ជំនួយ - La Reine Media

កុមារបួននាក់វង្វេងក្នុងព្រៃអាម៉ាហ្សូនអស់ 17 ថ្ងៃ ប៉ុន្តែសំណាងល្អនៅមានជីវិត

កងកម្លាំងជួយសង្គ្រោះបានរកឃើញកុមារបួននាក់ដែលបានបាត់ខ្លួនអស់រយៈពេល 17 ថ្ងៃ ក្រោយពីជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន ដែលស្ថិតក្នុងប្រទេសកូឡុំប៊ី។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

«នៅក្នុងការប្រឹងប្រែងមិនឈប់ឈរ កងទ័ពបានរកឃើញក្មេងបួននាក់ដែលបានបាត់ខ្លួនក្រោយហេតុការណ៍ធ្លាក់យន្តហោះនៅ Guaviare» ប្រធានាធិបតីកូឡុំប៊ី Gustavo Petro ប្រកាសលើ Twitter កាលពីថ្ងៃទី17 ឧសភាដូច្នេះ ហើយថា ការរកឃើញនេះគឺជា «ភាពរីករាយសម្រាប់ប្រទេសជាតិ»។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

មួយក្នុងចំណោមឧទ្ធម្ភាគទាំងបីគ្រឿងបំពាក់ឧបករណ៍បំពងសំឡេង បានធ្វើការស្វែងរកក្នុងរង្វង់ 1,500 ម៉ែត្រ និងបានចាក់ផ្សាយសំឡេងជីដូនរបស់ក្មេងទាំងនោះ ដែលប្រាប់ថា «ឈប់ផ្លាស់ទីក្នុងព្រៃដើម្បីរង់ចាំការជួយសង្គ្រោះ»។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប។

ក្មេងរងគ្រោះទាំងបួននាក់នេះត្រូវបានរកឃើញក្នុង «ស្ថានភាពសុខភាពធម្មតា បើទោះមានរបួសស្នាមខ្លះ» ក្រោយពីរង្វេង 17 ថ្ងៃនៅក្នុងព្រៃ។

អាជ្ញាធរមិនទាន់ប្រកាសអំពីមូលហេតុនៃករណីធ្លាក់យន្តហោះនេះនៅឡើយ។ ប៉ុន្តែ ប៉ុន្មាននាទីមុនពេលជួបគ្រោះថ្នាក់ ពីឡុតបានបញ្ជូនសញ្ញាប្រាប់ថា ម៉ាស៊ីនយន្តហោះមានបញ្ហា។ ជនជាតិកូឡុំប៊ី នៅក្នុងតំបន់ខាងលើនេះ តែងតែធ្វើដំណើរតាមឧទ្ធម្ភាគចក្រ ដោយសារតែផ្លូវគោកមិនមានអំណោយផលល្អសម្រាប់ការធ្វើដំណើរ។

យោងតាមអង្គការជនជាតិដើមភាគតិចកូឡុំប៊ី (ONIC) ជីវភាពរបស់ជនជាតិ Huitoto បានសម្របខ្លួននឹងស្ថានភាពលំបាកនៅក្នុងព្រៃអាម៉ាហ្សូន និងថែរក្សាប្រពៃណីបរបាញ់សត្វ ក៏ដូចជាមានជំនាញក្នុងការបេះផ្លែឈើក្នុងព្រៃជាអាហារ៕

May 18, 2023

គ្រូបង្វឹកឥណ្ឌូណេស៊ីថា ថៃធ្វើឱ្យមានអំពើហិង្សា ខណៈគ្រូបង្វឹកថៃថា គូប្រកួតខ្វះស្មារតីកីឡា

គ្រូបង្វឹករបស់ក្រុមបាល់ទាត់ជម្រើសជាតិឥណ្ឌូណេស៊ី លោក Indra Sjafri យល់ថា ការដែលក្រុមគ្រូបង្វឹកថៃចេញអបអរសាទរឌឺដង គឺជាមូលហេតុនាំឱ្យមានការប៉ះទង្គិចគ្នាក្នុងវគ្គផ្ដាច់ព្រ័ត្រនៅស៊ីហ្គេមលើកទី 32 កាលពីយប់មិញ។

«អាជ្ញាកណ្ដាលប្រកាសថាមានការថែមម៉ោង 7 នាទី ទើបនៅពេលអស់ម៉ោងនេះ យើងគិតថាការប្រកួតបានចប់ ក៏រត់ចូលទីលានអបអរ ពុំមែនចង់បង្កហេតុជាមួយអ្នកណាឡើយ។ ភ្លាមនោះ អាជ្ញាកណ្ដាលឱ្យថែមម៉ោងរហូតដល់ 11 នាទី។ ពេលគ្រាប់បាល់ស្មើ 2-2 ថៃក៏រុលមកកន្លែងរបស់យើងដើម្បីឌឺដង ធ្វើឱ្យការប្រកួតប្រែជាច្របូកច្របល់» គ្រូបង្វឹករបស់ឥណ្ឌូណេស៊ី លោក Indra Sjafri និយាយដូច្នេះ បន្ទាប់ពីការប្រកួតបានបញ្ចប់។

លោក Indra Sjafri បន្ថែមថា «ពេលមានគ្រាប់បាល់ទីបី ជំនួយការ និងកីឡាកររបស់ខ្ញុំក៏អបអរឌឺទៅវិញ។ សម្រាប់ខ្ញុំ សកម្មភាពនេះរបស់ក្រុមទាំងពីរគឺមិនអាចទទួលយកបាន»។

ចំណែកលោក Issara Sritaro ដែលជាគ្រូបង្វឹករបស់ក្រុមថៃវិញ និយាយថា «ការដែលយើងត្រូវបានទាត់ចូលទីមុនគឺមិនអាចទទួលយកបាន។ ក៏ប៉ុន្តែ ឥណ្ឌូណេស៊ី ក៏លេងដោយខ្វះស្មារតីកីឡា»។

ទោះជាយ៉ាងណាក៏ដោយ នៅពេលចប់ការប្រកួត ក្រុមទាំងពីរក៏ពុំមានបញ្ហាអ្វីនឹងគ្នាទៀតនោះដែរ។ នេះគឺជាបទពិសោធន៍ដែលគួរយកជាមេរៀន ដែលយើងមិនគួរឱ្យមានករណីបែបនេះកើតឡើង ព្រោះវាប៉ះពាល់ដល់អ្នកគាំទ្រ និងកីឡាករផងដែរ។

