(ប្រទេសចិន)-ចោរម្នាក់បានលួចចូលក្នុងផ្ទះមួយខ្នងនៅ Fujian និងបានសម្លាប់សត្វមួស ២ ក្បាល បន្សល់ទុកស្នាមឈាម ជួយឱ្យប៉ូលិសតាមរកឃើញ ដោយសារ DNA។
សមត្ថកិច្ចក្រុង Fuzhou ខេត្ត Fujian ភាគអាគ្នេយ៍ប្រទេសចិន កាលពីសប្ដាហ៍កន្លងបានប្រកាសនៅលើបណ្ដាញសង្គម WeChat អំពីករណីលួចឱ្យគួរឱ្យអស់សំណើចមួយ៖ «កាលពីថ្ងៃទី ១១ មិថុនា ប៉ូលិសបានទទួលដំណឹងអំពីករណីលួចចូលផ្ទះ និងយកទ្រព្យសម្បត្តិមានតម្លៃជាច្រើនពីផ្ទះមួយខ្នងនៅទីក្រុង Fuzhou»។
នៅពេលពិនិត្យស្ថានភាពកន្លែងកើតហេតុ ប៉ូលិសរកឃើញថា ចោរនេះបានលួចចូលផ្ទះតាមរានហាល។ បន្ទាប់ពីបានចូលដល់ក្នុងផ្ទះ ជននេះបានចម្អិនមី និងស៊ុតដើម្បីញ៉ាំ មុនពេលដុតធូបមូសរបស់ម្ចាស់ផ្ទះ និងគេងមួយយប់។
សមត្ថកិច្ចបានរកឃើញមូស ២ ក្បាលដែលមានជាប់ឈាមនៅលើជញ្ជាំង។ ពួកគេសន្និដ្ឋានថា នេះគឺជាឈាមរបស់ជនសង្ស័យ ហើយក៏បានយកទៅពិនិត្យ DNA។
លទ្ធផលនៃការពិនិត្យឈាមបង្ហាញថា DNA របស់ឈាមដែលជាប់នឹងសត្វមូសលើជញ្ជាំង ដូចគ្នាទៅនឹង DNA របស់បុរសម្នាក់ដែលមានត្រកូល Chai។ បន្ទាប់មក ជនសង្ស័យក៏ត្រូវបានចាប់ខ្លួនកាលពីថ្ងៃទី ៣០ មិថុនា ហើយជននេះបានសារភាពអំពីករណីខាងលើ និងអំពើលួចចំនួន ៤ ករណីផ្សេងទៀត។
អ្នកលេងបណ្ដាញសង្គមជាច្រើនបានចូលបញ្ចេញមតិក្រោមសាររបស់ប៉ូលិស Fuzhou ក្នុងនោះ ភាគច្រើនបានសម្ដែងការភ្ជាក់ផ្អើលចំពោះករណីនេះ។ អ្នកខ្លះសរសេរថា «នេះគឺជាការសងសឹករបស់សត្វមូស ខ្ញុំយល់ខុសហើយនៅពេលគិតថា ពួកវាគ្មានប្រយោជន៍»។
DNA គឺជាវត្ថុតាងមួយដ៏សំខាន់សម្រាប់ជួយដល់ សមត្ថកិច្ចចិន ក្នុងការបំបែករឿងក្ដី។ ប៉ូលិសខេត្ត Zhejiang ភាគខាងកើតប្រទេសចិន កាលពីខែមិថុនា ក៏បានចាប់ខ្លួនស្ត្រីម្នាក់ដែលបានគប់ស្នូលពោតពីអគារខ្ពស់មួយកន្លង ធ្វើឱ្យវាធ្លាក់ចំក្បាលទារិកាម្នាក់អាយុទើបតែ ៨ ខែ បន្ទាប់ពីវិភាគ DNA ក្នុងទឹកមាត់ដែលជាប់នៅលើស្នូលពោត៕
