អន្តរជាតិ - La Reine Media

រកឃើញពិភពចំនួនពីរក្នុងតំបន់អាចរស់នៅបាន និងស្ថិតនៅមិនឆ្ងាយពីផែនដី

ពិភពទាំងពីរដែលទើបត្រូវបានរកឃើញនេះ មានម៉ាសប៉ុននឹងផែនដី និងវិលយ៉ាងលឿនជុំវិញផ្កាយក្រហម GJ 1002 ដែលមានចម្ងាយ 16 ឆ្នាំពន្លឺពីប្រព័ន្ធព្រះអាទិត្យរបស់មនុស្ស។

ក្រុមអ្នកវិទ្យាសាស្ត្របានរកឃើញពិភពខាងក្រៅប្រព័ន្ធព្រះអាទិត្យចំនួន 2 ដែលអាចរស់នៅបាន កំពុងវិលជុំវិញផ្កាយមេរបស់ពួកវាដែលមានឈ្មោះថា GJ 1002។ ពួកវាមានចម្ងាយពីផែនដីត្រឹមតែ 16 ឆ្នាំពន្លឺប៉ុណ្ណោះ និងមានម៉ាសប៉ុននឹងផែនដី ស្ថិតក្នុងតំបន់ដែលអាចមានជីវិត ពោលគឺមិនក្ដៅពេក ហើយក៏មិនត្រជាក់ពេក ដែលអនុញ្ញាតឱ្យមានវត្តមានទឹករាវ។ របកគំហើញនេះត្រូវបានប្រកាសលើទស្សនាវដ្ដី Astronomy & Astrophysics និង Space កាលពីថ្ងៃទី 20 ធ្នូ 2022។

ពិភព GJ 1002b ដែលស្ថិតនៅខាងក្នុងបង្អស់ ចំណាយពេលប្រហែលតែ 10 ថ្ងៃប៉ុណ្ណោះគឺបញ្ចប់ការគោចរមួយជុំផ្កាយមេ ខណៈដែលពិភពមួយទៀតគឺ GJ 1002C ត្រូវការពេល 21 ថ្ងៃ។

យោងតាមក្រុមអ្នកស្រាវជ្រាវនៅវិទ្យាស្ថាន Canarias (IAC) ផ្កាយ GJ 1002 មានម៉ាសស្មើនឹង 1/8 នៃម៉ាសព្រះអាទិត្យ។

ការប្រៀបធៀបរវាងបណ្ដាភពក្នុងប្រព័ន្ធព្រះអាទិត្យ និងភពក្នុងប្រព័ន្ធផ្កាយ GJ 1002

របកគំហើញនេះគឺជាលទ្ធផលនៃកិច្ចសហការរវាងឧបករណ៍ ESPRESSO របស់ស្ថានីយសង្កេតអឺរ៉ុបខាងត្បូង (ESO) ស្ថិតនៅលើសមុទ្រខ្សាច់ Atacama ក្នុងប្រទេសស៊ីលី និង CARMENES ក្នុងឯស្ថានីយ Calar Alto នៅ Andalucia ប្រទេសអេស្ប៉ាញ។ CARMENES តាមដាន GJ 1002 ចាប់ពីឆ្នាំ 2017 ដល់ 2019 ចំណែក ESPRESSO ប្រមូលទិន្នន័យស្ដីពីផ្កាយក្រហមអំឡុងឆ្នាំ 2019 ដល់ 2021៕

December 26, 2022

យន្តហោះយោធាចិនជាង 40 គ្រឿង ហោះឆ្លងបន្ទាត់កណ្ដាលនៃច្រកសមុទ្រតៃវ៉ាន់

យន្តហោះចម្បាំង និងយន្តហោះឈ្លបយកការណ៍ 43 គ្រឿងរបស់ ប្រទេសចិន ហោះឆ្លងបន្ទាត់កណ្ដាលលើច្រកសមុទ្រតៃវ៉ាន់ នៅក្នុងការចូលទៅជិតកោះនេះក្នុងទ្រង់ទ្រាយធំបំផុតមិនធ្លាប់មាននាពេលកន្លង។

ស្ថាប័នស្វ័យការពាររបស់ កោះតៃវ៉ាន់ ថ្ងៃនេះបានឱ្យដឹងថា យន្តហោះយោធា 71 គ្រឿង និងនាវាយោធាចិន 7 គ្រឿង បានបង្ហាញខ្លួននៅក្នុងតំបន់នានានៅជុំវិញកោះតៃវ៉ាន់ កាលពីព្រឹកថ្ងៃទី 26 ធ្នូ 2022។ ក្នុងចំណោមនេះ មានយន្តហោះចម្បាំងធុនធ្ងន់ J-11, J-16 និង Su-30 ចំនួន 36 គ្រឿង និងយន្តហោះចម្បាំងធុនស្រាល J-10 ចំនួន 6 គ្រឿង រួមនឹងយន្តហោះឈ្លបយកការណ៍គ្មានមនុស្សបើក (UAV) CH-4 ចំនួន 1 គ្រឿង បានហោះឆ្លងបន្ទាត់កណ្ដាលរបស់ចក្រសមុទ្រតៃវ៉ាន់ ជាខ្សែបន្ទាត់ដែលគេយល់ថាជាព្រំដែនកំណត់ច្រកសមុទ្រតៃវ៉ាន់។

