អន្តរជាតិ - La Reine Media

ខ្មាន់កាំភ្លើងម្នាក់បាញ់រះក្នុងសាលារៀននៅ សហរដ្ឋអាម៉េរិក ធ្វើឱ្យមនុស្សច្រើននាក់បាត់បង់ជីវិត

ជនដៃដល់បានបាញ់សម្លាប់មនុស្សពីរនាក់ និងបង្ករបួសស្នាមដល់មនុស្សច្រើននាក់នៅឯសាលារៀនមួយក្នុងរដ្ឋ Missouri សហរដ្ឋអាម៉េរិក មុនពេលប្រយុទ្ធជាមួយក្រុមប៉ូលិស និងត្រូវបានកម្ចាត់។

ករណីបាញ់រះនេះកើតឡើងនៅឯវិទ្យាល័យសិល្បៈទស្សនីយភាព និងសម្ដែង (CVPA) ក្នុងទីក្រុង St. Louis នៃរដ្ឋ Missouri សហរដ្ឋអាម៉េរិក កាលពីព្រឹកថ្ងៃទី ២៤ តុលា នៅពេលជនដៃដល់ប្រើប្រាស់កាំភ្លើងវែងបាញ់ប្រហារទៅលើមនុស្សម្នា។

ស្នងការប៉ូលិសក្រុង St. Louis លោក Michael Sack បានឱ្យដឹងថា សមត្ថកិច្ចបានទៅដល់កន្លែងកើតហេតុ និងបានប្រយុទ្ធជាមួយខ្មាន់កាំភ្លើង។ ជនសង្ស័យត្រូវគ្រាប់ និងបានស្លាប់ក្នុងមន្ទីរពេទ្យ។

ជនរងគ្រោះ ៨ នាក់ ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់ ក្នុងនោះមាននារីពេញវ័យម្នាក់ និងសិស្សស្រីម្នាក់ត្រូវបានបញ្ជាក់ថាបានស្លាប់បន្ទាប់ពីទៅដល់មន្ទីរពេទ្យ។ លោក Sack ឱ្យដឹងថា ពួកគេបានស្លាប់ដោយសារត្រូវខ្មាន់កាំភ្លើងបាញ់ប្រហារ។

អត្តសញ្ញាណជនសង្ស័យមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ ក្រុមមន្ត្រីនិយាយថា ខ្មាន់កាំភ្លើងមានអាយុជាង ២០ ឆ្នាំ និងមិនទាន់ដឹងច្បាស់អំពីមូលហេតុនៅពីក្រោយអំពើបាញ់ប្រហារនេះ៕

October 25, 2022

កាន់តំណែងនាយករដ្ឋមន្ត្រីអង់គ្លេស ៤៤ ថ្ងៃ តែលោកស្រី Truss ទទួលប្រាក់ឧបត្ថម្ភ ១២៩ ០០០ ដុល្លារ/ឆ្នាំ ពេញមួយជីវិត ៖ បក្សប្រឆាំងជំទាស់

លោកស្រី Truss មានសិទ្ធិទទួលបានប្រាក់ឧបត្ថម្ភពេញមួយជីវិត ១២៩ ០០០ ដុល្លារ/ឆ្នាំ បើទោះជាកាន់តំណែងនាយករដ្ឋមន្ត្រីអង់គ្លេស បានតែ ៤៤ ថ្ងៃ ដែលប្រការនេះធ្វើឱ្យសាធារណមតិមានភាពចម្រូងចម្រាស។

នាយិការដ្ឋមន្ត្រីអង់គ្លេស លោកស្រី Liz Truss ប្រកាសលាលែងពីតំណែងកាលពីថ្ងៃទី ២០ តុលា ក្រោយការកាន់តំណែងនេះបាន ៤៤ ថ្ងៃ ក្នុងស្ថានភាពដែលលោកស្រីត្រូវរងសម្ពាធខ្លាំង។ បើទោះជាកាន់តំណែងក្នុងរយៈពេលខ្លី លោកស្រី Truss នៅតែមានលក្ខខណ្ឌគ្រប់គ្រាន់ដើម្បីទទួលបានប្រាក់ឧបត្ថម្ភ PDCA ១១៥ ០០០ ផោន (ជាង ១២៩ ០០០ ដុល្លារអាម៉េរិក) ជារៀងរាល់ឆ្នាំ ពេញមួយជីវិត។

ព័ត៌មានខាងលើបានធ្វើឱ្យមានភាពចម្រូងចម្រាសក្នុងសាធារណមតិ ពិសេសគឺពីគណបក្សប្រឆាំង។ ពួកគេយល់ថា ខ្ទង់ប្រាក់ឧបត្ថម្ភនេះច្រើនជាងប្រាក់បៀវត្សរ៍ដែលលោកស្រី Truss ទទួលបានក្នុងពេលកាន់តំណែងនេះទៅទៀត។ មតិផ្សេងទៀតលើកជាសំណួរថា ខ្ទង់ប្រាក់នេះអាចត្រូវបានប្រើប្រាស់ក្នុងគោលដៅល្អជាងនេះបានដែរ ឬទេ។

