ប្រវត្តិ - La Reine Media

អ្នកអវកាសដែល «ឯកាបំផុត» ក្នុងប្រវត្តិសាស្ត្រ

ជាង 50 ឆ្នាំបន្ទាប់ពីបេសកកម្ម Apollo 11 អ្នកអវកាស Michael Collins នៅតែត្រូវបានគេរម្លឹកថាជាអ្នកក្លាហានស្ងាត់ស្ងៀម ដែលមានរហ័សនាមថា «មនុស្សឯកាបំផុត»។

កាលពីឆ្នាំ 1969 ក្នុងពេល Neil Armstrong និង Buzz Aldrin ចុះដើរលើឋានព្រះចន្ទជាលើកដំបូងរបស់មនុស្សជាតិ លោក Michael Collins អង្គុយម្នាក់ឯងនៅក្នុងបន្ទប់បញ្ចាការ Columbia របស់យានអវកាស Apollo 11 និងហោះពីក្រោយតំបន់ងងឹតរបស់ព្រះចន្ទ។

លោក Collins ទទួលខុសត្រូវក្នុងការបញ្ជាម៉ូឌុល Eagle នាំមិត្តរួមក្រុមពីរនាក់ចុះចតលើឋានព្រះចន្ទ។ នៅពេលនោះ រាល់ទំនាក់ទំនងជាមួយផែនដីត្រូវបានកាត់ផ្ដាច់ ដោយសារតែមានការរារាំងពីព្រះចន្ទ ធ្វើឱ្យ Collins ត្រូវដាច់ទំនាក់ទំនងទាំងស្រុងជាមួយនឹងមនុស្សនៅលើផែនដី ហើយក៏ឆ្ងាយពីផ្ទះរាប់សែនគីឡូម៉ែត្រ។

លោក Collins និយាយថា «នៅខាងក្រៅកញ្ចក់យាន ខ្ញុំអាចមើលឃើញតែដួងតារា គឺមានតែប៉ុណ្ណឹង»។ លោកបន្តថា អារម្មណ៍ពេលនោះ គឺដូចទៅនឹងលោកកំពុងអង្គុយលើកូនទូកតូចមួយដែលកំពុងអណ្ដែតលើផ្ទៃទឹកមហាសមុទ្រប៉ាស៊ីហ្វិក ក្នុងរាត្រីងងឹតសូន្យសុង។

អ្នកអវកាស Michael Collins ថតរូបម៉ូឌុល Eagle របស់យានអវកាស Apollo 11 រួមនឹងព្រះចន្ទ និងផែនដី

លោក Collins បានស្ថិតនៅលើយាន Columbia អស់រយៈពេល 21 ម៉ោង គ្រាដែល Buzz Aldrin និង Neil Armstrong ចុះចត និងដើរលើឋានព្រះចន្ទ។ ទោះជាយ៉ាងណាក៏ដោយ លោក Collins ធ្លាប់បាននិយាយថា លោកនៅតែពេញចិត្តនឹងអារម្មណ៍ឯកានោះ៕

July 21, 2023

យានចុះចត Chandrayaan-3 របស់ឥណ្ឌា ឡើងដល់គន្លងតារាវិថិផែនដីដោយជោគជ័យ

អង្គការអវកាសរបស់ប្រទេសឥណ្ឌា បានបាញ់បង្ហោះរ៉ុក្កែតមួយគ្រឿងកាលពីថ្ងៃទី 14 កក្កដា ដើម្បីនាំយានអវកាសឡើងទៅកាន់គន្លងគោចរផែនដី និងនាំយានចុះចតឡើងទៅកាន់ឋានព្រះចន្ទ។

រ៉ុក្កែត LVM3 របស់អង្គការអវកាសឥណ្ឌា (ISRO) ត្រូវបានបាញ់បង្ហោះពីព្រលានអវកាសក្នុងរដ្ឋ Andhra Pradesh នៅភាគខាងត្បូងប្រទេសនេះ កាលពីល្ងាចថ្ងៃទី 14 កក្កដា ឆ្នាំ 2023។

ប្រហែល 16 នាទីបន្ទាប់ពីបានបាញ់បង្ហោះ ISRO ក៏ប្រកាសថា រ៉ុក្កែតបាននាំយានចុះចត Chandrayaan-3 ឡើងដល់គន្លងតារាវិថីផែនដីដោយជោគជ័យ។ យានចុះចតនេះនឹងហោះទៅដល់ឋានព្រះចន្ទនៅខែក្រោយ។

បើសិនជាបេសកកម្មខាងលើប្រព្រឹត្តិទៅដោយរលូន នោះឥណ្ឌានឹងក្លាយជាប្រទេសមួយក្នុងចំណោមប្រទេសដែលបាននាំយានទៅចុះចតលើឋានព្រះចន្ទដោយជោគជ័យ។ បច្ចុប្បន្ន មានប្រទេសចំនួនបីដែលបានទទួលជោគជ័យក្នុងបេសកកម្មដូចគ្នានេះ រួមមាន អាម៉េរិក អតីតសូវៀត និងចិន។

