អន្តរជាតិ - La Reine Media

ទេសចរនាំគ្នាសម្រុកទៅមើលបន្ទុះភ្នំភ្លើង Mauna Loa នៅកោះ Hawaii

មនុស្សរាប់ពាន់នាក់សម្រុកទៅមើលទិដ្ឋភាពដ៏អស្ចារ្យដែលប្រហែលជាអាចបានឃើញតែម្ដងគត់ក្នុងមួយឆាកជីវិតរបស់មនុស្សម្នាក់ នៅពេលភ្នំភ្លើងធំជាងគេបង្អស់លើពិភពលោក Mauna Loa កំពុងផ្ទុះកំអែ បន្ទាប់ពី «ដេកលក់» ជិត 40 ឆ្នាំ។

ក្រោយពីភ្នំភ្លើង Mauna Loa ចាប់ផ្ដើមផ្ទុះឡើងជាថ្មីកាលពីថ្ងៃទី 27 វិច្ឆិកា 2022 ហើយអាជ្ញាធររបស់ Hawaii ប្រកាសថា មិនមានសញ្ញាបង្ហាញថា កំអែភ្នំឡើងនេះនឹងគំរាមកំហែងដល់ប្រជាជនដែលនៅក្នុងបណ្ដាតំបន់ក្បែរនោះ ភ្លាមនោះវាក៏បានក្លាយជាទេសភាពដ៏អស្ចារ្យ ទាក់ទាញទេសចររាប់ពាន់ រាប់ម៉ឹននាក់មកទស្សនា។

ដំបូងឡើយ មនុស្សម្នាទាំងគ្រួសារៗ ដែលនៅក្បែរតំបន់ភ្នំភ្លើង Mauna Loa នាំគ្នាមកទស្សនា។ ពួកគេនាំយកទាំងសម្ភារប្រើប្រាស់មកជាមួយដើម្បីអាចគយគន់ទិដ្ឋភាពធម្មជាតិនេះបានងាយស្រួល។ បន្ទាប់មក គេឃើញមានទេសចរបរទេសមកទស្សានាច្រើនឡើងៗ ធ្វើឱ្យវិស័យទេសចរណ៍នៅ Hawaii ប្រែជាងើបឡើងយ៉ាងឆាប់រហ័ស។

«ទេសចរណ៍ពេលនេះ ផ្ទុះឡើងវិញហើយ» នាង Marian Somalinog បុគ្គលិករបស់សណ្ឋាគារ Castle Hilo និយាយដូច្នេះ និងបន្ថែមថា «ពួកយើងអស់កន្លែងរហូតដល់ផុតរដូវណូអែល»។

ក្រៅពី Mauna Loa ក៏នៅមានភ្នំភ្លើងតូចមួយទៀតកំពុងផ្ទុះ នោះគឺភ្នំភ្លើង Kilauea។ ទេសចរទៅកាន់ Hawaii អាចទស្សនាភ្នំភ្លើងទាំងពីរក្នុងពេលតែមួយ។

Mauna Loa បានផ្ទុះឡើងជាថ្មីកាលពីថ្ងៃអាទិត្យទី 27 វិច្ឆកា 2022។ ភ្នំភ្លើងដែលស្ថិតនៅលើកោះ Hawaii ក្នុងរដ្ឋ Hawaii សហរដ្ឋអាម៉េរិក គឺជាភ្នំភ្លើងសកម្មធំជាងគេបង្អស់លើពិភពលោក។ មុននោះ ភ្នំភ្លើង Mauna Loa បានផ្ទុះជាលើកចុងក្រោយកាលពីឆ្នាំ 1984៕

December 2, 2022

វៀតណាម ស្នើឱ្យ កោះតៃវ៉ាន់ លុបចោលសមយុទ្ធយោធានៅប្រជុំកោះ Spratly

ក្រសួងការបរទេសវៀតណាម អះអាងថា កោះតៃវ៉ាន់ រំលោភយ៉ាងធ្ងន់ធ្ងរលើអធិបតេយ្យភាពទឹកដីរបស់ វៀតណាម នៅពេលធ្វើសមយុទ្ធយោធានៅលើកោះ Taiping នៃប្រជុំកោះ Spratly។

