អន្តរជាតិ - La Reine Media

គំនិតស្ដីពីការបង្កើតសមុទ្រទឹកនៅលើសមុទ្រខ្សាច់សាហារ៉ា (Sahara)

ឆ្នាំ 1957 ក្រុមអ្នកវិទ្យាសាស្ត្របានលើកឡើងនូវគំនិតស្ដីពីការបង្កើតសមុទ្រទឹកលើតំបន់ទំនាប Qattara ក្នុងសមុទ្រខ្សាច់សាហារ៉ា ក្នុងនោះមានទាំងការប្រើវិធីបំផ្ទុះគ្រាប់បែកនុយក្លេអែរផងដែរ។

សមុទ្រខ្សាច់សាហារ៉ាគឺជាតំបន់ដែលមានទំហំ 9.2 លានគីឡូម៉ែត្រក្រឡា នៅភាគខាងជើងនៃទ្វីបអាហ្វ្រិក។ ក្នុងប្រវត្តិសាស្ត្រ ធ្លាប់មានគម្រោងជាច្រើនស្ដីពីការធ្វើឱ្យមួយផ្នែករបស់សមុទ្រខ្សាច់សាហារ៉ាលិចក្នុងទឹក ព្រោះថា តំបន់ជាច្រើននៅទីនេះស្ថិតក្រោមនីវ៉ូទឹកសមុទ្រ។ នេះបើយោងតាមទំព័រ IFL Science។

មនុស្សដំបូងគេដែលបានលើកឡើងគំនិតខាងលើគឺវិស្វករជនជាតិស្កុតឡែន Donald McKenzie។ គាត់ស្នើឱ្យបង្កើតព្រែកជីកមួយដែលមានប្រវែង 644 គីឡូម៉ែត្រពីម៉ារ៉ុកទៅកាន់តំបន់ខ្សាច់ El Djouf ធ្វើឱ្យទីនេះក្លាយជាសមុទ្រទឹកសាហារ៉ា។ ឆ្នាំ 1870 ប្រធានក្រុមនាវិក Francois-Elie Roudaire របស់កងទ័ពបារាំង ក៏បានស្នើឱ្យជីកព្រែកប្រវែង 193 គីឡូម៉ែត្រ ដែលតភ្ជាប់សមុទ្រមេឌីទែរ៉ាណេ ទៅនឹងតំបន់បឹងអំបិល Chott el Fejej លើសមុទ្រខ្សាច់សាហារ៉ា នៅភាគខាងត្បូងប្រទេសទុយនីស៊ី ធ្វើឱ្យតំបន់ 4,828 គីឡុម៉ែត្រក្រឡាត្រូវលិចក្នុងទឹក។

គំនិតខាងលើទទួលបានការគាំទ្ររបស់ Ferdinand de Lesseps អ្នកការទូតបារាំងដែលបានដឹកនាំការជីកព្រែក Suez។ ការចំណាយដើម្បីអនុវត្តគំនិតនេះ កាលណោះគឺប្រហែល 25 លានហ្វ្រង់ (4.2 លានដុល្លារអាម៉េរិក)។ ក៏ប៉ុន្តែ ការស្រាវជ្រាវមួយចំនួនបានរកឃើញថា តំបន់ខាងលើមិនស្ថិតក្រោមនីវ៉ូទឹកសមុទ្រពិតប្រាកដនោះទេ ហើយការចំណាយក៏កើនឡើង ធ្វើឱ្យគំនិតនេះមិនអាចក្លាយជាការពិត។

ផែនការមួយផ្សេងទៀតដែលទាក់ទងនឹងការនាំសមុទ្រទឹកទៅកាន់សមុទ្រខ្សាច់សាហារ៉ា ត្រូវបានលើកឡើងនៅអេហ្ស៊ីប។ គម្រោង Plowshare គឺជាគំនិតរបស់គណៈកម្មការថាមពលអាតូមិកអាម៉េរិក។ ក្រុមអ្នកវិទ្យាសាស្ត្រគិតឃើញថា ត្រូវការបំផ្ទុះគ្រាប់បែកនុយក្លេអែរចំនួន 213 គ្រាប់ដើម្បីបង្កើតជាព្រែកដែលមានជម្រៅទាបជាងនីវ៉ូទឹកសមុទ្រ 60 ម៉ែត្រ នៅតំបន់ទំនាប Qattara ។ ប៉ុន្តែ កិច្ចព្រមព្រៀងអន្តរជាតិមួយចំនួនហាមឃាត់ការបំផ្ទុះគ្រាប់បែកនុយក្លេអែរ ហើយគម្រោង Plowshare ក៏ត្រូវបានលុបចោលកាលពីឆ្នាំ 1977។

ថ្មីៗនេះ ក្នុងឆ្នាំ 2018 ក្រុមហ៊ុនមួយនៅជ្រលង Silicon ដែលមានឈ្មោះថា Y Combinator បានលើកឡើងនូវគំនិតដែលជួយទប់ទល់នឹងបាតុភូតកើនឡើងកម្ដៅរបស់ផែនដី ដោយការធ្វើឱ្យតំបន់សមុទ្រខ្សាច់ Algodones នៅ California ស្ថិតក្នុងទឹក។ គម្រោងរបស់ពួកគេគឺការបង្កើតបឹងទឹកដែលមានទំហំ 0.4 ហិកតាចំនួនរាប់លាន ដើម្បីដាំសារាយដែលមានតួនាទីដូចទៅនឹងអាងស្រូបយកកាបូន។ ក៏ប៉ុន្តែ ដោយសារតែការចំណាយឡើងដល់ 50 ទ្រីលានដុល្លារអាម៉េរិក គម្រោងនេះក៏នៅតែមិនទាន់ត្រូវបានអនុវត្ត៕

