មាន - La Reine Media

កម្លាំងប្រដាប់អាវុធស្និទ្ធនឹងអ៊ុយក្រែន បន្តវាយប្រហារចូលទឹកដីរុស្ស៊ី

RCV ដែលជាអង្គភាពទ័ពស្ម័គ្រចិត្តរុស្ស៊ី (Russian Volunteer Corps) បានប្រកាសចាប់ផ្ដើមដំណាក់កាលទីពីរនៃយុទ្ធនាការវាយប្រហារចូលទឹកដីរុស្ស៊ី បន្ទាប់ពីការវាយប្រហារនៅក្នុងខេត្ត Belgorod កាលពីចុងខែមុន។

«ដំណាក់កាលទីពីរដែលមេបញ្ជាការរបស់យើងធ្លាប់បាននិយាយ បានចាប់ផ្ដើមហើយ» តំណាងរបស់ អង្គភាពទ័ពស្ម័គ្រចិត្តរុស្ស៊ី (RCV) ដែលស្និទ្ធនឹងអ៊ុយក្រែន និយាយនៅក្នុងវីដេអូមួយដែលត្រូវបានបង្ហោះកាលពីថ្ងៃទី 01 មិថុនាដូច្នេះ។ ក្រុមនេះប្រកាសថា ទាហានរបស់ខ្លួនបានចាប់ផ្ដើមយុទ្ធនាការនៅក្នុងខេត្ត Belgorod របស់រុស្ស៊ី។

បណ្ដាវីដេអូដែលត្រូវបានចែករំលែកតគ្នាលើបណ្ដាញសង្គមបន្ទាប់នោះ បង្ហាញថា អគារសាលាស្រុកនៅ Shebekino ក្នុងតំបន់ភាគខាងត្បូងរបស់ខេត្ត Belgorod ដែលមានចម្ងាយពីព្រំដែនអ៊ុយក្រែនប្រហែល 6 គីឡូម៉ែត្រ ត្រូវឆេះសន្ធោសន្ធៅ។ ព័ត៌មានខ្លះឱ្យដឹងថា RCV បានកម្ទេចប្រព័ន្ធកាំភ្លើងធំចល័ត 2S4 Tyulpan មួយគ្រឿង និងរថយន្តជំនួយមួយគ្រឿងរបស់រុស្ស៊ី នៅក្បែរទីរួមស្រុក Shebekino។

កងជីវពលដែលស្និទ្ធនឹងអ៊ុយក្រែនមួយក្រុមផ្សេងទៀត គឺ អង្គភាពសេរីរុស្ស៊ី (FRL/ Liberty of Russia Legion) ក៏បានប្រកាសថា កំពុងធ្វើសកម្មភាពក្បែរព្រំដែនរុស្ស៊ី និងវាយប្រហារលើដោលដៅយោធាមួយចំនួន។

អនុរដ្ឋមន្ត្រីការបរទេសអ៊ុយក្រែន Andriy Melnyk បាននិយាយថា ក្រុមជីវពលទាំងនេះ «ធ្វើសកម្មភាពដោយចិត្តឯង» ហើយអ៊ុយក្រែនមិនទទួលខុសត្រូវចំពោះពួកគេឡើយ។ «អ៊ុយក្រែនមានសិទ្ធិស្របច្បាប់ក្នុងការវាយប្រហារចូលទឹកចិត្តរុស្ស៊ី ប៉ុន្តែនឹងធ្វើដោយការប្រុងប្រយ័ត្ន» លោក Andriy Melnyk បញ្ជាក់ដូច្នេះ។

រុស្ស៊ីបានឱ្យដឹងថា ហេដ្ឋារចនាសម្ព័ន្ធមួយចំនួននៅខេត្ត Belgorod រងការខូចខាតដោយសារកាំភ្លើងធំ ក្រោយ មកក្រុមប្រដាប់អាវុធមួយចំនួនបានព្យាយាមចូលទឹកដីរុស្ស៊ី។ រុស្ស៊ីក៏បានប្រកាសថា ខ្លួនបានវាយរុញច្រានកងកម្លាំងមកពីអ៊ុយក្រែន និងដេញដល់ក្នុងទឹកដីអ៊ុយក្រែន ហើយសម្លាប់បាន 30 នាក់៕

June 2, 2023

ម៉ូតូអគ្គិសនី Yadea F 200 ABS ជាផលិតផលសហការជាមួយ Porsche

ម៉ូតូអគ្គិសនីថ្មីរបស់ក្រុមហ៊ុន Yadea សហការជាមួយក្រុមហ៊ុន Porsche បំពាក់ម៉ូទ័រអគ្គិសនីកម្លាំង 14.7 សេះ អាចជិះបានចម្ងាយ 129 គីឡូម៉ែត្រ បន្ទាប់ពីបញ្ចូលថាមពលមួយពេញ។

ក្រុមហ៊ុនផលិតម៉ូតូចិន Yadea បានបង្ហាញម៉ូតូអគ្គិសនីម៉ូដែល F 200 ABS មានកម្លាំងប្រហាក់ប្រហែលនឹងម៉ូតូសាំង 125cc។ ម៉ូតូនេះបំពាក់ម៉ូទ័រអគ្គិសនីកម្លាំង 14.7 សេះ, កម្លាំងរមួលកង់ 235 Nm ជួយឱ្យបង្កើនល្បឿនពី 0-50 គីឡូម៉ែត្រ/ម៉ោង ដោយប្រើពេលតែ 2.5 វិនាទី ហើយអាចធ្វើដំណើរបាន 100 គីឡូម៉ែត្រ/ម៉ោង និងរត់បានចម្ងាយ 129 គីឡូម៉ែត្របន្ទាប់ពីបញ្ចូលអគ្គិសនីមួយពេញ។

