សឿន សំណាង - La Reine Media

អ៊ុយក្រែន «ទទួលមីស៊ីលការពារដែនអាកាសដំបូងរបស់ អាល្លឺម៉ង់»

កងទ័ពអ៊ុយក្រែន បានទទួលប្រព័ន្ធការពារដែនអាកាស IRIS-T ដំបូងពី ប្រទេសអាល្លឺម៉ង់ ក្រោយពីការវាយប្រហារតាមអាកាសទ្រង់ទ្រាយធំរបស់ រុស្ស៊ី នេះបើតាម ទីភ្នាក់ងារសារព័ត៌មាន អាល្លឺម៉ង់ Spiegel។

Spiegel បានឱ្យដឹងថា ប្រព័ន្ធការពារដែនអាកាសរយៈចម្ងាយមធ្យម IRIS-T SLM ដំបូងសម្រាប់ អ៊ុយក្រែន រួមមាន យានជាទីបញ្ជាការមួយគ្រឿង យានរ៉ាដាមួយគ្រឿង និងទម្រមួយគ្រឿងដែលបំពាក់មីស៊ីល ៨ គ្រាប់ ត្រូវបានប្រគល់ និងទទួលនៅ ព្រំដែនប៉ូឡូញ-អ៊ុយក្រែន កាលពីថ្ងៃទី ១១ តុលា។ សកម្មភាពនេះជួយឱ្យ អ៊ុយក្រែន មានប្រព័ន្ធ IRIS-T មុនកងទ័ពរបស់ អាល្លឺម៉ង់ ទៅទៀត។

ក្រសួងការពារជាតិអាល្លឺម៉ង់ និង កងទ័ពអ៊ុយក្រែន មិនទាន់មានការអធិប្បាយអ្វីនៅឡើយ ទាក់ទិននឹងព័ត៌មានខាងលើ។

ព្រឹត្តិការណ៍ខាងលើបានកើតឡើងបន្ទាប់ពី រដ្ឋមន្ត្រីការពារជាតិអាល្លឺម៉ង់ កាលពីថ្ងៃទី ១០ តុលា បានប្រកាសថា ប្រព័ន្ធការពារដែនអាកាសដំបូងសម្រាប់ អ៊ុយក្រែន នឹងត្រូវបានប្រគល់ឱ្យក្នុងប៉ុន្មានថ្ងៃខាងមុខ ដើម្បីឆ្លើយតបនឹងករណី «ស្រោច» មីស៊ីលលើទឹកដីរបស់ អ៊ុយក្រែន ពីសំណាក់កម្លាំងរបស់ រុស្ស៊ី។

IRIS-T អាចបាញ់បានចម្ងាយ ៤០ គីឡូម៉ែត្រ និងអាចបាញ់ទម្លាក់គោលដៅនៅលើកម្ពស់ ២០ គីឡូម៉ែត្រ។ ប្រព័ន្ធ IRIS-T មួយឈុតដែលពេញលេញ រួមមាន យានជាទីបញ្ជាការមួយគ្រឿង យានរ៉ាដាមួយគ្រឿង និងយានជាទម្រចំនួន ៣ គ្រឿងដែលបំពាក់មីស៊ីល ២៤ គ្រាប់។

អាល្លឺម៉ង់ បានប្រគល់ឱ្យ អ៊ុយក្រែន នូវ ប្រព័ន្ធការពារដែនអាកាស Gepard ចំនួន ២៤ គ្រឿង, កាំភ្លើងធំចល័ត PzH 2000 ចំនួន ១០ គ្រឿង, គ្រាប់ប្រឆាំងរថក្រោះ Panzerfaust 3 ប្រហែល ៣,០០០ គ្រាប់ អមជាមួយនឹងកាណុង ៩០០ ដើម, មីស៊ីលការពារដែនអាកាស FIM-92 Stinger ចំនួន ៥០០ គ្រាប់, មីស៊ីល Strela ២,៧០០ គ្រាប់ រួមនឹងអាវុធ គ្រាប់រំសេវ និងសម្ភារៈយោធាជាច្រើនផ្សេងទៀត រាប់ចាប់ពីពេល រុស្ស៊ី បានបើកយុទ្ធនាការយោធាពិសេសនៅ អ៊ុយក្រែន៕

October 12, 2022

អ៊ុយក្រែន ប្រកាសថា បានបាញ់ទម្លាក់មីស៊ីល និង UAV រាប់សិបគ្រឿងរបស់សត្រូវ

មន្ត្រីអ៊ុយក្រែន បានឱ្យដឹងថា ប្រព័ន្ធការពារដែនអាកាសរបស់ប្រទេសនេះ បានកម្ទេចមីស៊ីល និងយន្តហោះគ្មានមនុស្សបើក ៣៣ គ្រឿង នៅក្នុងការវាយប្រហារទ្រង់ទ្រាយធំរបស់ រុស្ស៊ី កាលពីម្សិលមិញ។

នាយករដ្ឋមន្ត្រីអ៊ុយក្រែន Denys Shmyhal ថ្លែងថា រុស្ស៊ី កាលពីថ្ងៃទី ១១ តុលា បានបន្តវាយប្រហារតាមអាកាសទ្រង់ទ្រាយធំទៅលើទីតាំងថាមពលរបស់ អ៊ុយក្រែន ក្នុងនោះ មីស៊ីល ៣៣ គ្រាប់បានគេចផុតពីសំណាញ់ការពារដែនអាកាស និងធ្លាក់ចំគោលដៅ។

