អគារ - La Reine Media

ទួរប៊ីនខ្យល់សមុទ្រធំជាងគេបង្អស់លើពិភពលោក ចាប់ផ្ដើមដំឡើងនៅ Fujian

ទួរប៊ីនខ្យល់សមុទ្រកម្លាំង 16 ម៉េហ្កាវ៉ាត់ ដែលត្រូវបានក្រុមវិស្វាករចិនចាប់ផ្ដើមដំឡើងនៅលំហសមុទ្រខេត្ត Fujian អាចផ្គត់ផ្គង់អគ្គិសនីដល់គ្រួសារចំនួន 36,000 គ្រួ ជារៀងរាល់ឆ្នាំ។

សកម្មភាពដំឡើងទួរប៊ីនផលិតអគ្គិសនីដើរដោយកម្លាំងខ្យល់សមុទ្រ បានចាប់ផ្ដើមឡើងនៅក្នុងខេត្ត Fujian ភាគអាគ្នេយ៍ប្រទេសចិន។ នេះបើតាម CGTN ចុះផ្សាយកាលពីថ្ងៃទី 25 មិថុនា។

ទួរប៊ីនដែលមានកម្លាំង 16 ម៉េហ្គាវ៉ាត់នេះ មានកម្ពស់ 146 ម៉ែត្រ គិតពីផ្ទៃទឹកសមុទ្រដល់ចំណុចកណ្ដាលរបស់រ៉ូទ័រ (rotor)។ កម្ពស់នេះប្រហាក់ប្រហែលនឹងអគារ 50 ជាន់។ ទួរប៊ីនដែលសហការផលិតដោយក្រុមហ៊ុន CTGC និងក្រុមហ៊ុន Goldwind ក៏មានស្លាបកង្ហារដែលមានអង្កត់ផ្ចតប្រវែង 252 ម៉ែត្រ វែងជាងគេលើពិភពលោក។

នៅពេលមានខ្យល់ខ្លាំង ទួរប៊ីននេះអាចផលិតអគ្គិសនីបាន 34.2 គីឡូវ៉ាត់ម៉ោង បន្ទាប់ពីកង្ហារវិលបានមួយជុំ និងអាចផ្គត់ផ្គង់តម្រូវការរបស់គ្រួសារចំនួន 36,000 គ្រួ ហើយជួយសំចៃធ្យូងថ្មបាន 22,000 តោន ក៏ដូចជាកាត់បន្ថយការបំភាយឧស្ម័នកាបូនបាន 54,000 តោន/ឆ្នាំ៕

June 26, 2023

កម្លាំងប្រដាប់អាវុធស្និទ្ធនឹងអ៊ុយក្រែន បន្តវាយប្រហារចូលទឹកដីរុស្ស៊ី

RCV ដែលជាអង្គភាពទ័ពស្ម័គ្រចិត្តរុស្ស៊ី (Russian Volunteer Corps) បានប្រកាសចាប់ផ្ដើមដំណាក់កាលទីពីរនៃយុទ្ធនាការវាយប្រហារចូលទឹកដីរុស្ស៊ី បន្ទាប់ពីការវាយប្រហារនៅក្នុងខេត្ត Belgorod កាលពីចុងខែមុន។

«ដំណាក់កាលទីពីរដែលមេបញ្ជាការរបស់យើងធ្លាប់បាននិយាយ បានចាប់ផ្ដើមហើយ» តំណាងរបស់ អង្គភាពទ័ពស្ម័គ្រចិត្តរុស្ស៊ី (RCV) ដែលស្និទ្ធនឹងអ៊ុយក្រែន និយាយនៅក្នុងវីដេអូមួយដែលត្រូវបានបង្ហោះកាលពីថ្ងៃទី 01 មិថុនាដូច្នេះ។ ក្រុមនេះប្រកាសថា ទាហានរបស់ខ្លួនបានចាប់ផ្ដើមយុទ្ធនាការនៅក្នុងខេត្ត Belgorod របស់រុស្ស៊ី។

