ក្រោយពី ប្រទេសថៃ ប្រកាសគោលនយោបាយលើកទឹកចិត្តសម្រាប់វិស័យរថយន្តអគ្គិសនីកាលពីដើមឆ្នាំ ពេលនេះមានក្រុមហ៊ុនធំៗជាច្រើនកំពុងតែផ្ដោតលើការដំឡើងរថយន្តអគ្គិសនី ការផលិតថ្មផ្ទុកអគ្គិសនី និងការសាងសង់ស្ថានីយបញ្ចូលថាមពលថ្មអគ្គិសនីសម្រាប់រថយន្តអគ្គិសនីនៅប្រទេសនេះ។
គោលនយោបាយលើកទឹកចិត្តដែលរួមមាន ការកាត់បន្ថយអត្រាពន្ធ ការបង្កើនជំនួយដល់អ្នកប្រើប្រាស់ និងអ្នកផលិតជាដើមខាងលើនេះរបស់ ប្រទេសថៃ កំពុងតែទាក់ទាញការវិនិយោគទាំងក្នុង និងក្រៅប្រទេស។ ក្នុងនោះ ក្រុមហ៊ុនប្រេងឥន្ធនៈជាតិរបស់ ប្រទេសថៃ (PTT) ក៏កំពុងតែកំណត់គោលដៅក្លាយជាអ្នកផលិតសំខាន់មួយក្នុងវិស័យឧស្សាហកម្មរថយន្តអគ្គិសនី (EV)។
ប្រធាន និងជានាយកប្រតិបត្តិរបស់ PPT លោក Auttapol Rerkpiboon បានឱ្យដឹងថា បណ្ដាក្រុមហ៊ុនបុត្រសម្ព័ន្ធរបស់ PTT កំពុងជំរុញគម្រោងទាំងឡាយដែលទាក់ទងនឹងរថយន្តអគ្គិសនី ពិសេសគឺជាបណ្ដាគម្រោងដែលមានកិច្ចសហការប្រតិបត្តិជាមួយបណ្ដាក្រុមហ៊ុនបច្ចេកវិទ្យា ដើម្បីអនុវត្តគម្រោងដំឡើងរថយន្តអគ្គិសនី ពង្រីកស្ថានីយបញ្ចូលថាមពល និងផ្ដល់សេវាកម្មជួលរថយន្តអគ្គិសនី។
PTT កំពុងសហការជាមួយ Hon Hai Precision Industry Co, ដែលជាក្រុមហ៊ុនផលិតឧបករណ៍អេឡិចត្រូនិចពហុជាតិ និងមានទីស្នាក់ការកណ្ដាលនៅ កោះតៃវ៉ាន់ និងត្រូវគេស្គាល់ថា Foxconn ដើម្បីបង្កើតរោងចក្រផលិតរថយន្តអគ្គិសនី ដោយមានទុនវិនិយោគចាប់ពី ១ ទៅ ២ ពាន់លានដុល្លារអាម៉េរិក នៅក្នុងតំបន់របៀងសេដ្ឋកិច្ចភាគខាងកើតរបស់ ប្រទេសថៃ។
លោក Auttapol Rerkpiboon និយាយថា មូលដ្ឋាននេះនឹងដើរតួនាទីជួយដល់បណ្ដាក្រុមហ៊ុនបរទេសដែលមានបំណងដំឡើងរថយន្តអគ្គិសនីនៅ ប្រទេសថៃ ជំនួសឱ្យការចំណាយប្រាក់ច្រើនដើម្បីបង្កើតរោងចក្រផលិតរថយន្តអគ្គិសនីយីហោថ្មី។
សកម្មភាពផលិតរថយន្តអគ្គិសនីរបស់ក្រុមហ៊ុន PTT-Foxconn គ្រោងនឹងចាប់ផ្ដើមពីឆ្នាំ ២០២៤ និងអាចដំឡើងបាន ៥ ម៉ឺនគ្រឿងជារៀងរាល់ឆ្នាំ នៅក្នុងឆ្នាំ ២០៣០។
ក្រៅពីការផលិត ឬដំឡើងរថយន្តអគ្គិសនី ក្រុមហ៊ុន PTT ក៏កំពុងតែអភិវឌ្ឍផ្នែកពាណិជ្ជកម្មលើថ្មផ្ទុកអគ្គិសនី តាមរយៈកិច្ចសហការជាមួយបណ្ដាក្រុមហ៊ុនផលិតថ្មអគ្គិសនី ក៏ដូចជាការស្រាវជ្រាវ អភិវឌ្ឍដើម្បីកែលំអបច្ចេកវិទ្យាថ្ម។
PTT នឹងផលិតថ្មសម្រាប់រថយន្តអគ្គិសនី ដោយការប្រើប្រាស់បច្ចេកវិទ្យារបស់ 24M Technologies Inc ដែលជាក្រុមហ៊ុនមួយរបស់ សហរដ្ឋអាម៉េរិក៕
