អន្តរជាតិ - La Reine Media

អឺរ៉ុប កំពុងបារម្ភអំពីអំពើលួចឧសសម្រាប់ការដុតកម្ដៅនៅក្នុងរដូវរងាខាងមុខ

រដ្ឋបាលព្រៃឈើរដ្ឋ North Rhine-Westphalia របស់ ប្រទេសអាល្លឺម៉ង់ កំពុងសាកល្បងបំពាក់ឧបករណ៍ GPS នៅក្នុងកំណាត់ឈើដើម្បីទប់ស្កាត់បញ្ហាលួចឧសដែលកំពុងផ្ទុះការបារម្ភនៅមុនរដូវរងាឆ្នាំនេះ។

ជីស៊ីណូ (Chisinau) ដែលជារដ្ឋធានីរបស់ ម៉ុលដាវី (Moldavia ឬផ្លូវការហៅថា Moldova) លោក Tudor Popescu កំពុងរក្សាទុកគំនរឧសដ៏ធំមួយនៅក្នុងឃ្លាំងដើម្បីអាចកម្ដៅផ្ទះរបស់គាត់នៅក្នុងរដូវរងាខាងមុខ។

ក្នុងរដូវរងាមុនៗ លោក Popescu ធ្លាប់ប្រើប្រាស់ឧស្ម័នដើម្បីកម្ដៅផ្ទះនៅពេលព្រឹក និងដុតឧសនៅពេលយប់។ ក៏ប៉ុន្តែ ម៉ុលដូវ៉ា ដែលជាប្រទេសនៅ អឺរ៉ុបខាងកើត កំពុងប្រឈមមុខនឹងបញ្ហាខ្វះឧស្ម័នបន្ទាប់ពីក្រុមហ៊ុន Gazprom របស់ រុស្ស៊ី បានកាត់បន្ថយប្រភពផ្គត់ផ្គង់ប្រមាណ 1/3។

«ខ្ញុំនឹងមិនប្រើប្រាស់ឧស្ម័នទៀតឡើយ ពេលនេះពឹងផ្អែកទាំងស្រុងទៅលើឧស» លោក Popescu និយាយនៅពេលកំពុងចាត់ចែកឧសដែលបានពុះរួច។ «ប៉ុន្តែ ឧសដែលមានបច្ចុប្បន្នគឺមិនគ្រប់គ្រាន់»។

លោក Tudor Popescu កំពុងពុះឧស និងរក្សាទុកគំនរឧសដ៏ធំមួយនៅក្នុងឃ្លាំង

ក្រោយរយៈច្រើនខែដែលបាន «ដុតដៃដុតជើង» ក្នុងការរកទិញឧស្ម័នរាវ (LNG) នៅទូទាំងពិភពលោក បរិមាណឧស្ម័នរួមនៅ អឺរ៉ុប បានកើនដល់ 93.6% ក្នុងនោះ អាល្លឺម៉ង់ បំពេញឧស្ម័នក្នុងឃ្លាំងបាន 97.5%។ តម្លៃឧស្ម័នក៏ថយចុះច្រើន ដោយបច្ចុប្បន្នមិនស្មើនឹង 1/3 នៃតម្លៃខ្ពស់បំផុតនៅរដូវក្ដៅ ប៉ុន្តែ ក្រុមអ្នកវិភាគនិយាយថា ហានិភ័យនៅតែមាននៅខាងមុខ ព្រោះស្ថានភាពអាស្រ័យលើអាកាសធាតុ។ បើសិនរដូវរងាឆ្នាំនេះចុះត្រជាក់ខ្លាំងជាងឆ្នាំមុនៗ ហានិភ័យខ្វះឧស្ម័នប្រើប្រាស់នៅតែកើតមាន។

ដោយសារតែការបារម្ភដូចខាងលើនេះហើយ បាននាំឱ្យមនុស្សមួយចំនួននៅ អឺរ៉ុប ពិសេសគឺបណ្ដាប្រទេសក្រីក្រ ត្រូវងាកទៅរកវិធីកម្ដៅផ្សេងទៀតដូចជា ការប្រើប្រាស់ឧសជាដើម នៅពេលរដូវរងាជិតមកដល់។

តម្រូវការកើនឡើងខ្ពស់ ធ្វើឱ្យប្រភពផ្គត់ផ្គង់ឧសធ្លាក់ទៅក្នុងបញ្ហាកង្វះខាត ហើយតម្លៃក៏កើនឡើងខ្ពស់ បណ្ដាលឱ្យមានការបារម្ភអំពីអំពើលួចឧស និងការកាប់ឈើខុសច្បាប់ មិនថានៅប្រទេសអ្នកមាន ឬប្រទេសក្រីក្រ។

ព្រៃឈើនៅ អឺរ៉ុប កំពុងស្ថិតក្នុងការគំរាមកំហែងពីសកម្មភាពលួចកាប់សម្រាប់ដុតកម្ដៅក្នុងរដូវរងា

ក្រុមមន្ត្រីគ្រប់គ្រងព្រៃឈើនៅប្រទេសមួយចំនួននៅ អឺរ៉ុប ក្នុងនោះមាន អាល្លឺម៉ង់ ផងដែរ បានចាប់ផ្ដើមបង្កើនការប្រើប្រាស់បច្ចេកវិទ្យា ក្នុងនោះមានការបំពាក់ GPS លើកំណាត់ឈើជាដើម ដើម្បីតាមដានសកម្មភាពក្នុងតំបន់ព្រៃ ក្នុងបំណងការពារព្រៃឈើនៅចំពោះមុខការព្រួយបារម្ភអំពីផលប៉ះពាល់ដល់បរិស្ថាន និងការកាប់បំផ្លាញព្រៃឈើដែលមិនអាចគ្រប់គ្រងបាន៕

