អារម្មណ៍ - La Reine Media

ប្រទេសចិនក្លាយជាអ្នកនាំចេញរថយន្តធំជាងគេលើពិភពលោក

ក្នុង 6 ខែដើមឆ្នាំនេះ ប្រទេសចិនបាននាំចេញរថយន្តជាង 2.3 លានគ្រឿង ច្រើនជាងជប៉ុន និងក្លាយជាប្រទេសដែលនាំចេញរថយន្តច្រើនជាងគេបង្អស់លើពិភពលោក។

ក្នុងការធ្វើបច្ចុប្បន្នភាពនៃស្ថានភាពនាំចេញរថយន្ត សមាគមនៃបណ្ដាក្រុមហ៊ុននាំចេញរថយន្តនៅប្រទេសចិន បានដកស្រង់ទិន្នន័យពីអគ្គនាយកដ្ឋានគយរបស់ប្រទេសនេះ ឱ្យដឹងថា ក្នុងរយៈពេល 6 ខែដើមឆ្នាំ 2023 ប្រទេសចិនបាននាំចេញរថយន្តចំនួន 2.34 លានគ្រឿង កើន 76.9% បើធៀបនឹងដំណាក់កាលដូចគ្នាក្នុងឆ្នាំ 2022។

ដោយឡែក យោងតាមទិន្នន័យដែលបានប្រកាសដោយសមាគមនៃបណ្ដាក្រុមហ៊ុននាំចេញរថយន្តជប៉ុន តួលេខរថយន្តដែលបាននាំចេញរបស់ប្រទេសនេះក្នុងឆមាសទីមួយនៃឆ្នាំ 2023 មាន 2.02 លានគ្រឿង កើន 17% បើធៀបនឹងឆមាសទីមួយឆ្នាំ 2022។

នេះគឺជាលើកដំបូងហើយដែលតួលេខនៃការនាំចេញរថយន្តក្នុង 6 ខែដើមឆ្នាំ 2023 របស់ប្រទេសចិន មានចំនួនច្រើនជាងជប៉ុន និងឈរលំដាប់ទីមួយលើពិភពលោក។

ទិន្នន័យខាងលើក៏បានឱ្យដឹងថា មានមូលហេតុសំខាន់ពីរដែលធ្វើឱ្យការនាំចេញរថយន្តរបស់ប្រទេសចិនកើនឡើងខ្ពស់ខ្លាំងក្នុងឆ្នាំនេះ នោះគឺចំនួនរថយន្តដំណើរការដោយប្រេងសាំងដែលនាំចេញទៅកាន់ប្រទេសរុស្ស៊ីបានកើនឡើងគួរឱ្យចាប់អារម្មណ៍។ ទន្ទឹមនឹងនេះ រថយន្តអគ្គិសនីក៏ត្រូវបាននាំចេញទៅកាន់ទីផ្សារអឺរ៉ុប និងទីផ្សារអាស៊ីអាគ្នេយ៍ កាន់តែច្រើន៕

September 11, 2023

ផ្ទាំងគំនូរបុរាណមានរូបភាពឧបករណ៍ទំនើប សង្ស័យថាជាករណី «ដំណើរឆ្លងពេលវេលា»

ផ្ទាំងគំនូរបុរាណតាំងពីឆ្នាំ 1882 ថ្មីៗនេះបានបង្កឱ្យមានការភ្ញាក់ផ្អើលខ្លាំង និងធ្វើឱ្យមានការលើកឡើងអំពីរឿង «ធ្វើដំណើរឆ្លងពេលវេលា» បន្ទាប់ពីទិដ្ឋភាពលំអិតរបស់វាត្រូវបានគេរកឃើញ។

ទំព័រ Daily Star កន្លងទៅថ្មីៗនេះបានលើកឡើងអំពីទ្រឹស្ដីមួយដ៏ពិបាកឱ្យគេជឿ ទាក់ទងនឹងផ្ទាំងគំនូរមួយដែលបានគូរកាលពីឆ្នាំ 1882 ដោយវិចិត្រករ R. Josey និង James Archer។ ផ្ទាំងគំនូរនេះមានឈ្មោះថា «The Betrothal» ។

គំនូរនេះត្រូវបានគេដឹងថា ជាទិដ្ឋភាពនៃសកម្មភាពសន្យានឹងគ្នាអំពីគម្រោងរៀបការរបស់អ្នកនិពន្ធស្កុតឡែន Robert Burns និងនារីម្នាក់ឈ្មោះ Mary Campbell នៅក្បែរទន្លេ Ayr នៅភាគខាងជើងប្រទេសស្កុតឡែនកាលពីឆ្នាំ 1786។

ក៏ប៉ុន្តែ នៅពេលត្រូវបានពង្រីកឱ្យធំជាងមុន 10 ដង ផ្ទាំងគំនូរនេះបានធ្វើឱ្យមនុស្សម្នាមានការភ្ញាក់ផ្អើលខ្លាំងនៅចំពោះមុខអំណោយអនុស្សាវរីយ៍រាងចតុកោណដែលមានកែងមូល។ បើទោះជាពិបាកឱ្យគេជឿ ប៉ុន្តែអ្នកខ្លះយល់ថា វត្ថុនេះមានរូបរាងដូចទៅនឹងទូរស័ព្ទឆ្លាតវៃ។

ក្រោយពីទ្រីស្ដីស្ដីពី «ដំណើរឆ្លងពេលវេលា» ត្រូវបានលើកឡើងក្នុងករណីនេះ ចំណាប់អារម្មណ៍ក៏ត្រូវបានផ្ដោតទៅលើ The Betrothal ។ ក៏ប៉ុន្តែ ដើម្បីប្រឆាំងនឹងទ្រីស្ដី «ដំណើរឆ្លងកាត់ពេលវេលា» មនុស្សជាច្រើនក៏បានបកស្រាយថា នេះគ្រាន់តែជាគម្ពីរសាសនាប៉ុណ្ណោះ។

