IU - La Reine Media

រថយន្តប្រើថាមពលព្រះអាទិត្យ បរបានជាង 700 គីឡូម៉ែត្រ ដោយមិនបាច់បញ្ចូលអគ្គិសនី

Stella Terra ដែលជារថយន្ត off-road ដំណើរការដោយថាមពលព្រះអាទិត្យដំបូងគេលើពិភពលោក បានបញ្ចប់ដំណើរសាកល្បងបរឆ្លងកាត់ប្រទេសម៉ារ៉ុក និងសមុទ្រខ្សាច់សាហារ៉ា កាលពីដើមខែតុលា 2023។

យោងតាមការចុះផ្សាយកាលពីថ្ងៃទី 17 តុលា របស់ Guardian រថយន្តអគ្គិសនី Stella Terra ដែលមានកៅអីពីរ ត្រូវបានអភិវឌ្ឍដោយក្រុមនិស្សិតនៅសាកលវិទ្យាល័យបច្ចេកវិទ្យា Eindhoven។ ដើម្បីទទួលបានជោគជ័យក្នុងការធ្វើតេស្តនេះ រថយន្ត Stella Terra បានឆ្លងកាត់ផ្លូវលំបាកជាច្រើននៅក្នុងភូមិសាស្ត្រខុសៗគ្នា ដោយប្រើប្រាស់ថាមពលអគ្គិសនីបានពីផ្ទាំងសូឡាដែលបំពាក់លើដំបូល។

Stella Terra ដែលមានទម្ងន់សរុបត្រឹមតែ 1,200 គីឡូក្រាម បំពាក់ថ្មផ្ទុកអគ្គិសនីប្រភេទលីចូម-អ៊ីយ៉ុង (lithium-ion) អាចបើកបរបានចម្ងាយ 710 គីឡូម៉ែត្រ និងមានល្បឿន 145 គីឡូម៉ែត្រ/ម៉ោង។ ថាមពលពីប្រព័ន្ធផ្ទាំងសូឡាលើរថយន្តនេះអាចផ្គត់ផ្គង់អគ្គិសនីគ្រប់គ្រាន់សម្រាប់ការចម្អិនអាហារ និងបញ្ចូលថាមពលដល់ឧបករណ៍នានា មានដូចជា ទូរស័ព្ទ និងម៉ាស៊ីនថតរូបជាដើម។ Stella Terra ដំណើរការមានប្រសិទ្ធភាពជាងប្រហែល 30% បើធៀបនឹងការរំពឹងទុកដំបូង៕

October 18, 2023

Audi បញ្ចុះតម្លៃរហូតដល់ម៉ឺនដុល្លារសម្រាប់រថយន្តអគ្គិសនីរបស់ខ្លួន ដើម្បីប្រជែងនឹង Tesla Model S

រថយន្តអគ្គិសនី RS e-tron GT អាចតាមទាន់ Model S Plaid របស់ Tesla។ នេះគឺជាក្ដីសង្ឃឹមរបស់ក្រុមហ៊ុន Audi។ ក្រុមហ៊ុនបុត្រសម្ព័ន្ធរបស់ Volkswagen Group មួយនេះកំពុងបញ្ចុះតម្លៃរហូតដល់ 20,000 ដុល្លារអាម៉េរិក សម្រាប់ម៉ូដែល e-tron GT គ្រាដែលកំពុងចូលរួមប្រជែងក្នុងទីផ្សាររថយន្តអគ្គិសនី។

ទន្ទឹមនឹង Porsche Taycan Turbo ក្រុមហ៊ុន Audi គឺជាមួយក្នុងចំណោមអ្នកផលិតរថយន្តដែលកំពុងប្រជែងជាមួយនឹង Tesla Model S ដោយប្រើប្រាស់ Audi e-tron GT។

ដោយមានកម្លាំងឡើងដល់ 637 សេះ រថយន្តអគ្គិសនី Audi e-tron GT អាចបង្កើនល្បឿនពី 0 ដល់ 100 គីឡូម៉ែត្រ/ម៉ោង ដោយចំណាយពេលតែ 3.1 វិនាទី។ ថ្មលីចូម – អ៊ីយ៉ុង (lithium-ion) 93 kWh របស់វា ជួយឱ្យធ្វើដំណើរបាន 400 គីឡូម៉ែត្រ និងអាចបញ្ចូលថាមពលរហ័ស ចាប់ផ្ដើមពី 5% ឡើងដល់ 80% ដោយប្រើពេល 22.5 នាទី។

ក្រុមហ៊ុន Audi កំពុងបញ្ចុះតម្លៃ 20,000 ដុល្លារ សម្រាប់ RS e-tron GT 2023។ នេះបើតាមព័ត៌មានដែលត្រូវបាន Audi ផ្ញើទៅកាន់តំណាងចែកចាយនានាកាលពីពេលថ្មីៗនេះ។

ក្រោយពីបញ្ចុះតម្លៃ 20,000 ដុល្លារ Audi RS e-tron GT នៅតែមានតម្លៃចាប់ពី 125,395 ដុល្លារ ខ្ពស់ជាងឆ្ងាយធៀបនឹង 80,890 ដុល្លាររបស់ Model S Plaid របស់ Tesla។

Tesla Model S Plaid បំពាក់ម៉ូទ័រអគ្គិសនីកម្លាំង 1,020 សេះ អាចបង្កើនល្បឿនចាប់ពី 0 ដល់ 100 គីឡូម៉ែត្រ/ម៉ោងដោយស៊ីពេល 1.99 វិនាទី និងធ្វើដំណើរបានរហូតដល់ 637 គីឡូម៉ែត្រ ក៏ដូចជាអាចរត់ក្នុងល្បឿន 200 ម៉ាយ/ម៉ោង ឬជិត 222 គីឡូម៉ែត្រ/ម៉ោង។

