អន្តរជាតិ - La Reine Media

ទាហានរុស្ស៊ី ប្រហែល ១៥,០០០ នាក់ បានស្លាប់នៅក្នុង ប្រទេសអ៊ុយក្រែន

ប្រធាន CIA បាននិយាយថា ទីក្រុងមូស្គូ បានបាត់បង់ទាហានប្រមាណ ១៥,០០០ នាក់ នៅក្នុងយុទ្ធនាការយោធានៅ អ៊ុយក្រែន និងបន្ថែមថា ទីក្រុងកៀវ ក៏មានទាហានស្លាប់ប្រហាក់ប្រហែលនេះដែរ។

«ការគណនាថ្មីបំផុតរបស់សហគមន៍ស៊ើបការណ៍សម្ងាត់អាម៉េរិក គឺថា ទាហានរុស្ស៊ី ប្រហែល ១៥,០០០ នាក់ បានស្លាប់ ក្នុងគ្រាដែលចំនួនទាហានត្រូវរងរបួស អាចខ្ពស់ជាងនេះ ៣ ដង។ ភាគីខាង អ៊ុយក្រែន ក៏ទទួលរងការខាតបង់ធ្ងន់ធ្ងរ តួលេខអាចទាបជាងបន្តិច ប៉ុន្តែ នៅតែជាចំនួនដ៏ច្រើន» ប្រធានទីភ្នាក់ងារស៊ើបការណ៍សម្ងាត់អាម៉េរិក (CIA) William Burns ថ្លែងកាលពីថ្ងៃទី ២០ កក្កដា។

លោក William Burns និយាយថា «កងទ័ពរុស្ស៊ី កំពុងអនុវត្តវិធីសាស្ត្រប្រយុទ្ធដែលស័ក្ដិសមនឹងពួកគេ នោះគឺការប្រើប្រាស់ចំណុចខ្លាំងរបស់កងកាំភ្លើងធំដើម្បីកម្ទេចគោលដៅនៅ អ៊ុយក្រែន ប៉ះប៉ូវសម្រាប់បញ្ហាខ្វះកម្លាំងមនុស្សដែលពួកគេកំពុងប្រឈម»។

ក្រសួងការពារជាតិរុស្ស៊ី និង កងទ័ពអ៊ុយក្រែន មិនទាន់មានការអធិប្បាយអ្វីដើម្បីឆ្លើយតបនឹងព័ត៌មានខាងលើនៅឡើយ។

ការអះអាងរបស់លោក William Burns ត្រូវបានលើកឡើងក្នុងគ្រាដែលសង្គ្រាមនៅ អ៊ុយក្រែន បានកើតឡើង ជិត ៥ ខែពេញ ហើយបច្ចុប្បន្ន កម្លាំងរបស់ រុស្ស៊ី កំពុងគ្រប់គ្រងទឹកដីប្រមាណ ២០% របស់ អ៊ុយក្រែន៕

July 21, 2022

យន្តហោះចម្បាំងផលិតដោយ កូរ៉េខាងត្បូង ហោះហើរលាកល្បងជាលើកដំបូង

យន្តហោះចម្បាំងល្បឿនលឿនជាងសំឡេង KF-21 ដែលផលិតដោយ កូរ៉េខាងត្បូង បានធ្វើការហោះហើរសាកល្បងលើកដំបូង ក្រោយពីបានចំណាយពេលអស់ជាង ៦ ឆ្នាំកន្លះ ក្នុងការស្រាវជ្រាវ និងអភិវឌ្ឍ។

ការហោះហើរសាកល្បងដំបូងត្រូវបានធ្វើឡើងកាលពីថ្ងៃទី ១៩ កក្កដា នៅឯសាលាហ្វឹកហ្វឺនហោះហើរលេខ ៣ របស់ ទ័ពអាកាសកូរ៉េខាងត្បូង ស្ថិតនៅទីក្រុង Sacheon ចម្ងាយពីទី រដ្ឋធានីសេអ៊ូល ប្រហែល ៣០០ គីឡូម៉ែត្រ ទៅទិសខាងត្បូង នេះបើតាម អាជ្ញាធរគ្រប់គ្រងកម្មវិធីទិញដូរសព្វាវុធការពារជាតិកូរ៉េខាងត្បូង (DAPA)។

យន្តហោះចម្បាំង KF-21 Boramae ហោះឡើងនៅវេលាម៉ោង ១៥ និង ៤០ នាទី និងចុះចតនៅវេលាម៉ោង ១៦ និង ១៤ នាទី ថ្ងៃទី ១៩ កក្កដា។ DAPA បានឱ្យដឹងថា «នេះគឺជាទិដ្ឋភាពបង្ហាញពីសមត្ថភាពអភិវឌ្ឍយន្តហោះចម្បាំងជំនាន់ ៤.៥ របស់ កូរ៉េខាងត្បូង ដែលបានក្លាយជាការពិត»។

