អន្តរជាតិ - La Reine Media

អាជ្ញាធរចិនកែប្រែអណ្ដូងរ៉ែដែកទៅជាឧទ្យានជាតិបៃតង (វីដេអូ)

កាលពីថ្ងៃទី 12 មីនា មនុស្សជិត 100 នាក់បានទៅចូលរួមព្រឹត្តិការណ៍ដាំកូនឈើនៅក្នុងឧទ្យានជាតិអណ្ដូងរ៉ែ Huangshi ជាទីដែលធ្លាប់ជាអណ្ដូងកណ្ដាលវាលធំជាងគេបំផុតនៅអាស៊ី។

ថ្ងៃទី 12 មីនា គឺជាទិវាដាំរុក្ខជាតិនៅប្រទេសចិន។ នៅទីក្រុង Huangshi នៃខេត្ត Hubei ប្រទេសចិន មនុស្សជិត 100 នាក់បានទៅចូលរួមព្រឹត្តិការណ៍ដាំកូនឈើនៅក្នុងឧទ្យានជាតិអណ្ដូងរ៉ែ Huangshi។ ឧទ្យាននេះត្រូវបានស្ថាបនាក្បែរអណ្ដូងរ៉ែដែកមួយដែលមានអាយុកាលរាប់សតវត្សរ៍ និងត្រូវបានគេហៅថា អណ្ដូងរ៉ែដែក Daye។

តំបន់ខាងលើធ្លាប់ជាអណ្ដូងរ៉ែកណ្ដាលវាលធំជាងគេក្នុងទ្វីបអាស៊ី។ ក្រោយឆ្នាំ 1958 សំណល់ថ្មជាង 360 លានតោនត្រូវបានចាក់ចូលក្នុងអណ្ដូងរ៉ែនេះ។ បន្ទាប់ពីសេដ្ឋកិច្ចបានរីកចម្រើន និងការទាញយករ៉ែអស់រយៈពេលច្រើនទសវត្សរ៍ Huangshi ក៏ត្រូវបានដាក់បញ្ចូលទៅក្នុងបញ្ជី «ទីក្រុងអស់ធនធានធម្មជាតិ» កាលពីឆ្នាំ 2009។ ដើម្បីកែលំអបរិស្ថាន អាជ្ញាធរ និងប្រជាជននៅមូលដ្ឋានក៏ចាប់ផ្ដើមដាំដើមឈើនៅទីនេះ តាំងពីទសវត្សរ៍ឆ្នាំ 1980។

«ក្រោយពីបានដាំដើមឈើជាច្រើនប្រភេទ យើងឃើញថា រុក្ខជាតិមួយប្រភេទដែលហៅថា locust សមស្របបំផុត ព្រោះវាអាចសម្របខ្លួនជាមួយនឹងបរិស្ថានក្ដៅ។ ចាប់ពីពេលនោះមក យើងចាប់ផ្ដើមសម្រុកដាំកូនឈើប្រភេទនេះក្នុងទ្រង់ទ្រាយធំ» Xiao Meng សន្តិសុខប្រចាំឧទ្យានជាតិ Huangshi ឱ្យដឹងដូច្នេះ។

ឧទ្យានជាតិអណ្ដូងរ៉ែ Huangshi (Huangshi National Mine Park)

បច្ចុប្បន្ន តំបន់អណ្ដូងរ៉ែត្រូវបានកែប្រែឱ្យទៅជាឧទ្យានវប្បធម៌បៃតង។ លោក Meng បន្ថែមថា «យើងបានដាំដើមឈើនៅទីនេះជិត 40 ឆ្នាំហើយ។ ឪពុកខ្ញុំធ្លាប់ជាកម្មករអណ្ដូងរ៉ែ។ ប៉ុន្តែ តាំងពីជំនាន់របស់គាត់ មនុស្សម្នាចាប់ផ្ដើមដាំរុក្ខជាតិនៅទីនេះ៕

March 13, 2023

ទីក្រុងដែលលិចក្រោមទឹកសមុទ្រ Pavlopetri មានអាយុកាលចាស់ជាងគេបំផុតលើពិភពលោក

(ក្រិក) – មូលហេតុដែលបណ្ដាលឱ្យ Pavlopetri ដែលជាទីក្រុងបុរាណអាយុប្រហែល 5,000 ឆ្នាំ ត្រូវលិចក្រោមទឹកសមុទ្រ នៅតែជារឿងអាថ៌កំបាំង។

ការរកឃើញនានារបស់បុរាណវិទូ មានជាអាទិ៍ ទីក្រុងវង្វេងដាន កំណប់បុរាណ ឬសាកសពកប៉ាល់បុរាណជាដើម តែងតែទាក់ទាញចំណាប់អារម្មណ៍របស់ក្រុមអ្នកវិទ្យាសាស្ត្រ។ Pavlopetri ដែលជាទីក្រុងបុរាណអាយុប្រហែល 5,000 ឆ្នាំ ត្រូវលិចក្រោមទឹកសមុទ្រ ក៏ជាទីចាប់អារម្មណ៍របស់អ្នកស្រាវជ្រាវ។ នេះបើតាម IFL Science។