បញ្ជាការដ្ឋានទ័ពអាកាសអ៊ុយក្រែន ឱ្យដឹងថា ក្រៅពីអាវុធខាងលើ មីស៊ីលបំពាក់បច្ចេកវិទ្យានាំផ្លូវ ២០ គ្រាប់ និងយន្តហោះអត្តឃាតគ្មានមនុស្សបើក (UAV) ១៣ គ្រឿងរបស់ រុស្ស៊ី ត្រូវបានបាញ់ទម្លាក់។

ស្ថាប័នខាងលើរបស់ អ៊ុយក្រែន បន្ថែមថា រុស្ស៊ី បានប្រើប្រាស់មីស៊ីលបំពាក់បច្ចេកវិទ្យានាំផ្លូវច្រើនប្រភេទ ក្នុងនោះមានទាំងមីស៊ីល Kh-101 និង Kh-555 បាញ់ពីយន្តហោះ ក៏ដូចជាមីស៊ីល Kalibr បាញ់ពីនាវាចម្បាំង។ កម្លាំងរបស់ រុស្ស៊ី ក៏ត្រូវបានចោទថា ប្រើប្រាស់យន្តហោះអត្តឃាតគ្មានមនុស្សបើក Shahed-136 របស់ អ៊ីរ៉ង់ ផងដែរ។

មីស៊ីល និង UAV ៦៦ គ្រឿងដែល រុស្ស៊ី បានប្រើប្រាស់កាលពីថ្ងៃទី ១១ តុលា គឺមានចំនួនតិចជាង ធៀបនឹងការវាយប្រហារទ្រង់ទ្រាយធំនៅពាសពេញទឹកដីរបស់ អ៊ុយក្រែន កាលពីមុននោះមួយថ្ងៃ ដែលមានមីស៊ីលប្រហែល ៨៤ គ្រាប់ត្រូវបាន រុស្ស៊ី បាញ់ប្លោង។

ទីភ្នាក់ងារចារកិច្ចអង់គ្លេស (GCHQ) បានវាយតម្លៃថា រុស្ស៊ី កំពុងតែអស់គ្រាប់រំសេវជាបណ្ដើរៗ ហើយយុទ្ធនាការយោធានៅ អ៊ុយក្រែន ក៏កាន់តែធ្លាក់ទៅក្នុងភាព «អស់សង្ឃឹម» បន្តិចម្ដងៗ សម្រាប់ រុស្ស៊ី។ ក៏ប៉ុន្តែ GCHQ មិនបានលើកឡើងអំពីភ័ស្ដុតាងណាមួយសម្រាប់គាំទ្រដល់ការអះអាងរបស់ពួកគេ៕

October 12, 2022

អាម៉េរិក ជំរុញឱ្យសម្ព័ន្ធមិត្តបង្កើនការផ្ដល់ជំនួយសម្រាប់ អ៊ុយក្រែន

រដ្ឋមន្ត្រីក្រសួងហិរញ្ញវត្ថុអាម៉េរិក Janet Yellen អំពាវនាវដល់សម្ព័ន្ធមិត្តឱ្យពន្លឿនការផ្ដល់ប្រាក់ជំនួយដល់ អ៊ុយក្រែន ក្រោយពីមានករណីវាយប្រហារទ្រង់ទ្រាយធំពីមីស៊ីលរបស់ រុស្ស៊ី ទៅលើទីក្រុងជាច្រើនរបស់ប្រទេសជិតខាង។

«យើងកំពុងអំពាវនាវដល់ដៃគូសហការ និងសម្ព័ន្ធមិត្ត ឱ្យរួមដៃជាមួយយើងដោយការពន្លឿនការអនុវត្តកិច្ចសន្យារបស់ពួកគេជាមួយ អ៊ុយក្រែន និងជំរុញការអនុវត្តបន្ថែមទៀត» លោកស្រី Yellen កាលពីថ្ងៃទី ១១ តុលា បានឱ្យដឹងដូច្នេះនៅពេលទទួលជួបសមភាគីអ៊ុយក្រែន Sergii Marchenko។

យោងតាម រដ្ឋមន្ត្រីក្រសួងហិរញ្ញវត្ថុអាម៉េរិក ការបង្កើនទំហំ និងការពន្លឿនការផ្ដល់ជំនួយផ្នែកហិរញ្ញវត្ថុនឹងជួយឱ្យ អ៊ុយក្រែន រក្សាស្ថិរភាពនៃសេវាកម្មសំខាន់ៗរបស់រដ្ឋាភិបាល ក៏ដូចជាការស្ដារ និងស្ថាបនាប្រទេសឡើងវិញ។

លោកស្រី Yellen បញ្ជាក់ថា សហរដ្ឋអាម៉េរិក នឹងចាប់ផ្ដើម «ផ្ដល់ជំនួយជាទឹកប្រាក់ ៤.៥ ពាន់លានដុល្លារដែលត្រូវបានសភាអនុម័តកាលពីថ្ងៃទី ៣០ កញ្ញា ទៅឱ្យ រដ្ឋាភិបាលអ៊ុយក្រែន ក្នុងប៉ុន្មានសប្ដាហ៍ខាងមុខ»។