April 12, 2023

ផ្ទុះភ្នំភ្លើងនៅរុស្ស៊ី ផេះធូលីប៉ើងដល់កម្ពស់ 20 គីឡូម៉ែត្រ

ភ្នំភ្លើងនៅតំបន់ចុងបូព៌ារបស់រុស្ស៊ីបានផ្ទុះឡើង បំប៉ើងផេះធូលីពេញផ្ទៃមេឃ ធ្វើឱ្យក្រុមមន្ត្រីប្រកាសអាសន្នកម្រិតក្រហមចំពោះវិស័យអាកាសចរណ៍។

ភ្នំភ្លើង Shiveluch បានផ្ទុះឡើងនៅពាក់កណ្ដាលយប់ និងឈានដល់ចំណុចកំពូលបន្ទាប់ពីផ្ទុះបាន 6 ម៉ោង បង្កើតបានជាពពកផេះធូលីគ្របដណ្ដប់លើផ្ទៃមេឃប្រមាណ 108,000 គូឡូម៉ែត្រក្រឡានៅពីលើឧបទ្វីប Kamchatka ស្ថិតក្នុងតំបន់ចុងបូព៌ារបស់រុស្ស៊ីកាលពីថ្ងៃទី 11 មេសា។

យោងតាមស្ថាប័នមានសមត្ថកិច្ច ហេតុការណ៍ផ្ទុះភ្នំភ្លើងនេះបានបណ្ដាលឱ្យបណ្ដាភូមិឋាននៅជុំវិញត្រូវគ្របដណ្ដប់ដោយផេះធូលីកម្រាស់ 8.5 សង់ទីម៉ែត្រ ក្រាស់បំផុតក្នុងរង្វង់ 60 ឆ្នាំមកនេះ។

ភ្នំភ្លើង Shiveluch គឺជាមួយក្នុងចំណោមភ្នំភ្លើងធំជាងគេ និងមានសកម្មភាពខ្លាំងក្លាបំផុតនៅ Kamchatk។ សមត្ថកិច្ចនិយាយថា កម្អែភ្នំភ្លើងនឹងមិនហូរចូលភូមិក្នុងតំបន់ក្បែរខាង ប៉ុន្តែអាចនឹងមានពពកផេះធូលីធំៗបន្តទៀត។ បច្ចុប្បន្ន មិនទាន់មានរបាយការណ៍ស្ដីពីករណីស្លាប់ដោយសារបន្ទុះភ្នំភ្លើងនេះនៅឡើយ។

https://www.youtube.com/watch?v=ibvprb_o4Dg

April 12, 2023

យន្តហោះ និងនាវាយោធាចិនជាង 100 គ្រឿង បង្ហាញខ្លួននៅជុំវិញកោះតៃវ៉ាន់

ស្ថាប័នការពារកោះតៃវ៉ាន់ បានរកឃើញយន្តហោះយោធាចំនួន 91 គ្រឿង និងនាវាយោធា 12 គ្រឿងរបស់ចិនដីគោក ធ្វើសកម្មភាពនៅបណ្ដាតំបន់ជុំវិញកោះនេះនៅក្នុងមួយថ្ងៃ។

«គិតត្រឹមម៉ោង 18 ថ្ងៃទី 10 មេសា យើងបានរកឃើញយន្តហោះយោធា 91 គ្រឿង និងនាវាយោធា 12 គ្រឿងនៅជុំវិញកោះតៃវ៉ាន់។ យន្តហោះ 54 គ្រឿងក្នុងចំណោមនោះ បានឆ្លងបន្ទាត់កណ្ដាលនៅច្រកសមុទ្រ ឬធ្វើដំណើរចូលក្នុងតំបន់កំណត់អត្តសញ្ញាណការពារដែនអាកាស។ កងកម្លាំងការពារបានតាមដានស្ថានការណ៍ និងដាក់ពង្រាយកម្លាំងដើម្បីជាប្រតិកម្ម» ស្ថាប័នការពារកោះតៃវ៉ាន់ឱ្យដឹងដូច្នេះ។

របាយការណ៍ខាងលើត្រូវបានលើកឡើងបន្ទាប់ពីកងទ័ពចិនប្រកាសថា បានបញ្ចប់ព្រឹត្តិការណ៍សមយុទ្ធបីថ្ងៃនៅក្នុងតំបន់ច្រកសមុទ្រតៃវ៉ាន់ និងបណ្ដាតំបន់សមុទ្រនៅជុំវិញកោះនេះ។

ថ្វីបើចិនដីគោកបានប្រកាសថាបានបញ្ចប់សមយុទ្ធដែលប្រើប្រាស់សេណារីយោ «ឡោមព័ទ្ធកោះ» ហើយក្ដី ភាគីចិនដីកោះតៃវ៉ាន់នៅតែបញ្ជាក់ថា នឹងបន្តការតាមដានស្ថានការណ៍ និងបង្កើនសមត្ថភាពត្រៀមប្រយុទ្ធ។

