កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១៣ នាក់ទៀត ក្នុងអំឡុង ២៤ ម៉ោងនៃថ្ងៃទី ២១ ខែកក្កដា ២០២២ ដែលទាំងនេះសុទ្ធតែជាករណីឆ្លងក្នុងសហគមន៍។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១១ នាក់ទៀត បានជាសះស្បើយ និងមិនមានករណីស្លាប់ថ្មីដោយសារជំងឺនេះនៅឡើយ។
តម្លៃមាសពិភពលោកងើបក្បាលឡើងបន្តិចក្នុងការជួញដូរកាលពីម្សិលមិញ ក៏ប៉ុន្តែ មើលជារួម មាសបានបាត់បង់តម្លៃជិត ៤០០ ដុល្លារអាម៉េរិក/អោន រាប់ចាប់ពីខែមីនា ២០២២។
តម្លៃមាសពិភពលោកងើបក្បាលឡើងបន្តិចក្នុងការជួញដូរកាលពីថ្ងៃទី ២១ កក្កដា បន្ទាប់ពីកើនជាង ១% ក្នុងពេលដែលប្រាក់ដុល្លារអាម៉េរិកធ្លាក់ថ្លៃ និងការបារម្ភអំពីវិបត្តិសេដ្ឋកិច្ចបានជំរុញឱ្យមាសមានភាពទាក់ទាញជាងមុន ដោយសារតែវាគឺជា «ខ្ទង់វិនិយោគសុវត្ថិភាព»។
នៅវេលាម៉ោងប្រហែល ២៣ និង ៣០ នាទី នៃថ្ងៃទី ២១ កក្កដា (ម៉ោងនៅ កម្ពុជា) តម្លៃមាសប្រគល់ភ្លាម បានកើន ១% ឡើងដល់ ១,៧១២.៦១ ដុល្លារ/អោន ក្រោយពីបានធ្លាក់ថ្លៃដល់ ១,៦៨០.២៥ ដុល្លារ/អោន តាំងពីខែមីនា ២០២២។ មាសប្រគល់មានកាលកំណត់របស់ សហរដ្ឋអាម៉េរិក បានឡើងថ្លៃ ០.៦% ពោលគឺមានតម្លៃ ១,៧១១ ដុល្លារ/អោន (មាស ១ អោន (ounce) ស្មើនឹង ៨.២៩៤២៦ ជី)។
ការដែលប្រាក់អឺរ៉ូឡើងថ្លៃធៀបនឹងប្រាក់ដុល្លារអាម៉េរិក មុនពេលត្រលប់មកស្មើគ្នា ក៏បានរួមចំណែកជួយឱ្យមាសឡើងថ្លៃផងដែរ។
ទោះយ៉ាងណាក៏ដោយ ជារួម មាសបានបាត់បង់តម្លៃជាង ៣៨០ ដុល្លារអាម៉េរិក/អោន រាប់ចាប់ពីខែមីនា ឆ្នាំ ២០២២ ដោយសារតែប្រាក់ដុល្លារអាម៉េរិកឡើងថ្លៃ ធ្វើឱ្យឧបសគ្គដែលកើតពីការប្រាក់ហក់ឡើងត្រូវកើនឡើងខ្ពស់ ដែលនេះគឺជាកត្តាកាត់បន្ថយឱកាសនៃការកាន់កាប់មាស៕
ក្រុមហ៊ុន Ford គ្រោងនឹងប្រកាសកាត់បន្ថយការងាររាប់ពាន់កន្លែង ក្នុងប៉ុន្មានសប្ដាហ៍ខាងមុខ ដើម្បីបន្ថយការចំណាយ និងបង្កើនការប្ដូរទៅផលិតរថយន្តដើរដោយថាមពលអគ្គិសនី។
Wall Street Journal (WSJ) កាលពីថ្ងៃទី ២០ កក្កដា បានឱ្យដឹងថា ក្រុមហ៊ុនផលិតរថយន្តអាម៉េរិក Ford កំពុងតែត្រៀមខ្លួនកាត់បន្ថយការងារជាង ៤,០០០ កន្លែង ដើម្បីបង្កើនសកម្មភាពក្នុងការផ្លាស់ប្ដូរទៅផលិតរថយន្តអគ្គិសនី (EV) ដែលបច្ចុប្បន្នមានការចាប់អារម្មណ៍ខ្លាំង ដោយសារតែកត្តាប្រេងសាំងឡើងថ្លៃ និងកត្តាបរិស្ថាន និងបម្រែបម្រួលអាកាសធាតុជាដើម។
