ការស្រាវជ្រាវ - La Reine Media

ករណីធ្លាក់យន្តហោះសម្លាប់មនុស្ស 229 នាក់ព្រោះតែឆេះខ្សែភ្លើង បានកែប្រែវិស័យអាកាសចរណ៍ទាំងមូល

គ្រោះថ្នាក់ធ្លាក់យន្តហោះដឹកមនុស្ស 229 នាក់កាលពីឆ្នាំ 1998 បានធ្វើឱ្យមានការកែប្រែជាច្រើននៅក្នុងស្ដង់ដាសុវត្ថិភាពរបស់វិស័យអាកាសចរណ៍ពិភពលោក។

កាលពីថ្ងៃទី 02 កញ្ញា 1998 ជើងហោះហើរលេខ 111 របស់យន្តហោះពាណិជ្ជកម្ម MD-11 បានចេញដំណើរពីទីក្រុង New York សហរដ្ឋអាម៉េរិក ទៅកាន់ប្រទេសស្វ៊ីស។ យន្តហោះនេះ ហោះឡើងដោយរលូតនៅវេលាម៉ោង 20 និង 18 នាទី។ ប៉ុន្តែ ពេលហោះឡើងដល់កម្ពស់ 10,100 ម៉ែត្រ ក្លិនអាក្រក់ក៏ចាប់ផ្ដើមភាយក្នុងកាប៊ីនអ្នកបើកបរ។ ពីឡុតក៏ដឹងថា ក្លិននេះភាយចេញពីប្រព័ន្ធម៉ាស៊ីនត្រជាក់ក្នុងកាប៊ីនពីឡុត ខណៈដែលកាប៊ីនអ្នកដំណើរមិនមានបញ្ហា។

បួននាទីក្រោយមក ក្លិនចម្លែកនេះក៏ភាយកាន់តែខ្លាំងនៅក្នុងកាប៊ីនពីឡុត អមនឹងផ្សែងពណ៌ស។ ពេលនេះទើបក្រុមអ្នកបើកបរដឹកថា មានអគ្គិភ័យក្នុងកាប៊ីន រួចក៏រាយការណ៍ដល់ស្ថាប័នគ្រប់គ្រងអាកាសចរណ៍។ ភ្លាមនោះ អណ្ដាតភ្លើងក៏ចាប់ផ្ដើមឆាបឆេះ ធ្វើឱ្យក្រុមពីឡុតមានពេលតិចតួចសម្រាប់ការចុះចតបន្ទាន់។ MD-11 ត្រូវបានបញ្ជាឱ្យចុះចតលើព្រលានយន្តហោះ Halifax Stanfield (កាណាដា) ដែលមានចម្ងាយជាង 100 គីឡូម៉ែត្រពីយន្តហោះ។

បួននាទីបន្ទាប់មកទៀត យន្តហោះក៏ហោះបានប្រហែល 50 គីឡូម៉ែត្រ។ ក្រុមហោះហើរក៏បានស្នើឱ្យអូសបន្លាយពេលវេលាហោះហើរដើម្បីបន្ទាបខ្លួន និងបញ្ចេញចោលឥន្ធនៈ។

នៅក្នុងអំឡុងពេលនោះ ក្រុមពីឡុតបានបិទចរន្តអគ្គិសនីក្នុងកាប៊ីន និងកង្ហារនៅលើពិតានយន្តហោះ ដែលនេះបានប្រែក្លាយលំហនៅពិតានទៅជាឧបករណ៍ស្រូបខ្យល់។ ភ្លាមនោះ ស្រាប់តែអណ្ដាតភ្លើងឆេះរាលដាលពេញកាប៊ីនពីឡុង ហើយផ្នែកជាច្រើនក៏លែងដំណើរការ ក្នុងនោះមានទាំងមុខងារបើបរស្វ័យប្រវត្ត និងអេក្រង់សម្រាប់មើលរបស់ពីឡុតផងដែរ។

MD-11 ក៏បាត់បង់ការគ្រប់គ្រងទាំងស្រុង។ ក្រុមហោះហើរបានផ្ដល់សញ្ញា «Mayday» ដែលរាយការណ៍អំពីគ្រោះអាសន្នកម្រិតខ្ពស់បំផុត ហើយក៏បាត់ទំនាក់ទំនង។ យន្តហោះនេះបានធ្លាក់ចុះមហាសមុទ្រនៅម៉ោង 22 និង 31 នាទី ក្នុងល្បឿន 555 គីឡូម៉ែត្រ/ម៉ោង ធ្វើឱ្យដងខ្លួនយន្តហោះខ្ទេចជារាប់លានបំណែកក្នុងរយៈពេលមិនដល់មួយវិនាទី។

ហេតុការណ៍ធ្លាក់យន្តហោះរបស់ក្រុមហ៊ុន Swissari នេះ បានសម្លាប់មនុស្ស 229 នាក់។ ក្រោយ MD-11 បានធ្លាក់ គណៈកម្មការសុវត្ថិភាពចរាចរណ៍កាណាដា (TSB) ក៏បានចាប់ផ្ដើមស៊ើបអង្កេតរកមូលហេតុ។ លទ្ធផលនៃការស្រាវជ្រាវបង្ហាញថា អណ្ដាតភ្លើងបានចាប់ផ្ដើមឆេះចេញពីបណ្ដាញខ្សែភ្លើងខាងលើកាប៊ីនអ្នកបើកបរ ហើយរាលដាលយ៉ាងលឿន ធ្វើឱ្យផ្នែកជាច្រើនរបស់យន្តហោះត្រូវខូចខាត។ អេក្រង់នានានៅក្នុងកាប៊ីនអ្នកបើកបរបានខូច នាំឱ្យពីឡុតត្រូវរាវដើម្បីបញ្ជាយន្តហោះព្រោះមើលមិនឃើញ ហើយក៏ហោះខុសទិសដៅ និងធ្លាក់ចូលមហាសមុទ្រអាត្លង់ទិក។

