Category: អន្តរជាតិ

មនុស្សជិត ៧០០០នាក់អះអាងថា ខ្លួនបានបាត់បង់ទឹកប្រាក់ជាង ២ពាន់លានបាត តាមរយៈអាជីវកម្មពីរ៉ាមីតរបស់ក្រុមហ៊ុន ដឺ អាយខុន គ្រុប
មនុស្សសរុបចំនួន ៦,៩៧៩នាក់បានដាក់ពាក្យបណ្ដឹង និងប្រកាសពីទំហំទឹកប្រាក់ខាតបង់ចំនួនជាង២ពាន់លានបាត ទាក់ទងនឹងការចូលរួមរបស់ពួកគេនៅក្នុងអាជីវកម្មលក់ផ្ទាល់របស់ ដឺ អាយខុន គ្រុប ហើយនៅពេលនេះការិយាល័យស៊ើបអង្កេតកណ្តាលនៃប្រទេសថៃក៏គ្រោងនឹងចោទប្រកាន់បន្ថែមទៀតទៅលើជនសង្ស័យទាំង១៨រូបនៅក្នុងគម្រោង ដឺ អាយខុន គ្រុប ពីបទលាងលុយកខ្វក់ ការខ្ចីប្រាក់ក្លែងបន្លំ និងការប្រមូលផ្ដុំដោយខុសច្បាប់ ដោយមានមនុស្សជាច្រើននៅក្នុងប្រទេសថៃ និងនៅប្រទេសផ្សេងទៀតកំពុងប្រមូលភស្តុតាងបន្ថែម ដូច្នេះជនសង្ស័យនៅក្នុងគម្រោង ដឺ អាយខុន ទាំង១៨រូប គឺកំពុងប្រឈមជាមួយការចោទប្រកាន់បន្ថែម ដែលធ្វើឱ្យទម្ងន់ទោសទណ្ឌរបស់ពួកគេនឹងកាន់តែធ្ងន់ធ្ងរឡើងថែមទៀត។
អគ្គស្នងការនគរបាលជាតិ លោក Pol Gen Kitrat Phanphet បានប្រាប់ឱ្យដឹងកាលពីថ្ងៃអង្គារ ទី២២នេះថា រវាងថ្ងៃទី១០ ដល់ថ្ងៃទី២១ ខែតុលានេះ មនុស្សសរុបចំនួន៦,៩៧៩នាក់ បានដាក់ពាក្យបណ្តឹងទៅកាន់ការិយាល័យស៊ើបអង្កេតកណ្តាល CIB និងនៅស្ថានីយ៍ប៉ូលីសទូទាំងប្រទេសថៃ ដោយពាក្យបណ្តឹងទាំងអស់បានរាយការណ៍ពីការខូចខាតសរុបចំនួនទឹកប្រាក់រហូតដល់២,០៤៦លានបាត។
លោក Pol Gen Kitrat ក៏បានបន្តទៀតថា កាលពីថ្ងៃអង្គារកន្លងទៅប៉ុន្មានថ្ងៃនេះ ប៉ូលីសថៃបានស្វែងរកទីតាំងចំនួន១១ទីតាំងបន្ថែមទៀត ដែលពាក់ព័ន្ធនឹងក្រុមហ៊ុន ដឺ អាយខុន គ្រុប និងជនសង្ស័យទាំង១៨រូបខាងលើ ហើយក្រុមស៊ើបអង្កេតកំពុងប្រមូល និងចងក្រងភស្តុតាង ស្នើសុំដីកាចាប់ខ្លួនពីតុលាការ ដើម្បីចុះចាប់ខ្លួនក្រុមជនសង្ស័យក្រុមទីពីរដែលពាក់ព័ន្ធនឹងគម្រោងឆបោកខ្នាតធំមួយនេះបន្តទៀត ដោយលោកបានអះអាងចំពោះអ្នកសារព័ត៌មានថា ជនណាដែលប៉ូលីសរកឃើញថាពាក់ព័ន្ធនឹងគម្រោងឆបោកមួយនេះនឹងប្រឈមមុខការចាត់វិធានការតាមផ្លូវច្បាប់នៃប្រទេសថៃ មិនថាពួកគេជានរណានោះទេ។
ក្នុងនោះក៏មានអ្នកចោទសួរថា តើអ្នកនាង Iyada Kantathavorn ភរិយារបស់ពិធីករទូរទស្សន៍ដ៏មានប្រជាប្រិយភាព និងជាតារាសម្តែង លោក Kan Kantathavorn ស្ថិតនៅក្នុងចំណោមជនសង្ស័យក្រុមទី២នេះដែរឬទេ? នាយឧត្តមសេនីយ៍ Kitrat បានបញ្ជាក់ប្រាប់ថា លោកមិនបានឃើញឈ្មោះរបស់អ្នកនាងនៅក្នុងបញ្ជីជនសង្ស័យនោះទេ ហើយក៏មិនមានរបាយការណ៍ណាមួយបានបញ្ជាក់ថាអ្នកនាងកំពុងមានសកម្មភាពរត់គេចចេញពីប្រទេសថៃនោះដែរ។

នាយឧត្តមសេនីយ៍ Sophon Saraphat ស្នងការរង CIB បានប្រាប់ឱ្យដឹងថា ប៉ូលីសកំពុងពិនិត្យមើលរបាយការណ៍អំពីការផ្ទេរទ្រព្យសម្បត្តិរបស់ជនដែលពាក់ព័ន្ធនឹងករណីឆបោកនេះ ហើយមន្ត្រីជំនាញក៏កំពុងពិនិត្យមើលភស្តុតាង ជាពិសេសកាមេរ៉ាសុវត្ថិភាព ដើម្បីស្វែងរកតម្រុយ និងភស្តុតាងនៃការផ្ទេរទ្រព្យសម្បត្តិចេញចូលផងដែរ។