ក្រៅពីកម្លាំង ចំណុចពិសេសផ្សេងទៀតរបស់ Yadea F 200 ABS គឺរូបរាង។ ក្រុមហ៊ុនចិន Yadea និយាយថា F 200 ABS របស់ខ្លួនគឺជាផលិតផលដែលកើតចេញពីកិច្ចសហការជាមួយក្រុមហ៊ុនផលិតរថយន្តអាល្លឺម៉ង់ Porsche។ រូបរាងរបស់ម៉ូតូនេះយកតាមគំនិតនៅក្នុងកិច្ចការឆ្លាក់ រួមផ្សំនឹងចំណុចលេចធ្លោរបស់រថយន្ត Porsche។

F 200 ABS បំពាក់អំពូលភ្លើងពេលថ្ងៃដ៏លេចធ្លោ និងអំពូល LED មួយគូនៅខាងមុខ ហើយក្បាលរបស់ម៉ូតូនេះក៏មានរបាំងការពារខ្យល់។ ចំណែកអំពូលភ្លើងខាងក្រោយ និងអំពូលភ្លើងហ្វ្រាំង គឺយកតាមគំនិតស្ដីពីពាណិជ្ជសញ្ញារបស់ Yadea។

Yadea F 200 ABS មានតាប្លូឌីជីថល និងឃ្លុបក្រោមកែប ទំហំធំ។ កង់ទីពីររបស់ម៉ូតូនេះត្រូវបានបំពាក់ហ្វាំងឌីស ខណៈថ្មផ្ទុកអគ្គិសនីត្រូវបានដាក់ក្រោមឈ្នាន់។

យោងតាមទំព័រ Paultan ក្រុមហ៊ុន Yadea មិនទាន់បង្ហើបឱ្យដឹងអំពីតម្លៃ ថ្ងៃដាក់លក់ ក៏ដូចជាទីផ្សារដំបូងៗរបស់ F 200 ABS នេះនៅឡើយ៕

June 2, 2023

គ្រូបង្វឹក Mourinho អាចរងការពិន័យធ្ងន់ធ្ងរ ក្រោយពីជេរ និងចោទអាជ្ញាកណ្ដាលនៅ Europa League

គ្រូបង្វឹករបស់ក្រុមបាល់ទាត់ Roma អាចនឹងត្រូវបានហាមការដឹកនាំពីបួនទៅប្រាំប្រកួតនៅ UEFA ព្រោះតែបានជេរប្រទេច និងចោទអាជ្ញាកណ្ដាល ក្រោយការប្រកួតវគ្គផ្ដាច់ព្រ័ត្រនៅពានរង្វាន់ Europa League កាលពីប៉ុន្មានថ្ងៃមុន។

គ្រូបង្វឹក Jose Mourinho របស់ក្រុមបាល់ទាត់អ៊ីតាលី Roma បានប្រើប្រាស់ពាក្យអសុរោះដើម្បីជេរប្រទេចអាជ្ញាកណ្ដាលជនជាតិអង់គ្លេស Anthony Taylor នៅឯចំណតរថយន្តបន្ទាប់ពីការប្រកួតវគ្គផ្ដាច់ព្រ័ត្រនៅពានរង្វាន់ Europa League បានបញ្ចប់។

ក៏ប៉ុន្តែ ការបញ្ចេញមតិដែលធ្ងន់ធ្ងរជាងការជេរប្រទេចខាងលើរបស់គ្រូបង្វឹកក្រុម Roma នោះគឺការចោទដោយប្រយោលថា ក្រុមអាជ្ញាកណ្ដាលបានរួមគំនិតគ្នាធ្វើការលំអៀងទៅរកក្រុម Sevilla របស់អេស្ប៉ាញ។ ពេលប្រធានក្រុមអាជ្ញាកណ្ដាលរបស់ UEFA លោក Roberto Rosetti ចូលមកណែនាំឱ្យស្ងប់ចិត្ត គ្រូបង្វឹកជនជាតិព័រទុយហ្កាល់ លោក Mourinho ក៏និយាយថា «លោកឯងរួមគំនិតជាមួយពួកគេ»។

សម្ដីរបស់លោក Mourinho ក៏បាននាំឱ្យមានភាពច្របូកច្របល់នៅពេលអ្នកគាំទ្រធ្វើការវាយប្រហារទៅលើអាជ្ញាកណ្ដាល Taylor និងក្រុមគ្រួសារ មុនពេលឡើងយន្តហោះត្រលប់ទៅអង់គ្លេស។

យោងតាម Sun Sport សម្ដីចោទប្រកាន់ដោយប្រយោលខាងលើ អាចនាំឱ្យលោក Mourinho ប្រឈមនឹងហានិភ័យត្រូវបានហាមការដឹកនាំរហូតដល់ប្រាំប្រកួត។ ប្រការនេះអាចប៉ះពាល់ដល់ឱកាសរបស់លោក Mourinho បើសិនជាទៅដឹកនាំក្លឹបថ្មី។ ឧទាហរណ៍ថា បើសិនចូលធ្វើការឱ្យក្លឹបបារាំង PSG លោក Mourinho

អាចនឹងមិនបានដឹកនាំក្រុមនេះនៅក្នុងការប្រកួតភាគច្រើននៅវគ្គវិលជុំរបស់ Champions League 2023-2024។

