អន្តរជាតិ - La Reine Media

សហរដ្ឋអាម៉េរិក ផ្ដល់ជំនួយជាអាវុធបន្ថែម តម្លៃ 400 លានដុល្លារដល់ អ៊ុយក្រែន

សហរដ្ឋអាម៉េរិក បានប្រកាសអំពីកញ្ចប់ជំនួយថ្មីដែលមានតម្លៃ 400 លានដុល្លារសម្រាប់ អ៊ុយក្រែន ក្នុងនោះមានទាំងមីស៊ីលការពារដែនអាកាស រ៉ុក្កែតរបស់ប្រព័ន្ធ HIMARS និងម៉ាស៊ីនផលិតអគ្គិសនីជាង 200 គ្រឿងផងដែរ។

ឧត្តមសេនីយ៍ត្រី Pat Ryder លេខាផ្នែកសារព័ត៌មានរបស់ មន្ទីរបញ្ចកោណ កាលពីថ្ងៃទី 23 វិច្ឆិកា បានប្រកាសអំពីកញ្ចប់ជំនួយយោធាថ្មីតម្លៃ 400 លានដុល្លារសម្រាប់ អ៊ុយក្រែន។ កញ្ចប់ជំនួយនេះរួមមាន គ្រាប់រ៉ុក្កែតសម្រាប់ប្រព័ន្ធមីស៊ីលការពារដែនអាកាស NASAMS, រ៉ុក្កែតសម្រាប់ប្រព័ន្ធ HIMARS, កាំភ្លើងយន្តធុនធ្ងន់ប្រឆាំងយន្តហោះគ្មានមនុស្សបើក និងគ្រាប់កាំភ្លើងជាង 20 លានគ្រាប់។

កញ្ចប់ជំនួយនេះក៏មានម៉ាស៊ីនផលិតអគ្គិសនីជាង 200 គ្រឿង ដើម្បីជួយឱ្យ អ៊ុយក្រែន អាចដោះស្រាយបញ្ហាដាច់ភ្លើងដោយសារហេដ្ឋារចនាសម្ព័ន្ធរងការខូចខាត។

ក្រសួងការបរទេសអាម៉េរិក ប្រកាសថា កញ្ចប់ជំនួយថ្មីនេះបានធ្វើឱ្យជំនួយសរុបរបស់ប្រទេសនេះសម្រាប់ អ៊ុយក្រែន ចាប់ពីខែមករា 2021 ឡើងដល់ប្រហែល 19.7 លានដុល្លារអាម៉េរិក។

កញ្ចប់ជំនួយថ្មីរបស់ សហរដ្ឋអាម៉េរិក នេះ ត្រូវបានប្រកាសបន្ទាប់ពី រុស្ស៊ី កាលពីថ្ងៃទី 23 វិច្ឆិកា បានបាញ់មីស៊ីលប្រហែល 70 គ្រាប់សំដៅលើគោលដៅហេដ្ឋារចនាសម្ព័ន្ធសំខាន់ៗរបស់ អ៊ុយក្រែន៕

November 24, 2022

អំពើហិង្សាផ្ទុះឡើងនៅឯរោងចក្រផលិត iPhone ក្នុងប្រទេសចិន

Foxconn បញ្ជាក់ថា មានអំពើហិង្សានៅឯរោងចក្រមួយក្នុងតំបន់ភាគកណ្ដាលប្រទេសចិន ជាទីតាំងផលិតទូរស័ព្ទ iPhone បន្ទាប់ពីមានវីដេអូបង្ហាញថា ពលករប៉ះទង្គិចជាមួយក្រុមសន្តិសុខ។

«រាល់សកម្មភាពហិង្សា ក្រុមហ៊ុននឹងបន្តទាក់ទងជាមួយនឹងកម្មករ និងអាជ្ញាធរដើម្បីទប់ស្កាត់ហេតុការណ៍បែបនេះកើតឡើងជាថ្មី» ក្រុមហ៊ុន Foxconn កាលពីម្សិលមិញបានប្រកាសដូច្នេះ។

ក្រុមហ៊ុនបច្ចេកវិទ្យាដែលមានទីស្នាក់ការកណ្ដាលនៅ កោះតៃវ៉ាន់ Foxconn បានបញ្ជាក់ថា មានហេតុការណ៍ប៉ះទង្គិចគ្នានៅឯរោងចក្ររបស់ពួកគេក្នុងតំបន់ Zhengzhou ភាគកណ្ដាលនៃ ប្រទេសចិន។ ក៏ប៉ុន្តែ Foxconn បានបដិសេធចំពោះព័ត៌មានដែលថា ពួកគេបានបណ្ដោយឱ្យបុគ្គលិកថ្មីស្នាក់នៅជាមួយអ្នកវិជ្ជមាននឹងកូវីដ-19 នៅក្នុងរោងចក្រ។