យន្តហោះនេះមិនមានប្រព័ន្ធស្វែងរកប្រភពអណ្ដាតភ្លើង និងប្រព័ន្ធពន្លត់ភ្លើង ទើបក្រុមហោះហើរត្រូវប្រើច្រមុះដើម្បីហិតក្លិន ពេលនោះ ហេតុការណ៍បានប្រែជាអាក្រក់ណាស់ទៅហើយ។

TSB សន្និដ្ឋានថា មូលហេតុនៃគ្រោះថ្នាក់នេះគឺដោយសារ «ស្ដង់ដាគ្រប់គ្រងអគ្គិភ័យសម្រាប់វត្ថុធាតុក្នុងយន្តហោះ មិនសមស្រប»។

ក្រោយហេតុការណ៍ខាងលើ សំណើជាច្រើនត្រូវបានលើកឡើងដើម្បីកែលំអស្តង់ដានានានៅក្នុងយន្តហោះ។ សំណើទាំងនេះក៏បាននាំឱ្យមានការកែប្រែច្រើននៅក្នុងស្ដង់ដាសុវត្ថិភាពអាកាសចរណ៍របស់ស្ថាប័នគ្រប់គ្រងអាកាសចរណ៍ នៅក្នុងការផលិតយន្តហោះ និងវិស័យអាកាចរណ៍ទាំងមូលរបស់ពិភពលោក៕

June 7, 2023

ស្ត្រីជាប់ពន្ធនាគារព្រោះសម្លាប់កូនបួននាក់នៅអូស្ត្រាលី ត្រូវបានដោះលែង

Kathleen Folbigg ជាស្ត្រីម្នាក់ដែលធ្លាប់ត្រូវបានកាត់ទោសពីបទសម្លាប់កូនតូចបួននាក់ ត្រូវបានដោះលែងពីពន្ធនាគារ ក្រោយរយៈពេល 20 ឆ្នាំ នៅពេលមានការសង្ស័យថា ត្រូវបានកាត់ទោសដោយអយុត្តិធម៌។

ប្រធានតុលាការ New South Wales កាលពីថ្ងៃទី 05 មិថុនា 2023 បានឱ្យដឹងថា បានពិភាក្សាជាមួយអភិបាលរដ្ឋនេះ និងបានស្នើឱ្យមានការដោះលែងដោយគ្មានលក្ខខណ្ឌចំពោះ Kathleen Folbigg ក្រោយពីលទ្ធផលនៃការស្រាវជ្រាវបឋមបង្ហាញថា មានចំណុចខុសប្រក្រតីទាក់ទិននឹងការកាត់ទោសស្ត្រីដែលត្រូវបានចោទថាបានសម្លាប់កូនតូចបួននាក់។ Folbigg ត្រូវបានដោះលែងក្នុងថ្ងៃដដែល។

Kathleen Folbigg អាយុ 55 ឆ្នាំ បានជាប់ពន្ធនាគារកាលពីឆ្នាំ 2003 ដោយត្រូវបានកាត់ទោសពីបទសម្លាប់មនុស្ស បន្ទាប់ពីកូនបួននាក់របស់គាត់បានស្លាប់ជាបន្តបន្ទាប់ក្នុងរង្វង់ជាងមួយទសវត្សរ៍ ចាប់ពីឆ្នាំ 1989។ Folbigg សុទ្ធតែជាអ្នករកឃើញសាកសពរបស់កូនៗ ប៉ុន្តែពុំមានភស្ដុតាងអ្វីដែលបញ្ជាក់ថា ស្ត្រីរូបនេះជាជនដៃដល់។

Kathleen Folbigg ត្រូវជាប់ពន្ធនាគារក្រោយពីតុលាការយល់ថា លទ្ធភាពដែលក្មេងបួននាក់ក្នុងគ្រួសារសុទ្ធតែបានស្លាប់ដោយគ្មានមូលហេតុគឺជារឿង «ពិបាកទៅរួច»។ ការសម្រេចរបស់តុលារក៏យោងទៅលើខ្លឹមសារនៅក្នុងកំណត់ហេតុរបស់ Folbigg ដែលបានសរសេរអំពីការចាកចេញរបស់កូនៗផងដែរ។

កាលពីមានអាយុ 20 ឆ្នាំ Kathleen Folbigg បានរៀបការជាមួយ Craig Folbigg។ ក្នុងរង្វង់មួយឆ្នាំ Folbigg ក៏មានកូននៅក្នុងឆ្នាំ 1989 ប៉ុន្តែកូនច្បងនេះបានស្លាប់ទៅវិញក្រោយការចាប់កំណើតបាន19 ថ្ងៃ។ មួយឆ្នាំបន្ទាប់ Folbigg បង្កើតបានកូនប្រុសឈ្មោះ Patrick តែក៏បានស្លាប់ពេលមានអាយុ 8 ខែ។ ពីរឆ្នាំបន្ទាប់មកទៀត កូនទីបីឈ្មោះ Sarah របស់ Folbigg ក៏បានស្លាប់ក្នុងអាយុ 10 ខែ។ ចំណែកកូនពៅឈ្មោះ Laura កើតឆ្នាំ 1999 ក៏ឃើញពន្លឺថ្ងៃបានតែ 18 ខែ។

ពេល Laura បានស្លាប់ សមត្ថកិច្ចក៏បើកការស៊ើបអង្កេត ហើយពីរឆ្នាំក្រោយមក តុលាការក៏កាត់ទោសដាក់ពន្ធនាគារចំពោះ Folbigs។

