អឺរ៉ុប - La Reine Media

ផ្សារហ៊ុនអឺរ៉ុប – អាម៉េរិក «ក្រឡាប់ចាក់» បន្ទាប់ពីមានរបាយការណ៍អតិផរណានៃខែសីហារបស់អាម៉េរិក

ផ្សារមូលបត្រអាម៉េរិកក្រឡាប់ចាក់នៅក្នុងការជួញដូរនាពេលព្រឹក នៅពេលអ្នកវិនិយោគពិនិត្យទិន្នន័យ និងអត្ថន័យរបស់វាចំពោះកិច្ចប្រជុំនៅសប្ដាហ៍ក្រោយរបស់ធនាគារកណ្ដាលអាម៉េរិក (Fed)។

ផ្សារមូលបត្រអឺរ៉ុប – អាម៉េរិក មានការប្រែប្រួលច្រើនក្នុងការជួញដូរកាលពីថ្ងៃទី 13 កញ្ញា 2023 បន្ទាប់ពីមានរបាយការណ៍អតិផរណាក្នុងខែសីហារបស់សហរដ្ឋអាម៉េរិក និងនៅមុនពេលធនាគារកណ្ដាលអឺរ៉ុប (ECB) កំណត់ការប្រាក់ថ្មី។

របាយការណ៍ថ្មីបំផុតពីក្រសួងការងារអាម៉េរិកបង្ហាញថា អតិផរណារបស់ប្រទេសនេះបានកើនពី 3.2% កាលពីខែកក្កដា ឡើងដល់ 3.7% ក្នុងខែសីហា ដោយភាគច្រើនបណ្ដាលមកពីតម្លៃប្រេងសាំងកើនឡើងខ្ពស់ខ្លាំង។

ផ្សារមូលបត្រអាម៉េរិកក្រឡាប់ចាក់ក្នុងការជួញដូរនៅពេលព្រឹក នៅពេលអ្នកវិនិយោគពិនិត្យទិន្នន័យ និងអត្ថន័យរបស់វាចំពោះកិច្ចប្រជុំនៅសប្ដាហ៍ក្រោយរបស់ធនាគារកណ្ដាលអាម៉េរិក (Fed)។ ក៏ប៉ុន្តែ ការជួញដូរចុងក្រោយក្នុងថ្ងៃដដែល (13 កញ្ញា) ទាំង S&P 500 ទាំង Nasdaq សុទ្ធតែបានងើបឡើងបន្តិច គ្រាដែល Dow Jones ធ្លាក់ចុះបន្តិច។ ដោយឡែក ផ្សារហ៊ុនអឺរ៉ុបវិញ ភាគច្រើនសុទ្ធតែថយចុះ ខណៈដែលមូលចំនួនតូចមិនមានការប្រែប្រួល។

មុននោះ ធនាគារកណ្ដាលអាម៉េរិក បានសង្កត់ធ្ងន់ថា ដំណើរការនៃការចេញសេចក្ដីសម្រេចស្ដីពីគោលនយោបាយហិរញ្ញវត្ថុ នឹងយោងទៅលើតួលេខសេដ្ឋកិច្ច។ ទិន្នន័យស្ដីពីទីផ្សារការងារ និងវិស័យសេវាកម្ម បានធ្វើឱ្យមានដំណឹងចចាមអារ៉ាមថា Fed អាចនឹងដំឡើងការប្រាក់ជាច្រើនលើកទៀត។ តម្លៃប្រេងឆៅដែលកើនខ្ពស់បំផុតក្នុង 10 ខែ ក៏កាន់តែធ្វើឱ្យក្ដីបារម្ភនេះកើនឡើងមួយកម្រិតទៀត៕

September 14, 2023

រវាងទ្វីបអាស៊ី និងទ្វីបអឺរ៉ុប មួយណាមានអ្នកមានច្រើនជាងគេ?

ទ្វីបអាស៊ីនៅតែមានអ្នកមានច្រើនជាងទ្វីបអឺរ៉ុប ដោយគ្រាន់តែនៅពីក្រោយតំបន់អាម៉េរិកខាងជើងប៉ុណ្ណោះ បើទោះជាចំនួនអ្នកមាននៅក្នុងបណ្ដាទ្វីប បានថយចុះច្រើនបំផុតកាលពីឆ្នាំ 2022។

យោងតាមរបាយការណ៍ World Ultra Wealth 2023 របស់ក្រុមហ៊ុន Altrata (អង់គ្លេស) ចំនួនអ្នកមាននៅទ្វីបអាស៊ីកាលពីឆ្នាំ 2022 គឺ 108,370 នាក់ ថយចុះជិត 11% បើធៀបនឹងឆ្នាំ 2021 ហើយក៏ជាការថយចុះច្រើនបំផុតមិនធ្លាប់មានពីមុនមក។ ទ្រព្យសរុបរបស់ក្រុមនេះបានថយចុះ 10.6% ធៀបនឹងឆ្នាំមុន។ របាយការណ៍នេះកំណត់ថា អ្នកមានគឺជាបុគ្គលដែលមានទ្រព្យសុទ្ធចាប់ពី 30 លានដុល្លារអាម៉េរិក។

