អង់គ្លេស - La Reine Media

អង្គការរបស់អង់គ្លេស ព្យាករថា វៀតណាមនឹងក្លាយជាប្រទេសមានចំណូលខ្ពស់នៅឆ្នាំ 2045

ដោយមានប្រជាជនច្រើន និងក្មេង វៀតណាមមានឱកាសយកឈ្នះលើប្រទេសស្ទើរតែទាំងអស់នៅក្នុងសមាគមប្រជាជាតិអាស៊ីអាគ្នេយ៍ (ASEAN) ស្ដីពីសេដ្ឋកិច្ច មានដូចជា សិង្ហបុរី ថៃ និងម៉ាឡេស៊ីជាដើម ហើយក្លាយជាប្រទេសមានចំណូលខ្ពស់ចាប់ពីឆ្នាំ 2045។

ថ្មីៗនេះ ជម្ឈមណ្ឌលព្យាករ វិភាគសេដ្ឋកិច្ចឯករាជ្យរបស់អង់គ្លេស (CEBR) បានប្រកាសរបាយការណ៍ទស្សនវិស័យសេដ្ឋកិច្ចពិភពលោកប្រចាំឆ្នាំលើកទី 14 និងបញ្ជីចំណាត់ថ្នាក់សម្ព័ន្ធសេដ្ឋកិច្ចពិភពលោក (World Economic League Table – WELT)។ ក្នុងរបាយការណ៍នេះ CEBR ព្យាករថា វៀតណាមនឹងបោះជំហានយ៉ាងធំនៅ 14 ឆ្នាំទៀត។

ក្នុងឆ្នាំ 2023 កំណើនសេដ្ឋកិច្ចរបស់វៀតណាមមានការកើនឡើង។ ក្នុងនោះ ផលិតផលក្នុងស្រុកសរុប (GDP) កើន 5.05% និងអតិផរណាកើនតែ 3.25%។ GDP របស់ប្រទេសនេះ សម្រេចបានប្រមាណ 430 ពាន់លានដុល្លារអាម៉េរិក ត្រូវជាប់ចំណាត់ថ្នាក់ទី 34 នៅក្នុងបញ្ជីចំណាត់ថ្នាក់របស់ CEBR ក្នុងឆ្នាំ 2023។

សម្រាប់ឆ្នាំ 2024 CEBR ព្យាករថា វៀតណាមអាចនឹងជាប់ចំណាត់ថ្នាក់ទី 33 ក្នុងបញ្ជីចំណាត់ថ្នាក់ WELT ដោយកើនឡើងមួយថ្នាក់ បើធៀបនឹងរបាយការណ៍ឆ្នាំ 2023។ GDP ឆ្នាំ 2024 របស់ប្រទេសនេះ នឹងសម្រេចបាន 462 ពាន់លានដុល្លារអាម៉េរិក (គិតក្នុងតម្លៃបច្ចុប្បន្ន)។

របាយការណ៍របស់ CEBR បានវាយតម្លៃថា ចំណាត់ថ្នាក់នៃទំហំសេដ្ឋកិច្ចរបស់វៀតណាម អាចកើនឡើងខ្ពស់យ៉ាងលឿនក្នុងអនាគត។ វៀតណាមនឹងជាប់ចំណាត់ថ្នាក់ទី 24 នៅក្នុងឆ្នាំ 2033 ដោយទំហំសេដ្ឋកិច្ចនឹងសម្រេចបាន 1,050 ពាន់លានដុល្លារ។

ដល់ឆ្នាំ 2038 GDP របស់ប្រទេសជិតខាងកម្ពុជាមួយនេះ គ្រោងនឹងសម្រេចបាន 1,559 ពាន់លានដុល្លារអាម៉េរិក ត្រូវជាប់ចំណាត់ថ្នាក់ទី 21 ដែលយកឈ្នះលើខឿនសេដ្ឋកិច្ចធំៗនៅអាស៊ាន មានដូចជា ថៃ (1,313 ពាន់លានដុល្លារ), សិង្ហបុរី (896 ពាន់លានដុល្លារ), ហ្វ៊ីលីពីន (1,536 ពាន់លានដុល្លារ) ហើយឡើងដល់ក្រុមប្រទេសទាំង 25 ដែលមានសេដ្ឋកិច្ចធំជាងគេលើពិភពលោក។

យោងតាម CEBR វៀតណាម ដែលមានប្រជាជនច្រើន និងក្មេង នឹងមានឱកាសយកឈ្នះលើប្រទេសស្ទើរតែទាំងអស់នៅក្នុងសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន (ASEAN) ស្ដីពីទំហំសេដ្ឋកិច្ច មានដូចជា ប្រទេសសិង្ហបុរី ថៃ និងម៉ាឡេស៊ីជាដើម ហើយក្លាយជាប្រទេសមានចំណូលខ្ពស់ចាប់ពីឆ្នាំ 2045៕

January 3, 2024

ទិដ្ឋភាព «ដូចឋាននរក» ក្នុងយន្តហោះជប៉ុនដែលកំពុងឆាបឆេះ

អ្នកដំណើរឱ្យដឹងថា គ្រប់គ្នារន្ធត់ខ្លាំងណាស់ នៅពេលផ្សែងចូលដល់ខាងក្នុងយន្តហោះរបស់ Japan Airlines មុនពេលត្រូវបានណែនាំឱ្យរត់ចេញពីអគ្គិភ័យដោយទោងរំអិល។

យន្តហោះ Airbus A350-900 របស់ក្រុមហ៊ុនអាកាសចរណ៍ជប៉ុន Japan Airlines (JAL) កាលពីថ្ងៃទី 02 មករា 2024 បានឆាបឆេះយ៉ាងសន្ធោសន្ធៅ នៅពេលប៉ះទង្គិចនឹងយន្តហោះរបស់កងកម្លាំងល្បាតសមុទ្រជប៉ុន (JCG) នៅលើផ្លូវរត់ក្នុងព្រលានយន្តហោះ Haneda នៅរាជធានីតូក្យូ។

