ក្នុងចំណោមអ្នកវិជ្ជមានថ្មីទាំង ៤១៥ នាក់ មានករណីឆ្លងក្នុងសហគមន៍ ៣៨៦ នាក់ និង ករណីអ្នកដំណើរពីបរទេស ២៩ នាក់ ដែលទាំងអស់សុទ្ធតែជាំករណី អូមីក្រុង។
Author: សឿន សំណាង
ប្រជាជនអាម៉េរិក នឹងទទួលបានថ្នាំព្យាបាលកូវីដ-១៩ នៅតាមឱសថស្ថាន ដោយមិនគិតថ្លៃ
នៅក្នុងព្រឹត្តិការណ៍អានសេចក្ដីថ្លែងការណ៍សហព័ន្ធលើកដំបូង នាថ្ងៃទី ១ មីនា (២ មីនា នៅ កម្ពុជា) ប្រធានាធិបតីអាម៉េរិក លោក បៃដិន ក៏បានថ្លែងអំពីបញ្ហា កូវីដ-១។
លោក ចូ បៃដិន បានថ្លែងថា រដ្ឋាភិបាលរបស់លោក បានផ្ដល់ការធ្វើតេស្តរក វីរុសកូវីដ-១៩ រាប់រយលានលើកដល់ប្រជាជនអាម៉េរិក ដោយមិនគិតថ្លៃ។ លោក បៃដិន ក៏បានប្រកាសអំពី គំនិតផ្ដួចផ្ដើម «ធ្វើតេស្តដើម្បីព្យាបាល» ដែលគោលនយោបាយថ្មី ក្នុងនោះ ប្រជាជនអាម៉េរិក នឹងអាចធ្វើតេស្តរក វីរុសកូវីដ-១៩ នៅតាមឱសថស្ថាននានា និងទទួលបានថ្នាំព្យាបាលដោយមិនគិតថ្លៃ «នៅនឹងកន្លែង» បើសិនលទ្ធផលតេស្តបង្ហាញថា ពួកគេវិជ្ជមាន។
«បើសិនជាឆ្លង វីរុសកូវីដ-១៩ ថ្នាំគ្រាប់របស់ Pfizer នឹងជួយកាត់បន្ថយបាន ៩០% នៃហានិភ័យត្រូវចូលព្យាបាលនៅមន្ទីរពេទ្យ» លោក បៃដិន បញ្ជាក់ និងបន្ថែមថា «រដ្ឋាភិបាលរបស់ខ្ញុំ បានបញ្ជាទិញថ្នាំច្រើនជាងប្រទេសណាទាំងអស់ក្នុងពិភពលោក។ Pfizer កំពុងបង្កើនការផលិតដើម្បីផ្គត់ផ្គង់ឱ្យយើង ១ លានគ្រាប់នៅក្នុងខែនេះ និងបង្កើនបរិមាណទ្វេដងនៅខែក្រោយ»។
លោក បៃដិន បញ្ចប់សេចក្ដីថ្លែងការណ៍សហព័ន្ធលើកដំបូងរបស់លោក ដោយសារស្ដីពី អំណាច និងទឹកចិត្តស្នេហាជាតិ។ «ប្រទេសមានអំណាចខ្លាំងក្លាក៏ដោយសារអ្នក ប្រជាជនអាម៉េរិក តែងតែរឹងមាំ។ យើងនឹងការពារសេរីភាព ពង្រីកយុត្តិធម៌ និងឱកាស។ យើងនឹងសង្គ្រោះប្រជាធិបតេយ្យ» លោក បៃដិន ថ្លែងដូច្នេះ។ «សូមបួងសួងដល់ព្រះ ជួយតាមថែរក្សាគ្រប់គ្នា និងការពារកងទ័ពរបស់យើង»៕
អាម៉េរិក និងសម្ព័ន្ធមិត្ត បញ្ចេញ «អាវុធ» ទប់ទល់នឹងតម្លៃប្រេងដែលកំពុងឡើងខ្ពស់
លោក ចូ បៃដិន នាព្រឹកនេះ (ម៉ោងនៅ កម្ពុជា) បានប្រកាសថា សហរដ្ឋអាម៉េរិក និងសម្ព័ន្ធមិត្ត បានសម្រេចចិត្តបញ្ចេញប្រេងដែលរក្សាទុកក្នុងឃ្លាំង ចំនួន ៦០ លានធុង ដើម្បីកាត់បន្ថយផលប៉ះពាល់ដោយសារតម្លៃប្រេងកើនឡើងខ្ពស់ ព្រោះតែ រុស្ស៊ី បញ្ឆេះសង្គ្រាមនៅ អ៊ុយក្រែន។
