អន្តរជាតិ - La Reine Media

ជើងហោះហើរដឹកអ្នកដំណើរដំបូងគេលើពិភពលោក

ក្រុមហ៊ុនអាកាសចរណ៍មួយនៅសហរដ្ឋអាម៉េរិក បើកការហោះហើរដឹកអ្នកដំណើរដំបូងគេ និងហោះឆ្លងកាត់ឈូងសមុទ្រ Tampa ដោយកប៉ាល់ហោះកាលពីឆ្នាំ 1913 និងដំណើរបានយ៉ាងជោគជ័យ។

ជិតមួយទសវត្សរ៍បន្ទាប់ពីជើងហោះហើរនាំមុខគេរបស់បងប្អូនត្រកូល Wright នៅ Kitty Hawk រដ្ឋ Carolina ខាងជើង សេវាកម្មហោះហើរដឹកអ្នកដំណើរទៅតាមកាលបរិច្ឆេទដំបូងគេលើពិភពលោកក៏ចាប់ផ្ដើមកាលពីឆ្នាំ 1914 ដោយហោះហើរទៅមករវាង St. Petersburg (រដ្ឋ Florida) និង Tampa ដោយឆ្លងកាត់ឈូងសមុទ្រ Tampa។

ក្រុមហ៊ុនអាកាសចរណ៍ដែលមានឈ្មោះថា St. Petersburg-Tampa Airboat Line គឺជាអ្នកគ្រប់គ្រងជើងហោះហើរខាងលើ។ សេវាកម្មនេះមានវត្តមានត្រឹមតែរយៈពេលខ្លី ហើយកប៉ាល់ហោះរបស់ក្រុមហ៊ុននេះក៏ដឹកអ្នកដំណើរបានតែម្នាក់គត់ក្នុងមួយជើង។ ក៏ប៉ុន្តែ តម្លៃដែលក្រុមហ៊ុននេះបាននាំមកគឺបានបើកផ្លូវឱ្យមានជើងហោះហើរពាណិជ្ជកម្មបែបទំនើប។ នេះបើតាម Amusing Planet។

គំនិតស្ដីពីក្រុមហ៊ុនអាកាសចរណ៍បានចាប់ផ្ដើមពីវិស្វករអគ្គិសនី Percival Elliot Fansler នៅ Florida ដែលកាលណោះធ្វើការដូចទៅនឹងបុគ្គលិកផ្នែកលក់របស់ក្រុមហ៊ុនផលិតម៉ាស៊ីនម៉ាស៊ូតសម្រាប់កប៉ាល់ហោះ។ Fansler ជក់ចិត្តជាមួយនឹងយន្តហោះនៅពេលសាកល្បងប្រណាំងទូកល្បឿនលឿន។ លោកយល់ថា វិធីតែមួយគត់ដើម្បីបង្កើនល្បឿនលឿនជាងនេះគឺការធ្វើឱ្យទូកហោះឡើងលើអាកាស។ ឆ្នាំ 1912 ពីឡុត Antony H. Jannus បានហោះហើរផ្លូវឆ្ងាយក្នុងរយៈពេល 40 ថ្ងៃ ពី Omaha ទៅកាន់ New Orleans។

បន្ទាប់ពីជើងហោះហើរប្រវត្តិសាស្ត្រខាងលើនេះ Fansler បានទាក់ទងទៅនឹង Thomas W. Benoist ម្ចាស់ក្រុមហ៊ុនផលិតម៉ាស៊ីនដែល Jannus បើកបរ ដោយប្រាប់ថា ចង់ទិញយន្តហោះ។ ការចរចាជាមួយ Benoist ធ្វើឱ្យ Fansler គិតដល់ការចាប់ផ្ដើមផ្ដល់សេវាកម្មអាកាសចរណ៍ពាណិជ្ជកម្ម។ Benoist ក៏ចាប់អារម្មណ៍លើគំនិតនេះហើយក៏យល់ព្រមផលិត និងផ្គត់ផ្គង់កប៉ាល់ហោះពីរគ្រឿង ខណៈដែល Fansler ចាត់ចែងដំណើរការ និងយុទ្ធសាស្ត្រលំអិតសម្រាប់ទីផ្សារ។

