អារម្មណ៍ - La Reine Media

ដែកវិសក្នុងនាវាមុជទឹក Titan អាចជាដើមហេតុនៃគ្រោះថ្នាក់នៅបាតសមុទ្រ

បណ្ដាវិសដែលភ្ជាប់អេក្រង់ទូរទស្សន៍ទៅនឹងតួនាវា Titan អាចជាមូលហេតុដែលនាំឱ្យសម្បកធ្វើអំពីសរសៃកាបូនថមថយកម្លាំងជាបន្តបន្ទាប់ រហូតដល់ត្រូវសម្ពាធទឹកគាបបែកបាក់ខ្ទេចខ្ទីនៅពេលចុះទៅមើលសាកសពកប៉ាល់ Titanic។

សោកនាដកម្មនាវាមុជទឹក Titan ដែលត្រូវគាបផ្ទុះបែកក្រោមបាតមហាសមុទ្រអាត្លង់ទិកកាលពីថ្ងៃ 23 មិថុនា 2023 នាំឱ្យមានការចាប់អារម្មណ៍ច្រើនពីសំណាក់ក្រុមអ្នកសារព័ត៌មាន និងអ្នកជំនាញ។ ក្រៅពីការអះអាងអំពីកំហុសឆ្គងក្នុងការរចនា ការផលិត ឬមុជជ្រៅជាងសមត្ថភាព គ្រោះថ្នាក់របស់នាវា Titan ក៏នៅមានការអះអាងមួយផ្សេងទៀត នោះគឺ ទ្រឹស្តីបរាជ័យដោយសារវត្ថុធាតុ (Materials Failure)។

ព័ត៌មានជាច្រើនបង្ហាញថា ក្រុមហ៊ុន OceanGate បានកែប្រែនាវា Titan ពីគោលដៅសម្រាប់វិទ្យាសាស្ត្រ ទៅជាទេសចរណ៍ដឹកមនុស្ស។ រូបភាពស្ដីពីដំណើរការផលិតដែលក្រុមហ៊ុន OceanGate ប្រកាស បង្ហាញថា អេក្រង់ទូរទស្សន៍ចំនួនពីរត្រូវបានភ្ជាប់ដោយវិសទៅនឹងជញ្ជាំងនាវាដែលគ្របដណ្ដប់ដោយសរសៃកាបូន។

នេះគឺជាប្រការដែលត្រូវចៀសវាងបំផុត ព្រោះថ្វីបើសរសៃកាបូនធុនជាងដែកប្រាំដង ប៉ុន្តែស្រួយជាងដែក ហើយតែងត្រូវបានលាយជាមួយនឹងកាវ resin ដើម្បីភ្ជាប់ទៅនឹងវត្ថុដែលត្រូវការគ្របដណ្ដប់។ ដំណើរការបិទភ្ជាប់នេះត្រូវបានធ្វើឡើងជាស្រទាប់តម្រួតលើគ្នា។

ដូច្នេះ រចនាសម្ព័ន្ធសរសៃកាបូននៅលើនាវា Titan មិនមែនជាទម្រង់បន្ទះកាបូនសុទ្ធ និងតែមួយ ប៉ុន្តែវាគឺជាទម្រង់ផ្សំរវាងសរសៃកាបូន និងកាវ resin ដែលក្រុមហ៊ុន OceanGate ហៅថា «carbon fiber composite»។

ដោយសារតែជាទម្រង់ composite ដូច្នេះ ក្នុងរចនាសម្ព័ន្ធសរសៃកាបូននេះក៏មានចន្លោះប្រហោងល្អិតៗដែលកាវ resin មិនអាចលុបបំពេញ។ OceanGate ថា អត្រានៃចន្លោះប្រហោងនេះគឺក្រោម 1% ប៉ុន្តែតួលេខនេះមិនត្រូវបានបញ្ជាក់ច្បាស់លាស់។ ភាពខុសគ្នារវាងអត្រាចន្លោះប្រហោង 0.99% និង 0.0000000000001% អាចមានឥទ្ធិពលធំទៅលើតួទាំងមូល ក៏ដូចជាល្បឿននៃការបែកបាក់របស់វត្ថុធាតុ។

ការខួង និងចាប់វិសភ្ជាប់អេក្រង់ទូរទស្សន៍ទៅនឹងជញ្ជាំងនាវា នឹងបង្កើតឱ្យមានស្នាមប្រេះតូចលើផ្ទៃ composite ខាងក្នុងនាវា។ ស្នាមប្រេះនេះក៏កាន់តែរីកធំទៅតាមពេលវេលា និងចំនួនលើកដែលនាវា Titan បានចុះទៅបាតសមុទ្រ ដូចទៅនឹងស្នាមប្រេះលើកញ្ចក់ ហើយក៏បែកខ្ទេចភ្លាមៗនៅពេលវាទ្រាំទ្រនឹងសម្ពាធទឹកលែងបាន៕

July 11, 2023

យន្តហោះលឿនជាងសំឡេងជំនាន់ថ្មីរបស់ណាសា ត្រៀមធ្វើតេស្តដំបូង

យន្តហោះល្បឿនលឿនជាងសំឡេងជំនាន់ថ្មីរបស់ទីភ្នាក់ងារអវកាសអាម៉េរិក (NASA) បានចាប់ផ្ដើមត្រៀមខ្លួនសម្រាប់ការហោះហើរលើកដំបូង។

