បង្ហាញ - La Reine Media

យន្តហោះល្បឿនលឿនជាងសំឡេង 7 ដង អាចហោះហើរចាប់ពីឆ្នាំក្រោយ

យន្តហោះល្បឿនលឿនជាងសំឡេងដែលត្រូវបានអភិវឌ្ឍដោយក្រុមហ៊ុន Hypersonix Launch Systems កំពុងឆ្ពោះទៅជិតដល់ដំណាក់កាលហោះហើរសាកល្បងដោយស្វ័យប្រវត្ត ទៅតាមកម្មវិធីរបស់ស្ថាប័នគំនិតផ្ដួចផ្ដើមការពារជាតិអាម៉េរិក (DIU)។

យន្តហោះសាកល្បងល្បឿនលឿន Dart AE កំពុងត្រូវបានអភិវឌ្ឍដោយក្រុមហ៊ុនអូស្ត្រាលី Hypersonix Launch Systems បន្ទាប់ពីបានសហការជាមួយ DIU។ នេះគឺជាយន្តហោះគំរូសម្រាប់បង្ហាញបច្ចេកវិទ្យា។ Dart AE ដែលមានប្រវែង 3 ម៉ែត្រ និងទម្ងន់ 300 គីឡូក្រាម អាចហោះក្នុងល្បឿន Mach 7 (8,643 គីឡូម៉ែត្រ/ម៉ោង)។

យោងតាមទំព័រ Space ដែលបានចុះផ្សាយកាលពីថ្ងៃទី 11 មិថុនា 2023 យន្តហោះ Dart AE អាចហោះបានចម្ងាយ 1,000 គីឡូម៉ែត្រ បន្ទាប់ពីបានចាក់ឥន្ធនៈមួយពេញ។

រូបភាពពង្រីកស្ដីពីនេប៊ូឡា Orion ជាទីដែលមានផ្ទុកសញ្ញានៃជីវិតដែលជិតកកើត

DART AE ប្រើប្រាស់ម៉ាស៊ីនប្រតិកម្មប្រភេទត្រង់ជំនាន់ទីប្រាំ Spartan របស់ Hypersonix និងអាចត្រូវបានបាញ់បង្ហោះឡើងទៅលើអាកាសដោយរ៉ុក្កែតគ្មានមនុស្សបើក។

Dart AE ស្ថិតក្នុងកម្មវិធីអភិវឌ្ឍបច្ចេកវិទ្យាល្បឿនលឿនជាងសំឡេងរបស់សហរដ្ឋអាម៉េរិក។ យន្តហោះនេះ អាចត្រៀមខ្លួនរួចរាល់សម្រាប់ការហោះហើរសាកល្បងលើកដំបូងនៅដើមរដូវក្ដៅឆ្នាំ 2024៕

June 28, 2023

GAC បង្ហាញយានប្រភេទគូ «រថយន្ត និងដ្រោន» eVTOL Gove

ក្រុមហ៊ុនផលិតរថយន្តមួយចំនួនកំពុងតែអភិវឌ្ឍ និងផលិតយានប្រភេទថ្មីៗនៅក្នុងវិស័យរថយន្ត និងយន្តហោះអគ្គិសនី (eVTOL) ក្នុងនោះក៏មានក្រុមហ៊ុន GAC Group ផងដែរ។

នៅក្នុងព្រឹត្តិការណ៍ទិវាបច្ចេកវិទ្យានាថ្ងៃនេះ GAC បានបង្ហាញយានដំណើរការដោយអគ្គិសនីប្រភេទ eVTOL មួយដែលត្រូវបានដាក់ឈ្មោះថា Gove។ GAC ឱ្យដឹងថា ពួកគេបានទទួលជោគជ័យក្នុងជើងហោះហើរដំបូង។

Gove គឺជាយានមួយគូ ក្នុងនោះដ្រោន និងគ្រោងខាងក្រោមអាចផ្ដាច់ចេញពីគ្នា ហើយពួកវាអាចភ្ជាប់នឹងគ្នាពេលបរលើដី និងផ្ដាច់ខ្លួនពេលហោះលើអាកាស។