ក្រុមហ៊ុននេះគ្រោងនឹងប្រកាសព័ត៌មានលម្អិតស្ដីពីការកាត់បន្ថយការងារនៅក្នុងប៉ុន្មានសប្ដាហ៍ខាងមុខ នេះបើតាម WSJ។ សារព័ត៌មានខ្លះនិយាយថា កម្មកររបស់រោងចក្រ Ford នឹងមិនរងផលប៉ះពាល់ ប៉ុន្តែ Bloomberg បានផ្សាយថា មានការងាររហូតដល់ ៨,០០០ កន្លែងអាចនឹងត្រូវរងផលអាក្រក់។
នាយកប្រតិបត្តិនានារបស់ Ford នឹងផ្ដល់ព័ត៌មានលម្អិតស្ដីពីវិធីដែលក្រុមហ៊ុនកំពុងតែកសាងប្រព័ន្ធឧស្សាហកម្មរបស់ខ្លួន ដើម្បីសម្រេចបានល្បឿននៃការផលិតរថយន្តអគ្គិសនីឱ្យបានពី ៦០០,០០០ គ្រឿង ទៅជាង ២ លានគ្រឿងនៅឆ្នាំ ២០២៦ នេះបើតាមក្រុមហ៊ុន Ford។
កាលពីខែមីនា Ford បានប្រកាសបង្កើតយីហោថ្មីរថយន្តអគ្គិសនីថ្មី គឺ Ford Model e។ អំឡុងពេលនោះ Ford បានឱ្យដឹងថា ចង់ផលិតរថយន្តអគ្គិសនីឱ្យបាន ២ លានគ្រឿងជារៀងរាល់ឆ្នាំ ចាប់ពីឆ្នាំ ២០២៦ ដែលតួលេខនេះកាន់កាប់ប្រហែល ១/៣ នៃបរិមាណរថយន្តអគ្គិសនីសរុបនៅទូទាំងពិភពលោក និងមានគម្រោងចំណាយ ៥០ ពាន់លានដុល្លារអាម៉េរិក សម្រាប់សកម្មភាពនេះ។
ក្រុមហ៊ុន Ford ក៏បានឱ្យដឹងថា ចង់កាត់បន្ថយការចំណាយសម្រាប់ការផលិតរថយន្តប្រពៃណី ឱ្យចុះមកនៅត្រឹម ៣ ពាន់លានដុល្លារជារៀងរាល់ឆ្នាំផងដែរ៕
បន្ទាប់ពីប្រធានាធិបតីអាម៉េរិក ទទួលបានលទ្ធផលតេស្តវិជ្ជមាននឹងកូវីដ-១៩ សេតវិមាន បានប្រកាសថា លោក ចូ បៃដិន បានឆ្លងកូវីដ-១៩ ប៉ុន្តែ មានអាការរោគស្រាល និងកំពុងធ្វើចត្តាឡីស័កនៅ សេតវិមាន។
លេខាផ្នែកសារព័ត៌មានប្រចាំសេតវិមាន បានអះអាងថា លោក បៃដិន មានសុខភាពល្អ នឹងបន្តបំពេញការងារទៅតាមតួនាទីក្នុងអំឡុងពេលធ្វើចត្តាឡីស័ក។ ក៏ប៉ុន្តែ លោក Kevin O’Connor ដែលជាវេជ្ជបណ្ឌិតផ្ទាល់របស់លោក បៃដិន បានឱ្យដឹងថា ម្ចាស់សេតវិមាន មានអាការអស់កម្លាំង ហៀរសម្បោរ និងក្អកម្ដងម្ដាលតាំងតែពីព្រលប់ថ្ងៃទី ២០ កក្កដា។