អ្នកមាននៅទ្វីបអាស៊ីមានចំនួនច្រើនជាងទ្វីបអឺរ៉ុប ជាទីដែលមានអ្នកមានតែ 100,850 នាក់ ថយចុះជាង 7% ធៀបនឹងឆ្នាំ 2021។ យោងតាមរបាយការណ៍ ចំនួនអ្នកមាននៅអាស៊ីបានកើនលើសទ្វីបអឺរ៉ុបជាលើកដំបូងកាលពីឆ្នាំ 2019។ មកដល់ឆ្នាំ 2022 ក្រុមអ្នកមាននៅអាស៊ីមានទ្រព្យសរុប 12,130,000,000,000 (12.13 ទ្រីលាន) ដុល្លារអាម៉េរិក ខណៈអឺរ៉ុបមាន 11.73 ទ្រីលានដុល្លារ។

ចំនួនអ្នកមាននៅអាស៊ីត្រូវបានព្យាករថា នឹងកើនឡើងបន្តទៀតក្នុងរយៈពេល 5 ឆ្នាំខាងមុខ។ ប្រការនេះកើតឡើងដោយសារតែសេដ្ឋកិច្ចរបស់ឥណ្ឌា ក៏ដូចជាបណ្ដាក្រុមហ៊ុនដែលពង្រីកខ្លួនចេញផុតពីទីផ្សារចិនទៅកាន់ទីផ្សារដទៃក្នុងតំបន់៕

September 13, 2023

ប្រទេសចិនក្លាយជាអ្នកនាំចេញរថយន្តធំជាងគេលើពិភពលោក

ក្នុង 6 ខែដើមឆ្នាំនេះ ប្រទេសចិនបាននាំចេញរថយន្តជាង 2.3 លានគ្រឿង ច្រើនជាងជប៉ុន និងក្លាយជាប្រទេសដែលនាំចេញរថយន្តច្រើនជាងគេបង្អស់លើពិភពលោក។

ក្នុងការធ្វើបច្ចុប្បន្នភាពនៃស្ថានភាពនាំចេញរថយន្ត សមាគមនៃបណ្ដាក្រុមហ៊ុននាំចេញរថយន្តនៅប្រទេសចិន បានដកស្រង់ទិន្នន័យពីអគ្គនាយកដ្ឋានគយរបស់ប្រទេសនេះ ឱ្យដឹងថា ក្នុងរយៈពេល 6 ខែដើមឆ្នាំ 2023 ប្រទេសចិនបាននាំចេញរថយន្តចំនួន 2.34 លានគ្រឿង កើន 76.9% បើធៀបនឹងដំណាក់កាលដូចគ្នាក្នុងឆ្នាំ 2022។

ដោយឡែក យោងតាមទិន្នន័យដែលបានប្រកាសដោយសមាគមនៃបណ្ដាក្រុមហ៊ុននាំចេញរថយន្តជប៉ុន តួលេខរថយន្តដែលបាននាំចេញរបស់ប្រទេសនេះក្នុងឆមាសទីមួយនៃឆ្នាំ 2023 មាន 2.02 លានគ្រឿង កើន 17% បើធៀបនឹងឆមាសទីមួយឆ្នាំ 2022។

នេះគឺជាលើកដំបូងហើយដែលតួលេខនៃការនាំចេញរថយន្តក្នុង 6 ខែដើមឆ្នាំ 2023 របស់ប្រទេសចិន មានចំនួនច្រើនជាងជប៉ុន និងឈរលំដាប់ទីមួយលើពិភពលោក។

ទិន្នន័យខាងលើក៏បានឱ្យដឹងថា មានមូលហេតុសំខាន់ពីរដែលធ្វើឱ្យការនាំចេញរថយន្តរបស់ប្រទេសចិនកើនឡើងខ្ពស់ខ្លាំងក្នុងឆ្នាំនេះ នោះគឺចំនួនរថយន្តដំណើរការដោយប្រេងសាំងដែលនាំចេញទៅកាន់ប្រទេសរុស្ស៊ីបានកើនឡើងគួរឱ្យចាប់អារម្មណ៍។ ទន្ទឹមនឹងនេះ រថយន្តអគ្គិសនីក៏ត្រូវបាននាំចេញទៅកាន់ទីផ្សារអឺរ៉ុប និងទីផ្សារអាស៊ីអាគ្នេយ៍ កាន់តែច្រើន៕

September 11, 2023

ជប៉ុនបាញ់បង្ហោះស្ថានីយចុះចតលើឋានព្រះចន្ទ

យានអវកាស SLIM នឹងហោះដល់គន្លងតារាវិថីព្រះចន្ទនៅក្នុងរយៈពេលពី 3 ទៅ 4 ខែទៀត រួចក៏នឹងចុះចតខាងក្នុងមាត់រណ្ដៅមួយដែលមានទំហំ 300 ម៉ែត្រ។