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League៕

June 2, 2023

អឺរ៉ុបនឹងផ្សាយផ្ទាល់លើកដំបូងពីយានអវកាសនៅឯភពអង្គារនាយប់នេះ

ទីភ្នាក់ងារអវកាសអឺរ៉ុប នឹងធ្វើការផ្សាយផ្ទាល់លើកដំបូងពីយានអវកាស Mars Express នៅឯភពអង្គារ នាវេលាម៉ោង 23:00 ថ្ងៃទី 02 មិថុនា 2023។

ការផ្សាយផ្ទាល់នេះធ្វើឡើងដើម្បីរម្លឹកខួប 20 ឆ្នាំនៃថ្ងៃបាញ់បង្ហោះយាន Mars Express របស់ទីភ្នាក់ងារអវកាសអឺរ៉ុប (ESA)។ រ៉ុក្កែត Soyuz-FG/Fregat បាននាំយានអវកាសនេះហោះឡើងពីអវកាសយានដ្ឋាន Baikonur នៅកាហ្សាក់ស្ថាន កាលពីថ្ងៃទី 02 មិថុនា ឆ្នាំ 2003។ Mars Express មានភារកិច្ចថតរូបភាព 3D នៃផ្ទៃភពអង្គារ ដើម្បីជួយឱ្យអ្នកវិទ្យាសាស្ត្រសង្កេតមើលភពនេះបានច្បាស់ជាងមុន។

អ្នកស្រលាញ់វិស័យតារាសាស្ត្រអាចតាមដានការផ្សាយរយៈពេលមួយម៉ោងនេះនៅលើឆានែល YouTube របស់ ESA។ ក៏ប៉ុន្តែ រូបភាពថ្មីនឹងត្រូវបានបញ្ជូនមកតាមដំណាក់កាល 50 វិនាទីម្ដង ជំនួសឱ្យការផ្សាយជាផ្ទាល់បន្តបន្ទាប់។

ការបញ្ជូនទិន្នន័យរវាងភពអង្គារ និងផែនដី ជាធម្មតាស៊ីពេលចាប់ពី 3 ទៅ 22 នាទី អាស្រ័យទៅលើទីតាំងរបស់ភពទាំងពីរនៅលើគន្លងតារាវិថីជុំវិញព្រះអាទិត្យ។ ក្នុងការផ្សាយផ្ទាល់នៅថ្ងៃនេះ ពេលវេលាចាប់ពីរូបភាពត្រូវបានថតនៅភពអង្គារ រហូតដល់ពេលបង្ហាញខ្លួននៅលើអេក្រង់របស់ទស្សនិកជន គឺប្រហែល 18 នាទី។ ក្នុងនោះ ការបញ្ជូនរូបភាពពីភពអង្គារមកដល់ស្ថានីយទទួលនៅលើផែនដី គឺស៊ីពេលប្រហែល 17 នាទី ហើយការបញ្ជូនបន្តពីម៉ាស៊ីនមេ (server) ទៅកាន់បណ្ដាញអ៊ីនធើណិតលើផ្ទៃផែនដីនឹងស៊ីពេលប្រហែល 1 នាទី។

ក៏ប៉ុន្តែ ESA បានបញ្ជាក់ថា ពួកគេមិនធ្លាប់បានសាកល្បងការផ្សាយផ្ទាល់បែបនេះពីមុនមក ដូច្នេះមិនទាន់ដឹងប្រាកដអំពីពេលវេលាជាក់លាក់ដែលទិន្នន័យត្រូវបានបញ្ជូននៅលើផែនដី៕

June 2, 2023

អ្នកគាំទ្រក្រុមបាល់ទាត់ Roma វាយប្រហារអាជ្ញាកណ្ដាលនៅ Europa League

(ហុងគ្រី) – អ្នកគាំទ្រក្រុមបាល់ទាត់អ៊ីតាលី Roma នាំគ្នាជេរប្រមាថ គប់ដបទឹក និងកៅអីជាដើម សំដៅលើ Anthony Taylor គ្រាដែលអាជ្ញាកណ្ដាលរូបនេះត្រូវបានប៉ូលិសអមដំណើរចូលបន្ទប់ដោយឡែកនៅព្រលានយន្តហោះ Budapest បន្ទាប់ពីការប្រកួតវគ្គផ្ដាច់ព្រ័ត្រ Europa League។

ពេលបង្ហាញវត្តមាននៅអាកាសយានដ្ឋានដើម្បីត្រៀមចាកចេញពីប្រទេសហុងគ្រីកាលពីថ្ងៃទី 01 មិថុនា 2023 អាជ្ញាកណ្ដាលជនជាតិអង់គ្លេស លោក Taylor ត្រូវបានអ្នកគាំទ្ររបស់ក្រុមបាល់ទាត់អ៊ីតាលី Roma ឡោមព័ន្ធ និងជេរប្រមាថ។ លើសពីនេះក៏មានអ្នកខ្លះស្រែកថា «សម្លាប់វាទៅ» ខណៈដែលអ្នកខ្លះគប់ដបទឹកសុទ្ធសំដៅអាជ្ញាកណ្ដាល និងក្រុមគ្រួសារ។

ដើម្បីការពារសុវត្ថិភាព ក្រុមប៉ូលិសក៏បានអមដំណើរលោក Taylor និងគ្រួសារ ចូលទៅក្នុងបន្ទប់ដោយឡែក។ ពេលនោះ មនុស្សម្នាក់ថែមទាំងបានគប់កៅអីសំដៅប៉ូលិសដែលកំពុងឈរការពារអាជ្ញាកណ្ដាល និងសមាជិកគ្រួសាររបស់គាត់។

