ជំនាញ - La Reine Media

នាវាមុជទឹក Titan ដែលបាត់ខ្លួន អាចនៅមានរូបរាងដើម ប៉ុន្តែទំនងជាត្រូវជ្រាបទឹក

វិស្វករ Ron Allum បានឱ្យដឹងថា នាវាទេសចរណ៍មុជទឹកដែលកំពុងបាត់ខ្លួន មិនអាចមានករណីផ្ទុះ ប៉ុន្តែបញ្ហាជ្រាបទឹកមួយផ្នែកទំនងជាអាចកើតឡើង និងបណ្ដាលឱ្យវាមិនអាចងើបមកលើផ្ទៃទឹក។

យោងតាមវិស្វករជនជាតិអូស្ត្រាលី Ron Allum ដែលជំនាញក្នុងការស្រាវជ្រាវតំបន់សមុទ្រជ្រៅ និងជាអ្នកដែលបានរចនានាវាមុជទឹក Deepsea Challenger ដែលអ្នកដឹករឿង James Cameron ប្រើប្រាស់កាលពីឆ្នាំ 2012 ដើម្បីថតយកទិដ្ឋភាពនៃទីតាំងជ្រៅបំផុតរបស់ផែនដី យល់ថា នាវា Titan មិនងាយនឹងជួបបញ្ហាធ្ងន់ធ្ងរនៅលើជញ្ជាំងរបស់វាឡើយ ព្រោះវាត្រូវបានរចនាឡើងដើម្បីទប់ទល់នឹងបញ្ហាសម្ពាធ។

លោក Allum បន្ថែមថា «ចំពោះខ្ញុំ ទ្រង់ទ្រាយរបស់នាវាមុជទឹកនេះនៅរក្សាបានសភាពដើម ប៉ុន្តែវាបានដាច់ចរន្តអគ្គិសនី។ ក្នុងករណីនេះ Titan អាចកាត់បន្ថយទម្ងន់ដោយស្វ័យប្រវត្តដើម្បីផុសឡើងមកលើ»។

ក៏ប៉ុន្តែ យោងតាមលោក Allum នៅពេលនាវានេះត្រូវជួបបញ្ហាជ្រាបទឹក វានឹងមិនអាចងើបឡើងមកលើផ្ទៃទឹកបានឡើយ ព្រោះទម្ងន់របស់វានឹងធ្ងន់ជាងមុន។ «ប្រការនោះក៏មានន័យថា អ្នកនៅក្នុងនាវាក៏កំពុងអង្គុយក្នុងទឹក ហើយនេះគឺជារឿងអាក្រក់។

នាវាមុជទឹក Titan បានបាត់ខ្លួនតាំងពីថ្ងៃទី 18 មិថុនា 2023 នៅពេលធ្វើដំណើរចុះទៅ មើលសាកសពកប៉ាល់ Titanic នៅបាតមហាសមុទ្រអាត្លង់ទិក។ ក្នុងនាវានោះមានមនុស្សប្រាំនាក់ ក្នុងនោះមានមហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 22, 2023

វរនាវីឯកទ័ពជើងទឹកអាម៉េរិកថា អ្នកជាប់ក្នុងនាវា Titan ប្រហែលកំពុងរងភាពត្រជាក់ខ្លាំង

វរនាវីឯកនៃទ័ពជើងទឹកអាម៉េរិកដែលចូលនិវត្តន៍ យល់ថា មនុស្សទាំងប្រាំនាក់នៅក្នុងនាវាមុជទឹក Titan ដែលកំពុងបាត់ខ្លួន ប្រហែលកំពុងរងភាពត្រជាក់ខ្លាំង ហើយប្រឈមនឹងហានិភ័យទាក់ទងនឹងបញ្ហាអុកស៊ីសែន។

