ចំនួនអ្នកអវកាសដែលកំពុងស្ថិតនៅលើគន្លងតារាវិថីផែនដីនាបច្ចុប្បន្នគឺ 17 នាក់ ដែលនេះគឺជាចំនួនច្រើនបំផុត បើទោះក្នុងរយៈពេលខ្លី។
យោងតាមទំព័រ Space បន្ទាប់ពីបេសកកម្ម Shenzhou 16 របស់ចិន ដែលបានបាញ់បង្ហោះកាលពីថ្ងៃទី 30 ឧសភា 2023 ចំនួនមនុស្សដែលកំពុងស្ថិតនៅលើគន្លងតារាវិថីផែនដី បានឡើងដល់ 17 នាក់។ កំណត់ត្រា 14 នាក់មុននោះត្រូវបានបង្កើតឡើងក្នុងបេសកកម្មឯកជន Inspiration4 កាលពីឆ្នាំ 2021។
អវកាសចរដែលកំពុងស្ថិតនៅលើគន្លងគោចរផែនដីបច្ចុប្បន្ន មកពីបួនក្រុមផ្សេងគ្នា។ ក្នុងនោះ ក្រុម Shenzhou 16 ចំនួន 3 នាក់ស្ថិតនៅលើស្ថានីយអវកាស Tiangong របស់ចិន ខណៈដែលក្រុម Shenzhou 15 មាន 3 នាក់ ស្ថិតនៅលើ Tiangong ចាប់ពីខែវិច្ឆិកា 2022 នឹងត្រលប់មកកាន់ផែនដីនៅដើមខែមិថុនា។ ចំណែកក្រុម Expedition 69 មាន 7 នាក់ និងក្រុម Axiom-2 មាន 4 នាក់ ស្ថិតនៅលើស្ថានីយអវកាសអន្តរជាតិ (ISS)។
ចាប់ពីឆ្នាំ 2000 មនុស្សមានវត្តមានជាបន្តបន្ទាប់នៅទីអវកាស ដោយចាប់ផ្ដើមពីក្រុមអវកាសចរដំបូងដែលរស់នៅលើស្ថានីយ ISS។ ប្រទេសចិនបានដំឡើងរួចរាល់ស្ថានីយ Tiangong កាលពីឆ្នាំមុន ហើយ Shenzhou 16 គឺជាបេសកកម្មហោះហើរមានមនុស្សលើកទី 11 និងជាជើងហោះហើរលើកទី 16 នៅក្នុងកម្មវិធី Shenzou។