សេវាកម្មហោះហើរដឹកអ្នកដំណើរចាប់ផ្ដើមដំណើរការពីថ្ងៃទី 01 មករា 1913។ មនុស្សប្រហែល 3,000 នាក់បានប្រមូលផ្ដុំគ្នានៅកំពង់ផែដើម្បីជូនដំណើរអតីតអភិបាលក្រុង Abraham C. Pheil ដែលជាអតិថិជនដំបូងរបស់ក្រុមហ៊ុនអាកាសចរណ៍ខាងលើ។ សំបុត្រសម្រាប់ជើងហោះហើរដឹកអ្នកដំណើរដំបូងនេះមានតម្លៃ 400 ដុល្លារអាម៉េរិក ដែលបានមកពីការដេញថ្លៃ។ ម៉ោង 10 ព្រឹក Jannus បញ្ជាកប៉ាល់ហោះហោះឡើងពីកំពង់ផែ និងឆ្ពោះទៅកាន់ Tampa។ មិនដល់កន្លះម៉ោងក្រោយមក កប៉ាល់ហោះក៏បានចុះចតលើទន្លេ Hillsborough នៅ Tampa។ ពេលនោះមានមនុស្សប្រហែល 3,500 នាក់បានរង់ចាំជាស្រេចដើម្បីទទួល Jannus។ បន្ទាប់ពីបានជំរាបសួរអភិបាលក្រុង Tampa និងថតរូប Jannus និង Pheil ក៏បានត្រលប់ទៅកាន់ St. Petersburg។

ក្រោយជើងហោះហើរដឹកអ្នកដំណើរដំបូងគេនេះ ក្រុមហ៊ុនអាកាចរណ៍ St. Petersburg-Tampa Airboat Line ក៏មានជើងហោះហើរជាបន្តបន្ទាប់ និងបើកផ្លូវឱ្យមានវត្តមានក្រុមហ៊ុនអាកាសចរណ៍ជាហូរហែរហូតដល់បច្ចុប្បន្ន៕

March 25, 2023

រកឃើញទឹកនៅលើភពដែលមានចម្ងាយ 40 ឆ្នាំពន្លឺពីផែនដី

ក្រុមអ្នកវិទ្យាសាស្ត្ររកឃើញពិភពក្រៅប្រព័ន្ធព្រះអាទិត្យមួយដែលដាក់ឈ្មោះឱ្យថា VHS 1256 b មានថាសធូលីវិលជុំវិញក្នុងបរិយាកាស និងមានផ្ទុកឧស្ម័នមេតាន កាបូនឌីអុកស៊ីត និងទឹក។

VHS 1256 b ជាភពគោចរជុំវិញផ្កាយមួយគូដែលមានចម្ងាយពីផែនដីប្រហែល 378.5 ទ្រីលានគីឡូម៉ែត្រទៅទិសកញ្ចុំផ្កាយ Corvus។ ភពនេះត្រូវបានសង្កេត និងវិភាគដោយក្រុមអ្នកវិទ្យាសាស្ត្រនៅសាកលវិទ្យាល័យ Arizona សហរដ្ឋអាម៉េរិក ដោយប្រើប្រាស់តេឡេស្កុបអវកាស James Webb របស់ណាសា។

ក្រុមអ្នកវិទ្យាសាស្ត្ររកឃើញថា ព្យុះធំៗជាច្រើនកើតឡើងពីពពក silicate នៅលើផ្ទៃភពដែលសម្បូរឧស្ម័នមេតាន កាបូនឌីអុកស៊ីត (CO2) រួមនឹងកាបូនម៉ូណូស៊ីត (CO) និងទឹក។ របកគំហើញនេះនឹងត្រូវបានប្រកាសនៅលើទស្សនាវដ្ដី The Astrophysical Journal Letters។ នេះបើតាម Newsweek ចុះផ្សាយក្នុងថ្ងៃទី 24 មីនា។

VHS 1256 b ត្រូវបានរកឃើញជាលើកដំបូងដោយតេឡេស្កុប Vista នៅប្រទេសស៊ីលី កាលពីឆ្នាំ 2015។ VHS 1256 b គឺជាភពឧស្ម័នខ្នាតយក្ស ធំជាងពី 12 ទៅ 18 ដង ធៀបនឹងភពព្រហស្បតិ៍ (Jupiter)។ មួយថ្ងៃនៅលើភពនេះមានរយៈពេល 22 ម៉ោង។ ពពក silicate (ពពកស៊ីលីកុន និងអុកស៊ីសែន) នៅលើភពនេះ អណ្ដែតទៅលើ និងច្របាច់បញ្ចូលគ្នានៅពេលថ្ងៃ ពេលដែលសីតុណ្ហភាពខ្ពស់ខ្លាំង និងត្រជាក់ខ្លាំង។ ពេលក្ដៅខ្លាំង ភពនេះនឹងមានសីតុណ្ហភាពឡើងដល់ 816 អង្សាសេ។

បើទោះជាមានទឹកក្នុងបរិយាកាស ភព VHS 1256 b នេះមិនសមស្របសម្រាប់ជីវិតឡើយ ព្រោះវាដូចទៅនឹងភពព្រហស្បតិ៍ជាជាងផែនដី៕