ក្រៅពី RS e-tron GT ក្រុមហ៊ុន Audi ក៏កំពុងបញ្ចុះតម្លៃ 12,500 ដុល្លារសម្រាប់ e-tron GT 2023 កំណែស្ដង់ដា, បញ្ចុះតម្លៃ 10,000 ដុល្លារសម្រាប់ RS e-tron GT 2024 និង 5,000 ដុល្លារសម្រាប់ e-tron GT 2024 កំណែធម្មតា៕

October 9, 2023

វត្ថុអវកាស «ពាក់កណ្ដាលផ្កាយ ពាក់កណ្ដាលភព» ចំនួនពីរ ត្រូវថតបានដោយផ្ទាល់

ប្រព័ន្ធផ្កាយមួយដែលមានវត្ថុអវកាសចម្លែកចំនួនបួន ទើបតែត្រូវបានក្រុមអ្នកតារាសាស្ត្រថតបានដោយផ្ទាល់ ក្នុងនោះមានវត្ថុអវកាសពីរដែលស្ថិតនៅក្នុងស្ថានភាពពាក់កណ្ដាលភព ពាក់កណ្ដាលផ្កាយ។

យោងតាម Sci-News ប្រព័ន្ធផ្កាយដែលទើបត្រូវថតបានដោយផ្ទាល់នេះរួមមាន ប្រព័ន្ធផ្កាយភ្លោះពីរដួងដែលមានឈ្មោះថា HIP 81208 និងវត្ថុអវកាសពីរទៀតដែលនៅក្បែរ មានចម្ងាយពីផែនដីប្រហែល 486 ឆ្នាំពន្លឺ និងនៅក្នុងកញ្ចុំផ្កាយ Scorpius។

នោះគឺជាប្រព័ន្ធផ្កាយដែលមានអាយុទើបតែ 17 លានឆ្នាំ ក្នុងនោះ ផ្កាយដែលភ្លឺជាងគេមានឈ្មោះថា HIP 81208A និងកូនផ្កាយក្រហម HIP 81208C ដែលវិលជុំវិញផ្កាយមេ HIP 81208A។

ប្រព័ន្ធនេះមិនទាន់មានភពពេញលេញ ប៉ុន្តែមានភពដែលកើតពី «ផ្កាយបរាជ័យ» ដែលមានឈ្មោះថា HIP 81208B ស្ថិតនៅក្បែរផ្កាយ A ដែលភ្លឺជាងគេ។ HIP 81208B គឺជាវត្ថុអវកាសដែលត្រូវបានចាត់ទុកថាជាកូនផ្កាយប្រផេះ។

ក្នុងការថតរូបផ្ទាល់ដោយឧបករណ៍ SPHERE ដែលបំពាក់លើតេឡេស្កុប ESO នៅប្រទេសស៊ីលី អ្នកវិទ្យាសាស្ត្របានរកឃើញវត្ថុអវកាសអាថ៌កំបាំងមួយផ្សេងទៀតដែលត្រូវបានហៅថា HIP 81208Cb ស្ថិតនៅក្បែរកូនផ្កាយក្រហម និងមានម៉ាសធំជាងភពព្រហស្បតិ៍ 15 ដង ធ្វើឱ្យវាត្រូវបានចាត់ចូលក្នុងប្រភេទ «ភពព្រហស្បតិ៍យក្ស» និងកូនផ្កាយប្រផេះ។

ផ្កាយប្រផេះគឺជាវិធីហៅវត្ថុអវកាសមួយដែលស្ថិតនៅចន្លោះនិយមន័យរបស់ផ្កាយ និងភព។ ពួកវាតូចខ្លាំង មិនអាចរក្សាការប្រតិកម្មនុយក្លេអែរក្នុងស្នូលដូចផ្កាយមួយដួង ប៉ុន្តែធំខ្លាំងបើធៀបនឹងភព។ ពួកវាកើតចេញពីពពកឧស្ម័នធូលីក្នុងលំហអវកាសដូចទៅនឹងផ្កាយធម្មតានានា ដោយមិនមែនកើតពីថាសធូលីរបស់ផ្កាយ ។ ក៏ប៉ុន្តែ ពួកវាក៏មិនមានលទ្ធភាពធ្វើឱ្យថាសធូលីដែលនៅជុំវិញខ្លួន កើតជាភពដូចបណ្ដាផ្កាយដទៃ។

ដូច្នេះ កូនផ្កាយប្រផេះក៏ត្រូវបានគេប្រដូចទៅនឹង «ផ្កាយបរាជ័យ» មួយដួង ឬ «ភពលំដាប់ខ្ពស់» ដែលមានភាពឯកា និងអាថ៌កំបាំង៕

September 21, 2023

Ronaldo ជួយឱ្យ Al Nassr ឡើងដល់វគ្គផ្ដាច់ព្រ័ត្រ Arab Champions Cup

(អារ៉ាប៊ីសាអូឌីត) – កំពូលតារាបាល់ទាត់វ័យ 38 ឆ្នាំ លោក Cristiano Ronaldo រកបានមួយគ្រាប់ពីការទាត់បាល់ពិន័យ នៅក្នុងការប្រកួតដែល Al Nassr ឈ្នះ Al Shorta ដោយលទ្ធផល 1-0 ក្នុងវគ្គពាក់កណ្ដាលផ្ដាច់ព្រ័ត្រនៅ Arab Club Champions Cup។