Gove បំពាក់ប្រព័ន្ធបើកបរស្វ័យប្រវត្ត ADiGO-Pilot របស់ GAC និងមានប្រព័ន្ធហោះហើរដែលមានស្លាបចក្រសម្រាប់ហោះ និងស្លាបចក្រសម្រាប់បង្ការ ការពារសុវត្ថិភាព។ GAC ឱ្យដឹងដូច្នេះ។

Gove មានរូបរាងដូចទៅនឹងយានប្រភេទ eVTOL ដែលត្រូវបានជនជាតិចិនមួយក្រុមបង្ហាញកាលពីចុងឆ្នាំកន្លង។

GAC (Guangzhou Automobile Group Co., Ltd.) គឺជាក្រុមហ៊ុនរដ្ឋចិន ដែលមានទីស្នាក់ការកណ្ដាលនៅទីក្រុង Guangzhou ប្រទេសចិន។

June 27, 2023

ប្រហោងខ្មៅមហាយក្សនៅកណ្ដាលកាឡាក់ស៊ីរបស់មនុស្ស «ហែកស៊ី» ផ្កាយទើបកើត

Sagittarius A* ដែលអ្នកវិទ្យាសាស្ត្រនឹកស្មានថាបាន «ដេកលង់លក់» នៅកណ្ដាលកាឡាក់ស៊ីដែលមានផ្ទុកផែនដី ពេលនេះបែរជាបញ្ចេញសញ្ញាដ៏គួរឱ្យភ័យខ្លាច។

យានអវកាស IXPE របស់ណាសាថតបាន «សញ្ញាពីឋាននរក» ដែលបញ្ជាក់ថា ប្រហោងខ្មៅរបស់កាឡាក់ស៊ីមីលគីវ៉េ (Milky Way) មិនបានដេកលង់លក់ទាំងស្រុងដូចអ្នកវិទ្យាសាស្ត្របានគិតឡើយ។

Sagittarius A* គឺជាប្រហោងខ្មៅនៅកណ្ដាលកាឡាក់ស៊ីមីលគេវ៉េដែលបានឆ្លងផុតដំណាក់កាលលេបត្របាក់ដ៏កាចសាហាវ។ វាមានម៉ាសធំជាងព្រះអាទិត្យប្រហែលនឹង 4.1 លានដង និងស្ថិតក្នុងក្រុមប្រហោងខ្មៅដែលធំជាងគេក្នុងចក្រវាល។

Sagittarius A* ស្ថិតនៅកណ្ដាលកាឡាក់ស៊ីមីលគីវ៉េ

ក៏ប៉ុន្តែ ថ្មីៗនេះមានភស្ដុតាងកាន់តែច្រើនបង្ហាញថា ប្រហោងខ្មៅនេះនៅតែ «ចាប់ស៊ី» វត្ថុអវកាសទាំងឡាយណាដែលគោចរមកក្បែរមាត់របស់វា។

យានអវកាស IXPE កត់ត្រាបានពន្លឺចែងចាំងឡើងខុសធម្មតារបស់ពពកបង្កបង្កើតផ្កាយ (Molecular cloud) ស្ថិតនៅក្បែរចំណុចកណ្ដាលរបស់ប្រហោងខ្មៅ Sagittarius A* និងបានដឹងថា វាកំពុងបញ្ចេញពន្លឺខ្លាំងជាងការគ្រោងទុក។

ការវិភាគបានបង្ហាញថា ពន្លឺនេះពុំមែនពពកបង្កបង្កើតផ្កាយជាអ្នកបញ្ចេញ ប៉ុន្តែវាគ្រាន់តែជាចំណាំងប្លាតពន្លឺពីហេតុការណ៍ផ្ទុះរបស់ Sagittarius A*។

ការគណនារបស់ក្រុមអ្នកវិទ្យាសាស្ត្របារាំងបានបង្ហាញថា ហេតុការណ៍ផ្ទុះនេះទើបតែកើតឡើងអំឡុងសតវត្សរ៍ទី XIX និងអូសបន្លាយពេលប្រហែលមួយឆ្នាំកន្លះ។

អ្នកវិទ្យាសាស្ត្រមិនទាន់ដឹងច្បាស់ថា វត្ថុអវកាសដែលត្រូវបានប្រហោងខ្មៅខាងលើហែកស៊ីគឺជាអ្វីនៅឡើយ ប៉ុន្តែបើតាមទ្រឹស្ត្រី វាអាចជាផ្កាយដែលទើបចាប់កំណើតពីពពកម៉ូលេគុលនៅក្បែរប្រហោងខ្មៅនោះ។

