ខ្មៅ - La Reine Media

រថយន្ត Ford Ranger 2024 បានបង្ហាញខ្លួនក្នុងទីផ្សារប្រទេសកម្ពុជាហើយ!

កាលពីថ្ងៃទី ១៥ ខែមីនា ឆ្នាំ២០២៤ ផ្នែកលក់រថយន្ត ហ្វដ នៃក្រុមហ៊ុន អ អិម អេ (ខេមបូឌា) – RMA (Cambodia) PLC បានធ្វើពិធីដាក់បង្ហាញជាផ្លូវការរថយន្ត Ford Ranger ស៊េរីឆ្នាំ2024 ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានចូលរួមប្រមាណជាង 2,000 នាក់ នៅមជ្ឈមណ្ឌល ដឹ ព្រេមៀ សេនធ័រ សែនសុខ – The Premier Center Sen Sok ។

នៅវេលាម៉ោង ៩ព្រឹក ដល់ ៤ល្ងាច គឺមានការបើកបរសាកល្បងសម្រាប់រថយន្ត Ford Ranger ស៊េរីឆ្នាំ2024 ដែលមានការបង្ហាញអំពីបច្ចេកវិទ្យាទំនើបៗដែលមានបំពាក់ក្នុងរថយន្ត រួមទាំងធ្វើការបង្ហាញនូវសមត្ថភាពជើងក្រោម និង កម្លាំងនៃម៉ាស៊ីនម៉ាស៊ូត 2.0L Bi-Turbo ដែលផ្តល់នូវផាសុកភាពក្នុងការបើកបរ និងបច្ចេក វិទ្យាទំនើបផ្សេងៗទៀតរបស់រថយន្ត Ford Ranger ស៊េរីឆ្នាំ2024។ ជាពិសេស អតិថិជនដែលបានចូលរួមក៏មានការលេងល្បែងកម្សាន្ត និងទទួលបានកាដូវត្ថុអនុសាវរីន៏ជាច្រើនទៀតពីក្រុមហ៊ុន ហ្វដ។ មិនតែប៉ុណ្ណោះ រថយន្ត Ford Ranger Wildtrak ស៊េរីឆ្នាំ2024 និងរថយន្ត Ford Ranger XLT ស៊េរីឆ្នាំ2024 ក៏មានបំពាក់នូវឈ្នាន់ជាន់ជើងផ្នែកចំហៀងខាងក្រោយ ដែលបង្កភាពងាយស្រួលក្នុងការឡើងចុះរថយន្ត ដោយពុំចាំបាច់ឡើងតាមកង់រថយន្តនោះទេ។

ជាកិច្ចចាប់ផ្តើមកម្មវិធី លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ ថា៖ “ក្រុមហ៊ុន អ អិម អេ (ខេមបូឌា) គឺជាក្រុមហ៊ុនមួយដែលឈានមុខគេក្នុងទីផ្សាររថយន្តថ្មី ហើយភាពពេញនិយម និងភាពល្បីល្បាញនេះ ដោយសារតែទទួលបានការគាំទ្រ ពីសំណាក់បងប្អូនប្រជាពលរដ្ឋកម្ពុជាមកលើរថយន្ត Ford Ranger និងភាពជឿជាក់ទៅលើគុណភាព និងសេវាកម្មផ្តល់ជូនអតិថិជន។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “រថយន្ត Ford Ranger គឺជាដៃគូដ៏មានទំនុក ចិត្តសម្រាប់អតិថិជនដែលប្រើប្រាស់ជាលក្ខណៈគ្រួសារ ការងារ ប្រកបអាជីវកម្ម និងជាពិសេស សម្រាប់អ្នកចូលចិត្តធ្វើដំណើរកម្សាន្តបែបផ្សងព្រេងជាដើម។ ការលក់របស់រថយន្ត Ford Ranger ត្រូវបានគ្របដណ្តប់លើទីផ្សារជាង ១៨០ ប្រទេសជុំវិញពិភពលោក ហើយសម្រាប់រថយន្ត Ford Ranger ស៊េរីថ្មីនេះ គឺនៅតែបន្តផ្តល់នូវភាពរឹងមាំ បច្ចេកវិទ្យាទំនើប និងប្រព័ន្ធសុវត្ថិភាពខ្ពស់លើសគេ ដែលបង្កភាពងាយស្រួលដល់អតិថិជនទាំងអស់ ក្នុងការបំពេញកិច្ចការងារផ្សេងៗរបស់ខ្លួន។ ខ្ញុំសូមថ្លែងអំណរគុណចំពោះអតិថិជន ហ្វដ ទាំងអស់ដែលបន្តគាំទ្រ និងជឿជាក់ទៅលើគុណភាព ប្រព័ន្ធសុវត្ថិភាព និងបច្ចេកវិទ្យារបស់រថយន្ត ហ្វដ។”

Ford Ranger ស៊េរីឆ្នាំ 2024 ត្រូវបានរចនាឡើងដោយកំណត់យកបទដ្ឋាន «Built Ford Tough» ដែលផ្តោតសំខាន់លើ ភាពធន់ រឹងមាំ ហាប់ណែន ទំនើបទាន់សម័យ និងប្រកបដោយផាសុកភាព ដែលជាគំនិតមួយដែលទទួលបានការគាំទ្រយ៉ាងច្រើនពីសំណាក់អតិថិជន។ លើសពីនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែបន្តបំពាក់ដោយបច្ចេកវិទ្យាឆ្លាតវៃជាច្រើន ដើម្បីបង្កនូវភាពងាយស្រួលដល់អតិថិជនដូចជា កុងទ័រឌីជីថល 8អ៊ីញដែលផ្តល់ទិន្នន័យផ្សេងៗ រួមទាំងជម្រើស Mode ទៅតាមស្ថានភាពផ្លូវចំនួន ៦ រួមមាន Normal, Eco, Tow/Hual, Slippery, Mud/Ruts, និង Sand, អេក្រង់ Multi-Touchscreen 12អ៊ីញ ដែលភ្ជាប់ជាមួយបច្ចេកវិទ្យា SYNC4A ដែលអាចភ្ជាប់ជាមួយនឹង Apple Carplay និង Android Auto តាមរយៈ Wireless និងកាមេរ៉ា 360^o រួមជាមួយប្រព័ន្ធសាកថ្មទូរស័ព្ទឥតខ្សែ និងប្រព័ន្ធចាប់ហ្វ្រាំងដោយស្វ័យប្រវត្តនៅពេលឈប់ស្តុប (Auto Hold) ។ល។

ពិសេសជាងនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែផ្តល់នូវប្រព័ន្ធសុវត្ថិភាពទំនើបៗចុងក្រោយ ដើម្បីសម្រួលដល់ការបើកបររបស់អតិថិជន ដូចជាប្រព័ន្ធចង្កៀងឆ្លាតវៃដែលអាចរេតាមចង្កូត និងបែងចែកពន្លឺដោយស្វ័យប្រវត្ត ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត ប្រព័ន្ធជំនួយលើដៃចង្កូតបញ្ចៀសចេញពីគ្រោះថា្នក់ ប្រព័ន្ធចាប់ហ្រ្វាំងបន្ទាន់ក្រោយពេលមានការប៉ះទង្គិច ប្រព័ន្ធផ្តល់សញ្ញាគ្រោះថ្នាក់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត នៅពេលថយក្រោយ និងប្រព័ន្ធឆ្លាតវៃជាច្រើនទៀត ដើម្បីផ្តល់នូវទំនុកចិត្តដល់អតិថិជន។

រថយន្ត Ford Ranger Wildtrak ស៊េរីឆ្នាំ 2024 មានជម្រើសពណ៌ចំនួន ៦ពណ៌ ដើម្បីជាជម្រើសដល់អតិថិជន រួមមានពណ៌លឿងទុំ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស និងរថយន្ត Ford Ranger XLT ស៊េរីឆ្នាំ2024 មានជម្រើសពណ៌ចំនួន ៦ពណ៌ ដូចគ្នា សម្រាប់ជាជម្រើសដល់អតិថិជន រួមមានពណ៌ខៀវ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស ។ សម្រាប់តម្លៃនៃរថយន្ត Ford Ranger Wildtrak ស៊េរីឆ្នាំ 2024 គឺ $55,900 និងរថយន្ត Ford Ranger XLT ស៊េរីឆ្នាំ 2024 គឺ $46,900។ សូមទំនាក់ទំនងផ្នែកលក់តាមសាខានីមួយៗ: សាខាព្រះមុនីវង្ស 078 999 773, សាខាទឹកថ្លា 095 939 939, សាខាទូលសង្កែ 078 935 935, សាខាជ្រោយចង្វារ 017 999 027, សាខាខេត្តសៀមរាប 077 666 357 ឬ 088 9 666 357, សាខាខេត្តកំពង់ចាម 078 999 883 ឬ 088 3 999 883, សាខាភ្នំពេញថ្មី 011 255 229 / 077 722 999 និងសាខាបឹងបៃតង 099 999 747។

March 18, 2024

រកឃើញវត្ថុអវកាសដែលភ្លឺជាងគេបង្អស់ក្នុងចក្រវាល

វត្ថុអវកាសមួយដែលទើបត្រូវបានរកឃើញ មិនត្រឹមតែជាឃ្វីហ្សា (quasar) ដែលភ្លឺជាងគេនោះទេ តែក៏ជាវត្ថុអវកាសដែលបញ្ចេញពន្លឺខ្លាំងជាងគេមិនធ្លាប់បានរកឃើញពីមុនផងដែរ។

ឃ្វីហ្សា J0529-4351 ស្ថិតនៅឆ្ងាយពីផែនដីដល់ថ្នាក់ ពន្លឺរបស់វាត្រូវការពេលវេលា 12 ពាន់លានឆ្នាំទើបធ្វើដំណើរមកដល់ផែនដី។ ថាមពលរបស់វាបានមកពីប្រហោងខ្មៅ (black hole) ដែលកំពុងរីកមាឌយ៉ាងឆាប់រហ័សបំផុតដែលក្រុមអ្នកវិទ្យាសាស្ត្រធ្លាប់បានជួបប្រទះ។ Black hole នេះស៊ីវត្ថុអវកាសប៉ុនព្រះអាទិត្យជារៀងរាល់ថ្ងៃ។ នេះបើតាមលទ្ធផលនៃការស្រាវជ្រាវដែលត្រូវបានប្រកាសកាលពីថ្ងៃទី 19 កុម្ភៈ នៅលើទស្សនាវដ្ដី Nature Astronomy។

ជារៀងរាល់ឆ្នាំ Black hole ដែលស្ថិតនៅកណ្ដាល J0529-4351 «ស៊ី» ឬប្រមូលផ្ដុំឧស្ម័ន និងធូលីបានប្រហាក់ប្រហែលនឹងព្រះអាទិត្យចំនួន 370 ដួង។ ប្រការនេះធ្វើឱ្យ J0529-4351 ភ្លឺជាង 500 លានលានដង បើធៀបនឹងព្រះអាទិត្យ។

ក្រុមអ្នកស្រាវជ្រាវគណនាឃើញថា អង្កត់ផ្ចិតរបស់ J0529-4351 វែងជាងប្រហែល 45,000 ដង បើធៀបនឹងចម្ងាយពីផែនដីទៅព្រះអាទិត្យ។