ក្នុងវីដេអូដែលបានបង្ហោះលើបណ្ដាញសង្គម គេឃើញមានកម្មកររបស់ Foxconn រាប់រយនាក់បាននាំគ្នាធ្វើបាតុកម្ម ក្នុងនោះមានអ្នកខ្លះប្រើអំពើហិង្សាប្រឆាំងប៉ូលិស និងក្រុមអ្នកស្លៀកពាក់ឈុតការពារវីរុស។ មនុស្សមួយចំនួនស្រែកថា «បើកប្រាក់ខែឱ្យពួកយើង» ឬនិយាយថា ពួកគេត្រូវបង្ខំឱ្យស្នាក់នៅជាមួយនឹងបុគ្គលិកដែលវិជ្ជមាននឹងកូវីដ-19។

Foxconn ថ្មីៗនេះបានរកឃើញថា ករណីវិជ្ជមាននឹងកូវីដ-19 កំពុងកើនឡើងនៅឯរោងចក្រក្នុងទីក្រុង Zhengzhou នាំឱ្យក្រុមហ៊ុននេះត្រូវបិទខ្ទប់ដើម្បីទប់ស្កាត់ការឆ្លងរាលដាល។ ចាប់ពីពេលនោះមក រោងចក្រដែលមានកម្មករប្រហែល 200,000 នាក់នេះ ត្រូវដំណើរការបែបលាក់លៀម។

ក្នុងខែនេះ លេចឮព័ត៌មានថា កម្មករជាច្រើននៅក្នុងរោងចក្ររបស់ Foxconn បានរត់ចោលការងារ បន្ទាប់ពីចោទថា មានហេដ្ឋារចនាសម្ព័ន្ធមិនល្អ។

ប្រទេសចិន នៅតែអនុវត្តយុទ្ធសាស្ត្រ «គ្មានកូវីដ-19» ដោយការចាត់វិធានការគ្រប់គ្រងតឹងរឹងដើម្បីទប់ស្កាត់ការឆ្លងរាលដាល។ គិតមកដល់បច្ចុប្បន្ន ប្រទេសនេះបានរកឃើញអ្នកឆ្លងកូវីដ-19 សរុបជិត 300,000 នាក់ និងអ្នកស្លាប់ជាង 5,200 នាក់ ដោយសារជំងឺនេះ៕

November 24, 2022

រាជវង្សសម្បូរទ្រព្យដែលកំពុងគ្រប់គ្រង «រាជាណាចក្រកាតា» នាពេលបច្ចុប្បន្ន

រាជវង្ស Al Thani បានគ្រងរាជសម្បត្តិនៅ កាតា ចាប់ពីពេលរាជាណាចក្រនេះត្រូវបានបង្កើតឡើងកាលពីសតវត្សរ៍ទី 19 ហើយបច្ចុប្បន្នមានទ្រព្យជាង 330 ពាន់លានដុល្លារអាម៉េរិក។

កាតា ជាប្រទេសអារ៉ាប់ដំបូងគេដែលបានធ្វើជាម្ចាស់ផ្ទះរបស់ World Cup គឺជាប្រទេសដែលកាន់លទ្ធិរាជាធិបតេយ្យ ដោយមានស្ដេច (emir) ជាមេដឹកនាំប្រទេស ជាមេបញ្ជាការកំពូលរបស់កងទ័ព និងជានិមិត្តរូបរបស់ប្រទេសជាតិ។ ចាប់ពីឆ្នាំ 1847 មកដល់បច្ចុប្បន្ន កាតា បានឆ្លងកាត់ស្ដេចចំនួន 11 ជំនាន់ ដែលទាំងអស់សុទ្ធតែជាសមាជិករបស់រាជវង្ស Al Thani។

រាជវង្ស Al Thani បានដឹកនាំប្រទេសតាំងពីពេលប្រទេសនេះស្ថិតក្រោមអាណានិគម Ottoman ក្នុងសតវត្សរ៍ទី 19 និងក្រោយមកស្ថិតក្រោមអាណានិគមអង់គ្លេស។ ឆ្នាំ 1868 ចក្រភពអង់គ្លេស បានចុះកិច្ចព្រមព្រៀងជាមួយ Sheikh Jassim bin Mohammed Al Thani ដែលជាស្ថាបនិករបស់ ប្រទេសកាតាសម័យទំនើប ដោយទទួលស្គាល់អាធិបតេយ្យរបស់ប្រទេសនេះ។ ឆ្នាំ 1971 ប្រទេសកាតា ទទួលបានឯករាជ្យបន្ទាប់ពី អង់គ្លេស ចាកចេញពីតំបន់។

