ម៉ាស៊ីនប្រតិកម្មនុយក្លេអែរ tokamak ទម្ងន់ជាង 84 គីឡូក្រាម ដែលអភិវឌ្ឍដោយ ប្រទេសចិន គ្រោងនឹងត្រូវបានដឹកទៅកាន់ ប្រទេសថៃ នៅពាក់កណ្ដាលខែធ្នូខាងមុខ។
ម៉ាស៊ីនប្រតិកម្មនុយក្លេអែរ tokamak ដ៏ស្មុគស្រាញមួយគ្រឿង ត្រូវបានរុះរើ និងវេចខ្ចប់យ៉ាងប្រុងប្រយ័ត្ននៅឯខេត្ត Anhui ភាគខាងកើតនៃ ប្រទេសចិន នេះបើតាម CGTN ចុះផ្សាយកាលពីថ្ងៃទី 19 វិច្ឆិកា។ ម៉ាស៊ីនសម្រាប់ពិសោធន៍ដែលអាចបង្កើតរស្មីប្លាស្មាកម្ដៅកម្រិតខ្ពស់ដើម្បីបង្ហាញត្រាប់អំពីប្រតិកម្មនុយក្លេអែរនេះ គ្រោងនឹងត្រូវបានដឹកជញ្ជូនទៅកាន់ ប្រទេសថៃ នៅពាក់កណ្ដាលខែធ្នូ 2022។
បច្ចុប្បន្ន ម៉ាស៊ីននេះត្រូវបានប្ដូរឈ្មោះទៅជា Thailand Tokamak 1 (TT-1)។ ម៉ាស៊ីន TT-1 នេះត្រូវបានអភិវឌ្ឍដោយ វិទ្យាស្ថានរូបវិទ្យាប្លាស្មា នៃ បណ្ឌិត្យសភាវិទ្យាសាស្ត្រចិន។
យោងតាមកិច្ចព្រមព្រៀងសហប្រតិបត្តិការដែលចុះហត្ថលេខាកាលពីឆ្នាំ 2017 ASIPP នឹងជូនម៉ាស៊ីនប្រតិកម្មនុយក្លេអែរ tokamak ដល់ វិទ្យាស្ថានបច្ចេកវិទ្យានុយក្លេអែរថៃ (TINT) ព្រមទាំងជួយដល់ការដំឡើង ដំណើរការ ក៏ដូចជាបណ្ដុះបណ្ដាលធនធានមនុស្សនៅក្នុងវិស័យស្រាវជ្រាវ និងអភិវឌ្ឍថាមពលដែលកើតឡើងដោយប្រតិកម្មនុយក្លេអែរ។
តាមផែនការ ម៉ាស៊ីននេះនឹងដឹកដល់ ប្រទេសថៃ នៅដើមខែមករា 2023។ បុគ្គលិកចិន ចំនួន 3 ក្រុម ដែលមានមនុស្សសរុបប្រហែល 60 នាក់ នឹងត្រូវបានបញ្ជូនទៅកាន់ ប្រទេសថៃ ដើម្បីជួយដល់ការដំឡើង ដំណើរការសាកល្បង មុនពេលដំណើរការជាផ្លូវការ។
គោលដៅចុងក្រោយរបស់ការស្រាវជ្រាវនេះគឺការបង្កើតប្រតិកម្មនុយក្លេអែរដូចទៅអ្វីដែលកំពុងកើតឡើងនៅក្នុងព្រះអាទិត្យ និងប្រើប្រាស់សារធាតុ deuterium ដ៏សម្បូរនៅក្រោមទឹកសមុទ្រ ដើម្បីផ្គត់ផ្គង់ថាមពលស្អាត និងស្ថិរភាព។ ក្រុមអ្នកវិទ្យាសាស្ត្រគណនាឃើញថា តាមរយៈប្រតិកម្មនុយក្លេអែរបែបនេះ សារធាតុ deuterium នៅក្នុងទឹក 1 លីត្រ អាចបង្កើតបានថាមពលស្មើនឹង 300 លីត្រសាំង៕