October 31, 2022

បាក់ស្ពានយោលនៅ ឥណ្ឌា! មនុស្សយ៉ាងតិច 120 នាក់បាត់បង់ជីវិត

ស្ពានយោលមួយនៅក្នុងរដ្ឋ Gugarat របស់ ឥណ្ឌា កាលពីម្សិលមិញបានបាក់ធ្លាក់ចូលទៅក្នុងទឹក នៅពេលមានមនុស្សរាប់រយនាក់កំពុងឆ្លងកាត់ បណ្ដាលឱ្យមានមនុស្សយ៉ាងតិច 120 នាក់ត្រូវបាត់បង់ជីវិត។

យោងតាមទូរទស្សន៍ក្នុងស្រុក Zee News ស្ពានយោលនៅក្នុងទីរួមស្រុក Morbi រដ្ឋ Gujarat បានបាក់កាលពីព្រលប់ថ្ងៃទី 30 តុលា នៅពេលមានមនុស្សប្រហែល 150 នាក់កំពុងឆ្លងកាត់ នេះបើតាម Harsh Sanghavi ដែលជាមមន្ត្រីរបស់រដ្ឋ Gujarat។ ជនរងគ្រោះជាច្រើនត្រូវធ្លាក់ចូលទៅក្នុងទឹកទន្លេ Machchu ដែលនៅខាងក្រោមស្ពាននេះ។

ចំណែកសារព័ត៌មាន The Telegraph បានឱ្យដឹងថា មានមនុស្សប្រហែល 400 នាក់កំពុងស្ថិតនៅលើស្ពាននៅពេលមានហេតុការណ៍នេះ។

Amit Jhala អ្នកគ្រប់គ្រងជាន់ខ្ពស់របស់មន្ទីរពេទ្យរដ្ឋមួយដែលព្យាបាលជនរងគ្រោះក្នុងករណីបាក់ស្ពាននេះបានឱ្យដឹងថា មនុស្សជាច្រើនត្រូវបានសង្គ្រោះ និងជាច្រើននាក់បានបាត់ខ្លួន»។ «យើងកំពុងប្រឹងប្រែងជួយសង្គ្រោះ» Rahul Tripathi មន្ត្រីនគរបាលនៅកន្លែងកើតហេតុនិយាយដូច្នេះ។

គ្រោះថ្នាក់បាក់ស្ពាននេះអាចបណ្ដាលមកពីមនុស្សច្រើនលើសចំណុះប្រមូលផ្ដុំគ្នានៅលើស្ពាន។ យោងតាមសាក្សីនៅកន្លែងកើតហេតុ នៅពេលស្ពានបាក់ មនុស្សម្នាដួលគរលើគ្នាគួរឱ្យរន្ធត់។

ស្ពានយោលប្រវែង 230 ម៉ែត្រត្រូវបានសាងសង់តាំងពីសតវត្សរ៍ទី 19 នៅពេល ឥណ្ឌា ស្ថិតក្រោមអាណានិគមអង់គ្លេស។ វាត្រូវបានបិទរយៈពេល 6 ខែដើម្បីជួសជុល និងទើបតែត្រូវបានដាក់ឱ្យប្រើប្រាស់ឡើងវិញកាលពីសប្ដាហ៍កន្លង។

នាយករដ្ឋមន្ត្រី Narendra Modi ដែលកំពុងស្ថិតនៅឯស្រុកកំណើត Gujarat បានឱ្យដឹងថា លោកបានណែនាំឱ្យអភិបាលរដ្ឋនេះ បញ្ជូនកម្លាំងសង្គ្រោះបន្ទាន់ដើម្បីជួយដល់ជនរងគ្រោះ៕

October 31, 2022

កន្លែងកើតហេតុនៃករណីប្រជៀតជាន់គ្នាស្លាប់ជាង 150 នាក់នៅ កូរ៉េខាងត្បូង

មនុស្សរាប់ពាន់នាក់ប្រជ្រៀតគ្នាឆ្លងកាត់ផ្លូវមួយនៅទីប្រជុំជន Itaewon ក្នុង រដ្ឋធានីសេអ៊ូល ដើម្បីចូលរួមពិធីបុណ្យ Halloween បណ្ដាលឱ្យកើតមានហេតុការណ៍ជាន់គ្នាស្លាប់យ៉ាងតិច 151 នាក់។

ហេតុការណ៍ប្រជ្រៀតជាន់គ្នាខាងលើកើតឡើងកាលពីយប់ថ្ងៃទី 29 តុលា នៅពេលមនុស្សម្នាប្រជ្រៀតគ្នាដើរឆ្លងកាត់ផ្លូវតូច និងជ្រាលមួយនៅក្បែរសណ្ឋាគារ Hamilton។ អាជ្ញាធរមិនទាន់ប្រកាសជាផ្លូវការអំពីមូលហេតុដែលនាំឱ្យមនុស្សម្នាប្រជ្រៀត រុញច្រានគ្នា និងជាន់គ្នានេះនៅឡើយ។

ពិធីបុណ្យ Halloween ខាងលើត្រូវបានគេគណនាឃើញថា មានមនុស្សប្រហែល 100,000 នាក់ចូលរួម ដែលនេះក្លាយជាព្រឹត្តិការណ៍ធំជាងគេបំផុតនៅ កូរ៉េខាងត្បូង ក្នុងរយៈពេលច្រើនឆ្នាំមកនេះ។

អង្គភាពប្រតិកម្មរហ័សរបស់ កូរ៉េខាងត្បូង បានទទួលការហៅទូរស័ព្ទ 81 លើកពីគ្រប់កន្លែងក្នុងតំបន់ Itaewon ដែលប្រាប់ថា ពួកគេពិបាកដកដង្ហើម។ នៅកន្លែងកើតហេតុ កម្លាំងសង្គ្រោះធ្វើចលនាបេះដូង និងសួតដើម្បីជួយដល់មនុស្សយ៉ាងតិច 50 នាក់ដែលកំពុងគាំងបេះដូង។

