សមុទ្រ - La Reine Media

នាវាអគ្គិសនីបំពាក់ក្ដោងសូឡាខ្នាតធំ អាចដឹកអ្នកដំណើរបាន 500 នាក់

(ន័រវែស) – ក្រុមហ៊ុន Hurtigruten បង្ហាញនាវាអគ្គិសនីដឹកអ្នកដំណើរមានក្ដោងសូឡាដែលអាចបង្រួមបាន និងគ្រោងដាក់ដំណើរការនៅឆ្នាំ 2030។

ក្រុមហ៊ុនខាងលើ បច្ចុប្បន្នមានក្រុមនាវាចំនួន 8 គ្រឿង ក្នុងនោះ មួយគ្រឿងៗអាចដឹកអ្នកដំណើរបាន 500 នាក់ ដែលផ្លាស់ទីតាមបណ្ដោយឆ្នេរសមុទ្រន័រវែស ចាប់ពី Oslo ដល់តំបន់ប៉ូលខាងជើង។

គម្រោងមានឈ្មោះថា «Sea Zero» ដែលត្រូវបានប្រកាសលើកដំបូងកាលពីឆ្នាំ 2022 ត្រូវបានរំពឹងថា អាចរួមចំណែកក្នុងការបំផុសគំនិត និងជំរុញឱ្យមានយានយន្តមិនបំភាយឧស្ម័ននៅក្នុងវិស័យដឹកជញ្ជូនផ្លូវទឹកទាំងមូល។

នាវាដឹកអ្នកដំណើររបស់ Hurtigruten នឹងដំណើរការដោយថ្ម 60 មេហ្គាវ៉ាត់ អាចបញ្ចូលថាមពលស្អាតនៅឯកំពង់ផែ ដោយសារថាមពលមិនបំភាយឧស្ម័ននេះកំពុងគ្របដណ្ដប់ 98% នៅក្នុងបណ្ដាញអគ្គិសនីរបស់ប្រទេសន័រវែស។

ក្រុមហ៊ុនខាងលើឱ្យដឹងថា ថ្មផ្ទុកអគ្គិសនីរបស់នាវានេះអាចឱ្យធ្វើដំណើរបានពី 555 ដល់ 648 គីឡូម៉ែត្រ គ្រាដែលក្ដោងរបស់វាបំពាក់ផ្ទាំងសូឡាសរុប 1,500 ម៉ែត្រក្រឡា ក៏អាចជួយបន្ថែមអគ្គិសនីបានច្រើនដល់នាវា។

យោងតាម CNN នាវាដែលនឹងមានកាប៊ីនចំនួន 270 អាចដាក់អ្នកដំណើរបាន 500 នាក់ និងក្រុមនាវិក 99 នាក់មួយនេះ នឹងត្រូវបានចាប់ផ្ដើមការផលិតនៅឆ្នាំ 2027 ហើយគ្រោងនឹងដាក់ឱ្យដំណើរការពាណិជ្ជកម្មចាប់ពីឆ្នាំ 2030៕

June 9, 2023

ផ្ទាំងទឹកកកធំជាងគេបង្អស់លើពិភពលោកបែកបាក់រលាយខ្ទេចខ្ទី

រូបភាពពីផ្កាយរណបរបស់ណាសា កាលពីចុងខែឧសភាបានបង្ហាញថា A-76A ដែលជាផ្ទាំងទឹកកកធំជាងទីក្រុង Los Angeles ពីរដង បានបែកបាក់ខ្ទេចខ្ទីនៅក្បែរកោះ Georgia ខាងត្បូង របស់ចក្រភពអង់គ្លេស។

A-76A គឺជាផ្ទាំងធំជាងគេដែលនៅសល់របស់ A-76 ដែលជាផ្ទាំងទឹកកកមានទំហំប្រហែល 4,320 គីឡូម៉ែត្រការ៉េ និងមានបណ្ដោយ 170 គីឡូម៉ែត្រ ទទឹង 25 គូឡូម៉ែត្រ ដែលបានបែកចេញពីខឿននៃផ្ទាំងទឹកកក Ronne របស់ទ្វីបអង់តាកតិច កាលពីខែឧសភា 2021។

កាលពីថ្ងៃទី 24 ឧសភា 2023 ផ្កាយរណប Terra របស់ណាសាថតរូបភាពថ្មីបំផុតអំពីបំណែកទាំង 6 របស់ A-76A ដែលកំពុងអណ្ដែតចេញឆ្ងាយពីគ្នានៅក្បែរកោះ Georgia ខាងត្បូង ក្នុងសមុទ្រ Scotia ដែលនេះមានន័យថា ផ្ទាំងទឹកកកខ្នាតយក្សនេះបានបែកពីគ្នាកាលពីច្រើនថ្ងៃមុនមកហើយ។ បំណែកផ្ទាំងទឹកកកទាំងនេះមានចម្ងាយប្រហែល 2,415 គីឡូម៉ែត្រពីកន្លែងដែល A-76 បានបែកចេញពីទ្វីបអង់តាកតិចកាលពីឆ្នាំ 2021។

