ជីវិត - La Reine Media

កូឡុំប៊ីផលិតភាពយន្តស្ដីពីកុមារបួននាក់នៅរស់ ក្រោយធ្លាក់យន្តហោះ និងស្ថិតក្នុងព្រៃអាម៉ាហ្សូន 40 ថ្ងៃ

អាជ្ញាធរកូឡុំប៊ី សហការជាមួយផលិតករជនជាតិអង់គ្លេស ផលិតខ្សែភាពយន្តឯកសារស្ដីពីកុមារ 4 នាក់ដែលនៅមានជីវិត ពេលវង្វេង 40 ថ្ងៃ ក្រោយពីធ្លាក់យន្តហោះក្នុងព្រៃអាម៉ាហ្សូន។

ប្រធានាធិបតីកូឡុំប៊ី Gustavo Petro ដែលកំពុងចូលរួមសន្និសីទកំពូលស្ដីពីអាកាសធាតុនៅទីក្រុងប៉ារីស កាលពីថ្ងៃទី 23 មិថុនា បានឱ្យដឹងថា បានជួបពិភាក្សាជាមួយ Simon Chinn ផលិតករភាពយន្តឯកសារជនជាតិអង់គ្លេស ដែលធ្លាប់ទទួលបានពានរង្វាន់អូស្ការពីរលើក។

លោក Gustavo Petro ឱ្យដងថា ទូរទស្សន៍ជាតិកូឡុំប៊ី (RTVC) នឹងសហការជាមួយ Lightbox ដែលជាក្រុមហ៊ុនផលិតភាពយន្តរបស់ Chinn ដើម្បីរៀបរាប់ដំណើររឿងស្ដីពី «យុទ្ធនាការនៃក្ដីសង្ឃឹម» ក្នុងការស្វែងរក និងសង្គ្រោះកុមារ 4 នាក់ដែលនៅមានជីវិតក្រោយពីយន្តហោះដែលពួកគេជិះ បានធ្លាក់ ហើយពួកគេត្រូវវង្វេង 40 ថ្ងៃក្នុងព្រៃជ្រៅអាម៉ាហ្សូន។

ក្មេង 4 នាក់ដែលរួមមាន Lesly អាយុ 13 ឆ្នាំ, Soleiny អាយុ 9 ឆ្នាំ, Tien Norel អាយុ 5 ឆ្នាំ និង Cristin អាយុ 1 ឆ្នាំ បានរួចពីហានិភ័យបាត់បង់ជីវិត បន្ទាប់ពីម្ដាយ និងមនុស្សពេញវ័យពីរនាក់បានស្លាប់ក្នុងហេតុការណ៍ធ្លាក់យន្តហោះនៅក្នុងព្រៃអាម៉ាហ្សូនកាលពីថ្ងៃទី 01 ឧសភា 2023។

ពេលបានទទួលដំណឹងអំពីករណីខាងលើ កងទ័ពកូឡុំប៊ី ក៏បានចាប់ផ្ដើមយុទ្ធនាការស្វែងរក និងសង្គ្រោះ។ ចុងក្រោយ ពួកគេក៏បានរកឃើញកុមារ 4 នាក់នេះកាលពីថ្ងៃទី 09 មិថុនា 2023៕

June 24, 2023

ក្រុមហ៊ុនគ្រប់គ្រងនាវាមុជទឹក Titan ប្រឈមនឹងបញ្ហាផ្លូវច្បាប់ក្រោយករណីស្លាប់មនុស្សប្រាំនាក់

OceanGate ដែលក្រុមហ៊ុនគ្រប់គ្រងនាវាមុជទឹក Titan អាចត្រូវប្រឈមមុខនឹងរឿងក្ដីប្ដឹងផ្ដល់ពីគ្រួសារជនរងគ្រោះ បើទោះជាក្រុមអ្នកទេសចណ៍នេះបានចុះហត្ថលេខាលើកលែងក៏ដោយ។

កាលពីថ្ងៃទី 22 មិថុនា សមត្ថកិច្ចសហរដ្ឋអាម៉េរិក និងក្រុមហ៊ុន OceanGate បានបញ្ជាក់ថា មនុស្សប្រាំនាក់ដែលស្ថិតក្នុងនាវាមុជទឹក Titan បានទទួលមរណភាពទាំងអស់ ក្រោយពីក្រុមសង្គ្រោះបានរកឃើញបំណែកនានារបស់ Titan។

