Category: អន្តរជាតិ

ស្ថានីយអវកាស Tiangong របស់ ចិន ចាប់ផ្ដើមដំណើរការពេញលេញ ពេលយាន Shenzhou 15 បានហោះទៅដល់
រ៉ុក្កែត Long March 2F នាំយានអវកាស Shenzhou រួមនឹងអ្នកអវកាស 3 រូប ពីមជ្ឈណ្ឌលបាញ់បង្ហោះផ្កាយរណប Juiquan នៅតំបន់សមុទ្រខ្សាច់ Gobi នៅវេលាម៉ោង 22 និង 08 នាទី ថ្ងៃទី 29 វិច្ឆិកា (ម៉ោងនៅ កម្ពុជា) ឡើងទៅកាន់ស្ថានីយអវកាសចិន Tiangong។
នៅម៉ោងប្រហែល 22 និង 18 នាទី យានអវកាស Shenzhou 15 ដែលដឹកអវកាសចរ 3 រូប បានផ្ដាច់ខ្លួនពីរ៉ុក្កែត។ អ្នកអវកាស Fei Junlong (ប្រធានក្រុម), Deng Qingming និង Zhang Lu បានចាប់ផ្ដើមចូលចតនៅឯស្ថានីយអវកាស Tiangong នៅវេលាម៉ោង 4 និង 42 នាទី ព្រឹកនេះ។ ម៉ោង 6 និង 33 នាទី ក្រុមអវកាសចរ Shenzhou 14 បានបើកទ្វារទទួលស្វាគមន៍ដំណើរមកដល់របស់ក្រុម Shenzhou 15។ ដូច្នេះ បច្ចុប្បន្ន នៅក្នុងស្ថានីយអវកាស Tiangong របស់ ប្រទេសចិន មានអ្នកអវកាសសរុប 6 នាក់។
បេសកកម្មរបស់ Shenzhou 15 បង្ហាញថា ស្ថានីយអវកាសចិន ចាប់ផ្ដើមដំណើរការពេញលេញ។ ក្រុម Shenzhou 15 នឹងធ្វើការពិសោធជាង 100 ដោយប្រើប្រាស់ទូវិទ្យាសាស្ត្រចំនួន 24 ដែលត្រូវបានរចនាឡើងជាពិសេសនៅក្នុងបណ្ដាម៉ូឌុល Wentian និង Mengtian របស់ស្ថានីយអវកាស Tiangong។
Shenzhou 15 គឺជាបេសកកម្មចុងក្រោយក្នុងចំណោមការបាញ់បង្ហោះចំនួន 11 លើកដើម្បីស្ថាបនាស្ថានីយអវកាស Tiangong ហើយក៏ជាការហោះហើរចុងក្រោយដើម្បីដាក់ឱ្យស្ថានីយនេះដំណើរការពេញលេញ៕
November 30, 2022
សហរដ្ឋអាម៉េរិក អនុម័តការលក់អាវុធតម្លៃ 1 ពាន់លានដុល្លារដល់ កាតា
មន្ទីរបញ្ចកោណ អនុម័តការលក់យន្តហោះគ្មានមនុស្សបើក (UAV) ខ្នាតតូច និងប្រព័ន្ធប្រឆាំងអាវុធប្រភេទនេះក្នុងតម្លៃ 1 ពាន់លានដុល្លារ ទៅឱ្យ ប្រទេសកាតា។
«ការជួញដូរដែលត្រូវបានស្នើឡើងនេះនឹងបង្កើនកម្លាំងរបស់ កាតា នៅក្នុងការទប់ទល់នឹងការគំរាមកំហែងនាបច្ចុប្បន្ន និងអនាគត ដោយមានការផ្ដល់នូវសមត្ថភាពបាញ់ទម្លាក់យន្តហោះគ្មានមនុស្សបើក ដោយប្រើប្រាស់ទាំងកម្លាំងនៃចលនវត្ថុ ទាំងអេឡិចត្រូនិច» ការិយាល័យសហការផ្នែកសន្តិសុខការពារជាតិ (DSCA) នៃ ក្រសួងការពារជាតិអាម៉េរិក ប្រកាសកាលពីថ្ងៃទី 29 វិច្ឆិកាដូច្នេះ។