មហាក្សត្របច្ចុប្បន្នរបស់ កាតា គឺ ព្រះអង្គម្ចាស់ Sheik Tamim bin Hamad Al Thani ជាបុគ្គលមានអំណាចជាងគេនៅប្រទេសនេះ។ ព្រះអង្គម្ចាស់ Sheikh Tamim ប្រសូត្រនៅថ្ងៃទី 03 មិថុនា 1980 គឺជារាជបុត្រាទី 3 របស់អតីតមហាក្សត្រ Hamad bin Khalifa។ ទ្រង់បានឡើងសោយរាជសម្បត្តិចាប់ពីឆ្នាំ 2013 ក្រោយពីបិតារបស់ព្រះអង្គបានដាក់រាជ្យ។ ព្រះអង្គម្ចាស់ Sheik Tamim រៀបអភិសេក 3 លើករួចមកហើយ និងមានបុត្រា 7 អង្គ និងបុត្រី 6 អង្គ។

រាជវង្ស Al Thani មានសមាជិកសរុបជាង 20,000 អង្គ ក្នុងនោះមាន 200 អង្គកំពុងកាន់តំណែងខ្ពស់ក្នុងប្រព័ន្ធនយោបាយ និងប្រព័ន្ធសេដ្ឋកិច្ចរបស់ប្រទេសកាតា នេះបើតាមក្រុមហ៊ុន Priya Dsouza។

រាជវង្ស Al Thani បច្ចុប្បន្នមានទ្រព្យសម្បត្តិសរុបប្រហែល 335 ពាន់លានដុល្លារអាម៉េរិក ក្នុងនោះ មហាក្សត្រ Sheikh Tamim មានទ្រព្យប្រហែល 2 ពាន់លានដុល្លារ៕

មហាក្សត្ររបស់ កាតា ព្រះអង្គម្ចាស់ Sheikh Tamim bin Hamad Al Thani

មហាក្សត្ររបស់ កាតា ព្រះអង្គម្ចាស់ Sheikh Tamim bin Hamad Al Thani (រាប់ពីឆ្វេងទៅស្ដាំ), Sheikha Moza bint Nasser Al-Missned (មាតាស្ដេច) និង Sheikha Moza bint Nasser Al-Missned (បិតាស្ដេច)

November 23, 2022

សហរដ្ឋអាម៉េរិក បញ្ចេញយន្តហោះចម្បាំង F-16 ទំនើបបំផុតនៅលើពិភពលោក

ក្រុមហ៊ុន Lockheed Martin បញ្ចេញយន្តហោះចម្បាំង F-16 Block 70 ដំបូងបង្អស់ និងបានឱ្យដឹងថា កំណែទំនើបបំផុតនេះនឹងត្រូវប្រគល់ឱ្យ ប្រទេសបារ៉ែន។

ក្រុមហ៊ុនការពារជាតិអាម៉េរិក Lockheed Martin កាលពីថ្ងៃទី 22 វិច្ឆិកា បានបង្ហាញវីដេអូស្ដីពីការបញ្ចេញយន្តហោះចម្បាំង F-16 Block 70 ពីរោងចក្រនៅ Carolina ខាងត្បូង។ នេះគឺជា F-16 Block 70 ដំបូងនៅក្នុងចំណោម 16 គ្រឿងដែល ប្រទេសបារ៉ែន បានបញ្ជាទិញ។

Block 70 គឺកំណែទំនើបបំផុតរបស់ F-16 ដែលជាកំណែទី 4 ត្រូវបាន សហរដ្ឋអាម៉េរិក និងសម្ព័ន្ធមិត្តប្រើប្រាស់ច្រើន មុនពេលយន្តហោះបំបាំងកាយជំនាន់ទី 5 បានបង្ហាញវត្តមាន។

Lockheed Martin ឱ្យដឹងថា ទ័ពអាកាសអាម៉េរិក នឹងធ្វើការហោះហើរសាកល្បងដំបូងជាមួយនឹង F-16 Block 70 នៅដើមឆ្នាំក្រោយ មុនពេលប្រគល់ឱ្យ បារ៉ែន។

រោងចក្ររបស់ Lockheed Martin នៅ Carolina ខាងត្បូង កំពុងផលិតយន្តហោះចម្បាំង F-16 ចំនួន 128 គ្រឿង ទៅតាមការបញ្ជាទិញរបស់ ប្រទេសបារ៉ែន ស្លូវ៉ាគី ប៊ុលហ្ការី កោះតៃវ៉ាន់ និងប្រទេសមួយចំនួនទៀតដែលសុំមិនបញ្ចេញឈ្មោះ។ តួលេខនេះអាចឡើងដល់ 136 គ្រឿង បន្ទាប់ពី ហ្សកដានី បានបញ្ជាទិញ 8 គ្រឿង៕