យន្តហោះ 4 គ្រឿងក៏បង្ហាញវត្តមាននៅភាគនិរតីនៃតំបន់កំណត់អត្តសញ្ញាណការពារដែនអាកាសតៃវ៉ាន់ រួមមានយន្តហោះប្រមាញ់នាវាមុជទឹក Y-8, យន្តហោះចម្បាំងផ្នែកអេឡេត្រូនិក, UAV WZ-7 និងយន្តហោះព្រមានរហ័ស KJ-500។

នេះគឺជាយុទ្ធនាការឡោមព័ទ្ធធំបំផុតមិនធ្លាប់មានពីមុនមករបស់កងកម្លាំងប្រដាប់អាវុធចិន នៅជុំវិញកោះតៃវ៉ាន់។ «យើងបន្តតាមដានសភាពការណ៍ និងដាក់ពង្រាយយន្តហោះចម្បាំង នាវាចម្បាំង និងប្រព័ន្ធមីស៊ីលដើម្បីប្រតិកម្មនឹងសកម្មភាពនេះ» ស្ថាប័នស្វ័យការពាររបស់ កោះតៃវ៉ាន់ បញ្ជាក់ដូច្នេះ ខណៈដែលភាគីខាង ប្រទេសចិន មិនទាន់បញ្ចេញយោបល់អ្វីនៅឡើយ។

ប្រទេសចិន តែងចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន ហើយថានឹងប្រើកម្លាំងបាយដណ្ដើមយកមកកាន់កាប់ បើសិនជាចាំបាច់។ សហរដ្ឋអាម៉េរិក ទទួលស្គាល់គោលនយោបាយ «ចិនតែមួយ» ប៉ុន្តែ គឺជាអ្នកផ្គត់ផ្គង់ផ្នែកយោធាសំខាន់បំផុតរបស់ កោះតៃវ៉ាន់ ដើម្បីជួយឱ្យ កោះនេះអាចការពារខ្លួនពីសត្រូវ៕

December 26, 2022

ទិដ្ឋភាពព្យុះព្រឹលវាយប្រហារទឹកដីអាម៉េរិក ក្នុងរដូវបុណ្យណូអែល

ព្យុះព្រឹលដ៏ធំកើតមាននៅក្នុងរដូវបុណ្យណូអែលឆ្នាំនេះ នាំឱ្យមានព្រឹលធ្លាក់យ៉ាងក្រាស់ បណ្ដាលឱ្យតំបន់ខ្លះត្រូវកក បង្កផលប៉ះពាល់ធ្ងន់ធ្ងរដល់មនុស្សរាប់លាននាក់នៅ សហរដ្ឋអាម៉េរិក។

ព្យុះព្រឹលចាប់ផ្ដើមកើតមានពីតំបន់សម្ពាធទាបលើ Five Great Lakes បន្តប្រែប្រួលនៅ សហរដ្ឋអាម៉េរិក បង្កការខូចខាតក្នុងទ្រង់ទ្រាយធំ ធ្វើឱ្យកកស្ទះចរាចរណ៍ក្នុងរដូវបុណ្យណូអែល។ រដ្ឋជាច្រើនស្ថិតក្នុងស្ថានភាពព្រឹលធ្លាក់យ៉ាងក្រាស់ និងមានភ្លៀង ទឹកជំនន់ ហើយអាកាសធាតុចុះត្រជាក់ខ្លាំង។

ទ្រង់ទ្រាយរបស់ព្យុះព្រឹលនេះ ស្ទើរតែមិនធ្លាប់មានពីមុនមក ដោយវាអូសបន្លាយពីតំបន់ Five Great Lakes ក្បែរ ប្រទេសកាណាដា រហូតដល់ Rio Grande តាមបណ្ដោយព្រំដែនជាមួយនឹង ម៉ិកស៊ិក។

ស្ថាប័នជាតិឧតុនិយម (NWS) គណនាឃើញថា ពលរដ្ឋអាម៉េរិក ប្រហែល 60% បានទទួលសេចក្ដីព្រមាន ឬការណែនាំអំពីគ្រោះថ្នាក់ធម្មជាតិមួយនេះ។ ជើងហោះហើរជាង 2,300 ត្រូវបានលុបចោលក្នុងថ្ងៃទី 24 ធ្នូ។

