Tag: ស្ថាប័ន

ចិនបាញ់រ៉ុក្កែត «ហៅទឹកភ្លៀង» បានជិត 40 ពាន់លានតោន និងសង្គ្រោះបានជាង 14 ពាន់លានយុន
សកម្មភាពបាញ់រ៉ុក្កែតទៅលើអាកាសដើម្បីហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។
វេលាម៉ោង 22 និង 23 នាទី ថ្ងៃទី 18 មីនា 2023 នៅមូលដ្ឋានគ្រប់គ្រងដំណើរការបង្កើនទឹកភ្លៀងសិប្បនិម្មិត ក្នុងស្រុក Fushun ខេត្ត Sichuan ប្រទេសចិន រ៉ុក្កែតហៅភ្លៀងសិប្បនិម្មិតចំនួនពីរគ្រាប់ត្រូវបានបាញ់ឡើងទៅកាន់អាកាស និងបានផ្ទុះ បង្កើតជាសំឡេងយ៉ាងកក្រើកមេឃ ហើយការបាញ់លើកទីមួយនេះក៏បានសម្រេចជាស្ថាពរ។
បួននាទីក្រោយការបាញ់រ៉ុក្កែត ទឹកភ្លៀងក៏ចាប់ផ្ដើមធ្លាក់នៅតំបន់ Fushun។ មកដល់ម៉ោង 23 និង 48 នាទី រ៉ុក្កែតហៅភ្លៀងពីរគ្រាប់ទៀតក៏ត្រូវបានបាញ់ឡើងទៅកាន់អាកាស ធ្វើឱ្យទឹកភ្លៀងបង្អោរចុះមកជាបន្តបន្ទាប់។
យោងតាមប្រព័ន្ធផ្សព្វផ្កាយនៅខេត្ត Sichuan សកម្មភាពបាញ់បង្ហោះរ៉ុក្កែតហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។
បច្ចេកទេស «ហៅភ្លៀង»
មន្ត្រីជំនាញនៅមជ្ឈមណ្ឌលសេវាកម្មកាត់បន្ថយគ្រោះធម្មជាតិនៃស្រុក Fushun និយាយថា ដើម្បីសម្រេចបានកិច្ចការបង្កើនទឹកភ្លៀងសិប្បនិម្មិត គេត្រូវបំពេញលក្ខខណ្ឌជាច្រើន មានដូចជា ការវិភាគនិន្នាការអាកាសធាតុ ការប្រឹក្សាយោបល់រួម ការត្រៀម ការកែតម្រូវឧបករណ៍ដំណើរការ ការតាមដានដោយផ្ទាល់ និងការស្នើសូមប្រើប្រាស់ដែនអាកាសជាដើម។
សកម្មភាពបង្កើនទឹកភ្លៀងសិប្បនិម្មិតមិនមែនមានន័យថា ចង់ហៅភ្លៀងពេលណាក៏បាន។ ដើម្បីអាចធ្វើឱ្យទឹកភ្លៀងធ្លាក់ គេត្រូវបំពេញលក្ខខណ្ឌសំខាន់ៗចំនួនបី៖ កម្រាស់របស់ពពកដែលផ្ទុកទឹកភ្លៀងត្រូវតែធំជាង 2 គីឡូម៉ែត្រ, ពពកនោះត្រូវតែមានចំហាយទឹកគ្រប់គ្រាន់ និងត្រូវតែមានតំបន់ភាយចំហាយទឹក។
តំបន់ដែលត្រូវការទឹកភ្លៀងត្រូវតែជាទីដែលអនុញ្ញាតឱ្យរ៉ុក្កែតហោះឡើងដល់កម្ពស់ពី 4 ពាន់ ទៅ 8 ពាន់ម៉ែត្រ ដែលនេះក៏ត្រូវការកិច្ចសហការឱ្យបានម៉ត់ចត់ជាមួយនឹងស្ថាប័នគ្រប់គ្រងដែនអាកាស ដើម្បីធានាសុវត្ថិភាព។
ពេលវេលាដែលអាចឱ្យគេដំណើរការបាញ់រ៉ុក្កែតហៅភ្លៀង គឺជារឿងស្មុគស្មាញមួយផ្សេងទៀត។ ព្រោះថា គេត្រូវការជ្រើសរើសពេលវេលា និងការរង់ចាំ មុននឹងអាចបាញ់រ៉ុក្កែតហៅភ្លៀង បន្ទាប់ពីបានត្រៀមផែនការរួចរាល់។
បច្ចេកទេសហៅទឹកភ្លៀងសិប្បនិម្មិត កាត់បន្ថយការខាតបង់ប្រាក់បានជិត 2 ពាន់ដុល្លារអាម៉េរិក