មន្ត្រីរបស់អង្គភាពពន្លត់អគ្គិភ័យកូរ៉េខាងត្បូង ឱ្យដឹងថា បុគ្គលិកជាង 400 នាក់ និងយានយន្តសង្គ្រោះបន្ទាន់ 140 គ្រឿង ត្រូវបានបញ្ជូនទៅកាន់កន្លែងកើតហេតុ។

ទីភ្នាក់ងារសារព័ត៌មាន Yonhap ចេញផ្សាយថា ជនរងគ្រោះភាគច្រើនគឺជាស្ត្រីដែលមានវ័យលើពីម្ភៃឆ្នាំ។

អាជ្ញាធរសេអ៊ូល កំពុងរៀបផែនការស្រាវជ្រាវរកមូលហេតុដែលនាំឱ្យកើតមានហេតុការណ៍ដ៏សោកសៅនេះ។

កូរ៉េខាងត្បូង ធ្លាប់កើតមានហេតុការណ៍រត់ជាន់គ្នាជាច្រើនលើមកហើយ ក្នុងនោះ ករណីកាលពីឆ្នាំ 2005 នៅទីក្រុង Sangju បានសម្លាប់មនុស្ស 11 នាក់ និង 60 នាក់រងរបួស។ 4 ឆ្នាំក្រោយមក ករណីរត់ជាន់គ្នាមួយនៅ Changyeong ក៏បានសម្លាប់មនុស្ស 4 នាក់ និងរបួសជាង 60 នាក់។

October 30, 2022

រត់ជាន់គ្នា «ស្រដៀងករណីកោះពេជ្រ» នៅ សេអ៊ូល ៖ មនុស្សរាប់សិបនាក់គាំងបេះដូង

មនុស្សយ៉ាងតិច 50 នាក់ត្រូវការជំនួយដង្ហើមបន្ទាន់ព្រោះតែគាំងបេះដូងនៅក្នុងករណីរត់ជាន់គ្នាក្នុងពិធីបុណ្យ Halloween នៅតំបន់ Itaewon នៃ រដ្ឋធានីរបស់ ប្រទេសកូរ៉េខាងត្បូង។

ក្រុមមន្ត្រីនៅ សេអ៊ូល បានឱ្យដឹងថា ហេតុការណ៍រត់ជាន់គ្នានេះត្រូវបានរាយការណ៍នៅម៉ោង 22 និង 15 នាទី (ប្រហែលម៉ោង 20 និង 15 នាទី នៅ កម្ពុជា) ទាក់ទិននឹងពិធីជប់លៀនបុណ្យ Halloween នៅតំបន់ Itaewon។

យោងតាមស្ថិតិបឋម មនុស្ស 100 នាក់បានរងគ្រោះក្នុងហេតុការណ៍នេះ ក្នុងនោះមានប្រហែល 50 នាក់ត្រូវការធ្វើចលនាបេះដូង និងសួតជាបន្ទាន់ និងត្រូវបានគេបញ្ជាក់ថា បេះដូងឈប់ដើរ។

សារព័ត៌មានកូរ៉េខាងត្បូង បានរាយការណ៍ថា ហេតុការណ៍ដែលបានកើតឡើងនៅក្បែរសណ្ឋាគារ Hamilton នេះ អាចបណ្ដាលមកពីមនុស្សច្រើននាំគ្នាសម្រុកចូលទៅកាន់បារមួយកន្លែង បន្ទាប់ពីដឹងថា មានបុគ្គលល្បីឈ្មោះម្នាក់បង្ហាញខ្លួននៅទីនោះ។

ប្រធានាធិបតី និង នាយករដ្ឋមន្ត្រីរបស់ កូរ៉េខាងត្បូង បានស្នើឱ្យសមត្ថកិច្ចជួយសង្គ្រោះអាយុជីវិតជនរងគ្រោះឱ្យបានលឿនបំផុត និងអស់ពីសមត្ថភាព។

ក្រុមមន្ត្រីសុខាភិបាល និងអង្គភាពដោះស្រាយហេតុការណ៍បន្ទាន់ក៏ត្រូវបានបញ្ជូនទៅកាន់កន្លែងកើតហេតុ ខណៈដែលមន្ទីរពេទ្យនៅក្បែរៗនោះក៏ត្រូវបានស្នើឱ្យត្រៀមកន្លែងសម្រាប់សង្គ្រោះបន្ទាន់ផងដែរ។

អាជ្ញាធរសេអ៊ូល កំពុងរៀបផែនការស្រាវជ្រាវរកមូលហេតុដែលនាំឱ្យកើតមានហេតុការណ៍ដ៏សោកសៅនេះ។

កូរ៉េខាងត្បូង ធ្លាប់កើតមានហេតុការណ៍រត់ជាន់គ្នាជាច្រើនលើមកហើយ ក្នុងនោះ ករណីកាលពីឆ្នាំ 2005 នៅទីក្រុង Sangju បានសម្លាប់មនុស្ស 11 នាក់ និង 60 នាក់រងរបួស។ 4 ឆ្នាំក្រោយមក ករណីរត់ជាន់គ្នាមួយនៅ Changyeong ក៏បានសម្លាប់មនុស្ស 4 នាក់ និងរបួសជាង 60 នាក់។

