សឿន សំណាង - La Reine Media

បាតុកម្មនៅសហរដ្ឋអាមេរិក រាលដាលដល់អង់គ្លេស!

ក្រុមបាតុករបានប្រមូលផ្ដុំគ្នានៅទីក្រុងឡុងដ៍ បន្ទាប់ពីមានបាតុកម្មជាច្រើនបាននិងកំពុងកើតឡើងនៅសហរដ្ឋអាមេរិក ទាក់ទិននឹងបុរសជនជាតិស្បែកខ្មៅម្នាក់ដែលត្រូវបានប៉ូលិសក្រៀកសង្កត់ករហូតដល់ស្លាប់ នៅក្នុងរដ្ឋ Minnesota។ បាតុករយ៉ាងតិច23នាក់ត្រូវបានចាប់ខ្លួននៅទីក្រុងឡុងដ៍ ប្រទេសអង់គ្លេស។

បើទោះជានៅមានបម្រាមប្រមូលផ្ដុំគ្នាដើម្បីទប់ស្កាត់ការឆ្លងវីរុសCOVID-19 ក្រុមបាតុករនៅតែប្រមូលផ្ដុំគ្នានៅទីលាន Trafalgar នាទីក្រុងឡុង ប្រទេសអង់គ្លេស ចាប់ពីម៉ោង8ព្រឹក ថ្ងៃទី31ឧសភា ដើម្បីបង្ហាញការគាំទ្រចំពោះបាតុកម្មនៅសហរដ្ឋអាមេរិក ក្នុងបំណងទាមទារយុត្តិធម៌ជូនលោក Floyd ដែលជាបុរសស្បែកខ្មៅម្នាក់ អាយុ46ឆ្នាំ ត្រូវបានប៉ូលិសក្រៀកសង្កត់ករហូតដល់ស្លាប់កាលពីថ្ងៃទី25ឧសភា នៅលើដងផ្លូវក្នុងទីក្រុង Minneapolis រដ្ឋ Minnesota នៃសហរដ្ឋអាមេរិក ដោយសារតែបុរសស្បែកខ្មៅនេះជាប់ទាក់ទងនឹងការប្រើប្រាស់លុយក្លែងក្លាយ។

ប្រភពព័ត៌មានពីស្នងការដ្ឋាននគរបាលក្រុងឡុងដ៍ ប្រទេសអង់គ្លេស កាលពីយប់ថ្ងៃទី31ឧសភាបានឱ្យដឹងថា បាតុករចំនួន23នាក់ត្រូវបានចាប់ខ្លួនក្រោមបទចោទប្រកាន់ផ្សេងៗគ្នា ក្នុងនោះក៏មានការរំលោភលើបទបញ្ជាបម្រាមគោចរផងដែរ។ មន្ត្រីប៉ូលិសបានបញ្ជាក់ថា បាតុករភាគច្រើនបាននាំគ្នាត្រលប់ទៅផ្ទះ ប៉ុន្តែ តាមគម្រោង បាតុកម្មបែបនេះនឹងត្រូវបានធ្វើឡើងជាបន្តបន្ទាប់នៅក្នុងសប្ដាហ៍នេះ។

បុរសស្បែកខ្មៅម្នាក់ឈ្មោះ Floyd នៅរដ្ឋ Minnesota នៃសហរដ្ឋអាមេរិក បានបាត់បង់ជីវិតនៅមន្ទីរពេទ្យកាលពីថ្ងៃទី25ឧសភា ក្រោយពីត្រូវបានប៉ូលិសចាប់ក្រៀកសង្កត់កក្នុងរយៈពេល9នាទី បើទោះជាបុរសនេះបានស្រែកអង្វរ និងនិយាយថា “ខ្ញុំមិនអាចដកដង្ហើម” ក៏ដោយ។

ការស្លាប់របស់បរុសឈ្មោះ Floyd ខាងលើ បាននាំឱ្យមានបាតុកម្មជាច្រើនកើតឡើងនៅសហរដ្ឋអាមេរិក នាំឱ្យប្រទេសនេះប្រឈមនឹងអសន្តិសុខ ដោយសារតែមានអំពើហិង្សា ការដុតបំផ្លាញទ្រព្យ និងការឆក់ប្លន់ពីក្រុមជនឱកាសនិយម៕

ប្រភព៖ សារព័ត៌មានបរទេស

June 1, 2020

Trump ត្រូវពួនក្រោមដីដោយសារបាតុករ ខណៈអភិបាលរដ្ឋខ្លះស្នើឱ្យលោកឈប់និយាយអំពីបាតុកម្ម

លោក Trump ត្រូវបាននាំចុះលាក់ខ្លួនក្នុងបន្ទប់ពិសេសក្រោមដីសម្រាប់ប្រធានាធិបតី ក្នុងរយៈពេលខ្លី ខណៈដែលក្រុមបាតុករប្រមូលផ្ដុំគ្នានៅក្បែរសេតវិមានកាលយប់ថ្ងៃទី29ឧសភា នេះបើតាមមន្ត្រីម្នាក់របស់រដ្ឋាភិបាលលោក Trump។