រ៉ុក្កែត H-2A របស់ជប៉ុន ដឹកស្ថានីយចុះចត SLIM និងតេឡេស្កុបអវកាស XRISM ហោះឡើងពីមជ្ឈមណ្ឌលអវកាស Tanegashima កាលពីម៉ោង 6 និង 42 នាទី ថ្ងៃទី 6 កញ្ញា (ពេលវេលានៅកម្ពុជា) យឺតជាង 10 ថ្ងៃ បើធៀបនឹងផែនការដំបូង ដោយសារតែបញ្ហាអាកាសធាតុ។

យានអវកាសទាំងពីរគ្រឿងបានហោះហោះដូចការគ្រោងទុក បន្ទាប់ពីត្រូវបានបាញ់បង្ហោះជិតមួយម៉ោង។ បើសិនជាគ្រប់យ៉ាងដំណើរការរលូត តែប៉ុន្មានខែទៀតប៉ុណ្ណោះ SLIM (ស្ថានីយស្រាវជ្រាវព្រះចន្ទឆ្លាតវៃ) នឹងរកវិធីចុះចតលើផ្ទៃព្រះចន្ទជាលើកដំបូង ដើម្បីបើកផ្លូវសម្រាប់បេសកកម្មប្រកបដោយមហិច្ឆតាជាច្រើនផ្សេងទៀត។

យោងតាមអង្គការស្រាវជ្រាវអវកាសជប៉ុន (JAXA) ស្ថានីយ SLIM ឆ្ពោះទៅរកការធ្វើតេស្តប្រព័ន្ធស្រាវជ្រាវស្រាលក្នុងទ្រង់ទ្រាយតូច និងប្រើប្រាស់បច្ចេកវិទ្យាចុះចតប្រកបដោយភាពសុក្រឹតចាំបាច់សម្រាប់យានអវកាសចុះចតលើឋានព្រះចន្ទក្នុងពេលអនាគត។

SLIM គឺជាយានអវកាសខ្នាតតូច មានកម្ពស់ 2.4 ម៉ែត្រ, បណ្ដោយ 2.7 ម៉ែត្រ និងទទឹង 1.7 ម៉ែត្រ។ នៅពេលហោះឡើង យាននេះមានទម្ងន់ 700 គីឡូក្រាម ក្នុងនោះ ឥន្ធនៈមានរហូតដល់ 70% នៃទម្ងន់សរុប។ SLIM នឹងហោះទៅតាមគន្លងវែងឆ្ងាយដែលសន្សំសំចៃឥន្ធនៈ ហើយគ្រោងនឹងទៅដល់គន្លងតារាវិថីព្រះចន្ទនៅ 3 ឬ 4 ខែទៀត។ យានអវកាសនេះនឹងសង្កេតមើលផ្ទៃព្រះចន្ទក្នុងមួយខែ មុននឹងបន្តចុះចតខាងក្នុងមាត់រណ្ដៅអាចម៍ផ្កាយ Shioli Crater ទំហំ 300 ម៉ែត្រ ដើម្បីធ្វើតេស្តបច្ចេកវិទ្យាចុះចត។

SLIM ក៏នាំយកយានស្រាវជ្រាវខ្នាតតូចពីរគ្រឿង ដែលគ្រោងនឹងត្រូវបានដាក់ពង្រាយលើផ្ទៃព្រះចន្ទ បន្ទាប់ពីបានចុះចត។ យានខ្នាតតូចមួយគូនេះនឹងជួយក្រុមអ្នកបច្ចេកទេសលើផែនដីអាចតាមដានស្ថានភាពរបស់យានចុះចត SLIM និងថតរូបតំបន់ចុះចត ក៏ដូចជាផ្ដល់ប្រព័ន្ធទំនាក់ទំនងផ្ទាល់ជាមួយនឹងផែនដី។

មុននោះ ស្ថានីយចុះចត Hakuto-R របស់ក្រុមហ៊ុនឯកជន Hakuto-R នៅតូក្យូ ក៏បានហោះដល់គន្លងតារាវិថីព្រះចន្ទ ប៉ុន្តែបានធ្លាក់បុកដីកាលពីខែមេសាឆ្នាំកន្លង។ ដូច្នេះ ជោគជ័យរបស់ SLIM នឹងជាប្រវត្តិសាស្ត្រដ៏សំខាន់មួយ។ គិតមកដល់បច្ចុប្បន្ន លើពិភពលោកមានតែបួនប្រទេសប៉ុណ្ណោះដែលធ្លាប់បានបញ្ជូនយានអវកាសទៅស្រាវជ្រាវឋានព្រះចន្ទ នោះគឺ សូវៀត អាម៉េរិក ចិន និងឥណ្ឌា។

ក្រៅពី SLIM រ៉ុក្កែតរុញច្រាន H-2A ក៏ដឹកឡេស្កុបអវកាស XRISM (បេសកកម្មថតរូបដែលបំពាក់បច្ចេកវិទ្យាកាំរស្មីអ៊ិច (X)) ដែលជាគម្រោងសហការរវាងទីភ្នាក់ងារអវកាសជប៉ុន អាម៉េរិក និងអឺរ៉ុប នឹងធ្វើសកម្មភាពនៅក្នុងគន្លងតារាវិថីកម្រិតទាបរបស់ផែនដី។ តេឡេស្កុបនេះនឹងស្រាវជ្រាវចក្រវាលតាមរយៈកាំរស្មីអ៊ិចថាមពលខ្ពស់ក្នុងទីអវកាស៕