DAPA ហៅ KF-21 ថាជាយន្តហោះចម្បាំងជំនាន់ ៤.៥ ក៏ព្រោះតែវាមិនមានមុខងារដែលជួយបង្កើនសមត្ថភាពបំបាំងកាយ ដូចជាកន្លែងដាក់អាវុធដែលលាក់ក្នុងខ្លួនជាដើម។ ក៏ប៉ុន្តែ ក្រុមអ្នកវិភាគនិយាយថា យន្តហោះនេះអាចហោះបានលឿនជាង និងខ្ពស់ជាង បើធៀបនឹងយន្តហោះចម្បាំង F-35 ជំនាន់ទី ៥ របស់ សហរដ្ឋអាម៉េរិក។

លទ្ធផលនៃការសាកល្បងហោះហើរនេះបានជួយឱ្យ កូរ៉េខាងត្បូង ក្លាយជាប្រទេសមួយក្នុងចំណោមប្រទេសដ៏តិចតួចដែលបានអភិវឌ្ឍដោយជោគជ័យនូវយន្តហោះចម្បាំងល្បឿនលឿនជាងសំឡេងដ៏ទំនើប។

KF-21 ត្រូវបានអភិវឌ្ឍនៅក្នុងគម្រោងដែលមានតម្លៃ ៨,៨០០ ពាន់លានវ៉ុន (៦.៦៧ ពាន់លានដុល្លារអាម៉េរិក) ដើម្បីជំនួសយន្តហោះចម្បាំង F-4 និង F-5 ក្នុងបំណងលើកកម្ពស់សមត្ថភាពការពារជាតិ និងកំញើញការគំរាមកំហែងពីអាវុធប្រល័យលោករបស់ កូរ៉េខាងជើង។

កូរ៉េខាងត្បូង បានផ្ដួចផ្ដើមគំនិតអភិវឌ្ឍយន្តហោះចម្បាំងដោយខ្លួនឯងចាប់ពីខែវិច្ឆិកា ២០០០ និងបានចុះកិច្ចព្រមព្រៀងអភិវឌ្ឍជាមួយ Korea Aerospace Industries ដែលជាក្រុមហ៊ុនផលិតយន្តហោះតែមួយគត់នៅ កូរ៉េខាងត្បូង កាលពីខែធ្នូ ២០១៥។

ដំណាក់កាលដំបូងដែលគ្រោងនឹងចំណាយអស់ ៨,១០០ ពាន់លានវ៉ុន ក្នុងនោះមានទុន ២០% បានមកពី ឥណ្ឌូណេស៊ី នឹងផ្ដោតលើការអភិវឌ្ឍយន្តហោះនេះទាំងមូល ហើយគ្រោងនឹងអូសបន្លាយពេលដល់ឆ្នាំ ២០២៦។ ដំណាក់កាលទីពីរគ្រោងនឹងចំណាយអស់ ៧០០ ពាន់លានវ៉ុន ដែលអូសបន្លាយដល់ឆ្នាំ ២០២៨ ដោយផ្ដោតលើការសាកល្បងអាវុធ។

យន្តហោះ KF-21 កំណែគំរូចំនួន ៥ គ្រឿងត្រូវបានផលិតរួចហើយ ខណៈដែលគ្រឿងទី ៦ គ្រោងនឹងបង្ហើយក្នុងខែកក្កដានេះ។

តាមផែនការ ទ័ពអាកាសកូរ៉េខាងត្បូង នឹងទទួលបាន KF-21 ចំនួន ១២០ គ្រឿងនៅឆ្នាំ ២០៣០។ យន្តហោះនេះត្រូវបានគេសង្ឃឹមថា អាចបំពាក់មីស៊ីលប្រឆាំងអាកាស និងប្រឆាំងដី ឬមីស៊ីលរយៈចម្ងាយឆ្ងាយផងដែរ។ KF-21 នឹងមាន ២ កំណែ រួមមាន កំណែ ២ កៅអី និងកំណែ ១ កៅអី៕

July 20, 2022

កងទ័ពអ៊ុយក្រែន ប្រកាសថាបាន បាញ់ទម្លាក់យន្តហោះចម្បាំង Su-35S របស់ កងទ័ពរុស្ស៊ី

កងទ័ពអ៊ុយក្រែន បានប្រកាសថា ពួកគេបានបាញ់ទម្លាក់យន្តហោះ Su-35S របស់ កងទ័ពរុស្ស៊ី នៅក្នុងខេត្ត Kherson ភាគខាងត្បូងប្រទេស។

«អង្គភាពមីស៊ីលការពារដែនអាកាសនៃ ទ័ពអាកាសអ៊ុយក្រែន បានបាញ់ទម្លាក់យន្តហោះចម្បាំងរុស្ស៊ី មួយគ្រឿង ដែលត្រូវបានដឹងថាជាកំណែ Su-35S នៅតំបន់ Nova Kakhovka ក្នុងខេត្ត Kherson កាលពីព្រឹកថ្ងៃទី ១៩ កក្កដា នៅពេលវាកំពុងរកវិធីវាយប្រហារលើយន្តហោះចម្បាំងរបស់ អ៊ុយក្រែន។ រូបភាពពីកន្លែងកើតហេតុបានបញ្ជាក់ថា យន្តហោះត្រូវបានបាញ់ទម្លាក់ ហើយអ្នកបើកបរបានលោតចេញដោយប្រើឆត្រយោង» បញ្ជាការដ្ឋានទ័ពអាកាសអ៊ុយក្រែន ប្រកាសដូច្នេះ។