ផ្ទាំងទឹកកកអណ្ដែតធំជាងគេលើពិភពលោកនាពេលកន្លង គឺ A-68A ក៏បានបែកបាក់ខ្ទេចខ្ទីនៅក្បែរកោះ Georgia ខាងត្បូង កាលពីខែធ្នូ 2020 ក្រោយពីបានអណ្ដែតតាមឆកសមុទ្រ Drake។ A-76A មិនប៉ះទង្គិចផ្ទាល់ជាមួយនឹង Georgia ខាងត្បូង ប៉ុន្តែនៅតែអាចបង្កផលប៉ះពាល់ដល់ប្រព័ន្ធជីវចម្រុះក្នុងសមុទ្រនៅក្បែរនោះ។

កាលពីពាក់កណ្ដាលឆ្នាំ 2021 នៅពេល A-68A បានរលាយទាំងស្រុង ក្រុមអ្នកវិទ្យាសាស្ត្រគណនាឃើញថា វាបានបន្ថែមទឹកសាបប្រហែល 900 លានតោនចូលក្នុងសមុទ្រ ដែលភាគច្រើននៅតំបន់ក្បែរកោះ Georgia ខាងត្បូង។ ចំណែក A-76A វិញ ក៏នឹងបន្ថែមទឹកសាបយ៉ាងច្រើនទៅក្នុងតំបន់សមុទ្រក្បែរខាង និងប៉ះពាល់ដល់ប្រព័ន្ធអាហារនៅក្នុងសមុទ្រ បើសិនជាវាបានរលាយអស់។ នេះបើយោងតាមការចុះផ្សាយរបស់ទំព័រ Live Science ៕

June 8, 2023

ករណីធ្លាក់យន្តហោះសម្លាប់មនុស្ស 229 នាក់ព្រោះតែឆេះខ្សែភ្លើង បានកែប្រែវិស័យអាកាសចរណ៍ទាំងមូល

គ្រោះថ្នាក់ធ្លាក់យន្តហោះដឹកមនុស្ស 229 នាក់កាលពីឆ្នាំ 1998 បានធ្វើឱ្យមានការកែប្រែជាច្រើននៅក្នុងស្ដង់ដាសុវត្ថិភាពរបស់វិស័យអាកាសចរណ៍ពិភពលោក។

កាលពីថ្ងៃទី 02 កញ្ញា 1998 ជើងហោះហើរលេខ 111 របស់យន្តហោះពាណិជ្ជកម្ម MD-11 បានចេញដំណើរពីទីក្រុង New York សហរដ្ឋអាម៉េរិក ទៅកាន់ប្រទេសស្វ៊ីស។ យន្តហោះនេះ ហោះឡើងដោយរលូតនៅវេលាម៉ោង 20 និង 18 នាទី។ ប៉ុន្តែ ពេលហោះឡើងដល់កម្ពស់ 10,100 ម៉ែត្រ ក្លិនអាក្រក់ក៏ចាប់ផ្ដើមភាយក្នុងកាប៊ីនអ្នកបើកបរ។ ពីឡុតក៏ដឹងថា ក្លិននេះភាយចេញពីប្រព័ន្ធម៉ាស៊ីនត្រជាក់ក្នុងកាប៊ីនពីឡុត ខណៈដែលកាប៊ីនអ្នកដំណើរមិនមានបញ្ហា។

បួននាទីក្រោយមក ក្លិនចម្លែកនេះក៏ភាយកាន់តែខ្លាំងនៅក្នុងកាប៊ីនពីឡុត អមនឹងផ្សែងពណ៌ស។ ពេលនេះទើបក្រុមអ្នកបើកបរដឹកថា មានអគ្គិភ័យក្នុងកាប៊ីន រួចក៏រាយការណ៍ដល់ស្ថាប័នគ្រប់គ្រងអាកាសចរណ៍។ ភ្លាមនោះ អណ្ដាតភ្លើងក៏ចាប់ផ្ដើមឆាបឆេះ ធ្វើឱ្យក្រុមពីឡុតមានពេលតិចតួចសម្រាប់ការចុះចតបន្ទាន់។ MD-11 ត្រូវបានបញ្ជាឱ្យចុះចតលើព្រលានយន្តហោះ Halifax Stanfield (កាណាដា) ដែលមានចម្ងាយជាង 100 គីឡូម៉ែត្រពីយន្តហោះ។

បួននាទីបន្ទាប់មកទៀត យន្តហោះក៏ហោះបានប្រហែល 50 គីឡូម៉ែត្រ។ ក្រុមហោះហើរក៏បានស្នើឱ្យអូសបន្លាយពេលវេលាហោះហើរដើម្បីបន្ទាបខ្លួន និងបញ្ចេញចោលឥន្ធនៈ។

