US - La Reine Media

ក្រុមហ៊ុនមេរបស់ Facebook បង្ហាញ AI និពន្ធបទភ្លេងពីសំណេរ

AudioCraft គឺជា AI (បញ្ញាសិប្បនិម្មិត) ដែលអនុញ្ញាតឱ្យអ្នកប្រើប្រាស់និពន្ធបទភ្លេង ឬសំឡេងបែបអាជីពដោយគ្រាន់តែត្រូវការសំណេររៀបរាប់អំពីខ្លឹមសារដែលត្រូវការបង្កើត។

ចូរស្រមៃមើលថាវាអស្ចារ្យកម្រិតណា នៅពេលតន្ត្រីករអាជីពម្នាក់អាចបង្កើតស្នាដៃនិពន្ធថ្មីដោយមិនចាំបាច់លេងភ្លេងអ្វីទាំងអស់ ឬថា អ្នកជំនួញម្នាក់ចង់បន្ថែម background music (ខ្ញុំហៅថា តន្ត្រីកំដរ) ទៅក្នុងវីដេអូផ្សាយពាណិជ្ជកម្មថ្មីបំផុត។ «នោះគឺនៅពេល AudioCraft បញ្ចេញប្រសិទ្ធភាព» តំណាងរបស់ Meta ឱ្យដឹងដូច្នេះ។

យោងតាម Meta ឧបករណ៍ AudioCraft បំពាក់បញ្ញាសិប្បនិម្មិតចំនួន 3 រួមមាន MusicGen, AudioGen និង Encodec។ MusicGen គឺជា AI ដែល Meta អភិវឌ្ឍតាំងពីឆ្នាំ 2022 និងអាចបង្កើតសូរសព្ទតន្ត្រីពីសំណេរ ខណៈដែល AudioGen មានជំនាញខាងកែប្រែសំឡេង ហើយក៏អាចបង្កើតសំឡេងពីសំណេរ មានជាអាទ៌ សំឡេងសុនកព្រុស សំឡេងស៊ីផ្លេឡាន ឬសំឡេងស្បែកជើងមនុស្សដើរជាដើម។

ចំណែក EnCodec វិញ គឺជាឧបករណ៍ដោះកូដសំឡេងដោយយោងទៅលើ AI ដែលបង្ហាញវត្តមានកាលពីឆ្នាំ 2022។ AI នេះក៏អាចនិពន្ធបទភ្លេងគុណភាពខ្ពស់ដោយមិនត្រូវការសំណេរច្រើនផងដែរ។ ទាំងអស់ខាងលើនេះត្រូវបានហៅថា AudioCraft ដែលជាកម្មវិធីបង្កើតសំឡេងប្រកបដោយគុណភាព និងងាយស្រួលប្រើប្រាស់។

បច្ចុប្បន្ន ឧបករណ៍បញ្ញាសិប្បនិម្មិតចេះនិពន្ធ (Generative artificial intelligence) អាចបង្កើតរូបភាព និងវីដេអូដែលស្ទើរតែដូចបេះបិទទៅនឹងការពិតជាក់ស្ដែង ដោយគ្រាន់តែប្រើប្រាស់សំណេរ។ ក៏ប៉ុន្តែ ក្នុងវិស័យសំឡេង វាហាក់មិនទាន់រីកចម្រើននៅឡើយ ដោយសារតែវាមានភាពលំបាកជាងវិស័យដទៃ៕

August 3, 2023

ម្ចាស់ Facebook បង្ហើបអំពីការទទួលទានអាហារដើម្បីមានកម្លាំងកាយរឹងមាំ

នាយកប្រតិបត្តិរបស់ Meta ដែលជាក្រុមហ៊ុនមេរបស់ Facebook លោក Mark Zuckerberg ឱ្យដឹងថា គាត់ហូបអាហារប្រមាណ 4,000 កាឡូរីជារៀងរាល់ថ្ងៃ ច្រើនជាង 1.6 ដង បើធៀបនឹងការណែនាំ។

ក្នុងសារដែលបានបង្ហោះលើ Threads កាលពីថ្ងៃទី 01 សីហា លោក Zuckerberg សរសេរថា លោកត្រូវការបរិភោគអាហារច្រើនដើម្បីប៉ះប៉ូវសម្រាប់សកម្មភាពប្រចាំថ្ងៃ ដែលភាគច្រើនគឺការហាត់គុន MMA និងកីឡាមួយចំនួនទៀត។

