Tag: មាន​

  • យានអវកាស Voyager 2 ភ្ជាប់​ទំនាក់ទំនង​ឡើងវិញ​ជាមួយ​ផែនដី

    យានអវកាស Voyager 2 ភ្ជាប់​ទំនាក់ទំនង​ឡើងវិញ​ជាមួយ​ផែនដី

    យានអវកាសរបស់​អាម៉េរិក​​ដែល​បាន​ហោះ​ដល់​តំបន់​អន្តរ​តារា​ និង​បាន​​ដាច់​​​ទំនាក់​ទំនងជា​មួយណា​សា​មុន​នេះ បានចាប់ផ្ដើម​បញ្ជូន​ទិន្នន័យ​មកកាន់​ផែនដី​វិញ​ហើយ កាលពី​ថ្ងៃទី 04 សីហា។

    យានអវកាស Voyager 2 ភ្ជាប់​ទំនាក់ទំនង​ឡើងវិញ​ជាមួយ​ផែនដី និង​កំពុងដំណើរការ​ធម្មតា។ បេសកកម្ម​យូរ​ឆ្នាំ Voyager 2 របស់​ទីភ្នាក់ងារ​អវកាស​អាម៉េរិក (ណា​សា-NASA) ត្រូវបាន​បាញ់​បង្ហោះ​កាលពី​ឆ្នាំ 1977 ហើយ​បច្ចុប្បន្ន​ស្ថិតនៅ​ចម្ងាយ 19.9 ពាន់​លាន​គឺ​ឡូ​ម៉ែត្រ​ពី​ផែនដី។ យាន​នេះ​បាន​ដាច់​ទំនាក់ទំនង​នឹង​ណា​សា បន្ទាប់ពី​កូដ​បញ្ជា​មួយចំនួន​បានធ្វើឱ្យ​អង់​តែ​ន​របស់ Voyager 2 ងាក​ចេញពី​ផែនដី​កាលពី​ថ្ងៃទី 28 សីហា។ នេះ​បើតាម​ការផ្សាយ​របស់ Live Science។

    កាលពី​ថ្ងៃទី 01 សីហា ក្រុម​អ្នកជំនាញ​របស់​ទីភ្នាក់ងារ​អវកាស​អាម៉េរិក (NASA) បានទទួល​រលកសញ្ញា​ដែល​អាចឱ្យ​ពួកគេ​ភ្ជាប់​ទំនាក់ទំនង​ឡើងវិញ។ Voyager 2 ត្រូវបាន​ដំឡើង​កម្មវិធី​ដែល​អាច​បង្វែរ​ទិស​របស់​អង់​តែ​ន​ដោយ​ឯកឯង​ច្រើនដង​ក្នុង​មួយឆ្នាំ ក្នុងករណី​មាន​បញ្ហា។ ការ​បង្វែរ​​អង់​តែ​ន​ដោយ​ស្វ័យប្រវត្ត​តម្រង់​មកកាន់​ផែនដី​លើក​បន្ទាប់​នឹងធ្វើ​ឡើង​នៅក្នុង​ខែតុលា​ឆ្នាំនេះ។

    យានអវកាស Voyager 1 និង Voyager 2 បច្ចុប្បន្ន​ស្ថិតនៅ​ចម្ងាយ 19.9 ពាន់​លាន​គឺ​ឡូ​ម៉ែត្រ​ពី​ផែនដី

    យានអវកាស Voyager 1 និង Voyager 2 ត្រូវបាន​បាញ់​បង្ហោះ​កាលពី​ខី​សីហា និង​កញ្ញា ឆ្នាំ 1977 ក្នុងនោះ Voyager 2 ត្រូវបាន​បាញ់​បង្ហោះ​មុន។ យាន​ទាំងពីរ​នេះ​សុទ្ធតែ​បាន​ហោះ​កាត់​ពីមុខ​បណ្ដា​ភព​ដែល​នៅ​ជាយ​ប្រព័ន្ធ​ព្រះអាទិត្យ មុនពេល​ឆ្លងកាត់​ព្រំដែន​ឆ្ងាយ​បំផុត​របស់​តំបន់​ហេ​លី​អូ​ស្ពែ​រ (Heliosphere) ជា​ស្រទាប់​ក្រៅ​បង្អស់​នៃ​បរិយាកាស​ព្រះអាទិត្យ​ដែល​បែងចែក​ប្រព័ន្ធ​ព្រះអាទិត្យ​ពី​តំបន់​អន្តរ​តារា។

    យាន Voyager 1 បាន​ទៅដល់​តំបន់​អន្តរ​តារា​មុន ដោយបាន​ឆ្លងកាត់​ហេ​លី​អូ​ស្ពែ​រ​កាលពី​ខែសីហា 2012។ បច្ចុប្បន្ន យាន​នេះ​កំពុងស្ថិត​ឆ្ងាយ​ពី​ផែនដី 23.8 ពាន់​លាន​គីឡូម៉ែត្រ។ Voyager 1 និង Voyager 2 នៅសល់​ថាមពល​ដែល​អាចឱ្យ​ប្រើប្រាស់​បានរ​ហូត​ដល់​យ៉ាងតិច​ត្រឹម​ឆ្នាំ 2025។

    Voyager 1 និង Voyager 2 នឹង​នៅតែ​អាច​បន្ត​បំពេញបេសកកម្ម​ផ្ញើ​សារ​ទៅកាន់​ភាវៈ​រស់នៅក្នុង​ប្រព័ន្ធ​ផ្កាយ​នានា បន្ទាប់ពី​ពួកវា​អស់​ថាមពល ដោយសារ​តែមាន​បំពាក់​ថាស​ដែល​ផ្ទុក​សារ​ពី​មនុស្សលោក ក្នុងនោះ​មាន​ទាំង​សំឡេង​នានា និង​ផែនទី​ផ្កាយ​របស់​ផែនដី​ជាដើម៕

  • តើ​មនុស្ស​អាច​រស់​បានយូរ​ប៉ុន​ណា​នៅក្នុង​ទី​អវកាស បើ​សិន​មិន​មាន​ឈុត​​ការ​ពារ​ខ្លួន​?

    តើ​មនុស្ស​អាច​រស់​បានយូរ​ប៉ុន​ណា​នៅក្នុង​ទី​អវកាស បើ​សិន​មិន​មាន​ឈុត​​ការ​ពារ​ខ្លួន​?

    នៅពេល​ស្ថិតក្នុង​ទី​អវកាស​ដោយ​មិនបាន​ពាក់​ឈុត​ការពារ មនុស្ស​អាច​បាត់បង់​ស្មារតី​ដោយសារតែ​កង្វះ​​អុកស៊ីសែន ក្រោយ​រយៈពេល​ប្រហែល​ពី 10 ទៅ 15 នាទី ហើយក៏​បាត់បង់​ជីវិត​យ៉ាង​ឆាប់រហ័ស។

    សម្លៀកបំពាក់​អវកាស​អនុញ្ញាតឱ្យ​មនុស្ស​ចេញមក​ខាងក្រៅ​យានអវកាស​ក្នុង​រយៈពេល​ខ្លី តាមរយៈ​ការផ្គត់ផ្គង់​ខ្យល់​អុកស៊ីសែន ទឹក សម្ពាធ និង​ការការពារ​រាងកាយ។ ប៉ុន្តែ បើសិន​មិនបាន​ប្រើប្រាស់​ឈុត​សម្លៀកបំពាក់​​អវកាស តើ​មនុស្ស​នឹងត្រូវ​ប្រឈម​នឹង​បញ្ហា​អ្វីខ្លះ ហើយ​អាច​រស់​បានយូរ​ប៉ុន​ណា​?