ឃ្វីហ្សា (quasar មកពីពាក្យ quasi-stellar object – វត្ថុមានរូបរាងដូចផ្កាយ) គឺជាតំបន់ដែលស្ថិតនៅចំកណ្ដាលកាឡាក់ស៊ីនានា និងមានផ្ទុកប្រហោងខ្មៅមហាយក្សដែលព័ន្ធជុំវិញដោយធូលី និងឧស្ម័នក្ដៅ៕

February 20, 2024

អាជ្ញាធរថៃ ចាប់ខ្លួនអ្នកសុំទានច្រើននាក់នៅសណ្ឋាគារ ដែលរកចំណូលបានរាប់លានរៀល/ថ្ងៃ

ប៉ូលិសថៃ បានប្រកាសឱ្យត្រួតពិនិត្យម៉ត់ចត់ចំពោះទេសចរចិនទាំងឡាយណាដែលមានមុខមាត់ខុសប្រក្រតី និងរាងកាយមានសភាពប្រែប្រួល ដោយសង្ស័យថា ពួកគេមកដើម្បីប្រកបរបរសុំទាន។

យោងតាមទំព័រ Bangkok Post កាលពីថ្ងៃទី 22 វិច្ឆិកា 2023 អាជ្ញាធរថៃ បានឱ្យដឹងថា ចាប់ពីថ្ងៃទី 10 ដល់ 20 វិច្ឆិកា សមត្ថកិច្ចបានចាប់ខ្លួនអ្នកសុំទានចំនួន 6 នាក់ ដែលជាពលរដ្ឋចិន។ អ្នកសុំទានទាំងនេះសុទ្ធតែមានមុខមាត់ខុសធម្មតា។

ក្រោយពីត្រូវបានចាប់ខ្លួន បីនាក់ក្នុងចំណោមនេះត្រូវបានពិន័យពី 100 ដល់ 500 បាត។ ក្រៅពីនេះ អាជ្ញាធរថៃ ក៏បានដាក់ពលរដ្ឋចិន 6 នាក់នេះចូលក្នុងបញ្ជីខ្មៅ ដោយហាមមិនឱ្យចូលទឹកដីថៃក្នុងរយៈពេល 10 ឆ្នាំ។

ប៉ូលិសនិយាយថា អ្នកសុំទានខ្លះជួលអ្នកបកប្រែថៃរួមគ្នា។ ពីរនាក់ក្នុងចំណោមអ្នកសុំទានចិន 6 នាក់ ស្នាក់នៅជាមួយគ្នាក្នុងបន្ទប់សណ្ឋាគារមួយក្នុងខណ្ឌ Wang Thonglang នៅទីក្រុងបាងកក ខណៈ 4 នាក់ផ្សេងទៀត ស្នាក់នៅក្នុងសណ្ឋាគារផ្សេងៗក្នុងរាជធានី។

ប៉ូលិសថៃ សង្ស័យថា អ្នកសុំទានជនជាតិចិនទាំង 6 នាក់នេះ គឺជាសមាជិករបស់ក្រុមមួយដែលគ្រប់គ្រងដោយជនជាតិថៃ។ ពួកគេសុំទាននៅទីប្រជុំជន និងតំបន់ទេសចរណ៍។ ពួកគេម្នាក់ៗរកបានប្រាក់ប្រហែល 10,000 បាត (ប្រមាណជាង 1,000,000 រៀល) ក្នុងមួយថ្ងៃ។

យោងតាមក្រសួងអភិវឌ្ឍសង្គម និងសន្តិសុខមនុស្សជាតិថៃ បច្ចុប្បន្នប្រទេសនេះមានអ្នកសុំទានជាង 7,000 នាក់ ក្នុងនោះមានជិត 4,700 នាក់ជាជនជាតិថៃ និងជិត 2,500 នាក់ជាជនបរទេស ក្នុងនោះភាគច្រើនជាពលរដ្ឋកម្ពុជា និងមីយ៉ាន់ម៉ា។ ពួកគេគឺជាសមាជិករបស់បណ្ដាក្រុមដែលមានអង្គការចាត់តាំង៕

November 24, 2023

ចាប់បានរលកវិទ្យុជះពី 8 ពាន់លានឆ្នាំមុន និងមានចង្វាក់ដូចសំឡេងបេះដូង

រលកវិទ្យុ «ផ្ទុះ» ភ្លឹបភ្លែតដែលទើបតែត្រូវបានរកឃើញ មានប្រភពពីទីដ៏គួរឱ្យព្រឺព្រួច ជាពេលដែលចក្រវាលទើបតែកកើតដំបូងៗ។

រលកសញ្ញាដ៏អាថ៌កំបាំង មានឈ្មោះថា FRB 20220610A ដែលកើតឡើងតាំងពី 8 ពាន់លានឆ្នាំមុន គឺជា «រលកវិទ្យុមួយចង្វាក់»។ រលកវិទ្យុមួយចង្វាក់គឺជារលកសញ្ញាវិទ្យុល្បឿនលឿនមួយប្រភេទដែលខ្លាំងក្លា អាចធ្វើដំណើរឆ្លងកាត់លំហអន្តរកាឡាក់ស៊ី។ អ្នកខ្លះថា វាកើតឡើងដោយសារការប៉ះគ្នារវាងប្រហោងខ្មៅ (Black Hole) ផ្កាយនឺរត្រុង ឬពីមនុស្សភពក្រៅប្រព័ន្ធព្រះអាទិត្យ។

យោងតាម Live Science រលកវិទ្យុនេះមានវ័យចំណាស់ និងឆ្ងាយជាង 1.5 ដង បើធៀបនឹងរលកវិទ្យុដែលកាន់កាប់កំណត់ត្រាមុននោះ។