ប្រធានាធិបតី Donald Trump បានចូលពួនក្នុងបន្ទប់សម្ងាត់ក្រោមដីនៅខាងក្រោមសេតវិមានប្រហែលជា1ម៉ោង នៅពេលដែលមានបាតុកររាប់រយនាក់នាំគ្នាស្រែកទាមទារយុត្តិធម៌នៅក្បែរវិមានរដ្ឋាភិបាល បន្ទាប់ពីការស្លាប់របស់ជនជាតិស្បែកខ្មៅឈ្មោះ George Floyd នៅទីក្រុង Minneapolis ក្នុងរដ្ឋ Minnesota។ គេមិនដឹងថា ជំទាវទី1 Melania និងកូនប្រុសពៅ Barron Trump ត្រូវបាននាំចូលលាក់ខ្លួនជាមួយលោក Trump ដែរ ឬយ៉ាងណានោះទេ។

ការសម្រេចចិត្តនាំប្រធានាធិបតី ចូលលាក់ខ្លួនក្រោមដីបែបនេះ ត្រូវបានធ្វើឡើងនៅពេលក្រុមប៉ូលិស និងសមត្ថកិច្ចសម្ងាត់បានប្រឈមមុខជាមួយនឹងក្រុមបាតុករនៅខាងក្រោមសេតវិមានក្នុងរយៈពេលជាច្រើនម៉ោង កាលពីថ្ងៃទី29ឧសភា។ ក្រុមបាតុករនាំគ្នាស្រែក និងគប់ដបទឹក និងវត្ថុផ្សេងៗទៅកាន់ឆ្មាំការពារសេតវិមាន និងព្យាយាមឆ្លងកាត់របងដែក។

មានពេលខ្លះ ក្រុមបាតុករក៏បានប្រើហិង្សាលើកម្លាំងសមត្ថកិច្ចផងដែរ ដែលនាំឱ្យមានការបិទសេតវិមានអស់មួយរយៈពេល។

អង្គភាពសម្ងាត់របស់សហរដ្ឋអាមេរិកបានបញ្ជាក់ថា សមត្ថកិច្ចចម្រុះជាង60នាក់បានរងរបួសនៅក្នុងរយៈពេល3ថ្ងៃនៃការទប់ទល់នឹងក្រុមបាតុករនៅខាងក្រៅសេតវិមាន។

អភិបាលរដ្ឋវ៉ាស៊ីងតោនបានចេញបញ្ជាដាក់បម្រាមគោចរដើម្បីទប់ស្កាត់បាតុកម្ម ខណៈដែលអភិបាលក្រុង Atlanta នៃរដ្ឋ Georgia ក៏បានស្នើឱ្យលោក Trump ឈប់និយាយអំពីបាតុកម្ម ដោយបានថ្លែងថា ការនិយាយអំពីបាតុកម្មនឹង “ធ្វើឱ្យស្ថានភាពកាន់តែអាក្រក់”។

បាតុកម្មដែលមានឈ្មោះថា “ខ្ញុំមិនអាចដកដង្ហើម” ខាងលើ បានចាប់ផ្ដើមកើតចេញពីតំបន់ Minneapolis រដ្ឋ Minnesota ហើយបានរាលដាលពេញផ្ទៃប្រទេស បន្ទាប់ពី George Floyd ដែលជាបុរសស្បែកខ្មៅម្នាក់ត្រូវបានប៉ូលិសក្រៀកសង្កត់រហូតដល់ស្លាប់ ព្រោះតែជាប់សង្ស័យថាបានប្រើប្រាស់ប្រាក់ក្លែងក្លាយ៕

ប្រភព៖ សារព័ត៌មានបរទេស

June 1, 2020

រដ្ឋធានីរបស់សហរដ្ឋអាមេរិក ដាក់បម្រាមគោចរ ដោយសារបាតុកម្ម(វីដេអូ)

អភិបាលរដ្ឋធានីវ៉ាស៊ីងតោន ដាក់បទបញ្ជាបម្រាមគោចរនាយប់ថ្ងៃទី31ឧសភា និងបានបញ្ចេញកម្លាំងឆ្មាំការពារជាតិ USNG (United States National Guard) ដើម្បីជួយដល់កម្លាំងប៉ូលិសក្នុងការទប់ស្កាត់បាតុកម្ម។

បទបញ្ជាបម្រាមគោចរខាងលើដែលមានសុពលភាពចាប់ពីវេលាម៉ោង23ថ្ងៃទី31ឧសភា ដល់ម៉ោង6ព្រឹកថ្ងៃទី1ខែមិថុនា ត្រូវបានធ្វើឡើងដើម្បីទប់ទល់ទៅនឹងក្រុមបាតុករដែលប្រមូលផ្ដុំគ្នានៅក្បែរសេតវិមាន។ នេះបើតាមអភិបាលក្រុងវ៉ាស៊ីងតោនឌីស៊ី (District of Columbia, DC) លោកស្រី Muriel Bowser។

Steve Dresner អ្នកយកព័ត៌មានរបស់ស្ថានីយវិទ្យុ WTOP បានឱ្យដឹងថា ក្រុមបាតុករនៅទីលាន Lafayette ដែលស្ថិតនៅទល់មុខនឹងសេតវិមាន ដំបូងឡើយ “មានរបៀបរៀបរយល្អ ប៉ុន្តែមានសម្លេងរំខានខ្លាំង”។ ស្ថានភាពបានប្រែទៅជាអាក្រក់បន្ទាប់ពីមានបាតុករខ្លះបានវាយបំបែកកញ្ចក់រថយន្តរបស់នគរបាល ធ្វើឱ្យសមត្ថកិច្ចប្រតិកម្មតបតដោយការបាញ់ផ្សែងបង្ហូរទឹកភ្នែក និងគ្រាប់បែកជះពន្លឺ (stun grenade) ដើម្បីទប់ទល់។