មុននោះ ម្ចាស់ Facebook បានឱ្យដឹងថា លោកហាត់គុនជូជិតស៊ូ (Jiu-jitsu) និង MMA ពី 3 ទៅ 4 ពេលក្នុងមួយសប្ដាហ៍។ ដូច្នេះ លោកត្រូវការបន្ថែមកាឡូរីឱ្យបានគ្រប់គ្រាន់សម្រាប់សាច់ដុំ និងយកកម្លាំងមកវិញ។

លោក Zuckerberg ក៏បានសរសេរតបនឹង McDonald’s នៅលើ Threads ថា លោកបរិភោគសាច់មាន់ក្រឡុកគ្រឿង 20 ចំណែក, នំប៉័ងសាច់គោ, ដំឡូងបារាំងបំពងមួយចំណែកធំ, Oreo McFlurry និងនំផ្សេងៗ។

Mike Davis ដែលជាអ្នកគុននិយម MMA និងជាមិត្តរបស់ Zuckerberg បានណែនាំថា «មិត្តឯងកំពុងនៅក្នុងមណ្ឌលហ្វឹកហាត់ មិនគួរមាន McDonald’s នៅទីនេះទេ»។

Mark Zuckerberg (ស្ដាំ) ថតរូបជាមួយនឹងគ្រូបង្វឹកក្បាច់គុន Dave Camarillo

Zuckerberg កំពុងបង្កើនការហ្វឹកហាត់ក្បាច់គុននាមួយរយៈពេលចុងក្រោយនេះ បន្ទាប់ពីបានយល់ព្រមជាមួយនឹងការបបួលឡើងសង្វៀនប្រកួតប្រដាល់របស់មហាសេដ្ឋី Elon Musk ដែលជាម្ចាស់បណ្ដាញសង្គម Twitter កាលពីថ្ងៃទី 21 មិថុនា 2023។ អ្នកទាំងពីរបានជ្រើសរើស Las Vegas ជាទីតាំងសម្រាប់ការប្រកួត។ ក៏ប៉ុន្តែ មកដល់ពេលនេះ ពុំទាន់មានសញ្ញាណាមួយបង្ហាញថា ការប្រកួតនេះនឹងកើតឡើងពិតប្រាកដនៅឡើយ៕

August 3, 2023

គម្រោងប្រើប្រាស់គ្រាប់បែកនុយក្លេអែរបង្កើតព្រែកជីកជំនួស Suez

សហរដ្ឋអាម៉េរិកធ្លាប់រៀបផែនការប្រើប្រាស់គ្រាប់បែកនុយក្លេអែរដើម្បីបង្កើតព្រែកជីកប្រវែង 257 គីឡូម៉ែត្រ ដែលឆ្លងកាត់ប្រទេសអ៊ីស្រាអែល ដើម្បីជំនួសព្រែកជីក Suez នៅក្បែរនោះ។

រដ្ឋាភិបាលអាម៉េរិក កាលពីអំឡុងទសវត្សរ៍ឆ្នាំ 1960 ធ្លាប់បានពិចារណាអំពីសំណើប្រើប្រាស់គ្រាប់បែកនុយក្លេអែរ 520 គ្រាប់ ដើម្បីបង្កើតព្រែកជីកមួយជំនួសព្រែកជីក Suez ដែលឆ្លងកាត់ប្រទេសអ៊ីស្រាអែល។ គម្រោងនេះមិនអាចក្លាយជាការពិត ប៉ុន្តែបើសិនមានផ្លូវទឹកជំនួស ឬបន្ថែមលើ Suez នោះគឺអាចមានប្រយោជន៍ច្រើននៅក្នុងវិស័យដឹកជញ្ជូនតាមផ្លូវទឹក ហើយអាចចៀសវាងការកកស្ទះចរាចរណ៍ដូចករណីមួយកាលពីខែមីនា 2021។ នេះបើតាម Business Insider។

យោងតាមអនុស្សារណៈឆ្នាំ 1963 របស់ក្រសួងការពារជាតិអាម៉េរិក ដែលត្រូវបានបង្ហើបឱ្យដឹងកាលពីឆ្នាំ 1996 គម្រោងរបស់ក្រុមអ្នកវិទ្យាសាស្ត្រអាម៉េរិក គឺការប្រើប្រាស់គ្រាប់បែកនុយក្លេអែរដើម្បីបង្កើតព្រែកជីកសមុទ្រងាប់ (Dead Sea) ដែលនឹងអនុញ្ញាតឱ្យទឹកហូរឆ្លងកាត់សមុទ្រខ្សាច់ Negev។ ព្រែកជីកថ្មីក្នុងគម្រោងនេះនឹងមានប្រវែង 257 គីឡូម៉ែត្រ ឆ្លងកាត់ប្រទេសអ៊ីស្រាអែល។ មូលហេតុដែលធ្វើឱ្យមានគម្រោងនេះ គឺដោយសារវិធីសាស្ត្រជីកបែបធម្មតាត្រូវការចំណាយប្រាក់ច្រើន ហើយគ្រាប់បែកនុយក្លេអែរអាចប្រើប្រាស់បាននៅក្នុងករណីនេះ។ ព្រែកជីកមួយបែបនេះអាចរួមចំណែកយ៉ាងធំធេងនៅក្នុងការអភិវឌ្ឍសេដ្ឋកិច្ច។

