រថភ្លើងដឹកអ្នកដំណើរពីរគ្រឿង និងរថភ្លើងដឹកទំនិញមួយគ្រឿង បានបុកគ្នានៅប្រទេសឥណ្ឌា បណ្ដាលឱ្យមនុស្សយ៉ាងតិច 233 នាក់បាត់បង់ជីវិត និងជាង 850 នាក់រងរបួស។
រថភ្លើងល្បឿនលឿនដឹកអ្នកដំណើរ Bengaluru – Howrah កាលពីព្រលប់ថ្ងៃទី 02 មិថុនា 2023 បានធ្លាក់ពីផ្លូវដែកនៅ Balasore ក្នុងរដ្ឋ Odisha នៅភាគខាងកើតប្រទេសឥណ្ឌា។ ទូមួយចំនួនរបស់រថភ្លើងនេះត្រូវក្រឡាប់ទៅលើផ្លូវដែកនៅក្បែរនោះ។
រថភ្លើងល្បឿនលឿនដឹកអ្នកដំណើរ Shalimar – Chennai ពេលនោះកំពុងធ្វើដំណើរជិតដល់កន្លែងកើតហេតុ។ ដោយសារចាប់ហ្វ្រាំងមិនទាន់ រថភ្លើងនេះក៏បុកពេញទំហឹងទៅលើទូមួយចំនួនរបស់រថភ្លើង Bengaluru – Howrah ដែលបានក្រឡាប់មកលើផ្លូវ បណ្ដាលឱ្យទូមួយចំនួនរបស់រថភ្លើង Shalimar – Chennai ត្រូវក្រឡាប់ និងទះទង្គិចនឹងរថភ្លើងដឹកទំនិញដែលកំពុងចតនៅក្បែរ។
សមត្ថកិច្ចបានឱ្យដឹងថា រថយន្តសង្គ្រោះជាង 100 គ្រឿង រួមនឹងក្រុមសង្គ្រោះ 8 អង្គភាព ត្រូវបានបញ្ជូនទៅកាន់កន្លែងកើតហេតុ។ មនុស្សយ៉ាងតិច 233 នាក់បានស្លាប់ ហើយចំនួននេះអាចនឹងកើនឡើងបន្តទៀត ខណៈដែលមនុស្សប្រហែល 850 នាក់ត្រូវរងរបួស និងត្រូវបានបញ្ជូនទៅកាន់មន្ទីរពេទ្យ។
នៅប្រទេសឥណ្ឌា គុណភាពបណ្ដាញផ្លូវដែកកំពុងទ្រុឌទ្រោមខ្លាំង ព្រោះតែត្រូវបានស្ថាបនា ប្រើប្រាស់តាំងពីយូរ ខណៈការថែទាំ និងជួសជុលធ្វើឡើងមិនពេញលេញ ដែលនេះអាចជាមូលហេតុមួយដែលនាំឱ្យឥណ្ឌាជួបគ្រោះថ្នាក់ច្រើន ទាក់ទងនឹងផ្លូវដែក។
កាលពីឆ្នាំ 2021 ប្រទេសឥណ្ឌាមានមនុស្សជាង 16,000 នាក់បានស្លាប់នៅក្នុងហេតុការណ៍គ្រោះថ្នាក់ផ្លូវដែកជិត 18,000 ករណី៕