បណ្ដាវីដេអូដែលត្រូវបានចែករំលែកតគ្នាលើបណ្ដាញសង្គមបន្ទាប់នោះ បង្ហាញថា អគារសាលាស្រុកនៅ Shebekino ក្នុងតំបន់ភាគខាងត្បូងរបស់ខេត្ត Belgorod ដែលមានចម្ងាយពីព្រំដែនអ៊ុយក្រែនប្រហែល 6 គីឡូម៉ែត្រ ត្រូវឆេះសន្ធោសន្ធៅ។ ព័ត៌មានខ្លះឱ្យដឹងថា RCV បានកម្ទេចប្រព័ន្ធកាំភ្លើងធំចល័ត 2S4 Tyulpan មួយគ្រឿង និងរថយន្តជំនួយមួយគ្រឿងរបស់រុស្ស៊ី នៅក្បែរទីរួមស្រុក Shebekino។

កងជីវពលដែលស្និទ្ធនឹងអ៊ុយក្រែនមួយក្រុមផ្សេងទៀត គឺ អង្គភាពសេរីរុស្ស៊ី (FRL/ Liberty of Russia Legion) ក៏បានប្រកាសថា កំពុងធ្វើសកម្មភាពក្បែរព្រំដែនរុស្ស៊ី និងវាយប្រហារលើដោលដៅយោធាមួយចំនួន។

អនុរដ្ឋមន្ត្រីការបរទេសអ៊ុយក្រែន Andriy Melnyk បាននិយាយថា ក្រុមជីវពលទាំងនេះ «ធ្វើសកម្មភាពដោយចិត្តឯង» ហើយអ៊ុយក្រែនមិនទទួលខុសត្រូវចំពោះពួកគេឡើយ។ «អ៊ុយក្រែនមានសិទ្ធិស្របច្បាប់ក្នុងការវាយប្រហារចូលទឹកចិត្តរុស្ស៊ី ប៉ុន្តែនឹងធ្វើដោយការប្រុងប្រយ័ត្ន» លោក Andriy Melnyk បញ្ជាក់ដូច្នេះ។

រុស្ស៊ីបានឱ្យដឹងថា ហេដ្ឋារចនាសម្ព័ន្ធមួយចំនួននៅខេត្ត Belgorod រងការខូចខាតដោយសារកាំភ្លើងធំ ក្រោយ មកក្រុមប្រដាប់អាវុធមួយចំនួនបានព្យាយាមចូលទឹកដីរុស្ស៊ី។ រុស្ស៊ីក៏បានប្រកាសថា ខ្លួនបានវាយរុញច្រានកងកម្លាំងមកពីអ៊ុយក្រែន និងដេញដល់ក្នុងទឹកដីអ៊ុយក្រែន ហើយសម្លាប់បាន 30 នាក់៕

June 2, 2023

រដ្ឋធានីរបស់រុស្ស៊ីរងការវាយប្រហារធ្ងន់ធ្ងរលើកដំបូង ក្រោយសង្គ្រាមលោកលើកទីពីរ

យន្តហោះគ្មានមនុស្សបើកបរ (UAV) ហោះទៅបុកអគារមួយខ្នងនៅរដ្ឋធានីមូស្គូរបស់ប្រទេសរុស្ស៊ី បង្កការខូចខាតស្រាល និងធ្វើឱ្យមនុស្សពីរនាក់រងរបួស។

មន្ត្រីនៅមូស្គូ ថ្ងៃនេះបានឱ្យដឹងថា UAV មួយគ្រឿងបានវាយប្រហារជាន់លើរបស់អគារមួយនៅភាគអាគ្នេយ៍របស់រដ្ឋធានី។ UAV មួយគ្រឿងផ្សេងទៀតក៏ហោះទៅបុកអគារ 24 ជាន់មួយនៅតំបន់ដដែល។ មនុស្សនៅក្នុងអគារទាំងពីរដែលស្ថិតក្នុងក្រុង Profsoyuznaya ភាគអាគ្នេយ៍របស់មូស្គូ ត្រូវបានជម្លៀស។