អ្នកដែលបានស្លាប់ក្នុងហេតុការណ៍ខាងលើ រួមមាន Stockton Rush អាយុ 61 ឆ្នាំ ជាស្ថាបនិក និងជានាយកប្រតិបត្តិរបស់ OceanGate, មហាសេដ្ឋីអង់គ្លេស Hamish Harding អាយុ 58 ឆ្នាំ, Shahzada Dawood អាយុ 48 ឆ្នាំ ជាអ្នកជំនួញដើមកំណើតប៉ាគីស្ថាន និងកូនប្រុស Suleman អាយុ 19 ឆ្នាំ ដែលសុទ្ធតែជាពលរដ្ឋអង់គ្លេស រួមនឹងពលរដ្ឋបារាំងមួយរូបទៀត គឺអ្នកវិទ្យាសាស្ត្រខាងសមុទ្រ Paul-Henri Nargeolet អាយុ 77 ឆ្នាំ។

បច្ចុប្បន្ន មិនទាន់ដឹងច្បាស់ថា សាកសពជនរងគ្រោះខាងលើនឹងអាចត្រូវបានស្រង់មកលើគោកបានដែរ ឬយ៉ាងណានៅឡើយ។ ប៉ុន្តែ ក្រុមសមត្ថកិច្ចនៅតែបន្តស្វែងរកវត្ថុតាងនានាដើម្បីបញ្ជាក់បន្ថែមឱ្យកាន់តែច្បាស់។

មុនពេលឡើងកប៉ាល់ និងចូលនាវា Titan ដើម្បីចុះទៅទស្សនាសាកសពកប៉ាល់ Titanic ដែលនៅបាតសមុទ្រជម្រៅជិត 4,000 ម៉ែត្រ អតិថិជនទាំងអស់សុទ្ធតែត្រូវតម្រូវឱ្យចុះហត្ថលេខាលើកលែងការទទួលខុសត្រូវលើអាយុជីវិតសម្រាប់ OceanGate។ ក៏ប៉ុន្តែ ចំពោះគ្រួសារជនរងគ្រោះ គ្រប់យ៉ាងនឹងមិនបញ្ចប់ត្រឹមនេះឡើយ។ ក្រុមអ្នកវិភាគនិយាយថា សាច់ញាតិរបស់ជនរងគ្រោះនៅតែអាចប្ដឹងក្រុមហ៊ុននេះ សូម្បីតែនៅពេលជនរងគ្រោះបានចុះហត្ថលេខារួចរាល់ក៏ដោយ។

ទោះជាយ៉ាងណាក៏ដោយ មុនពេលរកឃើញមូលហេតុពិតប្រាកដនៃហេតុការណ៍គ្រោះថ្នាក់នេះ គេនៅតែមិនទាន់កំណត់បានថា ករណីនេះត្រូវផាត់ចោលកិច្ចសន្យា ឬអត់។ នេះបើតាម Joseph Low មេធាវីមួយរូបនៅរដ្ឋ California សហរដ្ឋអាម៉េរិក។

មកដល់បច្ចុប្បន្ន មិនទាន់មានប្រភពណាមួយនិយាយច្បាស់អំពីរឿងថា តើគ្រួសារជនរងគ្រោះមានបំណងប្ដឹងក្រុមហ៊ុន OceanGate ឬអត់នៅឡើយ៕

June 23, 2023

James Cameron ថា គ្រោះថ្នាក់របស់ Titan ស្រដៀងនឹង Titanic

លោក James Cameron និយាយថា គ្រោះថ្នាក់នាវាមុជទឹក Titan មានចំណុចស្រដៀងទៅនឹងហេតុការណ៍លិចកប៉ាល់ Titanic កាលពីជាង 100 ឆ្នាំមុន នៅពេលករណីទាំងពីរនេះសុទ្ធតែត្រូវបានព្រមានជាមុន។

អ្នកដឹកនាំរឿង Titanic លោក Cameron បាននិយាយដូចខាងលើនៅលើទំព័រ ABC នាថ្ងៃទី 23 មិថុនា ក្រោយពីមន្ត្រីអាម៉េរិកបញ្ជាក់ថា នាវាមុជទឹក Titan បានបែកបាក់ជាបំណែក បណ្ដាលឱ្យមនុស្សប្រាំនាក់បាត់បង់ជីវិត។

