អន្តរជាតិ - La Reine Media

មនុស្សជាតិនឹងអាចត្រូវផុតពូជទាំងស្រុងក្រោយពីជាងពីររយលានឆ្នាំទៀត?

ការផុតពូជដ៏មហាវិនាសរបស់ថនិកសត្វ ក្នុងនោះមានមនុស្សជាតិជាដើម អាចកើតឡើងក្រោយរយៈពេល 250 លានឆ្នាំទៀត នៅពេលអាកាសធាតុប្រែប្រួលទាំងស្រុង។

Alexander Farnsworth ដែលជាបុរាណវិទូប្រចាំសាកលវិទ្យាល័យ Bristol រួមនឹងសហការី ព្យាករថា ថនិកសត្វ រួមទាំងមនុស្សផងដែរ អាចនឹងមានវត្តមានត្រឹមតែ 250 លានឆ្នាំទៀតប៉ុណ្ណោះ ព្រោះតែអាកាសធាតុនឹងប្រែជាគ្រោះថ្នាក់ ដោយសារកត្តាចំនួនបី៖ ព្រះអាទិត្យភ្លឺជាងមុន ភូមិសាស្ត្ររបស់ទ្វីបនានាប្រែប្រួល និងឧស្ម័ន CO2 កើនឡើងដល់កំពូល។

មុននោះ ក្រុមអ្នកវិទ្យាសាស្ត្របានព្យាករថា ព្រះអាទិត្យនឹងកាន់តែភ្លឺជាងមុន ហើយក៏ «លេបយក» ផែនដីបន្ទាប់ពី 7.6 ពាន់លានឆ្នាំទៀត។ ប៉ុន្តែ ជីវិតទំនងជាមិនអាចមានវត្តមានបានយូរដូចនេះឡើយ។ នៅពេលព្រះអាទិត្យបញ្ចេញថាមពលច្រើនជាងមុន បរិយាកាសផែនដីនឹងឡើងកម្ដៅ ធ្វើឱ្យទឹកត្រូវហួត។ ទឹកគឺជាឧស្ម័នផ្ទះកញ្ចក់មួយប្រភេទ ដូច្នេះវានឹងរក្សាកម្ដៅកាន់តែច្រើន។ ពីរពាន់លានឆ្នាំទៀត ផែនដីអាចនឹងឡើងកម្ដៅរហូតដល់ទឹកក្នុងមហាសមុទ្រត្រូវពុះ។

ការសិក្សាស្រាវជ្រាវរបស់ Farnsworth ព្យាករថា មហាទ្វីបថ្មីមួយដែលមានឈ្មោះថា Pangea Ultima នឹងកើតឡើងតាមបណ្ដោយខ្សែអេក្វាទ័រក្រោយរយៈពេល 250 លានឆ្នាំទៀត។ Pangea Ultima នឹងមានកម្ដៅខ្ពស់ជាងឆ្ងាយធៀបនឹងបណ្ដាទ្វីបនាបច្ចុប្បន្ន ដោយសារតែព្រះអាទិត្យ។ រៀងរាល់ 110 លានឆ្នាំកន្លង ថាមពលដែលព្រះអាទិត្យបញ្ចេញ នឹងកើនឡើងបន្ថែម 1%។

មហាទ្វីប Pangea Ultima ក៏រួមចំណែកធ្វើឱ្យស្ថានភាពកាន់តែអាក្រក់ ព្រោះដីគោកឡើងកម្ដៅលឿនជាងមហាសមុទ្រ ហើយក៏ធ្វើឱ្យអាកាសធាតុប្រែប្រួលខ្លាំង ដោយសារភ្នំភ្លើងបំភាយ CO2 មានច្រើនជាងមុន។

Pangea Ultima នឹងក្ដៅខ្លាំង ធ្វើឱ្យសត្វចិញ្ចឹមកូនដោយទឹកដោះ ក្នុងនោះមានមនុស្សជាដើម មិនអាចរស់នៅបាន។ ថនិកសត្វទាំងអស់អាចបាត់ខ្លួននៅក្នុងយុគសម័យផុតពូជដ៏មហាវិនាស ហើយត្រូវបានជំនួសដោយប្រភេទសត្វល្មូនឈាមត្រជាក់ដែលអាចស៊ូទ្រាំនឹងកម្ដៅបានល្អ៕

September 26, 2023

យានអវកាសអាម៉េរិកនាំយកសំណាកដីអាចម៍ផ្កាយមកកាន់ផែនដីដោយជោគជ័យ

យានអវកាស OSIRIS-REx បានហោះហើរក្នុងចម្ងាយផ្លូវ 6.2 ពាន់លានគីឡូម៉ែត្រ និងនាំយកកាប៊ីនផ្ទុកសំណាកដីរបស់អាចម៍ផ្កាយ Bennu មកចុះចតលើសមុទ្រខ្សាច់នៅសហរដ្ឋអាម៉េរិកប្រកបដោយភាពរលូន។