«លោកស្រីមិនគួរទទួលយកប្រាក់នោះ។ កាន់តំណែងបានតែ ៤៤ ថ្ងៃ លោកស្រីមិនទាន់មានសិទ្ធិគ្រប់គ្រាន់ដើម្បីទទួល ហើយគួរតែបដិសេធ» Keir Starmer មេបក្សសាធារណរដ្ឋ បានប្រាប់ BBC កាលពីថ្ងសទី ២១ តុលាដូច្នេះ។

Ed Davey ដែលជាប្រធានគណបក្សប្រជាធិបតេយ្យសេរី ក៏យល់ឃើញដូចទៅនឹងការលើកឡើងរបស់ Keir Starmer ផងដែរ។

«បច្ចុប្បន្ន ក្នុងចំណោមមន្ត្រី ៥ រូបគឺមាន ១ រូបត្រូវទៅរកកន្លែងឧបត្ថម្ភអាហារ, ៣៥% ហូបមិនគ្រប់គ្រាន់។ ពិតជាចម្លែកណាស់ បើសិនលោកស្រី Truss អាចទទួលបានអត្ថប្រយោជន៍នេះ» Mark Serwotka អគ្គលេខានៃសម្ព័ន្ធសេវាកម្មពាណិជ្ជកម្ម និងសាធារណៈ ដែលជាអង្គការតំណាងមន្ត្រីរាជការថ្លែងបែបនេះ និងបានអំពាវនាវឱ្យ នាយករដ្ឋមន្ត្រីបន្ទាប់របស់ អង់គ្លេស ដំឡើងប្រាក់ខែជូនមន្ត្រីរាជការដើម្បីទប់ទល់នឹងអតិផរណា។

លោកស្រី Truss បច្ចុប្បន្នមិនទាន់មានការអធិប្បាយអ្វីទាក់ទងនឹងខ្ទង់ប្រាក់ឧបត្ថម្ភ និងភាពចម្រូងចម្រាសខាងលើនៅឡើយ។

PDCA គឺជាកម្មវិធីរបស់ រាជរដ្ឋាភិបាលអង់គ្លេស ត្រូវបានអនុវត្តតាំងពីឆ្នាំ ១៩៩១ ក្នុងបំណង «ជួយឱ្យអតីតនាយករដ្ឋមន្ត្រីអាចបន្តសកម្មភាពសាធារណ»។ ខ្ទង់ប្រាក់ PDCA នេះត្រូវបានផ្ដល់ដោយយោងទៅតាមការចំណាយផ្លូវការជាក់ស្ដែង ដូចជា ថ្លៃជួលការិយាល័យ ប្រាក់ខែសម្រាប់បុគ្គលិកជំនួយការ ឬថ្លៃធ្វើដំណើរទៅចូលរួមព្រឹត្តិការណ៍ក្នុងនាមជាអតីតនាយករដ្ឋមន្ត្រី៕

October 24, 2022

រកឃើញប្រហោងខ្មៅ (Black Hole) ដែលនៅក្បែរផែនដីបំផុត

ក្រុមអ្នកវិទ្យាសាស្ត្របានរកឃើញប្រហោងខ្មៅមួយដែលធំជាងព្រះអាទិត្យ ១២ ដង ស្ថិតនៅចម្ងាយ ១៥៥០ ឆ្នាំពន្លឺពីផែនដី ដែល ១ ឆ្នាំពន្លឺស្មើនឹង ៩៤៦១ ទ្រីលានគីឡូម៉ែត្រ។

ដើម្បីឱ្យដឹងថា មានប្រហោងខ្មៅប៉ុន្មានដែលកំពុងលាក់ខ្លួនក្នុងចក្រវាល អ្នកវិទ្យាសាស្ត្រមួយក្រុមបានពិនិត្យមើលទិន្នន័យប្រព័ន្ធផ្កាយភ្លោះជិត ២ សែន ដែលត្រូវបានរកឃើញដោយបេសកកម្ម Gaia។ ក្នុងចំណោមនោះ ពួកគេស្វែងយល់អំពីសញ្ញារបស់ផ្កាយដែលវិលជុំវិញវត្ថុខ្នាតយក្សដែលមិនអាចមើលឃើញ។

ប្រហោងខ្មៅ (Black Hole) គឺជាវត្ថុអវកាសដែលងងឹតសូន្យសុង សូម្បីតែពន្លឺក៏មិនអាចរត់គេចបាន។ ពួកវាត្រូវបានគេដឹងតាមរយៈពន្លឺខ្លះដែលបញ្ចេញនៅពេលស្រូបយកឧស្ម័ន ធូលី ឬលេបផ្កាយ ឬមួយការប៉ះទង្គិចនឹងគ្នាប៉ុណ្ណោះ។