សរុបមកជនសង្ស័យនៅក្នុងរឿងឆបោកលំដាប់ប្រទេសមួយនេះនៅមិនទាន់ចប់ត្រឹមជនសង្ស័យទាំង១៨រូបដែលប៉ូលីសថៃបានចាប់ខ្លួនបញ្ជូនទៅមន្ទីរឃុំឃាំងកាលពីថ្ងៃពុធសប្តាហ៍មុននោះទេ គឺនៅមានជនសង្ស័យជាច្រើននាក់ទៀតដែលនឹងត្រូវចាប់ខ្លួនជាបន្តបន្ទាប់ ដូច្នេះសូមរង់ចាំតាមដានជាបន្តទៀត៕
October 24, 2024
វគ្គបង្ហាញមុខជនសង្ស័យទាំង ១៨រូប នៅក្នុងគម្រោងក្លែងបន្លំ និងឆបោក របស់ក្រុមហ៊ុន ដឺ អាយខុន គ្រុប ក្រុមហ៊ុនទីផ្សារបែបពីរ៉ាមីតដ៏ធំរបស់ប្រទេសថៃ
ជនសង្ស័យទាំង១៨នាក់នៅក្នុងគម្រោងឆបោក ដឺ អាយខុន គ្រុប មានដូចជា៖
១. លោក Jirawat Saengpakdi “Boss ឬ Coach Lab”
២. លោក Klod Setthanan “Boss Peter”
៣. កញ្ញា Pancharat Kanokraktanaporn “Boss Pan”
៤. លោក Thananon Hirunchaiwan “Boss Mor Ek”
៥. កញ្ញា Natpasorn Chatthanasorn “Boss Suay”
៦. កញ្ញា Yasikarn Ekchisanupong “Boss Soda”
៧. លោក Nantharat Chaowanapricha “Boss Ohm”
៨. លោក Thawinphat Phuphatthanarin “Boss Win”
៩. កញ្ញា Kanokthon Puranasukhon “Boss Mae Ying”
១០. កញ្ញា Saowapha Wongsakha “Boss Oommy”
១១. លោក Chetnapat Apipattanakarn “Boss Tommy”
១២. លោក Hatsayanon Ekchisanupong “Boss Pop”
១៣. កញ្ញា Wilailak Jengsuwan “Boss Joy”
១៤. លោក Thanarot Thitijariyawat “Boss Op”
១៥. តារាសម្តែងជើងចាស់ លោក Yuranan Pamornmontri “Boss Sam”
១៦. តារាស្រីដ៏ល្បីឈ្មោះ កញ្ញា Pechaya Wattanamontri “Boss Min”
១៧. តារាសម្តែង និងពិធីករទូរទស្សន៍ Kan Kantathavorn “Boss Kan”
១៨. នាយកប្រតិបត្តិនៃក្រុមហ៊ុន ដឺ អាយខុន គ្រុប លោក Warathaphon Waratyaworrakul “Boss Paul”
ដោយក្នុងចំណោមជនសង្ស័យទាំង១៨នាក់នោះ មានតែតារាសម្តែង Yuranan Pamornmontri “Boss Sam”តារាសម្តែង Pechaya Wattanamontri “Boss Min” និងពិធីករទូរទស្សន៍ Kan Kantathavorn “Boss Kan” ប៉ុណ្ណោះដែលបានដាក់ពាក្យសុំនៅក្រៅឃុំ។ តែទោះជាយ៉ាងណាក៏ដោយ ក៏តុលាការប្រទេសថៃបានបដិសេធសំណើររបស់ពួកគេ ដោយនិយាយថា ពួកគេមានហានិភ័យក្នុងការហោះហើរ ឬអាចរំខានដល់ភស្តុតាងផ្សេងៗទៀត។
ទន្ទឹមគ្នានេះដែរ តំណាងជនរងគ្រោះប្រមាណជា១៥០នាក់ក៏បានដាក់ញត្តិទៅតុលាការប្រឆាំងនឹងការដោះលែងបណ្តោះអាសន្នរបស់ជនសង្ស័យទាំងអស់នោះផងដែរ។
អានបន្ត៖ ជនសង្ស័យឆបោកប្រជាជនថៃនៅក្នុងក្រុមហ៊ុន ដឺ អាយខុន គ្រុប (The iCon Group) ចំនួន១៨នាក់ ត្រូវបានប៉ូលីសបញ្ជូនទៅពន្ធនាគារជាផ្លូវការហើយ
នាពេលនេះជនសង្ស័យប្រុសទាំង១១នាក់ ត្រូវបានបញ្ជូនទៅកាន់ពន្ធនាគារ Remand នៃទីក្រុងបាងកក និងជនសង្ស័យស្រី៧នាក់ទៀតត្រូវបានបញ្ជូនទៅកាន់ស្ថាប័នអប់រំកែប្រែស្ត្រី នៃទីក្រុងបាងកក ប្រទេសថៃរួចស្រេចអស់ហើយ។
តើវាសនារបស់ជនសង្ស័យទាំង១៨រូបនៅក្នុងគម្រោងឆបោកនៃក្រុមហ៊ុន ដឺ អាយខុន គ្រុប នឹងទៅជាយ៉ាងណា? សូមរង់ចាំតាមដានជាបន្តទៀត…៕
October 23, 2024
ជនសង្ស័យឆបោកប្រជាជនថៃនៅក្នុងក្រុមហ៊ុន ដឺ អាយខុន គ្រុប (The iCon Group) ចំនួន១៨នាក់ ត្រូវបានប៉ូលីសបញ្ជូនទៅពន្ធនាគារជាផ្លូវការហើយ