March 24, 2023

ស្លូវ៉ាគីប្រគល់យន្តហោះចម្បាំង MiG-29 ឱ្យអ៊ុយក្រែនដោយសុវត្ថិភាព

ស្លូវ៉ាគីបានបញ្ជូនយន្តហោះចម្បាំង MiG-29 ចំនួនបួនគ្រឿងដំបូងទៅឱ្យអ៊ុយក្រែន គ្រាដែល 9 គ្រឿងទៀតនឹងត្រូវបានប្រគល់ឱ្យនៅក្នុងប៉ុន្មានសប្ដាហ៍ខាងមុខ។

«យន្តហោះចម្បាំង GiG-29 ចំនួនបួនគ្រឿងត្រូវបានប្រគល់ដោយសុវត្ថិភាពទៅឱ្យកម្លាំងប្រដាប់អាវុធអ៊ុយក្រែន។ ខ្ញុំសូមអរគុណចំពោះគ្រប់គ្នាដែលបានចូលរួមធ្វើកិច្ចការដែលប្រកបដោយវិជាជីវៈដ៏អស្ចារ្យនេះ» រដ្ឋមន្ត្រីក្រសួងការពារជាតិស្លូវ៉ាគី Jaroslav Nad កាលពីម្សិលមិញ ថ្លែងដូច្នេះ។

យោងតាមលោក Nad យន្តហោះទាំងនេះត្រូវបានពីឡុតអ៊ុយក្រែនបើកបរពីស្លូវ៉ាគីទៅកាន់អ៊ុយក្រែន ដោយមានការអមការពារពីទ័ពអាកាសស្លូវ៉ាគី ទាហានអ៊ុយក្រែន និងក្រុមដទៃទៀត។ «ក្នុងអំឡុងប៉ុន្មានសប្ដាហ៍ខាងមុខ យន្តហោះដែលនៅសល់នឹងត្រូវបានប្រគល់» រដ្ឋមន្ត្រីក្រសួងការពារជាតិ Nad បញ្ជាក់បន្ថែម។

កាលពីសប្ដាហ៍កន្លង ស្លូវ៉ាគីបានក្លាយជាសម្ព័ន្ធមិត្តទីពីររបស់អ៊ុយក្រែន បន្ទាប់ពីប៉ូឡូញ ដែលបានផ្ដល់យន្តហោះចម្បាំងដល់អ៊ុយក្រែន ហើយនេះគឺជាអាវុធដែលទីក្រុងកៀវជឿថា មានសារសំខាន់ខ្លាំងសម្រាប់ការវាយរុញច្រានកងទ័ពរុស្ស៊ី។

ស្លូវ៉ាគីនឹងផ្ដល់យន្តហោះចម្បាំងសរុប 13 គ្រឿងទៅឱ្យអ៊ុយក្រែន ក្នុងនោះមាន 10 គ្រឿងអាចប្រើការណ៍បាន និងបីគ្រឿងទៀតសម្រាប់កាប់សាច់យកគ្រឿងបន្លាស់។ ទីក្រុងប្រាទីស្លាវ៉ាក៏នឹងផ្ដល់ប្រព័ន្ធការពារដែនអាកាស KUB ដល់ទីក្រុងកៀវផងដែរ៕

March 24, 2023

អាម៉េរិកអំពាវនាវដល់សមាជិកតុលាការ ICC អនុវត្តដីកាចាប់ខ្លួនលោក ពូទីន

រដ្ឋមន្ត្រីក្រសួងការបរទេសអាម៉េរិក លោក Antony Blinken បានអំពាវនាវសូមឱ្យគ្រប់សមាជិក ICC គោរពតាមដីកាដែលតុលាការព្រហ្មទណ្ឌអន្តរជាតិ (ICC) បានបញ្ជាឱ្យចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន។

ក្នុងសវនាការនៅសភាជាន់ខ្ពស់អាម៉េរិកកាលពីថ្ងៃទី 22 មីនា តំណាងរាស្ត្រ Lindsey Graham បានសួរលោក Blinken ថា តើវ៉ាស៊ីងតោននឹងចាប់ខ្លួនប្រធានាធិបតីរុស្ស៊ី ឬទេ បើសិនលោក ពូទីន មកកាន់ទឹកដីអាម៉េរិក។

«ដូចដែលអស់លោកបានដឹងហើយ យើងមិនមែនជាសមាជិករបស់តុលាការព្រហ្មទណ្ឌអន្តរជាតិ (ICC) ដូច្នេះខ្ញុំមិនចង់និយាយដល់សេណារីយោនោះ» លោក Blinken ឆ្លើយដូច្នេះ និងបន្តថា «ខ្ញុំក៏មិនគិតថា លោក ពូទីន មានគម្រោងមកកាន់សហរដ្ឋអាម៉េរិកឆាប់ៗនេះ»។