យោងតាមបណ្ឌិត Sukanya Chakrabarti ប្រធានក្រុមស្រាវជ្រាវ បេក្ខភាពប្រហោងខ្មៅដែលមានសក្ដានុពលបំផុតត្រូវបានស្រាវជ្រាវស៊ីជម្រៅតាមរយៈការវាស់ស្ទង់វិសាលគមពន្លឺរបស់ផ្កាយ ដោយប្រើប្រាស់ឧបករណ៍វិទ្យាសាស្ត្រជាច្រើន។ បើសិនមានប្រហោងខ្មៅមួយនៅទីនោះ ក្រុមស្រាវជ្រាវអាចរកឃើញវាដោយមើលទៅលើកម្លាំងទំនាញរបស់ប្រហោងខ្មៅទៅលើវិសាលគមពន្លឺរបស់ផ្កាយដែលស្ថិតនៅលើគន្លងគោចរ។ ដោយប្រើវិធីសាស្ត្រនេះ ក្រុមខាងលើយកចិត្តទុកដាក់ជាពិសេសទៅលើផ្កាយមួយដួងដែលតូចជាងព្រះអាទិត្យ និងវិលជុំវិញវត្ថុអវកាសងងឹតមួយដែលធំជាង ១២ ដង ធៀបនឹងព្រះអាទិត្យ។ ផ្កាយនេះបញ្ចប់គន្លងគោចរមួយជុំរបស់វាដោយចំណាយពេល ១៨៥ ថ្ងៃ។

«កម្លាំងទំនាញរបស់ប្រហោងខ្មៅទៅលើផ្កាយដែលអាចមើលឃើញ អាចកំណត់បានពីលទ្ធផលវាស់ស្ទង់វិសាលគមពន្លឺ» Chakrabarti ឱ្យដឹងដូច្នេះ។ «តាមរយៈការវិភាគលើល្បឿនរបស់ផ្កាយ យើងអាចសន្និដ្ឋានបាននូវទំហំរបស់ប្រហោងខ្មៅដែលគោចរជាមួយគ្នា និងពេលវេលាវិលជុំវិញគន្លងគោចរ»។

ក្រុមស្រាវជ្រាវខាងលើបានគណនាឃើញថា ប្រហោងខ្មៅដែលទើបរកឃើញនេះមានចម្ងាយពីផែនដីប្រមាណ ១៥៥០ ឆ្នាំពន្លឺ ប៉ុន្តែ មិនទាន់ត្រូវបានបញ្ជាក់ថាជាប្រហោងខ្មៅនៅឡើយ។ Chakrabarti និងសហការី បានផ្ញើលទ្ធផលនៃការស្រាវជ្រាវនេះទៅឱ្យទស្សនាវដ្ដី Astrophysical Journal ដើម្បីចុះផ្សាយ៕

October 24, 2022

ជះដំឡូងបារាំងកិនលើផ្ទាំងគំនូរតម្លៃ ១១១ លានដុល្លារ ដើម្បីប្រឆាំងនឹងឥន្ធនៈហ្វូស៊ីល

ក្រុមសកម្មជននាំគ្នាជះដំបូងបារាំងកិនទៅលើផ្ទាំងគំនូរដែលមានតម្លៃ ១១១ លានដុល្លារអាម៉េរិក របស់វិចិត្រករ Claude Monet ដែលដាក់តាំងនៅក្នុងសារមន្ទីរ ហើយស្រែកហ៊ោពាក្យប្រឆាំងនឹងឥន្ធនៈហ្វូស៊ីល។

«បើសិនជាត្រូវការរូបគំនូរដែលត្រូវជះដំឡូងបារាំងកិន ឬចាក់ទឹកប៉េងប៉ោះដើម្បីដាស់ឱ្យសង្គមដឹងថា ឥន្ធនៈហ្វូស៊ីលកំពុងតែសម្លាប់មនុស្សគ្រប់គ្នា នោះយើងខ្ញុំនឹងឱ្យគ្រប់គ្នាមើលឃើញថា គំនូរដែលត្រូវជះដំឡូងបារាំងកិនមានរូបរាងបែបណា» ក្រុមការពារបរិស្ថាន Last Generation (ជំនាន់ចុងក្រោយ) សរសេរនៅក្នុងវីដេអូបង្ហោះលើ Twitter កាលពីថ្ងៃទី ២៣ តុលាដូច្នេះ។

ស្លៀកពាក់ឈុតខ្មៅ និងអាវក្រៅពណ៌ទឹកក្រូច សកម្មជនបរិស្ថាន ២ រូប បានជះដំឡូងបារាំងកិនទៅលើផ្ទាំងគំនូរ Les Meules ដែលដាក់តាំងនៅក្នុងសារមន្ទីរ Barberini នៅ Postdam នៃ ប្រទេសអាល្លឺម៉ង់ មុនពេលអង្គុយចុះនៅខាងមុខផ្ទាំងគំនូរ និងច្រត់ដៃម្ខាងទៅលើជញ្ជាំង។