លោក បៃដិន វ័យ ៧៩ ឆ្នាំ បានចាប់ផ្ដើមប្រើប្រាស់ Paxlovid ដែលជាថ្នាំប្រឆាំងវីរុសអាចជួយកាត់បន្ថយហានីភ័យធ្លាក់ខ្លួនឈឺធ្ងន់សម្រាប់អ្នកជំងឺកូវីដ-១៩។ ថ្នាំនេះទទួលបានការអនុញ្ញាតឱ្យប្រើប្រាស់ពីសំណាក់អាជ្ញាធរគ្រប់គ្រងអាហារ និងឱសថអាម៉េរិក ដើម្បីព្យាបាលអ្នកជំងឺកូវីដ-១៩ មានអាការរោគពីស្រាល ដល់មធ្យម ចំពោះមនុស្សអាយុចាប់ពី ១២ ឆ្នាំឡើងទៅដែលមានហានិភ័យធ្លាក់ខ្លួនឈឺធ្ងន់កម្រិតខ្ពស់។ អ្នកជំងឺត្រូវតែមានការណែនាំរបស់វេជ្ជបណ្ឌិត បើសិនចង់ប្រើប្រាស់ថ្នាំនេះ។
នៅលើទំព័របណ្ដាញសង្គម ថ្មីៗនេះ លោក ចូ បៃដិន បានបញ្ជាក់ថា «ខ្ញុំបានចាក់វ៉ាក់សាំង ៤ ដូសរួចហើយ។ ខ្ញុំពិតជាមានសុខភាពល្អ និងបានសម្រេចកិច្ចការជាច្រើន។ គ្រប់យ៉ាងនឹងល្អប្រសើរឡើងវិញមិនខាន»។
លោក ចូ បៃដិន បានចែករំលែងរូបថតលោកកំពុងអង្គុយធ្វើការ និងបង្ហោះវីដេអូអះអាងថា លោកមានសុខភាពល្អ បន្ទាប់ពីទទួលបានលទ្ធផលតេស្តវិជ្ជមាននឹងវីរុសកូវីដ-១៩។
រូបថតដែលត្រូវបាន ប្រធានាធិបតីអាម៉េរិក ចូ បៃដិន បង្ហោះលើបណ្ដាញសង្គមកាលពីប៉ុន្មានម៉ោងមុននេះបង្ហាញថា លោកកំពុងញញឹមនៅពេលអង្គុយធ្វើការក្នុងការិយាល័យរបស់លោក នៅ សេតវិមាន។
«គ្រប់គ្នា ខ្ញុំមានសុខភាពល្អទេ។ អរគុណដែលបានបារម្ភ។ ខ្ញុំបានហៅទៅកាន់តំណាងរាស្ត្រសភាជាន់ខ្ពស់ Bob Casey, តំណាងរាស្ត្រសភាជាន់ទាប Matt Cartwright និង អភិបាលក្រុង Paige Cognetti (នៅទីក្រុង Scranton រដ្ឋ Pennsylvania) ដើម្បីសម្ដែងការសោកស្ដាយដោយសារខកខានមិនបានចូលរួមព្រឹត្តិការណ៍នៅថ្ងៃនេះរបស់យើង។ តោះ ធ្វើការបន្តទៀត» លោក បៃដិន បង្ហោះសារអមជាមួយរូបថតរបស់លោក។
នៅលើទំព័រ Twitter លោក បៃដិន វ័យ ៧៩ ឆ្នាំ ក៏បានបង្ហោះវីដេអូមួយដែលបង្ហាញថា លោកកំពុងស្ថិតនៅលើជ្រុងមួយនៃរានហាលរបស់ អគារសេតវិមាន និងបានឱ្យដឹងអំពីស្ថានភាពសុខភាពរបស់លោក។
«សួស្ដីគ្រប់គ្នា ខ្ញុំសន្និដ្ឋានថា ព្រឹកនេះគ្រប់គ្នាបានដឹងរួចហើយថា ខ្ញុំទទួលបានលទ្ធផលតេស្តវិជ្ជមាននឹង nCoV (កូវីដ-១៩) ប៉ុន្តែ ខ្ញុំបានចាក់វ៉ាក់សាំង ៤ ដូសរួចហើយ» លោក បៃដិន និយាយបណ្ដើរ ញញឹមបណ្ដើម។ លោកបន្តថា «ខ្ញុំពិតជាមានសុខភាពល្អ និងបានសម្រេចកិច្ចការជាច្រើន។ គ្រប់យ៉ាងនឹងល្អប្រសើរឡើងវិញមិនខាន»។
