សឿន សំណាង - La Reine Media

មួកសុវត្ថិភាពបំពាក់បច្ចេកវិទ្យាជួយឱ្យក្រុមពន្លត់អគ្គិភ័យមើលធ្លុះផ្សែង

(ស្កុតឡេន)-មួកសុវត្ថិភាពរបស់ក្រុមអ្នកស្រាវជ្រាវនៅសាកលវិទ្យាល័យ Edinburgh បំពាក់កាំមេរ៉ា រ៉ាដា អង្គញាណ ដែលជួយឱ្យបុគ្គលិកពន្លត់អគ្គិភ័យរកឃើញជនរងគ្រោះ និងស្គាល់បុគ្គលិករួមក្រុមបានដោយងាយ។

បុគ្គលិកពន្លត់អគ្គិភ័យទាំងនេះកំពុងមួកសុវត្ថិភាពដែលមានបំពាក់បច្ចេកវិទ្យាបញ្ញាសិប្បនិម្មិត (AI)។

មួកសុវត្ថិភាពដែលអភិវឌ្ឍឡើងដោយក្រុមអ្នកស្រាវជ្រាវនៅសាកលវិទ្យាល័យ Edinburgh នេះ ជួយឱ្យក្រុមពន្លត់អគ្គិភ័យមើលធ្លុះផ្សែង។ ឧបករណ៍កាមេរ៉ា រ៉ាដា និងអង្គញាណដែលបំពាក់លើមួកនេះ មានតួនាទីប្រមូលទិន្នន័យ។

«អ្នកមើលឃើញហើយនេះ មានអង្គញាណសំខាន់ចំនួន ២ នៅទីនេះ» Chris Xiaoxuan Lu សាស្ត្រាចារ្យរងនៅសាកលវិទ្យាល័យ Edinburgh បង្ហាញមួកពិសេស។ «មួយគឺកាមេរ៉ាស្កែនកម្ដៅ ជាអង្គញាណពិសេសអាចមើលធ្លុះផ្សែង ហើយពួកវាធ្វើការក្នុងប្រវែងរលក (wavelength) ខុសៗគ្នា។ AI បកស្រាយបង្ហាញអំពីទិន្នន័យដល់អ្នកប្រើប្រាស់មួកភ្លាមៗ។

ប្រការខាងលើនេះជួយឱ្យបុគ្គលិកពន្លត់អគ្គិភ័យរកឃើញជនរងគ្រោះ ស្គាល់បុគ្គលិករួមក្រុម និងកំណត់ទីតាំងរបស់ខ្លួននៅកន្លែងកើតហេតុបានដោយងាយ។

មួកនេះមិនត្រឹមតែផ្ដល់លទ្ធផលព្យាករដល់បុគ្គលិកពន្លត់អគ្គិភ័យ «ជួរមុខ» នោះទេ តែក៏បញ្ជូនទិន្នន័យនេះទៅកាន់ក្រុមមេបញ្ជាការនៅខាងក្រៅផងដែរ។ ក្រោយមក មេបញ្ជាការអាចប្រើប្រាស់ទិន្នន័យទាំងនេះដើម្បីណែនាំសហការប្រកបដោយប្រសិទ្ធភាពសម្រាប់បុគ្គលិកពន្លត់អគ្គិភ័យនៅខាងក្នុង។

ការពិសោធនេះមានការចូលរួមពីក្រុមពន្លត់អគ្គិភ័យមកពីនាយកដ្ឋានសង្គ្រោះ និងពន្លត់អគ្គិភ័យស្កុតឡេន។ Glynn Macaffer មេបញ្ជាការម្នាក់មកពី នាយកដ្ឋានសង្គ្រោះ និងពន្លត់អគ្គិភ័យស្កុតឡេន និយាយថា «វាមិនប៉ះពាល់ដល់សកម្មភាព។ ឧបករណ៍នៅលើមួកសុវត្ថិភាពនេះស្រាលខ្លាំងណាស់បើធៀបនឹងប្រភេទមួកដែលយើងកំពុងប្រើប្រាស់»៕

October 7, 2022

ប្រទេសឡាវ អភិវឌ្ឍថ្នាលបច្ចេកវិទ្យាសម្រាប់ការជួញដូរប្រាក់ឌីជីថលដំបូង

ថ្មីៗនេះ ថ្នាលបច្ចេកវិទ្យា Bitqik បានចាប់ផ្ដើមដំណើរការជាផ្លូវការនូវមជ្ឈមណ្ឌលជួញដូរប្រាក់ឌីជីថលដំបូងនៅ ប្រទេសឡាវ។