នាវាផ្ទុកយន្តហោះចម្បាំង និងយន្តហោះរបស់ប្រទេសចិន នៅលើមហាសមុទ្រប៉ាស៊ីហ្វ៊ិក ភាគខាងលិចកោះតៃវ៉ាន់

សមយុទ្ធរបស់ចិនដីគោកត្រូវបានធ្វើឡើងក្រោយពីមេដឹកនាំតៃវ៉ាន់ លោកស្រី Tsai Ing-wen ជួបពិភាក្សាការងារជាមួយប្រធានសភាជាន់ទាបអាម៉េរិក Kevin McCarthy នៅ California កាលពីថ្ងៃតី 05 មេសា ដែលជាជំនួបដំបូងរវាងមេដឹកនាំសភាជាន់ទាបអាម៉េរិក និងមេដឹកនាំកោះតៃវ៉ាន់ នៅលើទឹកដីអាម៉េរិក។

ប្រទេសចិនប្រកាសថា តៃវ៉ាន់គឺជាខេត្តមួយរបស់ខ្លួនដែលរង់ចាំតែការបង្រួបបង្រួមប៉ុណ្ណោះ និងមិនរំលងចោលការប្រើប្រាស់កម្លាំងបាយ បើសិនចាំបាច់។ ចំណែកតៃវ៉ាន់វិញក៏បានអះអាងថា មានតែប្រជាជនរបស់ពួកគេប៉ុណ្ណោះដែលអាចសម្រេចវាសនាអនាគតរបស់កោះនេះ៕

April 11, 2023

ណាតូ (NATO) ជិតធ្វើសមយុទ្ធទ័ពអាកាសធំបំផុតក្នុងប្រវត្តិសាស្ត្រ

អាល្លឺម៉ង់បានប្រកាសថា ណាតូ កំពុងរៀបផែនការធ្វើសមយុទ្ធទ័ពអាកាសធំបំផុតមិនធ្លាប់មានក្នុងអតីតកាល ដោយមានយន្តហោះយោធាចូលរួមចំនួន 220 គ្រឿង។

ព្រឹត្តិការណ៍សមយុទ្ធទ័ពអាកាស Air Defense 2023 របស់ណាតូនឹងធ្វើឡើងពីថ្ងៃទី 12 ដល់ 24 មិថុនា 2023 នៅអឺរ៉ុប នេះបើយោងតាមកងទ័ពអាល្លឺម៉ង់ (Bundeswehr) ដែលបានឱ្យដឹងកាលពីចុងសប្ដាហ៍កន្លង។ នេះគឺជាសមយុទ្ធទ័ពអាកាសធំបំផុតមិនធ្លាប់មានក្នុងប្រវត្តិសាស្ត្ររបស់សម្ព័ន្ធយោធាណាតូ ដោយមានទាហានចូលរួមសរុប 10,000 នាក់ និងយន្តហោះយោធាចំនួន 220 គ្រឿងមកពីសមាជិកចំនួន 24 ប្រទេស ក្នុងនោះមានទាំងហ្វាំងឡង់ដែលជាសមាជិកថ្មីរបស់ណាតូ។

ទ័ពអាកាសអាម៉េរិកនឹងបញ្ជូនយន្តហោះចំនួន 100 គ្រឿងទៅចូលរួមសមយុទ្ធ។ ស៊ុយអែតដែលជាប្រទេសកំពុងរង់ចាំការយល់ព្រមឱ្យចូលជាសមាជិកណាតូក៏នឹងចូលរួម Air Defense 2023។

ផែនការនៃសមយុទ្ធនេះត្រូវបានកសាងទៅតាមសេណារីយោ «ប្រើប្រាស់មាត្រាទី 5 នៃធម្មនុញ្ញរបស់ណាតូ» ដែលចែងអំពីគោលការណ៍ការពារជាក្រុមរបស់សម្ព័ន្ធយោធានេះនៅពេលសមាជិកណាមួយត្រូវរងការវាយប្រហារពីសត្រូវ។

ពីឡុតនឹងត្រូវប្រឈមនឹងមីស៊ីលដីប្រឆាំងអាកាស (ដោយការបង្ហាញត្រាប់), ឧបករណ៍រំខានរលកអេឡិចត្រូនិក និងការគំរាមកំហែងដទៃ។ Bundeswehr ឱ្យដឹងថា ខ្លឹមសារនៃសមយុទ្ធនេះ «នឹងមានការលំបាកខ្លាំង» ដើម្បីបង្កើនប្រសិទ្ធភាពឱ្យបានខ្ពស់បំផុតចំពោះសកម្មភាពសហការគ្នារវាងបណ្ដាសមាជិក និងដើម្បីបង្ហាញកម្លាំងរបស់ណាតូ។

សមយុទ្ធខាងលើនេះ ភាគច្រើនធ្វើឡើងនៅលើទឹកដីរបស់អាល្លឺម៉ង់ ប៉ុន្តែបើយោងតាមផែនទីដែលផ្ដល់ដោយ Bundeswehr ដែនអាកាសរបស់អេស្តូនីដែលមានព្រំដែនជាប់នឹងរុស្ស៊ី និងប្រទេសរ៉ូម៉ានី ជាប់នឹងអ៊ុយក្រែន ក៏អាចត្រូវបានប្រើប្រាស់។