មុននោះ Jean-Pierre ដែលជាលេខាផ្នែកសារព័ត៌មានរបស់ លោក បៃដិន បានឱ្យដឹងថា លោក បៃដិន បានចាប់ផ្ដើមប្រើប្រាស់ Paxlovid ដែលជាថ្នាំប្រឆាំងវីរុស អាចជួយកាត់បន្ថយហានិភ័យចូលពេទ្យ សម្រាប់អ្នកជំងឺកូវីដ-១៩។
…
ប្រធានាធិបតីបេឡារុស លោក Lukashenko យល់ថា អ៊ុយក្រែន អាចបញ្ចប់សង្គ្រាមបានដោយការចរចាជាមួយ រុស្ស៊ី និងធ្វើសម្បទានទឹកដីដើម្បីបញ្ចៀសហានិភ័យកើតសង្គ្រាមនុយក្លេអែរ។
«យើងត្រូវតែឈប់ សម្រេចកិច្ចព្រមព្រៀង បញ្ចប់ស្ថានការណ៍ច្របូកច្របល់ និងសង្គ្រាមនៅ អ៊ុយក្រែន» ប្រធានាធិបតីបេឡារុស លោក Alexander Lukashenko ប្រាប់ក្រុមអ្នកយកព័ត៌មាននៅ រដ្ឋធានីមីនស្កិ៍ កាលពីម្សិលមិញដូច្នេះ។
លោក Lukashenko បន្តថា «ចូរឈប់ទៅ ហើយយើងនឹងស្វែងរកឃើញវិធីដើម្បីបន្តរស់។ មិនចាំបាច់ដើរឆ្ងាយជាងនេះ ឆ្ងាយជាងនេះគឺជាជ្រោះជ្រៅនៃសង្គ្រាមនុយក្លេអែរ។ មិនបាច់ទៅដល់ទីនោះទេ»។
ទន្ទឹមនឹងនេះ ប្រធានាធិបតីបេឡារុស ក៏បានចោទប្រកាន់បស្ចិមលោកថា កំពុងស្វែងរកការធ្វើសង្គ្រាមជាមួយ រុស្ស៊ី និងបង្ខំឱ្យមានសង្គ្រាមនៅ អ៊ុយក្រែន។
បើតាមប្រធានាធិបតីបេឡារុស រដ្ឋាភិបាលអ៊ុយក្រែន អាចបញ្ចប់សង្គ្រាមបើសិនចាប់ផ្ដើមចរចាឡើងវិញជាមួយនឹង រុស្ស៊ី និងទទួលយកសំណើរបស់ មូស្គូ។
លោក Lukashenko អំពាវនាវដល់ រដ្ឋាភិបាលអ៊ុយក្រែន «ចូលតុចរចា និងយល់ព្រមឈប់គំរាមកំហែង រុស្ស៊ី» ហើយទទួលយកការបាត់បង់ទឹកដីនៅតំបន់ភាគខាងត្បូង និងភាគខាងកើតរបស់ អ៊ុយក្រែន ដែល រុស្ស៊ី កំពុងកាន់កាប់។
រុស្ស៊ី បានចាប់ផ្ដើមចូលលុកលុយ ប្រទេសអ៊ុយក្រែន កាលពីថ្ងៃទី ២៤ កុម្ភៈ ២០២២។ បេឡារុស ដែលជាសម្ព័ន្ធមិត្តរបស់ រុស្ស៊ី ដើរតួនាទីជាកន្លែងប្រមូលផ្ដុំកងកម្លាំងទាហានរបស់ ទីក្រុងមូស្គូ នៅក្នុងយុទ្ធនាការយោធានេះ។
ក៏ប៉ុន្តែ មកដល់ពេលនេះ លោក Lukashenko នៅតែចៀសវាងការបញ្ចូល បេឡារុស ទៅក្នុងភាគីមួយក្នុងសង្គ្រមនៅ អ៊ុយក្រែន ដែលប្រការនេះទំនងជាបណ្ដាលមកពី ប្រជាពលរដ្ឋបេឡារុស ភាគច្រើនមិនគាំទ្រឱ្យបញ្ជូនទ័ពចូលលុកលុយប្រទេសជិតខាង៕
សេតវិមានបានប្រកាសថា ប្រធានាធិបតី ចូ បៃដិន វិជ្ជមាននឹងវីរុស nCoV (កូវីដ-១៩) ប៉ុន្តែ មានអាការរោគស្រាល ហើយថា នឹងធ្វើចត្តាឡីស័កនៅ សេតវិមាន។