ក្រោយមក ស្ថានប័នគ្រប់គ្រងអាជ្ញាកណ្ដាលអាជីពអង់គ្លេស (PGMOL) បានប្រកាសថា ស្ថាប័ននេះមានការភ័យខ្លាចនៅចំពោះមុនទង្វើមិនសមហេតុផល និងអាក្រក់ដែលអ្នកគាំទ្របានប្រព្រឹត្តចំពោះ Taylor និងគ្រួសារ នៅពេលពួកគេព្យាយាមត្រលប់ទៅផ្ទះ ក្រោយពីវគ្គផ្ដាច់ព្រ័ត្រ Europa League។

សារព័ត៌មានអ៊ីតាលីបានហៅហេតុការណ៍នេះថាជា «ករណីវឹកវរ Taylor» និងយល់ថា គ្រូបង្វឹក Jose Mourinho ត្រូវទទួលខុសត្រូវចំពោះការបង្កឱ្យមានបរិយាកាសតានតឹងនេះ។ ព្រោះថា ក្រោយវគ្គផ្ដាច់ព្រ័ត្រនៅ Europa League លោក Mourinho បានជេរប្រទេចអាជ្ញាកណ្ដាលនៅឯចំណតរថយន្ត ដោយសារយល់ថា លោក Taylor កាត់ក្ដីលំអៀងទៅរកក្រុមអេស្ប៉ាញ Sevilla។

https://www.youtube.com/shorts/WoKey4yHvyo

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League។

June 2, 2023

ឥណ្ឌាជោគជ័យក្នុងការបាញ់សាកល្បងមីស៊ីលប្លោង Agni-1

(ឥណ្ឌា) – បញ្ជាការដ្ឋានកងកម្លាំងយុទ្ធសាស្ត្រ (SFC) បានបាញ់សាកល្បងមីស៊ីលប្លោងកម្រិតមធ្យម Agni-1 ពីកោះ Abdul Kalam ក្នុងរដ្ឋ Odisha ខាងកើត។

កាលពីថ្ងៃទី 01 មិថុនា 2023 ក្រសួងការពារជាតិឥណ្ឌា បានឱ្យដឹងថា បញ្ជាការដ្ឋានកងកម្លាំងយុទ្ធសាស្ត្រ (SFC) បានទទួលជោគជ័យទាំងស្រុងនៅក្នុងការបាញ់សាកល្បងមីស៊ីលប្លោងរយៈចម្ងាយមធ្យមយុទ្ធសាស្ត្រ Agni-1 ពីកោះ Abdul Kalam ក្នុងរដ្ឋ Odisha ខាងកើត។

ប្រកាសខាងលើសង្កត់ធ្ងន់ថា «មីស៊ីលនេះគឺជាប្រព័ន្ធមួយដែលត្រូវបានបញ្ជាក់រួចរាល់ថា មានសមត្ថភាពវាយប្រហារចំគោលដៅកម្រិតខ្ពស់ខ្លាំង»។

ក្នុងពីរទសវត្សរ៍កន្លង ឥណ្ឌាបានផ្ដោតទៅលើការបង្កើនសមត្ថភាពកំញើញជាយុទ្ធសាស្ត្រ តាមរយៈការអភិវឌ្ឍមីស៊ីលប្លោងច្រើនប្រភេទ អាវុធមានប្រព័ន្ធនាំផ្លូវវាយចំគោលដៅកម្រិតខ្ពស់ និងបច្ចេកវិទ្យាដែលពាក់ព័ន្ធ។ ប្រទេសនេះក៏បានអភិវឌ្ឍកំណែថ្មីៗជាច្រើនដែលយោងទៅលើមីស៊ីល Agni៕

June 2, 2023

គ្រូបង្វឹក Mourinho «ជេរធ្ងន់ៗ» លើអាជ្ញាកណ្ដាល បន្ទាប់ពីក្រុមអេស្ប៉ាញឈ្នះក្រុមអ៊ីតាលីនៅ Europa League

(ហុងគ្រី) – គ្រូបង្វឹក Jose Mourinho ស្ដីបន្ទោសអាជ្ញាកណ្ដាល Anthony Taylor យ៉ាងចាស់ដៃ ពេលជួបគ្នានៅចំណតឡាន ក្រោយពីការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League។

«អ…ចង្រៃ អ…ថោកទាប» លោក Mourinho និយាយជាភាសាអង់គ្លេស ជេរទៅលើអាជ្ញាកណ្ដាល Taylor ដូច្នេះ។ បន្ទាប់មក គ្រូបង្វឹកក្រុម Roma របស់អ៊ីតាលីរូបនេះក៏ជេរបន្តជាភាសាអ៊ីតាលីថា «អ…ងា.ប់»។ ជាងនេះ មុនពេលឡើងឡានរបស់ក្រុម Roma លោក Mourinho ក៏បន្តថា «សូមអបអរ អ…ថោក»។

មុននោះ លោក Mourinho និងក្រុមកីឡាកររបស់ក្លឹប Roma យល់ថា អាជ្ញាកណ្ដាល Taylor លំអៀងទៅរក Sevilla។ ពួកគេចោទថា អាជ្ញាកណ្ដាលជនជាតិអង់គ្លេស មិនពិន័យកាតលឿងទីពីរចំពោះ Erik Lamela ពេលមានករណីប៉ះទង្គិចគ្នានៅចុងម៉ោង។ ក្រោយមក Lamela ក៏ចូលរួមទាត់មួយគ្រាប់នៅក្នុងការប្រកួតទាត់ប៉េណាំងទីម្ដងម្នាក់ឱ្យ Sevilla។ ខាងក្រុម Roma ក៏ក្ដៅចិត្តខ្លាំងនៅពេលអាជ្ញាកណ្ដាលមិនផ្លុំកញ្ចែពិន័យប៉េណាំងទី បន្ទាប់ពីដៃរបស់ Fernando ប៉ះបាល់ក្នុងតំបន់គ្រោះថ្នាក់ផងដែរ។