ប្រាក់ឌីជីថលគឺជាវិស័យមួយដែលទទួលបានការយកចិត្តទុកដាក់ខ្ពស់ពីប្រទេសនានា និងអ្នកវិនិយោគក្នុងមួយរយៈពេលចុងក្រោយនេះ។ ប៉ុន្តែ ប្រទេសឡាវ មិនទាន់មានថ្នាលជួញដូរប្រាក់ឌីជីថលផ្ទាល់ខ្លួន ធ្វើឱ្យអ្នកវិនិយោគក្នុងវិស័យប្រាក់ឌីជីថលជួបការលំបាក នៅពេលត្រូវប្រើប្រាស់ថ្នាលបច្ចេកវិទ្យារបស់បរទេស។ Simeuang Group បានឆ្លៀតយកឱកាសនេះ អភិវឌ្ឍថ្នាល Bitqik ដើម្បីជួយដល់សកម្មភាពទិញដូរប្រាក់ឌីជីថលនៅ ប្រទេសឡាវ។

Bitqik គឺជាថ្នាលបច្ចេកវិទ្យាសម្រាប់ការទិញដូរប្រាក់ឌីជីថលតាមអនឡាញដែលទទួលបានវិញ្ញាបនបត្រទទួលស្គាល់ និងចុះបញ្ជីពាណិជ្ជកម្មពី ធនាគារជាតិរបស់ ឡាវ។ ក្រុមហ៊ុនអភិវឌ្ឍ និងដំណើរការសេវាកម្ម Bitqik គឺ Simeuang Group របស់លោក Ekaphan Phaphithak ដែលជាប្រធានក្រុមប្រឹក្សាភិបាលនៃធនាគារអភិវឌ្ឍន៍ចម្រុះ (Joint Development Bank-JDB)។

បច្ចុប្បន្ន Bitqik អាចធ្វើការជួញដូរប្រាក់ឌីជីថល ២០ ប្រភេទ រួមមាន BTC, ETH, USDT, BNB, ADA, XRP, BUSD, SOL, DOGE, DOT, TRX, DAI, AVAX, SHIB, MATIX, LTC, NEAR, UNI, ETC និង BCH។ ប៉ុន្តែ Bitqik នៅតែត្រូវប្រឈមនឹងបញ្ហាមួយចំនួន ពិសេសគឺស្ថានការណ៍ធ្លាក់ថ្លៃរបស់ប្រាក់ឌីជីថលមួយចំនួនធំ ដោយសារតែ រតនាគារជាតិអាម៉េរិក (Fed) ដំឡើរការប្រាក់ ខណៈដែលប្រាក់ឌីជីថលភាគច្រើនកំពុងស្ថិតក្នុងដំណាក់កាលបង្ហាញអំពីតម្លៃរបស់ខ្លួន។

ដូច្នេះ Bitqik ត្រូវតែអភិវឌ្ឍប្រព័ន្ធអតិថិជន អភិវឌ្ឍប្រព័ន្ធទីផ្សារប្រកបដោយសមកាលកម្ម និងទូលំទូលាយ។ល។ បើសិនចង់អភិវឌ្ឍខ្លួនទៅជាថ្នាលជួញដូរប្រាក់ឌីជីថលលំដាប់កំពូលនៅ ប្រទេសឡាវ នាពេលខាងមុខ៕

October 7, 2022

ជនជាតិរុស្ស៊ី ២ នាក់ ចែវទូកចូលទឹកដីអាម៉េរិក សុំសិទ្ធិជ្រកកោន

ជនជាតិរុស្ស៊ី ២ នាក់ ចែវទូកចូលកាន់កោះមួយរបស់ រដ្ឋ Alaska សហរដ្ឋអាម៉េរិក ដើម្បីសុំសិទ្ធិជ្រកកោននៅប្រទេសនេះ។

«ពលរដ្ឋរុស្ស៊ី ២ នាក់ ចូលចតនៅឆ្នេរសមុទ្រមួយ ក្បែរតំបន់ Gambell ភាគខាងលិចនៃកោះ St. Lawrence របស់រដ្ឋ Alaska និងស្នើសុំសិទ្ធិជ្រកកោននៅ សហរដ្ឋអាម៉េរិក» តំណាងរាស្ត្រ ២ រូបនៅសភាជាន់ខ្ពស់អាម៉េរិក គឺ Lisa Murkowski និង Dan Sullivan ឱ្យដឹងនៅក្នុងប្រកាសរួមមួយកាលពីថ្ងៃទី ០៦ តុលា។ ទីតាំងដែលពលរដ្ឋរុស្ស៊ី ចូលចត មានចម្ងាយពីតំបន់ចុងបូព៌ារបស់ រុស្ស៊ី តែប៉ុន្មានសិបគីឡូម៉ែត្រប៉ុណ្ណោះ។