កាលពីថ្ងៃទី 24 កញ្ញា នៅតំបន់ពិសោធន៍ Dugway របស់កងទ័ពអាម៉េរិកលើសមុទ្រខ្សាច់ Utah ក្រុមបុគ្គលិករបស់ណាសា (NASA) និងទ័ពអាកាសអាម៉េរិក បានប្រមូលយកកាប៊ីនផ្ទុកសំណាកដីពីអាចម៍ផ្កាយ Bennu ដែលយានអវកាស OSIRIS-REx យកបានកាលពីឆ្នាំ 2020។

យោងតាម Space បេសកកម្មនេះគឺជាលើកដំបូងដែលណាសាបានយក និងបញ្ជូនសំណាកដីពីអាចម៍ផ្កាយមកកាន់ផែនដី។

បន្ទាប់ពីធ្វើដំណើរជាង 6.2 ពាន់លានគីឡូម៉ែត្រដើម្បីទៅកាន់ Bennu និងត្រលប់មកវិញ យានអវកាស OSIRIS-REx បានទម្លាក់កាប៊ីនផ្ទុកសំណាកដីអាចម៍ផ្កាយពីកម្ពស់ 101,000 គីឡូម៉ែត្រខាងលើផ្ទៃផែនដី។ កាប៊ីនអវកាសនេះផ្ទុកដី និងវត្ថុធាតុផ្សេងៗទម្ងន់ 250 ក្រាម ដែលយកបានពីអាចម៍ផ្កាយ Bennu។ សំណាកដីនេះអាចជួយបកស្រាយសំណួរសំខាន់ៗរបស់អ្នកវិទ្យាសាស្ត្រ ទាក់ទងនឹងប្រភពនៃជីវិតនៅលើផែនដី និងយុគសម័យដំបូងៗរបស់ប្រព័ន្ធព្រះអាទិត្យ។

បេសកកម្ម OSIRIS-REx មានតម្លៃមួយពាន់លានដុល្លារនេះត្រូវបានបាញ់បង្ហោះកាលពីឆ្នាំ 2016 ហើយហោះទៅដល់អាចម៍ផ្កាយ Bennu ក្នុងឆ្នាំ 2018 និងយកសំណាកដីពីអាចម៍ផ្កាយនេះកាលពីឆ្នាំ 2020។

សំណាកដីអាចម៍ផ្កាយនេះនឹងត្រូវបានចែករំលែកទៅឱ្យវិទ្យាស្ថាន និងស្ថាប័នអវកាសនានានៅលើពិភពលោក។ ណាសានឹងរក្សាទុកសំណាក់ដីនេះ 70% ដើម្បីវិភាគនាពេលខាងមុខ។ ក្រៅពីនេះ សំណាក់ដី 25% ផ្សេងទៀតនឹងត្រូវប្រគល់ឱ្យអ្នកវិទ្យាសាស្ត្រជាង 200 នាក់នៅស្ថាប័នស្រាវជ្រាវចំនួន 35 ខណៈសំណាកដី 4% ទៀតនឹងត្រូវប្រគល់ឱ្យស្ថាប័នអវកាសកាណាដា និង 0.5% សម្រាប់ស្ថាប័នអវកាសជប៉ុន៕

September 25, 2023

វត្ថុអវកាស «ពាក់កណ្ដាលផ្កាយ ពាក់កណ្ដាលភព» ចំនួនពីរ ត្រូវថតបានដោយផ្ទាល់

ប្រព័ន្ធផ្កាយមួយដែលមានវត្ថុអវកាសចម្លែកចំនួនបួន ទើបតែត្រូវបានក្រុមអ្នកតារាសាស្ត្រថតបានដោយផ្ទាល់ ក្នុងនោះមានវត្ថុអវកាសពីរដែលស្ថិតនៅក្នុងស្ថានភាពពាក់កណ្ដាលភព ពាក់កណ្ដាលផ្កាយ។

យោងតាម Sci-News ប្រព័ន្ធផ្កាយដែលទើបត្រូវថតបានដោយផ្ទាល់នេះរួមមាន ប្រព័ន្ធផ្កាយភ្លោះពីរដួងដែលមានឈ្មោះថា HIP 81208 និងវត្ថុអវកាសពីរទៀតដែលនៅក្បែរ មានចម្ងាយពីផែនដីប្រហែល 486 ឆ្នាំពន្លឺ និងនៅក្នុងកញ្ចុំផ្កាយ Scorpius។

នោះគឺជាប្រព័ន្ធផ្កាយដែលមានអាយុទើបតែ 17 លានឆ្នាំ ក្នុងនោះ ផ្កាយដែលភ្លឺជាងគេមានឈ្មោះថា HIP 81208A និងកូនផ្កាយក្រហម HIP 81208C ដែលវិលជុំវិញផ្កាយមេ HIP 81208A។

ប្រព័ន្ធនេះមិនទាន់មានភពពេញលេញ ប៉ុន្តែមានភពដែលកើតពី «ផ្កាយបរាជ័យ» ដែលមានឈ្មោះថា HIP 81208B ស្ថិតនៅក្បែរផ្កាយ A ដែលភ្លឺជាងគេ។ HIP 81208B គឺជាវត្ថុអវកាសដែលត្រូវបានចាត់ទុកថាជាកូនផ្កាយប្រផេះ។