ក្រសួងការបរទេសអាម៉េរិក មុននោះ បានអនុម័តការលក់អាវុធខាងលើទៅឱ្យ កាតា ហើយ DSCA បានបញ្ជូនសំណើនេះឡើងទៅកាន់ សភាអាម៉េរិក ដើម្បីអនុម័តបន្ត។
«ការចំណាយសរុបនៃកម្មវិធីនេះគឺ 1 ពាន់លានដុល្លារអាម៉េរិក។ ការជួញដូរដែលបានស្នើឡើងនឹងជួយគាំទ្រដល់គោលនយោបាយការបរទេស និងគោលដៅសន្តិសុខជាតិរបស់ សហរដ្ឋអាម៉េរិក តាមរយៈការលើកកម្ពស់សន្តិសុខរបស់ប្រទេសស្និទ្ធស្នាលមួយ» DSCA អះអាងបន្ថែម។
ការជួញដូរអាវុធដែល សហរដ្ឋអាម៉េរិក កំពុងអនុម័តសម្រាប់ កាតា មានយន្តហោះ UAV ខ្នាតតូច Coyote Block 2 ចំនួន 200 គ្រឿង រួមនឹងបណ្ដាទម្ររបស់ប្រព័ន្ធ Coyote, ប្រព័ន្ធប្រយុទ្ធអេឡិចត្រូនិចប្រឆាំងអាវុធគ្មានមនុស្សបើកបរ (CUAEWS) និងឧបករណ៍ពាក់ព័ន្ធ។
ក្រៅពីនេះ ការជួញដូរអាវុធខាងលើក៏មានទាំងប្រព័ន្ធប្រឆាំង UAV FS-LIDS ដែលមានសមត្ថភាពស្វែងរកឃើញ UAV ខ្នាតតូច ហោះទាប និងយឺត រួមនឹងការបែងចែកប្រភេទ និងចាប់ទម្លាក់ដោយប្រើប្រាស់អេឡិចត្រូនិចផងដែរ។
ប្រកាសរបស់ DSCA ត្រូវបានធ្វើឡើងក្រោយពីក្រុម Houthi នៅ Yemen ដែលគាំទ្រដោយ អ៊ីរ៉ង់ ត្រូវបានចោទប្រកាន់ជាច្រើនលើកថា បានប្រើប្រាស់ UAV វាយប្រហារលើគោលដៅនានានៅ តំបន់ឈូងសមុទ្រពែក្ស៕
November 30, 2022
កូរ៉េខាងត្បូង គំរាមចាត់វិធានការមិនធ្លាប់មាន បើសិន កូរ៉េខាងជើង សាកល្បងអាវុធនុយក្លេអែរ
កូរ៉េខាងត្បូង បានព្រមានថា កូរ៉េខាងជើង នឹងប្រឈមមុខនឹងប្រតិកម្ម «មិនធ្លាប់មាន» បើសិនប្រទេសនេះសាកល្បងអាវុធនុយក្លេអែរ និងបានស្នើឱ្យ ទីក្រុងប៉េកាំង «កែប្រែឥរិយាបថ» របស់ ទីក្រុងព្យុងយ៉ាង។
ការសាកល្បងអាវុធនុយក្លេអែរលើកទី 7 នឹងជាសកម្មភាពខ្វះភាពឆ្លាតវៃដ៏ធ្ងន់ធ្ងររបស់ កូរ៉េខាងជើង» ប្រធានាធិបតីកូរ៉េខាងត្បូង លោក Yoon Suk-yeol បានថ្លែងប្រាប់ Reuters កាលពីម្សិលមិញដូច្នេះ។
នៅពេលត្រូវបានសួរថា កូរ៉េខាងត្បូង និងសម្ព័ន្ធមិត្តនឹងធ្វើអ្វី បើសិន កូរ៉េខាងជើង ធ្វើការសាកល្បងអាវុធនុយក្លេអែរថ្មី លោក Yoon ប្រកាសថា ប្រតិកម្មតបនឹងជា «រឿងមិនធ្លាប់បានឃើញក្នុងអតីតកាល» ប៉ុន្តែលោកមិនបានលើកឡើងលម្អិត។
«យើងត្រូវតែបញ្ចេញប្រតិកម្មឱ្យបានស៊ីចង្វាក់គ្នា និងស្របគ្នា» លោក Yoon បញ្ជាក់ និងបន្ថែមថា កង្វះភាពស៊ីចង្វាក់គ្នារបស់សហគមន៍អន្តរជាតិបានធ្វើគោលនយោបាយទាក់ទិននឹង កូរ៉េខាងជើង មិនមានប្រសិទ្ធភាពអស់រយៈពេល 3 ទសវត្សរ៍មកហើយ។