នៅក្នុងអំឡុងពេលនោះ ក្រុមពីឡុតបានបិទចរន្តអគ្គិសនីក្នុងកាប៊ីន និងកង្ហារនៅលើពិតានយន្តហោះ ដែលនេះបានប្រែក្លាយលំហនៅពិតានទៅជាឧបករណ៍ស្រូបខ្យល់។ ភ្លាមនោះ ស្រាប់តែអណ្ដាតភ្លើងឆេះរាលដាលពេញកាប៊ីនពីឡុង ហើយផ្នែកជាច្រើនក៏លែងដំណើរការ ក្នុងនោះមានទាំងមុខងារបើបរស្វ័យប្រវត្ត និងអេក្រង់សម្រាប់មើលរបស់ពីឡុតផងដែរ។

MD-11 ក៏បាត់បង់ការគ្រប់គ្រងទាំងស្រុង។ ក្រុមហោះហើរបានផ្ដល់សញ្ញា «Mayday» ដែលរាយការណ៍អំពីគ្រោះអាសន្នកម្រិតខ្ពស់បំផុត ហើយក៏បាត់ទំនាក់ទំនង។ យន្តហោះនេះបានធ្លាក់ចុះមហាសមុទ្រនៅម៉ោង 22 និង 31 នាទី ក្នុងល្បឿន 555 គីឡូម៉ែត្រ/ម៉ោង ធ្វើឱ្យដងខ្លួនយន្តហោះខ្ទេចជារាប់លានបំណែកក្នុងរយៈពេលមិនដល់មួយវិនាទី។

ហេតុការណ៍ធ្លាក់យន្តហោះរបស់ក្រុមហ៊ុន Swissari នេះ បានសម្លាប់មនុស្ស 229 នាក់។ ក្រោយ MD-11 បានធ្លាក់ គណៈកម្មការសុវត្ថិភាពចរាចរណ៍កាណាដា (TSB) ក៏បានចាប់ផ្ដើមស៊ើបអង្កេតរកមូលហេតុ។ លទ្ធផលនៃការស្រាវជ្រាវបង្ហាញថា អណ្ដាតភ្លើងបានចាប់ផ្ដើមឆេះចេញពីបណ្ដាញខ្សែភ្លើងខាងលើកាប៊ីនអ្នកបើកបរ ហើយរាលដាលយ៉ាងលឿន ធ្វើឱ្យផ្នែកជាច្រើនរបស់យន្តហោះត្រូវខូចខាត។ អេក្រង់នានានៅក្នុងកាប៊ីនអ្នកបើកបរបានខូច នាំឱ្យពីឡុតត្រូវរាវដើម្បីបញ្ជាយន្តហោះព្រោះមើលមិនឃើញ ហើយក៏ហោះខុសទិសដៅ និងធ្លាក់ចូលមហាសមុទ្រអាត្លង់ទិក។

យន្តហោះនេះមិនមានប្រព័ន្ធស្វែងរកប្រភពអណ្ដាតភ្លើង និងប្រព័ន្ធពន្លត់ភ្លើង ទើបក្រុមហោះហើរត្រូវប្រើច្រមុះដើម្បីហិតក្លិន ពេលនោះ ហេតុការណ៍បានប្រែជាអាក្រក់ណាស់ទៅហើយ។

TSB សន្និដ្ឋានថា មូលហេតុនៃគ្រោះថ្នាក់នេះគឺដោយសារ «ស្ដង់ដាគ្រប់គ្រងអគ្គិភ័យសម្រាប់វត្ថុធាតុក្នុងយន្តហោះ មិនសមស្រប»។

ក្រោយហេតុការណ៍ខាងលើ សំណើជាច្រើនត្រូវបានលើកឡើងដើម្បីកែលំអស្តង់ដានានានៅក្នុងយន្តហោះ។ សំណើទាំងនេះក៏បាននាំឱ្យមានការកែប្រែច្រើននៅក្នុងស្ដង់ដាសុវត្ថិភាពអាកាសចរណ៍របស់ស្ថាប័នគ្រប់គ្រងអាកាសចរណ៍ នៅក្នុងការផលិតយន្តហោះ និងវិស័យអាកាចរណ៍ទាំងមូលរបស់ពិភពលោក៕

June 7, 2023

នាវាចម្បាំងរបស់ឥណ្ឌូណេស៊ី ឆេះពេលកំពុងល្បាតលើសមុទ្រ

អណ្ដាតភ្លើងផ្ទុះឡើងនៅលើនាវា KRI Teluk Hading-538 របស់ឥណ្ឌូណេស៊ី កាលពីថ្ងៃទី 03 មិនថុនា ប៉ុន្តែមូលហេតុមិនទាន់ត្រូវបានបញ្ជាក់នៅឡើយ។