ក្នុងការថតរូបផ្ទាល់ដោយឧបករណ៍ SPHERE ដែលបំពាក់លើតេឡេស្កុប ESO នៅប្រទេសស៊ីលី អ្នកវិទ្យាសាស្ត្របានរកឃើញវត្ថុអវកាសអាថ៌កំបាំងមួយផ្សេងទៀតដែលត្រូវបានហៅថា HIP 81208Cb ស្ថិតនៅក្បែរកូនផ្កាយក្រហម និងមានម៉ាសធំជាងភពព្រហស្បតិ៍ 15 ដង ធ្វើឱ្យវាត្រូវបានចាត់ចូលក្នុងប្រភេទ «ភពព្រហស្បតិ៍យក្ស» និងកូនផ្កាយប្រផេះ។

ផ្កាយប្រផេះគឺជាវិធីហៅវត្ថុអវកាសមួយដែលស្ថិតនៅចន្លោះនិយមន័យរបស់ផ្កាយ និងភព។ ពួកវាតូចខ្លាំង មិនអាចរក្សាការប្រតិកម្មនុយក្លេអែរក្នុងស្នូលដូចផ្កាយមួយដួង ប៉ុន្តែធំខ្លាំងបើធៀបនឹងភព។ ពួកវាកើតចេញពីពពកឧស្ម័នធូលីក្នុងលំហអវកាសដូចទៅនឹងផ្កាយធម្មតានានា ដោយមិនមែនកើតពីថាសធូលីរបស់ផ្កាយ ។ ក៏ប៉ុន្តែ ពួកវាក៏មិនមានលទ្ធភាពធ្វើឱ្យថាសធូលីដែលនៅជុំវិញខ្លួន កើតជាភពដូចបណ្ដាផ្កាយដទៃ។

ដូច្នេះ កូនផ្កាយប្រផេះក៏ត្រូវបានគេប្រដូចទៅនឹង «ផ្កាយបរាជ័យ» មួយដួង ឬ «ភពលំដាប់ខ្ពស់» ដែលមានភាពឯកា និងអាថ៌កំបាំង៕

September 21, 2023

មន្ត្រីយោធាអាម៉េរិកថា អ៊ុយក្រែនរំដោះទឹកដីបានជាងពាក់កណ្ដាល ពីកងទ័ពរុស្ស៊ី

ឧត្តមសេនីយ៍ Milley អះអាងថា អ៊ុយក្រែនបានវាយបក និងដណ្ដើមមកវិញបានជាង 54% នៃទឹកដីដែលកងទ័ពរុស្ស៊ីបានវាយយកតាំងពីសង្គ្រាមបានផ្ទុះឡើង។

ក្នុងសន្និសីទសារព័ត៌មាននៅប្រទេសអាល្លឺម៉ង់ កាលពីថ្ងៃទី 19 កញ្ញា ឧត្តមសេនីយ៍ Mark Milley នាយអគ្គសេនាធិការចម្រុះសហរដ្ឋអាមេរិក បានអះអាងថា កងទ័ពអ៊ុយក្រែនបន្តសម្រេចបានគោលដៅក្នុងល្បឿនយឺត ប៉ុន្តែមានស្ថិរភាព នៅពេលរុញច្រានកងកម្លាំងរុស្ស៊ីចេញពីតំបន់កំពុងគ្រប់គ្រង។

«មកដល់ពេលនេះ អ៊ុយក្រែនរំដោះបានជាង 54% នៃទឹកដីរបស់ខ្លួនដែលរុស្ស៊ីគ្រប់គ្រង និងបន្តរក្សាភាពម្ចាស់ការក្នុងយុទ្ធសាស្ត្រ» ឧត្ដមសេនីយ៍ Milley ឱ្យដឹងដូច្នេះ។

Dave Butler អ្នកនាំពាក្យរបស់លោក Milley ក្រោយមកបានបកស្រាយថា តួលេខ 54% គឺទាក់ទងនឹងតំបន់នានាដែលអ៊ុយក្រែនរំដោះបាន រាប់ចាប់តាំងពីរុស្ស៊ីបានបើកយុទ្ធនាការយោធានៅអ៊ុយក្រែនកាលពីខែកុម្ភៈ 2022។

ការអះអាងរបស់លោក Milley ត្រូវបានលើកឡើងក្នុងពេលតំណាងយោធាជាង 50 ប្រទេស ដែលស្ថិតក្នុងក្រុមទំនាក់ទំនងការពារជាតិអ៊ុយក្រែន ជួបប្រជុំនៅប្រទេសអាល្លឺម៉ង់ដើម្បីពិភាក្សាអំពីការជួយគាំទ្រដល់ទីក្រុងកៀវ។