Pavlopetri ស្ថិតនៅតំបន់ Peloponnesus ភាគខាងត្បូងប្រទេសក្រិក និងមានអាយុកាលប្រហែល 5,000 ឆ្នាំ។ អតីតទីក្រុងនេះត្រូវបានរកឃើញដំបូងដោយអ្នកស្រាវជ្រាវ Folkion Negris កាលពីឆ្នាំ 1904។ មកដល់ឆ្នាំ 1967 បុរាណវិទូ Nicholas Flemming មកពីសាកលវិទ្យាល័យ Southampton បានស្រាវជ្រាវលើទីក្រុងក្នុងយុគសម័យសំរឹទ្ធនេះជាថ្មី។ Flemming អធិប្បាយថា ទីក្រុងនេះត្រូវលិចក្រោមទឹកប្រហែលពី 3 ទៅ 4 ម៉ែត្រ។ ឆ្នាំ 1968 Flemming និងសហការីពីសាកលវិទ្យាល័យ Cambridge ក៏បានបន្តស្រាវជ្រាវដានទីក្រុងលិចទឹកនេះក្នុងរយៈពេល 6 សប្ដាហ៍។

ក្រុមរបស់ Flemming ឱ្យដឹងថា ទីក្រុងនេះមានទំហំប្រហែល 300 ម៉ែត្រ x 150 ម៉ែត្រ។ ទីក្រុង Pavlopetri មានអគារដាច់ដោយឡែកយ៉ាងតិច 15 អគារ ព្រមទាំងមានទីលាន, ផ្លូវចំនួនប្រាំ, ចេតិយចំនួនពីរ និងកូនផ្នូរខ្មោចយ៉ាងតិច 37។ អ្នកវិទ្យាសាស្ត្រក៏បានរកឃើញថា ទីក្រុងក្រោមទឹកនេះបន្តពង្រីកខ្លួនទៅទិសខាងត្បូង រហូតដល់កោះ Pavlopetri ជាកន្លែងរក្សាបំណែកជញ្ជាំងនានា និងវត្ថុបុរាណផ្សេងៗទៀត មានដូចជា វត្ថុធ្វើពីដីឥដ្ឋ ដាវធ្វើពីថ្ម រូបសំណាកធ្វើពីសំរឹទ្ធអាយុកាលប្រហែលពីឆ្នាំ 2800 ដល់ 1180 មុនគ្រិស្តសករាជ។ ប៉ុន្តែ អគារនានារបស់ទីក្រុងលិចទឹកនេះ ភាគច្រើនស្ថិតក្នុងសម័យ Mycenae ពីឆ្នាំ 1650 ដល់ 1180 មុនគ្រិស្តសករាជ។

ឆ្នាំ 2009 ក្រុមអ្នកស្រាវជ្រាវរបស់ក្រិក និងសាកលវិទ្យាល័យ Nottingham បានរកឃើញ សំណង់ទំហំ 9,000 ម៉ែត្រការ៉េថែមទៀត។ ពួកគេក៏រកឃើញវត្ថុបុរាណជាច្រើនផ្សេងទៀតដែលបញ្ជាក់ថា ជនជាតិ Mycenae រស់នៅក្នុងទីក្រុង Pavlopetri ហើយទីក្រុងនេះមានមនុស្សរស់នៅពេញមួយយុគសម័យសំរឹទ្ធ ប្រហែលពីឆ្នាំ 3000 ដល់ឆ្នាំ 1100 មុនគ្រិស្តសករាជ។ ក្នុងសម័យនេះ ទីក្រុង Pavlopetri មានប្រជាជនប្រហែលពី 500 ទៅ 2,000 នាក់។

មូលហេតុដែលនាំឱ្យទីក្រុង Pavlopetri ត្រូវលិចក្រោមទឹកសមុទ្រ មកដល់ពេលនេះនៅតែជារឿងអាថ៌កំបាំងនៅឡើយ។ អ្នកជំនាញខ្លះជឿថា គ្រោះរញ្ជួយដីដែលកើតឡើងប្រហែលក្នុងឆ្នាំ 1000 មុនគ្រិស្តសករាជ ឬឆ្នាំ 375 មុនគ្រិស្តសករាជ បានពន្លិចទីក្រុងនេះ៕

March 13, 2023

រដ្ឋាភិបាលឥណ្ឌាជំទាស់រឿងទទួលស្គាល់អាពាហ៍ពិពាហ៍របស់មនុស្សភេទដូចគ្នា

អាជ្ញាធររបស់នាយករដ្ឋមន្ត្រី Modi បានដាក់ឯកសារឡើងទៅតុលាការកំពូលរបស់ឥណ្ឌា ដើម្បីច្រាលចោលសំណើរបស់គូស្នេហ៍ភេទទីបី (LGBT) ដែលស្នើសូមឱ្យទទួលស្គាល់អាពាហ៍ពិពាហ៍របស់មនុស្សភេទដូចគ្នា។

ក្រសួងយុត្តិធម៌ឥណ្ឌាជឿថា បើទោះជាទំនាក់ទំនងក្នុងសង្គមអាចមានរូបភាពច្រើនយ៉ាង ប៉ុន្តែអាពាហ៍ពិពាហ៍ដែលស្របច្បាប់គឺសម្រាប់គូស្នេហ៍មានភេទផ្ទុយគ្នា ហើយរដ្ឋមានផលប្រយោជន៍ស្របច្បាប់នៅក្នុងការរក្សាប្រការនេះ។