ប្រកាសកាលពីថ្ងៃទី 04 មិថុនារបស់ទ័ពជើងទឹកឥណ្ឌូណេស៊ី បានបញ្ជាក់ថានាវាចម្បាំង KRI Teluk Hading-538 របស់ពួកគេបានជួបគ្រោះអគ្គិភ័យកាលពីវេលាម៉ោងប្រហែល 14 និង15 នាទី (ម៉ោងក្នុងស្រុក) ថ្ងៃទី 03 មិថុនា 2023 ក្នុងពេលធ្វើសកម្មភាពល្បាតលើសមុទ្រ។ នាវិកទាំង 119 នាក់លើនាវានេះសុទ្ធតែបានរួចផុតពីគ្រោះថ្នាក់ ដោយត្រូវបាននាំទៅកាន់កប៉ាល់ TB Bahtera Zalfa ដែលកំពុងផ្លាស់ទីឆ្លងកាត់តំបន់កើតហេតុ។

អគ្គិភ័យលើនាវា KRI Teluk Hading-538 នេះ កើតឡើងនៅតំបន់ដែលមានចម្ងាយមិនឆ្ងាយប៉ុន្មានធៀបនឹងឆកសមុទ្រ Selayar។

ភ្លាមៗបន្ទាប់ពីហេតុការណ៍កើតឡើង ទ័ពជើងទឹកឥណ្ឌូណេស៊ីក៏បានបញ្ជូនកប៉ាល់ 5 គ្រឿងទៅជួយ និងបានអូស KRI Teluk Hading-538 ទៅកាន់ទីតាំងជិតបំផុតដើម្បីត្រួតពិនិត្យ។

KRI Teluk Hading-538 ស្ថិតក្នុងថ្នាក់នាវាវាយឡើងច្រាំង Frosch-I/Type 10 ធ្វើសកម្មភាពតាំងពីឆ្នាំ 1978។

June 5, 2023

ឥណ្ឌូណេស៊ីវិនិយោគជាង 30 ពាន់លានដុល្លារសម្រាប់វិស័យថ្មរថយន្តអគ្គិសនី

រដ្ឋមន្ត្រីក្រសួងវិនិយោគឥណ្ឌូណេស៊ី កាលពីថ្ងៃទី 30 ឧសភា ប្រកាសថា ប្រទេសនេះអាចទទួលបានខ្ទង់ប្រាក់វិនិយោគប្រមាណ 31.9 ពាន់លានដុល្លារអាម៉េរិក សម្រាប់បណ្ដាគម្រោងដែលជាប់ទាក់ទងនឹងបណ្ដាញផ្គត់ផ្គង់ថ្មរថយន្តអគ្គិសនីនៅឆ្នាំ 2026។

យោងតាមរដ្ឋមន្ត្រីក្រសួងសម្របសម្រួលកិច្ចការសមុទ្រ និងវិនិយោគឥណ្ឌូណេស៊ី លោក Luhut Binsar Pandjaitan ការដែលប្រទេសនេះសម្បូររ៉ែនីកែលដែលប្រើប្រាស់ក្នុងថ្មរថយន្តអគ្គិសនី រដ្ឋាភិបាលឥណ្ឌូណេស៊ី ចង់វិនិយោគកាន់តែច្រើនថែមទៀតទៅក្នុងបណ្ដាវិស័យដែលប្រើប្រាស់នីកែល ដើម្បីជំរុញកំណើនសេដ្ឋកិច្ច។

រដ្ឋមន្ត្រីរូបនេះឱ្យដឹងថា តំបន់ Kalimantan របស់ឥណ្ឌូណេស៊ី អាចនឹងទទួលបានប្រាក់វិនិយោគ 12.35 ពាន់លានដុល្លារអាម៉េរិក ស្របពេលដែលតំបន់ Maluku ខាងជើង និង Sulawesi អាចនឹងទាក់ទាញបានការវិនិយោគបន្តបន្ទាប់គឺ 9.78 ពាន់លានដុល្លារ និង 9.84 ពាន់លានដុល្លារ នៅក្នុងបណ្ដាគម្រោងបណ្ដាញផ្គត់ផ្គង់ថ្មផ្ទុកថាមពលសម្រាប់រថយន្តអគ្គិសនី។

June 1, 2023

ពពកចំហាយទឹកជះចេញពីព្រះចន្ទរបស់ភពសៅរ៍ មានប្រវែងជាង 9,000 គីឡូម៉ែត្រ

ក្រុមតារាវិទូបានរកឃើញចំហាយទឹកដ៏សម្បើមជះចេញពី Enceladus ដែលជាព្រះចន្ទមួយរបស់ភពសៅរ៍ ដែលនេះកំពុងតែផ្ដល់ក្ដីសង្ឃឹមដល់គំនិតដែលយល់ថា មានភាវៈរស់នៅខាងក្រៅផែនដី។