សហរដ្ឋអាម៉េរិកគឺជាភាគីផ្ដល់ជំនួយយោធាដល់អ៊ុយក្រែនច្រើនជាងគេ ដោយបានសន្យាថា ការផ្ដល់ជំនួយនេះនឹងមានរហូតដល់ 43.7 ពាន់លានដុល្លារអាម៉េរិក។ ដំបូងឡើយ អាម៉េរិកផ្ដល់អាវុធធុនស្រាល ហើយបន្ទាប់មកក៏ផ្ដល់កាំជ្រួចហ្វូង HIMARS, ប្រព័ន្ធមីស៊ីលការពារដែនអាកាស Patriot, រថក្រោះធុនធ្ងន់ M2 Bradley, រថក្រោះ M1 Abrams ហើយថ្មីៗនេះក៏បានសន្យាថា នឹងបណ្ដុះបណ្ដាលពីឡុត F-16 ដល់អ៊ុយក្រែនទៀតផង៕

September 20, 2023

មនុស្សស្លាប់ដោយសារទឹកជំនន់នៅលីប៊ីកើនលើសមួយម៉ឺនមួយពាន់នាក់

ក្រុមមន្ត្រីលីប៊ីបានអំពាវនាវឱ្យមានការស៊ើបអង្កេតបន្ទាន់ បន្ទាប់ពីចំនួនមនុស្សស្លាប់ដោយសារទឹកជំនន់នៅទីក្រុងជាប់សមុទ្រ Derna កាលពីថ្ងៃទី 11 កញ្ញា បានកើនឡើងដល់ជាង 11,000 នាក់។

អង្គការអឌ្ឍចន្ទក្រហមលីប៊ី កាលពីថ្ងៃទី 14 កញ្ញា បានឱ្យដឹងថា មនុស្ស 11,300 នាក់ត្រូវបានបញ្ជាក់ថាបានស្លាប់ក្នុងគ្រោះមហន្តរាយទឹកជំនន់នេះ ក្នុងនោះមានសាកសពជិត 2,000 នាក់ត្រូវបានទឹកជំនន់គួចចូលទៅសមុទ្រ។ ក្រុមមន្ត្រីនៅទីក្រុង Derna ជឿថា ចំនួនមនុស្សដែលបានស្លាប់អាចកើនដល់ 20,000 នាក់។

អង្គការឧតុនិយមពិភពលោក (WMO) របស់អង្គការសហប្រជាជាតិយល់ថា ការបាត់បង់ជីវិតមនុស្សដ៏ធំធេងអាចចៀសវាងបាន បើសិនលីប៊ីមានស្ថាប័នឧតុនិយមដែលមានប្រសិទ្ធភាព។ «បើសិនស្ថាប័នឧតុនិយមដំណើរការធម្មតា ពួកគេអាចប្រកាសអាសន្ន។ ស្ថាប័នគ្រប់គ្រងស្ថានការណ៍បន្ទាន់គួរណាស់តែបានធ្វើការឈ្លៀសមនុស្ស» Petteri Taalas ប្រធាន WMO ថ្លែងដូច្នេះ។

ភ្លៀងធំដែលកើតឡើងដោយសារព្យុះ Daniel កាលពីដើមសប្ដាហ៍នេះបានធ្វើឱ្យទំនប់ទឹកចំនួនពីរនៅកំណាត់ខាងលើនៃទន្លេដែលហូរឆ្លងកាត់ទីក្រុង Derna ត្រូវបាក់ នាំឱ្យទឹកជំនន់ហូរចូលទីក្រុងដែលមានប្រជាជនប្រមាណ 90,000 នាក់ និងបានបំផ្លាញ និងកួចយកស្ទើរគ្រប់អ្វីៗទាំងអស់ទៅកាន់សមុទ្រ៕

September 15, 2023

រកឃើញភពមួយចម្ងាយ 120 ឆ្នាំពន្លឺ ក្នុងតំបន់អាចរស់នៅបាន «អាចមានមហាសមុទ្រ»

ភព K2-18 b មានទំហំធំជាងពីរដងធៀបនឹងផែនដី និងគោចរក្នុងតំបន់ដែលអាចរស់នៅបាននៅជុំវិញផ្កាយមេដែលមានចម្ងាយ 120 ឆ្នាំពន្លឺពីព្រះអាទិត្យ (មួយឆ្នាំពន្លឺមានចម្ងាយ 9.46 ទ្រីលានគីឡូម៉ែត្រ)។

តេឡេស្កុបអវកាស James Webb (JWST) របស់អាម៉េរិក បានរកឃើញភស្តុតាងស្ដីពីម៉ូលីគុលដែលមានផ្ទុកកាបូននៅក្នុងបរិយាកាសរបស់ភព K2-18 b ដែលត្រូវបានសង្ស័យថាមានមហាសមុទ្រ។ ភព K2-18 b នេះគឺជាគោលដៅដ៏ទាក់ទាញសម្រាប់អ្នកតារាសាស្ត្រ ព្រោះពួកគេកំពុងស្វែងរកភាវៈរស់នៅខាងក្រៅប្រព័ន្ធព្រះអាទិត្យ។ យោងតាម Space ដែលបានចុះផ្សាយកាលពីថ្ងៃទី 11 កញ្ញា 2023 ការសិក្សាស្វែងយល់ និងសង្កេតដោយតេឡេស្កុបអវកាស Hubble មុននោះបង្ហើបឱ្យដឹងថា ភពខាងលើនេះអាចជាភពដែលមានមហាសមុទ្រទឹករាវ។