លោក Cameron ដែលធ្លាប់ចុះទៅបាតមហាសមុទ្រចំនួន 33 លើក ដើម្បីស្វែងយល់ពីសាកសពកប៉ាល់ Titanic បានឱ្យដឹងថា លោកដឹងច្បាស់អំពីទីតាំង តំបន់សមុទ្រនេះ។ លោកក៏ជាអ្នកដែលបានចូលរួមតាមដានការអភិវឌ្ឍនាវាមុជទឹកផងដែរ។

ហេតុការណ៍រន្ធត់បានកើតឡើងនៅក្នុងទីតាំងតែមួយ បន្ទាប់ពីការព្រមានអំពីសុវត្ថិភាពត្រូវបានគេរំលងចោល។ «ខ្ញុំរន្ធត់នឹងរឿងនេះណាស់» លោក Cameron ថ្លែងដូច្នេះ។

អ្នកដឹករឿងរបស់ភាពយន្ត Titanic និយាយថា កន្លងមក សហគមន៍អ្នកចូលចិត្តមុជទឹកសមុទ្របានសម្ដែងការព្រួយបារម្ភអំពីបញ្ហាសុវត្ថិភាពរបស់បណ្ដានាវាមុជទឹកដូច Titan។ អ្នកខ្លះថែមទាំងបានសរសេរសំបុត្រផ្ញើជូនក្រុមហ៊ុន OceanGate ដែលជាម្ចាស់នាវា Titan ដើម្បីប្រាប់ថា អ្វីដែលក្រុមហ៊ុននេះកំពុងធ្វើគឺពិតជាការផ្សងព្រេងខ្លាំងណាស់។

លោក Cameron ភ្ញាក់ផ្អើលខ្លាំងចំពោះភាពស្រដៀងគ្នារវាងគ្រោះថ្នាក់របស់ Titan និង Titanic។ ឆ្នាំ 1912 ប្រធានក្រុមនាវិករបស់កប៉ាល់ Titanic បានព្រមានជាបន្តបន្ទាប់អំពីភ្នំទឹកកកនៅខាងមុខក្នុងពេលធ្វើដំណើរ។ ប៉ុន្តែ នៅក្នុងយប់ងងឹត កប៉ាល់នេះនៅតែឆ្ពោះទៅមុខយ៉ាងលឿន ធ្វើឱ្យវាត្រូវបុកនឹងភ្នំទឹកកក បណ្ដាលឱ្យលិច ហើយមនុស្សរាប់ពាន់នាក់ត្រូវបាត់បង់ជីវិត។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

ក្រុមមនុស្សក្នុងនាវាមុជទឹក Titan រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman ត្រូវបានមន្ត្រីអាម៉េរិកប្រកាសកាលពីវេលាទៀបភ្លឹថ្ងៃនេះថា បានបាត់បង់ជីវិតទាំងអស់ ក្រោយពីរកឃើញបំណែកនានារបស់ Titan៕

June 23, 2023

សំឡេងនាវា Titan បែកខ្ទេចដោយសារសម្ពាធ ត្រូវកងទ័ពដឹងតាំងពីដំបូង ប៉ុន្តែមិនបញ្ចេញជាសាធារណៈ

កងទ័ពជើងទឹកសហរដ្ឋអាម៉េរិក បានឮសំឡេងលាន់ឡើងដែលត្រូវគេជឿថាកើតចេញពីហេតុការណ៍រងសម្ពាធរហូតដល់នាវាមុជទឹក Titan ត្រូវបែកខ្ទេចខ្ទី ក្រោយពីនាវានេះបានចាប់ផ្ដើមមុជចូលទឹក។

Wall Street Journal កាលពីថ្ងៃទី 22 មិថុនា ដកស្រង់សម្ដីមន្ត្រីជាន់ខ្ពស់នៅក្នុងជួរទ័ពជើងទឹកអាម៉េរិក សុំមិនបញ្ចេញឈ្មោះ បានឱ្យដឹងថា កងកម្លាំងនេះបានចាប់ផ្ដើមតាមដាននាវាមុជទឹក Titan ភ្លាមៗបន្ទាប់ពីនាវានេះបានដាច់ទំនាក់ទំនងកាលពីថ្ងៃទី 18 មិថុនា។