យោងតាមទំនៀមទម្លាប់បុរាណរបស់ជនជាតិស្កុតឡែន នៅពេលស្បថស្បែ គូស្នេហ៍នឹងបង្ហាញភក្ដីភាព និងការជឿជាក់របស់ខ្លួនដោយការជូនគម្ពីរសាសនាដល់គ្នានៅក្បែរទន្លេដែលមានទឹកកំពុងហូរ។ ដូច្នេះ រូបភាពដែលមានរាងចតុកោណនៅក្នុងផ្ទាំងគំនូរបុរាណនេះ ទំនងគ្រាន់តែជាសៀវភៅដែលសរសេរអំពីពាក្យសន្យាក្នុងសាសនាប៉ុណ្ណោះ មិនមែនជា «ឧបករណ៍អនាគត» អ្វីនោះឡើយ៕

August 29, 2023

រ៉ូបូតស្វ័យប្រវត្តលើឋានព្រះចន្ទរបស់ឥណ្ឌា ចាប់ផ្ដើមចល័តលើដី

បន្ទាប់ពីស្ថានីយ Vikram បានចុះចតដោយជោគជ័យលើឋានព្រះចន្ទ រ៉ូបូតស្វ័យប្រវត្ត Pragyan ក៏ចាប់ផ្ដើមចាកចេញពីស្ថានីយ Vikram នៅវេលាម៉ោង 23 និង 13 នាទី ថ្ងៃទី 23 សីហា (ពេលវេលានៅកម្ពុជា)។

មកដល់ម៉ោងជិត 10 ព្រឹក ថ្ងៃទី 24 សីហា (ម៉ោងនៅកម្ពុជា) អង្គការស្រាវជ្រាវអវកាសឥណ្ឌា (ISRO) ប្រកាសថា រ៉ូបូត Pragyan បានចាកចេញពីស្ថានីយ Vikram និងចាប់ផ្ដើមការស្រាវជ្រាវលើឋានព្រះចន្ទ។

រ៉ូបូត Pragyan មានទំហំប្រហាក់ប្រហែលនឹងសុនកមួយក្បាល និងមានទម្ងន់ 26 គីឡូក្រាម។ តាមផែនការ វានឹងប្រមូលសំណាកដីនៅប៉ូលខាងត្បូងរបស់ព្រះចន្ទជាលើកដំបូងក្នុងប្រវត្តិសាស្ត្រ។ ការស្រាវជ្រាវរបស់រ៉ូបូតនេះអាចដើរតួនាទីសំខាន់ក្នុងការស្វែងយល់អំពីវិធីទាញយកទឹកលើឋានព្រះចន្ទ ដែលនេះគឺជាគោលដៅចម្បងដែលប្រទេសនានាកំពុងចាប់អារម្មណ៍។

រ៉ូបូត Pragyan ដែលដំណើរការដោយថាមពលព្រះអាទិត្យ នឹងស្រាវជ្រាវអំពីផ្ទៃរបស់ព្រះចន្ទក្នុងរយៈពេលមួយថ្ងៃលើឋាននេះ (ប្រហែលនឹង 14 ថ្ងៃនៅលើផែនដី) មុនពេលរាត្រីព្រះចន្ទមកដល់ ធ្វើឱ្យពួកវាអស់ថាមពល។

ស្ថានីយចុះចត Vikram របស់យានអវកាសចន្ទ្រាយាន-3 បានចុះចតដោយជោគជ័យលើតំបន់ក្បែរប៉ូលខាងត្បូងរបស់ព្រះចន្ទនៅវេលាម៉ោង 19 និង 34 នាទី ថ្ងៃទី 23 សីហា (ម៉ោងនៅកម្ពុជា)។ ជោគជ័យរបស់ចន្ទ្រាយាន-3 បាននាំឱ្យឥណ្ឌាក្លាយជាប្រទេសទីបួនលើពិភពលោកដែលមានយានចុះចតលើឋានព្រះចន្ទបានសម្រេច បន្ទាប់ពីសូវៀត អាម៉េរិក និងចិន៕

August 24, 2023

ចម្លែក! នារីក្នុងកុលសម្ព័ន្ធស្បែកសស្រស់ស្អាតនៅប្រទេសចិន មិនរៀបការជាមួយជនជាតិដទៃ តើហេតុអ្វី?

នៅពេលនិយាយដល់ជនជាតិស្បែកស យើងតែនឹកឃើញដល់ជនជាតិអាម៉េរិក ឬអឺរ៉ុប។ល។ ប៉ុន្តែ រឿងដែលចម្លែកគឺថា នៅប្រទេសចិន ជាដែនដីមួយក្នុងទ្វីបអាស៊ីបែរជាមានកុលសម្ព័ន្ធស្បែកសមួយដែលបង្ហាញវត្តមានរាប់ពាន់ឆ្នាំមកហើយ។ នារីៗនៅក្នុងកុលសម្ព័ន្ធនេះ មានសម្រស់ស្រស់ស្អាតជាងជនជាតិដទៃមួយចំនួន។

ជនជាតិស្បែកសខាងលើនេះមានឈ្មោះថា Tajik រស់នៅលើជួរភ្នំ Pamirs ជាទីដែលត្រូវបានចាត់ទុកថាជាដំបូលផ្ទះពិភពលោក។ យោងតាមស្ថិតិពីរដ្ឋាភិបាលចិន ជនជាតិ Tajik នេះ មានប្រហែលជាង 50,000 នាក់ប៉ុណ្ណោះ។

ក្រៅពីលើភ្នំ Pamirs ជនជាតិ Tajik ក៏រស់នៅប្រមូលផ្ដុំគ្នានៅស្រុកស្វយ័តជនជាតិ Tajik Tashkurgan, Kashgar (ឬ Kashi), តំបន់ស្វយ័ត Xinjiang។

ជនជាតិ Tajik បរិភោគគ្រាប់ធញ្ញជាតិច្រើនប្រភេទ រួមនឹងសាច់អាំង នំផេនខេក និងផលិតផលធ្វើពីទឹកដោះគោ បន្លែ។ល។ ហើយពួកគេក៏ចូលចិត្តផឹកតែផងដែរ។

សម្រស់របស់ជនជាតិស្បែកស Tajik នៅប្រទេសចិន មានចំណុចពិសេសរបស់ជនជាតិអឺរ៉ុប ដោយមានថ្កាសខ្ពស់ ស្បែកពណ៌អូលីវ (លឿងច្រើនជាងក្រហម) ភ្នែកធំ ក្រហូងភ្នែកជ្រៅ និងក្ដោងច្រមុះដ៏ទាក់ទាញ។