ក្រោយការប្រកួត លោក Mourinho ក៏បាននិយាយថា «អាជ្ញាកណ្ដាលទំនងជាជនជាតិអេស្ប៉ាញ។ ភាពអយុត្តិធម៌បានបង្ហាញតាមរយៈ Lamela ដែលគួរណាស់តែត្រូវបានពិន័យកាតលឿងទីពីរ»។

អាជ្ញាកណ្ដាល Taylor បានពិន័យកាតលឿងចំនួន 14 ដែលនេះគឺជាកំណត់ត្រាថ្មីក្នុងការប្រកួតផ្ដាច់ព្រ័ត្រមួយប្រកួតនៅទ្វីបអឺរ៉ុប។

នេះមិនមែនជាលើកដំបូងឡើយដែលលោក Mourinho បានទៅរកអាជ្ញាកណ្ដាលដើម្បីស្ដីបន្ទោស បន្ទាប់ពីការប្រកួត។ កាលពីឆ្នាំ 2012 ក្រោយការប្រកួតចាញ់ Barca នៅពានរង្វាន់ Copa del Rey របស់អេស្ប៉ាញ គ្រូបង្វឹករូបនេះក៏ត្រូវរងការចោទប្រកាន់ដូចគ្នានេះដែរ។

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League។

June 1, 2023

គ្រូបង្វឹកក្រុមបាល់ទាត់ Roma របស់អ៊ីតាលី បោះមេដាយចោល ក្រោយចាញ់អេស្ប៉ាញនៅវគ្គផ្ដាច់ព្រ័ត្រ Europa League

(ហុងគ្រី) – គ្រូបង្វឹក Jose Mourinho បោះមេដាយប្រាក់ទៅឱ្យអ្នកគាំទ្ររបស់ Roma បន្ទាប់ពីចាញ់ Sevilla ក្នុងការទាត់ប៉េណាំងទីម្ដងម្នាក់នៅវគ្គផ្ដាច់ព្រ័ត្រ Europa League។

គ្រូបង្វឹករបស់ក្រុមបាល់ទាត់ Roma របស់ប្រទេសអ៊ីតាលី បោះមេដាយរបស់ខ្លួនទៅកាន់អ្នកគាំទ្រនៅលើវិទិកាទស្សនិកជ ក្នុងទីលាន Puskas Arena របស់ប្រទេសហុងគ្រី ក្រោយពីការប្រកួតវគ្គផ្ដាច់ព្រ័ត្រកាលពីព្រលប់ថ្ងៃទី 31 ឧសភា 2023។ ក្រុម Roma បានចាញ់ក្រុម Sevilla របស់អេស្ប៉ាញ់ 1-4 ក្នុងការទាត់ប៉េណាំងទីម្ដងម្នាក់ បន្ទាប់ពីមានលទ្ធផលស្មើគ្នា 1-1 ក្នុង 120 នាទីកន្លង។

នេះគឺជាលើកដំបូងហើយដែលលោក Mourinho បានចាញ់នៅវគ្គផ្ដាច់ព្រ័ត្រក្នុងការប្រកួតនៅទ្វីបអឺរ៉ុប ក្រោយពីដណ្ដើមបានតំណែងជើងឯក Champions League ពីរលើក, Europa League ឬ UEFA Cup ពីរលើក និង Conference League មួយលើក។

នេះក៏ជាលើកទីពីរផងដែរ ដែលគ្រូបង្វឹក Mourinho បោះមេដាយចោល។ ក្នុងនោះ លើកទីមួយគឺពេលដែល Chelsea ចាញ់ Arsenal នៅ FA Community Shield ឆ្នាំ 2015 និង Man Utd ចាញ់ Real Madrid នៅ UEFA Super Cup ឆ្នាំ 2017៕

ក្រុម Sevilla របស់អេស្ប៉ាញ់ អបអរជ័យជម្នះ

គ្រូបង្វឹក Jose (Jose Luis Mendilibar) របស់ក្លឹបអេស្ប៉ាញ Sevilla លើកពាន គ្រាដែលគ្រូបង្វឹក Jose (Jose Mourinho) របស់ក្លឹបអ៊ីតាលី Roma កំពុងខឹងខ្លាំង

អ្នកគាំទ្រម្នាក់ទទួលបានមេដាយដែលគ្រូបង្វឹករបស់ Roma បោះឱ្យ

June 1, 2023

អាចម៍ផ្កាយដែលគោចរអមនឹងផែនដីតាំងពីឆ្នាំ 100 មុនគ្រិស្តសករាជ

ក្រុមអ្នកវិទ្យាសាស្ត្រប្រទះឃើញអាចម៍ផ្កាយ 2023 FW13 ដែលមានអង្កត់ផ្ចិតប្រហែល 15 ម៉ែត្រ បានក្លាយជា «អ្នកជិតខាង» របស់ផែនដីតាំងពីរាប់ពាន់ឆ្នាំមុនរហូតដល់ដល់បច្ចុប្បន្ន។

អាចម៍ផ្កាយ 2023 FW13 ស្ថិតក្នុងប្រភេទ «quasi-moon» ឬ «quasi-satellite» (ស្ដង់ដាព្រះចន្ទ ឬ ស្ដង់ដាផ្កាយរណប) ដែលមានន័យថា វាគោចរជុំវិញព្រះអាទិត្យទៅតាមពេលវេលាដូចទៅនឹងផែនដី ប៉ុន្តែទទួលរងឥទ្ធិពលតិចតួចបំផុតពីកម្លាំងទំនាញរបស់ផែនដី។ នេះបើតាម Live Science ចុះផ្សាយកាលពីថ្ងៃទី 31 ឧសភា 2023។