October 29, 2022

រកឃើញបណ្ដាញទន្លេលាក់ខ្លួននៅក្រោមផ្ទាំងទឹកកកនៅប៉ូលខាងត្បូង ប្រវែង 460 គីឡូម៉ែត្រ

ក្រុមអ្នកវិទ្យាសាស្ត្របានរកឃើញបណ្ដាញទន្លេដ៏ធំមួយស្ថិតនៅក្រោមស្រទាប់ទឹកកកក្រាស់នៅប៉ូលខាងត្បូង ដែលអាចពន្លឿនដំណើរការរលាយរបស់ទឹកកក និងអាចពន្លិចផែនដី។

លទ្ធផលនៃការស្រាវជ្រាវត្រូវបានធ្វើឡើងដោយកិច្ចសហការរវាង សាកលវិទ្យាល័យ Imperial College London, Waterloo នៅ កាណាដា, សាកលវិទ្យាល័យម៉ាឡេស៊ី Terengganu និង សាកលវិទ្យាល័យ Newcastle របស់ អង់គ្លេស នេះ ត្រូវបានចុះផ្សាយលើទស្សនាវដ្ដី Nature Geoscience កាលពីថ្ងៃទី 27 តុលា។ របកគំហើញនេះ នាំមកនូវការយល់ដឹងថ្មីអំពីប៉ូលខាងត្បូង ទន្ទឹមនឹងនេះក៏រម្លឹកឱ្យយើងស្វែងយល់បន្ថែមទៀតអំពី ទ្វីបអង់តាក់ទិក។

«នៅពេលរកឃើញបឹងក្រោមស្រទាប់ទឹកកកមួយចំនួននៅ ប៉ូលខាងត្បូង កាលពីប៉ុន្មានទសវត្សរ៍កន្លង យើងគិតថា ពួកវានៅដាច់ដោយឡែក។ ពេលនេះ យើងចាប់ផ្ដើមយល់ថា មានប្រព័ន្ធមួយនៅក្រោមនោះ ដែលតភ្ជាប់គ្នាដោយបណ្ដាញទន្លេធំៗ» សាស្ត្រាចារ្យ Martin Siegert មកពីសាកលវិទ្យាល័យ Imperial College London ឱ្យដឹងដូច្នេះ។

ការស្រាវជ្រាវបានអធិប្បាយថា ទន្លេទាំងឡាយដែលមានប្រវែង 460 គីឡូម៉ែត្រ ប្រមូលយកទឹកពីតំបន់មួយដែលមានទំហំប៉ុន ប្រទេសអាល្លឺម៉ង់ និង បារាំង បូកចូលគ្នា ដែលនេះគឺធំជាងអ្វីដែលអ្នកវិទ្យាសាស្ត្រធ្លាប់បានគិតទៅទៀត ហើយវាអាចនឹងបណ្ដាលឱ្យផ្ទាំងទឹកនៅប៉ូលខាងត្បូង ឆាប់រលាយ នៅចំពោះមុខបម្រែបម្រួលអាកាសធាតុ។

បណ្ដាញទន្លេលាក់ខ្លួនក្រោមផ្ទាំងទឹកកកនៅប៉ូលខាងត្បូង

«តំបន់ស្រាវជ្រាវមានបរិមាណទឹកកកគ្រប់គ្រាន់ដើម្បីធ្វើឱ្យទឹកសមុទ្ររបស់ពិភពលោកកើនឡើង 4.3 ម៉ែត្របន្ថែមទៀត» Seigert បកស្រាយដូច្នេះ។

ក្រុមអ្នកស្រាវជ្រាវកំពុងតែប្រមូលទិន្នន័យបន្ថែមពីការស្រាវជ្រាវនានាដែលទាក់ទងនឹងបណ្ដាញទន្លេថ្មីនៅក្រោមផ្ទៃទឹកកក។ ពួកគេសង្ឃឹមថា អាចកែតម្រូវអ្វីដែលពួកគេបានរកឃើញ ដើម្បីយល់កាន់តែច្បាស់អំពីរបៀបដែលប៉ូលខាងត្បូង អាចបង្កផលប៉ះពាល់ដល់ពិភពផែនដីនាពេលអនគាត នៅពេលទឹកកករលាក៕

October 28, 2022

ឥណ្ឌា ធ្វើសមយុទ្ធយោធាជាមួយ អាម៉េរិក នៅក្បែរ ព្រំដែនចិន

ឥណ្ឌា កំពុងតែរៀបផែនការសម្រាប់សមយុទ្ធយោធាទ្វីភាគី និងពហុភាគីជាច្រើននៅមុនដំណាច់ឆ្នាំ 2022 ដើម្បីកែលំអសមត្ថភាពផ្ទុំកម្លាំងយុទ្ធសាស្ត្រជាមួយបណ្ដាប្រទេសស្និទ្ធស្នាល។

សារព័ត៌មានក្នុងស្រុកបានឱ្យដឹងថា កងទ័ពឥណ្ឌា កំពុងត្រៀមខ្លួនសម្រាប់ការធ្វើសមយុទ្ធយោធាជាមួយក្រុមប្រទេសជាដៃគូ នៅក្នុងអំឡុង 2 ខែចុងឆ្នាំនេះ។ ទ័ពជើងទឹកឥណ្ឌា នឹងចូលរួមសមយុទ្ធ 4 ភាគី Malabar នៅសមុទ្រជប៉ុន។ ទ័ពជើងគោកឥណ្ឌា នឹងធ្វើសមយុទ្ធជាមួយកងទ័ពរបស់ អូស្ត្រាលី និង 3 ប្រទេសរបស់ អាស៊ាន រួមនឹងសមយុទ្ធមួយទៀតនៅលើភ្នំជាមួយនឹង សហរដ្ឋអាម៉េរិក។ អ្វីដែលគួរឱ្យចាប់អារម្មណ៍ជាងគេ នោះគឺថា សមយុទ្ធរបស់ ឥណ្ឌា ជាមួយនឹង អាម៉េរិក នឹងធ្វើឡើងនៅក្បែរបន្ទាត់គ្រប់គ្រងជាក់ស្ដែង (LAC) រវាង ឥណ្ឌា និង ចិន។