Kathleen Folbigg មិនព្រមទទួលកំហុស ប៉ុន្តែនៅតែត្រូវជាប់ពន្ធនាគារ 40 ឆ្នាំ។ កាលពីឆ្នាំ 2019 រឿងក្ដីរបស់ Kathleen Folbigg ក៏ត្រូវបានសមត្ថកិច្ចស៊ើបអង្កេតឡើងវិញ ហើយក៏រកឃើញចំណុចគួរឱ្យសង្ស័យ។ កាលពីឆ្នាំ 2022 ការស៊ើបអង្កេតមួយផ្សេងទៀតក៏ត្រូវបានធ្វើឡើង បន្ទាប់ពីក្រុមអ្នកវិទ្យាសាស្ត្របង្ហាញភស្ដុតាងបញ្ជាក់ថា មូលហេតុនៃការស្លាប់របស់ក្មេងទាំងបូននាក់ខាងលើគឺដោយសារជំងឺតំណពូជ៕

June 5, 2023

ពពកចំហាយទឹកជះចេញពីព្រះចន្ទរបស់ភពសៅរ៍ មានប្រវែងជាង 9,000 គីឡូម៉ែត្រ

ក្រុមតារាវិទូបានរកឃើញចំហាយទឹកដ៏សម្បើមជះចេញពី Enceladus ដែលជាព្រះចន្ទមួយរបស់ភពសៅរ៍ ដែលនេះកំពុងតែផ្ដល់ក្ដីសង្ឃឹមដល់គំនិតដែលយល់ថា មានភាវៈរស់នៅខាងក្រៅផែនដី។

ទំព័រ Guardian កាលពីថ្ងៃទី 30 ឧសភា បានចុះផ្សាយថា ចំហាយឧស្ម័នប្រវែងប្រហែល 9,600 គីឡូម៉ែត្រ ដែលប្រហាក់ប្រហែលនឹងចម្ងាយពីជប៉ុនទៅអៀឡង់ កំពុងជះទឹកទៅក្នុងទីអវកាសក្នុងល្បឿនប្រមាណ 300 លីត្រ/វិនាទី។ តាំងពីយូរមកហើយ អ្នកវិទ្យាសាស្ត្រជឿថា ព្រះចន្ទ Enceladus ដែលមានទំហំប្រហែល 500 គីឡូម៉ែទ្រ មានលាក់មហាសមុទ្រទឹកប្រៃខាងក្រោមសម្បកដ៏ត្រជាក់ ហើយទំនងជាជះចំហាយទឹកទៅក្នុងបរិយាកាស។ ក៏ប៉ុន្តែ នេះគឺជាលើកដំបូងដែលអ្នកវិទ្យាសាស្ត្របានមើលឃើញករណីបាញ់ជះចំហាយទឹកដ៏ធំសម្បើមបែបនេះ។

«យើងពិតជាភ្ញាក់ផ្អើលនឹងទំហំ និងប្រវែងរបស់ចំហាយនេះ» អ្នកវិទ្យាសាស្ត្រ Geronimo Villanueva មកពីអង្គការណាសា និងជាសមាជិកក្រុមស្រាវជ្រាវខាងលើ ថ្លែងដូច្នេះ។ លទ្ធផលនៃការស្រាវជ្រាវនេះត្រូវបានចុះផ្សាយលើទស្សនាវដ្ដី Nature Astronomy។

ក្រុមខាងលើបានសង្កេតមើល Enceladus ដែលជាព្រះចន្ទធំជាងគេលំដាប់ទី 6 របស់ភពសៅរ៍ ដោយតេឡេស្កុបអវកាស James Webb កាលពីខែវិច្ឆិកា 2022។ ឧបករណ៍គណនារបស់តេឡេស្កុបនេះបង្ហាញថា ចំហាយនេះធ្វើឱ្យ Enceladus បាត់បង់ទឹក 300 គីឡូក្រាមរៀងរាល់មួយវិនាទី ដែលអាចបំពេញអាងទឹកខ្នាតអូឡាំពិកមួយ ក្នុងរយៈពេលតែប៉ុន្មានម៉ោងប៉ុណ្ណោះ។

ការសង្កេតមុននោះបង្ហាញថា ចំហាយទឹកដែលមានផ្ទុកភាគល្អិតរបស់ព្រឹល និងសារធាតុគីមីសរីរាង្គ បានជះចេញដូចទៅនឹងទឹកដែលបាញ់ចេញពីផ្ទៃផែនដី នៅលើព្រះចន្ទ Enceladus។ ដោយសារតែវិលជុំវិញភពសៅរ៍លឿនពេក ពោលគឺសម្រេចបានមួយជុំដោយប្រើពេលតែជាងមួយថ្ងៃ ចំហាយទឹកក៏ច្រាលចូលក្នុងគន្លងតារាវិថីរបស់ព្រះចន្ទ Enceladus និងបង្កើតបានជារង្វង់មូលមួយដ៏ធំ។ យោងតាមទិន្នន័យពីតេឡេស្កុប បរិមាណទឹកប្រហែល 30% ដែលបានរសាត់ផុតពី Enceladus ត្រូវបានរក្សាទុកក្នុងរង្វង់មូលខាងលើ ខណៈដែល 70% ទៀតបានភាយទៅក្នុងអវកាសជុំវិញភពសៅរ៍។

កាលពីឆ្នាំ 2017 ក្រុមអ្នកវិទ្យាសាស្ត្រមកពីណាសា បានឱ្យដឹងថា ព្រះចន្ទ Enceladus មានសារធាតុស្ទើរគ្រប់យ៉ាងដែលត្រូវការចាំបាច់សម្រាប់ភាវៈមានជីវិតដែលមនុស្សធ្លាប់បានដឹង ក្នុងនោះរួមមាន ទឹក ថាមពល និងកត្តាគីមីសាស្ត្រជាដើម។