បាតុកររាប់រយនាក់បានប្រមូលផ្ដុំគ្នានៅខាងក្រៅសេតវិមានអស់រយៈពេលជាច្រើនថ្ងៃបន្តបន្ទាប់ដើម្បីប្រឆាំងទៅនឹងសមត្ថកិច្ច និងគាំទ្រដល់ George Floyd ដែលជាបុរសស្បែកខ្មៅម្នាក់ត្រូវបានប៉ូលិសក្រៀកសង្កត់រហូតដល់ស្លាប់កាលពីថ្ងៃទី25ឧសភា នៅក្នុងទីក្រុង Minneapolis នៃរដ្ឋ Minnesota ដោយសារជាប់សង្ស័យថាបានប្រើប្រាស់លុយក្លែងក្លាយ។ ក្រុមបាតុករបាននាំគ្នាស្រែកថា “ជីវិតរបស់ជនជាតិស្បែកខ្មៅក៏សំខាន់” និង “ខ្ញុំមិនអាចដកដង្ហើម”។

ក្រៅពីរដ្ឋធានីវ៉ាស៊ីងតោន ក៏មានទីក្រុងយ៉ាងតិច40នៅសហរដ្ឋអាមេរិក ត្រូវបានដាក់បទបញ្ជាបម្រាមគោចរ ដើម្បីទប់ទល់នឹងបាតុកម្មទាមទារយុត្តិធម៍ជូនលោក George Floyd។ ឆ្មាំការពារជាតិប្រមាណជា 5,000នាក់ ត្រូវបានបញ្ជូនទៅកាន់រដ្ឋធានីវ៉ាស៊ីងតោន និងរដ្ឋចំនួន15ផ្សេងទៀត ខណៈដែលទាហានបម្រុង2,000នាក់កំពុងត្រៀមខ្លួនជាស្រេចដើម្បីធ្វើសកម្មភាព។

រដ្ឋចំនួន3 រួមមានរដ្ឋ Arizona រដ្ឋ Texas និងរដ្ឋ Virginia ត្រូវបានដាក់ឱ្យស្ថិតក្នុងស្ថានភាពអាសន្នដើម្បីបង្កើនសមត្ថភាពក្នុងការប្រមូល និងដាក់ពង្រាយកម្លាំងសមត្ថកិច្ច ក្នុងបំណងដោះស្រាយបញ្ហាហិង្សា និងការប្លន់ទ្រព្យសម្បត្តិដែលកើតមានឡើងជាហូរហែខណៈពេលមានបាតុកម្ម៕

ប្រភព៖ សារព័ត៌មានបរទេស

June 1, 2020

ជិត6.3លាននាក់ស្លាប់ដោយសារ COVID-19 នៅទូទាំងសកលលោក

ពិភពលោកមានអ្នកស្លាប់ជិត374,000នាក់នៅក្នុងចំណោមអ្នកដែលបានឆ្លងវីរុសCOVID-19 សរុបជិត6.3លាននាក់។

ប្រទេសនិងដែនដីចំនួន213ក្នុងពិភពលោក បានរាយការណ៍ថា បានរកឃើញអ្នកផ្ទុកវីរុសCOVID-19 សរុបចំនួន6,258,733នាក់ និងអ្នកស្លាប់សរុប373,677នាក់ ក្នុងនោះអ្នកជំងឺកើន110,215នាក់ និងអ្នកស្លាប់កើន3,205នាក់បើធៀបនឹងម្សិលមិញ។ អ្នកជំងឺដែលបានជាសះស្បើយមានចំនួន 2,783,942នាក់។

ទ្វីបអាមេរិកមានអ្នកជំងឺCOVID-19 សរុប2,944,346នាក់ ខណៈដែលទ្វីបអឺរ៉ុបមាន2,019,781នាក់ អាស៊ីមាន1,136,797នាក់ និងអាហ្វ្រិកមាន148,775នាក់។

ប្រទេសដែលមានអ្នកជំងឺCOVID-19 ច្រើនជាង100,000នាក់ បានកើនដល់12ប្រទេស ក្នុងនោះមាន សហរដ្ឋអាមេរិក ប្រេស៊ីល រុស្ស៊ី អេស្ប៉ាញ អង់គ្លេស អ៊ីតាលី បារាំង អាល្លឺម៉ង់ ឥណ្ឌា ទួរគី ប៉េរូ និងអ៊ីរ៉ង់។ ចំណែកប្រទេសចំនួន2ទៀតដែលមានអ្នកជំងឺជិត100,000នាក់ មាន2ប្រទេស គឺ ប្រទេសឈីលី និងប្រទេសកាណាដា។

សម្បុកមេរោគCOVID-19 ធំជាងគេបង្អស់ក្នុងពិភពលោក នៅតែជាសហរដ្ឋអាមេរិក ដោយមានអ្នកជំងឺសរុប1,836,759នាក់ ក្នុងនោះមានអ្នកស្លាប់106,176នាក់។ ក្នុងរយៈពេល24ម៉ោងចុងក្រោយនេះ សហរដ្ឋអាមេរិក បានរកឃើញអ្នកជំងឺសរុប21,042នាក់ និងអ្នកស្លាប់641នាក់ ដែលតួលេខនេះ បានថយចុះបន្តិចបើធៀបនឹងម្សិលមិញ៕