«ការធ្វើសមយុទ្ធបាញ់គ្រាប់ពិតរបស់ តៃវ៉ាន់ នៅតំបន់សមុទ្រជុំវិញកោះ Ba Binh (Tiping) នៃប្រជុំកោះ Truong Sa (Spratly) របស់ វៀតណាម គឺជាសកម្មភាពរំលោភធ្ងន់ធ្ងរលើអធិបតេយ្យភាពទឹកដីរបស់ វៀតណាម ចំពោះប្រជុំកោះនេះ និងគំរាមកំហែងសន្តិភាព ស្ថិរភាព សុវត្ថិភាព សន្តិសុខផ្លូវសមុទ្រ បង្កភាពតានតឹង ព្រមទាំងបង្កើនភាពស្មុគស្មាញនៅសមុទ្រខាងកើត (សមុទ្រចិនខាងត្បូង)» អ្នកនាំពាក្យក្រសួងការបរទេសវៀតណាម Le Thi Thu Hang នាថ្ងៃនេះបានឱ្យដឹងដូច្នេះ។

ការអះអាងខាងលើត្រូវបានលើកឡើងបន្ទាប់ពីមានការស្នើឱ្យអធិប្បាយអំពីព័ត៌មានដែលថា តៃវ៉ាន់ ធ្វើសមយុទ្ធយោធាបាញ់គ្រាប់ពិតនៅតំបន់ជុំវិញកោះ Tiping ក្នុងប្រជុំកោះ Spratly កាលពីថ្ងៃទី 29 វិច្ឆិកា 2022។

លោកស្រី Le Thi Thu Hang បញ្ជាក់ថា «វៀតណាម ប្ដេជ្ញាប្រឆាំង និងស្នើឱ្យ តៃវ៉ាន់ លុបចោលសកម្មភាពខុសច្បាប់ដូចនិយាយខាងលើ និងកុំឱ្យមានសកម្មភាពដូច្នេះទៀត»។

កោះ Tiping គឺជាកោះធម្មជាតិធំបំផុតក្នុងប្រជុំកោះ Spratly នៅសមុទ្រចិនខាងត្បូង។ តៃវ៉ាន់ ធ្លាប់ដាក់ពង្រាយកងម៉ារីននៅលើកោះនេះ ប៉ុន្តែក្រោយមកក៏បានដាក់ជំនួសដោយប៉ូលិសដែលបំពាក់អាវុធ មានដូចជា កាំភ្លើងយន្ត កាំភ្លើងត្បាល់រយៈចម្ងាយឆ្ងាយជាដើម ចាប់ពីឆ្នាំ 2000។ តៃវ៉ាន់ និង វៀតណាម សុទ្ធតែអះអាងអំពីកម្មសិទ្ធិរបស់ពួកគេនៅប្រជុំកោះ Spratly៕

December 2, 2022

ឥណ្ឌូណេស៊ី បន្ថែម «រថយន្តក្រុងពណ៌ផ្កាឈូក» ដែលដឹកតែអ្នកដំណើរភេទស្រី

ក្រុមហ៊ុនដឹកជញ្ជូន TransJakarta របស់ ឥណ្ឌូណេស៊ី ទើបតែបានប្រកាសបន្ថែមរថយន្តក្រុងពណ៌ផ្កាឈូក10 គ្រឿងទៀត សម្រាប់ដឹកតែអ្នកដំណើរជាស្ត្រីភេទ។

នេះគឺជាវិធានការមួយរបស់ TransJakarta ដើម្បីការពារអ្នកដំណើរជាស្ត្រីភេទនៅចំពោះមុខការកើនឡើងនៃអំពើបៀតបៀនផ្លូវភេទនៅលើមធ្យោបាយដឹកជញ្ជូនសាធារណៈ។

បន្ទាប់ពីការបន្ថែមខាងលើនេះ ហ្សាការតា នឹងមានរថយន្តក្រុងពណ៌ផ្កាឈូកចំនួន 20 គ្រឿង ដែលធ្វើសកម្មភាពចាប់ពីម៉ោង 5 ព្រឹក ដល់ 21 យប់ ហើយថ្លៃធ្វើដំណើរធម្មតាគឺ 3,500 រូពីឥណ្ឌូណេស៊ី (ជាង 900 រៀល)។

មិនត្រឹមទទួលដឹកតែអ្នកដំណើរជាស្ត្រីភេទនោះទេ ប៉ុន្តែ រថយន្តពណ៌ផ្កាឈូកនេះក៏មានអ្នកបើកបរ និងបុគ្គលិក រៀបចំដំណើរសុទ្ធតែជានារីផងដែរ។

ចំនួនករណីបៀតបៀនផ្លូវភេទនៅលើមធ្យោបាយធ្វើដំណើរសាធារណៈនៅ ហ្សាការតា ក្នុងឆ្នាំនេះ កើនឡើងទ្វេដង ធៀបនឹងឆ្នាំកន្លង។ យោងតាម TransJakarta ការដាក់ឱ្យដំណើរការរថយន្តក្រុងពណ៌ផ្កាឈូកនេះគឺជាការប្រឹងប្រែងរបស់ក្រុមហ៊ុន ដើម្បីការពារសុវត្ថិភាពរបស់ស្ត្រី នៅចំពោះមុខអំពើបៀតបៀនផ្លូវភេទនៅលើមធ្យោបាយដឹកជញ្ជូនសាធារណៈ៕