ក្នុងអនាគត បណ្ដាបេសកកម្មស្រាវជ្រាវព្រះចន្ទ Enceladus នឹងជួយឱ្យអ្នកវិទ្យាសាស្ត្រដឹងច្បាស់អំពីកម្រាស់របស់សម្បកទឹកកកខាងក្រៅ និងជម្រៅរបស់មហាសមុទ្រក្រោមដីរបស់ព្រះចន្ទមួយនេះ៕

May 31, 2023

បច្ចេកវិទ្យា «បាញ់បញ្ជូនអគ្គិសនីពីអវកាសមកកាន់ផែនដី» កំពុងមានការប្រកួតប្រជែងខ្លាំង

ក្រុមអ្នកវិទ្យាសាស្ត្រនៅសាកលវិទ្យាល័យ Kyoto នឹងធ្វើតេស្តក្នុងការប្រើប្រាស់ផ្កាយរណបបាញ់បញ្ជូនអគ្គិសនីបានពីព្រះអាទិត្យ មកកាន់ផែនដី ក្នុងទម្រង់រលកម៉ៃក្រូវេវ នៅឆ្នាំ 2025។

ការប្រណាំងប្រជែងគ្នាអភិវឌ្ឍបច្ចេកវិទ្យាបាញ់បញ្ជូនអគ្គិសនីព្រះអាទិត្យដែលប្រមូលបានពីទីអវកាស មកកាន់ផែនដី កំពុងឡើងកម្ដៅខ្លាំង។ នៅប្រទេសជប៉ុន ក្រុមហ៊ុនរបស់ Hiroshi Matsumoto អតីតនាយកសាកលវិទ្យាល័យ Kyoto កំពុងនាំមុខគេនៅក្នុងការស្រាវជ្រាវអំពីបច្ចេកវិទ្យានេះ។ បន្ទាប់មកគឺសាស្ត្រាចារ្យ Naoki Shinohara នៅសាកលវិទ្យាល័យ Kyoto ក៏បន្តការស្រាវជ្រាវ។ នេះបើតាម Nikkei ចុះផ្សាយកាលពីថ្ងៃទី 27 ឧសភា។

ឆ្នាំ 2009 ក្រុមរបស់ Shinohara បានប្រើប្រាស់បាឡុងហោះដើម្បីបាញ់បញ្ជូនអគ្គិសនីពីកម្ពស់ 30 ម៉ែត្រ មកកាន់ទូរស័ព្ទចល័តនៅលើដី។ នៅក្នុងឆ្នាំដដែល Shinohara ក៏ត្រូវបានជ្រើសតាំងជាប្រធានក្រុមប្រឹក្សាបច្ចេកវិទ្យារបស់គម្រោងពីក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុន ដើម្បីអភិវឌ្ឍមធ្យោបាយផ្គត់ផ្គង់អគ្គិសនីដោយមិនប្រើខ្សែ។ ក្រុមអ្នកវិទ្យាសាស្ត្រក្នុងគម្រោងនេះបានទទួលជោគជ័យក្នុងការធ្វើតេស្តបាញ់បញ្ជូនអគ្គិសនីក្នុងទម្រង់ម៉ៃក្រូវេវរលកទទឹង (transverse waves) កាលពីឆ្នាំ 2015 និងក្នុងទម្រម៉ៃក្រូវេវរលកបណ្ដោយ (longitudinal waves) កាលពីឆ្នាំ 2018 ក្នុងរយៈចម្ងាយពីប្រហែល 40 ម៉ែត្រ។ នាពេលខាងមុខ ពួកគេនឹងធ្វើតេស្តបាញ់បញ្ជូនអគ្គិសនីក្នុងទម្រម៉ៃក្រូវេវរលកបណ្ដោយពីចម្ងាយចាប់ពី 1 ដល់ 5 គីឡូម៉ែត្រ។

បច្ចុប្បន្ន ក្រុមអ្នកវិទ្យាសាស្ត្រខាងលើកំពុងដាក់គោលដៅធ្វើតេស្តការបាញ់បញ្ជូនអគ្គិសនីពីអវកាសមកកាន់ផែនដីនៅឆ្នាំ 2025។ ពួកគេនឹងប្រើប្រាស់ផ្កាយរណបខ្នាតតូចដើម្បីបាញ់បញ្ជូនអគ្គិសនីមកកាន់ទីតាំងទទួលនៅលើដីដែលមានគម្លាតពីគ្នារាប់រយគីឡូម៉ែត្រ។

រូបភាពបង្ហាញពីការបាញ់បញ្ជូនរលកម៉ៃក្រូវេវអវកាសមកកាន់ស្ថានីយទទួលនៅលើដី

គំនិតស្ដីពីការប្រមូលថាមពលព្រះអាទិត្យក្នុងទីអវកាស ត្រូវបានអ្នកវិទ្យាសាស្ត្រអាម៉េរិកលើកឡើងកាលពីឆ្នាំ 1968។ មធ្យោបាយរបស់ពួកគេគឺការបាញ់បង្ហោះផ្ទាំងសូឡាឡើងទៅកាន់ទីអវកាសដើម្បីផលិតអគ្គិសនីពីកម្ដៅព្រះអាទិត្យនៅលើកម្ពស់ 36,000 គីឡូម៉ែត្រ។ ថាមពលព្រះអាទិត្យត្រូវបានបំប្លែងទៅជារលកម៉ៃក្រូវេវ និងបាញ់បញ្ជូនមកកាន់ស្ថានីយទទួលនៅលើដី រួចបំប្លែងវាមកជាអគ្គិសនីវិញ។ រលកម៉ៃក្រូវេវអាចត្រូវបានបាញ់បញ្ជូនឆ្លងកាត់ពពក និងបង្កើតបានជាប្រភពផ្គត់ផ្គង់អគ្គិសនីដែលមានស្ថិរភាព មិនថាថ្ងៃ ឬយប់ ក្ដៅ ឬភ្លៀង៕