June 1, 2020

សហរដ្ឋអាមេរិកប្រើកម្លាំងទ័ពទប់ទល់នឹងបាតុករ ខណៈតំបន់ខ្លះត្រូវបានដាក់បម្រាមគោចរ

ក្នុងគ្រាដែលទីក្រុង និងរដ្ឋជាច្រើននៅសហរដ្ឋអាមេរិក កំពុងស្ថិតក្នុងរលកនៃបាតុកម្ម និងហិង្សា ក្រុមមន្ត្រីនៅតំបន់ជាច្រើនបានចេញបទបញ្ជាដាក់បម្រាមគោចរ និងដាក់ពង្រាយកងទ័ពផងដែរដើម្បីការពារសន្តិសុខផងដែរ។

យោងតាមសារព័ត៌មាន AP ចលនាបាតុកម្មដែលមានឈ្មោះថា “ខ្ញុំមិនអាចដកដង្ហើម” ខាងលើ បានចាប់ផ្ដើមកើតចេញពីតំបន់ Minneapolis រដ្ឋ Minnesota ហើយបានរាលដាលពេញផ្ទៃប្រទេស បន្ទាប់ពី George Floyd ដែលជាបុរសស្បែកខ្មៅម្នាក់ត្រូវបានប៉ូលិសក្រៀកសង្កត់រហូតដល់ស្លាប់ ព្រោះតែជាប់សង្ស័យថាបានប្រើប្រាស់ប្រាក់ក្លែងក្លាយ។ ចលនានេះបានបណ្ដាលឱ្យមានបាតុកម្មហិង្សា ការឆក់ប្លន់ជាច្រើនកើតឡើងនៅក្នុងទីក្រុងនានានៃសហរដ្ឋអាមេរិក។

ទីក្រុងជាច្រើននៅសហរដ្ឋអាមេរិកបន្តស្ថិតក្នុងបាតុកម្ម ក្នុងនោះក៏មានអំពើហិង្សា រវាងក្រុមប៉ូលិសជាមួយនឹងក្រុមបាតុករ ព្រមទាំអមានអំពើបាញ់ប្រហារបណ្ដាលឱ្យមានមនុស្សស្លាប់ និងរងរបួសជាច្រើននាក់ទៀតផង។ ទីក្រុងមួយចំនួនត្រូវបានដាក់បម្រាមគោចរ មានដូចជាទីក្រុង Angeles, Atlanta, Seattle, Portland, Denver, Cleveland, Columbus, Pittsburgh និង Philadelphia ជាដើម។

សហរដ្ឋអាមេរិកគឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺជាង7.1លាននាក់ និងអ្នកស្លាប់ជាង103,000នាក់។ ក្រុមអ្នកវិភាគជឿថា ជាមួយនឹងបាតុកម្មដែលបានរាលដាលពាសពេញផ្ទៃប្រទេស ក្នុងគ្រាដែលមានអ្នកជំងឺCOVID-19 ច្រើនបែបនេះ តួលេខនៃអ្នកជំងឺ និងអ្នកស្លាប់ដោយសារ COVID-19 នៅសហរដ្ឋអាមេរិកប្រាកដជានឹងកើនឡើងយ៉ាងគំហុកមិនខាន។

អភិបាលរដ្ឋ Minnesota លោក Timothy James Walz និងអភិបាលក្រុង Minneapolis លោក Jacob Frey សម្ដែងការព្រួយបារម្ភយ៉ាងខ្លាំងចំពោះហានិភ័យនៃការឆ្លងវីរុសនៅក្នុងពេលដែលបាតុកម្មជាច្រើនកំពុងកើតឡើង៕

ប្រភព៖ សារព័ត៌មានបរទេស

May 31, 2020

បាតុកម្មនៅសហរដ្ឋអាមេរិក! មនុស្ស4នាក់ត្រូវបានបាញ់ប្រហារ ក្នុងនោះមានម្នាក់បានស្លាប់

យ៉ាងហោចណាស់មានមនុស្ស3នាក់ត្រូវបានបាញ់ប្រហារ និងមនុស្សម្នាក់បានស្លាប់នៅក្នុងបាតុកម្មមួយដែលគេឱ្យឈ្មោះថា “ខ្ញុំមិនអាចដកដង្ហើម” នៅទីក្រុង Indianapolis ក្នុងរដ្ឋ Indiana សហរដ្ឋអាមេរិក នាយប់ថ្ងៃទី30ឧសភា។

Randal Taylor ដែលជាអធិការនគរបាលក្រុង Indianapolis បានឱ្យដឹងថា នគរបាលកំពុងស្រាវជ្រាវលើករណីដែលមនុស្សជាច្រើននាក់ត្រូវបានបាញ់ប្រហារ ក្នុងនោះមានមនុស្សម្នាក់បានបាត់បង់ជីវិតក្នុងបាតុកម្មនាទីក្រុង Indianapolis។ អធិការរូបនេះបានអំពាវនាវឱ្យពលរដ្ឋគេចចេញពីកន្លែងដែលមានបាតុករច្រើន។ Randal Taylor បានបន្ថែមថា មន្ត្រីនគរបាលម្នាក់ក៏ត្រូវរងរបួសផងដែរ។

