ប្រធានអង្គភាពស៊ើបការណ៍សម្ងាត់របស់កងទ័ពប្រទេសលីទុយអានី និយាយថា រុស្ស៊ីមានធនធានគ្រប់គ្រាន់ដើម្បីរក្សាយុទ្ធនាការយោធាពិសេសរបស់ខ្លួននៅអ៊ុយក្រែនដូចបច្ចុប្បន្នចំនួនពីរឆ្នាំបន្ថែមទៀត។
«ប្រភពធនធាននានាដែលរុស្ស៊ីកំពុងមាន គឺគ្រប់គ្រាន់ដើម្បីអាចបន្តធ្វើសង្គ្រាមខ្លាំងក្លាដូចបច្ចុប្បន្នក្នុងរយៈពេលពីរឆ្នាំទៀត» ប្រធានអង្គភាពស៊ើបការណ៍សម្ងាត់របស់កងទ័ពលីទុយអានី Elegijus Paulavicius ថ្លែងប្រាប់អ្នកសារព័ត៌មានកាលពីថ្ងៃទី 09 មីនាដូច្នេះ។ «ពេលវេលាដែលរុស្ស៊ីអាចអូសបន្លាយសម្រាប់ការធ្វើសង្គ្រាមនេះនឹងអាស្រ័យលើការជួយជ្រោមជ្រែងពីបណ្ដាប្រទេស មានដូចជា អ៊ីរ៉ង់ និងកូរ៉េខាងជើងជាដើម»។
ក្រុមចារកម្មរបស់លោកខាងលិចកន្លងមកធ្លាប់បាននិយាយថា អ៊ីរ៉ង់ និងកូរ៉េខាងជើងកំពុងផ្គត់ផ្គង់អាវុធឱ្យរុស្ស៊ី ប៉ុន្តែទីក្រុងតេហេរ៉ង់ និងព្យុងយ៉ាងបានច្រានចោលការចោទប្រកាន់នេះ។
ទណ្ឌកម្មនានារបស់បស្ចិមលោកមិនទាន់ជះឥទ្ធិពលដល់ប្រភពហិរញ្ញវត្ថុរបស់រុស្ស៊ីសម្រាប់យុទ្ធនាការយោធា។ រុស្ស៊ីបានប្រើប្រាស់ «ស្ថាប័នអន្តរការីជាច្រើន» ដើម្បីមានបច្ចេកវិទ្យាដែលរងទណ្ឌកម្ម។ កងទ័ពរុស្ស៊ីក៏ត្រូវបានកែសម្រួលដើម្បីអាចប្រឈមមុខនឹងលោកខាងលិចក្នុងរយៈពេលយូរ ព្រមទាំង នឹងបង្កើតវត្តមាននៅសមុទ្របាលទិច។ នេះបើតាមលោក Paulavicius។
ក្រុមមន្ត្រីរុស្ស៊ីមិនទាន់មានប្រតិកម្មអ្វីនៅឡើយ ទាក់ទងនឹងការអះអាងរបស់លោក Paulavicius ខាងលើ។
លីទុយអានីក៏បានចោទថា ក្រុមចោរអ៊ីនធើណិតដែលមានទំនាក់ទំនងជាមួយរដ្ឋាភិបាលរុស្ស៊ី និងចិន បានព្យាយាមចូលគ្រប់គ្រងប្រព័ន្ធកុំព្យូទ័ររបស់រដ្ឋាភិបាលប្រទេសនេះនៅក្នុងឆ្នាំ 2020។
ក្រោយត្រូវលីទុយអានីចោទប្រកាន់ ប្រទេសចិនមិនទាន់មានការឆ្លើយតបនៅឡើយ។ ប៉ុន្តែ ភាគីរុស្ស៊ីវិញ ធ្លាប់បានទាត់ចោលការអះអាងនេះជាច្រើនលើក។
លីទុយអានីមានព្រំដែនជាប់នឹង Kaliningrad ដែលជាទឹកដីឯនាយសមុទ្ររបស់រុស្ស៊ី ហើយក៏ជាកន្លែងដែលមានទីស្នាក់ការកណ្តាលនៃកងនាវាចរណ៍បាល់ទិករបស់កងទ័ពជើងទឹករុស្ស៊ីផងដែរ។ លីទុយអានីកំពុងបារម្ភចំពោះសន្តិសុខជាតិ បន្ទាប់ពីរុស្ស៊ីបានបើកការឈ្លានពានលើអ៊ុយក្រែនកាលពីខែកុម្ភៈ 2022។
លីទុយអានីគឺជាសមាជិកមួយរបស់សហភាពអឺរ៉ុបដែលរិះគន់រុស្ស៊ីខ្លាំងជាងគេ ខណៈដែលទំនាក់ទំនងរវាងប្រទេសនេះ និងចិនមានភាពតានតឹងចាប់ពីឆ្នាំ 2021 បន្ទាប់ពី ទីក្រុងវីលនីញូស អនុញ្ញាតឱ្យទីក្រុងតៃប៉ិបើកការិយាល័យតំណាងការទូតលើទឹកដីខ្លួន៕