May 29, 2023

រកឃើញបណ្ដាញ «ផ្លូវល្បឿនលឿន» និងទីក្រុងរាប់រយ អាយុកាលរាប់ពាន់ឆ្នាំ លាក់ខ្លួនក្នុងព្រៃជ្រៅ

(ក្វាតេម៉ាឡា)- ក្រុមអ្នកស្រាវជ្រាវអាម៉េរិក-ក្វាតេម៉ាឡា បានរកឃើញបណ្ដាញ «ផ្លូវល្បឿនលឿន» ដំបូងគេលើពិភពលោក ដែលតភ្ជាប់ទីក្រុងបុរាណរាប់រយរបស់ជនជាតិម៉ាយ៉ា (Maya)។

យោងតាម Business Insider ដែលបានចុះផ្សាយកាលពីថ្ងៃទី 22 ឧសភា បណ្ដាញ «ផ្លូវល្បឿនលឿន» បុរាណនេះមានប្រវែងប្រហែល 177 គីឡូម៉ែត្រ តភ្ជាប់ទីក្រុងចំនួន 417។ ការរកឃើញបណ្ដាញផ្លូវ និងទីក្រុង ក៏ដូចជាប្រព័ន្ធធារាសាស្ត្រ និងហេដ្ឋារចនាសម្ព័ន្ធកសិកម្ម បង្ហាញថា សហគមន៍ជនជាតិដែលរស់នៅតំបន់អាម៉េរិកកណ្ដាល មានភាពរីកចម្រើនជាងអ្វីដែលអ្នកវិទ្យាសាស្ត្រធ្លាប់បានគិត។ លទ្ធផលនៃការស្រាវជ្រាវនេះត្រូវបានចុះផ្សាយលើទស្សនាវដ្ដីរបស់សាកលវិទ្យាល័យ Cambridge។

សំណល់បុរាណដែលស្ថិតនៅលើទីតាំងបុរាណ el Mirador ក្នុងតំបន់ព្រៃមួយនៃប្រទេសក្វាតេម៉ាឡា មានវត្តមានតាំងពី 1,000 ឆ្នាំមុនគ្រិស្តសករាជ រហូតដល់សម័យបុរេប្រវត្តិរបស់ជនជាតិម៉ាយ៉ា។ តំបន់ព្រៃនេះអាចទៅដល់ដោយការធ្វើដំណើរតាមឧទ្ធម្ភាគចក្រ ឬដើរដោយថ្មើរជើង 64 គីឡូម៉ែត្រ។

ក្រុមអ្នកស្រាវជ្រាវអាម៉េរិក-ក្វាតេម៉ាឡា បានគូរផែនទីតំបន់ខាងលើចាប់តាំងពីឆ្នាំ 2015 ដោយប្រើប្រាស់ឧបករណ៍បច្ចេកវិទ្យាស្កេនកាំរស្មីឡាស៊ែរ ដែលហៅថា លីដា (lidar)។ បច្ចេកវិទ្យានេះអាចឱ្យគេរកឃើញវត្ថុបុរាណតូចបំផុត។ លីដាអនុញ្ញាតឱ្យអ្នកស្រាវជ្រាវមើលឃើញប្រឡាយ ព្រែក បឹង បណ្ដាញផ្លូវ ឬ បណ្ដាញប្រាសាទបុរាណ។ល។

May 23, 2023

កូឡុំប៊ីដកសេចក្ដីប្រកាសស្ដីពីការរកឃើញកុមារបួននាក់នៅមានជីវិតក្នុងព្រៃអាម៉ាហ្សូន ក្រោយគ្រោះថ្នាក់យន្តហោះ

ប្រធានាធិបតីកូឡុំប៊ី បានដកសេចក្ដីប្រកាសស្ដីពីការរកឃើញកុមារបួននាក់នៅមានជីវិតក្រោយពីបានជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន កាលពី 17 ថ្ងៃមុននោះ ហើយថា លោកសោកស្ដាយចំពោះការភាន់ច្រឡំនេះ។

«ខ្ញុំសូមអភ័យទោសនូវអ្វីដែលបានកើតឡើង។ កងទ័ព និងសហគមន៍ជនជាតិដើមនឹងបន្តស្វែងរកមិនឈប់ឈរ ដើម្បីនាំយកព័ត៌មានដែលប្រទេសជាតិទាំងមូលកំពុងទន្ទឹងរង់ចាំ» ប្រធានាធិបតីកូឡុំប៊ី លោក Gustavo Petro បង្ហោះសារនៅលើ Twitter កាលពីថ្ងៃទី 18 ឧសភាដូច្នេះ។

លោក Petro ក៏បានលុបអត្ថបទដែលបានបង្ហោះកាលពីមួយថ្ងៃមុននោះ ដែលនិយាយថា កងទ័ពបានរកឃើញកុមារបីនាក់ដែលមានអាយុ 4, 9, 13 ឆ្នាំ និងទារកម្នាក់អាយុ 11 ខែ ដែលបាត់ខ្លួនបន្ទាប់ពីជួបគ្រោះថ្នាក់ធ្លាក់យន្តហោះ។ យោងតាមប្រធានាធិបតី Petro ព័ត៌មានភាន់ច្រឡំនេះត្រូវបានរាយការណ៍ដោយវិទ្យាស្ថានសុខុមាលភាពគ្រួសាររបស់រដ្ឋាភិបាល។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប៕

May 19, 2023

កុមារបួននាក់វង្វេងក្នុងព្រៃអាម៉ាហ្សូនអស់ 17 ថ្ងៃ ប៉ុន្តែសំណាងល្អនៅមានជីវិត

កងកម្លាំងជួយសង្គ្រោះបានរកឃើញកុមារបួននាក់ដែលបានបាត់ខ្លួនអស់រយៈពេល 17 ថ្ងៃ ក្រោយពីជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន ដែលស្ថិតក្នុងប្រទេសកូឡុំប៊ី។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

