អន្តរជាតិ - La Reine Media

ឃ្លាំងប្រេងរបស់ រុស្ស៊ី នៅក្បែរព្រំដែនអ៊ុយក្រែន ផ្ទុះឆាបឆេះសន្ធោសន្ធៅ

អគ្គិភ័យយ៉ាងធំបានកើតឡើងនៅព្រឹកនេះ នៅឯឃ្លាំងប្រេងរបស់ ប្រទេសរុស្ស៊ី នាទីក្រុង Bryansk ក្បែរព្រំដែនអ៊ុយក្រែន ប៉ុន្តែមិនទាន់ដឹងច្បាស់អំពីការខូចខាត។

«អង្គភាពស្ថានការណ៍បន្ទាន់បញ្ជាក់ថាមានអគ្គិភ័យ» ការិយាល័យសារព័ត៌មានរបស់អាជ្ញាធរតំបន់ Bryansk ថ្ងៃទី ២៥ មេសានេះ ឱ្យដឹងដូច្នេះ ទាក់ទងនឹងដំណឹងស្ដីពីករណីឆេះឃ្លាំងប្រេង។ «អណ្ដាតភ្លើងបានផ្ទុះឆេះចេញពីធុងដាក់ប្រេង»។

ក្រុមមន្ត្រីនៃទីក្រុង Bryansk ដែលមានចម្ងាយពីព្រំដែនជាប់នឹង អ៊ុយក្រែន ប្រហែល ១០០ គីឡូម៉ែត្រ បានទទួលព័ត៌មានស្ដីពីអគ្គិភ័យនៅវេលាម៉ោង ២ (ម៉ោង ៦ នៅ កម្ពុជា)។ កងកម្លាំងពន្លត់អគ្គិភ័យ និងក្រុមជួយសង្គ្រោះ ត្រូវបានបញ្ជូនទៅកាន់កន្លែងកើតហេតុ និងបានរាយការណ៍ថា ឃ្លាំងប្រេងកំពុងឆាបឆេះ។

អង្គភាពស្ថានការណ៍បន្ទាន់នៅតំបន់ Bryansk មិនទាន់ប្រកាសព័ត៌មានបន្ថែមអំពីករណីអគ្គិភ័យនេះ ហើយបច្ចុប្បន្ន ក្រុមមន្ត្រីក៏មិនទាន់ដឹងច្បាស់ថា អគ្គិភ័យនេះមានជាប់ទាក់ទិននឹងសង្គ្រាមនៅ អ៊ុយក្រែន ឬយ៉ាងណានៅឡើយ។

កាលពីថ្ងៃព្រហស្បតិ៍សប្ដាហ៍កន្លង ក្រុមមន្ត្រីរុស្ស៊ី បានឱ្យដឹងថា ឧទ្ធម្ភាគចក្ររបស់ អ៊ុយក្រែន បានបាញ់ប្រហារសំដៅលើអគារស្នាក់នៅនានា និងបណ្ដាលឱ្យមានអ្នករងរបួស ៧ នាក់ នៅតំបន់ Bryansk របស់ រុស្ស៊ី។

April 25, 2022

លិចទូកដឹកជនចំណាកស្រុកនៅសមុទ្ររបស់ ទុយនីស៊ី៖ ជិត ២០ នាក់បាត់បង់ជីវិត

ប្រភពព័ត៌មានពី អាហ្វ្រិកខាងជើង ឱ្យដឹងថា អាជ្ញាធរទុយនីស៊ី កាលពីថ្ងៃទី ២៤ មេសា ប្រកាសថា បានរកឃើញសាកសពរបស់ក្រុមជនចំណាក់ស្រុកចំនួន ១៧ នាក់ បន្ទាប់ពីទូក ៤ គ្រឿង ព្យាយាមឆ្លងកាត់ សមុទ្រមេឌីទែរ៉ាណេ ដើម្បីទៅកាន់ អឺរ៉ុប ត្រូវជួបនឹងគ្រោះថ្នាក់លើសមុទ្រ។

មន្ត្រីតុលាការក្នុងតំបន់ ឱ្យដឹងថា ទូក «បណ្ដោះអាសន្នដែលមានសភាពទ្រុឌទ្រោម» ទាំងនេះ ចេញដំណើរក្នុងថ្ងៃទី ២២ ឬ ២៣ មេសា ពីទីក្រុង Sfax របស់ ទុយនីស៊ី នៅឆ្នេរសមុទ្រមេឌីទែរ៉ាណេ។ សាកសពចំនួន ១៧ នាក់ ត្រូវបានគេស្រង់ឡើងក្នុងដំណាក់កាលដំបូង ប៉ុន្តែតួលេខនេះអាចកើនឡើងបន្តទៀត។