ក្រោយសំឡេងកញ្ចែបញ្ចប់ការប្រកួត ក្រុមកីឡាកររបស់ Al Nassr រត់មកឱបគ្នា ហើយពួកគេបានសម្ដែងការត្រេកអរខ្លាំងចំពោះអ្នកចាំទី Alaqidi ដែលជួយសង្គ្រោះបានមួយគ្រាប់នៅចុងការប្រកួត។

ក្រោយការប្រកួតនេះ Al Nassr មានសិទ្ធិឡើងទៅវគ្គផ្ដាច់ព្រ័ត្រ ដែលនៅទីនោះ ពួកគេនឹងត្រូវប៉ះ Al Hilal ឬ Al Shabab ក្នុងថ្ងៃទី 12 សីហាខាងមុខ។

https://www.youtube.com/watch?v=Gj2kE-a85iU

Ronaldo សុទ្ធតែរកបានគ្រាប់បាល់ឈ្នះក្នុងបួនប្រកួតបន្តបន្ទាប់ នាំឱ្យគាត់ហក់ឡើងទៅកំពូលតារាងចំណាត់ថ្នាក់ «ស្ដេចកម្ទេចទី» ដែលនៅពីលើ Karim Benzema។

Arab Club Champions Cup គឺជាពានរង្វាន់ប្រចាំឆ្នាំសម្រាប់បណ្ដាក្លឹបនៅក្នុងសហគមន៍អារ៉ាប់ក្នុងតំបន់មជ្ឈិមបូព៌ា និងអាហ្វ្រិកខាងជើង។ ពានរង្វាន់នេះធ្វើឡើងពីថ្ងៃទី 27 កក្កដា ដល់ 12 សីហា ឆ្នាំ 2023 នៅប្រទេសអារ៉ាប៊ីសាអូឌីត និងមានក្រុមបាល់ទាត់ចំនួន 16 ចូលរួម៕

August 10, 2023

យានអវកាស Voyager 1 និង 2 នឹងហោះឆ្ពោះទៅណា បន្ទាប់ពីចប់ភារកិច្ច?

ប្រព័ន្ធដែលមិនមែនជាឧបករណ៍បច្ចេកទេសនៅលើយានអវកាស Voyager 1 និង Voyager 2 ត្រូវបានបិទខ្លះហើយ ដោយសង្ឃឹមថា នឹងជួយឱ្យពួកវាធ្វើសកម្មភាពរហូតដល់ឆ្នាំ 2030 ហើយក្រោយមក ពួកវាអាចនឹងដាច់ទំនាក់ទំនងជាមួយផែនដី។

យានអវកាស Voyager 1 និង 2 របស់ណាសា ដែលត្រូវបានបាញ់បង្ហោះមុនក្រោយគ្នា 16 ថ្ងៃ ក្នុងឆ្នាំ 1977 ត្រូវបានរចនាឡើងដើម្បីអាចបំពេញបេសកកម្មបាន 5 ឆ្នាំ។ យានមួយគូនេះបានសិក្សាស្រាវជ្រាវភពព្រហស្បតិ៍ ភពសៅរ៍ ភពអ៊ុយរ៉ានុស ភពណេបទូន និងព្រះចន្ទជាច្រើនទៀត។

ក៏ប៉ុន្តែ ក្រោយធ្វើសកម្មភាពបានជិត 46 ឆ្នាំ មកដល់ពេលនេះ យានអវកាសមួយគូនេះបង្កើតបានកំណត់ត្រាដ៏អស្ចារ្យ នៅពេលបានហោះឆ្លងផុតព្រំដែននៃតំបន់ឥទ្ធិពលរបស់ព្រះអាទិត្យ។ ពួកវានៅតែបន្តបញ្ជូនទិន្នន័យមកកាន់ផែនដី បើទោះស្ថិតក្នុងបរិស្ថានអន្តរតារា ដែលជាតំបន់អាថ៌កំបាំងនៅចន្លោះផ្កាយនានា។ ទោះជាពេលខ្លះជួបបញ្ហាបច្ចេកទេស ដាច់ទំនាក់ទងនឹងផែនដី ប៉ុន្តែដំណើរហោះហើរក្នុងទីអវកាសរបស់ពួកវា ទំនងជាអាចបន្តទៅមុខយូរទៀត។ នេះបើតាម Business Insider ចុះផ្សាយកាលពីថ្ងៃទី 04 សីហា។

ណាសាផលិតយាន Voyager គឺដើម្បីស្រាវជ្រាវផ្នែកខាងក្រៅរបស់ប្រព័ន្ធព្រះអាទិត្យ។ ក្រោយពីចប់បេសកកម្មសំខាន់ ពួកវាបន្តហោះហើរផ្សងព្រេងក្នុងកាឡាក់ស៊ីមីលគីវ៉េ និងថតបានទិដ្ឋភាពចក្រវាលដ៏សែនអស្ចារ្យ។

កាលពីថ្ងៃទី 14 កុម្ភៈ 1990 Voyager 1 ថតបានរូបភាព «Pale Blue Dot» (ចំណុចពណ៌ខៀវ) ពីចម្ងាយ 6.4 ពាន់លានគីឡូម៉ែត្រ។ នោះគឺជារូបភាពនិមិត្តរូប និងជារូបថតឆ្ងាយបំផុតស្ដីពីផែនដី។