លោក Graham បន្តសួរថា លោក Blinken «លើកទឹកចិត្តឱ្យសម្ព័ន្ធមិត្តនៅអឺរ៉ុបបញ្ជូនខ្លួនប្រធានាធិបតីរុស្ស៊ី ទៅឱ្យតុលាការ ឬអត់»។ រដ្ឋមន្ត្រីការបរទេសអាម៉េរិកក៏សង្កត់ធ្ងន់ថា «ខ្ញុំគិតថា រាល់សមាជិក ICC សុទ្ធតែត្រូវអនុវត្តកាតព្វកិច្ចរបស់ខ្លួន»។

ប្រធានាធិបតីរុស្ស៊ី លោក វ្ល៉ាឌីមៀ ពូទីន និងស្នងសិទ្ធិកុមាររុស្ស៊ី លោកស្រី Maria Lvova-Belova ជួបពិភាក្សាគ្នាកាលពីថ្ងៃទី 16 កុម្ភៈ

កាលពីថ្ងៃទី 17 មីនា 2023 តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន និងស្នងការរបស់ប្រធានាធិបតីរុស្ស៊ីទទួលបន្ទុកសិទ្ធិកុមារ Maria Lvova-Belova ក្រោមបទចោទថា «នាំកុមារអ៊ុយក្រែនទៅកាន់រុស្ស៊ីដោយមិនស្របច្បាប់»។ ICC យល់ថា សកម្មភាពខាងលើរបស់រុស្ស៊ីត្រូវបានធ្វើឡើងបន្ទាប់សង្គ្រាមនៅអ៊ុយក្រែនបានផ្ទុះឡើង។

យោងតាមការសម្រេចចិត្តរបស់ ICC លោក ពូទីន «ទទួលខុសត្រូវដោយផ្ទាល់នៅពេលធ្វើសកម្មភាព» ក៏ដូចជា «មិនបានគ្រប់គ្រង ឬអនុញ្ញាតឱ្យស្ថាប័នស៊ីវិល ឬយោធាក្រោមឱវាទប្រព្រឹត្តអំពើនេះ»៕

March 23, 2023

បាតុភូត «សូរ្យគ្រាសកូនកាត់» ដ៏កម្រនឹងកើតឡើងឆាប់ៗនេះ

បាតុភូតសូរ្យគ្រាសមួយផ្នែក សូរ្យគ្រាសពេញលេញ និងសូរ្យគ្រាសរាងចិញ្ចៀនដ៏កម្រ នឹងកើតឡើងក្នុងថ្ងៃទី 20 មេសា 2023 ខាងមុខ។

នៅថ្ងៃទី 20 មេសា 2023 ប្រជាជនដែលស្ថិតនៅក្នុងតំបន់ភ្លឺក្នុងវីដេអូនេះ អាចមើលឃើញបាតុភូតសូរ្យគ្រាសកូនកាត់ដ៏កម្រកើតមាន អាស្រ័យលើអាកាសធាតុ។

បាតុភូតសូរ្យគ្រាសកូនកាត់គឺជាព្រឹត្តិការណ៍ដែលកើតឡើងពីការរួមផ្សំរវាងបាតុភូតសូរ្យគ្រាសមួយផ្នែក សូរ្យគ្រាសទាំងស្រុង និងសូរ្យគ្រាសរាងចិញ្ចៀន។ ក៏ប៉ុន្តែ គ្រប់គ្នាមិនអាចមើលឃើញបាតុភូតទាំងនេះក្នុងពេលតែមួយឡើង។

សូរ្យគ្រាសដែលមានរូបរាងដូចចិញ្ចៀនកើតឡើងនៅពេលព្រះចន្ទគោចរឆ្លងកាត់តំបន់កន្លោះផែនដី និងព្រះអាទិត្យ ប៉ុន្តែគម្លាតនេះមិនជិតគ្រប់គ្រាន់ ដូច្នេះក៏មិនបាំងព្រះអាទិត្យទាំងស្រុងបាន ដោយបន្សល់ទុករង្វង់មូលស្ដើងនៅលើព្រះអាទិត្យ ដែលអ្នកវិទ្យាសាស្ត្រហៅថា «រង្វង់ភ្លើង»។

ចំណែកសូរ្យគ្រាសពេញលេញ (ទាំងស្រុង) វិញ កើតឡើងនៅពេលព្រះអាទិត្យទាំងមូលត្រូវបានបិទបាំងដោយព្រះចន្ទ។ សូរ្យគ្រាសពេញលេញអាចមើលឃើញពីតំបន់ Exmouth របស់អូស្ត្រាលី (1នាទី), ទីម័រខាងកើត (1នាទី និង 14 វិនាទី), Papua ខាងលិចរបស់ឥណ្ឌូណេស៊ី (1នាទីនិង 9 វិនាទី)។