«ការណ៍ដែលមនុស្សភេទដូចគ្នារស់នៅក្នុងនាមជាភរិយាស្វាមី និងមានទំនាក់ទំនងផ្លូវភេទ មិនអាចប្រៀបប្រដូចទៅនឹងនិយមន័យគ្រួសាររបស់ឥណ្ឌា ដែលរួមមានភរិយា ស្វាមី និងកូន» ឯកសារពីក្រសួងយុត្តិធម៌មានឃ្លាសរសេរដូច្នេះ។ តុលាការមិនអាចត្រូវបានគេស្នើឱ្យ «ប្ដូរផ្លាស់គោលនយោបាយបង្កើតច្បាប់របស់ប្រទេសជាតិដែលបានចាក់ឫសជ្រៅទៅក្នុងបទដ្ឋានសាសនា និងសង្គម»។

នៅក្នុងសេចក្ដីសម្រេចជាប្រវត្តិសាស្ត្រមួយកាលពីឆ្នាំ 2018 តុលាការកំពូលឥណ្ឌា បានកែប្រែច្បាប់ដែលដាក់ទោសព្រហ្មទណ្ឌចំពោះគូស្នេហ៍ភេទដូចគ្នា ដោយបានលុបចោលការហាមប្រាមចំពោះទំនាក់ទំនងផ្លូវភេទរបស់មនុស្សភេទដូចគ្នាដែលមានតាំងពីសម័យអាណានិគម។

នៅក្នុងប៉ុន្មានខែចុងក្រោយនេះ យ៉ាងហោចណាស់មានញត្តិចំនួន 15 ត្រូវបានដាក់ឡើងទៅតុលាការកំពូល ដើម្បីស្នើសូមឱ្យទទួលស្គាល់អាពាហ៍ពិពាហ៍របស់មនុស្សភេទដូចគ្នា ក្នុងបំណងបង្កើតឱ្យមានមូលដ្ឋានច្បាប់សម្រាប់ការប្រឈមមុខជាមួយនឹងរដ្ឋាភិបាលរបស់នាយករដ្ឋមន្ត្រី Narendra Modi។

បច្ចុប្បន្ន ទ្វីបអាស៊ី ភាគច្រើននៅតែដើរយឺតជាងលោកខាងលិច នៅក្នុងការទទួលស្គាល់អាពាហ៍ពិពាហ៍របស់មនុស្សភេទដូចគ្នា។ ទំនាក់ទំនងស្នេហារវាងមនុស្សភេទដូចគ្នានៅតែត្រូវបានចាត់ទុកថាជារឿងខុសច្បាប់នៅក្នុងប្រទេសមួយចំនួនទ្វីបនេះ ក្នុងនោះមានជាអាទិ៍ ប្រទេសម៉ាឡេស៊ី និងជប៉ុនជាដើម។

នៅក្នុងលិខិតផ្ញើទៅកាន់តុលាការកំពូលកាលពីថ្ងៃទី 12 មីនា 2023 រដ្ឋាភិបាលឥណ្ឌាបានអះអាងជាថ្មីថា សេចក្ដីសម្រេចរបស់តុលាការកាលពីឆ្នាំ 2018 មិនមែនជាការទទួលស្គាល់សិទ្ធិស្របច្បាប់ជាមូលដ្ឋានចំពោះអាពាហ៍ពិពាហ៍មនុស្សភេទដូចគ្នាទៅតាមច្បាប់របស់ប្រទេសឥណ្ឌាឡើយ ហើយការផ្លាស់ប្ដូរណាមួយទាក់ទិននឹងរចនាសម្ព័ន្ធច្បាប់គឺសុទ្ធតែត្រូវអនុម័តដោយសភា មិនមែនតុលាការនោះទេ៕

March 13, 2023

ក្នុងករណីរត់ជាន់គ្នាស្លាប់ជាង 100 នាក់នៅកីឡដ្ឋានរបស់ឥណ្ឌូណេស៊ី មន្ត្រីពីររូបត្រូវជាប់ពន្ធនាគារ

សារព័ត៌មាន Reuters បានផ្សាយថា តុលាការនៅ Surabaya ប្រទេសឥណ្ឌូណេស៊ី កាលពីថ្ងៃទី 10 មីនា 2023 បានកាត់ទោសដាក់ពន្ធនាគារចំពោះមន្ត្រីគ្រប់គ្រងបាល់ទាត់ពីររូបរបស់ប្រទេសនេះ ក្រោយពីបានរកឃើញថាពួកគេជាប់ទោសស្ដីពីការធ្វេសប្រហែស បណ្ដាលឱ្យមានសោកនាដកម្មរត់ជាន់គ្នាស្លាប់នៅឯកីឡដ្ឋាន Kanjuruhan ក្នុងតំបន់ Manlang កាលពីខែតុលា 2022 ក្នុងអំឡុងការប្រកួតបាល់ទាត់រវាងក្លឹប Arema និង Persebaya Surabaya។