ក្នុងទសវត្សរ៍កន្លង Voyager 1 បានស្រាវជ្រាវតំបន់អន្តរតារា ជាទីដែលមានធូលី ឧស្ម័ន និងគ្រាប់ដែលមានផ្ទុកអគ្គិសនីយ៉ាងក្រាស់។ Voyager 2 បានទៅដល់តំបន់អន្តរតារាក្នុងឆ្នាំ 2018 ក្រោយ Voyager 1 6 ឆ្នាំ។ ការស្រាវជ្រាវរបស់ពួកវាទាក់ទងនឹងឧស្ម័ននៅតំបន់អន្តរតារា បានជួយឱ្យក្រុមតារាវិទូយល់ដឹងអំពីទីអវកាសដ៏អាថ៌កំបាំងនេះ។

នៅក្នុងគន្លាតប្រហែល 23.8 ពាន់លានគីឡូម៉ែត្រពីផែនដី Voyager 1 កំពុងហោះហើរក្នុងបរិស្ថានអន្តរតារាដ៏ងងឹត។ វាគឺជាយានអវកាសរបស់មនុស្សដែលបានហោះទៅឆ្ងាយពីផែនដីបំផុត។ ដោយសារតែហោះក្នុងទិសដៅផ្សេងគ្នា ដូច្នេះ Voyager 2 បច្ចុប្បន្នមានគម្លាតពីផែនដីប្រហែល 19.8 ពាន់លានគីឡូម៉ែត្រ។

ប៉ុន្មានឆ្នាំមកនេះ ដោយមានការប្រឹងប្រែងដើម្បីគ្រប់គ្រងថាមពល ក្រុមវិស្វករបានបិទប្រព័ន្ធមួយចំនួនដែលមិនមែនជាឧបករណ៍បច្ចេកទេសនៅលើយានទាំងពីរនេះ ក្នុងនោះមានដូចជាប្រព័ន្ធកម្ដៅសម្រាប់ឧបករណ៍វិទ្យាសាស្ត្រជាដើម ដោយសង្ឃឹមថា ពួកវាអាចនឹងបំពេញភារកិច្ចបានដល់ឆ្នាំ 2030។ បន្ទាប់ពីនោះ ពួកវាទំនងជាអស់លទ្ធភាពក្នុងការរក្សាទំនាក់ទំនងជាមួយផែនដី។

ក៏ប៉ុន្តែ ក្រោយពីអស់ថាមពល Voyager នឹងនៅតែបន្តហោះហើរអណ្ដែតត្រសែតក្នុងតំបន់អន្តរតារា។ ណាសាឱ្យដឹងថា ប្រហែល 300 ឆ្នាំទៀត Voyager 1 នឹងហោះចូលដល់ពពក Oort ជាតំបន់ដែលមានរូបរាងមូលនៅខាងក្រៅគន្លងគោចររបស់ភពភ្លុយតូ និងមានផ្ទុកផ្កាយដុះកន្ទុយត្រជាក់ចំនួនរាប់ពាន់លានដុំ។ Voyager នឹងត្រូវចំណាយពេល 30,000 ឆ្នាំទៀតដើម្បីហោះទៅដល់ចំណុចចុងក្រោយបង្អស់របស់ពពក Oort និងប្រហែល 40,000 ឆ្នាំទៀតដើម្បីទៅដល់ AC+ 79 3888 ជាផ្កាយមួយដួងដែលស្ថិតក្នុងកញ្ចុំផ្កាយ Camelopardalis។

ចំណែក Voyager 2 វិញ ប្រហែល 296,000 ឆ្នាំទៀត នឹងហោះឆ្លងកាត់ Sirius ជាផ្កាយមួយដួងដែលភ្លឺជាងគេក្នុងរាត្រីនៅលើផែនដី។ ណាសាឱ្យដឹងថា យាន Voyager ប្រហែលជាហោះអណ្ដែតត្រសែតជារៀងរហូតនៅក្នុងកាឡាក់ស៊ីមីលគីវ៉េ៕

August 8, 2023

OPPO Reno10 5G តម្លៃ $399 | Reno10 Pro 5G តម្លៃ $569 បានដាក់សម្ពោធជាផ្លូវការយ៉ាងកក្រើកនៅប្រទេសកម្ពុជា

នាល្ងាចថ្ងៃទី 6 ខែសីហា ឆ្នាំ 2023 ក្រុមហ៊ុនស្មាតហ្វូន OPPO ដ៏ធំប្រចាំប្រទេសកម្ពុជាបានបង្ហាញខ្លួនយ៉ាងអធឹកអធមក្នុង «កម្មវិធីសម្ពោធជាផ្លូវការ OPPO Reno10 Series 5G» ដោយមានវត្តមានភ្ញៀវកិត្តិយសជាច្រើនរូប ពិសេសគឺ ព្រះនាងតូច ជេនណា នរោត្តម ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងកញ្ញា រ៉េត ស៊ូហ្សាណាព្រមទាំងតារាប្រុសស្រីល្បីៗជាច្រើនរូបទៀតដែលបានអញ្ជើញចូលរួមយ៉ាងច្រើននៅក្នុងកម្មវិធីនេះផងដែរ។