ប្រធានាធិបតីកូរ៉េខាងត្បូង លោក Yoon Suk-yeol
យោងតាមលោក Yoon ប្រទេសចិន មិនត្រឹមតែមានការទទួលខុសត្រូវនោះទេ តែក៏មានលទ្ធភាពអាចបញ្ចេញឥទ្ធិពលលើឥរិយាបថរបស់ កូរ៉េខាងជើង ក្រោយពី ទីក្រុងព្យុងយ៉ាង ធ្វើការសាកល្បងមីស៊ីលជាបន្តបន្ទាប់។
ភាគីខាង ប្រទេសចិន និង កូរ៉េខាងជើង មិនទាន់មានប្រតិកម្មអ្វីនៅឡើយ ទាក់ទងនឹងការការព្រមាន ក៏ដូចជាការអះអាងរបស់ ប្រធានាធិបតិកូរ៉េខាងត្បូង៕
November 29, 2022
ដើម្បីអបអរជ័យជម្នះនៅ World Cup 2022 អ៊ីរ៉ង់ ដោះលែងអ្នកទោសច្រើនរយនាក់
រដ្ឋមន្ត្រីក្រសួងយុត្តិធម៌អ៊ីរ៉ង់ ចុះហត្ថលេខាលើបទបញ្ជាដោះលែងអ្នកទោសជាង 700 នាក់នៅទូទាំងប្រទេស ក្រោយពីក្រុមបាល់ទាត់ជម្រើសជាតិរបស់ប្រទេសនេះយកឈ្នះ 2-0 លើក្រុមមកពី រាជាណាចក្រវ៉ែលស៍ (Wales) នៅ World Cup 2022។
«ក្រោយជ័យជម្នះប្រកបដោយមោទកភាពរបស់ក្រុមបាល់ទាត់ជម្រើសជាតិ រដ្ឋមន្ត្រីក្រសួងយុត្តិធម៌ Gholam Hossein Mohseni Ejei បានចូលរួមអបអរជាមួយប្រជាជនទូទាំងប្រទេស និងចុះហត្ថលេខាលើបទបញ្ជាពិសេស ស្នើឱ្យក្រុមមន្ត្រីយុត្តិធម៌ជួយដល់អ្នកទោសដែលមានលក្ខខណ្ឌគ្រប់គ្រាន់សម្រាប់ការលើកលែងទោស ដោះលែងឱ្យមានសេរីភាពត្រលប់ទៅកាន់គ្រួសារ» ទីភ្នាក់ងារសារព័ត៌មាន Mizan ដែលមានទំនាក់ទំនងជាមួយនឹង ក្រសួងយុត្តិធម៌អ៊ីរ៉ង់ ប្រកាសកាលពីម្សិលមិញដូច្នេះ។
សារព័ត៌មានអ៊ីរ៉ង់ ឱ្យដឹងថា អ្នកទោសប្រហែល 715 នាក់នៅក្នុង 12 ខេត្តរបស់ប្រទេសនេះ ត្រូវបានដោះលែង ក្នុងនោះមានទាំងអ្នកទោសដែលត្រូវបានចាប់ខ្លួន «ក្នុងព្រឹត្តិការណ៍ថ្មីៗនេះ» ដែលនេះហាក់សំដៅលើបាតុកម្មដែលបានផ្ទុះឡើងក្រោយពីការស្លាប់របស់នារី Mahsa Amini កាលពីខែកញ្ញា។
ជ័យជម្នះ 2-0 លើ រាជាណាចក្រវ៉ែលស៍ កាលពីថ្ងៃទី 25 វិច្ឆិកា គឺជាលើកដំបូងដែល អ៊ីរ៉ង់ បានយកឈ្នះលើក្រុមជម្រើសជាតិមកពី អឺរ៉ុប នៅក្នុងប្រវត្តិសាស្ត្រ World Cup។
អ៊ីរ៉ង់ បានចាញ់ 2-6 នៅក្នុងការប្រកួតជាមួយនឹង អង់គ្លេស កាលពីថ្ងៃទី 21 វិច្ឆិកា។ ក្រុមជម្រើសជាតិអ៊ីរ៉ង់ ក៏រងការខាតបង់ធំក្រោយការប្រកួតនោះ នៅពេលអ្នកចាំទីសំខាន់ Alireza Beiranvand ត្រូវបាក់ក្ដោងច្រមុះដោយសារការប៉ះទង្គិចជាមួយនឹងកីឡាកររួមក្រុមក្នុងពេលទប់ស្កាត់បាល់។