យោងតាមណាសា អង្កត់ផ្ចិតរបស់ 2023 FW13 ត្រូវបានអ្នកវិទ្យាសាស្ត្រគណនាឃើញថា ប្រហែល 15 ម៉ែត្រ។ នៅក្នុងគន្លងតារាវិថីជុំវិញព្រះអាទិត្យ អាចម៍ផ្កាយ 2023 FW13 ក៏វិលជុំវិញផែនដី ក្នុងគម្លាតប្រហែល 14 លានគីឡូម៉ែត្រ។ ចំណែកព្រះចន្ទរបស់មនុស្សដែលមានអង្កត់ផ្ចិត 3,474 គីឡូម៉ែត្រ មានគន្លាតពីផែនដីជិតបំផុតត្រឹម 364,000 គីឡូម៉ែត្រ។

ស្ថានីយសង្កេតតារា Pan-STARRS ដែលមានទីតាំងនៅលើកំពូលភ្នំភ្លើង Haleakala ក្នុងរដ្ឋ Hawaii បានប្រទះឃើញ 2023 FW13 កាលពីខែមីនា ឆ្នាំ 2023។ វត្តមានរបស់អាចម៍ផ្កាយនេះ ក្រោយមកក៏ត្រូវបានបញ្ជាក់ដោយតេឡេស្កុបកាណាដា-បារាំង-ហាវាយ និងតេឡេស្កុបចំនួនពីរទៀតនៅ Arizona។ ថ្ងៃទី 01 មេសា 2023 មជ្ឈមណ្ឌលអាចម៍ផ្កាយនៃសហព័ន្ធតារាសាស្ត្រអន្តរជាតិ (IAU) បានបញ្ចូល 2023 FW13 ទៅក្នុងបញ្ជីជាផ្លូវការ។

ការគណនាមួយចំនួនបង្ហាញថា 2023 FW13 បានធ្វើជា «អ្នកជិតខាង» របស់ផែនដីយ៉ាងហោចក៏ចាប់ពីឆ្នាំ 100 មុនគ្រិស្តសករាជ។ Adrien Coffinet តារាវិទូដំបូងគេដែលបានចាត់ 2023 FW13 ទៅក្នុងប្រភេទស្ដង់ដាព្រះចន្ទ អះអាងថា អាចម៍ផ្កាយនេះនឹងបន្តផ្លាស់ទីទៅតាមគន្លងគោចរបច្ចុប្បន្នរហូតដល់ប្រហែលឆ្នាំ 3700។

«ដំណឹងល្អគឺថា គន្លងគោចរបែបនេះនឹងមិននាំឱ្យមានហេតុការណ៍ប៉ះទង្គិចជាមួយផែនដីនោះទេ» Alan Harris តារាវិទូនៅវិទ្យាស្ថានអវកាសវិទ្យាឱ្យដឹងដូច្នេះ។

2023 FW13 មិនមែនជាអាចម៍ផ្កាយប្រភេទស្តង់ដាព្រះចន្ទតែមួយគត់របស់ផែនដីនោះឡើយ។ អាចម៍ផ្កាយ Kamo’oalewa ដែលត្រូវបានរកឃើញកាលពីឆ្នាំ 2016 ក៏ត្រូវបានចាត់ចូលក្នុងប្រភេទនេះ។ Kamo’oalewa គោចរក្បែរផែនដីនៅក្នុងគន្លងជុំវិញព្រះអាទិត្យ។ ការសិក្សាស្រាវជ្រាវកាលពីឆ្នាំ 2021 បង្ហាញថា Kamo’oalewa អាចជាបំណែកមួយរបស់ព្រះចន្ទកាលពីអតីតកាល។

យោងតាមទិន្នន័យខាងលើ យើងអាចចាត់ទុកបានថា បច្ចុប្បន្ន ផែនដីរបស់មនុស្សមានព្រះចន្ទរហូតដល់បីដួងទៅហើយ៕

June 1, 2023

តាក់ស៊ីហោះអគ្គិសនីល្បឿន 300 គីឡម៉ែត្រ/ម៉ោងរបស់ហូឡង់ នឹងកែប្រែវិស័យអាកាសចរណ៍

(ហូឡង់) – តាក់ស៊ីហោះ Electron 5 ដែលអាចដឹកអ្នកដំណើរបាន 5 នាក់ ដំណើរទាំងស្រុងដោយថាមពលអគ្គិសនី និងហោះហើរបានចម្ងាយ 750 គីឡូម៉ែត្រ។

បណ្ដាក្រុមហ៊ុនអាកាសចរណ៍បច្ចុប្បន្ន តែងតែជាអ្នកកំណត់កាលវិភាគនៃជើងហោះហើរ និងគោលដៅដែលត្រូវចុះចត។ ក៏ប៉ុន្តែ ក្រុមហ៊ុនធុរកិច្ចថ្មីរបស់ហូឡង់ Electron Aviation បំបែកការកំណត់នេះ នៅពេលផ្ដល់បណ្ដាញជើងហោះហើរមួយដែលអនុញ្ញាតឱ្យអ្នកដំណើរជ្រើសរើសពេលវេលា និងទីតាំងហោះហើរដោយសេរី។ Electron Aviation ក៏សហការជាមួយព្រលានយន្តហោះ Twente ដើម្បីផ្ដល់ការហោះហើរដែលមិនបំភាយឧស្ម័នកាបូន ដោយប្រើប្រាស់ Electron 5 ដែលជាយន្តហោះតាក់ស៊ីដំណើរការដោយអគ្គិសនីទាំងស្រុង នៅឆ្នាំ 2027។