នេះគឺជាផ្នែកមួយនៅក្នុងកញ្ចប់ជំនួយមួយដែលមានតម្លៃ ១២.៣ ពាន់លានដុល្លារដែល អាម៉េរិក គ្រោងនឹងផ្ដល់ឱ្យ អ៊ុយក្រែន ដើម្បីទប់ទល់នឹង រុស្ស៊ី។

សង្គ្រាមរវាង រុស្ស៊ី និង អ៊ុយក្រែន បានឡើងកម្ដៅខ្លាំងនាប៉ុន្មានសប្ដាហ៍កន្លងទៅនេះ បន្ទាប់ពីកាយវិការបន្ថែមភាពតានតឹងជាច្រើនត្រូវបានធ្វើឡើង ក្នុងនោះមានដូចជា ទីក្រុងមូស្គូ ប្រកាសច្របាច់បញ្ចូល ៤ តំបន់របស់ អ៊ុយក្រែន ទៅក្នុងទឹកដីរុស្ស៊ី, ប្រធានាធិបតីរុស្ស៊ី ប្រកាសកែនទ័ព ៣០០,០០០ នាក់, ស្ពាន Kerch នៅ គ្រីមៀ រងការវាយប្រហារ និងទីក្រុងជាច្រើនរបស់ អ៊ុយក្រែន ត្រូវរងគ្រាប់មីស៊ីលរយៈចម្ងាយឆ្ងាយរបស់ រុស្ស៊ី៕

October 12, 2022

រន្ទះបាញ់ចំយន្តហោះរបស់ក្រុមហ៊ុន Vietnam Airlines បណ្ដាលឱ្យបុគ្គលិក ២ នាក់សន្លប់

បុគ្គលិក ២ នាក់ បានរងរបួសនៅក្នុងករណីរន្ទះបាញ់ធ្លាយជញ្ជាំងយន្តហោះរបស់ក្រុមហ៊ុនអាកាសចរណ៍ Vietnam Airlines កាលពីម្សិលមិញ។

ព្រលប់ថ្ងៃទី ១០ តុលា យន្តហោះមួយគ្រឿងរបស់ Vietnam Airlines ដែលទើបតែបានបញ្ចប់ការហោះហើរពី កោះត្រល់ (Phu Quoc) និងចតនៅលើ ព្រលានយន្តហោះ Tan Son Nhat (ក្រុងហូជីមិញ) ត្រូវរន្ទះបាញ់ចំ ធ្វើឱ្យធ្លុះជញ្ជាំងយន្តហោះ។

ករណីដែលបានកើតឡើងនៅលើយន្តហោះ P70 នេះ បានបណ្ដាលឱ្យបុគ្គលិក ២ នាក់នៃក្រុមបម្រើសេវាកម្មរបស់ក្រុមហ៊ុន VIAGS ត្រូវរងរបួស នៅពេលពួកគេស្ថិតនៅក្រោមយន្តហោះ A321 គ្រាដែលមានរន្ទះបាញ់។ ភ្លាមៗបន្ទាប់ពីត្រូវរន្ទះបាញ់ឱ្យសន្លប់ ពួកគេក៏ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់។

មកដល់ថ្ងៃទី ១១ តុលា ស្ថានភាពសុខភាពរបស់ជនរងគ្រោះទាំងពីរបានធូរស្រាលបន្តិច ក្នុងនោះ ម្នាក់លែងមានអាការហូរឈាម ខណៈម្នាក់ទៀតនៅមានអាការចេញឈាមនៅឡើយ ប៉ុន្តែអាចគ្រប់គ្រងបាន។

ប្រហោង និងស្នាមរន្ទះបាញ់នៅលើជញ្ជាំងយន្តហោះ

ក្រោយហេតុការណ៍បានកើតឡើង គេពិនិត្យឃើញថា ជញ្ជាំងយន្តហោះត្រូវរន្ទះបាញ់ធ្លុះ និងមានស្នាមឆេះខ្មៅ។

ការិយាល័យអាកាសចរណ៍វៀតណាម ឱ្យដឹងថា ហេតុការណ៍រន្ទះបាញ់ចំយន្តហោះគឺជារឿងកើតឡើងញឹកញាប់ ប៉ុន្តែ ការដែលរន្ទះបាញ់ចំយន្តហោះ និងបង្ករបួសដល់មនុស្សគឺជារឿងកម្រ។

October 11, 2022

Foxconn ដំឡើងរថយន្តអគ្គិសនី INDI One ឱ្យក្រុមហ៊ុន INDI EV

INDIEV ត្រូវបានបង្កើតឡើងដោយអតីតនាយកប្រតិបត្តិ ២ រូបរបស់ក្រុមហ៊ុនផលិតរថយន្តអគ្គិសនី Faraday Future គឺ Steve Orsario និង Steven Offutt កាលពីឆ្នាំ ២០១៧។ ក្រុមហ៊ុននេះបានបង្ហាញរថយន្តអគ្គិសនី INDI One កាលពីរដូវស្លឹកឈើជ្រុះឆ្នាំ ២០២១ ហើយនេះគឺជា crossover អគ្គិសនីដែលមានតម្លៃចាប់ពី ៤៥,០០០ ដុល្លារអាម៉េរិក។