បាតុភូត «សូរ្យគ្រាសកូនកាត់» ដ៏កម្រនឹងកើតឡើងក្នុងថ្ងៃទី 20 មេសា 2023 ខាងមុខ

បាតុភូតសូរ្យគ្រាសនឹងប្រែពីរូបរាងចិញ្ចៀនទៅជាសូរ្យគ្រាសពេញលេញ ហើយវិលទៅរកពីរចំណុចជាក់លាក់ ប៉ុន្តែ សុទ្ធតែស្ថិតនៅតំបន់ឆ្ងាយៗលើសមុទ្រ។

សូរ្យគ្រាសកូនកាត់គឺជាប្រភេទសូរ្យគ្រាសដែលកម្រនឹងកើតឡើង ដោយវាបង្ហាញខ្លួនតែប៉ុន្មានដងប៉ុណ្ណោះនៅក្នុងមួយសតវត្សរ៍ និងត្រូវបានចាត់ទុកថាជាបាតុភូតធម្មជាតិដ៏អស្ចារ្យបំផុត៕

March 23, 2023

អ្នកវិទ្យាសាស្ត្ររកឃើញ RNA និងវីតាមីន B3 លើអាចម៍ផ្កាយក្បែរផែនដី

បណ្ដាម៉ូលេគុលសរីរាង្គត្រូវបានរកឃើញក្នុងសំណាកដីដែលយកពីអាចម៍ផ្កាយ Ryugu ដោយយានអវកាស របស់ប្រទេសជប៉ុន។

ក្រុមអ្នកស្រាវជ្រាវបានវិភាគទៅលើសំណាកដីរបស់អាចម៍ផ្កាយ Ryugu ដែលយាន Hayabusa2 របស់ទីភ្នាក់ងារអវកាសជប៉ុនប្រមូលបាន និងរកឃើញ uracil ដែលជាឯកតាមួយក្នុងចំណោមឯកតាព័ត៌មានដែលបង្កើតបានជា RNA ជាម៉ូលេគុលផ្ទុកការបញ្ជាក់អំពីវិធីកកើត និងសកម្មភាពរបស់សត្វមានជីវិត។

ក្រៅពីរបកគំហើញខាងលើ នៅក្នុងសំណាកដដែលនោះ អ្នកវិទ្យាសាស្ត្រក៏រកឃើញអាស៊ីត nicotinic ឬហៅថា niacin ឬវីតាមីន B3 ដែលជាកត្តាសំខាន់ចំពោះការរំលាយអាហាររបស់សត្វមានជីវិត។

ការរកឃើញរបស់ក្រុមអ្នកវិទ្យាសាស្ត្រអន្តរជាតិ ដែលដឹកនាំដោយសាស្ត្រាចារ្យ Yasuhiro Oba នៅសាកលវិទ្យាល័យ Hokkaido បានផ្ដល់ភស្ដុតាងបន្ថែមស្ដីពីរចនាសម្ព័ន្ធជីវិតនៅក្នុងទីអវកាស ដែលពួកវាអាចជាប់នៅលើអាចម៍ផ្កាយ និងធ្លាក់មកកាន់ផែនដី។ របកគំហើញនេះត្រូវបានប្រកាសកាលពីថ្ងៃទី 13 មីនា នៅលើទស្សនាវដ្ដី Nature Communications។

Ryugu គឺជាអាចម៍ផ្កាយដែលសម្បូរកាបូន និងមានរូបរាងស្រដៀងត្បូងពេជ្រ មានទទឹងមួយគីឡូម៉ែត្រ។ Hayabusa2 គឺជាបេសកកម្មដំបូងដែលបាននាំសំណាក់ដីពីខាងក្រោមស្រទាបលើរបស់អាចម៍ផ្កាយ ត្រលប់មកកាន់ផែនដី៕

March 22, 2023

រុស្ស៊ីថា «ការប៉ះទង្គិចនុយក្លេអែរជិតមកដល់» ក្រោយពីអង់គ្លេសគ្រោងជញ្ជូនគ្រាប់អ៊ុយរ៉ាញ៉ូមខ្សោយទៅឱ្យអ៊ុយក្រែន

ក្រុមមន្ត្រីនៅទីក្រុងមូស្គូបានថ្កោលទោសអង់គ្លេស ទាក់ទិននឹងរឿងជញ្ជូនគ្រាប់ទម្លុះដែកមានផ្ទុកអ៊ុយរ៉ាញ៉ូមខ្សោយទៅឱ្យអ៊ុយក្រែន និងព្រមានថា នឹងធ្វើការឆ្លើយតបយ៉ាងសមស្រប។

