មុន - La Reine Media

ផ្កាយដុះកន្ទុយមានរាងដូច UFO កំពុងហោះសំដៅមកកាន់ផែនដី

ផ្កាយដុះកន្ទុយធំប៉ុនទីក្រុង និងមានឈ្មោះថា 12P/Pons – Brooks កំពុងតែហោះសំដៅមកកាន់តំបន់ក្បែរផែនដីបំផុត នៅលើគន្លងគោចរ 71 ឆ្នាំនៅក្នុងប្រព័ន្ធព្រះអាទិត្យ។

ផ្កាយដុះកន្ទុយមានភ្នំភ្លើងមួយដួង ដែលកំពុងហោះមកកាន់ផែនដី មានរូបរាងស្រដៀងនឹងថាសហោះ (UFO) បន្ទាប់ពីមានហេតុការណ៍ផ្ទុះ ធ្វើឱ្យវាភ្លឺដូចទៅនឹងកូនផ្កាយមួយដួង និងស្រោចកំអែភ្នំភ្លើងត្រជាក់ទៅក្នុងទីអវកាស។ នេះគឺជាលើកដំបូងហើយដែលអ្នកវិទ្យាសាស្ត្របានមើលឃើញផ្កាយដុះកន្ទុយនេះផ្ទុះកំអែភ្នំភ្លើង នៅក្នុងអំឡុងពេលជិត 70 ឆ្នាំមកនេះ។

12P/Pons – Brooks (12P) គឺជាផ្កាយដុះកន្ទុយមានភ្នំភ្លើងត្រជាក់។ ដូចទៅនឹងផ្កាយដុះកន្ទុយដទៃ 12P មានស្នូលរឹងដែលផ្ទុកសមាសធាតុទឹកកក ធូលី និងឧស្ម័ន ហើយជុំវិញវាគឺជាពពកឧស្ម័នដែលហៅថាក្បាលផ្កាយដុះកន្ទុយ។ ប៉ុន្តែ ខុសពីផ្កាយដុះកន្ទុយដទៃ ឧស្ម័ន និងទឹកកកនៅខាងក្នុងស្នូលរបស់ 12P មានបរិមាណច្រើនរហូតដល់អាចផ្ទុះយ៉ាងខ្លាំងក្លា បាញ់ចេញវត្ថុធាតុត្រជាក់ដែលហៅថា កំអែទឹកកក ពីស្នាមប្រេះនៅលើសម្បករបស់ស្នូល។

កាលពីថ្ងៃទី 20 កក្កដា តារាវិទូជាច្រើនរូបបានសង្កេតឃើញថា មានហេតុការណ៍ផ្ទុះធំមួយនៅលើផ្កាយដុះកន្ទុយ 12P ដែលធ្វើឱ្យវាភ្លឺជាងធម្មតារហូតដល់ប្រហែល 100 ដង។ ការភ្លឺឡើងនេះកើតឡើងនៅពេលសម្បករបស់ 12P ស្រាប់តែប៉ោងឡើងដោយសារតែឧស្ម័ន និងសមាសធាតុទឹកកកដែលកញ្ជ្រោលចេញពីខាងក្នុង នាំឱ្យចំណាំងប្លាតពន្លឺពីព្រះអាទិត្យនៅលើ 12P ជះមកកាន់ផែនដីច្រើនជាងមុន។

នៅថ្ងៃទី 26 កក្កដា សម្បករបស់ 12P រីកប៉ោងឡើងរហូតដល់មានអង្កត់ផ្ចិត 230,000 គីឡូម៉ែត្រ ធំជាង 7,000 ដង ធៀបនឹងស្នូលដែលមានអង្កត់ផ្ចិតតែ 30 គីឡូម៉ែត្រ។ ក៏ប៉ុន្តែ ប្រការដែលគួរចាប់អារម្មណ៍គឺថា សម្បកដែលប៉ោងឡើង ធ្វើឱ្យវាមានរូបរាងស្រដៀងនឹងស្នែង ឬថាសហោះ (UFO) ដែលមានកន្ទុយដូចនៅក្នុងខ្សែភាពយន្តបែបវិទ្យាសាស្ត្រ និងសង្គ្រាមអវកាស។

អ្នកវិទ្យាសាស្ត្រនិយាយថា 12P នឹងហោះមកដល់តំបន់ក្បែរព្រះអាទិត្យបំផុតនៅថ្ងៃទី 14 មេសាឆ្នាំ 2024 និងមកក្បែរផែនដីនៅថ្ងៃទី 02 មិថុនា 2024 ហើយអាចឱ្យមនុស្សមើលឃើញដោយភ្នែកទទេនៅពេលរាត្រី៕