អភិបាលក្រុងមូស្គូ Sergey Sobyanin ឱ្យដឹងថា អគារមួយចំនួនរងការខូចខាតស្រាល និងមនុស្សពីរនាក់រងរបួស ប៉ុន្តែមិនធ្ងន់ធ្ងរ។

ក្រសួងការពារជាតិរុស្ស៊ី ក្រោយមកបានចោទថា អ៊ុយក្រែនគឺជាអ្នកនៅពីក្រោយករណីវាយប្រហារនេះ បើទោះមិនបានបង្ហាញភស្ដុតាង។ ក្រសួងនេះបញ្ជាក់ថា UAV ចំនួន 8 គ្រឿងបានចូលរួមការវាយប្រហារ ហើយស្ទើរតែទាំងអស់ត្រូវបានរុស្ស៊ីបាញ់ទម្លាក់។

តំណាងរាស្ត្ររុស្ស៊ី Maxim Ivanov និយាយថា នេះគឺជា «ការវាយប្រហារធ្ងន់ធ្ងន់បំផុតមកលើមូស្គូ រាប់ចាប់តាំងពីការវាយប្រហាររបស់ហ្វាស៊ីសអាល្លឺម៉ង់ក្នុងសង្គ្រាមលោកលើកទីពីរ»។

មួយរយៈពេលចុងក្រោយនេះ ទឹកដីរបស់រុស្ស៊ី កើតមានការវាយប្រហារមួយចំនួន ហើយរុស្ស៊ីតែងតែទម្លាក់កំហុសលើអ៊ុយក្រែន។ ចំណែកទីក្រុងកៀវវិញ ក៏មិនទទួលស្គាល់ការវាយប្រហារណាមួយនៅខាងក្នុងទឹកដីរបស់រុស្ស៊ី៕

May 30, 2023

រូបភាពក្លែងក្លាយបង្ហាញពី «ការផ្ទុះនៅមន្ទីរបញ្ចកោណ» ធ្វើឱ្យកក្រើកទីផ្សារភាគហ៊ុន និងបណ្ដាញសង្គមនៅសហរដ្ឋអាម៉េរិក

ក្នុងអំឡុងពេលថ្មីៗនេះ រូបភាពមិនពិត ដែលត្រូវបានគេជឿថា បង្កើតឡើងដោយបច្ចេកវិទ្យា AI (បញ្ញាសិប្បនិម្មិត) បង្ហាញពីផ្សែងខ្មៅបាញ់ឡើងពីចំហៀងខាងឆ្វេងរបស់មន្ទីរបញ្ចកោណ ត្រូវបានអ្នកលេងបណ្ដាញសង្គមចែករំលែកពេញអ៊ីនធើណិត។

រូបភាពនេះបានលេចឡើងនៅលើ Facebook កាលពីថ្ងៃទី 22 ឧសភា 2023 អមនឹងការបញ្ជាក់ «ករណីផ្ទុះធំនៅក្បែរតំបន់ចម្រុះមន្ទីរបញ្ចកោណ នៅវ៉ាស៊ីងតោន DC»។ ក្រោយមក រូបភាពនេះក៏ត្រូវបានគេចែករំលែកនៅលើបណ្ដាទំព័របណ្ដាញសង្គម Twitter ដែលមានអ្នកតាមដានរាប់លាននាក់ និងត្រូវបានចែករំលែកបន្តបន្ទាប់។ នេះបើយោងតាមទីភ្នាក់ងារសារព័ត៌មាន Bloomberg។

CNN និង NBC News បានឱ្យដឹងថា ក្រោយពីរូបភាពក្លែងក្លាយបង្កឱ្យមានការមន្ទិលលើបណ្ដាញសង្គម ទីផ្សារមូលបត្រអាម៉េរិកក៏រងផលប៉ះពាល់ក្នុងរយៈពេលខ្លី។ សន្ទស្សន៍ Dow Jones ថយចុះ 80 ពិន្ទុក្នុងបួននាទី ប៉ុន្តែក្រោយមកក៏បានងើបឡើងវិញ ខណៈដែលសន្ទស្សន៍ S&P 500 ធ្លាក់ចុះ 0.3% ហើយក៏ងើបឡើងវិញដូចដើម បន្ទាប់ពីរូបភាពនេះត្រូវបានបញ្ជាក់ថា «មិនពិត»។