តាំងពីឆ្នាំ 2018 គម្រោងយន្តហោះ X-59 របស់ណាសា ទទួលបានការចាប់អារម្មណ៍ច្រើនពីសហគមន៍អ្នកសារព័ត៌មាន ហើយវាក៏បាន និងកំពុងរុញច្រានវិស័យទេសចរណ៍ល្បឿនលឿនជាងសំឡេងឱ្យខិតចូលជិតដល់ភាពជាក់ស្ដែង។

ថ្មីៗនេះ ណាសាបានឱ្យដឹងថា កាលពីថ្ងៃទី 19 មិថុនា យន្តហោះ X-59 ត្រូវបាននាំពីរោងចក្រដំឡើងរបស់ Lockheed Martin ទៅកាន់ព្រលានយន្តហោះ។ ក្រោយមក យន្តហោះនេះនឹងត្រូវត្រួតពិនិត្យបច្ចេកទេសនៅលើដីដើម្បីធានាថា បានត្រៀមខ្លួនរួចរាល់សម្រាប់បេសកកម្មហោះហើរនាពេលខាងមុខ។

គោលដៅរបស់ណាសា គឺការបញ្ជាក់ថា យន្តហោះល្បឿនលឿនជាងសំឡេងរបស់ពួកគេអាចហោះបានលឿនជាងល្បឿនរបស់សំឡេង ប៉ុន្តែមិនលាន់ឮខ្លាំងដូចយន្តហោះល្បឿនលឿនជាងសំឡេងដទៃទៀត។

យន្តហោះ X-59 របស់ណាសា ដែលមានបណ្ដោយ 30 ម៉ែត្រ ទទឹង 9 ម៉ែត្រ និងបំពាក់ម៉ាស៊ីនប្រតិកម្មតែមួយគត់ ត្រូវបានរចនាឡើងដោយ General Electric Aviation ដែលជាក្រុមហ៊ុនបុត្រសម្ព័ន្ធរបស់ General Electric។

យន្តហោះនេះត្រូវបានផលិតឡើងដើម្បីអាចហោះក្នុងល្បឿន Mach 1.4 ឬ 1,488 គីឡូម៉ែត្រ/ម៉ោង និងអាចហោះដល់កម្ពស់ 16,764 ម៉ែត្រ។ នៅពេលបញ្ឆេះម៉ាស៊ីន X-59 នឹងបង្កើតជាសំឡេងមួយដ៏តូច ដែលប្រហាក់ប្រហែលនឹងសំឡេងបិទទ្វារឡាន ចំពោះអ្នកដែលស្ដាប់នៅលើដី។ ចំណែកយន្តហោះល្បឿនលឿនជាងសំឡេងដទៃអាចធ្វើឱ្យបែកកញ្ចក់បង្អួច នៅពេលវាហោះឆ្លងកាត់។

ណាសាសង្ឃឹមថា បច្ចេកវិទ្យាខាងលើនេះ អាចឱ្យពួកគេបញ្ចុះបញ្ចូលអាជ្ញាធរគ្រប់គ្រងអាកាសចរណ៍ អនុញ្ញាតឱ្យយន្តហោះល្បឿនលឿនជាងសំឡេង X-59 ហោះហើរពីលើតំបន់ដែលមានមនុស្សរស់នៅ។

បើសិនជាការធ្វើតេស្តនានាទទួលបានជោគជ័យ នោះ X-59 អាចក្លាយជាយន្តហោះល្បឿនលឿនជាងសំឡេងដំបូងគេដែលដឹកអ្នកដំណើរនៅទូទាំងពិភពលោក៕

July 10, 2023

អគាររាងមូលធំជាងគេបង្អស់នៅលើពិភពលោក បើកទ្វារនៅខែកញ្ញា

(សហរដ្ឋអាម៉េរិក) – អគារ Sphere នៅ Las Vegas គឺជាសំណង់ដែលមានរាងមូលធំជាងគេលើពិភពលោក និងគ្របដណ្ដប់ដោយអំពូលភ្លើង LED នៅខាងក្រៅ ហើយគ្រោងនឹងបើកទ្វារចាប់ពីខែកញ្ញាខាងមុខ។

អគារ Sphere មានកម្ពស់ 111 ម៉ែត្រ និងទទឹង 157 ម៉ែត្រ។ ការចំណាយលើការសាងសង់អគារនេះគឺប្រមាណ 2.3 ពាន់លានដុល្លារ។ អំពូលភ្លើង LED នៅខាងក្រៅគ្របដណ្ដប់លើផ្ទៃក្រឡាប្រហែល 54,000 ម៉ែត្រការ៉េ។ អគារនេះប្រើប្រាស់អំពូលភ្លើង LED សរុប 1.2 លានឈុត ក្នុងមួយឈុតៗមាន 48 អំពូល។ ផ្នែកខាងក្រៅរបស់អគារ Sphere អាចរចនាឡើងវិញបានទាំងស្រុងតាមរយៈកម្មវិធីកុំព្យូទ័រ ដើម្បីបង្ហាញទិដ្ឋភាពដែលគេចង់បាន។ នេះបើតាម New Atlas ចុះផ្សាយកាលពីថ្ងៃទី 05 កក្កដា 2023។

Sphere អាចដាក់កៅអីបាន 17,000 ឬកន្លែងឈរបាន 20,000 នាក់ ដែលអាចប្រារព្ធកម្មវិធីធំៗដូចជា ពិធិប្រគំតន្ត្រី ឬប្រដាល់។ល។ ខណៈផ្នែកខាងក្នុងមិនទាន់ត្រូវបានបង្ហើបឱ្យដឹង លើកលែងតែអេក្រង់ទូរទស្សន៍ខ្នាតយក្ស។