អភិបាលក្រុង New York បានឱ្យដឹងថា រថយន្តពន្លត់អគ្គិភ័យស្ទើរតែទាំងអស់ត្រូវជាប់គាំង។ ព្រលានយន្តហោះក្នុងទីក្រុងត្រូវបិទទ្វាររហូតដល់ថ្ងៃទី 26 ធ្នូ។

បាតុភូតធម្មជាតិដ៏អាក្រក់នេះ ក៏ធ្វើឱ្យផ្ទះ និងទីតាំងអាជីវកម្មរាប់សែនកន្លែងនៅ សហរដ្ឋអាម៉េរិក ត្រូវដាច់ភ្លើង។ មនុស្សរាប់លាននាក់រស់នៅក្នុងស្ថានភាពព្រួយបារម្ភអំពីការដាច់ភ្លើង ខណៈដែលសកម្មភាពរបស់ប៉ូលិស និងកម្លាំងពន្លត់អគ្គិភ័យក៏ត្រូវជាប់គាំង។

យ៉ាងហោចណាស់មានមនុស្ស 22 នាក់បានស្លាប់នៅក្នុងហេតុការណ៍ទាក់ទងនឹងព្យុះព្រឹលនៅ សហរដ្ឋអាម៉េរិក។ តំបន់មួយចំនួនមានសីតុណ្ហភាពចុះត្រជាក់ខ្លាំង អាចគំរាមកំហែងដល់អាយុជីវិតរបស់អ្នកដំណើរដែលជាប់នៅលើដងផ្លូវដោយសារព្រឹល៕

December 26, 2022

សភាអាម៉េរិក អនុម័តច្បាប់ថវិកាជាតិតម្លៃជិត 1.7 ទ្រីលានដុល្លារ

ក្រុមអ្នកតាក់តែងច្បាប់អាម៉េរិក បានអនុម័តសេចក្ដីព្រាងច្បាប់ថវិកាជាតិថ្មីតម្លៃ 1.66 ទ្រីលានដុល្លារ ក្នុងនោះមាន 858 ពាន់លានដុល្លារ សម្រាប់វិស័យការពារជាតិ។

សេចក្ដីព្រាងច្បាប់ស្ដីពីការចំណាយថ្នាក់ជាតិនេះ ត្រូវបានសភាជាន់ទាបអាម៉េរិក អនុម័តកាលពីថ្ងៃទី 23 ធ្នូ 2022 ដោយមានសន្លឹកឆ្នោតគាំទ្រចំនួន 225 សំឡេង និងប្រឆាំង 201 សំឡេង។ មុននោះមួយថ្ងៃ សេចក្ដីព្រាងច្បាប់នេះត្រូវបានសភាជាន់ខ្ពស់អាម៉េរិក អនុម័តរួចហើយ ដោយមានសន្លឹងឆ្នោតគាំទ្រចំនួន 68 សំឡេង ក្នុងនោះមាន 18 សំឡេងមកពីបក្សសាធារណរដ្ឋ និងជំទាស់ 29 សំឡេង។

ប្រធានាធិបតីអាម៉េរិក ចូ បៃដិន ប្រកាសថា នឹងចុះហត្ថលេខាលើសេចក្ដីព្រាងច្បាប់នេះ និងសរសើរថា នេះគឺជាភស្ដុតាងបង្ហាញថា បក្សសាធារណរដ្ឋ និងបក្សប្រជាធិបតេយ្យ អាចរួមគ្នាដោះស្រាយបញ្ហាសម្រាប់ជនជាតិអាម៉េរិក»។

សេចក្ដីព្រាងច្បាប់ថវិកាជាតិថ្មីដែលមានតម្លៃ 1.66 ទ្រីលានដុល្លារនេះ គឺកើនឡើងប្រហែល 160 ពាន់លានដុល្លារ ធៀបនឹងឆ្នាំកន្លង។

សេចក្ដីព្រាងច្បាប់ស្ដីថ្មីនេះក៏រួមបញ្ចូលទាំងជំនួយបន្ទាន់តម្លៃ 44.9 ពាន់លានដុល្លាររបស់ សហរដ្ឋអាម៉េរិក សម្រាប់ អ៊ុយក្រែន ផងដែរ។

December 24, 2022

បាតុកម្មហិង្សាផ្ទុះឡើងនៅប្រទេសបារាំង ក្រោយករណីបាញ់រះសម្លាប់មនុស្សច្រើននាក់

ក្រុមបាតុករជនជាតិឃើដ (Kurd) ប៉ះទង្គិចនឹងប៉ូលិសនៅ បារីស នៅពេលពួកគេខឹង និងរិះគន់ថា អាជ្ញាធរធ្វើសកម្មភាពតិចពេកនៅក្នុងការទប់ស្កាត់ករណីបាញ់រះបណ្ដាលឱ្យមនុស្ស 3 នាក់ស្លាប់។