អ្នកនាំពាក្យមួយរូបរបស់ ក្រសួងសន្តិសុខផ្ទៃក្នុងអាម៉េរិក បានឱ្យដឹងថា ពលរដ្ឋរុស្ស៊ី ២ នាក់នេះ ចែវទូកមួយគ្រឿង មកកាន់ សហរដ្ឋអាម៉េរិក ប៉ុន្តែ អត្តសញ្ញាណរបស់ពលរដ្ឋទាំងនេះមិនទាន់ត្រូវបានបង្ហើបឱ្យដឹងនៅឡើយ។ «ករណីរបស់ពួកគេកំពុងត្រូវបានពិនិត្យទៅតាមច្បាប់របស់ សហរដ្ឋអាម៉េរិក» អ្នកនាំពាក្យរូបនេះបន្ថែមដូច្នេះ។

តំណាងរាស្ត្រ Sullivan យល់ថា ករណីខាងលើបង្ហាញថា «ជនជាតិរុស្ស៊ី មិនចង់ចូលរួមយុទ្ធនាការធ្វើសង្គ្រាមនៅ អ៊ុយក្រែន របស់លោក ពូទីន»។ រុស្ស៊ី មិនទាន់មានប្រតិកម្មអ្វីទៅនឹងព័ត៌មាននេះនៅឡើយ។

October 7, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ០៧ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៦ នាក់ ក្នុងអំឡុង ២៤ ម៉ោង នៃថ្ងៃទី ០៦ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១០ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ០៧ ខែតុលា ឆ្នាំ ២០២២ កម្ពុជា មាន អ្នកឆ្លងសរុប ៖ ១៣៧,៩១២ នាក់, អ្នកជាសះស្បើយសរុប ៖ ១៣៤,៧៨៦ នាក់ និងអ្នកស្លាប់សរុប ៖ ៣,០៥៦ នាក់។

October 7, 2022

នាវាផ្ទុកយន្តហោះចម្បាំងអាម៉េរិក ធ្វើសមយុទ្ធជាមួយ កូរ៉េខាងត្បូង នៅក្បែរ កូរ៉េខាងជើង

សហរដ្ឋអាម៉េរិក-កូរ៉េខាងត្បូង ធ្វើសមយុទ្ធជើងទឹករួមដោយមានការចូលរួមរបស់នាវាផ្ទុកយន្តហោះចម្បាំង Ronald Reagan នៅសមុទ្រឧបទ្វីបកូរ៉េ បន្ទាប់ពីការបាញ់សាកល្បងមីស៊ីជាច្រើនលើករបស់ ទីក្រុងព្យុងយ៉ាង នាពេលថ្មីៗនេះ។

ក្រុមប្រឹក្សានៃសេនាធិការដ្ឋានចម្រុះកូរ៉េខាងត្បូង (JCS) ថ្ងៃនេះបានប្រកាសបើកសមយុទ្ធជើងទឹករួមជាមួយ សហរដ្ឋអាម៉េរិក នៅលើសមុទ្រភាគខាងកើតប្រទេសនេះ។ នាវាចម្បាំងកូរ៉េខាងត្បូង នឹងអនុវត្តខ្លឹមសារសមយុទ្ធជាមួយក្រុមប្រយុទ្ធនាវាផ្ទុកយន្តហោះចម្បាំង USS Ronald Reagan របស់ សហរដ្ឋអាម៉េរិក។

«យើងនឹងបន្តលើកកម្ពស់សមត្ថភាពប្រយុទ្ធ និងត្រៀមជាស្រេចសម្រាប់ការប្រយុទ្ធ តាមរយៈសមយុទ្ធរួមជាមួយនឹងក្រុមប្រយុទ្ធនាវាផ្ទុកយន្តហោះចម្បាំង USS Ronald Reagan ដើម្បីប្រតិកម្មនឹងសកម្មភាពបង្កហេតុរបស់ កូរ៉េខាងជើង» JCS បានឱ្យដឹងដូច្នេះ។