ជនរងគ្រោះដែលបានរួចពីការស្លាប់នៅក្នុងករណីលិចទូកនេះនិយាយថា មនុស្សប្រហែលពី ៣០ ទៅ ៣២ នាក់ ជិតនៅលើទូកនីមួយៗ ហើយភាគច្រើនជាពលរដ្ឋមកពី តំបន់អាហ្វ្រិក ក្បែរ សាហារ៉ា រួមមានពលរដ្ឋរបស់ កូតឌីវ័រ, ម៉ាលី និង សូម៉ាលី។

ប្រទេសទុយនីស៊ី និងប្រទេសលីប៊ី គឺជាទីតាំងចេញដំណើរដ៏ពេញនិយមរបស់ក្រុមជនចំណាកស្រុកដែលមានបំណងទៅកាន់អឺរ៉ុប ពិសេសគឺ អ៊ីតាលី។ ក៏ប៉ុន្តែ មធ្យោបាយធ្វើដំណើររបស់ពួកគេតែងតែជាទូក ឬកប៉ាល់ដែលស្ទើរតែមិនមានលក្ខណៈសម្បត្តិគ្រប់គ្រាន់ដើម្បីឆ្លងកាត់សមុទ្រ។

អង្គការចំណាកស្រុកអន្តរជាតិ (IOM) ឱ្យដឹងថា មានមនុស្សជិត ២,០០០ នាក់ បានលង់ទឹកស្លាប់ ឬបាត់ខ្លួននៅ សមុទ្រមេឌីទែរ៉ាណេ ក្នុងឆ្នាំ ២០២១ ច្រើនជាងឆ្ងាយធៀបនឹង ១,៤០១ នាក់ ក្នុងឆ្នាំ ២០២០។ នេះគឺជាផ្លូវចំណាកស្រុកដែលគ្រោះថ្នាក់បំផុតក្នុងពិភពលោក ប៉ុន្តែ ក្រុមមនុស្សដែលសង្ឃឹមថា នឹងមានជីវភាពល្អប្រសើរនៅពេលទៅដល់ អឺរ៉ុប មានការផ្សេងព្រេងកាន់តែច្រើនឡើង៕

April 25, 2022

រដ្ឋមន្ត្រីក្រសួងការពារជាតិអាម៉េរិក ជួបពិភាក្សាជាមួយប្រធានាធិបតីអ៊ុយក្រែន

ក្រុមមន្ត្រីរបស់ អ៊ុយក្រែន ប្រកាសថា ប្រធានាធិបតី ហ្សេឡែនស្គី បានជួបពិភាក្សាជាមួយរដ្ឋមន្ត្រីការបរទេស និងរដ្ឋមន្ត្រីការពារជាតិអាម៉េរិក ដែលកំពុងធ្វើទស្សនកិច្ចនៅ ទីក្រុងកៀវ ខណៈដែល រដ្ឋធានីវ៉ាស៊ីងតោន មិនទាន់បញ្ចេញប្រតិកម្ម។

«រដ្ឋមន្ត្រីការបរទេសអាម៉េរិក លោក Antony Blinken និង រដ្ឋមន្ត្រីការពារជាតិ លោក Lloyd Austin កំពុងជួបពិភាក្សាជាមួយប្រធានាធិបតី។ សង្ឃឹមថា ភាគីទាំងពីរនឹងឯកភាពគ្នាលើបញ្ហាបង្កើនជំនួយ» Oleksiy Arestovych ទីប្រឹក្សារបស់ ប្រធានាធិបតីអ៊ុយក្រែន ថ្លែងលើកញ្ចក់ទូរទស្សន៍កាលពីម្សិលមិញ។

មន្ត្រីរបស់ អ៊ុយក្រែន ខាងលើក៏បានអំពាវនាវដល់លោកខាងលិច ផ្ដល់ជំនួយផ្នែកសព្វាវុធបន្ថែមទៀតដល់ប្រទេសនេះ។

ប្រធានាធិបតីអ៊ុយក្រែន លោក ហ្សេឡែនស្គី ក្នុងថ្ងៃដដែល ក៏បានបង្ហោះសារមួយនៅលើ Twitter បញ្ជាក់ថា «ប្រជាជនអ៊ុយក្រែន កំពុងសាមគ្គីគ្នា» ហើយទំនាក់ទំនងរវាង អ៊ុយក្រែន-អាម៉េរិក កំពុង «ជិតស្និទ្ធជាងពេលណាៗទាំងអស់»។

សេតវិមាន មិនទាន់បញ្ជាក់អំពីព័ត៌មានខាងលើ ក្នុងពេលដែល ក្រសួងការបរទេសអាម៉េរិក និង មន្ទីរបញ្ចកោណ បដិសេធការស្នើឱ្យធ្វើអធិប្បាយលើរឿងនេះ។