ជាក់ស្ដែង សកម្មភាពកែសម្រួលអាកាសធាតុបែបសិប្បនិម្មិត មិនត្រឹមតែដើម្បីបង្កើនទឹកភ្លៀងនោះទេ តែនៅអាចទប់ស្កាត់បាតុភូតភ្លៀងទឹកកក ចុះអ័ព្ទ និងបាតុភូតត្រជាក់ដល់កកផងដែរ។
ក្រោយការអភិវឌ្ឍជាង 60 ឆ្នាំ បច្ចេកទេសកែប្រែអាកាសធាតុ និងបង្កើនទឹកភ្លៀងរបស់ប្រទេសចិន បានរីកចម្រើនយ៉ាងខ្លាំង បង្កើតជាប្រព័ន្ធមួយដែលមានបួនថ្នាក់ រួមមាន ថ្នាក់ស្រុក ថ្នាក់ក្រុង ថ្នាក់ខេត្ត និងថ្នាក់ជាតិ។
កាលពីឆ្នាំ 2022 ស្ទើរតែទាំងអស់នៃតំបន់ភាគខាងត្បូងប្រទេសចិន បានឆ្លងកាត់រលកកម្ដៅ និងគ្រោះរាំងស្ងួតជាច្រើនលើក ចាប់ពីខែមិថុនា ដល់ពាក់កណ្ដាលខែវិច្ឆិកា នាំឱ្យអាជ្ញាធរតំបន់ជាច្រើនត្រូវប្រើប្រាស់បច្ចេកទេសហៅទឹកភ្លៀង។ ក្នុងអំឡុងពេលនោះ ពួកគេបានធ្វើការហៅទឹកភ្លៀងសរុបជាង 15,000 លើក ក្នុងនោះ ការប្រើប្រាស់យន្តហោះមានចំនួន 241 លើក និងការបាញ់រ៉ុក្កែតចំនួន 15,000 លើក ហើយទាញយកទឹកភ្លៀងបានប្រហែល 8.56 ពាន់លានតោន។
យោងតាមស្ថាប័នឧតុនិយមចិន ពេញមួយឆ្នាំ 2022 ប្រទេសចិនបង្កើតទឹកភ្លៀងបានប្រហែល 39.8 ពាន់លានតោន ជួយការពារផ្ទៃដីបានប្រហែល 650,000 គីឡូម៉ែត្រការ៉េ និងកាត់បន្ថយការខាតបង់ផ្នែកសេដ្ឋកិច្ចបានប្រហែល 14.1 ពាន់លានយុន (ប្រហែល 1,972,900,000 ដុល្លារអាម៉េរិក)៕
July 26, 2023
យន្តហោះធ្លាក់នៅកូឡុំប៊ី បណ្ដាលឱ្យអ្នកនយោបាយប្រាំនាក់បាត់បង់ជីវិត
អ្នកនយោបាយ និងអ្នកបើកបរយន្តហោះកូឡុំប៊ី បានស្លាប់នៅក្នុងហេតុការណ៍ធ្លាក់យន្តហោះធុនស្រាលមួយគ្រឿងនៅភាគកណ្ដាលប្រទេសកូឡុំប៊ី។
យន្តហោះ Cessna T210N ដឹកមនុស្ស 6 នាក់ បានធ្លាក់នៅក្នុងទីក្រុង San Luis de Gaceno នៃខេត្ត Boyaca នៅពេលកំពុងហោះពីទីក្រុង Villavicencio ទៅកាន់រដ្ឋធានី Bogota ដើម្បីចូលរួមពិធីជប់លៀង កាលពីថ្ងៃទី 19 កក្កដា ឆ្នាំ 2023។
អ្នកនយោបាយទាំងប្រាំរូបដែលបានស្លាប់ សុទ្ធតែជាសមាជិករបស់បក្សស្ដាំនិយម ឈ្មោះ មជ្ឈមណ្ឌលប្រជាធិបតេយ្យ របស់អតីតប្រធានាធិបតី Alvaro Uribe។
យោងតាមការបង្ហោះសារនៅលើ Twitter របស់បក្សនេះ អ្នកនយោបាយដែលបានស្លាប់រួមមាន អតីតសមាជិកសភាជាន់ខ្ពស់ តំណាងរាស្ត្រ បេក្ខភាពអភិបាលខេត្ត សមាជិកក្រុមប្រឹក្សាក្រុង និងអ្នកបើកបរយន្តហោះ។
ស្ថាប័នគ្រប់គ្រងអាកាសចរណ៍ស៊ីវិលរបស់ប្រទេសកូឡុំប៊ី កំពុងធ្វើការស៊ើបអង្កេតរកមូលហេតុនៃគ្រោះថ្នាក់នេះ។