នៅក្នុងជ្រុងមួយនៃតេឡេស្កុបវិទ្យុ ពន្លឺជះចេញពីព្រឹត្តិការណ៍ផ្ទុះ មានល្បឿនលឿន ភ្លឹបភ្លែតទៅតាមវដ្ដមួយដូចចង្វាក់បេះដូង។

លើកនេះ ក្រុមអ្នកវិទ្យាសាស្ត្រជឿថា ពួកគេបានដឹងអំពីប្រភពរបស់វា នោះគឺ ហេតុការណ៍ប៉ះទង្គិចគ្នារវាងកាឡាក់ស៊ីបុរាណចំនួនបី។

October 20, 2023

ព្រលានយន្តហោះរបស់រុស្ស៊ីរងការវាយប្រហារពី UAV

អភិបាលខេត្ត Pskov ឱ្យដឹងថា ព្រលានយន្តហោះនៅទីក្រុង Pskov បានរងការវាយប្រហារពីយន្តហោះគ្មានមនុស្សបើក (UAV) បណ្ដាលឱ្យយន្តហោះដឹកជញ្ជូនច្រើនគ្រឿងត្រូវខូចខាត។

«ក្រសួងការពារជាតិកំពុងដោះស្រាយការវាយប្រហារពី UAV មកលើព្រលានយន្តហោះ Pskov» Mikhail Vedernikov អភិបាលខេត្ត Pskov នៅភាគពាយព្យប្រទេសរុស្ស៊ី ឱ្យដឹងដូច្នេះ។ លោកក៏បានបង្ហោះវីដេអូស្ដីពីការវាយប្រហារនេះនៅលើបណ្ដាញសង្គមផងដែរ។

ក្រសួងការពារជាតិរុស្ស៊ីមិនទាន់បញ្ចេញប្រតិកម្មអ្វីនៅឡើយ។ «យោងតាមព័ត៌មានដំបូង ពុំមានករណីស្លាប់» លោក Vedernikov និយាយដូច្នេះ និងបន្ថែមថា ទំហំនៃការខូចខាតកំពុងត្រូវបានវាយតម្លៃ។

សារព័ត៌មាន TASS ដកស្រង់ប្រភពព័ត៌មានពីស្ថាប័នសង្គ្រោះបន្ទាន់ឱ្យដឹងថា យន្តហោះដឹកជញ្ជូនធុនធ្ងន់ Ilyushin II-76 ចំនួនបួនគ្រឿង បានរងការខូចខាត។ ចំណែកដែនអាកាសនៅតំបន់ព្រលានយន្តហោះ Vnukovo របស់រដ្ឋធានីមូស្គូ ត្រូវបានបិទខ្ទប់ក្នុងរយៈពេលខ្លី។

សារព័ត៌មានរុស្ស៊ី Readovka បានផ្សាយថា យន្តហោះ UAV ប្រហែល 15 គ្រឿងរបស់អ៊ុយក្រែន ដែលហោះសំដៅទៅកាន់ព្រលានយន្តហោះ Pskov ត្រូវបានបាញ់ទម្លាក់។ ទំព័រ Telegram Mash និយាយថា UAV មួយគ្រឿងទំនងជាបានហោះសំដៅឃ្លាំងឥន្ធនៈ និងបានផ្ទុះឆេះ បង្កើតបានជាផ្សែងខ្មៅក្រាស់នៅលើទីក្រុង។

Pskov មានចម្ងាយពីព្រំដែនអ៊ុយក្រែនប្រហែលជិត 800 គីឡូម៉ែត្រ។ ទីក្រុងនេះមានចម្ងាយពីប្រទេសសមាជិកណាតូចំនួនពីរគឺ អេស្តូនីប្រហែល 30 គីឡូម៉ែត្រ និងឡេតូនី ប្រហែល 60 គីឡូម៉ែត្រ ទៅទិសខាងលិច៕

https://www.youtube.com/watch?v=F63FUYz7_IM

August 30, 2023

ផ្ទុះរោងចក្រផលិតឧបករណ៍យោធានៅរុស្ស៊ី ក្រោយយន្តហោះ UAV អ៊ុយក្រែនត្រូវបានបាញ់ទម្លាក់

ហេតុការណ៍ផ្ទុះដ៏ធំមួយបានកើតឡើងនៅឯរោងចក្រផលិតឧបករណ៍អុបទិក ស្ថិតក្នុងទីក្រុង Sergiev Posad ក្បែររដ្ឋធានីមូស្គូ បានបង្កឱ្យមានផ្សែងខ្មៅយ៉ាងខ្ពស់ និងមនុស្ស 11 នាក់រងរបួស។

អ្នកនាំពាក្យអង្គភាពបន្ទាន់របស់មូស្គូ ឱ្យដឹងថា ករណីផ្ទុះបានកើតឡើងកាលពីព្រឹកមិញ នៅឯរោងចក្រមេកានិច និងអុបទិក Zagorsk ក្នុងទីក្រុង Sergiev Posad ជាយខាងក្រៅនៃរដ្ឋធានីមូស្គូ។ «ករណីផ្ទុះនេះ ទំនងជាចាប់ផ្ដើមចេញពីតំបន់ឡចំហាយ និងបានធ្វើឱ្យបែកទ្វារ និងបង្អួចកញ្ចក់របស់អគារជាច្រើននៅក្នុងទីក្រុង» អ្នកនាំពាក្យរូបនេះនិយាយដូច្នេះ។