ទំព័រ Guardian កាលពីថ្ងៃទី 30 ឧសភា បានចុះផ្សាយថា ចំហាយឧស្ម័នប្រវែងប្រហែល 9,600 គីឡូម៉ែត្រ ដែលប្រហាក់ប្រហែលនឹងចម្ងាយពីជប៉ុនទៅអៀឡង់ កំពុងជះទឹកទៅក្នុងទីអវកាសក្នុងល្បឿនប្រមាណ 300 លីត្រ/វិនាទី។ តាំងពីយូរមកហើយ អ្នកវិទ្យាសាស្ត្រជឿថា ព្រះចន្ទ Enceladus ដែលមានទំហំប្រហែល 500 គីឡូម៉ែទ្រ មានលាក់មហាសមុទ្រទឹកប្រៃខាងក្រោមសម្បកដ៏ត្រជាក់ ហើយទំនងជាជះចំហាយទឹកទៅក្នុងបរិយាកាស។ ក៏ប៉ុន្តែ នេះគឺជាលើកដំបូងដែលអ្នកវិទ្យាសាស្ត្របានមើលឃើញករណីបាញ់ជះចំហាយទឹកដ៏ធំសម្បើមបែបនេះ។

«យើងពិតជាភ្ញាក់ផ្អើលនឹងទំហំ និងប្រវែងរបស់ចំហាយនេះ» អ្នកវិទ្យាសាស្ត្រ Geronimo Villanueva មកពីអង្គការណាសា និងជាសមាជិកក្រុមស្រាវជ្រាវខាងលើ ថ្លែងដូច្នេះ។ លទ្ធផលនៃការស្រាវជ្រាវនេះត្រូវបានចុះផ្សាយលើទស្សនាវដ្ដី Nature Astronomy។

ក្រុមខាងលើបានសង្កេតមើល Enceladus ដែលជាព្រះចន្ទធំជាងគេលំដាប់ទី 6 របស់ភពសៅរ៍ ដោយតេឡេស្កុបអវកាស James Webb កាលពីខែវិច្ឆិកា 2022។ ឧបករណ៍គណនារបស់តេឡេស្កុបនេះបង្ហាញថា ចំហាយនេះធ្វើឱ្យ Enceladus បាត់បង់ទឹក 300 គីឡូក្រាមរៀងរាល់មួយវិនាទី ដែលអាចបំពេញអាងទឹកខ្នាតអូឡាំពិកមួយ ក្នុងរយៈពេលតែប៉ុន្មានម៉ោងប៉ុណ្ណោះ។

ការសង្កេតមុននោះបង្ហាញថា ចំហាយទឹកដែលមានផ្ទុកភាគល្អិតរបស់ព្រឹល និងសារធាតុគីមីសរីរាង្គ បានជះចេញដូចទៅនឹងទឹកដែលបាញ់ចេញពីផ្ទៃផែនដី នៅលើព្រះចន្ទ Enceladus។ ដោយសារតែវិលជុំវិញភពសៅរ៍លឿនពេក ពោលគឺសម្រេចបានមួយជុំដោយប្រើពេលតែជាងមួយថ្ងៃ ចំហាយទឹកក៏ច្រាលចូលក្នុងគន្លងតារាវិថីរបស់ព្រះចន្ទ Enceladus និងបង្កើតបានជារង្វង់មូលមួយដ៏ធំ។ យោងតាមទិន្នន័យពីតេឡេស្កុប បរិមាណទឹកប្រហែល 30% ដែលបានរសាត់ផុតពី Enceladus ត្រូវបានរក្សាទុកក្នុងរង្វង់មូលខាងលើ ខណៈដែល 70% ទៀតបានភាយទៅក្នុងអវកាសជុំវិញភពសៅរ៍។

កាលពីឆ្នាំ 2017 ក្រុមអ្នកវិទ្យាសាស្ត្រមកពីណាសា បានឱ្យដឹងថា ព្រះចន្ទ Enceladus មានសារធាតុស្ទើរគ្រប់យ៉ាងដែលត្រូវការចាំបាច់សម្រាប់ភាវៈមានជីវិតដែលមនុស្សធ្លាប់បានដឹង ក្នុងនោះរួមមាន ទឹក ថាមពល និងកត្តាគីមីសាស្ត្រជាដើម។

ក្នុងអនាគត បណ្ដាបេសកកម្មស្រាវជ្រាវព្រះចន្ទ Enceladus នឹងជួយឱ្យអ្នកវិទ្យាសាស្ត្រដឹងច្បាស់អំពីកម្រាស់របស់សម្បកទឹកកកខាងក្រៅ និងជម្រៅរបស់មហាសមុទ្រក្រោមដីរបស់ព្រះចន្ទមួយនេះ៕

May 31, 2023

មីស៊ីលកូរ៉េខាងជើងធ្វើឱ្យប្រទេសជិតខាងភ័យស្លន់ស្លោ មុនពេលធ្លាក់ចូលសមុទ្របាត់ស្រមោល

កូរ៉េខាងជើងបានបញ្ជាក់ថា រ៉ុក្កែតដឹកផ្កាយរណបយោធាបានធ្លាក់ចូលសមុទ្រ ដោយសារតែមានបញ្ហាក្នុងពេលបាញ់បង្ហោះនៅព្រឹកនេះ។