«តើត្រូវការជះដំឡូងបារាំងកិនទៅលើផ្ទាំងគំនូរទើបធ្វើឱ្យអស់លោកចេះស្ដាប់? គំនូរនេះនឹងមិនមានតម្លៃអ្វីទាំងអស់ បើសិនយើងគ្រប់គ្នាត្រូវប្រយុទ្ធគ្នាដើម្បីដណ្ដើមអាហារ» សកម្មជនម្នាក់និយាយដូច្នេះ។

សកម្មជនបរិស្ថាន ២ រូបខាងលើ បច្ចុប្បន្នត្រូវបានឃុំខ្លួនរង់ចាំការស៊ើបអង្កេតអំពីការខូចខាតទ្រព្យសម្បត្តិ និងសកម្មភាពបំពាន។ មន្ត្រីនៅសារមន្ទីរបានឱ្យដឹងថា ផ្ទាំងគំនូរនេះស្ថិតក្នុងកញ្ចក់ការពារ និងមិនមានការខូចខាតអ្វីឡើយ។ គំនូរនេះនឹងត្រូវបានដាក់តាំងឡើងវិញចាប់ពីថ្ងៃទី ២៧ តុលាខាងមុខ។

ផ្ទាំងគំនូរ Les Meules គឺជាកម្រងគំនូររបស់មហាសេដ្ឋី Hasso Plattner និងត្រូវបានឱ្យសារមន្ទីរខ្ចីជារៀងរហូត។ គំនូរនេះត្រូវបានទិញក្នុងតម្លៃ ១១១ លានដុល្លារអាម៉េរិក ក្នុងការលក់ដេញថ្លៃកាលពីឆ្នាំ ២០១៩។ ខ្ទង់ប្រាក់នេះគឺជាតម្លៃខ្ពស់បំផុតសម្រាប់គំនូររបស់ Claude Monet ដែលជាវិចិត្រករល្បីឈ្មោះជនជាតិបារាំង (១៤/១១/១៨៤០ – ០៥/១២/១៩២៦)៕

October 24, 2022

យន្តហោះរបស់ កូរ៉េខាងត្បូង ដឹកមនុស្ស ១៧៣ នាក់ ជួបគ្រោះថ្នាក់ពេលចុះចត

យន្តហោះ Airbus របស់ក្រុមហ៊ុន Korean Air បានជួបគ្រោះថ្នាក់ដោយសារតែជ្រុលចេញពីផ្លូវរត់ពេលចុះចតនៅ ហ្វ៊ីលីពីន ប៉ុន្តែសំណាងល្អ មនុស្សទាំង ១៧៣ មិនបានរងរបួស។

ក្រុមហ៊ុនអាកាសចរណ៍កូរ៉េខាងត្បូង Korean Air ថ្ងៃនេះបានឱ្យដឹងថា យន្តហោះ Airbus SE A330 នៃជើងហោះហើរលេខ KE361 បានបរជ្រុលចេញពីផ្លូវរត់ក្នុងការចុះចតទី ៣ នៅវេលាម៉ោង ២៣ និង ០៧ នាទី ថ្ងៃទី ២៣ តុលា នៅព្រលានយន្តហោះអន្តរជាតិ Mactan-Cebu លើកោះ Mactan នៃខេត្ត Cebu របស់ ប្រទេសហ្វ៊ីលីពីន។

នៅក្នុងហេតុការខាងលើ អ្នកដំណើរ និងបុគ្គលិកហោះហើរ ១៧៣ នាក់ មិនបានរងរបួសអ្វីឡើយ។ យន្តហោះនេះបានធ្វើដំណើរពី Incheon និងបានព្យាយាមចុះចត ២ លើក ប៉ុន្តែមិនបានសម្រេចដោយសារអាកាសធាតុមិនអំណោយផល មុនពេលជួបគ្រោះថ្នាក់នៅក្នុងការចុះចតលើទី ៣។

យន្តហោះ Airbus SE A330 ដែលបានជួបគ្រោះថ្នាក់

«អ្នកដំណើរត្រូវបាននាំទៅកាន់សណ្ឋាគារ ៣ នៅក្នុងតំបន់។ យើងខ្ញុំកំពុងតែស្រាវជ្រាវរកមូលហេតុនៃហេតុការណ៍នេះ ជើងយន្តហោះជំនួសកំពុងត្រូវបានរៀបចំ» ក្រុមហ៊ុន Korean Air ប្រកាសដូច្នេះ។