មន្ត្រីក្នុងតំបន់ឱ្យដឹងថា ហេតុការណ៍នេះបានបណ្ដាលឱ្យមានមនុស្សរងរបួស 11 នាក់ ខណៈដែលសមត្ថកិច្ចកំពុងស្រាវជ្រាវរកមូលហេតុ។

រោងចក្រខាងលើគឺជាកន្លែងផលិតឧបករណ៍អុបទិកដែលមានសុក្រឹតភាពកម្រិតខ្ពស់សម្រាប់កងទ័ពរុស្ស៊ី ក្នុងនោះមានទាំងកែវយឹត និងវ៉ែនតាសម្រាប់មើលពេលយប់ផងដែរ។ ករណីនេះកើតឡើងតែប៉ុន្មានម៉ោងប៉ុណ្ណោះបន្ទាប់ពីកងទ័ពរុស្ស៊ីប្រកាសថា បានបាញ់ទម្លាក់យន្តហោះគ្មានមនុស្សបើកបរ (UAV) ចំនួន 2 គ្រឿងរបស់អ៊ុយក្រែន នៅលើដែនអាកាសរុស្ស៊ី៕

August 9, 2023

ប្រហោងខ្មៅខ្នាតយក្សបាញ់ចង្កោមថាមពលកម្រិតខ្ពស់សំដៅចំផែនដី

បេសកកម្មមួយរបស់ណាសា ធ្វើការសង្កេតមើលប្រហោងខ្មៅ (Black Hole) ខ្នាតយក្សមួយដែលបាញ់ចង្កោមរលកថាមពលកម្រិតខ្ពស់សំដៅចំផែនដីពីចម្ងាយ 400 លានឆ្នាំពន្លឺ។

បណ្ដាប្រហោងខ្មៅធំៗដែលកំពុងធ្វើសកម្មភាព ហើយមានថាសវត្ថុធាតុវិលជុំវិញ គេហៅថា Accretion disk (ថាសបន្ថែមថាមពល) ដែលជាប្រភព «ចំណី» សម្រាប់ការពង្រីកមាឌរបស់ប្រហោងខ្មៅ។ វត្ថុធាតុខ្លះដែលប្រហោងខ្មៅមិនអាចលេបបានទាំងអស់ ក៏ត្រូវបានបញ្ជូនទៅកាន់ប៉ូលនានា ហើយក្រោយមកក៏បាញ់ចេញទៅក្រៅក្នុងល្បឿនជិតស្មើនឹងល្បឿនពន្លឺ។

ដំណើរការខាងលើនេះ បង្កើតបានជាវិទ្យុសកម្មអេឡិចត្រូម៉ាញ៉េទិចដែលមានពន្លឺភ្លឺខ្លាំង និងមានថាមពលខ្ពស់។ នៅក្នុងករណីដែលណាសាទើបតែបានរកឃើញនាពេលថ្មីៗនេះ ចង្កោមពន្លឺកំពុងជះមកកាន់ផែនដីនៅក្នុងព្រឹត្តិការណ៍ដែលអ្នកវិទ្យាសាស្ត្រហៅថា blazar។ នេះបើតាម Live Science ចុះផ្សាយកាលពីថ្ងៃទី 30 កក្កដា 2023។

រូបភាពបង្ហាញពីចង្កោមពន្លឺដែលជះពី blazar Markarian 421

Blazar ដែលមានឈ្មោះថា Markarian 421 ស្ថិតនៅក្នុងកញ្ចុំផ្កាយ Ursa Major ត្រូវបានសង្កេតដោយបេសកកម្ម Imaging X-ray Polarimetry Explorer (IXPE) របស់ណាសា ដែលត្រូវបានបាញ់បង្ហោះកាលពីឆ្នាំ 2021។

ចង្កោមពន្លឺ blazar ខាងលើ អូសបន្លាយយ៉ាងវែងនៅក្នុងទីអវកាសក្នុងរយៈចម្ងាយរាប់លានឆ្នាំពន្លឺ ប៉ុន្តែដើមហេតុដែលបង្កើតវាឡើង មិនទាន់ត្រូវបានដឹងច្បាស់នៅឡើយ។

អ្នកវិទ្យាសាស្ត្រក៏គ្រោងនឹងបន្តសង្កេតមើល Markarian 421 ក៏ដូចជាកំណត់អត្តសញ្ញាណរបស់ balzar ដទៃទៀតដែលមានចំណុចពិសេសដូចគ្នា Markarian 421 ដើម្បីស្វែងយល់អំពីយន្តការនៅពីក្រោយបាតុភូតនេះ៕

July 31, 2023

ព្រះចន្ទអាចរៀបចំព្រឹត្តិការណ៍បាល់ទាត់ដំបូងនៅឆ្នាំ 2035?

បាល់ទាត់គឺជាកីឡាដែលទទួលបានការនិយមចូលចិត្តបំផុតនៅលើពិភពលោក ដូច្នេះតើវាអាចត្រូវបានរៀបចំការប្រកួតនៅលើភព ឬទីឋានដទៃក្រៅពីផែនដី ឬអត់?

