កិច្ចព្រមព្រៀងដែលត្រូវបានប្រកាសកាលពីថ្ងៃទី 15 វិច្ឆិកា គឺជាការប្រឹងប្រែងប្រកបដោយមហិច្ឆតាមួយរបស់បណ្ដាប្រទេសរីកចម្រើននៅក្នុងការបញ្ចុះបញ្ចូលបណ្ដាប្រទេសកំពុងអភិវឌ្ឍ ឱ្យបោះបង់ប្រភពថាមពលហ្វូស៊ីល ដូចជា រ៉ែប្រេង ធ្យូងថ្មជាដើម ដែលបង្កផលប៉ះពាល់ធ្ងន់ធ្ងរដល់បរិស្ថាន។
នេះគឺជាផ្នែកមួយនៃកិច្ចព្រមព្រៀងហិរញ្ញវត្ថុដែលមានតម្លៃ 20 ពាន់លានដុល្លារអាម៉ែរិក ទាក់ទងនឹងបញ្ហាអាកាសធាតុដែលបណ្ដាប្រទេសអភិវឌ្ឍដូចជា សហរដ្ឋអាម៉េររិក និង ជប៉ុន ជាដើម បានសន្យាជាមួយ ឥណ្ឌូណេស៊ី ជាប្រទេសមួយដែលប្រើប្រាស់ធ្យូងថ្មច្រើនជាងគេក្នុងពិភពលោក ដើម្បីប្ដូរទៅរកថាមពលកកើតឡើងវិញ។ មុនពេលត្រូវបានប្រកាសនៅក្នុងកិច្ចប្រជុំកំពូល G20 នៅ ឥណ្ឌូណេស៊ី ដែលធ្វើឡើងចាប់ពីថ្ងៃទី 15-16 វិច្ឆិកា បណ្ដាប្រទេសពាក់ព័ន្ធបានចរចាគ្នាតាំងពីជាងមួយឆ្នាំមុនមកម្ល៉េះ។
ឥណ្ឌូណេស៊ី បានសន្យាកាត់បន្ថយបរិមាណឧស្ម័នកាបូនដែលបំភាយពីវិស័យផលិតអគ្គិសនីរបស់ខ្លួនឱ្យចុះមកនៅត្រឹម 290 លានតោននៅឆ្នាំ 2030 ដែលនេះគឺជាផ្នែកមួយនៃកិច្ចព្រមព្រៀងខាងលើ។ ប្រការនេះមានន័យថា ការបំភាយឧស្ម័នកាបូនរបស់ ប្រទេសឥណ្ឌូណេស៊ី នឹងឡើងដល់ចំណុចកំពូលលឿនជាង 7 ឆ្នាំ ធៀបនឹងការគ្រោងទុក ហើយចាប់ផ្ដើមការកាត់បន្ថយការប្រើប្រាស់ធ្យូងថ្ម។
ក្រៅពីនេះ ឥណ្ឌូណេស៊ី ក៏ត្រូវសម្រេចបានគោលដៅក្នុងការផលិតអគ្គិសនីពីប្រភពថាមពលបៃតងដូចជា កម្លាំងខ្យល់ និងថាមពលព្រះអាទិត្យជាដើម ពី 11% នាបច្ចុប្បន្ន ឱ្យឡើងដល់ 34% នៅឆ្នាំ 2030។
ឥណ្ឌូណេស៊ី គឺជាប្រទេសដែលបំភាយឧស្ម័នច្រើនជាងគេលំដាប់ទី 9 ក្នុងពិភពលោក នៅឆ្នាំ 2021។ នៅមុនកិច្ចព្រមព្រៀងនេះ បរិមាណអគ្គិសនីដែលផលិតពីធ្យូងថ្មរបស់ ឥណ្ឌូណេស៊ី មានចំនួនរហូតដល់ 60% បើធៀបនឹងបរិមាណអគ្គិសនីសរុបរបស់ប្រទេសនេះ។
យោងតាមកិច្ចព្រមព្រៀង បណ្ដាប្រទេសអ្នកមាននឹងផ្ដល់ប្រាក់កម្ចី ជំនួយ និងវិនិយោគឯកជនសម្រាប់ ឥណ្ឌូណេស៊ី។ នៅចំពោះមុខ ខ្ទង់ប្រាក់ប្រហែល 10 លានដុល្លារអាម៉េរិក នឹងបានពី សហរដ្ឋអាម៉េរិក ជប៉ុន កាណាដា និងប្រទេសមួយចំនួននៅ អឺរ៉ុប រួមមាន អង់គ្លេស បារាំង និង អាល្លឺម៉ង់។ ក្រសួងការបរទេសអាម៉េរិក បញ្ជាក់ថា ថវិកា 10 ពាន់លានដុល្លារផ្សេងទៀតគ្រោងនឹងបានពីក្រុមអ្នកវិនិយោគឯកជន មានដូចជា ធនាគារអាម៉េរិក (Bank of America) និង Citibank ជាដើម។
អ្នកជំនាញផ្នែកប្ដូរផ្លាស់ឥន្ធនៈហ្វូស៊ីល មកពីកម្មវិធី E3G (Third Generation Environmentalism) បានឱ្យដឹងថា បើសិនជាកិច្ចព្រមព្រៀងខាងលើទទួលបានជោគជ័យ វានឹងក្លាយជាគំរូសម្រាប់ពិភពលោក៕