បើសិនជាដំណឹងខាងលើត្រូវបានបញ្ជាក់ថាមានពិត នោះវានឹងក្លាយជាដំណើរទស្សនកិច្ចថ្នាក់ខ្ពស់បំផុតរបស់ក្រុមមន្ត្រីអាម៉េរិក ដែលបានមកកាន់ អ៊ុយក្រែន បន្ទាប់ពី រុស្ស៊ី បានបើកយុទ្ធនាការយោធានៅ អ៊ុយក្រែន កាលពីពីរខែមុន៕

April 25, 2022

បាតុករឡោមព័ទ្ធគេហដ្ឋានរបស់ នាយករដ្ឋមន្ត្រីស្រីលង្កា

និស្សិតរាប់ពាន់នាក់មកពីសាកលវិទ្យាល័យស្រីលង្កា នាំគ្នាទៅកាន់គេហដ្ឋានរបស់ នាយករដ្ឋមន្ត្រី Mahinda Rajapaksa ស្នើឱ្យលោកចុះចេញពីតំណែង ដោយសារតែវិបត្តិសេដ្ឋកិច្ចកាន់តែមានសភាពធ្ងន់ធ្ងរ។

ហ្វូងបាតុករកាលពីថ្ងៃទី ២៤ មេសា បានព្យាយាមផ្ដួលរំលំរបងការពារជុំវិញតំបន់គេហដ្ឋានរបស់ នាយករដ្ឋមន្ត្រីស្រីលង្កា Mahinda Rajapaksa នៅទីក្រុងកូឡុំបូ បន្ទាប់ពីក្រុមប៉ូលិសបានដំឡើងរបងរាំងខ្ទប់ដងផ្លូវជាច្រើននៅជុំវិញរដ្ឋធានី ដើម្បីរារាំងពួកគេពីការប្រមូលកម្លាំងជាមួយនឹងក្រុមបាតុករនៅក្នុងតំបន់ផ្សេង។

«ពួកលោកអាចរាំងខ្ទប់ផ្លូវ ប៉ុន្តែមិនអាចទប់ស្កាត់ការតស៊ូរបស់ពួកយើង រហូតដល់រដ្ឋាភិបាលទាំងមូលត្រូវចុះចេញពីតំណែង» បាតុករជានិស្សិតម្នាក់និយាយដូច្នេះ។

កម្លាំងដែលត្រូវប្រឈមនឹងហ្វូងបាតុករគឺ ក្រុមប៉ូលិសប្រឆាំងកុបកម្មដែលមានខែលការពារ មានតួនាទីទប់ស្កាត់បាតុករចូលទៅក្បែរផ្ទះរបស់ប្រធានាធិបតី។ បាតុករមួយចំនួនកាន់បដាដែលសរសេរថា «ចុះចេញពីតំណែងភ្លាមទៅ Gota»។ Gota គឺជារហ័សនាមរបស់ប្រធានាធិបតី Gotabaya Rajapaksa ដែលជាប្អូនប្រុសរបស់នាយករដ្ឋមន្ត្រី Mahinda។

ប៉ូលិសបានឱ្យដឹងថា លោក Mahinda មិនស្ថិតនៅក្នុងផ្ទះនាពេលនោះ ហើយក្រុមបាតុករក៏បានរំសាយដោយសន្តិវិធី។

ក្នុងរយៈពេលជាង ២ សប្ដាហ៍មកនេះ បាតុកររាប់ពាន់នាក់នាំគ្នាបោះជំរំប្រចាំថ្ងៃនៅខាងក្រៅការិយាល័យប្រធានាធិបតី Gotabaya Rajapaksa ស្នើឱ្យលោក និងបងប្រុស ចុះចេញពីតំណែង។ នៅក្នុងបាតុកម្មនានានៅទូទាំងប្រទេស គេឃើញមានហ្វូងបាតុករព្យាយាមសម្រុកចូលផ្ទះ និងកន្លែងធ្វើការរបស់ក្រុមមេដឹកនាំរដ្ឋាភិបាល។

មនុស្សម្នាក់ត្រូវបានបាញ់សម្លាប់នៅពេលប៉ូលិសផ្ទុះអាវុធរាំងខ្ទប់ផ្លូវក្នុងទីរួមស្រុកភាគកណ្ដាល Rambukkana កាលពីសប្ដាហ៍កន្លែង ដែលនេះគឺជាករណីស្លាប់ដំបូង រាប់ចាប់តាំងពីបាតុកម្មបានផ្ទុះឡើង។

ស្ថានភាពដាច់ភ្លើងក្នុងរយៈពេលយូរ អតិផរណាកើនឡើងខ្ពស់ និងបញ្ហាខ្វះឥន្ធនៈធ្ងន់ធ្ងរ រួមនឹងបញ្ហាជាច្រើនផ្សេងទៀត ជាកត្តាធ្វើឱ្យប្រជាជនរបស់ ប្រទេសស្រីលង្កា ខកចិត្ត។