July 29, 2023

សហរដ្ឋអាម៉េរិកប្រកាសកញ្ចប់ជំនួយជាអាវុធសម្រាប់តៃវ៉ាន់

ប្រធានាធិបតីអាម៉េរិក ប្រកាសអំពីកញ្ចប់ជំនួយយោធាតម្លៃ 345 លានដុល្លារ សម្រាប់កោះតៃវ៉ាន់ ប៉ុន្តែមិនទាន់បង្ហើបឱ្យដឹងសេចក្ដីលំអិត។

នៅក្នុងប្រកាសកាលពីថ្ងៃទី 28 កក្កដា របស់សេតវិមាន ប្រធានាធិបតី ចូ បៃដិន ឱ្យដឹងថា បានផ្ដល់សិទ្ធិឱ្យរដ្ឋមន្ត្រីការបរទេសអាម៉េរិក ចាត់ចែងប្រាក់ 345 លានដុល្លារដែលបានពីក្រសួងការពារជាតិអាម៉េរិក សម្រាប់ជាកញ្ចប់ជំនួយយោធាសម្រាប់កោះតៃវ៉ាន់។

John Kirby អ្នកនាំពាក្យរបស់ក្រុមប្រឹក្សាសន្តិសុខអាម៉េរិក ក្នុងថ្ងៃដដែលបាននិយាយថា ប្រទេសនេះកំពុងតែអនុវត្តកាតព្វកិច្ចជាមួយនឹងតៃវ៉ាន់ និងជួយពួកគេក្នុងការលើកកម្ពស់សមត្ថភាពការពារជាតិ»។

ប្រទេសចិនមិនទាន់មានប្រតិកម្មអ្វីនៅឡើយ ទាក់ទងនឹងរឿងនេះ។ ប៉ុន្តែកន្លងមក អាជ្ញាធរចិនតែងតែជំទាស់ទៅនឹងការផ្គត់ផ្គង់អាវុធទៅឱ្យកោះតៃវ៉ាន់ ពីសំណាក់សហរដ្ឋអាម៉េរិក។

នេះគឺជាលើកដំបូងហើយដែលរដ្ឋាភិបាលអាម៉េរិក ដកអាវុធ សម្ភារៈយោធា និងថវិកាពីមន្ទីរបញ្ចកោណដោយផ្ទាល់ ដើម្បីផ្ដល់ឱ្យតៃវ៉ាន់ ទៅតាមសិទ្ធិចាត់ចែងធនធានរបស់ប្រធានាធិបតី (PDA)។ មុននោះ សភាអាម៉េរិកបានផ្ដល់សិទ្ធិឱ្យរដ្ឋាភិបាលប្រើប្រាស់យន្តការ PDA ដើម្បីផ្ដល់ជំនួយផ្នែកយោធាដល់តៃវ៉ាន់ ក្នុងទំហំគិតជាទឹកប្រាក់ឡើងដល់មួយពាន់លានដុល្លារអាម៉េរិក។

ចិនដីគោកតែងតែចាត់ទុកថា កោះតៃវ៉ាន់គឺជាខេត្តមួយរបស់ខ្លួនដែលរង់ចាំតែការបង្រួបបង្រួម ហើយថា នឹងប្រើប្រាស់កម្លាំងបាយ បើសិនជាចាំបាច់។

សហរដ្ឋអាម៉េរិកមិនមានទំនាក់ទំនងការទូតជាផ្លូវការជាមួយនឹងតៃវ៉ាន់ ប៉ុន្តែគឺជាអ្នកផ្គត់ផ្គង់អាវុធធំជាងគេរបស់កោះនេះ។ អាម៉េរិកកំពុងជំរុញកិច្ចការធ្វើទំនើបកម្មយោធារបស់ចិនដីកោះ (តៃវ៉ាន់) ដើម្បីរារាំងការវាយប្រហារពីចិនដីគោក៕

July 29, 2023

ជន្លេនបុរាណ «ដេកលក់» 46,000 ឆ្នាំ ពេលនេះបានភ្ញាក់ដឹងខ្លួនឡើងវិញ

(រុស្ស៊ី) – ជន្លេនបុរាណមួយប្រភេទបានងើបពីដំណេកបន្ទាប់ពីដេកកកអស់រយៈពេលរាប់ម៉ឺនឆ្នាំនៅក្នុងហ្វូស៊ីលរូងកំប្រុកតាំងពីយុគសម័យទឹកកកចុងក្រោយបង្អស់។

ជន្លេនខ្នាតតូចមួយប្រភេទនៅមានជីវិត បន្ទាប់ពីបានដេកក្នុងស្រទាប់ទឹកកកក្នុងដីដែលមានអាយុកាលរាប់ម៉ឺនឆ្នាំនៅស៊ីបេរី យូរជាងរាប់ម៉ឺនឆ្នាំ បើធៀបនឹងប្រភេទជន្លេនដែលត្រូវបានធ្វើឱ្យរស់ឡើងវិញមុននោះ។ ជន្លេននេះស្ថិតក្នុងប្រភេទ Panagrolaimus kolymaensis។ ក្រុមអ្នកវិទ្យាសាស្ត្របានរកឃើញវាកំពុងដេកជារង្វង់មូលនៅក្នុងហ្វូស៊ីលរូងរបស់សត្វកំប្រុកដែលយកពីដីដែលកករាប់ម៉ឺនឆ្នាំ ក្បែរទន្លេ Kolyma នៅភាគឦសាននៃបូលខាងជើង កាលពីឆ្នាំ 2002។