វីដេអូដែលអ្នកដំណើរថតបានពីក្នុងយន្តហោះបង្ហាញថា អណ្ដាតភ្លើងឆាបឆេះនៅចំហៀងខាងឆ្វេងរបស់យន្តហោះ នៅពេលវាត្រៀមចុះចត ហើយក៏ប៉ះទង្គិចជាមួយយន្តហោះរបស់ JCG ដែលកំពុងរត់លើផ្លូវដើម្បីត្រៀមហោះឡើង។ ហេតុការណ៍ប៉ះគ្នានេះទំនងជាបានបណ្ដាលឱ្យបំពង់ឥន្ធនៈរបស់យន្តហោះត្រូវដាច់ នាំឱ្យអគ្គិភ័យកើតឡើង។

អ្នកដំណើរឱ្យដឹងថា សំឡេងផ្ទុះបានលាន់ឡើងក្នុងពេលយន្តហោះចុះចត។ «ក្នុងកាប៊ីនយន្តហោះពេញដោយផ្សែង…ដូចទៅនឹងឋាននរក» Anton Deibe អ្នកដំណើរជនជាតិស៊ុយអែត វ័យ 17 ឆ្នាំ រៀបរាប់ដូច្នេះក្រោយពីបានឆ្លងកាត់ហេតុការណ៍ខាងលើ។

ពេលនោះ ស្ថានភាពច្របូកច្របល់នាំឱ្យអ្នកដំណើរភ័យរន្ធត់ខ្លាំង។ អ្នកខ្លះចាប់យកម៉ាសមកពាក់ អ្នកខ្លះយកក្រណាត់បិទច្រមុះដើម្បីទប់ទល់នឹងផ្សែង គ្រាដែលអ្នកខ្លះស្រែកឡើងក្នុងភាពភ័យខ្លាច។ អ្នកបម្រើលើយន្តនៅតែមានស្មារតីនឹងនរ និងណែនាំឱ្យអ្នកដំណើរឱនចុះ បិទច្រមុះ និងមាត់ ក្នុងពេលរង់ចាំដល់ពេលយន្តហោះឈប់នៅមួយកន្លែង។

ខាងក្រៅយន្តហោះ កងកម្លាំងពន្លត់អគ្គិភ័យក៏បានមកដល់កន្លែងកើតហេតុ និងចាប់ផ្ដើមការសង្គ្រោះ។

អ្នកដំណើរម្នាក់ឈ្មោះ Satoshi Yamake អាយុ 59 ឆ្នាំ បានឱ្យដឹងថា ពេលយន្តហោះឈប់នៅមួយកន្លែងភ្លាម អ្នកបម្រើលើយន្តហោះក៏ប្រញាប់ទម្លាក់ទោងរំអិលដើម្បីឱ្យអ្នកដំណើរទម្លាក់ខ្លួនមកក្រៅ ក្នុងគ្រាអណ្ដាតភ្លើងកំពុងឆាបឆេះនៅចំហៀងខាងឆ្វេងរបស់យន្តហោះ។

អ្នកដំណើរ 367 នាក់ និងសមាជិកក្រុមហោះហើរចំនួន 12 នាក់ បានជម្លៀសខ្លួនដោយជោគជ័យ មុនពេលអណ្ដាតភ្លើងលេបត្របាក់យន្តហោះទាំងមូល ប៉ុន្តែមានមនុស្ស 17 នាក់បានរងរបួស។

សាស្ត្រាចារ្យ Graham Braithwaite អ្នកជំនាញផ្នែកស៊ើបអង្កេតគ្រោះថ្នាក់ នៅសាកលវិទ្យាល័យ Cranfield របស់អង់គ្លេស ឱ្យដឹងថា ករណីឆេះយន្តហោះនេះកើតឡើងដោយសារការលេចធ្លាយឥន្ធនៈ។

ក្រុមមន្ត្រីជប៉ុន និងអ្នកជំនាញនៅប្រទេសអង់គ្លេស បញ្ជាក់ថា ក្រុមហោះហើរបំពេញភារកិច្ចបានល្អ និងត្រូវតាមវិធីសាស្ត្រ។

ចំណែក JCG វិញ ឱ្យដឹងថា មនុស្ស 5 នាក់ក្នុងចំណោម 6 នាក់ ដែលនៅលើយន្តហោះរបស់ពួកគេ បានបាត់បង់ជីវិត នៅក្នុងហេតុការណ៍ប៉ះគ្នានេះ ខណៈប្រធានក្រុមនៅមានជីវិត ប៉ុន្តែរងរបួសធ្ងន់ធ្ងរ។

សារព័ត៌មានជប៉ុនបានផ្សាយថា JCG បានជួបគ្រោះថ្នាក់នៅពេលត្រៀមហោះឡើងដើម្បីទៅជួយជនរងគ្រោះក្នុងហេតុការណ៍រញ្ជួយដីកម្លាំង 7.6 រិចទ័រ ដែលកើតឡើងនៅភាគកណ្ដាលប្រទេសជប៉ុន កាលពីថ្ងៃទី 01 មករា ឆ្នាំ 2024៕

January 3, 2024

មហាសេដ្ឋីរូបណាដែលមានទ្រព្យច្រើនជាងគេនៅប្រទេសចិន ក្នុងឆ្នាំ 2023?

ក្នុងបញ្ជីចំណាត់ថ្នាក់មហាសេដ្ឋីកំពូលៗនៅប្រទេសចិន ដែលគិតត្រឹមថ្ងៃទី 11 ធ្នូ ឆ្នាំ 2023 របស់ទស្សនាវដ្ដី Forbes មានមហាសេដ្ឋីបច្ចេកវិទ្យាចំនួន 5 រូប និង 3 រូបក្នុងវិស័យរថយន្ត។

នៅក្នុងឆ្នាំ 2023 នេះ មហាសេដ្ឋីដែលធ្លាប់ជាអ្នកមានជាងគេនៅប្រទេសចិន គឺលោក Jack Ma បានស្ថិតក្នុងចំណាត់ថ្នាក់ទី 6 ដោយមានទ្រព្យសរុប 24.4 ពាន់លានដុល្លារអាម៉េរិក។