យោងតាមប្រកាសរបស់នាយកដ្ឋានបច្ចេកទេសស៊ើបអង្កេតគ្រោះថ្នាក់អាកាសចរណ៍ស៊ីវិល ក្នុងឆ្នាំ 2022 កូឡុំប៊ីធ្លាប់កើតមានហេតុការណ៍គ្រោះថ្នាក់អាកាសចរណ៍ 17 ករណី បណ្ដាលឱ្យមនុស្ស 14 នាក់បាត់បង់ជីវិត។
July 20, 2023
អាម៉េរិកអនុម័តលក់មីស៊ីលបាញ់លើអាកាស តម្លៃជិតបីពាន់លានដុល្លារឱ្យអាល្លឺម៉ង់
ក្រសួងការបរទេសអាម៉េរិក បានយល់ព្រមលក់មីស៊ីលអាកាសប្រឆាំងអាកាសខ្នាតមធ្យម AMRAAM ជិត 1,000 ដើម ក្នុងតម្លៃ 2.9 ពាន់លានដុល្លារ ដល់ប្រទេសអាល្លឺម៉ង់។
មន្ទីរបញ្ចកោណ កាលពីថ្ងៃទី 19 កក្កដា បានប្រកាសថា ក្រសួងការបរទេសអាម៉េរិកបានអនុញ្ញាតឱ្យលក់មីស៊ីលបាញ់ពីអាកាសទៅអាកាសប្រភេទមធ្យម AIM-120C-8 AMRAAM ចំនួន 969 ដើម រួមនឹងប្រព័ន្ធបញ្ជាបម្រុង រូបមន្តនៃការហ្វឹកហាត់ ឧបករណ៍បច្ចេកទេស និងជំនួយផ្នែកហ្វឹកហ្វឺន ក្នុងតម្លៃ 2.9 ពាន់លានដុល្លារ ទៅឱ្យប្រទេសអាល្លឺម៉ង់។
«ការលក់អាវុធនេះនឹងជួយគាំទ្រដល់គោលនយោបាយការបរទេស និងសន្តិសុខជាតិរបស់សហរដ្ឋអាម៉េរិក តាមរយៈការកែលំអសន្តិសុខសម្រាប់សម្ព័ន្ធមិត្តមួយនៅក្នុងណាតូ ហើយក៏ជាប្រទេសដែលដើរតួនាទីសំខាន់នៅក្នុងការរក្សាស្ថិរភាពនយោបាយ និងសេដ្ឋកិច្ចអឺរ៉ុប» ប្រកាសរបស់ក្រសួងការពារជាតិអាម៉េរិក មានឃ្លាសរសេរដូច្នេះ។
យោងតាមមន្ទីរបញ្ចកោណ ការទិញដូរអាវុធនេះនឹងជួយឱ្យអាល្លឺម៉ង់មានអាវុធប្រឆាំងអាកាសទំនើប លើកកម្ពស់សមត្ថភាពទប់ទល់នឹងការគំរាមកំហែងនាបច្ចុប្បន្ន និងអនាគត។
ការលក់អាវុធខាងលើក៏ត្រូវបានជូនដំណឹងដល់សភាអាម៉េរិក ជាទីដែលស្ថាប័ននេះមានពេលវេលា 30 ថ្ងៃ ដើម្បីធ្វើការសម្រេចចិត្តថា ត្រូវយល់ព្រមឱ្យលក់ ឬបដិសេធ។ បើសិនទទួលបានការយល់ព្រមពីសភា ការលក់អាវុធនេះនឹងត្រូវបញ្ជូនឡើងទៅកាន់ប្រធានាធិបតី ចូ បៃដិន ដើម្បីចុះហត្ថលេខាចុងក្រោយ។
បុគ្គលិកយោធាអាម៉េរិក កំពុងដំឡើងមីស៊ីល AMRAAM
AIM-120 AMRAAM គឺជាមីស៊ីលម្ចាស់ការដែលនាំផ្លូវដោយរ៉ាដា អាចធ្វើសកម្មភាពនៅក្នុងលក្ខខណ្ឌអាកាសធាតុខុសៗគ្នា។ ក្បាលរ៉ាដាបំពាក់បច្ចេកវិទ្យាម្ចាស់ការ អនុញ្ញាតឱ្យមីស៊ីលអនុវត្តគោលការណ៍ «បាញ់ ហើយភ្លេច» ដែលជួយឱ្យយន្តហោះមិនចាំបាច់ចុចតម្រង់គោលដៅជាបន្តបន្ទាប់ និងគេចផុតពីការបាញ់តបតពីសត្រូវ។
កំណែដើម AIM-120A អាចបាញ់បានចម្ងាយ 50 គីឡូម៉ែត្រ គ្រាដែលកំណែ AIM-120C-8 របស់ AMRAAM អាចបាញ់ចំគោលដៅពីចម្ងាយ 180 គីឡូម៉ែត្រ។
ក្រុមហ៊ុនការពារជាតិ Raytheon ឱ្យដឹងថា មីស៊ីល AMRAAM កំពុងត្រូវបានដាក់ឱ្យប្រើប្រាស់នៅក្នុងជួរកងទ័ពអាម៉េរិក និងប្រទេសជិត 40 ក្នុងពិភពលោក៕