កៅអីទាំងអស់នឹងត្រូវបានបំពាក់បច្ចេកវិទ្យា 4D រួមមាន ប្រព័ន្ធដែលអនុញ្ញាតឱ្យអ្នកអង្គុយទទួលអារម្មណ៍ដឹងពីជំនោរខ្យល់ ការប្ដូរផ្លាស់កម្ដៅ និងក្លិនក្រអូបជាដើម ក៏ដូចជាប្រព័ន្ធកាមេរ៉ាពិសេសអាចថតរូបក្នុងល្បឿន 120 រូប/វិនាទី។

«ដោយស្ថិតក្នុងកម្មវិធីសម្ដែងពិសេសដើម្បីអបអរថ្ងៃបុណ្យឯករាជ្យជាតិ គ្រឿងលំអខាងក្រៅដែលធ្វើពីអំពូលភ្លើង LED របស់ Sphere ដែលជាអេក្រង់ LED ធំជាងគេលើពិភពលោក នឹងត្រូវបានបើកទាំងស្រុងជាលើកដំបូង» នេះបើតាមក្រុមហ៊ុន Sphere។

Sphere ត្រូវបានរចនាឡើងដោយ Populous ដែលជាក្រុមហ៊ុនស្ថាបត្យកម្មអន្តរជាតិ នៅពីក្រោយសំណង់កីឡាលំដាប់កំពូលជាច្រើនរបស់ពិភពលោក។ បច្ចុប្បន្ន ការងារសាងសង់របស់អគារនេះសម្រេចបានទាំងស្រុង ហើយគ្រោងនឹងបើកទ្វារនៅខែកញ្ញាខាងមុខ ដែលចាប់ផ្ដើមដោយការប្រគំតន្ត្រីជាបន្តបន្ទាប់។ Populous ក៏មានគម្រោងសាងសង់អគារប្រហាក់ប្រហែលនឹង Sphere មួយផ្សេងទៀតនៅទីក្រុងឡុងដ៍ ចក្រភពអង់គ្លេស៕

July 7, 2023

អាចម៍ផ្កាយខ្នាតធំមួយដុំនឹងហោះមកក្បែរផែនដីបំផុតនៅថ្ងៃស្អែក

អាចម៍ផ្កាយ 2019 LH5 ដែលមានអង្កត់ផ្ចិតប្រហែលជាង 400 ម៉ែត្រ នឹងហោះមកក្បែរផែនដីក្នុងគម្លាត 5.6 លានគីឡូម៉ែត្រ នៅវេលាម៉ោង 11 ថ្ងៃទី 07 កក្កដាខាងមុខ។

មិត្តអ្នកអានទាំងឡាយដែលចាប់អារម្មណ៍ អាចតាមដានដំណើរហោះមកក្បែរផែនដីរបស់អាចម៍ផ្កាយខាងលើ តាមរយៈគម្រោងតេឡេស្កុបនិម្មិត (VTP) ដែលនឹងផ្សាយផ្ទាល់ព្រឹត្តិការណ៍នេះ។

តារាវិទូ Gianluca Masi នៅ VTP ថតបានអាចម៍ផ្កាយ 2019 LH5 ដោយតេឡេស្កុបនៅ Manciano ប្រទេសអ៊ីតាលី កាលពីថ្ងៃទី 04 កក្កដា ពេលវត្ថុអវកាសនេះស្ថិតនៅក្នុងរយៈចម្ងាយពីផែនដីប្រហែល 7.2 លានគីឡូម៉ែត្រ។

2019 LH5 ត្រូវបានរកឃើញកាលពីឆ្នាំ 2019។ អង្គការណាសាឱ្យដឹងថា 2019 LH5 មានទំហំធំជាងកីឡដ្ឋានមួយដោយមានអង្កត់ផ្ចិតប្រហែលពី 210 ទៅ 470 ម៉ែត្រ។

អាចម៍ផ្កាយ 2019 LH5 ដែលថតបានកាលពីថ្ងៃទី 04 កក្កដា 2023

នៅពេលហោះមកក្បែរផែនដី 2019 LH5 នឹងផ្លាស់ទីក្នុងល្បឿនប្រហែល 77,900 គីឡូម៉ែត្រ/ម៉ោង ធៀបនឹងផែនដី។ យោងតាម CNEOS ល្បឿននេះគឺលឿនជាងប្រហែល 20 ដង ធៀបនឹងគ្រាប់កាំភ្លើងប្រភេទដូច AK។

អាចម៍ផ្កាយ 2019 LH5 ត្រូវការពេលប្រហែលពីរឆ្នាំ ទើបគោចរបានមួយជុំព្រះអាទិត្យ។ អ្នកវិទ្យាសាស្ត្របានគណនាឃើញថា អាចម៍ផ្កាយនេះនឹងមិនអាចហោះមកបុកជាមួយផែនដី យ៉ាងតិចនៅក្នុងការហោះមកក្បែរចំនួន 11 លើកនាពេលខាងមុខ រហូតដល់ឆ្នាំ 2192។

July 6, 2023

អនាគតនៃសកម្មភាពទស្សនាសាកសពកប៉ាល់ Titanic ក្រោយហេតុការណ៍ Titan

ករណីនាវាមុជទឹក Titan ដែលដឹកមនុស្ស 5 នាក់ជួបគ្រោះថ្នាក់នៅបាតមហាសមុទ្រអាត្លង់ទិក បាននាំឱ្យមានការបារម្ភអំពីអនាគតនៃសកម្មភាពផ្សងព្រេងចុះទៅមើលសាកសពកប៉ាល់ Titanic ដែលបានលិចកាលពីជាង 100 ឆ្នាំមុន។