September 7, 2023

ជាងពីរឆ្នាំទៀត អូស្ត្រាលីនឹងបញ្ជូនយានទៅចុះចតលើឋានព្រះចន្ទ

ទីភ្នាក់ងារអវកាសអូស្ត្រាលី កាលពីថ្ងៃទី 05 កញ្ញា បានប្រកាសថា ប្រទេសនេះមានគម្រោងបញ្ជូនរ៉ូបូតដំបូងរបស់ខ្លួនទៅកាន់ឋានព្រះចន្ទ តាមរយៈបេសកកម្ម Artemis របស់អាម៉េរិក នៅប៉ុន្មានឆ្នាំខាងមុខ។

«ដោយការប្រើប្រាស់បច្ចេកវិទ្យាគ្រប់គ្រងពីចម្ងាយលំដាប់កំពូលលើពិភពលោករបស់អូស្ត្រាលី រ៉ូបូតស្វ័យប្រវត្តនឹងចាប់យកសំណាកដី ថ្មរបស់ព្រះចន្ទ ដែលហៅថា regolith។ ណាសានឹងប្រឹងប្រែងចម្រាញ់អុកស៊ីសែនពីសំណាកដី។ នេះគឺជាជំហានសំខាន់មួយឆ្ពោះទៅកាន់ការបង្កើតវត្តមានយូរអង្វែងរបស់មនុស្សនៅលើឋានព្រះចន្ទ» ទីភ្នាក់ងារអវកាសអូស្ត្រាលី (ASA) ឱ្យដឹងដូច្នេះ។

រ៉ូបូតមិនទាន់មានឈ្មោះ ខណៈ ASA កំពុងបង្កើតកម្មវិធីប្រឡងមួយដើម្បីដាក់ឈ្មោះឱ្យរ៉ូបូតនេះ។ ពលរដ្ឋនៅអូស្ត្រាលីអាចចូលរួមការប្រឡងដែលនឹងផុតកំណត់នៅថ្ងៃទី 20 តុលាខាងមុខ។ ASA នឹងជ្រើសរើសឈ្មោះចំនួនបួន រួចហើយបើកឱ្យមានការជ្រើសរើសជាសាធារណៈ។ ឈ្មោះដែលបានឈ្នះការប្រកួតនឹងត្រូវបានប្រកាសនៅដើមខែធ្នូ 2023។ ឈ្មោះនេះនឹងត្រូវដាក់ឱ្យរ៉ូបូតរបស់អូស្ត្រាលីដែលធ្វើដំណើរទៅតាមយានអវកាសរបស់ណាសាក្នុងបេសកម្ម Artemis ដែលនឹងចុះចតលើឋានព្រះចន្ទនៅឆ្នាំ 2026។

ណាសាកំពុងប្រឹងប្រែងដើម្បីបង្កើតវត្តមានយូរអង្វែងរបស់មនុស្សនៅលើ និងជុំវិញឋានព្រះចន្ទនៅចុងទសវត្សរ៍ឆ្នាំ 2020 តាមរយៈកម្មវិធី Artemis។ ចំណេះដឹង និងសមត្ថភាពដែលប្រមូលបានពីកម្មវិធីនេះនឹងជួយឱ្យមនុស្សបោះជំហានទៅរកគោលដៅ «ហោះ» ទៅកាន់ភពអង្គារ។

Artemis 3 នឹងនាំអ្នកអវកាសចុះចតក្បែរប៉ូលខាងត្បូងរបស់ព្រះចន្ទនៅចុងឆ្នាំ 2025 ឬ 2026

គិតមកដល់ពេលនេះ ណាសាបានអនុវត្តដោយជោគជ័យនូវបេសកកម្មមួយនៅក្នុងកម្មវិធី Artemis នោះគឺ Artemis 1។ ក្នុងបេសកកម្មនេះ យាន Orion គ្មានមនុស្សបានហោះទៅកាន់គន្លងតារាវិថីព្រះចន្ទ និងត្រលប់មកកាន់ផែនដីក្នុងឆ្នាំ 2022។ ណាសាកំពុងត្រៀមសម្រាប់បេសកកម្ម Artemis 2 ដែលគ្រោងនឹងនាំអវកាសចរ 4 រូប ហោះទៅគោចរជុំវិញព្រះចន្ទនៅឆ្នាំ 2024។ Artemis 3 នឹងនាំអ្នកអវកាសចុះចតក្បែរប៉ូលខាងត្បូងរបស់ព្រះចន្ទនៅចុងឆ្នាំ 2025 ឬ 2026 បើសិនគ្រប់យ៉ាងដំណើរការដោយរលូន។

ណាសាកំពុងប្រើប្រាស់ទំនាក់ទំនងពាណិជ្ជកម្ម និងអន្តរជាតិដើម្បីសម្រេចបានគោលដៅប្រកបដោយមហិច្ឆតារបស់ Artemis ។ ដៃគូសហការរបស់ណាសាសម្រាប់គម្រោង Artemis រួមមានជាអាទិ៍ ទីភ្នាក់ងារអវកាសអឺរ៉ុប (ESA), អូស្ត្រាលី, SpaceX ។ល។