យោងតាមផែនការនេះ ចាប់ពីថ្ងៃទី 08 ដល់ 18 វិច្ឆិកា ទ័ពជើងទឹកឥណ្ឌា រួមនឹង ទ័ពជើងទឹកអាម៉េរិក អូស្ត្រាលី និង ជប៉ុន នឹងចូលរួមធ្វើសមយុទ្ធ Malabar នៅលើសមុទ្ររបស់ទីក្រុង Yokoshuka ប្រទេសជប៉ុន។ នេះគឺជាឆ្នាំទីបីហើយដែលទ័ពជើងទឹករបស់បណ្ដាប្រទេសក្នុងក្រុមសន្ទនាសន្តិសុខ 4 ភាគី (Quadrilateral Security Dialogue-QSD) ដែលត្រូវបានគេស្គាល់ជាទូទៅថា Quad ចូលរួមធ្វើសមយុទ្ធ Malabar។ ប្រទេសទាំងនេះសុទ្ធតែប្រកាសថា ប្ដេជ្ញាទប់ស្កាត់រាល់ការកៀបសង្កត់នៅតំបន់ ឥណ្ឌូ-ប៉ាស៊ីហ្វិក។

ទាហានឥណ្ឌា និង អាម៉េរិក ធ្វើសមយុទ្ធកាលពីខែ សីហា 2022

ទន្ទឹមនឹងនេះ ទ័ពជើងគោកឥណ្ឌា ក៏កំពុងត្រៀមសម្រាប់សមយុទ្ធធំមួយជាមួយនឹងសមភាគីអាម៉េរិក ចាប់ពីថ្ងៃទី 15 វិច្ឆិកាដល់ 02 ធ្នូ។ សមយុទ្ធដែលមានឈ្មោះថា Yudh Abhyas នេះនឹងធ្វើឡើងនៅ Auli ក្នុងរដ្ឋ Uttarakhand របស់ ឥណ្ឌា ដែលមានចម្ងាយពីបន្ទាត់ LAC ជាមួយ ប្រទេសចិន តែ 100 គីឡូម៉ែត្រប៉ុណ្ណោះ។

ចំណែកពីថ្ងៃទី 28 វិច្ឆិកាដល់ 11 ធ្នូ កងទ័ពឥណ្ឌា និង អូស្ត្រាលី ក៏នឹងធ្វើសមយុទ្ធជើងគោករួមដែលមានឈ្មោះថា Austra-Hind ជាលើកដំបូងនៅ Mahajan នៃរដ្ឋ Rajasthan ប្រទេសឥណ្ឌា។

ឥណ្ឌា ក៏កំពុងមានសកម្មភាពការពារជាតិទ្វេភាគីជាមួយបណ្ដាប្រទេសក្នុង អាស៊ាន ផងដែរ ក្នុងនោះរួមមាន សមយុទ្ធជើងទឹក SIMBEX ជាមួយ សិង្ហបុរី នៅឈូងសមុទ្រ Bengal ដែលបានចាប់ផ្ដើមតាំងពីថ្ងៃទី 26 តុលា និងសមយុទ្ធ Agni Warrior ជាមួយ សិង្ហបុរី ចាប់ពីថ្ងៃទី 13 វិច្ឆិកាដល់ 30 វិច្ឆិកា។ ក្នុងពាក់កណ្ដាលចុងខែវិច្ឆិកា និងដើមខែធ្នូ កងទ័ពឥណ្ឌា ក៏នឹងចូលរួមធ្វើសមយុទ្ធ Harimau Shakti រួមជាមួយនឹង ម៉ាឡេស៊ី និងសមយុទ្ធ Garud Shakti នៅ ឥណ្ឌូណេស៊ី ផងដែរ។

រថពាសដែករបស់កងទ័ពឥណ្ឌា និង សិង្ហបុរី កាលពីឆ្នាំ 2019

ឥណ្ឌា អះអាងថា សមយុទ្ធទាំងនេះគឺដើម្បីកសាងទំនាក់ទំនងសហប្រតិបត្តិការយុទ្ធសាស្ត្រ និងសមត្ថភាពសហការការពារជាតិជាមួយបណ្ដាប្រទេសដែលមានគោលដៅរួម៕

October 28, 2022

ដោយបារម្ភអំពីការសាកល្បងអាវុធប្រល័យលោករបស់ កូរ៉េខាងជើង សាស្ត្រាចារ្យកូរ៉េខាងត្បូង សង់បន្ទប់លាក់ខ្លួនក្រោមដី

បារម្ភអំបើសិនជា កូរ៉េខាងត្បូង រងការវាយប្រហារពីអាវុធនុយក្លេអែរ Lee Tae-goo នឹងចុះទៅក្នុងបន្ទប់លាក់ខ្លួនក្រោមដី និងនៅទីនេះពីរសប្ដាហ៍ដើម្បីចៀសវាងពីវិទ្យុសកម្ម។

ដោយមានជញ្ជាំងក្រាស់សង់អំពីបេតុង ច្រកចេញចូលធ្វើអំពីដែកថែប និងប្រព័ន្ធបន្សុទ្ធខ្យល់ សាស្ត្រាចារ្យផ្នែកស្ថាបត្យកម្មកូរ៉េខាងត្បូង Lee Tae-goo ជឿជាក់ថា បន្ទប់ក្រោមដីនេះអាចជួយឱ្យលោករស់រានមានជីវិតក្នុងគ្រោះមហន្តរាយនុយក្លេអែរ និងអាចទប់ទល់នឹងមីស៊ីលធម្មតាបាន។