November 23, 2022

កូរ៉េខាងត្បូង សាកល្បងខែលប្រឆាំងកាំជ្រួចប្លោងក្នុងស្រុកជាលើកដំបូង

ប្រព័ន្ធការពាររយៈចម្ងាយឆ្ងាយ L-SAM របស់ កូរ៉េខាងត្បូង ដែលមានមុខងារដូចទៅនឹង THAAD របស់ សហរដ្ឋអាម៉េរិក បានកម្ទេចគោលដៅដែលគេធ្វើត្រាប់កាំជ្រួចប្លោងដោយជោគជ័យ នៅក្នុងការសាកល្បងកាលពីពេលថ្មីៗនេះ។

កាលពីថ្ងៃទី 22 វិច្ឆិកា មន្ត្រីក្រសួងការពារជាតិកូរ៉េខាងត្បូង បានឱ្យដឹងថា ប្រទេសនេះបានសាកល្បងដោយជោគជ័យនូវប្រព័ន្ធការពាររយៈចម្ងាយឆ្ងាយ L-SAM ដែលបាញ់ស្កាត់គោលដៅនានាដែលគេធ្វើត្រាប់កាំជ្រួចប្លោងរបស់សត្រូវ។ ពេលវេលា និងទីតាំងសាកល្បងមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ នេះទំនងជាលើកដំបូងដែលប្រព័ន្ធ L-SAM បាញ់សំដៅគោលដៅជាក់លាក់។

ប្រកាសខាងលើត្រូវបានលើកឡើងនៅក្នុងគ្រាដែល កូរ៉េខាងជើង បាញ់សាកល្បងមីស៊ីលប្លោងជាបន្តបន្ទាប់ ក្នុងនោះមានករណីបាញ់មីស៊ីលម្ដង 23 គ្រាប់កាលពីថ្ងៃទី 02 វិច្ឆិកា និងការបាញ់មីស៊ីលអន្តរទ្វីប (ICBM) Hwasong-17 ដែលអាចបាញ់បានចម្ងាយ 15,000 គីឡូម៉ែត្រ កាលពីថ្ងៃទី 18 វិច្ឆិកា។

L-SAM គឺជាប្រព័ន្ធការពារដែនអាកាសក្នុងស្រុករបស់ កូរ៉េខាងត្បូង ដែលបំពាក់មីស៊ីល 2 ប្រភេទ និងត្រូវបានអភិវឌ្ឍដោយអង្គភាពអភិវឌ្ឍការពារជាតិ (ADD)។ L-SAM ត្រូវបានអភិវឌ្ឍឡើងដើម្បីវាយស្កាត់មីស៊ីលប្លោង ហើយនឹងក្លាយជាស្រទាប់ការពាររយៈចម្ងាយឆ្ងាយនៅក្នុងប្រព័ន្ធខែលការពារដែនអាកាសច្រើនស្រទាប់របស់ប្រទេសនេះ។

តាមផែនការ ADD នឹងបង្ហើយដំណើរការអភិវឌ្ឍ L-SAM នៅឆ្នាំ 2024 ដើម្បីអាចផលិតក្នុងបរិមាណច្រើនចាប់ពីឆ្នាំ 2026 និងដាក់ពង្រាយចាប់ពីឆ្នាំ 2027៕

November 23, 2022

លោកខាងលិចជិតដល់ថ្ងៃកំណត់តម្លៃពិតានសម្រាប់ប្រេងរបស់រុស្ស៊ី

ក្រសួងហិរញ្ញវត្ថុអាម៉េរិក បានឱ្យដឹងថា ទីក្រុងវ៉ាស៊ីងតោន និងសម្ព័ន្ធមិត្តគ្រោងនឹងកំណត់តម្លៃពិតានលើប្រេងរបស់ រុស្ស៊ី ចាប់ពីថ្ងៃទី 05 ធ្នូ 2022 ដើម្បីកាត់ផ្ដាច់ប្រភពហិរញ្ញវត្ថុសំខាន់របស់ ទីក្រុងមូស្គូ។