វរនាវីឯក David Marquet អតីតមេបញ្ជាការនាវាមុជទឹកនៃទ័ពជើងទឹកអាម៉េរិក កាលពីថ្ងៃទី 21 មិថុនា បាននិយាយថា យោងតាមការវាយតម្លៃផ្ទាល់ខ្លួនរបស់គាត់ មនុស្សដែលកំពុងជាប់ក្នុងនាវា Titan នៅមហាសមុទ្រអាត្លង់ទិក កំពុងស្រេកឃ្លានក្រោយរយៈពេលបីថ្ងៃ ប៉ុន្តែបញ្ហានេះប្រហែលជាមិនធ្វើឱ្យពួកគេស្លាប់។ បើសិនជានៅមានជីវិត ពួកគេអាចនឹងពិបាកទ្រាំនៅក្នុងទីដ៏តូចចង្អៀតរបស់នាវា។

«ពួកគេកំពុងតែរងភាពត្រជាក់ខ្លាំង ព្រោះថា តំបន់ទឹកនៅជុំវិញនាវាសុទ្ធតែមានសីតុណ្ហភាព 0 អង្សាសេ ឬទាបជាងនេះ។ ពួកគេត្រូវចូលមកក្បែរគ្នាដើម្បីទទួលកម្ដៅពីរាងកាយ» លោក Marquet អះអាងដូច្នេះ។

នៅពេលពួកគេដកដង្ហើមចេញ ចំហាយទឹកនឹងប្រមូលផ្ដុំគ្នា បង្កើតបានជាស្រទាប់អ័ព្ទត្រជាក់ខាងក្នុងនាវា ប៉ុន្តែប្រការសំខាន់គឺអុកស៊ីសែនកំពុងថយចុះជាលំដាប់ ខណៈដែលពួកគេបន្តបញ្ចេញកាបូន។

នាវា Titan ប្រហែលជាកាត់បន្ថយការស្រូបយកឧស្ម័នកាបូន។ បើសិនកំហាប់កាបូនក្នុងនាវានេះមានកម្រិតខ្ពស់ វានឹងធ្វើឱ្យមានអាការៈឈឺក្បាល ក្អួតចង្អោរ និងបាត់បង់ស្មារតី។

មន្ត្រីអាម៉េរិកកាលពីម្សិលមិញឱ្យដឹងថា ក្រុមសង្គ្រោះបានឮសំឡេងខ្លាំងនៅក្រោមសមុទ្រ ប៉ុន្តែមិនអាចកំណត់បានថាជាសំឡេងអ្វី។ ទំហំនៃការស្វែងរកត្រូវបានពង្រីកទ្វេដង បើធៀបនឹងផ្ទៃដីរបស់រដ្ឋ Connecticut (ជាង 13,000 គីឡូម៉ែត្រក្រឡា)។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 22, 2023

នាវាមុជទឹក Titan ដែលបាត់ខ្លួន អាចនៅសល់អុកស៊ីសែនមិនដល់ 9 ម៉ោង

កងកម្លាំងល្បាតឆ្នេរអាម៉េរិក គណនាឃើញថា បរិមាណខ្យល់អុកស៊ីសែនដែលមាននៅក្នុងនាវាមុជទឹក Titan អាចគ្រប់គ្រាន់សម្រាប់រយៈពេល 20 ម៉ោង (គិតត្រឹមម៉ោងប្រហែល 22 ថ្ងៃទី 21 មិថុនា) នៅពេលពួកគេកំពុងបន្ថែមកប៉ាល់ដែលអាចរកឃើញវត្ថុនានានៅបាតសមុទ្រ។

កាលពីវេលាម៉ោងប្រហែល 11 ម៉ោងនៅភាគខាងកើតសហរដ្ឋអាម៉េរិក (ម៉ោងប្រហែល 22 នៅកម្ពុជា) ថ្ងៃទី 21 មិថុនា ឧត្ដមនាវីទោ John Mauger របស់កងកម្លាំងល្បាតសមុទ្រអាម៉េរិក បានឱ្យដឹងថា បរិមាណខ្យល់អុកស៊ីសែនក្នុងនាវា Titan នៅសល់ប្រហែល 20 ម៉ោងទៀត ដោយយោងទៅតាមការគណនាដំបូង គឺ 96 ម៉ោង ចាប់តាំងពីនាវានេះបានបាត់ទំនាក់ទំនង។

