អន្តរជាតិ - La Reine Media

ភរិយារបស់ប្រធានាធិបតីអ៊ុយក្រែន ឆ្លងវីរុសCOVID-19 ខណៈដែលពិភពលោកមានអ្នកជំងឺជាង7.7លាននាក់

លោកស្រី Olena ភរិយារបស់ប្រធានាធិបតីអ៊ុយក្រែន Zelenskiy កាលពីម្សិលមិញបានប្រាប់ឱ្យដឹងអំពីលទ្ធផលវិជ្ជមានជាមួយនឹងវីរុសCOVID-19 ដែលលោកស្រីទទួលបានក្រោយពីការធ្វើតេស្ត ប៉ុន្តែស្វាមីនិងកូនៗរបស់លោកស្រីទទួលបានលទ្ធផលអវិជ្ជមានជាមួយនឹងមេរោគនេះ។

“ថ្ងៃនេះខ្ញុំបានទទួលលទ្ធផលធ្វើតេស្តវិជ្ជមានជាមួយនឹង COVID-19។ ជាដំណឹងដែលខ្ញុំមិនបានរំពឹងទុកទាល់តែសោះ។ ពិសេសគឺនៅពេលដែលខ្ញុំនិងគ្រួសារតែងតែគោរពគោលការទាក់ទិននឹងការពាក់ម៉ាស់ ពាក់ស្រោមដៃ និងកាត់បន្ថយការទាក់ទងផ្ទាល់” លោកស្រី Olena Zelenska ភរិយារបស់ប្រធានាធិបតីអ៊ុយក្រែន សរសេរបែបនេះនៅលើ Facebook។

លោកស្រី Olena បានឱ្យដឹងថា លោកស្រីនៅមានសុខភាពល្អ និងមិនបាច់ចូលពេទ្យ ប៉ុន្តែបានរក្សាគម្លាតជាមួយនឹងគ្រួសារទាំងមូល។

សូមរំឭកថា កន្លងមកក៏មានមន្ត្រីជាន់ខ្ពស់របស់បណ្ដាប្រទេសជាច្រើនបានឆ្លងវីរុសCOVID-19នេះ ក្នុងនោះមានដូចជា នាយករដ្ឋមន្ត្រីអង់គ្លេស (Boris Johnson) អនុប្រធានាធិបតីទីមួយរបស់អ៊ីរ៉ង់ (Eshaq Jahangiri) និងឧបនាយករដ្ឋមន្ត្រីអេស្ប៉ាញ (Carmen Calvo) ចំណែកលោកស្រី Sophie Gregoire ដែលជាភរិយារបស់ប្រធានាធិបតីកាណាដាក៏ត្រូវបានបញ្ជាក់ថាបានឆ្លងវីរុសនេះដែរ។ ក្រៅពីនេះនៅមានរដ្ឋមន្ត្រី អនុរដ្ឋមន្ត្រី និងមន្ត្រីជាន់ខ្ពស់នៃប្រទេសជាច្រើនផ្សេងទៀតក៏ធ្លាប់បានឆ្លង COVID-19។

ប្រទេសអ៊ុយក្រែនបានចាប់ផ្ដើមបន្ធូរបន្ថយការរឹតត្បិតនានាទាក់ទងនឹង COVID-19 ចាប់ពីចុងខែឧសភា ក្នុងនោះក៏បានអនុញ្ញាតឱ្យមានការប្រកួតបាល់ទាត់ឡើងវិញផងដែរ។ ចំណែកបណ្ដាញរថភ្លើងក្រោមដីនៅក្នុងរដ្ឋធានី Kiev ក៏បានដំណើរការឡើងវិញក្រោយពីបានផ្អាកអស់រយៈពេល2ខែដោយសារវិបត្តិសុខភាព។

COVID-19 បានបង្ហាញខ្លួននៅក្នុងប្រទេសនិងដែនដីចំនួន221ក្នុងពិភពលោក បណ្ដាលឱ្យមនុស្សជាង7.7លាននាក់បានឆ្លងវីរុស និងជាង428,000នាក់បានស្លាប់។ ប្រទេសអ៊ុយក្រែន បច្ចុប្បន្នមានអ្នកជំងឺCOVID-19 ជិត 30,000នាក់ និងជាង870នាក់បានស្លាប់ដោយសារវីរុសនេះ៕

ប្រភព៖ សារព័ត៌មានបរទេស

June 13, 2020

ទិដ្ឋភាពទឹកជំនន់វាយប្រហារតំបន់ភាគខាងត្បូងប្រទេសចិន! សណ្ឋាគារនិងផ្ទះរាប់ពាន់ខ្នងរងការខូចខាត

ទឹកជំនន់និងបាក់ដីនៅភាគខាងត្បូងប្រទេសចិន បណ្ដាលឱ្យមនុស្សរាប់សែននាក់បាត់បង់ផ្ទះសម្បែង មនុស្សរាប់សិបនាក់ស្លាប់ និងបាត់ខ្លួន ខណៈទំហំការខូចខាតបានឡើងដល់រាប់រយលានដុល្លារអាមេរិក។

ភ្លៀងធំបណ្ដាលឱ្យមានទឹកជំនន់ និងបាក់ដីជាច្រើនថ្ងៃមកនេះនៅតំបន់ស្វយ័តរបស់ជនជាតិ Zhuang (Guangxi Zhuang Autonomous Region) ក្នុងខេត្តក្វាងស៊ី បានបំផ្លាញផ្ទះសម្បែកជាង1,300ខ្នង នាំឱ្យមនុស្សប្រមាណជា 230,000នាក់ត្រូវជម្លៀសខ្លួន និង6នាក់បានស្លាប់ ម្នាក់បាត់ខ្លួន។

នៅក្នុងតំបន់ Yangshuo ដែលជាទីតាំងទេសចរណ៍ដ៏ល្បីឈ្មោះ ស្ថិតក្នុងទីក្រុង Guilin ខេត្តក្វាងស៊ី ត្រូវបានលិចលុងក្នុងទឹកជំនន់ បណ្ដាលឱ្យអ្នកទេសចរ និងពលរដ្ឋត្រូវជម្លៀសខ្លួនតាមក្បូនឫស្សី។ អាជ្ញាធរបានឱ្យដឹងថា សណ្ឋាគារជាង1,000 កំពុងលិចទឹក និងតំបន់ទេសចរណ៍ជាង30កន្លែងផ្សេងទៀតរងការខូចខាត។

ក្រសួងគ្រប់គ្រងគ្រោះអាសន្នចិន (Ministry of Emergency Management) វាយតម្លៃថា ការខូចខាតផ្នែកសេដ្ឋកិច្ច អាចឡើងដល់550លានដុល្លារអាមេរិក។

ចំណែកនៅខេត្ត Hunan យ៉ាងហោចណាស់មានមនុស្ស13នាក់បានស្លាប់ដោយសារភ្លៀងធំ។ នៅខេត្ត Guizhou វិញ មានមនុស្សចំនួន8នាក់បានបាត់ខ្លួន។

ភ្លៀងធំបានផ្ដើមធ្លាក់ចាប់ពីដើមខែមិថុនា នាំឱ្យទឹកទន្លេចំនួន110នៅប្រទេសចិន “កើនឡើងខ្ពស់ដល់កម្រិតគ្រោះថ្នាក់”។ តាមការព្យាករ ភ្លៀងនឹងបន្តធ្លាក់ក្នុងរយៈពេលច្រើនថ្ងៃទៀត នៅទូទាំងភាគខាងត្បូងប្រទេសចិន។

ប្រភព៖ AFP

June 12, 2020

មន្ត្រីយោធាថ្នាក់វរសេនីយ៍ម្នាក់របស់ចិន ត្រូវអាមេរិកចាប់ខ្លួននៅពេលត្រៀមឡើងយន្តហោះត្រលប់មកស្រុក

Xin Wang ដែលជាមន្ត្រីយោធាចិនម្នាក់មានឋានន្តរសក្ដិថ្នាក់វរសេនីយ៍ ត្រូវបានចាប់ខ្លួននៅពេលនាំយកការសិក្សាស្រាវជ្រាវចាកចេញពីសហរដ្ឋអាមេរិក ព្រមទាំងត្រូវរងការចោទប្រកាន់ថាបានក្លែងបន្លំទិដ្ឋាការផងដែរ។

មន្ត្រីទាហានថ្នាក់វរសេនីយ៍ ឈ្មោះ Xin Wang នេះ ត្រូវបានអង្គភាពស៊ើបការណ៍សម្ងាត់អាមេរិកាំង (FBI) ចាប់ខ្លួនខណៈត្រៀមចេញដំណើរពីអាកាសយានដ្ឋានអន្តរជាតិ Los Angeles ត្រលប់មកកាន់តំបន់ Tianjin ប្រទេសចិនកាលពីថ្ងៃទី7មិថុនា។ ព័ត៌មានខាងលើនេះត្រូវបានក្រសួងយុត្តិធម៌សហរដ្ឋអាមេរិកប្រកាសកាលពីម្សិលមិញ។

យោងតាមកំណត់ហេតុរបស់ FBI លោក Wang កំពុងកាន់កាប់តំណែងប្រហាក់ប្រហែលនឹងវរសេនីយ៍ទោក្នុងជួរកងទ័ពរំដោះប្រជាជនចិន (PLA) និងនៅតែទទួលប្រាក់ខែពីកងទ័ពចិន។