«រ៉ុក្កែតរុញច្រាន Cheollima-1 ដែលនាំយកផ្កាយរណបឈ្លបយកការណ៍ផ្នែកយោធា បានធ្លាក់ចូលតំបន់សមុទ្រភាគខាងលិច ព្រោះតែបាត់បង់ថាមពល ដោយសារមានបញ្ហាក្នុងការបញ្ឆេះម៉ាស៊ីននៅកំណាត់ទីពីរ» ទីភ្នាក់ងារសារព័ត៌មានមជ្ឈិមកូរ៉េខាងជើង (KCNA) ថ្ងៃទី 31 ឧសភានេះ បានរាយការណ៍ដូច្នេះ។

មុននោះ អគ្គសេនាធិការចម្រុះនៃសាធារណរដ្ឋកូរ៉េ (JSC) ឱ្យដឹងថា នៅវេលាម៉ោង 06:29 (ម៉ោងប្រហែល 4 កន្លះនៅកម្ពុជា) កូរ៉េខាងជើងបានបាញ់បង្ហោះរ៉ុក្កែតពីតំបន់ Tongchang-ri នៅឆ្នេរសមុទ្រភាគខាងលិចប្រទេស ឆ្ពោះទៅទិសខាងត្បូង។

រ៉ុក្កែតកូរ៉េខាងជើង ហោះលើលំហសមុទ្ររបស់កោះ Baengnyeong នៅភាគខាងលិចប្រទេសកូរ៉េខាងត្បូង និងមិនប៉ះពាល់ដល់រដ្ឋធានីសេអ៊ូល។ យោងតាម JSC ក្រុមប្រឹក្សាសន្តិសុខជាតិរបស់កូរ៉េខាងត្បូង ក៏បានប្រកាសបើកកិច្ចប្រជុំបន្ទាន់ផងដែរ។

កងទ័ពកូរ៉េខាងត្បូងក៏បានដឹងថា រ៉ុក្កែតនេះបានបាត់ខ្លួនពីរ៉ាដាមុនពេលហោះទៅដល់គោលដៅដែលបានគ្រោងទុក និងបានសន្និដ្ឋានថា វាបានផ្ទុះលើអាកាស ឬធ្លាក់ចូលសមុទ្រ។

សារ៉ែនប្រកាសអាសន្នបានបន្លឺឡើងនៅរដ្ឋធានីសេអ៊ូល នៅម៉ោងប្រហែល 6 កន្លះ គ្រាដែលអាជ្ញាធរស្នើឱ្យប្រជាជនត្រៀមខ្លួនឱ្យបានរួចរាល់សម្រាប់ការជម្លៀស។ ក្រសួងមហាផ្ទៃកូរ៉េខាងត្បូង ក្រោយមកបានឱ្យដឹងថា ការប្រកាសអាសន្នពីអាជ្ញាធរសេអ៊ូល គឺ «មិនត្រឹមត្រូវ»។ ចំណែកការជូនដំណឹងអំពីការជម្លៀសនៅតំបន់ក្បែរព្រំដែនភាគខាងលិចរបស់កូរ៉េខាងត្បូង ក៏ត្រូវបានដកចេញនៅវេលាម៉ោងប្រហែល 8 ព្រឹក។

នៅប្រទេសជប៉ុនវិញ អាជ្ញាធរក៏បានចេញសេចក្ដីជូនដំណឹងទាក់ទងនឹងបញ្ហាខាងលើតាមរយៈប្រព័ន្ធ J-Alert។ ប៉ុន្តែក្រោយមក ប្រព័ន្ធនេះក៏បានប្រាប់ថា រ៉ុក្កែតនឹងមិនហោះរំលងទឹកដីជប៉ុន ហើយក៏បានដកចោលសេចក្ដីជូនដំណឹងនេះ។

ជប៉ុន មុននោះបានឱ្យដឹងថា កូរ៉េខាងជើងបានជូនដំណឹងមកតូក្យូអំពីគម្រោងបាញ់បង្ហោះផ្កាយរណបចាប់ពីថ្ងៃទី 31 ឧសភា ដល់ 11 មិថុនា។ ជប៉ុនក៏បានប្រកាសថា នឹងបាញ់ទម្លាក់រាល់រ៉ុក្កែតរបស់កូរ៉េខាងជើង បើសិនវាត្រូវបានបញ្ជាក់ថានឹងធ្លាក់ចូលទឹកដីប្រទេសនេះ។

សហរដ្ឋអាម៉េរិក កូរ៉េខាងត្បូង និងជប៉ុន សុទ្ធតែយល់ថា ការបាញ់បង្ហោះផ្កាយរណបរបស់កូរ៉េខាងជើងគឺគ្រាន់តែជា «សម្បក» ដើម្បីសាកល្បងមីស៊ីល ដោយសារតែពួកវាប្រើប្រាស់បច្ចេកវិទ្យាដូចគ្នា។ កូរ៉េខាងជើងធ្លាប់បានបាញ់បង្ហោះរ៉ុក្កែតរុញច្រានដែលមានផ្ទុកផ្កាយរណបកាលពីឆ្នាំ 2012 និង 2016 ហើយរ៉ុក្កែតទាំងនេះសុទ្ធតែបានហោះរំលងខេត្ត Okinawa នៅភាគខាងត្បូងរបស់ប្រទេសជប៉ុន៕