«នៅក្នុងការប្រឹងប្រែងមិនឈប់ឈរ កងទ័ពបានរកឃើញក្មេងបួននាក់ដែលបានបាត់ខ្លួនក្រោយហេតុការណ៍ធ្លាក់យន្តហោះនៅ Guaviare» ប្រធានាធិបតីកូឡុំប៊ី Gustavo Petro ប្រកាសលើ Twitter កាលពីថ្ងៃទី17 ឧសភាដូច្នេះ ហើយថា ការរកឃើញនេះគឺជា «ភាពរីករាយសម្រាប់ប្រទេសជាតិ»។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

មួយក្នុងចំណោមឧទ្ធម្ភាគទាំងបីគ្រឿងបំពាក់ឧបករណ៍បំពងសំឡេង បានធ្វើការស្វែងរកក្នុងរង្វង់ 1,500 ម៉ែត្រ និងបានចាក់ផ្សាយសំឡេងជីដូនរបស់ក្មេងទាំងនោះ ដែលប្រាប់ថា «ឈប់ផ្លាស់ទីក្នុងព្រៃដើម្បីរង់ចាំការជួយសង្គ្រោះ»។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប។

ក្មេងរងគ្រោះទាំងបួននាក់នេះត្រូវបានរកឃើញក្នុង «ស្ថានភាពសុខភាពធម្មតា បើទោះមានរបួសស្នាមខ្លះ» ក្រោយពីរង្វេង 17 ថ្ងៃនៅក្នុងព្រៃ។

អាជ្ញាធរមិនទាន់ប្រកាសអំពីមូលហេតុនៃករណីធ្លាក់យន្តហោះនេះនៅឡើយ។ ប៉ុន្តែ ប៉ុន្មាននាទីមុនពេលជួបគ្រោះថ្នាក់ ពីឡុតបានបញ្ជូនសញ្ញាប្រាប់ថា ម៉ាស៊ីនយន្តហោះមានបញ្ហា។ ជនជាតិកូឡុំប៊ី នៅក្នុងតំបន់ខាងលើនេះ តែងតែធ្វើដំណើរតាមឧទ្ធម្ភាគចក្រ ដោយសារតែផ្លូវគោកមិនមានអំណោយផលល្អសម្រាប់ការធ្វើដំណើរ។

យោងតាមអង្គការជនជាតិដើមភាគតិចកូឡុំប៊ី (ONIC) ជីវភាពរបស់ជនជាតិ Huitoto បានសម្របខ្លួននឹងស្ថានភាពលំបាកនៅក្នុងព្រៃអាម៉ាហ្សូន និងថែរក្សាប្រពៃណីបរបាញ់សត្វ ក៏ដូចជាមានជំនាញក្នុងការបេះផ្លែឈើក្នុងព្រៃជាអាហារ៕

May 18, 2023

James Webb រកឃើញទឹកនៅជុំវិញផ្កាយដុះកន្ទុយ 238P/Read

តេឡេស្កុបអវកាស James Webb សង្កេតឃើញចំហាយទឹកនៅជុំវិញផ្កាយដុះកន្ទុយមួយដួងដ៏កម្រ ស្ថិតនៅក្នុងខ្សែក្រវាត់អាចម៍ផ្កាយចន្លោះភពអង្គារ និងភពព្រហស្បតិ៍។

ការរកឃើញថ្មីនេះគឺជាការរីកចម្រើនមួយជំហានទៀតនៅក្នុងវិស័យវិទ្យាសាស្ត្ររបស់តេឡេស្កុបអវកាស James Webb ដែលជាលើកដំបូង ឧស្ម័ន ក្នុងករណីនេះគឺចំហាយទឹក ត្រូវបានរកឃើញស្ថិតនៅជុំវិញផ្កាយដុះកន្ទុយ 238P/Read។ នេះបើតាមការចុះផ្សាយកាលពីថ្ងៃទី 16 ឧសភា របស់ទំព័រ Space។ ប្រការនេះពិតជាមានសារសំខាន់ ព្រោះវាបង្ហាញថា ទឹកនៅក្នុងប្រព័ន្ធព្រះអាទិត្យកាលពីយុគសម័យដំបូង អាចត្រូវបានរក្សាទុកក្នុងទម្រង់ទឹកកកនៅក្នុងខ្សែក្រវាត់អាចម៍ផ្កាយចម្បងជាងគេ។

«កន្លងមក យើងបានឃើញបណ្ដាវត្ថុនៅក្នុងខ្សែក្រវាត់អាចម៍ផ្កាយចម្បងគេ ពេញលក្ខណៈជាផ្កាយដុះកន្ទុយ ប៉ុន្តែ ដោយមានទិន្នន័យវិសាលគមសុក្រឹតនេះពី JWST ទើបយើងអាចប្រាកដថា ទឹកកកកំពុងបង្កើតបាតុភូតនោះ» អ្នកវិទ្យាសាស្ត្រ Michael Kelley ប្រធានក្រុមស្រាវជ្រាវនៃគម្រោងនេះ នៅសាកលវិទ្យាល័យ Maryland បានឱ្យដឹងដូច្នេះ។ ការរកឃើញថ្មីនេះត្រូវបានចុះផ្សាយលើទស្សនាវដ្ដី Nature។

ការរកឃើញចំហាយទឹកនៅជុំវិញ 238P/Read ជួយពង្រឹងទ្រឹស្ដីដែលថា ទឹកត្រូវបានផ្កាយដុះកន្ទុយនាំពីទីអវកាសមកកាន់ផែនដី។ ប៉ុន្តែ ការស្រាវជ្រាវក៏បង្ហាញថា 238P/Read មិនមានឧស្ម័ន CO2 ផងដែរ។