June 27, 2023

សំឡេងនាវា Titan បែកខ្ទេចដោយសារសម្ពាធ ត្រូវកងទ័ពដឹងតាំងពីដំបូង ប៉ុន្តែមិនបញ្ចេញជាសាធារណៈ

កងទ័ពជើងទឹកសហរដ្ឋអាម៉េរិក បានឮសំឡេងលាន់ឡើងដែលត្រូវគេជឿថាកើតចេញពីហេតុការណ៍រងសម្ពាធរហូតដល់នាវាមុជទឹក Titan ត្រូវបែកខ្ទេចខ្ទី ក្រោយពីនាវានេះបានចាប់ផ្ដើមមុជចូលទឹក។

Wall Street Journal កាលពីថ្ងៃទី 22 មិថុនា ដកស្រង់សម្ដីមន្ត្រីជាន់ខ្ពស់នៅក្នុងជួរទ័ពជើងទឹកអាម៉េរិក សុំមិនបញ្ចេញឈ្មោះ បានឱ្យដឹងថា កងកម្លាំងនេះបានចាប់ផ្ដើមតាមដាននាវាមុជទឹក Titan ភ្លាមៗបន្ទាប់ពីនាវានេះបានដាច់ទំនាក់ទំនងកាលពីថ្ងៃទី 18 មិថុនា។

យោងតាមមន្ត្រីខាងលើ ប្រព័ន្ធស្រូបសំឡេងក្រោមទឹកសម្ងាត់មួយរបស់ទ័ពជើងទឹកអាម៉េរិក ដែលត្រូវបានប្រើប្រាស់ដើម្បីស្វែងរកនាវាមុជទឹករបស់សត្រូវ «បានឮសំឡេងដែលបង្ហាញថា មានហេតុការណ៍រងសម្ពាធដល់បែកខ្ទេច ឬការផ្ទុះបែកមួយកើតឡើងនៅក្បែរតំបន់នាវាមុជទឹក Titan កំពុងបាត់ខ្លួន»។

ពួកគេបានជូនដំណឹងអំពីការរកឃើញខាងលើនេះទៅឱ្យកងកម្លាំងល្បាតឆ្នេរ ដែលជាអ្នកដឹកនាំការស្វែងរកនាវា Titan។ កងទ័ពជើងទឹកអាម៉េរិក ពេលនោះមិនទាន់អះអាងថា សំឡេងដែលបានឮគឺជាសំឡេងបាក់បែករបស់ Titan នៅឡើយ។ ពួកគេមិនបានប្រកាសព័ត៌មាននេះជាសាធារណៈ ក៏ព្រោះតែក្នុងបំណងធានាថា ការស្វែងរក និងសង្គ្រោះជីវិតទាន់ពេល នៅតែត្រូវបានធ្វើឡើង។ ការរកឃើញសញ្ញាសំឡេងខាងលើក៏បានជួយបង្រួមបរិវេណនៃតំបន់ស្វែងរក មុនពេលរកឃើញបំណែកនានាកាលពីថ្ងៃទី 22 មិថុនា។

«នាវា Titan ទំនងជាត្រូវរងសម្ពាធរហូតដល់បែកខ្ទេចតាំងតែពីថ្ងៃទី 18 មិថុនា នៅក្នុងដំណើរចុះទៅតំបន់សាកសពកប៉ាល់ Titanic ភ្លាមៗបន្ទាប់ពីដាច់ទំនាក់ទំនង នៅក្នុងជម្រៅប្រហែល 2,700 ម៉ែត្រ» ប្រភពព័ត៌មានពីទ័ពជើងទឹកអាម៉េរិកឱ្យដឹងដូច្នេះ។

June 23, 2023

ស្លាប់អស់ហើយ! នាវាមុជទឹក Titan ត្រូវខ្ទេចខ្ទីដោយសារសម្ពាធ បណ្ដាលឱ្យមនុស្សប្រាំនាក់បាត់បង់ជីវិត