កាលពីថ្ងៃទី ៦ តុលាកន្លងទៅ ក្រុមហ៊ុនផលិតរថយន្តអគ្គិសនី INDIEV ដែលមានមូលដ្ឋាននៅ Los Angeles សហរដ្ឋអាម៉េរិក ប្រកាសថា បានចុះកិច្ចព្រមព្រៀងជាមួយក្រុមហ៊ុនបច្ចេកវិទ្យា Hon Hai (Foxconn)។ យោងតាមកិច្ចព្រមព្រៀងនេះ Foxconn នឹងដំឡើងរថយន្តអគ្គិសនី INDI One នៅក្នុងរោងចក្ររបស់ខ្លួននៅ Ohio សហរដ្ឋអាម៉េរិក។

រថយន្តអគ្គិសនី INDI One ដែលមានទំហំធំបន្តិច បើធៀបនឹង Tesla Model Y ឬ Ford Mustang Mach-e បំពាក់ថ្មផ្ទុកអគ្គិសនី ៩៥ kWh ជួយឱ្យវាយធ្វើដំណើរបាន ៤៨៣ គីឡូម៉ែត្រ បន្ទាប់ពីបញ្ចូលថាមពលម្ដង។ INDI One បំពាក់ម៉ូទ័រអគ្គិសនីចំនួន ២ គ្រឿង ដែលមានកម្លាំងសរុប ៤១០ សេះ។

កាលពីខែមករា ក្រុមហ៊ុន INDIEV បានបង្ហាញ INDI One របស់ខ្លួននៅ CES និងទទួលការបញ្ជាទិញចាប់ពីត្រីមាសដំបូងនៃឆ្នាំ ២០២២ ហើយនឹងចាប់ផ្ដើមប្រគល់រថយន្តនៅក្នុងឆ្នាំនេះ។ គោលដៅនេះធ្លាប់ត្រូវបានគេសង្ស័យថា ប្រហែលមិនអាចសម្រេចបាន។ ក៏ប៉ុន្តែ ពេលនេះ INDIEV មាន Foxconn ជួយជ្រោមជ្រែកក្នុងការផលិត៕

October 11, 2022

កិច្ចព្រមព្រៀងពាណិជ្ជកម្ម CPTPP នឹងមានសុពលភាពសម្រាប់ ម៉ាឡេស៊ី ចាប់ពីខែវិច្ឆិកា ២០២២

ប្រភពព័ត៌មានបានឱ្យដឹងថា កិច្ចព្រមព្រៀងពាណិជ្ជកម្ម CPTPP ដែលនឹងមានសុពលភាពជាផ្លូវការសម្រាប់ ប្រទេសម៉ាឡេស៊ី ចាប់ពីថ្ងៃទី ២៩ វិច្ឆិកាខាងមុខ នឹងជួយឱ្យប្រទេសនេះក្លាយជាប្រទេសទី ៩ ដែលបានអនុម័តកិច្ចព្រមព្រៀងពាណិជ្ជកម្មនេះ។

មុននោះ ម៉ាឡេស៊ី បានប្រកាសជាផ្លូវការអំពីការសម្រេចរួចរាល់ក្នុងការអនុម័តលើ កិច្ចព្រមព្រៀង កិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) កាលពីថ្ងៃទី ០៥ តុលា ២០២២។

ក្នុងចំណោម ១១ ប្រទេសដែលបានចុះហត្ថលេខាលើ កិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក ម៉ាឡេស៊ី គឺជាប្រទេសទី ៩ ដែលបានអនុម័តកិច្ចព្រមព្រៀងនេះ ក្រោយដំណើរការអនុម័តរបស់ ៨ ប្រទេសដំបូង ចាប់ពីឆ្នាំ ២០១៨ ដល់ឆ្នាំ ២០២១ រួមមាន ម៉ិកស៊ិក ជប៉ុន សិង្ហបុរី អូស្ត្រាលី នូវែលសេឡង់ កាណាដា វៀតណាម និង ប៉េរូ។

រដ្ឋាភិបាលម៉ាឡេស៊ី សង្ឃឹមថា កិច្ចព្រមព្រៀងពាណិជ្ជកម្មនេះនឹងជួយឱ្យប្រទេសនេះជំរុញពាណិជ្ជកម្មរបស់ខ្លួន ដោយការចូលទៅកាន់ទីផ្សារដែល ម៉ាឡេស៊ី មិនទាន់មានកិច្ចព្រមព្រៀងពាណិជ្ជកម្មទ្វេភាគី ក្នុងនោះមានដូចជា ប្រទេសកាណាដា ម៉ិកស៊ិក និង ប៉េរូ ជាដើម។ CPTPP ក៏នឹងជួយឱ្យ ម៉ាឡេស៊ី រកបានប្រភពវត្ថុធាតុដើមគុណភាពខ្ពស់ និងតម្លៃទាប ក៏ដូចជាជួយឱ្យប្រទេសនេះក្លាយជាទីទាក់ទាញអ្នកវិនិយោគផងដែរ។