នេះគឺជាអ្វីដែលក្រុមអ្នកវិទ្យាសាស្ត្រកំពុងគិតដល់។ ពួកគេជឿថា បាល់ទាត់អាចលេងនៅលើឋានព្រះចន្ទយ៉ាងឆាប់នៅឆ្នាំ 2035។

ក្រុមអ្នកជំនាញមកពីវិទ្យាស្ថានបច្ចេកទេស និងបច្ចេកវិទ្យា (IET) ដែលមានទីស្នាក់ការកណ្ដាលនៅប្រទេសអង់គ្លេស បានរៀបគម្រោងពិសេសមួយស្ដីពីការរៀបចំព្រឹត្តិការណ៍ប្រកួតកីឡាបាល់ទាត់នៅលើឋានព្រះចន្ទ។ ពួកគេថា ការប្រកួតនេះនឹងមានថេរវេលា 90 នាទី ប៉ុន្តែមិនប្រើប្រាស់ឈុតសម្លៀកបំពាក់ធម្មតាដូចនៅលើផែនដី។

ការប្រកួតនៅខាងក្រៅភពផែនដីនឹងត្រូវបានចែកចេញជាបួនតង់ ហើយក្នុងមួយតង់មាន 10 នាទី និងសម្រាក 20 នាទីនៅចន្លោះតង់នីមួយៗ។ ក្រុមបាល់ទាត់នីមួយៗនឹងមានកីឡាករ 5 នាក់។

សម្លៀកបំពាក់កីឡាដូចនៅលើផែនដីនឹងត្រូវបានជំនួសដោយឈុតអ្នកអវកាស ដែលបំពាក់មុខងារទំនើបៗជាច្រើន ក្នុងនោះមានទាំងឧបករណ៍បញ្ចុះកម្ដៅផងដែរ។

ចំណែកអាជ្ញាកណ្ដាលវិញ នឹងមានលក្ខណៈស្រដៀងទៅនឹងបច្ចេកវិទ្យា VAR។ ព្រោះថា ពួកគេនឹងបង្ហាញខ្លួនលើទីលានប្រកួតក្នុងទម្រង់ជារូបភាព 3D។

យោងតាម IET ការប្រកួតបាល់ទាត់លើឋានព្រះចន្ទនឹងធ្វើឡើងនៅពេលថ្ងៃត្រង់ ដើម្បីងាយស្រួលមើល គ្រាដែលទំហំរបស់ទីលានក៏នឹងត្រូវបានបន្ថយមកនៅត្រឹម 1/8 នៃទីលាននៅលើផែនដី។

ខ្សែបន្ទាត់ជុំវិញទីលានអាចត្រូវបានគូសសញ្ញាដោយធាតុ polymer ពណ៌ខ្មៅ-ស។ ទីលានបាល់ទាត់ក៏នឹងត្រូវការបាំងដោយសំណាញ់ និងប្រក់ដំបូល ដើម្បីជៀសវាងបាល់ខ្ទាត់ចេញទៅបាត់។ រីឯគ្រាប់បាល់វិញ នឹងត្រូវមានទំហំធំជាងជិតទ្វេដង ធៀបនឹងបាល់ធម្មតា ដើម្បីងាយស្រួលមើល។

ដើម្បីគាំទ្រដល់គម្រោងខាងលើ IET កំពុងតែអំពាវនាវសូមឱ្យក្មេងនៅប្រទេសអង់គ្លេសដែលមានអាយុពី 4 ទៅ 13 ឆ្នាំ ចូលរួមការរចនាឈុតសម្លៀកបំពាក់ផ្លូវការដំបូងគេសម្រាប់ព្រឹត្តិការណ៍បាល់ទាត់នៅលើឋានព្រះចន្ទ៕

July 25, 2023

អ្នកវិទ្យាសាស្ត្រកំពុង «គយគន់» ទិដ្ឋភាពប្រហោងខ្មៅហែកស៊ីផ្កាយ កាលពី 10 ពាន់លានឆ្នាំមុន

វត្ថុអវកាសដែលមានឈ្មោះថា J221951 គឺជាមួយក្នុងចំណោមវត្ថុអវកាសដែលភ្លឺចែងចាំងជាងគេដែលអ្នកវិទ្យាសាស្ត្រធ្លាប់បានរកឃើញ។ វាមានចម្ងាយពីផែនដីរហូតដល់ 10 ពាន់លានឆ្នាំពន្លឺ។ នេះបើយោងតាម Live Science។

នៅក្នុងការសិក្សាស្រាវជ្រាវថ្មីបំផុត ក្រុមអ្នកវិទ្យាសាស្ត្រមកពីសាកលវិទ្យាល័យ Queen’s Belfast (អង់គ្លេស) បានព្យាយាមរកប្រភពរបស់ពន្លឺចែងចាំងខ្លាំង ដែលតេឡេស្កុប Hubble និង Neil Gehrels Swift របស់ណាសាបានរកឃើញ។

ដំបូងឡើយ អ្នកវិទ្យាសាស្ត្រយល់ច្រឡំថា J221951 គឺជាបាតុភូតផ្ទុះដែលបង្កឡើងដោយការបុកគ្នារបស់ផ្កាយពីរដួង។ ក្រោយមក ទិន្នន័យបន្ថែមពី Hubble និង Neil Gehrels Swift បានបង្ហាញថា J221951 ស្ថិតនៅត្រង់ជួរជាមួយនឹងកាឡាក់ស៊ីមួយដែលមានចម្ងាយពីផែនដីរហូតដល់ 10 ពាន់លានឆ្នាំពន្លឺ។

និយាយឱ្យស្រួលស្ដាប់ គឺថា មនុស្សកំពុងតែមើលទៅកាន់អតីតកាលរបស់កាឡាក់ស៊ីមួយដែលមានវត្តមាននៅពេលចក្រវាលទើបមានអាយុត្រឹមតែជាង ¼ នៃអាយុកាលបច្ចុប្បន្ន និងគយគន់ព្រឹត្តិការណ៍ជះពន្លឺដ៏មហិមាមួយកើតឡើងកាលពី 10 ពាន់លានឆ្នាំមុន។