Air Defense លើកទី 2023 នឹងត្រូវបានធ្វើឡើងបន្ទាប់ពីសមយុទ្ធ Defender Europe លើកទី 2023 ដែលដឹកនាំដោយសហរដ្ឋអាម៉េរិក ត្រូវបានធ្វើឡើងចាប់ពីថ្ងៃទី 22 មេសា នៅក្នុងដប់ប្រទេសនៅអឺរ៉ុប ដោយមានទាហានអាម៉េរិកចូលរួម 9,000 នាក់ និង 17,000 នាក់មកពី 26 ប្រទេសនៅជុំវិញពិភពលោក៕

April 10, 2023

ប្រហោងខ្មៅបង្កើតបានជាជ្រលងផ្កាយថ្មីមួយជួរប្រវែងពីរសែនឆ្នាំពន្លឺ

ក្រុមអ្នកវិទ្យាសាស្ត្ររកឃើញប្រហោងខ្មៅ (black hole) ខ្នាតយក្សមួយកំពុង «រត់គេច» ពីកាឡាក់ស៊ីរបស់វា ដែលនេះអាចបណ្ដាលមកពីការប៉ះទង្គិចរវាងប្រហោងខ្មៅ និងប្រហោងខ្មៅ។

លទ្ធផលនៃការស្រាវជ្រាវដែលត្រូវបានចុះផ្សាយលើទស្សនាវដ្ដី Astrophysical Journal Letters កាលពីថ្ងៃទី 06 មេសា បានឱ្យដឹងថា ប្រហោងខ្មៅខាងលើនេះមានម៉ាសធំជាង 20 លានដងនៃម៉ាសព្រះអាទិត្យ និងធ្វើដំណើរក្នុងល្បឿន 6.4 លានគីឡូម៉ែត្រ/ម៉ោង។ វាត្រូវបានប្រទះឃើញដោយចៃដន្យនៅពេលអ្នកស្រាវជ្រាវមកពីសាកលវិទ្យាល័យ Yale ពិនិត្យទិន្នន័យរូបភាពពីតេឡេស្កុបអវកាស Hubble។

«យើងបានឃើញពន្លឺមួយខ្សែដែលស្ទើរតែត្រង់ជួរ (ប្រវែង 200,000 ឆ្នាំពន្លឺ ដែលមួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ) ឆ្ពោះទៅកាន់ចំណុចកណ្ដាលរបស់កាឡាក់ស៊ីមួយ។ ដោយសារមិនធ្លាប់ឃើញពីមុនមក យើងក៏សម្រេចចិត្តស្រាវជ្រាវដោយប្រើតេឡេស្កុប Keck I នៃស្ថានីយសង្កេត WM Kech នៅ Hawaii» ប្រធានក្រុមស្រាវជ្រាវ Pieter van Dokkum មកពីសាកលវិទ្យាល័យ Yale ឱ្យដឹងដូច្នេះ។

ក្រុមស្រាវជ្រាវជឿថា ព្រឹត្តិការណ៍នេះកើតឡើងដោយសារការប៉ះទង្គិចគ្នារវាងប្រហោងខ្មៅខ្នាតយក្សចំនួនបី នៅពេលកាឡាក់ស៊ីមេចំនួនពីររបស់ពួកវាត្រូវច្របាច់បញ្ចូលគ្នាកាលពី 50 លានឆ្នាំមុន។ ក្នុងនោះ កាឡាក់ស៊ីមួយមានប្រហោងខ្មៅពីរវិលជុំវិញគ្នា ខណៈកាឡាក់ស៊ីមួយទៀតមានប្រហោងខ្មៅខ្នាតយក្សចំនួនមួយ។ ការប៉ះគ្នារវាងប្រហោងខ្មៅទាំងបីនេះកើតឡើងយ៉ាងច្របូកច្របល់ ហើយចុងក្រោយ មួយក្នុងចំណោមប្រហោងខ្មៅទាំងបីនេះបានប្រើប្រាស់បរិមាណចលនាពីប្រហោងខ្មៅពីរផ្សេងទៀត បោះពួយសំដៅទៅកាន់ទីអវកាសខាងក្រៅកាឡាក់ស៊ីរបស់វា។

នៅពេលប្រហោងខ្មៅរត់គេច វាក៏បានប៉ះនឹងលំហរបស់អវកាសដែលមានផ្ទុកពេញដោយធូលី ហើយស្រូបពួកវានៅក្នុងដំណើរការមួយដែលហៅថា ការប្រមូលផ្ដុំ (Accretion) នាំឱ្យកើតមានផ្កាយថ្មីៗជាបន្តបន្ទាបតាមពីក្រោយផ្លូវគោចរ។

ទ្រឹស្ដីស្ដីពីប្រហោងខ្មៅរត់គេចត្រូវបានលើកឡើងដំបូងនៅក្នុងទសវត្សរ៍ឆ្នាំ 1970។ បើសិនការសង្កេតបន្ទាប់ពីតេឡេស្កុបអវកាស James Webb និងស្ថានីយសង្កេតកាំរស្មី X Chandra អាចបញ្ជាក់ពីការសន្និដ្ឋានរបស់ក្រុមអ្នកស្រាវជ្រាវខាងលើ នោះវាអាចពង្រឹងទ្រឹស្ដីដែលមានអាយុ 50 ឆ្នាំមួយនេះ៕