ប៉ុន្តែ នៅក្នុងពាក្យស្នើសុំទិដ្ឋាការចូលទឹកដីសហរដ្ឋអាមេរិកកាលពីឆ្នាំ2018 លោក Wang បានសរសេរថា ខ្លួនគ្រាន់តែជាសាស្ត្រាចារ្យរងផ្នែកវេជ្ជសាស្ត្រនៅ PLA ចាប់ពីឆ្នាំ2002 ដល់2016 ហើយមកកាន់សហរដ្ឋអាមេរិកដើម្បីធ្វើការសិក្សាស្រាវជ្រាវវិទ្យាសាស្ត្រនៅសាកលវិទ្យាល័យ California នាទីក្រុង San Francisco (UCSF)។

Wang បានសារភាពថា “មានចេតនាកុហកអំពីដំណាក់កាលបម្រើការក្នុងជួរកងទ័ពនៅក្នុងលិខិតស្នើសុំទិដ្ឋាការគឺគ្រាន់តែដើម្បីបង្កើនលទ្ធភាពទទួលបានទិដ្ឋាការតែប៉ុណ្ណោះ”។

នៅពេលត្រៀមចាកចេញពីព្រលានយន្តហោះ Los Angeles កាលពីថ្ងៃទីអាទិត្យ Wang បាននិយាយជាមួយមន្ត្រីអាមេរិកាំងប្រចាំការនៅអាកាសយានដ្ឋានថា “បានទទួលការអនុញ្ញាតពីថ្នាក់លើ គឺប្រធានមន្ទីរពិសោធន៍នៅសាកលវិទ្យាល័យយោធាចិន ណែនាំឱ្យសង្កេតមើលរបៀបរៀបចំបន្ទប់ពិសោធន៍នៅ UCSF ហើយនាំយកព័ត៌មាននេះត្រលប់ទៅប្រទេសចិន”។

ក្រុមមន្ត្រីគយអាមេរិកាំងប្រចាំនៅព្រលានយន្តហោះទទួលបានព័ត៌មានថា “Wang នាំយកការសិក្សាស្រាវជ្រាវជាច្រើនពី UCSF ដើម្បីចែករំលែកទៅឱ្យអ្នករួមការងារនៅ PLA និងថែមទាំងបានផ្ញើលទ្ធផលនៃការសិក្សាស្រាវជ្រាវទៅកាន់មន្ទីរពិសោធន៍របស់ខ្លួននៅប្រទេសចិនតាមរយៈអ៊ីម៉ែល” នេះបើតាមសេចក្ដីប្រកាសរបស់ក្រសួងយុត្តិធម៌សហរដ្ឋអាមេរិក។

លទ្ធផលនៃការសិក្សាស្រាវជ្រាវរបស់ UCSF ដែល Wang យកតាមខ្លួននោះ ទទួលបានឧបត្ថម្ភពីក្រសួងសុខាភិបាលអាមេរិកាំង (United States Department of Health and Human Services) និងមន្ទីរសុខាភិបាលជាតិអាមេរិកាំង (National Institutes of Health)។ Wang ក៏បានលុបចោលសារក្នុងកម្មវិធី WeChat នៅលើទូរស័ព្ទរបស់ខ្លួននៅមុនពេលមកកាន់ព្រលានយន្តហោះដើម្បីធ្វើដំណើរត្រលប់មកប្រទេសចិន។

លោក Wang អាចប្រឈមមុខនឹងការជាប់ពន្ធនាគាររយៈពេល10ឆ្នាំ និងបង់ប្រាក់ពិន័យចំនួន 250,000ដុល្លារ បើសិនត្រូវបានកាត់ទោស។

នៅចំពោះមុខការព្រួយបារម្ភអំពីសន្តិសុខជាតិ រដ្ឋាភិបាលអាមេរិកាំងកំពុងស្វែងរកចាប់ខ្លួនក្រុមអ្នកស្រាវជ្រាវ និងក្រុមអ្នកវិទ្យាសាស្ត្រទាំងឡាយណាដែលទទួលបានជំនួយពីសហរដ្ឋអាមេរិកតែធ្វើការឱ្យកងទ័ពចិន ឬសហការជាមួយមន្ទីរស្រាវជ្រាវរបស់ចិន។

ប្រធានាធិបតី Donald Trump កាលពីថ្ងៃទី29ឧសភា បានប្រកាសថា និសិត្សនិងអ្នកស្រាវជ្រាវចិននឹងត្រូវហាមមិនឱ្យចូលទឹកដីអាមេរិក បើសិនពួកគេមានលទ្ធភាពផ្ទេរចំណេះដឹងផ្នែកបច្ចេកទេសទៅឱ្យកងទ័ពចិន។ សេចក្ដីសម្រេចនេះមានសុពលភាពចាប់ពីថ្ងៃទី1មិថុនាឆ្នាំ2020។ បទបញ្ជានេះមិនបាននិយាយលម្អិតនោះទេ ប៉ុន្តែទុកឱ្យក្រសួងការបរទេសជាអ្នកសម្រេចបន្ថែម៕

ប្រភព៖ SCMP

June 12, 2020

ខាងក្នុង “តំបន់ស្វយ័ត” នៅកណ្ដាលទឹកដីសហរដ្ឋអាមេរិកដែលបង្កើតឡើងដោយក្រុមបាតុករ

នៅតំបន់ប្រជុំជនក្នុងទីក្រុង Seattle ក្រុមបាតុករបាននាំគ្នាដាក់របងការពារនៅជុំវិញ ហើយដាក់ឈ្មោះទីនេះថាជា “តំបន់ស្វយ័ត Capitol Hill” បន្ទាប់ពីអង្គភាពប៉ូលិសបាន “ចុះចាញ់”។

មុននោះ ការប៉ះទង្គិចគ្នារវាងក្រុមបាតុករដែលកើតឡើងដោយសារការស្លាប់របស់ George Floyd ជាមួយនឹងក្រុមប៉ូលិសនៅទីក្រុង Seattle រដ្ឋវ៉ាស៊ីងតោន សហរដ្ឋអាមេរិក បានធ្លាក់ទៅក្នុងស្ថានភាពទាល់ច្រកអស់រយៈពេលមួយសប្ដាហ៍។ ចុងក្រោយ ប្រតិកម្មកាន់តែខ្លាំងឡើងៗរបស់ក្រុមបាតុករ ក៏បានធ្វើឱ្យអង្គភាពប៉ូលិសក្នុងតំបន់Seattle ត្រូវបង្ខំចិត្តចុះចាញ់ ដោយការដកមន្ត្រីប៉ូលិសទាំងអស់ចេញពីប៉ូស្តិ៍ក្នុងទីប្រជុំជន Capitol Hill ហើយទុកឱ្យក្រុមបាតុករធ្វើសកម្មភាពតាមអំពើចិត្ត។

“បរិវេណនេះ បច្ចុប្បន្នគឺជាទ្រព្យរបស់ប្រជាជន Seattle” បដាមួយមានសរសេរបែបនេះ។ តំបន់ដែលនៅជុំវិញបរិវេណនេះ មកដល់បច្ចុប្បន្ន បានក្លាយជាកន្លែងសម្រាប់ឱ្យប្រជាជនសាកល្បងរស់នៅដោយគ្មានវត្តមានរបស់សមត្ថកិច្ច។

មនុស្សរាប់រយនាក់ដែលនៅខាងក្នុងទីប្រជុំជននេះ តែងមកប្រមូលផ្ដុំគ្នាដើម្បីស្ដាប់សេចក្ដីថ្លែងការណ៍នានា រួមទាំងកំណាព្យ និងចម្រៀងផងដែរ។ កាលពីយប់ថ្ងៃទី9មិថុនាកន្លងទៅ មនុស្សរាប់សិបនាក់បាននាំគ្នាអង្គុយកណ្ដាលផ្លូវបែកជាមួយដើម្បីទស្សនាខ្សែភាពយន្តឯកសារ រឿង “វិសោធនកម្មលើកទី13” របស់អ្នកដឹកនាំរឿង Ava DuVernay ដែលនិយាយអំពីឥទ្ធិពលរបស់ប្រព័ន្ធយុត្តិធម៌ព្រហ្មទណ្ឌចំពោះជនជាតិអាមេរិកាំងដើមកំណើតអាហ្វ្រិក។ មួយថ្ងៃក្រោយមក នៅទីនេះគេឃើញមានក្មេងៗជាច្រើននាំគ្នាយកដីស និងទឹកថ្នាំមកគូសលេងនៅកណ្ដាលផ្លូវ។

ខាងលើនេះគ្រាន់តែជាការរៀបរាប់អំពីទិដ្ឋភាពខ្លះៗដែលបង្ហាញអំពីការរស់នៅដោយគ្មាននគរបាល នៅក្នុងតំបន់Seattle៕

ប្រភព៖ សារព័ត៌មានបរទេស

June 12, 2020

នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ (តពីម្សិលមិញ)