រដ្ឋលេខាធិការក្រសួងការពារជាតិអង់គ្លេស Annabel Goldie កាលពីថ្ងៃទី 21 មីនា បានឱ្យដឹងថា ក្នុងចំណោមគ្រាប់កាំភ្លើងសម្រាប់រថក្រោះយុទ្ធសាស្ត្រ Challenger 2 ដែលប្រទេសនេះគ្រោងនឹងដឹកទៅឱ្យអ៊ុយក្រែន មានគ្រាប់ទម្លុះដែកដែលមានផ្ទុកអ៊ុយរ៉ាញ៉ូមខ្សោយ។ យោងតាម Goldie គ្រាប់ប្រភេទនេះមានប្រសិទ្ធភាពខ្ពស់ក្នុងការកម្ទេចរថក្រោះទំនើប និងយានពាសដែក។

ប្រធានាធិបតីរុស្ស៊ី លោក ពូទីន ក្នុងថ្ងៃដដែលបាននិយាយថា «បើសិនរឿងនេះកើតឡើង រុស្ស៊ីនឹងឆ្លើយតបយ៉ាងសមស្រប ដោយសារលោកខាងលិច ជារួម បានចាប់ផ្ដើមប្រើប្រាស់អាវុធដែលមានផ្ទុកសមាសធាតុនុយក្លេអែរ»។

ចំណែករដ្ឋមន្ត្រីការពារជាតិរុស្ស៊ី Sergei Shoigu វិញ ក៏បានព្រមានថា ការសម្រេចចិត្តរបស់អង់គ្លេស ធ្វើឱ្យមូស្គូ និងបស្ចិមលោកខិតកាន់តែជិតករណី «ប៉ះទង្គិចនុយក្លេអែរ។ ពិតណាស់ រុស្ស៊ីក៏មានរបស់សម្រាប់តបត»។

ក្រសួងការពារជាតិអង់គ្លេស បន្ទាប់មកក៏បានចោទរុស្ស៊ីថា «មានចេតនារកវិធីធ្វើឱ្យព័ត៌មានប្រាសចាកការពិត»។ អ៊ុយរ៉ាញូមខ្សោយ «មិនទាក់ទងនឹងអាវុធ និងថាមពលនុយក្លេអែរ» ហើយវាគឺជា «សមាសធាតុស្ដង់ដាមួយ» ដែលត្រូវបានប្រទេសនានាប្រើប្រាស់ ក្នុងនោះមានរុស្ស៊ីផងដែរ។

អ៊ុយរ៉ាញ៉ូមខ្សោយគឺជាផលិតផលសំណល់ពីការចម្រាញ់អ៊ុយរ៉ាញ៉ូមក្នុងការផលិតវត្ថុធាតុថាមពល និងអាវុធនុយក្លេអែរ។ វាមានវិទ្យុសកម្មទាបជាងធៀបនឹងលោហធាតុនេះនៅក្នុងធម្មជាតិ ប៉ុន្តែបង្កការបារម្ភអំពីជាតិពុល។ អ៊ុយរ៉ាញ៉ូមខ្សោយតែងត្រូវបានផលិតជាគ្រាប់កាំភ្លើងទម្លុះដែក ដោយសារមានដង់ស៊ីតេខ្ពស់ជាង 70% ធៀបនឹងសំណ។

កាលពីខែមករា អង់គ្លេសប្រកាសថា នឹងផ្ដល់ជំនួយជារថក្រោះយុទ្ធសាស្ត្រ Challenger 2 ដើម្បីឱ្យអ៊ុយក្រែនអាច «វាយរុញច្រានកងទ័ពរុស្ស៊»។ Challenger 2 ត្រូវបានបង្កើតឡើងដើម្បីកម្ចាត់រថក្រោះរបស់សត្រូវ។ Challenger 2 ត្រូវបានប្រើប្រាស់នៅក្នុងសង្គ្រាមនៅបូស្នី-អ៊ែរហ្សេហ្គោវីន, កូសូវ៉ូ និងអ៊ីរ៉ាក់៕

March 22, 2023

ទឹកសមុទ្រកើនឡើងស្មើនឹង 365 លានអាងក្នុងមួយឆ្នាំ

ការវិភាគទិន្នន័យពីផ្កាយរណបរបស់ណាសា (NASA) បង្ហាញថា នីវ៉ូទឹកសមុទ្រទូទាំងសកលលោកកើនជាមធ្យម 0.27 សង់ទីម៉ែត្រចាប់ពីឆ្នាំ 2021 ដល់ឆ្នាំ 2022។