Chandrayaan (ចន្ទ្រយាន) នៅក្នុងភាសាសំស្ក្រឹតមានន័យថា «យានព្រះចន្ទ»។ ចន្ទ្រយានរួមមានយានចុះចតមួយគ្រឿងដែលមានកម្ពស់ពីរម៉ែត្រ ត្រូវបានផលិតឡើងដើម្បីដាក់ពង្រាយយានបើកបរស្វ័យប្រវត្តិមួយគ្រឿងនៅក្បែរប៉ូលខាងត្បូងរបស់ព្រះចន្ទ។

អង្គការអវកាសឥណ្ឌាឱ្យដឹងថា ការចុះចតលើដីនៅឋានព្រះចន្ទ គ្រោងនឹងធ្វើឡើងនៅថ្ងៃទី 23 ខែសីហា ឆ្នាំ 2023៕

July 15, 2023

សកម្មភាពប្រចាំថ្ងៃរបស់ម្ចាស់ Facebook

ក្រៅពីពេលវេលាសម្រាប់ធ្វើការ CEO របស់ Meta លោក Mark Zuckerberg មានកាលវិភាគសម្រាប់ការហូបចុក និងហាត់ប្រាណប្រកបដោយភាពតឹងរឹង។

នៅលើបណ្ដាញសង្គមថ្មីដែលមានឈ្មោះថា Threads ម្ចាស់ Facebook បង្ហើបឱ្យដឹងអំពីវិធីសាស្ត្រដែលជួយឱ្យលោកតែងតែពោរពេញដោយថាមពល និងអារម្មណ៍ស្រស់ថ្លា ដើម្បីដោះស្រាយបញ្ហាការងារយ៉ាងច្រើន។

«ខ្ញុំក្រោកឡើង ហាត់ក្បាច់គុន MMA ដើម្បីជួយឱ្យខួរក្បាលបានស្រស់ស្រាយ។ បង្កើតនូវអ្វីៗជាច្រើនសម្រាប់មនុស្សប្រើប្រាស់។ ហូបអាហារច្រើន ភាគច្រើនគឺប្រូតេអ៊ីន កាត់បន្ថយជាតិស្ករ និងផឹកស្រាតិចតួចបំផុត។ មួយថ្ងៃ ខ្ញុំដេកពី 7 ទៅ 8 ម៉ោង» លោក Zuckerberg សរសេរដូច្នេះ។

ម្ចាស់ Facebook ឱ្យដឹងថា លោកតែងតែធ្វើកិច្ចការខាងលើជារៀងរាល់ថ្ងៃ។ នៅពេលត្រូវបានអ្នកគុននិយមជនជាតិអាម៉េរិកាំងដ៏ល្បីឈ្មោះ Mike Davis សួរអំពីកាហ្វេ លោក Zuckerberg ឆ្លើយថា «មិនផឹកសូម្បីតែបន្តិច!»។

ដើមឡើយ លោក Zuckerberg តែងតែរត់ហាត់ប្រាណ បន្ទាប់បានក្រោកពីដំណេក។ ប៉ុន្តែក្រោយមក លោកក៏បានងាកមកហាត់ក្បាច់គុន MMA វិញ ព្រោះថា ពេលរត់ គាត់តែងតែគិត។ «អ្នកមិនអាចគិតដល់អ្វីទាំងអស់នៅពេលហាត់ MMA។ ឱ្យតែបាត់បង់ការផ្ដោតអារម្មណ៍បន្តិច អ្នកនឹងត្រូវបញ្ចប់ដោយការដេកដី» លោក Zuckerberg បញ្ជាក់ដូច្នេះ។

ជារៀងរាល់ឆ្នាំ CEO របស់ Meta នឹងចូលរួមបង្ហាញកម្លាំងក្នុងព្រឹត្តិការណ៍ The Murphy Challenge។ នេះគឺជាលំហាត់ប្រាណប្រើប្រាស់កម្លាំងខ្ពស់ដែលបង្កើតឡើងដោយមន្ត្រីក្នុងអង្គភាពពិសេសរបស់ទ័ពជើងទឹកអាម៉េរិក។

ក្រោយពីទទួលយកការបបួលប្រកួតរបស់មហាសេដ្ឋី Elon Musk នាយកប្រតិបត្តិរបស់ Meta មិនបានបង្ហោះសារណាមួយស្ដីពីការប្រកួតនៅលើសង្វៀន។ ប៉ុន្តែ Iska Saric អ្នកនាំពាក្យរបស់ Meta និយាយថា Zuckerberg ពិតជាម៉ឺងម៉ាត់ខ្លាំងណាស់។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

អ្នកគាំទ្រកំពុងតែទន្ទឹងរង់ចាំ និងនាំគ្នាភ្នាល់ ដោយមានការចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

July 12, 2023

គម្រោងសាងសង់ដងទង់ខ្ពស់ជាងគេលើពិភពលោក តម្លៃមួយពាន់លានដុល្លារ

ក្រុមហ៊ុនមួយនៅសហរដ្ឋអាម៉េរិក គ្រោងចំណាយប្រាក់មួយពាន់លានដុល្លារដើម្បីសាងសង់ដងទង់ដែលខ្ពស់ជាងអគារ Empire State ក្នុងបំណងលើកកម្ពស់ស្មារតីមោទកភាព និងសាមគ្គីភាពជាតិ។