យោងតាមមន្ត្រីខាងលើ ប្រព័ន្ធស្រូបសំឡេងក្រោមទឹកសម្ងាត់មួយរបស់ទ័ពជើងទឹកអាម៉េរិក ដែលត្រូវបានប្រើប្រាស់ដើម្បីស្វែងរកនាវាមុជទឹករបស់សត្រូវ «បានឮសំឡេងដែលបង្ហាញថា មានហេតុការណ៍រងសម្ពាធដល់បែកខ្ទេច ឬការផ្ទុះបែកមួយកើតឡើងនៅក្បែរតំបន់នាវាមុជទឹក Titan កំពុងបាត់ខ្លួន»។

ពួកគេបានជូនដំណឹងអំពីការរកឃើញខាងលើនេះទៅឱ្យកងកម្លាំងល្បាតឆ្នេរ ដែលជាអ្នកដឹកនាំការស្វែងរកនាវា Titan។ កងទ័ពជើងទឹកអាម៉េរិក ពេលនោះមិនទាន់អះអាងថា សំឡេងដែលបានឮគឺជាសំឡេងបាក់បែករបស់ Titan នៅឡើយ។ ពួកគេមិនបានប្រកាសព័ត៌មាននេះជាសាធារណៈ ក៏ព្រោះតែក្នុងបំណងធានាថា ការស្វែងរក និងសង្គ្រោះជីវិតទាន់ពេល នៅតែត្រូវបានធ្វើឡើង។ ការរកឃើញសញ្ញាសំឡេងខាងលើក៏បានជួយបង្រួមបរិវេណនៃតំបន់ស្វែងរក មុនពេលរកឃើញបំណែកនានាកាលពីថ្ងៃទី 22 មិថុនា។

«នាវា Titan ទំនងជាត្រូវរងសម្ពាធរហូតដល់បែកខ្ទេចតាំងតែពីថ្ងៃទី 18 មិថុនា នៅក្នុងដំណើរចុះទៅតំបន់សាកសពកប៉ាល់ Titanic ភ្លាមៗបន្ទាប់ពីដាច់ទំនាក់ទំនង នៅក្នុងជម្រៅប្រហែល 2,700 ម៉ែត្រ» ប្រភពព័ត៌មានពីទ័ពជើងទឹកអាម៉េរិកឱ្យដឹងដូច្នេះ។

June 23, 2023

ស្លាប់អស់ហើយ! នាវាមុជទឹក Titan ត្រូវខ្ទេចខ្ទីដោយសារសម្ពាធ បណ្ដាលឱ្យមនុស្សប្រាំនាក់បាត់បង់ជីវិត

កងកម្លាំងល្បាតសមុទ្រអាម៉េរិក បានឱ្យដឹងថា បណ្ដាបំណែកដែលពួកគេប្រមូលបានបង្ហាញថា នាវាមុជទឹក Titan ត្រូវរងសម្ពាធខ្លាំងរហូតដល់បែកខ្ទេច ធ្វើឱ្យមនុស្សប្រាំនាក់ក្នុងនាវានេះបាត់បង់ជីវិត។

ក្នុងសន្និសីទសារព័ត៌មាននៅទីក្រុង Boston រដ្ឋ Massachusetts កាលពីវេលាទៀបភ្លឺថ្ងៃទី 23 មិថុនា (ម៉ោងនៅកម្ពុជា) ឧត្ដមនាវី John Mauger របស់កងកម្លាំងល្បាតឆ្នេរអាម៉េរិក និយាយថា ឧបករណ៍ផ្លាស់ទីស្វ័យប្រវត្តក្រោមសមុទ្ររបស់កាណាដា បានរកឃើញបំណែកពីនាវាមុជទឹក Titan ដែលស្ថិតនៅចម្ងាយប្រហែល 488 ម៉ែត្រ ពីសាកសពកប៉ាល់ Titanic ក្នុងជម្រៅ 4,000 ម៉ែត្រ នៅមហាសមុទ្រអាត្លង់ទិកខាងជើង។