July 20, 2023
ចិននឹងបាញ់បង្ហោះយានដឹកមនុស្សអាចប្រើឡើងវិញបាននៅឆ្នាំ 2027
យានអវកាសដឹកមនុស្សថ្មីរបស់ប្រទេសចិន អាចដាក់មនុស្សបាន 7 នាក់ ហើយគ្រឿងសំខាន់ៗរបស់យាននេះ អាចត្រូវបានប្រើប្រាស់ឡើងវិញបានរហូតដល់ 10 ដង។
Yang Liwei ដែលជាអនុប្រធានកម្មវិធីអវកាសមានមនុស្សបើកបរ របស់ទីភ្នាក់ងារអវកាសចិន បានឱ្យដឹងថា យានអវកាសដែលអាចប្រើប្រាស់ឡើងវិញដំបូងគេរបស់ប្រទេសចិន នឹងត្រូវបានបាញ់បង្ហោះយ៉ាងឆាប់ត្រឹមឆ្នាំ 2027។ កាលពីថ្ងៃទី 17 កក្កដា 2023 លោក Yang បានឱ្យដឹងថា យានថ្មីនេះអាចដឹកមនុស្សបាន 7 នាក់។ ប្រការនោះនឹងដើរតួនាទីសំខាន់ក្នុងការសាងសង់ស្ថានីយអវកាសចិន និងបេសកកម្មចុះចតលើឋានព្រះចន្ទ។
យានគំរូដែលមានទំហំតាមខ្នាតផ្លូវការមួយគ្រឿងរបស់ស្ថាប័នខាងលើ បានបញ្ចប់ដោយជោគជ័យនូវជើងហោះហើរសាកល្បងរយៈពេល 67 ម៉ោង និងប្រើប្រាស់រ៉ុក្កែត Long March 5 កាលពីឆ្នាំ 2020។
តាមទ្រឹស្ដី យ៉ាងហោចណាស់ បណ្ដាគ្រឿងសំខាន់ៗរបស់យានអវកាសនេះ អាចប្រើប្រាស់ឡើងវិញបាន 10 ដង ដែលនេះនឹងជួយកាត់បន្ថយការចំណាយបានច្រើន។
យានអវកាសថ្មីខាងលើរបស់ប្រទេសចិន អាចបៀបស្មើទៅនឹងបណ្ដាយានអវកាសជំនាន់ថ្មីរបស់សហរដ្ឋអាម៉េរិក ដែលមានដូចជា យាន Dragon V2 របស់ SpaceX និង CST-100 Starliner របស់ Boeing ជាដើម៕
July 19, 2023
អាហ្វ្រិកខាងត្បូងថា «ចាប់លោក ពូទីន គឺស្មើនឹងប្រកាសសង្គ្រាមនឹងរុស្ស៊ី»
ប្រធានាធិបតី Ramaphosa និយាយថា អាហ្វ្រិកខាងត្បូងចាប់ខ្លួនលោក ពូទីន នឹងមានន័យថា ប្រកាសសង្គ្រាមជាមួយនឹងប្រទេសរុស្ស៊ី បន្ទាប់ពីបក្សប្រឆាំងចង់ឱ្យ រដ្ឋធានីព្រីតូរីយ៉ា អនុវត្តបទបញ្ជាតាមចាប់ខ្លួនរបស់តុលាការ ICC។
«រុស្ស៊ីបានប្រកាសហើយថា ការចាប់ខ្លួនប្រធានាធិបតី វ្ល៉ាឌីមៀ ពូទីន គឺស្មើនឹងការប្រកាសសង្គ្រាម» ប្រធានាធិបតីអាហ្វ្រិកខាងត្បូង Cyril Ramaphosa សរសេរលិខិតផ្ញើទៅកាន់តុលាការកំពូល Gauteng ដែលមានយុត្តាធិការលើ ព្រីតូរីយ៉ា ដូច្នេះ។
ការលើកឡើងរបស់ប្រធានាធិបតីអាហ្វ្រិកខាងត្បូងខាងលើ ត្រូវបានធ្វើឡើងបន្ទាប់ពីសម្ព័ន្ធភាពប្រជាធិបតេយ្យ (DA) របស់ក្រុមប្រឆាំង ចង់ឱ្យរដ្ឋធានីព្រីតូរីយ៉ា គោរពតាមបទបញ្ជាតាមចាប់ខ្លួនប្រធានាធិបតី ពូទីន ពីតុលាការព្រហ្មទណ្ឌអន្តរជាតិ (ICC)។ លោក Ramaphosa ពន្យល់ថា ការបង្កសង្គ្រាមជាមួយនឹងរុស្ស៊ី គឺមិនសមស្របនឹងរដ្ឋធម្មនុញ្ញរបស់អាហ្វ្រិកខាងត្បូង ហើយផ្ទុយពីការទទួលខុសត្រូវក្នុងការការពារជាតិរបស់រដ្ឋាភិបាល។