បាតុកម្មហិង្សានេះបានកើតឡើងកាលពីថ្ងៃទី 23 ធ្នូ នៅពេលក្រុមបាតុករព្យាយាមចូលទៅជិតរដ្ឋមន្ត្រីក្រសួងមហាផ្ទៃបារាំង Gerald Darmanin ក្នុងពេលលោកមកពិនិត្យកន្លែងកើតហេតុនៃករណីបាញ់ប្រហារសម្លាប់មនុស្ស 3 នាក់នៅ រដ្ឋធានីបារីស ដែលបានកើតឡើងប៉ុន្មានម៉ោងមុននោះ។

ក្រុមមនុស្សដែលកំពុងខឹង នាំគ្នាគប់របស់របរសំដៅលើក្រុមប៉ូលិស និងចោទអាជ្ញាធរថា ធ្វើសកម្មភាពតិចពេក មិនអាចទប់ស្កាត់អំពើបាញ់ប្រហារនេះបាន។ ក្រុមបាតុករក៏បានវាយបំផ្លាញរថយន្តប៉ូលិសដែលនៅក្បែរនោះផងដែរ។

កងកម្លាំងប៉ូលិសប្រឆាំងកុបកម្មបារាំង ក្រោយមកក៏បានប្រើប្រាស់គ្រាប់បែកផ្សែងបង្ហូរទឹកភ្នែកដើម្បីរំសាយក្រុមបាតុករ។

សមត្ថកិច្ចបារាំង បានចាប់ខ្លួនជនសង្ស័យនៅក្នុងហេតុការណ៍បាញ់រះដែលបានបណ្ដាលឱ្យមនុស្ស 3 នាក់ស្លាប់ និង 3 នាក់ទៀតរងរបួស។ ជនសង្ស័យវ័យ 69 ឆ្នាំរូបនេះ ធ្លាប់ប្រព្រឹត្តប្រើប្រាស់អាវុធខុសច្បាប់ និងវាយប្រហារលើជនចំណាកស្រុកនៅក្នុងតង់បណ្ដោះអាសន្ននាពេលកន្លង។

សមត្ថកិច្ចបារាំង កំពុងស៊ើបអង្កេតលើលទ្ធភាពដែលថា ការវាយប្រហាររបស់ជនសង្ស័យនេះ គឺជារឿងរើសអើងជាតិសាសន៍។

កាលពីឆ្នាំ 2013 សកម្មជននយោបាយជនជាតិឃើដ 3 រូប ត្រូវបានគេបាញ់សម្លាប់នៅ បារីស ក្នុងនោះក៏មានសមាជិកក្រុមសហស្ថាបនិករបស់ បក្សពលករជាតិឃើដ ផងដែរ៕

December 24, 2022

យានស្រាវជ្រាវរបស់មនុស្សនៅលើដីភពអង្គារ ឈប់ដំណើរការក្រោយរយៈពេល 4 ឆ្នាំ

បេសកកម្មបង្កើតផែនទីខាងក្នុងភពព្រះអង្គាររបស់យានស្រាវជ្រាវ InSight បានបញ្ចប់កាលពីថ្ងៃទី 20 ធ្នូ ដោយសារតែត្រូវគ្របដណ្ដប់ដោយធូលី។

បន្ទាប់ពីជាង 4 ឆ្នាំដែលត្រូវបានបាញ់បង្ហោះឡើងទៅកាន់ពិភពអង្គារ យាន InSight ក៏បានឈប់ដំណើរការចាប់ពីថ្ងៃទី 20 ធ្នូ 2022។ យានរបស់ ណាសា នេះ ត្រូវបានគេជឿថា អស់ថាមពល ព្រោះតែធូលីក្រាស់គ្របដណ្ដប់លើផ្ទាំងសូឡារបស់វា។

ដោយត្រូវបានបំពាក់ឧបករណ៍វាស់ស្ទង់ទំនើបៗ ក្នុងរយៈពេល 4 ឆ្នាំកន្លង InSight បានបំពេញបេសកកម្មបង្កើតផែនទីខាងក្នុង ក្រោមស្រទាប់ដីរបស់ពិភពក្រហមមួយនេះ តាមរយៈការកត់ត្រាករណីរញ្ជួយដីប្រមាណ 1,300 លើក។ ប្រការនេះជួយឱ្យអ្នកវិទ្យាសាស្ត្រអាចដឹងបានថា ស្នូលរបស់ពិភពអង្គារពិតជារាវ ហើយស្រទាប់ខាងក្រៅរបស់ពិភពនេះក៏ស្ដើងជាងការគិតកន្លងមក ដោយវាអាចត្រូវបានបង្កើតឡើងពីស្រទាប់ចំនួន 3។