កាលពីព្រលប់ថ្ងៃទី 16 ឧសភា ក្នុងការប្រកួតវគ្គផ្ដាច់ព្រ័ត្រនៅលើទីលានបាល់ទាត់របស់ពហុកីឡដ្ឋានជាតិអូឡាំពិក សមាជិកក្រុមកីឡាថៃ និងឥណ្ឌូណេស៊ី បានប៉ះទង្គិចគ្នាពីរលើក។ ក្នុងការថែមម៉ោងនៅតង់ទីពីរ សំឡេងកញ្ចែរបស់អាជ្ញាកណ្ដាលក៏បានធ្វើឱ្យក្រុមឥណ្ឌូណេស៊ីយល់ច្រលំថាអស់ម៉ោងប្រកួត ទើបនាំគ្នារត់ចូលទីលានអបអរសាទរ គ្រាដែលសំឡេងកញ្ចែនោះគឺជាការពិន័យចំពោះក្រុមឥណ្ឌូណេស៊ី។ ស្ថានការណ៍នេះបាននាំទៅរកគ្រាប់បាល់ស្មើ 2-2 ដោយកីឡាករថៃបានស៊ុតបញ្ចូលទីរបស់ឥណ្ឌូណេស៊ី។ បន្ទាប់ពីស៊ុតចូលភ្លាម កីឡាករថៃក៏រត់ទៅខាងមុខតំបន់អ្នកគាំទ្រឥណ្ឌូណេស៊ីដើម្បីសំដែងការអបអរ ឌឺដង ហើយក៏មានការប៉ះទង្គិចគ្នាមួយប្រាវ។

គ្រូបង្វឹករបស់ឥណ្ឌូណេស៊ី លោក Indra Sjafri

ចូលដល់តង់ទីពីរ បន្ទាប់ពីរកបានមួយគ្រាប់ទៀតដែលជួយឱ្យនាំមុខ 3-2 ឥណ្ឌូណេស៊ីក៏អបអរសងសឹក ហើយក៏មានការប្រវាយប្រតប់គ្នាជាថ្មី ធ្វើឱ្យការប្រកួតត្រូវអាក់ខានច្រើននាទី។ ពេលនោះ កាត់ក្រហមជាច្រើនក៏ត្រូវបានហូតចេញជាបន្តបន្ទាប់។

បន្ទាប់ពីស្ថានការណ៍ត្រូវបានគ្រប់គ្រង ថៃក៏ត្រូវបាត់បង់កីឡាករពីររូបដោយសារកាត់ក្រហម។ ដោយមានគ្នាតែ 9 នាក់ ក្រុមថៃក៏ត្រូវចាញ់ 2 គ្រាប់ទៀត នាំឱ្យឥណ្ឌូណេស៊ីឈ្នះ 5-2 ជាស្ថាពរ។ បរាជ័យលើកនេះរបស់ U22 ថៃ នាំឱ្យ U22 ឥណ្ឌូណេស៊ី ដណ្ដើមបានមេដាយមាសលើកទីបីនៅស៊ីហ្គេម៕

May 17, 2023

រថភ្លើងអាកាស បរក្រោមផ្លូវដែកមួយជួរនៅប្រទេសចិន ដំណើរការស្វ័យប្រវត្ត

រថភ្លើងដែលមានល្បឿន 60 គីឡូម៉ែត្រ/ម៉ោង ស្ថិតនៅក្នុងទីក្រុង Wuhan ខេត្ត Hubei ប្រទេសចិន ដំណើរការដោយស្វ័យប្រវត្ត និងស្ងាត់ នាំមកនូវបទពិសោធន៍ផាសុកភាពដល់អ្នកដំណើរ។

រថភ្លើងដែលមានឈ្មោះថា «Optics valley photon» ត្រូវបានព្យួរក្រោមផ្លូវដែកមួយជួរ ធ្វើឱ្យវាដូចទៅនឹងការបរត្រលប់ពីលើមកក្រោម។ នៅពេលរត់ខាងលើទីក្រុងនៅពេលយប់ រថភ្លើងនេះមានពន្លឺដ៏ស្រស់ស្អាត។

ធៀបនឹងរថភ្លើងអគ្គិសនីក្រោមដីដែលបរលើផ្លូវដែកពីរជួរបច្ចុប្បន្ន រថភ្លើងព្យួរក្រោមផ្លូវដែកមួយជួរនេះស្ងាត់ ល្អ និងមានផាសុកភាពជាង។ រថភ្លើងនេះក៏មិនត្រូវបានរំខានដោយមនុស្ស ឬយានយន្តដទៃ។ អស្ចារ្យជាងនេះ នោះគឺអ្នកដំណើរអាចគយគនទេសភាពទីក្រុងពីជ្រុងមួយខុសពីរថភ្លើងធម្មតា តាមរយៈបាតធ្វើពីកញ្ចក់។

រថភ្លើងព្យួរបញ្ច្រាសក្រោមផ្លូវដែកមួយជួរនេះដំណើរការប្រកបដោយភាពឆ្លាតវៃ ក្នុងល្បឿនអតិបរមា 60 គីឡូម៉ែត្រ/ម៉ោង។ ដំណើរការទាំងស្រុងរបស់រថភ្លើងនេះ រួមមាន ការបើកបិទទ្វារ ការចាប់ផ្ដើមរត់ និងការចូលចតក្នុងស្ថានីយ គឺសុទ្ធតែធ្វើឡើងដោយស្វ័យប្រវត្ត មិនបាច់មានជំនួយពីមនុស្ស។

រថភ្លើងនេះកំពុងដំណើរការដូចទៅនឹងផ្លូវទស្សនកិច្ចសម្រាប់ទេសចរនៅតំបន់អភិវឌ្ឍបច្ចេកវិទ្យាជាន់ខ្ពស់ East Lake (East Lake Hi-tech Development Zone) របស់ទីក្រុង Wuhan។

May 15, 2023

គ្រូបង្វឹក Sjafri ថា U22 ថៃ និង U22 វៀតណាម នឹងប្រឹងគេចពី U22 ឥណ្ឌូណេស៊ី

U22 ថៃ និង U22 វៀតណាម នឹងប្រឹងប្រែងដើម្បីនាំមុខគេនៅពូល B ក្នុងបំណងគេចពី U22 ឥណ្ឌូណេស៊ីនៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសរបស់ស៊ីហ្គេមលើកទី 32។

«យើងមិនត្រូវជ្រើសរើសគូប្រកួត។ វៀតណាម និងថៃទេតើ ទើបជាអ្នកត្រូវគិតគូរថាតើចង់ជួបគូប្រកួតមួយណា និងគេចពីគូប្រកួតមួយណានៅវគ្គពាក់កណ្ដាលផ្ដាច់ព្រ័ត្រ» គ្រូបង្វឹក Indra Sjafri របស់ U22 ឥណ្ឌូណេស៊ី និយាយដូច្នេះ បន្ទាប់ពីបានផ្ដួលកម្ពុជាក្នុងលទ្ធផល 2-1 នៅពហុកីឡដ្ឋានជាតិអូឡាំពិក កាលពីព្រលប់ថ្ងៃទី 10 ឧសភា។

ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U22) របស់ឥណ្ឌូណេស៊ី បានយកឈ្នះ 3-0 លើហ្វ៊ីលីពីន, 5-0 លើមីយ៉ាន់ម៉ា និង 3-0 លើទីម័រខាងកើត ហើយក៏បានឡើងដល់វគ្គពាក់កណ្ដាលផ្ដាច់ព្រ័ត្រឆាប់ជាងគេមួយប្រកួត។ នៅក្នុងការប្រកួតជើងចុងក្រោយនៅពូល A គ្រាដែលមានសំបុត្រសម្រាប់ការប្រកួតវគ្គបន្ត U22 ឥណ្ឌូណេស៊ី ក៏នៅតែផ្ដួលកម្ពុជាក្នុងលទ្ធផល 2-1។

(ពីឆ្វេងទៅស្ដាំ) លោក Sumardji អ្នកគ្រប់គ្រងក្រុម, លោក Indra Sjafri ប្រធានក្រុមគ្រូបង្វឹក និង លោក Bima Sakti ជំនួយការប្រធានក្រុមគ្រូបង្វឹករបស់ U22 ឥណ្ឌូណេស៊ី

ដោយសារតែឈរលើកំពូលតារាង A ដូច្នេះ U22 ឥណ្ឌូណេស៊ីនឹងប្រកួតក្នុងវគ្គពាក់កណ្ដាលផ្ដាច់ព្រ័ត្រជាមួយនឹងក្រុមលេខពីរនៅពូល B គឺ U22 ថៃ ឬ U22 វៀតណាម ដែលមានសំបុត្រឡើងទៅវគ្គបន្តរួចហើយ។ U22 ថៃ និង U22 វៀតណាម នឹងត្រូវប៉ះគ្នានៅម៉ោង 19 យប់ថ្ងៃទី 11 ឧសភានេះ នៅឯកីឡដ្ឋានព្រីនស៍ ដែលស្ថិតនៅភូមិឃ្មួញ សង្កាត់ឃ្មួញ ខណ្ឌសែនសុខ រាជធាននីភ្នំពេញ ដើម្បីដណ្ដើមតំណែងកំពូលតារាង B។ ឱ្យតែមានលទ្ធផលស្មើ U22 ថៃ នឹងក្លាយជាអ្នកគ្រប់គ្រងពូល B ដោយសារមាន 9 ពិន្ទុ ស្មើនឹង U22 វៀតណាម ប៉ុន្តែ ថៃមានគ្រាប់បាល់ចំណេញ (+7) ខ្ពស់ជាងវៀតណាម (+5)។

គ្រូបង្វឹកឥណ្ឌូណេស៊ី លោក Indra Sjafri និយាយថា «ខ្ញុំជឿជាក់ថា កីឡាកររបស់យើងនឹងលេងបានល្អ ហើយដណ្ដើមបានសំបុត្រទៅប្រកួតបន្ត… យើងបានត្រៀមសម្រាប់រាល់ការប្រកួតនៅវគ្គពាក់កណ្ដាលផ្ដាច់ព្រ័ត្រ …តាំងពីថ្ងៃដំបូងមកម្លេះ»។

May 11, 2023

អាម៉េរិកប្រកាសកញ្ចប់ជំនួយថ្មីតម្លៃជាងមួយពាន់លានដុល្លារសម្រាប់អ៊ុយក្រែន

សហរដ្ឋអាម៉េរិកគ្រោងនឹងផ្ដល់ជំនួយផ្នែកយោធាបន្ថែមចំនួន 1.2 ពាន់លានដុល្លារដល់អ៊ុយក្រែន ដើម្បីបង្កើនសមត្ថភាពការពារដែនអាកាស។

មន្ត្រីអាម៉េរិក កាលពីថ្ងៃទី 08 ឧសភា បានឱ្យដឹងថា ប្រទេសនេះគ្រោងនឹងប្រកាសអំពីកញ្ចប់ជំនួយថ្មីនៅថ្ងៃទី 09 ឧសភា។ កញ្ចប់ជំនួយនេះគ្រោងនឹងត្រូវបានផ្ដល់ឱ្យក្នុងរយៈពេលច្រើនខែ និងច្រើនឆ្នាំទៀតដើម្បីធានាសន្តិសុខក្នុងអនាគតរបស់អ៊ុយក្រែន ខុសពីជំនួយជាអាវុធ និងសម្ភារយោធាដែលត្រូវបានយកពីឃ្លាំងរបស់កងទ័ពអាម៉េរិកដោយផ្ទាល់ដែលធ្លាប់បានធ្វើឡើងនាពេលកន្លង។

កញ្ចប់ជំនួយថ្មីដែលមានតម្លៃ 1.2 ពាន់លានដុល្លារនេះនឹងធ្វើឱ្យកញ្ចប់ជំនួយយោធាសរុបដែលអាម៉េរិកផ្ដល់ឱ្យអ៊ុយក្រែន កើនឡើងដល់ជិត 37 ពាន់លានដុល្លារ រាប់ចាប់តាំងពីរុស្ស៊ីចូលឈ្លានពានអ៊ុយក្រែនកាលពីខែកុម្ភៈ 2022 រហូតដល់បច្ចុប្បន្ន។

ព័ត៌មាននេះត្រូវបានលើកឡើងនៅក្នុងគ្រាដែលប្រព័ន្ធការពារដែនអាកាសរបស់អ៊ុយក្រែនប្រឈមនឹងសម្ពាធខ្លាំងពីការវាយប្រហារតាមផ្លូវអាកាសរបស់រុស្ស៊ី នៅមុនការវាយបកទ្រង់ទ្រាយធំរបស់ទីក្រុងកៀវ។

May 9, 2023

អាម៉េរិកអាចផ្ដល់ជំនួយជាអាវុធតម្លៃ 500 លានដុល្លារដល់កោះតៃវ៉ាន់

រដ្ឋាភិបាលអាម៉េរិក អាចយកអាវុធតម្លៃ 500 លានដុល្លារពីឃ្លាំង ដើម្បីជញ្ជូនទៅឱ្យកោះតៃវ៉ាន់ភ្លាមៗ ក្នុងពេលភាពតានតឹងក្នុងតំបន់បន្តកើតឡើង។