អ្នកមុជទឹក Joe Maclnnis មិត្តរបស់លោក Paul-Henri Nargeolet ដែលជាមនុស្សម្នាក់ស្ថិតនៅក្នុងនាវាបាត់ខ្លួន Titan ជឿថា មិត្តរបស់គាត់គឺជា «អ្នកដឹកនាំដ៏អស្ចារ្យនៅក្នុងពេលមានបញ្ហា»។ លោក Joe និយាយថា លោក Nargeolet ដែលធ្លាប់ជាប្រធានក្រុមមុជទឹកជ្រៅនៅក្នុងជួរទ័ពជើងទឹកបារាំង អាចណែនាំអ្នកនៅក្នុងនាវាឱ្យរក្សាភាពស្ងប់ស្ងាត់ និងដកដង្ហើមកាន់តែតិច កាន់តែល្អ។

មន្ត្រីអាម៉េរិក ប្រកាសដំណឹងខ្លះៗអំពីដំណើរការស្វែងរកនាវាមុជទឹក Titan

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។ ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។

ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 22, 2023

ក្រុមសង្គ្រោះក្នុងករណីនាវាមុជទឹក Titan បាត់ខ្លួន «ឮសំឡេងលាន់ខ្លាំងៗចេញពីក្រោមសមុទ្រ»

ក្រុមអ្នកសង្គ្រោះដែលកំពុងស្វែងរកនាវាមុជទឹក Titan ដែលកំពុងបាត់ខ្លួននៅក្រោមមហាសមុទ្រអាត្លង់ទិក ត្រូវបានគេថា បានឮសំឡេងលាន់ខ្លាំងៗនៅក្រោមសមុទ្ររៀងរាល់ 30 នាទីម្ដង ធ្វើឱ្យមានការសង្ឃឹមចំពោះបេសកកម្មជួយសង្គ្រោះនេះ។

«មជ្ឈមណ្ឌលសម្របសម្រួលកិច្ចការសង្គ្រោះនៅ Halifax បានបញ្ជូនយន្តហោះ P-8 Poseidon មួយគ្រឿងដែលមានសមត្ថភាពតាមដានស្ថានការណ៍នៅក្រោមសមុទ្រ ទៅកាន់កន្លែងកើតហេតុ» ក្រសួងសន្តិសុខផ្ទៃក្នុងកាណាដាឱ្យដឹងដូច្នេះ។ នេះបើតាមព័ត៌មានដែលទំព័រ Rolling Stone ទទួលបានកាលពីថ្ងៃទី 20 មិថុនា។ CNN ក៏ផ្សាយព័ត៌មានប្រហាក់ប្រហែលនេះ។

យន្តហោះ P-8 បានទម្លាក់ពោងដែលបំពាក់បច្ចេកវិទ្យាស្រូបសំឡេងក្រោមទឹក ដើម្បីទទួលរលកសញ្ញា នៅក្បែរតំបន់ Titan បាត់ខ្លួន។ P-8 បានរកឃើញសំឡេងលាន់ខ្លាំងៗក្នុងតំបន់ទឹកជ្រៅ រៀងរាល់ 30 នាទីម្ដង។ បួនម៉ោងក្រោយមក ពួកគេបានទម្លាក់ពោងប្រភេទនេះបន្ថែមទៀត ហើយនៅតែឮសំឡេងនេះដដែល។ បច្ចុប្បន្ន ពុំទាន់ដឹងច្បាស់ថា សំឡេងនេះចេញមកពីណានៅឡើយ។

រូបភាពបង្ហាញពីក្រុមសង្គ្រោះទាំងឡាយដែលកំពុងស្វែងរកនាវាមុជទឹក Titan

យោងតាម CNN សំឡេងនានានឹងជួយដល់ការកំណត់ទិសដៅរបស់ឧបករណ៍លើសមុទ្រ ដែលនេះបង្ហាញថា ក្ដីសង្ឃឹមក្នុងការជួយសង្គ្រោះមនុស្សទាំងប្រាំនាក់ដែលស្ថិតក្នុងនាវាមុជទឹក Titan នៅមាននៅឡើយ។