    យោងតាម Stefaan de Mey បុគ្គលិក​ផ្នែក​យុទ្ធសាស្ត្រ​នៅ​ទីភ្នាក់ងារ​អវកាស​អឺរ៉ុប (ESA) ក្នុង​រយៈពេល​ខ្លី ប្រហែល​ពី 10 ទៅ 15 វិនាទី មនុស្ស​នឹង​បាត់បង់​ស្មារតី ដោយសារតែ​កង្វះ​​អុកស៊ីសែន។ ក្នុង​ទី​អវកាស អុកស៊ីសែន​ក្លាយជា​បញ្ហា​ធ្ងន់ធ្ងរ។ «អុកស៊ីសែន​ចាប់ផ្ដើម​រីក​ឡើង និង​ធ្វើឱ្យ​បែក​សួត ឈាម​ប្រែជា​ពុះ និង​បែក​ពពុះ នាំឱ្យ​ស្ទះ​សរសៃឈាម បង្ក​គ្រោះថ្នាក់​ដល់​ជីវិត» Mey ឱ្យដឹង​ដូច្នេះ។

    កង្វះ​សម្ពាធ​ទាំងស្រុង​ក៏​ធ្វើឱ្យមាន​បញ្ហា​ជាច្រើន​ផ្សេងទៀត​ដែល​គ្រោះថ្នាក់​ដល់​ជីវិត។ ធាតុ​រាវ​របស់​រាងកាយ មានដូចជា​ទឹកមាត់ និង​ទឹកភ្នែក​ជាដើម​នឹងត្រូវ​ពុះ។ រាងកាយ​មនុស្ស​នឹង​ប៉ោង​ឡើង ប៉ុន្តែ​ស្បែក​អាច​ទប់​ទល់នឹង​ការប្រែប្រួល​សម្ពាធ។ ក្នុងករណី​សំណាងល្អ​​បំផុត អ្នកនឹង​មាន​ពេល​ច្រើន​វិនាទី មុនពេល​ប្រើប្រាស់​អស់​អុកស៊ីសែន​ក្នុង​សរសៃឈាម ហើយ​អ្នក​ក៏​ចាប់ផ្ដើម​បាត់បង់​ស្មារតី។ ដោយសារ​មិនអាច​កែប្រែ​ស្ថានការណ៍ អាការ​ស្លាប់​ខួរក្បាល​នឹង​កើតឡើង​ក្រោយ​រយៈពេល​តែ​ប៉ុន្មាន​នាទី​ប៉ុណ្ណោះ លើកលែងតែ​អ្នក​ត្រូវបាន​គេ​សង្គ្រោះ​ទាន់​ពេល​។

    ក្រៅពី​ការផ្ដល់​អុកស៊ីសែន និង​សម្ពាធ ឈុត​សម្លៀកបំពាក់​អវកាស​ក៏​ការពារ​មនុស្ស​ពី​ការគំរាមកំហែង និង​ហានិភ័យ​នានា ក្នុងនោះ​រួមមាន កម្ដៅ​ដល់ 120 អង្សា​សេ ត្រជាក់​ដល់ -150 អង្សា​សេ និង​វិទ្យុសកម្ម​ដែល​អាចឱ្យ​កើត​ជំងឺមហារីក ឬ​អាចម៍ផ្កាយ​បុក​ទម្លុះ​រាងកាយ​ជាដើម៕

  • ការ​ធ្វើ​អន្តរាគមន៍​យោធា​លើប្រទេស​​នី​ហ្សេ ត្រូវ​បាន​ ECOWAS អនុម័ត​

    ការ​ធ្វើ​អន្តរាគមន៍​យោធា​លើប្រទេស​​នី​ហ្សេ ត្រូវ​បាន​ ECOWAS អនុម័ត​

    ECOWAS ប្រកាសថា ក្រុម​ប្រទេស​នេះ​បាន​ឯកភាព​ជ្រើស​យក​ផែន​ការធ្វើអន្តរាគមន៍​លើ​ប្រទេស​នី​ហ្សេ បើសិន​ក្រុម​រដ្ឋប្រហារ​យោធា​មិន​ប្រគល់​អំណាច​ត្រលប់​មកឱ្យ​អាជ្ញាធរ​ស៊ីវិល។

    «រាល់​កត្តា​នៅក្នុង​សេណារីយោ​ធ្វើ​អន្តរាគមន៍​ត្រូវបាន​កំណត់រួច​រាល់​ហើយ ក្នុងនោះ​ក៏មាន​ផែនការ​ប្រមូល​កម្លាំង​ចាំបាច់ យន្តការ និង​ពេលវេលា​នៃ​ការដាក់​ពង្រាយ​កងកម្លាំង​ផងដែរ​» Abdel-Fatau Musah ស្នងការ​សហគមន៍​សេដ្ឋកិច្ច​បណ្ដា​ប្រទេស​អាហ្វ្រិក​ខាងលិច (ECOWAS) កាលពី​ថ្ងៃទី 04 សីហា បានឱ្យដឹង​ដូច្នេះ។

    លោក Musah មិនទាន់​ប្រកាស​នៅឡើយ​អំពី​ពេលវេលា​ជាក់លាក់​ដែល​ក្រុម​ប្រទេស ECOWAS នឹងធ្វើ​អន្តរាគមន៍​យោធា​នៅ​ប្រទេស​នី​ហ្សេ។ យោងតាម​លោក Musah ក្រុម ECOWAS ចង់ឱ្យ​វិធានការ​ការទូត​មាន​ប្រសិទ្ធភាព និង​បញ្ជូន​សារ​ច្បាស់លាស់​ទៅកាន់​អាជ្ញាធរ​យោ​ធានី​ហ្សេ​​ឱ្យ​ដឹង​ថា យើង​កំពុង​ផ្ដល់ឱកាស​ឱ្យ​ពួកគេ​ប្រែ​ត្រលប់​នូវ​អ្វីដែល​បានធ្វើ»។

    ក្រុម​មេបញ្ជាការ​កងទ័ព​នៃ​បណ្ដា​ប្រទេស​ក្នុង​ក្រុម ECOWAS នា​សប្ដាហ៍​នេះ មាន​កិច្ចប្រជុំ​មួយ​នៅ​រដ្ឋធានី​អា​ប៊ូ​ហ្សា​ នៃ​ប្រទេស​នី​ហ្សេ​រី​យ៉ា បន្ទាប់ពី​កងកម្លាំង​យោធា​នី​ហ្សេ​ធ្វើ​រដ្ឋប្រហារ​ទម្លាក់​លោក Mohamed Bazoum កាលពី​ថ្ងៃទី 26 កក្កដា។

    អាជ្ញាធរ​យោធា​នី​ហ្សេ កាលពី​ថ្ងៃទី 04 សីហា ក៏បាន​ប្រកាសថា ប្រទេស​នេះ​នឹង​លុបចោល​កិច្ចសហប្រតិបត្តិការ​ការពា​រ​ជាតិ​ជាមួយនឹង​បារាំង។ ក៏ប៉ុន្តែ ទីក្រុង​ប៉ារីស​វិញ បាន​អះអាងថា ទំនាក់ទំនង​យោធា​រវាង​ប្រទេស​ទាំងពីរ​មិនមាន​ការប្ដូរ​ផ្លាស់ ព្រោះ​មិន​ទទួលស្គាល់​ក្រុម​រដ្ឋប្រហារ និង​បញ្ជាក់ថា មានតែ​អាជ្ញាធរ​ស្របច្បាប់​នៅ​នី​ហ្សេ​ប៉ុណ្ណោះ ​ទើប​មាន​សិទ្ធិ​សម្រេច។

    ផែនទី​នៃ​ក្រុម​ប្រទេស​ ECOWAS នៅ​អាហ្វ្រិក​ខាង​លិច

    កាលពី​ចុង​សប្ដាហ៍​កន្លង ECOWAS បានសម្រេច​ចិត្ត​ដាក់ទណ្ឌកម្ម​ផ្នែក​ពាណិជ្ជកម្ម និង​ហិរញ្ញវត្ថុ​ចំពោះ​នី​ហ្សេ និង​បានដាក់​ឱសានវាទផ្ដល់​ឱកាស​មួយ​សប្ដាហ៍​ដើម្បី​​ឱ្យ​អាជ្ញាធរ​យោធា​នៅ​នី​ហ្សេ​ ​ប្រគល់​អំណាច។