ឆ្លើយតបនឹងប្រធានាធិបតិ Ramaphosa មេដឹកនាំរបស់ DA លោក John Steenhuisen យល់ថា ការបកស្រាយរបស់លោក Ramaphosa គឺគួរឱ្យអស់សំណើច និងរាក់កំភែល ហើយថា «…ប្រការសំខាន់គឺត្រូវរក្សាកាតព្វកិច្ចអន្តរជាតិប្រកបដោយតម្លាភាព»។
អាហ្វ្រិកខាងត្បូង កំពុងតែមានការរារែក ចាប់តាំងពី ICC ចេញបទបញ្ជាតាមចាប់ខ្លួនប្រធានាធិបតី ពូទីន កាលពីខែមីនា ក្រោមបទចោទថា «បានផ្លាស់ទីកុមារអ៊ុយក្រែនដោយខុសច្បាប់»។ យោងតាមគោលការណ៍របស់តុលាការ ICC សមាជិកចំនួន 123 ប្រទេសរបស់តុលាការនេះ ក្នុងនោះមានអាហ្វ្រិកខាងត្បូង មានកាតព្វកិច្ចចាប់ខ្លួនមេដឹកនាំរុស្ស៊ី និងបញ្ជូនទៅកាន់ហូឡង់ ដើម្បីកាត់ទោស បើសិនជាលោក ពូទីន ឈានជើងចូលដល់ទឹកដីរបស់ពួកគេ។
ចំណែកភាគីខាងរុស្ស៊ីវិញ និយាយថា បទបញ្ជាតាមចាប់ខ្លួនរបស់ ICC គឺជារឿងគ្មានន័យ។ រុស្ស៊ីធ្លាប់បានចូលរួមជាសមាជិករបស់ ICC ប៉ុន្តែបានដកខ្លួន និងលែងទទួលស្គាល់ស្ថាប័ននេះ។
អាហ្វ្រិកខាងត្បូងកំពុងតែធ្វើជាប្រធាន BRICS ដែលជាក្រុមប្រទេសមានសេដ្ឋកិច្ចទើបតែលេចធ្លោ ដោយមានសមាជិកចំនួនប្រាំប្រទេស រួមមានទាំង ចិន រុស្ស៊ី ឥណ្ឌា និងប្រេស៊ីល។ អាហ្វ្រិកខាងត្បូងគ្រោងនឹងប្រារព្ធកិច្ចប្រជុំកំពូល BRICS លើកទី 15 ចាប់ពីថ្ងៃទី 22 ដល់ 24 សីហាខាងមុខ។
ដើម្បីដោះស្រាយបញ្ហាទាក់ទិននឹងតុលាការ ICC អាហ្វ្រិកខាងត្បូងបានស្នើឱ្យរុស្ស៊ី អនុញ្ញាតឱ្យរដ្ឋមន្ត្រីការបរទេស Sergei Lavrov មកចូលរួមកិច្ចប្រជុំជំនួសលោក ពូទីន ប៉ុន្តែ ទីក្រុងមូស្គូ បានបដិសេធសំណើនេះ៕
July 19, 2023
តំណាងរាស្ត្របក្សប្រឆាំង និងបក្សកាន់អំណាច វាយតប់គ្នាពេលប្រជុំក្នុងសភានៅកូសូវ៉ូ
តំណាងរាស្ត្រនៅកូសូវ៉ូ សាចទឹកទៅលើមេដឹកនាំស្ថាប័នអនុវត្តច្បាប់ នាំឱ្យមានហេតុការណ៍វាយតប់គ្នានៅក្នុងសភា ក្នុងកិច្ចប្រជុំស្ដីពីសំឡេងជជែកគ្នាដែលកំពុងមានភាពចម្រូងចម្រាស។
វីដេអូដែលថតបាននៅក្នុងកិច្ចប្រជុំសភាកូសូវ៉ូ កាលពីថ្ងៃទី 13 កក្កដា បង្ហាញថា តំណាងរាស្ត្រមួយរូបរបស់បក្សប្រឆាំង កាន់ដបទឹកសុទ្ធ និងជះទឹកទៅលើលោក Albin Kurti ដែលជាប្រធានស្ថាប័នអនុវត្តច្បាប់ និងអនុប្រធាន។
សកម្មភាពនេះ ភ្លាមៗនោះក៏បានធ្វើឱ្យមានអំពើហិង្សា នៅពេលក្រុមតំណាងរាស្ត្របក្សប្រឆាំង និងបក្សកាន់អំណាចសម្រុកទៅកាន់វេទិកា រុញច្រាន និងវាយតប់គ្នា។ អំពើហិង្សានេះបានបន្តរហូតដល់ក្រុមប៉ូលិស និងក្រុមអង្គរក្សរបស់លោក Kurti ចូលមកធ្វើអន្តរាគមន៍។
