ប្រធានាធិបតី - La Reine Media

លោក ពូទីន៖ អាវុធប្រល័យលោកត្រូវបានពង្រាយនៅបេឡារូស

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាក់ថា អាវុធនុយក្លេអែរបានបង្ហាញខ្លួននៅប្រទេសបេឡារូស និងបានបង្ហើបអំពីពេលវេលាសម្រេចបានគម្រោងដាក់ពង្រាយនេះ។

«ក្បាលគ្រាប់នុយក្លេអែរដំបូងៗត្រូវបានដឹកចូលទៅក្នុងទឹកដីបេឡារូស។ នេះទើបតែជាដំណាក់កាលដំបូងរបស់ផែនការ។ យើងនឹងសម្រេចជាស្ថាពរនៅមុនរដូវស្លឹកឈើជ្រុះ ឬចុងឆ្នាំនេះ» ប្រធានាធិបតីរុស្ស៊ី លោក ពូទីន ថ្លែងដូច្នេះនៅក្នុងវេទិកាសេដ្ឋកិច្ចអន្តរជាតិ St. Petersburg កាលពីថ្ងៃទី 16 មិថុនា។

នេះគឺជាលើកដំបូងហើយដែលលោក ពូទីន បញ្ជាក់អំពីរឿងខាងលើដោយផ្ទាល់។ យោងតាមលោក ពូទីន ការពង្រាយអាវុធប្រល័យលោកទាំងនេះនៅបេឡារូស គឺដើម្បីធានាសន្តិសុខជាតិ និងវត្តមានរបស់រដ្ឋរុស្ស៊ី។ ប៉ុន្តែលោកថា «ពិតណាស់ យើងមិនចាំបាច់ត្រូវប្រើប្រាស់យុទ្ធសាស្ត្រនេះឡើយ»។

ផែនការដាក់ពង្រាយអាវុធប្រល័យលោកនៅបេឡារូស ត្រូវបានលោក ពូទីន ប្រកាសតាំងពីខែមីនា 2023 បន្ទាប់ពីមានការយល់ព្រមពីមេដឹកនាំបេឡារូស។ រុស្ស៊ីអះអាងថា កិច្ចព្រមព្រៀងរវាងរុស្ស៊ី និងបេឡារូស គឺជាសកម្មភាពសមស្រប ព្រោះថា សហរដ្ឋអាម៉េរិក បានពង្រាយអាវុធប្រល័យលោកនៅក្នុងប្រទេសមួយចំនួននៅអឺរ៉ុប អស់ជាច្រើនទសវត្សរ៍មកហើយ៕

June 17, 2023

ប្រធានាធិបតីបារាំងថ្លែងអំពីរឿងអនាគតរបស់ Kylian Mbappe

ប្រធានាធិបតីបារាំងលោក Emmanuel Macron បានថ្លែងថា លោកនឹងព្យាយាមបញ្ចុះបញ្ចូល Kylian Mbappe ឱ្យនៅជាមួយក្លឹប Paris Saint-Germain ម្ដងទៀត នៅរដូវក្ដៅឆ្នាំនេះ។

លោក Emmanuel Macron បញ្ជាក់ថា លោកបានត្រៀមខ្លួនរួចហើយសម្រាប់ការជជែកគ្នាម្ដងទៀតជាមួយនឹង Mbappe ក្នុងបំណងបញ្ចុះបញ្ចូលឱ្យកីឡាករបារាំងរូបនេះលេងបាល់ឱ្យក្លឹបក្នុងស្រុក។ ប្រសាសន៍របស់លោក Emmanuel Macron ត្រូវបានធ្វើឡើងបន្ទាប់ពី Mbappe កាលពីពេលថ្មីៗនេះ បានប្រកាសជាផ្លូវការថា មិនមានបំណងពន្យារកិច្ចព្រមព្រៀងជាមួយក្លឹប PSG និងត្រូវចាកចេញក្រោយពីចប់កិច្ចសន្យា។ ចំណែក PSG ក៏បានប្រកាសអំពីតម្លៃខ្លួន 200 លានអឺរ៉ូរបស់ Mbappe។

លោក Emmanuel Macron ថ្លែងថា «Mbappe គឺជាកីឡាករឆ្នើម និងស្ថិតក្នុងលំដាប់កំពូល ដូចដែលគ្រប់គ្នាបានដឹង។ ដូច្នេះ គាត់មានទំនោរទៅរកការធ្វើចំណាកស្រុកដើម្បីអភិវឌ្ឍសមត្ថភាព និងយកឈ្នះលើឧបសគ្គថ្មីក្នុងអាជីព»។ លោកបន្ថែមថា «ក៏ប៉ុន្តែ បច្ចុប្បន្ន ខ្ញុំមិនមានដំណឹងល្អណាមួយសម្រាប់គ្រប់គ្នា តែយ៉ាងណាក៏ដោយ ខ្ញុំនឹងប្រឹងប្រែងឱ្យអស់ពីលទ្ធភាព (ក្នុងការបញ្ចុះបញ្ចូល Mbappe) ដូចអ្វីដែលខ្ញុំបានធ្វើកន្លងមក»។