    ECOWAS មាន​សមាជិក 15 ប្រទេស​នៅ​អាហ្វ្រិក រួមមាន កាបវែរ, ហ្គំប៊ី, ហ្គីណេ, ហ្គីណេប៊ីហ្សូ​, លីបេរីយ៉ា​, ម៉ាលី​, សេណេហ្កាល់​, សៀរ៉ាឡេអូន​, បេណាំង​, បួគីណាហ្វាសូ​, ហ្គាណា​, កូតឌឺវ័រ​, នីហ្សេ​, នីហ្សេរីយ៉ា​, តូហ្គោ​​។ ប៉ុន្តែ ម៉ាលី  និង បួគីណាហ្វាសូ​ ត្រូវបាន ECOWAS ព្យួរ​អាសនៈ ព្រោះតែ​ក្រុម​រដ្ឋប្រហារ​យោធា​ឡើងកាន់​អំណាច។ ម៉ាលី  និង បួគីណាហ្វាសូ ប្រកាសថា នឹង​ចូលធ្វើ​សង្គ្រាម បើសិន​នី​ហ្សេ​ត្រូវ​បរទេស​ធ្វើ​អន្តរាគមន៍​យោធា៕

  • តេ​ឡេ​ស្កុប James Webb ថត​បាន «រូបភាព​អនាគត» របស់​ព្រះអាទិត្យ

    តេ​ឡេ​ស្កុប James Webb ថត​បាន «រូបភាព​អនាគត» របស់​ព្រះអាទិត្យ

    ក្រុម​អ្នកវិទ្យាសាស្ត្រ​បាន​បង្ហើប​ឱ្យដឹង​អំពី​យុគសម័យ​ចុងក្រោយ​នៃ​ជីវិត​របស់​ផ្កាយ​មួយ​ដួង តាមរយៈ​រូបភាព​ដែល​ថត​បាន​ដោយ​តេ​ឡេ​ស្កុប​អវកាស James Webb។

    តេ​ឡេ​ស្កុប​អវកាស James Webb ថត​បាន​រង្វង់​មូល​ដ៏​ស្រស់ស្អាត​របស់​នេ​ប៊ូ​ឡា​មួយ​មាន​ឈ្មោះថា Messier 57 (M57) ដែលមាន​ចម្ងាយ​ពី​ផែនដី​ប្រហែល 2,200 ឆ្នាំ​ពន្លឺ (មួយឆ្នាំ​ពន្លឺ​ស្មើនឹង 9.46 ទ្រី​លាន​គីឡូម៉ែត្រ)។

    រង្វង់​មូល​របស់​នេ​ប៊ូ​ឡា​គឺជា​ផ្នែក​ដែល​នៅសល់ និង​បញ្ចេញ​ពន្លឺ របស់​ផ្កាយ​មួយ​ដួង​ដែល​បាន​ស្លាប់។ នៅ​ចំ​កណ្ដាល​រង្វង់​មូល​នេះ​មាន​ចំណុច​ពណ៌​ស​តំណាងឱ្យ​កូន​ផ្កាយ ដែលជា​ស្នូល​របស់​ផ្កាយ​ដែល​បាន​ស្លាប់​បន្ទាប់ពី​បាន​រីក​មាឌ។

    នេប៊ូឡា Messier 57 (M57)

    នៅពេល​ផ្កាយ​ទាំងឡាយ​ដែលមាន​ទំហំ​ប្រហាក់ប្រហែល​នឹង​ព្រះអាទិត្យ អស់​ថាមពល​សម្រាប់​ប្រតិកម្ម​នុយ​ក្លេ​អែរ ពួកវា​នឹងមិន​អាច​ទប់​ទល់នឹង​ទំនាញ​ពី​ខាងក្នុង​ខ្លួន​របស់​ពួកវា ហើយក៏​បាត់បង់​តុល្យភាព​ដែល​ធ្លាប់បាន​រក្សា​ឱ្យ​ពួកវា​ស្ថិតនៅ​រាប់ពាន់​លាន​ឆ្នាំ​កន្លង។

    ពេលដែល​ស្នូល​របស់​ផ្កាយ​ត្រូវ​បែកធ្លាយ ស្រទាប់​ខាងក្រៅ​ដែលជា​កន្លែង​ប្រតិកម្ម​នុយ​ក្លេ​អែរ ក៏ត្រូវ​បក់​បំ​ប៉ើង​ទៅ​ទី​អវកាស។ ក្នុង​គ្រា​ដំបូង បាតុភូត​នេះ​នឹងធ្វើ​ឱ្យ​ផ្កាយ​ដូច​ព្រះអាទិត្យ រីក​មាឌ​យ៉ាង​ធំ និង​ឆាប់រហ័ស ប្រៀបបាន​ទៅនឹង​ការផ្ទុះ។

    ស្រទាប់​វត្ថុ​ធាតុ​ខាងក្រៅ​របស់​ផ្កាយ​ដែល​បាន​រីក​មាឌ​នេះ ចុងក្រោយ​ក៏​ចុះ​ត្រជាក់ និង​ភាយ​ទៅ​ឆ្ងាយ​ពី​ចំណុចកណ្ដាល បង្កើតបានជា​ពពក​ដែលមាន​រូបរាងផ្សេងៗ មានដូចជា រូបរាង​មូល រាង​ដូច​ភ្នែក ឬ​រង្វង់​មូល​ដូច M57ជាដើម៕

  • អ្នក​ប្រដាល់​រ៉ូ​បូត​ដែល​ធ្វើ​ត្រាប់​តាម​លឿន​ជាងគេ​បំផុត​លើ​ពិភពលោក

    អ្នក​ប្រដាល់​រ៉ូ​បូត​ដែល​ធ្វើ​ត្រាប់​តាម​លឿន​ជាងគេ​បំផុត​លើ​ពិភពលោក

    (ប្រទេស​ចិន) – រ៉ូ​បូត Qibbot អាច​ត្រូវបាន​បញ្ជា​ពី​ចម្ងាយ និង​ធ្វើ​ត្រាប់​តាម​យឺត​ជាងការ​​បញ្ជា​ត្រឹមតែ 12 មិ​ល្លី​វិនាទី ដែល​មិនទាន់​ស្មើនឹង 1/15 បើ​ធៀប​នឹង​ថេរវេ​លា​នៃ​ការ​ធ្មេចភ្នែក។

    ក្រុមហ៊ុន Qibo Robot ​មាន​ទីស្នាក់​ការ​នៅ​​ភាគ​ខាងកើត​ប្រទេស​ចិន អភិវឌ្ឍ​រ៉ូ​បូត Qibbot ដៃ​មួយ និង​អាច​បញ្ជា​ពី​ចម្ងាយ ​ដើម្បី​បង្ហាញពី​ការ​ធ្វើ​​ត្រាប់​កាយវិការ​របស់​អ្នក​ប្រដាល់។ អ្នកគ្រប់គ្រង Qibbot អាច​ឈរ​ក្បែរ និង​បញ្ជា​ទៅលើ​រ៉ូ​បូត​ដោយ​កាយវិការ។

    នៅក្នុង​វីដេអូ​ដែល Qibo Robot ​បាន​ចែករំលែក រ៉ូបូត​ Qibbot ធ្វើ​ត្រាប់​តាម​បញ្ជា​ យឺត​ជាង​តែ​ 12 មិ​ល្លី​វិនាទីដែល​​មិនទាន់​ស្មើនឹង 1/15 ផង បើ​ធៀប​នឹង​ថេរវេលា​នៃ​ការ​ធ្មេចភ្នែក ដែល​នេះ​គឺជា​កំណាត់​ត្រា​ថ្មី​មួយ​សម្រាប់​ប្រព័ន្ធ​រ៉ូ​បូត​បញ្ជា​ពី​ចម្ងាយ។ ក្រុមហ៊ុន Qibo Robot ​អះអាងថា នេះ​គឺជា telerobot (រ៉ូ​បូត​បញ្ជា​ពី​ចម្ងាយ) ដែល​ធ្វើ​ត្រាប់​តាម​​បាន​លឿន​បំផុត​នៅ​លើ​​ពិភពលោក។