ហេតុការណ៍ខាងលើបានកើតឡើងនៅពេលដែលក្រុមតំណាងរាស្ត្រកូសូវ៉ូ បើកកិច្ចប្រជុំស្ដីពីសំឡេងដែលត្រូវបានសារព័ត៌មានចុះផ្សាយកាលពីពេលថ្មីៗនេះ ទាក់ទិននឹងការជជែកគ្នាកាលពីខែមិថុនា 2022 រវាងលោកស្រី Mimoza Kusari-Lila ប្រធានបក្សកាន់អំណាច Alternativa និងតំណាងរាស្ត្រជនជាតិសែប៊ី Slavko Simic។
ក្នុងសំឡេងដែលថតបានខាងលើ លោកស្រី Kursari-Lila ឱ្យដឹងថា ធ្លាប់បានជជែកជាមួយ Milan Radojcic ដែលជាមន្ត្រីជនជាតិសែប៊ីមួយរូបត្រូវបានសហរដ្ឋអាម៉េរិកដាក់ទណ្ឌកម្មព្រោះតែប្រព្រឹត្តអំពើពុករលួយ និងបទល្មើសដែលមានអង្គការចាត់តាំង។ Radojcic ក៏ត្រូវបានអាជ្ញាធរកូសូវ៉ូតាមចាប់ខ្លួនផងដែរ។
កូសូវ៉ូគឺជាតំបន់ផ្ដាច់ខ្លួនដែលស្ថិតនៅភាគនិរតីនៃប្រទេសសែប៊ី និងមានផ្ទៃក្រឡាប្រហែល 10,800 គីឡូម៉ែត្រការ៉េ។ តំបន់នេះមានប្រជាជនចំនួន 1.8 លាននាក់ ដែលភាគច្រើនគឺជាជនជាតិអាល់បានី។ កូសូវ៉ូបានប្រកាសឯករាជ្យកាលពីឆ្នាំ 2008 ប៉ុន្តែសែប៊ីមិនទទួលស្គាល់។
ជនជាតិសែប៊ីប្រហែល 120,000 នាក់ដែលរស់នៅក្នុងតំបន់ភាគខាងជើងកូសូវ៉ូ មិនទទួលស្គាល់អាជ្ញាធរនៅ Pristina ដោយពួកគេនៅតែស្មោះស្ម័គ្រផ្នែកនយោបាយជាមួយនឹងសែប៊ី។ ភាគច្រើននៃបណ្ដាប្រទេសលោកខាងលិច បានទទួលស្គាល់ឯករាជ្យរបស់កូសូវ៉ូ ប៉ុន្តែតំបន់នេះមិនទាន់ទទួលបានកៅអីនៅអង្គការសហប្រជាជាតិ ដោយសារតែមានការជំទាស់ពីរុស្ស៊ី និងចិន។

July 14, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
បេក្ខភាពនាយករដ្ឋមន្ត្រីថៃ ប្រឈមនឹងហានិភ័យត្រូវជម្រុះពីការប្រកួតប្រជែង
គណៈកម្មការរៀបចំការបោះឆ្នោតថៃ (EC) បញ្ជូនសំណុំរឿងលោក Pita បេក្ខភាពនាយករដ្ឋមន្ត្រីថៃ មកពីបក្ស Move Forward ឡើងទៅកាន់តុលាការធម្មនុញ្ញ នាំឱ្យលោកមានហានិភ័យត្រូវគេជម្រុះពីការប្រកួតដណ្ដើមកៅអីនាយករដ្ឋមន្ត្រីថៃ។
EC នៅថ្ងៃទី 12 កក្កដានេះ បានស្នើសូមឱ្យតុលាការធម្មនុញ្ញថៃ ព្យួរសមាជិកភាពសភារបស់លោក Pita Limjaroenrat ដែលជាបេក្ខភាពសម្រាប់កៅអីនាយករដ្ឋមន្ត្រី ក្នុងពេលតុលាការពិនិត្យរឿងក្ដីប្ដឹងអ្នកនយោបាយនេះ ទាក់ទិននឹងការកាន់កាប់ភាគហ៊ុនរបស់ក្រុមហ៊ុនបណ្ដាញផ្សព្វផ្សាយ iTV។