ក្រសួងការពារជាតិអាម៉េរិក និងក្រុមមន្ត្រីរបស់ កូរ៉េខាងជើង មិនទាន់មានប្រតិកម្មអ្វីនៅឡើយចំពោះព័ត៌មានខាងលើ។

ផែនទីបង្ហាញអំពីតំបន់សមុទ្រជប៉ុន និងទឹកដីឧបទ្វីបកូរ៉េ

កូរ៉េខាងជើង ថ្មីៗនេះ បានធ្វើការបាញ់ប្លោងមីស៊ីលជាបន្តបន្ទាប់។ ប្រទេសនេះកាលពីព្រឹកម្សិលមិញបានបាញ់មីស៊ីលប្លោង ២ គ្រាប់ទៅកាន់សមុទ្រខាងកើត ដែលនេះក៏ជាការបាញ់មីស៊ីលលើកទី ៦ របស់ទីក្រុងព្យុងយ៉ាង ក្នុងរង្វង់ជាង ១០ ថ្ងៃកន្លងមក។ កាលពីម្សិលមិញ កូរ៉េខាងជើង ក៏បានបញ្ជូនយន្តហោះចម្បាំងជាង ១០ ចូលទៅធ្វើសមយុទ្ធក្នុងតំបន់ក្បែរព្រំដែនជាមួយ កូរ៉េខាងត្បូង ផងដែរ។

សហរដ្ឋអាម៉េរិក និង កូរ៉េខាងត្បូង ប៉ុន្មានសប្ដាហ៍កន្លងទៅនេះ បានបង្កើនការធ្វើសមយុទ្ធរួមគ្នា ដើម្បីកំញើញ កូរ៉េខាងជើង។ ទីក្រុងព្យុងយ៉ាង បានថ្កោលទោសថា នេះគឺជា «ការបង្កភាពតានតឹងនៅ ឧបទ្វីបកូរ៉េ៕

October 7, 2022

United Airlines របស់ សហរដ្ឋអាម៉េរិក កំណត់គោលដៅប្រើប្រាស់យន្តហោះអគ្គិសនីដើម្បីបន្ថយការបំភាយឧស្ម័ន

ដើម្បីសម្រេចបានគោលដៅរបស់ក្រុមហ៊ុន ក្នុងការកាត់បន្ថយទាំងស្រុងនូវការបំភាយឧស្ម័នកាបូនឱ្យចុះមកនៅត្រឹម ០ ក្នុងឆ្នាំ ២០៥០ United Airlines របស់ សហរដ្ឋអាម៉េរិក កំពុងរៀបផែនការប្រើប្រាស់យន្តហោះអគ្គិសនីសម្រាប់ជើងហោះហើរក្នុងតំបន់ នៅឆ្នាំ ២០៣០។

យោងតាម CNBC បណ្ដាយន្តហោះដែលប្រើប្រាស់ថ្មផ្ទុកអគ្គិសនីនេះ កំពុងតែត្រូវបានអភិវឌ្ឍដោយក្រុមហ៊ុន Heart Aerospace របស់ ស៊ុយអែត។ United Airlines បានបញ្ជាទិញយន្តហោះអគ្គិសនី ១០០ គ្រឿង ពីក្រុមហ៊ុនខាងលើ កាលពីខែកក្កដា ២០២១។ ទន្ទឹមនឹងនេះ ក្រុមហ៊ុនអាកាសចរណ៍អាម៉េរិក មួយនេះ ក៏បានវិនិយោគទឹកប្រាក់មួយចំនួនទៅក្នុងក្រុមហ៊ុន Heart Aerospace តាមរយៈមូលនិធិបណ្ដាក់ទុនរបស់ខ្លួន។

ក្រៅពីនេះ United Airlines ថ្មីៗនេះក៏បានបង្កើនការវិនិយោគទៅលើវិស័យអាកាសចរណ៍ដែលបំភាយឧស្ម័នកម្រិតទាប ក៏ដូចជាប្រកាសអំពីគម្រោងការទិញតាក់ស៊ីហោះដំណើរការដោយអគ្គិសនី និងយន្តហោះដែលអាចហោះឡើងត្រង់ទៀតផង។

ក្រុមហ៊ុនអាកាសចរណ៍នេះថែមទាំងមានបំណងផ្ដោតការវិនិយោគទៅលើបច្ចេកវិទ្យាមួយចំនួនទៀត រួមមានម៉ូទ័រអគ្គិសនី អ៊ីដ្រូសែន និងបណ្ដាក្រុមហ៊ុនដែលនៅពីក្រោយបច្ចេកវិទ្យាដែលកំពុងរីកចម្រើនខ្លាំងក្លានាបច្ចុប្បន្ន។