    អ្នក​ប្រដាល់​យន្ត Qibbot នេះ​មាន​កម្ពស់ 1.9 ម៉ែត្រ មាន​ដៃ​ម្ខាង​ប្រវែង 1.5 ម៉ែត្រ និង​មាន​​ទម្ងន់​សរុប 140 គីឡូក្រាម។

    រ៉ូ​បូត​នេះ​ត្រូវបាន​ចាប់ផ្ដើម​អភិវឌ្ឍ​តាំងពី​ឆ្នាំ 2019 ហើយ​ក្រុមការងារ​បាន​ចំណាយពេល​អស់ 3 ឆ្នាំ​ទើប​បង្កើតបាន​កំណែ​ដំបូង។ ក្រោយមក ពួកគេ​ក៏​ចំណាយពេល​អស់​មួយឆ្នាំ​ទៀត​នៅក្នុង​ការកែលំអ មុនពេល​បង្ហាញខ្លួន Qibbot កាលពី​ខែមិថុនា 2023។

    ក្រុមហ៊ុន​ខាងលើ​គ្រោង​នឹង​អភិវឌ្ឍ​កំណែ​ទី​ពីរ​របស់ Qibbot ដែលមាន​ដៃ​ពីរ​នៅ​ចុងឆ្នាំ​នេះ។ Qibo Robot​អះអាងថា រ៉ូ​បូត​ប្រភេទ​នេះ​អាច​ប្រើប្រាស់​បាន​នៅក្នុង​ករណី​បន្ទាន់ និង​គ្រោះថ្នាក់ មាន​ជា​អាទិ៍ សកម្មភាព​ប្រឆាំង​បទល្មើស​ឧក្រិដ្ឋ សកម្មភាព​យោធា ឬ​លើកកម្ពស់​ការផលិត​ក្នុង​រោងចក្រ​ជា​ដើម​៕

  • Taylor Swift ចំណាយ​ជាង 50 លាន​ដុល្លារ​សម្រាប់​ជា​អំណោយ​ជូន​ក្រុមការងារ

    Taylor Swift ចំណាយ​ជាង 50 លាន​ដុល្លារ​សម្រាប់​ជា​អំណោយ​ជូន​ក្រុមការងារ

    កំពូល​តារាចម្រៀង​ប៉ប់ Taylor Swift បាន​ចំណាយ​ប្រាក់​ចំនួន 55 លាន​ដុល្លារ សម្រាប់​ជា​រង្វាន់​ជូន​ក្រុមការងារ​បើកឡាន អ្នករៀបចំ​អាហារ​ហូប​ចុច អ្នក​ដំឡើង​ឆាក និង​ក្រុម​អ្នករាំ​ជាដើម ដែល​ធ្វើការ​នៅក្នុង​ដំណើរ​សំដែង Eras Tour របស់​នាង​នៅ​សហរដ្ឋ​អាម៉េរិក។

    យោងតាម​ប្រភពព័ត៌មាន​នានា​ដែល​បាន​ប្រាប់​ទំព័រ People កំពូល​តារាចម្រៀង​ស្រី Taylor Swift ថ្មីៗនេះ​បានប្រគល់​ប្រាក់រង្វាន់​ជូន​ដល់​បុគ្គលិក​ទាំងអស់​ដែល​បម្រើការ​នៅក្នុង​ដំណើរ​សំដែង​ជុំវិញ​សហរដ្ឋ​អាម៉េរិក​របស់​នាង​នៅក្នុង​រយៈពេល 5 ខែ​កន្លង។

    ទំព័រ TMZ ក៏បាន​ផ្សាយ​ថា កំពូល​តារាចម្រៀង​វ័យ 33 ឆ្នាំ​រូបនេះ បានផ្ដល់​រង្វាន់​ជូន​ដល់​អ្នកបើកបរ​រថយន្តម្នាក់ៗ 100,000 ដុល្លារ។ អ្នកបើកបរ​រថយន្ត​ដឹក​សម្ភារៈ​សម្រាប់​ការសម្ដែង​របស់ Taylor Swift មាន​ប្រហែល 50 នាក់ ដែល​នេះ​មានន័យថា គ្រាន់តែ​អ្នកបើកបរ​រថយន្ត​មួយ​មុខ Taylor ត្រូវ​ចំណាយ​ប្រាក់​អស់ 5 លាន​ដុល្លារ​បាត់ទៅហើយ។

    ទិន្នន័យ​របស់ Pollstar បង្ហាញថា Eras Tour រកប្រាក់​ពី​ការលក់​សំបុត្រ​បាន 300.8 លាន​ដុល្លារ​អាម៉េរិក រាប់​ចាប់តាំងពី​ខែមីនា​រហូតដល់​បច្ចុប្បន្ន។ តម្លៃ​ជា​មធ្យម​របស់​សំបុត្រ​ចូល​ទស្សនា​ខន់​ស៊ើ​តរបស់ Taylor Swift គឺ 253 ដុល្លារ។ បន្ទាប់ពី​ការសម្ដែង​នៅក្នុង 22 ទីតាំង​បានបញ្ចប់ Eras Tour លក់​សំបុត្រ​បាន​ជាង​មួយ​លាន​សន្លឹក។

    តាម​គម្រោង Taylor Swift នឹង​បញ្ចប់​រដូវ​កាល​សម្ដែង​របស់ខ្លួន​នៅ​សហរដ្ឋ​អាម៉េរិក​ត្រឹម​ពាក់កណ្ដាល​ខែសីហា​នេះ។ ចាប់ពី​ចុងខែ​នេះ Taylor Swift នឹង​ចាប់ផ្ដើម​ដំណើរ​សម្ដែង​របស់ខ្លួន​នៅ​អាម៉េរិក​ឡាទីន បន្ទាប់មក​គឺ​នៅ​អាស៊ី អឺរ៉ុប និង​អូស្ត្រាលី​នា​ឆ្នាំក្រោយ។

    កម្មវិធី​ដំណើរ​សម្ដែង Eras Tour របស់ Taylor Swift ត្រូវបាន​គេ​ព្យាករ​ថា នឹង​ជា​ព្រឹត្តិការណ៍​សម្ដែង​ដែល​រកបាន​ប្រាក់ចំណូល​ច្រើនជាងគេបង្អស់​នៅ​គ្រប់​សម័យកាល។

    យោងតាម​ស្ថិតិ​របស់​ទស្សនាវដ្ដី Forbes ដែល​បាន​ចុះផ្សាយ​កាលពី​ខែមិថុនា 2023 Taylor Swift គឺជា​អ្នកចម្រៀង​រកស៊ី​មានបាន​ដោយ​ខ្លួនឯង​មានទ្រព្យ​ច្រើនជាងគេ​លំដាប់​ទី​ពីរ​ក្នុង​វិស័យ​ចម្រៀង បន្ទាប់ពី Rihanna។ នាង​ក៏​ជាប់​ចំណាត់ថ្នាក់​ទី 34 នៅក្នុង​តារាង​ចំណាត់ថ្នាក់​ស្ដីពី «ស្ត្រី​រកស៊ី​មានបាន​ដោយ​ខ្លួនឯង​ដែលមាន​ទ្រព្យ​ច្រើន​បំផុត​នៅ​សហរដ្ឋ​អាម៉េរិក»។ ទ្រព្យ​សរុប​របស់ Taylor Swift ត្រូវបាន​គណនា​ឃើញថា មាន​រហូតដល់ 740 លាន​ដុល្លារ​អាម៉េរិក៕