យោងតាមក្រុមជំនាញ បំណែកសំខាន់ចំនួនប្រាំរបស់នាវាមុជទឹកប្រវែង 6.7 ម៉ែត្រ ត្រូវបានរកឃើញនៅក្នុងចំណោមបំណែកមួយក្រុមដែលនៅសល់បន្ទាប់ពីនាវាបានបែកបាក់។ «បំណែកទាំងនេះបង្ហាញថា មានហេតុការណ៍រងសម្ពាធដ៏ខ្លាំងក្លាកើតឡើងនៅក្នុងកាប៊ីនប្រឆាំងសម្ពាធ» លោក Mauger ឱ្យដឹងដូច្នេះ។

ចំណែក OceanGate ដែលជាក្រុមហ៊ុនគ្រប់គ្រងនាវាមុជទឹក Titan ក៏ប្រកាសថា ពុំមានអ្នកណាម្នាក់នៅមានជីវិតឡើយ ក្នុងនោះក៏មានស្ថាបនិក និងជានាយកប្រតិបត្តិរបស់ OeanGate លោក Stockton Rush ផងដែរ។

នាវាមុជទឹក Titan បានបាត់ខ្លួនកាលពីថ្ងៃទី 18 មិថុនា ពេលកំពុងដឹកមនុស្ស 5 នាក់ ធ្វើដំណើរចុះទៅមើលសាកសពកប៉ាល់ Titanic ក្រោមបាតមហាសមុទ្រអាត្លង់ទិក ជម្រៅជិត 4,000 ម៉ែត្រ និងមានចម្ងាយពី Newfoundland របស់កាណាដា ប្រហែល 600 គីឡូម៉ែត្រ។

June 23, 2023

សំឡេងពីក្រោមសមុទ្រអាចជាសំឡេងមនុស្សក្នុងនាវា Titan បង្កើតឡើងដើម្បីជាសញ្ញា

ពោងស្រូបសំឡេងក្រោមទឹកបានជួយឱ្យកងកម្លាំងសង្គ្រោះស្ដាប់ឮសំឡេងលាន់ខ្លាំងៗដែលបញ្ចេញរៀងរាល់ 30 នាទីម្ដង ដែលនេះអាចជាសំឡេងដែលបង្កើតឡើងដោយមនុស្សនៅក្នុងនាវាមុជទឹក Titan ដែលកំពុងបាត់ខ្លួននៅតំបន់សាកសពកប៉ាល់ Titanic។

ក្រុមមន្ត្រីអាម៉េរិក និងកាណាដាកំពុងប្រឹងប្រែងស្វែងរកនាវាមុជទឹក Titan របស់ក្រុមហ៊ុន OceanGate ដែលនាំមនុស្ស 5 នាក់ចុះទៅមើលសាកសពកប៉ាល់ Titanic ដែលបានលិចកាលពីជាង 100 ឆ្នាំមុន។ កាលពីថ្ងៃទី 21 មិថុនា ពួកគេបានរកឃើញសំឡេងលាន់ឮខ្លាំងៗដែលមានគម្លាត់ពីគ្នារៀងរាល់ 30 នាទីម្ដង នៅពេលប្រើប្រាស់ឧបករណ៍ស្រូបសំឡេងក្រោមសមុទ្រ។ ប្រការនេះនាំឱ្យមានក្ដីសង្ឃឹមដែលថា មនុស្សនៅក្នុងនាវានេះអាចនៅមានជីវិត។

«ការដែលសំឡេងត្រូវបានបញ្ចេញរៀងរាល់ 30 នាទីម្ដងគឺជាសញ្ញាដ៏ធំមួយ។ កម្រនឹងអាចមានសំឡេងពីនាវាមុជទឹកដទៃដែលតែងមុជត្រឹមជម្រៅ 900 ម៉ែត្រ» Jamie Pringle និស្សិតថ្នាក់បណ្ឌិតនៅសាកលវិទ្យាល័យ Keele យល់ដូច្នេះ និងបន្តថា កប៉ាល់នៅលើផ្ទៃសមុទ្រនឹងបង្កើតសំឡេងបន្តបន្ទាប់មិនដាច់ ដូច្នេះ សំឡេងរៀងរាល់ 30 នាទីម្ដង អាចជាសំឡេងដែលបង្កើតឡើងដោយមនុស្សនៅក្នុងនាវា Titan។