អ៊ីរ៉ង់ កំពុងមានឱកាសជាលើកដំបូងដើម្បីចូលទៅកាន់វគ្គជម្រុះផ្ទាល់។ ក្រុមជម្រើសជាតិប្រទេសនេះកំពុងស្ថិតនៅចំណាត់ថ្នាក់ទីពីរក្នុងពូល B ហើយនឹងត្រូវប្រកួតជាមួយ សហរដ្ឋអាម៉េរិក នៅជុំចុងក្រោយ៕
November 29, 2022
យន្តហោះបុកចំបង្គោលខ្សែភ្លើង ធ្វើឱ្យរដ្ឋធានីរបស់ អាម៉េរិក ដាច់អគ្គិសនីទ្រង់ទ្រាយធំ
យន្តហោះធុនតូចហោះទៅបុកចំបង្គោលខ្សែភ្លើងនៅក្នុងរដ្ឋ Maryland បណ្ដាលឱ្យប្រជាជនជាង 120,000 គ្រួសារនៅ រដ្ឋធានីវ៉ាស៊ីងតោន ត្រូវដាច់ចរន្តអគ្គិសនី។
យន្តហោះម៉ាស៊ីនតែមួយ Mooney M20J ហោះបុកចំបង្គោលខ្សែភ្លើងតង់ស្យុងខ្ពស់នៅតំបន់ Montgomery ក្នុងរដ្ឋ Maryland របស់ សហរដ្ឋអាម៉េរិក កាលពីល្ងាចថ្ងៃទី 27 វិច្ឆិកា (ព្រឹកថ្ងៃទី 28 វិច្ឆិកានៅ កម្ពុជា) នៅក្នុងពេលអាកាសធាតុចុះអ័ព្ទខ្លាំង។
រូបភាពនៅកន្លែងកើតហេតុបង្ហាញថា យន្តហោះត្រូវជាប់នៅកណ្ដាលគ្រោងសសរ និងខ្សែភ្លើងតង់ស្យុងខ្ពស់ដែលមានកម្ពស់ជាង 30 ម៉ែត្រ។
ក្រុមហ៊ុនអគ្គិសនី Pepco បានឱ្យដឹងថា អតិថិជនប្រមាណ 120,000 នៅក្នុង រដ្ឋធានីវ៉ាស៊ីងតោន ត្រូវដាច់ចរន្តអគ្គិសនីដោយសារតែហេតុការណ៍គ្រោះថ្នាក់នេះ។ ផ្លូវជាច្រើនត្រូវបិទទ្វារ ស្របពេលដែលភ្លើងចរាចរណ៍ក្នុងតំបន់កើតហេតុត្រូវផ្អាកដំណើរការ។
ក្រុមមន្ត្រីនិយាយថា មនុស្សពីរនាក់នៅលើយន្តហោះនៅមានជីវិតនៅឡើយ និងបានជាប់គាំងក្នុងរយៈពេលយូរ ប៉ុន្តែមិនបានឱ្យដឹងលម្អិត។
អាជ្ញាធរគ្រប់គ្រងអាកាសចរណ៍អាម៉េរិក (FAA) បានឱ្យដឹងថា យន្តហោះ M20J ចេញដំណើរពី Westchester ក្នុងរដ្ឋ New York ហើយគ្រោងនឹងចុះចតនៅឯព្រលានយន្តហោះ Montgomery ក្បែរកន្លែងកើតហេតុ៕
November 28, 2022
អាជ្ញាធរចិនប្រកាសអាសន្នកម្រិតខ្ពស់បំផុត ស្ដីពីរលកត្រជាក់នៅសប្ដាហ៍នេះ
ប្រទេសចិន បានប្រកាសអាសន្នស្ដីពីរលកត្រជាក់ឡើងដល់ពណ៌ទឹកក្រូច ដែលជាកម្រិតធ្ងន់ធ្ងរបំផុតក្នុងចំណោម 3 កម្រិត គ្រាដែលរដូវត្រជាក់ត្រូវបានព្យាករថានឹងប៉ះពាល់ដល់ខេត្ត និងក្រុងជាង 20 ដោយសីតុណ្ហភាពអាចថយចុះជាង 20 អង្សាសេ។
ក្រោយរយៈពេលមួយថ្ងៃ បន្ទាប់ពីបានប្រកាសអាសន្នស្ដីពីរលកត្រជាក់ពណ៌លឿង ដែលជាកម្រិតទី 2 ក្នុងចំណោម 3 កម្រិត រួមមានពណ៌ខៀវ លឿន និងទឹកក្រូច ស្ថានីយឧតុនិយមជាតិចិន បានដំឡើងកម្រិតនៃការប្រកាសអាសន្នឡើងខ្ពស់បំផុត ពោលគឺពណ៌ទឹកក្រូច នៅទូទាំងប្រទេសកាលពីម៉ោង 6 ល្ងាចថ្ងៃទី 27 វិច្ឆិកា និងម៉ោង 6 ព្រឹកថ្ងៃទី 28 វិច្ឆិកា (ម៉ោងក្នុងស្រុង)។