កងកម្លាំងល្បាតសមុទ្រអាម៉េរិក បានឱ្យដឹងថា បណ្ដាបំណែកដែលពួកគេប្រមូលបានបង្ហាញថា នាវាមុជទឹក Titan ត្រូវរងសម្ពាធខ្លាំងរហូតដល់បែកខ្ទេច ធ្វើឱ្យមនុស្សប្រាំនាក់ក្នុងនាវានេះបាត់បង់ជីវិត។

ក្នុងសន្និសីទសារព័ត៌មាននៅទីក្រុង Boston រដ្ឋ Massachusetts កាលពីវេលាទៀបភ្លឺថ្ងៃទី 23 មិថុនា (ម៉ោងនៅកម្ពុជា) ឧត្ដមនាវី John Mauger របស់កងកម្លាំងល្បាតឆ្នេរអាម៉េរិក និយាយថា ឧបករណ៍ផ្លាស់ទីស្វ័យប្រវត្តក្រោមសមុទ្ររបស់កាណាដា បានរកឃើញបំណែកពីនាវាមុជទឹក Titan ដែលស្ថិតនៅចម្ងាយប្រហែល 488 ម៉ែត្រ ពីសាកសពកប៉ាល់ Titanic ក្នុងជម្រៅ 4,000 ម៉ែត្រ នៅមហាសមុទ្រអាត្លង់ទិកខាងជើង។

យោងតាមក្រុមជំនាញ បំណែកសំខាន់ចំនួនប្រាំរបស់នាវាមុជទឹកប្រវែង 6.7 ម៉ែត្រ ត្រូវបានរកឃើញនៅក្នុងចំណោមបំណែកមួយក្រុមដែលនៅសល់បន្ទាប់ពីនាវាបានបែកបាក់។ «បំណែកទាំងនេះបង្ហាញថា មានហេតុការណ៍រងសម្ពាធដ៏ខ្លាំងក្លាកើតឡើងនៅក្នុងកាប៊ីនប្រឆាំងសម្ពាធ» លោក Mauger ឱ្យដឹងដូច្នេះ។

ចំណែក OceanGate ដែលជាក្រុមហ៊ុនគ្រប់គ្រងនាវាមុជទឹក Titan ក៏ប្រកាសថា ពុំមានអ្នកណាម្នាក់នៅមានជីវិតឡើយ ក្នុងនោះក៏មានស្ថាបនិក និងជានាយកប្រតិបត្តិរបស់ OeanGate លោក Stockton Rush ផងដែរ។

នាវាមុជទឹក Titan បានបាត់ខ្លួនកាលពីថ្ងៃទី 18 មិថុនា ពេលកំពុងដឹកមនុស្ស 5 នាក់ ធ្វើដំណើរចុះទៅមើលសាកសពកប៉ាល់ Titanic ក្រោមបាតមហាសមុទ្រអាត្លង់ទិក ជម្រៅជិត 4,000 ម៉ែត្រ និងមានចម្ងាយពី Newfoundland របស់កាណាដា ប្រហែល 600 គីឡូម៉ែត្រ។

June 23, 2023

គ្រូបង្វឹក Mourinho ត្រូវបានពិន័យធ្ងន់ធ្ងរ ព្រោះតែជេរអាជ្ញាកណ្ដាល បន្ទាប់ពីវគ្គផ្ដាច់ព្រ័ត្រ Europa League

គ្រូបង្វឹករបស់ក្រុមបាល់ទាត់ Roma (អ៊ីតាលី) លោក Jose Mourinho បានទទួលពិន័យជាផ្លូវការពីសហព័ន្ធកីឡាបាល់ទាត់អឺរ៉ុប (UEFA) ដោយសារតែបង្ហាញទង្វើជេរប្រមាថអាជ្ញាកណ្ដាល បន្ទាប់ពីការប្រកួតវគ្គផ្ដាច់ព្រ័ត្រនៅពានរង្វាន់ Europa League 2022-2023។