ប្រធានក្រុមហ៊ុន United Airlines លោក Mike Leskinen នៅក្នុងក្របខណ្ឌនៃសន្និបាតនិម្មិត ESG Impact របស់ CNBC កាលពីថ្ងៃទី ០៦ តុលា បានឱ្យដឹងថា ក្រុមហ៊ុននេះមិនអាចបន្តការងាររបស់ខ្លួនដូចមុនទៀតទេ នៅក្នុងគ្រាដែលបច្ចេកវិទ្យាមានការរីកចម្រើន និងវិបត្តិអាកាសធាតុកំពុងកើតឡើង។ ដូច្នេះ លោកអះអាងថា United Airlines ត្រូវតែផ្លាស់ប្ដូរវិធីដំណើរការ និងជំនួញ តាមរយៈកញ្ចប់វិនិយោគទៅក្នុងវិស័យបច្ចេកវិទ្យា៕

October 7, 2022

លោក ចូ បៃដិន ថា «ពិភពលោកប្រឈមនឹងហានិភ័យនៃថ្ងៃផែនដីវិនាសដោយសារនុយក្លេអែរ»

ប្រធានាធិបតីអាម៉េរិក លោក បៃដិន យល់ថា ដោយសារតែសង្គ្រាមនៅ អ៊ុយក្រែន ពិភពលោកជាលើកដំបូងកំពុងតែប្រឈមនឹងហានិភ័យ «ថ្ងៃវិនាសរបស់ផែនដីដោយសារនុយក្លេអែរ» រាប់ចាប់ពីសង្គ្រាមត្រជាក់។

«យើងមិនធ្លាប់បានប្រឈមនឹងហានិភ័យកើតមានថ្ងៃវិនាសរាប់ចាប់តាំងពីសម័យរដ្ឋាភិបាល Kennedy រួមនឹងវិបត្តិមីស៊ីលគុយបា ឆ្នាំ ១៩៦២។ នេះគឺជាលើកដំបូងចាប់តាំងពីសង្គ្រាមត្រជាក់ ដែលពិភពលោកបានឃើញការគំរាមកំហែងផ្ទាល់ពីអាវុធនុយក្លេអែរ បើសិនជាគ្រប់យ៉ាងបន្តទៅតាមទិសដៅដូចបច្ចុប្បន្ន» ប្រធានាធិបតីអាម៉េរិក ចូ បៃដិន ថ្លែងនៅក្នុងព្រឹត្តិការណ៍រៃអង្គាសប្រាក់របស់ បក្សប្រជាធិបតេយ្យ នៅ New York កាលពីម្សិលមិញ។

លោក បៃដិន យល់ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន «មិននិយាយលេងសើច» នៅពេលព្រមានថា ត្រៀមរួចរាល់សម្រាប់ការដាក់ពង្រាយអាវុធនុយក្លេអែរនៅ សមរភូមិអ៊ុយក្រែន។

ពាក្យចចាមអារ៉ាមស្ដីអំពីសកម្មភាពនុយក្លេអែររបស់ រុស្ស៊ី ត្រូវបានលើកឡើងបន្ទាប់ពីលោក ពូទីន កាលពីថ្ងៃទី ២១ កញ្ញា បានចេញបទបញ្ជាកែនទ័ពមួយផ្នែកជាលើកដំបូងរាប់ចាប់តាំងពីសង្គ្រាមលោកលើកទីពីរ សម្រាប់ចូលសមរភូមិនៅ អ៊ុយក្រែន។ លោក ពូទីន ក៏បានព្រមានលោកខាងលិចថា រុស្ស៊ី ត្រៀមខ្លួនរួចជាស្រេចក្នុងការប្រើប្រាស់អាវុធនុយក្លេអែរដើម្បីការពារបូរណភាពទឹកដី ក្នុងនោះមានទាំង ៤ ខេត្តរបស់ អ៊ុយក្រែន ដែល រុស្ស៊ី ទើបតែបានរឹបអូសផងដែរ៕

October 7, 2022

សហភាពអឺរ៉ុប បញ្ចេញកញ្ចប់ទណ្ឌកម្មទី ៨ ដើម្បីប្រឆាំងនឹង រុស្ស៊ី ព្រោះតែបានរឹបអូសទឹកដីអ៊ុយក្រែន