Morrill Worcester ស្ថាបនិកក្រុមហ៊ុនលក់គ្រឿងអលង្ការ Worcester Wreath ដែលជាស្ថាប័នអភិវឌ្ឍគម្រោងដងទង់ខាងលើបានឱ្យដឹងថា សំណង់ដែលមានឈ្មោះថា ដងទង់ឧទ្យានសេរីភាព (Flagpole of Freedom Park) នេះ នឹងត្រូវសាងសង់នៅក្នុងរដ្ឋ Maine ក្នុងបំណង «ផ្សារភ្ជាប់ប្រជាជនអាម៉េរិក រម្លឹកពួកគេអំពីប្រវត្តិសាស្ត្រការពារសេរីភាព និងផ្សារភ្ជាប់ប្រទេសជាតិដែលត្រូវប្រេះឆា»។

Worcester គ្រោងនឹងសាងសង់ដងទង់ដែលកម្ពស់ 445 ម៉ែត្រនៅក្នុងរយៈពេលដប់ឆ្នាំ ហើយវានឹងក្លាយជាដងទង់ដែលខ្ពស់ជាងគេបង្អស់លើពិភពលោក។ ដងទង់នេះក៏នឹងត្រូវដំឡើងទង់ជាតិសហរដ្ឋអាម៉េរិកដែលមានទំហំធំជាងទីលានបេស្បល។ ភ្ញៀវនឹងត្រូវប្រើប្រាស់ជណ្ដើរយោងដើម្បីឡើងទៅដល់ស្ថានីយគយគន់ទេសភាពនៅកំពូលដងទង់ ដែលខ្ពស់ជាងអគារ State Empire ទៅទៀត។ នៅលើកម្ពស់នេះ ភ្ញៀវអាចមើលទៅឆ្ងាយរហូតដល់ទឹកដីកាណាដា។

លោក Morrill ក៏គ្រោងនឹងបង្កើតភូមិមួយដែលមាន «សារមន្ទីររស់» ជាទីដែលអតីតទាហានបរិយាយអំពីប្រវត្តិសាស្ត្រ រួមនឹងសំណង់ជាច្រើនផ្សេងទៀតដែលស្ថិតនៅក្នុងផ្ទៃដីជាង 4,000 ហិកតា។

July 6, 2023

អនាគតនៃសកម្មភាពទស្សនាសាកសពកប៉ាល់ Titanic ក្រោយហេតុការណ៍ Titan

ករណីនាវាមុជទឹក Titan ដែលដឹកមនុស្ស 5 នាក់ជួបគ្រោះថ្នាក់នៅបាតមហាសមុទ្រអាត្លង់ទិក បាននាំឱ្យមានការបារម្ភអំពីអនាគតនៃសកម្មភាពផ្សងព្រេងចុះទៅមើលសាកសពកប៉ាល់ Titanic ដែលបានលិចកាលពីជាង 100 ឆ្នាំមុន។

ចាប់តាំងពីកប៉ាល់ Titanic ចាប់ផ្ដើមដំណើរឆ្លងកាត់មហាសមុទ្រអាត្លង់ទិកដំបូងកាលពីថ្ងៃទី 10 មេសា 1912 មនុស្សម្នានៅជុំវិញពិភពលោកក៏ចាប់អារម្មណ៍ខ្លាំងទៅលើកប៉ាល់នេះ ក៏ដូចជាហេតុការណ៍គ្រោះថ្នាក់របស់វា។ រឿងរ៉ាវរបស់ Titanic មិនត្រឹមតែជួយឱ្យគេផលិតបានភាពយន្តក៏អស្ចារ្យនោះទេ តែក៏បានជួយជំរុញវិស័យទេសចរណ៍ផ្សងព្រេងទៅកាន់បាតសមុទ្រនៅកាណាដា សហរដ្ឋអាម៉េរិក និងអង់គ្លេសផងដែរ។

ទេសចររាប់លាននាក់បានទៅកាន់សារមន្ទីរ បូជនីយស្ថានស្ដីពីកប៉ាល់ និងសោកនាដកម្ម Titanic ហើយក៏មានមនុស្សជាច្រើនចង់មើលសាកសពកប៉ាល់នេះដោយផ្ទាល់។ ពួកគេហ៊ានចំណាយរហូតដល់ 250,000 ដុល្លារអាម៉េរិកដើម្បីសម្រេចក្ដីប្រាថ្នាគយគន់សាកសពកប៉ាល់ Titanic នៅជម្រៅជិត 4,000 ម៉ែត្រ ដោយជិះក្នុងនាវាមុជទឹក។

ក៏ប៉ុន្តែ ការស្លាប់របស់មនុស្ស 5 នាក់នៅក្នុងនាវាមុជទឹក Titan ដែលកើតហេតុនៅមិនឆ្ងាយពីសាកសពកប៉ាល់ Titanic ធ្វើឱ្យគ្រប់គ្នាមានការបារម្ភអំពីអនាគតនៃវិស័យទេសចរណ៍នៅបាតសមុទ្រ។