ទឹកសមុទ្រកើនជាមធ្យមនៅទូទាំងសកលលោកក្នុងដំណាក់កាលឆ្នាំ 2021-2022 ស្មើនឹងការបន្ថែមទឹកមួយលានអាងស្ដង់ដាអូឡាំពិក ទៅក្នុងសមុទ្រជារៀងរាល់ថ្ងៃក្នុងរយៈពេលពេញមួយឆ្នាំ នេះបើតាម Interesting Engineering ចុះផ្សាយកាលពីថ្ងៃទី 20 មីនា។ នេះគ្រាន់តែជាផ្នែកមួយនៃការកើនឡើងរបស់នីវ៉ូទឹកសមុទ្រដែលអូសបន្លាយពេលរាប់ទសវត្សរ៍។

ក្រុមអ្នកវិទ្យាសាស្ត្រចាប់ផ្ដើមតាមដានកម្ពស់ផ្ទៃទឹកសមុទ្រជាលើកដំបូងនៅឆ្នាំ 1993 នៅក្នុងបេសកកម្ម TOPEX/Poseidon របស់អាម៉េរិក-បារាំង។ ណាសាបានឱ្យដឹងថា ចាប់តាំងពីពេលនោះមក នីវ៉ូទឹកសមុទ្របានកើនឡើង 9.1 សង់ទីម៉ែត្រ។

ល្បឿននៃការកើនឡើងរបស់ទឹកសមុទ្រប្រចាំឆ្នាំក៏កើនពី 0.2 សង់ទីម៉ែត្រ/ឆ្នាំនៅឆ្នាំ 1993 ឡើងដល់ 0.44 សង់ទីម៉ែត្រ/ឆ្នាំ នៅឆ្នាំ 2022។ តាមការគណនាពីផ្កាយរណប ល្បឿននេះត្រូវគេរំពឹងថានឹងឡើងដល់ 0.66 សង់ទីម៉ែត្រ/ឆ្នាំនៅឆ្នាំ 2050។

កាលពី 30 ឆ្នាំមុន ការវាស់កម្ពស់ផ្ទៃទឹកសមុទ្របានចាប់ផ្ដើមដោយកម្មវិធី TOPEX/Poseidon និងបន្តដោយបួនកម្មវិធីទៀតរបស់ណាសា សហការជាមួយទីភ្នាក់ងារអវកាសអឺរ៉ុប (ESA), បារាំង (CNES) និងទីភ្នាក់ងារ NOAA របស់សហរដ្ឋអាម៉េរិក។ បេសកកម្មថ្មីបំផុតនៅក្នុងក្រុមនេះគឺ Sentinel-6/Jason-CS ដែលរួមមានផ្កាយរណបចំនួនពីរគ្រឿង នឹងបន្តការវាស់នីវ៉ូទឹកសមុទ្ររហូតដល់ឆ្នាំ 2030៕

March 22, 2023

អាចម៍ផ្កាយមួយដុំមានកម្លាំងផ្ទុះខ្លាំងជាងគ្រាប់បែកប្រល័យលោកនៅ Nagasaki 200 ដង ហោះជិតដល់ផែនដី

យោងតាមមជ្ឈមណ្ឌលស្រាវជ្រាវវត្ថុអវកាសក្បែរផែនដីរបស់ណាសា អាចម៍ផ្កាយ 2023 DZ2 នឹងមកក្បែរផែនដីក្នុងគម្លាត 175,000 គីឡូម៉ែត្រ នៅវេលាម៉ោងប្រហែល 3 ថ្ងៃទី 26 មីនា (ម៉ោងនៅកម្ពុជា)។

អាចម៍ផ្កាយ 2023 DZ2 នឹងហោះកាត់មុខផែនដីក្នុងគម្លាតមិនដល់ ½ នៃចម្ងាយមធ្យមពីផែនដីទៅព្រះចន្ទ។ ក្នុងគន្លាតនេះ គ្រប់គ្នាអាចសង្កេតមើលឃើញដោយប្រើប្រាស់កូនតេឡេស្កុប ឬសាម៉ែលគុណភាពខ្ពស់។ បច្ចុប្បន្ន អាចម៍ផ្កាយនេះកំពុងស្ថិតនៅក្នុងតំបន់កញ្ចុំផ្កាយ Cancer ប៉ុន្តែនៅថ្ងៃទី 26 មីនា វានឹងហោះដល់តំបន់កញ្ចុំផ្កាយ Leo, Virgo និង Libra។

ទិន្នន័យពីណាសាបង្ហាញថា 2023 DZ2 មានអង្កត់ផ្ចិតប្រហែលពី 43 ទៅ 97 ម៉ែត្រ ខ្ពស់ជាងបន្តិចបើធៀបនឹងរូបសំណាកសេរីភាព Liberty។ ពេលមកក្បែរផែនដី អាចម៍ផ្កាយនេះនឹងមានល្បឿន 28,000 គីឡូម៉ែត្រ/ម៉ោង លឿនជាងប្រហែល 8 ដង ធៀបនឹងគ្រាប់កាំភ្លើងវែង (rifle)។