ខណៈដែលសមត្ថកិច្ចនៅកាណាដាមិនទាន់មានការអធិប្បាយអ្វី OceanGate Expeditions ដែលជាក្រុមហ៊ុនគ្រប់គ្រងនាវាមុជទឹក Titan ក៏បាននិយាយថា មិនទាន់មានដំណឹងថ្មីដើម្បីចែករំលែកនៅឡើយនៅពេលនេះ។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 21, 2023

ប្អូនស្រីរបស់លោក Elon Musk ថា «ជាបងប្អូននឹងអ្នកមានជាងគេលើលោក គឺជាកាំបិតមុខពីរ»

Tosca ដែលជាប្អូនស្រីរបស់លោក Elon Musk និយាយថា ត្រូវចំណាយលើថ្លៃជួលខ្ពស់ជាងគេនៅពេលម្ចាស់ទីតាំងថតកុនដឹងថា អ្នកស្រីមានត្រកូលដូចអ្នកមានទ្រព្យច្រើនជាងគេលើពិភពលោក។

Tosca Musk ដែលជាផលិតការិនីភាពយន្ត បានឱ្យដឹងថា នាមជាប្អូនរបស់មហាសេដ្ឋីអាម៉េរិក គឺជា «សំណាងល្អ ប៉ុន្តែក៏ជារឿងអាក្រក់»។ ប្រការនេះបានលេចឡើងនៅពេលអ្នកស្រីជួលទីតាំងថតកុនមួយកន្លែង។

«តំបន់នោះមានតម្លៃ 5,000 ដុល្លារ/ថ្ងៃ។ ប៉ុន្តែពេលឮឈ្មោះខ្ញុំ ម្ចាស់ទីតាំងនោះក៏ប្រាប់ថា តម្លៃ 25,000 ដុល្លារ» អ្នកស្រី Tosca រៀបរាប់ដូច្នេះ និងបន្ថែមថា «គ្រប់គ្នាគិតថា បងប្រុសរបស់ខ្ញុំចេញថ្លៃគ្រប់យ៉ាងឱ្យខ្ញុំ ប៉ុន្តែតាមពិត មិនដូច្នោះទេ»។

អ្នកស្រី Tosca ឱ្យដឹងថា ជាសាច់ញាតិរបស់លោក Elon Musk ក៏ជា «កាំបិតមុខពីរ» ព្រោះថា ក្រៅពីជួយដល់ការកសាងទំនាក់ទំនងក្នុងការងារ ប្រការនេះក៏ធ្វើឱ្យអ្នកស្រីរងសម្ពាធច្រើនផងដែរ។ យ៉ាងណាក៏ដោយ អ្នកស្រីនិយាយថា ការមានត្រកូល Musk គឺជាភ័ព្វសំណាង ហើយអ្នកស្រីមិនចង់ប្ដូរផ្លាស់ឡើយ។

អ្នកស្រី Tosca កើនឆ្នាំ 1974 បន្ទាប់ពីលោក Elon Musk និងបងប្រុសម្នាក់ទៀតគឺ Kimbal Musk។ យោងតាមទំព័រ IMDb អ្នកស្រី Tosca បានចាប់ផ្ដើមមុខរបរផលិតភាពយន្តតាំងពីឆ្នាំ 2001 ហើយមកដល់ពេលនេះ អ្នកស្រីផលិតបានជាង 50 រឿង។ អ្នកស្រីក៏ជាស្ថាបនិក និងជា CEO របស់ Passionflix ដែលជាក្រុមហ៊ុនផលិត និងផ្គត់ផ្គង់សេវាកម្មផ្សាយផ្ទាល់ ដែលជំនាញខាងមាតិកាមនោសញ្ចេតនា។

ទំព័រ Bloomberg ឱ្យដឹងថា លោក Elon Musk ដណ្ដើមបានតំណែងជាអ្នកមានទ្រព្យច្រើនជាងគេលើពិភព លោក ពីមហាសេដ្ឋីបារាំង Bernard Arnault កាលពីដើមខែមិថុនា 2023 ដោយលោក Elon Musk មានទ្រព្យសរុប 233 ពាន់លានដុល្លារអាម៉េរិក៕