លោក Emmanuel Macron លើកទឹកចិត្ត Kylian Mbappe នៅ World Cup 2022

កាលពីឆ្នាំមុន ប្រធានាធិបតីបារាំង ក៏បានជជែកគ្នាជាមួយ Mbappe ទាក់ទងនឹងអនាគតរបស់កីឡាករនេះ ហើយ PSG ក៏រក្សាបាន Mbappe មួយឆ្នាំទៀត។ ក៏ប៉ុន្តែ លើកនេះ ស្ថានភាពនៅក្លឹប PSG ហាក់មិនល្អប្រសើរ គ្រាដែលកីឡាករកំពូលៗរបស់ក្លឹបនេះ មានដូចជា Messi ជាដើម ត្រូវបានអ្នកគាំទ្ររបស់ PSG ធ្វើបាបផ្លូវចិត្ត ហើយជើងខ្លាំងខ្លះក៏ចាកចេញ ឬមានបំណងចាកចេញជាបន្តបន្ទាប់ ស្របពេលដែលទីផ្សារក្រៅប្រទេសកំពុងមានភាពទាក់ទាញខ្លាំង៕

June 15, 2023

កុមារបួននាក់ដែលបាត់ខ្លួនជាងប្រាំសប្ដាហ៍ក្នុងព្រៃអាម៉ាហ្សូន «នៅមានជីវិត»

កុមារបួននាក់មានអាយុចាប់ពីជិតមួយឆ្នាំដល់ 13 ឆ្នាំ ដែលវង្វេងផ្លូវក្នុងព្រៃអាម៉ាហ្សូន បន្ទាប់ពីជួបគ្រោះថ្នាក់ធ្លាក់យន្តហោះកាលពីថ្ងៃទី 01 ឧសភា ត្រូវបានសមត្ថកិច្ចកូឡុំប៊ីរកឃើញ និងសង្គ្រោះទាន់ពេល។

«ប្រទេសទាំងមូលសប្បាយរីករាយ! កុមារបួននាក់ដែលបាត់ខ្លួនក្នុងព្រៃជ្រៅនៅកូឡុំប៊ី នៅមានជីវិត» ប្រធានាធិបតីកូឡុំប៊ី លោក Gustavo Petro នៅថ្ងៃទី 10 មិថុនា បានសរសេរលើបណ្ដាញសង្គមដូច្នេះ។

ក្រុមកុមារនេះត្រូវបានទាហានកូឡុំប៊ីរកឃើញនៅក្បែរព្រំប្រទល់រវាងខេត្ត Caqueta និង Guaviare របស់ប្រទេសកូឡុំប៊ី ដែលនៅមិនឆ្ងាយប៉ុន្មានធៀបនឹងកន្លែងយន្តហោះដឹកគ្រួសាររបស់ពួកគេបានជួបគ្រោះថ្នាក់កាលពីថ្ងៃទី 01 ឧសភា។

ក្រុមសង្គ្រោះរបស់កូឡុំប៊ី ធ្វើការយ៉ាង «ដុតដៃដុតជើង» នៅក្នុងការតាមស្វែងរកក្រុមកុមារបាត់ខ្លួននេះ។ បណ្ដាញផ្សព្វផ្សាយក្នុងស្រុកបានរាយការណ៍ថា Wilson ដែលជាសុនកជំនាញ បានបាត់ខ្លួនក្នុងពេលតាមស្វែងរក ក៏ត្រូវបានរកឃើញនៅជាមួយកុមារទាំងនេះផងដែរ។

ពេលបានរកឃើញ កុមារទាំងនេះមានអាការៈបាត់បង់ជាតិទឹក នៅលើខ្លួនមានស្នាមសត្វល្អិតខាំ និងបាក់កម្លាំង។ កងទ័ពកូឡុំប៊ី បានបញ្ជូនឧទ្ធម្ភាគចក្រទៅកាន់កន្លែងកើតហេតុដើម្បីនាំកុមារទាំងនេះទៅកាន់មន្ទីរពេទ្យ។

កាលពីថ្ងៃទី 01 ឧសភា 2023 យន្តហោះខ្នាតតូច Cessna 206 ដឹកមនុស្ស 7 នាក់ពី Araracuara ទៅកាន់ San Jose del Guaviare ដែលជាទីក្រុងស្ថិតក្នុងព្រៃជ្រៅអាម៉ាហ្សូនរបស់ប្រទេសកូឡុំប៊ី។ អ្នកដំណើរលើយន្តហោះរួមមាន មេដឹកនាំជនជាតិដើម Huitoto និងស្ត្រីជនជាតិដើមម្នាក់ឈ្មោះ Magdalena Mucutui Valencia រួមនឹងកូនបួននាក់។