អំពីទំនៀមទម្លាប់ក្នុងគ្រួសារជនជាតិ Tajik

ឪពុកម្ដាយចាស់ៗមានទំនោរលើកស្ទួយកូនប្រុសជាងកូនស្រី។ ដូច្នេះ ដើម្បីអាចបន្តវត្តមាន និងរីកចម្រើន នារីជនជាតិ Tajik ត្រូវឆ្លងកាត់ឧបសគ្គ និងសម្ពាធយ៉ាងច្រើន។

នារីជនជាតិស្បែកស Tajik មានសម្រស់ប្រហាក់ប្រហែលនឹងជនជាតិអឺរ៉ុប ដូច្នេះពួកគេតែងទទួលបានចំណាប់អារម្មណ៍ច្រើនពីសាធារណជន។ ក៏ប៉ុន្តែ ជនជាតិនេះមានច្បាប់បុរាណដែលមិនបានចារលើក្រដាសមួយដ៏សំខាន់ សម្រាប់ការអនុវត្តចំពោះនារីភេទ នោះគឺកូនក្រមុំជនជាតិនេះមិនត្រូវបានអនុញ្ញាតឱ្យរៀបការនឹងជនជាតិដទៃ។

មូលហេតុដែលនាំឱ្យមានច្បាប់បុរាណខាងលើ នោះគឺថា ជនជាតិ Tajik ចង់រក្សាឈាមជ័រ ពូជសាសន៍របស់ខ្លួនឱ្យនៅ «បរិសុទ្ធ» ដោយមិនត្រូវបានលាយឡំនឹងពូជសាសន៍ដទៃ៕

August 18, 2023

«រោងចក្រ» មួយរបស់ចក្រវាល ផលិតលោហធាតុធ្ងន់ស្មើផែនដីមួយពាន់ដង

ករណីផ្ទុះមួយដែលមានចម្ងាយពីផែនដី 3 ពាន់លានឆ្នាំពន្លឺ បង្កើតចេញលោហធាតុគ្រប់ប្រភេទដែលមានទម្ងន់សរុបលើសពីភព ព្រះចន្ទ និងអាចម៍ផ្កាយក្នុងប្រព័ន្ធព្រះអាទិត្យបូកបញ្ចូលគ្នាទៅទៀត។

ឆ្នាំ 2021 ស្ថានីយសង្កេតតារា Neil Gehrels បានរកឃើញករណីច្របាច់បញ្ចូលគ្នារវាងវត្ថុអវកាសក្រាស់ៗចំនួនពីរដែលហៅថា kilonova និងត្រូវបានដាក់ឈ្មោះឱ្យថា GRB 211211A។ នេះគឺជាឧទាហរណ៍ជិតបំផុតស្ដីពីព្រឹត្តិការណ៍តារាសាស្ត្រកម្រចួបនេះដែលមនុស្សមិនបានរកឃើញជាមួយនឹងរលកទំនាញ។ GRB 211211A ប្លែកពីគេ ដោយសារតែពន្លឺហ្គាម៉ា (GRB) ដែលវាបញ្ចេញ អូសបន្លាយពេលមួយនាទី។ កន្លងមក ថេរវេលាដូចគ្នានេះតែងតែអមជាមួយនឹង GRB ពីហេតុការណ៍ផ្ទុះផ្កាយនានាដែលហៅថាស៊ូពើណូវ៉ា ជំនួសឱ្យការច្របាច់បញ្ចូលគ្នារវាងផ្កាយនឺត្រុង។

ទំព័រ IFL Science រាយការណ៍កាលពីថ្ងៃទី 15 សីហាថា លទ្ធផលនៃការស្រាវជ្រាវចំនួនបួនត្រូវបានប្រកាសដំណាលគ្នាលើទស្សនាវដ្ដី Nature បរិយាយអំពីការរកឃើញខាងលើ និងដំណើរការដែលអាចបង្កើតបានជាព្រឹត្តិការណ៍បែបនេះ។ ក៏ប៉ុន្តែ អ្វីដែលគួរឱ្យចាប់អារម្មណ៍ជាងគេនៃហេតុការណ៍នេះ អាចជាបរិមាណវត្ថុធាតុធ្ងន់ៗដែលត្រូវបានបង្កើតឡើងពីការផ្ទុះដ៏អស្ចារ្យ ក្នុងនោះមានទាំងលោហធាតុកម្រ មានដូចជា មាស និងប្លាទីនជាដើម។

រូបភាពដែលបង្កើតឡើងត្រាប់តាមរស្មីហ្គាម៉ាដែលជះចេញពី GRB 211211A

ជាធម្មតា ផ្កាយមួយដួងតែងច្របាច់អ៊ីដ្រូសែនបញ្ចូលគ្នាឱ្យក្លាយជាអេល្យូម រួចក៏ប្រែក្លាយអេល្យូមទៅជាសារធាតុដទៃៗនៅក្នុងវដ្ដរបស់វា។ ពេលស្លាប់ទៅ ផ្កាយដែលមានម៉ាសតូចទាបនឹងបង្កើតសារធាតុថ្មីៗ ប៉ុន្តែវត្ថុធាតុភាគច្រើនទាមទារឱ្យមានវិធីកកើតដ៏ខ្លាំងក្លា។ សារធាតុដូចអាលុយមីញ៉ោម និងប៉ូតាស្យូមកកើតពីហេតុការណ៍ផ្ទុះផ្កាយមួយដួងដោយឡែកពីគ្នា (ស៊ូពើណូវ៉ា) ប៉ុន្តែ ក្រុមអ្នកវិទ្យាសាស្ត្រសង្ស័យថា មានប្រភពសារធាតុធ្ងន់ៗដទៃ ដោយសារថា ចំនួនករណីផ្ទុះស៊ូពើណូវ៉ាដែលពួកគេបានប្រទះ មិនសមស្របនឹងកម្រិតសម្បូរបែបរបស់សារធាតុធ្ងន់ៗ។