2023 DZ2 ចំណាយពេលប្រហែលបីឆ្នាំ ទើបហោះបានមួយជុំព្រះអាទិត្យ។ អាចម៍ផ្កាយដែលត្រូវបានរកឃើញកាលពីថ្ងៃទី 27 កុម្ភៈនេះ ស្ថិតក្នុងចំណោមអាចម៍ផ្កាយជាង 31,000 ដុំដែលត្រូវបានរកឃើញស្ថិតនៅក្បែរផែនដី។

អ្នកវិទ្យាសាស្ត្រគណនាឃើញថា បើសិនជាកើតមានហេតុការណ៍ប៉ះទង្គិចមកលើផែនដី 2023 DZ2 នឹងផ្ទុះនៅលើអាកាស ហើយបំណែកជាច្រើនរបស់វានឹងធ្លាក់មកលើផែនដី។ ការផ្ទុះរបស់ 2023 DZ2 នឹងបង្កើតបានជាថាមពលប្រហាក់ប្រហែលនឹងរំសេវ TNT 5 លានតោន ខ្លាំងជាង 200 ដង បើធៀបនឹងគ្រាប់បែកនុយក្លេអែរដែលអាម៉េរិកបានទម្លាក់ទៅលើទីក្រុង Nagasaki របស់ជប៉ុន កាលពីឆ្នាំ 1945៕

March 21, 2023

អាម៉េរិកផ្ដល់ជំនួយយោធាបន្ថែម 350 លានដុល្លារដល់អ៊ុយក្រែន

ក្រសួងការបរទេសអាម៉េរិកបានប្រកាសអំពីកញ្ចប់ជំនួយយោធាថ្មីតម្លៃ 350 លានដុល្លារសម្រាប់អ៊ុយក្រែន ក្នុងនោះមានទាំងរ៉ុក្កែត HIMARS រួមនឹងគ្រាប់រំសេវជាច្រើនប្រភេទទៀត។

«រហូតដល់រុស្ស៊ីបញ្ចប់ជម្លោះ យើងនឹងនៅជាមួយអ៊ុយក្រែនរហូតដល់ពេលនោះ តាមដែលអាចធ្វើបាន» រដ្ឋមន្ត្រីក្រសួងការបរទេសអាម៉េរិក Antony Blinken កាលពីថ្ងៃទី 20 មីនា បាននិយាយដូច្នេះនៅពេលប្រកាសអំពីកញ្ចប់ជំនួយយោធាថ្មីសម្រាប់អ៊ុយក្រែន។ មកដល់ពេលនេះ ជំនួយយោធាសរុបដែលអាម៉េរិកបានផ្ដល់ឱ្យអ៊ុយក្រែន បន្ទាប់ពីរុស្ស៊ីបើកយុទ្ធនាការយោធាពិសេសកាលពីខែកុម្ភៈ 2022 គឺជាង 32 ពាន់លានដុល្លារអាម៉េរិក។

កញ្ចប់ទំនួយថ្មីតម្លៃ 350 លានដុល្លារនេះមានទាំងរ៉ុក្កែតសម្រាប់ប្រព័ន្ធ HIMARS, គ្រាប់សម្រាប់កាំភ្លើងធំរបស់រថក្រោះ M2 Bradley, មីស៊ីលប្រឆាំងរ៉ាដា AMG-88 HARM, អាវុធប្រឆាំងរថក្រោះ និងឧបករណ៍យោធាដទៃទៀត។

កញ្ចប់ជំនួយយោធាថ្មីនេះត្រូវបានប្រកាសនៅក្នុងគ្រាដែលសង្គ្រាមរវាងរុស្ស៊ី និងអ៊ុយក្រែនកំពុងស្ថិតក្នុងសភាពខ្លាំងក្លានៅទីក្រុង Bakhmut នៃខេត្ត Donetsk។ ទីក្រុង Bakhmut ត្រូវបានរុស្ស៊ីគ្រប់គ្រងប្រហែល 70% នៃផ្ទៃដីសរុប នេះបើតាមមេដឹកនាំក្រុមទាហានស៊ីឈ្នួលរុស្ស៊ី Wagner។

បណ្ដាប្រទេសដែលគាំទ្រអ៊ុយក្រែន កំពុងបង្វឹកទាហានប្រទេសនេះឱ្យចេះប្រើអាវុធ ឧបករណ៍បច្ចេកវិទ្យា និងយុទ្ធសាស្ត្រទំនើបៗ ដើម្បីទប់ទល់នឹងកងទ័ពឈ្លានពានរបស់រុស្ស៊ី៕

March 21, 2023

Category: អន្តរជាតិ