«សហរដ្ឋអាម៉េរិក នឹងនាំមុខគេក្នុងការប្រឹងប្រែងនោះ ដោយបញ្ចេញប្រេងពីក្នុងឃ្លាំង ចំនួន ៣០ លានធុង។ ហើយយើងបានត្រៀមជាស្រេចដើម្បីបញ្ចេញប្រេងបន្ថែមទៀត បើសិនជាចាំបាច់» លោក បៃដិន អះអាងដូច្នេះ នៅក្នុងព្រឹត្តិការណ៍អានសេចក្ដីថ្លែងការណ៍សហព័ន្ធលើកដំបូង នាថ្ងៃទី ១ មីនា (២ មីនា នៅ កម្ពុជា)។ លោក បៃដិន បន្ថែមថា «ជំហានទាំងនេះនឹងជួយបញ្ចុំតម្លៃប្រេងសាំងក្នុងប្រទេស»។
និយាយអំពីវិស័យការងារក្នុងស្រុកវិញ ប្រធានាធិបតីអាម៉េរិក ឱ្យដឹងថា សេដ្ឋកិច្ចប្រទេសនេះបានបង្កើតការងារថ្មីជាង ៦.៥ លានកន្លែង ក្នុងឆ្នាំ ២០២១ ច្រើនជាងពេលណាទាំងអស់ក្នុងប្រវត្តិសាស្ត្ររបស់ សហរដ្ឋអាម៉េរិក។
ចំពោះបញ្ហាពន្ធដារ លោក ចូ បៃដិន បញ្ជាក់ថា រដ្ឋាភិបាលរបស់លោក នឹងមិនដំឡើងអត្រាពន្ធនោះទេ ចំពោះពលរដ្ឋដែលរកចំណូលបានក្រោម ៤ សែនដុល្លារ/ឆ្នាំ៕
លោក ចូ បៃដិន បញ្ជាក់ជាថ្មីថា សហរដ្ឋអាម៉េរិក នឹងមិនបញ្ជូនទ័ពទៅកាន់ អ៊ុយក្រែន
ក្នុងសេចក្ដីថ្លែងការណ៍ដំបូង ប្រធានាធិបតីទី ៤៦ របស់ សហរដ្ឋអាម៉េរិក បានសម្ដែងសាមគ្គីភាពជាមួយ ជនជាតិអ៊ុយក្រែន ប៉ុន្តែ បានបដិសេធការបញ្ជូនទ័ពរបស់ អាម៉េរិក ទៅជួយរដ្ឋធានីកៀវ។
លោក ចូ បៃដិន នៅក្នុងសេចក្ដីថ្លែងការណ៍ដំបូងនៅចំពោះមុខសភា បានបញ្ជាក់ឡើងវិញអំពីការពង្រាយទាហានរបស់ខ្លួននៅ អ៊ុយក្រែន។ «សូមអនុញ្ញាតឱ្យខ្ញុំនិយាយឱ្យបានច្បាស់ កងកម្លាំងរបស់យើងនឹងមិនចូលរួមធ្វើសង្គ្រាមប្រឆាំង រុស្ស៊ី នៅ អ៊ុយក្រែន ឡើយ»។ ជំនួសមកវិញ កងទ័ពអាម៉េរិក ដែលត្រូវដាក់ពង្រាយនៅ អឺរ៉ុប គឺ «ដើម្បីការពារសម្ព័ន្ធមិត្តណាតូ របស់យើង នៅក្នុងករណី ពូទីន សម្រេចចិត្តបន្តចល័តទ័ពទៅទិសខាងលិច»។
បណ្ដាប្រទេសរបស់ ណាតូ នៅ អឺរ៉ុប ដែលទទួលបានការការពារជាពិសេស រួមមាន ប្រទេសប៉ូឡូញ, រូម៉ានី, ឡេតូនី, លីទុយអានី និង អេស្តូនី។
ឯកអគ្គរដ្ឋទូតអ៊ុយក្រែន ប្រចាំ សហរដ្ឋអាម៉េរិក លោកស្រី អុកសាណា ម៉ាការ៉ូវ៉ា (ឆ្វេងបង្អស់) លោក បៃដិន បាននិយាយថា សហរដ្ឋអាម៉េរិក និងសម្ព័ន្ធមិត្ត បានផ្ទាល់ជំនួយផ្ទាល់ដល់ អ៊ុយក្រែន ជាង ១ ពាន់លានដុល្លាររួចហើយ ទាក់ទងនឹងយោធា សេដ្ឋកិច្ច និងមនុស្សធម៌។
ព្រឹត្តិការណ៍ថ្លែងការណ៍ខាងលើ ក៏មានវត្តមានរបស់ ឯកអគ្គរដ្ឋទូតអ៊ុយក្រែន ប្រចាំ សហរដ្ឋអាម៉េរិក លោកស្រី អុកសាណា ម៉ាការ៉ូវ៉ា ( Oksana Markarova) ផងដែរ ដែលអង្គុយក្បែរស្ត្រីទីមួយ ជីល បៃដិន (Jill Biden)។
អានសេចក្ដីថ្លែងការណ៍របស់សហព័ន្ធ ជាលើកដំបូង ប្រធានាធិបតីអាម៉េរិក ថា «រុស្ស៊ី គិតខុស»