ប្រភពព័ត៌មាននានា កាលពីថ្ងៃទី 05 ឧសភា បានឱ្យដឹងថា កញ្ចប់ជំនួយសម្រាប់កោះតៃវ៉ាន់ នឹងទាក់ទិននឹងការដកអាវុធ ឬសម្ភារៈជំនួយនៅក្នុងឃ្លាំងអាវុធរបស់សហរដ្ឋអាម៉េរិក ទៅតាមច្បាប់ «សិទ្ធិបែងចែកប្រភពធនធានរបស់ប្រធានាធិបតី (PDA)» ប៉ុន្តែមិនទាន់ដឹងច្បាស់អំពីប្រភេទអាវុធ ក៏ដូចជាពេលវេលានៃការប្រគល់អាវុធ។

អ្នកនាំពាក្យរបស់មន្ទីរបញ្ចកោណ ក្រោយមកក៏បានបដិសេធការអធិប្បាយអំពីបញ្ហាដែលថា តើសហរដ្ឋអាម៉េរិកបានពន្លឿនការផ្ដល់ជំនួយជាអាវុធតម្លៃ 500 លានដុល្លារទៅឱ្យកោះតៃវ៉ាន់ ឬអត់។ «វិធីដែលយើងធ្វើគឺនៅតែសមស្របជាមួយនឹងគោលនយោបាយយូរអង្វែងរបស់សហរដ្ឋអាម៉េរិក។ យើងកំពុងប្រឹងប្រែងអនុវត្តកាតព្វកិច្ចទៅតាមច្បាប់ស្ដីពីទំនាក់ទំនងជាមួយកោះតៃវ៉ាន់ ហើយនឹងបន្តធ្វើដូច្នេះ» នេះបើតាមអ្នកនាំពាក្យរបស់មន្ទីរបញ្ចកោណ។

អាជ្ញាធរចិននៅទីក្រុងប៉េកាំង មិនទាន់បញ្ចេញប្រតិកម្មតបតនៅឡើយ ទាក់ទិននឹងព័ត៌មាន និងការលើកឡើងខាងលើ។

សភាអាម៉េរិក មុននោះបានផ្ដល់សិទ្ធិឱ្យរដ្ឋាភិបាលផ្ដល់ជំនួយជាអាវុធតម្លៃមួយពាន់លានដុល្លារដល់កោះតៃវ៉ាន់ ទៅតាមច្បាប់ PDA ក្នុងករណីចាំបាច់ ដោយមិនត្រូវរង់ចាំការយល់ព្រមពីសភា។ សហរដ្ឋអាម៉េរិកធ្លាប់បានប្រើប្រាស់យន្តការបែបនេះជាង 30 លើក ដើម្បីជញ្ជូនអាវុធឱ្យអ៊ុយក្រែន។

ព័ត៌មានស្ដីពីការផ្ដល់ជំនួយជាអាវុធខាងលើ បានលេចឡើងនៅពេលស្ថានការណ៍តានតឹងនៅច្រកសមុទ្រតៃវ៉ាន់ បន្តកើនឡើង។

ប្រទេសចិនតែងតែចាត់ទុកកោះតៃវ៉ាន់ជាខេត្តមួយរបស់ខ្លួន ដែលរង់ចាំតែការបង្រួបបង្រួមប៉ុណ្ណោះ ហើយថា នឹងប្រើកម្លាំងបាយយកមកកាន់កាប់ បើសិនចាំបាច់។ ចំណែកសហរដ្ឋអាម៉េរិកវិញ បានសន្យាគោរពគោលការណ៍ «ចិនតែមួយ» ប៉ុន្តែបន្តរក្សាទំនាក់ទំនង ការពារ និងលក់អាវុធឱ្យកោះតៃវ៉ាន់។

ច្បាប់ស្ដីពីទំនាក់ទំនងជាមួយកោះតៃវ៉ាន់ ត្រូវបានអតីតប្រធានាធិបតីអាម៉េរិក Jimmy Carter ចុះហត្ថលេខាក្រោយពីសហរដ្ឋអាម៉េរិក បង្កើតទំនាក់ទំនងការទូតជាមួយប្រទេសចិន កាលពីឆ្នាំ 1979។ ច្បាប់នេះតម្រូវឱ្យសហរដ្ឋអាម៉េរិក ជួយគាំទ្រដល់សមត្ថភាពការពារខ្លួនរបស់កោះតៃវ៉ាន់៕

May 6, 2023

ថ្ងៃទី 05 ឧសភានេះ កម្ពុជាសម្ពោធបើកព្រឹត្តិការណ៍ស៊ីហ្គេមលើកទី 32 ជាផ្លូវការ

ពិធីសម្ពោធបើកព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 ជាផ្លូវការនេះ នឹងត្រូវធ្វើឡើងនាវេលាម៉ោង 19 នៅឯពហុកីឡដ្ឋានជាតិមរតកតេជោ ដែលស្ថិតក្នុងរាជធានីភ្នំពេញ។

មកដល់បច្ចុប្បន្ន ម្ចាស់ផ្ទះកម្ពុជានៅតែមិនបញ្ចេញព័ត៌មានលំអិតអំពីកម្មវិធី និងការសំដែងនានានៅក្នុងពិធីសម្ពោធព្រឹត្តិការណ៍ស៊ីហ្គេមលើកទី 32 ក្រៅតែពីពេលវេលា ទីតាំង និងបណ្ដាមន្ត្រីជាន់ខ្ពស់ដែលអញ្ជើញចូលរួម។ ក្រុមអ្នកយកព័ត៌មានក៏មិនត្រូវបានអនុញ្ញាតឱ្យចូលទស្សនាការហាត់សម ព្រោះគណៈកម្មការស៊ីហ្គេមចង់បង្កើតកម្មវិធីដ៏ទាក់ទាញមួយទៅតាមស្ដង់ដាអូឡាំពិក។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ គណៈកម្មាធិការជាតិ CAMSOC កាលពីថ្ងៃទី 24 មេសា បានឱ្យដឹងថា កម្ពុជាត្រូវតែប្រារព្ធពិធីសម្ពោធបើកព្រឹត្តិការណ៍ប្រកបដោយការទាក់ទាញបំផុតក្នុងប្រវត្តិសាស្ត្រ ទៅតាមស្ដង់ដាអូឡាំពិក ពុំមែនលំដាប់តំបន់ដូចប្រទេសដទៃ។ គ្រប់គ្នានឹងបានឃើញចំណុចដ៏អស្ចារ្យរបស់ពិធីនេះ។