K2-18 b មានម៉ាសធំជាងផែនដីប្រហែល 8.6 ដង និងស្ថិតក្នុងតំបន់ដែលអាចរស់នៅបានរបស់ប្រព័ន្ធផ្កាយក្រហម K2-18។

ភពនេះមានកាំធំជាងផែនដីពី 2 ទៅ 3 ដង និងមានចម្ងាយពីព្រះអាទិត្យរបស់មនុស្ស 120 ឆ្នាំពន្លឺ។ លទ្ធផលនៃការសិក្សាស្រាវជ្រាវថ្មីបង្ហាញថា ដានរបស់កាបូនឌីអុកស៊ីត និងមេតានក្នុងបរិយាកាសរបស់ភព K2-18 b និងមិនមានអាម៉ូញាក់ បញ្ជាក់ថា មានមហាសមុទ្រមួយនៅខាងក្រោមបរិយាកាសដែលសម្បូរអ៊ីដ្រូសែន។

JWST ហាក់បានរកឃើញ dimethyl sulfide (DMS) ក្នុងបរិយាកាសរបស់ភព K2-18 b ទៀតផង។ សមាសធាតុនេះកើតឡើងតែពីប្លង់តុង (plankton គឺជាមីក្រូសារពាង្គកាយដែលរស់នៅក្នុងស្រទាប់លើនៃប្រព័ន្ធទឹក) លើផែនដី។ ក្រុមអ្នកវិទ្យាសាស្ត្រនៅសាកលវិទ្យាល័យ Cambridge ឱ្យដឹងថា នឹងបន្តសង្កេត K2-18 b ដើម្បីស្វែងយល់បន្ថែមអំពីលក្ខខណ្ឌនៃបរិស្ថានរបស់វា។ លទ្ធផលនៃការស្រាវជ្រាវរបស់ពួកគេនឹងត្រូវបានផ្សាយលើទស្សនាវដ្ដី Astrophysical Journal Letters៕

September 13, 2023

អវកាសចរដែលស្ថិតនៅទីអវកាសយូរជាងគេលើពិភពលោក

Frank Rubio បានស្ថិតនៅលើគន្លងតារាវិថីកម្រិតទាបរបស់ផែនដីជាង 355 ថ្ងៃ បំណែកកំណត់ត្រាស្ដីពីការបំពេញបេសកកម្មអវកាសយូរបំផុតលើពិភពលោក។

យោងតាមណាសា លោក Rubio រស់នៅ និងធ្វើការលើស្ថានីយអវកាសអន្តរជាតិ (ISS) ចាប់ពីខែកញ្ញា 2022 យូរជាងកំណត់ត្រាមុននោះរបស់អ្នកអវកាស Mark Vande Hei កាលពីវេលាម៉ោង 00 និង 40 នាទី ថ្ងៃទី 12 កញ្ញា 2023 (ពេលវេលានៅកម្ពុជា)។

តាមគម្រោង យានអវកាស Soyuz របស់រុស្ស៊ី នឹងដឹក Rubio ត្រលប់មកកាន់ផែនដីនៅថ្ងៃទី 27 កញ្ញាខាងមុខ។ ប្រការនេះមានន័យថា លោក Rubio នឹងឆ្លងកាត់ពេលវេលាយ៉ាងតិច 371 ថ្ងៃនៅលើគន្លងតារាវិថី មុននឹងបញ្ចប់បេសកកម្ម។ ពេលនោះ លោក Rubio នឹងក្លាយជាជនជាតិអាម៉េរិកដំបូងគេដែលរស់នៅ និងធ្វើការជាងមួយឆ្នាំក្នុងបរិស្ថានមីក្រូទំនាញ (ទំនាញផែនដីកម្រិតទាប)។

ការបំបែកកំណត់ត្រាខាងលើរបស់ Rubio គឺជារឿងចៃដន្យ ព្រោះថា ដំបូងក្រុមរបស់លោកគ្រោងនឹងបំពេញបេសកកម្មតែ 6 ខែប៉ុណ្ណោះ។ ក៏ប៉ុន្តែ ដោយសារយានអវកាសដែលដឹក Rubio និងមិត្តរួមការងារជនជាតិរុស្ស៊ីពីរនាក់ទៀត បានជួបបញ្ហាធ្លាយសារធាតុត្រជាក់កាលពីខែធ្នូ 2022។

ក្រុមអ្នកទទួលខុសត្រូវនៅទីភ្នាក់ងារអវកាសរុស្ស៊ី Roscosmos ក្រោយមកក៏បានបញ្ជាក់ថា យាននេះមិនមានសុវត្ថិភាពនៅក្នុងការនាំអវកាសចរត្រលប់មកកាន់ផែនដី។ យាន Soyuz MS-22 បានត្រលប់មកកាន់ផែនដីកាលពីថ្ងៃទី 28 មីនា 2023 ដោយមិនបានដឹកអ្នកអវកាស។