តើប្រិយមិត្តអ្នកអានទាំងអស់បានតាមដានដែរឬទេ នូវរឿងដ៏កក្រើកមួយនៅក្នុងប្រទេសថៃដែលជាប្រទេសជិតខាងរបស់ប្រទេសកម្ពុជាយើង? នោះគឺរឿងដ៏ចម្រូងចម្រាសរបស់ក្រុមហ៊ុនដ៏ល្បីឈ្មោះ និងធំមួយរបស់ប្រទេសថៃ ដែលមានឈ្មោះថា “ដឺ អាយខុន គ្រុប” (The iCon Group) ដែលទទួលបាននូវពាក្យបណ្តឹងពីសំណាក់ប្រជាជនថៃរាប់ពាន់នាក់ថា ជាក្រុមហ៊ុនឆបោក និងបានបោកប្រាស់លុយកាក់របស់ប្រជាជនថៃរហូតដល់ជាង១.៦១ពានលានបាត។
នៅពេលថ្មីៗនេះ នាយកប្រតិបត្តិនៃក្រុមហ៊ុន ដឺ អាយខុន គ្រុប លោក Warathaphon Waratyaworrakul “ហៅ Boss Paul” បានបង្ហាញខ្លួននៅតុលាការជាលើកដំបូងនៅថ្ងៃសុក្រ ទី១៨ ខែតុលាកន្លងទៅថ្មីៗនេះ ដើម្បីវែកមុខរកអ្នកចូលរួមឆបោកប្រជាជនថៃនៅក្នុងគម្រោង ដឺ អាយខុន គ្រុប បន្ថែមទៀត។
ប៉ូលីសក៏បាននាំខ្លួនជនសង្ស័យចំនួន១៧នាក់ផ្សេងទៀតទៅកាន់តុលាការកាលពីរសៀលថ្ងៃព្រហស្បតិ៍ ដើម្បីធ្វើការសាកសួរស៊ើបអង្កេត និងធ្វើការឃុំខ្លួន ខណៈដែលស្ថាបនិក និងជានាយកប្រតិបត្តិ ដឺ អាយខុន គ្រុប លោក Warathaphon Waratyaworrakul “Boss Paul” កំពុងត្រូវបានសាកសួរដោយក្រុមស៊ើបអង្កេតនៅឡើយ។
ក្នុងនោះក៏មានតារាល្បីឈ្មោះ លោក Yuranan Pamornmontri “ហៅ Boss Sam” កញ្ញា Pechaya Wattanamontri “ហៅ Boss Min” និងលោក Kan Kantathavorn “ហៅ Boss Kan” ព្រមទាំងជនសង្ស័យចំនួន១៤នាក់ផ្សេងទៀតនៅក្នុងសំណុំរឿងក្លែងបន្លំ ដឺ អាយខុន គ្រុប ត្រូវបានបញ្ជូនទៅតុលាការព្រហ្មទណ្ឌនៅរសៀលថ្ងៃព្រហស្បតិ៍ ទី១៧ ខែតុលាកន្លងទៅនេះ ដោយអ្នកទាំងអស់ត្រូវបានឃុំខ្លួននៅមន្ទីរឃុំឃាំងហើយ។
ជនសង្ស័យចំនួន១៨នាក់នៅក្នុងសំណុំរឿងក្លែងបន្លំ និងឆបោក ដឺ អាយខុន គ្រុប ត្រូវបានបញ្ជូនទៅពន្ធនាគារបន្ទាប់ពីតុលាការព្រហ្មទណ្ឌបានបដិសេធសំណើសុំនៅក្រៅឃុំដែលដាក់ដោយតារាល្បីបីនាក់ ដោយលើកឡើងពីហានិភ័យនៃការហោះហើរ ខណៈដែលអ្នកផ្សេងទៀតមិនបានដាក់ពាក្យសុំដោះលែងនោះទេ។
សេចក្តីសម្រេចនេះបានធ្វើឡើងនៅថ្ងៃដែលនាយកដ្ឋានស៊ើបអង្កេតពិសេស DSI បានកំណត់ទីតាំងម៉ាស៊ីនមេដែលមានកំណត់ត្រាអាជីវកម្មរបស់ក្រុមហ៊ុនលក់អនឡាញ ដែលត្រូវបានចោទប្រកាន់ពីបទដំណើរការគម្រោងពីរ៉ាមីត។ អាជ្ញាធរថៃក៏បានរឹបអូសទ្រព្យសម្បត្តិដែលមានតម្លៃសរុប២២០លានបាត រួមទាំងរថយន្តទំនើបៗជាច្រើនគ្រឿងពីជនសង្ស័យទាំងនោះផងដែរ។
ជនសង្ស័យទាំង១៨រូប ដែលត្រូវបានគេហៅថា “ចៅហ្វាយនាយ – The Boss” នៅក្នុងឋានានុក្រមរបស់ ដឺ អាយខុន គ្រុប ត្រូវបានចោទប្រកាន់ពីបទសមគំនិតក្នុងការក្លែងបន្លំ និងបញ្ចូលព័ត៌មានមិនពិតទៅទៅដល់ប្រជាជនទូទៅឱ្យជឿស្លុង និងធ្វើការបណ្តាក់ទុនជាមួយក្រុមហ៊ុន ដឺ អាយខុន គ្រុប ហើយអ្នកទាំង១៨រូបនេះត្រូវបានចាប់ខ្លួនកាលពីថ្ងៃពុធ ទី១៦ ខែតុលា ឆ្នាំ២០២៤ បន្ទាប់ពីមនុស្សជាង១,០០០នាក់បានដាក់ពាក្យបណ្តឹងរឿងក្លែងបន្លំប្រឆាំងនឹងក្រុមហ៊ុន ដឺ អាយខុន គ្រុប។ ពួកគេនិយាយថា ដឺ អាយខុន គ្រុប បានទាក់ទាញពួកគេដោយផ្តល់វគ្គបណ្តុះបណ្តាលលក់អនឡាញថោកៗ ហើយបន្ទាប់មកបានបង្ខិតបង្ខំពួកគេឱ្យធ្វើការប្តេជ្ញាចិត្តក្នុងការកាត់ស្តុកផលិតផលយកទៅលក់បន្ត ដែលនាំឱ្យពួកគេត្រូវខាតបង់ប្រាក់កាសរាប់រយពាន់បាត៕