December 2, 2022

ក្រោយអ៊ីរ៉ង់ចាញ់អាម៉េរិក និងត្រូវខ្ទាតពី World Cup 2022 យុវជនអ៊ីរ៉ង់ម្នាក់ត្រូវគេបាញ់សម្លាប់

ទីក្រុងតេហេរ៉ង់ បានបើកការស៊ើបអង្កេតលើករណីបុរសម្នាក់ត្រូវបានជនមិនស្គាល់មុខបាញ់សម្លាប់នៅភាគពាយព្យប្រទេសនេះ ក្រោយការប្រកួតរវាងក្រុមបាល់ទាត់ជម្រើសជាតិអ៊ីរ៉ង់ និង អាម៉េរិក នៅ World Cup 2022។

«ក្រោយការប្រកួត បុរសម្នាក់ឈ្មោះ Mehran Samak បានស្លាប់យ៉ាងគួរឱ្យសង្ស័យ ដោយសារត្រូវគ្រាប់កាំភ្លើងនៅទីក្រុង Bandar Anzali» Mehdi Fallahmiri រដ្ឋអាជ្ញាតុលាការខេត្ត Gilan នៅភាគពាយព្យនៃ ប្រទេសអ៊ីរ៉ង់ កាលពីម្សិលមិញ បានឱ្យដឹងដូច្នេះ។

មុននោះ ក្រុមសកម្មជនសិទ្ធិមនុស្សដែលមានមូលដ្ឋាននៅបរទេស បានឱ្យដឹងថា Samak អាយុ 27 ឆ្នាំ ត្រូវបានបាញ់សម្លាប់បន្ទាប់ពីចុចស៊ីផ្លេយានជំនិះដើម្បីអបអរបរាជ័យរបស់ ក្រុមជម្រើសជាតិអ៊ីរ៉ង់ ដែលបានចាញ់ អាម៉េរិក ក្នុងវគ្គចែកពូលនៅ World Cup 2022។ បរាជ័យនេះមានន័យថា អ៊ីរ៉ង់ ត្រូវបានជម្រុះពី World Cup នៅ កាតា ហើយ អាម៉េរិក បានឡើងទៅវគ្គ 8 ក្រុម។

ក្រុមមន្ត្រីមានសមត្ថកិច្ចរបស់ អ៊ីរ៉ង់ មិនទាន់ឱ្យដឹងថា ជនរងគ្រោះនេះត្រូវបានគេបាញ់សម្លាប់ដោយសារតែការអបអរបរាជ័យរបស់ក្រុមបាល់ទាត់ជម្រើសជាតិអ៊ីរ៉ង់ ឬយ៉ាងណានៅឡើយ។

មេដឹកនាំនៃឆ្មាំបដិវត្តន៍អ៊ីស្លាមអ៊ីរ៉ង់ ឧត្ដមសេនីយ៍ទោ Hossein Salami កាលពីថ្ងៃទី 01 ធ្នូ 2022 បាននិយាយថា «សត្រូវរបស់ អ៊ីរ៉ង់» បានធ្វើឱ្យយុវជនមួយចំនួនពេញចិត្តនឹងបរាជ័យរបស់ក្រុមបាល់ទាត់អ៊ីរ៉ង់។

«ថ្ងៃនេះ សត្រូវទាំងអស់កំពុងតែព្យាយាមសាបព្រោះភាពអស់សង្ឃឹមទៅក្នុងបេះដូងយុវវ័យ។ មនុស្សមួយចំនួនថែមទាំងបានបង្ហាញការពេញចិត្តជាមួយនឹងការដែលក្រុមបាល់ទាត់ជម្រើសជាតិត្រូវបានជម្រុះទៀតផង» លោក Hossein Salami ថ្លែងដូច្នេះ។

ក្រុមបាល់ទាត់ជម្រើសជាតិអ៊ីរ៉ង់ ត្រូវខ្ទាតពី World Cup 2022 ក្រោយការចាញ់ អាម៉េរិក 0-1 នៅជុំចុងក្រោយនៃវគ្គចែកពូល