យន្តហោះមួយគ្រឿងរបស់ Korean Air នៅ Incheon របស់ កូរ៉េខាងត្បូង

ក្រុមហ៊ុន Korean Air មិនធ្លាប់ជួបគ្រោះថ្នាក់ដែលបណ្ដាលឱ្យមានមនុស្សស្លាប់ឡើយ រាប់ចាប់ពីឆ្នាំ ១៩៩៧ នេះបើតាមបណ្ដាញសុវត្ថិភាពអាកាសចរណ៍ (ASN)។ កាលពីឆ្នាំ ១៩៩៧ ក្រុមហ៊ុន Korean Air ត្រូវបានគេចាត់ទុកថា មានគុណភាពសុវត្ថិភាពមិនមានស្ថិរភាព ប៉ុន្តែបានកែលំអឡើងវិញ បន្ទាប់ពីមានជំនួយរបស់ Boeing និង Delta Air Lines៕

October 24, 2022

កូរ៉េខាងជើង និងកូរ៉េខាងត្បូង បាញ់ព្រមានគ្នានៅលើសមុទ្រ

កូរ៉េខាងត្បូង ថ្ងៃនេះបានបាញ់ព្រមានកប៉ាល់របស់ កូរ៉េខាងជើង ដែលឆ្លងកាត់ដែនទឹករបស់ប្រទេសទាំងពីរ ធ្វើឱ្យ ព្យុងយ៉ាង បាញ់កាំជ្រួចហ្វូង ១០ គ្រាប់ដើម្បីជាការឆ្លើយតប។

ទីភ្នាក់ងារសារព័ត៌មាន KCNA ដកស្រង់សម្ដីអ្នកនាំពាក្យរបស់ អគ្គបញ្ជាការដ្ឋានកងទ័ពកូរ៉េខាងជើង បានឱ្យដឹងថា ប្រទេសនេះបានបាញ់កាំជ្រួចហ្វូង ១០ គ្រាប់ទៅកាន់សមុទ្រភាគខាងលិចកាលពីវេលាម៉ោងប្រហែល ៥ និង ១៥ នាទី ថ្ងៃទី ២៤ តុលា។

ទីក្រុងព្យុងយ៉ាង បានឱ្យដឹងថា នេះគឺជាសកម្មភាពឆ្លើយតបក្រោយពី កងទ័ពកូរ៉េខាងត្បូង កាលពីវេលាម៉ោងប្រហែល ៣ និង ៥០ នាទីក្នុងថ្ងៃដដែល បានបាញ់ព្រមានកប៉ាល់របស់ កូរ៉េខាងជើង ដែលឆ្លងកាត់ព្រំដែនសមុទ្ររបស់ប្រទេសទាំងពីរ។

អគ្គសេនាធិការចម្រុះនៃសាធារណរដ្ឋកូរ៉េ (JSC) ក្នុងពេលនោះបានប្រកាសថា បានបង្ខំឱ្យកប៉ាល់ជំនួញពី កូរ៉េខាងជើង វិលត្រលប់ទៅវិញ ក្រោយពីកប៉ាល់នេះឆ្លងកាត់ដែនទឹកភាគខាងជើង (NLL) ក្បែរកោះ Baengnyeong។

NLL ត្រូវបានចាត់ទុកថាជាបន្ទាត់ព្រំដែនសមុទ្ររវាង កូរ៉េខាងជើង និង កូរ៉េខាងត្បូង។ នេះក៏ជាកន្លែងដែលធ្លាប់កើតមានការផ្ទុះអាវុធដាក់គ្នារវាង កម្លាំងរបស់ ទីក្រុងព្យុងយ៉ាង និង សេអ៊ូល កាលពីប៉ុន្មានឆ្នាំកន្លងផងដែរ។

ភាពតានតឹងនៅ ឧបទ្វីបកូរ៉េ ថ្មីៗនេះបានកើនឡើងខ្ពស់នៅពេល ទីក្រុងព្យុងយ៉ាង បាញ់សាកល្បងមីស៊ីលជាបន្តបន្ទាប់ ដោយលើកហេតុផលថា ជាការឆ្លើយតបទៅនឹងសមយុទ្ធយោធារវាង វ៉ាស៊ីងតោន សេអ៊ូល និង តូក្យូ។ កូរ៉េខាងជើង ឱ្យដឹងថា ការសាកល្បងមីស៊ីលរបស់ខ្លួនគឺជាសមយុទ្ធ «វាយប្រហារដោយអាវុធនុយក្លេអែរយុទ្ធសាស្ត្រ»៕

October 24, 2022

Pfizer គ្រោងនឹងដំឡើងថ្លៃវ៉ាក់សាំងបង្ការកូវីដ-១៩ ខ្ពស់ជាងបច្ចុប្បន្ន ៤ ដង

ក្រុមហ៊ុនផលិតឱសថអាម៉េរិក Pfizer គ្រោងនឹងដំឡើងថ្លៃវ៉ាក់សាំងបង្ការជំងឺកូវីដ-១៩ ចាប់ពី ១១០ ដល់ ១៣០ ដុល្លារអាម៉េរិក ខ្ពស់ជាង ៤ ដង ធៀបនឹងតម្លៃបច្ចុប្បន្ន។ នេះបើតាមប្រកាសរបស់នាយកប្រតិបត្តិរបស់ Pfizer Angela Lukin កាលពីថ្ងៃទី ២០ តុលា។