វីដេអូដែលត្រូវបានចែករំលែកលើបណ្ដាញសង្គមបង្ហាញថា យន្តហោះត្រូវឆាបឆេះ ធ្លាក់ចុះដី និងផ្ទុះខ្ទេច ប៉ុន្តែមិនដឹងថាវាជាយន្តហោះប្រភេទណា និងគ្រប់គ្រងដោយអង្គភាពណា។ ឆត្រយោងមួយដែលត្រូវបានជឿថាជារបស់អ្នកបើកបរ បានទម្លាក់ខ្លួនចុះពីទីខ្ពស់នៅក្បែរនោះ មុនពេលឧទ្ធម្ភាគចក្រ Mi-24/35 ហោះក្រឡឹងកន្លែងកើតហេតុ។

ក្រសួងការពារជាតិរុស្ស៊ី មិនទាន់មានការអធិប្បាយអ្វីនៅឡើយ ទាក់ទិននឹងការប្រកាសរបស់ ទ័ពអាកាសអ៊ុយក្រែន។

Su-35S គឺជាយន្តហោះចម្បាំងជំនាន់ទី ៤++ របស់ រុស្ស៊ី ដែលមានសមត្ថភាពប្រតិកម្មរហ័សកម្រិតខ្ពស់ និងបំពាក់ឧបករណ៍ទំនើប។ ទ័ពអាកាសរុស្ស៊ី បានប្រើប្រាស់យន្តហោះនេះចាប់ពីឆ្នាំ ២០១៣ ហើយបច្ចុប្បន្ន មាន ១០៣ គ្រឿងកំពុងត្រូវបានប្រើប្រាស់ និងកំពុងបញ្ជាទិញ ២៩ គ្រឿងបន្ថែមទៀត។ Su-35S គឺជាយន្តហោះចម្បាំងសំខាន់លំដាប់លេខ ១ របស់ កងទ័ពរុស្ស៊ី នាបច្ចុប្បន្ន៕

https://twitter.com/IAPonomarenko/status/1549461295870742529?s=20&t=4PovUTSjsAmQ4Ud6f-S0Yw

July 20, 2022

ឥណ្ឌា ឃាត់កប៉ាល់របស់ រុស្ស៊ី ដែលកំពុងដឹកឧបករណ៍យោធា

ស្ថានទូតរុស្ស៊ី បានឱ្យដឹងថា កប៉ាល់ដឹកអាវុធមួយគ្រឿងរបស់ប្រទេសនេះ ត្រូវបានឃាត់នៅកំពង់ផែ Cochin ប្រទេសឥណ្ឌា។

«ស្ថានទូតរុស្ស៊ីប្រចាំឥណ្ឌា បានដឹងអំពីករណីឃាត់កប៉ាល់ដឹកទំនិញរបស់ រុស្ស៊ី នៅកំពង់ផែ Cochin របស់ ឥណ្ឌា។ លើកប៉ាល់នេះមានឧបករណ៍យោធាមួយឈុតដែលប្រគល់ឱ្យកងកម្លាំងប្រដាប់អាវុធឥណ្ឌា» សារព័ត៌មានឥណ្ឌា ANI ដកស្រង់សម្ដីរបស់ មន្ត្រីស្ថានទូតរុស្ស៊ី ឱ្យដឹងកាលពីថ្ងៃទី ១៩ កក្កដា។

ភាគីខាងរុស្ស៊ី បន្តថា បានបញ្ជូនសំណើទៅកាន់ ក្រសួងការបទេសឥណ្ឌា ដើម្បីឱ្យបកស្រាយអំពីហេតុការណ៍ដែលបានកើតឡើង ក៏ដូចជាស្នើឱ្យស្ថាប័ននេះ «គោរពដោយគ្មានលក្ខខណ្ឌចំពោះសិទ្ធិរបស់ម្ចាស់កប៉ាល់ រួមនឹងក្រុមនាវិករុស្ស៊ី»។

ទាក់ទិននឹងបញ្ហាខាងលើ ភាគីខាងឥណ្ឌា មិនទាន់មានប្រតិកម្មអ្វីនៅឡើយ។

កាលពីដើមខែនេះ កប៉ាល់ដឹកទំនិញ Zhibek Zholy ដែលដោតទង់ជាតិរុស្ស៊ី ក៏ត្រូវបានឃាត់នៅឯកំពង់ផែ Karasu ប្រទេសតួកគី បន្ទាប់ពីមានការសង្ស័យថា ដឹកធញ្ញជាតិខុសច្បាប់រាប់ពាន់តោនរបស់ អ៊ុយក្រែន ចាកចេញពីកំពង់ផែ Berdyansk ជាទីដែលគ្រប់គ្រងដោយកងទ័ពរបស់ រុស្ស៊ី។