គំនិតដ៏មហាអស្ចារ្យដែលបង្ហាញឡើងយ៉ាងឆាប់រហ័សបែបនេះ គឺជាក្ដីស្រមើស្រមៃ ដែលមិនអាចទៅរួចបានឡើយ និងមានតែសាងភាពខូចខាតបន្ថែមច្រើនឡើងក្នុងវិស័យការទូត និងភាពជាអ្នកដឹកនាំរបស់សហរដ្ឋអាមេរិក។ សមាជិកដែលនៅសល់ ៦ប្រទេសទៀតរបស់ G7 គឺចក្រភពអង់គ្លេស បារាំង អាល្លឺម៉ង់ អ៊ីតាលី កាណាដា និងជប៉ុន នៅតែមានការសង្ស័យនៅក្នុងចិត្ត ក្នុងរឿងដែលចង់យកប្រទេសរុស្ស៊ីមកចូលរួម 1ទៀត ក្រោយពីដែនដីខ្លាឃ្មុំសមួយនេះ ត្រូវបានបណ្ដេញចេញនៅឆ្នាំ2014 ដោយសារករណី ចូលទៅឈ្លានពាន និងរំលោភយកដែនដីឆក ខ្រៃមៀរ។

ក្រៅពីនោះ អឺរ៉ុបត្រូវការដឹងមុនគេបំផុតថា តើលោកត្រាំ នឹងធ្វើអ្វីជាមួយឋានៈនៃភាពជាអ្នកដឹកនាំរបស់អាមេរិកក្នុងរបៀបរបបអន្តរជាតិ បែបសេរីនិយមនៃយុគសម័យក្រោយសង្គ្រាមលោកលើកទី2?។ វាមិនមែនត្រឹមតែថា ពួកប្រទេសសមាជិកផ្សេងៗទៀតរបស់ G7 មានអារម្មណ៍ធុញទ្រាន់តិចៗ ពីសំណើតាមអំពើចិត្តតែម្នាក់ឯងក្នុងរឿងការពង្រីកវង់(G7)ជាផ្លូវការរបស់លោកត្រាំប៉ុណ្ណោះទេ តែពួកអឺរ៉ុបថែមទាំងបានសម្រេចចិត្តរួចហើយទៀតផងថា ពួកត្រូវការថែរក្សាការសហការជាមួយចិនតទៅទៀត។

ជប៉ុន កូរ៉េខាងត្បូង អូស្ត្រាលី និងរុស្ស៊ី ក៏ដូចគ្នាដែរ សុទ្ធតែមានផលប្រយោជន៍ក្នុងការស្ដារ និងអភិវឌ្ឍន៍សេដ្ឋកិច្ចលំដាប់ភូមិភាគ ដោយមានចិនចូលមករួមជាមួយដែរ និងទាំងអស់គ្នាសុទ្ធតែត្រូវការឱ្យការស្ដារ និងអភិវឌ្ឍន៍នេះឱ្យរឹតតែស៊ីជម្រៅ ស្ថិតស្ថេរខ្លាំងឡើងទៀត។

ភាពបាក់បែករ៉ៅឆានផ្ទៃក្នុងរបស់ក្រុមប្រទេសលោកខាងលិច ក្នុងរឿងសម្ព័ន្ធភាពជាមួយចិន បានទទួលការបញ្ជាក់បន្ថែមដោយលោកស្រី មើកែល ក្នុងចំណុចសង្កេតផ្សេងៗ ដែលលោកស្រីបាននិយាយកាលពីសប្ដាហ៍កន្លងទៅ នៅពេលដែលលោកស្រីបានអះអាងថា បណ្ដាប្រទេសអឺរ៉ុបមាន “ផលប្រយោជន៍ខាងយុទ្ធសាស្ត្រដ៏ធំសម្បើម” ក្នុងការមានបដិសម្ព័ន្ធបែបចម្រើនជាមួយចិន បើទោះជាក្នុងពេលជាមួយគ្នានោះ នៅត្រូវខំព្យាយាមតាំងចិត្តយ៉ាងម៉ឺងម៉ាត់ ដើម្បីឱ្យបានឆ្ពោះទៅដល់ភាពជាភាគហ៊ុន ដែលមានភាពស្មើភាគគ្នាជាមួយចិនក៏ដោយ។

នៅក្នុងការជួបប្រាស្រ័យដ៏សំខាន់មួយដែលលោកស្រី មើរកែល បានទៅថ្លែងជាមួយមូលនិធិ Konrad-Adenauer Stiftung ក្រុមបណ្ដុំគំនិត ដែលមានសម្ព័ន្ធភាពជាមួយបក្ស គ្រីស្ទាន ដេម៉ូខ្រេទិក យូនៀន របស់លោកស្រី នៅទីក្រុងប៊ែរឡាំង កាលពីថ្ងៃទី27 ឧសភានោះ លោកស្រីបានប្រាប់ថា ចិននឹងក្លាយជារឿងមានកម្រិតភាពសំខាន់ខ្ពស់បំផុតមួយ នៅពេលរដ្ឋបាលរបស់លោកស្រីចូលទទួលតំណែងជាប្រធានរបស់សហភាពអឺរ៉ុបវិលជុំ 6ខែ ចាប់ពីថ្ងៃទី1 ខែកក្កដាខាងមុខ។

ការឈានដើរ ដែលខ្វះការត្រិះរិះ

លោកស្រី មើរកែល បានបញ្ជាក់ថា “យើងប្រជាពលរដ្ឋអឺរ៉ុប មានភាពចាំបាច់ក្នុងការត្រូវធានាភាពដាច់ខាតពិតប្រាកដរបស់ចិន ក្នុងការប្រកាសអាងឋានៈនៃភាពជាអ្នកដឹកនាំម្នាក់ក្នុងគ្រោងសាងស្ថាបត្យកម្មអន្តរជាតិ ដែលកំពុងមាននាពេលបច្ចុប្បន្ន”។ លោកស្រីបានបន្តទៀតថា បើទោះជាពួករដ្ឋបាលប្រទេសអឺរ៉ុប នឹងសម្លឹងមើលការតាំងជំហរដ៏រឹងមាំក្លៀវក្លារបស់ចិនដោយខ្សែភ្នែករិះគន់ សង្ស័យក៏ដោយចុះ តែលោកស្រី ក៏នឹងនៅតែមានគោលដៅក្នុងការថែរក្សាការសន្ទនា “យ៉ាងរិះគន់ សង្ស័យ និងយ៉ាងរីកចម្រើន” ជាមួយក្រុងប៉េកាំងជានិច្ច។

លោកស្រី មើរកែល បានសង្កត់ធ្ងន់ពីគោលបំណងរបស់លោកស្រី ក្នុងការទៅឱ្យដល់កិច្ចព្រមព្រៀងការវិនិយោគទុនជាមួយចិនឱ្យសម្រេចស្រេចបាច់ រហូតដល់ការស្វែងរកទីតាំងរួមគ្នាក្នុងការតស៊ូជាមួយការប្រែប្រួលនៃអាកាសធាតុ និងហានិភ័យផ្សេងៗខាងផ្នែកសុខភាពសាធារណៈលំដាប់ពិភពលោកទៀតផង។ គោលបំណងទាំងអស់នេះរបស់លោកស្រីមើរកែល គឺជាការពន្លត់ក្ដីសង្ឃឹមរបស់លោកត្រាំ ដែលចង់ប្រើ G7 ឬអ្វីដែលក្នុងពេលនេះ លោកហៅថា G10 ឬ G11 ដើម្បីបង្កើតក្រុមសម្ព័ន្ធមិត្តមួយឡើងមកគាបសង្កត់ចិន។

បើនិយាយងាយៗ ក៏គឺ ការប្រកាសតាមអំពើចិត្តតែម្នាក់ឯងពាក់ព័ន្ធនឹងការពង្រីក G7 នេះ ត្រូវបានដឹង ត្រូវបានយល់ដឹងទាំងអស់គ្នានៅក្នុងអឺរ៉ុបថា គ្រាន់តែជាការបន្តការឈានដើរ ដែលខ្វះការត្រិះរិះគិតពិចារណារបស់លោក ត្រាំ ក្នុងរយៈពេល 3ឆ្នាំនៃការគ្រងតំណែងប្រធានាធិបតីរបស់ខ្លួន ដែលក្លាយជាការបំផ្លិចបំផ្លាញរបៀបរបបពិភពលោកបែបពហុភាគីដែលពឹងលើច្បាប់វិន័យ ដែលពួកប្រធានាធិបតីរបស់សហរដ្ឋអាមេរិកទាំងឡាយ ដែលចេញមកពីបក្សនយោបាយទាំង2 បានខឹតខំព្យាយាមកសាងឡើងពេញមួយរយៈពេលជាង 70ឆ្នាំកន្លងមក។

ទង្វើបែបអាងវាយ អាងតប់ លើកចុងក្រោយបំផុតរបស់លោកត្រាំ ដែលបានប្រកាសចេតនារម្មណ៍របស់ខ្លួនក្នុងការដឹកនាំសហរដ្ឋអាមេរិក ដកខ្លួនចេញពីអង្គការសុខភាពពិភពលោក បានធ្វើឱ្យលោក Ursula von der Leyen ប្រធានរបស់គណៈកម្មាធិការអឺរ៉ុប (European Commision) និងលោក Josep Borrel អ្នកតំណាងផ្នែកកិច្ចការអន្តរជាតិ និងនយោបាយសន្តិសុខ និងជាអនុប្រធានរបស់គណៈកម្មាធិការអឺរ៉ុប ចេញសេចក្ដីថ្លែងការណ៍មួយ សម្ដែងការមិនយល់ស្រប កាលពីថ្ងៃទី30 ខែឧសភា។