ការកកស្ទះចរាចរណ៍កាលពីខែមីនា 2021 នៅលើព្រែកជីក Suez

ក្រុមអ្នកវិទ្យាសាស្ត្រនៅក្រសួងការពារជាតិអាម៉េរិកគណនាឃើញថា ត្រូវការឧបករណ៍ផ្ទុះដែលមានកម្លាំង 2 ម៉េហ្គាតោនចំនួន 4 សម្រាប់ព្រែកមួយកំណាត់ៗដែលមានប្រវែង 1.6 គីឡូម៉ែត្រ។ អ្នកជំនាញនិយាយថា តួលេខនេះប្រហាក់ប្រហែលនឹងគ្រាប់បែកនុយក្លេអែរចំនួន 520 គ្រាប់ ឬ រំសេវ 1.04 ជីហ្គាតោន (មួយជីហ្គាតោនស្មើនឹងមួយពាន់លានតោន)។ ទីតាំងល្អដែលត្រូវបានស្នើ គឺតំបន់ដែលឆ្លងកាត់សមុទ្រខ្សាច់ Negev នៅអ៊ីស្រាអែល ភ្ជាប់សមុទ្រមេឌីទែរ៉ាណេទៅនឹងឈូងសមុទ្រ Aqaba បើកផ្លូវរហូតដល់សមុទ្រក្រហម និងមហាសមុទ្រឥណ្ឌា។

ការសិក្សាបឋមបង្ហាញថា វិធីសាស្ត្រខាងលើគឺអាចទៅរួច។ ប៉ុន្តែ អនុស្សារណៈរបស់អាម៉េរិកក៏បានបង្ហាញថា អាចមានបញ្ហាផ្នែកនយោបាយ ព្រោះថា ក្រុមប្រទេសអារ៉ាប់ដែលនៅជុំវិញអ៊ីស្រាអែល នឹងជំទាស់យ៉ាងខ្លាំងក្លាទៅនឹងគម្រោងនេះ។

តំបន់ព្រែកជីក Suez និងគម្រោងព្រែកជីកនុយក្លេអែរ

អនុស្សារណៈនេះត្រូវបានប្រទះឃើញនៅពេលគណៈកម្មការថាមពលនុយក្លេអែរអាម៉េរិក ស៊ើបអង្កេតលើការប្រើប្រាស់ជាតិផ្ទុះនុយក្លេអែរសន្តិភាព (PNE) ដើម្បីជីកហេដ្ឋារចនាសម្ព័ន្ធដែលមានប្រយោជន៍។ គម្រោងខាងលើបានខកខានបន្ទាប់ពីសហរដ្ឋអាម៉េរិកមើលឃើញថា ការធ្វើតេស្តជាមួយនឹង PNE ចំនួន 27 លើក គឺមានការបំភាយវិទ្យុសកម្មទៅក្នុងបរិស្ថាន៕

August 3, 2023

ESA បង្ហាញ «សារអាថ៌កំបាំង» ពីទីតាំងឆ្ងាយពីផែនដីជិត 1,500 ឆ្នាំពន្លឺ

សញ្ញាសួរពណ៌ក្រហមដ៏ចម្លែក ត្រូវបានអវកាស «ផ្ដល់ជាសញ្ញា» មកកាន់មនុស្សនៅលើផែនដី តាមរយៈរូបភាពដ៏អាថ៌កំបាំងដែលតេឡេស្កុបអវកាស James Webb ទើបតែផ្ដិតយកបាន។

នោះគឺជាវត្ថុអវកាសដ៏ធំមួយដែលមានរូបរាងដូចទៅនឹងសញ្ញាសួរ ស្ថិតនៅខាងក្រោមផ្កាយក្មេងពីរដួងនៅក្នុងកញ្ចុំផ្កាយ Vela (Vela Supercluster)។ នេះបើតាមសេចក្ដីប្រកាសថ្មីរបស់ក្រុមអ្នកធ្វើការជាមួយតេឡេស្កុបអាម៉េរិក James Webb មកពីទីភ្នាក់ងារអវកាសអឺរ៉ុប (ESA)។