ចាប់តាំងពីកប៉ាល់ Titanic ចាប់ផ្ដើមដំណើរឆ្លងកាត់មហាសមុទ្រអាត្លង់ទិកដំបូងកាលពីថ្ងៃទី 10 មេសា 1912 មនុស្សម្នានៅជុំវិញពិភពលោកក៏ចាប់អារម្មណ៍ខ្លាំងទៅលើកប៉ាល់នេះ ក៏ដូចជាហេតុការណ៍គ្រោះថ្នាក់របស់វា។ រឿងរ៉ាវរបស់ Titanic មិនត្រឹមតែជួយឱ្យគេផលិតបានភាពយន្តក៏អស្ចារ្យនោះទេ តែក៏បានជួយជំរុញវិស័យទេសចរណ៍ផ្សងព្រេងទៅកាន់បាតសមុទ្រនៅកាណាដា សហរដ្ឋអាម៉េរិក និងអង់គ្លេសផងដែរ។

ទេសចររាប់លាននាក់បានទៅកាន់សារមន្ទីរ បូជនីយស្ថានស្ដីពីកប៉ាល់ និងសោកនាដកម្ម Titanic ហើយក៏មានមនុស្សជាច្រើនចង់មើលសាកសពកប៉ាល់នេះដោយផ្ទាល់។ ពួកគេហ៊ានចំណាយរហូតដល់ 250,000 ដុល្លារអាម៉េរិកដើម្បីសម្រេចក្ដីប្រាថ្នាគយគន់សាកសពកប៉ាល់ Titanic នៅជម្រៅជិត 4,000 ម៉ែត្រ ដោយជិះក្នុងនាវាមុជទឹក។

ក៏ប៉ុន្តែ ការស្លាប់របស់មនុស្ស 5 នាក់នៅក្នុងនាវាមុជទឹក Titan ដែលកើតហេតុនៅមិនឆ្ងាយពីសាកសពកប៉ាល់ Titanic ធ្វើឱ្យគ្រប់គ្នាមានការបារម្ភអំពីអនាគតនៃវិស័យទេសចរណ៍នៅបាតសមុទ្រ។

អ្នកស្រី Jean Legg កូនស្រីរបស់បុរសម្នាក់ដែលជាបុគ្គលិកលើកប៉ាល់ Titanic បាននិយាយថា «…កប៉ាល់ Titanic គួរតែត្រូវបានទុកឱ្យនៅក្នុងភាពស្ងប់សុខ។ កប៉ាល់នេះគួរតែត្រូវបានចាត់ទុកជាសុគតិភពរបស់វិញ្ញាណទាំងឡាយនៃមនុស្សដែលបានបាត់បង់ជីវិត»។

ឪពុករបស់អ្នកស្រី Jean Legg មានឈ្មោះថា Sidney Daniels ជាបុគ្គលិកបម្រើការនៅលើកប៉ាល់ Titanic ក្នុងពេលមានអាយុទើបតែ 18 ឆ្នាំ។ ក្នុងយប់កើតហេតុលិចកប៉ាល់ Titanic លោក Daniels បានរួចពីការស្លាប់ ដោយសារបានលោតចូលសមុទ្រ និងហែលដល់ទូកសុវត្ថិភាព។ គាត់បានទទួលមរណភាពកាលពីឆ្នាំ 1983។

ក្រោយពីនាវាមុជទឹក Titan ជួបគ្រោះថ្នាក់កាលពីថ្ងៃទី 18 មិថុនា 2023 ព័ត៌មានជាច្រើនបានឱ្យដឹងថា ក្រុមហ៊ុន OceanGate ដែលគ្រប់គ្រងនាវា Titan មិនបានគោរពគោលការណ៍ស្ដង់ដាធម្មតាស្ដីពីសុវត្ថិភាពរបស់នាវា។

Titan មិនមែនជានាវាដំបូងគេដែលចុះទៅមើលសាកសពកប៉ាល់ Titanic។ Deep Ocean Expeditions បានចាប់ផ្ដើមសកម្មភាពដូចគ្នានេះចាប់ពីឆ្នាំ 1998 ដោយលក់សំបុត្រតម្លៃ 32,000 ដុល្លារ/ម្នាក់។ បណ្ដាក្រុមហ៊ុនដទៃដូចជា Bluefish, RMS Titanic Inc និង Blue Marble Private ក៏ធ្វើសកម្មភាពនេះ។

ក៏ប៉ុន្តែ Deep Ocean Experditions និង Bluefish បានបញ្ឈប់សកម្មភាពតាំងពីឆ្នាំ 2012 ខណៈ RMS Titanic Inc ក៏បានផ្អាកតាំងពីជាងមួយទសវត្សរ៍កន្លង។

អ្នកស្រី Jean Legg ជាកូនស្រីរបស់លោក Sidney Daniels អតីតបុគ្គលិកលើកប៉ាល់ Titanic

នាវាមុជទឹកដែលផ្សងព្រេងចុះទៅទស្សនាសាកសពកប៉ាល់ Titanic ធ្វើសកម្មភាពក្នុងតំបន់សមុទ្រអន្តរជាតិ ដូច្នេះពុំមានស្ថាប័នរដ្ឋណាមួយគ្រប់គ្រងស្ដង់ដាសុវត្ថិភាពរបស់នាវាទាំងនេះ។ ប៉ុន្តែក្រុមហ៊ុននានាបានស្ម័គ្រចិត្តអនុញ្ញាតឱ្យរដ្ឋពិនិត្យនាវារបស់ពួកគេ។