April 10, 2023

ប្រធានាធិបតីប្រេស៊ីល ស្នើឱ្យអ៊ុយក្រែនបោះបង់គ្រីមៀជាថ្នូរនឹងសន្តិភាព

ប្រធានាធិបតីប្រេស៊ីល ស្នើឱ្យអ៊ុយក្រែនធ្វើសម្បទានឧបទ្វីបគ្រីមៀ (Crimea) ទៅឱ្យរុស្ស៊ី ជាថ្នូរនឹងការបញ្ចប់សង្គ្រាម ប៉ុន្តែទីក្រុងកៀវបានច្រានចោល។

«បញ្ហាឧបទ្វីបគ្រីមៀអាចចរចាគ្នាបាន។ ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី មិនអាចចង់បានគ្រប់យ៉ាង។ ពិភពលោកត្រូវការស្ថិរភាព ហើយយើងត្រូវរកដំណោះស្រាយ» ប្រធានាធិបតីប្រេស៊ីល Luiz Inacio Lula da Silva ថ្លែងដូច្នេះកាលពីថ្ងៃទី 06 មេសា ពេលលោកស្នើឱ្យអ៊ុយក្រែនធ្វើសម្បទាននៅក្នុងបញ្ហាគ្រីមៀ ដើម្បីបញ្ចប់សង្គ្រាមឱ្យបានឆាប់។

ប្រធានាធិបតី Lula នៅសប្ដាហ៍ក្រោយនេះនឹងមានដំណើរទស្សនកិច្ចទៅកាន់ប្រទេសចិន និងមានគម្រោងពិភាក្សាអំពីបញ្ហាសង្គ្រាមរវាងរុស្ស៊ី និងអ៊ុយក្រែន។ ទីក្រុងប៉េកាំង មុននោះបានប្រកាសអំពីផែនការសន្តិភាព 12 ចំណុចសម្រាប់អ៊ុយក្រែន ក្នុងនោះក៏មានការអំពាវនាវដល់ភាគីនានាជួយដល់មូស្គូ និងកៀវ ដើម្បីដោះស្រាយវិបត្តិនេះ។

មេដឹកនាំប្រេស៊ីលបានលើកជាគំនិតស្ដីពីការបង្កើតក្រុមមួយដែលមានបណ្ដាប្រទេសជាអ្នកសម្រុះសម្រួលសម្រាប់បញ្ហារុស្ស៊ី-អ៊ុយក្រែន។ លោក Lula និយាយថា លោកជឿថា ក្រុមនេះនឹងត្រូវបានបង្កើតឡើងបន្ទាប់ពីដំណើរទស្សនកិច្ចរបស់លោកនៅប្រទេសចិន។

អ្នកនាំពាក្យរបស់ក្រសួងការបរទេសអ៊ុយក្រែន លោក Oleg Nikolenko កាលពីថ្ងៃទី 07 មេសា បានរិះគន់ចំពោះសំណើរបស់ប្រធានាធិបតីប្រេស៊ីល និងអះអាងថា ទីក្រុងកៀវនឹងមិនធ្វើសម្បទានទឹកដីជាដាច់ខាត ទោះជាមួយសង់ទីម៉ែត្រ។

«រាល់ការប្រឹងប្រែងសម្រុះសម្រួលដើម្បីស្ដារសន្តិភាពនៅអ៊ុយក្រែន ត្រូវតែយោងទៅលើការគោរពអធិបតេយ្យភាព និងបូរណភាពទឹកដីរបស់អ៊ុយក្រែន» លោក Nikolenko ថ្លែងដូច្នេះ។

កាលពីខែតុលា 2022 មហាសេដ្ឋីអាម៉េរិក លោក Elon Musk ក៏ធ្លាប់បានលើកឡើងនូវដំណោះស្រាយដូចទៅនឹងប្រធានាធិបតីប្រេស៊ីល ប៉ុន្តែក៏ត្រូវបានទីក្រុងកៀវបដិសេធ។

រុស្ស៊ីបានរឹបអូសយកឧបទ្វីបគ្រីមៀរបស់អ៊ុយក្រែន បន្ទាប់ពីការធ្វើប្រជាមតិកាលពីឆ្នាំ 2014។ មូស្គូនិយាយថា លទ្ធផលនៃការធ្វើប្រជាមតិបង្ហាញថា ប្រជាជនភាគច្រើននៅគ្រីមៀ ចង់ក្លាយជាផ្នែកមួយរបស់រុស្ស៊ី ប៉ុន្តែ អ៊ុយក្រែន និងបណ្ដាប្រទេសលោកខាងលិចចាត់ទុកថា នេះគឺជាទង្វើខុសច្បាប់។

វិមានក្រឹមឡាំងស្នើឱ្យអ៊ុយក្រែនទទួលស្គាល់អធិបតេយ្យភាពរបស់រុស្ស៊ីចំពោះគ្រីមៀ និងតំបន់មួយចំនួនទៀតដែលមូស្គូបានរឹបអូស ដើម្បីជាថ្នូរនឹងសន្តិភាព។ ទីក្រុងកៀវប្រកាសថា មិនចរចារកសន្តិភាព បើសិនរុស្ស៊ីមិនទាន់ចាកចេញពីដែនដីទាំងឡាយដែលពួកគេបានគ្រប់គ្រងនៅអ៊ុយក្រែន ក្នុងនោះមានឧបទ្វីបគ្រីមៀជាដើម៕