June 22, 2023

វរនាវីឯកទ័ពជើងទឹកអាម៉េរិកថា អ្នកជាប់ក្នុងនាវា Titan ប្រហែលកំពុងរងភាពត្រជាក់ខ្លាំង

វរនាវីឯកនៃទ័ពជើងទឹកអាម៉េរិកដែលចូលនិវត្តន៍ យល់ថា មនុស្សទាំងប្រាំនាក់នៅក្នុងនាវាមុជទឹក Titan ដែលកំពុងបាត់ខ្លួន ប្រហែលកំពុងរងភាពត្រជាក់ខ្លាំង ហើយប្រឈមនឹងហានិភ័យទាក់ទងនឹងបញ្ហាអុកស៊ីសែន។

វរនាវីឯក David Marquet អតីតមេបញ្ជាការនាវាមុជទឹកនៃទ័ពជើងទឹកអាម៉េរិក កាលពីថ្ងៃទី 21 មិថុនា បាននិយាយថា យោងតាមការវាយតម្លៃផ្ទាល់ខ្លួនរបស់គាត់ មនុស្សដែលកំពុងជាប់ក្នុងនាវា Titan នៅមហាសមុទ្រអាត្លង់ទិក កំពុងស្រេកឃ្លានក្រោយរយៈពេលបីថ្ងៃ ប៉ុន្តែបញ្ហានេះប្រហែលជាមិនធ្វើឱ្យពួកគេស្លាប់។ បើសិនជានៅមានជីវិត ពួកគេអាចនឹងពិបាកទ្រាំនៅក្នុងទីដ៏តូចចង្អៀតរបស់នាវា។

«ពួកគេកំពុងតែរងភាពត្រជាក់ខ្លាំង ព្រោះថា តំបន់ទឹកនៅជុំវិញនាវាសុទ្ធតែមានសីតុណ្ហភាព 0 អង្សាសេ ឬទាបជាងនេះ។ ពួកគេត្រូវចូលមកក្បែរគ្នាដើម្បីទទួលកម្ដៅពីរាងកាយ» លោក Marquet អះអាងដូច្នេះ។

នៅពេលពួកគេដកដង្ហើមចេញ ចំហាយទឹកនឹងប្រមូលផ្ដុំគ្នា បង្កើតបានជាស្រទាប់អ័ព្ទត្រជាក់ខាងក្នុងនាវា ប៉ុន្តែប្រការសំខាន់គឺអុកស៊ីសែនកំពុងថយចុះជាលំដាប់ ខណៈដែលពួកគេបន្តបញ្ចេញកាបូន។

នាវា Titan ប្រហែលជាកាត់បន្ថយការស្រូបយកឧស្ម័នកាបូន។ បើសិនកំហាប់កាបូនក្នុងនាវានេះមានកម្រិតខ្ពស់ វានឹងធ្វើឱ្យមានអាការៈឈឺក្បាល ក្អួតចង្អោរ និងបាត់បង់ស្មារតី។

មន្ត្រីអាម៉េរិកកាលពីម្សិលមិញឱ្យដឹងថា ក្រុមសង្គ្រោះបានឮសំឡេងខ្លាំងនៅក្រោមសមុទ្រ ប៉ុន្តែមិនអាចកំណត់បានថាជាសំឡេងអ្វី។ ទំហំនៃការស្វែងរកត្រូវបានពង្រីកទ្វេដង បើធៀបនឹងផ្ទៃដីរបស់រដ្ឋ Connecticut (ជាង 13,000 គីឡូម៉ែត្រក្រឡា)។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 22, 2023

ស្ថានភាពសាកសពកប៉ាល់ Titanic នៅបាទមហាសមុទ្រនាបច្ចុប្បន្ន

ដោយសារតែលំហូរទឹកសមុទ្រ ភាពប្រៃរបស់ទឹកសមុទ្រ និងបាក់តេរីស៊ីលោហធាតុ សាកសពកប៉ាល់ Titanic កំពុងត្រូវបានរំលាយយ៉ាងឆាប់រហ័ស ហើយអាចបាត់ខ្លួននៅប៉ុន្មានសិបឆ្នាំទៀតប៉ុណ្ណោះ។