«ព្រឹកនេះ ប្រធានាធិបតី បៃដិន ទទួលបានលទ្ធផលវិជ្ជមាននឹង nCoV។ ប្រធានាធិបតីបានទទួលការចាក់វ៉ាក់សាំង ៤ ដូសរួចហើយ ហើយបច្ចុប្បន្នមានអាការរោគស្រាលខ្លាំងណាស់» លេខាផ្នែកសារព័ត៌មានប្រចាំ សេតវិមាន Karine Jean-Pierre បានឱ្យដឹងកាលពីម្សិលមិញដូច្នេះ។
យោងតាម Jean-Pierre លោក បៃដិន អាយុ ៧៩ ឆ្នាំ បានចាប់ផ្ដើមប្រើប្រាស់ Paxlovid ដែលជាថ្នាំប្រឆាំងវីរុស អាចជួយកាត់បន្ថយហានិភ័យចូលពេទ្យ សម្រាប់អ្នកជំងឺកូវីដ-១៩។
«តាមការណែនាំរបស់ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) ប្រធានាធិបតីនឹងធ្វើចត្តាឡីស័កនៅ សេតវិមាន ហើយនឹងបន្តធ្វើគ្រប់កិច្ចការទៅតាមតួនាទី នៅក្នុងអំឡុងពេលធ្វើចត្តាឡីស័ក» Jean-Pierre ឱ្យដឹងដូច្នេះ។
លោក បៃដិន បានទទួលការចាក់វ៉ាក់សាំង Pfizer បាន ២ ដូស នៅមុនពេលចូលកាន់តំណែងកាលពីខែមករា ២០២១, ចាក់ដូសជំរុញដំបូងនៅខែកញ្ញា ២០២១ និងដូចជំរុញទីពីរនៅថ្ងៃទី ៣០ មីនា ២០២២។
ដោយសារតែអាយុច្រើន លោក បៃដិន មានហានិភ័យធ្លាក់ខ្លួនឈឺធ្ងន់នៅពេលឆ្លងកូវីដ-១៩ បើទោះ CDC របស់ សហរដ្ឋអាម៉េរិក ឱ្យដឹងថា មនុស្សវ័យចំណាស់ដែលចាក់វ៉ាក់សាំងបាន ៣ ដូសឡើងទៅ ប្រឈមនឹងការចូលពេទ្យ និងការស្លាប់កម្រិតទាប។
យោងតាមមន្ត្រីមួយរូប សេតវិមានកំពុងតែស្រាវជ្រាវរកអ្នកដែលបានប៉ះពាល់ និងនៅផ្ទាល់ជាមួយប្រធានាធិបតី ហើយថានឹងប្រកាសព័ត៌មានលម្អិតក្រោយពីមានលទ្ធផល៕
ក្រសួងពាណិជ្ជកម្ម របស់ កម្ពុជា បានអំពាវនាវដល់ប្រជាពលរដ្ឋ កុំព្រួយបារម្ភរឿងអង្ករឡើងថ្លៃ ដោយសារមានក្រុមហ៊ុននៅក្នុងស្រុកអាចផ្គត់ផ្គង់តាមតម្រូវការបានគ្រប់គ្រាន់ អាចជួយរក្សាតម្លៃនៅលើទីផ្សារឱ្យនៅថេរ។
ក្នុងសន្និសីទសារព័ត៌មាន ស្តីពី «សមិទ្ធផលសម្រេចបានរយៈពេល ៥ ឆ្នាំកន្លងមក របស់ក្រសួងពាណិជ្ជកម្ម» នៅទីស្តីការគណៈរដ្ឋមន្ត្រី នាព្រឹកថ្ងៃទី ២១ កក្កដា ឯកឧត្តម ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម បានថ្លែងថា តម្លៃអង្ករ និងគ្រឿងឧបភោគបរិភោគមួយចំនួន គឺគ្មានការឡើងថ្លៃឡើយ ដោយសារតែ កម្ពុជា មានការបម្រុងទុកស្រូវអង្ករសម្រាប់ផ្គត់ផ្គង់ដល់ប្រជាពលរដ្ឋនៅទូទាំងប្រទេស។ លោកបន្តថា ជាងនេះ កម្ពុជា ក៏សល់ស្រូវអង្ករដែលអាចនាំចេញទៅកាន់ទីផ្សារក្រៅប្រទេសផងដែរ។