សេចក្ដីថ្លែងការណ៍ច្បាប់នោះ មានខ្លឹមសាររិះគន់លោកប្រធានាធិបតី ដូណាល់ ត្រាំ យ៉ាងបើកចំហថា៖ “ខណៈដែលពិភពលោកនៅតែកំពុងតស៊ូនឹងរោគឆ្លងរាតត្បាតដ៏ធំកូវីដ-19 យ៉ាងឥតឈប់ឈរនេះ ភារកិច្ចចម្បងសម្រាប់គ្រប់ៗភាគីក៏គឺ ត្រូវព្យាយាមថែរក្សាជីវិតមនុស្សឱ្យបានច្រើនបំផុត ត្រូវព្យាយាមគ្រប់គ្រង និងសម្រាលភាពធ្ងន់ធ្ងររបស់រោគឆ្លងរាតត្បាតដ៏ធំនេះឱ្យបាន។ តាមរយៈទស្សនៈមួយនេះ សហភាពអឺរ៉ុបនឹងនៅតែផ្ដល់ការគាំទ្រ WHO បន្តទៅទៀត និងថែមទាំងបានចាត់ចែងរកប្រាក់មកបន្ថែមឱ្យហើយទៀតផង”

…នៅមានត…

ប្រែសម្រួលដោយ តាវ៉ែនតា

June 12, 2020

ក្នុងចំណោមមនុស្ស1លាននាក់នៅលើពិភពលោក គឺមានជាង50នាក់បានស្លាប់ដោយសារ COVID-19

ពិភពលោកបានរកឃើញអ្នកឆ្លងវីរុសCOVID-19 សរុបជិត7.6លាននាក់ ក្នុងនោះមានជិត423,000នាក់បានបាត់បង់ជីវិត។

ប្រទេសនិងដែនដីចំនួន221 ក្នុងពិភពលោក បានរាយការណ៍ថា មានអ្នកជំងឺCOVID-19 ចំនួន 7,578,973នាក់ និងអ្នកជំងឺដែលបានស្លាប់ក៏បានឡើងដល់ 422,0928នាក់។ អ្នកជំងឺកើន138,005នាក់ និងអ្នកស្លាប់កើន4,937នាក់បើធៀបនឹងម្សិលមិញ។ ជាសរុប មានអ្នកជំងឺ3,832,706នាក់បានជាសះស្បើយ។

ទ្វីបអាមេរិកមានអ្នកជំងឺ COVID-19 សរុបជិត 3.7លាននាក់ ខណៈទ្វីបអឺរ៉ុបមានជាង2.1លាននាក់ និងអាស៊ីមានជិត1.5លាននាក់ និងទ្វីបអាហ្វ្រិកមានជាង219,000នាក់។

មកដល់បច្ចុប្បន្ន បើសិនគិតទៅតាមចំនួនប្រជាជនសរុបរបស់ពិភពលោក គេរកឃើញថា ក្នុងចំណោមមនុស្ស 1,000,000នាក់ គឺមាន973នាក់បានឆ្លងវីរុសCOVID-19។ ចំណែកតួលេខអ្នកស្លាប់វិញគឺមាន54.3នាក់ក្នុងចំណោមមនុស្ស1,000,000នាក់។

ប្រទេសដែលមានអ្នកជំងឺលើសពី100,000នាក់ បានកើនដល់16ប្រទេស រួមមាន សហរដ្ឋអាមេរិក ប្រេស៊ីល រុស្ស៊ី អង់គ្លេស អេស្ប៉ាញ់ ឥណ្ឌា អ៊ីតាលី ប៉េរូ អាល្លឺម៉ង់ អ៊ីរ៉ង់ ទួរគី បារាំង ឈីលី ម៉ិកស៊ិក ប៉ាគីស្ថាន និងអារ៉ាប់ប៊ីសាអ៊ូឌីត៕

June 12, 2020

ក្រុមជនជាតិស្បែកខ្មៅដែលជំទាស់នឹងបាតុកម្មប្រឆាំងការរើសអើងពូជសាសន៍នៅអាមេរិក បានបង្ហាញខ្លួនហើយ!

ស្ត្រីស្បែកខ្មៅពីររូប គឺ Bevelyn និង Edmee នៅទីក្រុង Chicago សហរដ្ឋអាមេរិក យល់ថា ចលនា “ជីវិតជនជាតិស្បែកខ្មៅមានតម្លៃ” គឺជារឿងបោកប្រាស់ និងមិនតំណាងឱ្យពួកគេនោះទេ។

នៅពេលដែលក្រុមបាតុករកំពុងស្ថិតនៅខាងក្រៅភោជនីយដ្ឋាន Nini’s Deli នៅក្នុងទីក្រុង Chicago រដ្ឋ Illinois សហរដ្ឋអាមេរិកចាប់ផ្ដើមតិចទៅៗនារសៀលថ្ងៃទី7មិថុនា Justin Starns ក៏មានវត្តមាននៅទីនោះ និងមើលមិត្តរបស់ខ្លួនបាញ់ថ្នាំជាអក្សរ BLM (Black Lives Matter-ជីវិតជនជនជាតិស្បែកខ្មៅសំខាន់) នៅលើផ្ទាំងឈើខាងក្រៅភោជនីយដ្ឋាន។ ទាំងនេះសុទ្ធតែជាអក្សរក្បាច់ពណ៌ផ្ទៃមេឃ។

ភ្លាមនោះស្រាប់តែមានស្ត្រីស្បែកខ្មៅម្នាក់ឈានជើងឡើង និងនិយាយយ៉ាងឮៗថា “អូ! ប្រការទាំងនេះសម្រាប់ខ្ញុំមែន? ជីវិតរបស់ខ្ញុំក៏មានតម្លៃដែរមែនទេ?”។

Starns រៀបរាប់ឡើងវិញថា “នាង និងស្ត្រីម្នាក់ផ្សេងទៀតនិយាយថា ពួកគេទទួលបានប្រាក់ខែពី George Soros ហើយថា ពួកគេគឺជា House Negro (ពាក្យសម្រាប់ប្រើសំដៅទៅលើទាសចរស្បែកខ្មៅរស់នៅជាមួយម្ចាស់របស់ខ្លួន)”។ George Soros គឺជាមហាសេដ្ឋី និងជាសប្បុរសជនអាមេរិកាំងដើម្បីកំណើតហុងគ្រី។

Starns ដែលជាជនជាតិស្បែកខ្មៅម្នាក់ បានឱ្យដឹងថា នោះគឺជាទិដ្ឋភាពចម្លែក នៅពេលដែលមានស្ត្រីស្បែកខ្មៅពីរនាក់អះអាងថា ពួកគេគឺជា Bevelyn និង Edmee និងបានចោទចលនា “Black Live Matter” ថា “ជាបីសាចដ៏កាចសាហាវ និងបោកប្រាស់” នៅចំពោះមុខក្រុមបាតុករដែលភាគច្រើនជាជនជាតិស្បែកស និងជនជាតិអាមេរិកឡាទីន នៅក្នុងតំបន់ West Town នៃទីក្រុង Chicago សហរដ្ឋអាមេរិក។

Edmee និយាយថា “ខ្ញុំបានឃើញបាតុកម្ម “Black Live Matter” ជាច្រើនមកហើយ។ ប្រការនេះមិនតំណាងឱ្យយើងខ្ញុំទេ។ វាជាការបង្កអស្ថិរភាព។ ព្រះអើយ!”។

Nini’s Deli (ស្ដាំ) កំពុងប្រកែកតវ៉ានឹងប៉ូលិសនៅខាងក្រៅភោជនីយដ្ឋាន Nini’s Deli

បាតុកម្មកាលពីថ្ងៃទី7មិថុនាកន្លងទៅ ត្រូវបានធ្វើឡើងនៅពេលភោជនីយដ្ឋាន Nini’s Deli កំពុងបិទទ្វារ។ ម្ចាស់ហាងនេះត្រូវបានគេជឿថាជាមនុស្សមានទស្សនៈជ្រុលនិយមទៅលើបញ្ហាស្រលាញ់ភេទដូចគ្នា និងប្រឆាំងចំពោះចលនា “Black Live Matter”។ បុគ្គលិក4នាក់បានឈប់ធ្វើការដើម្បីប្រឆាំងថៅកែរបស់ពួកគេដែលជាម្ចាស់ភោជនីយដ្ឋាននេះ។

Bevelyn និង Edmee ដែលបាននិយាយថា ពួកគេមកទីនេះដើម្បីគាំទ្រ Nini’s Deli បានឈរអស់រយៈពេលជាច្រើនម៉ោងនៅខាងមុខភោជនីយដ្ឋានដែលខណ្ឌចែកពីក្រុមបាតុករដោយក្រុមប៉ូលិសដែលមានពាក់មួកសុវត្ថិភាព និងកញ្ចក់បាំងមុខ។

Bevelyn ដែលមានរូបរាងទាបបន្តិច និងពោរពេញដោយថាមពល បានទាត់ចោលបំពង់បាញ់ថ្នាំពណ៌ និងហែកក្រដាសដែលបិទជាប់នឹងបន្ទះឈើនៅខាងមុខភោជនីយដ្ឋាន។ នាងបានថ្កោលទោសចំពោះអំពើបំផ្លិចបំផ្លាញ និងបក្សប្រជាធិបតេយ្យ រួមនឹងក្រុមបាតុនានាដែលទាមទារសិទ្ធិស្មើភាពគ្នារវាងជាតិសាសន៍។ នៅពេលដែលក្រុមបាតុករស្រែកប្រឆាំង នាង Bevelyn ក៏ចាប់ផ្ដើមលោត និងបញ្ចេញទឹកមុខដូចជាចំអកឱ្យក្រុមបាតុករ។