នៅលើពិភពលោកមាននាវាត្រឹមតែ 10 គ្រឿងប៉ុណ្ណោះដែលមានសមត្ថភាពចុះដល់ជម្រៅរបស់សាកសពកប៉ាល់ Titanic។ នេះបើតាមលោក Will Kohnen ប្រធានសមាគមបច្ចេកវិទ្យាផ្លូវទឹក។ លោក Will និយាយថា «នាវាទាំងនេះសុទ្ធតែត្រូវបានត្រួតពិនិត្យ លើកលែងតែ Titan»។

នៅមុន និងក្រោយកើតហេតុការណ៍គ្រោះថ្នាក់នាវាមុជទឹក Titan បុគ្គល និងស្ថាប័នជាច្រើនបានអំពាវនាវឱ្យមានការត្រួតពិនិត្យនាវា Titan និងក្រុមហ៊ុន OceanGate ក៏ដូចជាបណ្ដាក្រុមហ៊ុនដែលផ្សេងព្រេងចុះទៅទស្សនាសាកសព Titanic។ ពួកគេយល់ថា ក្រុមហ៊ុន OceanGate មិនយកចិត្តទុកដាក់លើបញ្ហាសុវត្ថិភាព។

ក៏ប៉ុន្តែ អ្នកខ្លះថា ប្រវត្តិសាស្ត្រនឹងបាត់ស្រមោល បើសិនដំណើរចុះទៅមើលសាកសព Titanic ត្រូវបានបញ្ឈប់ជារៀងរហូត។ ពួកគេយល់ថា វិស័យទេសចរណ៍ប្រភេទនេះនឹងងើបឡើងវិញ។

លោក Alan Whitefield ដែលជាប្រធានក្រុមហ៊ុន Silvercrest Submarines នៅប្រទេសអង់គ្លេស និយាយថា «វាដូចទៅនឹងវិស័យអាកាសចរណ៍។ ពេលមានយន្តហោះធ្លាក់ គ្រប់គ្នាតែងតែព្រួយបារម្ភ…។ ប៉ុន្តែច្រើនខែក្រោយមក ពួកគេក៏បន្តជិះយន្តហោះ និងភ្លេចរឿងរ៉ាវដែលបានកើតឡើង»៕

July 3, 2023

Elon Musk ចាប់ផ្ដើមហ្វឹកហាត់គុនដើម្បីឡើងប្រដល់នឹង Zuckerberg

មហាសេដ្ឋី Elon Musk ដែលជាម្ចាស់ SpaceX បានចាប់ផ្ដើមហាត់ក្បាច់គុនចម្រុះ MMA ជាមួយនឹង Lex Fridman ម្ចាស់ខ្សែក្រវាត់ខ្មៅ Jujutsu (ជូជិតស៊ូ) ដើម្បីត្រៀមខ្លួនសម្រាប់ការឡើងសង្វៀនប្រកួតជាមួយម្ចាស់ Facebook គឺមហាសេដ្ឋី Mark Zuckerberg។

«ខ្ញុំបានចាប់ផ្ដើមការហ្វឹកហាត់ប្រកបដោយការរីករាយតាមធម្មតាជាមួយ Elon Musk ក្នុងរយៈពេលច្រើនម៉ោងកាលពីម្សិលមិញ» Lex Fridman ម្ចាស់ឆានែល Lex Fridman Podcast និងជាម្ចាស់ខ្សែក្រវាត់ខ្មៅគុនជូជិតស៊ូ បានសរសេរលើ Twitter កាលពីថ្ងៃទី 28 មិថុនាដូច្នេះ។

លោក Fridman បន្តថា «ពិតជាគួរឱ្យចាប់អារម្មណ៍ចំពោះកម្លាំង និងសមត្ថភាពរបស់គាត់ ទាំងនៅលើជើងទាំងពីរ ទាំងនៅលើដី»។

Fridman ក៏បានបង្ហោះរូបថតពីរសន្លឹកដែលថតបានទិដ្ឋភាព Musk ក្រៀកជាប់ក និងសង្កត់ដៃរបស់ Fridman ហើយផ្ដួលគូប្រកួតបានយ៉ាងស្រួល។

«ពិតជាចាប់អារម្មណ៍នៅពេលឃើញ Elon និង Mark ហាត់ក្បាច់គុន។ ប៉ុន្តែខ្ញុំគិតថា ពិភពលោកនឹងទទួលបានការបម្រើច្រើនជាងនេះនៅពេលពួកគេហាត់គុន ដោយមិនវាយគ្នាក្នុងទ្រុងដែក។ ទោះជាមានរឿងអ្វីកើតឡើង ខ្ញុំនៅតែគាំទ្រពួកគេ» Fridman និយាយដូច្នេះ។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

អ្នកគាំទ្រកំពុងតែទន្ទឹងរង់ចាំ និងនាំគ្នាភ្នាល់ ដោយមានការចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

June 29, 2023

Concept កំពូលនាវាទេសចរណ៍ប្រើប្រាស់អ៊ីដ្រូសែន និងមានទីលានចុះចតឧទ្ធម្ភាគចក្រចំនួនពីរ

អ្នករចនានាវាទេសចរណ៍ជនជាតិអ៊ីតាលី Marco Ferrari បានបង្ហើបឱ្យដឹងអំពី concept កំពូលនាវាទេសចរណ៍ដែលដំណើរការដោយអ៊ីដ្រូសែន ឈ្មោះ Project Neptune ដែលអាចជួយដោះស្រាយបញ្ហាបំភាយឧស្ម័នពុល។