May 31, 2023

ប្រទេសចិនស្ថាបនាទំនប់នាវាចរណ៍នៅដីគោកធំជាងគេលើពិភពលោក

ទំនប់នាវាចរណ៍ (Lock) ថ្មី ដែលកំពុងត្រូវបានស្ថាបនាលើព្រែក Pinglu ក្នុងខេត្ត Guangxi មានទំហំ 185,000 ម៉ែត្រក្រឡា ហើយគ្រោងនឹងជួយសន្សំសំចៃទឹកបាន 60% ធៀបនឹងទំនប់នាវាចរណ៍ធម្មតា។

ព្រែក Pinglu ដែលជាគម្រោងធំមួយរបស់ច្រករបៀងដីគោក-សមុទ្រភាគខាងលិចថ្មីរបស់ប្រទេសចិន កំពុងស្ថិតក្នុងដំណាក់កាលសាងសង់ នឹងមានទំនប់នាវាចរណ៍សន្សំសំចៃទឹកលើដីគោកធំបំផុតក្នុងពិភពលោក។

កំណាត់សំខាន់របស់ទំនប់នាវាចរណ៍នេះមានទំហំ 185,000 ម៉ែត្រក្រឡា អាចដាក់ទឹកបាន 3.5 លានម៉ែត្រគូប។ ទំនប់នេះនឹងត្រូវបានជីកដល់ជម្រៅ 65 ម៉ែត្រ ដើម្បីធានាសុវត្ថិភាព និងស្ថិរភាព។

នៅពេលកប៉ាល់ចូលដល់ទំនប់នាវាចរណ៍ ជំនួសឱ្យការបង្ហូរទឹកទៅតាមបណ្ដោយចរន្ត ទឹកនេះនឹងត្រូវបានជញ្ជូនចូលទៅក្នុងកន្លែងផ្ទុកដែលដើរតួនាទីជាប្រភពទឹកសម្រាប់ទំនប់ក្នុងការលើកកប៉ាល់នៅពេលត្រូវការ។ ដោយមានប្រសិទ្ធភាពខ្ពស់ ទំនប់នាវាចរណ៍នេះត្រូវបានរំពឹងថា នឹងជួយសន្សំសំចៃទឹកបានប្រហែល 60% នៅក្នុងការប្រើប្រាស់ បើធៀបនឹងទំនប់នាវាចរណ៍ធម្មតា។

ការស្ថាបនាព្រែក Pinglu នៅខេត្ត Guangxi គឺក្នុងបំណងតភ្ជាប់ទន្លេ Xijiang ដែលជាផ្លូវទឹកធំនៅភាគនិរតីប្រទេសចិន ជាមួយនឹងកំពង់ផែសមុទ្រនានារបស់ប្រទេសនេះ៕

May 26, 2023

កប៉ាល់ដឹកទំនិញហុងកុងជាប់គាំងនៅលើព្រែកជីក Suez

កប៉ាល់ដឹកទំនិញដោតទង់ជាតិហុងកុងជាប់គាំងនៅលើព្រែកជីក Suez ធ្វើឱ្យស្ទះដំណើររបស់កប៉ាល់ដទៃដែលនៅពីក្រោយជាច្រើនគ្រឿង។

«កប៉ាល់ Xin Hai Tong 23 ជាប់គាំងលើព្រែកជីក Suez នៅតំបន់គីឡូលេខ 159 វេលាម៉ោង 4 (ម៉ោង 8 នៅកម្ពុជា) ថ្ងៃទី 25 ឧសភា» ក្រុមហ៊ុនដឹកជញ្ជូនតាមសមុទ្រ Leth Agencies ប្រកាសលើ Twitter ដូច្នេះ។ កប៉ាល់អូសកំពុងតែប្រឹងប្រែងជួយដល់ Xin Hai Tong 23 ដែលមានបណ្ដោយ 189 ម៉ែត្រ។

កប៉ាល់ខាងលើជាប់គាំងនៅផ្នែកខាងត្បូង ក្បែរច្រាំងខាងកើតរបស់ព្រែកជីក Suez។ យ៉ាងហោចណាស់មានកប៉ាល់ចំនួនបួនគ្រឿងផ្សេងទៀតត្រូវកប៉ាល់ Xin Hai Tong 23 រាំងផ្លូវ។ នេះបើតាម Marine Traffic ដែលជាគេហទំព័រជំនាញពីទិន្នន័យផ្លូវសមុទ្រ។

គិតត្រឹមវេលាថ្ងៃត្រង់នេះ ភាគីអ្នកគ្រប់គ្រងព្រែកជីក Suez មិនទាន់មានការអធិប្បាយអ្វីនៅឡើយ។