វត្ថុអវកាសខាងលើត្រូវបានកំណត់អត្តសញ្ញាណថាជាប្រហោងខ្មៅខ្នាតយក្ស ដែលទើបបញ្ចេញសកម្មភាពនៅក្នុងហេតុការណ៍ផ្ទុះដ៏ខ្លាំងក្លាមួយ ទើបវាបញ្ចេញពន្លឺជាទម្រង់ quasar (quasar គឺជាស្នូលកាឡាក់ស៊ីសកម្មដែលមានពន្លឺខ្លាំង)។ ប្រហោងខ្មៅតែងតែបញ្ចេញពន្លឺបែបនេះនៅពេលវាកំពុងហែកស៊ីផ្កាយណាមួយដែលចូលមកក្បែរ។

បើទោះជាវត្ថុអវកាសខាងលើកើតឡើងដោយមូលហេតុអ្វីក៏ដោយ ទិដ្ឋភាពពាន់ឆ្នាំមានម្ដងមួយនេះនៅតែជាឱកាសដ៏សែនល្អ ជួយឱ្យអ្នកវិទ្យាសាស្ត្រមើលឃើញប្រហោងខ្មៅ ព្រោះនៅពេលអសកម្ម ប្រហោងខ្មៅនឹងងងឹតសូន្យសុង ហើយមនុស្សមិនអាចមើលឃើញ៕

July 12, 2023

Elon Musk ហាត់ក្បាច់គុនជាមួយគ្រូបង្វឹកបីនាក់ក្នុងពេលតែមួយ ដើម្បីផ្ដួលម្ចាស់ Facebook

មហាសេដ្ឋីអាម៉េរិក លោក Elon Musk ទទួលយកការបង្វឹកពីកំពូលអ្នកគុននិយម UFC, កំពូលអ្នកចំបាប់ជនជាតិកាណាដា និងម្ចាស់ខ្សែក្រវាត់ខ្មៅជូជិតស៊ូ ហើយក៏បានបង្ហោះរូបថតចំអកឱ្យ Mark Zuckerberg ទៀតផង។

យោងតាម Business Insider មហាសេដ្ឋី Elon Musk កំពុងតែបង្ហាញភាពម៉ឺងម៉ាត់ក្នុងការរៀបចំគម្រោងផ្ដួលមហាសេដ្ឋី Mark Zuckerberg នៅលើសង្វៀនប្រដាល់។ កាលពីថ្ងៃទី 04 កក្កដា កំពូលអ្នកប្រដាល់របស់ UFC លោក Georges St-Pierre បានបង្ហោះរូបដែលលោកបានថតជាមួយនាយកប្រតិបត្តិរបស់ក្រុមហ៊ុន Tesla, អ្នកចំបាប់ជនជាតិកាណាដា លោក John Danaher និងម្ចាស់ខ្សែក្រវាត់ខ្មៅជូជិតស៊ូ លោក Lex Fridman។

«ការហ្វឹកហាត់ដ៏អស្ចារ្យជាមួយនឹងបុរសបីនាក់ដែលខ្ញុំគាំទ្របំផុត» លោក Georges St-Pierre សរសេរលើបណ្ដាញសង្គម Twitter ដូច្នេះ។ ប៉ុន្តែ លោកមិនបានឱ្យដឹងអំពីទីកន្លែង និងពេលវេលានៃការហ្វឹកហាត់នេះទេ។

ប៉ុន្មានម៉ោងក្រោយមក លោក Musk ក៏បញ្ចេញយោបល់៖ «ការហ្វឹកហាត់នេះពិតជាសប្បាយណាស់។ ជាក់ច្បាស់ហើយ ខ្ញុំត្រូវតែហ្វឹកហាត់ឱ្យបានច្រើនជាងនេះ»។

ការភ្នាល់ប្រកួតវាយគ្នាលើសង្វៀងរវាងម្ចាស់ Twitter និងម្ចាស់ Facebook កើតឡើងដោយវិធីចម្លែកខុសគេ។ រឿងរ៉ាវចាប់ផ្ដើមពីពេលលោក Musk និយាយលេងកាលពីថ្ងៃទី 21 មិថុនាថា លោកនឹងទទួលការប្រកួតក្នុងទ្រុងជាមួយម្ចាស់ Facebook។ មួយថ្ងៃក្រោយមក CEO របស់ Meta ដែលជាក្រុមហ៊ុនមេរបស់ Facebook ក៏បានបង្ហោះសារលើ Instagram ថា «បញ្ជូនទីតាំងមកឱ្យខ្ញុំ» ដែលនេះជាសញ្ញាបញ្ជាក់ថា Zuckerberg បានទទួលយកការបបួលប្រកួត។

ក្នុងរយៈពេលច្រើនថ្ងៃក្រោយមកទៀត ព័ត៌មានស្ដីពីការប្រកួតលើសង្វៀនរវាងមហាសេដ្ឋីអាម៉េរិកដើមកំណើតអាហ្វ្រិកខាងត្បូង និងមហាសេដ្ឋីអាម៉េរិកដើមកំណើតជ្វីប ក៏ចាប់ផ្ដើមលេចឡើងជាបន្តបន្ទាប់ ហើយនេះក៏ជាព្រឹត្តិការណ៍ដែលមនុស្សជាច្រើនកំពុងទន្ទឹងរង់ចាំ៕

July 5, 2023

Elon Musk ចាប់ផ្ដើមហ្វឹកហាត់គុនដើម្បីឡើងប្រដល់នឹង Zuckerberg

មហាសេដ្ឋី Elon Musk ដែលជាម្ចាស់ SpaceX បានចាប់ផ្ដើមហាត់ក្បាច់គុនចម្រុះ MMA ជាមួយនឹង Lex Fridman ម្ចាស់ខ្សែក្រវាត់ខ្មៅ Jujutsu (ជូជិតស៊ូ) ដើម្បីត្រៀមខ្លួនសម្រាប់ការឡើងសង្វៀនប្រកួតជាមួយម្ចាស់ Facebook គឺមហាសេដ្ឋី Mark Zuckerberg។