យោងតាម ស្ថានីយឧតុនិយមចិន រលកត្រជាក់នេះនឹងប៉ះពាល់ដល់ទឹកដីស្ទើរតែទាំងអស់របស់ ប្រទេសចិន បង្កឱ្យមានអាកាសធាតុត្រជាក់ខ្លាំង ខ្យល់ខ្លាំង ធូលីខ្សាច់ និងភ្លៀងព្រឹលទ្រង់ទ្រាយធំ។ សីតុណ្ហភាពនៅតំបន់ភាគខាងជើង កណ្ដាល និងភាគខាងកើតរបស់ ប្រទេសចិន នឹងថយចុះចាប់ពី 10 ដល់ 16 អង្សាសេ ហើយក៏មានតំបន់ខ្លះថយចុះ 18 អង្សាសេ និងជាង 20 អង្សាសេក៏មាន។ ខេត្តក្រុង និងតំបន់ស្វយ័តជាង 20 របស់ប្រទេសនេះនឹងរងផលប៉ះពាល់ដោយសារអាកាសធាតុត្រជាក់លឿន និងខ្លាំងក្នុងលើកនេះ។
អំពីពេលវេលាដែលអាកាសធាតុចុះត្រជាក់ លោក Hu Xiao អ្នកវិភាគផ្នែកឧតុនិយមរបស់បណ្ដាញអាកាសធាតុចិន ឱ្យដឹងថា សីតុណ្ហភាពនឹងថយចុះដល់កម្រិតទាបបំផុតនៅក្នុងតំបន់ភាគខាងជើងប្រទេសចិន ចាប់ពីថ្ងៃទី 29 ដល់ 30 វិច្ឆិកា ខណៈដែលភាគខាងត្បូងនឹងចាប់ផ្ដើមពីថ្ងៃទី 01 ដល់ទី 02 ធ្នូខាងមុខ៕
November 28, 2022
អ្នកគាំទ្រស៊ិចស៊ីបំផុតនៅ World Cup Qatar 2022 រងការរិះគន់
តារាបង្ហាញម៉ូដរបស់ ក្រូអាត Ivana Knoll រងការរិះគន់ថា មិនបានគោរពចំពោះប្រពៃណី ទំនៀមទម្លាប់របស់ ប្រទេសកាតា នៅពេលបង្ហោះវីដេអូមួយដែលក្នុងនោះបង្ហាញថា នាងស្លៀកពាក់ឈុតហែលទឹកយ៉ាងស៊ិចស៊ី ដើរនៅលើដងផ្លូវតាមបណ្ដោយឆ្នេរសមុទ្រ។
Ivana Knoll គឺជាតារាបង្ហាញម៉ូដដ៏ល្បីឈ្មោះមួយរូបនៅ ក្រូអាត និងមានអ្នកតាមដានជាង 650,000 នាក់នៅលើ Instagram ហើយនាងក៏ជាអ្នកគាំទ្របាល់ទាត់ដ៏ខ្លាំងក្លាម្នាក់ផងដែរ។ នាងមកកាន់ កាតា ដើម្បីគាំទ្រក្រុមជម្រើសជាតិរបស់ ក្រូអាត នៅ World Cup 2022។ តារាម៉ូដែលរូបនេះក៏ធ្លាប់បានទៅកាន់ ប្រេស៊ីល ក្នុងឆ្នាំ 2014 និង រុស្ស៊ី ឆ្នាំ 2018 នៅពេល World Cup ត្រូវបានប្រារព្ធឡើងនៅប្រទេសទាំងនេះ។ ដូច្នេះហើយបានជា Ivana Knoll ត្រូវបានអ្នកយកព័ត៌មានផ្ដល់រហ័សនាមថា «អ្នកគាំទ្រ World Cup ស៊ិចស៊ីបំផុត»។
កាលពីថ្ងៃទី 24 វិច្ឆិកា Knoll បានបង្ហោះវីដេអូមួយនៅលើ Instagram ដែលក្នុងនោះនាងស្លៀកឈុតហែលទឹកក្រឡាការ៉ូពណ៌ក្រហមលាយស ដើរលើដងផ្លូវមួយតាមបណ្ដោយឆ្នេរសមុទ្រនៅ ប្រទេសកាតា។ សកម្មភាពរបស់ Knoll បន្ទាប់មកក៏ត្រូវរងការរិះគន់ពីអ្នកលេងបណ្ដាញសង្គម។ គណនីមួយបញ្ចេញមតិថា «ពិតជាគួរឱ្យអាម៉ាស។ ចូរគោរពដល់ប្រពៃណី ទំនៀមទម្លាប់របស់ប្រទេសដទៃផង»។