រូបភាពក្លែងក្លាយខាងលើក៏ធ្វើឱ្យបុគ្គលិកនៅមន្ទីរបញ្ចកោណ (អគាររបស់ក្រសួងការពារជាតិអាម៉េរិក) ត្រូវមមាញឹកនឹងការឆ្លើយតបសំណួរផងដែរ នៅពេលមានការហៅទូរស័ព្ទមកសួរនាំជាច្រើនពីប្រជាជន។

អ្នកជំនាញវាយតម្លៃថា បច្ចេកវិទ្យាបញ្ញាសិប្បនិម្មិត គឺជាឧបករណ៍ដែលជួយសម្រួលដល់ការងារជាច្រើននាបច្ចុប្បន្ន។ ក៏ប៉ុន្តែ ពួកគេយល់ថា AI ក៏ផ្ដល់ផលប្រយោជន៍ដល់ជនទុច្ចរិតផងដែរ នៅពេលមិនទាន់មានការគ្រប់គ្រងឱ្យបានសមស្រប៕

May 23, 2023

អាចម៍ផ្កាយធ្លាក់ និងផ្ទុះឆេះភ្លឺពេញផ្ទៃមេឃនៅអូស្ត្រាលី

កាលពីយប់ថ្ងៃទី 20 ឧសភា ផ្ទៃមេឃនៅពេលរាត្រីក្នុងរដ្ឋ Queensland ភាគខាងជើងប្រទេសអូស្ត្រាលី បែរជាភ្លឺចាំងភ្នែក នៅពេលអាចម៍ផ្កាយមួយដុំហោះកាត់បរិយាកាស ធ្លាក់ទៅលើផែនដី បង្កជាសំឡេងផ្ទុះដ៏ខ្លាំង។

រូបភាពដែលថតបានដោយកាមេរ៉ាតាំងពីទីក្រុង Cairns នៅតំបន់ឆ្នេរសមុទ្រភាគខាងកើត រហូតដល់ Normanton នៅឈូងសមុទ្រ Carpentaria បង្ហាញថា ដុំភ្លើងមួយដុំធំ ធ្លាក់ក្នុងល្បឿនយ៉ាងលឿនចុះមកកាន់ផែនដី ហើយមានពន្លឺមួយខ្សែពណ៌បៃតង ពណ៌ខៀវ និងលឿងលេចចេញតាមពីក្រោយ។

ហេតុការណ៍នេះកើតឡើងនៅវេលាម៉ោង 09:22 យប់ ថ្ងៃទី 20 ឧសភា ឆ្នាំ 2023 (ពេលវេលាក្នុងស្រុក)។ ប្រជាជននៅទីរួមស្រុក Croydon ដែលមានចម្ងាយពី Cairns ប្រហែល 500 គីឡូម៉ែត្រទៅទិសខាងលិច ក៏បានឮសំឡេងផ្ទុះ។

អាចម៍ផ្កាយខាងលើនេះប្រហែលជាមានទំហំពី 0.5 ដល់ 1 ម៉ែត្រ តូចជាងអាចម៍ផ្កាយទំហំមធ្យម និងផ្លាស់ទីក្នុងល្បឿន 150,000 គីឡូម៉ែត្រ/ម៉ោង។ នេះបើតាមបណ្ឌិត Brad Tucker មកពីសាកលវិទ្យាល័យជាតិអូស្ត្រាលី។

អាចម៍ផ្កាយធ្លាក់ និងផ្ទុះឆេះនៅ Queensland ប្រទេសអូស្ត្រាលី

យោងតាមបណ្ឌិត Tucker អាចម៍ផ្កាយនេះនឹងមិនបង្កឱ្យមានរណ្ដៅ ដោយសារតែវាត្រូវបែកជាបំណែកមុនពេលធ្លាក់ដល់ដី ប៉ុន្តែវាក៏អាចនៅសល់បំណែកខ្លះត្រង់កន្លែងធ្លាក់។