នេះជាមហាកិត្តិយសដ៏ធំក្រៃលែងដែលព្រះនាងតូច ជេនណា នរោត្តម បានផ្តល់វត្តមានជាភ្ញៀវកិត្តិយស ចូលរួមបកស្រាយចម្រៀងយ៉ាងពិរោះរណ្តំ ព្រមទាំងផ្តល់កិត្តិយសក្នុងការប្រកាសតម្លៃរបស់ស្មាតហ្វូនស៊េរីថ្មីជូនដល់ក្រុមហ៊ុន OPPO ផងដែរ ។ ចំណែកតារាចម្រៀង Original Song លោក ថេណា និង កញ្ញា រ៉េត ស៊ូហ្សាណា ក៏បានច្រៀងចម្រៀងថ្មីៗព្រមទាំងចែករំលែកបទពិសោធពីការប្រើប្រាស់នូវស្មាតហ្វូន OPPO Reno10 Series 5G ផងដែរ។ រីឯបវរកញ្ញា ពេជ្រ វត្តីសារ៉ាវឌ្ឍី បានដើរបង្ហាញម៉ូដជាមួយនឹងទូរស័ព្ទស៊េរីថ្មី OPPO Reno10 Series 5G យ៉ាងទាក់ទាញជាមួយនឹងសម្លេងហ៊ោគាំទ្រពេញសាលកម្មវិធីផងដែរ។ មិនតែប៉ុណ្ណោះ ក្នុងនោះក៏ឃើញមានវត្តមានបវរកញ្ញាដែលជា Top3 ក្នុងកម្មវិធី Miss Pre-Teen ដើរម៉ូដយ៉ាងស្រស់ស្អាតផងដែរ។

ក្រុមហ៊ុន OPPO បានដាក់សម្ពោធនូវស្មាតហ្វូន 2 ម៉ូដែលគឺ OPPO Reno10 5G និង Reno10 Pro 5G ដែល កញ្ញា ងួន ភួងទេពសុនិច ជាតួនាទីជា Product Manager បានឡើងធ្វើបទបង្ហាញអំពីមុខងារ អត្ថប្រយោជន៍ សមត្ថភាព និងភាពឈ្លាសវៃរបស់ស្មាតហ្វូនទាំង 2 ម៉ូដែលនេះផងដែរ។

សម្រាប់ OPPO Reno10 5G បានបំពាក់នូវប្រព័ន្ធកាមេរ៉ា Portrait ដ៏ពេញលេញជាមួយលែន Telephoto Portrait ទំហំ 32MP បំពាក់នូវសេនស័រ Flagship របស់ SONY IMX709 ដែលអាចថតរូប Portrait បានហើយអាច Zoom បានទៀតជាមួយបច្ចេកវិទ្យា 2X Optical Zoom និង Digital Zoom ដល់ទៅ 20X ។ OPPO Reno10 5G ក៏បានបំពាក់នូវបច្ចេកវិទ្យាសាកថ្មល្បឿនលឿន 67W SUPERVOOC សាកពេញ 100% ប្រើពេលត្រឹមតែ 47នាទីតែប៉ុណ្ណោះ បន្ថែមពីសាកថ្មលឿនហើយទំហំថ្មក៏ធំដែររហូតដល់ 5000mAh។ មិនតែប៉ុណ្ណោះ បើនិយាយពី Spec អេក្រង់វិញគឺកាន់តែអេម ដោយបំពាក់មកនូវអេក្រង់កោង 3D កម្រិតកំពូលជាមួយ Refresh Rate 120Hz អូសដោយមិនទាក់ និងទើសចិត្តឡើយជាមួយអេក្រង់ធំដល់ទៅ 6.7Inch AMOLED។ បើក្រឡេកទៅមើលការឌីហ្សាញវិញប្រកបដោយភាពប្រណីត និងទាន់សម័យដោយផ្តល់នូវជម្រើស 2 ពណ៌គឺ Ice Blue និង Silvery Grey។

ចំណែក OPPO Reno10 Pro 5G នាំមកជូនជាមួយជម្រើស 2 ពណ៌គឺ Glossy Purple រចនាឡើងដោយកញ្ចក់ថ្លារលោង ជាមួយពណ៌ស្វាយបែប Premium និងមួយពណ៌ទៀតគឺ Silvery Grey ដែលរចនាបែប OPPO Glow ជាមួយនឹងអេក្រង់កោងបែប 3D ដូចទៅនឹង OPPO Reno10 5G ដែរ។ អ្វីដែលគួរឲ្យចាប់អារម្មណ៍នោះគឺ OPPO Reno10 Pro 5G បានប្រើប្រាស់សេនស័រ SONY ទាំងអស់ដែលផ្តល់ឲ្យការថតរូបទាំងនៅលើកាមេរ៉ាមុខនិងក្រោយច្បាស់គ្រប់ពេលវេលាប្រៀបដូចប្រើកាមេរ៉ាអាជីព។ រីឯថាមពលថ្មទំហំ 4600mAh និងកម្លាំងសាកថ្មលឿនរហូតដល់ 80W SUPERVOOC សាកពេញ 100% ក្នុងពេលត្រឹមតែ 28នាទីប៉ុណ្ណោះ។ បន្ថែមពីនេះ វាមានសមត្ថភាពប្រតិបត្តិការកាន់តែប្រសើរ ជាមួយនឹងឈីបគ្រប់គ្រងថាមពល SUPERVOOC S ផ្តាច់មុខនិងដំបូងនៅលើ OPPO ផងដែរ។ បើនិយាយពីកម្លាំងប្រតិបត្តិការវិញបំពាក់ជាមួយឈីប Qualcomm ® Snapdragon 778 5G ដ៏ល្បីល្បាញទទួលស្គាល់លើកម្លាំងប្រតិបត្តិការលើពិភពលោក។

ជាមួយនឹងតម្លៃកាន់តែពិសេស! កក់ទុកមុននូវសមាជិកថ្មីរបស់ OPPO Reno10 Series 5G ទាំងពីរម៉ូដែល Reno10 5G តម្លៃ $399 | Reno10 Pro 5G តម្លៃ $569 ចាប់ពីថ្ងៃទី 7 រហូតដល់ថ្ងៃទី 12 ខែសីហា ឆ្នាំ2023 មានការថែមជូនកាដូតម្លៃ $182 រួមមាន៖ បណ្ណធានាអេក្រង់រយៈពេល1ឆ្នាំ តម្លៃ$89, កាតាបដ៏ស្រស់ស្អាត តម្លៃ$39 និងស៊ីមស្មាតលេខពិសេស Bronze តម្លៃ $54 ភ្ជាប់គម្រោង SurfLikeCrazy រយៈពេល 6ខែ។ តោះចាំអីទៀត!