Roscosmos ក៏បានបញ្ជូនយាន Soyuz MS-23 ទៅកាន់ ISS កាលពីថ្ងៃទី 25 កុម្ភៈ 2023 ដើម្បីជំនួសយាន Soyuz MS-22។ ថ្ងៃត្រលប់មកកាន់ផែនដីរបស់ Rubio ត្រូវបានពន្យាររហូតដល់ខែកញ្ញា 2023 ពេលរុស្ស៊ីត្រៀមសម្រាប់ការហោះហើររបស់យាន Soyuz បន្ទាប់ ដែលគ្រោងនឹងដឹកអ្នកអវកាសអាម៉េរិកម្នាក់ និងអ្នកអវកាសរុស្ស៊ីពីរនាក់ ទៅកាន់ ISS នៅថ្ងៃទី 15 កញ្ញាខាងមុខ៕

September 12, 2023

ដីមួយក្ដាប់ដែលមានតម្លៃរហូតដល់រាប់ពាន់លានដុល្លារអាម៉េរិក

គ្រាន់តែមួយក្ដាប់សោះ ដីនេះមានតម្លៃឡើងដល់ 9 ពាន់លានដុល្លារអាម៉េរិក សូម្បីតែកំពូលមហាសេដ្ឋីពិភពលោកក៏ពិបាករកទិញ ព្រោះតែភាពកម្ររបស់វា។ ដូច្នេះតើនេះគឺជាដីអ្វី?

ដី ឬធូលីមួយក្ដាប់ដែលត្រូវបានចាត់ទុកថាមានតម្លៃខ្ពស់ជាងគេលើពិភពលោក គឺធូលីរបស់ភពអង្គារ។ ក្រុមអ្នកជំនាញនិយាយថា ធូលីភពអង្គារតែមួយក្ដាប់ក៏អាចត្រូវបានលក់ដេញថ្លៃក្នុងតម្លៃរហូតដល់ 9 ពាន់លានដុល្លារអាម៉េរិក។ នេះអាចត្រូវបានចាត់ទុកថា ជាធូលីថ្លៃបំផុតក្នុងកាឡាក់ស៊ីមីលគីវ៉េ។

មូលហេតុដែលធ្វើឱ្យធូលីភពអង្គារមានតម្លៃខ្ពស់បែបនេះគឺដោយសារគេត្រូវចំណាយពេលរហូតដល់មួយទសវត្សរ៍ ប្រាក់រាប់ពាន់លានដុល្លារអាម៉េរិក និងបេសកកម្មអវកាសជាច្រើន ទើបអាចនាំយកដី ឬធូលីមួយក្ដាប់មកដល់ផែនដី។

ជាក់ស្ដែង បេសកកម្មដែលនាំទៅរកការយកបានដីមួយក្ដាប់ពីភពអង្គារមកកាន់ផែនដី បានចាប់ផ្ដើមពីថ្ងៃទី 30 កក្កដា 2020 ដោយប្រើប្រាស់រ៉ុក្កែត Atlas V ដែលមានតម្លៃសរុបប្រហែល 109 លានដុល្លារអាម៉េរិក។ Atlas V នាំយកយាន Perseverance និងកូនឧទ្ធម្ភាគចក្រ Ingenuity ទៅជាមួយ។ ជើងហោះហើរនេះអូសបន្លាយពេលប្រហែល 7 ខែ។

រហូតដល់ថ្ងៃទី 18 កុម្ភៈ 2021 រ៉ុក្កែត Atlas V ក៏បានហោះដល់គោលដៅ។ ក្រោយពីបានចុះចតដោយជោគជ័យលើផ្ទៃភពអង្គារ យាន Perseverance ក៏ចាប់ផ្ដើមដំណើរប្រមូលយកសំណាកដី និងអនុវត្តបេសកកម្មនាំយកដី ធូលីរបស់ភពក្រហមនេះមកកាន់ផែនដី។ ក្រុមអ្នកវិទ្យាសាស្ត្រសង្ឃឹមថា អាចរកឃើញដាននៃភាវៈរស់ក្នុងសំណាកដីភពអង្គារនេះ។

កូនឧទ្ធម្ភាគចក្រ Ingenuity លើផ្ទៃភពអង្គារ

បេសកកម្មរបស់យាន Perseverance របស់ណាសា ក៏មានគោលដៅមួយផ្សេងទៀត នោះគឺការពិសោធបច្ចេកវិទ្យាផលិតអុកស៊ីសែនលើភពអង្គារ ដោយប្រើប្រាស់ធនធាននៅលើភពនេះ។ ដើម្បីធ្វើបានបែបនេះ យានរបស់ណាសាដែលមានតម្លៃ 2.7 ពាន់លានដុល្លារ នឹងប្រមូលសំណាកដីរហូតដល់ឆ្នាំ 2023។ ប៉ុន្តែយាននេះនឹងទុកបំពង់ផ្ទុកសំណាកដីលើផ្ទៃភពអង្គារ។

ជិតមួយទសវត្សរ៍ក្រោយ សំណាកដីនេះនឹងត្រូវបានយកមកកាន់ផែនដីដោយយានមួយផ្សេងទៀតដែលមានតម្លៃរាប់ពាន់លានដុល្លារ និងចំណាយពេល 7 ខែដើម្បីហោះទៅដល់ភពអង្គារ។ បេសកកម្មថ្មីនាពេលអនាគតនោះនឹងចំណាយពេលសរុបប្រហែល 5 ឆ្នាំទៀត។ សំណាកដីភពអង្គារដែលនឹងត្រូវបាននាំមកដល់ផែនដី នឹងត្រូវបានមនុស្សពិនិត្យដើម្បីឱ្យដឹងថា តើភពអង្គារមានភាវៈរស់ ឬអត់?