ដំបូងឡើយ ក្រុមរបស់ ESA នៅ James Webb សង្កេតមើលចំណុចលម្អិតរបស់ផ្កាយក្មេងមួយគូដែលមានឈ្មោះថា Herbig-Haro 46/47 ដែលកំពុងត្រូវឡោមព័ទ្ធដោយថាសវត្ថុធាតុដែលចិញ្ចឹមពួកវាឱ្យធំធាត់ក្នុងរយៈពេលរាប់លានឆ្នាំ។

នៅខាងក្រោមផ្កាយពីរដួងខាងលើ ពួកគេបានប្រទះឃើញអ្វីមួយដ៏អាថ៌កំបាំង និងគួរឱ្យភ្ញាក់ផ្អើល៖ សញ្ញាសួរមួយបង្ហាញខ្លួនដូចទៅនឹងមនុស្សលើភពដទៃកំពុងបញ្ជូនសញ្ញាដល់មនុស្សនៅលើផែនដី។

បច្ចុប្បន្ន អ្នកវិទ្យាសាស្ត្រមិនទាន់ដឹងច្បាស់ថា សញ្ញាសួរដ៏ធំមហិមានេះគឺជាអ្វីនៅឡើយ ប៉ុន្តែពណ៌ និងរូបរាងរបស់វា បាននាំឱ្យតារាវិទូនានាមានយោបល់មួយចំនួន។

នៅលើទំព័រ Space តំណាងរបស់តេឡេស្កុប James Webb យល់ថា វាអាចជាកាឡាក់ស៊ីដែលនៅសែនឆ្ងាយ ឬបណ្ដាកាឡាក់ស៊ីកំពុងប៉ះទង្គិចគ្នា នាំឱ្យមានរូបរាងខុសធម្មតា។ ចំណែកពណ៌ក្រហមរបស់សញ្ញាសួរនេះ កើតឡើងដោយសារវានៅឆ្ងាយ និងបន្តផ្លាស់ទីទៅឆ្ងាយ ព្រោះចក្រវាលកំពុងរីកមាឌ។

បើទោះសញ្ញាសួរនេះបង្ហាញខ្លួននៅក្បែរវត្ថុអវកាសដែលមានចម្ងាយ 1,470 ឆ្នាំពន្លឺពីផែនដី ប៉ុន្តែគម្លាតពិតរបស់សញ្ញាសួរនេះ អាចឡើងដល់រាប់ពាន់លានឆ្នាំ។

ចំណែកអ្នកវិទ្យាសាស្ត្រមកពីសាកលវិទ្យាល័យរដ្ឋ Illinois វិញ យល់ថា សញ្ញាសួរនេះគឺជាកាឡាក់ស៊ីពីរកំពុងច្របាច់បញ្ចូលគ្នា ក្នុងនោះចំណុចដូចផ្លែសន្ទូចនៅខាងលើគឺកើតឡើងដោយសារកាឡាក់ស៊ីធំមួយត្រូវបានកាច់ឱ្យកោង៕

August 2, 2023

រកឃើញគ្រាប់ល្អិតយ៉ាងច្រើនដូចវីរុសខ្នាតធំនៅក្នុងព្រៃអាម៉េរិក

ក្រុមអ្នកជំនាញបានរកឃើញគ្រាប់ល្អិតយ៉ាងច្រើនដែលអាចជាប្រភេទវីរុសថ្មីក្នុងដីនៅឯព្រៃ Harvard រដ្ឋ Massachusetts ដោយពួកវាមានលក្ខណៈពិសេសមិនធ្លាប់បានឃើញពីមុនមក។

យោងតាមការសិក្សាស្រាវជ្រាវថ្មីដែលទើបត្រូវបានចុះផ្សាយលើទំព័រ bioRxiv គ្រាប់ល្អិតខ្លះដូចទៅនឹងវីរុស និងមានសម្បកក្រៅដូចរូបផ្កាយ ចំណែកផ្សេងទៀតមានរូបចម្លែកៗមិនធ្លាប់បានឃើញ។

ទោះយ៉ាងណាក៏ដោយ ដោយសារតែក្រុមអ្នកវិទ្យាសាស្ត្រខាងលើមិនបានវិភាគហ្សែន ទើបមិនអាចហៅដោយប្រាកដថា គ្រាប់ល្អិតថ្មីទាំងនេះជាវីរុស បើទោះមានលទ្ធភាពខ្ពស់។ ជំនួសមកវិញ ពួកគេហៅវាថា «គ្រាប់ល្អិតដូចវីរុស» នៅក្នុងលទ្ធផលនៃការសិក្សាស្រាវជ្រាវថ្មី៕