April 8, 2023

រុស្ស៊ីនឹងជួយវៀតណាមក្នុងការអភិវឌ្ឍបច្ចេកវិទ្យាស្រាវជ្រាវនុយក្លេអែរថ្មី

គម្រោងសាងសង់មជ្ឈមណ្ឌលស្រាវជ្រាវវិទ្យាសាស្ត្រ និងបច្ចេកវិទ្យនុយក្លេអែរ (CNST) និងរោងចក្រស្រាវជ្រាវថ្មីនៅវៀតណាម កំពុងត្រូវបានរដ្ឋាភិបាលរុស្ស៊ី និងវៀតណាមពិភាក្សាដើម្បីឈានដល់ការចុះកិច្ចព្រមព្រៀងនាពេលខាងមុខ។

ព័ត៌មាននេះត្រូវបានចែករំលែកនៅក្នុងដំណើរទស្សនកិច្ចរបស់ឧបនាយករដ្ឋមន្ត្រីរុស្ស៊ី Chernyshenko Dmitry Nikolaevich និងក្រុមការងារ នៅវិទ្យាស្ថានថាមពលអាតូមិកវៀតណាម របស់ក្រសួងវិទ្យាសាស្ត្រ និងបច្ចេកវិទ្យា កាលពីព្រឹកថ្ងៃទី 07 មេសា។ នេះបើតាមការចុះផ្សាយរបស់សារព័ត៌មានវៀតណាម VNExpress។

ក្នុងជំនួបខាងលើ អនុរដ្ឋមន្ត្រីក្រសួងវិទ្យាសាស្ត្រវៀតណាម បានសង្កត់ធ្ងន់ថា វៀតណាម និងរុស្ស៊ីបានធ្វើកិច្ចសហប្រតិបត្តិការទ្វេភាគីក្នុងវិស័យអប់រំ បណ្ដុះបណ្ដាល វិទ្យាសាស្ត្រ និងបច្ចេកវិទ្យា។ ក្នុងវិស័យវិទ្យាសាស្ត្រ និងបច្ចេកវិទ្យាដែលភាគីទាំងពីរបានសហការ រួមមាន ថាមពលអាតូមិក បច្ចេកវិទ្យាជីវសាស្ត្រ វត្ថុធាតុថ្មី អេឡិចត្រូនិច និងបច្ចេកវិទ្យាស្វ័យប្រវត្ត។ល។

ក្នុងវិស័យថាមពលអាតូមិក អតីតសូវៀតធ្លាប់បានជួយវៀតណាមក្នុងការស្ដារ និងលើកកម្ពស់គុណភាពម៉ាស៊ីនប្រតិកម្មនុយក្លេអែរ (រ៉េអាក់ទ័រនុយក្លេអ៊ែរ) ដែលស្រាវជ្រាវនៅខេត្ត Da Lat ប្រទេសវៀតណាម។ បច្ចុប្បន្ន រុស្ស៊ីកំពុងជួយវៀតណាមក្នុងការអនុវត្តគម្រោងសាងសង់ CNST ដែលមានរោងចក្រស្រាវជ្រាវថ្មី។

ឧបនាយករដ្ឋមន្ត្រីរុស្ស៊ី Dmitry Chernyshenko ឱ្យដឹងថា សម្រាប់គម្រោងមជ្ឈមណ្ឌលស្រាវជ្រាវ CNST អង្គភាព RosAtom កំពុងត្រៀមឯកសារស្នើដេញថ្លៃ។ «ភាគីទាំងពីរបន្តពិភាក្សាគ្នា ហើយអាចចុះកិច្ចព្រមព្រៀងនៅពាក់កណ្ដាលឆ្នាំនេះ» លោក Dmitry Chernyshenko បញ្ជាក់ដូច្នេះ។

គម្រោងមជ្ឈមណ្ឌលស្រាវជ្រាវវិទ្យាសាស្ត្របច្ចេកវិទ្យានុយក្លេអែរត្រូវបានអនុវត្តទៅតាមកិច្ចព្រមព្រៀងអន្តររដ្ឋាភិបាលដែលចុះហត្ថលេខាកាលពីឆ្នាំ 2011។ គម្រោងនេះត្រូវបានរដ្ឋាភិបាលវៀតណាមអនុម័តគោលនយោបាយវិនិយោគកាលពីឆ្នាំ 2018៕

April 7, 2023

ទ័ពអាកាសអាម៉េរិកចង់ទិញយន្តហោះចម្បាំងចំនួនច្រើនគ្រឿងមិនធ្លាប់មាន

ទ័ពអាកាសរបស់សហរដ្ឋអាម៉េរិក រៀបផែនការបញ្ជាទិញយន្តហោះចម្បាំងថ្មីចំនួន 72 គ្រឿងក្នុងឆ្នាំ 2024 ដើម្បីធ្វើទំនើបកម្មទ័ពអាកាស ដែលនេះគឺជាចំនួនដ៏ច្រើនមិនធ្លាប់មានក្នុងអំឡុងរាប់សិបឆ្នាំកន្លង។

សំណើនេះត្រូវបានឧត្តមសេនីយ៍ឯក Richard Moore មេបញ្ជាការរងទ័ពអាកាសអាម៉េរិក លើកឡើងនៅមុខសភាកាលពីថ្ងៃទី 06 មេសា ដើម្បីធ្វើការពិនិត្យសម្រេចចំពោះគម្រោងថវិកាសម្រាប់ឆ្នាំបន្ទាប់។ យោងតាមសំណើនេះ ទ័ពអាកាសអាម៉េរិកចង់បានយន្តហោះចម្បាំងបំបាំងកាយ F-35A ចំនួន 48 គ្រឿង និង F-15EX ចំនួន 24 បន្ថែមទៀត នៅក្នុងឆ្នាំសារពើពន្ធ 2024។