June 21, 2023

មហាសេដ្ឋី និងអ្នកជំនួញមកពីបួនប្រទេសបាត់ខ្លួនជាមួយនឹង Titan ពេលចុះមើលសព Titanic

អ្នកជំនាញបារាំងម្នាក់ រួមនឹងអ្នកជំនួញបួននាក់មកពីអង់គ្លេស ប៉ាគីស្ថាន និងសហរដ្ឋអាម៉េរិក ត្រូវបានគេជឿថា មានវត្តមាននៅក្នុងនាវាមុជទឹក Titan ដែលបានបាត់ខ្លួនក្នុងពេលចុះទៅមើលសាកសពកប៉ាល់ Titanic នៅបាតមហាសមុទ្រ។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

OceanGate Expeditions ដែលមានទីស្នាក់ការកណ្ដាលនៅក្នុងរដ្ឋវ៉ាស៊ីងតោន សហរដ្ឋអាម៉េរិក បានចាប់ផ្ដើមផ្ដល់សេវាកម្មនាំអតិថិជនទៅមើលសាកសពកប៉ាល់ Titanic ក្នុងតម្លៃប្រហែល 250,000 ដុល្លារ/ម្នាក់ ចាប់ពីឆ្នាំ 2020។ ភ្ញៀវនឹងទទួលបទពិសោធន៍ 8 ថ្ងៃនៅលើសមុទ្រ ក្នុងនោះ នាវាមុជទឹក Titan ដែលដាក់មនុស្សបាន 5 នាក់ ត្រូវបានប្រើប្រាស់ដើម្បីនាំទេសចរចុះទៅមើលសាកសពកប៉ាល់ Titanic ដែលស្ថិតក្នុងជម្រៅប្រហែលជិត 4,000 ម៉ែត្រ។

ពីឆ្វេងមកស្ដាំគឺ Paul-Henry Nargeolet, Hamish Harding និង Stockton Rush

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman។

ក្នុងចំណោមមនុស្សខាងលើ មហាសេដ្ឋីអង់គ្លេសត្រូវបានគេចាប់អារម្មណ៍ជាងគេ។ លោក Hamish Harding អាយុ 58 ឆ្នាំ ដែលជាអ្នកជំនួញជនជាតិអង់គ្លេស រស់នៅក្នុងប្រទេសអេមីរ៉ាតអារ៉ាប់រួម (UAE) គឺជាប្រធានរបស់ក្រុមហ៊ុន Action Aviation ដែលជាទីភ្នាក់ងារឈ្មួញជើងសាអន្តរជាតិផ្នែកយន្តហោះ មានទីស្នាក់ការកណ្ដាលនៅទីក្រុងឌូបៃ។

June 21, 2023

មូលហេតុនាំឱ្យនាវាមុជទឹក Titan បាត់ខ្លួន អាចមកពីកត្តាទាំងនេះ

ក្រុមអ្នកជំនាញយល់ថា នាវាមុជទឹក Titan ប្រហែលជាបានជួបបញ្ហាបច្ចេកទេស ឬខូចសម្បកខាងក្រៅ បណ្ដាលឱ្យបាត់ទំនាក់ទំនងនៅពេលមុជក្រោមសមុទ្រទៅមើលសាកសពកប៉ាល់ Titanic។

កងកម្លាំងល្បាតឆ្នេរសមុទ្រអាម៉េរិក កាលពីថ្ងៃទី 19 មិថុនា ប្រកាសថា ពួកគេកំពុងស្វែងរកដានរបស់នាវាមុជទឹកទេសចរណ៍ Titan ដែលបានបាត់ខ្លួនក្នុងពេលមុជចុះទៅមើលសាកសពកប៉ាល់ Titanic នៅបាតមហាសមុទ្រអាត្លង់ទិក។ នាវាជួបគ្រោះថ្នាក់នេះ ដឹកមនុស្ស 5 នាក់ ក្នុងនោះក៏មានមហាសេដ្ឋីអង់គ្លេស បានមុជចុះក្រោមទឹកសមុទ្រនៅព្រឹកថ្ងៃទី 18 មិថុនា ហើយរយៈពេលជាងមួយម៉ោងកន្លះក្រោយមក វាក៏បានបាត់ទំនាក់ទំនង។