ព្រឹកព្រលឹមថ្ងៃទី 15 មេសា ឆ្នាំ 1912 កប៉ាល់ RMS Titanic លិចចូលក្នុងទឹកសមុទ្រជម្រៅជាង 3,657 ម៉ែត្រ បណ្ដាលឱ្យមនុស្ស 1,517 នាក់ត្រូវបាត់បង់ជីវិត បន្ទាប់ពីបុកចំភ្នំទឹកកកកំពុងអណ្ដែតក្នុងចម្ងាយប្រហែល 643 គីឡូម៉ែត្រពីដែនដី Newfoundland ក្នុងពេលដែលកប៉ាល់នេះកំពុងធ្វើដំណើរជាលើកដំបូងទៅកាន់ New York។

ក្រោយហេតុការណ៍លិចនេះ កប៉ាល់ Titanic ក៏ស្ថិតនៅនឹងកន្លែងអស់រយៈពេលជាង 70 ឆ្នាំ មុនពេលត្រូវបានទ័ពជើងទឹកអាម៉េរិកប្រទះឃើញនៅក្នុងបេសកកម្មសម្ងាត់មួយក្នុងសង្គ្រាមត្រជាក់ នៅថ្ងៃទី 01 កញ្ញា 1985។ បន្ទាប់មក នាវាមុជទឹកគ្មាន និងមានមនុស្សបើកបររាប់សិបគ្រឿង បានចុះទៅមើលសាកសពកប៉ាល់ Titanic ក្នុងនោះមានទាំងក្រុមស្រាវជ្រាវផងដែរ។ នេះបើតាមទំព័រ Business Insider។

មកដល់ពេលនេះ សាកសពកប៉ាល់ Titanic បានបាត់បង់រូបរាងដើមទាំងស្រុង ហាក់នៅសល់តែគ្រោងឆ្អឹង។ យោងតាមអ្នកវិទ្យាសាស្ត្រ Lori Johnson មូលហេតុដែលនាំឱ្យសាកសព Titanic ត្រូវបានរំលាយយ៉ាងលឿនដូច្នេះ គឺដោយសារមានបាក់តេរីស៊ីដែកដែលមានឈ្មោះថា Halomonas titanicae។

Henrietta Mann អ្នកវិទ្យាសាស្ត្រដែលបានរកឃើញបាក់តេរីខាងលើកាលពីឆ្នាំ 2010 បានឱ្យដឹងថា សាកសពកប៉ាល់ Titanic នឹងមានវត្តមានត្រឹមតែ 30 ឆ្នាំទៀតប៉ុណ្នោះ មុនពេលបាត់ខ្លួន។ កប៉ាល់នេះបានស្ថិតនៅក្នុងសមុទ្រអស់ 107 ឆ្នាំមកហើយ។

June 21, 2023

មហាសេដ្ឋីចិន Jack Ma «នៅមានជីវិត និងមានសេចក្ដីសុខធម្មតា»

ប្រធានបច្ចុប្បន្នរបស់ក្រុមហ៊ុន Alibaba បានបង្ហើបឱ្យដឹងថា ស្ថាបនិក លោក Jack Ma មិនមានបញ្ហាអ្វីទេ និងកំពុងចំណាយពេលវេលាច្រើនជាងមុននៅប្រទេសចិន។

«ជាដំបូង លោក Jack នៅមានជីវិត។ គាត់គ្មានបញ្ហាអ្វីទេ និងមានសេចក្ដីសុខ» ប្រធានក្រុមហ៊ុន Alibaba លោក Michael Evans និយាយនៅក្នុងកិច្ចប្រជុំ Viva Tech នៅប៉ារីស កាលពីថ្ងៃទី 15 មីថុនាដូច្នេះ។ លោក Evans ក៏បានឱ្យដឹងថា លោក Jack Ma «កំពុងបង្រៀននៅសាកលវិទ្យាល័យមួយនៅទីក្រុងតូក្យូ ប្រទេសជប៉ុន និងចំណាយពេលវេលានៅប្រទេសចិនច្រើនជាងមុន»។