បន្ទប់ក្រោមដីនេះស្ថិតនៅក្នុងបរិមាណក្បែរផ្ទះរបស់លោក Lee នៅក្នុងទីក្រុង Jecheon ចម្ងាយពី រដ្ឋធានីសេអ៊ូល ប្រហែល 120 គីឡូម៉ែត្រទៅទិសអាគ្នេយ៍។ លោក Lee បានចំណាយប្រាក់អស់ប្រហែល 70 លានវ៉ុន (48,000 ដុល្លារអាម៉េរិក) ក្នុងការសាងសង់បន្ទប់ក្រោមដី ហើយនេះមិនទាន់គិតដល់ថ្លៃកម្មករនៅឡើយ។

ខ្ទង់ប្រាក់ខាងលើត្រូវបានចំណាយដោយកម្មវិធីស្រាវជ្រាវមួយរបស់ ក្រសួងអប់រំកូរ៉េខាងត្បូង បន្ទាប់ពីលោក Lee បានដាក់សំណើ និងបានទទួលការយល់ព្រម។ នេះគឺជាផ្នែកមួយនៅក្នុងយុទ្ធនាការរបស់សាស្ត្រាចារ្យ Lee ក្នុងបំណងអំពាវនាវដល់ ប្រជាជនកូរ៉េខាងត្បូង យកចិត្តទុកដាក់ជាងមុននៅក្នុងការត្រៀមខ្លួនដើម្បីទប់ទល់នឹងមហន្តរាយនុយក្លេអែរ។

«កូរ៉េខាងជើង មានចម្ងាយពីទីនេះត្រឹមតែ 100 គីឡូម៉ែត្រ ហើយពួកគេអាចបាញ់មីស៊ីលបំពាក់នុយក្លេអែរ ឬជីវសាស្ត្រ» សាស្ត្រាចារ្យ Lee មកពីសាកលវិទ្យាល័យ Semyung និយាយដូច្នេះ។ លោក Lee ក៏មានការបារម្ភអំពីលទ្ធភាពដែលរោងចក្រប្រតិកម្មនុយក្លេអែររបស់ កូរ៉េខាងត្បូង ជួបបញ្ហាដូចទៅនឹងមហន្តរាយនៅ Fukushima របស់ ជប៉ុន។

កូរ៉េខាងត្បូង និង កូរ៉េខាងជើង ជាមូលដ្ឋានគឺនៅតែស្ថិតក្នុងស្ថានការណ៍សង្គ្រាម ព្រោះថា ជម្លោះប្រដាប់អាវុធចន្លោះពីឆ្នាំ 1950 ដល់ 1953 ត្រូវបានបញ្ចប់ដោយកិច្ចព្រមព្រៀងផ្អាកការប្រយុទ្ធតែប៉ុណ្ណោះ មិនមែនជាសន្ធិសញ្ញាសន្តិភាពឡើយ។ ភាគីទាំងពីរតែងតែចោទប្រកាន់គ្នាថា «មានសកម្មភាពបង្កហេតុ» ធ្វើឱ្យភាពតានតឹងមានហានិភ័យក្លាយជាជម្លោះប្រដាប់អាវុធ។

កូរ៉េខាងជើង បានសាកល្បងអាវុធនុយក្លេអែរ 6 លើកមកហើយ ក្នុងនោះ លើកដំបូងគឺនៅឆ្នាំ 2006 និងបានបាញ់សាកល្បងមីស៊ីលជាច្រើនលើក។ ថ្មីៗនេះ ទីក្រុងព្យុងយ៉ាង ក៏បានឱ្យដឹងថា ពួកគេបានធ្វើសមយុទ្ធ «វាយប្រហារដោយអាវុធនុយក្លេអែរយុទ្ធសាស្ត្រ» ក្រោមការតាមដានរបស់មេដឹកនាំ គីម ជុងអុន។

យោងតាមលោក Lee អ្នកដែលបានសាងសង់បន្ទប់លាក់ខ្លួនក្រោមដីដូចលោក ភាគច្រើនមិនចង់ឱ្យគេដឹង ព្រោះខ្លាចថា នឹងមានញាតិមិត្ត អ្នកជិតខាងមកសុំជ្រក។

«កាលពីពេលខ្ញុំកំពុងសង់បន្ទប់ក្រោមដីនេះ អ្នកណាៗក៏និយាយថា ពួកគេនឹងមកលាក់ខ្លួននៅទីនេះ បើសិន កូរ៉េខាងត្បូង ត្រូវរងការវាយប្រហារ។ បន្ទប់ក្រោមដីនេះដាក់មនុស្សបានតែ 12 នាក់ប៉ុណ្ណោះ៕

សាស្ត្រាចារ្យផ្នែកស្ថាបត្យកម្មកូរ៉េខាងត្បូង Lee Tae-goo នៅក្នុងបន្ទប់ក្រោមដីរបស់គាត់

October 28, 2022

យន្តហោះដឹកមនុស្សជាង 170 នាក់ ឆាបឆេះម៉ាស៊ីនពេលស្ថិតលើកម្ពស់ជាង 900 ម៉ែត្រ

(ឥណ្ឌូណេស៊ី)-យន្តហោះដឹកមនុស្សចំនួន 175 នាក់ របស់ក្រុមហ៊ុនអាកាសចរណ៍ Lion Air ត្រូវវិលត្រលប់មកចុះចតនៅ ហ្សាការតា វិញ ក្រោយពីបានហោះឡើង ដោយសារតែម៉ាស៊ីនមួយគ្រឿងរបស់វាឆាបឆេះ។