មុននោះ EC បានឯកភាពនឹងការសន្និដ្ឋានដែលថា មានភស្ដុតាងគ្រប់គ្រាន់ដើម្បីបញ្ជាក់ថា លោក Pita កាន់កាប់ភាគហ៊ុនចំនួន 42,000 ហ៊ុននៅ iTV ពេលលោកចុះឈ្មោះជាបេក្ខភាពសម្រាប់ការបោះឆ្នោតនាពេលកន្លង។ ច្បាប់របស់ថៃបានចែងថា បេក្ខភាពសមាជិកសភាមិនត្រូវបានអនុញ្ញាតឱ្យមានក្រុមហ៊ុនបណ្ដាញផ្សព្វផ្សាយ។
ការសម្រេចរបស់ EC ត្រូវបានធ្វើឡើងតែមួយថ្ងៃ មុនពេលសភាថៃបោះឆ្នោតជ្រើសរើសនាយករដ្ឋមន្ត្រីថ្មី ក្នុងនោះមានលោក Pita ជាមេបក្ស Move Forward ដែលកំពុងជាបេក្ខភាពលំដាប់កំពូល។ បើសិនត្រូវបានព្យួរសមាជិកភាពសភា លោក Pita នឹងត្រូវបានជម្រុះចេញពីការប្រកួតដណ្ដើមតំណែងនាយករដ្ឋមន្ត្រីថៃនៅអាណត្តិនេះ។
តុលាការធម្មនុញ្ញថៃ គ្រោងនឹងបើកសវនាការនៅថ្ងៃនេះ ប៉ុន្តែមិនដឹងថាស្ថាប័ននេះនឹងចេញសាលក្រមនៅវេលាណានៅឡើយ៕
July 12, 2023
គម្រោងសាងសង់ដងទង់ខ្ពស់ជាងគេលើពិភពលោក តម្លៃមួយពាន់លានដុល្លារ
ក្រុមហ៊ុនមួយនៅសហរដ្ឋអាម៉េរិក គ្រោងចំណាយប្រាក់មួយពាន់លានដុល្លារដើម្បីសាងសង់ដងទង់ដែលខ្ពស់ជាងអគារ Empire State ក្នុងបំណងលើកកម្ពស់ស្មារតីមោទកភាព និងសាមគ្គីភាពជាតិ។
Morrill Worcester ស្ថាបនិកក្រុមហ៊ុនលក់គ្រឿងអលង្ការ Worcester Wreath ដែលជាស្ថាប័នអភិវឌ្ឍគម្រោងដងទង់ខាងលើបានឱ្យដឹងថា សំណង់ដែលមានឈ្មោះថា ដងទង់ឧទ្យានសេរីភាព (Flagpole of Freedom Park) នេះ នឹងត្រូវសាងសង់នៅក្នុងរដ្ឋ Maine ក្នុងបំណង «ផ្សារភ្ជាប់ប្រជាជនអាម៉េរិក រម្លឹកពួកគេអំពីប្រវត្តិសាស្ត្រការពារសេរីភាព និងផ្សារភ្ជាប់ប្រទេសជាតិដែលត្រូវប្រេះឆា»។
Worcester គ្រោងនឹងសាងសង់ដងទង់ដែលកម្ពស់ 445 ម៉ែត្រនៅក្នុងរយៈពេលដប់ឆ្នាំ ហើយវានឹងក្លាយជាដងទង់ដែលខ្ពស់ជាងគេបង្អស់លើពិភពលោក។ ដងទង់នេះក៏នឹងត្រូវដំឡើងទង់ជាតិសហរដ្ឋអាម៉េរិកដែលមានទំហំធំជាងទីលានបេស្បល។ ភ្ញៀវនឹងត្រូវប្រើប្រាស់ជណ្ដើរយោងដើម្បីឡើងទៅដល់ស្ថានីយគយគន់ទេសភាពនៅកំពូលដងទង់ ដែលខ្ពស់ជាងអគារ State Empire ទៅទៀត។ នៅលើកម្ពស់នេះ ភ្ញៀវអាចមើលទៅឆ្ងាយរហូតដល់ទឹកដីកាណាដា។
លោក Morrill ក៏គ្រោងនឹងបង្កើតភូមិមួយដែលមាន «សារមន្ទីររស់» ជាទីដែលអតីតទាហានបរិយាយអំពីប្រវត្តិសាស្ត្រ រួមនឹងសំណង់ជាច្រើនផ្សេងទៀតដែលស្ថិតនៅក្នុងផ្ទៃដីជាង 4,000 ហិកតា។
July 6, 2023
គ្រាន់តែកិនឆ្មាងាប់សោះ ក្រុមហ៊ុនបារាំងរងការពិន័យជាប្រាក់ 3,000 ដុល្លារអាម៉េរិក
ក្រុមហ៊ុនគ្រប់គ្រងផ្លូវដែកជាតិបារាំង ត្រូវបានពិន័យជាប្រាក់ជាង 1,000 ដុល្លារអាម៉េរិក ពីបទខ្វះការទទួលខុសត្រូវ ដោយសារតែបានកិនឆ្មាសំណព្វរបស់អ្នកដំណើរម្នាក់ រហូតដល់ងាប់។