លោក Ma ដែលធ្លាប់ជាគ្រូបង្រៀនភាសាអង់គ្លេស បច្ចុប្បន្នមានអាយុ 58 ឆ្នាំ។ លោកគឺជាសហស្ថាបនិកនៃក្រុមហ៊ុន Alibaba ដែលបច្ចុប្បន្នគឺជាមួយក្នុងចំណោមក្រុមហ៊ុនគ្រប់គ្រងផ្សារអនឡាញធំជាងគេនៅប្រទេសចិន។

លោក Ma បានលាឈប់ពីតំណែងនាយកប្រតិបត្តិរបស់ Alibaba កាលពីឆ្នាំ 2019។ ក្រោយការរស់នៅឯបរទេសប្រហែលមួយឆ្នាំ លោកក៏ត្រលប់ទៅកាន់ប្រទេសចិន កាលពីខែមីនា 2023 ក្នុងពេល Alibaba បង្ហើបឱ្យដឹងអំពីគម្រោងបំបែកខ្លួនជា 6 ក្រុមហ៊ុន។ លោក Ma មានភាគហ៊ុនចំនួន 3.9% នៅក្នុង Alibaba និងភាគហ៊ុននៅក្នុងបណ្ដាក្រុមហ៊ុនកម្សាន្តមួយចំនួន មានដូចជា Beijing Enlight Media និង Huayi Brothers ជាដើម។

ក្រុមហ៊ុន Alibaba បានចាប់ផ្ដើមធ្លាក់ដុនដាប បន្ទាប់ពីលោក Ma បាននិយាយរិះគន់គោលនយោបាយខ្លះរបស់រដ្ឋាភិបាលចិន ដែលដឹកនាំដោយប្រធានាធិបតី Xi Jinping។

ចំណែកមហាសេដ្ឋីដែលមានទ្រព្យច្រើនជាងគេនៅប្រទេសចិន ប្រចាំឆ្នាំ 2023 គឺលោក Zhong Shanshan។ លោកគឺជាស្ថាបនិកនៃក្រុមហ៊ុនផលិតទឹកសុទ្ធ Nongfu Spring។ លោក Shanshan កើតឆ្នាំ 1954 នៅទីក្រុង Hangzhou ខេត្ត Zhejiang ប្រទេសចិន និងបានឈប់រៀនពេលមានអាយុ 12 ឆ្នាំ ព្រោះតែបញ្ហាគ្រួសារ។ ពេញមួយទសវត្សរ៍ក្រោយមក លោកធ្វើជាកម្មករសំណង់ និងសិក្សារហូតដល់បានចូលរៀននៅមហាវិទ្យាល័យ ក្រោយពីប្រឡងធ្លាក់ពីរលើក។

ចំណាត់ថ្នាក់ទីពីរក្នុងបញ្ជីនេះ គឺមហាសេដ្ឋី Colin Huang អាយុ 43 ឆ្នាំ ដោយមានទ្រព្យ 49 ពាន់លានដុល្លារអាម៉េរិក។ លោកគឺជាស្ថាបនិករបស់ PDD Holdings ដែលនៅពីក្រោយផ្សារអនឡាញ Pinduoduo។

ចំណាត់ថ្នាក់ទីបី បានទៅលើ Zhang Yiming អាយុ 40 ឆ្នាំ ជាស្ថាបនិករបស់ ByteDance ដែលជាក្រុមហ៊ុនមេរបស់ TikTok។ លោក Yiming មានទ្រព្យ 43.4 ពាន់លានដុល្លារអាម៉េរិក។

ចំណាត់ថ្នាក់ទីបួន បានទៅលើ Ma Huateng (Pony Ma) អាយុ 51 ឆ្នាំ ជាប្រធានក្រុមហ៊ុនអ៊ីនធើណិតចិន Tencent Holdings។

ខាងក្រោមនេះគឺជាមហាសេដ្ឋីដែលមានឈ្មោះក្នុងបញ្ជីចំណាត់ថ្នាក់មហាសេដ្ឋី 10 រូបនៅប្រទេស របស់ Forbes ៖

5 – William Ding

ទ្រព្យ៖ 33.1 ពាន់លានដុល្លារអាម៉េរិក
វិស័យជំនួញ៖ បច្ចេកវិទ្យា

7 – Robin Zeng

ទ្រព្យ៖ 24.1 ពាន់លានដុល្លារអាម៉េរិក
វិស័យ៖ រថយន្ត

8 – He Xiangjian និងគ្រួសារ

ទ្រព្យ៖ 21.2 ពាន់លានដុល្លារអាម៉េរិក
វិស័យ៖ ផលិតសម្ភារៈប្រើប្រាស់ក្នុងផ្ទះ

9 – Wang Chuanfu

ទ្រព្យ៖ 15.1 ពាន់លានដុល្លារអាម៉េរិក
វិស័យ៖ រថយន្ត

10 – Eric Li

ទ្រព្យ៖ 15.1 ពាន់លានដុល្លារអាម៉េរិក
វិស័យ៖ រថយន្ត

December 13, 2023

ប្រទេសចំនួន 7 រួមដៃគ្នាបាញ់បង្ហោះយានទៅចុះចតលើផ្ទៃព្រះចន្ទនាពេលឆាប់ៗនេះ

នៅរាត្រីបុណ្យណូអែល ថ្ងៃទី 24 ធ្នូ 2023 យានអវកាសមួយគ្រឿងនឹងត្រូវបានបាញ់បង្ហោះឡើងទៅកាន់ឋានព្រះចន្ទ ដើម្បីបំពេញបេសកកម្មពាណិជ្ជកម្មមួយដែលមិនធ្លាប់មានក្នុងប្រវត្តិសាស្ត្រនាពេលកន្លង។ នេះបើតាម Space.com ដែលបានចុះផ្សាយកាលពីដើមខែនេះ។

យានអវកាសនេះមានឈ្មោះថា យានចុះចតឋានព្រះចន្ទ Peregrine (ឬហៅថា ស្ទាំងទេព របស់ផែនដី) ដែលដាក់ឈ្មោះទៅតាមឈ្មោះសត្វស្ទាំង Peregrine ដែលហោះលឿនជាងគេលើពិភពលោក។

បើសិនគ្រប់យ៉ាងដំណើរការរលូនទៅតាមផែនការ «ស្ទាំងទេព» របស់ផែនដី នឹងចុះចតលើផ្ទៃព្រះចន្ទ ត្រង់តំបន់ដែលមានជ្រលងកម្អែភ្នំភ្លើងបុរាណនៅលើឋានព្រះចន្ទ ដែលត្រូវបានហៅថា Sinus Viscositatis។