អ្នកស្រី Jean Legg កូនស្រីរបស់បុរសម្នាក់ដែលជាបុគ្គលិកលើកប៉ាល់ Titanic បាននិយាយថា «…កប៉ាល់ Titanic គួរតែត្រូវបានទុកឱ្យនៅក្នុងភាពស្ងប់សុខ។ កប៉ាល់នេះគួរតែត្រូវបានចាត់ទុកជាសុគតិភពរបស់វិញ្ញាណទាំងឡាយនៃមនុស្សដែលបានបាត់បង់ជីវិត»។

ឪពុករបស់អ្នកស្រី Jean Legg មានឈ្មោះថា Sidney Daniels ជាបុគ្គលិកបម្រើការនៅលើកប៉ាល់ Titanic ក្នុងពេលមានអាយុទើបតែ 18 ឆ្នាំ។ ក្នុងយប់កើតហេតុលិចកប៉ាល់ Titanic លោក Daniels បានរួចពីការស្លាប់ ដោយសារបានលោតចូលសមុទ្រ និងហែលដល់ទូកសុវត្ថិភាព។ គាត់បានទទួលមរណភាពកាលពីឆ្នាំ 1983។

ក្រោយពីនាវាមុជទឹក Titan ជួបគ្រោះថ្នាក់កាលពីថ្ងៃទី 18 មិថុនា 2023 ព័ត៌មានជាច្រើនបានឱ្យដឹងថា ក្រុមហ៊ុន OceanGate ដែលគ្រប់គ្រងនាវា Titan មិនបានគោរពគោលការណ៍ស្ដង់ដាធម្មតាស្ដីពីសុវត្ថិភាពរបស់នាវា។

Titan មិនមែនជានាវាដំបូងគេដែលចុះទៅមើលសាកសពកប៉ាល់ Titanic។ Deep Ocean Expeditions បានចាប់ផ្ដើមសកម្មភាពដូចគ្នានេះចាប់ពីឆ្នាំ 1998 ដោយលក់សំបុត្រតម្លៃ 32,000 ដុល្លារ/ម្នាក់។ បណ្ដាក្រុមហ៊ុនដទៃដូចជា Bluefish, RMS Titanic Inc និង Blue Marble Private ក៏ធ្វើសកម្មភាពនេះ។

ក៏ប៉ុន្តែ Deep Ocean Experditions និង Bluefish បានបញ្ឈប់សកម្មភាពតាំងពីឆ្នាំ 2012 ខណៈ RMS Titanic Inc ក៏បានផ្អាកតាំងពីជាងមួយទសវត្សរ៍កន្លង។

អ្នកស្រី Jean Legg ជាកូនស្រីរបស់លោក Sidney Daniels អតីតបុគ្គលិកលើកប៉ាល់ Titanic

នាវាមុជទឹកដែលផ្សងព្រេងចុះទៅទស្សនាសាកសពកប៉ាល់ Titanic ធ្វើសកម្មភាពក្នុងតំបន់សមុទ្រអន្តរជាតិ ដូច្នេះពុំមានស្ថាប័នរដ្ឋណាមួយគ្រប់គ្រងស្ដង់ដាសុវត្ថិភាពរបស់នាវាទាំងនេះ។ ប៉ុន្តែក្រុមហ៊ុននានាបានស្ម័គ្រចិត្តអនុញ្ញាតឱ្យរដ្ឋពិនិត្យនាវារបស់ពួកគេ។

នៅលើពិភពលោកមាននាវាត្រឹមតែ 10 គ្រឿងប៉ុណ្ណោះដែលមានសមត្ថភាពចុះដល់ជម្រៅរបស់សាកសពកប៉ាល់ Titanic។ នេះបើតាមលោក Will Kohnen ប្រធានសមាគមបច្ចេកវិទ្យាផ្លូវទឹក។ លោក Will និយាយថា «នាវាទាំងនេះសុទ្ធតែត្រូវបានត្រួតពិនិត្យ លើកលែងតែ Titan»។

នៅមុន និងក្រោយកើតហេតុការណ៍គ្រោះថ្នាក់នាវាមុជទឹក Titan បុគ្គល និងស្ថាប័នជាច្រើនបានអំពាវនាវឱ្យមានការត្រួតពិនិត្យនាវា Titan និងក្រុមហ៊ុន OceanGate ក៏ដូចជាបណ្ដាក្រុមហ៊ុនដែលផ្សេងព្រេងចុះទៅទស្សនាសាកសព Titanic។ ពួកគេយល់ថា ក្រុមហ៊ុន OceanGate មិនយកចិត្តទុកដាក់លើបញ្ហាសុវត្ថិភាព។

ក៏ប៉ុន្តែ អ្នកខ្លះថា ប្រវត្តិសាស្ត្រនឹងបាត់ស្រមោល បើសិនដំណើរចុះទៅមើលសាកសព Titanic ត្រូវបានបញ្ឈប់ជារៀងរហូត។ ពួកគេយល់ថា វិស័យទេសចរណ៍ប្រភេទនេះនឹងងើបឡើងវិញ។