ជាងនេះ ការសិក្សាស្រាវជ្រាវសំណាកដី ធូលីភពអង្គារក៏អាចជួយឱ្យអ្នកវិទ្យាសាស្ត្ររកឃើញ ឬបកស្រាយអំពីអាថ៌កំបាំងជាច្រើនដែលទាក់ទងនឹងភពក្រហមនេះផងដែរ។ នេះក៏ជាមូលហេតុដែលរួមចំណែកជួយឱ្យដី ឬធូលីភពអង្គារមួយក្ដាប់មានតម្លៃរហូតដល់ 9 ពាន់លានដុល្លារអាម៉េរិក៕

September 12, 2023

អ្នកវិទ្យាសាស្ត្រចិនចិញ្ចឹមតម្រងនោមមនុស្សក្នុងអំប៊្រីយ៉ុងជ្រូកបានជោគជ័យ

ជាលើកដំបូងហើយដែលអ្នកវិទ្យាសាស្ត្រមួយក្រុមនៅប្រទេសចិន ចិញ្ចឹមតម្រងនោមមានកោសិកាមនុស្សក្នុងអំប៊្រីយ៉ុងសត្វជ្រូក ដែលនេះត្រូវបានគេរំពឹងថា នឹងក្លាយជាវិធីសាស្ត្រជំនួសនៅក្នុងការវះកាត់ប្ដូរសរីរាង្គរបស់មនុស្ស។

លទ្ធផលនៃការសិក្សាស្រាវជ្រាវរបស់វិទ្យាស្ថានវេជ្ជសាស្ត្រ និងសុខភាពក្វាងចូវ នៃបណ្ឌិត្យសភាវិទ្យាសាស្ត្រចិន ប្រកាសនៅលើទស្សនាវដ្ដី Cell Stem Cell កាលពីថ្ងៃទី 07 កញ្ញា 2023 បានបង្ហាញអំពីសក្ដានុពលនៃការចិញ្ចឹមសរីរាង្គដើម្បីផ្លាស់ប្ដូរ និងសិក្សាស្រាវជ្រាវនៅលើសត្វជ្រូក។ យោងតាម China Science Net នេះគឺជាលើកដំបូងដែលសរីរាង្គរបស់មនុស្សរីកចម្រើននៅខាងក្នុងរាងកាយសត្វដទៃ។

ក្នុងចំណោមអំប៊្រីយ៉ុងជា 1,800 នៅក្នុងការសិក្សាស្រាវជ្រាវខាងលើ មានអំប៊្រីយ៉ុងចំនួន 5 បានរីកចម្រើនប្រកបដោយជោគជ័យ។ អំប៊្រីយ៉ុងទាំងនេះចិញ្ចឹមតម្រងនោមដែលមានផ្ទុកកោសិកាមនុស្សពី 50 ទៅ 60%។ ក្រុមអ្នកវិទ្យាសាស្ត្រប្រើប្រាស់ឧបករណ៍កែសម្រួលហ្សែន CRISPR ដើម្បីចាត់ចែងហ្សែនចំនួនពីរដែលមានតួនាទីគ្រប់គ្រងការវិវត្តរបស់តម្រងនោម និងកាត់បន្ថយការរីកចម្រើនរបស់កោសិកាជ្រូក។

តម្រងនោមគឺជាមួយក្នុងចំណោមសរីរាង្គដែលត្រូវបានប្ដូរច្រើនជាងគេនៅលើមនុស្ស ប៉ុន្តែកង្វះតម្រងនោមល្អដែលបានពីការបរិច្ចាគកំពុងក្លាយជារឿងលំបាក។ ការចិញ្ចឹមសរីរាង្គមនុស្សក្នុងអំប៊្រីយ៉ុងសត្វមានដោះធំនឹងជាដំណោះស្រាយល្អសម្រាប់បញ្ហានេះ។

September 11, 2023

ជប៉ុនបាញ់បង្ហោះស្ថានីយចុះចតលើឋានព្រះចន្ទ

យានអវកាស SLIM នឹងហោះដល់គន្លងតារាវិថីព្រះចន្ទនៅក្នុងរយៈពេលពី 3 ទៅ 4 ខែទៀត រួចក៏នឹងចុះចតខាងក្នុងមាត់រណ្ដៅមួយដែលមានទំហំ 300 ម៉ែត្រ។

រ៉ុក្កែត H-2A របស់ជប៉ុន ដឹកស្ថានីយចុះចត SLIM និងតេឡេស្កុបអវកាស XRISM ហោះឡើងពីមជ្ឈមណ្ឌលអវកាស Tanegashima កាលពីម៉ោង 6 និង 42 នាទី ថ្ងៃទី 6 កញ្ញា (ពេលវេលានៅកម្ពុជា) យឺតជាង 10 ថ្ងៃ បើធៀបនឹងផែនការដំបូង ដោយសារតែបញ្ហាអាកាសធាតុ។