ឥណ្ឌា និង ចិន គឺជាប្រទេសធំៗដែលមិនដាក់ទណ្ឌកម្មលើ រុស្ស៊ី ទាក់ទិននឹងសង្គ្រាមនៅ អ៊ុយក្រែន បើទោះមានសម្ពាធពី បស្ចិមលោក។ ប្រទេសទាំងពីរនេះ សុទ្ធតែបង្កើនការទិញប្រេងតម្លៃទាបរបស់ រុស្ស៊ី ក្នុងរយៈពេលច្រើនខែមកនេះ។

កាលពីសប្ដាហ៍កន្លង សហរដ្ឋអាម៉េរិក បានស្នើឱ្យ ឥណ្ឌា មិនអនុញ្ញាតឱ្យកប៉ាល់ដឹកទំនិញរបស់ រុស្ស៊ី ចូលចតក្នុងកំពង់ផែ ដើម្បីជាការដាក់ទណ្ឌកម្ម ប៉ុន្តែ ទីក្រុងញូវដែលី បានបដិសេធ៕

July 20, 2022

អ៊ុយក្រែន ប្ដេជ្ញាយកឈ្នះលើ រុស្ស៊ី ឱ្យបានមុនរដូវរងា

ប្រធានការិយាល័យប្រធានាធិបតីអ៊ុយក្រែន បានឱ្យដឹងថា ប្រទេសនេះត្រូវតែយកឈ្នះលើ រុស្ស៊ី ឱ្យបានមុនរដូវរងា ដើម្បីទប់ស្កាត់ ទីក្រុងមូស្គូ មានប្រៀបយូរអង្វែង។

«ប្រការដែលសំខាន់សម្រាប់យើង នោះគឺមិនត្រូវអូសបន្លាយសង្គ្រាមរហូតដល់រដូវរងា។ ក្រោយរដូវរងា នៅពេលដែល ជនជាតិរុស្ស៊ី មានពេលច្រើនដើម្បីស្ដារកម្លាំង ស្ថានការណ៍នឹងលំបាកជាងនេះឆ្ងាយ។ អ្វីដែលយើងត្រូវធ្វើ គឺការលុបបំបាត់លទ្ធភាពនេះ» Andriy Yermak ប្រធានការិយាល័យប្រធានាធិបតីអ៊ុយក្រែន ថ្លែងកាលពីថ្ងៃទី ១៩ កក្កដា។

លោក Yermak បានរម្លឹកឡើងវិញថា សម្ព័ន្ធមិត្តលោកខាងលិច គួរផ្ដល់អាវុធបន្ថែមទៀតដល់ អ៊ុយក្រែន និងបន្តថា លោកកំពុងរង់ចាំជំនួយខ្ទង់ពាន់លានដុល្លាររបស់ សហរដ្ឋអាម៉េរិក ក្រោមរូបភាពជំនួយជាអាវុធ និងហិរញ្ញវត្ថុ។

ច្បាប់ Lend-Lease (ឱ្យជួល-ឱ្យខ្ចី) សម្រាប់ការពារប្រជាធិបតេយ្យអ៊ុយក្រែន ឆ្នាំ ២០២២ ដែលប្រធានាធិបតីអាម៉េរិក ចូ បៃដិន បានចុះហត្ថលេខាកាលពីខែឧសភា ដើម្បីពន្លឿនការបញ្ចេញកញ្ចប់ជំនួយ នឹងមានសុពលភាពទាំងស្រុងចាប់ពីខែក្រោយ។

«គោលដៅរបស់យើងគឺជ័យជម្នះ» លោក Yermak សង្កត់ធ្ងន់ដូច្នេះ និងបន្តថា ការចរចាជាមួយ រុស្ស៊ី ដែលកំពុងធ្វើឡើង សុទ្ធតែផ្ដោតទៅលើការរំដោះធញ្ញជាតិពីបណ្ដាកំពង់ផែដែលត្រូវបានបិទខ្ទប់ ពោលគឺមិនមែនស្វែងរកវិធីដើម្បីបញ្ចប់សង្គ្រាមឡើយ។

ឆ្លើយតបនឹងសំណួររបស់ Forbes Ukraine កាលពីថ្ងៃទី ១៨ កក្កដា រដ្ឋមន្ត្រីការបរទេសអ៊ុយក្រែន Dmytro Kuleba ក៏បានបញ្ជាក់ថា ទីក្រុងកៀវ នឹងចូលតុចរចារកសន្តិភាពឡើងវិញ លុះណាតែ ទីក្រុងមូស្គូ «បរាជ័យក្នុងសមរភូមិ»។

ចំណែកភាគីខាងរុស្ស៊ី លោក Medvedev អនុប្រធានក្រុមប្រឹក្សាសន្តិសុខរុស្ស៊ី បានប្រកាសថា ទីក្រុងមូស្គូ នឹងធ្វើគ្រប់យ៉ាងដើម្បីមានប្រៀបនៅលើ សមរភូមិអ៊ុយក្រែន៕