លោក Alan Whitefield ដែលជាប្រធានក្រុមហ៊ុន Silvercrest Submarines នៅប្រទេសអង់គ្លេស និយាយថា «វាដូចទៅនឹងវិស័យអាកាសចរណ៍។ ពេលមានយន្តហោះធ្លាក់ គ្រប់គ្នាតែងតែព្រួយបារម្ភ…។ ប៉ុន្តែច្រើនខែក្រោយមក ពួកគេក៏បន្តជិះយន្តហោះ និងភ្លេចរឿងរ៉ាវដែលបានកើតឡើង»៕

July 3, 2023

Elon Musk ចាប់ផ្ដើមហ្វឹកហាត់គុនដើម្បីឡើងប្រដល់នឹង Zuckerberg

មហាសេដ្ឋី Elon Musk ដែលជាម្ចាស់ SpaceX បានចាប់ផ្ដើមហាត់ក្បាច់គុនចម្រុះ MMA ជាមួយនឹង Lex Fridman ម្ចាស់ខ្សែក្រវាត់ខ្មៅ Jujutsu (ជូជិតស៊ូ) ដើម្បីត្រៀមខ្លួនសម្រាប់ការឡើងសង្វៀនប្រកួតជាមួយម្ចាស់ Facebook គឺមហាសេដ្ឋី Mark Zuckerberg។

«ខ្ញុំបានចាប់ផ្ដើមការហ្វឹកហាត់ប្រកបដោយការរីករាយតាមធម្មតាជាមួយ Elon Musk ក្នុងរយៈពេលច្រើនម៉ោងកាលពីម្សិលមិញ» Lex Fridman ម្ចាស់ឆានែល Lex Fridman Podcast និងជាម្ចាស់ខ្សែក្រវាត់ខ្មៅគុនជូជិតស៊ូ បានសរសេរលើ Twitter កាលពីថ្ងៃទី 28 មិថុនាដូច្នេះ។

លោក Fridman បន្តថា «ពិតជាគួរឱ្យចាប់អារម្មណ៍ចំពោះកម្លាំង និងសមត្ថភាពរបស់គាត់ ទាំងនៅលើជើងទាំងពីរ ទាំងនៅលើដី»។

Fridman ក៏បានបង្ហោះរូបថតពីរសន្លឹកដែលថតបានទិដ្ឋភាព Musk ក្រៀកជាប់ក និងសង្កត់ដៃរបស់ Fridman ហើយផ្ដួលគូប្រកួតបានយ៉ាងស្រួល។

«ពិតជាចាប់អារម្មណ៍នៅពេលឃើញ Elon និង Mark ហាត់ក្បាច់គុន។ ប៉ុន្តែខ្ញុំគិតថា ពិភពលោកនឹងទទួលបានការបម្រើច្រើនជាងនេះនៅពេលពួកគេហាត់គុន ដោយមិនវាយគ្នាក្នុងទ្រុងដែក។ ទោះជាមានរឿងអ្វីកើតឡើង ខ្ញុំនៅតែគាំទ្រពួកគេ» Fridman និយាយដូច្នេះ។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

អ្នកគាំទ្រកំពុងតែទន្ទឹងរង់ចាំ និងនាំគ្នាភ្នាល់ ដោយមានការចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

June 29, 2023

មហាសេដ្ឋី Elon Musk ព្រមហាត់គុនជាមួយគ្រូល្បីៗ មុនការប្រកួតជាមួយ Zuckerberg

លោក Musk បានយល់ព្រមហាត់ក្បាច់គុនជាមួយនឹង Gerges St-Pierre ដែលជាកំពូលអ្នកគុននិយមម្នាក់របស់ពិភពលោក ដើម្បីត្រៀមខ្លួនឡើងសង្វៀនប្រកួតប្រដាល់ជាមួយនឹងមហាសេដ្ឋី Zuckergerg។

«លោក Musk ខ្ញុំគឺជាអ្នកគាំទ្ររបស់លោក។ នឹងជាកិត្តិយសបំផុតបើសិនខ្ញុំអាចជួយក្នុងការប្រកួតជាមួយ Zuckerberg។ សូមទុកឱ្យខ្ញុំធ្វើជាគ្រូបង្វឹករបស់លោក» Georges St-Pierre (GSP) បង្ហោះសារលើ Twitter កាលពីថ្ងៃទី 25 មិថុនាដូច្នេះ។

កាលពីថ្ងៃទី 27 មិថុនា 2023 មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk បានឆ្លើយតបលើ Twitter ថា «បាន តោះយើងចាប់ផ្ដើម»។ សាររបស់លោក Musk ទាក់ទាញអ្នកអានបានជាងកន្លះលាននាក់ និងការចុចចូលចិត្តជាង 14.4 k ក្រោយការបង្ហោះមិនដល់មួយថ្ងៃ។ អ្នកចូលមើលស្ទើរតែទាំងអស់គាំទ្រដល់ការសម្រេចចិត្តរបស់លោក Musk ដោយពួកគេសរសេរប្រហាក់់ប្រហែលគ្នាថា ទន្ទឹងរង់ចាំការប្រកួតនេះ។