ក្រោយពីយន្តហោះហោះឡើងបានប៉ុន្មាននាទី ពីឡុតក៏ផ្ដល់សញ្ញាគ្រោះថ្នាក់ទាក់ទងនឹងម៉ាស៊ីន។ ក្រោយមកទៀត យន្តហោះនេះក៏បានបាត់ខ្លួនពីរ៉ាដា។

ក្នុងថ្ងៃទី 15 និង 16 ឧសភា ក្រុមទាហានកូឡុំប៊ី បានរកឃើញសាកសពរបស់អ្នកបើកបរយន្តហោះ និងមនុស្សចាស់ពីរនាក់នៅតំបន់ Caqueta។ កុមារបួននាក់នៅលើយន្តហោះជួបគ្រោះថ្នាក់នេះក៏បានបាត់ខ្លួន។ បន្ទាប់មក សុនកជំនាញ និងកងកម្លាំងសង្គ្រោះក៏បានរកឃើញដបទឹកដោះគោសម្រាប់ទារក ស្បែកជើង ខោអាវ និងផ្លែឈើដែលក្មេងទាំងនេះបានខាំ នៅមិនឆ្ងាយប៉ុន្មានពីកន្លែងធ្លាក់យន្តហោះ។

មកដល់ថ្ងៃទី 17 ឧសភា កម្លាំងសង្គ្រោះបានរកឃើញជម្រកមួយដែលធ្វើពីមែកឈើ។ សុនកជំនាញក៏បានរកឃើញកន្ត្រៃ និងខ្សែចងសក់។ Fidencia Valencia ដែលជាជីតារបស់កុមារទាំងបួននាក់នេះធ្លាប់បានប្រាប់ថា ក្មេងទាំងនេះរស់នៅស៊ាំនឹងព្រៃជ្រៅ ហើយប្រហែលជាកំពុងគេចខ្លួនដោយសារការភ័យខ្លាច។ ក្មេងស្រីច្បងក្នុងចំណោមកុមារបួននាក់នេះ ចេះដឹងច្រើនទាក់ទងនឹងការរក្សាជីវិតនៅក្នុងព្រៃជ្រៅ៕

June 10, 2023

វីដេអូ៖ តំណាងរាស្ត្រប្រហែលម្ភៃនាក់វាយតប់គ្នាក្នុងសភានៅបូលីវី

តំណាងរាស្ត្រច្រើនរូបនៅសភាបូលីវី វាយតប់ បោចសក់គ្នានៅក្នុងសភានៅពេលតំណាងរដ្ឋាភិបាលវាយការណ៍អំពីការដាក់ពន្ធនាគារចំពោះអតីតអភិបាលមួយរូប។

រដ្ឋមន្ត្រី Eduardo del Castillo កាលពីថ្ងៃទី 23 ឧសភា ត្រូវបានសភាបូលីវីកោះហៅឱ្យចូលមករាយការណ៍អំពីករណីលោក Luis Fernando Camacho អតីតអភិបាលតំបន់ Santa Cruz និងជាអ្នកនយោបាយដ៏ល្បីឈ្មោះរបស់បក្សប្រឆាំង ដែលត្រូវបានកាត់ទោសឱ្យជាប់ពន្ធនាគារ 12 ឆ្នាំ ក្រោមការចោទប្រកាន់ថា មានផែនការធ្វើរដ្ឋប្រហារ។

លោក Castillo ការពារសេចក្ដីសម្រេចចំពោះការកាត់ទោសអតីតអភិបាល Camacho ព្រមទាំងបានរិះគន់ថា ក្រុមតំណាងរាស្ត្របក្សរបស់លោក Camacho ជា «ក្រុមជ្រុលនិយម លួចប្លន់ ហិង្សា ចូលចិត្តរឹបអូបទ្រព្យរបស់ប្រជាជនបូលីវី»។

ពេលលោក Castillo កំពុងនិយាយ តំណាងរាស្ត្រមួយក្រុមរបស់បក្សប្រឆាំង នាំគ្នាលើកបដាប្រឆាំងនឹងការដាក់ទោសលើលោក Camacho អមនឹងអក្សរមួយឃ្លា «រដ្ឋមន្ត្រីភេរវកម្ម»។ ក្នុងពេលតំណាងរាស្ត្រមួយក្រុមដែលគាំទ្ររដ្ឋាភិបាលព្យាយាមដណ្ដើមយកបដា ភ្លាមនោះ តំណាងរាស្ត្រប្រហែល 20 នាក់ ភាគច្រើនជាស្ត្រី ក៏ចូលទៅវាយតប់ និងបោចសក់គ្នាក្នុងសភា។

ប៉ុន្មាននាទីក្រោយមក ហេតុការណ៍វាយតប់គ្នាក៏បានបញ្ចប់នៅពេលក្រុមតំណាងរាស្ត្រជាបុរសចូលធ្វើអន្តរាគមន៍។ ក្នុងហេតុការណ៍នេះពុំមានអ្នករងរបួសធ្ងន់ធ្ងរនោះទេ។