ហេតុការណ៍ដ៏អាក្រក់នៅឯកីឡដ្ឋាន Kanjuruhan បានកើតឡើងនៅពេលស្ថានការណ៍ជ្រួលច្របល់ក្រោយការប្រកួត ពេលដែលមនុស្សម្នាដណ្ដើមគ្នារត់ បន្ទាប់ពីប៉ូលិសបានបាញ់ផ្សែងបង្ហូរទឹកភ្នែកសំដៅហ្វូងមនុស្សបណ្ដាលឱ្យទស្សនិកជន 135 នាក់បាត់បង់ជីវិត និងជាច្រើននាក់រងរបួស។

ចៅក្រម Abu Achmad Shiddqi Hamsya បានឱ្យដឹងថា Abdul Haris (មន្ត្រីបាល់ទាត់ដែលចាត់ចែងការប្រកួតខាងលើ) ត្រូវបានកាត់ទោសដាក់ពន្ធនាគារមួយឆ្នាំកន្លះ ដោយសារការ «ធ្វេសប្រហែស ធ្វើឱ្យមនុស្សច្រើននាក់ស្លាប់ និងរងរបួស»។

Abdul Haris បានចាត់ចែងការលក់សំបុត្រច្រើនជាងសមត្ថភាពរបស់កីឡដ្ឋាន បណ្ដាលឱ្យមានហេតុការណ៍រត់ជាន់គ្នា។ ចំណែក Suko Sutrisno (បុគ្គលិកសន្តិសុខរបស់ក្លឹប Arema) ត្រូវជាប់ពន្ធនាគារមួយឆ្នាំ ដោយជាប់ទោសពីបទធ្វេសប្រហែស។ ពួកគេក៏ត្រូវបានសហព័ន្ធបាល់ទាត់ឥណ្ឌូណេស៊ី ហាមចូលរួមសកម្មភាពដែលទាក់ទងនឹងបាល់ទាត់ អស់មួយជីវិត។

ហេតុការណ៍ដ៏អាក្រក់នៅឯកីឡដ្ឋាន Kanjuruhan បានកើតឡើងនៅពេលស្ថានការណ៍ជ្រួលច្របល់ក្រោយការប្រកួត ពេលដែលមនុស្សម្នាដណ្ដើមគ្នារត់ បន្ទាប់ពីប៉ូលិសបានបាញ់ផ្សែងបង្ហូរទឹកភ្នែកសំដៅហ្វូងមនុស្ស

ចំណែកមន្ត្រីប៉ូលិសបីនាក់ផ្សេងទៀតដែលបានបាញ់ផ្សែងបង្ហូរទឹកភ្នែកសំដៅលើមនុស្សម្នាក្នុងហេតុការណ៍ខាងលើ ក៏កំពុងត្រូវបានពិចារណាលើទោសកំហុស មុនពេលចេញសាលក្រមចុងក្រោយ៕

March 11, 2023

ចានគោមក្នុងរជ្ជកាលស្ដេច ឈៀន ឡុង ត្រូវបានកំណត់តម្លៃជាង 20 លានដុល្លារអាម៉េរិក

ចានគោមដែលមានរូបសត្វត្រចៀកកាំក្នុងសម័យអធិរាជ ឈៀន ឡុង របស់ប្រទេសចិន បង្ហាញខ្លួននៅក្នុងទីផ្សារលក់ដេញថ្លៃ និងត្រូវបានកំណត់តម្លៃឡើងដល់ជាង 25 លានដុល្លារអាម៉េរិក។

យោងតាម The Value ស្នាដៃសិប្បកម្មដែលនឹងត្រូវបានដាក់លក់ដេញថ្លៃនៅថ្ងៃទី 08 មេសា 2023 ខាងមុខ គឺជា «វត្ថុពិសេស» ក្នុងចំណោមវត្ថុបុរាណនៅក្នុងឱកាសខួប 50 ឆ្នាំនៃការបង្កើតក្រុមហ៊ុន Sotheby’s Hong Kong។

ក្រោយរយៈពេល 17 ឆ្នាំ វត្ថុបុរាណដែលបង្ហាញខ្លួនក្នុងទីផ្សារលើកនេះត្រូវបានគេសង្ឃឹមថានឹងក្លាយជាវត្ថុបុរាណចិនធ្វើពីសេរ៉ាមិចមានតម្លៃថ្លៃជាងគេ។ អ្នកជំនាញនិយាយថា តម្លៃរបស់ចានគោមនេះ បច្ចុប្បន្នខ្ពស់ជាង 200 លានដុល្លារហុងកុង (ជាង 25 លានដុល្លារអាម៉េរិក)។

កាលពីឆ្នាំ 2006 ចាននេះត្រូវបានអ្នកជំនួញម្នាក់នៅហុងកុងទិញក្នុងតម្លៃ 151 លានដុល្លារហុងកុង (19.2 លានដុល្លារអាម៉េរិក) និងក្លាយជាវត្ថុបុរាណធ្វើពីសេរ៉ាមិចសម័យរាជវង្សឈីងរបស់ចិនមានតម្លៃខ្ពស់ជាងគេ និងជាស្នាដៃសិល្បៈទ្វីបអាស៊ីដែលមានតម្លៃខ្ពស់ជាងគេនាពេលនោះ។ បច្ចុប្បន្ន កំណត់ត្រាស្ដីពីផលិតផលសេរ៉ាមិចចិនមានតម្លៃខ្ពស់បំផុតបានទៅលើថូសម័យស្ដេច ឈៀន ឡុង ដោយត្រូវបានលក់ក្នុងតម្លៃ 327 លានដុល្លារហុងកុង (41.6 លានដុល្លារអាម៉េរិក) កាលពីឆ្នាំ 2021។

