បុគ្គលិក ២ នាក់ បានរងរបួសនៅក្នុងករណីរន្ទះបាញ់ធ្លាយជញ្ជាំងយន្តហោះរបស់ក្រុមហ៊ុនអាកាសចរណ៍ Vietnam Airlines កាលពីម្សិលមិញ។
ព្រលប់ថ្ងៃទី ១០ តុលា យន្តហោះមួយគ្រឿងរបស់ Vietnam Airlines ដែលទើបតែបានបញ្ចប់ការហោះហើរពី កោះត្រល់ (Phu Quoc) និងចតនៅលើ ព្រលានយន្តហោះ Tan Son Nhat (ក្រុងហូជីមិញ) ត្រូវរន្ទះបាញ់ចំ ធ្វើឱ្យធ្លុះជញ្ជាំងយន្តហោះ។
ករណីដែលបានកើតឡើងនៅលើយន្តហោះ P70 នេះ បានបណ្ដាលឱ្យបុគ្គលិក ២ នាក់នៃក្រុមបម្រើសេវាកម្មរបស់ក្រុមហ៊ុន VIAGS ត្រូវរងរបួស នៅពេលពួកគេស្ថិតនៅក្រោមយន្តហោះ A321 គ្រាដែលមានរន្ទះបាញ់។ ភ្លាមៗបន្ទាប់ពីត្រូវរន្ទះបាញ់ឱ្យសន្លប់ ពួកគេក៏ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់។
មកដល់ថ្ងៃទី ១១ តុលា ស្ថានភាពសុខភាពរបស់ជនរងគ្រោះទាំងពីរបានធូរស្រាលបន្តិច ក្នុងនោះ ម្នាក់លែងមានអាការហូរឈាម ខណៈម្នាក់ទៀតនៅមានអាការចេញឈាមនៅឡើយ ប៉ុន្តែអាចគ្រប់គ្រងបាន។
ក្រោយហេតុការណ៍បានកើតឡើង គេពិនិត្យឃើញថា ជញ្ជាំងយន្តហោះត្រូវរន្ទះបាញ់ធ្លុះ និងមានស្នាមឆេះខ្មៅ។
ការិយាល័យអាកាសចរណ៍វៀតណាម ឱ្យដឹងថា ហេតុការណ៍រន្ទះបាញ់ចំយន្តហោះគឺជារឿងកើតឡើងញឹកញាប់ ប៉ុន្តែ ការដែលរន្ទះបាញ់ចំយន្តហោះ និងបង្ករបួសដល់មនុស្សគឺជារឿងកម្រ។