បេសកកម្មនេះនឹងត្រូវបានកត់ត្រាក្នុងប្រវត្តិសាស្ត្រ ព្រោះវាជាបេសកកម្មដំបូងដែលបាញ់បង្ហោះទៅតាមគំនិតផ្ដួចផ្ដើម សេវាកម្មដឹកជញ្ជូនបែបពាណិជ្ជកម្មឡើងទៅកាន់ឋានព្រះចន្ទ (CLPS) របស់ទីភ្នាក់ងារអវកាសអាម៉េរិក (NASA)។ នេះក៏ជាលើកដំបូងដែលបច្ចេកវិទ្យារបស់ប្រទេសចំនួន 7 ត្រូវបានបាញ់បង្ហោះរួមគ្នាឡើងទៅកាន់ផ្ទៃព្រះចន្ទ។

ទំនិញចំនួន 20 ចំណែក មកពី 7 ប្រទេស នឹងត្រូវបាន «ស្ទាំងទេព» Peregrine នាំឡើងទៅកាន់ទីឋានរណបរបស់ផែនដី។ ក្នុងនោះ ទំនិញ 5 ចំណែកមកពី សហរដ្ឋអាម៉េរិក។ ក្រៅពីនេះ គឺជាទំនិញរបស់ អង់គ្លេស ម៉ិចស៊ិច អាល្លឺម៉ង់ ហុងគ្រី ជប៉ុន និងប្រទេសសីស្ហែល (Seychelles) នៅទ្វីបអាហ្វ្រិក។

ដោយការប្រើប្រាស់បច្ចេកវិទ្យាទំនើបចុងក្រោយ បេសកកម្មស្រាវជ្រាវឋានព្រះចន្ទរបស់ប្រទេសចំនួន 7 នេះ ត្រូវបានរំពឹងថា នឹងនាំមកនូវព័ត៌មាន/ទិន្នន័យសំខាន់ៗសម្រាប់អ្នកវិទ្យាសាស្ត្រ។

តាមគម្រោង យានចុះចត Peregrine នឹងធ្វើដំណើរតាមរយៈជើងហោះហើរដំបូងរបស់រ៉ុក្កែត Vulcan Centaur ដែលផលិតដោយក្រុមហ៊ុនអាម៉េរិក United Launch Alliance៕

December 11, 2023

ភ្ញៀវទេសចរណ៍បរទេសមកទស្សនាកម្ពុជា កើនឡើងកាន់តែខ្ពស់

នៅក្នុងរយៈពេល 10 ខែដំបូងនៃឆ្នាំ 2023 នេះ កម្ពុជាបានទទួលភ្ញៀវបរទេសជាង 4 លាននាក់ កើនឡើងច្រើនបើធៀបនឹងដំណាក់កាលដូចគ្នាក្នុងឆ្នាំកន្លង។

យោងតាមទិន្នន័យពីក្រសួងទេសចរណ៍ ដែលបានចេញផ្សាយកាលពីចុងសប្ដាហ៍កន្លង ក្នុង 10 ខែដំបូងនៃឆ្នាំ 2023 មានទេសចរបរទេសជាង 4.4 លាននាក់មកទស្សនាកម្ពុជា ដែលតួលេខនេះកើន 179.7% បើធៀបនឹង 10 ខែដំបូងនៃឆ្នាំ 2022។ ក្រសួងឱ្យដឹងថា ទេសចរថៃរួមចំណែករហូតដល់ 1 លាននាក់ ស្មើនឹង 34.1% នៃចំនួនភ្ញៀវបរទេសសរុប ខណៈដែលវៀតណាមរួមចំណែកជាង 8 សែននាក់ ស្មើនឹង 18.7% ស្របពេលដែលចិនរួមចំណែកជាង 4 សែននាក់ ស្មើនឹង 10.3%។

ដោយឡែក ក្នុងខែតុលា កម្ពុជាបានទទួលភ្ញៀវទេសចរណ៍បរទេសចំនួនជាង 480,000 នាក់ កើន 54.9% បើធៀបនឹងខែតុលាឆ្នាំកន្លង។

ក្រៅពីភ្ញៀវមកពីប្រទេសថៃ វៀតណាម និងចិន ពលរដ្ឋនៃប្រទេសមួយចំនួនផ្សេងទៀតក៏រួមចំណែកច្រើននៅក្នុងកំណើនទេសចរបរទេសរបស់កម្ពុជា មានជាអាទិ៍ ឡាវ អាម៉េរិក កូរ៉េខាងត្បូង ឥណ្ឌូណេស៊ី បារាំង អង់គ្លេស និងអូស្ត្រាលី ជាដើម។

លោក ខៀវ ធី ប្រធានសមាគមមគ្គុទ្ទេសក៍ទេសចរខ្មែរអង្គរ (KATGA) យល់ថា យុទ្ធសាស្ត្រឃោសនា និងទាក់ទាញ់វិនិយោគពីបរទេសមកកាន់កម្ពុជា របស់រាជរដ្ឋាភិបាល បាន និងកំពុងដើរតួនាទីសំខាន់នៅក្នុងការជំរុញកំណើនវិស័យទេសចរណ៍។

«ការបើកដំណើរការព្រលានយន្តហោះអន្តរជាតិសៀមរាបអង្គរ និងការដាក់ចេញគោលនយោបាយជំរុញកំណើនវិស័យទេសចរណ៍ នឹងបន្តជួយអូសទាញភ្ញៀវបរទេសបន្ថែមទៀត» លោក ខៀវ ធី ថ្លែងដូច្នេះ។

យោងតាមក្រសួងទេសចរណ៍ កាលពីឆ្នាំ 2022 កម្ពុជាបានទទួលភ្ញៀវទេសចរណ៍បរទេសជិត 2.28 លាននាក់ កើន 1,059% បើធៀបនឹងឆ្នាំ 2021។ ក្នុងនោះ ទេសចរពីប្រទេសថៃ វៀតណាម ឡាវ និងចិន រួមចំណែក 1,516,855 នាក់ ស្មើនឹង 66.62% ធៀបនឹងភ្ញៀវបរទេសសរុប៕