ធូលីគ្របដណ្ដប់ពេញពីលើផ្ទាំងសូឡារបស់យាន InSight

បាតុភូតរញ្ជួយដីអាចជាលទ្ធផលដែលកើតពីភាពមិនប្រក្រតីរបស់សីតុណ្ហភាព ដោយសារតែស្រទាប់ខាងក្រៅរបស់ពិភពអង្គារ។ កន្លងមក បេសកកម្មរបស់ InSight ក៏ធ្លាប់ជួបបរាជ័យម្ដងរួចហើយ ទាក់ទិននឹងឧបករណ៍វិទ្យាសាស្ត្រវាស់ស្ទង់សីតុណ្ហភាព។ ឧបករណ៍នេះត្រូវកប់ក្នុងដីជម្រៅ 5 ម៉ែត្រដើម្បីវាស់កម្ដៅ ប៉ុន្តែវាមិនអាចជីករុលចុះជ្រៅបាន ហើយបេសកកម្មនេះក៏ត្រូវបានបោះបង់ចោលកណ្ដាលទី៕

December 23, 2022

សិស្សស្រីនៅ អាហ្វហ្គានីស្ថាន អស់សង្ឃឹម ព្រោះតែរបបតាលីបង់ ហាមការសិក្សា

ក្រោយការប្រឹងប្រែងមើលមេរៀនអស់ជាច្រើនសប្ដាហ៍ សិស្សស្រីនៅ អាហ្វហ្គានីស្ថាន ក៏បានទទួលដំណឹងដ៏មហាអាក្រក់ នោះគឺ «តាលីបង់ ហាមសិស្សស្រីទាំងអស់ចូលសិក្សានៅមហាវិទ្យាល័យ»។

«ខ្ញុំមិនបានឈប់ ហើយនៅតែបន្តការមើលមេរៀន» នារីម្នាក់សុំមិនបញ្ចេញឈ្មោះ បានប្រាប់ CNN កាលពីថ្ងៃទី 21 ធ្នូ មួយថ្ងៃក្រោយពី អាជ្ញាធរតាលីបង់ ចេញបទបញ្ជាហាមសិស្សស្រីនៅ អាហ្វហ្គានីស្ថាន ចូលរៀននៅមហាវិទ្យាល័យ ដោយមិនមានការកំណត់ពេលវេលា។ «ព្រឹកនោះ ខ្ញុំនៅតែទៅសាលារៀន» នារីខាងលើបន្ថែមដូច្នេះ។

ក៏ប៉ុន្តែ ការប្ដេជ្ញាចិត្តរបស់នារីខាងលើ មិនមានប្រយោជន៍ឡើយ។ ក្រុមខ្មាន់កាំភ្លើងរបស់ តាលីបង់ ដែលបង្ហាញខ្លួនមុខខ្លោងទ្វារសាកលវិទ្យាល័យនៅ រដ្ឋធានីកាប៊ុល ដេញសិស្សស្រីទាំងអស់ដែលព្យាយាមចូលទៅក្នុងសាលា។

«នោះគឺជាទិដ្ឋភាពអាក្រក់ជាទីបំផុត» នារីម្នាក់និយាយដូច្នេះ។ «សិស្សស្រីស្ទើរតែទាំងអស់ ក្នុងនោះក៏មានរូបខ្ញុំ យំ និងស្នើសុំចូលសាលារៀន។ អ្នកនឹងមានអារម្មណ៍យ៉ាងណានៅពេលបណ្ដោយឱ្យសិទ្ធិរបស់ខ្លួនត្រូវបាត់បង់ដោយមិនអាចធ្វើអ្វីបាន?»។

ស្ត្រីនៅ អាហ្វហ្គានីស្ថាន ត្រូវប្រឈមមុខនឹងការបិទសិទ្ធិកាន់តែខ្លាំងឡើងៗ បន្ទាប់ពី តាលីបង់ ឡើងកាន់អំណាចកាលពីខែសីហាឆ្នាំកន្លង។ ការរំលោភសិទ្ធិដែលគួរឱ្យចាប់អារម្មណ៍បំផុតគឺបទបញ្ជាហាមសិស្សស្រីរៀននៅមហាវិទ្យាល័យ។

កាលពីខែមីនា 2022 តាលីបង់ បានហាមក្មេងស្រីចូលរៀននៅមធ្យមសិក្សា។ យោងតាម WSJ ដែលបានចុះផ្សាយកាលពីថ្ងៃទី 21 ធ្នូ 2022 ឱ្យដឹងថា តាលីបង់ ក៏បានហាមក្មេងស្រីនៅ អាហ្វហ្គានីស្ថាន រៀនបឋមសិក្សាផងដែរ។

ចំពោះសិស្ស និងនិស្សិតនៅ កាប៊ុល ការហាមសិស្សស្រីរៀននៅមហាវិទ្យាល័យ គឺជារឿងដ៏គួរឱ្យសោកសៅបំផុត ហើយសាហាវជាងការបំផ្ទុះគ្រាប់បែក អំពើហិង្សាដែលពួកគេបានជួបទៅទៀត។