Electron 5 អាចដឹកអ្នកដំណើរបាន 5 នាក់។ ភាគីក្រុមហ៊ុនបានអះអាងថា យន្តហោះអគ្គិសនីនេះនឹងនាំមកនូវផាសុកភាព និងបទពិសោធន៍ល្អដល់អតិថិជន។ នេះបើតាម Design Boom ចុះផ្សាយកាលពីថ្ងៃទី 30 ឧសភា 2023។

យន្តហោះអគ្គិសនីនេះមានបង្អួចដែលអាចមើលឃើញគ្រប់ទិស ជួយឱ្យអ្នកដំណើរគយគន់ទេសភាពខាងក្រៅបានដោយងាយ។ Electron 5 ក៏បំពាក់ម៉ូទ័របម្រុងនៅខាងក្រោយដើម្បីធានាសុវត្ថិភាពក្នុងពេលហោះហើរ។ កៅអីក្នុងយន្តហោះនេះអាចបត់បែនបានល្អ ជួយឱ្យឱ្យអ្នកដំណើររៀបចំកន្លែងអង្គុយបានតាមចិត្ត។

យន្តហោះអគ្គិសនី Electron 5 គ្រោងនឹងហោះហើរលើកម្ពស់ 3,000 ម៉ែត្រ ហើយអាចហោះក្នុងល្បឿន 300 គីឡូម៉ែត្រ/ម៉ោង និងហោះបានចម្ងាយ 750 គីឡូម៉ែត្រ បន្ទាប់ពីបញ្ចូលថាមពលមួយពេញ។ ដោយសារតែជាសេវាកម្មតាមសំណើ ដូច្នេះតាក់ស៊ីហោះនេះ នឹងហោះហើរតែនៅពេលអតិថិជនបានកក់សំបុត្រតាមរយៈកម្មវិធីទូរស័ព្ទរបស់ក្រុមហ៊ុន។ ពីព្រលានយន្តហោះ Twente យន្តហោះអគ្គិសនី Electron 5 នេះ អាចទៅដល់ទីក្រុងបែរឡាំងរបស់អាល្លឺម៉ង់, ក្រុងឡុងដ៍របស់អង់គ្លេស ឬប៉ារីសរបស់បារាំង ដោយប្រើពេលមិនដល់ពីរម៉ោង៕

June 1, 2023

អូស្ត្រាលីផ្ដល់រង្វាន់មួយលានដុល្លារអាម៉េរិក ដើម្បីរកកុមារបាត់ខ្លួនកាលពីជិតប្រាំទសវត្សរ៍កន្លង

សមត្ថកិច្ចអូស្ត្រាលី ប្រកាសថានឹងផ្ដល់ប្រាក់រង្វាន់មួយលានដុល្លារអាម៉េរិក ដល់អ្នកទាំងឡាយណាដែលផ្ដល់ព័ត៌មាននាំទៅរកការចាប់ខ្លួន ផ្ដន្ទាទោសជនល្មើសនៅក្នុងករណីកុមារាដែលបានបាត់ខ្លួនកាលពីជិត 50 ឆ្នាំមុន។

កុមារារងគ្រោះឈ្មោះ James Patrick Taylor ហៅក្រៅថា Jimmy បានបាត់ខ្លួនកាលពីថ្ងៃទី 29 សីហា 1974 ក្រោយពីដើរពីផ្ទះនៅក្នុងទីរួមស្រុក Derby តំបន់ Kimberley ក្នុងរដ្ឋអូស្ត្រាលីខាងលិច ទៅកាន់ហាង Lwoys ដែលមានចម្ងាយជិតមួយគីឡូម៉ែត្រ។ នេះបើតាម CBS News ចុះផ្សាយកាលពីថ្ងៃទី 31 ឧសភា 2023។

Taylor កាលណោះមានអាយុ 12 ឆ្នាំ ជាក្មេងរួសរាយ មានចរិតម្ចាស់ការ និងតែងតែយកក្រាសសិតសក់តាមខ្លួន។ Taylor រស់នៅជាមួយឪពុកម្ដាយ បងប្អូនប្រាំនាក់ និងសាច់ញាតិមួយចំនួន។ កុមារនេះធ្លាប់ដើរទៅទិញគ្រឿងទេសឱ្យម្ដាយតែម្នាក់ឯងជាញឹកញាប់ ហើយហាង Lwoys គឺជាកន្លែងដែល Tayor ចូលចិត្ត។

លើកចុងក្រោយដែលសាក្សីបានឃើញ Taylor គឺនៅពេលកុមារនេះឡើងរថយន្តនៅខាងក្រៅហាង Lwoys បន្ទាប់ពីបានចូលទិញភេសជ្ជៈ។ សាក្សីបានឱ្យដឹងថា អ្នកបើកបរដែលមានវ័យប្រហែលពី 25 ទៅ 35 ឆ្នាំ បង្ខំឱ្យ Jimmy ចូលរថយន្ត។ Taylor ពេលនោះដើរជើងទទេ និងពាក់អាវយឺតដៃខ្លីពណ៌ប្រផេះ ស្លៀកខោកីឡាខ្លីពណ៌ខ្មៅ។

គ្រួសាររបស់ Taylor ស្មានថា កុមារនេះទៅលេងផ្ទះមិត្តភក្ដិនៅឯកសិដ្ឋាន Myroodah ដែលមានចម្ងាយពី Derby ប្រហែល 90 នាទីពេលជិះរថយន្ត។ មកដល់ថ្ងៃទី 05 កញ្ញា ឆ្នាំ 1974 ឪពុករបស់ Taylor ក៏បានរាយការណ៍ប្រាប់ប៉ូលិសថា Taylor បាត់ខ្លួន។