November 30, 2023

ភពចំនួនពីរដែលអាចមានអរិយធម៌ជឿនលឿនជាងផែនដីប្រាំពាន់លានឆ្នាំ

ការសិក្សាស្រាវជ្រាវមួយរបស់អង់គ្លេសបានបង្ហាញទីតាំងដែលកំពុងលាក់បាំងភពក្រៅប្រព័ន្ធព្រះអាទិត្យយ៉ាងតិចពីរ ដែលមានទ្វីប «ចាស់» ជាងផែនដីរហូតដល់ប្រាំពាន់លានឆ្នាំ និងអាចមានជីវិតដែលជឿនលឿនជាងមនុស្ស។

ក្រុមអ្នកវិទ្យាសាស្ត្រមកពីសាកលវិទ្យាល័យ Cardiff (អង់គ្លេស) បានឱ្យដឹងថា នៅជុំវិញផ្កាយពីរដួងដែលមានឈ្មោះថា HD 76932 និង HD 201991 អាចមានលាក់បាំងភពយ៉ាងតិចពីរដែលកកើតទ្វីបមុនផែនដីរហូតដល់ចាប់ពី 4 ទៅ 5 ពាន់លានឆ្នាំ។

យោងតាម Live Science ខាងលើនេះគឺជាលទ្ធផលនៃការចម្រាញ់ពីផ្កាយ 29 ដួងដែលត្រូវបានចាត់ទុកថា មានសក្ដានុពលក្នុងការគាំទ្រឱ្យមានការកកើតភពទាំងឡាយដែលអាចទ្រទ្រង់ជីវិត។

ជាងនេះទៀត ក្រុមអ្នកស្រាវជ្រាវនេះក៏ជឿថា ភពដែលវិលជុំវិញផ្កាយ HD 76932 និង HD 201991 ទំនងជាមានជីវមណ្ឌល (Biosphere) ជឿនលឿនជាងផែនដីទៅទៀត។ ប្រការនេះនាំឱ្យមានការរំពឹងថា រយៈពេលពីបួនដល់ប្រាំពាន់លានឆ្នាំ បានអនុញ្ញាតឱ្យភពទាំងនេះមានភាវៈរស់ ឬមានអរិយធម៌ជឿនលឿនជាងអ្វីដែលកំពុងកើតមាននៅលើផែនដី។

ក្រុមស្រាវជ្រាវកំណត់បាន «ដែនដីដែលមានសក្ដានុពល» សម្រាប់ភាវៈរស់នេះ តាមរយៈការរកឃើញអ៊ុយរ៉ាញ៉ូម-239 និងប៉ូតាស្យូមក្នុងបរិមាណច្រើន ដែលមាននៅក្នុងផ្កាយទាំងពីរដួងខាងលើ ក៏ដូចជាអាយុរបស់ផ្កាយដែលត្រូវបានវាស់ស្ទង់ដោយផ្កាយរណប Gaia របស់ទីភ្នាក់ងារអវកាសអឺរ៉ុប (ESA)។

យោងតាមរបាយការណ៍នៅលើ Research Notes of the American Astronomical Society ផ្កាយ HD 76932 និងផ្កាយ HD 201991 មានចម្ងាយពីផែនដីប្រហែល 70 និង 110 ឆ្នាំពន្លឺ (មួយឆ្នាំពន្លឺមានចម្ងាយប្រហែល 9.46 (9,460,000,000,000) ទ្រីលានគីឡូម៉ែត្រ) និងស្ថិតតំបន់ជាយរបស់កាឡាក់ស៊ីមីលគីវ៉េ។ ផែនដីរបស់មនុស្សក៏ស្ថិតនៅក្នុងតំបន់ក្បែរជាយកាឡាក់ស៊ីនេះផងដែរ៕

November 10, 2023

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

វៀតណាមចង់ទិញម៉ាស៊ីនព្យាបាលជំងឺមហារីកទំនើបចុងក្រោយបង្អស់ តម្លៃជាងមួយរយលានដុល្លារអាម៉េរិក/គ្រឿង

ប្រធានមន្ទីរពេទ្យជោរៃរបស់វៀតណាម បានដាក់សំណើទិញម៉ាស៊ីនវិទ្យុសកម្មប្រូតុងដើម្បីព្យាបាលជំងឺមហារីក ចំនួនពីរគ្រឿង សម្រាប់រដ្ឋធានីហាណូយ និងទីក្រុងហូជីមិញ ក្នុងនោះ ម៉ាស៊ីននេះមានតម្លៃយ៉ាងតិចប្រហែលពី 101,719,000.00 ដុល្លារអាម៉េរិក។

នេះគឺជាម៉ាស៊ីនបាញ់កាំរស្មីពីក្រៅទំនើបបំផុតនាបច្ចុប្បន្ន ដែលអនុញ្ញាតឱ្យបាញ់វិទ្យុសកម្មសមស្រប និងសុក្រឹតទៅកាន់ដុំគីស សូម្បីតែពួកវាមានរូបរាងស្មុគស្មាញ និងស្ថិតនៅក្បែរអវយវៈមិនមានជំងឺ និងងាយប្រតិកម្ម។ វិធីសាស្ត្រនេះនឹងដោះស្រាយបាននូវចំណុចអវិជ្ជមាននៃការព្យាបាលដោយម៉ាស៊ីនបង្កើនល្បឿនលីនេអ៊ែរ LINAC (Linear Accelerator) ដែលអាចបង្កផលប៉ះពាល់ច្រើន។

ការព្យាបាលដោយម៉ាស៊ីនបង្កើនល្បឿនលីនេអ៊ែរ Linear Accelerator (ឆ្វេង) អាចបង្កផលប៉ះពាល់ច្រើន បើធៀបនឹងម៉ាស៊ីនវិទ្យុសកម្មប្រូតុង (ស្ដាំ)