  • ឱសថ​ដែល​អាច​ «កម្ចាត់​រាល់​ដុំ​គីស​» ទាំង​កាចទាំង​ស្លួត

    ឱសថ​ដែល​អាច​ «កម្ចាត់​រាល់​ដុំ​គីស​» ទាំង​កាចទាំង​ស្លួត

    (សហរដ្ឋ​អាម៉េរិក) – ក្រុម​អ្នកវិទ្យាសាស្ត្រ​អភិវឌ្ឍ​ឱសថ​មួយ​ប្រភេទ​ដែលមាន​ប្រសិទ្ធភាព​ក្នុងការ​កម្ចាត់​រាល់​ដុំ​គិ​សរឹង ទាំង​ប្រភេទ​កាច ទាំង​ប្រភេទ​ស្លូត ដោយ​មិន​ប៉ះពាល់​ដល់​កោសិកា​ដែល​មាន​សុខ​ភាពល្អ។

    ការស្រាវជ្រាវ​នេះ​ត្រូវបាន​ធ្វើឡើង​ដោយ​ក្រុម​អ្នកជំនាញ​ប្រចាំ​មន្ទីរពេទ្យ City of Hope ដែលជា​មជ្ឈមណ្ឌល​ព្យាបាល​ជំងឺមហារីក​ធំជាងគេ​មួយ​នៅ​សហរដ្ឋ​អាម៉េរិក និង​ត្រូវបាន​ចុះផ្សាយ​លើ​ទស្សនាវដ្ដី Cell Chemical Biology កាលពី​ថ្ងៃទី 02 សីហា 2023។ គ្រាប់​ថ្នាំ​នេះ​មាន​ឈ្មោះថា AOH1996។

    City of Hope ឱ្យដឹងថា ឱសថ AOH1996 ដាក់​គោលដៅ​កម្ចាត់​​ប្រូតេអ៊ីន​មួយ​ប្រភេទ​មាន​នៅ​​ក្នុង​ដុំសាច់​មហារីក​ស្ទើរ​គ្រប់​ប្រភេទ ដែល​​បណ្ដាលឱ្យ​ដុំ​គីស​រីក​ធំ និង​កើនឡើង​ច្រើន​នៅក្នុង​រាងកាយ។ ប្រូតេអ៊ីន​នេះ​គឺជា​អង់​ទី​ហ្សែ​ន PCNA (Proliferating cell nuclear antigen) ដែល​ធ្លាប់​ត្រូវបាន​ចាត់ទុកថា មិនអាច​កម្ចាត់​បាន​។

    គ្រាប់​ថ្នាំ AOH1996 កម្ចាត់​កោសិកា​មហារីក​ទៅតាម​របៀប​ដែលមាន​ការជ្រើសរើស ដោយ​យន្តការ​បំបែក​វដ្ដ​នៃ​ការបង្កើត​កូនចៅ​តាម​ធម្មតា​របស់​ដុំ​គីស ទប់ស្កាត់​កោសិកា DNA ដែលមាន​កំហុស កុំឱ្យ​បន្ត​រីកចម្រើន ធ្វើឱ្យ​ពួកវា​​មិនអាច​ចម្លង​ពី​តិច​ទៅ​ច្រើន​ទៀត​បាន។ ប្រការនេះ​នឹង​បណ្ដាលឱ្យ​កោសិកា​មហារីក​ទាំង​ឡាយ​​ត្រូវ​ងាប់​ដោយ​ឯកឯង និង​​មិន​ប៉ះពាល់​ដល់​កោសិកា​ល្អ។

    អ្នកវិទ្យាសាស្ត្រ​នៅ City of Hope អធិប្បាយ​ថា PCNA គឺ​ប្រៀប​ដូច​ទៅនឹង​ព្រលានយន្តហោះ​ដ៏​ធំ​មួយ ជាទី​ដែល​ជើងហោះហើរ​នានា​នាំយក​កោសិកា​មហារីក​ទៅកាន់​គ្រប់​ទីកន្លែង​នៅក្នុង​រាងកាយ។ ថ្នាំ AOH1996 ប្រៀប​ដូច​ព្យុះ​ព្រឹល​ដែល​វាយប្រហារ​កម្ទេច​ព្រលានយន្តហោះ​នេះ ធ្វើឱ្យ​ជើងហោះហើរ​ទាំងអស់​ត្រូវ​ឈប់​ដំណើរការ។

    ថ្នាំ AOH1996 ត្រូវបាន​សាកល្បង​ប្រើប្រាស់​នៅលើ​កោសិកា​មហារីក​ចំនួន 70 ប្រភេទផ្សេងៗគ្នា រួមមាន​ទាំង​មហារីក​សុដន់ មហារីក​ខួរក្បាល ស្បែក សួត មាត់ស្បូន អូ​វ៉ែ​រ និងមហា​រីក​​ប្រពេ​ញ​ប្រូ​ស្តា​ត​ជាដើម។ ថ្នាំ​នេះ​មាន​ប្រសិទ្ធភាព​លើ​គ្រប់​កោសិកា​មហារីក។ City of Hope បាន​ហៅ​ឱសថ​នេះ​ថា ជា​លំដាប់​កំពូល​ក្នុង​រយៈពេល 20 ឆ្នាំ នៃ​ការស្រាវជ្រាវ​ និង​អភិវឌ្ឍ។

    បច្ចុប្បន្ន ឱសថ AOH1996 កំពុង​ត្រូវបាន​ប្រើប្រាស់​សាកល្បង​លើ​មនុស្ស​ដំណាក់កាល​ទីមួយ និង​ត្រូវបាន​ជឿថា អាច​នាំមក​នូវ​លទ្ធផល​ល្អ គួរ​ជាទី​រីករាយ៕

  • Ronaldo ជួយ​ឱ្យ Al Nassr ឡើងដល់​វគ្គ ¼ នៅ Arab Champions Cup

    Ronaldo ជួយ​ឱ្យ Al Nassr ឡើងដល់​វគ្គ ¼ នៅ Arab Champions Cup

    (អា​រ៉ា​ប៊ី​សា​អូឌីត) – ការ​ទាត់​ចូល​ទី​ដែល​ស្ទើរ​តែ​​យឺត​ពេល​​របស់ Cristiano Ronaldo បាន​ជួយ​ឱ្យ Al Nassr មាន​លទ្ធផល​ស្មើ 1-1 ជាមួយនឹង Zamalek និង​ឆ្លង​ផុត​វគ្គ​ចែក​ពូ​ល​នៅ Arab Club Champions Cup 2023។

    ក្លឹប Al Nassr មាន​ហានិភ័យ​ត្រូវបាន​ជម្រុះ​ត្រឹម​វគ្គ​ចែក​ពូ​ល​រហូតដល់​នាទី​ទី 87 នៅពេល​ខ្សែការពារ Ghislain Konan គ្រប់គ្រង​បាន​បាល់​នៅ​ស្លាប​ខាងឆ្វេង រួច​បញ្ជូនទៅឱ្យ Ronaldo តែ​ត​បញ្ចូល​ទី​ពី​ចម្ងាយ​ជិត 10 ម៉ែត្រ។ តួលេខ 1-1 នៅពេលនោះ​គឺ​គ្រប់គ្រាន់​អាចឱ្យ Al Nassr ឆ្លង​ផុត​វគ្គ​ចែក​ពូ​ល ប៉ុន្តែ CR7 នៅតែ​ប្រញាប់​​ឱប​បាល់​ទៅកាន់​តំបន់​កណ្ដាល​ដើម្បី​មានឱកាស​រកបាន​គ្រាប់​បាល់​បន្ថែមទៀត។ បើ​ទោះ​មិនអាច​សម្រេចបាន​ប្រការ​នោះ ប៉ុន្តែ Ronaldo និង​មិត្ត​រួម​ក្រុម​នៅតែមាន​សិទ្ធិ​ឡើងទៅ​ប្រកួត​នៅ​វគ្គ ¼ ដោយ​គ្រប់គ្រង​ចំណាត់ថ្នាក់​លេខ​ពីរ​នៅ​ពូ​ល C។