September 6, 2023

យានអវកាស SpaceX ដឹកអ្នកអវកាសបួនរូបចុះចតលើសមុទ្រដោយសុវត្ថិភាព

យាន Dragon បានចុះចតដោយជោគជ័យលើតំបន់សមុទ្រ Jacksonville រដ្ឋ Florida សហរដ្ឋអាម៉េរិក កាលពីព្រឹកម្សិលមិញ។

យានអវកាស Dragon ដឹកក្រុមអវកាសចរ Crew-6 ដែលរួមមាន Stephen Bowen និង Warren “Woody” Hoburg (អាម៉េរិក), Sultan AlNeyadi (អេមីរ៉ាតអារ៉ាប់រួម), Andrey Fedyaev (រុស្ស៊ី) បានចុះចតលើមហាសមុទ្រអាត្លង់ទិក នៅវេលាម៉ោង 11 និង 17 នាទី ថ្ងៃទី 04 កញ្ញា (ពេលវេលានៅកម្ពុជា)។

«យើងបានចេញដើរក្នុងអវកាសបីលើក ជួយយានដឹកទំនិញ Cygnus មួយគ្រឿងចូលចតនៅស្ថានីយអវកាសអន្តរជាតិ (ISS)។ យើងក៏ធ្វើកិច្ចការថែទាំជាច្រើនទៀត ហើយសង្ឃឹមថា ពេលយើងចាកចេញ ស្ថានីយនឹងប្រសើរឡើងមុនបន្តិចធៀបនឹងកាលពីពេលទើបមក» Warren ថ្លែងដូច្នេះ។

យាន Dragon បានផ្ដាច់ចេញពី ISS កាលពីវេលាម៉ោង 16 និង 05 នាទី ថ្ងៃទី 03 កញ្ញា។ ការវិលត្រលប់របស់ក្រុម Crew-6 នេះ ក៏បានបញ្ចប់បេសកកម្មអវកាស 186 ថ្ងៃរបស់ពួកគេ។ កប៉ាល់របស់ SpaceX ដែលត្រូវបានដាក់ពង្រាយនៅក្បែរទីតាំងចុះចត បាននាំយកយានអវកាស រួមនឹងអវកាសចរឡើងគោកដោយសុវត្ថិភាព។

ក្រោយពីក្រុម Crew-6 ត្រលប់មកកាន់ផែនដី លើ ISS នៅសល់អវកាសចរ 7 នាក់ រួមមាន អ្នកអវកាសរបស់អាម៉េរិក អឺរ៉ុប ជប៉ុន និងរុស្ស៊ី។ យាន Soyuz MS-23 របស់រុស្ស៊ីគ្រោងនឹងដឹកអ្នកអវកាស 3 រូប ត្រលប់មកកាន់ផែនដីនៅចុងខែកញ្ញា 2023៕

September 5, 2023

បេសកកម្មស្រាវជ្រាវព្រះអាទិត្យដំបូងរបស់ឥណ្ឌានឹងចាប់ផ្ដើមពីថ្ងៃស្អែក

បេសកកម្មស្រាវជ្រាវព្រះអាទិត្យត្រូវបានធ្វើឡើងភ្លាមៗបន្ទាប់ពីជើងហោះហើរទៅចុះចតលើឋានព្រះចន្ទរបស់ឥណ្ឌាបានទទួលជោគជ័យ។ ស្ថានីយសង្កេត Aditya-L1 ត្រូវបានដឹកទៅដល់ទីតាំងបាញ់បង្ហោះលើកោះ Sriharikota នៅលើឆ្នេរសមុទ្រភាគខាងកើតនៃប្រទេសឥណ្ឌា ហើយនឹងបាញ់បង្ហោះនៅថ្ងៃទី 02 ខែកញ្ញា ឆ្នាំ 2023។

អង្គការស្រាវជ្រាវអវកាសឥណ្ឌា (ISRO) បានប្រកាសអំពីថ្ងៃបាញ់បង្ហោះខាងលើនៅលើ Twitter ក្រោយពីបានចែករំលែករូបថតមួយចំនួនស្ដីពីយានអវកាស Aditya-L1 (Aditya ក្នុងភាសាសំស្ក្រឹតមានន័យថា ព្រះអាទិត្យ) កាលពីថ្ងៃទី 13 សីហា។

ក្រុមអ្នកវិទ្យាសាស្ត្របានដឹងតិចតួចអំពីអ្វីដែលបាន និងកំពុងកើតឡើងនៅលើព្រះអាទិត្យ មុនពេលវាបញ្ចេញពន្លឺ និងពពកប្លាស្មាដ៏មហិមាទៅកាន់ទីអវកាស។ល។ សហគមន៍អ្នកស្រាវជ្រាវសង្ឃឹមថា Aditya-L1 នឹងផ្ដល់តម្រុយអំពីអាថ៌កំបាំងនានានៅលើព្រះអាទិត្យ។