https://www.youtube.com/watch?v=oYiNsr0S17Q
«នាងកំពុងស្ថិតនៅ ប្រទេសកាតា មិនមែន ក្រូអាត ទេ។ នាងត្រូវគោរពការកំណត់នានា នេះគឺជាប្រទេសអ៊ីស្លាម» គណនីមួយទៀតសរសេរបញ្ចេញមតិដូច្នេះ។
យោងតាមទំព័រ Mirror តារាម៉ូដែល Knoll ប្រហែលជានឹងត្រូវបានក្រុមមន្ត្រីរបស់ កាតា ទាក់ទងដើម្បីសួរនាំ។ មុនពេល World Cup ត្រូវបានសម្ពោធបើកការប្រកួតកាលពីថ្ងៃទី 20 វិច្ឆិកា ក្រុមមន្ត្រីរបស់ កាតា បានព្រមានថា ភ្ញៀវ ទាំងបុរស ទាំងស្ត្រី គួរតែគោរពវប្បធម៌របស់ប្រទេសនេះ ចៀសវាងការស្លៀកពាក់ស៊ិចស៊ីហួសហេតុនៅទីសាធារណៈ។ ពួកគេណែនាំថា ភ្ញៀវគួរតែស្លៀកពាក់ឱ្យបានជិតស្មា និងក្បាលជង្គង់។
ក្រោយការប្រកួតជាមួយ ម៉ារ៉ុក ដែលទទួលបានលទ្ធផល 0-0 ក្រុមក្រូអាត នៅ World Cup នឹងបន្តការប្រកួតនៅថ្ងៃទី 27 វិច្ឆិកា ដោយប៉ះនឹងក្រុមរបស់ កាណាដា។ ការប្រកួតចុងក្រោយរបស់ ក្រូអាត នៅក្នុងវគ្គជម្រុះនឹងធ្វើឡើងនៅថ្ងៃទី 01 ធ្នូ ដោយត្រូវជួបក្រុមជម្រើសជាតិរបស់ បែលហ្ស៊ិក៕
November 27, 2022
សហរដ្ឋអាម៉េរិក ហាមឃាត់ការលក់ឧបករណ៍ទូរគមនាគមន៍របស់ក្រុមហ៊ុនចិន Huawei និង ZTE
សហរដ្ឋអាម៉េរិក បានដាក់ក្រុមហ៊ុន Huawei និង ZTE ទៅក្នុងបញ្ជីស្ដីពីក្រុមហ៊ុនដែលត្រូវបានចាត់ទុកថាជាការគំរាមកំហែងដល់ប្រទេសនេះ និងហាមការផ្ដល់អាជ្ញាប័ណ្ណ ក៏ដូចជាការនាំចូល ឬលក់ផលិតផលរបស់ក្រុមហ៊ុនទាំងនេះ។
ក្រុមមន្ត្រីអាម៉េរិក កាលពីថ្ងៃទី 25 វិច្ឆិកា បានប្រកាសអំពីបទបញ្ជាហាមនាំចូល ឬលក់ឧបករណ៍ទំនាក់ទំនងដែល អាម៉េរិក ចាត់ទុកថាជា «ហានិភ័យមិនអាចទទួលយកបានសម្រាប់សន្តិសុខជាតិ» ក្នុងនោះក៏មានផលិតផលរបស់ក្រុមហ៊ុនចិន Huawei និង ZTE ផងដែរ។
ក្រុមហ៊ុនចិនទាំងពីរនេះ សុទ្ធតែស្ថិតក្នុងបញ្ជីឈ្មោះស្ដីពីបណ្ដាក្រុមហ៊ុនដែលត្រូវ គណៈកម្មការទូរគមនាគមន៍សហរដ្ឋអាម៉េរិក (FCC) ចាត់ទុកជាការគំរាមកំហែង។ បទបញ្ជាថ្មីក៏ហាមការផ្ដល់អាជ្ញាប័ណ្ណនៅ សហរដ្ឋអាម៉េរិក ចំពោះបណ្ដាឧបករណ៍របស់ Huawei និង ZTE នៅក្នុងអនាគត។
នេះគឺជាឥរិយាបថថ្មីបំផុតនៅក្នុងសកម្មភាពផ្លូវច្បាប់ ដើម្បីកាត់បន្ថយសិទ្ធិរបស់បណ្ដាក្រុមហ៊ុនចិន ក្នុងការវាយលុកទីផ្សារទូរគមនាគមន៍នៅ សហរដ្ឋអាម៉េរិក។ ការសម្រេចចិត្តខាងលើនេះត្រូវបានលើកឡើងនៅពេលស្ថានការណ៍នយោបាយ និងពាណិជ្ជកម្មរបស់ ចិន និង អាម៉េរិក កំពុងជាប់គាំង។