OceanGate Expeditions ដែលជាអ្នកគ្រប់គ្រងនាវាខាងលើឱ្យដឹងថា ខ្លួនកំពុងរកគ្រប់វិធីដើម្បីនាំក្រុមអ្នកទេសចរណ៍នេះឡើងមកដោយសុវត្ថិភាព។ កងកម្លាំងរបស់ប្រទេសកាណាដាក៏ចូលរួមការស្វែងរកនាវានេះដែរ ប៉ុន្តែមិនទាន់បានរកឃើញតម្រុយអ្វីនៅឡើយ។

ក្រុមអ្នកជំនាញបានលើកឡើងនូវមូលហេតុជាច្រើនដែលពួកគេយល់ថា អាចជាកត្តាដែលបណ្ដាលឱ្យនាវា Titan បាត់ខ្លួន។ ក្នុងនោះមានដូចជា បញ្ហាដាច់ប្រភពអគ្គិសនី បញ្ហាទាក់ជាប់នឹងវត្ថុអ្វីមួយរបស់សាកសពកប៉ាល់ Titanic និងបញ្ហាប្រព័ន្ធទំនាក់ទំនងជាដើម។

សាកសពកប៉ាល់ Titanic ស្ថិតក្នុងជម្រៅប្រហែល 3,800 ម៉ែត្រ ខាងក្រោមមហាសមុទ្រអាត្លង់ទិក។ នៅជុំវិញសាកសពកប៉ាល់នេះ មានបំណែកជាច្រើនដែលសេសសល់ពីហេតុការណ៍លិចកាលពីជាងមួយសតវត្សរ៍មុន៕

June 20, 2023

សេវាកម្មកែច្នៃរថយន្តសាំងទៅជារថយន្តអគ្គិសនីកំពុង «ផ្ទុះការនិយម» នៅសហរដ្ឋអាម៉េរិក

ការកែច្នៃរថយន្តប្រើម៉ាស៊ីនចំហេះក្នុងទៅជារថយន្តអគ្គិសនីកំពុងទាក់ទាញចំណាប់អារម្មណ៍ខ្លាំងនៅសហរដ្ឋអាម៉េរិក ខណៈយានដ្ឋាននានានាំគ្នាផ្ដល់សេវាកម្មនេះកាន់តែច្រើន។

ចំណាប់អារម្មណ៍របស់អ្នកប្រើប្រាស់ចំពោះរថយន្តអគ្គិសនីកំពុងតែស្ថិតក្នុងកម្រិតខ្ពស់បំផុត នៅពេលចំនួនរថយន្តអគ្គិសនីថ្មីត្រូវបានលក់ចេញ កើន 55% នៅឆ្នាំ 2022 ធៀបនឹងឆ្នាំ 2021។ នេះបើយោងតាមទិន្នន័យរបស់អង្គការថាមពលអន្តរជាតិ (IEA)។ ប៉ុន្តែ រថយន្តសាំងក៏នៅតែគ្រប់គ្រងទីផ្សាររថយន្តទាំងមូល ហើយប្រការនេះអាចនៅតែកើតឡើងក្នុងអនាគតខ្លីខាងមុខ។

ក្នុងកាលៈទេសៈនេះ វិស័យឧស្សាហកម្មថ្មីមួយកំពុងត្រូវបានបង្កើតឡើង និងកំពុងទាក់ទាញចំណាប់អារម្មណ៍របស់សាធារណជន។ មជ្ឈមណ្ឌលផ្ដល់សេវាកម្មកែច្នៃរថយន្តសាំងទៅជារថយន្តអគ្គិសនីកំពុងតែរីកមាឌ។