នៅក្នុងខ្សែក្រវាត់អាចម៍ផ្កាយចម្បងរបស់ប្រព័ន្ធព្រះអាទិត្យ ភាគច្រើនគឺជាដុំថ្ម។ ក៏ប៉ុន្តែ នៅទីនេះ ជួនកាលក៏មានវត្ថុដូចផ្កាយដុះកន្ទុយ 238P/Read។

មកដល់បច្ចុប្បន្ន «យើងមិនទាន់ប្រាកដថា ធ្វើបែបណាបានជាទឹកដ៏ច្រើនមានវត្តមាននៅលើផែនដី។ ការស្វែងយល់ប្រវត្តិនៃការ «បែងចែក» ទឹកនៅក្នុងប្រព័ន្ធព្រះអាទិត្យ នឹងជួយឱ្យយើងយល់អំពីប្រព័ន្ធផ្កាយដទៃ និងវាយតម្លៃបានថា តើពួកវាអាចមានភពដែលដូចផែនដី ឬអត់» Stefanie Milam មកពីក្រុមស្រាវជ្រាវខាងលើ ឱ្យដឹងដូច្នេះ។

ជំហានបន្ទាប់ ក្រុមស្រាវជ្រាវកំណត់គោលដៅសង្កេតលំអិតលើ 238P/Read ដើម្បីស្វែងយល់ឱ្យបានច្បាស់ថា ផ្កាយដុះកន្ទុយកម្រជួបដូចវា មានសមាសធាតុដូចគ្នានេះ ឬអត់៕

May 18, 2023

រកឃើញដីកម្រនៅលើភពក្រៅប្រព័ន្ធព្រះអាទិត្យ ដែលមានកម្ដៅបួនពាន់អង្សាសេ

ក្រុមអ្នកវិទ្យាសាស្ត្របានរកឃើញសារធាតុ terbium ជាលើកដំបូងនៅក្នុងបរិយាកាសរបស់ KELT-9b ដែលជាភពមួយក្នុងចំណោមភពក្រៅប្រព័ន្ធព្រះអាទិត្យដែលក្ដៅបំផុតធ្លាប់ត្រូវបានកត់ត្រានាពេលកន្លង។

KELT-9b មានសីតុណ្ហភាពជាមធ្យម 4,000 អង្សាសេ វិលជុំវិញផ្កាយមេ KELT-9 ដែលមានចម្ងាយពីផែនដីប្រហែល 670 ឆ្នាំពន្លឺ (មួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ)។ ភពនេះតែងតែជាទីចាប់អារម្មណ៍របស់អ្នកតារាសាស្ត្រចាប់តាំងពីត្រូវបានរកឃើញកាលពីឆ្នាំ 2016។

លទ្ធផលនៃការស្រាវជ្រាវថ្មីដែលបានប្រកាសលើទស្សនាវដ្ដី Astronomy and Astrophysics បានឱ្យដឹងថា ក្រុមអ្នកវិទ្យាសាស្ត្របានរកឃើញលោហធាតុ terbium ដែលជាដីកម្រ នៅក្នុងបរិយាកាសរបស់ KELT-9b។

Terbium ត្រូវបានអ្នកវិទ្យាសាស្ត្រស៊ុយអែត Carl Gustaf Mosander រកឃើញជាលើកដំបូងក្នុងអណ្ដូងរ៉ែ Ytterby នៅប្រជុំកោះ Stockholm កាលពីឆ្នាំ 1843។ សារធាតុ terbium គឺជាដីដ៏កម្រ ក្នុងនោះ 99% នៃការផលិត terbium របស់ពិភពលោក គឺធ្វើឡើងនៅ Bayan Obo ដែលជាតំបន់ទាញយករ៉ែក្នុងដែនដីម៉ុងហ្កោលីខាងក្នុងរបស់ប្រទេសចិន។

ភព KELT-9b វិលជុំវិញផ្កាយមេ KELT-9

ការរកឃើញខាងលើនេះពិតជាមានសារសំខាន់ក្នុងការស្វែងយល់អំពីបណ្ដាភពនៅក្រៅប្រព័ន្ធព្រះអាទិត្យ។ «កាន់តែយល់ច្បាស់អំពីលក្ខណៈសម្បត្តិរបស់បណ្ដាភព យើងក៏កាន់តែមានឱកាសច្រើនក្នុងការស្វែងរកឃើញផែនដី 2.0 ក្នុងអនាគត» Nicholas Borsato មកពីសាកលវិទ្យាល័យ Lund ដែលជាសមាជិករបស់ក្រុមស្រាវជ្រាវអំពីភព KELT-9b បញ្ជាក់ដូច្នេះ៕

April 29, 2023

ការសិក្សាស្រាវជ្រាវ ៖ វិស័យមូលបត្រនាំមកនូវប្រាក់ចំណេញខ្ពស់ជាងអចលនទ្រព្យ ប៉ុន្តែ បន្ថែមគម្លាតរវាងអ្នកមាន និងអ្នកក្រ

ទីផ្សារមូលបត្របានឡើងថ្លៃខ្ពស់ជាង ៥ ដង ធៀបនឹងអត្រានៃកំណើនរបស់តម្លៃអចលនទ្រព្យ រាប់ចាប់ពីឆ្នាំ ១៩៥០ នេះបើតាមរបាយការណ៍របស់ NBER។