បច្ចុប្បន្ន រដ្ឋាភិបាលអាម៉េរិក កំពុងផ្ដល់វ៉ាក់សាំងបង្ការជំងឺកូវីដ-១៩ ដោយមិនគិតថ្លៃ ដល់ពលរដ្ឋគ្រប់រូប ប៉ុន្តែ ត្រូវបង់ថ្លៃប្រហែល ៣០ ដុល្លារសម្រាប់វ៉ាក់សាំង ១ ដូស ទៅឱ្យ Pfizer និងដៃគូ អាល្លឺម៉ង់ BioNTech។

ការសម្រេចខាងលើត្រូវបាន Pfizer លើកឡើងក្រោយពីកម្មវិធីទិញវ៉ាក់សាំងរបស់ រដ្ឋាភិបាលអាម៉េរិក ដល់កាលកំណត់ ហើយចាប់ពីឆ្នាំ ២០២៣ ទីផ្សារវ៉ាក់សាំងនឹងត្រូវបានងាកទៅរកបណ្ដាក្រុមហ៊ុនធានារ៉ាប់រងឯកជន បើសិនជាស្ថានភាពអាសន្នស្ដីពីសុខភាពសាធារណៈត្រូវបានប្រកាសបញ្ចប់។

លោកស្រី Pfizer Angela Lukin សង្ឃឹមថា វ៉ាក់សាំងបង្ការកូវីដ-១៩ របស់ក្រុមហ៊ុន Pfizer នឹងត្រូវបានបន្តផ្ដល់ដោយមិនគិតថ្លៃដល់ប្រជាជនដែលមានធានារ៉ាប់រងឯកជន ឬធានារ៉ាប់រងដែលចេញថ្លៃដោយ រដ្ឋាភិបាលអាម៉េរិក ហើយទីផ្សារវ៉ាក់សាំងកូវីដ-១៩ នឹងមានទំហំប្រហាក់ប្រហែលនឹងទីផ្សារវ៉ាក់សាំងសម្រាប់ជំងឺផ្ដាសាយលើមនុស្សធំនាបច្ចុប្បន្ន។

ពេលនេះមិនទាន់ដឹងច្បាស់ថា អ្នកដែលមិនមានធានារ៉ាប់រងផ្នែកសុខភាពនឹងទទួលការចាក់វ៉ាក់សាំងកូវីដ-១៩ តាមរបៀបណានៅឡើយ។ Pfizer ក៏មិនទាន់ប្រកាសជាផ្លូវការអំពីតម្លៃរបស់វ៉ាក់សាំងបង្ការកូវីដ-១៩ នៅតាមបណ្ដាប្រទេសក្រៅពី សហរដ្ឋអាម៉េរិក នៅឡើយ៕

October 22, 2022

សហភាពអឺរ៉ុប ត្រៀមផ្ដល់ជំនួយជិត ១.៥ ពាន់លានដុល្លារ/ខែ ដល់ អ៊ុយក្រែន

សហភាពអឺរ៉ុប (EU) គ្រោងនឹងផ្ដល់ជំនួយប្រហែល ១៧.៧ ពាន់លានដុល្លារដល់ អ៊ុយក្រែន ក្នុងឆ្នាំ ២០២៣ ស្មើនឹងជិត ១.៥ ពាន់លានដុល្លារជារៀងរាល់ខែ។

ក្នុងសន្និសីទសារព័ត៌មានកាលពីថ្ងៃទី ២១ តុលា ប្រធានគណៈកម្មការអឺរ៉ុប Ursula von der Leyen បានឱ្យដឹងថា EU គ្រោងនឹង «ផ្ដល់ជំនួយ ១.៥ ពាន់លានអឺរ៉ូ (១.៤៦ ពាន់លានដុល្លារ) ជារៀងរាល់ខែដល់ អ៊ុយក្រែន។

«តួលេខសរុបគឺ ១៨ ពាន់លានអឺរ៉ូ (១៧.៧ ពាន់លានដុល្លារអាម៉េរិក) សម្រាប់ឆ្នាំក្រោយ ជាទឹកប្រាក់ដែល អ៊ុយក្រែន អាចជឿជាក់ ហើយក៏ជាប្រភពហិរញ្ញវត្ថុស្ថិរភាព ដែលគួរទុកចិត្ត និងព្យាករបាន» លោកស្រី von der Leyen ថ្លែងដូច្នេះ។

លោកស្រី Leyen ក៏បានឱ្យដឹងថា អ៊ុយក្រែន បានស្នើម្ចាស់ជំនួយអន្តរជាតិ ផ្ដល់ប្រភពម៉ាក្រូសេដ្ឋកិច្ច «ស្ថិរភាព គួរជាទីទុកចិត្ត និងអាចព្យាករដឹងបាន»។