តុលាការបារាំង កាលពីថ្ងៃទី 04 កក្កដា បានសម្រេចថា ក្រុមហ៊ុនផ្លូវដែកជាតិ (SNCF) បានធ្វើឱ្យមានកំហុសទាក់ទិននឹងបញ្ហាខ្វះការទទួលខុសត្រូវ បន្ទាប់ពីមានករណីរថភ្លើងមួយខ្សែបានកិនឆ្មាសំណព្វរបស់អ្នកដំណើររហូតដល់ងាប់ កាលពីខែមករា។
ការចោទប្រកាន់ខាងលើនេះអាចដាក់ពិន័យជាប្រាក់ឡើងដល់ 75,000 អឺរ៉ូប (ជាង 80,000 ដុល្លារអាម៉េរិក) និងដាក់ពន្ធនាគារ 5 ឆ្នាំ។ ក៏ប៉ុន្តែ តុលាការបានសម្រេចពិន័យជាប្រាក់ត្រឹមតែ 1,000 អឺរ៉ូ (ជាង 1,000 ដុល្លារអាម៉េរិក) ចំពោះ SNCF។
SNCF ក៏ត្រូវបានបញ្ជាឱ្យបង់ប្រាក់ជំងឺចិត្តបន្ថែមចំនួន 2,000 អឺរ៉ូ (ជិត 2,200 ដុល្លារអាម៉េរិក) ដល់ម្ចាស់ពីរនាក់របស់សត្វមួយក្បាលឈ្មោះ Neko ដែលត្រូវរថភ្លើងកិននោះផងដែរ។
រឿងរ៉ាវខាងលើបានកើតឡើងកាលពីខែមករា 2023។ កាលណោះ Georgia និងកូនស្រី Melaina អាយុ 15 ឆ្នាំ បានឃើញ Neko លោតចុះពីថង់ និងរត់ទៅកាន់ផ្លូវដែកនៅមុនពេលរថភ្លើងចេញដំណើរ។ Georgia បានចោទថា បុគ្គលិករបស់ក្រុមហ៊ុនរថភ្លើងមានចិត្តឃោរឃៅ ព្រោះបានបដិសេធការស្នើសុំពន្យារការចេញដំណើរពី Paris ទៅកាន់ Bordeaux ដើម្បីជួយស្វែងរកឆ្មា។
នៅពេលរថភ្លើងចេញដំណើរ ម្ចាស់ឆ្មាក៏បានឃើញ Neko ត្រូវរថភ្លើងកិន។ ពេលនោះ SNCF ស្នើសុំបង់ថ្លៃខូចខាតដោយសំបុត្ររថភ្លើងមួយទៅកាន់ Bordeaux។
ករណីខាងលើក៏បានធ្វើឱ្យមានបាតុកម្ម រួមនឹងញត្តិតវ៉ាដែលមានស្នាមមេដៃរបស់មនុស្ស 100,000 នាក់។ រដ្ឋមន្ត្រីក្រសួងមហាផ្ទៃបារាំង Gerald Darmanin និយាយថា លោកភ្ញាក់ផ្អើលខ្លាំងណាស់នៅចំពោះហេតុការណ៍នេះ។ អង្គការការពារសិទ្ធិសត្វមួយក៏បានដាក់ញត្តិតវ៉ាចំពោះ SNCF ព្រោះតែ «អំពើហិង្សាធ្ងន់ធ្ងរ និងឃោរឃៅដែលនាំឱ្យសត្វស្លាប់»។
ចៅក្រមតុលាការបារាំង កាលពីថ្ងៃទី 04 កក្កដា 2023 យល់ថា បុគ្គលិកនៅលើរថភ្លើង «មិនបានប្រឹងប្រែងក្នុងការសង្គ្រោះសត្វឆ្មា»។ សាលក្រមរបស់តុលាការនេះក៏ដើរផ្ទុយពីអនុសាសន៍របស់ក្រុមរដ្ឋអាជ្ញា ជាក្រុមដែលអំពាវនាវឱ្យទម្លាក់ចោលរាល់ការចោទប្រកាន់ទៅលើ SNCF ដោយយល់ថា បុគ្គលិករបស់ស្ថាប័ននេះមិនបានបញ្ចេញភាពគ្មានមនុស្សធម៌។
នៅលើបណ្ដាញសង្គម មនុស្សមួយចំនួនបានរិះគន់សាលក្រមតុលាការខាងលើ។ អ្នកខ្លះថា លើកក្រោយបើមានករណីនេះកើតឡើង ពួកគេគិតថា ម្ចាស់សត្វត្រូវតែបង់ថ្លៃខាតបង់ពេលវេលាដល់អ្នកដំណើរដទៃ នៅពេលរថភ្លើងត្រូវបានពន្យារពេលចេញដំណើរ៕
July 6, 2023