ការបង្ហាត់កូនឱ្យមាននិស្ស័យស្រឡាញ់ការអានសៀវភៅ លោកឪពុកអ្នកម្តាយមួយចំនួនប្រហែលជាអាចនឹងគិតថា ជារឿងដែលពិបាកនឹងធ្វើបានណាស់ រឹតតែសម័យនេះមានវត្ថុជន្លចិត្ត បង្អួតភ្នែកផ្សេងៗសម្រាប់កូនតូចច្រើនមែនទែន ដូចជា ទូរទស្សន៍ ហ្គេមកុំព្យូទ័រ អៃភែដ ឬការចេញទៅលេងក្រៅផ្ទះទៀតផងនោះ ទើបការអានសៀវភៅក្លាយជារឿងមួយដែលមិនសូវគួរឱ្យចាប់អារម្មណ៍ប៉ុន្មានឡើយសម្រាប់ក្មេង។ អ្វីដែលរៀបរាប់មកខាងលើ មិនមែនជារឿងមិនល្អនោះទេ អាចរាប់បានថាជារឿងល្អម្នាក់មួយបែប តែយ៉ាងណាក៏ដោយលោកឪពុកអ្នកម្តាយគួរតែបង្ហាត់កូនតូចឱ្យស្រឡាញ់ចូលចិត្តការអានសៀវភៅ ព្រោះការអានសៀវភៅនឹងធ្វើឱ្យកូនមានសមាធិខ្ពស់ ព្រោះនៅពេលកូនអានហើយ កូននឹងត្រូវនាំយកមកហាត់រិះគិតទៀតផងថា អ្វីដែលអានហើយនោះមានន័យយ៉ាងណា សៀវភៅដែលកំពុងអានត្រូវការប្រាប់យើងពីអ្វី?
វិធីបង្ហាត់ឱ្យកូនចូលចិត្តអានសៀវភៅមានច្រើនវិធី ឡារ៉ែន នឹងលើកឧទាហរណ៍មកជម្រាបជូនដូចតទៅ៖
1,អានសៀវភៅឱ្យកូនឃើញញឹកញាប់ កូននឹងធ្វើតាម និងចង់ធ្វើការងារនោះរួមគ្នាជាមួយឪពុកម្តាយ។
2,សាកល្បងសង្កេតមើលថា តើកូនចូលចិត្តសៀវភៅបែបណា ចូររកសៀវភៅបែបដែលកូនចាប់អារម្មណ៍មកឱ្យអាន។
3,ឱ្យកូនអានសៀវភៅឱ្យបានច្រើនប្រភេទ ដូចជា សៀវភៅរឿងនិទាន កីឡា តន្ត្រី និងទស្សនាវដ្តី ឬសារព័ត៌មានជាដើម។
4,ឱ្យកូនអានសៀវភៅឱ្យស្តាប់ ហើយសឹមបង្រៀនពីវិធីគិតថា តើសៀវភៅដែលអាននោះ ផ្តល់ចំណេះដឹងពាក់ព័ន្ធនឹងអ្វី?
5,នាំកូនទៅបណ្ណាគារ ឬកន្លែងលក់សៀវភៅ ឱ្យកូនបានជ្រើសរើសសៀវភៅដែលចូលចិត្តដោយខ្លួនឯង។
6,ប្រើវិធីជន្លបញ្ឆោត បង្កើតលក្ខខណ្ឌជាមួយកូន ដូចជា បើកូនចង់មើលភាពយន្តតុក្កតា1ម៉ោង ប៉ា(ឬម៉ាក់)ឱ្យមើល តែត្រូវប្តូរគ្នាដោយកូនត្រូវអង្គុយអានសៀវភៅរយៈពេល1ម៉ោងវិញដូចគ្នាដែរ។
7,ឱ្យរង្វាន់ អាចជាវត្ថុអ្វីមួយដែលកូនចង់បាន និងដាក់លក្ខខណ្ឌជាមួយកូនថា ត្រូវតែអានសៀវភៅឱ្យបានប៉ុន្មានក្បាលជាដើម។
8,កុំបង្ខំឱ្យកូនអានសៀវភៅ ព្រោះនឹងធ្វើឱ្យកូនតតាំង និងក្លាយជារឿងដែលគេមិនចង់ធ្វើតែម្តង។
9,រកពពួកសៀវភៅរឿងនិទានដែលមានរូបភាពស្អាតៗឱ្យកូនបានមើលតាំងពីនៅតូចៗដើម្បីឱ្យកូនស៊ាំធ្លាប់ និងចូលចិត្តអានសៀវភៅដោយឯកឯង។
ឧទាហរណ៍ដែលរៀបរាប់មកខាងលើអាចនៅមិនទាន់អស់ទេចំពោះវិធីបង្ហាត់កូនឱ្យក្លាយជាអ្នកអាន ព្រោះនៅមានច្រើនទៀតក្នុងការបង្ហាត់ឱ្យកូនចង់អានសៀវភៅដោយខ្លួនឯងនោះ។ ឪពុកម្តាយត្រូវចេះតាមសង្កេតមើលកូនខ្លួនឯងផងថា តើគេចូលចិត្តអ្វី និងមិនចូលចិត្តអ្វីដោយសាកល្បងរិះរកវិធីណាដែលចូលគ្នាជាមួយកូន ហើយបើបានអានសៀវភៅរួមជាមួយគ្នា ទាំងប៉ា ទាំងម៉ាក់ផងនោះ ពិតជាកិច្ចការងារដែលសប្បាយរីករាយ និងមានសេចក្តីសុខខ្លាំងណាស់សម្រាប់កូន៕