កាលពីថ្ងៃទី ០៦ តុលា សហភាពអឺរ៉ុប (EU) បានប្រកាសជាផ្លូវការនូវកញ្ចប់ទណ្ឌកម្មថ្មីបំផុតសម្រាប់ រុស្ស៊ី ក្នុងគ្រាដែល មូស្គូ ទើបតែបានបង្ហើយកិច្ចការរឹបអូសទឹកដី ៤ ខេត្តរបស់ អ៊ុយក្រែន ដែលរួមមាន Donetsk, Kherson, Lugansk និង Zaporizhzhia។

យោងតាម Reuters នៅក្នុងកញ្ចប់ទណ្ឌកម្មថ្មី EU ប្រកាសរឹតបន្តឹងវិធានការទណ្ឌកម្មដែលត្រូវបានអនុវត្តចាប់ពីខែមេសា ចំពោះសេវាកម្មប្រាក់ឌីជីថលនៅ រុស្ស៊ី។ EU នឹងហាមរាល់កាបូបលុយអេឡិចត្រូនិច គណនី ឬសេវាកម្មដែលទាក់ទងនឹងទ្រព្យជាប្រាក់ឌីជីថល ដោយមិនកំណត់បរិមាណកាបូបលុយរបស់ រុស្ស៊ី។

ក្រោយពីបណ្ដាសេវាកម្មទូទាត់ប្រាក់ ដូចជា Visa និង Mastercard ជាដើម បានចាកចេញពី រុស្ស៊ី កាលពីដើមឆ្នាំនេះ ក៏ដូចជាធនាគារមួយចំនួនរបស់ប្រទេសនេះត្រូវបានដកចេញពីប្រព័ន្ធហិរញ្ញវត្ថុសកល SWIFT គេឃើញថា ប្រភេទប្រាក់ឌីជីថលដូចជា Stablecoin (USDT) ជាដើម បានក្លាយជាវិធីសាស្ត្រមួយដែលមានប្រសិទ្ធភាពបំផុតក្នុងការជួយឱ្យ ជនជាតិរុស្ស៊ី ផ្ទេរប្រាក់ចេញទៅបរទេស។

បុគ្គលជាច្រើនរូប និងស្ថាប័នមួយចំនួនរបស់ រុស្ស៊ី ក៏ត្រូវបានដាក់បញ្ចូលទៅក្នុងបញ្ជីខ្មៅរបស់ EU

EU ក៏បានដាក់ការកំណត់លើតម្លៃពិតានចំពោះផលិតផលប្រេងឆៅរបស់ រុស្ស៊ី ដែលត្រូវបានដឹកជញ្ជូនទៅកាន់ប្រទេសទីបីតាមផ្លូវទឹក។ សហភាពអឺរ៉ុប ក៏ពង្រីកការហាមនាំចូលទំនិញរបស់ រុស្ស៊ី មួយចំនួន រួមមាន ទាំងផលិតផលដែកថែប និងផ្អាកការនាំចេញសេវាកម្មព័ត៌មានវិទ្យា បច្ចេកវិទ្យា រួមនឹងសេវាកម្មផ្នែកច្បាប់ទៅឱ្យស្ថាប័នទាំងឡាយរបស់ រុស្ស៊ី។

ទន្ទឹមនឹងនេះ កញ្ចប់ទណ្ឌកម្មថ្មីក៏សំដៅលើបុគ្គលជាច្រើនរូប និងស្ថាប័នមួយចំនួនរបស់ រុស្ស៊ី។ ពលរដ្ឋ និងស្ថាប័នរដ្ឋចំនួន ៣៧ របស់ រុស្ស៊ី ក្នុងនោះមានទាំង ក្រសួងការពារជាតិ ក៏ត្រូវបានដាក់បញ្ចូលទៅក្នុងបញ្ជីខ្មៅ។ EU ថែមទាំងបានហាមពលរដ្ឋរបស់ខ្លួនដែលកាន់តំណែងនៅក្នុងក្រុមប្រឹក្សាភិបាលរបស់អង្គការ ស្ថាប័នរដ្ឋមួយចំនួនរបស់ រុស្ស៊ី។ ពិសេសជាងនេះ EU ក៏ប្រកាសថានឹងដាក់ទណ្ឌកម្មលើតំបន់ទាំងឡាយដែលត្រូវបាន រុស្ស៊ី រឹបអូសផងដែរ៕