ប្រធានាធិបតីអាម៉េរិក លោក ចូ បៃដិន អានសាររបស់សហព័ន្ធនៅឯវិមានសភាជាន់ទាបជាលើកដំបូងចាប់តាំងពីបានឡើងកាន់អំណាច ក្នុងនោះក៏បាននិយាយដល់ជម្លោះប្រដាប់អាវុធនៅ អ៊ុយក្រែន និងបញ្ហាជាច្រើនផ្សេងទៀត។
«កាលពីឆ្នាំកន្លង កូវីដ-១៩ បានធ្វើឱ្យយើងគ្រប់គ្នាត្រូវរក្សាគម្លាត។ ឆ្នាំនេះ ចុងក្រោយ យើងក៏បានមកនៅជិតគ្នា» ប្រធានាធិបតី ចូ បៃដិន បានថ្លែងដូច្នេះ នៅក្នុងសេចក្ដីថ្លែងការណ៍របស់សហព័ន្ធ នាយប់ថ្ងៃទី ១ មីនា (ព្រឹកថ្ងៃទី ២ មីនា នៅ ភ្នំពេញ)។ លោកក៏បានថ្លែងថា សេរីភាពនឹងតែងតែទទួលបានជ័យជំនះ។
ពាក់ព័ន្ធនឹងបញ្ហានៅ អ៊ុយក្រែន លោក បៃដិន ថ្លែងថា ការសម្រេចចិត្តលុកលុយរបស់ ប្រធានាធិបតីរុស្ស៊ី វ្លាឌីមៀ ពូទីន គឺជា «ការគិតមិនត្រឹមត្រូវ»។
«គាត់យល់ថា អាចសម្រុកចូលទឹកដីអ៊ុយក្រែន ហើយពិភពលោកនឹងក្រឡាប់ចាក់។ ជំនួសមកវិញ គាត់ត្រូវជួបនឹងជញ្ជាំងអំណាចដែលគាត់មិនអាចនឹកស្មានដល់ នោះគឺជនជាតិអ៊ុយក្រែន» លោក បៃដិន ថ្លែងដូច្នេះ។ លោកក៏និយាយដល់ការដាក់ទណ្ឌកម្មលើ រុស្ស៊ី ពិសេសគឺក្រុមអ្នកមាន «យើងនឹងសហការជាមួយសម្ព័ន្ធមិត្តនៅ អឺរ៉ុប ដើម្បីស្វែងរក និងរឹបអូសយកនាវាទេសចរណ៍ ភូមិគ្រឹះប្រណិត យន្តហោះឯកជនរបស់ពួកគេ។ យើងធ្វើសកម្មភាពសំដៅលើផលប្រយោជន៍មិនប្រក្រតីរបស់ពួកគេ»។
«រួមជាមួយនឹងសម្ព័ន្ធមិត្ត យើងនឹងបិទដែនអាកាសអាម៉េរិក ចំពោះរាល់ជើងហោះហើររបស់ រុស្ស៊ី និងដាក់ រុស្ស៊ី ឱ្យនៅឯកោជាងមុន និងបង្កើនសម្ពាធផ្នែកសេដ្ឋកិច្ចរបស់ពួកគេ» លោក បៃដិន បញ្ជាក់។
ដើម្បីផ្ដល់ទំនុកចិត្តដល់ពលរដ្ឋអាម៉េរិក ដែលបារម្ភអំពីបញ្ហានៅ អ៊ុយក្រែន លោក បៃដិន ថ្លែងថា «គ្រប់យ៉ាងនឹងប្រសើរឡើង»។
ការថ្លែងនៅចំពោះមុខសភាកាលពីឆ្នាំកន្លងរបស់លោក បៃដិន មិនត្រូវបានចាត់ទុកថាជាសេចក្ដីថ្លែងការណ៍របស់សហព័ន្ធនោះទេ ព្រោះតែវាជា «សារប្រចាំឆ្នាំ» ដោយវាជាឆ្នាំដំបូងនៃការឡើងកាន់អំណាចរបស់លោក។ រាប់ចាប់ពីឆ្នាំ ១៩៧៧ បណ្ដាប្រធានាធិបតីថ្មីរបស់ សហរដ្ឋអាម៉េរិក មិនបានចាត់ទុកការថ្លែងការណ៍ដំបូងរបស់ពួកគេនៅចំពោះមុខសភា ថាជា សេចក្ដីថ្លែងសាររបស់សហព័ន្ធឡើយ៕
ផែនការធ្វើឃាតប្រធានាធិបតីអ៊ុយក្រែន ទទួលបរាជ័យ
មន្ត្រីសន្តិសុខរបស់ អ៊ុយក្រែន បានឱ្យដឹងថា កងទ័ពប្រទេសនេះបានបំផ្លាញដោយជោគជ័យនូវផែនការធ្វើឃាតរបស់ក្រុមពិសេសមកពី សាធារណរដ្ឋឆេឆេនី។