យ៉ាងហោចណាស់មានមនុស្សចំនួន6នាក់ត្រូវបានចាប់ខ្លួន បន្ទាប់ពីក្រុមបាតុករបានវាយបំបែកទ្វារ និងសម្រុកចូលក្នុងអធិការដ្ឋាននគរបាលនៅទីក្រុង Indianapolis ដែលនេះបាននាំឱ្យមានការប៉ះទង្គិចរវាងក្រុមប៉ូលិសជាមួយនឹងក្រុមបាតុករ។

សូមរំឭកថា បាតុកម្មដែលមានឈ្មោះថា “ខ្ញុំមិនអាចដកដង្ហើម” ខាងលើ បានចាប់ផ្ដើមកើតចេញពីតំបន់ Minneapolis រដ្ឋ Minnesota ហើយបានរាលដាលពេញផ្ទៃប្រទេស បន្ទាប់ពី George Floyd ដែលជាបុរសស្បែកខ្មៅម្នាក់ត្រូវបានប៉ូលិសក្រៀកសង្កត់រហូតដល់ស្លាប់ ព្រោះតែជាប់សង្ស័យថាបានប្រើប្រាស់ប្រាក់ក្លែងក្លាយ៕

ប្រភព៖ សារព័ត៌មានបរទេស

May 31, 2020

Focus ចុងសប្ដាហ៍ ៖ សហរដ្ឋអាមេរិក គំរាមរំដោះ “ហុងកុង” ចេញពីឋានៈតំបន់ពិសេស…និងថា ចិនលែងមានអំណាចគ្រប់គ្រងទៀតហើយ ក្រោយប្រុងប្រើ “ច្បាប់សន្តិសុខជាតិ” បង្ក្រាបបាតុកម្មប្រជាធិបតេយ្យ

សហរដ្ឋអាមេរិក គំរាមថា នឹងដកសិទ្ធិឋានៈតំបន់ពិសេសរបស់កោះហុងកុង ក្រោមច្បាប់អាមេរិកាំង កណ្ដាលបរិយាកាសនយោបាយនៅក្នុងទីក្រុងហុងកុង ដែលកំពុងវិលត្រឡប់មកបង្កើនភាពក្ដៅគគុកសាជាថ្មីម្ដងទៀត ក្រោយពីចិន បានប្រកាសផែនការបញ្ជាឱ្យប្រើច្បាប់សន្តិសុខជាតិថ្មីមួយ ដែលត្រូវបានគេមើលឃើញថា ជាការព្យាយាមរារាំងការជួបជំនុំគ្នាតវ៉ាទាមទារប្រជាធិបតេយ្យនៅលើកោះដែលជាមជ្ឈមណ្ឌលកណ្ដាលនៃវិស័យហិរញ្ញវត្ថុមួយនេះ។

លោក ម៉ៃក៍ ប៉ុមប៉េអូ រដ្ឋមន្ត្រីក្រសួងការបរទេសសហរដ្ឋអាមេរិក បានប្រកាស កាលពីថ្ងៃពុធ(ទី27ឧសភា) ថា លោកបានជូនដំណឹងទៅសភាកុងហ្គ្រេសរួចហើយថា ហុងកុង លែងមានគុណសម្បត្តិក្នុងការបានទទួលសិទ្ធិពិសេសខាងពាណិជ្ជកម្មតាមច្បាប់សហរដ្ឋអាមេរិកតទៅទៀតហើយ ដោយសារតែចិន មិនបានប្រតិបត្តិតាមពាក្យសន្យាដែលបានធ្វើ កាលពីគ្រាប្រគល់-ទទួលកោះហុងកុងពីសហរាជណាចក្រ(UK)។

សេចក្ដីប្រកាសនេះ បានកើតឡើង ត្រឹមតែប៉ុន្មានម៉ោងប៉ុណ្ណោះ មុននឹងរដ្ឋសភាចិនបោះឆ្នោតសម្រេចក្នុងគ្រាដ៏សំខាន់នេះ ដើម្បីដាក់បញ្ជាឱ្យប្រើច្បាប់សន្តិសុខជាតិថ្មី នៅក្នុងតំបន់គ្រប់គ្រងពិសេសហុងកុង ខណៈដែលលោកប្រធាធិបតីនៃសហរដ្ឋអាមេរិក ដូណាល់ ត្រាំ បានចេញមកព្រមានក្នុងថ្ងៃជាមួយគ្នាដែរថា ហុងកុងអាចនឹងបាត់បង់ឋានៈមជ្ឈមណ្ឌលកណ្ដាលនៃវិស័យហិរញ្ញវត្ថុពិភពលោក បើសេរីភាព និងភាពឥស្សរៈ ខាងតុលាការត្រូវកាត់បន្ថយ ព្រមទាំងបានគំរាមទៀតថា អាមេរិកនឹងមានវិធានការឆ្លើយតបនឹងច្បាប់សន្តិសុខជាតិរបស់ចិនក្នុងពេលឆាប់ៗនេះដែរ។