    Arab Club Champions Cup គឺជា​ពានរង្វាន់​ប្រចាំឆ្នាំ​សម្រាប់​បណ្ដា​ក្លឹប​ក្នុង​តំបន់​អារ៉ាប់ នៅ​មជ្ឈិមបូព៌ា និង​អាហ្វ្រិក​ខាងជើង។ Al Nassr ចូលរួម​ប្រកួត​នៅ​រដូវ​កាល​នេះ​គឺ​ឆ្លើយតប​នឹង​ការអញ្ជើញ​ពី​​សហព័ន្ធ​​​បាល់ទាត់​អារ៉ាប់ ដោយ​មិនបាច់ត្រូវ​​ទាត់​ក្នុង​វគ្គ​ជម្រុះ។ ការប្រកួត​នៅ​ពានរង្វាន់​នេះ​ត្រូវបាន​ធ្វើឡើង​ពីថ្ងៃ​ទី 27 កក្កដា ដល់ 12 សីហា 2023 ដោយមាន 16 ក្រុម​ចូលរួម និង​ចែកជា 4 ពូ​ល ក្នុងនោះ មួយ​ពូលៗមាន 4 ក្រុម ហើយ​ជ្រើស​យក 2 ក្រុម​ដែល​ឈរលើគេ​ក្នុង​ពូល​នីមួយៗ ទៅ​ប្រកួត​នៅ​វគ្គ ¼។

    ក្រោយ 4 ប្រកួត ក្លឹប Al Nassr បានឈ្នះ​មួយ ស្មើ​ពីរ និង​រកបាន 5 ពិន្ទុ ហើយ​ឈរ​លំដាប់​ទី​ពីរ​នៅ​ពូ​ល C បន្ទាប់ពី​ក្លឹប Al Shabab។ ក្លឹប Zamalek មកពី​ប្រទេស​អេ​ហ្ស៊ី​ប ជាប់​លេខ 3 នៅ​ពូល C ដោយមាន 4 ពិន្ទុ ហើយក៏​ត្រូវបាន​ជម្រុះ។ ក្នុង 8 ក្រុម​នៅ​វគ្គ ¼ មាន​តំណាង​ដល់​ទៅ 4 មកពី​អា​រ៉ា​ប៊ី​សា​អូឌីត រួមមាន Al Nassr, Al Shabab, Al Hilal និង Al Ittihad។ Ronaldo និង​មិត្ត​រួម​ក្រុម​នឹងត្រូវ​ជួប CLB Raja (ម៉ូ​ណា​កូ) នៅ​វគ្គ ¼ នា​​ថ្ងៃទី 06 សីហា​ខាងមុខ​។

    នៅ​ពានរង្វាន់​ខាងលើ Ronaldo រកបាន 2 គ្រាប់ បង្កើតបាន​កំណត់ត្រា​ពិភពលោក 840 គ្រាប់ និង​ឈរ​លំដាប់​ទី​ពីរ​នៅក្នុង​តារាង​ចំណាត់ថ្នាក់​សម្រាប់​តំណែង​កីឡាករ​ទាត់​ចូល​ទី​បាន​ច្រើនជាងគេ។ អ្នក​នាំមុខគេ​នៅក្នុង​ការ​ប្រជែង​យក​តំណែង​នេះ គឺ​កីឡាករ Karim Benzema ដោយសារ​រកបាន 3 គ្រាប់​ឱ្យ Al Ittihad៕

    https://www.youtube.com/watch?v=bbIHNb9tbVA

  • រុស្ស៊ី​នឹង​បាញ់​បង្ហោះ​យាន​ស្រាវជ្រាវ​ព្រះ​ចន្ទ​ដំបូង ក្រោយ​ជិត 50 ឆ្នាំ

    រុស្ស៊ី​នឹង​បាញ់​បង្ហោះ​យាន​ស្រាវជ្រាវ​ព្រះ​ចន្ទ​ដំបូង ក្រោយ​ជិត 50 ឆ្នាំ

    កាលពី​ថ្ងៃទី 03 សីហា ទំព័រ RIA Novosti របស់​រុស្ស៊ី​បាន​រាយការណ៍​ថា ប្រទេស​នេះ​នឹង​បាញ់​បង្ហោះ​យាន​ស្រាវជ្រាវ​ព្រះ​ចន្ទ Luna-25 នៅ​​ក្នុង​ខែ​សីហា​ខាងមុខ ដែល​នេះ​គឺជា​ជំហាន​ដំបូង​នៅក្នុង​ការវិល​ត្រលប់​មករក​កម្មវិធី​ស្រាវជ្រាវ​ឋាន​ព្រះ​ចន្ទ​របស់​រុស្ស៊ី ក្រោយ​ការ​ផ្អាក​អស់​រយៈពេល​ជិត 50 ឆ្នាំ។

    យោងតាម RIA Novosti កាលបរិច្ឆេទ​សម្រាប់​ការបាញ់​បង្ហោះ​យាន Luna-25 ត្រូវបាន​កំណត់​យក​វេ​លា​ទៀបភ្លឺ ថ្ងៃទី 11 សីហា 2023។ រ៉ុក្កែត Soyuz-2.1b នឹងត្រូវ​បាន​បាញ់​បង្ហោះ​ចេញពី​មជ្ឈមណ្ឌល​អវកាស Vostochny ក្នុង​ខេត្ត Amur នៅ​វេលា​ម៉ោង 02 និង 10 នាទី (ម៉ោង​នៅ​មូ​ស្គូ) នាំយក​កំណាត់​ខាងលើ Fregat និង​ស្ថានីយ​ស្វ័យប្រវត្ត​ឡើងទៅ​កាន់​ទី​អវកាស។ បន្ទាប់​ពី​ត្រូវបាន​បាញ់​បង្ហោះ និង​ផ្ដាច់ខ្លួន​ពី​រ៉ុក្កែត កំណាត់​ខាងលើ Fregat នឹង​នាំ​ស្ថានីយ​ស្វ័យប្រវត្ត​ឆ្ពោះទៅកាន់​គន្លង​តារាវិថី​ផែនដី និង​ហោះ​សំដៅ​ឋាន​ព្រះ​ចន្ទ។ ក្រោយ​រយៈពេល​បួន​ថ្ងៃ​កន្លះ ស្ថានីយ​នេះ​នឹងហោះ​​ចូលដល់​គន្លង​តារាវិថី​ជុំវិញ​ឋាន​ព្រះ​ចន្ទ រួច​​កែប្រែ​គន្លង​គោចរ​ជាច្រើនលើក មុននឹង​ចុះចត​នៅ​តំបន់​ប៉ូល​ខាងត្បូង។

    បេសកកម្ម​របស់ Luna-25 គឺជា​ការសាកល្បង​បច្ចេកវិទ្យា​នានា​ដែល​ទាក់ទង​នឹង​ការ​ចុះចត​លើ​តំបន់​ប៉ូល​របស់​ព្រះ​ចន្ទ និង​ការ​ស្រាវជ្រាវ ពិសោធ​ទៅ​លើ​​ប្រភពធនធាន​​នានា​នៅលើ​ឋាន​មួយ​នេះ ក្នុងនោះ​មានទឹក​ជាដើម។ ភារកិច្ច​ផ្នែក​វិទ្យាសាស្ត្រ​របស់ Luna-25 គ្រោង​នឹង​អូស​បន្លាយពេល​មួយឆ្នាំ។

    យានចុះចត Luna-24 របស់​អតីត​សូវៀត (រុស្ស៊ី)