ក្រោយមក Taylor ក៏មិនបានទាក់ទងមកកាន់គ្រួសារ ឬមិត្តភក្ដិឡើយ។ សមត្ថកិច្ចក៏មិនអាចកំណត់បានអត្តសញ្ញាណជនសង្ស័យដែលទាក់ទិននឹងករណីបាត់ខ្លួននេះ។

តំបន់អូស្ត្រាលីខាងលិច (Western Australia)

មកដល់បច្ចុប្បន្ន ក្រោយរយៈពេលជិតកន្លះសតវត្សរ៍ ប៉ូលិសក៏បានអំពាវនាវឱ្យសាធារណជនផ្ដល់ព័ត៌មាន ឬទាក់ទងមកកាន់សមត្ថកិច្ច បើសិនបានដឹងដំណឹងទាក់ទិននឹងករណីនេះ។

ករណីរបស់ Taylor គឺជាមួយក្នុងចំណោម 64 រឿងក្ដីបាត់ខ្លួន និងឃាតកម្ម ដែលមិនទាន់បានបិទបញ្ចប់នៅអូស្ត្រាលីខាងលិច។ ក្នុងនោះមានករណីជាច្រើនបានកើតឡើងតាំងពីអំឡុងទសវត្សរ៍ឆ្នាំ 1970។ ជនរងគ្រោះនៅក្នុងករណីជាច្រើនមិនត្រូវបានគេរកឃើញ។

ថ្មីៗនេះ សមត្ថកិច្ចអូស្ត្រាលីបានប្រកាសថា នឹងប្រគល់ប្រាក់រង្វាន់មួយលានដុល្លារអាម៉េរិកដល់អ្នកទាំងឡាយណាដែលផ្ដល់ព័ត៌មាននាំទៅរកការចាប់ខ្លួន និងកាត់ទោសជនដៃដល់នៅក្នុងរឿងក្ដីទាំងឡាយដែលបាននិយាយខាងលើ៕

June 1, 2023

អាម៉េរិកផ្ដល់ជំនួយជាមីស៊ីលការពារដែនអាកាសបន្ថែមដល់អ៊ុយក្រែន

សហរដ្ឋអាម៉េរិកប្រកាសអំពីកញ្ចប់ជំនួយផ្នែកយោធាតម្លៃ 300 លានដុល្លារទៅឱ្យអ៊ុយក្រែន ក្នុងនោះមានទាំងមីស៊ីលសម្រាប់ប្រព័ន្ធ Patriot និងប្រព័ន្ធការពារដែនអាកាសជាច្រើនប្រភេទផ្សេងទៀត។

កាលពីថ្ងៃទី 31 ឧសភា មន្ទីរបញ្ចកោណបានប្រកាសថា កញ្ចប់ជំនួយតម្លៃ 300 លានដុល្លារសម្រាប់អ៊ុយក្រែន នឹងបន្ថែមមីស៊ីលការពារដែនអាកាសរយៈចម្ងាយឆ្ងាយ Patriot ក៏ដូចជាបន្ថែមប្រព័ន្ធការពារដែនអាកាសរយៈចម្ងាយខ្លី Avenger និងមីស៊ីលបាញ់ពីលើស្មា Stinger។ អាម៉េរិកក៏ផ្ដល់បន្ថែមមីស៊ីលអាកាសប្រឆាំងអាកាសរយៈចម្ងាយមធ្យម AIM-7, រ៉ុក្កែតសម្រាប់ប្រព័ន្ធ HIMARS, គ្រាប់កាំភ្លើងធំ 155 មម និង 105 មម រួមនឹងរ៉ុក្កែត Zuni និងគ្រាប់កាំភ្លើងសម្រាប់ទាហានថ្មើរជើងជាង 30 លានគ្រាប់ផងដែរ។

នេះគឺជាកញ្ចប់ជំនួយជាអាវុធលើកទី 39 របស់អាម៉េរិក សម្រាប់អ៊ុយក្រែន ធ្វើឱ្យជំនួយយោធារបស់វ៉ាស៊ីងតោនសម្រាប់ទីក្រុងកៀវ រាប់ចាប់តាំងពីខែកុម្ភៈ 2022 ឡើងដល់ 37.6 ពាន់លានដុល្លារ។

ប្រកាសខាងលើត្រូវបានធ្វើឡើងក្នុងគ្រាដែលអ៊ុយក្រែនកំពុងត្រៀមខ្លួនសម្រាប់ការវាយបកទ្រង់ទ្រាយធំ ដើម្បីរុញច្រានកងទ័ពរុស្ស៊ី។ ថ្មីៗនេះ ទឹកដីរុស្ស៊ី ចាប់ផ្ដើមរងការវាយប្រហារពីក្រុមប្រដាប់អាវុធអាថ៌កំបាំង។ មូស្គូចោទថា ការវាយប្រហារនេះគឺជាស្នាដៃរបស់ទីក្រុងកៀវ ប៉ុន្តែត្រូវបានអ៊ុយក្រែនបដិសេធ។ ចំណែកទីក្រុងវ៉ាស៊ីងតោនវិញ កន្លងមកក៏ធ្លាប់បានព្រមានដល់ទីក្រុងកៀវថា មិនត្រូវប្រើប្រាស់អាវុធដែលផលិតដោយអាម៉េរិក ទៅវាយប្រហារលើទឹកដីរុស្ស៊ី៕

June 1, 2023

Tag: មាន​

Tag: មាន