ក្លឹបបាល់ទាត់ AS Roma បានចាញ់ Sevilla (អេស្ប៉ាញ) នៅក្នុងការប្រកួតទាត់ប៉េណាំងទី ក្នុងវគ្គផ្ដាច់ព្រ័ត្រ Europa League 2022-2023 ធ្វើឱ្យគ្រូបង្វឹក Jose Mourinho ផ្ទុះការខឹងនៅក្រោយការប្រកួត។ គ្រូបង្វឹកជនជាតិព័រទុយហ្កាល់រូបនេះ បានរង់ចាំអាជ្ញាកណ្ដាលនៅចំណត់ឡាន ហើយបានជេរប្រមាថលោក Anthony Taylor។ លោក Mourinho ក៏និយាយបញ្ឆិតបញ្ឆៀងក្នុងន័យថា អាជ្ញាកណ្ដាល Anthony Taylor កាន់ជើងខាងអេស្ប៉ាញ។

ពេលនោះ អ្នកគាំទ្ររបស់ក្រុម Roma ក៏បានស្រែកចំអកឱ្យអាជ្ញាកណ្ដាល Taylor ហើយថែមទាំងគប់កៅអីសំដៅអាជ្ញាកណ្ដាល នៅពេលគាត់ និងគ្រួសារព្យាយាមចាកចេញពីហុងគ្រីត្រលប់ទៅផ្ទះ។

គ្រូបង្វឹក Mourinho ជេរប្រមាថគ្រូបង្វឹក Taylor នៅចំណត់ឡាន

ថ្មីៗនេះ សហព័ន្ធកីឡាបាល់ទាត់អឺរ៉ុប បានសម្រេចចិត្តពិន័យលើគ្រូបង្វឹក Mourinho ដោយមិនឱ្យដឹកនាំបួនប្រកួតនៅអឺរ៉ុប ខណៈដែល Roma ឈរលំដាប់ទី 6 នៅ Serie A កាលពីរដូវកាលមុន ហើយមានលក្ខខណ្ឌគ្រប់គ្រាន់ដើម្បីចូលប្រកួតនៅ Europa League។

ក្រៅពីនេះ ក្លឹប Roma ក៏ត្រូវ UEFA ពិន័យ។ ពួកគេត្រូវបានហាមលក់សំបុត្រនៅឯទីលានដទៃក្នុងការប្រកួតបន្ទាប់នៅអឺរ៉ុប និងពិន័យជាប្រាក់ 5,000 អឺរ៉ូផងដែរ ហើយពួកគេក៏ត្រូវបានតម្រូវឱ្យទាក់ទងទៅកាន់សហព័ន្ធបាល់ទាត់ហុងគ្រីដើម្បីដោះស្រាយការខូចខាតដែលអ្នកគាំទ្ររបស់ Roma បានធ្វើឡើង៕

June 22, 2023

ក្រុមសង្គ្រោះក្នុងករណីនាវាមុជទឹក Titan បាត់ខ្លួន «ឮសំឡេងលាន់ខ្លាំងៗចេញពីក្រោមសមុទ្រ»

ក្រុមអ្នកសង្គ្រោះដែលកំពុងស្វែងរកនាវាមុជទឹក Titan ដែលកំពុងបាត់ខ្លួននៅក្រោមមហាសមុទ្រអាត្លង់ទិក ត្រូវបានគេថា បានឮសំឡេងលាន់ខ្លាំងៗនៅក្រោមសមុទ្ររៀងរាល់ 30 នាទីម្ដង ធ្វើឱ្យមានការសង្ឃឹមចំពោះបេសកកម្មជួយសង្គ្រោះនេះ។

«មជ្ឈមណ្ឌលសម្របសម្រួលកិច្ចការសង្គ្រោះនៅ Halifax បានបញ្ជូនយន្តហោះ P-8 Poseidon មួយគ្រឿងដែលមានសមត្ថភាពតាមដានស្ថានការណ៍នៅក្រោមសមុទ្រ ទៅកាន់កន្លែងកើតហេតុ» ក្រសួងសន្តិសុខផ្ទៃក្នុងកាណាដាឱ្យដឹងដូច្នេះ។ នេះបើតាមព័ត៌មានដែលទំព័រ Rolling Stone ទទួលបានកាលពីថ្ងៃទី 20 មិថុនា។ CNN ក៏ផ្សាយព័ត៌មានប្រហាក់ប្រហែលនេះ។