អាជ្ញាធររបស់ ប្រទេសចិន មិនទាន់មានប្រតិកម្មឆ្លើយតបនៅឡើយ ទាក់ទិននឹងបទបញ្ជាថ្មីខាងលើរបស់ សហរដ្ឋអាម៉េរិក។
កាលពីឆ្នាំ 2019 សហរដ្ឋអាម៉េរិក បានបញ្ចូលក្រុមហ៊ុន Huawei ទៅក្នុងបញ្ជីខ្មៅ និងហាមក្រុមហ៊ុនអាម៉េរិក រកស៊ីជាមួយ ក្រុមហ៊ុនចិនមួយនេះ។ ជាលទ្ធផល ផ្នែកផលិតទូរស័ព្ទរបស់ Huawei ហាក់ស្ទើរតែក្ស័យធន ដោយប្រាក់ចំណូលរបស់ក្រុមហ៊ុននេះធ្លាក់ចុះយ៉ាងគំហុក៕
November 26, 2022
រូបភាពពីផ្កាយរណបបង្ហាញថា «អ៊ុយក្រែន កំពុងស្ថិតក្នុងភាពងងឹត»
ទឹកដីភាគច្រើនរបស់ ប្រទេសអ៊ុយក្រែន កំពុងស្ថិតក្នុងភាពងងឹត ដោយសារតែបញ្ហាដាច់ចរន្តអគ្គិសនី បន្ទាប់ពីរងការវាយប្រហារតាមផ្លូវអាកាសកាលពីថ្ងៃទី 23 វិច្ឆិកា ពី រុស្ស៊ី។
ទីភ្នាក់ងារអវកាសអាម៉េរិក (NASA) ថ្ងៃទី 24 វិច្ឆិកា បានបញ្ចេញរូបថតពីផ្កាយរណបស្ដីពីតំបន់អឺរ៉ុបខាងកើត នៅក្នុងយប់នោះ ដែលបង្ហាញថា ទឹកដីភាគច្រើនរបស់ អ៊ុយក្រែន ស្ថិតក្នុងភាពងងឹត ក្នុងពេលដែលបណ្ដាប្រទេសនៅជុំវិញ នៅតែភ្លឺនាពេលរាត្រី។
នៅ ប្រទេសអ៊ុយក្រែន មានតែតំបន់មួយចំនួនតូចប៉ុណ្ណោះដែលមានភ្លឺបំភ្លឺ ដូចជា រដ្ឋធានីកៀវ និងទីក្រុង Lviv, Zhytomyr នៅភាគខាងលិច និង Odessa នៅភាគខាងត្បូង ប៉ុន្តែ កម្រិតពន្លឺបានថយចុះច្រើនដងធៀបនឹងដំណាក់កាលមុនសង្គ្រាម។ នៅឯតំបន់ភាគខាងកើតរបស់ អ៊ុយក្រែន ជាទីដែលកំពុងមានការប្រយុទ្ធគ្នាយ៉ាងខ្លាំងក្លា ហាក់មិនមានពន្លឺទាល់តែសោះ។
ក្រុមមន្ត្រីអ៊ុយក្រែន ឱ្យដឹងថា កងទ័ពរុស្ស៊ី បានបាញ់មីស៊ីលមានប្រព័ន្ធនាំផ្លូវ សំដៅលើហេដ្ឋារចនាសម្ព័ន្ធនៅ រដ្ឋធានីកៀវ និងទីក្រុងជាច្រើនរបស់ អ៊ុយក្រែន កាលពីរសៀលថ្ងៃទី 23 វិច្ឆិកា។
Ukrenergo ដែលជាក្រុមហ៊ុនគ្រប់គ្រងបណ្ដាញអគ្គិសនីជាតិរបស់ អ៊ុយក្រែន បានឱ្យដឹងថា 50% នៃតម្រូវការប្រើប្រាស់អគ្គិសនី មិនទាន់ត្រូវបានឆ្លើយតបនៅឡើយ នៅព្រលប់ថ្ងៃទី 24 វិច្ឆិកា។
60% ក្នុងចំណោមប្រជាពលរដ្ឋសរុប 3 លាននាក់នៅ រដ្ឋធានីកៀវ នៅតែស្ថិតក្នុងស្ថានភាពដាច់ចរន្តអគ្គិសនី។ តំបន់ផ្សេងទៀតនៅ អ៊ុយក្រែន ក៏រងផលប៉ះពាល់ដូចគ្នានេះដែរ៕
November 25, 2022
កម្រងរូបថតបង្ហាញអំពីការរីកចម្រើនយ៉ាងរហ័សរបស់ម្ចាស់ផ្ទះ World Cup 2022