នៅពេលផ្កាយនឺត្រុងពីរដួងប៉ះទង្គិចគ្នា និងត្រូវបានច្របាច់បញ្ចូលគ្នា ថាមពលដែលពួកវាបញ្ចេញកកើតទៅជាលោហធាតុធ្ងន់ជាងឆ្ងាយបើធៀបនឹងហេតុការណ៍ផ្ទុះស៊ូពើណូវ៉ា។ បើទោះជាគីឡូណូវ៉ា កម្រកើតមាន បើធៀបនឹងស៊ូពើណូវ៉ា តែពួកវាបង្កើតសារធាតុធ្ងន់ៗច្រើនជាង និងកាន់កាប់លោហធាតុធ្ងន់ៗភាគច្រើនដែលមាននៅក្នុងចក្រវាល។ ឧទាហរណ៍៖ ព្រះអាទិត្យមានម៉ាសធ្ងន់ជាងផែនដី 330,000 ដង ខណៈ 99.5% នៃសម្បកផែនដីមានផ្ទុកសារធាតុមិនធ្ងន់ជាងដែក។ ប្រការនេះបញ្ចាក់ថា «រោងចក្រផលិតមាសក្នុងចក្រវាល» មានទំហំធំខ្លាំងណាស់។

រូបភាពបរិយាយអំពីការច្របាច់បញ្ចូលគ្នារវាងផ្កាយក្រិនពណ៌ស (ឆ្វេង) និងផ្កាយនឺត្រុង (កណ្ដាលថាសវត្ថុធាតុ)

ដើម្បីឱ្យដឹងថា ព្រឹត្តិការណ៍ដូច GRB 211211A រួមចំណែកអ្វីខ្លះក្នុងការកកើតសារធាតុធ្ងន់ៗក្នុងចក្រវាល ក្រុមអ្នកវិទ្យាសាស្ត្រត្រូវការដឹងអំពីចំនួនរបស់ពួកវា។ ក្រុមអ្នកវិទ្យាសាស្ត្រកំពុងស្វែងរកអ្វីដែលបានបង្កើត GRB 211211A។ បច្ចុប្បន្ន សម្មតិកម្មមួយត្រូវបានលើកឡើង នោះគឺការច្របាច់បញ្ចូលគ្នារវាងផ្កាយនីត្រុង និងកូនផ្កាយក្រិនពណ៌ស បង្កើតឱ្យមាន GRB 211211A មិនមែនការបុកបញ្ចូលគ្នារវាងផ្កាយនីត្រុងពីរដួងនោះទេ៕

August 17, 2023

Elon Musk ថា ចង់ទៅដល់ផ្ទះ Zuckerberg ដើម្បីប្រកួតប្រដាល់

មហាសេដ្ឋី Elon Musk បានប្រាប់ថា «នឹងទៅគោះទ្វារផ្ទះរបស់ Mark Zuckerberg» ហើយអាចយកឈ្នះដោយសារមាឌធំ។ នេះបើតាមខ្លឹមសារដែលត្រូវបានគេជឿថា ជាការផ្លាស់ប្ដូរយោបល់រវាងមហាសេដ្ឋីទាំងពីរ។

កាលពីថ្ងៃទី 13 សីហា Walter Isaacson ដែលជាអ្នកសរសេរប្រវត្តិរូបសង្ខេបសម្រាប់ Elon Musk បានបង្ហោះខ្លឹមសារមួយផ្នែកនៅក្នុងសារផ្ញើឱ្យគ្នា រវាង CEO របស់ Tesla និង CEO របស់ Meta។ ក្រោយមក Elon Musk ក៏បានបង្ហោះរូបភាពថតអេក្រង់មួយផ្សេងទៀតដែលលោកអះអាងថា ជាខ្លឹមសារពេញលេញ ដែលក្នុងនោះលោកបានសួរ Zuckerberg ថា តើចាប់អារម្មណ៍នឹងការហ្វឹកហាត់ ឬទេ។

អ្នកដែលត្រូវបានគេជឿថាជា Zuckerberg ឆ្លើយថា «បើនៅតែចង់ចូលរួមការប្រកួត MMA ពិត លោកគួរតែហាត់ដោយខ្លួនឯង ហើយឱ្យដឹងថា ពេលណាបានត្រៀមរួចរាល់។ ខ្ញុំមិនចង់បន្តបំប៉ោងរឿងរ៉ាវដែលអាចនឹងមិនកើតឡើង។ ដូច្នេះ លោកគួរសម្រេចចិត្តឱ្យបានឆាប់ មិនដូច្នេះទេ យើងគួរឈប់ត្រឹមនេះ»។

ជិត 10 ម៉ោងក្រោយ លោក Elon Musk ក៏បានឆ្លើយតបថា លោក «នឹងនៅ Palo Alto នៅថ្ងៃចន្ទ» និងលើកឡើងថា ទាំងពីរនាក់អាចប្រកួតនៅលើសង្វៀនក្រោយផ្ទះរបស់ម្ចាស់ Facebook។

CEO របស់ Meta មិនទាន់បញ្ចេញយោបល់អ្វីនៅឡើយ ក្រោយពីរូបភាពថតអេក្រង់ត្រូវបានចែករំលែកលើបណ្ដាញសង្គម។

ការបបួលប្រយុទ្ធលើសង្វៀនរវាងម្ចាស់បណ្ដាញសង្គមធំៗលើពិភពលោកនេះ ត្រូវបានលើកឡើងកាលពីចុងខែមិថុនា ឆ្នាំ 2023 នៅពេលលោក Musk រិះគន់ចំពោះរឿង Meta បង្ហាញបណ្ដាញសង្គម Threads។ អ្នកលេងបណ្ដាញសង្គមម្នាក់ព្រមានថា មិនគួរគំរាមកំហែង Zuckerberg ព្រោះថា គាត់ចេះក្បាច់គុន។ សំណេរនេះ ភ្លាមនោះក៏ធ្វើឱ្យលោក Musk បបួលប្រយុទ្ធគ្នា ហើយ Zuckerberg ក៏បានយល់ព្រមយ៉ាងលឿន។

យោងតាម Dana White ប្រធានស្ថាប័នក្បាច់គុន UFC ដែលធ្លាប់បានជជែកជាមួយលោក Musk និង Zuckerberg និយាយថា មហាសេដ្ឋីទាំងពីររូបនេះសុទ្ធតែបង្ហាញភាពម៉ឺងម៉ាត់។ ការប្រកួតនេះត្រូវបានគេរំពឹងថា អាចរកប្រាក់ចំណូលបានលើសពីមួយពាន់លានដុល្លារអាម៉េរិក៕