August 1, 2023

ភ្ញាក់ផ្អើលខ្លាំងពេលអាវធ្លាប់ពាក់លេងពីក្មេង បែរជាមានតម្លៃខ្ពស់បែបនេះ

កាលពីថ្ងៃអាទិត្យ (30 កក្កដា) ភ្ញៀវដែលចូលរួមកម្មវិធី Antiques Roadshow (កម្មវិធីវាយតម្លៃវត្ថុបុរាណរបស់ BBC 1 នៅប្រទេសអង់គ្លេស) បានមានឱកាសទស្សនាវត្ថុនានាដែលភ្ញៀវទាំងឡាយបាននាំយកមកទីនេះ។

យោងតាម Daily Mail ព្រឹត្តិការណ៍វាយតម្លៃវត្ថុបុរាណត្រូវបានធ្វើឡើងនៅឯវិមាន Ham House ក្នុងតំបន់ Richmond ក្បែរទន្លេ Thames នៃទីក្រុងឡុងដ៍ ដែលសាងសង់តាំងពីសតវត្សរ៍ទី 17 ដោយមានការចូលរួមរបស់អ្នកជំនាញខាងវត្ថុបុរាណ Lee Young។

គូស្វាមីភរិយាវ័យចំណាស់មួយគូ បាននាំយកអាវសម្រាប់រាជវង្សានុវង្សនៅប្រទេសចិនតាំងពីបុរាណ មកឱ្យអ្នកជំនាញ Lee Young ធ្វើការពិនិត្យ និងវាយតម្លៃ។

យោងតាមបុរសជាស្វាមី ភូសា (អាវ) នេះគឺជាវត្ថុដែលត្រូវបានជីតារបស់ភរិយាគាត់ (ជាអ្នកដែលធ្លាប់កាន់តំណែងនាយកប្រតិបត្តិរបស់ធនាគារ Standard នៅប្រទេសឥណ្ឌា) នាំយកមកកាន់ប្រទេសអង់គ្លេស កាលពីដើមទសវត្សរ៍ឆ្នាំ 1930 នៃសហស្សវត្សរ៍មុន។

អ្នកស្រី Sara ភរិយារបស់បុរសខាងលើ ឱ្យដឹងថា អ្នកស្រីបានរក្សាទុកអាវក្រៅនេះនៅក្នុងប្រអប់ដាក់សម្លៀកបំពាក់ ហើយកាលពីនៅក្មេង គាត់តែងតែយកវាមកពាក់លេង។

«អាវនេះត្រូវបានផលិតឡើងក្នុងអំឡុងទសវត្សរ៍ឆ្នាំ 1750 ដែលពិតជាភូសាសម្រាប់រាជវង្សានុវង្ស។ វាជាអាវក្រៅសម្រាប់ស្ត្រី ហើយអាវធំដែលត្រូវបានផលិតឡើងកាលពីអំឡុងទសវត្សរ៍ឆ្នាំ 1750 គឺជាវត្ថុដ៏កម្រ។ អាវបែបនេះមាននៅសល់តែប៉ុន្មានឈុតប៉ុណ្ណោះ។ បើតាមខ្ញុំដឹង ដើម្បីបានមើលភូសាប៉ុន្មានឈុតនោះ អ្នកត្រូវធ្វើដំណើរទៅកាន់រដ្ឋធានីប៉េកាំង និងសារមន្ទីរវាំងចាស់។ វាពិតជាវត្ថុដែលមានតែនៅក្នុងសារមន្ទីរ» អ្នកជំនាញ Lee បន្ថែមដូច្នេះ។

យោងតាមលោក Lee ពណ៌លឿងរបស់ភូសានេះគឺជាពណ៌សម្រាប់តែមហេសីស្ដេច ឬស្នំដែលមានឋានៈខ្ពស់។ រូបភាពនាគមានក្រញ៉ាំជើងប្រាំនៅលើភូសា ក៏ជានិមិត្តរូបបង្ហាញថា វាជាវត្ថុសម្រាប់រាជវង្សានុវង្ស។

ប្រការដែលអ្នកជំនាញ Lee Young ត្រៀមនឹងប្រកាស ធ្វើឱ្យម្ចាស់អាវនេះមិនភ្ញាក់ផ្អើលមិនបាន។ «បើសិនយកទៅលក់ដេញថ្លៃក្នុងទីផ្សារនាបច្ចុប្បន្ន ភូសានេះនឹងអាចលក់បានក្នុងតម្លៃ 200,000 ផោន (ប្រហែល 256.000 ដុល្លារអាម៉េរិក)» លោក Lee បញ្ជាក់ដូច្នេះ។