អធិរាជ ឈៀន ឡុង សោយរាជ្យនៅប្រទេសចិនពីឆ្នាំ 1735 ដល់ 1796 ដូច្នេះចាននេះមានអាយុកាលប្រហែលពី 226 ឆ្នាំដល់ 287 ឆ្នាំ។ ចានគោមសម័យស្ដេច ឈៀន ឡុង មានរូបផ្កាអាលមិន (អាលម៉ុង-almond), ផ្ការាំងរាសី និងសត្វត្រចៀកកាំ ចំណែកម្ខាងទៀតមានកំណាព្យពីរឃ្លា។

ចាន ឬសម្ភារៈសេរ៉ាមិច គឺជារបស់ដែលធ្វើពីដីឥដ្ឋកាអូលីនីត (Kaolinite) ដោយវាត្រូវបានគេដុតក្នុងកម្ដៅចាប់ពី 1,200 អង្សាសេដល់ 1,400 អង្សាសេ។

March 10, 2023

លីទុយអានី ថា រុស្ស៊ីអាចធ្វើសង្គ្រាមនៅអ៊ុយក្រែន «ពីរឆ្នាំបន្ថែមទៀត»

ប្រធានអង្គភាពស៊ើបការណ៍សម្ងាត់របស់កងទ័ពប្រទេសលីទុយអានី និយាយថា រុស្ស៊ីមានធនធានគ្រប់គ្រាន់ដើម្បីរក្សាយុទ្ធនាការយោធាពិសេសរបស់ខ្លួននៅអ៊ុយក្រែនដូចបច្ចុប្បន្នចំនួនពីរឆ្នាំបន្ថែមទៀត។

«ប្រភពធនធាននានាដែលរុស្ស៊ីកំពុងមាន គឺគ្រប់គ្រាន់ដើម្បីអាចបន្តធ្វើសង្គ្រាមខ្លាំងក្លាដូចបច្ចុប្បន្នក្នុងរយៈពេលពីរឆ្នាំទៀត» ប្រធានអង្គភាពស៊ើបការណ៍សម្ងាត់របស់កងទ័ពលីទុយអានី Elegijus Paulavicius ថ្លែងប្រាប់អ្នកសារព័ត៌មានកាលពីថ្ងៃទី 09 មីនាដូច្នេះ។ «ពេលវេលាដែលរុស្ស៊ីអាចអូសបន្លាយសម្រាប់ការធ្វើសង្គ្រាមនេះនឹងអាស្រ័យលើការជួយជ្រោមជ្រែងពីបណ្ដាប្រទេស មានដូចជា អ៊ីរ៉ង់ និងកូរ៉េខាងជើងជាដើម»។

ក្រុមចារកម្មរបស់លោកខាងលិចកន្លងមកធ្លាប់បាននិយាយថា អ៊ីរ៉ង់ និងកូរ៉េខាងជើងកំពុងផ្គត់ផ្គង់អាវុធឱ្យរុស្ស៊ី ប៉ុន្តែទីក្រុងតេហេរ៉ង់ និងព្យុងយ៉ាងបានច្រានចោលការចោទប្រកាន់នេះ។

ទណ្ឌកម្មនានារបស់បស្ចិមលោកមិនទាន់ជះឥទ្ធិពលដល់ប្រភពហិរញ្ញវត្ថុរបស់រុស្ស៊ីសម្រាប់យុទ្ធនាការយោធា។ រុស្ស៊ីបានប្រើប្រាស់ «ស្ថាប័នអន្តរការីជាច្រើន» ដើម្បីមានបច្ចេកវិទ្យាដែលរងទណ្ឌកម្ម។ កងទ័ពរុស្ស៊ីក៏ត្រូវបានកែសម្រួលដើម្បីអាចប្រឈមមុខនឹងលោកខាងលិចក្នុងរយៈពេលយូរ ព្រមទាំង នឹងបង្កើតវត្តមាននៅសមុទ្របាលទិច។ នេះបើតាមលោក Paulavicius។

ក្រុមមន្ត្រីរុស្ស៊ីមិនទាន់មានប្រតិកម្មអ្វីនៅឡើយ ទាក់ទងនឹងការអះអាងរបស់លោក Paulavicius ខាងលើ។

លីទុយអានីក៏បានចោទថា ក្រុមចោរអ៊ីនធើណិតដែលមានទំនាក់ទំនងជាមួយរដ្ឋាភិបាលរុស្ស៊ី និងចិន បានព្យាយាមចូលគ្រប់គ្រងប្រព័ន្ធកុំព្យូទ័ររបស់រដ្ឋាភិបាលប្រទេសនេះនៅក្នុងឆ្នាំ 2020។

ក្រោយត្រូវលីទុយអានីចោទប្រកាន់ ប្រទេសចិនមិនទាន់មានការឆ្លើយតបនៅឡើយ។ ប៉ុន្តែ ភាគីរុស្ស៊ីវិញ ធ្លាប់បានទាត់ចោលការអះអាងនេះជាច្រើនលើក។