October 7, 2022

ប្រធានាធិបតីអ៊ុយក្រែន អំពាវនាវដល់ ណាតូ ឱ្យវាយប្រហារទប់ស្កាត់លើ រុស្ស៊ី

លោក ហ្សេឡែនស្គី បានស្នើឱ្យ អង្គការណាតូ វាយប្រហារទប់ស្កាត់ ទីក្រុងមូស្គូ ប្រើប្រាស់អាវុធប្រល័យលោក ដែលការអំពាវនាវនេះត្រូវបាន វិមានក្រឹមឡាំង ចោទថា ជាការព្យាយាមបញ្ឆេះសង្គ្រាមលោក។

កាលពីថ្ងៃទី ០៦ តុលា នៅក្នុងសន្និសីទមួយដែលត្រូវបានប្រារព្ធឡើងដោយវិទ្យាស្ថាន Lowy ដែលជាវិទ្យាស្ថានស្រាវជ្រាវគោលនយោបាយលំដាប់កំពូលរបស់ អូស្ត្រាលី នាយកប្រតិបត្តិ Michael Fullilove បានសួរទៅកាន់ ប្រធានាធិបតីអ៊ុយក្រែន លោក ហ្សេឡែនស្គី ថា តើលោកជឿថា រុស្ស៊ី នឹងប្រើប្រាស់អាវុធនុយក្លេអែរ ដើម្បីប្រឆាំងនឹង អ៊ុយក្រែន ហើយលោកចង់ឱ្យ ណាតូ ធ្វើអ្វីទៀត ដើម្បីទប់ស្កាត់ ទីក្រុងម៉ូស្គូ ប្រើប្រាស់អាវុធនេះ។

«ណាតូ គួរតែធ្វើអ្វី? នោះគឺជាការលុបបំបាត់លទ្ធភាព រុស្ស៊ី ប្រើប្រាស់អាវុធនុយក្លេអែរ» ប្រធានាធិបតីអ៊ុយក្រែន ឆ្លើយដូច្នេះតាមរយៈវីដេអូ។ «ជាថ្មីម្ដងទៀត ខ្ញុំសូមអំពាវនាវដល់សហគមន៍អន្តរជាតិ ដូចដែលបានធ្វើនៅមុនថ្ងៃទី ២៤ កុម្ភៈ យើងត្រូវតែវាយប្រហារទប់ស្កាត់ដើម្បីឱ្យពួកគេដឹងថា ប្រការអ្វីខ្លះនឹងកើតឡើងបើសិនប្រើប្រាស់អាវុធនុយក្លេអែរ»។

«កុំរង់ចាំការវាយប្រហារដោយអាវុធនុយក្លេអែរ របស់ រុស្ស៊ី។ ចូរពិនិត្យឡើងវិញអំពីវិធីដាក់សម្ពាធ» លោក ហ្សេឡែស្គី ថ្លែងដូច្នេះ។

អ្នកនាំពាក្យរបស់ វិមានក្រឹមឡាំង លោក Dmitry Peskov យល់ថា មតិរបស់ ប្រធានាធិបតីអ៊ុយក្រែន «មិនខុសអ្វីទៅនឹងការព្យាយាមបញ្ឆេះសង្គ្រាមលោក ដែលនាំឱ្យមានផលវិបាកមិនអាចស្មានដល់»។ វិមានក្រឹមឡាំង បានអំពាវនាវដល់បណ្ដាប្រទេស ពិសេសគឺ សហរដ្ឋអាម៉េរិក និង អង់គ្លេស ឱ្យយកចិត្តទុកដាក់លើប្រកាសរបស់លោក ហ្សេឡែនស្គី និងត្រូវទទួលខុសត្រូវចំពោះសម្ដីរបស់ ប្រធានាធិបតីអ៊ុយក្រែន។

ក្រសួងការបរទសរុស្ស៊ី ក៏បានចោទលោក ហ្សេឡែនស្គី ថា ព្យាយាមបញ្ឆេះសង្គ្រាមនុយក្លេអែរ ដោយយល់ថា ប្រធានាធិបតីអ៊ុយក្រែន ត្រូវបាន «បូមពេញដោយអាវុធ» និង «អាចកម្ទេចពិភពលោក»។