លោក ប៉ុមប៉េអូ បានបញ្ជាក់ថា “កាលពីពេលមុននោះ សហរដ្ឋអាមេរិកធ្លាប់សង្ឃឹមថា សេរីភាព និងភាពរុងរឿងរបស់ហុងកុង នឹងក្លាយជាគំរូសម្រាប់ប្រព័ន្ធផ្ដាច់ការចិន តែពេលនេះ វាច្បាស់លាស់ហើយថា ចិនខ្លួនឯងទៅវិញទេដែលកំពុងតែធ្វើជាគំរូឱ្យហុងកុង…តាមរយៈរឿងពិតដែលមានក្នុងថ្ងៃនេះ ប្រហែលជាគ្មានមនុស្សប៉ិនកុហកណាម្នាក់ អាចអះអាងបានថា ហុងកុងនៅតែបានទទួលអំណាចគ្រប់គ្រងខ្លួនឯងកម្រិតខ្ពស់ពីប្រទេសចិនឡើយ”

លោក Mike Pompeo រដ្ឋមន្ត្រីក្រសួងសុខាភិបាលអាមេរិកាំង

លោកបន្តថា “សហរដ្ឋអាមេរិក សូមនៅឈរកៀកស្មាជាមួយពលរដ្ឋហុងកុង ក្នុងខណៈដែលពួកគេត្រូវតស៊ូនឹងការធ្វើសកម្មភាពរបស់ចិន ដែលព្យាយាមបដិសេធអំណាចគ្រប់គ្រងខ្លួនឯងរបស់ពលរដ្ឋហុងកុង តាមដែលធ្លាប់បានសន្យា”

ចុងក្រោយបំផុត លោកប្រធានាធិបតី ដូណាល់ ត្រាំ បានចេញមកបង្ហើបឱ្យដឹងកាលពីថ្ងៃសុក្រថា លោកបានបញ្ជាឱ្យរដ្ឋបាលសហរដ្ឋអាមេរិក ចាប់ផ្ដើមកម្មវិធី ដកឋានៈពិសេសខាងពាណិជ្ជកម្ម ដែលបាន
ប្រគល់ឱ្យកោះហុងកុងហើយ និងថែមទាំងបានចុះហត្ថលេខាលើសេចក្ដីប្រកាស 1ច្បាប់ដែលនឹងការពារការងារស្រាវជ្រាវសំខាន់ៗ របស់មហាវិទ្យាល័យផ្សេងៗឱ្យបានល្អជាមុន ដោយការផ្អាកការធ្វើដំណើរចូលមកក្នុងប្រទេស របស់និស្សិតជនជាតិចិនមួយចំនួន ដែលត្រូវបានបញ្ជាក់ថា មានហានិភ័យដល់សន្តិសុខរបស់ប្រទេស។

កាលពីសប្ដាហ៍កន្លងទៅ ក្រុងប៉េកាំង បានប្រកាសពីផែនការដាក់បញ្ជាឱ្យប្រើច្បាប់សន្តិសុខជាតិថ្មី ដែលនឹងមានបទដាក់ទណ្ឌកម្មសម្រាប់អ្នកដែលបំផុសបំផុលការទាមទារឯករាជ្យ បំផ្លាញរដ្ឋ ឬបង្កភេរវកម្ម ដែលច្បាប់មួយនេះ នឹងបើកផ្លូវឱ្យអង្គភាពព័ត៌មានសម្ងាត់របស់ចិន អាចចូលទៅបង្កើតមូលដ្ឋានប្រតិបត្តិការយ៉ាងបើកចំហបាននៅក្នុងក្រុងហុងកុងជាលើកដំបូងទៀតផង។

ផែនការរបស់ចិន បាននាំឆ្ពោះទៅរកការដើក្បួនតវ៉ាប្រឆាំងនៅក្នុងក្រុងហុងកុង កាលពីថ្ងៃទី24 ឧសភា ដែលអាចនិយាយបានថា ជាការជួបជំនុំធ្វើការតវ៉ាដ៏ធំមួយ ជាលើកដំបូងរបស់ពលរដ្ឋហុងកុងក្នុងអំឡុងពេលច្រើនខែកន្លងមក។

(សូមរង់ចាំអានបន្តនៅថ្ងៃស្អែក)

ប្រែសម្រួលដោយ តាវ៉ែនតា
ប្រភព ៖ សាព័ត៌មានបរទេស

May 31, 2020

មនុស្សជាង370,000នាក់បានស្លាប់ដោយសារCOVID-19 នៅទូទាំងពិភពលោក

ពិភពលោកទាំងមូលត្រូវបានរាយការណ៍ថា មានអ្នកស្លាប់ដល់ទៅជាង370,000នាក់ក្នុងចំណោមអ្នកដែលបានឆ្លងវីរុសCOVID-19 ជាង6.1លាននាក់។

ប្រទេសនិងដែនដីចំនួន213ក្នុងពិភពលោក បានរកឃើញអ្នកផ្ទុកវីរុសCOVID-19 ចំនួន6,148,518នាក់ និងអ្នកស្លាប់370,472នាក់។ អ្នកជំងឺកើន122,427នាក់ និងអ្នកស្លាប់កើន4,057នាក់បើធៀបនឹងម្សិលមិញ។ អ្នកជំងឺបានជាសះស្បើយមានចំនួនជាង2.7លាននាក់។

ទ្វីបអាមេរិកមានអ្នកជំងឺCOVID-19 ច្រើនជាងគេ ក្នុងនោះអាមេរិកខាងជើងមានអ្នកជំងឺ2,043,719នាក់ អាមេរិកខាងត្បូងមាន844,621នាក់ ខណៈទ្វីបអឺរ៉ុបមាន2,004,226នាក់ អាស៊ីមាន1,107,530នាក់ និងទ្វីបអាហ្វ្រិកមាន143,769នាក់។

