ខ្សែភាពយន្តរឿង «ប៉ាវចិន» ឬ «តុលាការមុខដែក» ដើមឡើយត្រូវបានគ្រោងថតតែដប់ភាគ ប៉ុន្តែចុងក្រោយក៏បានថតរហូតដល់ 236 ភាគ ក្នុងមួយឆ្នាំ។
ឆ្នាំនេះ ខ្សែភាពយន្តខាងលើមានអាយុគម្រប់ 30 ឆ្នាំ។ នៅលើទំព័របណ្ដាញសង្គម Kenny Ho (សម្ដែងជាតួអង្គ ចាន់ចៅ) បានឱ្យដឹងថា ក្នុងរយៈពេលកន្លង មានប្រការមួយដែលមិនប្ដូរផ្លាស់ នោះគឺមនោសញ្ចេតនា ការរួមសុខទុក្ខរវាងគាត់ និងមិត្តរួមការងារ Jin Chao Qun (ប៉ាវចិន) និង Fan Hong Xuan (តួ កុងស៊ុន)។ រាមច្បងទាំងពីរបានចូលនិវត្តន៍ ខណៈដែល Kenny Ho បើកហាងលក់អាហារនៅ Guangdong ប្រទេសចិន។ Kenny Ho បង្ហើបឱ្យដឹងថា បានអញ្ជើញ Jin Chao Qun និង Fan Hong Xuan មកលេងក្រុមហ៊ុនរបស់ខ្លួននៅពាក់កណ្ដាលឆ្នាំនេះ។
ភាពយន្តរឿង «តុលាការមុខដែក» ថតនៅកោះតៃវ៉ាន់ចាប់ពីខែកុម្ភៈ 1993 និងបញ្ចប់នៅក្នុងខែមករា 1994 ដោយផលិតករ Chao Ta-shen។ យោងតាម Yahoo ភាពយន្តនេះ ដំបូងឡើយគ្រោងនឹងថតតែក្នុងរយៈពេលខ្លី ប៉ុន្តែដោយសារមានការគាំទ្រច្រើនលើសលុប ផលិតករក៏សម្រេចចិត្តថត 236 ភាគ ដោយប្រើពេលមួយឆ្នាំកន្លះ។
នៅលើទូរទស្សន៍ CTS របស់តៃវ៉ាន់ Chao Ta-shen ធ្លាប់និយាយថា មូលហេតុសំខាន់ដែលបានជួយឱ្យភាពយន្តនេះជោគជ័យគឺដោយសារកម្លាំងមាំមួន និងការតស៊ូរបស់ក្រុមអ្នកសម្ដែង។ អ្នកសម្ដែងសំខាន់ៗដេកតែបីបួនម៉ោងប៉ុណ្ណោះនៅក្នុងមួយថ្ងៃ ដោយចែកជាពេលខ្លីៗ ពោលគឺមិនដេកម្ដងច្រើនម៉ោងនោះទេ។
ផលិតករនិយាយថា ការជ្រើសរើស Jin Chao Qun ឱ្យសម្ដែងជាតួអង្គប៉ាវចិន ក៏ព្រោះតែគាត់ជាសិល្បករល្ខោនហ៊ីចិន និយាយបានល្អ ព្រមទាំងមានមាឌស័ក្ដិសមនឹងតួអង្គនេះ។ មុនពេលសម្ដែង Jin Chao Qun ហូបច្រើនដើម្បីមានរូបរាងធាត់ អាចបង្ហាញពីអំណាចរបស់ប៉ាវចិន។ ក៏ប៉ុន្តែ តាំងពីពេលនោះមក គាត់មិនអាចសម្រកទម្ងន់បាន។ គាត់ក៏មានជម្ងឺសម្ពាធឈាមខ្ពស់ លើសជាតិស្ករ និងលើសជាតិខ្លាញ់។
Kenny Ho ធ្លាប់និយាយថា ដើម្បីឱ្យទាន់ពេល គាត់ និងមិត្តរួមការងារយកចិត្តទុកដាក់កម្រិតខ្ពស់ មិនឱ្យមានកំហុសឆ្គងក្នុងពេលថត។ គាត់ថា បើទោះលំបាក ប៉ុន្តែគ្រប់គ្នាមានអំណត់ និងប្រឹងប្រែងខ្លាំងណាស់។ Kenny Ho ថា គាត់មិនសូវហត់ដូច Jin Chao Qun និង Fan Hong Xuan ព្រោះតួអង្គ ចាន់ចៅ មិននិយាយច្រើន។
ក្នុងអំឡុងទសវត្សរ៍ឆ្នាំ 1990 ភាពយន្ត «តុលាការមុខដែក» ទទួលបានការគាំទ្រច្រើននៅតាមបណ្ដាប្រទេស និងតំបន់នៅអាស៊ី។ ខ្សែភាពយន្តនេះនិយាយអំពីការស៊ើបអង្កេតបំបែករឿងក្ដីរបស់ប៉ាវចិន ដោយមានការជួយជ្រោមជ្រែងពី កុងស៊ុន និង ចាន់ចៅ។ ស្នាដៃនិពន្ធនេះសរសើរចំពោះភាពម៉ឺងម៉ាត់ មិនចុះចាញ់បុគ្គលមានអំណាច ដើម្បីការពារយុត្តិធម៌របស់តួអង្គសំខាន់ទាំងបី។
ឆ្នាំនេះ Jin Chao Qun មានអាយុ 72 ឆ្នាំ និងកម្របង្ហាញវត្តមានក្នុងព្រឹត្តិការណ៍សិល្បៈ។ គាត់ត្រូវបានវេជ្ជបណ្ឌិតពិនិត្យឃើញថា មានដុំសាច់ក្នុងខួរក្បាលកាលពីឆ្នាំ 2017 និងត្រូវទទួលការវះកាត់។ ចាប់ពីពេលនោះមក គាត់ក៏បានចូលនិវត្តន៍។ លោក Jin Chao Qun និងភរិយារស់នៅក្នុងដែនដីកោះតៃវ៉ាន់។ ពួកគាត់មិនមានកូនសូម្បីតែម្នាក់។
ចំណែក កុងស៊ុន (Fan Hong Xuan) វិញ បច្ចុប្បន្នមានអាយុ 77 ឆ្នាំ រស់នៅតែម្នាក់ឯង មិនយកភរិយា។ រីឯ Kenny Ho ក៏មិនយកប្រពន្ធ។ នៅលើទំព័រ Dongjiang Shibao គាត់ធ្លាប់ប្រាប់ថា ចូលចិត្តការរស់នៅដោយមានសេរីភាព មិនសូវជាប់ជំពាក់នឹងបញ្ហា៕