កាលពីថ្ងៃទី 22 វិច្ឆិកា មន្ត្រីជាន់ខ្ពស់មួយរូបរបស់ ក្រសួងហិរញ្ញវត្ថុអាម៉េរិក និយាយថា សហភាពអឺរ៉ុប (EU) កំពុងប្រមូលមតិរបស់សមាជិកស្ដីពីតម្លៃ ហើយលោកខាងលិចនឹងអនុវត្តជំហានបន្ទាប់ដើម្បីកំណត់តម្លៃពិតានរបស់ ប្រេងរុស្ស៊ី ក្រោយពីនីតិវិធីនានាត្រូវបានបំពេញរួចរាល់។

តម្លៃពិតាននឹងក្លាយជាមូលដ្ឋានសម្រាប់ទណ្ឌកម្មដែលមានសុពលភាពចាប់ពីថ្ងៃទី 05 ធ្នូ 2022 ដែលហាមឃាត់បណ្ដាក្រុមហ៊ុនដឹកជញ្ជូន ឬផ្គត់ផ្គង់ការធានារាប់រងដល់ប្រេងរបស់ រុស្ស៊ី ដែលលក់ក្នុងតម្លៃខ្ពស់ជាងការកំណត់។

មន្ត្រីខាងលើបន្ថែមថា មិនមានមូលហេតុណាមួយដែលឱ្យគេយល់ថា ទីក្រុងមូស្គូ នឹងសងសឹកចំពោះគោលនយោបាយថ្មីនេះ ព្រោះថា «សកម្មភាពណាមួយក្នុងបំណងដំឡើងថ្លៃនឹងជះឥទ្ធិពលដល់អតិថិជនថ្មីរបស់ពួកគេ មានដូចជា ឥណ្ឌ និង ចិន ជាដើម»។

ក្រុមមន្ត្រីរបស់លោកខាងលិចនិយាយថា តម្លៃពិតាននៅតែអនុញ្ញាតឱ្យ រុស្ស៊ី រកបានប្រាក់ចំណេញ ប៉ុន្តែ មិនអនុញ្ញាតឱ្យពួកគេមានប្រភពចំណូលធំពីការឡើងថ្លៃប្រេង។

សង្គ្រាមនៅ អ៊ុយក្រែន ដែលបានផ្ទុះឡើងកាលពីថ្ងៃទី 24 កុម្ភៈ 2022 បានធ្វើឱ្យតម្លៃថាមពលកើនឡើងខ្ពស់ខ្លាំង នាំមកនូវប្រាក់ចំណេញយ៉ាងសម្បើមដល់ រុស្ស៊ី ហើយជួយឱ្យប្រទេសនេះកាត់បន្ថយបាននូវផលប៉ះពាល់ពីទណ្ឌកម្មដែលលោកខាងលិចបានដាក់លើ ទីក្រុងមូស្គូ។ សហរដ្ឋអាម៉េរិក និងសម្ព័ន្ធមិត្ត ឱ្យដឹងថា ការកំណត់តម្លៃពិតានលើប្រេង មិនត្រឹមតែដើម្បីដកហូតប្រភពចំណូលរបស់ រុស្ស៊ី នោះទេ ប៉ុន្តែក៏ជួយកាត់បន្ថយការឡើងថ្លៃថាមពលនៅទូទាំងពិភពលោកផងដែរ៕

November 23, 2022

ចំនួនមនុស្សស្លាប់ក្នុងហេតុការណ៍រញ្ជួយដីនៅ ឥណ្ឌូណេស៊ី កាលពីម្សិលមិញ កើនដល់ 162 នាក់

អាជ្ញាធរឥណ្ឌូណេស៊ី បានឱ្យដឹងថា ចំនួនជនរងគ្រោះដែលបានស្លាប់នៅក្នុងហេតុការណ៍រញ្ជួយដីក្នុង ខេត្តជ្វាខាងលិច បានកើនឡើងដល់ 162 នាក់ ក្នុងនោះភាគច្រើនគឺជាកុមារ។

«ការិយាល័យអង្គភាពជាតិកាត់បន្ថយគ្រោះមហន្តរាយឥណ្ឌូណេស៊ី (BNPB) បានរកឃើញថា មានមនុស្ស 162 នាក់បានស្លាប់។ ភាគច្រើនក្នុងចំណោមនោះគឺជាកុមារ។ យើងខ្ញុំពិតជាមានការបារម្ភខ្លាំងណាស់» Ridwan Kami អភិបាលខេត្តជ្វាខាងលិច របស់ ឥណ្ឌូណេស៊ី ឱ្យដឹងដូច្នេះកាលពីព្រលប់ម្សិលមិញ។

យោងតាមលោក Kami មូលហេតុដែលនាំឱ្យកុមារជាច្រើនបាត់បង់ជីវិតគឺដោយសាររញ្ជួយដីកើតឡើងចំពេលសិស្សសាលាកំពុងស្ថិតនៅក្នុងថ្នាក់រៀន។