«បេសកកម្មដែលធ្វើឡើងដោយសមាជិកក្រុមពិសេស Kadyrovites របស់ សាធារណរដ្ឋឆេឆេនី ដើម្បីធ្វើឃាតប្រធានាធិបតីរបស់ អ៊ុយក្រែន ត្រូវបានយើងរកឃើញនៅថ្ងៃនេះ» លេខានៃក្រុមប្រឹក្សាការពារជាតិ និងសន្តិសុខជាតិអ៊ុយក្រែន លោក Oleksiy Danilov កាលពីថ្ងៃទី ១ មីនា បានប្រកាសដូច្នេះនៅលើទូរទស្សន៍រដ្ឋ Rada TV។
យោងតាម Danilov កម្លាំងពិសេស Kadyrovites ត្រូវបានបែងចែកជាពីរក្រុម ក្នុងនោះ ពាក់កណ្ដាលត្រូវបានកងទ័ពរបស់ អ៊ុយក្រែន គ្រប់គ្រងនៅ Hostomel ក្បែរ រដ្ឋធានីកៀវ ចំណែកក្រុមមួយទៀតកំពុងប្រយុទ្ធគ្នាទល់នឹងកងកម្លាំងរបស់ អ៊ុយក្រែន។ បច្ចុប្បន្ន មិនទាន់ដឹងច្បាស់ថា ក្រុមនេះបានទៅដល់ទីណានៅឡើយ។
ប្រធានាធិបតី ហ្សេឡែនស្គី ធ្លាប់បានថ្លែងថា លោកគឺជា «គោលដៅទីមួយ» ចាប់តាំងពី រុស្ស៊ី បានប្រកាសបើកការឈ្លានពានលើ អ៊ុយក្រែន។ អាម៉េរិក ក៏ធ្លាប់បានស្នើឱ្យធ្វើការឈ្លៀសប្រធានាធិបតីរូបនេះផងដែរ ដើម្បីការពារសុវត្ថិភាព ក៏ប៉ុន្តែ លោក ហ្សេឡែនស្គី បានបដិសេធ។
មេដឹកនាំរបស់ សាធារណរដ្ឋឆេឆេនី លោក Ramzan Kadyrov គឺជាសម្ព័ន្ធមិត្តជិតស្និទ្ធរបស់ រុស្ស៊ី។ ឆេឆេនី កាលពីប៉ុន្មានថ្ងៃមុននេះ បានបញ្ចាក់ថា កងទ័ពរបស់ខ្លួន កំពុងចូលរួមជួយ រុស្ស៊ី នៅក្នុងការឈ្លានពាន អ៊ុយក្រែន។
សភាអឺរ៉ុប ស្នើឱ្យផ្ដល់ឋានៈជាបេក្ខភាពសមាជិក EU ឱ្យ អ៊ុយក្រែន
សភាអឺរ៉ុប បានអនុម័តសេចក្ដីសម្រេចចិត្ត ស្នើឱ្យបណ្ដាប្រទេសជាសមាជិករបស់ សហភាពអឺរ៉ុប (EU) សហការគ្នាដើម្បីផ្ដល់ឋានៈជាបេក្ខភាពសមាជិក ឱ្យ ប្រទេសអ៊ុយក្រែន បន្ទាប់ពីប្រទេសនេះ ដាក់ពាក្យស្នើសុំចូលជាសមាជិក EU ជាផ្លូវការ។
សេចក្ដីសម្រេចចិត្តត្រូវបានសភាអឺរ៉ុប (MEP) អនុម័តកាលពីថ្ងៃទី ១ មីនា ដោយយល់ថា ប្រការនេះសមស្របទៅតាមមាត្រាទី ៤៩ នៃ កតិកាសញ្ញាស្ដីអំពី សហភាពអឺរ៉ុប។ សេចក្ដីសម្រេចនេះក៏អំពាវនាវឱ្យបណ្ដាប្រទេសរបស់ EU «បន្តឆ្ពោះទៅរកការដាក់បញ្ចូល អ៊ុយក្រែន ទៅក្នុងទីផ្សាររួមរបស់ EU ទៅតាមកិច្ចព្រមព្រៀង»។
សេចក្ដីសម្រេចដែលមានការគាំទ្រពីសមាជិកចំនួន ៦៣៧ នាក់ របស់ MEP ក៏បានស្នើឱ្យ EU «ដាក់ទណ្ឌកម្មធ្ងន់ធ្ងរជាងបច្ចុប្បន្ន» ទៅលើ រុស្ស៊ី និងស្នើឱ្យ វិមានក្រឹមឡាំង បញ្ចប់រាល់សកម្មភាពយោធានៅ អ៊ុយក្រែន។