ក្នុងពេលក្រុមបាល់ទាត់ជម្រើសជាតិរបស់ អ៊ីរ៉ង់ កំពុងប្រកួតនៅ World Cup 2022 បាតុកម្មនៅតែកើតមានឡើងនៅឯ ប្រទេសអ៊ីរ៉ង់ ព្រោះតែការស្លាប់របស់ Mahsa Amini ជានារីម្នាក់មានវ័យ 22 ឆ្នាំ បានបាត់បង់ជីវិតបន្ទាប់ពីត្រូវក្រុមនគរបាលសីលធម៌ចាប់ខ្លួន។ ការប៉ះទង្គិចគ្នាបានបណ្ដាលឱ្យមនុស្សជាង 300 នាក់បាត់បង់ជីវិត ក្នុងនោះមានទាំងសន្តិសុខ និងបាតុករផងដែរ នេះបើតាមមន្ត្រីអ៊ីរ៉ង់។

ជនជាតិអ៊ីរ៉ង់ មួយចំនួន បាន «បែរខ្នង» ដាក់ក្រុមបាល់ទាត់ជម្រើសជាតិ ក្នុងពេលបាតុកម្មកើតឡើង ព្រោះថា ពួកគេចាត់ទុកក្រុមបាល់ទាត់នេះតំណាងឱ្យរដ្ឋាភិបាល ជាជាងប្រជាជន។ វីដេអូលើបណ្ដាញសង្គមបានបង្ហាញថា មនុស្សមួយចំនួនបានអបអរសាទរ ក្រោយពី អ៊ីរ៉ង់ ចាញ់ អង់គ្លេស 2-6 នៅជុំដំបូង និង ចាញ់អាម៉េរិក 0-1 នៅជុំចុងក្រោយនៃវគ្គចែកពូលនៅ World Cup 2022។

អាម៉េរិក និងក្រុមប្រទេសលោកខាងលិច បានដាក់ទណ្ឌកម្មសំដៅលើក្រុមមន្ត្រីរបស់ អ៊ីរ៉ង់ ព្រោះតែបានបង្ក្រាបបាតុកម្ម។ អ៊ីរ៉ង់ ក៏បានដាក់ទណ្ឌកម្មតបត និងចោទថា បស្ចិមលោកកំពុងជំរុញអំពើហិង្សា ជួយដល់បាតុករនៅ អ៊ីរ៉ង់ ដើម្បីច្នៃអាវុធ ឬគ្រាប់បែកសាំងសម្រាប់កុបកម្ម៕

December 2, 2022

ទិដ្ឋភាពព្រឹល ទឹកកកដ៏ស្រស់ស្អាត កំពុងគ្របដណ្ដប់ពេញតំបន់ភាគខាងជើងប្រទេសចិន

សីតុណ្ហភាពថយចុះភ្លាមៗដោយសារតែរលកខ្យល់ត្រជាក់កាលពីចុងសប្ដាហ៍កន្លង ធ្វើឱ្យតំបន់ជាច្រើននៅ Heilongjiang និង Xinjiang ក្លាយជា «ឋានសួគ៌» ដូចទៅនឹងរឿងព្រេងបុរាណ។

ខ្យល់ត្រជាក់ខ្លាំងបំផុតដែលកើតឡើងចាប់ពីដើមរដូវ កំពុងបង្កផលប៉ះពាល់ដល់បណ្ដាតំបន់នៅភាគខាងជើងរបស់ ប្រទេសចិន នាំឱ្យសីតុណ្ហភាពចុះត្រជាក់ភ្លាមៗកាលពីចុងសប្ដាហ៍កន្លង បង្កើតឱ្យមានព្រឹល និងអ័ព្ទធ្លាក់គ្របដណ្ដប់ពេញផ្ទៃដី និងរុក្ខជាតិ ធ្វើឱ្យទិដ្ឋភាពប្រែជាស្រស់ស្អាតប្រៀបបានទៅនឹងឋានទេវលោក។

ព្រឹលទឹកកកមួយប្រភេទដែលហៅថា rime កកើតឡើងដោយសារចំហាយទឹកក្នុងបរិយាកាសកកទៅជាដុំទឹកកកល្អិត និងមានពណ៌សដូចអំបិលនៅពេលប៉ះនឹងផ្ទៃដែលត្រជាក់ក្រោម 0 អង្សាសេ។ នេះគឺជាបាតុភូតអាកាសធាតុអាក្រក់ បង្កផលប៉ះពាល់ដល់រុក្ខជាតិ។

December 1, 2022

ទាហានពីររូបស្រលាញ់មនុស្សភេទដូចគ្នា ត្រូវតុលាការកាត់ទោសដាក់ពន្ធនាគារច្រើនខែ

ទាហានឥណ្ឌូណេស៊ី 2 រូប ត្រូវបានកាត់ទោសឱ្យជាប់ពន្ធនាគារ 7 ខែ ព្រោះតែមានទំនាក់ទំនងស្នេហាជាមួយមនុស្សភេទដូចគ្នា ជាប្រការដែលកងទ័ពរបស់ប្រទេសនេះចាត់ទុកថាជាសកម្មភាពមិនត្រឹមត្រូវ។