ស្ដាប់ដល់ត្រឹមនេះ អ្នកស្រី Sara មានការភ្ញាក់ផ្អើលខ្លាំង និងនិយាយថា «ពិតជាភ្ញាក់ផ្អើលណាស់។ ព្រះអឺយ! សូមអរគុណលោកច្រើនណាស់។ ពួកយើងប្រាកដជាលែងដាក់វាទៅក្នុងប្រអប់សម្លៀកបំពាក់ទៀតហើយ»៕

August 1, 2023

យន្តហោះខូចម៉ាស៊ីន ពីឡុតក៏បញ្ជាឱ្យចុះចតលើសមុទ្រ

(បារាំង) – អ្នកបើកបរបានបញ្ជាឱ្យយន្តហោះទេសចរណ៍ចុះចតលើសមុទ្រមេឌីទែរ៉ាណេ បន្ទាប់ពីម៉ាស៊ីនរបស់វាខូច អ្នកនៅលើយន្តហោះក៏បានរួចពីការស្លាប់។

យន្តហោះធុនតូច Cessna 177 ចុះចតលើសមុទ្រដែលមានចម្ងាយពីតំបន់លំហែកាយ Frejus ខេត្ត Var នៅភាគអាគ្នេយ៍ប្រទេសបារាំង ប្រហែល 600 ម៉ែត្រ កាលពីព្រឹកថ្ងៃទី 30 កក្កដា។ កម្លាំងសង្គ្រោះឱ្យដឹងថា ពីឡុតជ្រើសរើសទីតាំងចុះចតលើទឹក ដើម្បីចៀសវាងឆ្នេរដែលកំពុងមានទេសចរច្រើននៅលេងកម្សាន្ត។

«ដើម្បីធ្វើបានបែបនេះ អ្នកត្រូវការជំនាញ និងសំណាង» អ្នកនាំពាក្យរបស់កម្លាំងសង្គ្រោះក្នុងតំបន់ និយាយដូច្នេះ។

បុរសអ្នកបើកបរ និងភ្ញៀវពីរនាក់ ក្នុងនោះមានម្នាក់ជាស្ត្រី ត្រូវបានជួយសង្គ្រោះពីយន្តហោះ។ ពួកគេមិនមានរបួស ប៉ុន្តែបានប៉ះពាល់អារម្មណ៍។

ចំណែកយន្តហោះវិញ បានលិចចូលសមុទ្រ បន្ទាប់ពីជនរងគ្រោះទាំងអស់ត្រូវបានយកចេញ បើទោះក្រុមសង្គ្រោះប្រឹងប្រែងជួយបណ្ដែត៕

July 31, 2023

ភ្នំភ្លើងធំជាងគេក្នុងប្រព័ន្ធព្រះអាទិត្យធ្លាប់ជាកោះនៅកណ្ដាលសមុទ្រ

ភ្នំភ្លើង Olympus Mons ដែលមានកម្ពស់ 25 គីឡូម៉ែត្រ នៅលើផ្ទៃភពអង្គារ ទំនងជាធ្លាប់ស្ថិតនៅកណ្ដាលមហាសាគរ។

ពេលភពអង្គារនៅក្មេង និងពេញដោយទឹកកាលពីរាប់ពាន់លានឆ្នាំមុន ភ្នំភ្លើងខ្នាតធំ Olympus Mons ទំនងជាមានរូបរាងដូចទៅនឹងភ្នំភ្លើង Stromboli ឬ Savai’l នៅលើផែនដី ប៉ុន្តែធំជាងឆ្ងាយ។ ការវិភាគថ្មីត្រូវបានប្រកាសលើទស្សនាវដ្ដី Earth and Planetary Science Letters ដែលបង្ហាញអំពីចំណុចប្រហាក់ប្រហែលគ្នារវាងភ្នំភ្លើង Olympus Mons និងបណ្ដាកោះភ្នំភ្លើងសកម្មនៅលើផែនដី ផ្ដល់អំណះអំណាងថ្មីស្ដីពីអតីតកាលដែលពេញដោយទឹករាវរបស់ភពអង្គារ។ នេះបើតាម Science Alert ចុះផ្សាយកាលពីថ្ងៃទី 27 កក្កដា 2023។

ក្រុមអ្នកវិទ្យាសាស្ត្រមកពីសាកលវិទ្យាល័យ Paris-Saclay នៅប្រទេសបារាំង បានឱ្យដឹងថា ផ្នែកខាងលើនៃចង្កេះភ្នំដែលមានកម្ពស់ 6 គីឡូម៉ែត្រ ព័ទ្ធជុំវិញភ្នំភ្លើង Olympus Mons ទំនងជាបានកើតឡើងដោយសារកំអែភ្នំភ្លើងហូរចូលទៅក្នុងទឹករាវ នៅពេលរចនាសម្ព័ន្ធនេះគឺជាកោះភ្នំភ្លើងដែលធ្វើសកម្មភាពអំឡុងពេលប្រហែលនៅចុងយុគសម័យ Noachian និងដើមយុគសម័យ Hesperian។