គ្រោះរញ្ជួយដីកាលពីថ្ងៃទី 21 វិច្ឆិកានៅ ឥណ្ឌូណេស៊ី បានបណ្ដាលឱ្យមនុស្សជាង 300 នាក់រងរបួស និងជិត 14,000 នាក់ត្រូវបាត់បង់ផ្ទះសំបែង។ ផ្ទះជាង 2,300 ខ្នងនៅ ខេត្តជ្វាខាងលិច ត្រូវរងការខូចខាតធ្ងន់ធ្ងរ ឬត្រូវបាក់រលំទាំងស្រុង។

នាយកដ្ឋានឧតុនិយម និងភូគព្ភសាស្ត្រឥណ្ឌូណេស៊ី (BMKG) បានឱ្យដឹងថា គ្រោះរញ្ជួយដីកម្លាំង 5.6 រិចទ័រ កើតឡើងនៅវេលាម៉ោង 13 និង 21 នាទីនៅថ្ងៃនេះ ក្នុងនោះ ចំណុចកណ្ដាលនៃបាតុភូតរញ្ជួយដីស្ថិតនៅក្នុងជម្រៅ 10 គីឡូម៉ែត្រក្រោមដី នៅក្នុង ខេត្តជ្វាខាងលិច ដែលមានចម្ងាយពី រដ្ឋធានីហ្សាការតា ប្រហែល 100 គីឡូម៉ែត្រទៅទិសខាងត្បូង។ ចំណែកស្ថាប័នភូគព្ភសាស្ត្រអាម៉េរិក វិញ និយាយថា ករណីរញ្ជួយដីនេះមានកម្លាំង 5.4 រិចទ័រ។

ឥណ្ឌូណេស៊ី តែងកើតមានគ្រោះរញ្ជួយដី និងបន្ទុះភ្នំភ្លើងជាញឹកញាប់ ដោយសារតែស្ថិតនៅពីលើ «ខ្សែក្រវាត់ភ្លើង» ជាទីដែលស្រទាប់តិចតូនិច (Tectonic Plate) ធ្វើចលនា និងប៉ះគ្នាយ៉ាងសកម្ម ដោយអូសបន្លាយពី ជប៉ុន រហូតដល់ អាស៊ីអាគ្នេយ៍ និង តំបន់ប៉ាស៊ីហ្វិក៕

November 22, 2022

អគ្គិភ័យឆេះរោងចក្រមួយ បណ្ដាលឱ្យមនុស្សជិត 40 នាក់បាត់បង់ជីវិត នៅភាគកណ្ដាលប្រទេសចិន

អគ្គិភ័យបានកើតឡើងនៅឯរោងចក្រមួយក្នុងទីក្រុង Anyang នៃខេត្ត Henan ភាគកណ្ដាលប្រទេសចិន បណ្ដាលឱ្យមនុស្ស 36 នាក់បាត់បង់ជីវិត និង 2 នាក់រងរបួសធ្ងន់។

អគ្គិភ័យផ្ទុះឡើងនៅក្នុងរោងចក្ររបស់ក្រុមហ៊ុន Kaixinda នៅទីតាំងខាងលើកាលពីរសៀលថ្ងៃទី 21 វិច្ឆិកា។ បុគ្គលិកពន្លត់អគ្គិភ័យប្រហែល 240 នាក់ រួមនឹងរថយន្តពន្លត់អគ្គិភ័យ 63 គ្រឿងត្រូវបានបញ្ជូនទៅកាន់កន្លែងកើតហេតុ។

អណ្ដាតភ្លើងត្រូវបានគ្រប់គ្រងនៅវេលាម៉ោងប្រហែល 20 និងពន្លត់បានទាំងស្រុកនៅម៉ោង 23 យប់នៃថ្ងៃដដែល។ អគ្គិភ័យនេះបានបណ្ដាលឱ្យមនុស្សយ៉ាងតិច 36 នាក់បាត់បង់ជីវិត និង 2 នាក់រងរបួស ខណៈដែល 2 នាក់ទៀតកំពុងបាត់ខ្លួន។

ប៉ូលិសបានឱ្យដឹងថា បានរកឃើញជនសង្ស័យក្នុងហេតុការណ៍អគ្គិភ័យនេះ ប៉ុន្តែមិនទាន់បង្ហើបឱ្យដឹងព័ត៌មានលម្អិតស្ដីពីដើមហេតុ ក៏ដូចជាអត្តសញ្ញាណរបស់ជនសង្ស័យទាំងនោះនៅឡើយ៕