លីទុយអានីមានព្រំដែនជាប់នឹង Kaliningrad ដែលជាទឹកដីឯនាយសមុទ្ររបស់រុស្ស៊ី ហើយក៏ជាកន្លែងដែលមានទីស្នាក់ការកណ្តាលនៃកងនាវាចរណ៍បាល់ទិករបស់កងទ័ពជើងទឹករុស្ស៊ីផងដែរ។ លីទុយអានីកំពុងបារម្ភចំពោះសន្តិសុខជាតិ បន្ទាប់ពីរុស្ស៊ីបានបើកការឈ្លានពានលើអ៊ុយក្រែនកាលពីខែកុម្ភៈ 2022។

លីទុយអានីគឺជាសមាជិកមួយរបស់សហភាពអឺរ៉ុបដែលរិះគន់រុស្ស៊ីខ្លាំងជាងគេ ខណៈដែលទំនាក់ទំនងរវាងប្រទេសនេះ និងចិនមានភាពតានតឹងចាប់ពីឆ្នាំ 2021 បន្ទាប់ពី ទីក្រុងវីលនីញូស អនុញ្ញាតឱ្យទីក្រុងតៃប៉ិបើកការិយាល័យតំណាងការទូតលើទឹកដីខ្លួន៕

March 10, 2023

អតីតនាយករដ្ឋមន្ត្រីម៉ាឡេស៊ី Yassin ត្រូវបានចោទប្រកាន់ពីបទប្រើប្រាស់អំណាចខុសច្បាប់

ក្នុងសវនាការនៅកូឡាឡាំពួ លោក Muhyiddin Yassin ត្រូវបានចោទប្រកាន់ពីបទប្រើអំណាចហួសដែនកំណត់ចំនួនបួនករណី និងពីរករណីទៀតទាក់ទិននឹងការលាងលុយ។

នាថ្ងៃទី 10 មីនា អតីតនាយករដ្ឋមន្ត្រីម៉ាឡេស៊ី លោក Muhyiddin Yassin បានចូលបង្ហាញខ្លួននៅតុលាការមួយក្នុងរាជធានីកូឡាឡាំពួ ហើយលោកក៏ត្រូវបានចោទប្រកាន់ពីបទប្រើប្រាស់អំណាច និងលាងលុយខុសច្បាប់ ទាក់ទិននឹងបណ្ដាគម្រោងដែលបានអនុវត្តក្នុងពេលលោកកំពុងកាន់អំណាច។

នៅក្នុងសវនាការនៅកូឡាឡាំពួ លោក Muhyiddin Yassin ត្រូវបានចោទប្រកាន់ពីបទប្រើអំណាចហួសដែនកំណត់ចំនួនបួនករណី ទាក់ទិននឹងប្រាក់ជាង 232 លានរីងហ្គីត (51.4 លានដុល្លារអាម៉េរិក) និងពីរករណីទៀតដែលទាក់ទិននឹងការលាងលុយ 195 លានរីងហ្គីត (ជាង 43 លានដុល្លារអាម៉េរិក)។

ក៏ប៉ុន្តែ លោក Yassin បានច្រានចោលការចោទប្រកាន់ ហើយកន្លងមក លោកធ្លាប់បាននិយាយថា ការចោទប្រកាន់ទាំងនេះគឺមានចរិតនយោបាយ។

ទោះជាយ៉ាងណាក៏ដោយ បើសិនត្រូវបានផ្ដន្ទាទោសពីបទលាងលុយ លោក Yassin អាចនឹងត្រូវជាប់ពន្ធនាគារ 15 ឆ្នាំ។ ចំណែកទោសប្រើអំណាចខុសច្បាប់វិញអាចត្រូវជាប់ពន្ធនាគារ 20 ឆ្នាំ។ ទន្ទឹមនឹងការជាប់ពន្ធនាគារ លោក Yassin ក៏អាចត្រូវបានពិន័យជាប្រាក់យ៉ាងច្រើនផងដែរ។

លោក Yassin ត្រូវបានចាប់ខ្លួនកាលពីថ្ងៃទី 09 មីនា នៅពេលលោកបានទៅបង្ហាញខ្លួននៅឯអង្គភាពប្រឆាំងអំពើពុករលួយម៉ាឡេស៊ី (MACC) ទាក់ទងនឹង Jana Wibawa ដែលជាកម្មវិធីទប់ទល់នឹងបញ្ហាក្នុងសម័យកូវីដ។ ប៉ុន្តែ ក្នុងថ្ងៃដដែល លោក Yassin ក៏ត្រូវបានដោះលែង។

លោក Muhyiddin Yassin គឺជាមេដឹកនាំរបស់បក្សសាមគ្គីជនជាតិម៉ាឡេក្នុងស្រុក (Bersatu)។ លោកគឺជាអ្នកដែលទើបត្រូវបានចាប់ខ្លួនចុងក្រោយ ទាក់ទិននឹងកម្មវិធី Jana Wibawa។ មុននោះ MACC បានបង្កកគណនីរបស់បក្ស Bersatu។

នៅក្នុងខែកុម្ភៈ 2023 មេដឹកនាំពីររូបផ្សេងទៀតរបស់បក្ស Bersatu ត្រូវបានតុលាការម៉ាឡេស៊ីចោទប្រកាន់ពីបទពុករលួយ ទាក់ទិននឹងគម្រោងដែលមានជាប់ពាក់ព័ន្ធ៕