ក្រុមប្រទេសនៃកិច្ចព្រមព្រៀង កិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP)

មុននោះ ក្រសួងពាណិជ្ជកម្ម និងឧស្សាហកម្មម៉ាឡេស៊ី (MITI) បានឱ្យដឹងថា កាលពីថ្ងៃទី ៣០ កញ្ញា រដ្ឋាភិបាលប្រទេសនេះបានដាក់ឯកសារអនុម័ត CPTPP ទៅកាន់ ប្រទេសនូវែលសេឡង់ ដែលជាអ្នករក្សាទុកកិច្ចព្រមព្រៀង CPTPP។ លទ្ធផលនៃ «ការវិភាគផលប្រយោជន៍ និងការចំណាយ» របស់ ម៉ាឡេស៊ី បង្ហាញថា ដោយមានកិច្ចព្រមព្រៀង CPTPP ទំហំពាណិជ្ជកម្មសរុបរបស់ ម៉ាឡេស៊ី ត្រូវបានព្យាករថា នឹងកើនឡើងដល់ ៦៥៥.៧ ពាន់លានដុល្លារអាម៉េរិក នៅឆ្នាំ ២០៣០៕

October 11, 2022

តាក់ស៊ីហោះអគ្គិសនីស្វ័យប្រវត្តិ ល្បឿន ១៣០ គូឡូម៉ែត្រ/ម៉ោង សាកល្បងនៅ ឌូបៃ

ក្រុមហ៊ុន XPeng Inc ធ្វើការសាកល្បងម៉ូដែលតាក់ស៊ីហោះអគ្គិសនីដែលហោះឡើង និងចុះចតដោយត្រង់នៅ ឌូបៃ កាលពីថ្ងៃទី ១០ តុលា នៅ ទីក្រុងឌូបៃ នៃ ប្រទេសអេមីរ៉ាតអារ៉ាប់រួម ដោយរំពឹងថានឹងក្លាយជាមធ្យោបាយដឹកជញ្ជូនរវាងទីក្រុងនាពេលអនាគត។

តាក់ស៊ីហោះអគ្គិសនី XPeng X2 ដែលអភិវឌ្ឍដោយក្រុមហ៊ុនចិន XPeng Inc គឺជាគម្រោងមួយក្នុងចំណោមរាប់សិបគម្រោងស្ដីពីតាក់ស៊ីហោះនៅពាសពេញពិភពលោក។ ក្នុងចំណោមបណ្ដាគម្រោងខាងលើ មានតែប៉ុន្មានគម្រោងប៉ុណ្ណោះដែលបានជោគជ័យ និងនៅត្រូវការពេលច្រើនឆ្នាំទៀត មុនពេលអាចដាក់ឱ្យដំណើរការពាណិជ្ជកម្មជាផ្លូវការ។

ក្រុមហ៊ុន XPeng Inc កាលពីម្សិលមិញ បានធ្វើការសាកល្បងចំពោះតាក់ស៊ីហោះអគ្គិសនី XPeng X2 ដោយប្រើប្រាស់ប្រព័ន្ធស្វ័យប្រវត្ត។ មុននោះ XPeng Inc ធ្លាប់បានសាកល្បងហោះហើរដោយមានមនុស្សបើកបរកាលពីខែកក្កដា ២០២១។

តាក់ស៊ីហោះ XPeng X2 អាចដឹកអ្នកដំណើរបាន ២ នាក់ និងដំណើរការបានដោយប្រើម៉ូទ័ររុញច្រានចំនួន ៨ គ្រឿង។ XPeng X2 អាចហោះបានក្នុងល្បឿនអតិបរមា ១៣០ គីឡូម៉ែត្រ/ម៉ោង។

មិនដូចទៅនឹងយន្តហោះ ឬឧទ្ធម្ភាគចក្រធម្មតា តាក់ស៊ីហោះអគ្គិសនី Xpeng X2 អាចហោះឡើង និងចុះចតត្រង់ដោយស្វ័យប្រវត្ត និងអាចដឹកអ្នកដំណើរពីកន្លែងមួយទៅកន្លែងមួយបានឆាប់រហ័ស។

នាពេលអនាគត តាក់ស៊ីហោះអគ្គិសនីស្វ័យប្រវត្តដូច XPeng X2 នឹងអាចដឹកភ្ញៀវនៅក្នុងទីក្រុង ដោយការហោះហើរពីខាងលើបណ្ដាផ្លូវដែលមានចរាចរណ៍មមាញឹកខ្លាំង។ ប៉ុន្តែ មធ្យោបាយធ្វើដំណើរទំនើបនេះនៅមានបញ្ហាជាច្រើនដែលត្រូវដោះស្រាយ រួមមាន អាយុកាលរបស់ថ្មផ្ទុកអគ្គិសនី បញ្ហាសុវត្ថិភាព ការគ្រប់គ្រងអាកាសចរណ៍ និងបញ្ហាហេដ្ឋារចនាសម្ព័ន្ធជាដើម៕

October 11, 2022

ព្រោះតែកង្វះទំនិញ ស្ថានីយប្រេងសាំងជាច្រើននៅ វៀតណាម ត្រូវដំឡើងរបងខណ្ឌចែកអ្នកទិញ និងលក់ក្នុងបរិមាណមានកំណត់