July 20, 2022

អាម៉េរិក សម្រេចបានកិច្ចព្រមព្រៀងទិញយន្តហោះចម្បាំងទំនើបជិត ៤០០ គ្រឿង

ក្រសួងការពារជាតិសហរដ្ឋអាម៉េរិក សម្រេចបានកិច្ចព្រមព្រៀងជាមួយក្រុមហ៊ុនម៉ៅការផ្នែកការពារជាតិ នៅសហរដ្ឋអាម៉េរិក ក្នុងការទិញ និងលក់យន្តហោះចម្បាំង F-35 ចំនួន ៣៧៥ គ្រឿង ក្នុងរង្វង់ ៣ ឆ្នាំ។

«យើងរីករាយនឹងប្រកាសថា ក្រសួងការពារជាតិអាម៉េរិក និងក្រុមហ៊ុនម៉ៅការយោធា Lockheed Martin សម្រេចបានកិច្ចព្រមព្រៀងទិញដូរយន្តហោះចម្បាំង F-35 ចំនួន ៣៧៥ គ្រឿងបន្ទាប់» William LaPlante អ្នកនាំពាក្យនៃទ័ពអាកាសរបស់ សហរដ្ឋអាម៉េរិក ឱ្យដឹងកាលពីថ្ងៃទី ១៨ កក្កដា។

សារព័ត៌មាន Reuters ដកស្រង់ប្រភពព័ត៌មានច្បាស់ការណ៍ បានផ្សាយថា តម្លៃសរុបនៃការទិញដូរយន្តហោះចម្បាំងទំនើបខាងលើ គឺប្រហែល ៣០ ពាន់លានដុល្លារអាម៉េរិក។

យន្តហោះចម្បាំង F-35A ដំបូងគេត្រូវបានផលិតកាលពីឆ្នាំ ២០០៧ និងមានតម្លៃ ២២១ លានដុល្លារអាម៉េរិក។ ចាប់ពីពេលនោះមក Lockheed Martin បានកែសម្រួលការផលិត និងបង្កើនការផលិត ធ្វើឱ្យតម្លៃរបស់យន្តហោះចម្បាំងនេះ ថយចុះមកនៅត្រឹម ៧៩ លានដុល្លារ/គ្រឿង។

F-35 មាន ៣ កំណែ។ F-35A គឺជាកំណែពេញនិយមជាងគេ និងសម្រាប់តែ កងទ័ពអាម៉េរិក និងសម្ព័ន្ធមិត្ត។ F-35B អាចហោះឡើង និងចុះចតដោយត្រង់ ខណៈដែល F-35C គឺជាកំណែសម្រាប់ទ័ពជើងទឹក និងទ័ពថ្មើរជើងរបស់ សហរដ្ឋអាម៉េរិក។

យន្តហោះចម្បាំង F-35 ថ្មីៗនេះទទួលបានការបញ្ជាទិញច្រើនពីបរទេស។ កាលពីខែមីនា អាល្លឺម៉ង់ បានបញ្ជាទិញ F-35 ពី សហរដ្ឋអាម៉េរិក ចំនួន ៣៥ គ្រឿង ក្នុងគ្រាដែលទំនាក់ទំនងរវាង អឺរ៉ុប និង រុស្ស៊ី មានភាពតានតឹង។

កូរ៉េខាងត្បូង បានបង្ហើយការទិញដូរ F-35A ចំនួន ៤០ គ្រឿង កាលពីខែមករា ហើយបានធ្វើសមយុទ្ធរួមជាលើកដំបូងជាមួយបណ្ដាយន្តហោះចម្បាំងអាម៉េរិក នៅ កូរ៉េខាងត្បូង កាលពីសប្ដាហ៍កន្លង។ កាលពីថ្ងៃទី ១៥ កក្កដា ប្រទេសនេះក៏បានអនុម័តគម្រោងចំណាយ ២.៩៧ ពាន់លានដុល្លារ ដើម្បីទិញយន្តហោះចម្បាំង F-35A ចំនួនប្រហែល ២០ គ្រឿងបន្ថែមទៀតពី សហរដ្ឋអាម៉េរិក។

ប្រទេសកាណាដា ក៏មានគម្រោងបញ្ជាទិញយន្តហោះចម្បាំង F-35 ចំនួន ៨៨ គ្រឿងពី សហរដ្ឋអាម៉េរិក ដើម្បីជំនួសបណ្ដាយន្តហោះចម្បាំងដែលហួសសម័យ៕

July 19, 2022

សហរដ្ឋអាម៉េរិក សម្រួលនីតិវិធីសុំទិដ្ឋាការពិសេស សម្រាប់ ជនជាតិអាហ្វហ្គានីស្ថាន

ចាប់ពីសប្ដាហ៍នេះ ជនជាតិអាហ្វហ្គានីស្ថាន ដែលសុំទិដ្ឋាការនឹងមិនត្រូវតម្រូវឱ្យបំពេញឯកសារទៅតាមទម្រង់ដោយឡែក ដើម្បីឱ្យពួកគេទទួលបានគោលនយោបាយពិសេសក្នុងការចូលទៅកាន់ទឹកដីរបស់ សហរដ្ឋអាម៉េរិក។