សហរដ្ឋអាមេរិកនៅតែជាសម្បុកមេរោគធំជាងគេក្នុងពិភពលោក ដោយមានអ្នកជំងឺសរុប1,815,717នាក់ និងអ្នកស្លាប់សរុប105,535នាក់ ក្នុងនោះអ្នកជំងឺកើន 22,454នាក់ ខណៈអ្នកស្លាប់កើន996នាក់បើធៀបនឹងមុននេះមួយថ្ងៃ។ ចំណែកប្រេស៊ីល មានអ្នកជំងឹសរុប498,440នាក់ និងអ្នកស្លាប់សរុប28,834នាក់។ រីឯប្រទេសរុស្ស៊ីវិញ មានអ្នកជំងឺសរុប396,575នាក់ និងអ្នកស្លាប់សរុប4,555នាក់៕

ប្រភព៖ សារព័ត៌មានបរទេស

May 31, 2020

បាតុករផ្ដួលរំលំរបងសេតវិមាន! លោក Trump ថ្កោលទោស និងហៅក្រុមបាតុករថាជា “ចោរប្លន់”

ក្រុមបាតុករដែលទាក់ទិននឹងការស្លាប់របស់បុរសស្បែកខ្មៅ បាននាំគ្នារុញផ្ដួលរបងសន្តិសុខ និងបានប៉ះទង្គិចជាមួយប៉ូលិសនៅខាងក្រៅសេតវិមាន។

វីដេអូដែលត្រូវបានគេចែករំលែកនៅលើ Twitter កាលពីថ្ងៃទី30ឧសភា បានបង្ហាញថារបងសន្តិសុខរបស់សេតវិមាន ត្រូវបានរុញឱ្យដួលរលំ ហើយក្រុមបាតុករបាននាំគ្នារុលទៅមុខ។ បាតុករបានប្រឈមមុខដាក់គ្នាជាមួយនឹងសមត្ថកិច្ច ខណៈដែលក្រុមនេះបានរៀបក្បួន និងលើកខែលរារាំង។ ប៉ូលិសមួយចំនួនត្រូវក្រុមបាតុករគប់នឹងស៊ុត។

https://www.youtube.com/watch?v=I68c8d_qnp4

សក្សីនៅកន្លែងកើតហេតុបានឱ្យដឹងថា ក្រុមសមត្ថកិច្ចបានព្រមានអំពីការប្រមូលផ្ដុំគ្នាដោយខុសច្បាប់ នៅមុនពេលចេញទៅរារាំងក្រុមបាតុករ។ មនុស្សមួយចំនួនក៏ត្រូវប៉ូលិសបាញ់ផ្សែងបង្ហូរទឹកភ្នែក។

សេតវិមានមុននោះត្រូវបានបិទទៅតាមបញ្ជារបស់អង្គភាពសម្ងាត់អាមេរិកាំង ប៉ុន្តែបានបើកឡើងវិញដោយសារក្រុមបាតុករបង្វែរគោលដៅទៅកន្លែងផ្សេងក្នុងរដ្ឋធានីវ៉ាស៊ីងតោន។ ប៉ុន្តែ ក្រោយមកក្រុមបាតុករក៏ត្រឡប់មកសេតវិមានវិញ។ បាតុកម្មបានចាប់ផ្ដើមនៅវេលាម៉ោងប្រហែល22 ថ្ងៃទី29ឧសភា ហើយដល់ម៉ោង3និង30នាទីព្រឹកថ្ងៃទី30ឧសភា ហាក់ដូចបានស្ងប់ស្ងាត់ទាំងស្រុង។

ប្រធានាធិបតី Donald Trump ឱ្យដឹងថា លោកមានសុវត្ថិភាព ខណៈស្ថិតនៅក្នុងសេតវិមាន ហើយក៏បានសរសើរដល់ក្រុមសម្ងាត់ថា បានបំពេញបេសកកម្មដោយជោគជ័យ”។ លោក Trump ក៏បានព្រមានក្រុមបាតុករថា នឹងជួប “ឆ្កែកាច” បើសិនឆ្លងផុតរបងសេតវិមាន។

លោក Trump យល់ថា អំពើហិង្សារបស់ក្រុមបាតុករនៅ Minneapolis គឺជាសកម្មភាពរបស់ “ក្រុមចោរប្លន់ និងអាណាធិបតេយ្យ”។ លោកបន្តថា “អាជ្ញាធររបស់ខ្ញុំនឹងទប់ស្កាត់អំពើហិង្សារបស់ក្រុមបាតុករ”។

សូមរំឭកថា បាតុកម្មខាងលើបានចាប់ផ្ដើមកើតចេញពីតំបន់ Minneapolis រដ្ឋ Minnesota ហើយបានរាលដាលពេញផ្ទៃប្រទេស បន្ទាប់ពី George Floyd ដែលជាបុរសស្បែកខ្មៅម្នាក់ត្រូវបានប៉ូលិសក្រៀកសង្កត់រហូតដល់ស្លាប់ ព្រោះតែជាប់សង្ស័យថាបានប្រើប្រាស់ប្រាក់ក្លែងក្លាយ៕