August 15, 2023

មន្ទីរពេទ្យមួយនៅវៀតណាមវះកាត់ខួរក្បាលដោយប្រើរ៉ូបូត AI៖ អ្នកជំងឺច្រៀងក្នុងពេលវះកាត់

អ្នកជំងឺវ័យ 58 ឆ្នាំម្នាក់ត្រូវដាច់សរសៃឈាមខួរក្បាលជាង 24 ម៉ោង និងមានអាការៈភ្លេចភ្លាំងស្មារតី មិនអាចកម្រើកបាន ដូច្នេះ បើសិនវះកាត់តាមធម្មតា នឹងមានហានិភ័យកើតជំងឺស្លាប់អវយវៈណាមួយ ប៉ុន្តែបើវះកាត់យកកំណកឈាមក្នុងខួរក្បាលដោយមិនចាក់ថ្នាំសន្លប់ និងប្រើប្រាស់បច្ចេកវិទ្យារ៉ូបូត AI (បញ្ញាសិប្បនិម្មិត) អ្នកជំងឺអាច «ច្រៀង» ជាមួយក្រុមវេជ្ជបណ្ឌិតបានក្នុងគ្រាកំពុងវះកាត់។

កាលពីថ្ងៃទី 10 សីហា អ្នកជំងឺខាងលើ (នៅក្រុងព្រៃនគរ) ត្រូវបានគ្រួសារនាំមកកាន់មន្ទីរពេទ្យពហុព្យាបាលតាមអាញ់ទីក្រុងហូជីមិញ (Tam Anh Hospital) ក្នុងស្ថានភាពរង្វេងរង្វាន់ ដៃជើងកម្រើនស្ទើរមិនបាន។ លទ្ធផលនៃការថត MRI 3 Tesla បញ្ជាក់ថា អ្នកជំងឺនេះមានដុំឈាមកកក្នុងខួរក្បាលទំហំ 4 សង់ទីម៉ែត្រ។ បើមិនវះកាត់បន្ទាន់ អ្នកជំងឺត្រូវប្រឈមនឹងបញ្ហាស្លាប់មួយចំហៀងខ្លួន ពិបាកក្នុងការនិយាយ ស្រវាំងភ្នែក ឬអាចបាត់បង់ជីវិត។

ក្រុមវេជ្ជបណ្ឌិតបានជ្រើសយកវិធីវះកាត់ខួរក្បាលបែបថ្មី ដែលអនុញ្ញាតឱ្យអ្នកជំងឺនៅដឹងខ្លួន ដោយចាក់តែថ្នាំស្ពឹក និងប្រើប្រាស់រ៉ូបូត AI Modus V Synaptive រួមនឹងប្រព័ន្ធកំណត់ទិស Neuro-Navigation AI ជំនាន់ថ្មីបំផុត។

ការវះកាត់បែបថ្មីនេះនឹងជួយឱ្យអ្នកជំងឺគេចផុតពីគ្រោះថ្នាក់បានលឿន ការវាយតម្លៃលើប្រសិទ្ធភាពនៃការវះកាត់មានភាពរលូន ដោយសារតែអ្នកជំងឺអាចកម្រើក និងឆ្លើយឆ្លងជាមួយក្រុមវេជ្ជបណ្ឌិត។ ក៏ប៉ុន្តែ វិធីវះកាត់ថ្មីនេះមានភាពស្មុគស្មាញច្រើន និងគ្រោះថ្នាក់ជាង ធៀបនឹងការវះកាត់ដោយចាក់ថ្នាំសន្លប់។ ក៏ប៉ុន្តែ បើចាក់ថ្នាំសន្លប់ វេជ្ជបណ្ឌិតនឹងមិនអាចវាយតម្លៃផ្ទាល់ដោយការសួរអ្នកជំងឺក្នុងពេលវះកាត់។

ក្នុងពេលវះកាត់ វេជ្ជបណ្ឌិតវៀតណាម និយាយជាមួយអ្នកជំងឺថា «ខ្ញុំកំពុងយកកំណកឈាមចេញពីខួរក្បាល លោកមានអារម្មណ៍ស្រួលខ្លួនជាងមុនទេ?»។ អ្នកជំងឺឆ្លើយថា «ធូរស្រាលជាងមុនឆ្ងាយណាស់ អរគុណគ្រូពេទ្យ»។

ក្រុមវេជ្ជបណ្ឌិតសួរនាំ និងស្នើឱ្យអ្នកជំងឺលើកដៃជើងជាបន្តបន្ទាប់ ដើម្បីប្រាកដថា សរសៃប្រសាទនានាត្រូវបានការពារក្នុងកម្រិតខ្ពស់បំផុត។

ដោយសារការត្រេកអរខ្លាំងបន្ទាប់ពីកំណកឈាមត្រូវបានយកចេញពីខួរក្បាល និងមានអារម្មណ៍ធូរស្រាល ទាំងវេជ្ជបណ្ឌិត ទាំងអ្នកជំងឺ នាំគ្នាច្រៀងរអ៊ូៗ គ្រាដែលក្រុមជំនួយការបន្តដាក់ភ្ជាប់លលាដ៍ក្បាល និងដេរស្បែកក្បាល។

ក្រោយរយៈពេលជាង 30 នាទីនៃការវះកាត់ ក្រុមវេជ្ជបណ្ឌិតដ៏នាំគ្នាហ៊ោក្នុងភាពត្រេកអរ នៅពេលប្រធានក្រុមវេជ្ជបណ្ឌិតប្រកាសថា «ការវះកាត់បានទទួលជោគជ័យ អបអរសាទរលោកហៃ និងអរគុណគ្រប់គ្នា»។

30 នាទីបន្ទាប់មកទៀត អ្នកជំងឺក៏បានជួបសាច់ញាតិ និងហៅទូរស័ព្ទទៅកាន់អ្នកផ្ទះ។ កន្លះថ្ងៃក្រោយមក លទ្ធផលនៃការថត CT 768 បង្ហាញថា លែងមានកំណកឈាមក្នុងខួរក្បាល ហើយអ្នកជំងឺក៏មានសភាពដូចធម្មតាទាំងស្រុង៕