សេចក្ដីសម្រេចរបស់ MEP ត្រូវបានធ្វើឡើងបន្ទាប់ពី ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ២៨ កុម្ភៈ បានចុះហត្ថលេខាសុំចូលជាសមាជិករបស់ EU និងស្នើឱ្យ EU អនុញ្ញាតឱ្យ អ៊ុយក្រែន បានចូលសហភាពនេះជាបន្ទាន់ ក្នុងគ្រាដែល កងទ័ពរុស្ស៊ី កំពុងឡោមព័ទ្ធរដ្ឋធានី។
អ៊ុយក្រែន បច្ចុប្បន្ន មិនទាន់ត្រូវបានទទួលស្គាល់ជាបេក្ខភាពផ្លូវការសម្រាប់ឋានៈជាសមាជិក របស់ EU នៅឡើយ បើទោះប្រទេសនេះគឺជាផ្នែកមួយនៃកិច្ចព្រមព្រៀងតភ្ជាប់ជាមួយ EU ដែលក្នុងនោះ ភាគីទាំងពីរយល់ព្រមភ្ជាប់សេដ្ឋកិច្ចនៅក្នុងវិស័យជាក់លាក់មួយចំនួន និងធ្វើឱ្យមានភាពស៊ីជម្រៅជាងមុន លើទំនាក់ទំនងនយោបាយ ចាប់តាំងពីឆ្នាំ ២០១៧។
វិថីកសាងទ្រព្យខ្ទង់ពាន់លានដុល្លាររបស់មហាសេដ្ឋិនីលំដាប់លេខ១ នៅ ប្រទេសរុស្ស៊ី
Tatyana Bakalchuk ជាស្ថាបនិករបស់ក្រុមហ៊ុន Wildberries បច្ចុប្បន្នគឺជាស្ត្រីដែលមានទ្រព្យច្រើនជាងគេបង្អស់នៅ ប្រទេសរុស្ស៊ី ដោយបច្ចុប្បន្នមានទ្រព្យ ១១.៧ ពាន់លានដុល្លារអាម៉េរិក នេះបើយោងតាម Real Time របស់ Forbes។
ដោយសារតម្រូវការនៃការទិញទំនិញតាមអនឡាញកើនឡើងខ្ពស់ក្នុងសម័យកូវីដ-១៩ អ្នកស្រី Tatyana បានក្លាយជាមហាសេដ្ឋិនី ព្រោះតែទ្រព្យបានកើនយ៉ាងលឿនក្នុងឆ្នាំ ២០២១ ពី ១.១ ពាន់លានដុល្លារ ឡើងដល់ ១២.៩ ពាន់លានដុល្លារអាម៉េរិក។
Tatyana កើតឆ្នាំ ១៩៧។ អ្នកស្រីធ្លាប់ត្រូវបានគេចាត់ទុកថា «ជែក ម៉ា របស់ រុស្ស៊ី» ដោយសារអ្នកស្រីធ្លាប់ធ្វើជាគ្រូបង្រៀនភាសាអង់គ្លេស មុននឹងចេញរកស៊ី និងកសាងក្រុមហ៊ុនពាណិជ្ជកម្មអនឡាញដោយជោគជ័យ។
អ្នកស្រី Tatyana បង្កើត Wildberries កាលពីឆ្នាំ ២០០៤ នៅពេលមានអាយុ ២៨ ឆ្នាំ និងទើបបង្កើតបានកូនច្បងម្នាក់ (បច្ចុប្បន្នអ្នកស្រីមានកូន ៤ នាក់)។ កត្តាដែលនាំឱ្យអ្នកស្រី Tatyana បង្កើតក្រុមហ៊ុននេះឡើង គឺដោយសារកាលណោះ អ្នកស្រីកំពុងមានផ្ទៃពោះ និងជួបការលំបាកច្រើនទាក់ទងនឹងជីវភាពប្រចាំថ្ងៃសម្រាប់ស្ត្រីកំពុងពពោះ និងស្ត្រីមានកូនតូច និងដោយមើលឃើញថា នេះមិនមែនជាបញ្ហាដែលអ្នកស្រីជួបប្រទះតែម្នាក់ឯង អ្នកស្រីក៏បានសម្រេចចិត្តឈប់ធ្វើការដើម្បីបង្កើតក្រុមហ៊ុន Wildberries ជាគេហទំព័រដែលលក់តែផលិតផលប្រើប្រាស់ក្នុងផ្ទះ និងសម្លៀកបំពាក់។
«ថ្ងៃដំបូងនៃការចាប់ផ្ដើម ខ្ញុំធ្វើគ្រប់យ៉ាងតែឯង តាំងពីទៅយកទំនិញ និងប្រគល់ឱ្យអតិថិជនដោយផ្ញើតាមរថភ្លើងអគ្គិសនីក្រោមដី ឬរថយន្តក្រុង» អ្នកស្រី Tatyana រៀបរាប់។ ឆ្នាំ ២០០៤ ដដែល ស្វាមី Vladislav របស់អ្នកស្រី ក៏បានបោះបង់ការងារជាវិស្វករផ្នែកព័ត៌មានវិទ្យា ដើម្បីជួយគ្រប់គ្រងមុខជំនួញរបស់អ្នកស្រី។