ដោយមានបណ្ដោយប្រវែង 137.3 ម៉ែត្រ និងទម្ងន់ប្រហែល 5,000 តោន Project Neptune គឺជានាវាទេសចរណ៍ខ្នាតធំ។ នេះបើតាម Interesting Engineering ចុះផ្សាយកាលពីថ្ងៃទី 26 មិថុនា 2023។

ផ្នែកខាងក្រៅរបស់នាវានេះធ្វើពីអាលុយមីញ៉ូម។ នាវានេះក៏មានអាងហែលទឹលមួយនៅផ្នែកកន្ទុយ និងនៅជាន់លើផងដែរ។ ជាងនេះ វាក៏មានកន្លែងចុះចតចំនួនពីរសម្រាប់ឧទ្ធម្ភាគចក្រទៀតផង។

Project Neptune មានបន្ទប់ចំនួនបួនដែលមានយ៉រៀងៗខ្លួននៅជាន់ទាបៗ និងបន្ទប់ប្រភេទប្រណិតចំនួន 6 ដែលអាចដាក់មនុស្សសរុប 22 នាក់។ ក្រុមនាវិកលើនាវានេះនឹងមាន 50 នាក់ ក្នុងនោះមានទាំងវេជ្ជបណ្ឌិត និងជំនួយការពេទ្យម្នាក់ផងដែរ។ ក្រៅពីនេះ នាវា Project Neptune ក៏មានមធ្យោបាយធ្វើដំណើរអម មានដូចជា ម៉ូតូទឹក ទូកកាយ៉ាក និងឧបករណ៍មុជទឹក។ល។

អ្វីដែលគួរឱ្យចាប់អារម្មណ៍ជាងនេះគឺថា នាវាទេសចរណ៍ Project Neptune នឹងដំណើរការដោយថាមពលអ៊ីដ្រូសែន មិនបំភាយឧស្ម័នពុល៕

June 29, 2023

មហាសេដ្ឋីកំពូលសំណាង ព្រោះមិនបានស្លាប់ក្នុងនាវាមុជទឹក Titan

Jay Bloom សប្បាយចិត្តនៅពេលបង្អួតកូនប្រុសអំពីគម្រោងចុះទៅទស្សនាសាកសពកប៉ាល់ Titanic នៅបាតមហាសមុទ្រ ដោយជិះក្នុងនាវាមុជទឹក Titan ប៉ុន្តែសំណាងល្អ ព្រោះបានកូនព្រមានទាន់ពេល។

«មូលហេតុដែលឪពុកខ្ញុំមិនទៅក៏ព្រោះតែខ្ញុំបានព្រមានគាត់ថា «ប៉ា កប៉ាល់មុជទឹកនោះមិនអាចនៅសេសសល់ក្នុងជម្រៅជ្រៅបែបនេះនៅក្រោមមហាសមុទ្រនោះទេ» Sean Bloom អាយុ 20 ឆ្នាំ កូនប្រុសរបស់មហាសេដ្ឋី Jay Bloom និយាយកាលពីថ្ងៃទី 24 មិថុនាដូច្នេះ។

Sean បន្ថែមថា «ខ្ញុំព្រួយបារម្ភណាស់ ព្រោះគិតថា កូននាវានេះមិនអាចស៊ូទ្រាំបានជាមួយនឹងសម្ពាធខ្លាំងបែបនេះ។ វាក៏មិនអាចមុជទៅជ្រៅដូច្នេះ»។

Sean ចូលចិត្តស្រាវជ្រាវអំពី Titanic ហើយលោក Jay ដែលជាមហាសេដ្ឋីម្នាក់ដែរនោះ ក៏ចង់ឱ្យកូនប្រុសទៅជាមួយខ្លួន។ Stockton Rush ស្ថាបនិក និងជា CEO របស់ OceanGate ដែលក្រុមហ៊ុនគ្រប់គ្រងនាវា Titan បានទៅជួប Jay កាលពីខែមីនា។ ពួកគេបានទៅមើលពិព័រណ៍ Titanic នៅសណ្ឋាគារ Luxor និងបានពិភាក្សាគ្នាអំពីដំណើរផ្សងព្រេង។

Jay ឱ្យដឹងថា លោក Rush ជំរុញជាបន្តបន្ទាប់ដើម្បីឱ្យគាត់ទិញសំបុត្រទៅមើល Titanic នៅបាតសមុទ្រ។ ក្នុងពេល Rush កំពុងបញ្ចុះបញ្ចូល Jay កូនរបស់ Jay គឺ Sean និងមិត្តរបស់គេក៏ស្វែងយល់បន្ថែមអំពី Titan ហើយពួកគេក៏ចាប់ផ្ដើមព្រួយភ័យ។

«នោះគឺជាកូននាវាដ៏តូច មនុស្ស 5 នាក់អង្គុយប្រជ្រៀតគ្នានៅខាងក្នុង។ វាធ្វើឱ្យខ្ញុំមានអារម្មណ៍ថាគ្មានសុវត្ថិភាព។ អារម្មណ៍របស់ខ្ញុំរម្លឹកខ្ញុំជានិច្ចថា មិនគួរធ្វើដំណើរលើកនេះ» Sean និយាយដូច្នេះ។

