ក្រុមហោះហើរដែលមានសមាជិក ៨ នាក់ នៅលើយន្តហោះជួបគ្រោះថ្នាក់នេះ បានបាត់បង់ជីវិតទាំងអស់ ប៉ុន្តែ មកដល់ពេលនេះ សមត្ថកិច្ចទើបរកឃើញសាកសពសមាជិកម្នាក់ប៉ុណ្ណោះ។
ក្រុមមន្ត្រីរបស់ ប្រទេសក្រិក បានឱ្យដឹងថា យោងតាមការស្រាវជ្រាវរបស់ អង្គភាពពិសេសនៃប្រទេសនេះ បច្ចុប្បន្ន មិនទាន់រកឃើញដានរបស់វត្ថុធាតុដែលត្រូវបានគេចាត់ទុកថា «គ្រោះថ្នាក់ដល់សុខភាពសាធារណៈ» នៅកន្លែងធ្លាក់របស់យន្តហោះ Antonov 12 នៃ ក្រុមហ៊ុនអ៊ុយក្រែន នៅឡើយ។ ហើយមកដល់ពេលនេះ សមត្ថកិច្ចទើបរកឃើញសាកសពសមាជិកម្នាក់ប៉ុណ្ណោះ ក្នុងចំណោម ៨ នាក់នៅលើយន្តហោះនេះ។
កាលពីថ្ងៃទី ១៧ កក្កដា រដ្ឋមន្ត្រីក្រសួងការពារជាតិសែប៊ី (Serbia) លោក Nebojsa Stefanovic បានថ្លែងថា ក្រុមហោះហើរទាំង ៨ នាក់ បានស្លាប់ បន្ទាប់ពីយន្តហោះធ្លាក់លើតំបន់ភាគខាងជើងនៃ ប្រទេសក្រិក។
យន្តហោះ Antonov AN-12 ដែលហោះឡើងពីព្រលានយន្តហោះ Nis នៅ ភាគខាងត្បូងប្រទេសសែប៊ី នៅវេលាម៉ោងប្រហែល ២០ និង ៤០ នាទី ថ្ងៃទី ១៦ កក្កដា មានដឹកគ្រាប់រំសេវជាង ១១ តោន ដែលផលិតដោយ សែប៊ី ហើយគ្រោងនឹងចុះចតនៅក្នុង រដ្ឋធានីអាម៉ាន់ របស់ ប្រទេសហ្សកដានី។
ប៉ុន្មាននាទីមុនពេលធ្លាក់ ក្រុមអ្នកបើកបរយន្តហោះបានប្រាប់បុគ្គលិកគ្រប់គ្រងអាកាសអាកាសចរណ៍ថា ម៉ាស៊ីន ១ គ្រឿងរបស់យន្តហោះនេះមានបញ្ហា និងត្រូវចុះចតជាបន្ទាន់ ប៉ុន្តែ មិនបានជោគជ័យ។
យន្តហោះនេះគ្រប់គ្រងដោយក្រុមហ៊ុនដឹកជញ្ជូន Meridian របស់ អ៊ុយក្រែន។ ស្ថានកុងស៊ុលអ៊ុយក្រែន ប្រចាំទីក្រុង Thessaloniki របស់ ក្រិក បានទៅដល់កន្លែងកើតហេតុ និងបានបញ្ជាក់អំពីអត្តសញ្ញាណជនរងគ្រោះ។