«វិស័យឯកជនក៏អាចនឹងរួមចំណែកជាមួយ នឹងក្រសួង នៅក្នុងការប្រឹងប្រែងកាត់បន្ថយថ្លៃដែលធ្វើឱ្យថ្លៃលក់នោះអាចស្ថិតនៅក្នុងលំដាប់មួយ ឬក៏កម្រិតមួយដែលទទួលយកបាន ទាំងអ្នកផលិតទាំងអ្នកប្រើប្រាស់» ឯកឧត្តម ប៉ែន សុវិជាតិ បញ្ជាក់បន្ថែម។
ប្រសាសន៍របស់ រដ្ឋលេខាធិការក្រសួងពាណិជ្ជកម្ម ត្រូវបានលើកឡើងនៅក្នុងគ្រាដែលទំនិញច្រើនមុខនៅក្នុងទីផ្សារបាន និងកំពុងឡើងថ្លៃជាបន្តបន្ទាប់ ពិសេសគឺទំនិញដែលចាំបាច់ក្នុងការប្រើប្រាស់ប្រចាំថ្ងៃ ធ្វើឱ្យប្រជាពលរដ្ឋទូទៅមានការព្រួយបារម្ភខ្លាំង។
ក្នុងរយៈពេលប៉ុន្មានថ្ងៃកន្លងទៅនេះ អង្គការសហប្រជាជាតិ (UN) បានព្រមានអំពីបញ្ហាផ្គត់ផ្គង់ស្បៀងអាហារជាបន្តបន្ទាប់។ លោក David Beasley នាយកប្រតិបត្តិនៃកម្មវិធីស្បៀងអាហារពិភពលោក (WFP) របស់ UN បានព្រមានថា នៅក្នុងរង្វង់ពី ៦ ទៅ ១២ ខែទៀត ពិភពលោកនឹងជួបការលំបាកខ្លាំងដោយសារតែតម្លៃស្បៀងអាហារកើនឡើងខ្ពស់ ដែលដើមហេតុបណ្ដាលមកពីវិបត្តិសង្គ្រាមនៅ អ៊ុយក្រែន។ លោក David Beasley បន្តថា ក្រោយមកទៀត បើសិនវិបត្តិធំៗក្នុងពិភពលោកនាបច្ចុប្បន្នមិនត្រូវបានដោះស្រាយ នោះពិភពលោកអាចធ្លាក់ទៅក្នុងស្ថានភាពខ្វះស្បៀងអាហារពិតប្រាកដ៕
សកម្មភាពធ្វើសមយុទ្ធយោធារបស់ ចិនដីគោក នៅក្បែរប្រជុំមួយនៅក្នុង សមុទ្រចិនខាងត្បូង ត្រូវបាន វៀតណាម ស្រែកថា «រំលោភបំពានអធិបតេយ្យភាព និងបង្កភាពស្មុគស្មាញនៅ សមុទ្រចិនខាងត្បូង»។
«យើងប្ដេជ្ញាប្រឆាំងតវ៉ាចំពោះសកម្មភាពរំលោភអធិបតេយ្យភាពទឹកដីរបស់ វៀតណាម ចំពោះប្រជុំកោះពីរគឺ Hoang Sa និង Truong Sa» អ្នកនាំពាក្យរងរបស់ ក្រសួងការបរទេសវៀតណាម លោកស្រី Pham Thu Hang បានប្រកាសនាថ្ងៃនេះ នៅពេលត្រូវបានសួរអំពីព័ត៌មានដែលថា ចិនដីគោក ប្រកាសបើកសមយុទ្ធយោធានៅក្បែរ ប្រជុំកោះ Paracel នៅ សមុទ្រចិនខាងត្បូង។
អ្នកនាំពាក្យរងរបស់ ក្រសួងការបរទេសវៀតណាម ក៏បានរម្លឹកអំពីការតវ៉ានាពេលកន្លងរបស់ អ្នកនាំពាក្យក្រសួងការបរទេសវៀតណាម ដែលប្រឆាំងទៅនឹងសមយុទ្ធរបស់ ចិនដីគោក ផងដែរ។