November 22, 2022

ហេតុការណ៍ប្រជ្រៀតជាន់គ្នា Itaewon វិះកើតឡើងនៅក្នុងព្រឹត្តិការណ៍បើកការប្រកួត World Cup 2022

យោងតាមទីភ្នាក់ងារសារព័ត៌មាន Independent ដើម្បីបម្រើ World Cup 2022 នៅកណ្ដាល រដ្ឋធានីដូហា ប្រទេសកាតា អាជ្ញាធរបានដំឡើងតំបន់មួយសម្រាប់អ្នកគាំទ្រ ជាទីដែលមានអេក្រង់ទូរទស្សន៍ធំ មានបម្រើសេវាកម្មស្រាបៀរ និងអាហារផ្សេង។ ប៉ុន្តែ ក្នុងយប់សម្ពោធ តំបន់នេះប្រែក្លាយទៅជាច្របូកច្របល់ នៅពេលមនុស្សរាប់ម៉ឺននាក់សម្រុកចូល នាំឱ្យមានការកកស្ទះ និងរុញច្រានទាំងកងកម្លាំងប៉ូលិស ដើម្បីបានចូលទៅខាងក្នុង។

បើទោះជាមានសមត្ថកិច្ចប្រឆាំងអំពើហិង្សាដែលប្រដាប់ដោយអាវុធ ឈរយាមនៅច្រកចូល ប៉ុន្តែ មនុស្សម្នានៅតែអង្វរសុំចូលទៅតំបន់ខាងលើ។ មានតែស្ត្រីមានផ្ទៃពោះ និងជនពិការទើបត្រូវបានអនុញ្ញាតឱ្យចូលខាងក្នុងតាមរយៈច្រកពិសេស បន្ទាប់ពីការប្រកួតបើកឆាករវាង កាតា និង អេក្វាទ័រ ចាប់ផ្ដើមនៅក្នុងទីក្រុង Al Khor។

សារព័ត៌មាន Reuters ឱ្យដឹងថា តំបន់សម្រាប់អ្នកគាំទ្រនៅសួន Al Bidda ក្នុង រដ្ឋធានីដូហា អាចដាក់មនុស្សបានតែប្រហែល 40,000 នាក់ប៉ុណ្ណោះ ប៉ុន្តែ តាមការគណនា អ្នកគាំទ្រច្រើនជាងនេះយ៉ាងតិចទ្វេដង បានសម្រុកមកតំបន់នេះនៅយប់ថ្ងៃទី 20 វិច្ឆិកា។

«ស្ថានភាពពេលនោះពិតជាបង្កប់នូវហានិភ័យធំ។ មនុស្សជាច្រើននាក់អាចបាត់បង់ជីវិត ព្រោះថា មនុស្សចាស់ និងស្ត្រីមិនអាចប្រតិកម្មបាននៅពេលមានការប្រជ្រៀតក្នុងហ្វូងមនុស្សច្រើនបែបនេះ។ ដោយសារតែខ្ញុំខ្ពស់ទើបនៅតែអាចដកដង្ហើមបាន ប៉ុន្តែក្នុងហ្វូងមនុស្សពេលនោះមានក្មេងៗជាច្រើន។ ខ្ញុំបានណែនាំឱ្យមនុស្សធំដែលដើរជាមួយក្មេងត្រូវលើកពួកគេព បង្ការគ្រោះថ្នាក់ស្ទះដង្ហើម» លោក Hatem El-Berarri ជាជនជាតិអ៊ីរ៉ាក់ម្នាក់ដែលបានចូលរួមព្រឹត្តិការណ៍នេះឱ្យដឹងដូច្នេះ។

លោក Hatem El-Berarri អះអាងថា គាត់បានឃើញហ្វូងមនុស្សប្រជ្រៀត រុញច្រានគ្នា ហើយមានស្ត្រីខ្លះស្រែកយំទៀតផង។

លោក Luis Reyes ដែលជាទេសចរម្នាក់មកពី សហរដ្ឋអាម៉េរិក បានប្រៀបប្រដូចស្ថានភាពប្រជ្រៀតគ្នាដ៏ច្របូកច្របល់នៅតំបន់សម្រាប់អ្នកគាំទ្រ World Cup 2022 នៅ ដូហា កាលពីយប់ថ្ងៃទី 20 វិច្ឆិកា ទៅនឹងហេតុការណ៍ប្រជ្រៀតជាន់គ្នានៅ Itaewon ក្នុង រដ្ឋធានីសេអ៊ូល ប្រទេសកូរ៉េខាងត្បូង កាលពីប៉ុន្មានសប្ដាហ៍មុនដែលបានបណ្ដាលឱ្យមានមនុស្សស្លាប់ជាង 150 នាក់៕