កាលពីថ្ងៃទី ១២ មេសា ស្រីលង្កា បានប្រកាសក្ស័យធន។ សេដ្ឋកិច្ចត្រូវដួលរលំ បន្ទាប់ពីបាត់បង់ចំណូលពីបរទេស និងចំណួលពីវិស័យទេសចរណ៍។

រដ្ឋមន្ត្រីហិរញ្ញវត្ថុរបស់ ស្រីលង្កា Ali Sabry កំពុងស្ថិតនៅ រដ្ឋធានីវ៉ាស៊ីងតោន ដើម្បីពិភាក្សាអំពីកញ្ចប់ជំនួយរបស់ មូលនិធិរូបិយវត្ថុអន្តរជាតិ។ លោកបានព្រមានថា ស្ថានភាពសេដ្ឋកិច្ចរបស់ ស្រីលង្កា អាចនឹងអាក្រក់ជាងបច្ចុប្បន្ន៕

April 25, 2022

បារាំង ដឹកជញ្ជូនអាវុធធុនធ្ងន់ ឱ្យ អ៊ុយក្រែន ដើម្បីទប់ទល់នឹង រុស្ស៊ី

ប្រធានាធិបតី Macron ប្រកាសថា បារាំង ដឹកជញ្ជូនកាំភ្លើងធំ CAESAR និងមីស៊ីលប្រឆាំងរថក្រោះ ឱ្យ អ៊ុយក្រែន ប៉ុន្តែមិនបានបង្ហើបឱ្យដឹងអំពីចំនួនអាវុធនេះទេ។

ប្រធានាធិបតីបារាំង លោក Emmanuel Macron កាលពីថ្ងៃទី ២២ មេសា ថ្លែងថា បារាំង «កំពុងផ្គត់ផ្គង់ឧបករណ៍សំខាន់ៗ តាំងពីមីស៊ីលប្រឆាំងរថក្រោះ MILAN ដល់កាំភ្លើងធំបំពាក់លើរថយន្ត CAESAR» ឱ្យ អ៊ុយក្រែន។

«ខ្ញុំគិតថា យើងត្រូវតែបន្តដើរលើផ្លូវនេះ ប៉ុន្តែ ត្រូវដឹងអំពីបន្ទាត់ក្រហមដែលថា យើងនឹងមិនក្លាយជាភាគីមួយនៃសង្គ្រាម» លោក Macron បានប្រាប់សារព័ត៌មាន Ouest-France ដូច្នេះ។

លោក Macron បន្ថែមថា ទាហានអ៊ុយក្រែន ប្រមាណ ៤០ នាក់ នឹងបានហ្វឹកហាត់ក្នុងការគ្រប់គ្រងអាវុធថ្មីនេះនៅ ប្រទេសបារាំង ចាប់ពីថ្ងៃទី ២៣ មេសា។ ចំណែក រដ្ឋមន្ត្រីការពារជាតិបារាំង Florence Parly ក្រោយមកក៏បានបញ្ជាក់ថា ប្រទេសនេះនឹងផ្ទេរ «កាំភ្លើងធំ CAESAR មួយចំនួន រួមនឹងគ្រាប់កាំភ្លើងរាប់ពាន់គ្រាប់» ឱ្យ អ៊ុយក្រែន។

វិមានអេលីស៊ី បានបដិសេធការបង្ហើបឱ្យដឹងអំពីចំនួនអាវុធដែលនឹងត្រូវផ្ទេរឱ្យ អ៊ុយក្រែន ព្រោះមិនចង់ធ្វើឱ្យបែកការណ៍ ប៉ុន្តែ បានប្រាប់ថា មីស៊ីលប្រឆាំងរថក្រោះ MILAN ត្រូវបានបញ្ជូនទៅកាន់អ៊ុយក្រែន រួចហើយ ចំណែកកាំភ្លើងធំ នឹងត្រូវបានដឹកទៅប្រគល់ឱ្យ ទីក្រុងកៀវ នៅប៉ុន្មានថ្ងៃខាងមុខ។

April 23, 2022

យន្តហោះដឹកជញ្ជូនរបស់ អ៊ុយក្រែន ធ្លាក់បាក់ជាច្រើនកំណាត់ ពេលកំពុងហោះហើរ

យន្តហោះដឹកជញ្ជូន An-២៦ របស់ ប្រទេសអ៊ុយក្រែន បានធ្លាក់បាក់បែកខ្ទេចដោយសារជាប់ខ្សែភ្លើងនៅពេលកំពុងហោះសាកល្បង បណ្ដាលឱ្យអ្នកបើកបរបាត់បង់ជីវិត។