ការស្រាវជ្រាវមួយបង្ហាញថា វៀតណាមមានអ្នកជំងឺមហារីកប្រមាណ 9,000 នាក់ ដែលត្រូវការការព្យាបាលដោយម៉ាស៊ីនបច្ចេកវិទ្យាថ្មីបំផុតនេះ។ បន្ទប់វិទ្យុសកម្មប្រូតុងមួយអាចព្យាបាលអ្នកជំងឺប្រហែល 300 នាក់ ក្នុងមួយឆ្នាំ ដូច្នេះ វៀតណាម ត្រូវការម៉ាស៊ីនទំនើបចុងក្រោយនេះប្រហែល 30 គ្រឿង។ ក៏ប៉ុន្តែ បច្ចុប្បន្ន ប្រទេសនេះមិនទាន់មានមួយគ្រឿងណានៅឡើយ។

មូលហេតុនេះហើយ ក្នុងកិច្ចប្រជុំមួយនៅសភាជាតិវៀតណាម កាលពីថ្ងៃទី 01 វិច្ឆិកា ប្រធានមន្ទីរពេទ្យជោរៃ លោក ង្វៀន ទ្រីធឹក យល់ថា ការបំពាក់ម៉ាស៊ីនវិទ្យុសកម្មប្រូតុងគឺជារឿងចាំបាច់ និងបន្ទាន់។ លោកបានដាក់សំណើទិញម៉ាស៊ីនវិទ្យុសកម្មប្រូតុងដើម្បីព្យាបាលជំងឺមហារីក ចំនួនពីរគ្រឿង សម្រាប់រដ្ឋធានីហាណូយ និងទីក្រុងហូជីមិញ ក្នុងនោះ ម៉ាស៊ីនមួយគ្រឿងៗមានតម្លៃប្រហែលពី 101,719,000.00 ទៅ 122,062,800.00 ដុល្លារអាម៉េរិក។

ម៉ាស៊ីនវិទ្យុសកម្មប្រូតុងមួយគ្រឿងមានតម្លៃប្រហែលពី 101,719,000.00 ទៅ 122,062,800.00 ដុល្លារអាម៉េរិក

បច្ចុប្បន្ន នៅលើពិភពលោកមានមជ្ឈមណ្ឌលព្យាបាលជំងឺមហារីកជាង 120 កន្លែង កំពុងប្រើប្រាស់ម៉ាស៊ីនវិទ្យុសកម្មប្រូតុង។ បណ្ដាប្រទេសអភិវឌ្ឍលើពិភពលោក មានជាអាទិ៍ សហរដ្ឋអាម៉េរិក ជប៉ុន អាល្លឺម៉ង់ បារាំង អង់គ្លេស រុស្ស៊ី ចិន និងប្រទេសមួយចំនួននៅអាស៊ីអាគ្នេយ៍ (សិង្ហបុរី និងថៃ) សុទ្ធតែមានម៉ាស៊ីនទំនើបនេះ៕

November 2, 2023

«អ៊ីស្រាអែលទទួលបានការទទួលស្គាល់ពីអាម៉េរិកក្រោយពីរពាន់ឆ្នាំ» ព្រោះតែមនោសញ្ចេតនា

Eddie Jacobson មិនធ្លាប់ស្នើសូមជំនួយពីមិត្តជិតស្និទ្ធដែលជាប្រធានាធិបតីអាម៉េរិក Harry Truman ម្ដងណាឡើយ ប៉ុន្តែនៅខែមីនា 1948 លោក Eddie បានសូមជំនួយបន្ទាន់ជាលើកដំបូង។

ក្នុងកិច្ចប្រជុំនៅឯការិយាល័យរាងពងក្រពើ (The Oval Office) ក្នុងសេតវិមាន កាលពីព្រឹកថ្ងៃទី 13 មីនា 1948 លោក Eddie Jacobson បានស្នើសូមឱ្យប្រធានាធិបតីអាម៉េរិក Truman ជួបពិភាក្សាជាមួយនឹង លោក Chaim Weizmann ដែលជាអតីតមេដឹកនាំរបស់អង្គការហ្ស៊ីយ៉ូនពិភពលោក (World Zionist Organization) និងជាមេដឹកនាំផ្នែកស្មារតីរបស់ចលនានេះ ដើម្បីទទួលស្គាល់រដ្ឋជ្វីហ្វ (អ៊ីស្រាអែល) ជាលើកដំបូងក្រោយរយៈពេលជិត 2,000 ឆ្នាំ។

«លោកត្រូវតែជួបបណ្ឌិត Weizmann។ លោកត្រូវតែគាំទ្ររដ្ឋជ្វីហ្វមួយដែលឯករាជ» លោក Jacobson ដែលជាអ្នកជំនួញអាម៉េរិកដើមកំណើតជ្វីហ្វ បាននិយាយដូច្នេះជាមួយលោក Truman ដែលជាប្រធានាធិបតីទី 33 របស់សហរដ្ឋអាម៉េរិក។

សំណើនេះធ្វើឱ្យប្រធានាធិបតី Truman មិនសប្បាយចិត្ត និងខឹងសម្បា។ យោងតាមប្រវត្តិវិទូនានា លោក Truman ធ្លាប់រិះគន់ជនជាតិជ្វីហ្វនៅក្នុងការពិភាក្សាលក្ខណៈបុគ្គលជាច្រើនលើក។ ក្រោយមក លោក Jacobson ក៏សម្លឹងឃើញរូបសំណាកមួយដែលឆ្លាក់រូបប្រធានាធិបតី Andrew Jackson នៅលើខ្នងសេះ ដែលដាក់តាំងក្នុងបន្ទប់ ហើយក៏សម្រេចចិត្តស្នើសូមម្ដងទៀត។

«Harry លោកមានវីរបុរសមួយរូប គឺ Andrew Jackson។ ខ្ញុំក៏មានវីរបុរសមួយរូបដែរ នោះគឺ Chaim Weizmann» លោក Jacobson និយាយដូច្នេះ និងបន្តថា «គាត់គឺជាជនជាតិជ្វីហ្វដ៏អស្ចារ្យបំផុតក្នុងសម័យរបស់គាត់។ Weizmann មានវ័យចំណាស់ និងរាងកាយស្គមខ្សោយ ប៉ុន្តែបានធ្វើដំណើរផ្លូវឆ្ងាយដើម្បីជួបលោក បែបនេះហើយ តើលោកមិនយល់ព្រមជួបគាត់ទៀតទេអី? ប្រការនេះមិនដូចលោកបន្តិចទាល់តែសោះ»។