«នេះគឺជាលើកដំបូងហើយដែលទ័ពអាកាសអាម៉េរិកស្នើទិញយន្តចម្បាំងច្រើនបែបនេះ រាប់ចាប់តាំងពីខ្ញុំធ្វើការក្នុងជួរកងទ័ព» ឧត្តមសេនីយ៍ឯក Moore និយាយដូច្នេះ និងបន្តថា សំណើនេះនឹងមិនត្រូវធ្វើឡើងតែម្ដងឡើយ តែនឹងត្រូវធ្វើឡើងវិញនៅក្នុងបណ្ដាឆ្នាំខាងមុខ។

ក្រុមមេដឹកនាំ និងមេបញ្ជាការទ័ពអាកាសអាម៉េរិក ច្រើនឆ្នាំមកនេះបានបញ្ជាក់ថា ទ័ពអាកាសត្រូវការទិញយន្តហោះចម្បាំងថ្មីចំនួន 72 គ្រឿងជារៀងរាល់ឆ្នាំ ដើម្បីធ្វើទំនើបកម្មកងកម្លាំង ក៏ដូចជាកាត់បន្ថយអាយុកាលមធ្យមរបស់យន្តហោះ។ បើសិនមិនដូច្នោះទេ ពួកគេនឹងមិនមានយន្តហោះគ្រប់គ្រាន់ដើម្បីផ្លាស់ប្ដូរយន្តហោះចាស់ និងជិតត្រូវបានដាក់ឱ្យចូលនិវត្តន៍ ដូច F-15C ជាដើម។

ក៏ប៉ុន្តែ សភាអាម៉េរិក ច្រើនឆ្នាំកន្លងបានយល់ព្រមឱ្យទិញយន្តហោះចម្បាំងតិចជាងការចង់បានរបស់ទ័ពអាកាសប្រទេសនេះ។ ក្នុងឆ្នាំសារពើពន្ធ 2023 សភាអាម៉េរិកអនុម័តឱ្យទិញតែ 67 គ្រឿងប៉ុណ្ណោះ ដែលរួមមាន 43 គ្រឿងជា F-35A និង 24 គ្រឿងជា F-15EX៕

April 7, 2023

នេះជារូបភាពច្បាស់ និងរស់រវើកបំផុតស្ដីពីផ្ទៃព្រះអាទិត្យ ដែលបង្កើតឡើងពីរូបថត 9 ម៉ឺនសន្លឹក

ក្រុមអ្នកថតរូបតារាសាស្ត្របានធ្វើឱ្យមានការភ្ញាក់ផ្អើលខ្លាំងនៅពេលបញ្ចេញរូបភាពស្ដីពីផ្ទៃព្រះអាទិត្យលឿងឆ្អៅ ដោយការផ្គុំរូបថតប្រមាណ 90,000 សន្លឹក។

ដើម្បីបង្កើតបានជារូបភាពនេះ Andrew McCarthy និង Jason Guenzel បានប្រើប្រាស់រូបថតមួយចំនួនរបស់ពួកគេ និងរូបថតបានពីស្ថានីយសង្កេតព្រះអាទិត្យ និងបរិយាកាសព្រះអាទិត្យ រួមទាំងរូបថតពីយានអវកាសរបស់ណាសា ដើម្បីផ្គុំចូលគ្នា។ នេះបើតាម Live Science ចុះផ្សាយកាលពីថ្ងៃទី 05 មេសា។

អ្នកថតរូបខាងលើបានផ្គុំរូបថតស្ដីពីព្រះអាទិត្យប្រហែល 90,000 សន្លឹកចូលគ្នា ដើម្បីបង្កើតបានជារូបភាពមួយសន្លឹកចុងក្រោយដែលពួកគេហៅថា «ការរួបរួមរបស់ Helios» បង្ហាញពីផ្ទៃដែលពេញដោយអណ្ដាតភ្លើងលឿងឆ្អៅរបស់ព្រះអាទិត្យ អមនឹងកាំរស្មីប្លាស្មាវិលវល់ដូចទៅនឹងស្រទាប់រោមជុំវិញលើកូនបាល់តេនីស។

ចំណុះដែលលេចធ្លោជាងគេនៅលើរូបភាពនេះគឺ «កំណួចខ្យល់ប្លាស្មា» ដែលខ្ពស់បំផុតនៅលើព្រះអាទិត្យ។ កំណួចខ្យល់ប្លាស្មានេះមានកម្ពស់រហូតដល់ 178,000 គីឡូម៉ែត្រ ស្មើនឹងផែនដីចំនួនបួនរៀបជាជួរ។ ព្រឹត្តិការណ៍នេះកើតឡើងរយៈពេលបីថ្ងៃ មុនពេលក្លាយជាពពកប្លាស្មា និងត្រូវបានរុញច្រានចេញឆ្ងាយពីព្រះអាទិត្យ។

Guenzel និយាយថា ស្នាដៃ «ការរួបរួមរបស់ Helios» នេះ គឺជារូបភាពស្ដីពីព្រះអាទិត្យដែលច្បាស់ និងរស់រវើកបំផុត ដែលគាត់ និង McCarthy ធ្លាប់បានបង្កើតឡើង។