ប្រភព៖ សារព័ត៌មានបរទេស

May 31, 2020

បាតុកម្ម “ខ្ញុំមិនអាចដកដង្ហើម” បានរាលដាលពេញសហរដ្ឋអាមេរិក

ប្រជាជននៅក្នុងទីក្រុងជាច្រើននៅសហរដ្ឋអាមេរិក ដូចជាទីក្រុង New York, Houston និង Atlanta ជាដើម បាននាំគ្នាចេញធ្វើបាតុកម្មប្រឆាំងនឹងករណីប៉ូលិសបានធ្វើឱ្យពលរដ្ឋស្បែកខ្មៅម្នាក់បាត់បង់ជីវិតនៅឯទីក្រុង Minneapolis នៃរដ្ឋ Minnesota។

មនុស្សរាប់ពាន់នាក់បានប្រមូលផ្ដុំគ្នានៅខាងក្រៅកីឡដ្ឋាន Barclays Center ក្នុងតំបន់ Brooklyn នៃទីក្រុង New York កាលពីថ្ងៃទី 29ឧសភាកន្លងទៅ ក្នុងគ្រាដែលរលកនៃបាតុកម្មកំពុងផ្ទុះឡើងពាសពេញផ្ទៃប្រទេស បន្ទាប់ពីមានករណី George Floyd ដែលជាបុរសស្បែកខ្មៅម្នាក់រស់នៅក្នុងទីក្រុង Minneapolis បានបាត់បង់ជីវិតខណៈកំពុងត្រូវបានប៉ូលិសចាប់ខ្លួន។

ក្រុមបាតុករបាននាំគ្នាលើកបដាដែលមានសរសេរថា “ខ្ញុំមិនអាចដកដង្ហើម” ខណៈពួកគេប្រមូលផ្ដុំគ្នានៅតំបន់ Manhattan ក្នុងទីក្រុង New York ដោយស្នើឱ្យអនុម័តទៅលើសេចក្ដីព្រាងច្បាប់ ហាមមិនឱ្យសមត្ថកិច្ចប្រើប្រាស់យុទ្ធសាស្ត្រដែលអាចបណ្ដាលឱ្យអ្នកត្រូវចាប់ខ្លួនថប់ដង្ហើម។

Floyd អាយុ46ឆ្នាំ ត្រូវបានប៉ូលិស4នាក់ចាប់ខ្លួនកាលពីថ្ងៃទី25ឧសភា ក្រោមបទចោទថាបានប្រើប្រាស់ប្រាក់ក្លែងក្លាយ។ មន្ត្រីប៉ូលិសម្នាក់ឈ្មោះ Derek Chauvin បានគ្រាកសង្កត់ Floyd ក្នុងរយៈពេល9នាទី បើទោះជាបុរសនេះបានស្រែកអង្វរ និងនិយាយថា “ខ្ញុំមិនអាចដកដង្ហើម” ហើយក៏បានសន្លប់។ Floyd បានបាត់បង់ជីវិត នៅក្នុងមន្ទីរពេទ្យ។

បន្ទាប់មក បាតុកម្មជាច្រើនកន្លែងត្រូវបានធ្វើឡើងនៅពាសពេញទីក្រុង Minneapolis ដោយសារតែពេលនោះ មន្ត្រីប៉ូលិស4នាក់ដែលជាប់ពាក់ព័ន្ធនឹងបញ្ហាខាងលើមិនទាន់ត្រូវបានចាត់ការតាមផ្លូវច្បាប់ បើទោះត្រូវបានដកហូតតំណែងក៏ដោយ។ ក្រុមបាតុករបានប្រមូលផ្ដុំគ្នាជាច្រើនថ្ងៃបន្តបន្ទាប់ដើម្បីថ្កោលទោសករណីខាងលើនេះ។ ជាងនេះ ក្រុមបាតុករថែមទាំងបានដុតបំផ្លាញការិយាល័យដែលជាកន្លែងធ្វើការរបស់មន្ត្រីប៉ូលិស4នាក់ដែលជាប់ពាក់ព័ន្ធនឹងករណីសម្លាប់មនុស្សនេះទៀតផង។

Chavin កាលពីថ្ងៃទី29ឧសភា ត្រូវបានចោទប្រកាន់ពីបទឃាតកម្មដោយអចេតនា។ ចំណែកប៉ូលិស3នាក់ផ្សេងទៀត កំពុងត្រូវបានស៊ើបអង្កេត ហើយអាចនឹងត្រូវបានចោទប្រកាន់នាពេលខាងមុខ។

ក្នុងបាតុកម្មកាលពីម្សិលមិញនៅទីក្រុង New York ប៉ូលិសបានចាប់ខ្លួនមនុស្សរាប់សិបនាក់ និងបានបិទផ្លូវធំមួយ បន្ទាប់ពីក្រុមបាតុករនាំគ្នាខាកស្ដោះ និងគប់ដបកែវសំដៅសមត្ថកិច្ច។

នៅ Atlanta ដែលជាទីក្រុងធំរបស់ Georgia បាតុកម្មមានសភាពខ្លាំងក្លា ហើយពេលខ្លះបានកើតជាអំពើហិង្សាផងដែរ ក្នុងនោះ យ៉ាងហោចមានរថយន្តរបស់ប៉ូលិសមួយគ្រឿងត្រូវបានដុតបំផ្លាញ។ កញ្ចក់នៃអគាររបស់ CNN និងអគារមួយចំនួនទៀតក៏ត្រូវបានវាយកម្ទេច៕

ប្រភព៖ សារព័ត៌មានបរទេស

May 30, 2020

Author: សឿន សំណាង