ស្ថានីយប្រេងសាំងជាច្រើនកន្លែងនៅ ទីក្រុងហូជីមិញ ដំឡើងរបង ខណ្ឌសំណាញ ឬចងខ្សែជាដើម ដើម្បីទប់ទល់នឹងការប្រជ្រៀតគ្នាចូលទិញរបស់អតិថិជននាព្រឹកថ្ងៃទី ១១ តុលានេះ។

អតិថិជនដែលទៅទិញប្រេងសាំង ភាគច្រើនត្រូវរង់ចាំជាង ៣០ នាទីទើបដល់វេនចាក់សាំង។ នៅឯស្ថានីយប្រេងសាំងមួយកន្លែងនៅក្បែរផ្លូវ To Ky ខណ្ឌ ១២ នៃទីក្រុងហូជីមិញ មានម៉ាស៊ីនចាក់សាំងចំនួន ៥ ប៉ុន្តែមានតែ ២ ប៉ុណ្ណោះដែលដំណើរការ ព្រោះតែខ្វះឥន្ធនៈ។

ដោយសារតែមានអតិថិជនសម្រុកមកទិញច្រើនពេក ស្ថានីយប្រេងសាំងនៅផ្លូវ To Ky ត្រូវដំឡើងរបងដើម្បីទប់ និងខណ្ឌចែកអតិថិជន ដោយទុកតែផ្លូវតូចមួយសម្រាប់ចូលទៅក្បែរម៉ាស៊ីនចាក់សាំង។ «យើងដំឡើងរបងដើម្បីឱ្យអតិថិអាចរក្សាសណ្ដាប់ធ្នាប់ ចៀសវាងការប្រជ្រៀតគ្នាដូចកាលពីពីរថ្ងៃកន្លង» បុគ្គលិកនៅស្ថានីយប្រេងសាំងខាងលើនិយាយដូច្នេះ។

មិនខុសពីស្ថានីយប្រេងសាំងខាងលើ ស្ថានីយប្រេងសាំងនៅក្បែរចំណតរថយន្ត Mien Dong ក្នុងសង្កាត់ ២៦ នៃខណ្ឌ Binh Thanh ក៏ទប់ទល់នឹងការប្រជ្រៀតរបស់អតិថិជនដោយការដាក់កៅអី និងដែកក្នុងបំណងរក្សាសណ្ដាប់ធ្នាប់។

ដោយសារតែមិនមានទំនិញបន្ថែម ស្ថានីយប្រេងសាំងនានានៅ ទីក្រុងហូជីមិញ កំណត់ឱ្យលក់តែប្រហែល ២០,០០០ ដុងប៉ុណ្ណោះសម្រាប់ម៉ូតូមួយគ្រឿង។ យោងតាមបុគ្គលិកនៅស្ថានីយប្រេងសាំងមួយកន្លែង កាលពីម្សិលមិញ ពួកគេប្រកាសថា «ម៉ូតូមួយគ្រឿងអាចចាក់សាំងបានត្រឹម ៣០,០០០ ដុង» ប៉ុន្តែ ព្រឹកនេះ ត្រូវប្ដូរមក ២០,០០០ ដុង ដោយសារតែខ្វះទំនិញ។

នៅឯស្ថានីយប្រេងសាំងជាច្រើនផ្សេងទៀត ក៏ជួបនឹងបញ្ហា និងត្រូវដោះស្រាយដោយវិធីខាងលើតាំងពីព្រឹកព្រលឹម ខណៈដែលកងកម្លាំងសន្តិសុខក៏ត្រូវបានដាក់ពង្រាយដើម្បីរក្សាសណ្ដាប់ធ្នាប់សាធារណៈនៅជុំវិញទីតាំងដែលមានស្ថានីយប្រេងសាំង។

ការបារម្ភអំពីកង្វះប្រេងសាំង អតិថិជនជាច្រើនក៏យកដបមកតាមខ្លួន ដោយសង្ឃឹមថា នឹងអាចទិញសាំងបានច្រើន ប៉ុន្តែ មិនសមតាមបំណង។ យោងតាមអ្នកគ្រប់គ្រងស្ថានីយប្រេងសាំងមួយចំនួន ប៉ុន្មានថ្ងៃមកនេះ បរិមាណប្រេងសាំងដែលបានលក់ចេញ បានកើនឡើងប្រមាណ ១/៣ ធៀបនឹងសប្ដាហ៍កន្លង។

ការិយាល័យគ្រប់គ្រងទីផ្សារនៅ ទីក្រុងហូជីមិញ បានឱ្យដឹងថា មកដល់ល្ងាចថ្ងៃទី ១០ តុលា មានស្ថានីយប្រេងសាំងចំនួន ១២១/៥៥០ បានអស់ប្រេងសាំងពីស្ថានីយ ក្នុងនោះមានស្ថានីយជាច្រើនបានចុះឈ្មោះទិញ ប៉ុន្តែខាងដៃគូផ្គត់ផ្គង់មិនទាន់ប្រគល់ទំនិញនៅឡើយ៕