នេះគឺជាហេតុការណ៍ថ្មីបំផុតដែលបង្ហាញអំពីស្ថានការណ៍ប្រកាន់បក្សពួកក្នុងរឿងនយោបាយនៅ បូលីវី ជាប្រទេសដែលបក្សប្រឆាំងប្រកាសថា សកម្មជនបក្សប្រឆាំងប្រហែល 180 នាក់កំពុងត្រូវបានឃុំខ្លួន។

រដ្ឋាភិបាលរបស់ប្រធានាធិបតី Luis Arce បានចោទប្រកាន់សកម្មជនទាំងនោះថា បានគាំទ្ររដ្ឋប្រហារប្រឆាំងអតីតប្រធានាធិបតី Evo Morales កាលពីឆ្នាំ 2019 និងជួយឱ្យលោកស្រី Jeanine Anez អ្នកនយោបាយស្ដាំនិយមឡើងកាន់អំណាច។

យោងតាម AFP លោក Arce ធ្លាប់ជារដ្ឋមន្ត្រីសេដ្ឋកិច្ចក្នុងសម័យប្រធានាធិបតី Morales និងត្រូវសុំសិទ្ធិជ្រកកោននៅប្រទេសម៉ិកស៊ិក នៅពេលលោក Morales ត្រូវបានផ្ដួលរំលំ។ ក្រោយមក លោក Arce ក៏បានត្រលប់មកប្រទេស និងត្រូវបានបោះឆ្នោតជាប្រធានាធិបតីបូលីវីកាលពីឆ្នាំ 2020 គ្រាដែលលោកស្រី Anez ត្រូវបានកាត់ទោសឱ្យជាប់ពន្ធនាគារ៕

May 25, 2023

កូឡុំប៊ីដកសេចក្ដីប្រកាសស្ដីពីការរកឃើញកុមារបួននាក់នៅមានជីវិតក្នុងព្រៃអាម៉ាហ្សូន ក្រោយគ្រោះថ្នាក់យន្តហោះ

ប្រធានាធិបតីកូឡុំប៊ី បានដកសេចក្ដីប្រកាសស្ដីពីការរកឃើញកុមារបួននាក់នៅមានជីវិតក្រោយពីបានជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន កាលពី 17 ថ្ងៃមុននោះ ហើយថា លោកសោកស្ដាយចំពោះការភាន់ច្រឡំនេះ។

«ខ្ញុំសូមអភ័យទោសនូវអ្វីដែលបានកើតឡើង។ កងទ័ព និងសហគមន៍ជនជាតិដើមនឹងបន្តស្វែងរកមិនឈប់ឈរ ដើម្បីនាំយកព័ត៌មានដែលប្រទេសជាតិទាំងមូលកំពុងទន្ទឹងរង់ចាំ» ប្រធានាធិបតីកូឡុំប៊ី លោក Gustavo Petro បង្ហោះសារនៅលើ Twitter កាលពីថ្ងៃទី 18 ឧសភាដូច្នេះ។

លោក Petro ក៏បានលុបអត្ថបទដែលបានបង្ហោះកាលពីមួយថ្ងៃមុននោះ ដែលនិយាយថា កងទ័ពបានរកឃើញកុមារបីនាក់ដែលមានអាយុ 4, 9, 13 ឆ្នាំ និងទារកម្នាក់អាយុ 11 ខែ ដែលបាត់ខ្លួនបន្ទាប់ពីជួបគ្រោះថ្នាក់ធ្លាក់យន្តហោះ។ យោងតាមប្រធានាធិបតី Petro ព័ត៌មានភាន់ច្រឡំនេះត្រូវបានរាយការណ៍ដោយវិទ្យាស្ថានសុខុមាលភាពគ្រួសាររបស់រដ្ឋាភិបាល។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប៕

May 19, 2023

កុមារបួននាក់វង្វេងក្នុងព្រៃអាម៉ាហ្សូនអស់ 17 ថ្ងៃ ប៉ុន្តែសំណាងល្អនៅមានជីវិត

កងកម្លាំងជួយសង្គ្រោះបានរកឃើញកុមារបួននាក់ដែលបានបាត់ខ្លួនអស់រយៈពេល 17 ថ្ងៃ ក្រោយពីជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន ដែលស្ថិតក្នុងប្រទេសកូឡុំប៊ី។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

«នៅក្នុងការប្រឹងប្រែងមិនឈប់ឈរ កងទ័ពបានរកឃើញក្មេងបួននាក់ដែលបានបាត់ខ្លួនក្រោយហេតុការណ៍ធ្លាក់យន្តហោះនៅ Guaviare» ប្រធានាធិបតីកូឡុំប៊ី Gustavo Petro ប្រកាសលើ Twitter កាលពីថ្ងៃទី17 ឧសភាដូច្នេះ ហើយថា ការរកឃើញនេះគឺជា «ភាពរីករាយសម្រាប់ប្រទេសជាតិ»។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