តម្លៃកាន់តែពិសេស! ស្មាតហ្វូន OPPO Reno10 Series 5G ទទួលកក់ចាប់ពីថ្ងៃទី 7 រហូតដល់ថ្ងៃទី 12 សីហា ដើម្បីទទួលបានកាដូពិសេសៗជាច្រើន

August 7, 2023

ម្ចាស់ Facebook បង្ហើបអំពីការទទួលទានអាហារដើម្បីមានកម្លាំងកាយរឹងមាំ

នាយកប្រតិបត្តិរបស់ Meta ដែលជាក្រុមហ៊ុនមេរបស់ Facebook លោក Mark Zuckerberg ឱ្យដឹងថា គាត់ហូបអាហារប្រមាណ 4,000 កាឡូរីជារៀងរាល់ថ្ងៃ ច្រើនជាង 1.6 ដង បើធៀបនឹងការណែនាំ។

ក្នុងសារដែលបានបង្ហោះលើ Threads កាលពីថ្ងៃទី 01 សីហា លោក Zuckerberg សរសេរថា លោកត្រូវការបរិភោគអាហារច្រើនដើម្បីប៉ះប៉ូវសម្រាប់សកម្មភាពប្រចាំថ្ងៃ ដែលភាគច្រើនគឺការហាត់គុន MMA និងកីឡាមួយចំនួនទៀត។

មុននោះ ម្ចាស់ Facebook បានឱ្យដឹងថា លោកហាត់គុនជូជិតស៊ូ (Jiu-jitsu) និង MMA ពី 3 ទៅ 4 ពេលក្នុងមួយសប្ដាហ៍។ ដូច្នេះ លោកត្រូវការបន្ថែមកាឡូរីឱ្យបានគ្រប់គ្រាន់សម្រាប់សាច់ដុំ និងយកកម្លាំងមកវិញ។

លោក Zuckerberg ក៏បានសរសេរតបនឹង McDonald’s នៅលើ Threads ថា លោកបរិភោគសាច់មាន់ក្រឡុកគ្រឿង 20 ចំណែក, នំប៉័ងសាច់គោ, ដំឡូងបារាំងបំពងមួយចំណែកធំ, Oreo McFlurry និងនំផ្សេងៗ។

Mike Davis ដែលជាអ្នកគុននិយម MMA និងជាមិត្តរបស់ Zuckerberg បានណែនាំថា «មិត្តឯងកំពុងនៅក្នុងមណ្ឌលហ្វឹកហាត់ មិនគួរមាន McDonald’s នៅទីនេះទេ»។

Mark Zuckerberg (ស្ដាំ) ថតរូបជាមួយនឹងគ្រូបង្វឹកក្បាច់គុន Dave Camarillo

Zuckerberg កំពុងបង្កើនការហ្វឹកហាត់ក្បាច់គុននាមួយរយៈពេលចុងក្រោយនេះ បន្ទាប់ពីបានយល់ព្រមជាមួយនឹងការបបួលឡើងសង្វៀនប្រកួតប្រដាល់របស់មហាសេដ្ឋី Elon Musk ដែលជាម្ចាស់បណ្ដាញសង្គម Twitter កាលពីថ្ងៃទី 21 មិថុនា 2023។ អ្នកទាំងពីរបានជ្រើសរើស Las Vegas ជាទីតាំងសម្រាប់ការប្រកួត។ ក៏ប៉ុន្តែ មកដល់ពេលនេះ ពុំទាន់មានសញ្ញាណាមួយបង្ហាញថា ការប្រកួតនេះនឹងកើតឡើងពិតប្រាកដនៅឡើយ៕

August 3, 2023

ចម្លែកមែន! ស្ត្រីម្នាក់មិនបានដេក 40 ឆ្នាំមកហើយ តែនៅមានកម្លាំងដូចធម្មតា

ថ្មីៗនេះ សារព័ត៌មានចិនបានរាយការណ៍ថា មានស្ត្រីម្នាក់ប្រកាសថា មិនបានដេកអស់រយៈពេលប្រហែល 4 ទសវត្សរ៍មកហើយ ប៉ុន្តែមិនមានសភាពងងុយដេក ឬអស់កម្លាំងអ្វីឡើយ។

មនុស្សគ្រប់រូបត្រូវការដំណេកដើម្បីយកកម្លាំងមកវិញ ប៉ុន្តែ Li Zhanying ដែលជាស្ត្រីម្នាក់រស់នៅក្នុងខេត្ត Henan ប្រទេសចិន បានឱ្យដឹងថា បានឆ្លងកាត់ពេលវេលា 40 ឆ្នាំ ដោយមិនបានដេកពួនសោះឡើយ។ នេះគឺជារឿងចម្លែកដែលត្រូវបានបញ្ជាក់ដោយស្វាមីរបស់អ្នកស្រី និងអ្នកជិតខាង។