March 10, 2023

ប្រធានាធិបតីអាម៉េរិកដាក់សំណើបង្កើនថវិកាការពារជាតិជាង 880 ពាន់លានដុល្លារ

ប្រធានាធិបតី ចូ បៃដិន សង្កត់ធ្ងន់ថា ថវិកានេះនឹងធានាចំពោះការសន្យារបស់សហរដ្ឋអាម៉េរិក នៅក្នុងប្រឈមនឹងបញ្ហានានានៅទូទាំងសកលលោក និងរក្សាសុវត្ថិភាពសម្រាប់ទីក្រុងវ៉ាស៊ីងតោន ក៏ដូចជាជួយដល់អ៊ុយក្រែន។

កាលពីថ្ងៃទី 09 មីនា លោក បៃដិន បានប្រកាសអំពីសំណើថវិកាការពារជាតិប្រហែល 886 ពាន់លានដុល្លារសម្រាប់ឆ្នាំសារពើពន្ធ 2024 កើន 3.3% ធៀបនឹងឆ្នាំ 2023 ដើម្បីទប់ទល់នឹងឧបសគ្គដែលសហរដ្ឋអាម៉េរិកកំពុងជួបប្រទះ។

រដ្ឋាភិបាលរបស់លោក បៃដិន មានផែនការចំណាយសរុប 6.88 ទ្រីលានដុល្លារ កើន 8% ធៀបនឹងឆ្នាំ 2023 សម្រាប់ឆ្នាំសារពើពន្ធដែលចាប់ផ្ដើមពីថ្ងៃទី 01 តុលាខាងមុខ។

លោក បៃដិន សង្កត់ធ្ងន់ថា «ថវិកានេះជួយគាំទ្រដល់ការសន្យារបស់យើងនៅក្នុងការប្រឈមមុខនឹងឧបសគ្គសកល និងរក្សាសុវត្ថិភាពសម្រាប់សហរដ្ឋអាម៉េរិក។ វាគូសវាសនូវខ្ទង់វិនិយោគសំខាន់នានាដើម្បីប្រកួតប្រជែងជាមួយប្រទេសចិននៅលើពិភពលោក និងបន្តជួយដល់ប្រទេសអ៊ុយក្រែន។

យោងតាមវ៉ាស៊ីងតោន កំណើនថវិកាការពារជាតិខាងលើនឹងរួមចំណែកជំរុញសមត្ថភាពកំញើញទូទៅរបស់សហរដ្ឋអាម៉េរិក នៅក្នុងតំបន់ទាំងឡាយលើពិភពលោក៕

March 10, 2023

លោក Kim Jong-un បញ្ជាឱ្យកងទ័ពត្រៀមខ្លួនសម្រាប់សង្គ្រាមជាក់ស្ដែង

មេដឹកនាំកូរ៉េខាងជើង លោក Kim Jong-un បានបញ្ជាឱ្យកងទ័ពជំរុញការធ្វើសមយុទ្ធ ត្រៀមខ្លួនសម្រាប់ស្ថានការណ៍សង្គ្រាមជាក់ស្ដែង ក្នុងគ្រាដែលលោកធ្វើទស្សនកិច្ចព្រឹត្តិការណ៍បាញ់សាកល្បងមីស៊ីលផ្លោង។

ទីភ្នាក់ងារសារព័ត៌មានកូរ៉េខាងជើង KCNA កាលពីម្សិលមិញប្រកាសថា លោក Kim Jong-un បានធ្វើទស្សនកិច្ចសមយុទ្ធបាញ់គ្រាប់ពិតរបស់អង្គភាពជំនាញវាយប្រហារមួយ និងបន្ថែមថា អង្គភាពនេះបានបាញ់កាំជ្រួចផ្លោងខ្លាំងក្លាជាច្រើនគ្រាប់ទៅកាន់គោលដៅលើសមុទ្រ ព្រមទាំងបានបង្ហាញសមត្ថភាពត្រៀមខ្លួនរួចរាល់សម្រាប់ការប្រឈមនឹងសង្គ្រាមជាក់ស្ដែង។

រូបភាពដែលត្រូវបានចុះផ្សាយបង្ហាញថា លោក Kim Jong-un និងកូនស្រីមានវត្តមាននៅមូលដ្ឋានទ័ព ខណៈដែលយានបាញ់ផ្លោងមីស៊ីលជាច្រើនគ្រឿងត្រូវបានដាក់ពង្រាយក្រោមការការពាររបស់រថពាសដែក និងទាហានថ្នើរជើង។ ក្រោយមក មីស៊ីលផ្លោង 6 គ្រាប់ត្រូវបានបាញ់ចេញដំណាលគ្នា។

មេដឹកនាំរបស់កូរ៉េខាងជើងសង្កត់ធ្ងន់ថា «អង្គភាពប្រដាប់អាវុធខ្នាតធំត្រូវការការធ្វើសមយុទ្ធឱ្យបានម៉ឺងម៉ាត់ ដើម្បីបំពេញសមត្ថភាពនៃការអនុវត្តភារកិច្ចយុទ្ធសាស្ត្រ រួមមាន ការកំញើញអំពីសង្គ្រាម និងដើម្បីមានប្រៀបនៅពេលផ្ទុះសង្គ្រាម ក៏ដូចជាជំរុញការធ្វើសមយុទ្ធ ត្រៀមសម្រាប់សង្គ្រាមជាក់ស្ដែង»។