បទបញ្ជាខាងលើរបស់ របបតាលីបង់ កំពុងរងការរិះគន់យ៉ាងខ្លាំងក្លាពីអន្តរជាតិ ក្នុងនោះ ប្រទេស និងអង្គការសិទ្ធិមនុស្សធំៗក៏បានប្រតិកម្មជំទាស់នឹងការសម្រេចនេះផងដែរ៕

December 23, 2022

តាលីបង់ លើកមូលហេតុនៃ «ការហាមសិស្សស្រីរៀនមហាវិទ្យាល័យ»

មន្ត្រីរបស់របបតាលីបង់ បានឱ្យដឹងថា សិស្សស្រីនៅ អាហ្វហ្គានីស្ថាន ត្រូវបានហាមសិក្សានៅមហាវិទ្យាល័យគឺដោយសារពួកគេមិនគោរពតាមការណែនាំ ក្នុងនោះក៏មានការកំណត់អំពីសម្លៀកបំពាក់សមស្របផងដែរ។

«និស្សិតស្រីដែលដើរពីផ្ទះទៅកាន់សាកលវិទ្យាល័យក៏មិនបានគោរពតាមការណែនាំទាក់ទងនឹងកន្សែងគ្របក្បាលហ៊ីចាប (Hijab)។ ពួកគេស្លៀកពាក់ដូចទៅពិធីជប់លៀងមង្គលការ» រដ្ឋមន្ត្រីក្រសួងអប់រំមហាវិទ្យាល័យរបស់របបតាលីបង់ Neda Mohammad Nadeem ថ្លែងនៅលើកញ្ចក់ទូរទស្សន៍កាលពីថ្ងៃទី 22 ធ្នូ 2022។

យោងតាម Nadeem និស្សិតស្រីមិនបានអើពើជាមួយនឹងការកំណត់របស់សាសនាអ៊ីស្លាម ក្នុងនោះបានកំណត់ថាត្រូវស្លៀកពា់កអ្វី ឬដើរជាមួយសាច់ញាតិជាបុរសនៅពេលចេញទៅក្រៅ។

«…14 ខែបានកន្លងផុតទៅ ប៉ុន្តែ ការណែនាំរបស់ក្រសួងអប់រំមហាវិទ្យាល័យស្ដីពីការអប់រំស្ត្រី មិនត្រូវបានគេធ្វើតាម» Nadeem បញ្ជាក់ដូច្នេះ។

Nadeem ក៏បានឱ្យដឹងថា មុខវិជ្ជាមួយចំនួនមិនសមស្របនឹងស្ត្រីភេទ។ «បច្ចេកទេសកសិកម្ម និងមុខវិជ្ជាមួយចំនួនផ្សេងទៀត មិនសមស្របនឹងសេចក្តីថ្លៃថ្នូរ និងកិត្តិយសរបស់និស្សិតស្រី ក៏ដូចជាវប្បធម៌របស់ អាហ្វហ្គានីស្ថាន» រដ្ឋមន្ត្រីក្រសួងអប់រំរបស់ តាលីបង់ អះអាងដូច្នេះ និងបន្តថា អាជ្ញាធរក៏បានបិទសាលាដែលបង្រៀនតែនិស្សិតស្រីក្នុងករណីមួយចំនួនផងដែរ។

អាជ្ញាធរតាលីបង់ កាលពីថ្ងៃទី 20 ធ្នូ បានដាក់បម្រាមមិនកំណត់ពេលចំពោះនិស្សិតស្រីអាហ្វហ្គានីស្ថាន រៀននៅមហាវិទ្យាល័យ បន្ទាប់ពីជិត 3 ខែដែលសិស្សស្រី និងស្ត្រីរាប់ពាន់នាក់នៅប្រទេសនេះ ចូលរួមប្រលងចូលមហាវិទ្យាល័យ។

តាលីបង់ ក៏បានឱ្យដឹងថា សាលាមធ្យមសិក្សាសម្រាប់សិស្សស្រីស្ទើរតែទាំងអស់នៅ អាហ្វហ្គានីស្ថាន ក៏ត្រូវបានបិទទ្វារបណ្ដោះអាសន្នក្នុងរយៈពេលជាងមួយឆ្នាំ។

ក្រុមប្រទេស G7 មានប្រតិកម្មខ្លាំងក្លាទៅនឹងបទបញ្ជាខាងលើរបស់ តាលីបង់ និងបានស្នើឱ្យអាជ្ញាធរនៅ អាហ្វហ្គានីស្ថាន លុបចោលបម្រាមនេះ។ អារ៉ាប៊ីសាអូឌីត ក៏បានសម្ដែងការភ្ញាក់ផ្អើល និងសោកស្ដាយ ព្រមទាំងជំរុញឱ្យ តាលីបង់ ដកបម្រាមនេះផងដែរ។ ប៉ុន្តែ Nadeem និយាយថា សហគមន៍អន្តរជាតិមិនគួរលូកដៃចូលក្នុងកិច្ចការផ្ទៃក្នុងរបស់ អាហ្វហ្គានីស្ថាន។