សំណើរបស់ ទីក្រុងកៀវ ត្រូវបានធ្វើឡើងក្នុងស្ថានការណ៍ដែលសេដ្ឋកិច្ចរបស់ អ៊ុយក្រែន ត្រូវបំផ្លាញក្រោយរយៈពេល ៨ ខែដែលសង្គ្រាមបានផ្ទុះឡើង។ អ៊ុយក្រែន គណនាឃើញថា ពួកគេត្រូវការយ៉ាងតិច ៣.៩ ពាន់លានដុល្លារជារៀងរាល់ខែពីប្រភពឥណទាន ឬជំនួយដើម្បីធានាដំណើរការជាមូលដ្ឋានរបស់រដ្ឋាភិបាល។

លោកស្រី Leyen បញ្ជាក់ថា ទឹកប្រាក់ទាំងនេះនឹងត្រូវបានផ្ដល់ដោយ សហភាពអឺរ៉ុប អាម៉េរិក និងបណ្ដាអង្គការសេដ្ឋកិច្ចអន្តរជាតិ ហើយនឹងត្រូវបានផ្ទេរទៅឱ្យ អ៊ុយក្រែន ជាទម្រង់សាច់ប្រាក់។

ក្នុងប្រកាសរួមក្រោយកិច្ចប្រជុំកំពូលកាលពីថ្ងៃទី ២១ តុលា ក្រុមមេដឹកនាំរបស់ EU បានឱ្យដឹងថានឹងប្រញាប់ផ្ដល់ ៣ ពាន់លានអឺរ៉ូ (២.៩៣ ពាន់លានដុល្លារអាម៉េរិក) ដែលត្រូវបានសម្រេចបែងចែកឱ្យ អ៊ុយក្រែន នាពេលកន្លង។

October 22, 2022

រក្សាទុកមេជីវិតរបស់កូនប្រុសទោលដែលបានស្លាប់ ដើម្បីមានចៅបន្តពូជនឹងគេ

(អ៊ីស្រាអែល)-លោក Baruch រក្សាទុកមេជីវិតរបស់កូនប្រុសទោល Amit Ben Ygal ដែលជាទាហានម្នាក់បានស្លាប់នៅក្នុងតំបន់ West Bank កាលពី ២ ឆ្នាំមុន ដោយសង្ឃឹមថា នឹងមានចៅនឹងគេ។

«Amit គឺជាអ្វីៗគ្រប់យ៉ាងរបស់ខ្ញុំ» លោក Baruch អាយុ ៥៣ ឆ្នាំ និយាយអំពីកូនប្រុសតែមួយគត់របស់លោក។ «ខ្ញុំចង់មានភាពសប្បាយរីករាយក្នុងឆាកជីវិតឡើងវិញ។ កងទ័ពអ៊ីស្រាអែល គួរតែជួយខ្ញុំឱ្យបានក្លាយជាជីតានឹងគេ»។

Amit អាយុ ២១ ឆ្នាំ បានបាត់បង់ជីវិតបន្ទាប់ពីត្រូវ ជនជាតិប៉ាលេស្ទីន គប់ដុំថ្មចំក្បាលក្នុងពេលចូលរួមយុទ្ធនាការរបស់ កងទ័ពអ៊ីស្រាអែល នៅ West Bank កាលពីខែឧសភា ២០២០។ លោក Baruch បានយកមេជីវិតរបស់កូនប្រុសគាត់ក្នុងរង្វង់ ៧២ ម៉ោង ក្រោយពី Amit បានស្លាប់ ជាពេលវេលាគ្រប់គ្រាន់ល្មមសម្រាប់បង្កក និងអាចបង្កកំណើតក្នុងបំពង់ពិសោធន៍។

លោក Baruch ចង់ប្រើប្រាស់មេជីវិតរបស់កូនដើម្បីមានចៅនឹងគេ តាមរយៈការពពោះស្ម័គ្រចិត្តរបស់ស្ត្រីម្នាក់ ប៉ុន្តែមិនអាចធ្វើបាន ដោយសារថា ច្បាប់របស់ អ៊ីស្រាអែល មិនទាន់អនុញ្ញាតឱ្យធ្វើបែបនេះ។ ច្បាប់របស់ អ៊ីស្រាអែល បច្ចុប្បន្នកំណត់ថា មានតែភរិយារបស់ទាហានដែលបានស្លាប់នៅពេលកំពុងបំពេញបេសកកម្មតែប៉ុណ្ណោះ ទើបមានសិទ្ធិប្រើប្រាស់មេជីវិតដើម្បីបង្កកំណើតក្នុងបំពង់ពិសោធន៍ (IVF)។