យន្តហោះ P-8 បានទម្លាក់ពោងដែលបំពាក់បច្ចេកវិទ្យាស្រូបសំឡេងក្រោមទឹក ដើម្បីទទួលរលកសញ្ញា នៅក្បែរតំបន់ Titan បាត់ខ្លួន។ P-8 បានរកឃើញសំឡេងលាន់ខ្លាំងៗក្នុងតំបន់ទឹកជ្រៅ រៀងរាល់ 30 នាទីម្ដង។ បួនម៉ោងក្រោយមក ពួកគេបានទម្លាក់ពោងប្រភេទនេះបន្ថែមទៀត ហើយនៅតែឮសំឡេងនេះដដែល។ បច្ចុប្បន្ន ពុំទាន់ដឹងច្បាស់ថា សំឡេងនេះចេញមកពីណានៅឡើយ។

រូបភាពបង្ហាញពីក្រុមសង្គ្រោះទាំងឡាយដែលកំពុងស្វែងរកនាវាមុជទឹក Titan

យោងតាម CNN សំឡេងនានានឹងជួយដល់ការកំណត់ទិសដៅរបស់ឧបករណ៍លើសមុទ្រ ដែលនេះបង្ហាញថា ក្ដីសង្ឃឹមក្នុងការជួយសង្គ្រោះមនុស្សទាំងប្រាំនាក់ដែលស្ថិតក្នុងនាវាមុជទឹក Titan នៅមាននៅឡើយ។

ខណៈដែលសមត្ថកិច្ចនៅកាណាដាមិនទាន់មានការអធិប្បាយអ្វី OceanGate Expeditions ដែលជាក្រុមហ៊ុនគ្រប់គ្រងនាវាមុជទឹក Titan ក៏បាននិយាយថា មិនទាន់មានដំណឹងថ្មីដើម្បីចែករំលែកនៅឡើយនៅពេលនេះ។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 21, 2023

Great Wall Motor ផលិតថ្មផ្ទុកថាមពលសម្រាប់រថយន្តអគ្គិសនីនៅប្រទេសថៃ

Great Wall Motor (GWM) គ្រោងនឹងសាងសង់រោងចក្រផលិតថ្មផ្ទុកថាមពលសម្រាប់រថយន្តអគ្គិសនីអគ្គិសនីនៅប្រទេសថៃ ហើយអាចស្រាវជ្រាវ និងអភិវឌ្ឍសម្រាប់រថយន្តទ្រុងអគ្គិសនីផងដែរ។

ប្រទេសថៃគឺជាខឿនសេដ្ឋកិច្ចសម្រាប់ការផលិតរថយន្តធំជាងគេលំដាប់ទីដប់របស់ពិភពលោក និងមានគោល ដៅប្ដូរទៅរកការផលិតរថយន្តអគ្គិសនីឱ្យបាន 30% ក្នុងរយៈពេលតែប៉ុន្មានឆ្នាំទៀតប៉ុណ្ណោះ។ រាជរដ្ឋាភិបាលថៃក៏កំពុងផ្ដល់អត្ថប្រយោជន៍ជាច្រើនដល់អ្នកផលិតថ្មផ្ទុកថាមពលអគ្គិសនីនៅក្នុងស្រុក។

GWM បានទិញរោងចក្រមួយរបស់ GM កាលពីឆ្នាំ 2020 ហើយចាប់ពីពេលនោះ GWM បានផលិតរថយន្ត hybrid Haval នៅប្រទេសថៃ។ ឆ្នាំ 2021 GWM បានបង្ហាញរថយន្ត Ora Good Cat នៅប្រទេសថៃ ហើយបច្ចុប្បន្នវាគឺជាម៉ូដែលរថយន្តដែលលក់ដាច់ជាងគេនៅប្រទេសនេះ។ GWM ក៏មានគម្រោងផលិតរថយន្តអគ្គិសនី Ora Good Cat EV នៅប្រទេសថៃ នាឆ្នាំ 2024 ដែលអាចលក់ក្នុងតម្លៃ 24,475 ដុល្លារអាម៉េរិក/គ្រឿង។