អ្នកស្រី Li ប្រាប់ថា តាមការចងចាំ គាត់ធ្លាប់បានដេកមួយដំណេកកាលពីអាយុ 5 ឬ 6 ឆ្នាំ។ ក៏ប៉ុន្តែពេលនេះ បើទោះមានអាយុជាង 40 ទៅហើយ ដំណេករបស់អ្នកស្រី គឺនៅសល់តែអនុស្សាវរីយ៍ប៉ុណ្ណោះ។

លោក Liu Suoquin ដែលជាស្វាមីរបស់អ្នកស្រី Li បានប្រាប់ថា តាំងពីពេលរៀបការរួច គាត់មិនដែលឃើញភរិយាខ្លួនដេកនៅពេលយប់នោះទេ ហើយពេលថ្ងៃក៏នៅតែធ្វើការ។ លោក Liu ធ្លាប់បានទិញថ្នាំងងុយដេកឱ្យលេប ប៉ុន្តែក៏មិនបានផល។

យោងតាមទំព័រ Bastille Post អ្នកស្រី Li បានស្វែងរកជំនួយពីវេជ្ជបណ្ឌិតជាច្រើនលើក ដើម្បីដោះស្រាយបញ្ហារបស់ខ្លួន តែវេជ្ជបណ្ឌិតទាំងនោះសុទ្ធតែមិនបានរកឃើញភាពមិនប្រក្រតីទាក់ទងនឹងអាការមិនងងុយដេករបស់គាត់។

ក៏ប៉ុន្តែ បន្ទាប់ពីបានទៅកាន់មជ្ឈមណ្ឌលសុខាភិបាលមួយនៅរដ្ឋធានីប៉េកាំង កាលពីពេលថ្មីៗនេះ អាថ៌កំបាំងស្ដីពីកង្វះដំណេករាប់សិបឆ្នាំរបស់អ្នកស្រី Li ក៏ទទួលបានចម្លើយ។

ក្រោយការតាមដាន 48/48 ម៉ោង ក្រុមវេជ្ជបណ្ឌិតខាងលើបានរកឃើញថា តាមពិត អ្នកស្រី Li នៅតែបានទទួលទានដំណេក ប៉ុន្តែដំណេករបស់គាត់មិនដូចមនុស្សទូទៅ។ ពួកគេរកឃើញថា រាងកាយរបស់អ្នកជំងឺនេះមានចំណុចពិសេសមួយចំនួន អនុញ្ញាតឱ្យស្ថិតក្នុងស្ថានភាពសម្រាកទាំងនៅពេលកំពុងជជែកជាមួយអ្នកនៅជុំវិញ ឬកំពុងធ្វើការ។ ការបិទភ្នែកតែប៉ុន្មាននាទីប៉ុណ្ណោះគឺអាចឱ្យរាងកាយយកកម្លាំងមកវិញបាន។

ក្រុមអ្នកជំនាញបានវិភាគលទ្ធផលនៃការស្កេតខួរក្បាលរបស់ Li ហើយក៏រកឃើញថា ការប្រើប្រាស់កម្លាំងរបស់ Li នៅពេលថ្ងៃ គឺតិចជាងអ្នកដទៃឆ្ងាយណាស់។ ពួកគេថា អ្នកស្រី Li តាមពិត បាន «ចាញ់បោក» ខួរក្បាលខ្លួនឯង។ ពេល Li កំពុងសម្រាក ផ្នែកខ្លះនៃរាងកាយរបស់គាត់ក៏ប្ដូរទៅរកស្ថានភាពដេក ដោយមិនចាំបាច់បិទភ្នែក។

ទោះជាយ៉ាងណាក៏ដោយ នៅមានរឿងជាច្រើនទៀតដែលអ្នកវិទ្យាសាស្ត្របច្ចុប្បន្នមិនអាចបកស្រាយបានទាក់ទងនឹងករណីរបស់អ្នកស្រី Li។ ប៉ុន្តែ យ៉ាងហោចណាស់ក៏ពួកគេអាចបញ្ជាក់បានថា រាងកាយរបស់ស្ត្រីរូបនេះគឺមានសភាពធម្មតា៕

August 2, 2023

អាជ្ញាធរចិនប្រហារជីវិតគ្រូបង្រៀនម្នាក់ដែលបានបំពុលសិស្ស 25 នាក់

អាជ្ញាធរចិនប្រហារជីវិត Wang Yun ជាគ្រូបង្រៀនថ្នាក់មតេ្តយ្យដែលបានដាក់ថ្នាំបំពុលសិស្សចំនួន 25 នាក់កាលពីឆ្នាំ 2019 បណ្ដាលឱ្យកុមារម្នាក់បាត់បង់ជីវិត។

Wang Yun អាយុ 40 ត្រូវបានកាត់ទោសពីបទបំពុលសិស្សរបស់ខ្លួនដោយការដាក់សូដ្យូមនីត្រាតទៅក្នុងអាហាររបស់សិស្ស។ ដំបូងឡើយ Wang Yun ត្រូវបានកាត់ទោសឱ្យជាប់ពន្ធនាគារ 9 ខែ ពីបទមានចេតនាបង្កឱ្យខូចសុខភាពរបស់សិស្ស។ ក៏ប៉ុន្តែ ក្រោយមក កាលពីខែកញ្ញាឆ្នាំ 2020 សាលក្រមតុលាការក៏បានកែប្រែ នាំឱ្យអ្នកគ្រូរូបនេះត្រូវទទួលទោសប្រហារជីវិត។