អ្នកទាំងពីរបានចាប់ផ្ដើមចេញរកស៊ីដោយមានទុនដំបូងតែ ៧០០ ដុល្លារប៉ុណ្ណោះ ក្នុងនោះ ៧០ ដុល្លារគឺសម្រាប់ការផ្សាយពាណិជ្ជកម្ម។
ក្រោយមក Tatyana បានទិញខោអាវក្នុងបរិមាណច្រើនពីទំព័រ Otto របស់ អាល្លឺម៉ង់ រួចថតរូបទំនិញ និងលក់វានៅលើគេហទំព័ររបស់ខ្លួន។ អ្នកស្រីបានជួលអ្នកប្រគល់ទំនិញនៅ មូស្គូ និងតំបន់ក្បែរខាង ឬប្រើប្រាស់សេវាប្រៃសណីយ៍ដើម្បីប្រគល់ទំនិញដល់អតិថិជននៅឆ្ងាយ។
ក្រោយរកស៊ីជាមួយ Otto បាន ៤ ឆ្នាំ អ្នកស្រី Tatyana ក៏បានដកខ្លួន និងចាប់ផ្ដើមរកស៊ីផ្ទាល់ជាមួយបណ្ដាយីហោ។ ក្នុងពេល Adidas រងឥទ្ធិពលដោយសារវិបត្តិហិរញ្ញវត្ថុសកលកាលពីឆ្នាំ ២០០៨ និងត្រូវដោះស្រាយជាមួយទំនិញដែលមានតម្លៃជាង ១ លានអឺរ៉ូ អ្នកស្រី Tatyana បានបង្ហាញខ្លួនដូចទៅនឹងអ្នកជួយសង្គ្រោះសម្រាប់ Adidas និងបានទិញទំនិញទាំងអស់នោះ។ អ្នកស្រីក៏បានលក់ទំនិញទាំងនេះក្នុងរង្វង់ ២ ឆ្នាំបន្ទាប់។
ដោយវិធីខាងលើ Wildberries ក៏បានក្លាយជាអ្នកលក់រាយអនឡាញធំជាងគេនៅ រុស្ស៊ី។ ខែមីនា ២០១៩ Wildberries បានក្លាយជាគេហទំព័រពាណិជ្ជកម្មអនឡាញដែលមានគេចូលមើលច្រើនជាងគេលំដាប់ទី ៣ ក្នុងពិភពលោក បន្ទាប់ពី H&M និង Macy’s។ នេះបើតាមការស្រាវជ្រាវរបស់ក្រុមហ៊ុនវិភាគទីផ្សារ SEMrush។
បច្ចុប្បន្ន Wildberries គឺជាក្រុមហ៊ុនធំ ដោយមានឃ្លាំងផ្ទាល់ខ្លួនជាច្រើន និងបុគ្គលិករាប់ម៉ឺននាក់។ Wildberries លក់គ្រប់យ៉ាងដែលមនុស្សម្នាក់ត្រូវការ ដោយមានផលិតផលប្រហែល ៣១ ពាន់យីហោ។ ក្រុមហ៊ុននេះរកចំណូលបាន ៣.៥ ពាន់លានដុល្លារអាម៉េរិក ក្នុងឆ្នាំ ២០១៩ និង ៥.៧ ពាន់លានដុល្លារក្នុងឆ្នាំ ២០២។ ក្រៅពី រុស្ស៊ី Wildberries ក៏មានវត្តមាននៅក្នុងប្រទេសមួយចំនួនផ្សេងទៀតផងដែរ។
បើទោះជាមានទ្រព្យច្រើន ប៉ុន្តែ អ្នកស្រី Tatyana Bakalchuk និងស្វាមី កម្រនឹងបង្ហាញខ្លួនក្នុងព្រឹត្តិការណ៍ ឬកិច្ចសម្ភាសនានា៕
ជប៉ុន ឈឺក្បាលដោយសារបញ្ហា «Sugar Baby»៖ ក្មេងស្រីមិនទាន់គ្រប់ ១៨ ឆ្នាំ ស្លៀកខ្លីចេញរកប្រាក់ អ្នកខ្លះរកបាន ៦០ដុល្លារ/ម៉ោង ដោយគ្រាន់តែកំដរអតិថិជនដើរលេងក្នុងសួន
នៅ ប្រទេសជប៉ុន អាយុដែលត្រូវបានគេចាត់ទុកថាអាចមានទំនាក់ទំនងផ្លូវភេទបាន គឺ ១៣ ឆ្នាំ ដូច្នេះ ក្មេងស្រីវ័យចាប់ពី ១៥ ដល់ ១៨ ឆ្នាំ ត្រូវបានទទួលស្គាល់ដោយស្របច្បាប់ក្នុងការ «ទាក់ទង» នឹងមនុស្សពេញវ័យ។