AFP កាលពីថ្ងៃទី 30 វិច្ឆិកា បានយោងតាមសេចក្ដីសម្រេចកាលពីថ្ងៃទី 09 វិច្ឆិកា 2022 របស់តុលាការយោធានៃ ប្រទេសឥណ្ឌណេស៊ី បានឱ្យដឹងថា ទាហាន 2 រូបដែលមានទំនាក់ទំនងស្នេហានឹងមនុស្សភេទដូចគ្នាត្រូវបានបណ្ដេញចេញពីជួរកងទ័ព។ ទាហានទាំង 2 នាក់នេះបានចូលបម្រើកងទ័ពកាលពីឆ្នាំកន្លង និងឈរជើងនៅលើកោះជ្វា (Java)។

«ការដែលជនជាប់ចោទប្រព្រឹត្តអំពើរួមភេទជាមួយនឹងមនុស្សភេទដូចគ្នាគឺជារឿងដែលមិនសមស្រប។ ក្នុងនាមជាទាហាន ជនជាប់ចោទត្រូវតែជាគំរូល្អសម្រាប់មនុស្សនៅជុំវិញ។ សកម្មភាពរបស់ជនជាប់ចោទបានដើរផ្ទុយទៅនឹងច្បាប់រដ្ឋ ឬគ្រប់បញ្ញត្តិផ្នែកសាសនា» សាលក្រមតុលាការកម្រាស់ 60 ទំព័រ មានឃ្លាសរសេរដូច្នេះ។

តុលាការកំពូលឥណ្ឌូណេស៊ី បានចុះផ្សាយអំពីសាលក្រមខាងលើកាលពីសប្ដាហ៍កន្លង ប៉ុន្តែរហូតដល់យប់ថ្ងៃទី 29 វិច្ឆិកា ទើបហេតុការណ៍នេះត្រូវបានគេដឹងច្រើន បន្ទាប់ពីការចុះផ្សាយរបស់សារព័ត៌មានក្នុងស្រុក Detik។

ប្រធានអង្គការលើកលែងទោសអន្តរជាតិឥណ្ឌូណេស៊ី Usman Hamid បានចោទប្រកាន់ក្រុមមន្ត្រីនៅ ឥណ្ឌូណេស៊ី ថា ចេញសាលក្រមដែលបង្ហាញអំពីការស្អប់ខ្ពើមក្រុមសំឡេងភាគតិច ក្នុងនោះមានទាំងសហគមន៍ភេទទីបី (LGBTQ) ផងដែរ៕

December 1, 2022

សហរដ្ឋអាម៉េរិក ចំណាយជាង 1 ពាន់លានដុល្លារដើម្បីទិញមីស៊ីល NASAMS ឱ្យ អ៊ុយក្រែន

កងទ័ពជើងគោកអាម៉េរិក ប្រគល់កិច្ចព្រមព្រៀងតម្លៃជាង 1 ពាន់លានដុល្លារឱ្យក្រុមហ៊ុន Raytheon ដើម្បីផលិតប្រព័ន្ធការពារដែនអាកាស NASAMS ចំនួន 6 គ្រឿង សម្រាប់ផ្គត់ផ្គង់ឱ្យ ទីក្រុងកៀវ។

មន្ទីរបញ្ចកោណ កាលពីថ្ងៃទី 30 វិច្ឆិកា បានប្រកាសថា កងទ័ពជើងគោកអាម៉េរិក បានប្រគល់កិច្ចព្រមព្រៀងតម្លៃ 1.2 ពាន់លានដុល្លារទៅឱ្យក្រុមហ៊ុនការពារជាតិ Raytheon ដើម្បីផលិត និងផ្គត់ផ្គង់ប្រព័ន្ធមីស៊ីលការពារដែនអាកាសរយៈចម្ងាយមធ្យម NASAMS អមជាមួយនឹងការហ្វឹកហ្វឺន និងជួយដល់ផ្នែកដឹកជញ្ជូនសម្រាប់កងទ័ពរបស់ ប្រទេសអ៊ុយក្រែន។

ប្រព័ន្ធ NASAMS ចំនួន 6 គ្រឿងនេះ ស្ថិតក្នុងកញ្ចប់ជំនួយទី 5 ដែលមានតម្លៃសរុប 2.98 ពាន់លានដុល្លារអាម៉េរិក ដែលស្ថិតក្នុងគំនិតផ្ដួចផ្ដើមជំនួយយោធាសម្រាប់ អ៊ុយក្រែន (USAI)។ មូលនិធិ USAI ដែលត្រូវបានបង្កើតឡើងដោយ សភាអាម៉េរិក នេះ អនុញ្ញាតឱ្យ ប្រធានាធិបតី ចូ បៃដិន ទិញអាវុធពីបណ្ដាក្រុមហ៊ុនការពារជាតិ ជំនួសឱ្យការយកពីឃ្លាំងរបស់ សហរដ្ឋអាម៉េរិក ដើម្បីផ្ដល់ឱ្យ អ៊ុយក្រែន។