យោងតាមសេចក្ដីប្រកាសកាលពីថ្ងៃទី 14 កក្កដា 2023 Wang Yun ត្រូវបានប្រហារជីវិតកាលពីថ្ងៃទី 13 កក្កដា 2023 នៅក្នុងទីក្រុង Jiaozuo នៃខេត្ត Henan។ សមត្ថកិច្ចចិនមិនបានបង្ហើបឱ្យដឹងអំពីរបៀបនៃការប្រហារជីវិតនោះទេ នៅក្នុងករណីនេះ។

Wang Yun បានដាក់សូដ្យូមនីត្រាតទៅក្នុងបបរសម្រាប់សិស្សកាលពីថ្ងៃទី 27 មីនា 2019 នៅឯសាលាមត្តេយ្យដែលខ្លួនកំពុងបង្រៀន បន្ទាប់ពីបានប្រកែកគ្នាជាមួយនឹងមិត្តរួមការងារអំពីវិធីគ្រប់គ្រងសិស្ស។ យោងតាមទំព័រ Poison Control ការហូបចាំសូដ្យូមនីត្រាតអាចនាំឱ្យមានបញ្ហាខ្វះអុកស៊ីសែន ថប់ដង្ហើម កន្ត្រាក់ដៃជើង ចង្វាក់បេះដូងមិនប្រក្រតី បាត់បង់ស្មារតី និងអាចបាត់បង់ជីវិត។

ទង្វើរបស់ Wang Yun បាននាំឱ្យសិស្ស 25 នាក់ពុលអាហារ ប៉ុន្តែស្ទើរតែទាំងអស់បានជាសះស្បើយក្រោយការព្យាបាល។ ក៏ប៉ុន្តែ ក្នុងចំណោមនោះមានសិស្សម្នាក់បានស្លាប់ក្នុងឆ្នាំ 2020 បន្ទាប់ពីការព្យាបាលជំងឺខ្សោយគ្រឿងក្នុងដោយសារតែថ្នាំពុលអស់មួយរយៈពេល។

ករណីបំពុលសិស្សខាងលើនេះមិនមែនជាលើកដំបូងឡើយដែល Wang Yun ប្រើប្រាស់សូដ្យូមនីត្រាត។ កន្លងមក ជនដៃដល់នេះក៏ធ្លាប់ដាក់សារធាតុនេះដើម្បីបំពុលប្ដីខ្លួនឯង បណ្ដាលឱ្យមានអាការពុលកម្រិតស្រាលផងដែរ៕

សិស្ស 25 នាក់របស់ Wang Yun បានក្អួតចង្អោរ និងសន្លប់ក្នុងថ្នាក់រៀន បន្ទាប់ពីបានហូបអាហារដែលមានថ្នាំពុលកាលពីខែមីនា 2019

July 15, 2023

រ៉ុក្កែតប្រើប្រាស់ឥន្ធនៈមេតានដំបូងគេលើពិភពលោក ត្រូវបានបាញ់បង្ហោះដោយជោគជ័យ

រ៉ុក្កែត Zhuque-2 របស់ក្រុមហ៊ុនចិន Landspace បានហោះឡើងពីមជ្ឈមណ្ឌលបាញ់បង្ហោះផ្កាយរណប Jiuquan នៅសមុទ្រខ្សាច់ Gobi កាលពីព្រឹកថ្ងៃទី 12 កក្កដា 2023។

អង្គភាពអវកាសអាម៉េរិកបានបញ្ជាក់អំពីសេចក្ដីប្រកាសរបស់ចិន ស្ដីពីការបាញ់បង្ហោះរ៉ុក្កែតឥន្ធនៈមេតាន Zhuque-2 ឡើងដល់គន្លងគោចរ។ នេះគឺជាជោគជ័យរបស់ Zhuque-2 ដោយសារកាលពីថ្ងៃទី 14 ធ្នូ 2022 រ៉ុក្កែតនេះបានទទួលបរាជ័យ និងធ្វើឱ្យបាត់បង់ផ្កាយរណប 14 គ្រឿង។

មេតានត្រូវបានគេសរសើរថាជាឥន្ធនៈដែលបំភាយឧស្ម័នពុលកម្រិតទាប បើធៀបនឹងឥន្ធនៈដែលរ៉ុក្កែតផ្សេងៗកំពុងប្រើប្រាស់។

ក្រុមហ៊ុនអាម៉េរិកជាច្រើនក៏កំពុងតែអភិវឌ្ឍរ៉ុក្កែតមេតាន ក្នុងនោះក៏មាន SpaceX, Blue Origin, Rocket Lab, United Launch និង Relativity Space ជាដើម។

ប្រទេសចិន និងក្រុមហ៊ុនអវកាសឯកជនរបស់ប្រទេសនេះ កំពុងទទួលបានជោគជ័យជាបន្តបន្ទាប់នៅក្នុងការបាញ់បង្ហោះនានា និងបានបំពេញបេសកកម្មឡើងទៅកាន់គន្លងគោចរចំនួន 54 លើក នៅក្នុងឆ្នាំ 2022 ហើយឆ្នាំនេះ ពួកគេគ្រោងនឹងសម្រេចឱ្យបានជាង 60 លើក។

ដោយឡែក ក្រុមហ៊ុនអាម៉េរិក SpaceX គឺជាទីភ្នាក់ងារអវកាសដែលមមាញឹកនឹងការងារជាងគេរបស់សហរដ្ឋអាម៉េរិក ដោយបានបាញ់បង្ហោះរ៉ុក្កែតទៅកាន់អវកាសចំនួន 61 លើក កាលពីឆ្នាំ 2022៕

July 13, 2023

Tag: IU