ប្រមុខរាជរដ្ឋាភិបាលកម្ពុជា សម្ដេចតោជោ ហ៊ុន សែន ក៏បានប្រកាសមិនយកថ្លៃសំបុត្រចូលទស្សនាពិធីសម្ពោធនេះផងដែរ។ សម្ដេចមានប្រសាសន៍ថា មនុស្សជាងកន្លះលាននាក់ចង់ចូលទស្សនា ប៉ុន្តែពហុកីឡដ្ឋានមរតកតេជោ អាចដាក់មនុស្សបានតែពី 60,000 ទៅ 70,000 នាក់ប៉ុណ្ណោះ។ ទោះជាយ៉ាងណាក៏ដោយ បញ្ហានេះត្រូវបានដោះស្រាយតាមរយៈការដំឡើងឆាកបញ្ចាំងស្លាយផ្សាយបន្តផ្ទាល់នៅតាមបណ្ដាខេត្ត-ក្រុង។

ទីលានបាល់ទាត់មរតកតេជោ ស្ថិតក្នុងពហុកីឡដ្ឋានមរតកតេជោ នៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ត្រូវបានសម្ពោធការដ្ឋានសាងសង់កាលពីខែសីហា 2017 ហើយបួនឆ្នាំក្រោយមកក៏បានសម្រេចជាស្ថាពរ។ ការចំណាយសម្រាប់ការសាងសង់ពហុកីឡដ្ឋាននេះគឺប្រហែល 160 លានដុល្លារអាម៉េរិក ជាជំនួយរបស់ប្រទេសចិន។

យោងតាមគេហទំព័រស៊ីហ្គេមលើកទី 32 ព្រឹត្តិការណ៍ប្រកួតកីឡាអាស៊ីអាគ្នេយ៍នៅកម្ពុជា មានសមាជិកចូលរួមប្រហែល 12,000 នាក់ មកពី 11 ប្រតិភូ ដោយមិនទាន់រាប់បញ្ចូលក្រុមអាជ្ញាកណ្ដាល។ អ្នកយកព័ត៌មានជាង 2,000 នាក់ក៏បានទទួលកាតចុះឈ្មោះចូលយកព័ត៌មាន ក្នុងនោះមាន 907 នាក់មកពីបរទេស។

ស៊ីហ្គេមលើកទី 32 ធ្វើឡើងនៅរាជធានីភ្នំពេញ និងទីក្រុងបួនផ្សេងទៀត ចាប់ពីថ្ងៃទី 29 មេសាដល់ 16 ឧសភា ដោយមានកីឡា 36 ប្រភេទ ចែកជា 584 វិញ្ញាសា។ កាលពីថ្ងៃទី 04 ឧសភា គណៈកម្មការស៊ីហ្គេមបានប្រគល់មេដាយចំនួន 9 គ្រឿងដំបូងជូនអត្តពលិក ក្នុងនោះម្ចាស់ផ្ទះកម្ពុជានាំមុខគេដោយដណ្ដើមបានមេដាយមាសប្រាំគ្រឿង។ ហ្វ៊ីលីពីនដណ្ដើមបានមេដាយមាសពីរគ្រឿង ខណៈថៃ និងឡាវទទួលបានមួយគ្រឿង ពីប្រភេទកីឡាគុន ជូជិតស៊ូ (Jujutsu) និងល្បុក្កតោ។

នៅក្នុងថ្ងៃទី 05 ឧសភានេះ ស៊ីហ្គេមលើកទី 32 នឹងមិនមានការប្រកួតកីឡាណាមួយឡើយ ដោយផ្ដោតទៅលើតែពិធីសម្ពោធជាផ្លូវការ។

បទចម្រៀងផផ្លូវការរបស់ស៊ីហ្គេមលើកនេះគឺបទ Cambodian Pride ដែលបច្ចុប្បន្នចំនួនអ្នកចូលមើលបានកើនឡើងដល់ជាង 65 លានលើកនៅលើ YouTube ក្រោយពីបង្ហោះបានជាងបីសប្ដាហ៍។ រូបតំណាងស៊ីហ្គេមលើកទី 32 គឺកូនទន្សាយពីរក្បាល មួយឈ្មោះ រំដួល និងមួយឈ្មោះ បុរី។

ចំណែកពិធីបិទស៊ីហ្គេមលើកទី 32 វិញ នឹងត្រូវធ្វើឡើងក្នុងថ្ងៃទី 17 ឧសភា នៅឯពហុកីឡដ្ឋានមរតកតេជោ៕

May 5, 2023

ក្រុមហ៊ុន IBM នឹងប្រើប្រាស់ AI ជំនួសមនុស្សជិត 8,000 នាក់

Arvind Krishna អគ្គនាយកប្រតិបត្តិរបស់ IBM បានឱ្យដឹងថា បណ្ដាការងារជួយដល់ការិយាល័យដូចជាការគ្រប់គ្រងធនធានមនុស្សជាដើមនឹងត្រូវបានជំនួសដោយបញ្ញានិម្មិត (AI)។

លោក Krishna បានប្រាប់ Bloomberg ថា ក្រុមហ៊ុន IBM នឹងឈប់ជ្រើសរើសបុគ្គលិកសម្រាប់តំណែងទាំងឡាយណាដែលពួកគេយល់ថាអាចជំនួសដោយ AI នៅពេលខាងមុខ។ ក្រុមការងារដែលនឹងត្រូវឈប់ជ្រើសរើស និងធ្វើការផ្លាស់ប្ដូរដំបូងគេគឺក្រុមជំនួយការនៅការិយាល័យដែលមានដូចជាបុគ្គលិកគ្រប់គ្រងធនធានមនុស្សជាដើម។

យោងតាមលោក Krishna នៅក្នុងក្រុមហ៊ុន IBM តំណែងនានាដែលមិនធ្វើការផ្ទាល់ជាមួយអតិថិជន មានប្រហែល 26,000 នាក់។ «ក្នុងប្រាំឆ្នាំទៀត មានប្រហែល 30% ក្នុងក្រុមនេះនឹងត្រូវជំនួសដោយ AI និងប្រព័ន្ធស្វ័យប្រវត្ត ដែលស្មើនឹង 7,800 នាក់ ត្រូវបាត់បង់ការងារ» លោក Krishna បន្ធែមដូច្នេះ។

អ្នកនាំពាក្យរបស់ IBM អះអាងថា ការកាត់បន្ថយបុគ្គលិកនេះនឹងមិនប៉ះពាល់ច្រើនដល់សកម្មភាព និងគុណភាពផលិតផលរបស់ក្រុមហ៊ុន។

បច្ចុប្បន្ន IBM មានបុគ្គលិក 260,000 នាក់ និងបន្តជ្រើសរើសសម្រាប់តំណែងទាក់ទងនឹងសបវ៉ែរ និងតំណែងដែលធ្វើការជាមួយអតិថិជន។ ដើមឆ្នាំនេះ IBM បានបញ្ឈប់បុគ្គលិក 5,000 នាក់ ប៉ុន្តែបានជ្រើសរើស 7,000 នាក់នៅក្នុងត្រីមាសទីមួយឆ្នាំនេះ។