ក្រសួងសន្តិសុខមាតុភូមិអាមេរិក ថ្ងៃទី ១៩ កក្កដានេះ បានឱ្យដឹងថា អាជ្ញាធរប្រទេសនេះនឹងសម្រួលនីតិវិធីសុំទិដ្ឋាការ (វីសា) ពិសេសសម្រាប់ ជនជាតិអាហ្វហ្គានីស្ថាន ក្នុងនោះ អ្នកស្នើសុំទិដ្ឋាការគ្រាន់តែបំពេញ និងដាក់ពាក្យទៅតាមទម្រង់ឯកសារតែមួយគត់។

ក្នុងសេចក្ដីប្រកាសរួមមួយ រដ្ឋមន្ត្រីការបរទេសអាម៉េរិក Antony Blinken និង រដ្ឋមន្ត្រីសន្តិសុខមាតុភូមិអាម៉េរិក Alejandro Mayorkas ឱ្យដឹងថា ចាប់ពីសប្ដាហ៍នេះ ជនជាតិអាហ្វហ្គានីស្ថាន ដែលសុំទិដ្ឋាការនឹងមិនត្រូវតម្រូវឱ្យបំពេញឯកសារទៅតាមទម្រង់ដោយឡែកដូចមុនទៀតឡើយ។ នេះគឺជាគោលការណ៍ពិសេសដែលពួកគេទទួលបានក្នុងការចូលទៅកាន់ សហរដ្ឋអាម៉េរិក ក្រោយពីរបបប្រជាធិបតេយ្យនៅ អាហ្វហ្គានីស្ថាន បានដួលរលំ និងជំនួសដោយ របបតាលីបង់ ដែលប្រកាន់តឹង។

ការសម្រួលនីតិវិធីសុំទិដ្ឋាការនេះ នឹងជួយបង្កើនប្រសិទ្ធភាពក្នុងការកាត់បន្ថយឧបសគ្គ និងពន្លឿនដំណើរការនៃការផ្ដល់ទិដ្ឋាកា ជូន ជនជាតិអាហ្វហ្គានីស្ថាន ដែលភាគច្រើនចង់ចាកចេញពី របបតាលីបង់ សព្វថ្ងៃ៕

July 19, 2022

គ្រឿងអលង្ការតម្លៃរយលានដុល្លារត្រូវគេប្លន់យកយ៉ាងសម្ងាត់ ក្រោយពិធីតាំងពិព័រណ៍បានបញ្ចប់

(សហរដ្ឋអាម៉េរិក)-គ្រឿងអលង្ការ និងត្បូងមានតម្លៃខ្ទង់រយលានដុល្លារអាម៉េរិក ដែលជាកម្មសិទ្ធិរបស់បណ្ដាក្រុមហ៊ុនចូលរួមដាក់តាំងបង្ហាញក្នុងព្រឹត្តិការណ៍តាំងពិព័រណ៍លក់រាយ California កាលពីពេលថ្មី ៗនេះ ត្រូវបានចោរលួចយកទៅបាត់ នៅពេលកំពុងដឹកក្នុងរថយន្តមួយគ្រឿងឆ្ពោះទៅទិសខាងជើងដើម្បីទៅកាន់ Los Angeles។

ករណីលួចនេះបានកើតឡើងនៅព្រឹកព្រលឹម ថ្ងៃទី ១១ កក្កដា ក្នុងទីក្រុង Frazier Park នៅពេលរថយន្តឯកទេសរបស់ Brink Co’s ដែលដឹកគ្រឿងអលង្ការ និងត្បូងមានតម្លៃទាំងនេះ ទៅកាន់ឃ្លាំងមួយកន្លែង។

អ្នកស្រី Brandy Swanson ប្រធានក្រុមហ៊ុន International Gem & Jewelry Show ដែលជំនាញក្នុងការរៀបចំពិធីតាំងពិព័រណ៍លក់រាយនៅ សហរដ្ឋអាម៉េរិក បានឱ្យដឹងថា គ្រឿងអលង្ការ និងត្បូងប្រហែលពី ២៥ ទៅ ២០ ប្រអប់ របស់ ១៨ ក្រុមហ៊ុន ដែលបានចូលរួមដាក់តាំងក្នុងពិព័រណ៍នៅ San Mateo ភាគខាងត្បូងនៃទីក្រុង San Francisco ត្រូវបានគេលួចយកទៅបាត់ស្រមោល។ វត្ថុមានតម្លៃទាំងនេះត្រូវបានដឹកទៅកាន់ឃ្លាំងមួយ មុនពេលបន្តនាំយកទៅទីតាំងពិព័រណ៍មួយកន្លែងផ្សេងទៀតនៅ Pasadena។