អានបន្ត៖ វគ្គបង្ហាញមុខជនសង្ស័យទាំង ១៨រូប នៅក្នុងគម្រោងក្លែងបន្លំ និងឆបោក របស់ក្រុមហ៊ុន ដឺ អាយខុន គ្រុប ក្រុមហ៊ុនទីផ្សារបែបពីរ៉ាមីតដ៏ធំរបស់ប្រទេសថៃ
October 23, 2024
ឡាវ កំពុងងាកទៅរកការបង្កើតទីផ្សារជួញដូរមាសទ្រង់ទ្រាយធំ ដើម្បីស្ដារសេដ្ឋកិច្ចដែលកំពុងដាំក្បាល
បរទេស ៖ រដ្ឋាភិបាលប្រទេសឡាវ បាន និងកំពុងងាកទៅរកការបង្កើតទីផ្សារជួញដូរមាសក្នុងទ្រង់ទ្រាយធំតាមរយៈធនាគារថ្មីមួយរបស់ខ្លួន ដោយរំពឹងថាអាចស្ដារសេដ្ឋកិច្ចរបស់ខ្លួនដែលកំពុងប្រឈមនឹងការដាំក្បាលចុះ។ នេះបើយោងតាមការចេញផ្សាយរបស់បណ្តាញសារព័ត៌មានជប៉ុន នីគីអាស៊ី។
ប្រភពពីបណ្តាញសារព័ត៌មានខាងលើនេះបានឱ្យថា ៖ បច្ចុប្បន្ននេះ រដ្ឋាភិបាលនៃប្រទេសឡាវ បាន និងកំពុងងាកទៅរកការជួញដូរមាសដែលជាចំណុចស្នូលយុទ្ធសាស្ត្រ ដើម្បីពង្រឹងស្ថិរភាពហិរញ្ញវត្ថុរបស់ប្រទេស។ គំនិតផ្តួចផ្តើមនេះបានបង្ហាញពីការផ្លាស់ប្តូរដ៏សំខាន់នៃគោលនយោបាយសេដ្ឋកិច្ចរបស់ប្រទេសឡាវ ដែលមានបំណងប្រើប្រាស់ធនធានធម្មជាតិរបស់ខ្លួន ដើម្បីទាក់ទាញការវិនិយោគពីបរទេស និងបង្កើនទុនបម្រុងប្តូរប្រាក់បរទេស។
គួរកត់សម្គាល់ថា កាលពីខែកញ្ញាឆ្នាំ២០២៤កន្លងទៅនេះ រដ្ឋាភិបាលឡាវ និងក្រុមហ៊ុនឯកជនក្នុងស្រុកបានសហការបណ្តាក់ទុនរួមគ្នាដើម្បីបង្កើតធនាគារថ្មីមួយមានឈ្មោះថា Lao Bullion Bank (LBB) ដែលមានប្រតិបត្តិការដូចជា ទិញ-លក់មាសទ្រង់ទ្រាយធំ និងទទួលប្រាក់បញ្ញើ ប៉ុន្តែដំណើរការមិនទាន់បានពេញលេញនោះទេ។ យ៉ាងណាមិញ ការបើកដំណើរការពេញលេញនឹងចាប់ផ្តើមនៅខែវិច្ឆិកាខាងមុខនេះ ដោយនឹងរួមបញ្ជូលការជួញដូរមាស ការវិភាគភាពសុទ្ធនៃមាស ព្រមទាំងប្រតិបត្តិការផ្សេងទៀត។
លោក Vathana Dalaloy ទេសាភិបាលធនាគារកណ្តាលស្តីទីបានលើកឡើងថា ប្រតិបត្តិការរបស់ធនាគារដែលប្រើប្រាស់ទុនបម្រុងមាសប្រមាណ ៥០០ ទៅ ១ ០០០ តោនរបស់ប្រទេសនឹងរួមចំណែកដល់ស្ថិរភាពនៃស្ថាប័នហិរញ្ញវត្ថុ និងសារពើពន្ធ។
ដោយឡែក លោក Kenichiro Yamada ដែលជាអ្នកជំនាញផ្នែកសេដ្ឋកិច្ច មកពីអង្គការពាណិជ្ជកម្មក្រៅប្រទេសជប៉ុនបានលើកឡើងថា ការគាំទ្ររបស់រដ្ឋាភិបាលសម្រាប់ធនាគារ Lao Bullion Bank (LBB) ដែលទើបតែបង្កើតថ្មីខាងលើនេះ អាចទាក់ទាញអតិថិជនស៊ីវិល និងការគ្រប់គ្រងទ្រព្យសម្បត្តិកាន់តែច្រើន ខណៈដែលការចាប់អារម្មណ៍លើទីផ្សារមាសកំពុងកើនឡើង៕
October 22, 2024
អាចម៍ផ្កាយដែលទើបតែធ្លាក់បុកផែនដីថ្មីៗនេះ មានរង្វិលខ្ញាល់លឿនបំផុត
2024 BX1 ដែលទើបតែបានធ្លាក់មកបុកនឹងផែនដីកាលពីថ្ងៃទី 21 មករា គឺជាអាចម៍ផ្កាយដែលធ្វើដំណើរក្នុងល្បឿនលឿនជាងវត្ថុអវកាសទាំងឡាយដែលស្ថិតនៅក្បែរផែនដី។
អាចម៍ផ្កាយ 2024 BX1 ប្រែក្លាយជាដុំភ្លើង និងផ្ទុះនៅលើអាកាសនៃទីក្រុងបែកឡាំងប្រទេសអាល្លឺម៉ង់ កាលពីថ្ងៃទី 21 មករា 2024។ បើទោះជាអាចម៍ផ្កាយតូចៗដែលធ្លាក់មកបុកនឹងផែនដី តែងតែត្រូវបានឃើញនៅពេលពួកវាហោះចូលមកដល់បរិយាកាសផែនដី ប៉ុន្តែក្រុមអ្នកវិទ្យាសាស្ត្របានប្រទះឃើញអាចម៍ផ្កាយ 2024 BX1 ប្រហែលបីម៉ោង មុនពេលវាបុកនឹងផ្ទៃផែនដី។