លោក Truman យកម្រាមដៃគោះលើតុ រួចបង្វិលកៅអីមកវិញ។ លោកក៏បានផ្លាស់ប្ដូរការសម្រេចចិត្ត។ «បានហើយ លោកទំពែកក្បាលរឹង។ លោកឈ្នះ។ ខ្ញុំនឹងជួប Weizmann»។

ការយល់ព្រមខាងលើបាននាំឱ្យមានជំនួបជាសម្ងាត់វាងលោក Truman និង Weizmann នាប៉ុន្មានថ្ងៃក្រោយមក ក្នុងនោះ ប្រធានាធិបតីអាម៉េរិកបានសន្យាថា នឹងគាំទ្រដល់កិច្ចខិតខំបង្កើតរដ្ឋអ៊ីស្រាអែល។

ប្រធានាធិបតីអាម៉េរិក Harry S. Truman (ឆ្វេង) និងលោក Eddie Jacobson នៅ Kansas រដ្ឋ Missouri កាលពីខែធ្នូ ឆ្នាំ 1947

មនោសញ្ចេតនាមរវាងលោក Truman និង Jacobson បានចាប់ផ្ដើមនៅឯទីក្រុង Kansa រដ្ឋ Missouri ។ Jacobson កើតឆ្នាំ 1891 ហើយធំដឹងក្ដីនៅតំបន់ Lower East Side ក្នុងទីក្រុង New York City មុនពេលរើទៅរស់នៅក្នុងទីក្រុង Kansas។ ឪពុកម្ដាយរបស់លោក Jacobson គឺជាជនជាតិជ្វីហ្វដ៏ក្រីក្រ មកពីលីទុយអានី (Lithuania)។

ឆ្នាំ 1906 Jacobson ដែលមានវ័យ 15 ឆ្នាំ និងបានឈប់រៀន កំពុងតែផ្ញើវិក្កយបត្រទូទាត់ប្រាក់ទៅឱ្យហាងទំនិញមួយនៅក្បែរធនាគារជាតិ Union ក៏បានជួប Truman ដែលពេលនោះជាបុគ្គលិកឃ្លាំងប្រាក់ និងមានអាយុ 22 ឆ្នាំ។ ពួកគេបានភ្ជាប់ទំនាក់ទំនងនឹងគ្នាជាថ្មីនៅឆ្នាំ 1917 ក្នុងតំបន់ Fort Sill រដ្ឋ Oklahoma ជាទីដែលពួកគេត្រូវបានបង្វឹកដើម្បីចូលរួមធ្វើសកម្មភាពក្នុងសង្គ្រាមលោកលើកទីមួយ។ ពួកគេបានក្លាយជាមិត្ត និងរួមគ្នាគ្រប់គ្រងអាហារដ្ឋានមួយក្នុងបន្ទាយ ដើម្បីរៃអង្គាសប្រាក់សម្រាប់ទិញសម្ភារៈប្រើប្រាស់ឱ្យមិត្តរួមក្រុម។

ក្រោយសង្គ្រាម ពួកគេក៏បានសហការគ្នារកស៊ី។ នៅឆ្នាំ 1919 លោក Truman និងលោក Jacobson ក៏បានសម្រេចចិត្តបើកហាងលក់សម្លៀកបំពាក់មួយនៅកណ្ដាលក្រុង Kansas។

ឆ្នាំ 1935 លោក Truman បានក្លាយជាតំណាងរាស្ត្រនៅសភាជាន់ខ្ពស់របស់រដ្ឋ Missouri សហរដ្ឋអាម៉េរិក។ Truman និង Jacobson នៅតែរក្សាទំនាក់ទំនងនឹងគ្នា។ Jacobson បបួល Truman ទៅបរបាញ់ និងស្ទួចត្រីក្នុងទន្លេ Missouri ជាញឹកញាប់។

ក្រោយមក Harry Truman ក៏ក្លាយជាអនុប្រធានាធិបតីអាម៉េរិក នៅក្នុងរដ្ឋការលោក Franklin D. Roosevelt នៅឆ្នាំ 1945។ ក្នុងខែមេសា 1945 លោក Truman ក៏ក្លាយជាប្រធានាធិបតី ពេលលោក Roosevelt បានទទួលមរណភាព។

រាជាណាចក្រអ៊ីស្រាអែលរបស់ជនជាតិជ្វីហ្វ ត្រូវបានបង្កើតឡើងកាលពីសតវត្សរ៍ទី 11 មុនគ្រិស្តសករាជ។ ឆ្នាំ 586 មុនគ្រិស្តសករាជ ចក្រភពបាប៊ីឡូន (Babylon) ដណ្ដើមបានដែនដីនេះ ហើយតំបន់នេះក្រោយមកក៏ស្ថិតក្រោមការគ្រប់គ្រងរបស់ចក្រភពពែរ្ស (អ៊ីរ៉ង់) និងចក្រភពរ៉ូម។ ចាប់ពីឆ្នាំ 641 ជនជាតិអារ៉ាប់ក៏គ្រប់គ្រងដែនដីនេះក្នុងរយៈពេល 1,300 ឆ្នាំ។ វត្តមានរបស់ជនជាតិជ្វីហ្វលើទឹកដីនេះក៏ថយចុះច្រើន ខណៈដែលពួកគេមួយចំនួនរត់ទៅរស់នៅក្នុងដែនដីដទៃ មានដូចជា អឺរ៉ុបជាដើម។ ឆ្នាំ 1516 ចក្រភពអូតូម៉ង់ (Ottoman) ក៏វាយយកបានដែនដីនេះ និងបានហៅវាថា ប៉ាលេស្ទីនអាតូម៉ង់។

ចលនាហ្ស៊ីយ៉ូននិយម (Zionist Movement) បានងើបឡើងចាប់ពីឆ្នាំ 1881 គ្រាដែលសហគមន៍ទាំងឡាយរបស់ជនជាតិជ្វីហ្វដែលរស់នៅឆ្ងាយពីទឹកដី មានបំណងវិលត្រលប់ចូល «ដែនដីអ៊ីស្រាអែល» និងមានបំណងបង្កើតរដ្ឋជ្វីហ្វ។ ជនជាតិជ្វីហ្វពីអឺរ៉ុប និងរុស្ស៊ីជាដើម បានត្រលប់ទៅរស់នៅក្នុងអតីតទឹកដីរបស់ខ្លួនដែលប៉ាលេស្ទីនរបស់អូតូម៉ង់កំពុងគ្រប់គ្រង។