រថយន្តមួយគ្រឿងរបស់ក្រុមហ៊ុនសន្តិសុខ Brinks

យោងតាមប្រកាសរបស់ Brink វត្ថុមានតម្លៃដែលត្រូវគេលួចនេះ មានតម្លៃមិនដល់ ១០ លានដុល្លារ ប៉ុន្តែ អ្នកស្រី Swason បានកំណត់តម្លៃជិត ១០០ លានដុល្លារ។ បច្ចុប្បន្ន ភាគីខាងក្រុមហ៊ុនការពារសន្តិសុខ មិនទាន់មានប្រតិកម្មអ្វីនៅឡើយ ទាក់ទិននឹងហេតុការណ៍នេះ។

ទាក់ទងនឹងប្រកាសរបស់ Brink អ្នកស្រី Swason បកស្រាយថា ក្រុមហ៊ុនមួយចំនួនដែលបានចូលរួមតាំងពិព័រណ៍ តែងតែមានចេតនាប្រកាសតម្លៃទាបជាងធៀបនឹងជាក់ស្ដែងដើម្បីកាត់បន្ថយការចំណាយលើថ្លៃធានារ៉ាប់រង។

បច្ចុប្បន្ន សមត្ថកិច្ចមិនទាន់ដឹងច្បាស់ថា ក្រុមចោរបានចូលគ្រប់គ្រងរថយន្តដឹកគ្រឿងអលង្ការនេះបានដោយវិធីណា ហើយក៏មិនដឹងថា ក្នុងរថយន្តនេះមានកាមេរ៉ា ឬប្រព័ន្ធកំណត់ តាមដានទិសដៅដែរ ឬយ៉ាងណានៅឡើយ៕

July 19, 2022

សហភាពអឺរ៉ុប អនុម័តកញ្ចប់ទណ្ឌកម្មទី៧ ប្រឆាំងនឹង សហព័ន្ធរុស្ស៊ី

កាលពីថ្ងៃទី ១៨ កក្កដា ក្នុងសន្និបាតរដ្ឋមន្ត្រីការបរទេសរបស់ សហភាពអឺរ៉ុប (EU) ក្រុមមន្ត្រីតំណាងប្រទេសនានា បានឯកភាពគ្នាលើកញ្ចប់ទណ្ឌកម្មទី ៧ ដើម្បីប្រឆាំងនឹង រុស្ស៊ី ក្នុងនោះមានទាំងវិធានការទណ្ឌកម្មសំដៅលើអង្គការ និងបុគ្គលជាច្រើនបន្ថែមទៀតរបស់ រុស្ស៊ី ក៏ដូចជាការហាមនាំចូលមាសពីប្រទេសនេះផងដែរ។

រដ្ឋមន្ត្រីក្រសួងការបរទេសឆែក ដែលជាប្រធានប្ដូរវេនរបស់ EU បានឱ្យដឹងថា សហភាពអឺរ៉ុប ត្រូវការកំណត់ឡើងវិញនូវទំនាក់ទំនងជាមួយ ទីក្រុងមូស្គូ បន្ទាប់ពីមានសង្គ្រាមនៅ អ៊ុយក្រែន។ យោងតាមរដ្ឋមន្ត្រី Lipavsky នៅចំពោះមុខសកម្មភាពថ្មីៗនេះរបស់ រុស្ស៊ី បណ្ដាគោលការណ៍ និងវិធីប្រព្រឹត្តរបស់ EU ចំពោះ រុស្ស៊ី ទៅតាមមូលដ្ឋានចាស់ គឺលែងត្រូវបានអនុវត្តទៀតហើយ។ សហភាពអឺរ៉ុប ត្រូវការពិនិត្យយុទ្ធសាស្ត្រយូរអង្វែង នៅក្នុងការទប់ទល់នឹង ទីក្រុងមូស្គូ។

នៅក្នុងកិច្ចប្រជុំ វិធានការដាក់ទណ្ឌកម្មថ្មីចំពោះ រុស្ស៊ី ជាមូលដ្ឋាន ត្រូវបានធ្វើបច្ចុប្បន្នភាពទៅតាមគោលការណ៍មុននោះ និងពុំមានការរឹតបន្តឹងណាមួយទាក់ទិននឹងបញ្ហានាំចូលថាមពល។

រដ្ឋមន្ត្រីការបរទេសហុងគ្រី Szijjarto យល់ថា កញ្ចប់ទណ្ឌកម្មថ្មីមិនរួមបញ្ចូលទណ្ឌកម្មដែលទាក់ទិននឹងបណ្ដាធនាគារ Gazprombank របស់ រុស្ស៊ី។ ប៉ុន្តែ មានការកែប្រែមួយចំនួន ដូចជា ការហាមនាំចូលមាសពី ប្រទេសរុស្ស៊ី និងការរឹតត្បិតលើការជួញដូរផលិតផលដែលត្រូវបានប្រើប្រាស់ក្នុងវិស័យឧស្សាហកម្មយោធា និងការពារជាតិ។ល។