ការតវ៉ាថ្មីបំផុតរបស់ វៀតណាម នេះ ត្រូវបានធ្វើឡើងក្រោយពី អាជ្ញាធរខេត្ត Hainan របស់ ប្រទេសចិន កាលពីថ្ងៃទី ១៥ កក្កដា បានប្រកាសហាមទូកកប៉ាល់ឆ្លងកាត់តំបន់សមុទ្រភាគខាងជើងនៃ ប្រជុំកោះ Paracel ចាប់ពីថ្ងៃទី ១៦ ដល់ ២០ កក្កដា ដើម្បីរៀបចំសម្រាប់ការធ្វើសមយុទ្ធយោធា។
ប្រជុំកោះ Paracel និងប្រជុំកោះ Spratly ដែល វៀតណាម ហៅថា Hoang Sa និង Truong Sa ត្រូវបានប្រទេសនានានៅជុំវិញតំបន់សមុទ្រចិនខាងត្បូង អះអាងថាជាកម្មសិទ្ធិរៀងៗខ្លួន ធ្វើឱ្យតំបន់សមុទ្រនេះក្លាយជាទីបង្ហាញសាច់ដុំដាក់គ្នារវាងមហាអំណាចចិន និង សហរដ្ឋអាម៉េរិក រួមនឹងការ «ពាក់មុខយក្សដាក់គ្នា» រវាងបណ្ដាប្រទេសដែលពាក់ព័ន្ធ៕
រ៉ុក្កែតរបស់ក្រុមហ៊ុន Relativity Space នឹងនាំយកស្ថានីយចុះចតរបស់ Impulse Space ឡើងទៅកាន់ពិភពក្រហមនៅឆ្នាំ ២០២៤ បើសិនជាគ្រប់យ៉ាងដំណើរការរលូន។
ក្រុមហ៊ុនធុរកិច្ចថ្មីចំនួន ២ របស់ សហរដ្ឋអាម៉េរិក នៅ California គឺក្រុមហ៊ុន Relativity Space និងក្រុមហ៊ុន Impulse Space កាលពីថ្ងៃទី ១៩ កក្កដា បានប្រកាសថា កំពុងសហការគ្នាដើម្បីបំពេញបេសកកម្មពាណិជ្ជកម្មដំបូងទៅកាន់ផ្កាយព្រះអង្គារនៅឆ្នាំ ២០២៤ លឿនជាងច្រើនឆ្នាំធៀងនឹងគម្រោងហោះហើរដំបូងរបស់ SpaceX។
Newsweek បានឱ្យដឹងថា Relativity Space នឹងប្រើប្រាស់ Terran R ដែលជារ៉ុក្កែតបោះពុម្ភ 3D អាចប្រើបានច្រើនដង ខណៈដែល Impulse Space ទទួលបន្ទុកអភិវឌ្ឍយានអវកាសដើម្បីហោះទៅកាន់ពិភពព្រះអង្គារ និងស្ថានីយចុះចត សម្រាប់ដំឡើងឧបករណ៍នានានៅលើដីរបស់ពិភពនេះ។
ដោយឡែក ក្រុមហ៊ុន SpaceX របស់មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk វិញ មានគម្រោងហោះហើរលក្ខណៈពាណិជ្ជកម្មដំបូងរបស់ខ្លួនទៅកាន់ពិភពអង្គារនៅចុងទសវត្សរ៍នេះ នេះបើតាមអ្នកស្រី Gwynne Shotwell ដែលជាប្រធាន និងជានាយិកាប្រតិបត្តិរបស់ក្រុមហ៊ុន។
SpaceX មិនទាន់ប្រកាសអំពីពេលវេលាជាក់លាក់ក្នុងការហោះហើរទៅកាន់ភពព្រះអង្គារ ប៉ុន្តែ បើសិន Relativity Space និង Impulse Space អាចអនុវត្តគម្រោងបានដោយជោគជ័យ នោះពួកគេនឹងក្លាយជាក្រុមហ៊ុនពាណិជ្ជកម្មដំបូងដែលបានហោះទៅកាន់ពិភពក្រហមនេះ៕