ផែនទីរបស់ប្រទេសអ៊ីស្រាអែល និងប៉ាលេស្ទីន ចាប់ពីឆ្នាំ 1947ដល់បច្ចុប្បន្ន

ក្រោយសង្គ្រាមលើកទីមួយបានបញ្ចប់ អង់គ្លេសបានផ្ដួលអាតូម៉ង់ និងដណ្ដើមបានតំបន់ខាងលើ ហើយហៅវាថា ដែនដីគ្រប់គ្រងមានកាលកំណត់ប៉ាលេស្ទីន។ ក្រោយសង្គ្រាមលោកលើកទីពីរ ជនជាតិជ្វីហ្វនៅលើដែនដីនេះមានកាន់តែច្រើន ធ្វើឱ្យក្ដីស្រមៃស្ដីពីការបង្កើតរដ្ឋជ្វីហ្វ ត្រូវបានជំរុញបន្ថែម។

ថ្ងៃទី 29 វិច្ឆិកា 1947 អង្គការសហប្រជាជាតិបានអនុម័តផែនការបែងចែកទឹកដីប៉ាលេស្ទីនជាប្រទេសពីរដាច់ពីគ្នា គឺប្រទេសជ្វីហ្វ (អ៊ីស្រាអែល) និងអារ៉ាប់ (ប៉ាលេស្ទីន)។ អង្គការសហប្រជាជាតិប្រគល់របបអន្តរជាតិពិសេសទៅឱ្យទីក្រុង Jerusalem។ ភាគីខាងជ្វីហ្វបានយល់ព្រមតាមផែនការនេះ ខណៈអារ៉ាប់បានបដិសេធ។

ដើម្បីទាក់ទាញការគាំទ្ររបស់សហរដ្ឋអាម៉េរិក ក្រុមមេដឹកនាំចលនាហ្ស៊ីយ៉ូននិយម ក៏បានទាក់ទងលោក Jacobson ដើម្បីពឹងឱ្យលោកបញ្ចុះបញ្ចូល ស្នើសូមឱ្យប្រធានាធិបតី Truman ជួប Weizmann។

ក្រសួងការបរទេសអាម៉េរិក កាលនោះកំពុងរងសម្ពាធពីក្រុមអ្នកគាំទ្រអារ៉ាប់ និងមានគម្រោងដកថយពីផែនការបែងចែកទឹកដីរបស់អង្គការសហប្រជាជាតិ។ ក៏ប៉ុន្តែ ចុងក្រោយ លោក Truman ក៏បានសម្រេចចិត្តគាំទ្រទាំងស្រុងទៅវិញ បន្ទាប់ពីបានជួបលោក Weizmann។

ថ្ងៃទី 14 ឧសភា 1948 អ៊ីស្រាអែល ក៏ប្រកាសឯករាជ។ 11 នាទីក្រោយ ប្រធានាធិបតី Truman ក៏ប្រកាសទទួលស្គាល់ប្រទេសអ៊ីស្រាអែល។ លោក Weizmann បានក្លាយជាប្រធានាធិបតីដំបូងរបស់ប្រទេសអ៊ីស្រាអែល៕

October 30, 2023

រថភ្លើងដឹកជញ្ជូន Hyperloop ល្បឿនជាង 1,200 គីឡូម៉ែត្រ/ម៉ោង

(សហរដ្ឋអាម៉េរិក) – ប្រព័ន្ធ Hyperloop Express Freight អាចដឹកទំនិញដោយស្វ័យប្រវត្តក្នុងល្បឿន 1,223 គីឡូម៉ែត្រក្នុងមួយម៉ោង និងលើកដាក់ទំនិញក្នុងពេលតែមួយ។

ក្រុមហ៊ុន Hyperloop Transportation Technologies (HyperloopTT) កំពុងឆ្ពោះទៅរកការអភិវឌ្ឍប្រព័ន្ធទូរថភ្លើងល្បឿនលឿនដែលស្ទើរតែមិនមានកម្លាំងកកិត អាចជាបដិវត្តន៍ក្នុងវិស័យដឹកជញ្ជូន។ ប្រព័ន្ធថ្មីបំផុតដែលមានឈ្មោះថា Express Freight ប្រើប្រាស់បំពង់ផ្លូវទទេ ទូរថភ្លើងអណ្ដែត និងទ្វារអគ្គិសនីជាដើមដោយស្វ័យប្រវត្តទាំងស្រុង ដើម្បីលើកដាក់ទំនិញដំណាលគ្នានៅពេលចេញដំណើរ។ HyperloopTT ឱ្យដឹងថា ប្រព័ន្ធនេះនឹងអាចដឹកជញ្ជូនបានលឿន សន្សំសំចៃប្រាក់ និងមានស្ថិរភាពជាងបើធៀបនឹងការដឹកទំនិញតាមយន្តហោះ ឬរថយន្តដឹកទំនិញ។

ប្រព័ន្ធនេះត្រូវបាន HyperloopTT សហការអភិវឌ្ឍជាមួយនឹងក្រុមហ៊ុន Tangerine របស់ប្រទេសអង់គ្លេស។

ផែនការរបស់ HyperloopTT គឺការបំពាក់ប្រព័ន្ធ Express Freight ខាងក្នុងហេដ្ឋារចនាសម្ព័ន្ធដឹកអ្នកដំណើរ។ ប្រព័ន្ធដឹកអ្នកដំណើរគឺជាទូដែលមានរូបរាងដូចដងខ្លួនយន្តហោះ ធ្វើដំណើរក្នុងល្បឿន 1,223 គីឡូម៉ែត្រ/ម៉ោង តាមរយៈប្រព័ន្ធម៉ាញេទិចដំណើរការនៅក្នុងប្រព័ន្ធបំពង់សម្ពាធទាប។

October 25, 2023

Tag: អង់គ្លេស