ប្រព័ន្ធមីស៊ីលការពារដែនអាកាសរយៈចម្ងាយមធ្យម NASAMS

មកដល់ពេលនេះ មិនទាន់ដឹងច្បាស់ថា ប្រព័ន្ធទាំងនេះនឹងត្រូវបញ្ចេញ និងប្រគល់ឱ្យ អ៊ុយក្រែន នៅពេលណានៅឡើយ។

សហរដ្ឋអាម៉េរិក គឺជាភាគីដែលផ្ដល់ជំនួយយោធាច្រើនជាងគេបង្អស់សម្រាប់ អ៊ុយក្រែន ក្នុងនោះមានទាំងអាវុធធុនធ្ងន់ដូចជា ប្រព័ន្ធរ៉ុក្កែត HIMARS, កាំភ្លើងធំ M777 និងមីស៊ីលការពារដែនអាកាស NASAMS ជាដើម។ ក្រសួងការបរទេសអាម៉េរិក ឱ្យដឹងថា ជំនួយសរុបរបស់ អាម៉េរិក សម្រាប់ អ៊ុយក្រែន រាប់ចាប់ពីខែមករា 2021 គឺប្រហែល 19.7 ពាន់លានដុល្លារ៕

December 1, 2022

អាម៉េរិក ថា មេដឹកនាំភេរវកម្ម IS ត្រូវក្រុមបះបោរនៅប្រទេសស៊ីរី សម្លាប់

កងទ័ពអាម៉េរិក ឱ្យដឹងថា មេដឹកនាំ IS ឈ្មោះ Abu al-Hassan al-Hashemi al-Quraishi ត្រូវបានសម្លាប់ដោយក្រុមបះបោរនៅ ប្រទេសស៊ីរី កាលពីពាក់កណ្ដាលខែតុលា 2022។

អ្នកនាំពាក្យរបស់ កងទ័ពអាម៉េរិក កាលពីថ្ងៃទី 30 វិច្ឆិកា បានឱ្យដឹងថា មេដឹកនាំក្រុមភេរវកររដ្ឋអ៊ីស្លាម (IS) ឈ្មោះ Abu al-Hassan al-Hashemi al-Quraishi ត្រូវបានសម្លាប់នៅក្នុងយុទ្ធនាការយោធារបស់ កងទ័ពសេរីស៊ីរី (FSA) តាំងពីខែតុលា នៅឯខេត្ត Daraa។ អ្នកនាំពាក្យរូបនេះបន្ថែមថា ពុំមានទាហានរបស់ សហរដ្ឋអាម៉េរិក ចូលរួមក្នុងយុទ្ធនាការនេះទេ។

មុននោះ អ្នកនាំពាក្យរបស់ ក្រុមប្រឹក្សាសន្តិសុខជាតិអាម៉េរិក John Kirby និយាយថា ទីក្រុងវ៉ាស៊ីងតោន សាទរចំពោះព័ត៌មានដែលថា មេដឹកនាំម្នាក់ទៀតរបស់ IS ត្រូវបានកម្ចាត់ ប៉ុន្តែ នឹងនៅតែតាមដានព័ត៌មានជាបន្ត។

IS មុននោះក៏បានប្រកាសថា មេដឹកនាំកំពូល Abu al-Hassan ត្រូវបានសម្លាប់នៅក្នុងការប្រយុទ្ធជាមួយ «សត្រូវរបស់ព្រះអម្ចាស់» ប៉ុន្តែ មិនបានលើកឡើងអំពីពេលវេលា និងស្ថានភាពស្ដីពីការស្លាប់របស់មេដឹកនាំនេះ។

ក្រុម IS បន្ថែមថា ពួកគេបានជ្រើសរើស Abu al-Husayn al-Husayni al-Qurashi ជាមេដឹកនាំថ្មីទី 4 និងអំពាវនាវដល់សមាជិកទាំងអស់ មានភក្ដីភាពចំពោះមេដឹកនាំថ្មី។ បច្ចុប្បន្នមិនទាន់មានព័ត៌មានស្ដីពី Abu al-Husayn នៅឡើយ។