ព្រែកជីក Suez ប្រវែង 190 គីឡូម៉ែត្រ គឺជាផ្លូវដឹកជញ្ជូនប្រើពេលខ្លីបំផុតរវាងទ្វីបអឺរ៉ុប និងអាស៊ី។ ព្រែកនេះតភ្ជាប់រវាងទីក្រុងចំនួនពីររបស់អេហ្សីប គឺ Suez នៅជាប់សមុទ្រក្រហម និង Port Said នៅមេឌីទែរ៉ាណេ។ កន្លែងចង្អៀតបំផុតរបស់ព្រែកជីកទទឹង 200 ម៉ែត្រ គឺជាទីដែលតែងបង្កផលលំបាកដល់ការធ្វើដំណើររបស់កប៉ាល់ដឹកទំនិញធំៗ។

កប៉ាល់ Ever Given ដែលធ្លាប់បានជាប់គាំងនៅលើព្រែក Suez

កាលពីខែមីនា 2021 កប៉ាល់ដឹកកុងតឺន័រខ្នាតយក្ស Ever Given ដែលដោតទង់ជាតិប៉ាណាម៉ា ក៏ធ្លាប់បានជាប់គាំងនៅលើព្រែក Suez ធ្វើឱ្យកកស្ទះចរាចរណ៍អស់ 6 ថ្ងៃ និងបង្កឱ្យមានការខាតបង់គិតជាទឹកប្រាក់ប្រហែល 9 ពាន់លានដុល្លារអាម៉េរិកក្នុងមួយថ្ងៃៗ ចំពោះពាណិជ្ជកម្មសកល និងធ្វើឱ្យមានបញ្ហាដល់ខ្សែច្រវាក់ផ្គត់ផ្គង់ទំនិញផងដែរ៕

May 25, 2023

មនុស្សទី 600 ដែលហោះហើរក្នុងគន្លងតារាវិថីជុំវិញផែនដី

(សហរដ្ឋអាម៉េរិក) – ស្ត្រីអវកាសចរដំបូងរបស់គណៈកម្មការអវកាសអារ៉ាប៊ីសាអូឌីត បានក្លាយជាមនុស្សទី 600 ដែលហោះជុំវិញផែនដីនៅក្នុងយានអវកាស Dragon របស់ SpaceX នៅម៉ោង 4:37 ថ្ងៃទី 22 ឧសភា ឆ្នាំ 2023 (ពេលវេលានៅកម្ពុជា)។

ការបាញ់បង្ហោះយានអវកាសកាលពីថ្ងៃទី 22 ឧសភា គឺជាការចាប់ផ្ដើមសម្រាប់ Ax-2 (Axiom-2) ដែលជាបេសកកម្មហោះហើរឯកជនលើកទីពីររបស់ក្រុមហ៊ុន Axiom Space ឡើងទៅកាន់ស្ថានីយអវកាសអន្តរជាតិ (ISS)។ បេសកកម្មដំបូង គឺ Ax-1 ត្រូវបានធ្វើឡើងកាលពីខែមេសា ឆ្នាំ 2022។

Ax-2 រួមមានអ្នកអវកាសបួននាក់ ក្នុងនោះក៏មានអ្នកស្រាវជ្រាវផ្នែកវេជ្ជសាស្ត្រ លោកស្រី Rayyanah Barnawi ផងដែរ។ Barnawi ដែលជាអ្នកអវកាសដំបូងរបស់គណៈកម្មការអវកាសអារ៉ាប៊ីសាអូឌីត បានក្លាយជាមនុស្សទី 600 ដែលហោះក្នុងគន្លងគោចរជុំវិញផែនដី។

ប៉ុន្តែ បើសិនគិតទាំងមនុស្សដែលបានឡើងផុតខ្សែបន្ទាត់ Karman ដែលជាព្រំដែនអវកាសកម្ពស់ 100 គីឡូម៉ែត្រពីផែនដី ទៅតាមអនុសញ្ញារបស់ក្រុមអ្នកជំនាញអន្តរជាតិច្រើនរូប គេត្រូវតែរាប់មនុស្ស 32 នាក់ទៀតដែលបានហោះហើរលើយានអវកាស New Shepard របស់ Blue Origin។ ជើងហោះហើរទាំងនេះបានឡើងជិតដល់គន្លងតារាវិថីផែនដី និងត្រលប់វិញ ដោយមិនបានហោះជុំវិញផែនដី។

តាមផែនការ Axiom-2 នឹងត្រលប់មកកាន់ផែនដីនៅដើមខែមិថុនា 2023 ដោយចុះចតលើមហាសមុទ្រអាត្លង់ទិក។

ថ្វីបើការហោះហើរមានរយៈពេលតែ12 ថ្ងៃ ប៉ុន្តែ Axiom-2 មានគម្រោងស្រាវជ្រាវជាច្រើន ក្នុងនោះមានដូចជា បាតុភូតបរិយាកាសកម្រជួប ការពិសោធឈុតសម្លៀកបំពាក់អវកាស ក៏ដូចជាការពិសោធពាក់ព័ន្ធនឹងសុខភាព។ល។

May 24, 2023

Tag: សមុទ្រ