យាន Aditya-L1 គ្រោងនឹងហោះឡើងជាមួយនឹងរ៉ុក្កែតមួយគ្រឿងដែលនឹងនាំវាទៅកាន់គន្លងគោចរស្ថិរភាពនៅជុំវិញផែនដី មុននឹងហោះសំដៅទីតាំងក្នុងអវកាសដែលមានចម្ងាយពីផែនដីប្រហែល 1.5 លានគីឡូម៉ែត្រ ជាទីដែលពុំមានឧបសគ្គសម្រាប់ចក្ខុវិស័យរបស់យានពេលសង្កេតមើលព្រះអាទិត្យ។ តំបន់នេះត្រូវបានហៅថា ចំណុច Lagrange ផែនដី-ព្រះអាទិត្យ 1 ឬ L1 ហើយវាក៏ជាកន្លែងដែលមានយានស្រាវជ្រាវព្រះអាទិត្យរបស់អាម៉េរិក-អឺរ៉ុប ដែលបានដំណើរការតាំងពីឆ្នាំ 1996 ផងដែរ។

ស្ថានីយ Aditya-L1 មានតម្លៃ 45 លានដុល្លារអាម៉េរិក និងត្រូវបានអភិវឌ្ឍក្នុងរយៈពេល 15 ឆ្នាំ។ Aditya-L1 គឺជាគម្រោងបាញ់បង្ហោះសំខាន់ទីពីររបស់ឥណ្ឌានៅក្នុងឆ្នាំ 2023 នេះ។ មុននោះ យានអវកាស Chandrayaan-3 បានចុះចតលើឋានព្រះចន្ទដោយជោគជ័យកាលពីថ្ងៃទី 23 សីហា 2023 នាំឱ្យឥណ្ឌាបានក្លាយជាប្រទេសដំបូងគេដែលមានយានចុះចតនៅប៉ូលខាងត្បូងរបស់ឋានរណបមួយនេះ៕

September 1, 2023

ជប៉ុនពន្យារពេលបញ្ជូនយានអវកាសទៅចុះចតលើឋានព្រះចន្ទ

ព្រឹកថ្ងៃទី 28 សីហានេះ Mitsubishi Heavy Industries Ltd (MHI) ដែលជាក្រុមហ៊ុនបុត្រសម្ព័ន្ធរបស់ Mitsubishi បានប្រកាសពន្យារពេលការបាញ់បង្ហោះរ៉ុក្កែត H2A ដែលនាំយានអវកាសរបស់ប្រទេសជប៉ុនទៅចុះចតលើឋានព្រះចន្ទ ដោយសារតែមានខ្យល់ខ្លាំងនៅទីតាំងបាញ់បង្ហោះ។

តាមផែនការដំបូង នៅម៉ោង 9 និង 26 នាទីព្រឹកថ្ងៃនេះ (ម៉ោងក្នុងស្រុក) រ៉ុក្កែត H2A ដែលផលិតដោយជប៉ុន នឹងហោះឡើងពីមជ្ឈមណ្ឌលអវកាស Tanegashima ដែលស្ថិតនៅលើកោះ Tanegashima ក្នុងខេត្ត Kagoshima ភាគនិរតីប្រទេសជប៉ុន។

រ៉ុក្កែតនេះនាំយកយានចុះចតលើឋានព្រះចន្ទ SLIM ដែលអភិវឌ្ឍដោយទីភ្នាក់ងារអវកាសជប៉ុន (JAXA)។ យាន SLIM នឹងធ្វើតេស្តបច្ចេកវិទ្យាចុះចតនៅលើឋានព្រះចន្ទ។ តាមគម្រោង SLIM នឹងហោះដល់គន្លងគោចរជុំវិញព្រះចន្ទ បន្ទាប់ពីចាកចេញពីប្រព័ន្ធទម្របានប្រហែលពី 3 ទៅ 4 ខែ ហើយអាចចុះចតលើឋានព្រះចន្ទនៅ 4 ឬ 6 ខែទៀត។ ផ្កាយរណប XRISM ដែលសហការផលិតដោយទីភ្នាក់ងារអវកាសជប៉ុនចាសា (JAXA), ណាសារបស់អាម៉េរិក និងអ៊ីសារបស់អឺរ៉ុប និងមានជំនាញខាងថតរូបកាំរស្មី X ក៏នឹងហោះហើរតាមរ៉ុក្កែតខាងលើ ដើម្បីស្រាវជ្រាវលើការវិវត្តរបស់ចក្រវាល។

ស្ថានីយចុះចត SLIM ដែលមានរ៉ូបូតស្វ័យប្រវត្តមួយគ្រឿងមានទំហំប៉ុនបាតដៃ និងអាចផ្លាស់ប្ដូររូបរាង នឹងមានតួនាទីស្វែងយល់អំពីដំណើរការកកើតរបស់ព្រះចន្ទ។