អ្នកវិទ្យាសាស្ត្រមួយក្រុមក៏ធ្លាប់បានជួយឱ្យជន្លេនដែលកករស់ឡើងវិញម្ដងហើយកាលពីឆ្នាំ 2018 ប៉ុន្តែមិនបានដឹងអំពីអាយុកាល និងប្រភេទរបស់វា។

«នៅទីនេះ យើងបានបញ្ជាក់ថា ជន្លេនរាងមូលរស់នៅក្នុងដី ប្រភេទ Panagrolaimus kolymaensis បានផ្អាកដំណើរការក្នុងរយៈពេល 46,000 ឆ្នាំនៅក្រោមដីដែលកករាប់ម៉ឺនលានឆ្នាំនៅស៊ីបេរី» អ្នកស្រាវជ្រាវមកពីប្រទេសរុស្ស៊ី និងអាល្លឺម៉ង់ ឱ្យដឹងដូច្នេះ។

រាងកាយរបស់សត្វជន្លេនមូល និងខ្លាឃ្មុំទឹក (Tardigrades) អាចស្ថិតនៅស្ងៀមមួយកន្លែង ដែលហៅថា cryptobiosis (ដេកកក) ដើម្បីទប់ទល់នឹងស្ថានភាពកក ឬបាត់បង់ជាតិទឹកទាំងស្រុង។ ក្នុងករណីនេះ ពួកវាកាត់បន្ថយការប្រើប្រាស់អុកស៊ីសែន និងកម្ដៅដែលកើតពីដំណើរការស្រូបយកជីវជាតិពីអាហារ ដល់ថ្នាក់មិនអាចត្រូវបានគេដឹង។

ជន្លេនខាងលើបានដេកកកក្នុងដីតាំងពីចុងយុគសម័យទឹកកកចុងក្រោយ (ពី 2.6 លាន ដល់ 11,700 ឆ្នាំមុន)។ បណ្ដាប្រភេទជន្លេនបុរាណអាចរស់ឡើងវិញ បើសិនពួកវារួចផុតពីស្រទាប់ទឹកកកក្រោមដី។

July 28, 2023

អង្គការសហប្រជាជាតិព្រមានអំពីយុគសម័យ «ដុតកម្លោចទូទាំងសកលលោក»

អគ្គលេខាធិការនៃអង្គការសហប្រជាជាតិ លោក Antonio Guterres យល់ថា យុគសម័យឡើងកម្ដៅទូទាំងសកលលោកបានបញ្ចប់ ហើយពិភពលោកចាប់ផ្ដើមចូលដល់ «យុគសម័យដុតកម្លោច»។

«អាកាសធាតុប្រែប្រួលកំពុងកើតមានឡើងយ៉ាងអាក្រក់ ប៉ុន្តែនោះគ្រាន់តែជាការចាប់ផ្ដើមប៉ុណ្ណោះ» លោក Guterres ប្រកាសកាលពីថ្ងៃទី 27 កក្កដាដូច្នេះ និងបន្តថា «នៅតែអាចគ្រប់គ្រងកំណើនសីតុណ្ហភាពទូទាំងសកលលោកក្នុងកម្រិត 1.5 អង្សាសេ និងចៀសផុតពីសេណារីយោស្ដីពីការប្រែប្រួលអាកាសធាតុអាក្រក់បំផុត។ ប៉ុន្តែ យើងត្រូវតែធ្វើសកម្មភាពឱ្យបានខ្លាំងក្លាជាបន្ទាន់»។

ការព្រមាននេះត្រូវបានធ្វើឡើងបន្ទាប់ពីក្រុមអ្នកវិទ្យាសាស្ត្របញ្ជាក់ថា បីសប្ដាហ៍កន្លងទៅនេះគឺជាពេលដែលផែនដីមានកម្ដៅខ្ពស់បំផុតមិនធ្លាប់មានពីមុន។ ខែកក្កដាឆ្នាំនេះ កំពុងស្ថិតក្នុងជំហានក្លាយទៅជាខែដែលមានអាកាសធាតុក្ដៅជាងគេបង្អស់ក្នុងប្រវត្តិសាស្ត្ររបស់មនុស្សជាតិ។