អាជ្ញាធរតាលីបង់ ថែមទាំងបានដាក់ការកំណត់យ៉ាងតឹងរឹងនៅពេលហាមស្ត្រីទៅឧទ្យាន ពិព័រណ៍ បន្ទប់ហាត់ប្រាណ ក៏ដូចជាបន្ទប់ងូតទឹកសាធារណៈ។

តាលីបង់ បានប្រកាសថា បានផ្លាស់ប្ដូរច្រើនធៀបនឹងកាលពីសម័យជាង 20 ឆ្នាំមុន និងបានអះអាងថា កំពុងអនុញ្ញាតឱ្យស្ត្រីទទួលបានសិទ្ធិនានាទៅតាមច្បាប់សាសនាអ៊ីស្លាម និងវប្បធម៌អាហ្វហ្គានីស្ថាន។ ប៉ុន្តែ ការសម្រេចចិត្តក្នុងប៉ុន្មានខែចុងក្រោយនេះ នាំឱ្យរបបនេះរងការរិះគន់ និងសង្ស័យ៕

December 23, 2022

ក្រុមជម្រើសជាតិអាហ្សង់ទីន ត្រូវបង្ខំចិត្តឡើងឧទ្ធម្ភាគចក្រហែក្បួនអបអរសាទរជ័យជម្នះនៅ World Cup

Messi និងក្រុមជម្រើសជាតិអាហ្សង់ទីន ត្រូវបោះបង់ការហែក្បួនដោយរថយន្តក្រុងគ្មានដំបូល និងឡើងឧទ្ធម្ភាគចក្រហោះពីលើរដ្ឋធានី ដោយសារមនុស្សរាប់លាននាក់ចេញដើរតាមដងផ្លូវចូលរួមអបអរសាទរជើងឯក World Cup 2022។

ការហែក្បួនដោយរថយន្តក្រុងគ្មានដំបូលនៅលើផ្លូវក្នុង រដ្ឋធានីប៊ុយណូស៊ែ ធ្វើឡើងក្នុងថ្ងៃទី 20 ធ្នូ ដើម្បីឱ្យប្រជាជនអាចចូលរួមសប្បាយនឹងតំណែងជើងឯក World Cup 2022 ដែលក្រុមបាល់ទាត់ជម្រើសជាតិអាហ្សង់ទីន ដណ្ដើមបាន។ យោងតាមការគណនា មនុស្សប្រហែល 4 លាននាក់បានចូលរួមហែក្បួននេះ ធ្វើឱ្យដងផ្លូវត្រូវណែនណាន់តាន់តាប់។

រថយន្តក្រុងត្រូវបរយឺតៗនៅកណ្ដាលហ្វូងមនុស្សរាប់លាននាក់ នៅពេលឆ្ពោះទៅកាន់ Obelisk ព្រោះតែដងផ្លូវចង្អៀតខ្លាំង។ មនុស្សមួយចំនួនថែមទាំងព្យាយាមលោតឡើងរថយន្តក្រុងរបស់ក្រុមបាល់ទាត់។

ក្បួនហែដែលអូសបន្លាយពេល 8 ទៅតាមផែនការ ត្រូវបានកាត់បន្ថយពេលវេលា ដោយសារការបារម្ភអំពីសន្តិសុខ ហើយក្រុមកីឡាករត្រូវចាកចេញពីរថយន្តក្រុង ដើម្បីឡើងឧទ្ធម្ភាគចក្រ។ ឧទ្ធម្ភាគចក្រនេះ ក្រោយមកក៏ហោះក្រឡឹងវិមាន Obelisk ពីលើហ្វូងមនុស្ស។

ក្រុមជម្រើសជាតិអាហ្សង់ទីន បានត្រលប់ទៅដល់ព្រលានយន្តហោះ Ezeiza នៅ រដ្ឋធានីប៊ុយណូស៊ែ វេលាម៉ោងប្រហែល 3 ថ្ងៃទី 20 ធ្នូ ពេលមនុស្សរាប់ពាន់នាក់បានរង់ចាំអបអរសាទរ។

នៅវេលាថ្ងៃត្រង់ មនុស្សរាប់លាននាក់បានប្រមូលផ្ដុំគ្នានៅកណ្ដាលរដ្ឋធានី។ មនុស្សម្នាលើករូបថតរបស់ Messi និងអតីតកំពូលតារាបាល់ទាត់ Diego Maradona ទន្ទឹមនឹងការលេងតន្ត្រី ស្រែកហ៊ោ និងសកម្មភាពផ្សេង។