ឆ្លើយតបនឹងការពេញចិត្តរបស់អ្នកលេងបណ្ដាញសង្គម លោក Musk ក៏បានឱ្យដឹងថា លោកក៏ទើបតែ «លេងមួយទឹក» ជាមួយនឹង Lex Fridman អ្នកស្រាវជ្រាវផ្នែកបញ្ញាសិប្បនិម្មិត (AI) និងជាម្ចាស់ឆានែល podcast ដ៏ល្បីឈ្មោះ ដែលជំនាញខាងសម្ពាសក្រុមមេដឹកនាំបច្ចេកវិទ្យា។

Gerges St-Pierre គឺជាអ្នកគុននិយមជនជាតិកាណាដាដើមកំណើតបារាំង។ បុរសនេះធ្លាប់ដណ្ដើមបានតំណែងជើងឯកពានរង្វាន់ MMA ពីរទម្ងន់ផ្សេងគ្នា។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

សំណួរដែលសួរថា «អ្នកជ្រើសរើស Team Musk ឬ Team Zuck?» បានក្លាយជាពាក្យពេញនិយមនៅលើបណ្ដាញសង្គម Twitter និង Reddit។

មហាសេដ្ឋី Elon Musk (ស្ដាំ) និងមហាសេដ្ឋី Mark Zuckerberg

បើនិយាយអំពីន័យចំ Zuckerberg អាយុ 39 ឆ្នាំ ប្រាកដជាមានប្រៀបជាង ដោយសារតែនៅក្មេង ជាអ្នកគុននិយម MMA និងធ្លាប់ឈ្នះក្នុងការប្រកួតគុនជឺជិតស៊ូប្រេងស៊ីល។ ចំណែកលោក Musk អាយុ 51 ឆ្នាំ មានប្រៀបជាងខាងកម្ពស់ និងទម្ងន់ ហើយធ្លាប់និយាយថា បានចូលរួមវាយគ្នានៅតាមដងផ្លូវពេលធំឡើងនៅអាហ្វ្រិកខាងត្បូង។

ចំណែកឪពុកម្ដាយរបស់លោក Musk សុទ្ធតែមានការបារម្ភចំពោះកូនប្រុស និងណែនាំថា មិនគួរប្រកួតឡើយ។ លោក Errol Musk ដែលជាឪពុករបស់លោក Elon Musk និយាយថា ទោះជាឈ្នះ ឬចាញ់ កូនរបស់គាត់នៅតែត្រូវទទួលការខាតបង់។

រីឯអ្នកគាំទ្រវិញ កំពុងតែទន្ទឹងរង់ចាំ និងនាំគ្នាភ្នាល់ ចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

June 28, 2023

ម្ចាស់កំណត់ត្រា Ronaldo ពេញចិត្តពេលទាត់ចូលទីក្នុងការប្រកួតលើកទី 200 ឱ្យព័រទុយហ្កាល់

(អៀឡង់) – ខ្សែប្រយុទ្ធ Cristiano Ronaldo ឱ្យដឹងថា លោកឆ្លងកាត់ថ្ងៃប្រកួតពិសេស នៅពេលបានទាត់ចូលទីមួយគ្រប់ ជួយឱ្យព័រទុយហ្កាល់ឈ្នះអៀឡង់នៅក្នុងវគ្គជម្រុះរបស់ Euro 2023 ដែលនេះក៏ជាការប្រកួតលើកទី 200 របស់ CR7 សម្រាប់ក្រុមបាល់ទាត់ជម្រើសជាតិ។

មុនពេលបាល់ចាប់ផ្ដើមរមៀល Ronaldo ត្រូវបានស្ថាប័ន Guinness ប្រគល់វិញ្ញាបនបត្របញ្ជាក់ថាជាកីឡាករដែលទាត់ឱ្យក្រុមជម្រើសជាតិបានច្រើនប្រកួតជាងគេក្នុងប្រវត្តិសាស្ត្រ។ CR7 បានបំបែកកំណត់ត្រាចាស់ 196 ប្រកួតរបស់ Bader Al-Mutawa មកពីប្រទេសកូវ៉ែត។ ទស្សនិកជននៅឯកីឡដ្ឋាន Laugardalsvollur របស់អៀឡង់ ក៏នាំគ្នាក្រោកឈរទះដៃអបអរសាទរជូនចំពោះកីឡាករវ័យ 38 ឆ្នាំរូបនេះផងដែរ។

Guinness ប្រគល់វិញ្ញាបនបត្របញ្ជាក់ថា Ronaldo ជាកីឡាករដែលទាត់ឱ្យក្រុមជម្រើសជាតិបានច្រើនប្រកួតជាងគេក្នុងប្រវត្តិសាស្ត្

ក្នុងថ្ងៃនោះដែរ ការសប្បាយរីករាយរបស់ Ronaldo ក៏ត្រូវបានបំពេញបន្ថែម នៅពេលគាត់គឺជាកីឡាករតែម្នាក់គត់ដែលបានទាត់ចូលទីមួយគ្រាប់នៅនាទីទី 89 ជួយឱ្យព័រទុយហ្កាល់ឈ្នះអៀឡង់ 1-0 នៅក្នុងវគ្គជម្រុះរបស់ Euro 2024 ដែលជាការប្រកួតលើកទី 200 របស់ CR7 សម្រាប់ក្រុមជម្រើសជាតិព័រទុយហ្កាល់។