ទំព័រ Live Science ចុះផ្សាយកាលពីថ្ងៃទី 2ឧសភា ឱ្យដឹងថា ខាងលើនេះមិនមែនជាចំនុចពិសេសដែលនាំឱ្យ អាចម៍ផ្កាយ 2024 BX1 ប្រែជាពិសេសជាងគេនោះទេ។ យោងតាមលទ្ធផលនៃការសិក្សាស្រាវជ្រាវថ្មីមួយដែលទើបតរូវបានចុះផ្សាយលើទស្សនាវដ្ដីទិន្នន័យ arXiv អាចម៍ផ្កាយនេះផ្លាស់ទីក្នុងល្បឿន 5ម៉ឺនគីឡូម៉ែត្រក្នុងមួយម៉ោង ហើយរៀងរាល់ជាង 2វិនាទីកន្លះ វាវិលមួយជុំខ្លួនវា។ នេះគឺជាល្បឿនរង្វិលខ្ញាល់ដែលលឿនបំផុតមិនធ្លាប់ត្រូវបានដឹងនៅលើអាចម៍ផ្កាយក្បែរផែនដី។
មុននោះ កំណត់ត្រាបែបនេះគឺបានទៅលើ 2020 HS7 ដោយសារតែរង្វិលខ្ញាល់មួយជុំរបស់វា ស៊ីពេលតែ 2.99 វិនាទី។ អាចម៍ផ្កាយនេះមានអង្កត់ផ្ចិតប្រវែងពី 4 ទៅ 8ម៉ែត្រ ធំជាងបន្តិចបើធៀបនឹងអាចម៍ផ្កាយ 2024 BX1។
មានមូលហេតុជាច្រើនដែលនាំឱ្យអាចម៍ផ្កាយវិលខ្ញាល់ ឧទាហរណ៍ វាត្រូវបានរុញត្រលប់ទៅកាន់អវកាសបន្ទាប់ពីបានប៉ះទង្គិចនឹងអាចម៍ផ្កាយដទៃ។ ព្រោះតែតូចជាង ទើបអាចម៍ផ្កាយតូចៗតែងតែមានរង្វិលខ្ញាល់លឿនជាងអាចម៍ផ្កាយធំៗ។
អ្នកវិទ្យាសាស្ត្របានអភិវឌ្ឍបច្ចេកទេសថ្មីដែលអាចជួយសង្កេតដឹងអំពីល្បឿននៃរង្វិលខ្ញាល់របស់បណ្ដាអាចម៍ផ្កាយ ដោយយោងទៅលើរូបភាព។ ការប្រែប្រួលកម្រិតពន្លឺក្នុងពេលគោចរ គឺជាបង្ហាញអំពីចំនួនជុំនៃរង្វិលខ្ញាល់របស់អាចម៍ផ្កាយ។
ក្រុមស្រាវជ្រាវបានវាស់ប្រវែងនៃគម្លាតរវាងចំនុចភ្លឺខ្លាំង រួចធ្វើការសន្និដ្ឋានថា ថេរវេលាវិលមួយជុំខ្លួនឯងរបស់អាចម៍ផ្កាយ 2024 BX1 គឺ 2.588 វិនាទី ពោលគឺប្រហាក់ប្រហែលនឹង 33ពាន់ជុំក្នុងមួយថ្ងៃ។
ការក្ដាប់បាននូវល្បឿនល្បឿននៃរង្វិលខ្ញាល់របស់បណ្ដាអាចម៍ផ្កាយដែលស្ថិតនៅក្បែរផែនដី នឹងជួយកាត់បន្ថយហានិភ័យដែលពួកវាអាចបង្កឡើងមកលើមនុស្ស ក៏ដូចជាហេដ្ឋារចនាសម្ព័ន្ធនៅលើផែនដី៕
May 6, 2024
ចិនបញ្ជូនយានទៅយកសំណាកដីតំបន់ងងឹតរបស់ព្រះចន្ទ
យាន Chang’e 6 ហោះឡើងជាមួយនឹងរ៉ុក្កែត Long March 5 ពីមជ្ឈមណ្ឌលបាញ់បង្ហោះផ្កាយរណប Wenchang លើកោះ Hainan កាលពីវេលាម៉ោង 16និង27នាទី ថ្ងៃទី3 ខែឧសភា ម៉ោងនៅកម្ពុជា។
ក្នុងការហោះហើរ 53ថ្ងៃ យានអវកាស Chang’e 6 នឹងឆ្ពោះទៅកាន់តំបន់ទំនាបនៅប៉ូលខាងត្បូង Aitken (SPA) ដែលស្ថិតក្នុងតំបន់ងងឹតរបស់ព្រះចន្ទ ជាទីដែលមិនអាចមើលឃើញពីផែនដី។ នេះបើតាមទីភ្នាក់ងារអវកាសចិន (CNSA)។
បេសកកម្មនេះនឹងរើសយកសំណាកដី និងថ្មចំនួនពីរគីឡូក្រាមពីតំបន់ចុះចត និងនាំយកមកកាន់ផែនដីដើម្បីវិភាគលម្អិត។ ដំណើរការរើសយកសំណាកដីព្រះចន្ទនឹងត្រូវបានគាំទ្រដោយផ្កាយរណប Queqiao-2 ដែលត្រូវបានបាញ់បង្ហោះកាលពីខែមីនា និងកំពុងគោចរជុំវិញព្រះចន្ទ រង់ចាំយាន Chang’e 6។
នោះនឹងជាសំណាកដីព្រះចន្ទដំបូងដែលត្រូវបាននាំយកមកកាន់ផែនដី បន្ទាប់ពីបេសកកម្ម Apollo របស់អាម៉េរិក និង Luna របស់អតីតសូវៀត កាលពីប្រាំទសវត្សរ៍មុន។