Michael Bream ដែលជាស្ថាបនិក និងជានាយកប្រតិបត្តិរបស់យានដ្ឋានរថយន្តអគ្គិសនី EV West នៅ California សហរដ្ឋអាម៉េរិក គឺជាមួយក្នុងចំណោមយានដ្ឋាននាំមុខគេនៅក្នុងការផ្ដល់សេវាកម្មកែច្នៃរថយន្តសាំងទៅជារថយន្តអគ្គិសនី។ យានដ្ឋាននេះកំពុងតែមមាញឹកខ្លាំង ហើយអតិថិជនខ្លះត្រូវរង់ចាំរហូតដល់ទៅ 4 ឬ 5 ឆ្នាំ ទើបដល់វេនទទួលសេវាកម្មនេះ។

EV West ផ្ដល់សេវាកម្មប្ដូរម៉ាស៊ីនចំហេះក្នុងទៅជាម៉ូទ័រអគ្គិសនីកម្លាំងរហូតដល់ 550 សេះ។ EV West ប្រើប្រាស់ម៉ូទ័រអគ្គិសនីរបស់ Tesla។ យោងតាមអ្នកជំនាញ ការចំណាយជាមធ្យមលើការប្ដូរម៉ាស៊ីននេះគឺប្រហែលពី 7,000 ទៅ 9,000 ដុល្លារអាម៉េរិក/រថយន្តមួយគ្រឿង។ យានដ្ឋានរបស់ Bream ទទួលប្ដូរម៉ាស៊ីនរថយន្តថ្លៃៗ និងកម្រៗ ដូច្នេះ តម្លៃក៏ខ្ពស់ ពោលគឺពី 18,000 ដល់ 30,000 ដុល្លារអាម៉េរិក។

នៅសហរដ្ឋអាម៉េរិក ក្រៅពីបណ្ដាយានដ្ឋានជំនាញ គេក៏ឃើញមានយានដ្ឋានតូចៗ និងក្រុមជាងច្នៃប្រឌិតជាច្រើន នាំគ្នាចូលរួមរកស៊ីក្នុងវិស័យឧស្សាហកម្មថ្មីនេះផងដែរ៕

June 19, 2023

អ្នកជំនាញរបស់ណាសាថា ព្រះចន្ទអាចមានភាវៈរស់ ពិសេសគឺប្រភពរបស់វា

ភាវៈរស់ក្រៅភពផែនដីមិនមែននៅឆ្ងាយឡើយ តែអាចស្ថិតនៅលើភពរណបរបស់ផែនដី នោះគឺព្រះចន្ទរបស់មនុស្ស។

ប៉ូលខាងត្បូងរបស់ព្រះចន្ទក្លាយជាចំណុចដ៏ទាក់ទាញសម្រាប់បណ្ដាប្រទេសមហាអំណាចអវកាស ពិសេសនៅពេលទីភ្នាក់ងារអវកាសអាម៉េរិក (ណាសា) រៀបគម្រោងនាំមនុស្សឡើងទៅជាន់ដីព្រះចន្ទតាមរយៈបេសកកម្ម Artemis។

ថ្មីៗនេះ អ្នកវិទ្យាសាស្ត្រមួយរូបរបស់ណាសា បានចែករំលែកព័ត៌មានដ៏គួរឱ្យភ្ញាក់ផ្អើលមួយ នោះគឺ នៅលើឋានព្រះចន្ទអាចមានភាវៈរស់ បើទោះមានលក្ខខណ្ឌមិនអំណោយផលសម្រាប់ជីវិត។

យោងតាម Business Insider អ្នកវិទ្យាសាស្ត្រ Prabal Saxena របស់អង្គការណាសា ឱ្យដឹងថា ជីវិតរបស់សត្វល្អិតអាចមានវត្តមាននៅក្នុងបរិស្ថានអាក្រក់ដូចនៅលើព្រះចន្ទ។ លោក Prabal បន្ថែមថា រណ្ដៅនានានៅលើផ្ទៃព្រះចន្ទទំនងជាបានផ្ដល់ជាជម្រកល្អសម្រាប់សត្វល្អិតទាំងនោះ ពិសេសគឺនៅប៉ូលខាងត្បូងដែលពន្លឺព្រះអាទិត្យមិនអាចទៅដល់។