Ronaldo ទាត់ចូលទីមួយគ្រាប់នៅនាទីទី 89 ជួយឱ្យព័រទុយហ្កាល់ឈ្នះអៀឡង់ 1-0 នៅក្នុងវគ្គជម្រុះរបស់ Euro 2024

នៅក្នុងការជួបជុំបន្ទាប់របស់ក្រុមជម្រើសជាតិព័រទុយហ្កាល់ Ronaldo និងមិត្តរួមក្រុមនឹងត្រូវធ្វើជាភ្ញៀវរបស់ស្លូវ៉ាគី នៅថ្ងៃទី 08 កញ្ញា រួចត្រឡប់ទៅកាន់ទីលានម្ចាស់ផ្ទះ Algarve ដើម្បីទទួលក្រុមលុចសំបួនៅបីថ្ងៃក្រោយមក៕

June 21, 2023

UEFA ប្រកាសអំពីម្ចាស់ពានរង្វាន់ «កីឡាករឆ្នើមបំផុតនៅ Champions League»

ក្នុងនាមជាម្ចាស់ជើងឯកបាល់ទាត់ Champions League យើងងាយយល់បានថា ហេតុអ្វីកីឡាកររបស់ Man City ក្លាយជាម្ចាស់ពានរង្វាន់កីឡាឆ្នើមបំផុតប្រចាំព្រឹត្តិការណ៍នេះ។

Man City បានក្លាយជាម្ចាស់ជើងឯកពានរង្វាន់បាល់ទាត់ Champions League ជាលើកដំបូងក្នុងប្រវត្តិសាស្ត្រ បន្ទាប់ពីបានផ្ដួល Inter Milan ដោយលទ្ធផល 1-0 នៅវគ្គផ្ដាច់ព្រ័ត្រកាលពីវេលាទៀបភ្លឺថ្ងៃទី 11 មិថុនា 2023 (ម៉ោងនៅកម្ពុជា)។ នេះគឺជាសមិទ្ធផលដ៏សក្ដិសមសម្រាប់កូនសិស្ស និងគ្រូបង្វឹក Pep Guardiola ក្រោយពីអ្វីដែលពួកគេបានធ្វើនៅក្នុងរដូវកាលនេះ។

មិនយូរប៉ុន្មានបន្ទាប់ពីពានរង្វាន់ជើងឯកបាល់ទាត់ Champions League ត្រូវបានប្រគល់ សហព័ន្ធកីឡាបាល់ទាត់អឺរ៉ុប (UEFA) ក៏បានប្រកាសឈ្មោះម្ចាស់ជ័យលាភី «កីឡាករឆ្នើមបំផុតរបស់ Champions League 2022/2023»។ កំពូលកីឡាករ Erling Haaland ពុំមែនជាអ្នកបានទទួលពានរង្វាន់នេះ បើទោះរកបាន 12 គ្រាប់ឱ្យ Man City។ ពានរង្វាន់នេះបានទៅលើកីឡាករ Rodri (Rodrigo Hernández Cascante)។

Rodri គឺជាអ្នកបានជួយឱ្យ Man City ឈ្នះនៅវគ្គផ្ដាច់ព្រ័ត្រ Champions League។ នេះក៏ជាលើកទីមួយក្នុងប្រវត្តិសាស្ត្រដែល Man City បានក្លាយជាក្រុមបាល់ទាត់ទីពីរនៅអង់គ្លេស ដែលដណ្ដើមបានពានរង្វាន់ជើងឯកចំនួនបីក្នុងមួយរដូវកាល បន្ទាប់ពី Man Utd ដណ្ដើមបានកាលពីឆ្នាំ 1999៕

June 12, 2023

យានអវកាស Dragon បានចូលចតនៅស្ថានីយអវកាសអន្តរជាតិ

យានអវកាសរបស់ SpaceX ដែលដឹកទំនិញឡើងទៅកាន់ស្ថានីយអវកាសអន្តរជាតិ (ISS) បានចូលចតនៅម៉ូឌុល Harmony របស់ ISS កាលពីល្ងាចថ្ងៃទី 06 មិថុនា និងស្ថិតនៅទីនោះប្រហែលបីសប្ដាហ៍ មុនពេលហោះត្រលប់មកកាន់ផែនដី។

យានអវកាស Dragon របស់ក្រុមហ៊ុនអាម៉េរិក SpaceX បានចូលចតនៅស្ថានីអវកាសអន្តរជាតិ ជាមួយនឹងទំនិញជាង 3.5 តោន។ យោងតាមណាសា យាននេះបានចូលចតត្រង់ម៉ូឌុល Harmony របស់ ISS ដោយស្វ័យប្រវត្តិនៅវេលាម៉ោង 05 និង 54 នាទីព្រឹក ថ្ងៃទី 06 មិថុនា ម៉ោងនៅវ៉ាស៊ីងតោន ត្រូវនឹងម៉ោងប្រហែល 17 ល្ងាច ថ្ងៃទី 06 មិថុនានៅកម្ពុជា។