យានចុះចត និងយានយកសំណាកនឹងចុះចតក្នុងភាគឦសានលើតំបន់ទំនាប SPA ជាទីដែលមានភូមិសាស្ត្រស្មុគស្មាញ និងមានតម្លៃខ្ពស់ផ្នែកវិទ្យាសាស្ត្រ។ បន្ទាប់ពីបានរើសយកសំណាកដី និងថ្ម យានយកសំណាកនេះនឹងហោះត្រលប់ទៅកាន់គន្លងតារាវិថីព្រះចន្ទ ដើម្បីប្រគល់ឱ្យម៉ូឌុលដែលនៅចាំទទួលក្នុងអវកាស មុននឹងនាំយកសំណាកទាំងនេះមកកាន់ផែនដី។
កាលពីឆ្នាំកន្លង អ្នកវិទ្យាសាស្ត្រមួយក្រុមនៅប្រទេសចិន បានកំណត់ទីតាំងចំនួនបីដ៏មានសក្ដានុពលសម្រាប់ការចុះចតរបស់យាន Chang’e 6 នៅក្នុងតំបន់ទំនាប SPA ដែលជារណ្ដៅយក្សទំហំ 2,500 គីឡូម៉ែត្រ និងជម្រៅ 8គីឡូម៉ែត្រ កើតឡើងក្រោយពីករណីធ្លាក់អាចម៍ផ្កាយកាលពីរាប់ពាន់លានឆ្នាំមុន។
យោងតាមទិន្នន័យដែលបានសង្កេតពីចម្ងាយ តំបន់ទំនាប SPA សម្បូរទៅដោយសារធាតុគីមី និងមានអាយុកាលយូរ។ យានរបស់ចិននឹងជ្រើសទីតាំងសុវត្ថិភាពបំផុតដើម្បីចុះចត នៅពេលហោះបន្ទាបខ្លួនបន្តិចម្ដងៗ។
យាន Chang’e 6 ទំនងជាអាចរកឃើញ និងនាំយកថ្មី basalt ដែលជាកម្អែរភ្នំភ្លើងដែលបានត្រជាក់នៅតំបន់ទំនាបខាងលើ។ អ្នកវិទ្យាសាស្ត្រអាចវាស់ស្ទង់អាយុកាល សមាសធាតុ និងរបៀបកកើតរបស់វា។ តាមរយៈការប្រៀបធៀបថ្មដែលនាំយកពីតំបន់ភ្លឺរបស់ព្រះចន្ទ ពួកគេនឹងអាចរកឃើញតម្រុយដែលទាក់ទងនឹងមូលហេតុដែលនាំឱ្យមានតំបន់ងងឹត និងតំបន់ភ្លឺនៅលើឋានព្រះចន្ទ។
May 4, 2024
ថៃប្ដូរយុទ្ធសាស្ត្រទាក់ទាញទេសចរ ព្រោះតែអាកាសធាតុ
អគ្គនាយកដ្ឋានទេសចរណ៍ថៃ (TAT) កំពុងតែត្រៀមខ្លួនដើម្បីជំរុញ លើកទឹកចិត្តដល់ក្រុមទេសចរណ៍ព្រឹកព្រលឹម និងព្រលប់ ក្នុងបំណងរក្សាលំនឹងក្នុងទីផ្សារទេសចរណ៍ គ្រាដែលអាកាសធាតុក្ដៅខ្លាំង ធ្វើឱ្យមនុស្សម្នាមិនចង់ចេញទៅក្រៅ។
លោកស្រី Somradee Chitchong ដែលជាអគ្គនាយិការង នៃអគ្គនាយកដ្ឋាន TAT ទទួលបន្ទុកទីផ្សារក្នុងស្រុក បានឱ្យដឹងថា ស្ថាប័ននេះកំពុងតែបង្វែរគោលដៅយុទ្ធសាស្ត្រឃោសនាទៅរកទេសចរណ៍ព្រឹកព្រលឹម និងពេលយប់ ដើម្បីជៀសវាងកម្ដៅថ្ងៃ។
លោកស្រីថ្លែងថា អាកាសធាតុក្ដៅខ្លាំង ធ្វើឱ្យប្រជាជននៅប្រទេសនេះមិនចង់ចេញពីផ្ទះ ពិសេសគឺមនុស្សចាស់។ អ្នកខ្លះក៏ជ្រើសរើសទីតាំងទេសចរណ៍ដែលមានបរិយាកាសត្រជាក់ ស្រួលដកដង្ហើមជាដើម។
ដើម្បីជំរុញប្រាក់ចំណូលសម្រាប់បណ្ដាក្រុមហ៊ុនទេសចរណ៍ក្នុងស្រុកដែលកំពុងប្រឈមនឹងការធ្លាក់ចុះនៃប្រាក់ចំណូល TAT មានផែនការជំរុញសកម្មភាពសមស្របជាងមុននៅពេលព្រឹក ពេលព្រលប់ និងពេលយប់ មានដូចជា សកម្មភាពរត់យឺត ចែវទូក ឬគយគន់តារាជាដើម។
May 3, 2024
ក្រុមហ៊ុន Virtus Solis មានគម្រោងផលិតអគ្គិសនីព្រះអាទិត្យក្នុងទីអវកាស
ក្រុមហ៊ុន Virtus Solis គ្រោងនឹងប្រើប្រាស់រ៉ុក្កែត Starship ដើម្បីបាញ់បង្ហោះផ្ទាំងសូឡាទំហំមួយគីឡូម៉ែត្រ ឡើងទៅកាន់ទីអវកាស ដើម្បីផលិត និងបាញ់បញ្ជូនអគ្គិសនីពីលើមេឃមកកាន់ផែនដី។
Virtus Solis ដែលជាក្រុមហ៊ុនធុរកិច្ចថ្មីនៅរដ្ឋ Michigan សហរដ្ឋអាម៉េរិក ត្រូវបានបង្កើតឡើងដោយអតីតវិស្វកររ៉ុក្កែត John Bucknell របស់ក្រុមហ៊ុន SpaceX។ តំណាងក្រុមហ៊ុននេះបានអធិប្បាយអំពីគំនិតស្ដីពីការបាញ់បញ្ជូនអគ្គិសនីព្រះអាទិត្យពីទីអវកាស នៅក្នុងសន្និសីទអន្តរជាតិស្ដីពីថាមពលអវកាស ដែលត្រូវបានធ្វើឡើងនៅប្រទេសអង់គ្លេសកាលពីពាក់កណ្ដាលខែមេសា ឆ្នាំ2024។ នេះបើតាមទំព័រ Space ដែលបានចុះផ្សាយកាលពីថ្ងៃទី30 មេសា។