ចំណែក Edmee ដែលមានរូបរាងខ្ពស់ និងមាំមួន បាននិយាយដោយប្រើសម្លេងម៉ឺងម៉ាត់តាមរបៀបគ្រូអាចារ្យ ឬអ្នកផ្សាយសាសនាដែលពេញដោយបទពិសោធន៍។ នាង Edmee និយាយថា “នេះគឺជាសកម្មភាពបីសាចដ៏កាចសាហាវ។ អ្នករាល់គ្នាកំពុងតែត្រូវបានគេបោកប្រាស់ និងកេងចំណេញ។ ព្រះយ៉េស៊ូត្រូវបានក្រុមមនុស្សធុននេះក្បាត់ហើយ”។

ភាពតានតឹងបានកើតឡើងនៅពេលមានមនុស្សម្នាក់គប់ដបទឹកទៅលើ Bevelyn និងប៉ូលិសរាប់សិបនាក់ត្រូវបានដាក់ពង្រាយ។ Bevelyn ស្រែកខ្លាំងៗនៅចំពោះមុខក្រុមប៉ូលិសថា “ការធ្វើជំនួញរបស់បុរសនេះ (ម្ចាស់ភោជនីយដ្ឋាន) ត្រូវបានបំផ្លិចបផ្លាញគ្មានសល់ដោយសារតែចលនា “ជីវិតជនជាតិស្បែកខ្មៅសំខាន់”។ នាងបន្តថា “នេះគឺជារឿងឃោរឃៅ និងជារឿងដ៏រំខាន”។

នាង Edmee កំពុងហែកក្រដាសអក្សរដែលក្រុមបាតុករបានបិទនៅខាងក្រៅភោជនីយដ្ឋាន Nini’s Deli កាលពីថ្ងៃទី7មិថុនា

Bevelyn និង Edmee មានបំណងបង្ហាញការគាំទ្រចំពោះម្ចាស់ភោជនីយដ្ឋាន Nini ក្រោយពីបានជួបគ្រូគង្វាល (អាចារ្យ) របស់ខ្លួន កាលពីសប្ដាហ៍មុន។ Bevelyn ថ្លែងថា “យើងមានសិទ្ធិនិយាយថា សូម្បីតែម្ចាស់ភោជនីយដ្ឋាននេះជាមនុស្សប្រកាន់ពូជសាសន៍ ក៏គាត់នៅតែមានសិទ្ធិនិយាយថា គាត់មិនគាំទ្រការស្រលាញ់ភេទដូចគ្នាដែរ”។

ជិត3ម៉ោងក្រោយមក Bevelyn និង Edmee រួមនឹងអ្នកគាំទ្រមួយចំនួនបានប្រកាសចាកចេញពីកន្លែងកើតហេតុដែលមានសម្លេងហ៊ោកញ្ជ្រៀវពីក្រុមបាតុករ ក្នុងនោះមានមនុស្សម្នាក់ស្រែកឡើងថា “មានអ្នកណាចង់លាងបាបដែរទេ?” បាតុករក៏នាំគ្នាសើច ខណៈដែលក្រុមប៉ូលិសការពារក្រុមរបស់ Bevelyn ឆ្ពោះទៅទិសខាងត្បូងផ្លូវ Noble រហូតដល់បាត់ស្រមោលពីភ្នែក។

ការស្លាប់របស់ George Floyd បានបង្កើតឱ្យមានបាតុកម្មនៅពាសពេញសហរដ្ឋអាមេរិក ហើយបានរាលដាលដល់បណ្ដាប្រទេសជាច្រើនក្នុងពិភពលោក ដើម្បីទាមទារយុត្តិធម៌ជូនសពលោក Floyd និងប្រឆាំងចំពោះអំពើរើសអើងពូជសាសន៍។ បាតុកម្មនានានៅទីក្រុង Chicago ភាគច្រើនត្រូវបានធ្វើឡើងប្រកបដោយសន្តិវិធី ប៉ុន្តែក៏នៅតែមានអំពើឆក់ប្លន់ ការបំផ្លិចបំផ្លាញទ្រព្យសម្បត្តិជាច្រើនករណីផងដែរ បណ្ដាលឱ្យហាងទំនិញ ភោជនីយដ្ឋាន និងហាងលក់ថ្នាំពេទ្យជាច្រើនត្រូវបានបិទ៕

ប្រភព៖ Chicago Tribune

June 11, 2020

នយោបាយ វាយប្រហារចិន របស់លោក ត្រាំ ជួបផ្លូវទ័ល នៅពេលអឺរ៉ុប មិនសហការ

ផែនឧបាយកលដែលលោកប្រធានាធិបតី ដូណាល់ ត្រាំ បានត្រៀមទុក ដើម្បីវាយប្រហារចិន ក្នុងប្រធានបទផ្សេងៗនោះ ត្រូវបានដួលរលំខ្ទេចខ្ទីអស់កាលពីអំឡុងចុងខែឧសភា និងតរហូតមកដល់ដើមខែមិថុនាកន្លងទៅ នៅពេលដែលផ្ទៃក្នុងរបស់សហរដ្ឋអាមេរិកខ្លួនឯង កើតមានករណីការស្លាប់របស់ ចច ហ្វ្លយដ៍ បានបង្កឱ្យកើតចរន្តដ៏ធំមហាសាលក្នុងការប្រឆាំងតវ៉ានឹងការរើសអើងពូជសាសន៍ពណ៌សម្បុរ និងការដែលប៉ូលិសប្រើអំពើហិង្សាដាក់ក្រុមបាតុករ ខណៈដែលសម្ព័ន្ធភាពរវាងប្រទេសវិញនោះ អឺរ៉ុប ជាពិសេសបំផុត អាល្លឺម៉ង់ ក៏បានបង្ហាញខ្លួនយ៉ាងច្បាស់ថា មិនឯកភាពជាមួយនយោបាយចំពោះចិន របស់លោក ត្រាំឡើយ។

អំឡុងសប្ដាហ៍ចុងក្រោយរបស់ខែឧសភា អាចហៅបានថា ជាអំឡុងពេល 7ថ្ងៃនៃសេចក្ដីវិនាស ដែលចាប់អង្រួនប្រទេសអាមេរិក ឱ្យញ័ររញ្ជួយខ្លាំងក្លាបំផុត ដោយកម្ទេចបំណែកបាក់បែកមួយចំនួន ថែមទាំងអាចនឹងធ្លាក់មកលើលោកប្រធានាធិបតី ដូណាល់ ត្រាំ ខ្លួនឯងទៀតផង ហើយអ្វីដែលសំខាន់បំផុតនោះគឺ គណៈគ្រប់គ្រងរបស់លោក ត្រាំ ត្រូវបាត់បង់ផែនឧបាយកលដែលបានត្រៀមទុកក្នុងរឿងដែលពាក់ព័ន្ធនឹងចិនទៀតផង។

អំពើឃាតកម្មលើបុរសស្បែកខ្មៅ ចច ហ្វ្លយដ៍ ដ៏គួរឱ្យសោកសៅរំជួលចិត្តនៅក្នុងទីក្រុងមីននិអាប៉ូលិស ក្នុងថ្ងៃទី25 ឧសភា ដែលត្រូវនឹងថ្ងៃទិវាអតីតយុទ្ធជន របស់សហរដ្ឋអាមេរិកនោះ គឺជាការសង្កត់បន្ថែម ឱ្យឃើញពីអំពើហិង្សា របស់ការរើសអើងពូជសាសន៍ពណ៌សម្បុរ និងការតម្រង់គោលដៅចាត់ការ មនុស្សដែលមិនមែនជាជនស្បែកស ក្នុងហេតុការណ៍ប្រើអំពើហិង្សា ម្ដងហើយ ម្ដងទៀតរបស់ប៉ូលិស។ វាគឺជាសញ្ញានៃការផ្ទុះឡើងរបស់ជនវណ្ណៈទាប ដែលបុរាណបំផុត និងជាប្រតិកម្មប្រឆាំងភាពឈានមុខជាទីបំផុតក្នុងសង្គមជនអាមេរិកាំង ខណៈពេលជាមួយគ្នា វាក៏ក្លាយជាការបកអាក្រាតឱ្យមើលឃើញយ៉ាងច្បាស់អំពីការជិះជាន់ខាងវណ្ណៈ ដែលបង្កប់នៅក្រោមពាក្យភូតកុហកបោកប្រាស់របស់របបប្រធានាធិបតី របស់លោក ត្រាំ ទៀតផង។

ទាំងអស់នេះ ជនរងគ្រោះនៃការប្រើអំពើហិង្សារបស់ប៉ូលិស មិនថាតែជនស្បែកខ្មៅ ជនស្បែកស ជនហ៊ិស្ប៉ានិក(អ្នកដែលនិយាយភាសាអេស្ប៉ាញ នៅក្នុងសហរដ្ឋអាមេរិក ដែលភាគច្រើន គឺពួកដែលភៀសខ្លួនមកពីតំបន់អាមេរិកឡាទីន) ឬជនកុលសម្ព័ន្ធអាមេរិក ក៏ដោយ សុទ្ធតែជាអ្នកទីទ័លក្រ និងជាចំណែករបស់ប្រជាជនដែលទន់ខ្សោយផុយស្រួយបំផុតដូចគ្នាទាំងអស់។