នៅពេលឧបករណ៍បញ្ញានិម្មិតកាន់តែរីកចម្រើន និងបង្ហាញពីសមត្ថភាពដ៏អស្ចារ្យនៅក្នុងការងារដែលមិនទាមទារឱ្យមានជំនាញខ្ពស់ ក្រុមអ្នកជំនាញចាប់ផ្ដើមមានការព្រួយបារម្ភអំពីហានិភ័យទីផ្សារការងារបែបបុរាណត្រូវបានបំផ្លាញ។ មនុស្សជាច្រើនដែលធ្វើការក្នុងវិស័យមួយចំនួនមានដូចជា ការងារនិពន្ធ ការងារគូររូបជាដើម បានប្រាប់ថា ប្រាក់ចំណូលរបស់ពួកគេបានថយចុះពាក់កណ្ដាលចាប់តាំងពីបណ្ដារូបមន្ត AI ត្រូវបានណែនាំដល់សាធារណជន៕

May 3, 2023

រថយន្តអគ្គិសនី Volvo លក់ក្នុងតម្លៃថ្លៃ នៅតែត្រូវអតិថិជនទិញអស់

តម្លៃ 8 ម៉ឺនដុល្លារអាម៉េរិក/គ្រឿង មិនអាចរារាំងអតិថិជនដែលចង់ប្រើរថយន្តអគ្គិសនីដ៏ទំនើបរបស់ក្រុមហ៊ុន Volvo បានឡើយ។

ថ្មីៗនេះ បន្ទាប់ពីដាក់ឱ្យបញ្ជាទិញជាមុនរថយន្តអគ្គិសនី EX90 ក្រុមហ៊ុនផលិតរថយន្ត Volvo ក៏ទទួលបានការគាំទ្រយ៉ាងច្រើនពីអ្នកប្រើប្រាស់ រហូតធ្វើឱ្យក្រុមហ៊ុននេះត្រូវផ្អាកការលក់បណ្ដោះអាសន្ន ព្រោះតែបរិមាណនៃរថយន្តដែលត្រូវបានបញ្ជាទិញ បានលើសពីគម្រោងនៃការផលិតលើកទីមួយ។ ប៉ុន្តែ ក្រុមហ៊ុនបានសន្យាថា នឹងបើកលក់ជាថ្មីនាពេលខាងមុខ។

Volvo EX90 ត្រូវបានអភិវឌ្ឍឡើងដោយយោងទៅតាមតួរថយន្តអគ្គិសនី SPA2 របស់ក្រុមហ៊ុនមេ Geely ដែលដូចទៅនឹង Polestar 3។ ក្នុងពេលដែល Polestar 3 មានកៅអីចំនួនប្រាំ Volvo EX90 មានកៅអីអាចឱ្យអង្គុយបាន 7 នាក់។

កំណែមូលដ្ឋានរបស់ Volvo EX90 ប្រើប្រាស់ម៉ូទ័រអគ្គិសនីដែលអាចផលិតកម្លាំងបាន 402 សេះ ខណៈដែលកំណែ Performance មានកម្លាំង 510 សេះ អាចបង្កើនល្បឿនពី 0-97 គីឡូម៉ែត្រ/ម៉ោង ដោយប្រើពេលតែ 4.7 វិនាទី។ កំណែទាំងពីរនេះប្រើប្រាស់ប្រព័ន្ធថ្មផ្ទុកថាមពល 107 kWh អាចឱ្យបើកបរបាន 580 គីឡូម៉ែត្រ ទៅតាមស្ដង់ដារបស់ WLTP ឬប្រហែល 483 គីឡូម៉ែត្រក្នុងការបើកបរជាក់ស្ដែង។

Volvo EX90 ត្រូវបានបំពាក់ប្រព័ន្ធ LiDAR ((Light Detection and Ranging) ដែលជាសេនស័រ 3D សម្រាប់បាញ់វាស់ចម្ងាយ និងវាស់ជម្រៅរបស់វត្ថុ ក៏ដូចជាដៅសម្គាល់ភាពជ្រៅនៃផ្ទៃលំហជាដើម) រយៈចម្ងាយឆ្ងាយមួយគ្រៀង, រ៉ាដាប្រាំគ្រឿង, កាមេរ៉ា 8 គ្រឿង និងសែនស័រចាប់រលកសញ្ញា 16 គ្រឿង។ ក្រៅពីនេះ រថយន្តអគ្គិសនី EX90 ក៏បំពាក់បច្ចេកវិទ្យាជាច្រើនទៀតនៅខាងក្នុងកាប៊ីន រួមមានទាំងអេក្រង់ទូរទស្សន៍ 14.5 អ៊ីញដែលបំពាក់កម្មវិធីជំនួយការរបស់ Google ផងដែរ៕

May 2, 2023

Ford Ranger Raptor ម៉ាស៊ីនម៉ាស៊ូត 2.0L Bi-Turbo ត្រូវបានដាក់សម្ពោធជាផ្លូវការ

(ភ្នំពេញ-ថ្ងៃទី 28 ខែមេសា ឆ្នាំ 2023) – ជួបគ្នាម្ដងទៀតហើយជាមួយនឹងព្រឹត្តិការណ៍ដ៏អស្ចារ្យដែលត្រូវបានរៀបចំឡើយដោយក្រុមហ៊ុន អ អិម អេ (ខេមបូឌា) ម.ក ផ្នែករថយន្ត Ford នោះគឺពិធីសម្ពោធជាផ្លូវការរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលកម្មវិធីនេះបានប្រារព្ធឡើងនៅ ដឹ ព្រេមៀ សេនធ័រ សែនសុខ ដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។

កម្មវិធីនេះប្រារព្ធឡើងដើម្បីណែនាំនូវជម្រើសម៉ាស៊ីនថ្មីមួយទៀតដល់អតិថិជន នោះគឺម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលជាប្រភេទម៉ាស៊ីនមានកម្លាំងខ្លាំង សន្សំសំចៃខ្ពស់ និងទទួលបានការពេញនិយមយ៉ាងច្រើនកុះករពីសំណាក់អតិថិជន។ ចំណុចដែលកាន់តែពិសេសគួរឱ្យភ្ញាក់ផ្អើលនោះគឺ តម្លៃបង់ពន្ធផ្លូវសម្រាប់រថយន្តទំនើប Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតមួយនេះគឺត្រឹមតែ 20 ម៉ឺនរៀលតែប៉ុណ្ណោះ។

អតិថិជនដែលទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសរបស់ Ford ដើម្បីសាកល្បងនូវមុខងារនៃប្រព័ន្ធសុវត្ថិភាព និងបច្ចេកវិទ្យាទំនើបចុងក្រោយដែលបានបំពាក់នៅលើរថយន្តនេះ។

ជាពិសេសជាងនេះទៀតគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនម៉ាស៊ូត 2.0L Bi-Turbo (Diesel0 Inline4 ដែលអាចផលិតកម្លាំងសេះបានរហូតដល់ 210 PS និងកម្លាំងរមួលកង់រហូតដល់ 500 Nm ដែលផ្ដល់នូវសន្ទុះដ៏ខ្លាំងក្នុងការបើកបរ។

មិនតែប៉ុណ្ណោះ នៅមានមុខងារច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖

ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
បំពាក់នូវបូម Fox Racing Shocks ទំហំ 2.5 អ៊ីញ ដែលផ្ដល់នូវផាសុកភាពក្នុងពេលបើកបរ ជាពិសេសសម្រាប់ការបើកបរលើផ្លូវដែលមានឧបសគ្គ និងផ្លូវ Off-Road Performance
អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងចង្កូតពិជាធ្វើឱ្យការចុលរលូនខ្លាំង
បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពិចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Tochscreen 12 អ៊ីញបានយ៉ាងងាយស្រួល
ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ និងប្រព័ន្ធជំនួយលើចង្កូតបញ្ចៀសចេញពីគ្រោះថ្នាក់
ប្រព័ន្ធចង្កៀងឆ្លាតដែលអាចរេតាមចង្កូតដោយស្វ័យប្រវត្ត និងអាចបែងចែកពន្លឺដោយស្វ័យប្រវត្ត
ប្រព័ន្ធចាប់ហ្វ្រាំងបន្ទាន់ពេលថយក្រោយដោយស្វ័យប្រវត្ត
ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឱ្យរថយន្តនេះជម្នះបានគ្រប់ឧបសគ្គនៃការបើកបរ និងស័ក្ដិសមជាកំពូលរថយន្តភីកអាប់ Off-Road Performance ។

រថយន្ត រថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះមានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ 8 ជម្រើស រួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស ជាមួយនឹងតម្លៃពិសេសត្រឹមតែ $75,900 តែប៉ុណ្ណោះ។

សម្រាប់ព័ត៌មានបន្ថែម លោកអ្នកអាចអញ្ជើញទៅសាកសួរ និងបើកបរសាកល្បងរថយន្តFord Ranger Raptor ស៊េរីឆ្នាំ 2023 ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នៅតាមបណ្ដាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លូវព្រះមុនីវង្ស ជាប់ទូតវៀតណាម លេខទូរស័ព្ទ៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្ដោយផ្លូវទៅព្រលានយន្តហោះ លេខទូរស័ព្ទ៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 និងផ្សារសាំហាន់ លេខទូរស័ព្ទ៖ 078 959 935
អគារតាំងបង្ហាញរថយន្ត Ford Trade-In ដែលស្ថិតនៅតាមបណ្ដោយផ្លូវទៅកាន់ព្រលានយន្តហោះ លេខទូរស័ព្ទ៖ 077 722 999 ឬ 011 255 229
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្ដោយផ្លូវជាតិលេខ 6A លេខទូរស័ព្ទ៖ 077 666 357 ឬ 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្ដោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទ៖ 078 999 883 ឬ 088 3 999 883 ។

April 29, 2023

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR

គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។

ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។

នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។

គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។

ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។

លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។

នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕

April 29, 2023

សំបុត្រពីស្ត្រីជាម្ដាយ ជូនដល់ស្ត្រីជាម្ដាយទាំងអស់៖ “រឿងតូចៗ ដែលអាចសាងអនាគតកូនបាន”

ជូនស្ត្រីជាម្ដាយគ្រប់រូបលើពិភពលោកនេះ…

«នាងខ្ញុំមានអាជីពជាម្ដាយគេ និងក៏មិនខុសប្លែកពីស្ត្រីជាម្ដាយដទៃទៀតដែរ យើងព្យាយាមក្នុងការសម្របសម្រួលជីវិតការធ្វើការងាររបស់យើង ជាមួយនឹងការធ្វើជាម្ដាយរបស់គេ។ យើងត្រូវបានធ្វើឱ្យភ័យខ្លាច និងមិនសូវមានទំនុកចិត្តលើខ្លួនឯងជាប់ជានិច្ចថា តើយើងបានធ្វើខ្លួនជាម្ដាយ ដែលល្អគ្រប់គ្រាន់ហើយឬនៅ?។

កំណត់ត្រាទាំងឡាយ រឹតតែធ្វើឱ្យយើងញាប់ញ័រថែមទៀត មិនថាតែ “ជាងពាក់កណ្ដាលនៃកុមារៗយើង សព្វថ្ងៃមានសៀវភៅអានមិនដល់ 3ក្បាលឡើយ”…”ឪពុកៗ ជិតពាក់កណ្ដាល គ្មានពេលវេលាលេងជាមួយកូន”…”40ភាគរយនៃក្មេងតូចៗ ខកខានឱកាសល្អៗក្នុងការអភិវឌ្ឍខ្លួន” និង “កុមារយើងបច្ចុប្បន្ន មាន IQ ទាបជាងកម្រិតស្តង់ដា”។ល។

ព័ត៌មានទាំងអស់នេះ ធ្វើឱ្យយើងត្រូវត្រៀមខ្លួនជាស្រេច ក្នុងការតស៊ូ ដើម្បីក្លាយជាម្ដាយដ៏ល្អ តែ ពេលខ្លះក៏ចង់លើកទង់ជ័យស សុំចុះចាញ់ម្ដងម្កាលដែរ ព្រោះមិនមានជំនួយ…ឬមួយក៏ដល់ពេលត្រូវទទួលស្គាល់ការពិតហើយថា ការចិញ្ចឹមកូនក្នុងសង្គមបែបនេះ ពិតជាលំបាកមែនទែន…។

ខ្ញុំបានដឹងពីលោកគ្រូពេទ្យជំនាញម្នាក់ ដែលតែងតែបញ្ជាក់ប្រាប់ដដែលៗថា ការចិញ្ចឹមក្មេង សំខាន់បំផុតក្នុងអំឡុងពេល 3ឆ្នាំដំបូង។ ក្មេងនឹងសាងខ្លួនឯង និងជឿទុកចិត្តពិភពលោកមួយនេះ តាមរយៈការទទួលបានសេចក្ដីស្រឡាញ់ និងការយកចិត្តទុកដាក់យ៉ាងគ្រប់គ្រាន់…ត្រូវហើយ! ខ្ញុំដឹង! អ្នកក៏ដឹង! តែបញ្ហាសេដ្ឋកិច្ចគ្រួសារ បានរឹតរួតយើង ឱ្យនៅជាប់នឹងកៅអីធ្វើការ ហើយយើងត្រូវជួលមនុស្សម្នាក់ មកចិញ្ចឹមមើលថែទាំតំណក់ឈាមរបស់ខ្លួនឯង…ពិភពលោក គឺដូច្នេះឯង ហើយតួនាទីរបស់យើង គឺត្រូវតែទទួលយកបែបហ្នឹង។