«យន្តហោះដឹកជញ្ជូន An-២៦ របស់ អ៊ុយក្រែន ធ្លាក់ក្បែរតំបន់ Mikhailovka នៃខេត្ត Zaporizhzhia ភាគអាគ្នេយ៍ប្រទេសនេះ ក្នុងពេលកំពុងហោះហើរសាកល្បងបច្ចេកទេស» មន្ត្រីខេត្ត Zaporizhzhia បានឱ្យដឹងដូច្នេះនៅក្នុងអត្ថបទបង្ហោះលើបណ្ដាញសង្គមកាលពីម្សិលមិញ។

ក្រុមមន្ត្រីក្នុងតំបន់និយាយថា យន្តហោះនេះបានប៉ះទៅនឹងខ្សែអគ្គិសនីតង់ស្យុងខ្ពស់នៅពេលហោះទាប ធ្វើឱ្យម៉ាស៊ីនត្រូវឆាបឆេះ ហើយយន្តហោះក៏ធ្លាក់មកដី។ រូបភាពពីកន្លែងកើតហេតុបង្ហាញថា យន្តហោះ An-២៦B-១០០ បែកបាក់ជាច្រើនកំណាត់។ គ្រោះថ្នាក់នេះបណ្ដាលឱ្យអ្នកបើកបរម្នាក់ស្លាប់ និង ២ នាក់នៅលើយន្តហោះត្រូវរងរបួស។

ស្ថាប័នអាកាសចរណ៍របស់ អ៊ុយក្រែន មិនទាន់មានការអធិប្បាយអ្វីនៅឡើយ ខណៈដែលក្រុមមន្ត្រីនៅខេត្ត Zaporizhzhia ឱ្យដឹងថា ហេតុការណ៍នេះកំពុងត្រូវបានស៊ើបអង្កេត។

Antonov An-២៦ គឺជាយន្តហោះដឹកជញ្ជូនខ្នាតមធ្យម ១ គ្រឿង ក្នុងចំណោមជាង ១,៤០០ គ្រឿងដែលត្រូវបានផលិតដោយ សូវៀត ក្នុងអំឡុងពីឆ្នាំ ១៩៦៩ ដល់ ១៩៨។ យន្តហោះនេះមានម៉ាស៊ីនប្រើកង្ហារចំនួន ២ គ្រឿង អាចហោះក្នុងល្បឿន ៤៤០ គីឡូម៉ែត្រ/ម៉ោង និងហោះបានរយៈចម្ងាយ ១,១០០ គីឡូម៉ែត្រ នៅពេលផ្ទុកទំនិញពេញ។ យន្តហោះនេះអាចដឹកទម្ងន់បានប្រហែល ៥.៥ តោន ឬ អ្នកដំណើរ ៤០ នាក់។

ករណីនេះគឺជាការខាតបង់មួយទៀតសម្រាប់ អ៊ុយក្រែន គ្រាដែលកំពុងរងការបំផ្លាញដោយសង្គ្រាមជាមួយនឹង រុស្ស៊ី។ មុនពេល រុស្ស៊ី បើកយុទ្ធនាការយោធា ប្រទេសអ៊ុយក្រែន មានយន្តហោះ An-២៦ ប្រហែល ២០ គ្រឿង។

April 23, 2022

បំផ្ទុះគ្រាប់បែកនៅវិហារអ៊ីស្លាមរបស់ អាហ្វហ្គានីស្ថាន សម្លាប់មនុស្សរាប់សិបនាក់

ករណីបំផ្ទុះគ្រាប់បែកដែលកើតឡើងនៅឯវិហារសាសនាអ៊ីស្លាម ក្នុងខេត្ត Kunduz ភាគខាងជើងនៃ ប្រទេសអាហ្វហ្គានីស្ថាន បណ្ដាលឱ្យមានមនុស្សស្លាប់ ៣៣ នាក់ ក្នុងនោះមានទាំងក្មេងៗផងដែរ។

«យើងថ្កោលទោសចំពោះអំពើឧក្រិដ្ឋនេះ និងសម្ដែងនូវការអាណិតអាសូរយ៉ាងជ្រាលជ្រៅបំផុតដល់ក្រុមគ្រួសារនៃសព» អ្នកនាំពាក្យរបស់អាជ្ញាធរតាលីបង់ Zabihullah Mujahid បង្ហោះសារនៅលើ Twitter កាលពីថ្ងៃទី ២២ មេសា ស្ដីពីករណីបំផ្ទុះគ្រាប់បែកនៅវិហារអ៊ីស្លាម Mawlavi Sikandar ក្នុងខេត្ត Kunduz ប្រទេសអាហ្វហ្គានីស្ថាន។

មកដល់ពេលនេះ ករណីបំផ្ទុះគ្រាប់បែកដែលបានបណ្ដាលឱ្យមានអ្នកស្លាប់ ៣៣ នាក់ និងរបួស ៤៣ នាក់នេះ មិនទាន់ត្រូវបានក្រុមណាមួយចេញមកទទួលខុសត្រូវនៅឡើយ។