ប្រព័ន្ធរ៉ូបូត AI Modus V Synaptive ដែលមានតែមួយគត់នៅប្រទេសវៀតណាម

August 15, 2023

របកគំហើញថ្មី! ភពចំនួន 7 ដូចផែនដី ទំនងជាកំពុងមានផ្ទុកភាវៈរស់

ផ្កាយ TRAPPIST-1 បានក្លាយជាទីជជែកវែកញែកតាំងពីយូរមកហើយ នៅពេលក្រុមអ្នកវិទ្យាសាស្ត្រព្រួយបារម្ភអំពីកត្តាមួយចំនួនពីផ្កាយមេ និងកត្តាផ្ទៃក្នុងរបស់បណ្ដាភពនេះ អាចរារាំងលទ្ធភាពកកើតជីវិត។

ក៏ប៉ុន្តែ លទ្ធផលនៃការសិក្សាស្រាវជ្រាវដែលទើបត្រូវបានប្រកាសលើទស្សនាវដ្ដីវិទ្យាសាស្ត្រ Nature ដែលនាំមុខដោយតារាវិទូ Frank Selsis មកពីសាកលវិទ្យាល័យ Bordeaux (បារាំង) បាននាំមកនូវដំណឹងល្អដ៏ធំមួយ។

TRAPPIST-1 គឺជាផ្កាយក្រិនពណ៌ក្រហមមួយដួង មានទំហំតូចខ្លាំង និងត្រជាក់ជាងព្រះអាទិត្យឆ្ងាយណាស់ ហើយមានចម្ងាយពីផែនដីត្រឹមតែ 40 ឆ្នាំពន្លឺប៉ុណ្ណោះ។

ភពទាំង 7 របស់ផ្កាយ TRAPPIST-1 មានទំហំ និងរូបរាងខុសៗគ្នា និងសុទ្ធតែមានចំណុចពិសេសមួយចំនួនដែលដូចទៅនឹងផែនដី ដែលអាចគាំទ្រដល់ភាវៈរស់។

អ្វីដែលធ្វើឱ្យអ្នកវិទ្យាសាស្ត្រចាប់អារម្មណ៍ជាងគេគឺ ភពទាំង 7 នេះសុទ្ធតែមានលទ្ធភាពខ្ពស់ អាចផ្ទុកទឹករាវនៅលើផ្ទៃ ឬនៅក្រោមដី។ ក៏ប៉ុន្តែ មានឧបសគ្គមួយចំនួនត្រូវបានលើកឡើងនាពេលកន្លង។ ភាពចម្លែករបស់ «ភពមហាសមុទ្ឬ» មួយចំនួនក្នុងចំណោមនោះ បានធ្វើឱ្យក្រុមអ្នកវិទ្យាសាស្ត្រព្រួយបារម្ភ។ ពួកគេយល់ថា ការដែលពួកវាមានទឹកច្រើនពេកធៀបនឹងផែនដី នឹងបង្កផលវិបាកដល់ភាវៈរស់។

ក្ដីបារម្ភធំបំផុតនៅតែជាផ្កាយមេ TRAPPIST-1។ ផ្កាយក្រិនក្រហមនេះត្រជាក់មែនពិត ប៉ុន្តែដោយសារតែវាមានវិទ្យុសកម្មដ៏ខ្លាំងក្លា ដូច្នេះទឹកក្នុងបរិយាកាសប្រាកដជាត្រូវហួតទៅក្នុងទីអវកាស ហើយពួកវានឹងក្លាយជា «ភពសុក្រ» របស់ផ្កាយ TRAPPIST-1 ជំនួសឱ្យផែនដី។

ទោះយ៉ាងណាក៏ដោយ បណ្ឌិត Selsis ឱ្យដឹងថា ពន្លឺផ្កាយក្រិនក្រហមដូច TRAPPIST-1 ត្រូវថយចុះទៅតាមពេលវេលា ដែលនេះមានន័យថា អនាគតរបស់ពួកវានៅតែអាចមានទឹក។

រូបមន្តដែលលោក Frank Selsis និងសហការីបានអភិវឌ្ឍ បង្ហាញថា TRAPPIST-1 ដំបូងឡើយគឺពិតជាបានដុតកម្ដៅភពទាំង 7 របស់វា ប៉ុន្តែដោយសារតែជាផ្កាយក្រិនក្រហម ដូច្នេះវានឹងមិនមានកម្ដៅច្រើនគ្រប់គ្រាន់ដើម្បីដុតរំលាយសម្បកខាងលើ និងស្រទាប់បន្ទាប់របស់បណ្ដាភពម៉ាក់ម៉ានេះ។

ប្រការនេះមានន័យថា មានទឹកជាច្រើននៅតែស្ថិតក្នុងថ្ម ពោលគឺថា ការដែលបណ្ដាភពនេះលិចទឹក គឺនាំមកនូវផលប្រយោជន៍ច្រើនផងដែរ។ ក្នុងពេលដែលផ្កាយមេចុះត្រជាក់ បណ្ដាមហាសមុទ្រទឹករាវក៏ទំនងជាបានកើតឡើង ហើយមកដល់បច្ចុប្បន្ន អាចមានភាវៈរស់ប្រកបដោយភាពសម្បូរបែប។

យោងតាមទំព័រ Space ការរកឃើញខាងលើ មិនត្រឹមតែជួយឱ្យអ្នកវិទ្យាសាស្ត្រមានក្ដីសង្ឃឹមច្រើនជាងមុននោះទេ តែក៏បង្កើនឱកាសច្រើនដើម្បីអាចបញ្ចាក់បានថា មនុស្សជាតិមិនមែននៅឯកាក្នុងកាឡាក់ស៊ីមីលគីវ៉េ ឬចក្រវាលទាំងមូលឡើយ ព្រោះថា ផ្កាយដូច TRAPPIST-1 គឺជាផ្កាយដែលមានច្រើនជាងគេនៅក្នុងកាឡាក់ស៊ីរបស់ផែនដី៕

August 14, 2023

ទង្វើប្រកបដោយហិង្សាធ្វើឱ្យកីឡាការិនីអង់គ្លេសត្រូវបានប្រដូចទៅនឹង Beckham និង Rooney