យាន Dragon ត្រូវបានបាញ់បង្ហោះកាលពីថ្ងៃទី 05 មិថុនា ពីមជ្ឈមណ្ឌលអវកាស Kennedy របស់ណាសា នៅ Florida សហរដ្ឋអាម៉េរិក។ នេះគឺជាជើងហោះហើរពាណិជ្ជកម្មលើកទី 28 ដែលធ្វើឡើងទៅតាមកិច្ចសន្យារវាង SpaceX និងណាសា។

តាមគម្រោង យាន Dragon នឹងភ្ជាប់ជាមួយ ISS ក្នុងរយៈពេលប្រហែលបីសប្ដាហ៍ មុននឹងហោះវិលត្រលប់មកកាន់ផែនដី។ ក្នុងបេសកកម្មនេះ Dragon បានដឹកឧបករណ៍ជាច្រើនដែលបម្រើដល់វិស័យវិទ្យាសាស្ត្រ មានជាអាទិ៍ ផ្ទាំងសូឡាជាដើម ទៅឱ្យក្រុមអ្នកអវកាសរបស់សហរដ្ឋអាម៉េរិកដែលកំពុងធ្វើការនៅលើ ISS៕

June 8, 2023

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។

បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។

ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។

តារាងចំណាត់ថ្នាក់របស់ Brand Finance

ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។

បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។

Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕

June 6, 2023

ក្លឹបបាល់ទាត់អេស្បាញ ក្លាយជាជើងឯក Europa League ពេលបានឈ្នះក្លឹបអ៊ីតាលី

(ហុងគ្រី) – គ្រូបង្វឹក Jose Mourinho បានបរាជ័យជាលើកដំបូងនៅវគ្គផ្ដាច់ព្រ័ត្រនៃការប្រកួតដណ្ដើមពានរង្វាន់បាល់ទាត់ Europa League នៅពេល Roma ដែលជាក្រុមបាល់ទាត់របស់ក្លឹបអ៊ីតាលី បានចាញ់ក្រុមរបស់ក្លឹបអេស្បាញ Sevilla 1-4 ក្នុងការទាត់ប៉េណាំងទីម្ដងម្នាក់នៅចុងការប្រកួត។

កីឡាករខ្សែបម្រើពីររូបគឺ Gianluca Mancini និង Roger Ibanez សុទ្ធតែទាត់បាល់មិនបានល្អ ធ្វើឱ្យ Roma ចាញ់ 1-4 នៅក្នុងការទាត់ប៉េណាំងទីម្ដងម្នាក់ ហើយក៏បាត់បង់តំណែងជើងឯក Europa League និងមិនអាចចូលរួមប្រកួតនៅ Champions League រដូវកាលក្រោយ។

កូនសិស្ស និងគ្រូបង្វឹក Mourinho ប្រាកដជាស្ដាយក្រោយខ្លាំងណាស់ នៅពេលធ្វើឱ្យរបូតឱកាសល្អជាច្រើននៅក្នុងតង់ទីមួយ ទីពីរ ក៏ដូចជានៅក្នុងម៉ោងបន្ថែមដែលទទួលបានលទ្ធផល 1-1 មុននឹងចាញ់ 1-4 នៅក្នុងការទាត់ប៉េណាំងទី។

ចំណែក Sevilla វិញ បានបង្ហាញភាពខ្លាំង និងភាពជាអ្នកសម្បូរសមិទ្ធផលជាងគេនៅក្នុងប្រវត្តិ Europa League ដោយការទាត់ប៉េណាំងទីម្ដងម្នាក់បានសម្រេច។ ក្រុមនេះក៏សុទ្ធតែបានឈ្នះនៅក្នុងការប្រកួតផ្ដាច់ព្រ័ត្រទាំង 7 លើកនៅ Europa League បើរាប់ទាំងជ័យជម្នះលើ Roma នៅលើកនេះ។

ជាថ្មីម្ដងទៀត បណ្ដាក្លឹបតំណាងរបស់អេស្ប៉ាញបានបង្ហាញ «អំណាច» របស់ខ្លួននៅទ្វីបអារ៉ុប ដោយសារបានឈ្នះការប្រកួតវគ្គផ្ដាច់ព្រ័ត្រចំនួន 18 លើកជាប់ៗគ្នានៅចំពោះមុខគូប្រកួតមកពីប្រទេសផ្សេងក្នុងទ្វីបនេះ។ បណ្ដាក្រុមបាល់ទាត់របស់អេស្ប៉ាញ ក៏មិនបានចាញ់នៅក្នុងវគ្គផ្ដាច់ព្រ័ត្រចំនួន 23 លើកនៅ Champions League និង Europa League រាប់ចាប់តាំងពីឆ្នាំ 2001។ សមិទ្ធផលនេះនឹងអូសបន្លាយពេលយូរ យ៉ាងហោចក៏ដល់ឆ្នាំ 2024៕

June 1, 2023

Tag: ប្រវត្តិ