ព័ត៌មានដ៏គួរឱ្យភ្ញាក់ផ្អើលមួយទៀត គឺអង្គប្រកបផ្សេងៗរបស់ស្ថានភាពជុំវិញខ្លួន មានភាពសំខាន់បំផុត គឺបើឱ្យកុមារធំធាត់ឡើងដោយខ្លួនឯង សក្ដានុពលរបស់គេនឹងថយចុះ 30ភាគរយ…តួលេខនេះ គឺជាភាពធ្ងន់ធ្ងរមួយ ដែលអ្នកម្ដាយគ្រប់រូប ត្រូវទទួលបន្ទុកនេះ។

ក្នុងឋានៈជាម្ដាយ ខ្ញុំដឹងច្បាស់ណាស់ថា ម្ដាយគ្រប់រូបចង់ឱ្យកូន “ពូកែ ល្អ ឆ្លាត” ពាក្យ 3ម៉ាត់នេះ គឺការសាកល្បងសមត្ថភាពយើង។ ទោះជាហត់នឿយប៉ុនណា បើមិនបានអានរឿងនិទានមុនពេលគេង ឱ្យកូនស្ដាប់ យើងនឹងក្លាយជាម្ដាយ ដែលមិនបានការភ្លាមតែម្ដង ព្រោះថា លុយកាក់ មិនមានន័យស្មើនឹងពេលវេលា និងការយកចិត្តទុកដាក់ចំពោះកូនៗឡើយ។ ការចាប់ផ្ដើមធ្វើដោយដៃទាំង2 របស់ម្ដាយ គឺជារឿងតូចមួយ ដែលជួយជំរុញវិវឌ្ឍនាការរបស់កូន បានល្អបំផុត។ យើងគ្រប់គ្នា គួរតែបានដឹងពីវិធីការសាងវិវឌ្ឍនាការដល់កូន។

ចេះគិត ចេះធ្វើការ ចេះរៀនសូត្រ ចេះដោះស្រាយបញ្ហា ចេះរស់នៅជាមួយអ្នកដទៃ និងអ្វីដែលសំខាន់បំផុតគឺ “ចេះមានសេចក្តីសុខ” ពាក្យចុងក្រោយគេនេះ ជាពាក្យដែលសំខាន់ខ្លាំងណាស់សម្រាប់នាងខ្ញុំ ព្រោះនាងខ្ញុំខ្លាចខ្លាំងណាស់ ខ្លាចកូនមិនដឹងពីវិធីមានសេចក្ដីសុខ ក្នុងពិភពលោក ដែលកាន់តែពិបាករស់នៅទៅ ពិបាករស់នៅទៅ ដូចសព្វថ្ងៃ។

មួយទៀត ការបន្ថែមជំនាញផ្នែកភាសា ក៏ជារឿងមួយ ដែលមិនគួរមើលរំលងដែរ ដូច្នេះអ្វីដែលសំខាន់គឺ “ការអានសៀវភៅ”។

លោកគ្រូពេទ្យខាងលើបន្ថែមថា “រឿងចាំបាច់ចំពោះការជំរុញវិវឌ្ឍនាការរបស់កុមារ គឺសេចក្ដីស្រឡាញ់ ការយកចិត្តទុកដាក់ ស្ថានភាពជុំវិញខ្លួនដែលល្អ អានសៀវភៅ និងកន្លែងក្មេងលេង” គាត់បន្តថា របស់លេងនៅក្នុងកន្លែងក្មេងលេង ក៏សំខាន់ស្មើនឹងសៀវភៅដែរ។ ខួរក្បាលរបស់កុមារ ជាមួយនឹងការអាន ក្នុងអំឡុង 3ដំណាក់កាល នឹងអភិវឌ្ឍសន្សឹមៗតាមលំដាប់។ ចាប់ផ្ដើមពីការរៀនអាន ដើម្បីូការរៀនយល់ដឹង រៀនយល់ដឹងពីជំនាញការអាន រហូតទៅដល់អានបានដោយខ្លួនឯង ដើម្បីការរៀនយល់ដឹងបន្ត។

ការជ្រើសរើសសៀវភៅ ដែលមានពាក្យចុងជួន មិនចាំបាច់មានអត្ថន័យខ្លឹមសារឱ្យគិតច្រើន មានសំឡេងឡើងចុះ នឹងធ្វើឱ្យខួរក្បាលរបស់កុមារ បើកទទួលយកកាន់ងាយស្រួលឡើង…អ៊ីចឹងតើ! បានជាកូនតូចរបស់ខ្ញុំ សើចក្អាកក្អាយគ្រប់ពេល ដែលម្ដាយធ្វើសំឡេងឡើងចុះ ឬអានរឿងនិទាន(ដែលមើលទៅដូចជាគ្មានន័យអ្វីទាំងអស់)ឱ្យគេស្ដាប់។

ការអភិវឌ្ឍខួរក្បាល ជារឿងសំខាន់ក៏ពិតមែន តែការសម្រាកខួរក្បាល ក៏សំខាន់មិនចាញ់គ្នាប៉ុន្មានដែរ ហើយការណ៍នេះអាចជាលេសមួយ ដែលអាចឱ្យម្ដាយៗដូចរូបយើង រកពេលសម្រាក និងបានធ្វើការងាររបស់ខ្លួនឯងខ្លះ ព្រោះវាប្រហែលជាដូចដែលគេនិយាយមែនហើយថា ម្ដាយដែលមានសេចក្ដីសុខ នឹងសាងកូនឱ្យមានសេចក្ដីសុខ បានដូចគ្នា។

សូមជួយជាកម្លាំងចិត្ត ដល់អ្នកម្ដាយគ្រប់រូបយ៉ាងមុតមាំ ហើយយើងនឹងឆ្លងកាត់សមរភូមិ នៃការចិញ្ចឹមមើលថែកូនទៅជាមួយគ្នា…»

ពីនាងខ្ញុំ ស្ត្រីជាម្ដាយម្នាក់

រៀបរៀងដោយ អ្នកគ្រូ ឆវី

July 8, 2021

Tag: ជំនួយ