ដងផ្លូវក៏ចាប់ផ្ដើមទូលាយបន្តិច ក្រោយពីក្រុមបាល់ទាត់ឡើងឧទ្ធម្ភាគចក្រ។ មនុស្សមួយចំនួនសោកស្ដាយ ព្រោះតែមិនបានជួបក្រុមជម្រើសជាតិនេះ។

ដើម្បីចូលរួមអបអរសាទរជ័យជម្នះនៅ World Cup 2022 រដ្ឋាភិបាលអាហ្សង់ទីន កាលពីថ្ងៃទី 20 ធ្នូ បានអនុញ្ញាតឱ្យប្រជាជនឈប់សម្រាកពីការងារមួយថ្ងៃ លើកលែងតែវិស័យចាំបាច់មួយចំនួន៕

December 21, 2022

ក្មេងស្រីអាយុ 5 ឆ្នាំ ធ្លាក់ចូលកូនរណ្ដៅជម្រៅ 10 ម៉ែត្រ នៅវៀតណាម

ក្នុងពេលលេងសប្បាយនៅក្នុងការដ្ឋានសំណង់ ក្មេងស្រីអាយុ 5 ឆ្នាំម្នាក់បានធ្លាក់ចូលទៅក្នុងរណ្ដៅតូចមួយ និងជាប់ក្នុងរយៈពេលរាប់សិបនាទីមុនពេលអាចទាញឡើងបាន។

គ្រោះថ្នាក់នេះកើតឡើងនៅពេលក្មេងស្រីរងគ្រោះដែលមានផ្ទះនៅក្បែរការដ្ឋានសំណង់ កំពុងរត់លេងជាមួយមិត្តភក្ដិក្នុងតំបន់ក្បែរគម្រោងបុរីមួយកន្លែងនៅភាគខាងត្បូងប្រទេសវៀតណាម កាលពីថ្ងៃទី 19 ធ្នូ។ ពេលកំពុងរត់លេង ក្មេងស្រីម្នាក់នេះក៏រអិលជើងធ្លាក់ចូលទៅក្នុងរណ្ដៅជ្រៅដែលធ្វើដើម្បីចាក់សសរបេតុង។

ពេលឮសំឡេងស្រែកឱ្យជួយ សន្តិសុខ និងកម្មករក៏រត់មកមើល ប៉ុន្តែមិនបានជួយបាន ដោយសារតែរណ្ដៅមានអង្កត់ផ្ចិតត្រឹមតែ 30 សម។ ក្មេងស្រីនេះស្រែកយំជាមិនឈប់ដោយភាពភ័យខ្លាច និងរន្ធត់។

ក្រុមពន្លត់អគ្គិភ័យ និងសង្គ្រោះ ក្នុងតំបន់ចំនួន 14 នាក់ រួមនឹងឧបករណ៍ជួយសង្គ្រោះ មិនយូរប៉ុន្មានក៏បានមកដល់កន្លែងកើតហេតុ។ មាត់រណ្ដៅតូចពេក បុគ្គលិកសង្គ្រោះមិនអាចចុះទៅជួយបាន។ ការពង្រីករណ្ដៅក៏ត្រូវចំណាយពេលច្រើន ហើយដីក៏អាចធ្លាក់កប់ជនរងគ្រោះ ដូច្នេះត្រូវរកវិធីផ្សេង។

បុគ្គលិកសង្គ្រោះបានប្រើវិធីចិត្តសាស្ត្រដើម្បីរម្ងាប់អារម្មណ៍ភ័យខ្លាច រួចទម្លាក់ខ្សែ និងឧបករណ៍សង្គ្រោះចូលក្នុងរណ្ដៅ និងណែនាំក្មេងស្រីនេះតាមលំដាប់លំដោយដើម្បីទាញឡើង។ ប្រហែល 20 នាទីក្រោយមក ក្មេងស្រីរងគ្រោះក៏ត្រូវបានទាញឡើងមកលើដោយសុវត្ថិភាព និងបញ្ចូលទៅកាន់មន្ទីរពេទ្យ។ បច្ចុប្បន្ន សុខភាពរបស់ក្មេងស្រីនេះបានល្អប្រសើរវិញហើយ។

យោងតាមសារព័ត៌មាន VNexpress កាលពីឆ្នាំ 2015 ហេតុការណ៍ប្រហាក់ប្រហែលនេះក៏បានកើតឡើងនៅវៀតណាម។ ក្នុងពេលរត់លេង ក្មេងស្រីអាយុ 7 ឆ្នាំម្នាក់បានធ្លាក់ចូលអណ្ដូងជម្រៅ 13 ម៉ែត្រ។ ក្រោយការប្រឹងប្រែងអស់រយៈពេល 10 ម៉ោង ក្នុងការជីកអណ្ដូងមួយទៀតនៅក្បែរនោះ អាជ្ញាធរក៏សង្គ្រោះបានជោគជ័យ៕

December 20, 2022

Category: អន្តរជាតិ