Jay Bloom (ឆ្វេង) និងកូនប្រុស Sean Bloom

នៅចំពោះមុខឪពុក Sean បានព្រមាន និងរៀបរាប់អំពីបញ្ហាសុវត្ថិភាពដែល Titan អាចជួបប្រទះ។ ចុងក្រោយ ឪពុក និងកូនក៏យល់ស្របគ្នាថា មិនទៅ។ Rush ក៏បានជំនួសកៅអីរបស់ Sean និង Jay ដោយលក់សំបុត្រឱ្យមហាសេដ្ឋីអង់គ្លេសដើមកំណើតប៉ាគីស្ថាន Shahzada Dawood និងកូនប្រុស Suleman។

នាវាមុជទឹក Titan បានបាត់ខ្លួនកាលពីថ្ងៃទី 18 មិថុនា ពេលកំពុងដឹកមនុស្ស 5 នាក់ ធ្វើដំណើរចុះទៅមើលសាកសពកប៉ាល់ Titanic ក្រោមបាតមហាសមុទ្រអាត្លង់ទិក ជម្រៅជិត 4,000 ម៉ែត្រ និងមានចម្ងាយពី Newfoundland របស់កាណាដា ប្រហែល 600 គីឡូម៉ែត្រ។ ក្រុមមន្ត្រីអាម៉េរិក និងក្រុមហ៊ុន OceanGate កាលពីថ្ងៃទី 22 មិថុនា បានប្រកាសជាផ្លូវការថា នាវា Titan បានផ្ទុះបែក ហើយមនុស្ស 5 នាក់ក្នុងនាវាបានបាត់បង់ជីវិត។

June 26, 2023

បទពិសោធន៍ «វិះនឹងស្លាប់ក្នុងនាវាមុជទឹកដូច Titan នៅក្បែរសាកសពកប៉ាល់ Titanic»

គ្រោះថ្នាក់នាវាមុជទឹក Titan បានធ្វើឱ្យ Michael Guillen នឹកឃើញដល់បទពិសោធន៍ដ៏រន្ធត់នៅពេលជាប់ក្នុងនាវាមុជទឹកនៅត្រង់កន្លែងដូចទីតាំងក្នុងករណី Titan កាលពីឆ្នាំ 2000។

«ខ្ញុំគឺជាមនុស្សម្នាក់ក្នុងចំណោមអ្នកយកព័ត៌មានដំបូងៗដែលបានមើលឃើញសាកសពកប៉ាល់ Titanic នៅបាតសមុទ្រអាត្លង់ទិក។ ប្រការនោះធ្វើឱ្យខ្ញុំមានមោទកភាព» Michael Guillen បណ្ឌិតផ្នែករូបវិទ្យាអាម៉េរិក រៀបរាប់អំពីដំណើរចុះទៅមើលសាកសពកប៉ាល់ Titanic ក្នុងនាមជាអ្នកយកព័ត៌មានផ្នែកវិទ្យាសាស្ត្ររបស់ទូរទស្សន៍ ABC កាលពី 23 ឆ្នាំមុន។

ក្នុងដំណើរផ្សងព្រេងនោះ Guillen ទៅជាមួយមិត្តម្នាក់ឈ្មោះ Brian និងអ្នកបើកបរនាវាជនជាតិរុស្ស៊ី Viktor នៅក្នុងនាវាមុជទឹក Mir-1 របស់រុស្ស៊ី ដែលត្រូវបានទម្លាក់ចុះទឹកពីកប៉ាល់មេ Akademik Mstislav Keldysh។ ក្រោយពីបានទស្សនាផ្នែកខាងមុខរបស់សាកសពកប៉ាល់ Titanic ប្រកបដោយភាពងាយស្រួលនៅក្នុងជម្រៅ 3,800 ម៉ែត្រ ពួកគេក៏សម្រេចចិត្តផ្លាស់ទីទៅកាន់ផ្នែកខាងក្រោយរបស់កប៉ាល់។

លោក Guillen រៀបរាប់៖ «ពេលឆ្លងកាត់តំបន់ដែលមានបំណែកជាច្រើន ដើម្បីឆ្ពោះទៅកាន់ចំណុចកន្ទុយកប៉ាល់ ពួកយើងក៏ស្រាប់តែត្រូវស្រូបចូលខ្សែទឹកដែលហូរខ្លាំងនៅបាតសមុទ្រ។ ចុងក្រោយ Mir-1 ត្រូវជាប់គាំងទៅនឹងស្លាបចក្រដ៏ធំរបស់កប៉ាល់ Titanic»។

«ក្រោយពីការប៉ះទង្គិច ពួកយើងឃើញដុំដែកច្រែះរបស់កប៉ាល់ Titanic ធ្លាក់មកលើនាវាមុជទឹក» លោក Guillen បន្ថែម និងបន្តថា «ពេលនោះខ្ញុំគិតថា ខ្ញុំនឹងមិនអាចគេចផុតពីការស្លាប់ឡើយ»។

Viktor ដែលធ្លាប់ជាអ្នកបើកបរយន្តហោះចម្បាំង MiG របស់រុស្ស៊ី ក៏បានរកវិធីរំដោះនាវាមុជទឹក។ លោក Guillen និយាយថា ពេលនោះ «ដូចទៅនឹងរថយន្តរបស់អ្នកកំពុងជាប់ផុង ហើយអ្នកត្រូវរកវិធីថយក្រោយដើម្បីរំដោះខ្លួន។ ពួកយើងសុទ្ធតែរក្សាភាពស្ងប់ស្ងាត់ ព្រោះមិនចង់រំខាន ឬធ្វើឱ្យ Viktor បែកអារម្មណ៍។ ពួកយើងសុទ្ធតែដឹងថា កំពុងស្ថិតក្នុងស្ថានភាពអាសន្ន…»។