«ខ្ញុំបានចាប់ផ្ដើមការហ្វឹកហាត់ប្រកបដោយការរីករាយតាមធម្មតាជាមួយ Elon Musk ក្នុងរយៈពេលច្រើនម៉ោងកាលពីម្សិលមិញ» Lex Fridman ម្ចាស់ឆានែល Lex Fridman Podcast និងជាម្ចាស់ខ្សែក្រវាត់ខ្មៅគុនជូជិតស៊ូ បានសរសេរលើ Twitter កាលពីថ្ងៃទី 28 មិថុនាដូច្នេះ។

លោក Fridman បន្តថា «ពិតជាគួរឱ្យចាប់អារម្មណ៍ចំពោះកម្លាំង និងសមត្ថភាពរបស់គាត់ ទាំងនៅលើជើងទាំងពីរ ទាំងនៅលើដី»។

Fridman ក៏បានបង្ហោះរូបថតពីរសន្លឹកដែលថតបានទិដ្ឋភាព Musk ក្រៀកជាប់ក និងសង្កត់ដៃរបស់ Fridman ហើយផ្ដួលគូប្រកួតបានយ៉ាងស្រួល។

«ពិតជាចាប់អារម្មណ៍នៅពេលឃើញ Elon និង Mark ហាត់ក្បាច់គុន។ ប៉ុន្តែខ្ញុំគិតថា ពិភពលោកនឹងទទួលបានការបម្រើច្រើនជាងនេះនៅពេលពួកគេហាត់គុន ដោយមិនវាយគ្នាក្នុងទ្រុងដែក។ ទោះជាមានរឿងអ្វីកើតឡើង ខ្ញុំនៅតែគាំទ្រពួកគេ» Fridman និយាយដូច្នេះ។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

អ្នកគាំទ្រកំពុងតែទន្ទឹងរង់ចាំ និងនាំគ្នាភ្នាល់ ដោយមានការចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

June 29, 2023

ប្រហោងខ្មៅមហាយក្សនៅកណ្ដាលកាឡាក់ស៊ីរបស់មនុស្ស «ហែកស៊ី» ផ្កាយទើបកើត

Sagittarius A* ដែលអ្នកវិទ្យាសាស្ត្រនឹកស្មានថាបាន «ដេកលង់លក់» នៅកណ្ដាលកាឡាក់ស៊ីដែលមានផ្ទុកផែនដី ពេលនេះបែរជាបញ្ចេញសញ្ញាដ៏គួរឱ្យភ័យខ្លាច។

យានអវកាស IXPE របស់ណាសាថតបាន «សញ្ញាពីឋាននរក» ដែលបញ្ជាក់ថា ប្រហោងខ្មៅរបស់កាឡាក់ស៊ីមីលគីវ៉េ (Milky Way) មិនបានដេកលង់លក់ទាំងស្រុងដូចអ្នកវិទ្យាសាស្ត្របានគិតឡើយ។

Sagittarius A* គឺជាប្រហោងខ្មៅនៅកណ្ដាលកាឡាក់ស៊ីមីលគេវ៉េដែលបានឆ្លងផុតដំណាក់កាលលេបត្របាក់ដ៏កាចសាហាវ។ វាមានម៉ាសធំជាងព្រះអាទិត្យប្រហែលនឹង 4.1 លានដង និងស្ថិតក្នុងក្រុមប្រហោងខ្មៅដែលធំជាងគេក្នុងចក្រវាល។

Sagittarius A* ស្ថិតនៅកណ្ដាលកាឡាក់ស៊ីមីលគីវ៉េ

ក៏ប៉ុន្តែ ថ្មីៗនេះមានភស្ដុតាងកាន់តែច្រើនបង្ហាញថា ប្រហោងខ្មៅនេះនៅតែ «ចាប់ស៊ី» វត្ថុអវកាសទាំងឡាយណាដែលគោចរមកក្បែរមាត់របស់វា។

យានអវកាស IXPE កត់ត្រាបានពន្លឺចែងចាំងឡើងខុសធម្មតារបស់ពពកបង្កបង្កើតផ្កាយ (Molecular cloud) ស្ថិតនៅក្បែរចំណុចកណ្ដាលរបស់ប្រហោងខ្មៅ Sagittarius A* និងបានដឹងថា វាកំពុងបញ្ចេញពន្លឺខ្លាំងជាងការគ្រោងទុក។

ការវិភាគបានបង្ហាញថា ពន្លឺនេះពុំមែនពពកបង្កបង្កើតផ្កាយជាអ្នកបញ្ចេញ ប៉ុន្តែវាគ្រាន់តែជាចំណាំងប្លាតពន្លឺពីហេតុការណ៍ផ្ទុះរបស់ Sagittarius A*។

ការគណនារបស់ក្រុមអ្នកវិទ្យាសាស្ត្របារាំងបានបង្ហាញថា ហេតុការណ៍ផ្ទុះនេះទើបតែកើតឡើងអំឡុងសតវត្សរ៍ទី XIX និងអូសបន្លាយពេលប្រហែលមួយឆ្នាំកន្លះ។

អ្នកវិទ្យាសាស្ត្រមិនទាន់ដឹងច្បាស់ថា វត្ថុអវកាសដែលត្រូវបានប្រហោងខ្មៅខាងលើហែកស៊ីគឺជាអ្វីនៅឡើយ ប៉ុន្តែបើតាមទ្រឹស្ត្រី វាអាចជាផ្កាយដែលទើបចាប់កំណើតពីពពកម៉ូលេគុលនៅក្បែរប្រហោងខ្មៅនោះ។

June 27, 2023

Tag: ខ្មៅ