    យាន​ស្រាវជ្រាវ​ព្រះ​ចន្ទ​មុន​នោះ​របស់​ប្រទេស​រុស្ស៊ី ​គឺ Luna-24 ដែល​ត្រូវបាន​បាញ់​ប្រ​ហោះ​ឡើងទៅ​កាន់​ទី​អវកាស​កាលពី​ឆ្នាំ 1976។ ព្រឹត្តិការណ៍​នោះបាន​ក្លាយជា​ប្រវត្តិសាស្ត្រ​នៃ​ការស្រាវជ្រាវ​ទី​អវកាស​របស់​ពិភពលោក នៅពេល​វា​យក​បាន​សំណាក​ដី​ពី​ឋាន​ព្រះ​ចន្ទ ដែល​ក្រោយមក​ត្រូវបាន​បញ្ជាក់ថា ទឹក​មាន​វត្តមាន​នៅលើ​ឋាន​រណប​មួយ​នេះ។

    តាម​ផែនការ ក្រោយពី​ព្រឹត្តិការណ៍​បាញ់​បង្ហោះ Luna-25 រុស្ស៊ី​ក៏មាន​គម្រោង​បាញ់​បង្ហោះ​យាន Luna-26 និង Luna-27 នៅក្នុង​ឆ្នាំ 2024 និង 2025 ផងដែរ៕

  • ក្រុម​ប្រដាប់អាវុធ​រដ្ឋ​អ៊ីស្លាម (IS) ​បញ្ជាក់ថា មេបញ្ជាការ​កំពូល​ត្រូវបាន​គេ​សម្លាប់

    ក្រុម​ប្រដាប់អាវុធ​រដ្ឋ​អ៊ីស្លាម (IS) ​បញ្ជាក់ថា មេបញ្ជាការ​កំពូល​ត្រូវបាន​គេ​សម្លាប់

    ក្រុម​ភេរវ​ករ​រដ្ឋ​អ៊ីស្លាម (IS) បានទទួល​ស្គាល់​ការស្លាប់​របស់​មេដឹកនាំ​កំពូល Abu Hussein al-Husseini al-Qurashi ហើយក៏​ប្រកាសថា បាន​ជ្រើសតាំង​មេដឹកនាំ​ថ្មី​រួចហើយ។

    នៅក្នុង​សារ​ជា​សំឡេង​​មិនមាន​ថ្ងៃខែ​ដែល​ត្រូវបាន​បង្ហោះ​លើ Telegram កាលពី​ថ្ងៃទី 03 សីហា អ្នកនាំពាក្យ​របស់​ក្រុម​ប្រដាប់អាវុធ​ដែល​ហៅ​ខ្លួនឯង​ថា អង្គការ​រដ្ឋ​អ៊ីស្លាម (Islamic State) បាន​និយាយថា Qurashi ត្រូវបាន​គេ​សម្លាប់​នៅក្នុង​ការប្រយុទ្ធ​​គ្នា​ជាមួយនឹង Hayat Tahrir al-Sham (HTS) ដែលជា​ក្រុម​អ៊ីស្លាម​មួយ​ក្រុម​ផ្សេង​ទៀត​ កំពុងកាន់​អំណាច​នៅ​មូលដ្ឋាន​របស់​ក្រុមប្រឆាំង​នៅ​ភាគ​ពាយព្យ​ប្រទេស​ស៊ី​រី។

    «មេដឹកនាំ Qurashi ត្រូវបាន​គេ​សម្លាប់​នៅពេល HTS ព្យាយាម​ចាប់ខ្លួន​លោក​ជា​ចំណាប់ខ្មាំង។ លោក​បាន​ប្រយុទ្ធ​តតាំង​នឹង​ពួកវា​រហូតដល់​បាត់បង់​ជីវិត​ដោយសារតែ​របួស» អ្នកនាំពាក្យ​របស់ IS ឱ្យដឹង​ដូច្នេះ និង​បាន​ចោទថា HTS បានបង្ហាញ​ទីតាំង​ប្រាប់​ក្រុម​ស៊ើបការណ៍​សម្ងាត់​តួ​ក​គី។

    Abu al-Hussein al-Husseini al-Qurashi 

    យោងតាម​អ្នកនាំពាក្យ​ខាងលើ Abu Hafs al-Hashimi al-Qurashi ត្រូវបានតែងតាំង​ជំនួស Qurashi ប៉ុន្តែ​មិនបាន​បង្ហើប​ឱ្យដឹង​ព័ត៌មាន​លើសពីនេះ។

    នេះ​ទំនងជា​សេចក្ដីប្រកាស​ផ្លូវការ​ដំបូង​របស់ IS ស្ដីពី​ការស្លាប់​របស់ Qurashi រាប់​ចាប់តាំងពី​តួ​ក​គី​ប្រកាស​កាល​ពី​ខែមេសា​ថា កងកម្លាំង​ស៊ើបការណ៍​សម្ងាត់​របស់​តួ​ក​គី​បានសម្លាប់​មេដឹកនាំ​រូបនេះ​នៅ​ប្រទេស​ស៊ី​រី។

    Abu Hussein al-Husseini al-Qurashi ​បាន​ឡើងកាន់​អំណាច​កាលពី​ខែវិច្ឆិកា 2022 បន្ទាប់ពី​មេដឹកនាំ​មុន​ត្រូវបាន​សម្លាប់​នៅ​ស៊ី​រី។

    IS ធ្លាប់​គ្រប់គ្រង​តំបន់​ដ៏​ធំ​នៅ​ប្រទេស​ស៊ី​រី និង​អ៊ីរ៉ាក់ ដែលមាន​ប្រជាជន​ប្រហែល 10 លាន ហើយក៏​បានប្រកាស​បង្កើត​ប្រទេស​អ៊ីស្លាម​​ដាច់​ដោយឡែក។ ក៏ប៉ុន្តែ ក្រុម​ជ្រុលនិយម​នេះ​បាន​រង​ការបរាជ័យ​ជា​បន្តបន្ទាប់​នៅ​ចំពោះមុខ​យុទ្ធនាការ​យោធារៀងៗខ្លួន​របស់​សម្ព័ន្ធមិត្ត​ដែល​ដឹកនាំ​ដោយ​អាម៉េរិក និង​កងទ័ព​ស៊ី​រី​ដែល​គាំទ្រ​ដោយ​រុស្ស៊ី។

    ផែនទីប្រទេស​ស៊ីរី និង​អ៊ីរ៉ាក់

    តាំងពី​បាន​បាត់បង់​មូលដ្ឋាន​ចុងក្រោយ​នៅ​តំបន់​សមុទ្រ​ខ្សាច់​នៅ​ភាគ​ខាងកើត​ប្រទេស​ស៊ី​រី​កាលពី​ខែមីនា 2019 ខ្មាន់កាំភ្លើង​របស់ IS បាន​ដកថយ​ទៅ​លាក់ខ្លួន​ក្នុង​សមុទ្រ​ខ្សាច់ និង​លប​វាយប្រហារ​ម្ដងម្កាល​លើ​កម្លាំង​របស់​ជនជាតិ​ឃើ​ដ ក៏ដូចជា​អាជ្ញាធរ​ស៊ី​រី។

    ក្រុមមន្ត្រី​អាម៉េរិក​ឱ្យដឹងថា ក្រុម​ជ្រុលនិយម​ដែល​រួមមាន​ខ្មាន់កាំភ្លើង​រាប់ពាន់នាក់​នៅ​ទ្វីបអាហ្វ្រិក មជ្ឈិមបូព៌ា អាស៊ី​កណ្ដាល និង​តំបន់​ជាច្រើន​ផ្សេងទៀត នៅតែ​ជាការ​គំរាមកំហែង​ចំពោះ​​ពិភពលោក៕