October 11, 2022

ពិធីសម្ពោធជាផ្លូវការ អគារតាំងបង្ហាញរថយន្ត និង មជ្ឈមណ្ឌលជួសជុលរថយន្ត Ford សាខាខេត្តកំពង់ចាម

[កំពង់ចាម – ថ្ងៃទី ០៧ ខែតុលា ឆ្នាំ២០២២] ក្រុមហ៊ុន អ អិម អេ (ខេមបូឌា) – RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត Ford មកកាន់ទីផ្សារព្រះរាជាណាចក្រកម្ពុជា បានប្រារព្ធពិធី “សម្ពោធជាផ្លូវការអគារតាំងបង្ហាញរថយន្ត និងមជ្ឈមណ្ឌលជួសជុលរថយន្ត Ford សាខាខេត្តកំពង់ចាម” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនFord និងមិត្តអ្នកសារព័ត៌មានប្រមាណជាង ៥០០ នាក់។

អគារតាំងបង្ហាញរថយន្ត និងមជ្ឈមណ្ឌលជួសជុលរថយន្ត Ford សាខាខេត្តកំពង់ចាម ត្រូវបានបំពាក់ដោយឧបករណ៌ និងគ្រឿងបរិក្ខាទំនើបៗចុងក្រោយ ហើយជាងជួសជុលរថយន្ត Ford ទាំងអស់ សុទ្ធសឹងតែត្រូវបានទទួលការបណ្តុះបណ្តាលវិជ្ជាជីវៈច្បាស់លាស់ពីសំណាក់រោងចក្រផ្ទាល់ ព្រមទាំងមានបទពិសោធន៌យូរឆ្នាំដើម្បីបំរើអតិថិជនប្រកបដោយទំនុកចិត្ត។ អគារតាំងបង្ហាញរថយន្ត Ford សាខាខេត្តកំពង់ចាមនេះ ក៏មានធ្វើការដាក់តាំងបង្ហាញនូវរថយន្ត Ford ស៊េរីឆ្នាំ2023គ្រប់ម៉ូដែលទាំងអស់ ដែលសុទ្ធសឹងជារថយន្តដែលទទួលបានផ្លាស់ផ្តូររូបរាងថ្មីទាំង ស្រុង ព្រមទាំងបំពាក់ដោយប្រព័ន្ធសុវត្ថិភាព និងបច្ចេកវិទ្យាទំនើបៗចុងក្រោយ ដើម្បីសម្រួលដល់ការបើកបររបស់អតិថិជន។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ការពង្រើកសាខាអគារតាំងបង្ហាញរថយន្ត និងមជ្ឈមណ្ឌលជួសជុលរថយន្ត Ford មកកាន់ខេត្តកំពង់ចាមនេះ គឺដើម្បីធើ្វការបង្ខិតសេវាកម្ម និងផលិតផលអោយគៀកជាមួយនឹងអតិថិជន ជាពិសេសគឺអតិថិជនដែលនៅតាមបណ្តាខេត្តនានាជុំវិញខេត្តកំពង់ចាមនេះផ្ទាល់តែម្តង។ បើគិតមកដល់ពេលនេះ យើងបានពង្រីកសាខាចំនួន៣ខេត្តរួចមកហើយគឺ ខេត្តសៀមរាប ខេត្តកំពង់ស្ពឺ និងខេត្តកំពង់ចាម ហើយទិសដៅបន្ទាប់សំរាប់ឆ្នាំក្រោយ យើងនឹងបន្តពង្រើកដល់បណ្តាខេត្តផ្សេងៗមួយចំនួនទៀត ដូចជាខេត្តបាត់ដំបង និងខេត្តព្រះសីហនុជាដើម”។

ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានមានប្រសាសន៍ថា៖ “នេះគឺជាមោទនភាពរបស់ខេត្តដែលក្រុមហ៊ុនFord បានសម្រេចចិត្តពង្រើកសាខារបស់ខ្លួនមកដល់ទឹកដីខេត្តកំពង់ចាមយើងនេះ ហើយនេះក៏ជាការផ្តល់នូវទំនុកចិត្តបន្ថែមទៀតដល់អតិថិជនដែលប្រើប្រាស់រថយន្តFord ព្រោះអ្នកប្រើប្រាស់រថយន្តFord មួយចំនួនធំតែងតែមានការព្រួយបារម្មណ៍ក្នុងការរកគ្រឿងបន្លាស់ ហើយចាំបាច់ត្រូវតែធ្វើដំណើរទៅភ្នំពេញ តែឥឡូវនេះ គឺមិនចាំបាច់ធ្វើដំណើរទៅដល់ភ្នំពេញទៀតនោះទេ។ ដូច្នេះខ្ញុំសូមលើកទឹកចិត្តដល់ថ្នាក់ដឹកនាំ មន្រ្តីរាជការ និងប្រជាពលរដ្ឋដែលមានធនធាន និងមានបំណងក្នុងការប្រើប្រាស់រថយន្តដែលមានគុណភាព ធន់រឹងមាំ និងប្រើប្រាស់បានយូរ សូមមកពិនិត្យមើលរថយន្តFord និងធ្វើការសម្រេចចិត្តជ្រើសរើសដោយមិនចាំបាច់មានការស្ទាក់ស្ទើរនោះទេ”។