កាលពីខែវិច្ឆិកា 2022 ជប៉ុនបានប្រឹងប្រែងបញ្ជូនយាន Omotenashi ដែលហោះជាមួយនឹងយាន Artemis 1 របស់ណាសា ដើម្បីចុះចតលើឋានព្រះចន្ទ ប៉ុន្តែបានដាច់ទំនាក់ទំនង និងបរាជ័យ។ កាលពីខែមេសា 2023 ក្រុមហ៊ុនជប៉ុន Ispace ក៏បានបរាជ័យក្នុងមហិច្ឆតាក្លាយជាក្រុមហ៊ុនឯកជនដំបូងគេដែលនាំយានទៅចុះចតលើឋានព្រះចន្ទផងដែរ។

មូលហេតុនៃការបរាជ័យក្នុងបេសកកម្មអវកាសរបស់ជប៉ុននាពេលកន្លងត្រូវបានគេជឿថា កើតឡើងដោយសារបញ្ហារ៉ុក្កែត ក្នុងនោះមានជាអាទិ៍ រ៉ុក្កែត Epsilon បរាជ័យកាលពីខែតុលា 2022 និង រ៉ុក្កែត H3 បរាជ័យកាលពីខែមីនា 2023។ ការសាកល្បងរ៉ុក្កែត Epsilon S កាលពីខែកន្លង ក៏បានបញ្ចប់ដោយហេតុការណ៍ផ្ទុះ បន្ទាប់ពីការបញ្ឆេះម៉ាស៊ីនបាន 50 វិនាទី៕

August 28, 2023

SpaceX នាំអ្នកអវកាសអន្តរជាតិឡើងទៅកាន់ស្ថានីយ ISS

រ៉ុក្កែត Falcon 9 នាំយាន Crew Dragon ដែលដឹកអវកាសចរ 4 នាក់ក្នុងបេសកកម្ម Crew-7 ពីមជ្ឈមណ្ឌលអវកាស Kennedy នៅវេលាម៉ោង 14 និង 27 នាទី ថ្ងៃទី 26 សីហា (ម៉ោងនៅកម្ពុជា)។

កំណាត់ដំបូងរបស់ Falcon 9 បានផ្ដាច់ខ្លួនពីកំណាត់ខាងលើបន្ទាប់ពីហោះឡើងបានប្រហែល 2 នាទី និង 40 វិនាទី មុនពេលបញ្ឆេះម៉ាស៊ីនហោះត្រលប់មកកាន់ផែនដី។ ប្រហែល 7.5 នាទីក្រោយការបាញ់បង្ហោះ កំណាត់ទីមួយក៏បានចុះចតនៅមូលដ្ឋាននៃកងកម្លាំងអវកាស Cape Canaveral ដែលនៅក្បែរមជ្ឈមណ្ឌលអវកាស Kennedy។

នេះគឺជាការបាញ់បង្ហោះ និងចុះចតដំបូងរបស់រ៉ុក្កែត Falcon 9 គ្រាដែលយាន Crew Dragon មានបទពិសោធន៍ច្រើនជាងក្នុងការនាំអវកាសចរឡើងទៅកាន់ស្ថានីយអវកាសអន្តរជាតិ (ISS) ក្នុងបេសកកម្ម Crew-3 និង Crew-5 របស់ SpaceX។

នេះក៏ជាជើងហោះហើរនាំយកក្រុមអវកាសចរមានលក្ខណៈអន្តរជាតិបំផុតដែល SpaceX ធ្លាប់ធ្វើឡើង។ អ្នកអវកាស 4 រូបតំណាងឱ្យទីភ្នាក់ងារអវកាសផ្សេងៗគ្នាចំនួន 4 ស្ថាប័ន។ ប្រធានបេសកកម្ម Crew-7 គឺជាអ្នកអវកាសរបស់ណាសា អ្នកស្រី Jasmin Moghbeli។ នេះគឺជាជើងហោះហើរទៅកាន់អវកាសលើកដំបូងរបស់ Moghbeli។ អ្នកស្រីគឺជាពលរដ្ឋអាម៉េរិកដើមកំណើតអ៊ីរ៉ង់ទីពីរដែលបានហោះទៅទីអវកាស បន្ទាប់ពី Anousheh Ansari។

សមាជិក 3 រូបផ្សេងទៀតរបស់ក្រុមហោះហើរ Crew-7 រួមមាន Andreas Mogensen ដែលជាអ្នកអវកាសជនជាតិដាណឺម៉ាក មកពីទីភ្នាក់ងារអវកាសអឺរ៉ុប (ESA), Satoshi Furukawa របស់ទីភ្នាក់ងារអវកាសជប៉ុន (JAXA) និង Konstantin Borisov មកពី Roscosmos របស់រុស្ស៊ី។

Crew-7 គឺជាបេសកកម្មមានអវកាសចរលើកទី ៨ ដែល SpaceX អនុវត្តឱ្យណាសា និងជាបេសកកម្មមានអ្នកអវកាសលើកទី 11 របស់ក្រុមហ៊ុន SpaceX។