  • ស្ថានីយ​អវកាស​ពាណិជ្ជកម្ម ជិតបាន​ឡើង​ទៅ​​​ជំនួស ISS

    ស្ថានីយ​អវកាស​ពាណិជ្ជកម្ម ជិតបាន​ឡើង​ទៅ​​​ជំនួស ISS

    Airbus និង​ក្រុមហ៊ុន​អាម៉េរិក Voyager Space កាលពី​ថ្ងៃទី 02 សីហា បានប្រកាស​បង្កើត​ក្រុមហ៊ុន​បណ្ដាក់ទុន​រួម​ដើម្បី​អភិវឌ្ឍ Starlab ដែលជា​កំណែ​ស្ថានីយ​អវកាស​ពាណិជ្ជកម្ម ដែល​អាច​ជំនួស​ស្ថានីយ​អវកាស​អន្តរជាតិ (ISS)។

    ក្រុមហ៊ុន​បណ្ដាក់ទុន​រួម​ដែល​​មាន​ទីស្នាក់ការ​កណ្ដាល​នៅ​ប្រទេស​អាល្លឺម៉ង់នេះ គ្រោង​នឹង​អាចឆ្លើយតប​នឹង​តម្រូវ​ការ​ពី​បណ្ដា​ទីភ្នាក់ងារ​អវកាស​នៅលើ​ពិភពលោក ទន្ទឹមនឹងការ​​បើកផ្លូវ​ឱ្យមាន​ឱកាស​ថ្មី​សម្រាប់​វិស័យ​ពាណិជ្ជ​កម្ម​។ នេះ​បើតាម Matthew Kuta ប្រធាន​ក្រុមហ៊ុន Voyager Space។

    ដើម្បី​ជំនួស ISS ណា​សា​មាន​គម្រោង​ទិញ​សេវាកម្ម​ពី​ដៃគូ​សហការ​ជំនួស​ឱ្យ​ការចាត់ចែង​កម្មវិធី​ដោយផ្ទាល់ ដូច​ទៅនឹង​អ្វីដែល​បាន​អនុវត្ត​នៅក្នុង​ការនាំ​អវកាសចរ​​ឡើងទៅ​កាន់​ទី​អវកាស។ Voyager Space ទទួលបាន​កិច្ចព្រមព្រៀង​តម្លៃ 160 លាន​ដុល្លារ​ពី​ណា​សា​កាលពី​ចុងឆ្នាំ 2021 ដើម្បី​អភិវឌ្ឍ Starlab។

    ទន្ទឹមនឹង Voyager Space ណា​សា​ក៏បាន​ប្រគល់ប្រាក់​ 130 លាន​ដុល្លារ​ឱ្យ Blue Origin និង 126 លាន​ដុល្លារ​ឱ្យ Northrop Grumman ដើម្បី​អភិវឌ្ឍ​បណ្ដា​គម្រោង​អវកាស​ដោយឡែក។ ក្រុមហ៊ុន​អាម៉េរិក Axiom Space ក៏​កំពុង​អភិវឌ្ឍ​ស្ថានីយ​អវកាស​មួយ​ក្រោម​ការជួយ​គាំទ្រ​ពី​ណា​សា និង​ក្រុមហ៊ុន Thales Alenia Space ផងដែរ​។

    AFP ឱ្យដឹងថា តាម​ផែនការ Starlab នឹងត្រូវ​បាន​បាញ់​បង្ហោះ​ឡើងទៅ​កាន់​គន្លង​តារាវិថី​នៅ​ឆ្នាំ 2028។ ស្ថានីយ​អវកាស​ថ្មី​នេះ​នឹងមាន​អង្កត់ផ្ចិត​ប្រវែង 8 ម៉ែត្រ វែង​ជាង​ជិត​ពីរដង​ធៀប​នឹង ISS ប៉ុន្តែ​ផ្ទៃក្រឡា​ខាងក្នុង​ស្មើនឹង​ពាក់កណ្ដាល ព្រោះថា ISS មាន​ម៉ូឌុល​ច្រើនជាង។

  • ក្រុមហ៊ុនមេ​របស់ Facebook បង្ហាញ AI និពន្ធ​បទ​ភ្លេង​ពី​សំណេរ

    ក្រុមហ៊ុនមេ​របស់ Facebook បង្ហាញ AI និពន្ធ​បទ​ភ្លេង​ពី​សំណេរ

    AudioCraft គឺជា AI (បញ្ញា​សិប្បនិម្មិត) ដែល​អនុញ្ញាតឱ្យ​អ្នកប្រើប្រាស់​និពន្ធ​បទ​ភ្លេង ឬ​សំឡេង​បែប​អាជីព​ដោយ​គ្រាន់តែ​ត្រូវការ​សំណេរ​​រៀបរាប់​អំពី​ខ្លឹមសារ​ដែល​ត្រូវការ​បង្កើត។

    ចូរ​ស្រមៃ​មើលថា​វា​អស្ចារ្យ​កម្រិត​ណា​ នៅ​ពេល​​តន្ត្រីករ​អាជីព​ម្នាក់​អាច​បង្កើត​​​ស្នាដៃ​និពន្ធ​ថ្មី​ដោយ​មិនចាំបាច់​លេងភ្លេង​អ្វី​ទាំងអស់ ឬថា អ្នកជំនួញ​ម្នាក់​ចង់​បន្ថែម background music (ខ្ញុំ​ហៅថា តន្ត្រី​កំដរ) ទៅក្នុង​វីដេអូ​ផ្សាយពាណិជ្ជកម្ម​ថ្មី​បំផុត​។ «នោះ​គឺ​នៅពេល AudioCraft បញ្ចេញ​ប្រសិទ្ធភាព» តំណាង​​របស់ Meta ឱ្យដឹង​ដូច្នេះ។

    យោងតាម Meta ឧបករណ៍ AudioCraft បំពាក់​បញ្ញា​សិប្បនិម្មិត​ចំនួន 3 រួមមាន MusicGen, AudioGen និង Encodec។ MusicGen គឺជា AI ដែល Meta អភិវឌ្ឍ​តាំងពី​ឆ្នាំ 2022 និង​អាចបង្កើត​សូរសព្ទ​​តន្ត្រី​ពី​សំណេរ ខណៈដែល AudioGen មាន​ជំនាញ​ខាង​កែប្រែ​សំឡេង ហើយក៏​អាចបង្កើត​សំឡេង​ពី​សំណេរ មាន​ជា​អាទ៌ សំឡេង​សុនក​ព្រុស សំឡេង​ស៊ី​ផ្លេ​ឡាន ឬ​​សំឡេង​ស្បែក​ជើង​មនុស្ស​ដើរ​ជាដើម។

    ចំណែក EnCodec វិញ គឺជា​ឧបករណ៍​ដោះ​កូដ​សំឡេង​ដោយយោង​ទៅលើ AI ដែល​បង្ហាញ​វត្តមាន​កាលពី​ឆ្នាំ 2022។ AI នេះ​ក៏​អាច​និពន្ធ​បទ​ភ្លេង​គុណភាព​ខ្ពស់​ដោយ​មិនត្រូវ​ការ​សំណេរ​ច្រើន​ផងដែរ។ ទាំងអស់​ខាងលើនេះ​ត្រូវបាន​ហៅថា AudioCraft ដែលជា​កម្មវិធី​បង្កើត​សំឡេង​ប្រកបដោយ​គុណភាព និង​ងាយស្រួល​ប្រើប្រាស់​។

    បច្ចុប្បន្ន ឧបករណ៍​បញ្ញា​សិប្បនិម្មិត​ចេះ​និពន្ធ (Generative artificial intelligence) អាចបង្កើត​រូបភាព និង​វីដេអូ​ដែលស្ទើរ​តែ​​ដូច​បេះ​បិទ​ទៅនឹង​ការពិត​ជាក់ស្ដែង ដោយគ្រាន់​តែ​​ប្រើប្រាស់​សំណេរ។ ក៏ប៉ុន្តែ ក្នុង​វិស័យ​សំឡេង វា​ហាក់​មិនទាន់​រីកចម្រើន​នៅឡើយ ដោយសារតែ​វា​មាន​ភាពលំបាក​ជាង​វិស័យ​ដទៃ៕