លោក Guterres ក៏បានអំពាវនាវសូមឱ្យអ្នកនយោបាយ ធ្វើសកម្មភាពជាបន្ទាន់។ «ខ្យល់អាកាសមិនអាចដកដង្ហើមបាន កម្ដៅមិនអាចទ្រាំបាន ផលចំណេញពីឥន្ធនៈហ្វូស៊ីល និងការអង្គុយនៅស្ងៀម មិនធ្វើសកម្មភាព គឺជារឿងដែលមិនអាចទទួលយកបាន។ មេដឹកនាំត្រូវតែជាអ្នកដើរនាំមុខគេ។ មិនអាចពន្យារពេល មិនអាចប្រើលេស មិនអាចរង់ចាំអ្នកផ្សេងធ្វើមុន ព្រោះថា មិនមានពេលទៀតនោះទេ»។

អគ្គលេខាធិការនៃអង្គការសហប្រជាជាតិអះអាងថា ការប្រើប្រាស់ថាមពលកកើតឡើងវិញប្រកបដោយភាពខ្លាំងក្លា និងការកែសម្រួលក្នុងវិស័យមួយចំនួន មានវិស័យដឹកជញ្ជូនជាដើម បង្ហាញថា មានភាពជឿនលឿន ប៉ុន្តែសុទ្ធតែមិនទាន់បានឆ្ងាយ និងលឿនគ្រប់គ្រាន់នៅឡើយ ហើយនៅតែត្រូវការបន្ថែមល្បឿនបន្តទៀត៕

July 28, 2023

ប្រតិកម្មដំបូងរបស់ប្រធានាធិបតីនីហ្សេ បន្ទាប់ពីត្រូវកងទ័ពធ្វើរដ្ឋប្រហារ

ប្រធានាធិបតីនីហ្សេ លោក Mohamed Bazoum សរសេរលើបណ្ដាញសង្គមអំពាវនាវសូមឱ្យប្រជាជនជួយការពារសមិទ្ធផលរបស់ប្រទេសជាតិ ក្រោយពីកងទ័ពប្រទេសនេះប្រកាសធ្វើរដ្ឋប្រហារផ្ដួលរំលំរដ្ឋាភិបាល។

«បណ្ដាសមិទ្ធផលដែលយើងបានចំណាយអស់កម្លាំងជាច្រើនទើបដណ្ដើមបាននេះ នឹងត្រូវបានការពារ។ ជនជាតិនីហ្សេដែលស្រលាញ់ប្រជាធិបតេយ្យ និងសេរីភាព ប្រាកដជានឹងធ្វើដូច្នេះ» លោក Bazoum បង្ហោះសារលើបណ្ដាញសង្គម X (ឈ្មោះថ្មីរបស់ Twitter) នៅថ្ងៃនេះដូច្នេះ។

រដ្ឋមន្ត្រីការបរទេស Hassoumi Massoudou ក៏បានបង្ហោះសារអំពាវនាវសូមឱ្យប្រជាជនគ្រប់រូបដែលគាំទ្រប្រជាធិបតេយ្យ នាំគ្នាចេញធ្វើសកម្មភាពដើម្បីធ្វើឱ្យអំពើរដ្ឋប្រហារត្រូវបរាជ័យ។ លោកបានបញ្ជាក់ថា រដ្ឋាភិបាលដែលកើតចេញពីការបោះឆ្នោតដែលជ្រើសរើសដោយប្រជាពលរដ្ឋគឺជារដ្ឋាភិបាលស្របច្បាប់។

លោករដ្ឋមន្ត្រីការបរទេសរបស់ប្រទេសនីហ្សេក៏បញ្ជាក់ថា ប្រធានាធិបតី និងគ្រួសារបច្ចុប្បន្ន «មានសុខភាពល្អ» និងកំពុងត្រូវបានកងទ័ពឃុំខ្លួននៅឡើយ។

មុននោះ វរសេនីយ៍ឯក Amadou Abdramane អ្នកនាំពាក្យរបស់កងទ័ពប្រទេសនីហ្សេ ប្រកាសនៅលើកញ្ចក់ទូរទស្សន៍ជាតិកាលពីថ្ងៃទី 26 កក្កដា ឆ្នាំ 2023 ថា «យើងជាកងកម្លាំងការពារជាតិ និងសន្តិសុខ បានសម្រេចចិត្តបញ្ចប់របបរបស់ប្រធានាធិបតី Mohamed Bazoum»។

លោក Amadou Abdramane បានចោទថា អាជ្ញាធរស៊ីវិលគ្រប់គ្រងបែបធូររលុង និងបានធ្វើឱ្យស្ថានការណ៍សន្តិសុខកាន់តែអាក្រក់ឡើងៗ។ កងកទ័ពនេហ្សេប្រកាសថា នឹងបិទច្រកព្រំដែន និងដាក់បម្រាមគោចរនៅទូទាំងប្រទេស រហូតដល់ពេលមានប្រកាសថ្មី។ កងកម្លាំងនេះក៏បានព្រមានថា នឹងធ្វើការប្រឆាំង បើសិនមានការអន្តរាគមន៍ពីបរទេស។