ជើងហោះហើរ JT330 របស់ក្រុមហ៊ុនអាកាសចរណ៍ Lion Air ដឹកអ្នកដំណើរ 169 នាក់ និងបុគ្គលិក 6 នាក់ បានហោះឡើងពី រដ្ឋធានីហ្សាការតា ប្រទេសឥណ្ឌូនេស៊ី នៅម៉ោង 17 និង 13 នាទី ថ្ងៃទី 16 តុលា។ អ្នកបើកបររបស់យន្តហោះ Boeing 737-800 បានដឹងថា ម៉ាស៊ីនមួយគ្រឿងរបស់យន្តហោះនេះ «ដំណើរការមិនប្រក្រតី» នៅពេលហោះឡើងដល់កម្ពស់ជាង 900 ម៉ែត្រ នេះបើតាមក្រុមហ៊ុន Lion Air របស់ ឥណ្ឌូណេស៊ី។

ប្រហែលកន្លះម៉ោងក្រោយមក យន្តហោះនេះក៏បានចុះចតដោយសុវត្ថិភាព និងមិនមានអ្នករងរបួស។ ក្រុមហ៊ុន Lion Air មិនទាន់ប្រកាសឱ្យដឹងអំពីមូលហេតុនៃហេតុការណ៍ឆេះម៉ាស៊ីននេះនៅឡើយ ខណៈដែលក្រុមវិស្វករកំពុងត្រួតពិនិត្យយន្តហោះ។ ចំណែកក្រុមហ៊ុន Boeing វិញ បានបដិសេធការស្នើសុំការបកស្រាយអំពីបញ្ហានេះ។

យន្តហោះ Boeing 737-800 របស់ក្រុមហ៊ុនអាកាសចរណ៍ឥណ្ឌូណេស៊ី Lion Air

ក្រុមហ៊ុន Lion Air ធ្លាប់ជួបគ្រោះថ្នាក់អាកាសចរណ៍ម្ដងរួចហើយចំពោះយន្តហោះប្រភេទ 737 Max របស់ Boeing កាលពីឆ្នាំ 2018។ យន្តហោះ Boeing 737 Max កាលណោះបានធ្លាក់ទៅក្នុងសមុទ្រក្រោយពីហោះឡើងបាន 13 នាទី ពីព្រលានយន្តហោះនៅ ហ្សាការតា។ អ្នកដំណើរ រួមនឹងបុគ្គលិកទាំងអស់នៅលើយន្តហោះនេះ បានបាត់បង់ជីវិត៕

October 27, 2022

ណាតូ ប្រកាសថា មិនអនុញ្ញាតឱ្យលោក ពូទីន ឈ្នះសង្គ្រាមនៅ អ៊ុយក្រែន

អគ្គលេខាធិការនៃអង្គការណាតូ Stoltenberg ប្រកាសថា មិនអនុញ្ញាតឱ្យលោក ពូទីន ឈ្នះសង្គ្រាមនៅ អ៊ុយក្រែន ហើយថា នឹងជួយដល់កងកម្លាំងរបស់ ទីក្រុងកៀវ រហូតដល់អស់ការចាំបាច់។

«ជាមូលដ្ឋាន មិនអាចសន្និដ្ឋានបានចំពោះសង្គ្រាមនេះ។ ខ្ញុំមិនមានការសន្និដ្ឋានថា សង្គ្រាមនឹងអូសបន្លាយដល់ពេលណា គ្រាន់តែចង់អះអាងថា យើងខ្ញុំនឹងជួយដល់ អ៊ុយក្រែន រហូតដល់អស់ការចាំបាច់។ យើងមិនអាចបណ្ដោយឱ្យលោក វ្ល៉ាឌីមៀ ពូទីន ឈ្នះសង្គ្រាមនេះ» អគ្គលេខាធិការនៃអង្គការណាតូ Stoltenberg

ឆ្លើយក្នុងកិច្ចសម្ភាសនៅឯកិច្ចប្រជុំជាមួយ នាយករដ្ឋមន្ត្រីរូម៉ានី Nicolae Ciuca នៅទីស្នាក់ការកណ្ដាលរបស់ ណាតូ នៅ ព្រុចសែល ប្រទេសបែហ្សិក កាលពីថ្ងៃទី 26 តុលា។

លោក Stoltenberg យល់ថា ការឈ្នះសង្គ្រាមរបស់ រុស្ស៊ី «នឹងជាគ្រោះមហន្តរាយ សោកនាដកម្មសម្រាប់ ជនជាតិអ៊ុយក្រែន ហើយក៏ធ្វើឱ្យសម្ព័ន្ធមិត្តណាតូ ងាយរងគ្រោះជាងមុន»។

សង្គ្រាមនៅ អ៊ុយក្រែន មិនមែនបានចាប់ផ្ដើមពីខែកុម្ភៈ 2022 ឡើយ ប៉ុន្តែ កើតឡើងតាំងពីឆ្នាំ 2014 ពេលដែលលោក ពូទីន បានរឹបអូប ឧបទ្វីបគ្រីមៀ ហើយ រុស្ស៊ី ចាប់ផ្ដើមគ្រប់គ្រងតំបន់ Donbass នៅភាគខាងកើតនៃ ទឹកដីអ៊ុយក្រែន។ «អ្វីដែលបានកើតឡើងកាលពីខែកុម្ភៈ គឺជាភាពតានតឹងដែលបានកើនឡើងពេញលេញ ជាសង្គ្រាមទូទៅ» អគ្គលេខាធិការនៃអង្គការណាតូ Stoltenberg និយាយដូច្នេះ។

លោក Stoltenberg អះអាងថា កងទ័ពរុស្ស៊ី កំពុងបរាជ័យនៅ អ៊ុយក្រែន ក្នុងគ្រាដែលកងទ័ពរបស់ ទីក្រុងកៀវ កំពុងមានថាមពលខ្លាំងឡើង។