កូរ៉េខាងត្បូងឱ្យដឹងថា កូរ៉េខាងជើងបានបាញ់សាកល្បងមីស៊ីលកាលពីព្រលប់ថ្ងៃទី 09 មីនា ខណៈដែលសហរដ្ឋអាម៉េរិក បញ្ជាក់ថា ការបាញ់សាកល្បងអាវុធរបស់កូរ៉េខាងជើងនេះ ធ្វើឱ្យមានអស្ថិរភាពក្នុងតំបន់។

ថ្មីៗនេះ ឧបទ្វីបកូរ៉េ និងតំបន់ជុំវិញបន្តឡើងកម្ដៅ នៅពេលកូរ៉េខាងត្បូងចូលរួមធ្វើសមយុទ្ធយោធាទ្រង់ទ្រាយធំជាមួយសហរដ្ឋអាម៉េរិក និងជប៉ុន ហើយកូរ៉េខាងជើងក៏បាញ់សាកល្បងមីស៊ីល និងអាវុធថ្មីៗជាបន្តបន្ទាប់៕

March 10, 2023

ករណីចោរប្លន់ប្រាក់ជាង 32 លានដុល្លារក្នុងព្រលានយន្តហោះនៅស៊ីលី បានសម្លាប់មនុស្សច្រើននាក់

កងកម្លាំងសន្តិសុខរបស់ព្រលានយន្តហោះនៅ Santiago ប្រយុទ្ធគ្នាជាមួយនឹងក្រុមចោរប្រដាប់អាវុធ ដើម្បីរារាំងសកម្មភាពប្លន់ប្រាក់ 32.5 លានដុល្លារនៅលើយន្តហោះ បណ្ដាលឱ្យមានមនុស្សពីរនាក់បាត់បង់ជីវិត។

ចោរប្លន់ប្រដាប់អាវុធមួយក្រុមមានគ្នាពី 10 ទៅ 12 នាក់ កាលពីវេលាទៀបភ្លឺថ្ងៃទី 08 មីនា បានបើករថយន្តបីគ្រឿងសម្រុកចូលព្រលានយន្តហោះអន្តរជាតិ Arturo Merino Benitez។ ពួកគេបានឆ្ពោះទៅកាន់កន្លែងលើកដាក់ទំនិញ ក្នុងគ្រាដែលបុគ្គលិកកំពុងជញ្ជូនប្រាក់ 32.5 លានដុល្លារអាម៉េរិកចេញពីយន្តហោះ ដើម្បីដាក់ចូលក្នុងរថពាសដែក។

«ទំនិញមានតម្លៃខ្ពស់ត្រូវបានដឹកជញ្ជូនតាមយន្តហោះរបស់ក្រុមហ៊ុនអាកាសចរណ៍ LATAM ពី Miami ដែលការពារដោយក្រុមហ៊ុនសន្តិសុខ Brinks។ ក្រុមចោរប្លន់បានសម្រុកចូល ប៉ុន្តែត្រូវក្រុមសន្តិសុខបាញ់ប្រហាររុញច្រានទៅវិញ» រដ្ឋអាជ្ញា Eduardo Baeza ដែលទទួលបន្ទុកស៊ើបអង្កេតរឿងក្ដីនេះ បានថ្លែងដូច្នេះ។

ការប្រយុទ្ធគ្នារវាងក្រុមសន្តិសុខ និងក្រុមចោរប្លន់ បានបណ្ដាលឱ្យមនុស្សពីរនាក់ស្លាប់ ក្នុងនោះមានម្នាក់ជាសន្តិសុខ និងម្នាក់ជាចោរ។ ក្រោយមក ក្រុមចោរក៏បានរត់គេចខ្លះ និងដុតរថយន្តពីរគ្រឿងក្នុងចំណោមបីគ្រឿងរបស់ពួកគេនៅលើផ្លូវល្បឿនលឿនក្បែរកន្លែងកើតហេតុ។

ប្រធានាធិបតី Gabriel Boric បានសន្យាថា ស្វែងរក និងកាត់ទោសក្រុមចោរប្លន់នេះឱ្យបាន។ លោកក៏បានអះអាងថា នឹងផ្ដល់កម្លាំងប៉ូលិសឱ្យបានគ្រប់គ្រាន់ដើម្បីប្រឈមមុខនឹងក្រុមឧក្រិដ្ឋជននេះ។

កាលពីឆ្នាំ 2020 នៅឯព្រលានយន្តហោះ Arturo Merino Benitez ក៏កើតមានករណីប្លន់ស្រដៀងគ្នានេះ ដែលពេលនោះ ចោរបានប្លន់យកប្រាក់ 15 លានដុល្លារអាម៉េរិកពីរថយន្តដឹកទំនិញ។ ឆ្នាំ 2014 ព្រលានយន្តហោះនេះក៏ត្រូវចោរប្លន់យកបានប្រាក់ជាង 10 លានដុល្លារ៕

March 9, 2023

Category: អន្តរជាតិ