អង្គការសហប្រជាជាតិក៏បានថ្កោលទោសចំពោះការផ្លាស់ប្ដូររដ្ឋាភិបាលដោយអំពើខុសច្បាប់នៅប្រទេសនីហ្សេ។ «អគ្គលេខាធិការបានអំពាវនាវឱ្យបញ្ឈប់ជាបន្ទាន់នូវរាល់សកម្មភាពបំផ្លាញគោលការណ៍ប្រជាធិបតេយ្យនៅនីហ្សេ» អ្នកនាំពាក្យរបស់អគ្គលេខាធិការនៃអង្គការសហប្រជាជាតិ ឱ្យដឹងដូច្នេះ។

ទន្ទឹមនឹងនេះ សហរដ្ឋអាម៉េរិក អង់គ្លេស បារាំង អាល្លឺម៉ង់ និងធនាគារពិភពលោក (WB) ជាដើម ក៏បានប្រកាសថ្កោលទោសចំពោះអំពើរដ្ឋប្រហារខាងលើផងដែរ។

July 27, 2023

ទៅរស់ក្នុងព្រៃដើម្បីគេចពីពិភពលោកដ៏គ្រោះថ្នាក់ តែត្រូវស្លាប់ដោយកង្វះបទពិសោធន៍

(សហរដ្ឋអាម៉េរិក) – ស្ត្រីពីរនាក់ និងក្មេងប្រុសម្នាក់បានស្លាប់នៅក្នុងតំបន់ដាច់ស្រយាលមួយនៅ Colorado ក្រោយពីបាននាំគ្នាចូលព្រៃដើម្បីគេចពី «ពិភពទំនើប» បើទោះជាមិនមានបទពិសោធន៍ច្រើនក្នុងការចិញ្ចឹមជីវិតពេលនៅក្នុងព្រៃ ហើយក៏បានស្លាប់បាត់បង់ជីវិត។

អាជ្ញាធរតំបន់ Gunnison របស់រដ្ឋ Colorado កាលពីថ្ងៃទី 26 កក្កដា ឆ្នាំ 2023 បានឱ្យដឹងថា សាកសពមនុស្សបីនាក់ត្រូវបានរកឃើញនៅក្នុង និងជុំវិញតង់នៅក្បែរជំរំក្នុងព្រៃ Gunnison។

ជនរងគ្រោះខាងលើរួមមាន ស្ត្រីពីរនាក់ជាបងប្អូន អាយុ 41 និង 42 ឆ្នាំ រួមនឹងកូនប្រុសអាយុ 14 ឆ្នាំ។ អ្នកផ្ទះរបស់ជនរងគ្រោះនិយាយថា ជនរងគ្រោះចូលព្រៃតាំងពីរដូវក្ដៅឆ្នាំមុន ដើម្បីគេចចេញពីពិភពទំនើប បើទោះមានការរារាំង ហើយពួកគេក៏មិនមានបទពិសោធន៍ក្នុងការរស់នៅក្នុងព្រៃ ដោយគ្រាន់តែបានមើលវីដេអូលើ YouTube ប៉ុណ្ណោះ។

កាលពីដើមខែនេះ អ្នកឡើងភ្នំម្នាក់បានប្រទះឃើញសាកសពរបស់ពួកគេនៅជុំវិញខ្ទមបណ្ដោះអាសន្ន។ បន្ទាប់ពីបានស្រាវជ្រាវ សមត្ថកិច្ចឱ្យដឹងថា ពួកគេរស់ដោយសារតែអាហារកំប៉ុង។ រាងកាយរបស់ជនរងគ្រោះមានសញ្ញាខ្វះជីវជាតិ។

បច្ចុប្បន្ន ប៉ូលិសកំពុងរង់ចាំលទ្ធផលនៃការពិនិត្យរកជាតិពុល និងមិនទាន់រកឃើញមូលហេតុនៃការស្លាប់នៅឡើយ។ ប៉ុន្តែសមត្ថកិច្ចសង្ស័យថា ជនរងគ្រោះទំនងជាបានស្លាប់ដោយសារអត់អាហារ រងា ឬដោយសារពុលនឹងផ្សែងដែលពួកគេដុតដើម្បីកម្ដៅរាងកាយ។

ប៉ូលិសនិយាយថា ជនរងគ្រោះប្រហែលជាបានស្លាប់នៅក្នុងរដូវរងា ដោយសារតែជម្រកស្នាក់នៅរបស់ពួកគេមិនទាន់ធ្វើរួចរាល់ ក៏ស្រាប់តែរដូវរងាមកដល់។