Olympus Mons គឺជាភ្នំភ្លើងដែលមានរូបរាងដូចខែលបុរាណ កម្ពស់ 25 គីឡូម៉ែត្រ និងលាតសន្ធឹងលើផ្ទៃដីដែលធំប៉ុនប្រទេសប៉ូឡូញ។ នេះមិនត្រឹមតែជាភ្នំភ្លើងធំបំផុត ប៉ុន្តែក៏ជាភ្នំភ្លើងខ្ពស់បំផុតផងដែរ នៅក្នុងប្រព័ន្ធព្រះអាទិត្យ។ ជើងភ្នំភ្លើងនេះមិនដូចទៅនឹងជើងភ្នំធម្មតានៅលើដីគោក ព្រោះថា នៅក្នុងរយៈកម្ពស់ប្រហែល 6 គីឡូម៉ែត្រ មានជញ្ជាំងថ្មឈរត្រង់ ព័ទ្ធស្ទើរតែជុំភ្នំ និងចាក់ចុះត្រង់ទៅក្រោម។ ប្រភពនៃជញ្ជាំងថ្មភ្នំចាក់ចុះត្រង់នេះ នៅតែជារឿងអាថ៌កំបាំងនៅឡើយ។

បច្ចុប្បន្ន ភពអង្គារគឺជាទីឋានដ៏សែនសោះកក្រោះ គ្មានទឹក និងពេញដោយខ្សាច់ ធូលី។ ទឹកនៅលើផ្ទៃរបស់ភពនេះ នៅមានខ្លះដែរ តែនៅក្នុងទម្រង់ទឹកកក។ ក៏ប៉ុន្តែ អ្នកវិទ្យាសាស្ត្រ បានរកឃើញភ័ស្ដុតាងជាបន្តបន្ទាប់ដែលបង្ហាញថា ទឹករាវធ្លាប់គ្របដណ្ដប់ពាសពេញផ្ទៃភពអង្គារ៕

July 29, 2023

កីឡាការិនីខ្សែប្រយុទ្ធព័រទុយហ្កាល់បំបែកកំណត់ត្រារបស់ Ronaldo

គ្រាប់បាល់ដែលរកបាននៅពេលជួយឱ្យព័រទុយហ្កាល់នាំមុខគូប្រកួត 2-0 ក្នុងការប្រកួតកាលពីថ្ងៃទី 27 កក្កដា ក្នុងក្របខណ្ឌ World Cup បានជួយឱ្យកីឡាការិនី Kika Nazareth បំបែកកំណត់ត្រាមួយរបស់ Cristiano Ronaldo។

Kika Nazareth ដែលមានអាយុ 20 ឆ្នាំ និង 8 ខែ ត្រូវបានគ្រូបង្វឹក Francisco Neto ដាក់ឱ្យទាត់ជាកីឡាការិនីជម្រើសដំបូង នៅក្នុងការប្រកួតជាមួយនឹងវៀតណាម កាលពីថ្ងៃទី 27 កក្កដា។ Kika Nazareth បានជួយឱ្យព័រទុយហ្កាល់នាំមុខវៀតណាម 2-0 ចាប់ពីនាទីទី 21។ ដោយរកបានគ្រាប់បាល់នេះ Kika Nazareth បានក្លាយជាអ្នកលេងបាល់ក្មេងបំផុតដែលស៊ុតចូលទីឱ្យក្រុមជម្រើសជាតិព័រទុយហ្កាល់នៅ World Cup។

មុននោះ កំណត់ត្រានេះ ត្រូវបានបង្កើតឡើងដោយ Cristiano Ronaldo ពេលទាត់នៅ World Cup ផ្នែកបុរស ឆ្នាំ 2006។ កាលនោះ កំពូលតារាបាល់ទាត់កើតឆ្នាំ 1985 បានស៊ុតចូលទីនៅនាទីទី 80 ជួយឱ្យព័រទុយហ្កាល់ឈ្មោះអ៊ីរ៉ង់ 2-0 នៅវគ្គចែកពូល។ Ronaldo មានអាយុ 21 ឆ្នាំ និង 132 ថ្ងៃ ក្នុងគ្រាដែលគាត់ទាត់ចូលទីនៅក្នុងការប្រកួតដំបូងរបស់ខ្លួននៅ World Cup។