November 21, 2022

ប្រទេសចិន ជូន «ព្រះអាទិត្យសិប្បនិម្មិត» ដល់ ប្រទេសថៃ សម្រាប់ការសិក្សាស្រាវជ្រាវ

ម៉ាស៊ីនប្រតិកម្មនុយក្លេអែរ tokamak ទម្ងន់ជាង 84 គីឡូក្រាម ដែលអភិវឌ្ឍដោយ ប្រទេសចិន គ្រោងនឹងត្រូវបានដឹកទៅកាន់ ប្រទេសថៃ នៅពាក់កណ្ដាលខែធ្នូខាងមុខ។

ម៉ាស៊ីនប្រតិកម្មនុយក្លេអែរ tokamak ដ៏ស្មុគស្រាញមួយគ្រឿង ត្រូវបានរុះរើ និងវេចខ្ចប់យ៉ាងប្រុងប្រយ័ត្ននៅឯខេត្ត Anhui ភាគខាងកើតនៃ ប្រទេសចិន នេះបើតាម CGTN ចុះផ្សាយកាលពីថ្ងៃទី 19 វិច្ឆិកា។ ម៉ាស៊ីនសម្រាប់ពិសោធន៍ដែលអាចបង្កើតរស្មីប្លាស្មាកម្ដៅកម្រិតខ្ពស់ដើម្បីបង្ហាញត្រាប់អំពីប្រតិកម្មនុយក្លេអែរនេះ គ្រោងនឹងត្រូវបានដឹកជញ្ជូនទៅកាន់ ប្រទេសថៃ នៅពាក់កណ្ដាលខែធ្នូ 2022។

បច្ចុប្បន្ន ម៉ាស៊ីននេះត្រូវបានប្ដូរឈ្មោះទៅជា Thailand Tokamak 1 (TT-1)។ ម៉ាស៊ីន TT-1 នេះត្រូវបានអភិវឌ្ឍដោយ វិទ្យាស្ថានរូបវិទ្យាប្លាស្មា នៃ បណ្ឌិត្យសភាវិទ្យាសាស្ត្រចិន។

យោងតាមកិច្ចព្រមព្រៀងសហប្រតិបត្តិការដែលចុះហត្ថលេខាកាលពីឆ្នាំ 2017 ASIPP នឹងជូនម៉ាស៊ីនប្រតិកម្មនុយក្លេអែរ tokamak ដល់ វិទ្យាស្ថានបច្ចេកវិទ្យានុយក្លេអែរថៃ (TINT) ព្រមទាំងជួយដល់ការដំឡើង ដំណើរការ ក៏ដូចជាបណ្ដុះបណ្ដាលធនធានមនុស្សនៅក្នុងវិស័យស្រាវជ្រាវ និងអភិវឌ្ឍថាមពលដែលកើតឡើងដោយប្រតិកម្មនុយក្លេអែរ។

ក្រុមអ្នកវិទ្យាសាស្ត្រ និងវិស្វករពី ប្រទេសថៃ ឈរថតរូបនៅខាងមុខ Thailand Tokamak 1 នៅ ប្រទេសចិន កាលពីថ្ងៃទី 24 សីហា 2022

តាមផែនការ ម៉ាស៊ីននេះនឹងដឹកដល់ ប្រទេសថៃ នៅដើមខែមករា 2023។ បុគ្គលិកចិន ចំនួន 3 ក្រុម ដែលមានមនុស្សសរុបប្រហែល 60 នាក់ នឹងត្រូវបានបញ្ជូនទៅកាន់ ប្រទេសថៃ ដើម្បីជួយដល់ការដំឡើង ដំណើរការសាកល្បង មុនពេលដំណើរការជាផ្លូវការ។

គោលដៅចុងក្រោយរបស់ការស្រាវជ្រាវនេះគឺការបង្កើតប្រតិកម្មនុយក្លេអែរដូចទៅអ្វីដែលកំពុងកើតឡើងនៅក្នុងព្រះអាទិត្យ និងប្រើប្រាស់សារធាតុ deuterium ដ៏សម្បូរនៅក្រោមទឹកសមុទ្រ ដើម្បីផ្គត់ផ្គង់ថាមពលស្អាត និងស្ថិរភាព។ ក្រុមអ្នកវិទ្យាសាស្ត្រគណនាឃើញថា តាមរយៈប្រតិកម្មនុយក្លេអែរបែបនេះ សារធាតុ deuterium នៅក្នុងទឹក 1 លីត្រ អាចបង្កើតបានថាមពលស្មើនឹង 300 លីត្រសាំង៕

November 21, 2022

Category: អន្តរជាតិ