ក្នុងកម្រិតអន្តរជាតិ មានការបង្ហាញឡើងនូវភាពសាមគ្គីគ្នាជាធ្លុងមួយដោយការប្រឆាំងតវ៉ា ដែលផ្ទុះឡើងយ៉ាងច្រើនបន្ទាប់ពីការសម្លាប់ ចច ហ្វ្លយដ៍។ ការជួបជុំគ្នាដើរជាក្បួនបានកើតឡើង ទាំងនៅក្នុងទីលាន ថ្រាហ្វាល់ការ របស់ក្រុងឡុងដ្រ៍ និងខ្លោងទ្វារ ប្រ៊ែនដេនប៊ើក ក្នុងក្រុងប៊ែរឡាំង ហើយក្រសួងការបរទេសរុស្ស៊ី ក៏បានបញ្ចេញយោបល់ពាក់ព័ន្ធនឹងរឿងនេះដែរ។

អឺរ៉ុប មានអារម្មណ៍ចម្លែកប្លែកចំពោះអាមេរិក របស់លោកត្រាំស្រាប់ទៅហើយ ហើយក្នុងពេលនេះ មានតែនឹងចាក់ឫសជ្រៅចុះទៅទៀត ដែលការពិតទៅ ក្នុងអំឡុងសប្ដាហ៍ចុងក្រោយរបស់ខែឧសភានោះ មានហេតុការណ៍ជាច្រើនយ៉ាង ដែលរឹតតែសង្កត់បន្ថែម ឱ្យឃើញពីភាពបែកបាក់រ៉ៅឆាន ដែលកំពុងបង្ហាញខ្លួនឡើងនៅក្នុងក្រុមសម្ព័ន្ធមិត្ត នៃត្រើយទាំង 2ខាងរបស់មហាសមុទ្រអាត្លង់ទិក។

ទិសដៅដែលគួរឱ្យចាប់អារម្មណ៍ ដែលបង្ហាញខ្លួនឡើង មាន 3ទិសដៅ…

លោកត្រាំ មើលទៅហាក់ដូចជាបានរំពឹងប៉ាន់ប្រមាណទុកយ៉ាងប្រយ័ត្នប្រយែង ក្នុងរឿងចង្វាក់ពេលវេលាដែលលោកចេញមកប្រកាសផែនការ ចាប់ផ្ដើមធ្វើជាម្ចាស់ផ្ទះរៀបចំការប្រជុំ សាំមិត របស់ក្រុមប្រទេស G7 បែបជំនួបទល់មុខគ្នាក្នុងក្រុងវ៉ាស៊ីនតោន អំឡុងថ្ងៃទី25-26 មិថុនាខាងមុខ ដោយនឹកសង្ឃឹមក្នុងការអួតអាងឱ្យឃើញទាំងអស់គ្នាថា ខ្លួនបានត្រៀមរួចរាល់ហើយក្នុងការឈានរំលងឱ្យហួសផុតពីជំងឺឆ្លងរាតត្បាតកូវីដ-19 តែផែនការរបស់លោកទាំងអស់នោះ បែរជាដួលរលំបោកទៅនឹងដីបែកបាក់ខ្ទេចខ្ទីអស់ ដោយសារតែខ្វះការចាប់អារម្មណ៍ក្លៀវក្លាស្វាហាប់ ពីពួកប្រទេសសម្ព័ន្ធមិត្តលោកខាងលិចរបស់សហរដ្ឋអាមេរិកហ្នឹងឯង។

លោកស្រី មើរកែល ប្រកាសគោលជំហរ

រឿងនេះត្រូវបានបង្ហាញចេញមកឱ្យឃើញយ៉ាងច្បាស់ គួរឱ្យភ្ញាក់ផ្អើលជាពិសេសតែម្ដង តាមរយៈការដែលលោកស្រីនាយករដ្ឋមន្ត្រីនៃប្រទេសអាល្លឺម៉ង់ អ៊ែងជើឡា មើរកែល សម្រេចចិត្តប្រកាស មិនទទួលយកការអញ្ជើញរបស់លោកត្រាំ ដោយលើកហេតុផលដ៏គួរឱ្យកើតអារម្មណ៍បញ្ជោះបន្សោកថា លោកស្រីនៅត្រូវរវល់ វីវក់នឹងការគ្រប់គ្រងជំងឺរាតត្បាតឱ្យបានសិន។

តែការមិនយល់ស្របជាមួយលោកត្រាំ របស់លោកស្រីមើរកែល នៅមានទៅឆ្ងាយជាងហ្នឹង នៅមានចាក់ចូលជ្រៅខ្លាំងជាងហ្នឹងទៅទៀត…លោកស្រីបានដាក់ការសង្កេតយ៉ាងបើកចំហចំពោះសាធារណជនថា បើសិនមានការប្រជុំ សាំមិតប្រទេសG7 កើតឡើង មិនថាក្នុងរូបបែបណាក៏ដោយ “មិនថាតែបែបវីដេអូ ខន់ហ្វ៊ើរេនស៍ ឬបែបណាក៏ដោយ ខ្ញុំក៏នឹងតស៊ូដើម្បី “ដំណើរផ្លូវបែបពហុភាគីនិយម” យ៉ាងពិតប្រាកដ នេះគឺជាអ្វីដែលច្បាស់លាស់បំផុត ទាំងក្នុងG7 ទាំងក្នុង G20”។

នៅពេលមានអារម្មណ៍ដឹងថា ភាពជាអ្នកដឹកនាំរបស់ខ្លួនត្រូវបានគេសាកល្បងយ៉ាងធ្ងន់ធ្ងរហើយនៅក្នុងប្រទេសលោកខាងលិចនោះ លោកត្រាំ ក៏ប្រញាប់ប្រញាល់ប្ដូរទិសដៅ ដោយងាកទៅស្នើឡើងថា ក្រុមG7 ដែលប្រកបដោយពួកប្រទេសដែលមានសេដ្ឋកិច្ចឈានមុខនោះ បានក្លាយជារឿងដែល “ហួសសម័យខ្លាំងណាស់” បាត់ទៅហើយក្នុងពិភពលោកដែលកំពុងផ្លាស់ប្ដូរបែបនេះ និងគួរតែកែសម្រួលឱ្យក្លាយជា “G10 ឬ G11 ដើម្បីតស៊ូជាមួយ G1(គឺចិន)”។

នោះ គឺមានន័យថា លោកត្រាំត្រូវការឱ្យមានការពង្រីកវង់ G7 ដោយនាំយកប្រទេសរុស្ស៊ី ឥណ្ឌា អូស្ត្រាលី និងកូរ៉េខាងត្បូង មកចូលរួមដែរ ហើយក្រុមដែលកែសម្រួលថ្មីនេះ នឹងសាមគ្គីគ្នាតតាំង និងចាត់ការចិន។

…នៅមានត…

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 11, 2020

តើការឆ្លងរាលដាលរបស់មេរោគវីរុសកូរ៉ូណាប្រភេទថ្មីនៅតំបន់អាមេរិកឡាទីន កាចសាហាវប៉ុនណា?

ខណៈដែលស្ថានការណ៍ការឆ្លងរាលដាលរបស់មេរោគវីរុសកូរ៉ូណាប្រភេទថ្មីនៅក្នុងតំបន់ជាច្រើនក្នុងពិភពលោក កំពុងចាប់ផ្ដើមល្អប្រសើរឡើងវិញជាបណ្ដើរៗ មិនថាតែទ្វីបអាស៊ី ឬអឺរ៉ុបនោះ អង្គភាពសាធារណៈសុខាភិបាល បានបញ្ជាក់ថា តំបន់អាមេរិកឡាទីន បានក្លាយជាចំណុចកណ្ដាលនៃការឆ្លងរាលដាលថ្មីមួយរបស់ពិភពលោកហើយ។

ប្រេស៊ីលមានអ្នកឆ្លងមេរោគនេះជិត 8សែននាក់ហើយ ដែលនេះអាចនិយាយបានថា ច្រើនបំផុតលំដាប់លេខ2 របស់ពិភពលោក ឯប្រទេសជិតខាងផ្សេងទៀត ដូចជា មិកស៊ិក និងប៉េរូ ជាដើម ក៏កំពុងព្យាយាមទប់ទល់នឹងការឆ្លងរាលដាលដ៏ធំនេះយ៉ាងវីវក់ដែរ។

ខណៈដែលតួលេខអ្នកឆ្លងថ្មីនៅសហរដ្ឋអាមេរិក កំពុងចាប់ផ្ដើមនៅនឹង ហើយប្រទេសជាច្រើននៅក្នុងទ្វីបអឺរ៉ុប ក៏កំពុងចាប់ផ្ដើមបន្ធូរបន្ថយវិធានការបិទប្រទេសដែរនោះ តែស្ថានការណ៍នៅក្នុងចំណុចកណ្ដាលនៃការឆ្លងរាលដាលកូវីដ-19 ថ្មី របស់ពិភពលោក បែរជាកំពុងតែធ្ងន់ធ្ងរឡើងៗទៅវិញ។

សាកសពត្រូវបានទុកចោលនៅតាមចិញ្ចើមថ្នល់ក្នុងទីក្រុង ក្វាយអាគីល ទីក្រុងធំបំផុតរបស់ប្រទេសអេក្វាដ័រ