មួយក្នុងចំណោមឧទ្ធម្ភាគទាំងបីគ្រឿងបំពាក់ឧបករណ៍បំពងសំឡេង បានធ្វើការស្វែងរកក្នុងរង្វង់ 1,500 ម៉ែត្រ និងបានចាក់ផ្សាយសំឡេងជីដូនរបស់ក្មេងទាំងនោះ ដែលប្រាប់ថា «ឈប់ផ្លាស់ទីក្នុងព្រៃដើម្បីរង់ចាំការជួយសង្គ្រោះ»។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប។

ក្មេងរងគ្រោះទាំងបួននាក់នេះត្រូវបានរកឃើញក្នុង «ស្ថានភាពសុខភាពធម្មតា បើទោះមានរបួសស្នាមខ្លះ» ក្រោយពីរង្វេង 17 ថ្ងៃនៅក្នុងព្រៃ។

អាជ្ញាធរមិនទាន់ប្រកាសអំពីមូលហេតុនៃករណីធ្លាក់យន្តហោះនេះនៅឡើយ។ ប៉ុន្តែ ប៉ុន្មាននាទីមុនពេលជួបគ្រោះថ្នាក់ ពីឡុតបានបញ្ជូនសញ្ញាប្រាប់ថា ម៉ាស៊ីនយន្តហោះមានបញ្ហា។ ជនជាតិកូឡុំប៊ី នៅក្នុងតំបន់ខាងលើនេះ តែងតែធ្វើដំណើរតាមឧទ្ធម្ភាគចក្រ ដោយសារតែផ្លូវគោកមិនមានអំណោយផលល្អសម្រាប់ការធ្វើដំណើរ។

យោងតាមអង្គការជនជាតិដើមភាគតិចកូឡុំប៊ី (ONIC) ជីវភាពរបស់ជនជាតិ Huitoto បានសម្របខ្លួននឹងស្ថានភាពលំបាកនៅក្នុងព្រៃអាម៉ាហ្សូន និងថែរក្សាប្រពៃណីបរបាញ់សត្វ ក៏ដូចជាមានជំនាញក្នុងការបេះផ្លែឈើក្នុងព្រៃជាអាហារ៕

May 18, 2023

រុស្ស៊ី ប្រារព្ធពិធីដង្ហែព្យុហយាត្រាអបអរជ័យជម្នះនៅថ្ងៃនេះ

ព្រឹត្តិការណ៍ដង្ហែក្បួនព្យុហយាត្រាអបអរជ័យជម្នះរបស់រុស្ស៊ី គ្រោងនឹងធ្វើឡើងនៅល្ងាចនេះនៅឯទីលានក្រហម ដោយមានការចូលរួមរបស់ទាហានរុស្ស៊ីជាង 10,000 នាក់ រួមនឹងអាវុធនានារបស់ប្រទេសនេះ។

ពិធីដង្ហែក្បួនព្យុហយាត្រាអបអរជ័យជម្នះ 78 ឆ្នាំនៃថ្ងៃកងទ័ពក្រហមសូវៀត បានផ្ដួលរំលំរបបហ្វាស៊ីសអាល្លឺម៉ង់ បញ្ចប់សង្គ្រាមស្នេហាជាតិដ៏អស្ចារ្យ (Great Patriotic War) នេះ នឹងធ្វើឡើងនៅវេលាម៉ោង 10 ថ្ងៃទី 09 ឧសភា (ម៉ោងប្រហែល 14 នៅកម្ពុជា) នៅទីលានក្រហម (Red Square) ក្នុងរដ្ឋធានីមូស្គូ។ ទាហានរុស្ស៊ីជាង 10,000 នាក់ រួមនឹងអង្គភាពអាវុធចំនួន 125 នឹងចូលរួមពិធីខាងលើនេះ។

ប្រធានាធិបតីរុស្ស៊ី លោក ពូទីន រួមនឹងមេដឹកនាំប្រទេសមួយចំនួន ក្នុងនោះមាន បេឡារុស អាមេនី កៀហ្ស៊ីស៊ីស្ថាន តាហ្ស៊ីគីស្ថាន អ៊ូសបេគីស្ថាន និងកាហ្សាក់ស្ថានជាដើម នឹងបង្ហាញវត្តមាននៅក្នុងព្រឹត្តិការណ៍នេះផងដែរ។

ពិធីដង្ហែព្យុហយាត្រាអបអរជ័យជម្នះនៅក្នុងឆ្នាំនេះរបស់រុស្ស៊ី ធ្វើឡើងក្នុងស្ថានការណ៍សន្តិសុខត្រូវបានរឹតបន្តឹងខ្លាំងនៅទូទាំងប្រទេស បន្ទាប់ពីមានការវាយប្រហារពីយន្តហោះគ្មានមនុស្សបើកបរ (UAV) ទៅលើហេដ្ឋារចនាសម្ព័ន្ធជាច្រើនករណី គ្រាដែលកងទ័ពប្រទេសនេះកំពុងឈ្លានពានទឹកដីអ៊ុយក្រែន។