សកម្មភាពបាត់បង់ការគ្រប់គ្រងរបស់កីឡាការិនី Lauren James ក្នុងវគ្គ 1/8 នៅ World Cup នារី 2023 ធ្វើឱ្យគេនឹកឃើញដល់ករណីដូចគ្នានេះដែលបានកើតឡើងជាមួយនឹងកីឡាករ Wayne Rooney និង David Beckham របស់អង់គ្លេស។

នៅនាទីទី 85 ក្នុងការប្រកួតរវាងក្រុមបាល់ទាត់នារីនីហ្សេរីយ៉ា និងអង់គ្លេសកាលពីដើមសប្ដាហ៍នេះ Lauren James មិនអាចគ្រប់គ្រងអារម្មណ៍បាន នៅពេលដើរជាន់ពីលើដងខ្លួនរបស់ Michelle Alozie។ ដំបូងឡើយ អាជ្ញាកណ្ដាលមិនបានឃើញ ប៉ុន្តែសកម្មភាពនេះត្រូវបាន VAR រកឃើញ នាំឱ្យខ្សែប្រយុទ្ធវ័យ 21 ឆ្នាំ ត្រូវទទួលកាតក្រហម។

សកម្មភាពនេះធ្វើឱ្យសារព័ត៌មាន និងអ្នកលេងបណ្ដាញសង្គមនៅអង់គ្លេស នាំគ្នាប្រៀបប្រដួចទៅនឹងករណីបង្កកំហុសឆ្គងរបស់ Wayne Rooney និង David Beckham កាលពីអតីតកាល។

David Beckham (អាវស) និង Diego Simeone នៅ World Cup 1998 ក្នុងការប្រកួតរវាងអង់គ្លេស និងអាហ្សង់ទីន

នៅក្នុងវគ្គ ¼ នៃ World Cup 1998 ដែលពេលនោះ Beckham មានអាយុ 23 ឆ្នាំ ត្រូវទទួលកាតក្រហម បន្ទាប់ពីបញ្ចេញកាយវិការសងសឹកនឹង Diego Simeone នៅក្នុងការប្រកួតរវាងអង់គ្លេស និងអាហ្សង់ទីន។ មកដល់វគ្គ ¼ នៃ World Cup 2006 Wayne Rooney អាយុ 21 ឆ្នាំ ក៏ត្រូវបានបញ្ឈប់ការប្រកួត បន្ទាប់ពីយកជើងជាន់ពីលើ Ricardo Carvalho របស់ព័រទុយហ្កាល់។

Wayne Rooney (អាវស) និង Ricardo Carvalho

កំហុសឆ្គងទាំងបីខាងលើនេះ មានចំណុចដូចគ្នាជាច្រើន ក្នុងនោះមានដូចជា ពួកគេគឺជាកីឡាករឆ្នើមកំពុងមានឈ្មោះល្បីជាងគេនៅអង់គ្លេស ដែលឆ្លងកាត់ករណីមិនអាចគ្រប់គ្រងអារម្មណ៍ ពេលក្រុមជម្រើសជាតិកំពុងប្រកួតក្នុងវគ្គជម្រុះផ្ទាល់នៅ World Cup។ ទន្ទឹមនឹងនេះ ក្រុមអង់គ្លេសក៏សុទ្ធតែត្រូវប្រកួតទាត់ប៉េណាំងទីម្ដងម្នាក់នៅក្នុងបីប្រកួតខាងលើ។ ប៉ុន្តែ កីឡាការិនី Lauren James មានសំណាងល្អជាង នៅពេលក្រុមនារីជម្រើសជាតិអង់គ្លេសបានយកឈ្នះលើនីហ្សេរីយ៉ា ចំណែក Beckham និង Rooney បានក្លាយជាកីឡាករមានកំហុសរបស់អង់គ្លេស បន្ទាប់ពីការប្រកួតបានបញ្ចប់។

នៅ World Cup នារី 2023 Lauren James រកបាន 3 គ្រាប់ និងបង្កឱកាសបាន 3 គ្រាប់ ក្នុងចំណោម 8 គ្រាប់របស់ក្រុមនារីអង់គ្លេស។ គ្រូបង្វឹកក្រុមនារីអង់គ្លេស Sarina Wiegman ឱ្យដឹងថា Lauren James បានធ្វើការសូមអភ័យទោសចំពោះករណីដែលនាងបានបង្កឡើង៕

August 9, 2023

OPPO Reno10 5G តម្លៃ $399 | Reno10 Pro 5G តម្លៃ $569 បានដាក់សម្ពោធជាផ្លូវការយ៉ាងកក្រើកនៅប្រទេសកម្ពុជា

នាល្ងាចថ្ងៃទី 6 ខែសីហា ឆ្នាំ 2023 ក្រុមហ៊ុនស្មាតហ្វូន OPPO ដ៏ធំប្រចាំប្រទេសកម្ពុជាបានបង្ហាញខ្លួនយ៉ាងអធឹកអធមក្នុង «កម្មវិធីសម្ពោធជាផ្លូវការ OPPO Reno10 Series 5G» ដោយមានវត្តមានភ្ញៀវកិត្តិយសជាច្រើនរូប ពិសេសគឺ ព្រះនាងតូច ជេនណា នរោត្តម ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងកញ្ញា រ៉េត ស៊ូហ្សាណាព្រមទាំងតារាប្រុសស្រីល្បីៗជាច្រើនរូបទៀតដែលបានអញ្ជើញចូលរួមយ៉ាងច្រើននៅក្នុងកម្មវិធីនេះផងដែរ។

នេះជាមហាកិត្តិយសដ៏ធំក្រៃលែងដែលព្រះនាងតូច ជេនណា នរោត្តម បានផ្តល់វត្តមានជាភ្ញៀវកិត្តិយស ចូលរួមបកស្រាយចម្រៀងយ៉ាងពិរោះរណ្តំ ព្រមទាំងផ្តល់កិត្តិយសក្នុងការប្រកាសតម្លៃរបស់ស្មាតហ្វូនស៊េរីថ្មីជូនដល់ក្រុមហ៊ុន OPPO ផងដែរ ។ ចំណែកតារាចម្រៀង Original Song លោក ថេណា និង កញ្ញា រ៉េត ស៊ូហ្សាណា ក៏បានច្រៀងចម្រៀងថ្មីៗព្រមទាំងចែករំលែកបទពិសោធពីការប្រើប្រាស់នូវស្មាតហ្វូន OPPO Reno10 Series 5G ផងដែរ។ រីឯបវរកញ្ញា ពេជ្រ វត្តីសារ៉ាវឌ្ឍី បានដើរបង្ហាញម៉ូដជាមួយនឹងទូរស័ព្ទស៊េរីថ្មី OPPO Reno10 Series 5G យ៉ាងទាក់ទាញជាមួយនឹងសម្លេងហ៊ោគាំទ្រពេញសាលកម្មវិធីផងដែរ។ មិនតែប៉ុណ្ណោះ ក្នុងនោះក៏ឃើញមានវត្តមានបវរកញ្ញាដែលជា Top3 ក្នុងកម្មវិធី Miss Pre-Teen ដើរម៉ូដយ៉ាងស្រស់ស្អាតផងដែរ។