អ្នកឆ្លងមេរោគដែលបានទទួលការអះអាងដំបូងគេនៅក្នុងតំបន់អាមេរិកឡាទីន គឺនៅក្នុងប្រទេសប្រេស៊ីល កាលពីថ្ងៃទី26 កុម្ភៈ បើទោះជាអ្នកស្រាវជ្រាវបានប្រាប់ថា មានសញ្ញាបង្ហាញថា ចាប់ផ្ដើមមានអ្នកឆ្លងមេរោគនេះ តាំងពីខែមករា មកម្ល៉េះក៏ដោយ។

បន្ទាប់ពីនោះមក មេរោគវីរុសកូរ៉ូណាប្រភេទថ្មីនេះ ក៏ឆ្លងរាលដាលទៅគ្រប់ប្រទេសក្នុងតំបន់អាមេរិកឡាទីន ដោយមជ្ឈមណ្ឌលគ្រប់គ្រង និងការពាររោគអឺរ៉ុប(European Centre for Disease Control and Prevention) បានកត់ត្រាទុកថា មកដល់ថ្ងៃនេះ មានអ្នកឆ្លងមេរោគច្រើនជាង 1.26លាននាក់ និងមានអ្នកស្លាប់ច្រើនជាង 6ម៉ឺននាក់ហើយ។

ទោះបីជាតួលេខនេះ តិចជាងនៅក្នុងអឺរ៉ុប និងសហរដ្ឋអាមេរិកមែន តែការត្រួតពិនិត្យនៅក្នុងអាមេរិកឡាទីនមិនទូលំទូលាយឡើយ និងក៏អាចមានការស្លាប់ដែលមិនបានរាយការណ៍ជាផ្លូវការ ជាច្រើននាក់ទៀតផង។

ប្រេស៊ីល មានអ្នកឆ្លងមេរោគជិត 7សែននាក់ហើយ នេះជាចំនួនដែលច្រើនបំផុតលំដាប់លេខ2 ក្នុងពិភពលោក

ប្រទេសដែលមានប្រជាជនច្រើនបំផុត 2ប្រទេស ដូចជាប្រេស៊ីល និងមិកស៊ិក មានអ្នកស្លាប់ច្រើនបំផុត ដោយមានចំនួនច្រើនជាង 3.4ម៉ឺននាក់ និង 1.2ម៉ឺននាក់ តាមលំដាប់។

កាលពីថ្ងៃទី4 មិថុនា ប្រេស៊ីលមានរបាយការណ៍អ្នកស្លាប់ 1,349នាក់ ក្នុងរង្វង់ 24ម៉ោង ដែលនេះជាចំនួនខ្ពស់បំផុតជាប្រវត្តិសាស្ត្រ តែយ៉ាងណាក៏ដោយ ក៏ប្រេស៊ីល នៅមិនទាន់មានរដ្ឋមន្ត្រីក្រសួងសុខាភិបាល ដែលបំពេញតួនាទីយ៉ាងស្ថិតស្ថេរដែរ។

កន្លងមក លោកប្រធានាធិបតី សាអ៊ី បូលសូណារ៉ូ របស់ប្រទេសប្រេស៊ីល បានប្រាប់ជាប់រហូតថា កូវីដ-19 មិនមែនជារឿងធ្ងន់ធ្ងរទេ និងក្នុងអំឡុងសប្ដាហ៍កន្លងទៅ លោកទើបតែប្រាប់ទៀតថា ចំនួនអ្នកស្លាប់ដែលកើនឡើងជារឿយៗនៅក្នុងប្រេស៊ីលនោះ គឺជា “កម្មវាសនា” របស់មនុស្សគ្រប់រូប និងបានបន្ទោសបណ្ដាញសារព័ត៌មានថា ជាអ្នកធ្វើឱ្យពលរដ្ឋប្រេស៊ីលភ័យភ្ញាក់ផ្អើល។

រដ្ឋាភិបាលមិកស៊ិក ត្រូវរងការរិះគន់យ៉ាងខ្លាំង ដែលបានចាប់ផ្ដើមបន្ធូរបន្ថយការបិទប្រទេស និងឱ្យធុរកិច្ចមួយផ្នែកត្រឡប់ទៅបើកដំណើរការឡើងវិញ

នៅប្រទេសមិកស៊ិក ក៏ដូចគ្នា កាលពីថ្ងៃទី4 មិថុនា មានចំនួនអ្នកស្លាប់ក្នុងរង្វង់ 24ម៉ោង ខ្ពស់បំផុតជាប្រវត្តិសាស្ត្រ 1,092នាក់ ចំណែកតួលេខអ្នកឆ្លងមេរោគប្រចាំថ្ងៃ ក៏ខ្ពស់បំផុតជាប្រវត្តិសាស្ត្រដូចគ្នា គឺ 3,912នាក់។

យ៉ាងណាក៏ដោយ អាជ្ញាធររដ្ឋបាលបានប្រាប់ថា តួលេខអ្នកឆ្លងមេរោគ និងអ្នកស្លាប់មែនទែន ប្រហែលជាខ្ពស់ជាងនេះច្រើន។ ចំណែករដ្ឋាភិបាល ត្រូវទទួលរងការរិះគន់យ៉ាងខ្លាំង ដែលចាប់ផ្ដើមបន្ធូរបន្ថយវិធានការបិទប្រទេស ឱ្យធុរកិច្ចមួយផ្នែកវិលមកដំណើរការវិញ ធ្វើឱ្យអង្គការសុខភាពប្រចាំភូមិភាគអាមេរិក(Pan American Health Organisation ឬ PAHO) ចេញមកព្រមាន មិនឱ្យរដ្ឋាភិបាល ឆាប់បន្ធូរបន្ថយវិធានការបិទប្រទេសជ្រុលពេក ព្រោះអាចនឹងធ្វើឱ្យស្ថានការណ៍ឆ្លងរាលដាលកាន់តែអាក្រក់ខ្លាំងឡើង។

លោកប្រធានាធិបតី សាអ៊ី បូលសូណារ៉ូ របស់ប្រទេសប្រេស៊ីល ប្រាប់ថា ចំនួនអ្នកស្លាប់ដែលកើនឡើងជារឿយៗនោះ គឺជា “កម្មវាសនា” របស់មនុស្សគ្រប់រូប និងបន្ទោសសារព័ត៌មានថា ជាអ្នកធ្វើឱ្យពលរដ្ឋប្រេស៊ីលភ័យភ្ញាក់ផ្អើល

ប្រទេសប៉េរូ មានចំនួនអ្នកឆ្លងមេរោគខ្ពស់បំផុតលំដាប់ទី10 ក្នុងពិភពលោក ដោយមានអ្នកស្លាប់ប្រមាណជា 5ពាន់នាក់ ចំណែកប្រទេសឈីលី មានអ្នកឆ្លងមេរោគថ្មី រាប់ពាន់នាក់ក្នុង 1ថ្ងៃៗ។

ប្រទេសអេក្វាដ័រ មានអត្រាការស្លាប់ ទល់នឹងចំនួនប្រជាជនខ្ពស់បំផុត ដោយមានអ្នកស្លាប់ប្រមាណជា 20នាក់ ក្នុងចំនួនប្រជាជន 1សែននាក់។

ធៀបជាមួយសហរដ្ឋអាមេរិក និងអឺរ៉ុប

ខុសពីសហរដ្ឋអាមេរិក និងប្រទេសភាគច្រើននៅក្នុងទ្វីបអឺរ៉ុប ចំនួនអ្នកស្លាប់ក្នុងបណ្ដាប្រទេសក្នុងអាមេរិកឡាទីន នៅតែកើនខ្ពស់ឡើងជារឿយៗ។ តួលេខអ្នកស្លាប់នៅក្នុងប្រទេសប្រេស៊ីល មិកស៊ិក និងប៉េរូ កើនឡើង 2ដង រៀងរាល់ 2-3សប្ដាហ៍ ក្នុងខណៈដែលចំនួននេះ ត្រូវប្រើពេល 3ខែសម្រាប់ចក្រភពអង់គ្លេស 8ខែសម្រាប់ប្រទេសអ៊ីតាលី និង11ខែសម្រាប់ប្រទេសបារាំង។

ចំណែកសហរដ្ឋអាមេរិកវិញ មានអ្នកស្លាប់កើនឡើង 2ដង រៀងរាល់ 2ខែ។

ការងារសិក្សាស្រាវជ្រាវ ដោយមហាវិទ្យាល័យវ៉ាស៊ីនតោន បានបង្ហាញថា ចំនួនអ្នកស្លាប់ក្នុងប្រទេសប្រេស៊ីល អាចខ្ពស់ដល់ 1.25សែននាក់ ក្នុងអំឡុងដើមខែសីហា ដែលនឹងកើនឡើង 4ដង ពីចំនួនដែលកំពុងខ្ពស់ឡើងក្នុងខណៈនេះ។

វេជ្ជបណ្ឌិត ខារីសា អេតៀង ប្រធានអង្គការសុខភាពពិភពលោកភូមិភាគអាមេរិក បានប្រាប់ថា “គ្មានអ្វីគួរសង្ស័យសោះឡើយថា ខណៈនេះភូមិភាគរបស់យើង បានក្លាយជាមណ្ឌលកណ្ដាលនៃការឆ្លងរាលដាលដ៏ធំថ្មីមួយរបស់ពិភពលោកទៅហើយ”

អ្នកជំនាញការប្រាប់ថា ច្រើនសប្ដាហ៍ទៀត ទម្រាំតែការឆ្លងរាលដាលនៅក្នុងប្រទេសខ្លះក្នុងអាមេរិឡាទីន នឹងទៅដល់ចំណុចវិបត្តិខ្ពស់បំផុត។

តើត្រូវទប់ទល់យ៉ាងណា?