ការសាងសង់រោងចក្រដំឡើងថ្មផ្ទុកអគ្គិសនីថ្មីនៅប្រទេសថៃ នឹងត្រូវចំណាយប្រាក់ពី 14 ដល់ 28 លានដុល្លារ។ លោក Narong Sritayon ប្រធានផ្នែកពាណិជ្ជកម្មរបស់ GWM នៅប្រទេសថៃ និយាយថា រោងចក្រនេះអាចនឹងត្រូវបានប្រើប្រាស់ជាកន្លែងផលិត និងផ្គត់ផ្គង់ថ្មផ្ទុកថាមពលសម្រាប់រថយន្តអគ្គិសនីនាពេលខាងមុខ៕

June 20, 2023

ឧទ្ធម្ភាគចក្រចម្បាំងរបស់រុស្ស៊ីបាក់កន្ទុយព្រោះត្រូវគ្រាប់របស់អ៊ុយក្រែន តែមិនបានធ្លាក់

ឧទ្ធម្ភាគចក្រ Ka-52 រងការខូចខាតធ្ងន់ធ្ងរ ដែលនេះអាចបណ្ដាលមកពីត្រូវគ្រាប់មីស៊ីលរបស់អ៊ុយក្រែន ប៉ុន្តែបានត្រលប់ទៅដល់មូលដ្ឋានដោយសុវត្ថិភាព។

គណនី Fighter Bomber របស់អ្នកបើកបរយន្តហោះចម្បាំងរុស្ស៊ីម្នាក់ កាលពីថ្ងៃទី 19 មិថុនា បានបង្ហោះវីដេអូលើ Telegram ស្ដីពីឧទ្ធម្ភាគចក្រ Ka-52 ត្រូវរងការខូចខាតធ្ងន់ធ្ងន់ និងកំពុងត្រូវបានហោះអមដំណើរឆ្ពោះទៅកាន់មូលដ្ឋាន។ «ផ្នែកកន្ទុយត្រូវបានមីស៊ីលការពារដែនអាកាសកម្ទេច។ សត្រូវមិនទាន់បានបាញ់ទម្លាក់ឧទ្ធម្ភាគចក្រណាមួយនៅឡើយ រាប់ចាប់តាំងពីបើកការវាយបក» ពីឡុតរុស្ស៊ីឱ្យដឹងដូច្នេះ។

ទីតាំងថតវីដេអូនេះមិនត្រូវបានបង្ហើបឱ្យដឹង ប៉ុន្តែក្រុមហោះហើររបស់រុស្ស៊ី ពេលនោះហាក់កំពុងផ្លាស់ទីនៅតំបន់ក្បែរសមុទ្រខ្មៅ។

វីដេអូនេះបង្ហាញថា Ka-52 ទម្លាក់ចោលធុងប្រេង និងប្រព័ន្ធរ៉ុក្កែតនៅរយៈកម្ពស់ទាប ដែលនេះទំនងជាដើម្បីកាត់បន្ថយទម្ងន់ និងជួយឱ្យពីឡុតងាយស្រួលបើកបរ។ ឧទ្ធម្ភាគចក្រអមដំណើរ ក្រោយមកក៏ហោះទៅក្បែរ Ka-52 និងបង្ហាញថា ស្លាបនៅត្រង់កន្ទុយរបស់ Ka-52 បានបាក់ ខណៈផ្នែកខ្លះនៅត្រង់កាប៊ីនអ្នកបើកបរក៏រងការខូចខាត។

រូបភាពដែលថតនៅបន្ទាយទាហានរុស្ស៊ី បានបង្ហាញថា ឧទ្ធម្ភាគចក្រ Ka-52 ដែលត្រូវគ្រាប់ បានត្រលប់ទៅដល់មូលដ្ឋានដោយសុវត្ថិភាព ក្នុងនោះ ស្លាបនៅត្រង់កន្ទុយត្រូវបាក់ ប៉ុន្តែមិនទាន់ដាច់ចេញពីតួឧទ្ធម្ភាគចក្រ៕

June 20, 2023

មហាសេដ្ឋីចិន Jack Ma បង្ហាញខ្លួនជាគ្រូបង្រៀនលើកដំបូងនៅប្រទេសជប៉ុន

មហាសេដ្ឋីបច្ចេកវិទ្យា Jack Ma បង្ហាញខ្លួនក្នុងតួនាទីជាសាស្ត្រាចារ្យបរទេសរបស់សាកលវិទ្យាល័យតូក្យូ ប្រទេសជប៉ុន កាលពីពេលថ្មីៗនេះ។