Joshi Kosei គឺជាផលិតផលមួយរបស់ Enjo Kosai នៅពេលអ្នកមានលុយអាចចេញថ្លៃដើម្បីណាត់ជួប ឬទាក់ទងជាមួយសិស្សសាលាដែលមានវ័យមិនទាន់គ្រប់ ១៨ ឆ្នាំ។
មានការពិតមួយដែលថា វប្បធម៍ Kawaii (គួរឱ្យស្រលាញ់) ដែលនិយាយអំពី ស្ត្រីជប៉ុន ធ្វើឱ្យបុរសនៅទីនេះ ចូលចិត្តសិស្សស្រី ឬក្មេងស្រីដែលមិនទាន់ពេញវ័យ។ រូបភាពនារីដែលមានភ្នែកមូលធំៗ និងឆោតល្ងង់នៅលើកញ្ចក់ទូរទស្សន៍ គំនូរ ឬផលិតផលផ្លូវភេទ ធ្វើឱ្យហាងកាហ្វនានា កើតគំនិតបង្កើតជា Joshi Kosei ដើម្បីបំពេញតម្រូវការ។
Enjo Kosai គឺជាការណាត់ជួប និងទាក់ទងដោយមានការបង់ថ្លៃសេវា ចំណែក Joshi Kosei គឺជាប្រភេទហាងកាហ្វេដែលភ្ញៀវជាបុរសអាចបង់ថ្លៃសេវាដើម្បីបានជួបនារីមានអាយុមិនទាន់គ្រប់ ១៨ ឆ្នាំ។ ក្នុងសម្លៀកបំពាក់ខ្លីៗ នារីទាំងនេះអាចរកបានប្រហែល ៩០០ យ៉េន (៨ ដុល្លារ)/ម៉ោង ដោយគ្រាន់តែជជែកគ្នាលេង ឬបម្រើអាហារ ភេសជ្ជៈដល់បុរសដែលមានវ័យស្មើនឹងឪពុក។
«ភាគច្រើន អតិថិជនស្ថិតក្នុងវ័យប្រហែលពី ៣០ ទៅ ៥០ ឆ្នាំ។ ប៉ុន្តែ ពួកគេពេលណាក៏ចេះតែទាមទារណាត់ជួបខ្ញុំ» ក្មេងស្រី Eli (ឈ្មោះក្លែងក្លាយ) ដែលមានអាយុទើបតែ ១៦ ឆ្នាំ បានប្រាប់អ្នកយកព័ត៌មាន CNN អំពីវិស័យសេវាកម្ម Joshi Kosei។
បើសិនជាចង់ អតិថិជនអាចចំណាយ ៦០ ដុល្លារ/ម៉ោង ដើម្បីបានដើរលេងក្នុងសួនជាមួយសិស្សស្រីនៅក្នុងហាងប្រភេទនេះ។ «នៅពេលបានចេញពីហាង អ្នកអាចធ្វើអ្វីក៏បានតាមចិត្ត» សកម្មជនសង្គមមួយរូបនិយាយអំពីសេវាកម្មរបស់បណ្ដាហាង Joshi Kosei។
យោងតាម CNN ហាងមួយចំនួនថែមទាំងលួចផ្ដល់សេវាកម្មគក់ស្របាច់ លក់ខោអាវទ្រនាប់មួយទឹកទៀតផង។ ក្មេងស្រីជាច្រើនត្រូវបានបង្ខំឱ្យណាត់ជួបភ្ញៀវ ដោយម្ចាស់ហាងប្រើប្រាស់ល្បិចនានាដើម្បីចងជើងបុគ្គលិក ដូចជា ថតរូបអាក្រាតកាយ ឬផ្ដល់ប្រាក់កម្ចីដែលមានការប្រាក់ខ្ពស់ជាដើម។
នៅក្នុងវ័យជំទង់ ក្មេងស្រីតែងតែចូលចិត្តបង្ហាញសម្លៀកបំពាក់ និងសម្ភារថ្លៃៗ ឬក៏ដើម្បីបង់ថ្លៃសាលា ពួកគេក៏ចង់រកប្រាក់តាមវិធីខាងលើ។ ជាងនេះ ពួកគេក៏ងាយត្រូវគេអូសទាញ លួងលោម និងគំរាមជាដើម។ ពួកគេក៏អាចជាក្មេងស្រីមកពីគ្រួសារបែកបាក់ ត្រូវគេបំពានផ្លូវភេទតាំងពីតូច ឬអស់សង្ឃឹមក្នុងជីវិត។ នេះគឺជា «ចំណីឆ្ងាញ់» សម្រាប់ជនឆ្លៀតឱកាស ដែលប្រើប្រាស់ពួកគេជាឧបករណ៍រកប្រាក់មកឱ្យខ្លួន។