កញ្ចប់ទណ្ឌកម្មថ្មីនេះក៏បានបន្ថែមបុគ្គលចំនួន ៤៨ នាក់ និងអង្គការឯកជនចំនួន ៩ ស្ថាប័នរបស់ រុស្ស៊ី ទៅក្នុងបញ្ជីទណ្ឌកម្មចាស់ ក្នុងនោះក៏មាន ឧបនាយករដ្ឋមន្ត្រីម្នាក់របស់ រុស្ស៊ី និងមេដឹកនាំនយោបាយជាច្រើនរូបផ្សេងទៀត។

ជាងនេះ EU ក៏បានអនុម័តលើការសម្រេចចិត្តបែងចែកថវិកា ៥០០ លានអឺរ៉ូ ពីមូលនិធិសន្តិភាព សម្រាប់ជួយដល់ អ៊ុយក្រែន ដើម្បីបង្កើនសមត្ថភាពការពារប្រទេសជាតិ នៅក្នុងសង្គ្រាមបច្ចុប្បន្ន៕

July 19, 2022

ព្រៃឈើជាង ១៧,០០០ ហិកតា ត្រូវភ្លើងឆេះខ្ទេច ខណៈពលរដ្ឋរាប់ម៉ឺននាក់ត្រូវភៀសខ្លួន ព្រោះមេឃក្ដៅខ្លាំង

ប្រទេសបារាំង កាលពីថ្ងៃទី ១៨ កក្កដា បានឆ្លងកាត់រលកកម្ដៅកម្រិតខ្ពស់ នៅពេលសីតុណ្ហភាពនៅតំបន់ខ្លះឡើងដល់ជាង ៤០ អង្សាសេ ទន្ទឹមនឹងបញ្ហាភ្លើងឆេះព្រៃនៅភាគនិរតីនៅតែបន្តរាលដាល ធ្វើឱ្យព្រៃជាង ១៧,០០០ ហិកតាត្រូវឆេះខ្ទេច និងបង្ខំឱ្យប្រជាជនជាង ៣២,០០០ នាក់ ត្រូវភៀសខ្លួនជាបន្ទាន់។

យោងតាមប្រភពព័ត៌មានពី ប្រទេសបារាំង ក្នុងថ្ងៃទី ១៨ កក្កដា សីតុណ្ហភាពឡើងដល់ជាង ៤០ អង្សាសេ បានកើតឡើងនៅតាមបណ្ដោយឆ្នេរសមុទ្រភាគខាងលិច ជាប់នឹងមហាសមុទ្រអាត្លង់ទិករបស់ បារាំង ដែលអូសបន្លាយពីភាគពាយព្យ ចុះមកភាគនិរតី ក្នុងនោះ សីតុណ្ហភាពនៅទីក្រុង Nantes ឡើងដល់ ៤២ អង្សាសេ និងតំបន់ Biscarrosse ឡើងដល់ ៤២.៦ អង្សាសេ។ សីតុណ្ហភាពក្បែរ ៤០ អង្សាសេក៏ត្រូវបានកត់ត្រានៅក្នុងទីក្រុងរាប់សិបផ្សេងទៀតក្នុងតំបន់ Bretagne និងនៅ រដ្ឋធានីប៉ារីស ផងដែរ។

ក្នុងថ្ងៃនេះ (១៩ កក្កដា) កម្ដៅខ្ពស់នឹងបន្តកើតមាននៅ ប្រទេសបារាំង ប៉ុន្តែ វាផ្លាស់ទីបន្តិចម្ដងៗទៅកាន់បណ្ដាខេត្តនៅភាគខាងកើត។ ចំណែក ទីក្រុងប៉ារីស ថ្ងៃនេះ សីតុណ្ហភាពអាចឡើងដល់ ៤១ អង្សាសេ។

អាកាសធាតុក្ដៅខ្លាំង ធ្វើឱ្យភ្លើងព្រៃដែលកំពុងឆេះ កាន់តែមានសភាពធ្ងន់ធ្ងរ។ ក្នុងខេត្ត Gironde នៅភាគនិរតី ភ្លើងព្រៃបានដុតបំផ្លាញព្រៃឈើអស់ជាង ១៧,០០០ ហិកតា និងបានបណ្ដាលឱ្យប្រជាជន ក៏ដូចជាទេសចរជាង ១៦,០០០ នាក់ទៀត ត្រូវភៀសខ្លួន។ រាប់ចាប់ពីថ្ងៃទី ១២ កក្កដា មានប្រជាជនជាង ៣២,០០០ នាក់ បានរត់ចោលផ្ទះ និងទីតាំងបោះតង់លម្ហែកាយ។

ក្រុមមន្ត្រីបារាំង បានបញ្ជូនកម្លាំងជិត ២,០០០ នាក់ និងប្រើប្រាស់យន្តហោះពន្លត់អគ្គិភ័យស្ទើរតែទាំងអស់ដើម្បីចូលរួមពន្លត់ភ្លើងព្រៃ ប៉ុន្តែ មិនទាន់គ្រប់គ្រងស្ថានការណ៍បាននៅឡើយ៕

July 19, 2022

Category: អន្តរជាតិ