ទាហានតាលីបង់ និងក្រុមគ្រូពេទ្យប្រចាំការនៅខាងក្រៅមន្ទីរពេទ្យ ដើម្បីជួយសង្គ្រោះជនរងគ្រោះក្នុងករណីបំផ្ទុះគ្រាប់បែកកាលពីថ្ងៃទី ២២ មេសា នៅ ស្រុក Imam Sahib, ខេត្ត Kunduz

នេះគឺជាករណីវាយប្រហារធំបំផុតមួយនៅ អាហ្វហ្គានីស្ថាន រាប់ចាប់តាំងពីកងកម្លាំងតាលីបង់ បានចូលមកក្ដោបក្ដាប់អំណោយកាលពីខែសីហា ២០២១

មុននោះ ក្រុមរដ្ឋអ៊ីស្លាមនៅ អាហ្វហ្គានីស្ថាន (IS-K) បានចេញមុខទទួលខុសត្រូវចំពោះករណីបំផ្ទុះគ្រាប់បែកនៅវិហារអ៊ីស្លាមនិកាយ Shite នៅ Mazar-i-Sharif កាលពីថ្ងៃទី ២១ មេសា ដែលបានបណ្ដាលឱ្យមានអ្នកស្លាប់ ១២ នាក់ និងជាង ៥៨ នាក់ រងរបួស។ IS-K ក៏បានទទួលស្គាល់ថា នៅពីក្រោយករណីវាយប្រហារផ្សេងទៀតក្នុងថ្ងៃទី ២១ មេសា នៅទីក្រុង Kunduz ដែលបានសម្លាប់មនុស្ស ៤ នាក់ និង ១៨ នាក់ រងរបួស៕

April 23, 2022

បើសិនហ៊ានជួយដល់ ប្រទេសរុស្ស៊ី រដ្ឋាភិបាលចិន នឹងត្រូវរងទណ្ឌកម្មធ្ងន់ធ្ងរ! នេះបើតាមការគំរាមរបស់ អាម៉េរិក

អនុរដ្ឋមន្ត្រីការបរទេសអាម៉េរិក Sherman បានព្រមានថា នឹងដាក់ទណ្ឌកម្ម ព្រមទាំងត្រួតពិនិត្យ រឹតត្បិតលើការនាំចេញទំនិញចំពោះ ប្រទេសចិន បើសិនប្រទេសនេះជួយដល់យុទ្ធនាការយោធារបស់ រុស្ស៊ី នៅ អ៊ុយក្រែន។

«ពួកគេ (ប្រទេសចិន) បានឃើញវិធានការដាក់ទណ្ឌកម្ម ត្រួតពិនិត្យការនាំចេញដែលយើងបានធ្វើឡើងចំពោះ រុស្ស៊ី។ ដូច្នេះ ពួកគេដឹងថា យើងអាចធ្វើអ្វីបាន បើសិន ចិន ជួយផ្ដល់សម្ភារៈនានាដល់ រុស្ស៊ី» អនុរដ្ឋមន្ត្រីការបរទេសអាម៉េរិក Wendy Sherman ថ្លែងក្នុងព្រឹត្តិការណ៍មួយនៅឯ ទីក្រុងព្រុចសែល ប្រទេសបែលហ្ស៊ិក កាលពីថ្ងៃទី ២១ មេសា។

លោកស្រី Sherman ចោទប្រកាន់ រដ្ឋាភិបាលចិន ថា បាន «បំប៉ោងយុទ្ធនាការផ្សព្វផ្សាយព័ត៌មានមិនពិតរបស់ រុស្ស៊ី» ហើយថា លោកស្រីសង្ឃឹមថា ទីក្រុងប៉េកាំង នឹងដកយកបទពិសោធន៍ពី «មេរៀនដ៏ត្រឹមត្រូវ» ស្ដីពីសង្គ្រាមនៅ អ៊ុយក្រែន ក្នុងនោះក៏មានបញ្ហាដែលពួកគេមិនអាចបំបែកបំបាក សហរដ្ឋអាម៉េរិក និងបណ្ដាសម្ព័ន្ធមិត្ត។

អនុរដ្ឋមន្ត្រីការបរទេសអាម៉េរិក រូបនេះ បន្ថែមថា ទីក្រុងវ៉ាស៊ីងតោន កំពុងព្យាយាមជៀសវាងការបណ្ដោយឱ្យមានភាពតានតឹងកើនឡើងរវាងមហាអំណាច រហូតដល់ថ្នាក់មិនអាចគ្រប់គ្រងបាន។