អ្នកអវកាស 4 រូបរបស់ Crew-7 ឡើងដល់ ISS វេលាម៉ោង 19 និង 50 នាទី ក្នុងថ្ងៃបាញ់បង្ហោះ ហើយក្រោយមកនឹងចាប់ផ្ដើមធ្វើការលើស្ថានីយអវកាសអន្តរជាតិរយៈពេល 6 ខែ។ ប្រហែល 5 ថ្ងៃបន្ទាប់ពី Crew-7 ឡើងដល់ ISS ក្រុម Crew-6 នឹងចាកចេញពីស្ថានីយនេះដើម្បីត្រលប់មកកាន់ផែនដី៕

August 28, 2023

ជប៉ុនបាញ់បញ្ជូនយានទៅចុះចតលើឋានព្រះចន្ទឆាប់ៗនេះ

ទីភ្នាក់ងារស្រាវជ្រាវអវកាសជប៉ុនបានឱ្យដឹងថា ការបាញ់បញ្ជូនយានអវកាសទៅចុះចតលើឋានព្រះចន្ទ នឹងធ្វើឡើងនៅថ្ងៃទី 28 សីហា 2023 យឺតជាងមួយថ្ងៃបើធៀបនឹងកាលបរិច្ឆេទដំបូង ដោយសារតែអាកាសធាតុមិនអំណោយផល។

តាមផែនការ រ៉ុក្កែត H2-A នឹងនាំយកស្ថានីយចុះចតឆ្លាតវៃស្រាវជ្រាវព្រះចន្ទ (SLIM) និងផ្កាយរណប X-Ray Imaging and Spectroscopy Mission (SRISM) ឡើងទៅកាន់ទីអវកាស ដោយត្រូវបាញ់បង្ហោះពី Tanegashima នៅភាគខាងត្បូងប្រទេសជប៉ុន ក្នុងថ្ងៃទី 28 សីហា។ ស្ថានីយ SLIM គ្រោងនឹងចុះចតលើឋានព្រះចន្ទនៅ 4 ឬ 6 ខែទៀត។ ចំណែកផ្កាយរណប XRISM ដែលជំនាញខាងថតរូបកាំរស្មី X និងសហការផលិតដោយទីភ្នាក់ងារអវកាសជប៉ុនចាសា (JAXA), ណាសារបស់អាម៉េរិក និងអ៊ីសារបស់អឺរ៉ុប នឹងដើរតួជាអ្នកស្រាវជ្រាវលើការវិវត្តរបស់ចក្រវាល។

កម្មវិធីអវកាសរបស់ជប៉ុនគឺជាមួយក្នុងចំណោមកម្មវិធីអវកាសធំជាងគេលើពិភពលោក ប៉ុន្តែការប្រឹងប្រែងដំបូងក្នុងការបញ្ជូនយានទៅចុះចតលើឋានព្រះចន្ទកាលពីខែវិច្ឆិកា 2022 បានបរាជ័យ។ ក្ដីសង្ឃឹមរបស់ចាសា នាបច្ចុប្បន្ន គឺការផ្ដោតទៅលើ SLIM។ ស្ថានីយចុះចតថ្មីនេះ តូច ស្រាលជាងមុន និងមានកម្ពស់ 2.4 ម៉ែត្រ បណ្ដោយ 1.7 ម៉ែត្រ ទទឹង 2.7 ម៉ែត្រ និងទម្ងន់ប្រហែល 700 គីឡូក្រាម។

ស្ថានីយចុះចត SLIM ដែលមានរ៉ូបូតស្វ័យប្រវត្តមួយគ្រឿងមានទំហំប៉ុនបាតដៃ និងអាចផ្លាស់ប្ដូររូបរាង នឹងមានតួនាទីស្វែងយល់អំពីដំណើរការកកើតរបស់ព្រះចន្ទ។

កាលពីខែវិច្ឆិកា 2022 ជប៉ុនបានប្រឹងប្រែងបញ្ជូនយាន Omotenashi ដែលហោះជាមួយនឹងយាន Artemis 1 របស់ណាសា ដើម្បីចុះចតលើឋានព្រះចន្ទ ប៉ុន្តែបានដាច់ទំនាក់ទំនង និងបរាជ័យ។ កាលពីខែមេសា 2023 ក្រុមហ៊ុនជប៉ុន Ispace ក៏បានបរាជ័យក្នុងមហិច្ឆតាក្លាយជាក្រុមហ៊ុនឯកជនដំបូងគេដែលនាំយានទៅចុះចតលើឋានព្រះចន្ទផងដែរ។

មូលហេតុនៃការបរាជ័យក្នុងបេសកកម្មអវកាសរបស់ជប៉ុននាពេលកន្លងត្រូវបានគេជឿថា កើតឡើងដោយសារបញ្ហារ៉ុក្កែត ក្នុងនោះមានជាអាទិ៍ រ៉ុក្កែត Epsilon បរាជ័យកាលពីខែតុលា 2022 និង រ៉ុក្កែត H3 បរាជ័យកាលពីខែមីនា 2023។ ការសាកល្បងរ៉ុក្កែត Epsilon S កាលពីខែកន្លង ក៏បានបញ្ចប់ដោយហេតុការណ៍ផ្ទុះ បន្ទាប់ពីការបញ្ឆេះម៉ាស៊ីនបាន 50 វិនាទី៕

August 26, 2023

Tag: អឺរ៉ុប