លោក Bucknell យល់ថា នៅពេលការចំណាយសម្រាប់ការបាញ់បង្ហោះផ្កាយរណបឡើងទៅកាន់គន្លងតារាវិថីកម្រិតទាបរបស់ផែនដីថយចុះមកនៅក្រោម 200ដុល្លារក្នុងមួយគីឡូក្រាម អគ្គិសនីព្រះអាទិត្យក្នុងទីអវកាសក៏នឹងមានតម្លៃទាបជាង បើធៀបនឹងអគ្គិសនីពីបណ្ដារោងចក្រថាមពលនុយក្លេអែរ ឬរោងចក្រដែលប្រើប្រាស់ធ្យូងថ្ម និងឧស្ម័នធម្មជាតិនៅលើផែនដី។ បច្ចុប្បន្ន SpaceX យកថ្លៃមិនដល់ 3ពាន់ដុល្លារសម្រាប់ទំនិញមួយគីឡូក្រាមដែលផ្ញើឡើងទៅកាន់ទីអវកាស។ SpaceX បានអះអាងថា បន្ទាប់ពីរ៉ុក្កែត Starship ដំណើរការពេញលេញ ការចំណាយសម្រាប់ការបាញ់បង្ហោះផ្កាយរណបទៅកាន់អវកាស នឹងថយចុះមកនៅ 10ដុល្លារក្នុងមួយគីឡូក្រាម។
ក្រុមហ៊ុន Virtus Solis ចង់អភិវឌ្ឍផ្ទាំងសូឡាដែលមានទទឹងមួយគីឡូម៉ែត្រ អាចដំឡើងនៅលើមេឃដោយរ៉ូបូតម៉ូឌុលដែលមានទំហំ 1.6 ម៉ែត្រ។ ម៉ូឌុលប្រភេទនេះចំនួនរាប់រយ អាចត្រូវបានដឹកជញ្ជូនដោយរ៉ុក្កែត Starship ឡើងទៅកាន់ Molniya ដែលជាគន្លងតារាវិថីរាងពងក្រពើ ដែលមានចំណុចជិតបំផុតគឺ 800 គីឡូម៉ែត្រ និងឆ្ងាយបំផុតគឺ 35ពាន់គីឡូម៉ែត្រ ធៀបនឹងផែនដី។
ដូច្នេះ ផ្កាយរណបចាប់ពីពីរគ្រឿងឡើងទៅនឹងអាចផ្គត់ផ្គង់អគ្គិសនីសម្រាប់មួយតំបន់នៅលើផែនដី។ ប្រព័ន្ធរបស់ក្រុមហ៊ុន Virtus Solis ដែលមានផ្ទាំងសូឡាចំនួន 16ផ្ទាំង នឹងគ្របដណ្ដប់តំបន់នានានៅទូទាំងពិភពលោក ហើយអាចបាញ់បញ្ជូនថាមពលក្នុងទម្រង់រលកមីក្រូវ៉េវ មកកាន់អង់តែនទទួលខ្នាតយក្សនៅលើដី។
យោងតាម Bucknell បច្ចុប្បន្ន ក្រុមហ៊ុន Virtus Solis កំពុងរកវិធីកែលម្អប្រសិទ្ធភាពនៃបច្ចេកវិទ្យាបញ្ជូនអគ្គិសនីដោយមិនប្រើខ្សែ ដែលជាឧបស័គធំចំពោះការផលិតអគ្គិសនីព្រះអាទិត្យក្នុងទីអវកាស។ បណ្ដាប្រព័ន្ធបែបនេះ បច្ចុប្បន្នមានប្រសិទ្ធភាពប្រហែល 5% ប៉ុន្តែដើម្បីអាចប្រើប្រាស់ជាក់ស្ដែង ប្រសិទ្ធភាពនេះត្រូវការកើនឡើងដល់ 20%។
កាលពីខែកុម្ភៈ ឆ្នាំ2024 ក្រុមហ៊ុន Virtus Solis បានប្រកាសអំពីគម្រោងសាកល្បងដំណើរការផ្កាយរណបបាញ់បញ្ជូនអគ្គិសនីនៅក្នុងឆ្នាំ2027 ដើម្បីត្រួតពិនិត្យការដំឡើងផ្ទាំងសូឡាក្នុងទីអវកាស និងបាញ់បញ្ជូនអគ្គិសនីជាងមួយគីឡូវ៉ាត់ មកកាន់ផែនដី។ ក្រុមហ៊ុននេះសង្ឃឹមថា អាចស្ថាបនារោងចក្រអគ្គិសនីព្រះអាទិត្យសម្រាប់ធ្វើពាណិជ្ជកម្ម ក្នុងកម្រិតមេហ្គាវ៉ាត់ នៅក្នុងឆ្នាំ2030។
May 3, 2024
ហេតុអ្វីអាកាសធាតុកាន់តែក្ដៅឡើងៗ?
ក្នុងរង្វង់ 100ឆ្នាំកន្លងទៅនេះ ការកើនឡើងកម្ដៅរបស់ផែនដីកាន់តែបង្ហាញច្បាស់ឡើងៗ ធ្វើឱ្យអ្នកវិទ្យាសាស្ត្រមានការព្រួយបារម្ភ។ ក្នុងអនាគត កម្ដៅផែនដីក៏នឹងកើនឡើងបន្តទៀត ហើយបន្សល់ទុកនូវផលវិបាកយ៉ាងធ្ងន់ធ្ងរ។ ដូច្នេះតើបាតុភូតផែនដីឡើងកម្ដៅកើតឡើងដោយសារកត្តាអ្វីខ្លះ? ការឡើងកម្ដៅផែនដីបង្កផលវិបាកអ្វីខ្លះ? តើមនុស្សត្រូវដោះស្រាយបញ្ហានេះដោយរបៀបណា?