អនុរដ្ឋមន្ត្រីការបរទេសអាម៉េរិក លោកស្រី Wendy Sherman

ប្រកាសរបស់លោកស្រី Sherman គឺជាការព្រមានថ្មីបំផុតពីសំណាក់ សហរដ្ឋអាម៉េរិក ទាក់ទិននឹងលទ្ធភាពនៃការដាក់ទណ្ឌកម្មលើ រដ្ឋាភិបាលចិន បើសិនហ៊ានជួយដល់ រុស្ស៊ី។ មុននោះ រដ្ឋមន្ត្រីហិរញ្ញវត្ថុអាម៉េរិក Janet Yellen និងប្រធានអង្គភាពស៊ើបការណ៍សម្ងាត់ (CIA) Nicholas Burns ក៏ធ្លាប់ព្រមានថា ចិន នឹងប្រឈមមុខជាមួយនឹងផលវិបាកធ្ងន់ធ្ងរ បើសិនជួយ រុស្ស៊ី។

យោងតាមស្ថាប័នគយចិន ប្រទេសនេះ គឺជាទីផ្សារនាំចេញលំដាប់កំពូលរបស់ រុស្ស៊ី បន្ទាប់ពី សហភាពអឺរ៉ុប។ ទំនិញនាំចេញរបស់ រុស្ស៊ី ទៅកាន់ ប្រទេសចិន មានតម្លៃ ៧៩.៣ ពាន់លានដុល្លារ កាលពីឆ្នាំ ២០២១ ក្នុងនោះ ប្រេង ឧស្ម័ន មានរហូតដល់ ៥៦%៕

April 22, 2022

វៀតណាម អភិវឌ្ឍកាំជ្រួចហ្វូងចល័ត សម្រាប់បាញ់ពន្លត់អគ្គិភ័យពីចម្ងាយ

ប្រព័ន្ធកាំជ្រួចហ្វូងពន្លត់អគ្គិភ័យមានទម្ងន់ ៤០០ គីឡូក្រាម ដែលមានកាណុងចំនួន ២០ នេះ គឺជាឧបករណ៍បច្ចេកទេសរបស់រោងចក្រ Z១១៣ ផលិតឡើងក្នុងបំណងបម្រើដល់បេសកកម្មពន្លត់អគ្គិភ័យដែលមនុស្សពិបាកចូលដល់។

ប្រព័ន្ធនេះអាចបាញ់បាន ១២០ គ្រាប់ ក្នុងរយៈពេល ១ នាទី និងបាញ់បានចម្ងាយ ២៥០ ម៉ែត្រ ប្រកបដោយប្រសិទ្ធភាព។

អនុសេនីយ៍ឯក Nguyen Duong Manh មកពីរោងចក្រ Z១១៣ របស់ អគ្គនាយកដ្ឋានឧស្សាហកម្មការពារជាតិ នៃ ក្រសួងការពារជាតិវៀតណាម ឱ្យដឹងថា ឧបករណ៍នេះត្រូវបានអភិវឌ្ឍឡើងដើម្បីចូលរួមពន្លត់អគ្គិភ័យទ្រង់ទ្រាយធំ ដូចជា ភ្លើងឆេះព្រៃ ករណីអគ្គិភ័យមានសារធាតុពុល និងអគ្គិភ័យដែលមនុស្សមិនអាចចូលទៅក្បែរជាដើម។ លោកបន្ថែមថា ចំណុចខ្លាំងរបស់ឧបករណ៍នេះ គឺមានភាពសាមញ្ញ អាចដាក់លើរថយន្ត និងអាចផ្លាស់ទីបានយ៉ាងឆាប់រហ័ស។

ឧបករណ៍នេះមានបំពាក់កាមេរ៉ា អង្គញាណវាស់វេងរយៈចម្ងាយរបស់គោលដៅ រួចបញ្ជូនទិន្នន័យមកកាន់កុំព្យូទ័រ ដើម្បីអាចសម្រេចថា គួរបាញ់មួយគ្រាប់ម្ដង ឬបាញ់ជាហ្វូង នេះបើតាម អនុសេនីយ៍ឯក Nguyen Van Sau មកពីរោងចក្រ Z១១៣។

នៅក្នុងគ្រាប់កាំជ្រួចពន្លត់អគ្គិភ័យនេះមានផ្ទុកម្សៅពន្លត់ភ្លើង ៣ គីឡូក្រាម។ នៅពេលបាញ់ ក្បាលគ្រាប់ដែលមានផ្ទុកម្សៅពន្លត់ភ្លើងនឹងត្រូវបានរុញច្រានទៅមុខដោយកម្លាំងចំហេះក្នុងរបស់គ្រាប់កាំជ្រួច ហើយពេលហោះទៅដល់គោលដៅ ក្បាលគ្រាប់នឹងផ្ទុះឡើង បាច់សាចម្សៅដូចទៅនឹងការផ្ទុះគ្រាប់បែកដៃ ប៉ុន្តែ មិនបង្កគ្រោះថ្នាក់ដល់មនុស្ស។