Nazareth ដែលមានឈ្មោះពេញថា Francisca Ramos Ribeiro Nazareth Sousa កំពុងទាត់ឱ្យក្លឹប Benfica។ នាងបានបង្ហាញខ្លួនក្នុងក្លឹបនេះតាំងពីអាយុ 16 ឆ្នាំ និងចុះកិច្ចសន្យាដំបូងកាលពីឆ្នាំ 2020 ក្នុងវ័យ 17 ឆ្នាំ។ ខែមីនា ឆ្នាំ 2020 Nazareth បានទាត់ក្នុងការប្រកួតដំបូងសម្រាប់ក្រុមជម្រើសជាតិព័រទុយហ្កាល់។ នាងរកបានគ្រាប់បាល់ដំបូងឱ្យក្រុមជម្រើសជាតិនៅថ្ងៃទី 22 មិថុនា 2022 ក្នុងការប្រកួតមិត្តភាពជាមួយនឹងក្រុមក្រិក៕

July 29, 2023

ជន្លេនបុរាណ «ដេកលក់» 46,000 ឆ្នាំ ពេលនេះបានភ្ញាក់ដឹងខ្លួនឡើងវិញ

(រុស្ស៊ី) – ជន្លេនបុរាណមួយប្រភេទបានងើបពីដំណេកបន្ទាប់ពីដេកកកអស់រយៈពេលរាប់ម៉ឺនឆ្នាំនៅក្នុងហ្វូស៊ីលរូងកំប្រុកតាំងពីយុគសម័យទឹកកកចុងក្រោយបង្អស់។

ជន្លេនខ្នាតតូចមួយប្រភេទនៅមានជីវិត បន្ទាប់ពីបានដេកក្នុងស្រទាប់ទឹកកកក្នុងដីដែលមានអាយុកាលរាប់ម៉ឺនឆ្នាំនៅស៊ីបេរី យូរជាងរាប់ម៉ឺនឆ្នាំ បើធៀបនឹងប្រភេទជន្លេនដែលត្រូវបានធ្វើឱ្យរស់ឡើងវិញមុននោះ។ ជន្លេននេះស្ថិតក្នុងប្រភេទ Panagrolaimus kolymaensis។ ក្រុមអ្នកវិទ្យាសាស្ត្របានរកឃើញវាកំពុងដេកជារង្វង់មូលនៅក្នុងហ្វូស៊ីលរូងរបស់សត្វកំប្រុកដែលយកពីដីដែលកករាប់ម៉ឺនឆ្នាំ ក្បែរទន្លេ Kolyma នៅភាគឦសាននៃបូលខាងជើង កាលពីឆ្នាំ 2002។

អ្នកវិទ្យាសាស្ត្រមួយក្រុមក៏ធ្លាប់បានជួយឱ្យជន្លេនដែលកករស់ឡើងវិញម្ដងហើយកាលពីឆ្នាំ 2018 ប៉ុន្តែមិនបានដឹងអំពីអាយុកាល និងប្រភេទរបស់វា។

«នៅទីនេះ យើងបានបញ្ជាក់ថា ជន្លេនរាងមូលរស់នៅក្នុងដី ប្រភេទ Panagrolaimus kolymaensis បានផ្អាកដំណើរការក្នុងរយៈពេល 46,000 ឆ្នាំនៅក្រោមដីដែលកករាប់ម៉ឺនលានឆ្នាំនៅស៊ីបេរី» អ្នកស្រាវជ្រាវមកពីប្រទេសរុស្ស៊ី និងអាល្លឺម៉ង់ ឱ្យដឹងដូច្នេះ។

រាងកាយរបស់សត្វជន្លេនមូល និងខ្លាឃ្មុំទឹក (Tardigrades) អាចស្ថិតនៅស្ងៀមមួយកន្លែង ដែលហៅថា cryptobiosis (ដេកកក) ដើម្បីទប់ទល់នឹងស្ថានភាពកក ឬបាត់បង់ជាតិទឹកទាំងស្រុង។ ក្នុងករណីនេះ ពួកវាកាត់បន្ថយការប្រើប្រាស់អុកស៊ីសែន និងកម្ដៅដែលកើតពីដំណើរការស្រូបយកជីវជាតិពីអាហារ ដល់ថ្នាក់មិនអាចត្រូវបានគេដឹង។

ជន្លេនខាងលើបានដេកកកក្នុងដីតាំងពីចុងយុគសម័យទឹកកកចុងក្រោយ (ពី 2.6 លាន ដល់ 11,700 ឆ្នាំមុន)។ បណ្ដាប្រភេទជន្លេនបុរាណអាចរស់ឡើងវិញ បើសិនពួកវារួចផុតពីស្រទាប់ទឹកកកក្រោមដី។

July 28, 2023

Tag: US