យានអវកាសទាំងពីរគ្រឿងបានហោះហោះដូចការគ្រោងទុក បន្ទាប់ពីត្រូវបានបាញ់បង្ហោះជិតមួយម៉ោង។ បើសិនជាគ្រប់យ៉ាងដំណើរការរលូត តែប៉ុន្មានខែទៀតប៉ុណ្ណោះ SLIM (ស្ថានីយស្រាវជ្រាវព្រះចន្ទឆ្លាតវៃ) នឹងរកវិធីចុះចតលើផ្ទៃព្រះចន្ទជាលើកដំបូង ដើម្បីបើកផ្លូវសម្រាប់បេសកកម្មប្រកបដោយមហិច្ឆតាជាច្រើនផ្សេងទៀត។

យោងតាមអង្គការស្រាវជ្រាវអវកាសជប៉ុន (JAXA) ស្ថានីយ SLIM ឆ្ពោះទៅរកការធ្វើតេស្តប្រព័ន្ធស្រាវជ្រាវស្រាលក្នុងទ្រង់ទ្រាយតូច និងប្រើប្រាស់បច្ចេកវិទ្យាចុះចតប្រកបដោយភាពសុក្រឹតចាំបាច់សម្រាប់យានអវកាសចុះចតលើឋានព្រះចន្ទក្នុងពេលអនាគត។

SLIM គឺជាយានអវកាសខ្នាតតូច មានកម្ពស់ 2.4 ម៉ែត្រ, បណ្ដោយ 2.7 ម៉ែត្រ និងទទឹង 1.7 ម៉ែត្រ។ នៅពេលហោះឡើង យាននេះមានទម្ងន់ 700 គីឡូក្រាម ក្នុងនោះ ឥន្ធនៈមានរហូតដល់ 70% នៃទម្ងន់សរុប។ SLIM នឹងហោះទៅតាមគន្លងវែងឆ្ងាយដែលសន្សំសំចៃឥន្ធនៈ ហើយគ្រោងនឹងទៅដល់គន្លងតារាវិថីព្រះចន្ទនៅ 3 ឬ 4 ខែទៀត។ យានអវកាសនេះនឹងសង្កេតមើលផ្ទៃព្រះចន្ទក្នុងមួយខែ មុននឹងបន្តចុះចតខាងក្នុងមាត់រណ្ដៅអាចម៍ផ្កាយ Shioli Crater ទំហំ 300 ម៉ែត្រ ដើម្បីធ្វើតេស្តបច្ចេកវិទ្យាចុះចត។

SLIM ក៏នាំយកយានស្រាវជ្រាវខ្នាតតូចពីរគ្រឿង ដែលគ្រោងនឹងត្រូវបានដាក់ពង្រាយលើផ្ទៃព្រះចន្ទ បន្ទាប់ពីបានចុះចត។ យានខ្នាតតូចមួយគូនេះនឹងជួយក្រុមអ្នកបច្ចេកទេសលើផែនដីអាចតាមដានស្ថានភាពរបស់យានចុះចត SLIM និងថតរូបតំបន់ចុះចត ក៏ដូចជាផ្ដល់ប្រព័ន្ធទំនាក់ទំនងផ្ទាល់ជាមួយនឹងផែនដី។

មុននោះ ស្ថានីយចុះចត Hakuto-R របស់ក្រុមហ៊ុនឯកជន Hakuto-R នៅតូក្យូ ក៏បានហោះដល់គន្លងតារាវិថីព្រះចន្ទ ប៉ុន្តែបានធ្លាក់បុកដីកាលពីខែមេសាឆ្នាំកន្លង។ ដូច្នេះ ជោគជ័យរបស់ SLIM នឹងជាប្រវត្តិសាស្ត្រដ៏សំខាន់មួយ។ គិតមកដល់បច្ចុប្បន្ន លើពិភពលោកមានតែបួនប្រទេសប៉ុណ្ណោះដែលធ្លាប់បានបញ្ជូនយានអវកាសទៅស្រាវជ្រាវឋានព្រះចន្ទ នោះគឺ សូវៀត អាម៉េរិក ចិន និងឥណ្ឌា។

ក្រៅពី SLIM រ៉ុក្កែតរុញច្រាន H-2A ក៏ដឹកឡេស្កុបអវកាស XRISM (បេសកកម្មថតរូបដែលបំពាក់បច្ចេកវិទ្យាកាំរស្មីអ៊ិច (X)) ដែលជាគម្រោងសហការរវាងទីភ្នាក់ងារអវកាសជប៉ុន អាម៉េរិក និងអឺរ៉ុប នឹងធ្វើសកម្មភាពនៅក្នុងគន្លងតារាវិថីកម្រិតទាបរបស់ផែនដី។ តេឡេស្កុបនេះនឹងស្រាវជ្រាវចក្រវាលតាមរយៈកាំរស្មីអ៊ិចថាមពលខ្ពស់ក្នុងទីអវកាស៕

September 7, 2023

Category: អន្តរជាតិ