សម្រាប់ជនជាតិអាម៉េរិក ក៏ដូចជាមនុស្សភាគច្រើននៅលើផែនដី ការដែលមានដី និងផ្ទះ គឺជាវិធីសន្សំទ្រព្យមួយដ៏ពេញនិយម។ ក៏ប៉ុន្តែ របាយការណ៍ថ្មីរបស់ ការិយាល័យស្រាវជ្រាវសេដ្ឋកិច្ចជាតិ (NBER) របស់ សហរដ្ឋអាម៉េរិក បានឱ្យដឹងថា ទម្រង់វិនិយោគដែលនាំមកនូវប្រាក់ចំណេញខ្ពស់ជាងគេគឺមូលបត្រ ពោលគឺមិនមែនអចលនទ្រព្យឡើយ នៅក្នុងអំឡុងពេលច្រើនទសវត្សរ៍មកនេះ។

យោងតាមរបាយការណ៍ស្រាវជ្រាវខាងលើ ទីផ្សារមូលបត្របានឡើងថ្លៃខ្ពស់ជាង ៥ ដង ធៀបនឹងអត្រានៃកំណើនរបស់តម្លៃអចលនទ្រព្យ រាប់ចាប់ពីឆ្នាំ ១៩៥០។ នេះមានន័យថា ពលរដ្ឋអាម៉េរិក ដែលវិនិយោគទៅលើទីផ្សារមូលបត្រ រកបានប្រាក់ចំណេញខ្ពស់ជាង ធៀបនឹងអ្នកវិនិយោគទៅក្នុងវិស័យអចលនទ្រព្យ។

«នេះគឺជាមូលហេតុមួយដែលធ្វើឱ្យមានការកើនឡើងនៃគម្លាតរវាងអ្នកមាន និងអ្នកក្រ ទាក់ទិននឹងជាតិសាសន៍នៅ សហរដ្ឋអាម៉េរិក។ ជនជនអាម៉េរិកស្បែកខ្មៅ មានទ្រព្យស្ថិតក្នុងវិស័យអចលនទ្រព្យច្រើនជាងមូលបត្រ ហើយប្រការនេះមិនមានអំណោយផលល្អសម្រាប់ពួកគេ» Business Insider ស្រង់របាយការណ៍របស់ NBER ឱ្យដឹងដូច្នេះ។

ការស្រាវជ្រាវមួយរបស់ Fed New York (ធនាគារជាតិអាម៉េរិក សាខា New York) កាលពីឆ្នាំមុនបានបង្ហាញថា ជាង ៩០% នៃមនុស្សដែលបានចូលរួមការស្ទង់មតិ ប្រាប់ថា ចូលចិត្តកាន់កាប់អចលនទ្រព្យជាជាងការវិនិយោគទៅក្នុងទីផ្សារមូលបត្រ ហើយសូម្បីតែនៅក្នុងពេលទីផ្សារមូលបត្របង្កើតបានកំណត់ត្រាថ្មីៗជាបន្តបន្ទាប់ ក៏ឥរិយាបថនេះមិនបានប្ដូរផ្លាស់ដែរ។

«ក្នុងអំឡុងពេលប្រហែលពីឆ្នាំ ១៩៥០ ដល់ ២០១៩ ផ្ទះស្នាក់នៅ និងទ្រព្យដែលមិនមានជាហិរញ្ញវត្ថុ បានគ្របដណ្ដប់លើមុខជំនួញមួយភាគធំរបស់ ជនជាតិអាម៉េរិកស្បែកខ្មៅ ខណៈដែលវាមានតែ ៤១% ប៉ុណ្ណោះ នៅក្នុងខ្ទង់វិនិយោគរបស់ ជនជាតិអាម៉េរិកស្បែកស។ ទ្រព្យដែលជាទម្រង់ភាគហ៊ុនរបស់ ជនជាតិអាម៉េរិកស្បែកខ្មៅ មានតែ ៧% ប៉ុណ្ណោះ ទាបជាងឆ្ងាយ បើធៀបនឹង ១៨% របស់ ជនជាតិអាម៉េរិកស្បែកស» របាយការណ៍ខាងលើបង្ហាញដូច្នេះ។

របាយការណ៍នេះបន្ថែមថា «ការឡើងថ្លៃខ្ពស់នៃទីផ្សារមូលបត្រ បាននាំឱ្យទ្រព្យរបស់ក្រុមអ្នកមានកំពូលៗ ដែលភាគច្រើនបំផុតជា ជនជាតិអាម៉េរិកស្បែកស បានកើនឡើងខ្ពស់ខ្លាំង»។

ក្រុមអ្នកស្រាវជ្រាវរបស់ NBER បង្ហាញថា ក្នុងអំឡុងសម័យកូវីដ-១៩ កម្រិតនៃការប្រមូលផ្ដុំរបស់ទ្រព្យនៅ សហរដ្ឋអាម៉េរិក បានឡើងដល់កំពូល រាប់ចាប់ពីសង្គ្រាមលោកលើកទីពីរ ក្នុងនោះមានគ្រួសារតែ ០.០១% ប៉ុណ្ណោះ ដែលកាន់កាប់ ៣៦% នៃទ្រព្យឯកជនសរុបទូទាំងប្រទេស។

ក្រុមអ្នកស្រាវជ្រាវរបស់ NBER សន្និដ្ឋានថា គោលនយោបាយនានាដែលបែងចែកទ្រព្យឡើងវិញ នឹងជួយកាត់បន្ថយបានភ្លាមៗនូវវិសមភាពរវាងអ្នកមាន និងអ្នកក្រ។ ផ្ទុយទៅវិញ បើសិនជាវិធានការស្ដីពីរចនាសម្ព័ន្ធត្រូវបានអនុវត្តសន្សឹមៗ គេនឹងអាចត្រូវចំណាយពេលរាប់សតវត្សរ៍ ដើម្បីទទួលបានប្រសិទ្ធភាព។ ទោះជាបែបនេះក្ដី ក្រុមនេះសង្កត់ធ្ងន់ថា វិធីសាស្ត្រទាំងពីរនេះសុទ្ធតែមានសារសំខាន់ និងចាំបាច់៕

August 5, 2022

Tag: ការស្រាវជ្រាវ