ការិយាល័យរបស់លោក ហ្សេឡែនស្គី ក្រោយមកបានបកស្រាយថា ប្រធានាធិបតីអ៊ុយក្រែន មិនបានអំពាវនាវឱ្យវាយប្រហារទប់ស្កាត់ដោយប្រើប្រាស់អាវុធនុយក្លេអែរ ប្រឆាំងនឹង រុស្ស៊ី ឡើយ។ «ប្រធានាធិបតីគ្រាន់តែនិយាយអំពីអំឡុងពេលមុនថ្ងៃ ២៤ កុម្ភៈ។ ដែលពេលនោះ ត្រូវការការចាត់វិធានការទប់ស្កាត់ដើម្បីរារាំង រុស្ស៊ី ធ្វើយុទ្ធនាការសង្គ្រាម។ ខ្ញុំសូមបញ្ជាក់ជាថ្មីថា វិធានការតែមួយគត់ដែលត្រូវបានលើកយកមកពិភាក្សានៅពេលនោះ គឺវិធានការដាក់ទណ្ឌកម្មទប់ស្កាត់» ជំនួយការផ្នែកសារព័ត៌មាន Serhiy Nikiforov បង្ហោះសារលើបណ្ដាញសង្គម Facebook ដូច្នេះ។

បណ្ដាប្រទេសលោកខាងលិចយល់ថា ការគំរាមកំហែងផ្នែកនុយក្លេអែរ បានកើនឡើងចាប់តាំងពីថ្ងៃទី ៣០ កញ្ញា នៅពេល ប្រធានាធិបតីរុស្ស៊ី លោក ពូទីន បានចុះហត្ថលេខាលើឯកសាររឹបអូសទឹកដី ៤ ខេត្តរបស់ អ៊ុយក្រែន៕

October 7, 2022

យន្តហោះចម្បាំងកូរ៉េខាងជើង ១២ គ្រឿង ចូលមកក្បែរព្រំដែនកូរ៉េខាងត្បូង

កងទ័ពកូរ៉េខាងត្បូង ប្រកាសថា យន្តហោះចម្បាំង ១២ គ្រឿងរបស់ កូរ៉េខាងជើង ធ្វើសមយុទ្ធនៅក្បែរព្រំដែនប្រទេសនេះ ធ្វើឱ្យ ទីក្រុងសេអ៊ូល បញ្ជូនយន្តហោះចម្បាំង ៣០ គ្រឿងទៅទប់ទល់។

ក្រុមប្រឹក្សានៃសេនាធិការដ្ឋានចម្រុះកូរ៉េខាងត្បូង ថ្ងៃនេះបានឱ្យដឹងថា យន្តហោះចម្បាំង ៨ គ្រឿង និងយន្តហោះទម្លាក់គ្រាប់បែក ៤ គ្រឿងរបស់ កូរ៉េខាងជើង ហោះហើរឆ្ពោះទៅកាន់ព្រំដែនភាគខាងជើង និងត្រូវបានគេជឿថា ធ្វើសមយុទ្ធអាកាសប្រឆាំងដី។

កូរ៉េខាងត្បូង បានបញ្ជូនយន្តហោះចម្បាំង ៣០ គ្រឿងចេញទៅទប់ទល់សកម្មភាពរបស់ កូរ៉េខាងជើង។ បច្ចុប្បន្ន ទីក្រុងព្យុងយ៉ាង មិនទាន់មានប្រតិកម្មអ្វីនៅឡើយ ទាក់ទិននឹងព័ត៌មាននេះ។

កូរ៉េខាងជើង ថ្មីៗនេះ បានធ្វើការបាញ់ប្លោងមីស៊ីលជាបន្តបន្ទាប់។ ប្រទេសនេះកាលពីព្រឹកមិញក៏បានបាញ់មីស៊ីលប្លោង ២ គ្រាប់ទៅកាន់សមុទ្រខាងកើត ដែលនេះក៏ជាការបាញ់មីស៊ីលលើកទី ៦ របស់ទីក្រុងព្យុងយ៉ាង ក្នុងរង្វង់ ១២ ថ្ងៃកន្លងមក។

សហរដ្ឋអាម៉េរិក និង កូរ៉េខាងត្បូង ប៉ុន្មានសប្ដាហ៍កន្លងទៅនេះ បានបង្កើនការធ្វើសមយុទ្ធរួមគ្នា ដើម្បីកំញើញ កូរ៉េខាងជើង។ ទីក្រុងព្យុងយ៉ាង បានថ្កោលទោសថា នេះគឺជា «ការបង្កភាពតានតឹងនៅ ឧបទ្វីបកូរ៉េ៕

October 6, 2022

Author: សឿន សំណាង