FSA គឺជាក្រុមបះបោរប្រដាប់អាវុធនៅ ស៊ីរី ដែលគាំទ្រដោយ តួកគី ដើម្បីទប់ស្កាត់ការគ្រប់គ្រងទឹកដីពីសំណាក់កងជីវពលជនជាតិឃឺដ និងរារាំងជនភៀសខ្លួនពី ស៊ីរី ចូលទឹកដីតួកគី។ ក្រុម FSA ត្រូវបាន រដ្ឋាភិបាលស៊ីរី និង រុស្ស៊ី ចាត់ទុកជាក្រុមភេរវកម្ម។

IS បានរងការវាយប្រហារខ្លាំងក្លាចាប់តាំងពី Abu Bakr al-Baghdadi ដែលជាស្ថាបនិករបស់ក្រុមនេះត្រូវបានកម្ចាត់នៅក្នុងការវាយឆ្មក់របស់ អាម៉េរិក នៅ Idlib កាលពីឆ្នាំ 2019។ តាំងពីពេលបាត់បង់មូលដ្ឋានចុងក្រោយនៅតំបន់សមុទ្រខ្សាច់នៅភាគខាងកើតរបស់ ប្រទេសស៊ីរី កាលពីខែ មីនា 2019 ទាហានរបស់ IS ក៏បានដកថយទៅលាក់ខ្លួនក្នុងសមុទ្រខ្សាច់ ហើយពេលខ្លះក៏ចេញមកវាយឆ្មក់លើកងកម្លាំងរបស់ ជនជាតិឃឺដ និង រដ្ឋាភិបាលស៊ីរី៕

December 1, 2022

ប្រទេសចិន៖ អតីតប្រធានាធិបតី ជាំង ហ្សេមីន ទទួលមរណភាពហើយ!

សារព័ត៌មាន Xinhua ដែលជាទីភ្នាក់ងារសារព័ត៌មានរដ្ឋចិន នារសៀលថ្ងៃទី 30 វិច្ឆិកា 2022 នេះ បានប្រកាសថា អតីតប្រធានាធិបតីចិន លោក ជាំង ហ្សេមីន (Jiang Zemin) បានទទួលមរណភាព ក្នុងជន្មាយុ 96 ឆ្នាំ។

គេហទំព័រផ្លូវការរបស់របស់ Xinhua បានប្ដូរទៅជាពណ៌ខ្មៅនៅវេលាម៉ោង 14 និង 40 នាទី ថ្ងៃទី 30 វិច្ឆិកា (ម៉ោងក្នុងស្រុក) នៅពេលចុះផ្សាយថា លោក ជាំង ហ្សេមីន ទទួលមរណភាពនៅវេលាម៉ោង 12 និង 13 នាទី (ម៉ោង 11 និង 13 នាទី នៅ កម្ពុជា) នៅក្នុងទីក្រុងសៀងហៃ ដោយសារជំងឺមហារីកគ្រាប់ឈាម បើទោះជាមានការប្រឹងប្រែងក្នុងការជួយសង្គ្រោះ។

Xinhua ក៏បានដកស្រង់សារលិខិតរបស់ គណៈកម្មាធិការមជ្ឈិមបក្សកុម្មុយនិស្តចិន (CPC) ផ្ញើជូនចំពោះបក្ស កងទ័ព និងប្រជាជនចិនទាំងមូល ក្នុងនោះមានឃ្លាសរសេរថា «សមមិត្ត ជាំង ហ្សេមីន គឺជាមេដឹកនាំឆ្នើម មានកេរ្ដិ៍ឈ្មោះល្អ ត្រូវបានបក្ស កងទ័ព និងប្រជាពលរដ្ឋចិន ទទួលស្គាល់ថា ជាមនុស្សម្នាក់ដែលដើរតាមលទ្ធិម៉ាក្សនិយមដ៏អស្ចារ្យ ជាអ្នកបដិវត្តន៍វណ្ណអធនដ៏មហាអស្ចា្យ…ជាអ្នកយុទ្ធសាស្ត្រយោធា និងអ្នកការទូតចាស់វាស្សា»។

លោក ជាង ហ្សេមីន ចាប់កំណើតនៅថ្ងៃទី 17 សីហា 1926 នៅទីក្រុង Yangzhou ប្រទេសចិន។ លោកគឺជាអតីតអគ្គលេខាធិការបក្សកុម្មុយនិស្តចិន ពីឆ្នាំ 1989 ដល់ឆ្នាំ 2002, ជាប្រធានគណៈកម្មាធិការយោធាមជ្ឈិម ពីឆ្នាំ 1989 ដល់ឆ្នាំ 2004 និងជាប្រធានាធិបតីចិន ពីឆ្នាំ 1993 ដល់ឆ្នាំ 2003។ លោកចាប់កំណើតនៅថ្ងៃទី 17 សីហា 1926 នៅទីក្រុង Yangzhou ប្រទេសចិន។