ប្រទេសកាតា ដ៏តូចច្រឡឹងនៅ មជ្ឈិមបូព៌ា បានឆ្លងកាត់ពេលវេលាដ៏វែងឆ្ងាយចាប់ពីពេលដណ្ដើមបានឯករាជ្យកាលពីឆ្នាំ 1971 មុននឹងទទួលបានវឌ្ឍនភាពដ៏អស្ចារ្យដូចសព្វថ្ងៃ។ ពេលនេះ កាតា កំពុងទទួលបានចំណាត់អារម្មណ៍របស់ពិភពលោក នៅពេលរៀបចំព្រឹត្តិការណ៍ World Cup 2022។
ក្នុងប៉ុន្មានឆ្នាំកន្លងមកនេះ កាតា សុទ្ធតែស្ថិតក្នុង top 5 ស្ដីពីបណ្ដាប្រទេសដែលមាន GDP/មនុស្សម្នាក់ ខ្ពស់ជាងគេលើពិភពលោក។ ប៉ុន្តែ កាលពី 50 ឆ្នាំមុន កាតា គ្រាន់តែជាទឹកដីមួយដែលមានសភាពសោះកក្រោះ ហើយសេដ្ឋកិច្ចក៏អន់ជាងគេនៅក្នុងតំបន់មជ្ឈិមបូព៌ា។
បច្ចុប្បន្ន កាតា គឺជាប្រទេសមួយក្នុងចំណោមប្រទេសនាំចេញប្រេងឆៅលំដាប់កំពូលរបស់ពិភពលោក ក្នុងនោះ មូលនិធិជាតិវិនិយោគ (ដែលហៅថា ក្រុមប្រឹក្សាវិនិយោគតាកា) មានតម្លៃរហូតដល់ជាង 85 ពាន់លានដុល្លារអាម៉េរិក នេះបើតាម CNN Money។
ពេលនេះ កាតា គឺជាទីស្នាក់ការរបស់បណ្ដាក្រុមហ៊ុនប្រេងខ្នាតធំបំផុតរបស់ប្រទេស និងមានប្រជាជនជិត 2.4 លាននាក់។ កាតា បាន និងកំពុងរីកចម្រើនយ៉ាងឆាប់រហ័ស។
ខាងក្រោមគឺជាកម្រងរូបថតស្ដីពី កាតា ក្នុងអតីតកាល និងបច្ចុប្បន្នកាល ៖
រាជធានីរបស់ កាតា កាលពីឆ្នាំ 1977
រាជធានីដូហា របស់ កាតា នាបច្ចុប្បន្ន
សណ្ឋាគារ Sheraton Grand Doha Resort និង Convention ក្នុងអំឡុងទសវត្សរ៍ឆ្នាំ 1970
បច្ចុប្បន្ន នៅក្បែរ Sheraton មានអគារកប់ពពកច្រើនស្ទើររាប់មិនអស់
រូបថតចាស់ស្ដីពីតំបន់រាជវាំងរបស់ស្ដេច Sheikh Abdullah bin Jassim Al Thani
បច្ចុប្បន្ន រាជវាំងខាងលើត្រូវបានហ៊ុមព័ទ្ធដោយសារមន្ទីរជាតិ NMoQ
ផ្លូវ Al Kahraba នៅតំបន់ Msheireb របស់ Doha កាលពីអតីតកាល
ទិដ្ឋភាពមជ្ឈមណ្ឌលពាណិជ្ជកម្មទំនើបបច្ចុប្បន្នរបស់តំបន់ ផ្លូវ Al Kahraba
តំបន់ផ្សារហាលថ្ងៃមួយរបស់ ដូហា កាលពីឆ្នាំ 1977
តំបន់ពាណិជ្ជកម្ម Porto Arabia បច្ចុប្បន្ន
នៅកណ្ដាលរូបថត គឺជាសារមន្ទីរជាតិកាតា កាលពីឆ្នាំ 1977 ហើយជុំវិញគឺជាសំណង់បុរាណមួយដែលកំពុងទ្រុឌទ្រោម
សារមន្ទីរសិល្បៈអ៊ីស្លាមកាតា នាបច្ចុប្បន្ន
រាជវាំងរបស់ កាតា កាលពីឆ្នាំ 1971
រាជវាំង Emiri Diwan បច្ចុប្បន្ន
វិមាននាឡិកានៅ មជ្ឈមណ្ឌលឧស្សាហកម្មរបស់ ដូហា កាលពីឆ្នាំ 1971
ទិដ្ឋភាពជុំវិញវិមាននាឡិកា នាបច្ចុប្បន្ន
November 24, 2022