អគារតាំងបង្ហាញរថយន្ត និងមជ្ឈមណ្ឌលជួសជុលរថយន្ត Ford សាខាខេត្តកំពង់ចាម មានអាស័យដ្ឋានស្ថិតនៅតាមបណ្តោយផ្លូវជាតិលេខ៧ អាគារលេខ៩៤០ ភូមិបឹងស្នាយ សង្កាត់សំបួរមាស ខេត្តកំពង់ចាម។សម្រាប់ព័ត៌មានបន្ថែម ឬកក់សេវាកម្មជួសជុលរថយន្ត សូមទំនាក់ទំនងតាមលេខទួរស័ព្ទ 078 999 883 ឬ 088 3 999 883 ។

October 11, 2022

អាម៉េរិក ផ្ដល់មីស៊ីលការពារដែនអាកាសឱ្យ អ៊ុយក្រែន ក្រោយការវាយប្រហារតាមអាកាសរបស់ រុស្ស៊ី

លោក បៃដិន បានហៅទូរស័ព្ទពិភាក្សាជាមួយលោក ហ្សេឡែនស្គី និងសន្យាថា ផ្ដល់ប្រព័ន្ធការពារដែនអាកាសទំនើបទៅឱ្យ អ៊ុយក្រែន បន្ទាប់ពី រដ្ឋធានីកៀវ រងការវាយប្រហារទ្រង់ទ្រាយធំពីគ្រាប់មីស៊ីលរបស់ រុស្ស៊ី។

«សហរដ្ឋអាម៉េរិក សន្យាបន្តផ្ដល់ឱ្យ អ៊ុយក្រែន នូវជំនួយចាំបាច់ដើម្បីការពារខ្លួន ក្នុងនោះមានទាំងប្រព័ន្ធការពារដែនអាកាសទំនើប» ប្រធានាធិបតីអាម៉េរិក លោក ចូ បៃដិន បានថ្លែងនៅក្នុងជំនួបតាមទូរស័ព្ទជាមួយ ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ១០ តុលា ប៉ុន្តែ មិនបានលើកឡើងលម្អិតអំពីអាវុធនេះ។

លោក ហ្សឡែនស្គី ក្រោយមកប្រកាសថា ការការពារដែនអាកាស «គឺជាអាទិភាពដំបូងគេនៅក្នុងកិច្ចសហប្រតិបត្តិការ» រវាង អ៊ុយក្រែន និង អាម៉េរិក។ «យើងនឹងធ្វើឱ្យសមរភូមិក្លាយជាការឈឺចាប់ជាងមុនសម្រាប់គូសត្រូវ» លោក ហ្សេឡែនស្គី ថ្លែងដូច្នេះ។

មុននោះ កាលពីថ្ងៃទី ២៧ កញ្ញា មន្ទីរបញ្ចកោណបានប្រកាសថា អាម៉េរិក នឹងចាប់ផ្ដើមប្រគល់ប្រព័ន្ធការពារដែនអាកាសទំនើបចំនួន ២ របស់ ន័រវែស (NASAMS) ទៅឱ្យ អ៊ុយក្រែន ក្នុងរយៈពេលប៉ុន្មានខែខាងមុខ ប៉ុន្តែ មិនទាន់ឱ្យដឹងអំពីពេលវេលាជាក់លាក់។

ការសម្រេចចិត្តរបស់ អាម៉េរិក ខាងលើ ត្រូវបានធ្វើឡើងបន្ទាប់ពី រុស្ស៊ី បើកយុទ្ធនាការវាយប្រហារទ្រង់ទ្រាយធំដោយប្រើប្រាស់មីស៊ីលរយៈចម្ងាយឆ្ងាយសំដៅលើហេដ្ឋារចនាសម្ព័ន្ធថាមពល ទីបញ្ជាការយោធា និងបណ្ដាញទំនាក់ទំនងនៅ អ៊ុយក្រែន។

ក្រុមមន្ត្រីអ៊ុយក្រែន ឱ្យដឹងថា ហេដ្ឋារចនាសម្ព័ន្ធសំខាន់ ១១ កន្លែងនៅក្នុង ៨ ខេត្តរបស់ប្រទេសនេះ បានរងការវាយប្រហារដោយមីស៊ីល និងបណ្ដាលឱ្យមនុស្ស ១២ នាក់ស្លាប់ និងតំបន់ជាច្រើនត្រូវដាច់ភ្លើង ទឹក ឬមិនអាចដំណើរការប្រព័ន្ធកម្ដៅ។

ការវាយប្រហារខាងលើរបស់ រុស្ស៊ី បានកើតមានឡើងក្រោយពីស្ពានគ្រីមៀ ដែលតភ្ជាប់ឧបទ្វីបគ្រីមៀរបស់ អ៊ុយក្រែន ជាមួយនឹងតំបន់ Krasnodar របស់ រុស្ស៊ី បានរងការវាយប្រហារ៕

រដ្ឋធានីកៀវរបស់ អ៊ុយក្រែន រងការវាយប្រហារពីមីស៊ីលរបស់ រុស្ស៊ី កាលពីថ្ងៃទី ១០ តុលា ២០២២

October 11, 2022

Author: សឿន សំណាង