អ្នកផ្ទះបានឱ្យដឹងថា ស្ត្រីពីរនាក់បងប្អូនដែលរងគ្រោះ កន្លងមកមានការព្រួយភ័យខ្លាំងចំពោះស្ថានការណ៍របស់ពិភពលោក ក្នុងនោះមានទាំងវិបត្តិសុខភាពដែលបង្កឡើងដោយកូវីដ-19 ជាដើម។ ដូច្នេះ ពួកគេក៏នាំគ្នាចាកចេញពីផ្ទះ ទៅរស់នៅក្នុងព្រៃ។ ការសម្រេចចិត្តរបស់ពួកគេជារឿងត្រឹមត្រូវ គ្រាន់តែថា ពួកគេមិនបានត្រៀមខ្លួនឱ្យបានគ្រប់គ្រាន់ប៉ុណ្ណោះ៕

July 27, 2023

ឆេះកប៉ាល់ដឹករថយន្ត 3,000 គ្រឿង នៅលើសមុទ្រហូឡង់

កប៉ាល់ដឹករថយន្ត 3,000 គ្រឿង បានឆាបឆេះនៅលើផ្ទៃសមុទ្រ បណ្ដាលឱ្យមនុស្សម្នាក់ស្លាប់ និងច្រើននាក់ត្រូវបង្ខំចិត្តលោតចូលសមុទ្រ។

កាលពីថ្ងៃទី 26 កក្កដា កប៉ាល់ Fremantle Highway ដែលមានបណ្ដោយ 199 ម៉ែត្រ កើតមានអគ្គិភ័យពេល ស្ថិតក្នុងតំបន់ដែលមានចម្ងាយប្រហែល 27 គីឡូម៉ែត្រពីកោះ Ameland របស់ប្រទេសហូឡង់ គ្រាដែលកំពុងធ្វើដំណើរពីប្រទេសអាល្លឺម៉ង់ ឆ្ពោះទៅកាន់ប្រទេសអេហ្ស៊ីប។

ប៉ូលិសល្បាតសមុទ្ររបស់ហូឡង់ បានឱ្យដឹងថា ក្រុមកប៉ាល់សង្គ្រោះបានបាញ់ទឹកទៅកាន់កប៉ាល់ Fremantle Highway ដើម្បីពន្លត់ភ្លើង ប៉ុន្តែមិនអាចប្រើប្រាស់ទឹកច្រើន ព្រោះអាចធ្វើឱ្យកប៉ាល់លិច។ កប៉ាល់នេះត្រូវបានទាញចេញពីផ្លូវទឹកដែលមានចរាចរណ៍មមាញឹក។

នៅលើកប៉ាល់ដឹកឡាន 3,000 គ្រឿងនេះ មាននាវិក 23 នាក់ ក្នុងនោះមានម្នាក់បានស្លាប់ និង 7 នាក់ត្រូវលោតចូលសមុទ្រ ខណៈដែលនាវិកក្រៅពីនេះត្រូវបានសង្គ្រោះដោយឧទ្ធម្ភាគចក្រ។

ក្រុមហ៊ុនជប៉ុន Shoei Kisen ដែលជាអ្នកគ្រប់គ្រងកប៉ាល់ខាងលើ បានឱ្យដឹងថា ពួកគេកំពុងធ្វើការជាមួយអាជ្ញាធរហូឡង់ ទាក់ទិននឹងហេតុការណ៍អគ្គិភ័យនេះ។

ប៉ូលិសហូឡង់និយាយថា មូលហេតុនៃអគ្គិភ័យមិនទាន់ត្រូវបានរកឃើញនៅឡើយ។ ក៏ប៉ុន្តែ អ្នកនាំពាក្យម្នាក់របស់កងកម្លាំងនេះ មុននោះបានបង្ហើបឱ្យដឹងថា អណ្ដាតភ្លើងបានចាប់ផ្ដើមពីទីតាំងមួយនៅក្បែររថយន្តអគ្គិសនី។

July 27, 2023

កងទ័ពរបស់ប្រទេសនីហ្សេធ្វើរដ្ឋប្រហារ

កងទ័ពនៃប្រទេសនីហ្សេបានប្រកាសថា ធ្វើរដ្ឋប្រហារផ្ដួលរំលំរដ្ឋាភិបាលរបស់ប្រធានាធិបតី Bazoum និងដាក់បម្រាមគោចរនៅទូទាំងប្រទេស រហូតដល់ពេលមានសេចក្ដីប្រកាសថ្មី។

«យើងជាកងកម្លាំងការពារជាតិ និងសន្តិសុខ បានសម្រេចចិត្តបញ្ចប់របបរបស់ប្រធានាធិបតី Mohamed Bazoum» វរសេនីយ៍ឯក Amadou Abdramane អ្នកនាំពាក្យរបស់កងទ័ពប្រទេសនីហ្សេ ប្រកាសនៅលើកញ្ចក់ទូរទស្សន៍ជាតិកាលពីថ្ងៃទី 26 កក្កដា ឆ្នាំ 2023 ដូច្នេះ។ លោក Amadou Abdramane បានចោទថា អាជ្ញាធរស៊ីវិលគ្រប់គ្រងបែបធូររលុង និងបានធ្វើឱ្យស្ថានការណ៍សន្តិសុខកាន់តែអាក្រក់ឡើងៗ។