យោងតាមលោក Stoltenberg សង្គ្រាមស្ទើរតែទាំងអស់ សុទ្ធតែត្រូវបានបញ្ចប់នៅឯតុចរចា ហើយអ្វីដែល អ៊ុយក្រែន អាចសម្រេចបាននៅលើតុចរចា គឺអាស្រ័យទាំងស្រុងលើកម្លាំងនៅឯសមរភូមិ។ ដូច្នេះ ណាតូ គួរតែបង្កើនកម្លាំងរបស់ពួកគេនៅលើតុចរចា តាមរយៈការផ្ដល់ជំនួយយោធាដល់ អ៊ុយក្រែន។

ភាគីខាងរុស្ស៊ី មិនទាន់មានការអធិប្បាយអ្វីនៅឡើយ ទាក់ទងនឹងការលើកឡើងរបស់ អគ្គលេខាធិការនៃអង្គការណាតូ ខាងលើ៕

October 27, 2022

កាណាដា ច្រានចោលសំណើ «ផ្ដាច់ទំនាក់ទំនង» ជាមួយរបបរាជានិយមអង់គ្លេស

សភាជាន់ទាបកាណាដា បានច្រានចោលសំណើរបស់ បក្ស Bloc Quebecois ក្រោយពីបក្សនេះនិយាយថា ដល់ពេលដែលត្រូវកាត់ផ្ដាច់ទំនាក់ទំនងជាមួយនឹងរបបរាជានិយមអង់គ្លេស។

សំណើផ្ដាច់ទំនាក់ទំនងជាមួយនឹងរបបរាជានិយមអង់គ្លេស ដែលលើកឡើងដោយបក្ស Bloc Quebecois ត្រូវបានច្រានចោលនៅក្នុងការបោះឆ្នោតសភាជាន់ទាបកាណាដា កាលពីថ្ងៃទី 26 តុលា ដោយទទួលបានការគាំទ្រចំនួន 44 សំឡេង និងប្រឆាំងចំនួន 266 សំឡេង។

ការបោះឆ្នោតខាងលើត្រូវបានធ្វើឡើងបន្ទាប់ពី Yves-Francois Blanchet មេដឹកនាំបក្ស Bloc Quebecois កាលពីថ្ងៃទី 25 តុលា យល់ថា ស្វាមីភក្ដិជាមួយនឹងរបបរាជានិយមនៅបរទេស មិនត្រឹមតែហួសសម័យនោះទេ ប៉ុន្តែថែមទាំងត្រូវចំណាយច្រើនទៀតផង។ លោក Yves-Francois Blanchet និយាយថា ការប្រគល់អំណាចថ្វាយមហាក្សត្រ Charles ទីបី នៅលើកនេះគឺជាឱកាសដើម្បីឱ្យ កាណាដា អាចផ្ដាច់ទំនាក់ទំនងជាមួយរាជានិយមអង់គ្លេស។

យោងតាមលោក Yves-Francois Blanchet សមាជិកបក្ស Bloc Quebecois ត្រូវបាន «បង្ខំឱ្យស្បថថាស្មោះត្រង់នឹងរបបរាជានិយមអង់គ្លេស» ហើយមានអារម្មណ៍ថា សម្បថរបស់ពួកគេគឺជារឿង «គ្មានន័យ»។ លោកសង្កត់ធ្ងន់ថា ក្រុមតំណាងរាស្ត្រ Bloc Quebecois ស្បថដោយមានភក្ដីភាពចំពោះតែ ប្រជាជន Quebec តែប៉ុណ្ណោះ។

តំណាងរាស្ត្រច្រើនរូបរបស់ កាណាដា ចោទប្រកាន់ថា លោក Blanchet លើកឡើងនូវបញ្ហាដែលមិនទាន់ទង ហើយកំពុងរកវិធីទាក់ទាញចំណាប់អារម្មណ៍។ ពួកគេយល់ថា ប្រជាជនកាណាដា កំពុងបារម្ភអំពីបញ្ហាដទៃ មានដូចជា សេដ្ឋកិច្ច អាកាសធាតុ និងការថែទាំសុខភាព។

នៅ កាណាដា ការផ្ដាច់ទំនាក់ទំនងជាមួយរបបរាជានិយមអង់គ្លេស ទាមទារឱ្យមានការធ្វើវិសោធនកម្មច្បាប់រដ្ឋធម្មនុញ្ញ ដោយមានការគាំទ្រទាំងស្រុងពីសភាខេត្តទាំង 10 រួមនឹងសមាជិកសភាជាតិ។

ក្រោយពី មហាក្សត្រីអង់គ្លេស Elizabeth ទីពីរ បានចូលទិវង្គតកាលពីថ្ងៃទី 08 កញ្ញា មហាក្សត្រ Charles ទីបី ដែលជាអ្នកស្នងរាជសម្បត្តិ និងឡើងគ្រងរាជកាលពីថ្ងៃទី 10 កញ្ញា បានក្លាយជាមេដឹកនាំរបស់ ប្រទេសអង់គ្លេស កាណាដា អូស្ត្រាលី នូវែលសេឡង់ និងបណ្ដាប្រទេសផ្សេងទៀតនៅក្នុង សមាគមប្រទេសជាតិខំមិនវែល (commonwealth of nations)។

ក្រៅពី កាណាដា ក៏មានប្រទេសមួយចំនួនទៀត ដូចជា អូស្ត្រាលី និង នូវែសេឡង់ ជាដើម ធ្លាប់និយាយដល់លទ្ធភាពក្លាយជាសាធារណរដ្ឋ ប៉ុន្តែមិនបានចាត់ទុកថា នេះគឺជាគោលដៅបន្ទាន់៕

បណ្ដាប្រទេសដែលចាត់ទុកស្ដេចអង់គ្លេស ជាមេដឹកនាំ

បណ្ដាប្រទេសនៅក្នុង សមាគមប្រទេសជាតិខំមិនវែល (commonwealth of nations)។

October 27, 2022

Category: អន្តរជាតិ