សង្គ្រាមស្នេហាជាតិដ៏អស្ចារ្យ (1941-1945) គឺជាសង្គ្រាមធំបំផុត និងបង្កឱ្យមានមនុស្សស្លាប់ និងរបួសច្រើនបំផុតក្នុងប្រវត្តិសាស្ត្រមនុស្សជាតិ ក្នុងនោះមានទាហាន និងប្រជាជនសូវៀត ប្រហែល 27 លាននាក់បានបាត់បង់ជីវិតដើម្បីការពារប្រទេស និងមនុស្សជាតិពីពួកហ្វាស៊ីសនិយម។

សង្គ្រាមនេះបានបញ្ចប់នៅថ្ងៃទី 09 ឧសភា 1945 នៅពេលតំណាងហ្វាស៊ីសអាល្លឺម៉ង់ ចុះហត្ថលេខាទទួលស្គាល់ការចុះចាញ់ដោយគ្មានលក្ខខណ្ឌនៅចំពោះមុខតំណាងសម្ព័ន្ធមិត្តនៅបែរឡាំង។ កងទ័ពក្រហមសូវៀតបានប្រារព្ធពិធីដង្ហែក្បួនព្យុហយាត្រាអបអរជ័យជម្នះជាលើកដំបូងកាលពីថ្ងៃទី 24 មិថុនា 1945។ ក្រោយមក ព្រឹត្តិការណ៍នេះក៏ត្រូវបានធ្វើឡើងនៅថ្ងៃទី 09 ឧសភា ក្នុងឆ្នាំ 1965, 1985 និង 1990។

ក្រោយពីសូវៀតបានដួលរលំ រុស្ស៊ីក៏បានប្រារព្ធពិធីនេះឡើងវិញនៅមូស្គូចាប់ពីឆ្នាំ 1995។ ចាប់តាំងពីពេលនោះមក ព្រឹត្តិការណ៍នេះក៏ត្រូវបានធ្វើឡើងជារៀងរាល់ឆ្នាំនៅថ្ងៃទី 09 ឧសភា។ ក៏ប៉ុន្តែ កាលពីឆ្នាំ 2020 ព្រឹតត្តិការណ៍នេះត្រូវបានលើកទៅធ្វើនៅថ្ងៃទី 24 មិថុនា ដោយសារតែវិបត្តិកូវីដ-19៕

May 9, 2023

អាម៉េរិកអាចផ្ដល់ជំនួយជាអាវុធតម្លៃ 500 លានដុល្លារដល់កោះតៃវ៉ាន់

រដ្ឋាភិបាលអាម៉េរិក អាចយកអាវុធតម្លៃ 500 លានដុល្លារពីឃ្លាំង ដើម្បីជញ្ជូនទៅឱ្យកោះតៃវ៉ាន់ភ្លាមៗ ក្នុងពេលភាពតានតឹងក្នុងតំបន់បន្តកើតឡើង។

ប្រភពព័ត៌មាននានា កាលពីថ្ងៃទី 05 ឧសភា បានឱ្យដឹងថា កញ្ចប់ជំនួយសម្រាប់កោះតៃវ៉ាន់ នឹងទាក់ទិននឹងការដកអាវុធ ឬសម្ភារៈជំនួយនៅក្នុងឃ្លាំងអាវុធរបស់សហរដ្ឋអាម៉េរិក ទៅតាមច្បាប់ «សិទ្ធិបែងចែកប្រភពធនធានរបស់ប្រធានាធិបតី (PDA)» ប៉ុន្តែមិនទាន់ដឹងច្បាស់អំពីប្រភេទអាវុធ ក៏ដូចជាពេលវេលានៃការប្រគល់អាវុធ។

អ្នកនាំពាក្យរបស់មន្ទីរបញ្ចកោណ ក្រោយមកក៏បានបដិសេធការអធិប្បាយអំពីបញ្ហាដែលថា តើសហរដ្ឋអាម៉េរិកបានពន្លឿនការផ្ដល់ជំនួយជាអាវុធតម្លៃ 500 លានដុល្លារទៅឱ្យកោះតៃវ៉ាន់ ឬអត់។ «វិធីដែលយើងធ្វើគឺនៅតែសមស្របជាមួយនឹងគោលនយោបាយយូរអង្វែងរបស់សហរដ្ឋអាម៉េរិក។ យើងកំពុងប្រឹងប្រែងអនុវត្តកាតព្វកិច្ចទៅតាមច្បាប់ស្ដីពីទំនាក់ទំនងជាមួយកោះតៃវ៉ាន់ ហើយនឹងបន្តធ្វើដូច្នេះ» នេះបើតាមអ្នកនាំពាក្យរបស់មន្ទីរបញ្ចកោណ។