កងកទ័ពនេហ្សេប្រកាសថា នឹងបិទច្រកព្រំដែន និងដាក់បម្រាមគោចរនៅទូទាំងប្រទេស រហូតដល់ពេលមានប្រកាសថ្មី។ កងកម្លាំងនេះក៏បានព្រមានថា នឹងធ្វើការប្រឆាំង បើសិនមានការអន្តរាគមន៍ពីបរទេស។

មុននោះ ប្រភពព័ត៌មានដែលជិតស្និទ្ធបានបង្ហើបឱ្យដឹងថា ប្រធានាធិបតីនីហ្សេ លោក Bazoum ត្រូវបានកងកម្លាំងអង្គរក្សឃុំខ្លួននៅក្នុងភូមិគ្រឹះ។ ការិយាល័យប្រធានាធិបតីនីហ្សេ ប្រកាសថា កងទ័ពបានត្រៀមខ្លួនរួចរាល់ក្នុងការវាយប្រហារលើកងកម្លាំងអង្គរក្ស បើសិនពួកគេមិនដោះលែងលោក Bazoum។

ទីប្រឹក្សាសន្តិសុខជាតិនៅសេតវិមាន លោក Jake Sullivan បានថ្កោលទោសចំពោះរាល់កិច្ចប្រឹងប្រែងក្នុងការចាប់ខ្លួនប្រធានាធិបតីនីហ្សេ ឬបំផ្លាញរដ្ឋាភិបាលស៊ីវិល។ សហរដ្ឋអាម៉េរិកក៏បានអំពាវនាវឱ្យកងទ័ពនីហ្សេ ប្រញាប់ដោះលែងប្រធានាធិបតី Bazoum។

មន្ត្រីអង់គ្លេសដែលទទួលបន្ទុកអភិវឌ្ឍអន្តរជាតិ និងអាហ្វ្រិក រួមនឹងធនាគារពិភពលោក (WB) ក៏បានថ្កោលទោសចំពោះរដ្ឋប្រហារខាងលើផងដែរ។

រដ្ឋប្រហារដែលកើតឡើងនៅមុនរដ្ឋប្រហារចុងក្រោយនេះ ត្រូវបានធ្វើឡើងកាលពីខែកុម្ភៈឆ្នាំ 2010 និងបានបណ្ដាលឱ្យរដ្ឋាភិបាលរបស់ប្រធានាធិបតី Mamadou Tandja ត្រូវដួលរលំ។ ប្រធានាធិបតី Bazoum អាយុ 64 ឆ្នាំ ដែលត្រូវបានបោះឆ្នោតជ្រើសរើសកាលពីឆ្នាំ 2021 គឺជាសម្ព័ន្ធមិត្តជិតស្និទ្ធរបស់ប្រទេសបារាំង។

បច្ចុប្បន្ននេះ ប្រទេសនីហ្សេកំពុងតែប្រយុទ្ធប្រឆាំងនឹងយុទ្ធនាការចំនួនពីររបស់ក្រុមឧទ្ទាមអ៊ីស្លាមនៅភាគនិរតី និងអាគ្នេយ៍ ដែលជាប់ទាក់ទងនឹងបណ្ដាក្រុមជ្រុលនិយមនៅម៉ាលី និងនីហ្សេរីយ៉ា ដែលជាប្រទេសជិតខាង៕

July 27, 2023

អាម៉េរិកផ្ដល់ជំនួយជាយន្តហោះគ្មានមនុស្សបើកមហាតូចឱ្យអ៊ុយក្រែន

អ៊ុយក្រែននឹងទទួលបានយន្តហោះគ្មានមនុស្សបើកបរ (UAV) Black Hornet ខ្នាតតូចមួយឈុត នៅក្នុងកញ្ចប់ជំនួយថ្មីដែលមានតម្លៃ 400 លានដុល្លារអាម៉េរិក។

មន្ទីរបញ្ចកោណបានប្រកាសឱ្យដឹងអំពីកញ្ចប់ជំនួយតម្លៃ 400 លានដុល្លារសម្រាប់អ៊ុយក្រែន ក្នុងនោះមានទាំងគ្រាប់កាំភ្លើងច្រើនប្រភេទសម្រាប់ប្រព័ន្ធការពារដែនអាកាស និងបណ្ដាញយន្តហោះ UAV ខ្នាតមហាតូចដែលមានឈ្មោះថា Black Hornet។

Black Hornet គឺជា UAV ដែលមានទំហំតូចខ្លាំង និងត្រូវបានប្រើប្រាស់ដើម្បីប្រមូលព័ត៌មានស៊ើបការណ៍សម្ងាត់។ មុននោះ អង់គ្លេស និងន័រវែសក៏ធ្លាប់បានផ្ដល់ជំនួយជាយន្តហោះ Black Hornet នេះដល់អ៊ុយក្រែន។