April 6, 2023

«ជ្រូកព្រៃយក្ស» កំពុងដណ្ដើមកាន់កាប់ទឹកដីនៅកាណាដា

ចំនួនសត្វជ្រូកយក្សនៅក្នុងតំបន់មួយចំនួនរបស់ប្រទេសកាណាដា មានដូចជា Manitoba និង Saskatchewan ជាដើម បានកើនឡើងរហូតដល់ថ្នាក់ធ្វើឱ្យការកម្ចាត់លែងមានប្រសិទ្ធភាព។

បច្ចុប្បន្ន ជ្រូកព្រៃយក្សកំពុងគំរាមកំហែងដល់ទឹកដីភាគខាងជើងរបស់សហរដ្ឋអាម៉េរិក ជាប់ព្រំដែនកាណាដា នេះបើតាម Interesting Engineering ចុះផ្សាយកាលពីថ្ងៃទី 04 មេសា។ ជ្រូកយក្សពុំមែនជាអម្បូរសត្វថ្មី ឬទាក់ទងនឹងការកែសម្រួលហ្សែននៅក្នុងបន្ទប់ពិសោធន៍។ មូលហេតុដែលត្រូវបានគេហៅថា ជ្រូកយក្ស ក៏ព្រោះតែទំហំដងខ្លួន និងសមត្ថភាពរក្សាជីវិតរបស់ពួកវានៅក្នុងអាកាសធាតុត្រជាក់ខ្លាំងនៅកាណាដា។ ជ្រូកយក្សមួយក្បាលអាចមានទម្ងន់រហូតដល់ 300 គីឡូក្រាម និងអាចរស់នៅជាមួយអាកាសធាតុត្រជាក់ -50 អង្សាសេ ដោយការកាយរូងជម្រៅពីរម៉ែត្រខាងក្រោមព្រឹល។ បច្ចុប្បន្ន ពួកវារស់នៅលើទឹកដីទំហំជិត 1.7 លានគីឡូម៉ែត្រការ៉េ។

ជ្រូកយក្សគឺជាលទ្ធផលនៃការពិសោធបង្កាត់ពូជរវាងជ្រូកព្រៃពីអឺរ៉ុប និងជ្រូកស្រុកនៅកាណាដា។ ក្រុមអ្នកបង្កាត់ពូជមានបំណងធ្វើពិពិធកម្មវិស័យឧស្សាហកម្មចិញ្ចឹមសត្វ និងបង្កើតប្រភេទជ្រូកដែលអាចរស់នៅក្នុងរដូវត្រជាក់ខ្លាំង។ មុននេះប្រហែលពីរទសវត្សរ៍ ប្រជាកសិករនាំគ្នាលែងជ្រូកយក្សរបស់ពួកគេចូលទៅក្នុងព្រៃ ដោយសារតែតម្រូវការសាច់ជ្រូកបានធ្លាក់ចុះខ្លាំង។ ច្រើនឆ្នាំក្រោយមក ពួកវាក៏មានចំនួនកាន់តែច្រើន និងក្លាយជាជ្រូកព្រៃយក្ស ដែលកំពុងគំរាមកំហែងដល់ទីក្រុងធំៗនៅកាណាដា។

ដើម្បីរកវិធីសមស្របសម្រាប់ការកាត់បន្ថយកំណើននៃចំនួនជ្រូកព្រៃយក្ស ដំបូងអ្នកស្រាវជ្រាវត្រូវដឹងថា ពួកវាកំពុងរាលដាលដល់ទីណា និងដោយវិធីណា។ ដូច្នេះ Brook និងសហការីក៏បានបង្កើតផែនទីដែលបង្ហាញពីវត្តមានរបស់ជ្រូកព្រៃយក្ស ក្នុងរយៈពេលច្រើនឆ្នាំកន្លង។ ថ្មីៗនេះ លោក Brook បានចែករំលែករូបថតនៅលើបណ្ដាញសង្គម បង្ហាញថា ជ្រូកព្រៃយក្សបង្ហាញខ្លួនជាង 54,000 លើក។ Brook សង្កត់ធ្ងន់ថា ចំនួនសត្វជ្រូកព្រៃយក្សកើនឡើងច្រើនជាងគេនៅតំបន់ក្បែរ Edmonton ធ្វើឱ្យមានការបារម្ភថា ពួកវានឹងចូលឈ្លានពានទីក្រុង។

ជ្រូកព្រៃយក្សតែងធ្វើដំណើរជាហ្វូង អាចឡើងដល់រាប់សិបក្បាល ធ្វើឱ្យហានិភ័យគ្រោះថ្នាក់ចរាចរណ៍ ក៏ដូចជាការខាតបងដំណាំកើនឡើងខ្ពស់។

ចំនួនជ្រូកព្រៃយក្សនៅបណ្ដាតំបន់ដូចជា Manitoba និង Saskatchewan ជាដើមរបស់កាណាដា បានកើនឡើងដល់កម្រិតខ្ពស់ខ្លាំង ធ្វើឱ្យការកម្ចាត់លែងមានប្រសិទ្ធភាព។ បច្ចុប្បន្ន ការចូលកាន់កាប់របស់ហ្វូងជ្រូកព្រៃយក្សនៅតំបន់ព្រំដែនជាប់នឹងទឹកដីអាម៉េរិក គឺគ្រាន់តែជាបញ្ហាពេលវេលាប៉ុណ្ណោះ៕

April 6, 2023

Category: អន្តរជាតិ