លោក Prabal និងសហការីយល់ថា សត្វល្អិតទាំងនេះមានប្រភពមកពីទីអវកាស ពិសេសគឺផែនដីតែម្ដង។ សត្វល្អិតទាំងនេះ បើសិនជាមាន ពួកវាប្រហែលជាបានទៅកាន់ឋានព្រះចន្ទតាមរយៈយានអវកាស ក្នុងនោះមានយានចុះចតដូចជា Apollo របស់សហរដ្ឋអាម៉េរិក កាលពីឆ្នាំ 1969 ជាដើម។ ប្រសិនបើពេលនេះពុំមានសត្វល្អិត នៅថ្ងៃខាងមុខ ព្រះចន្ទក៏នៅតែមានវត្តមានរបស់ភាវៈរស់ ព្រោះថា អនាគត មនុស្សនឹងបង្កើនវត្តមានរបស់ខ្លួននៅទីនោះ៕

June 16, 2023

វិស្វករអាយុ 14 ឆ្នាំរបស់ SpaceX ថា បណ្ដាញសង្គមរបស់ Microsoft រើសអើងវ័យ

Kairan Quazi ដែលជាវិស្វករផ្នែកទន់ទើបតែបានចូលធ្វើការឱ្យក្រុមហ៊ុន SpaceX មិនអាចចូលប្រើប្រាស់បណ្ដាញសង្គមការងារ LinkedIn ដោយសារតែមានអាយុទើបតែ 14 ឆ្នាំ។

កាលពីថ្ងៃទី 14 មិថុនា Kairan Quazi បានបង្ហោះរូបថតអេក្រង់ស្ដីពីប្រកាសរបស់ LinkedIn នៅលើ Instagram។ ប្រកាសនោះប្រាប់ថា គណនីរបស់ Kairan ត្រូវបានរារាំងព្រោះតែមានអាយុតិចជាងលក្ខខណ្ឌរបស់ LinkedIn។ បណ្ដាញសង្គមរបស់ Microsoft នេះ ទាមទារឱ្យអ្នកប្រើប្រាស់ត្រូវមានអាយុចាប់ពី 16 ឆ្នាំឡើងទៅ។

LinkedIn ឱ្យដឹងថា វិស្វករវ័យក្មេងខាងលើនឹងបានចូលប្រើប្រាស់ឡើងវិញ បន្ទាប់ពីមានអាយុគ្រប់ 16 ឆ្នាំ។ Kairan ប្រើប្រាស់បណ្ដាញសង្គមនេះដោយមានការបង់ប្រាក់ ប៉ុន្តែ LinkedIn ថា នឹងសងប្រាក់នោះត្រឡប់មកវិញ។

Kairan Quazi បានសម្ដែងការមិនពេញចិត្តចំពោះគោលការណ៍របស់ LinkedIn។ កុមាររូបនេះចោទថា បណ្ដាញសង្គមរបស់ Microsoft រើសអើងវ័យចំពោះកុមារ។

Kairan Quazi កើតឆ្នាំ 2009 នៅ California សហរដ្ឋអាម៉េរិក។ វ័យ 11 ឆ្នាំ Kairan បានចូលសាកលវិទ្យាល័យ Santa Clara រៀនជំនាញវិទ្យាសាស្ត្រ និងបច្ចេកទេសកុំព្យូទ័រ។

LinkedIn គឺជាបណ្ដាញសង្គមផ្នែកទិន្នន័យអាជីព ការងារ និងផ្សារភ្ជាប់ជាមួយនឹងមុខរបរ ធំជាងគេលើពិភពលោក ហើយក៏ជាកម្មសិទ្ធិរបស់ក្រុមហ៊ុន Microsoft។ គិតត្រឹមខែមីនា 2023 បណ្ដាញសង្គមនេះមានសមាជិកចូលរួមប្រើប្រាស់ជាង 900 លាននាក់ មកពីប្រទេស និងដែនដីជាង 200 ក្នុងនោះក៏មានកម្ពុជាផងដែរ៕

June 15, 2023

Tag: ជំនាញ