នាវា Mir-1 ត្រូវជាប់ប្រហែលមួយម៉ោងក្នុងភាពងងឹតនៅបាតសមុទ្រ ដោយសារតែ Viktor សម្រេចចិត្តបិទភ្លើងដើម្បីសន្សំសំចៃថាមពល។ «ខ្ញុំមិនភ្លេចសោះឡើយនូវស្ថានភាពដែលគិតថា ខ្លួននឹងស្លាប់មិនខាន» លោក Guillen រម្លឹកឡើងដូច្នេះ។

ក្នុងពេលនោះ Guillen មានអារម្មណ៍ថា នាវាកំពុងផុសឡើង។ «ខ្ញុំងាកក្រោយសួរ Viktor ថា មានបញ្ហាអ្វីអត់? គាត់ក៏ឆ្លើយដោយសំឡេងស្អកៗថា «មិនមានបញ្ហាទេ»។ ពេលនោះទើបខ្ញុំមានអារម្មណ៍ធូរទ្រូង» លោក Guillen ថ្លែងបន្តដូច្នេះ។

ដោយសារជំនាញរបស់ Viktor ចុងក្រោយ នាវាមុជទឹក Mir-1 ក៏បានរំដោះខ្លួនផុតពីស្លាបចក្រ និងគំនរបាក់បែករបស់សាកសពកប៉ាល់ Titanic។ ពួកគេត្រូវចំណាយពេលពីរម៉ោងកន្លះដើម្បីងើបឡើងលើផ្ទៃទឹក និងផុតពីគ្រោះអាសន្ន។

កាលពីឆ្នាំ 2000 មានតែពីរប្រទេសប៉ុណ្ណោះដែលអាចអភិវឌ្ឍនាវាមុជទឹកដែលស៊ូទ្រាំបានជាមួយនឹងសម្ពាធទឹកសមុទ្រដ៏មហាសាល នោះគឺប្រទេសបារាំង និងរុស្ស៊ី។ នេះបើតាម លោក Guillen។

នាវាមុជទឹក Mir របស់រុស្ស៊ី មានបណ្ដោយ 7.8 ម៉ែត្រ, ទទឹង 3.6 ម៉ែត្រ, កម្ពស់ 3 ម៉ែត្រ និងទម្ងន់ 18,600 គីឡូក្រាម។ នាវានេះអាចចុះជ្រៅរហូតដល់ 6,000 ម៉ែត្រ។ ក្នុងការធ្វើតេស្ដជាក់ស្ដែង Mir-1 អាចចុះដល់ជម្រៅ 6,170 ម៉ែត្រ និង Mir-2 អាចចុះដល់ 6,120 ម៉ែត្រ៕

June 26, 2023

មហាសេដ្ឋី និងអ្នកជំនួញមកពីបួនប្រទេសបាត់ខ្លួនជាមួយនឹង Titan ពេលចុះមើលសព Titanic

អ្នកជំនាញបារាំងម្នាក់ រួមនឹងអ្នកជំនួញបួននាក់មកពីអង់គ្លេស ប៉ាគីស្ថាន និងសហរដ្ឋអាម៉េរិក ត្រូវបានគេជឿថា មានវត្តមាននៅក្នុងនាវាមុជទឹក Titan ដែលបានបាត់ខ្លួនក្នុងពេលចុះទៅមើលសាកសពកប៉ាល់ Titanic នៅបាតមហាសមុទ្រ។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

OceanGate Expeditions ដែលមានទីស្នាក់ការកណ្ដាលនៅក្នុងរដ្ឋវ៉ាស៊ីងតោន សហរដ្ឋអាម៉េរិក បានចាប់ផ្ដើមផ្ដល់សេវាកម្មនាំអតិថិជនទៅមើលសាកសពកប៉ាល់ Titanic ក្នុងតម្លៃប្រហែល 250,000 ដុល្លារ/ម្នាក់ ចាប់ពីឆ្នាំ 2020។ ភ្ញៀវនឹងទទួលបទពិសោធន៍ 8 ថ្ងៃនៅលើសមុទ្រ ក្នុងនោះ នាវាមុជទឹក Titan ដែលដាក់មនុស្សបាន 5 នាក់ ត្រូវបានប្រើប្រាស់ដើម្បីនាំទេសចរចុះទៅមើលសាកសពកប៉ាល់ Titanic ដែលស្ថិតក្នុងជម្រៅប្រហែលជិត 4,000 ម៉ែត្រ។

ពីឆ្វេងមកស្ដាំគឺ Paul-Henry Nargeolet, Hamish Harding និង Stockton Rush

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman។

ក្នុងចំណោមមនុស្សខាងលើ មហាសេដ្ឋីអង់គ្លេសត្រូវបានគេចាប់អារម្មណ៍ជាងគេ។ លោក Hamish Harding អាយុ 58 ឆ្នាំ ដែលជាអ្នកជំនួញជនជាតិអង់គ្លេស រស់នៅក្នុងប្រទេសអេមីរ៉ាតអារ៉ាប់រួម (UAE) គឺជាប្រធានរបស់ក្រុមហ៊ុន Action Aviation ដែលជាទីភ្នាក់ងារឈ្មួញជើងសាអន្តរជាតិផ្នែកយន្តហោះ មានទីស្នាក់ការកណ្ដាលនៅទីក្រុងឌូបៃ។

June 21, 2023

Tag: អារម្មណ៍