ដំណឹងខាងលើត្រូវបានលើកឡើងបន្ទាប់ពីមានអ្នកសួរអំពីស្ថានភាពស្ថាបនិករបស់ Alibaba។ យោងតាម CNBC ប្រការនេះបង្ហាញថា សុខទុក្ខរបស់មហាសេដ្ឋីចិន Jack Ma នៅតែទទួលបានការចាប់អារម្មណ៍ ក្រោយពីក្រុមហ៊ុនរបស់លោកមានបញ្ហាខ្លះជាមួយទីក្រុងប៉េកាំង ដោយសារច្បាប់រឹតបន្តឹងលើក្រុមហ៊ុនបច្ចេកវិទ្យា នាពេលកន្លង។

លោក Evans ថ្លែងថា លោក Jack Ma នៅតែជាភាគហ៊ុនិកធំជាងគេរបស់ក្រុមហ៊ុន Alibaba។ ការបង្ហាញវត្តមានរបស់លោក Jack Ma នេះ គឺចំពេលដែលទីក្រុងប៉េកាំងកំពុងរកវិធីស្ដារសេដ្ឋកិច្ចជាតិ និងទំនុកចិត្តរបស់អ្នកវិនិយោគ ក្រោយពីបានរឹតបន្តឹងវិស័យបច្ចេកវិទ្យាអស់ជាច្រើនឆ្នាំ៕

June 17, 2023

អ្នកជំនាញរបស់ណាសាថា ព្រះចន្ទអាចមានភាវៈរស់ ពិសេសគឺប្រភពរបស់វា

ភាវៈរស់ក្រៅភពផែនដីមិនមែននៅឆ្ងាយឡើយ តែអាចស្ថិតនៅលើភពរណបរបស់ផែនដី នោះគឺព្រះចន្ទរបស់មនុស្ស។

ប៉ូលខាងត្បូងរបស់ព្រះចន្ទក្លាយជាចំណុចដ៏ទាក់ទាញសម្រាប់បណ្ដាប្រទេសមហាអំណាចអវកាស ពិសេសនៅពេលទីភ្នាក់ងារអវកាសអាម៉េរិក (ណាសា) រៀបគម្រោងនាំមនុស្សឡើងទៅជាន់ដីព្រះចន្ទតាមរយៈបេសកកម្ម Artemis។

ថ្មីៗនេះ អ្នកវិទ្យាសាស្ត្រមួយរូបរបស់ណាសា បានចែករំលែកព័ត៌មានដ៏គួរឱ្យភ្ញាក់ផ្អើលមួយ នោះគឺ នៅលើឋានព្រះចន្ទអាចមានភាវៈរស់ បើទោះមានលក្ខខណ្ឌមិនអំណោយផលសម្រាប់ជីវិត។

យោងតាម Business Insider អ្នកវិទ្យាសាស្ត្រ Prabal Saxena របស់អង្គការណាសា ឱ្យដឹងថា ជីវិតរបស់សត្វល្អិតអាចមានវត្តមាននៅក្នុងបរិស្ថានអាក្រក់ដូចនៅលើព្រះចន្ទ។ លោក Prabal បន្ថែមថា រណ្ដៅនានានៅលើផ្ទៃព្រះចន្ទទំនងជាបានផ្ដល់ជាជម្រកល្អសម្រាប់សត្វល្អិតទាំងនោះ ពិសេសគឺនៅប៉ូលខាងត្បូងដែលពន្លឺព្រះអាទិត្យមិនអាចទៅដល់។

លោក Prabal និងសហការីយល់ថា សត្វល្អិតទាំងនេះមានប្រភពមកពីទីអវកាស ពិសេសគឺផែនដីតែម្ដង។ សត្វល្អិតទាំងនេះ បើសិនជាមាន ពួកវាប្រហែលជាបានទៅកាន់ឋានព្រះចន្ទតាមរយៈយានអវកាស ក្នុងនោះមានយានចុះចតដូចជា Apollo របស់សហរដ្ឋអាម៉េរិក កាលពីឆ្នាំ 1969 ជាដើម។ ប្រសិនបើពេលនេះពុំមានសត្វល្អិត នៅថ្ងៃខាងមុខ ព្រះចន្ទក៏នៅតែមានវត្តមានរបស់ភាវៈរស់ ព្រោះថា អនាគត មនុស្សនឹងបង្កើនវត្តមានរបស់ខ្លួននៅទីនោះ៕

June 16, 2023

Tag: ជីវិត