ផែនដីឡើងកម្ដៅបណ្ដាលមកពីកត្តាពីរសំខាន់ រួមមាន កត្តាធម្មជាតិ និងកត្តាមនុស្ស
កត្តាធម្មជាតិ
- ការបញ្ចេញឧស្ម័នមេតានច្រើនហួសពីប៉ូលខាងជើង និងបណ្ដាតំបន់ដែលមានសំណើមកម្រិតខ្ពស់ កំពុងរួមចំណែកធ្វើឱ្យកម្ដៅផែនដីកើនឡើង។ ឧស្ម័នមេតានគឺជាឧស្ម័នផ្ទះកញ្ចក់មួយប្រភេទដែលអាចរក្សាកម្ដៅក្នុងបរិយាកាស។
- បាតុភូតភ្នំភ្លើងផ្ទុះ បង្កើតបានជាធូលីយ៉ាងច្រើនក៏ជាមួយក្នុងចំណោមមូលហេតុដែលនាំឱ្យអាកាសធាតុក្ដៅ។
- នៅពេលសីតុណ្ហភាពមធ្យមរបស់ផែនដីកើនឡើង ផ្ទាំងទឹកកកនៅឯប៉ូលទាំងពីររបស់ផែនដីក៏ត្រូវរលាយ និងធ្វើឱ្យស្រទាប់ទឹកកកកាបូនឌីអុកស៊ីត (CO2) ដែលនៅជ្រៅក្រោមទឹកកកត្រូវលេចឡើង ហើយក៏សាយភាយទៅក្នុងបរិយាកាសផែនដី គ្រាដែលព្រៃឈើលើផែនដីដែលមានតួនាទីស្រូបយកឧស្ម័ននេះក៏ចេះតែហិនហោចទៅៗ។ ពេលនេះ បរិមាណកាបូនឌីអុកស៊ីតបានកើនឡើងដល់កម្រិតខ្ពស់ខ្លាំង លើសពីសមត្ថភាពគ្រប់គ្រងរបស់ធម្មជាតិ ទើបផែនដីត្រូវឡើងកម្ដៅជាបន្តបន្ទាប់។
កត្តាមនុស្ស
- មនុស្សបានធ្វើឱ្យផែនដីឡើងកម្ដៅបន្តិចម្ដងៗរហូតដល់បច្ចុប្បន្ន តាមរយៈការបំភាយឧស្ម័នពីសកម្មភាពផលិត ជីវភាពប្រចាំថ្ងៃ ទៅក្នុងបរិស្ថានធម្មជាតិ។
- បច្ចុប្បន្ន បាតុភូតផែនដីឡើងកម្ដៅ ភាគច្រើនគឺដោយសារមនុស្ស។ សកម្មភាពដុតឥន្ធនៈហ្វូស៊ីល ដែលរួមមាន ប្រេងសាំង ឬធ្យូងថ្មជាដើម ដែលបង្កើតឱ្យមានឧស្ម័នផ្ទះកញ្ចក់ បាន និងកំពុងរក្សាកម្ដៅនៅក្នុងបរិយាកាស។
ផលវិបាកដែលកើតឡើងពីបាតុភូតផែនដីឡើងកម្ដៅ
បាតុភូតកម្ដៅផែនដីកើនឡើង នឹងនាំឱ្យកើតមានផលវិបាកជាច្រើនរៀបមិនអស់ ក្នុងនោះមានជាអាទិ៍ អាកាសធាតុក្ដៅអូសបន្លាយពេលយូរជាងមុន នាំឱ្យមានគ្រោះរាំងស្ងួត ឆេះព្រៃ ព្យុះធូលី និងគ្រោះទឹកជំនន់ជាដើម។
បញ្ហាឡើងកម្ដៅផែនដីក៏នឹងធ្វើឱ្យខ្យល់អាកាសប្រែជាអាក្រក់ជាងមុន ដោយសារតែស្រទាប់អូហ្សូនលើដីក្រាស់ជាងមុន ព្រោះតែផ្សែងពុលកើនឡើង។ ប្រការនេះនឹងបណ្ដាលឱ្យមនុស្សត្រូវឈឺច្រើនជាងធម្មតា។
អត្រាផុតពូជនៃសត្វ និងរុក្ខជាតិក៏នឹងកើនឡើង ព្រោះតែសម្របខ្លួនមិនទាន់ពេល នៅពេលដី និងសមុទ្រត្រូវឆ្លងកាត់ការប្រែប្រួលឆាប់រហ័ស។
កម្ដៅផែនដីកើនឡើងក៏នឹងធ្វើឱ្យផ្ទាំងទឹកកកនៅតំបន់ប៉ូលត្រូវរលាយលឿនជាងធម្មតា បណ្ដាលឱ្យទឹកសមុទ្រកើនឡើងខ្ពស់ គំរាមកំហែងដល់បណ្ដាតំបន់ទំនាបនៅលើផែនដី។
ដំណោះស្រាយសម្រាប់បាតុភូតផែនដីឡើងកម្ដៅ រួមមាន
- ការស្ដារ និងលើកកម្ពស់គុណភាពហេដ្ឋារចនាសម្ព័ន្ធ
- ការកាត់បន្ថយការប្រើប្រាស់ឥន្ធនៈហ្វូស៊ីល
- ការពារព្រៃឈើ
- កាត់បន្ថយការប្រើប្រាស់ថង់ប្លាស្ទិច
- ការសន្សំសំចៃអគ្គិសនី និងទឹក
- ការបរិភោគបន្លែ ផ្លែឈើឱ្យបានច្រើនជាងមុន
- ការប្រើប្រាស់ប្រភពថាមបលបៃតង ថាមពលកកើតឡើងវិញ
- ការប្រើប្រាស់បច្ចេកវិទ្យាថ្មីនៅក្នុងការការពារផែនដី។
May 2, 2024
ផ្ទាំងសូឡាធ្វើឱ្យតម្លៃអគ្គិសនីស្មើសូន្យ នៅក្នុងរដ្ឋមួយរបស់សហរដ្ឋអាម៉េរិក
នៅពេលតម្លៃអគ្គិសនីស្មើនឹងសូន្យដោយសារតែការផលិតថាមពលពីព្រះអាទិត្យបានកើនឡើងខ្ពស់ខ្លាំង នាំឱ្យអាជ្ញាធររដ្ឋ California ត្រូវរកដំណោះស្រាយបញ្ហាសល់អគ្គិសនី។
រដ្ឋ California សម្បូរពន្លឺព្រះអាទិត្យ ដូច្នេះ ផ្ទាំងសូឡាក៏មាននៅគ្រប់កន្លែង។ យោងតាមការគណនាថ្មីបំផុត រដ្ឋនេះមានផ្ទាំងសូឡាដែលអាចផលិតអគ្គិសនីបានជិត 47 gigawatt គ្រប់គ្រាន់សម្រាប់ផ្គត់ផ្គង់ដល់គ្រួសារ 13.9 គ្រួ ស្មើនឹង ¼ នៃតម្រូវការអគ្គិសនីរបស់រដ្ឋ។
ក្រុមហ៊ុន CAISO ដែលជាអ្នកគ្រប់គ្រងបណ្ដាញអគ្គិសនីនៅ California ឱ្យដឹងថា California បានត្រៀមសម្រាប់វត្តមានអគ្គិសនីព្រះអាទិត្យតាំងពីយូរមកហើយ ប៉ុន្តែពួកគេបានវាយតម្លៃទាបចំពោះល្បឿននៃការរីកចម្រើនដ៏ខ្លាំងក្លារបស់ផ្ទាំងសូឡានៅតាមផ្ទះ។ ប្រការនេះធ្វើឱ្យបរិមាណអគ្គិសនីកើនឡើងលើសពីតម្រូវការ។
ទោះជាយ៉ាងណាក៏ដោយ រដ្ឋ California កំពុងដោះស្រាយបញ្ហាអគ្គិសនីសល់ដោយសារលក់អគ្គិសនីមួយចំនួនទៅឱ្យបណ្ដារដ្ឋក្បែរខាង។

April 30, 2024