អាជ្ញាធរចិននៅទីក្រុងប៉េកាំង មិនទាន់បញ្ចេញប្រតិកម្មតបតនៅឡើយ ទាក់ទិននឹងព័ត៌មាន និងការលើកឡើងខាងលើ។

សភាអាម៉េរិក មុននោះបានផ្ដល់សិទ្ធិឱ្យរដ្ឋាភិបាលផ្ដល់ជំនួយជាអាវុធតម្លៃមួយពាន់លានដុល្លារដល់កោះតៃវ៉ាន់ ទៅតាមច្បាប់ PDA ក្នុងករណីចាំបាច់ ដោយមិនត្រូវរង់ចាំការយល់ព្រមពីសភា។ សហរដ្ឋអាម៉េរិកធ្លាប់បានប្រើប្រាស់យន្តការបែបនេះជាង 30 លើក ដើម្បីជញ្ជូនអាវុធឱ្យអ៊ុយក្រែន។

ព័ត៌មានស្ដីពីការផ្ដល់ជំនួយជាអាវុធខាងលើ បានលេចឡើងនៅពេលស្ថានការណ៍តានតឹងនៅច្រកសមុទ្រតៃវ៉ាន់ បន្តកើនឡើង។

ប្រទេសចិនតែងតែចាត់ទុកកោះតៃវ៉ាន់ជាខេត្តមួយរបស់ខ្លួន ដែលរង់ចាំតែការបង្រួបបង្រួមប៉ុណ្ណោះ ហើយថា នឹងប្រើកម្លាំងបាយយកមកកាន់កាប់ បើសិនចាំបាច់។ ចំណែកសហរដ្ឋអាម៉េរិកវិញ បានសន្យាគោរពគោលការណ៍ «ចិនតែមួយ» ប៉ុន្តែបន្តរក្សាទំនាក់ទំនង ការពារ និងលក់អាវុធឱ្យកោះតៃវ៉ាន់។

ច្បាប់ស្ដីពីទំនាក់ទំនងជាមួយកោះតៃវ៉ាន់ ត្រូវបានអតីតប្រធានាធិបតីអាម៉េរិក Jimmy Carter ចុះហត្ថលេខាក្រោយពីសហរដ្ឋអាម៉េរិក បង្កើតទំនាក់ទំនងការទូតជាមួយប្រទេសចិន កាលពីឆ្នាំ 1979។ ច្បាប់នេះតម្រូវឱ្យសហរដ្ឋអាម៉េរិក ជួយគាំទ្រដល់សមត្ថភាពការពារខ្លួនរបស់កោះតៃវ៉ាន់៕

May 6, 2023

តួកគីប្រកាសព័ត៌មានលម្អិតថ្មីបំផុតស្ដីពីយុទ្ធនាការកម្ចាត់មេដឹកនាំកំពូលរបស់ «រដ្ឋអ៊ីស្លាម (IS)»

ប្រទេសតួកគីបានប្រកាសអំពីយុទ្ធនាការបួនម៉ោងនៅប្រទេសស៊ីរី ដើម្បីកំណត់ទីតាំង និងកម្ចាត់មេបញ្ជាការកំពូលបច្ចុប្បន្នរបស់ក្រុមភេរវកម្មរដ្ឋអ៊ីស្លាម (Islamic State)។

បណ្ដាផ្សព្វផ្សាយរបស់រដ្ឋតួកគី កាលពីថ្ងៃទី 01 ឧសភា បានបញ្ចេញរូបថតថ្មីបំផុតស្ដីពីផ្ទះដ៏រឹងមាំស្ថិតនៅកណ្ដាលវាលស្រែនៃខេត្ត Afrin ប្រទេសស៊ីរី ជាទីដែលកម្លាំងពិសេសរបស់តួកគីបានធ្វើការវាយប្រហារកម្ចាត់មេបញ្ជាការកំពូលរបស់ក្រុមភេរវកររដ្ឋអ៊ីស្លាម (Islamic State) Abu al-Hussein al-Husseini al-Qurashi។

ទីភ្នាក់ងារសារព័ត៌មាន Anadolu បានឱ្យដឹងថា ក្រោយពីបានកំណត់ទីតាំងផ្ទះនេះ ដែលជាកន្លែងស្នាក់នៅរបស់ Qurashi ស្ថាប័នស៊ើបការណ៍សម្ងាត់របស់តួកគី (MIT) ក៏បានធ្វើយុទ្ធនាការរយៈពេលបួនម៉ោងក្នុងថ្ងៃទី 29 មេសា ដើម្បីឡោមព័ទ្ធមេភេរវករ។

MIT បានបំផ្ទុះជញ្ជាំងជុំវិញផ្ទះ មុននឹងសម្រុកចូលតាមច្រកទ្វារខាងក្រោយ និងតាមបង្អួច។ រូបភាពដែលត្រូវបានបញ្ចេញបង្ហាញថា មួយផ្នែករបស់ផ្ទះពីរជាន់នេះបានខូចខាតច្រើន។