Black Hornet មានបណ្ដោយប្រហែល 10 សង់ទីម៉ែត្រ អាចហោះបានក្នុងរង្វង់ 2 គីឡូម៉ែត្រ និងមានល្បឿន 4.7 ម៉ែត្រ/វិនាទី អាចដំណើរការជាបន្តបន្ទាប់បាន 25 នាទី។

Black Hornet ត្រូវបានបំពាក់កាមេរ៉ាខ្នាតតូចមួយចំនួន និងអាចហោះទៅក្បែរគោលដៅដោយមិនងាយនឹងត្រូវបានមើលឃើញ។ ទន្ទឹមនឹងនេះ វាក៏អាចថតរូប ថតវីដេអូនៅពេលយប់ និងបញ្ជូនវីដេអូទៅកាន់មូលដ្ឋាននៅក្នុងរយៈចម្ងាយប្រហែល 2 គីឡូម៉ែត្រផងដែរ។

កំណែថ្មីរបស់ Black Hornet មិនតម្រូវឱ្យយកឧបករណ៍អមមួយចំនួនទៅជាមួយ ដើម្បីលុបបំបាត់ហានិភ័យព័ត៌មានត្រូវធ្លាក់ទៅលើដៃសត្រូវ។

Black Hornet មានប្រយោជន៍ច្រើននៅក្នុងការតាមដានគោលដៅ និងឈ្លបយកការណ៍។ ប៉ុន្តែ UAV នេះក៏ពិបាកប្រើប្រាស់នៅពេលមានអាកាសធាតុអាក្រក់ មានដូចជា ខ្យល់ព្យុះ និងភ្លៀងធំជាងដើម។ ទោះជាយ៉ាងនេះក៏ដោយ អ្នកជំនាញនិយាយថា កំណែថ្មីដែលមានទម្ងន់ធ្ងន់ជាង អាចទប់ទល់នឹងខ្យល់ព្យុះដែលមានល្បឿន 28 គីឡូម៉ែត្រ/ម៉ោង៕

July 26, 2023

យានកង់ពិសេសដំណើរការដោយអគ្គិសនី អាចបើកបរឆ្លងកាត់ស្ទើគ្រប់ឧបសគ្គនៅលើដី

ក្រុមហ៊ុន 18 Wheels ដែលមានទីស្នាក់ការនៅ Helsinki ប្រទេសហ្វាំងឡង់ បានបង្ហាញយានគំរូមួយប្រភេទដែលដំណើរការដោយថាមពលអគ្គិសនី និងមានកង់រហូតដល់ 18 គ្រាប់។

រចនារូបរាងពិសេសរបស់យាននេះ អនុញ្ញាតឱ្យវាធ្វើដំណើរក្នុងល្បឿនលឿននៅលើភូមិសាស្ត្រដែលមានឧបសគ្គកម្ពស់រហូតដល់ 20 សង់ទីម៉ែត្រ ដោយមិនត្រូវបន្ថយល្បឿន។ វាអាចរត់លើដើមឈើដែលផ្ដេកនៅលើដី ដុំថ្ម និងជណ្ដើរជាដើម។ នេះបើតាម New Atlas ចុះផ្សាយកាលពីថ្ងៃទី 25 កក្កដា 2023។

កង់នីមួយៗរបស់យានចម្លែកនេះប្រើប្រាស់ម៉ូទ័រអគ្គិសនីមួយគ្រឿង។ ដោយសារប្រព័ន្ធជើងក្រោមដ៏ពិសេស វាដំណើរការស្ទើរដូចទៅនឹងកង់របស់រថក្រោះ។ យាននេះត្រូវបានអភិវឌ្ឍឡើងដើម្បីធ្វើដំណើរលើភូមិសាស្ត្រដែលសម្បូរឧបសគ្គ និងមិនបង្កឱ្យមានការខូចខាតផ្ទៃដីដែលវាបានធ្វើដំណើរឆ្លងកាត់។

យានចម្លែកនេះត្រូវបានគេរៀបគម្រោងតាំងពីឆ្នាំ 2021 និងអភិវឌ្ឍកាលពីឆ្នាំ 2022 មុននឹងធ្វើការសាកល្បងនាពេលថ្មីៗនេះ ដូចដែលបានបង្ហាញនៅក្នុងវីដេអូខាងក្រោម។

ក្រុមអ្នកស្រាវជ្រាវកំពុងអភិវឌ្ឍកំណែគំរូទីពីរ ដែលគេជឿថា នឹងដោះស្រាយបញ្ហាដែលបានកើតឡើងនៅក្នុងការសាកល្បង។ កំណែគំរូទីពីរគ្រោងនឹងត្រូវបានផលិតបន្ទាប់ពីបានបញ្ចប់ការសាកល្បងនៅចុងរដូវក្ដៅឆ្នាំ2023៕

July 26, 2023

Tag: មុន