ក៏ប៉ុន្តែ ក្រុមមន្ត្រីរបស់ អ៊ីស្រាអែល កំពុងតែដាក់សេចក្ដីព្រាងច្បាប់មួយដែលពង្រីកសិទ្ធិនេះសម្រាប់ឪពុកម្ដាយរបស់ទាហាន។ សកម្មជនម្នាក់និយាយថា អ៊ីស្រាអែល គួរតែ «អនុវត្តកាតព្វកិច្ចមនុស្សធម៌» ចំពោះគ្រួសារដែលមានកូនស្លាប់នៅក្នុងជួរកងទ័ព។

លោក Baruch និងភរិយាបានលែងលះគ្នាតាំងពីយូរ ហើយ Amit គឺជាកូនប្រុសតែមួយគត់របស់គាត់។ ឪពុក និងកូនបានរស់នៅជុំគ្នានៅ Ramat Gan ជាយក្រុង Tel Aviv។ លោក Baruch នៅតែមិនអាចជឿបានសោះថា កូនប្រុសរបស់គាត់បានបាត់បង់ជីវិត។ គាត់និយាយថា «បើសិនជាមានចៅមុនពេលស្លាប់ ខ្ញុំអាចស្លាប់ដោយសប្បាយចិត្តហើយ»។

លោក Baruch និងកូនប្រុសទោស Amit Ben Ygal កាលពីនៅរស់

តំណាងរាស្ត្រ Zvi Hauser បានបង្កើតសេចក្ដីព្រាងច្បាប់ «បន្តវេន» ដើម្បីជួយឱ្យបំណងរបស់លោក Baruch បានក្លាយជារឿងស្របច្បាប់។ លោក Hauser យល់ថា ប្រទេសអ៊ីស្រាអែល ជំពាក់បំណុលគ្រួសារទាហាន។

សេចក្ដីព្រាងច្បាប់ «បន្តវេន» របស់លោក Hauser ត្រូវបានអនុម័តនៅក្នុងការបោះឆ្នោតដំបូងកាលពីខែមុន ប៉ុន្តែ នឹងត្រូវឆ្លងកាត់ការបោះឆ្នោតពីរជុំទៀត បន្ទាប់ពីសភាថ្មីរបស់ អ៊ីស្រាអែល ត្រូវបានបង្កើតឡើងនៅខែក្រោយ៕

October 21, 2022

រថយន្តដឹកប្រេងសាំងបុកស្ពានអាកាស បណ្ដាលឱ្យផ្ទុះឆេះផ្ទះប្រជាជននៅ ម៉ិកស៊ិក (វីដេអូ)

អគ្គិភ័យធំមួយបានកើតឡើងបង្កឱ្យមានសំឡេងផ្ទុះជាច្រើនគួរឱ្យភ័យខ្លាច នៅពេលរថយន្តដឹកប្រេងសាំងមួយគ្រឿងបានបុកទៅនឹងស្ពានឆ្លងផ្លូវនៅទីក្រុង Aguascalientes ប្រទេសម៉ិកស៊ិក នាំឱ្យអាជ្ញាធរឈ្លៀសប្រជាជនក្នុងតំបន់។

ក្រុមមន្ត្រីនៅ ទីក្រុង Aguascalientes ភាគកណ្ដាលនៃ ប្រទេសម៉ិកស៊ិក បានឱ្យដឹងថា ករណីគ្រោះថ្នាក់ខាងលើនេះកើតឡើងក្នុងថ្ងៃទី ២១ តុលា នៅពេលរថយន្តដឹកប្រេងសាំងមួយគ្រឿងបានបុកស្ពានអាកាសឆ្លងផ្លូវដែក បណ្ដាលឱ្យមានអណ្ដាតភ្លើងសន្ធោសន្ធៅ ឆេះរាលដាលដល់ផ្ទះជាច្រើនខ្នងដែលនៅក្បែរនោះ។

ប្រធានអាជ្ញាធរគ្រប់គ្រងអគ្គិភ័យរបស់ទីក្រុង Aguascalientes លោក Miguel Murillo បាននិយាយថា មនុស្សប្រហែលពី ៨០០ ទៅ ១,០០០ នាក់ ត្រូវបានឈ្លៀសទៅរកកន្លែងសុវត្ថិភាព។ ជនរងគ្រោះ ១២ នាក់ត្រូវបានសង្គ្រោះពីផ្ទះដែលកំពុងឆាបឆេះ ប៉ុន្តែ ពុំមានអ្នកណាម្នាក់បាត់បង់ជីវិត។

សមត្ថកិច្ចនៅ Aguascalientes បានឱ្យដឹងថា អ្នកបើកបររថយន្តដែលបានបង្កគ្រោះថ្នាក់ខាងលើត្រូវបានប៉ូលិសចាប់ខ្លួន ក្រោយពីហេតុការណ៍នេះបានកើតឡើង។

https://www.youtube.com/watch?v=RsbdEPJJ7NE

October 21, 2022

Category: អន្តរជាតិ