ក្រុមហ៊ុន OPPO បានដាក់សម្ពោធនូវស្មាតហ្វូន 2 ម៉ូដែលគឺ OPPO Reno10 5G និង Reno10 Pro 5G ដែល កញ្ញា ងួន ភួងទេពសុនិច ជាតួនាទីជា Product Manager បានឡើងធ្វើបទបង្ហាញអំពីមុខងារ អត្ថប្រយោជន៍ សមត្ថភាព និងភាពឈ្លាសវៃរបស់ស្មាតហ្វូនទាំង 2 ម៉ូដែលនេះផងដែរ។

សម្រាប់ OPPO Reno10 5G បានបំពាក់នូវប្រព័ន្ធកាមេរ៉ា Portrait ដ៏ពេញលេញជាមួយលែន Telephoto Portrait ទំហំ 32MP បំពាក់នូវសេនស័រ Flagship របស់ SONY IMX709 ដែលអាចថតរូប Portrait បានហើយអាច Zoom បានទៀតជាមួយបច្ចេកវិទ្យា 2X Optical Zoom និង Digital Zoom ដល់ទៅ 20X ។ OPPO Reno10 5G ក៏បានបំពាក់នូវបច្ចេកវិទ្យាសាកថ្មល្បឿនលឿន 67W SUPERVOOC សាកពេញ 100% ប្រើពេលត្រឹមតែ 47នាទីតែប៉ុណ្ណោះ បន្ថែមពីសាកថ្មលឿនហើយទំហំថ្មក៏ធំដែររហូតដល់ 5000mAh។ មិនតែប៉ុណ្ណោះ បើនិយាយពី Spec អេក្រង់វិញគឺកាន់តែអេម ដោយបំពាក់មកនូវអេក្រង់កោង 3D កម្រិតកំពូលជាមួយ Refresh Rate 120Hz អូសដោយមិនទាក់ និងទើសចិត្តឡើយជាមួយអេក្រង់ធំដល់ទៅ 6.7Inch AMOLED។ បើក្រឡេកទៅមើលការឌីហ្សាញវិញប្រកបដោយភាពប្រណីត និងទាន់សម័យដោយផ្តល់នូវជម្រើស 2 ពណ៌គឺ Ice Blue និង Silvery Grey។

ចំណែក OPPO Reno10 Pro 5G នាំមកជូនជាមួយជម្រើស 2 ពណ៌គឺ Glossy Purple រចនាឡើងដោយកញ្ចក់ថ្លារលោង ជាមួយពណ៌ស្វាយបែប Premium និងមួយពណ៌ទៀតគឺ Silvery Grey ដែលរចនាបែប OPPO Glow ជាមួយនឹងអេក្រង់កោងបែប 3D ដូចទៅនឹង OPPO Reno10 5G ដែរ។ អ្វីដែលគួរឲ្យចាប់អារម្មណ៍នោះគឺ OPPO Reno10 Pro 5G បានប្រើប្រាស់សេនស័រ SONY ទាំងអស់ដែលផ្តល់ឲ្យការថតរូបទាំងនៅលើកាមេរ៉ាមុខនិងក្រោយច្បាស់គ្រប់ពេលវេលាប្រៀបដូចប្រើកាមេរ៉ាអាជីព។ រីឯថាមពលថ្មទំហំ 4600mAh និងកម្លាំងសាកថ្មលឿនរហូតដល់ 80W SUPERVOOC សាកពេញ 100% ក្នុងពេលត្រឹមតែ 28នាទីប៉ុណ្ណោះ។ បន្ថែមពីនេះ វាមានសមត្ថភាពប្រតិបត្តិការកាន់តែប្រសើរ ជាមួយនឹងឈីបគ្រប់គ្រងថាមពល SUPERVOOC S ផ្តាច់មុខនិងដំបូងនៅលើ OPPO ផងដែរ។ បើនិយាយពីកម្លាំងប្រតិបត្តិការវិញបំពាក់ជាមួយឈីប Qualcomm ® Snapdragon 778 5G ដ៏ល្បីល្បាញទទួលស្គាល់លើកម្លាំងប្រតិបត្តិការលើពិភពលោក។

ជាមួយនឹងតម្លៃកាន់តែពិសេស! កក់ទុកមុននូវសមាជិកថ្មីរបស់ OPPO Reno10 Series 5G ទាំងពីរម៉ូដែល Reno10 5G តម្លៃ $399 | Reno10 Pro 5G តម្លៃ $569 ចាប់ពីថ្ងៃទី 7 រហូតដល់ថ្ងៃទី 12 ខែសីហា ឆ្នាំ2023 មានការថែមជូនកាដូតម្លៃ $182 រួមមាន៖ បណ្ណធានាអេក្រង់រយៈពេល1ឆ្នាំ តម្លៃ$89, កាតាបដ៏ស្រស់ស្អាត តម្លៃ$39 និងស៊ីមស្មាតលេខពិសេស Bronze តម្លៃ $54 ភ្ជាប់គម្រោង SurfLikeCrazy រយៈពេល 6ខែ។ តោះចាំអីទៀត!

តម្លៃកាន់តែពិសេស! ស្មាតហ្វូន OPPO Reno10 Series 5G ទទួលកក់ចាប់ពីថ្ងៃទី 7 រហូតដល់ថ្ងៃទី 12 សីហា ដើម្បីទទួលបានកាដូពិសេសៗជាច្រើន

August 7, 2023

Tag: អារម្មណ៍