ការស្ទង់មតិរបស់អាជ្ញាធរក្រុងតូក្យូ បង្ហាញថា សិស្សវិទ្យាល័យនៅទីនេះ ប្រហែល ៧០% ធ្លាប់ឆ្លងកាត់ទំនាក់ទំនងផ្លូវភេទ និង ២៣% ជាប់ទាក់ទងជាមួយបញ្ហាពេស្យាចារ។
ជាក់ច្បាស់ណាស់ សកម្មភាព Joshi Kosei កំពុងធ្វើឱ្យបញ្ហាពេស្យាចារនៅក្នុងវ័យសិក្សា កើនឡើងខ្ពស់ ប៉ុន្តែមិនត្រូវបានសង្គមយកចិត្តទុកដាក់ឱ្យបានសមល្មម។ យោងតាមច្បាប់ នៅពេលបនស្រីពេស្យាត្រូវបានរកឃើញ និងចោទប្រកាន់ទោស គឺមានតែមេបនប៉ុណ្ណោះដែលត្រូវបានពិន័យ ចំណែកអតិថិជនវិញ គឺបានរួចខ្លួន។ ទន្ទឹមនឹងនេះ ការកំណត់អាយុក្នុងការមានទំនាក់ទំនងផ្លូវភេទត្រឹម ១៣ ឆ្នាំ នៅ ជប៉ុន ក៏បានក្លាយជាចន្លោះប្រហោងសម្រាប់សកម្មភាពជួញដូរផ្លូវភេទនៅលើក្មេងស្រី វ័យចាប់ពី ១៥ ដល់ ១៨ ឆ្នាំផងដែរ៕
បច្ចេកវិទ្យាថ្មី! Facebook អភិវឌ្ឍបញ្ញាសិប្បនិម្មិត អាចបកប្រែបាន ១០០ ភាសា ដោយមិនបាច់មានសំណេរជាអន្តរការី
(សហរដ្ឋអាម៉េរិក)-ក្រុមហ៊ុនមេរបស់ Facebook នឹងអភិវឌ្ឍកម្មវិធីបញ្ញាសិប្បនិម្មិត (AI) ដែលអាចបកប្រែភាសាទៅតាមពេលវេលាជាក់ស្ដែង ខ្ទង់រយភាសា ក្នុងនោះមានទាំងភាសាដែលមានមនុស្សប្រើប្រាស់តិចផងដែរ។
Meta ដែលជាក្រុមហ៊ុនមេរបស់បណ្ដាញសង្គម Facebook, Instagram និង WhatsApp ប្រកាសថា ចំពោះគម្រោងស្រាវជ្រាវបច្ចេកវិទ្យាបញ្ញាសិប្បនិម្មិតថ្មីនេះ មនុស្សគ្រប់រូបក្នុងពិភពលោក សុទ្ធតែអាចប្រើបាន។
«សមត្ថភាពក្នុងការនិយាយជាមួយមនុស្សគ្រប់រូប ដោយប្រើប្រាស់គ្រប់ភាសា គឺជាជំនាញកំពូលដែលគ្រប់គ្នាប្រាថ្នាចង់បាន ហើយ AI នឹងនាំមកនូវប្រការនោះក្នុងយុគសម័យរបស់យើង» នាយកប្រតិបត្តិរបស់ Meta លោក Mark Zuckerberg បាននិយាយដូច្នេះ។
យោងតាម Meta បើទោះជា អង់គ្លេស ចិន និង អេស្ប៉ាញ ជាដើម គឺជាភាសាដែលគេនិយមប្រើច្រើន ប៉ុន្តែ ប្រជាជនប្រហែល ២០% ក្នុងពិភពលោក មិនបានប្រើប្រាស់ភាសាទាំងនេះ។ ភាសាជាច្រើនដែលមិនសូវមានមនុស្សប្រើប្រាស់ និងមិនមានអក្សរសម្រាប់សរសេរ សមស្របក្នុងការដាក់បញ្ចូលក្នុងប្រព័ន្ធ AI បកប្រែរបស់ Beta។
Meta នឹងផ្ដោតទៅលើការងារចំនួន ២ គឺ ទីមួយមានឈ្មោះថា No Language Left Behind ដែលកសាងប្រព័ន្ធ AI ដែលរៀនអំពីវិធីសាស្ត្របកប្រែភាសា និងទី ២ គឺ មានឈ្មោះថា Universal Speech Translator ដែលអភិវឌ្ឍប្រព័ន្ធបកប្រែភាសាដោយផ្ទាល់មាត់ និងនៅនឹងកន្លែង ដោយមិនបាច់មានសំណេរជាលក្ខណៈអន្តរការី៕