ប្រព័ន្ធកាំជ្រួចពន្លត់អគ្គិភ័យចល័តនេះត្រូវបានអភិវឌ្ឍក្នុងរយៈពេល ១ ឆ្នាំ ហើយបច្ចុប្បន្នស្ថិតក្នុងដំណាក់កាលអភិវឌ្ឍពេញលេញជាស្ថាព័រ។

April 22, 2022

អតីតប្រធានាធិបតី របស់ ហុងឌូរ៉ាស ត្រូវបាននាំខ្លួនទៅកាត់ទោសនៅ សហរដ្ឋអាម៉េរិក

អតីតប្រធានាធិបតីរបស់ ប្រទេសហុងឌូរ៉ាស ត្រូវបានធ្វើបត្យាប័នទៅកាន់ សហរដ្ឋអាម៉េរិក ដើម្បីកាត់ទោសក្រោមបទចោទថា បានជួញដូរគ្រឿងញៀនកូកាអ៊ីន រាប់រយតោន និងស៊ីសំណូករាប់លានដុល្លារ។

Juan Orlando Hernandez អាយុ ៥៣ ឆ្នាំ ត្រូវបាននាំខ្លួនពីមូលដ្ឋានទ័ពអាកាសនៅ Tegucigalpa ឡើងឧទ្ធម្ភាគចក្ររបស់អង្គភាពប្រឆាំងគ្រឿងញៀន ហោះទៅកាន់ សហរដ្ឋអាម៉េរិក កាលពីថ្ងៃទី ២១ មេសា។ លោក Juan នឹងត្រូវឡើងតុលាការនៅទីក្រុង New York នាថ្ងៃទី ២២ មេសា។

កាលពីថ្ងៃទី ២៨ មីនា ២០២២ តុលាការកំពូលរបស់ ហុងឌូរ៉ាស បានអនុម័តឱ្យធ្វើបត្យាប័នអតីតប្រធានាធិបតី Juan Orlando Hernandez ទៅកាន់ សហរដ្ឋអាម៉េរិក។

លោក Juan Orlando Hernandez ដែលកាន់តំណែងប្រធានាធិបតីរបស់ ហុងឌូរ៉ាស ចាប់ពីឆ្នាំ ២០១៤ ដល់ ២០២២ ត្រូវបានចោទប្រកាន់ថា បានការពារករណីជួញដូរគ្រឿងញៀនប្រភេទកូកាអ៊ីន ចំនួន ៥០០ តោន ដែលភាគច្រើនមកនាំពី ប្រទេសកូឡុំប៊ី និង វ៉េណេស៊ុយអេឡា ទៅកាន់ សហរដ្ឋអាម៉េរិក ដោយឆ្លងកាត់ ហុងឌូរ៉ាស ចាប់តាំងពីឆ្នាំ ២០០៤។

លោក Juan Orlando Hernandez ត្រូវបានចោទប្រកាន់ទោសចំនួន ៣ ដែលទាក់ទងនឹងគ្រឿងញៀន និងអាវុធ នេះបើតាមឯកសាររបស់រដ្ឋអាជ្ញានៅ New York។ រដ្ឋមន្ត្រីក្រសួងយុត្តិធម៌អាម៉េរិក Merrick Garland ថ្លែងថា «Hernandez បានប្រើប្រាស់តួនាទីដើម្បីដឹកនាំប្រទេសដូចទៅនឹងទឹកដីឈ្មួញកណ្ដាលនៃអំពើជួញដូរគ្រឿងញៀន»។

លោក Juan Orlando Hernandez កាលពីឆ្នាំ ២០២១

ក្រោយពីចប់អាណត្តិកាលពីថ្ងៃទី ២៧ មករា ២០២២ មិនដល់ ៣ សប្ដាហ៍ផង Hernandez ក៏ត្រូវបានសមត្ថកិច្ចរបស់ ហុងឌូរ៉ាស ចាប់ខ្លួន ទៅតាមសំណើរបស់ ទីក្រុងវ៉ាស៊ីងតោន។ អតីតប្រធានាធិបតីរូបនេះ បានចុះចាញ់ក្រុមប៉ូលិសកាលពីថ្ងៃទី ១៥ កុម្ភៈ និងត្រូវបានចាប់ឃុំខ្លួននៅក្នុងពន្ធនាគាររបស់អង្គភាពប៉ូលិសពិសេសនៅ រដ្ឋធានីតេហ្គូស៊ីហ្គាល់ប៉ា។

ហុងឌូរ៉ាស គឺជាប្រទេសមួយនៅតំបន់ អាម៉េរិកកណ្ដាល និងមានប្រជាជន ១០ លាននាក់។ ក៏ប៉ុន្តែ អត្រានៃភាពក្រីក្ររបស់ប្រទេសនេះ មានរហូតដល់ ៦០%៕

April 22, 2022

Category: អន្តរជាតិ