មិកស៊ិក និងប្រេស៊ីល នៅតែមិនប្រើវិធានការបិទប្រទេសដែលម៉ឺងម៉ាត់ ដូចប្រទេសដទៃទៀត។ ទាំង 2ប្រទេស សុទ្ធតែបានចេញការណែនាំថា ប្រជាជនគួរតែប្រតិបត្តិខ្លួនយ៉ាងណា តែក៏មិនបានចេញច្បាប់ហាមឃាត់កម្រិតជាតិដែរ ហើយលោកប្រធានាធិបតី សាអ៊ី បូលសូណារ៉ូ របស់ប្រេស៊ីល ក៏បានបញ្ជាក់ជាច្រើនលើកថា កូវីដ-19 មិនមែនជារឿងអាក្រក់ទេ។

លោក ម៉ាសៀ ខាស្ត្រូ សាស្ត្រាចារ្យផ្នែកសាធារណៈសុខាភិបាល នៅមហាវិទ្យាល័យ ហាវើដ បានបញ្ជាក់ថា វិធានការទប់ទល់របស់ប្រទេសប្រេស៊ីល មិនល្អឡើយ តែពេលនេះគោលបំណងនៃបទបញ្ជាពីមនុស្សលំដាប់អ្នកគ្រប់គ្រងប្រទេស ក៏ច្របូកច្របល់ និងមិនត្រូវគ្នា ខុសពីប្រទេសអាហ្សង់ទីន និងអ៊ុរុហ្កាយ ដែលល្មមអាចគ្រប់គ្រងស្ថានការណ៍បានខ្លះៗហើយ។

តែយ៉ាងណាក៏ដោយ ទោះជាប្រទេសប៉េរូ នឹងមានវិធានការបិទប្រទេសដ៏ម៉ឹងម៉ាត់តឹងរ៉ឹងបំផុតក្ដី តែតួលេខអ្នកឆ្លងមេរោគ និងអ្នកស្លាប់ ក៏នៅតែកើនឡើងខ្ពស់ជារឿយៗ និងមានបទបញ្ជាឱ្យពន្យារវិធានការបិទប្រទេសរហូតដល់ដំណាច់ខែនេះ។

ទោះជាប្រទេសឈីលី អាចពិនិត្យរកមេរោគពីប្រជាជនបានច្រើនជាងគេបំផុតក្នុងតំបន់ ដែលស្ថិតក្នុងចំនួនប្រមាណ 32នាក់ ក្នុងចំនួនប្រជាជន 1,000នាក់មែន តែការពិនិត្យរកមេរោគនៅក្នុងតំបន់នេះ ក៏នៅតែអាចរាប់បានថា តិចខ្លាំងណាស់ បើប្រៀបធៀបនឹងតំបន់ផ្សេងៗ ដូចជាប្រទេសមិកស៊ិក ដែលមានការពិនិត្យរកមេរោគ គិតទៅប្រមាណជា 2នាក់ ក្នុងចំនួនប្រជាជន 1,000នាក់ ធៀបនឹង 57នាក់ ក្នុងចំនួនប្រជាជន 1,000នាក់នៅក្នុងសហរដ្ឋអាមេរិក។

ការវិភាគស្រាវជ្រាវដោយមហាវិទ្យាល័យ សៅប៉ូឡូ បានវាយតម្លៃថា ប្រទេសប្រេស៊ីល អាចមានអ្នកឆ្លងមេរោគមែនទែនច្រើនជាងតួលេខផ្លូវការដល់ទៅ 15ដងឯណោះ តែយ៉ាងណាក៏ដោយ លោកប្រធានាធិបតី បូលសូណារ៉ូ ក៏នៅតែចង់ឱ្យប្រទេសប្រេស៊ីល ត្រឡប់មកស្ដារសេដ្ឋកិច្ចឡើងវិញឱ្យបានឆាប់រហ័ស កណ្ដាលក្ដីវិតក្កកង្វល់របស់ប្រទេសជិតខាងផ្សេងទៀត៕

ប្រភព៖ សារព័ត៌មានបរទេស

June 11, 2020

Donald Trump និងសភា តែងតាំងជនជាតិស្បែកខ្មៅ ជាមេបញ្ជាការកងទ័ពដំបូងគេក្នុងប្រវត្តិសាស្ត្រ

Charles Brown ត្រូវបានសភាជាន់ខ្ពស់សហរដ្ឋអាមេរិកតែងតាំងជាមេបញ្ជាការកងទ័ពអាកាស និងក្លាយជាពលរដ្ឋអាមេរិកដើមកំណើតអាហ្វ្រិកដំបូងគេដែលកាន់កាប់តំណែងជាមេបញ្ជាការកងទ័ពសហរដ្ឋអាមេរិក។

លោក Charles Brown អាយុ57ឆ្នាំ បច្ចុប្បន្នគឺជាមេបញ្ជាការកងទ័ពអាកាសប្រចាំតំបន់ប៉ាស៊ីហ្វិក ទើបត្រូវបានសភាជាន់ខ្ពស់អាមេរិកាំងតែងតាំងជាមេបញ្ជាការកងទ័ពអាកាសសហរដ្ឋអាមេរិក ដោយទទួលបានសំឡេងឆ្នោតគាំទ្រ98សំឡេង និងមិនមានសំឡេងប្រឆាំង នៅក្នុងការអនុម័តរបស់សភាជាន់ខ្ពស់កាលពីថ្ងៃទី9មិថុនា។

ជាមួយនឹងសេចក្ដីសម្រេចនេះ លោក Charles Brown ក្លាយជាពលរដ្ឋដើមកំណើតអាហ្រិកដំបូងគេដែលគ្រប់គ្រង់តំណែងខ្ពស់បំផុតមួយក្នុងចំណោមតំណែងជាមេបញ្ជាការកងទ័ពចំនួន6របស់សហរដ្ឋអាមេរិក។ លោក Brown ក៏ជាជនជាតិស្បែកខ្មៅទី2ដែលបានមានវត្តមាននៅក្នុងអគ្គបញ្ជាការដ្ឋានចម្រុះសហរដ្ឋអាមេរិក (Joint Chiefs of Staff) បន្ទាប់ពីលោក Colin Powell អតីតអគ្គមេបញ្ជាការកងទ័ព (Chairman of the Joint Chiefs of Staff) ដំណាក់កាលពីឆ្នាំ1989-1993។

លោក Colin Powell អតីតអគ្គមេបញ្ជាការកងទ័ព (Chairman of the Joint Chiefs of Staff) ដំណាក់កាលពីឆ្នាំ1989-1993។

ប្រធានាធិបតី Donald Trump បានសរសេរនៅលើ Twitter កាលពីថ្ងៃទី9មិថុនាថា “ការសម្រេចចិត្តរបស់ខ្ញុំក្នុងការតែងតាំងមេបញ្ជាការកងទ័ពអាកាសនេះ លោក Charles Brown ក្លាយជាពលរដ្ឋដើមកំណើតអាហ្វ្រិកដំបូងគេដែលបានធ្វើជាមេបញ្ជាការកងទ័ពដែលត្រូវបានសភាជាន់ខ្ពស់អនុម័តយល់ព្រម។ ជាថ្ងៃប្រវត្តិសាស្ត្រចំពោះសហរដ្ឋអាមេរិក! ពិតជាមានការសប្បាយរីករាយក្នុងការធ្វើការម៉ត់ចត់បន្ថែមទៀតជាមួយមេបញ្ជាការ Brown ដែលជាអ្នកស្នេហាជាតិ និងជាមេដឹកនាំល្អម្នាក់!”។

ការតែងតាំងខាងលើនេះ បានកើតឡើងក្នុងគ្រាដែលមានបាតុកម្មជាច្រើនកើតឡើងនៅទូទាំងសហរដ្ឋអាមេរិកក្រោយពីការស្លាប់របស់ George Floyd ដែលនេះបានរួមចំណែកបន្ថែមទៀតក្នុងសាមគ្គីភាពដើម្បីលុបបំបាត់អំពើរើសអើងពូជសាសន៍ក្នុងប្រទេសវនេះ។

លោក Brown ធ្លាប់បានបញ្ចេញយោបល់កាលពីសប្ដាហ៍មុនថា បញ្ហាដើមកំណើតអាហ្វ្រិកកំពុងតែរាំងខ្ទប់រូបលោកក្នុងការទទួលបានការដំឡើងឋានន្តរសក្ដិ។ លោកថ្លែងថា ការតែងតាំងនេះអាចនាំមកនូវក្ដីសង្ឃឹមដល់អ្នកផ្សេង ប៉ុន្តែលោកបានទទួលស្គាល់ថា ចំពោះលោកតែម្នាក់ឯង “មិនអាចផ្សះផ្សារការបែងចែកពូជសាសន៍ដែលកើតមានអស់រយៈពេលរាប់សតវត្សរ៍” នៅសហរដ្ឋអាមេរិកឡើយ៕

ប្រភព៖ AFP

June 10, 2020

Category: អន្តរជាតិ