មេបញ្ជាការកំពូលរបស់ក្រុមភេរវកម្មរដ្ឋអ៊ីស្លាម (Islamic State) Abu al-Hussein al-Husseini al-Qurashi

Qurashi បានចុចបំផ្ទុះគ្រាប់បែកអត្តឃាតនៅពេលដឹងថា ខ្លួនជិតត្រូវបានគេចាប់។ ក្នុងការវាយលុកនេះ ភាគីខាងតួកគីពុំមានអ្នកស្លាប់ ឬរងរបួសនោះទេ។

ប្រធានាធិបតីតួកគី Recep Tayyip Erdogan កាលពីថ្ងៃទី 30 មេសា បានប្រកាសថា កម្លាំងស៊ើបការណ៍សម្ងាត់របស់ប្រទេសនេះបានកម្ចាត់ Qurashi នៅក្នុងយុទ្ធនាការមួយនៅប្រទេសស៊ីរី។

Qurashi គឺជាមេបញ្ជាការកំពូលទីបួនរបស់ IS ដែលត្រូវបានតែងតាំងកាលពីខែវិច្ឆិកា 2022 បន្ទាប់ពីការស្លាប់របស់មេដឹកនាំកំពូល Abu al-Hassan al-Hashemi al-Quraishi។ Qurashi បានចូលក្រុម IS ក្នុងឆ្នាំ 2013 និងបានទទួលការតែងតាំងជាបន្តបន្ទាប់យ៉ាងឆាប់រហ័សនៅក្នុងក្រុមភេរវករ។

ផ្ទះរបស់មេភេរវករ រដ្ឋអ៊ីស្លាម (Islamic State) Abu al-Hussein al-Husseini al-Qurashi

តួកគីបានបញ្ជូនទ័ពទៅកាន់ភាគខាងជើងប្រទេសស៊ីរីតាំងពីឆ្នាំ 2020 និងគ្រប់គ្រងតំបន់ដ៏ធំមួយដោយមានការជួយគាំទ្រពីបណ្ដាក្រុមបះបោរនៅប្រទេសស៊ីរី៕

May 2, 2023

ប្រទេសហុងគ្រី មានប្រធានាធិបតីជាស្ត្រីភេទលើកដំបូងបង្អស់នៅក្នុងប្រវត្តិសាស្ត្រ

នាថ្ងៃទី ១០ មីនា ២០២២ សភារបស់ ប្រទេសហុងគ្រី បានបោះឆ្នោតជ្រើសរើសអតីតរដ្ឋមន្ត្រីទទួលបន្ទុកកិច្ចការគ្រួសារ លោកស្រី Katalin Novak ឱ្យធ្វើជាប្រធានាធិបតីថ្មីរបស់ប្រទេសនេះ។ នេះគឺជាលើកដំបូងហើយដែល ហុងគ្រី មានប្រធានាធិបតីជាស្ត្រីភេទ។

នៅក្នុងការបោះឆ្នោតនៅសភា លោកស្រី Novak បានទទួលសន្លឹកឆ្នោតគាំទ្រចំនួន ១៣៧ សំឡេង និងប្រឆាំង ៥១ សំឡេង ដូច្នេះលោកបានយកឈ្នះលើគូប្រជែង Peter Rona ដែលជាសេដ្ឋវិទូមួយរូប។ លោកស្រី Novak នឹងឡើងកាន់អំណាចបន្តពីលោក Janos Ader ដែលនឹងត្រូវអស់អាណត្តិទី ២ របស់លោក នៅថ្ងៃទី ១០ ឧសភាខាងមុខ។

លោកស្រី Novak វ័យ ៤៤ ឆ្នាំ នឹងក្លាយជាប្រធានាធិបតីក្មេងបំផុតក្នុងប្រវត្តិសាស្ត្ររបស់ ហុងគ្រី និងជាប្រធានាធិបតីស្រីដំបូងគេនៅក្នុង សហភាពអឺរ៉ុប (EU)។

ការបោះឆ្នោតប្រធានាធិបតីខាងលើ ត្រូវបានធ្វើឡើងនៅក្នុងគ្រាដែលនៅសល់តែប៉ុន្មានសប្ដាហ៍ទៀតប៉ុណ្ណោះ នឹងដល់ថ្ងៃបោះឆ្នោតសភា (៣ មេសា) នៅប្រទេសនេះ។ នាយករដ្ឋមន្ត្រីហុងគ្រី លោក Viktor Orban បានចាប់ផ្ដើមយុទ្ធនាការឃោសនារកសំឡេងឆ្នោត ដោយសង្ឃឹមថា នឹងបានជាប់ឆ្នោតនៅក្នុងអាណត្តិទី ៤ របស់លោក ជាបន្តទៀត៕

March 10, 2022

Tag: ប្រធានាធិបតី