ប្រធានាធិបតីចិន លោក ស៊ី ជីនពីង និងលោក ជាំង ហ្សេមីន ក្នុងពិធីសមាជរបស់បក្ស កាលពីឆ្នាំ 2017

មេដឹកនាំចិន លោក ជាំង ជាំង ហ្សេមីន ចាប់ដៃជាមួយព្រះអង្គម្ចាស់ Charles ក្នុងពិធីប្រគល់ទីក្រុងហុងកុងទៅឱ្យ ប្រទេសចិន វិញ នៅថ្ងៃទី 01 ខែកក្កដា ឆ្នាំ 1997

November 30, 2022

ប្រទេសនៅបាល់ទិច អំពាវនាវដល់សម្ព័ន្ធយោធាណាតូ អនុញ្ញាតឱ្យ អនុយក្រែន វាយប្រហារចូលទឹកដីរុស្ស៊ី

ក្នុងកិច្ចសម្ភាសនៅខាងក្រៅកិច្ចប្រជុំរបស់ក្រុមរដ្ឋមន្ត្រីការបរទេសណាតូ នៅ Bucharest កាលពីថ្ងៃទី 29 វិច្ឆិកា រដ្ឋមន្ត្រីឡេតូនី Edgars Rinkevics បានអំពាវនាវដល់ ណាតូ «អនុញ្ញាត» ឱ្យ អ៊ុយក្រែន ប្រើប្រាស់អាវុធដែលផ្គត់ផ្គង់ដោយលោកខាងលិច ដើម្បីវាយប្រហារចូលជ្រៅទៅក្នុងទឹកដីរបស់ រុស្ស៊ី។

ឆ្លើយតបនឹងទំព័រ Bloomberg រដ្ឋមន្ត្រីការបរទេស Rinkevics ស្នើថា អ៊ុយក្រែន គួរតែប្រើប្រាស់អាវុធដើម្បីវាយប្រហារទៅលើគោលដៅដែល មូស្គូ ប្រើប្រាស់ក្នុងការវាយប្រហារដោយមីស៊ីលសំដៅលើហេដ្ឋារចនាសម្ព័ន្ធរបស់ អ៊ុយក្រែន។

«យើងគួរតែអនុញ្ញាតឱ្យ អ៊ុយក្រែន ប្រើប្រាស់អាវុធសំដៅលើគោលដៅដាក់មីស៊ីល ឬព្រលានយន្ត (របស់ រុស្ស៊ី)» លោក Rinkevics ថ្លែងដូច្នេះ។

រដ្ឋមន្ត្រីការបរទេសរបស់ ប្រទេសឡេតូនី លោក Edgars Rinkevics

រដ្ឋមន្ត្រីឡេតូនី បន្ថែមថា ណាតូ «មិនគួរខ្លាច» ភាពតានតឹងដែលនឹងកើនឡើងឡើយ បើទោះ ក្រុមមន្ត្រីនៅ មូស្គូ ធ្លាប់បានព្រមានច្រើនលើកថា ការផ្ដល់អាវុធទៅឱ្យ អ៊ុយក្រែន ពីសំណាក់បស្ចិមលោក នឹងកាន់តែធ្វើឱ្យសង្គ្រាមអូសបន្លាយពេលយូរ។

បច្ចុប្បន្ន ភាគីខាងរុស្ស៊ី និង ណាតូ មិនទាន់មានប្រតិកម្ម ឬអធិប្បាយអ្វីនៅឡើយ ទាក់ទងនឹងការលើកឡើងរបស់ រដ្ឋមន្ត្រីការបរទេសឡេតូនី។

យោងតាម RT ឡេតូនី និងបណ្ដាប្រទេសនៅតំបន់បាល់ទិច គឺជាភាគីដែលគាំទ្រយ៉ាងខ្លាំងក្លាចំពោះ ទីក្រុងកៀវ នៅក្នុងសង្គ្រាមរវាង រុស្ស៊ី និង អ៊ុយក្រែន។ មន្ត្រីកំពូលៗរបស់ប្រទេសទាំងនេះ បានទៅកាន់ អ៊ុយក្រែន ច្រើនលើកមកហើយ ដើម្បីសំដែងការគាំទ្ររបស់ពួកគេ។

ប្រទេសទាំងឡាយនៅតំបន់បាល់ទិច រួមមាន អេស្តូនី, ឡេតូនី និង លីទុយអានី គឺសុទ្ធតែជាសមាជិករបស់ ណាតូ ហើយប្រទេសទាំង 3 នេះក៏មានព្រំដែនជាប់នឹងទឹកដីរបស់ រុស្ស៊ី ផងដែរ៕

November 30, 2022

Category: អន្តរជាតិ