ការចែករំលែកចំណេះដឹងរបស់មហាសេដ្ឋីចិន Jack Ma បានចាប់ផ្ដើមពីថ្ងៃទី 12 មិថុនា 2023 ប៉ុន្តែ ទើបតែត្រូវបានប្រកាសក្រោយការបង្រៀនបានជិតមួយសប្ដាហ៍។ យោងតាម SCMP ស្ថាបនិកវ័យ 58 ឆ្នាំរបស់ Alibaba គឺជាវាគ្មិនមួយរូបដែលលេចធ្លោជាងគេនៅក្នុងសិក្ខាសាលាពិសេសស្ដីពី «នវានុវត្តន៍ និងសហគ្រិនភាព» ដែលត្រូវបានរៀបចំឡើងនៅឯសាកលវិទ្យាល័យតូក្យូ។

នេះក៏ជាសិក្ខាសាលាដំបូងដែលលោក Ma ចូលរួមក្នុងនាមជាសាស្ត្រាចារ្យបរទេស នៅក្នុងស្ថាប័នអប់រំដែលមានអាយុ 146 ឆ្នាំនៅប្រទេសជប៉ុន។ អ្នកដែលបានចូលរួមក្នុងសិក្ខាសាលាខាងលើរួមមាន និស្សិតមកពីតំបន់នានារបស់ប្រទេសជប៉ុន ចិន ឥណ្ឌា និងម៉ាឡេស៊ី។

ពិធីចែករំលែកចំណេះដឹង និងបទពិសោធន៍នេះ ផ្ដោតទៅលើទស្សនៈនៃការគ្រប់គ្រង និងរបៀបដែលយុវវ័យជំនាន់ថ្មីអាចសម្រេចបាននៅពេលអនាគត។ យោងតាមគេហទំព័ររបស់សាកលវិទ្យាល័យតូក្យូ នេះគឺជាប្រធានបទដែលយោងទៅលើ «បទពិសោធន៍សម្បូរបែប ចំណេះដឹងនាំមុខគេទាក់ទងនឹងស្មារតីជំនួញ និងភាពច្នៃប្រឌិត» របស់លោក Jack Ma។

ប៉ុន្មានថ្ងៃក្រោយពីចូលរួមសិក្ខាសាលានៅប្រទេសជប៉ុន លោក Ma ក៏បានបន្តបង្ហាញវត្តមាននៅប្រទេសចិនក្នុងកម្មវិធីមួយដែលរៀបចំដោយក្រុមហ៊ុន Alibaba។ នៅទីនេះ លោក Ma ស្លៀកពាក់យ៉ាងសាមញ្ញ។

លោក Jack Ma ធ្លាប់ជាគ្រូបង្រៀនភាសាអង់គ្លេស មុនពេលបង្កើតក្រុមហ៊ុន Alibaba។ គិតមកដល់ពេលនេះ លោក Ma កំពុងធ្វើជាសាស្ត្រាចារ្យនៅសាកលវិទ្យាល័យយ៉ាងតិចបួនដែលស្ថិតនៅខាងក្រៅចិនដីគោក ក្នុងនោះក៏មានសាកលវិទ្យាល័យហុងកុង សាកលវិទ្យាល័យនៅអាហ្វ្រិក និងសាកលវិទ្យាល័យនៅប្រទេសអ៊ីស្រាអែលផងដែរ។

ក្នុងព្រឹត្តិការណ៍មួយកាលពីថ្ងៃទី 15 មិថុនា លោក Michael Evans ដែលជាប្រធានក្រុមហ៊ុន Alibaba បានថ្លែងថា លោក Jack Ma នៅតែជាភាគហ៊ុនិកធំជាងគេរបស់ក្រុមហ៊ុន Alibaba។

ការបង្ហាញវត្តមានរបស់លោក Jack Ma នេះ គឺចំពេលដែលទីក្រុងប៉េកាំងកំពុងរកវិធីស្ដារសេដ្ឋកិច្ចជាតិ និងទំនុកចិត្តរបស់អ្នកវិនិយោគ ក្រោយពីបានរឹតបន្តឹងវិស័យបច្ចេកវិទ្យាអស់ជាច្រើនឆ្នាំ៕

June 19, 2023

Tag: បង្ហាញ