កាលពីឆ្នាំ 2013 អាចម៍ផ្កាយមួយដុំទំហំ 20 ម៉ែត្រ បានផ្ទុះនៅខាងលើទីក្រុង Chelyabinsk របស់រុស្ស៊ី។ ការផ្ទុះនេះមានកម្លាំងប្រហាក់ប្រហែលនឹងការផ្ទុះ 500 គីឡូតោន (100,000 តោន) របស់រំសេវ TNT។ ការផ្ទុះនេះបានធ្វើឱ្យមនុស្សជាច្រើនត្រូវប៉ើង និងបំបែកបង្អួចកញ្ចក់របស់អគាររាប់ពាន់ខ្នង ខណៈដែលរោងចក្រមួយក៏ត្រូវបាក់រលំ។ យោងតាមទំព័រ Guardian អាចម៍ផ្កាយ Chelyabinsk ភ្លឺជាងព្រះអាទិត្យ 30 ដង ធ្វើឱ្យប្រជាជននៅឆ្ងាយពីទីនោះជិត 30 គីឡូម៉ែត្រ ក៏ត្រូវរលាកស្បែក និងភ្នែក៕

May 22, 2023

គម្រោងសាងសង់កោះវេជ្ជសាស្ត្ររាងអឌ្ឍចន្ទប្រកបដោយបច្ចេកវិទ្យាខ្ពស់នៅទីក្រុងឌូបៃ

Kalbod Design ដែលជាស្ទូឌីយោមួយនៅរដ្ឋធានីតេហេរ៉ង់ (ប្រទេសអ៊ីរ៉ង់) បានបង្ហាញគម្រោងកោះវេជ្ជសាស្ត្រឌូបៃ ដែលមានអគារកប់ពពកទំហំមួយលានម៉ែត្រការ៉េ ដ៏លេចធ្លោនៅចំកណ្ដាល។

កោះថ្មីនេះមានឈ្មោះថា ទីក្រុងថែទាំសុខភាពឌូបៃ (Dubai Healthcare City) ដែលជាតំបន់ចម្រុះអណ្ដែតលើផ្ទៃទឹក ផ្ដោតសំខាន់លើការផ្ដល់សេវាថែទាំសុខភាពគុណភាពខ្ពស់ បំពាក់បច្ចេកវិទ្យាទំនើប និងប្រកបដោយស្ថិរភាព ព្រមទាំងគោរពតាមលក្ខខណ្ឌនៃភូមិសាស្ត្រ និងសង្គមដ៏ពិសេសរបស់តំបន់។ Design Boom ចុះផ្សាយព័ត៌មាននេះកាលពីថ្ងៃទី 15 ឧសភា។

ទីក្រុងថែទាំសុខភាពឌូបៃ មានរូបរាងដូចអឌ្ឍចន្ទ ឬដូចចំណិតដូង និងរួមផ្សំជាមួយនឹងកត្តារចនាបថរូបវិទ្យាក្នុងសាសនាអ៊ីស្លាម។ កោះនេះដំណើរការដូចទៅនឹងតំបន់ចម្រុះក្នុងអគារ ដោយមានប្រព័ន្ធគមនាគមន៍ក្នុងទឹកដោយឡែក តំបន់លំនៅដែលមានរុក្ខជាតិបៃតងត្រជាក់សម្រាប់អ្នកជំងឺ បណ្ដាមជ្ឈមណ្ឌលអប់រំ និងអភិវឌ្ឍ។ល។

ច្រកចូលកោះនេះត្រូវបានស្ថាបនាក្រោមទឹក ដើម្បីកាត់បន្ថយការធ្វើចរាចរណ៍របស់រថយន្តនៅលើកោះ។ ហេដ្ឋារចនាសម្ព័ន្ធក្រោមទឹករួមមាន ប្រព័ន្ធរថភ្លើងអគ្គិសនី និងរថយន្តអគ្គិសនី។ គ្រប់កន្លែងនៅលើកោះនេះសុទ្ធតែមានស្ថានីយដើម្បីសម្រួលដល់ការធ្វើដំណើរ។ ចំណែកអ្នកថ្មើរជើងវិញ គឺអាចដើរនៅលើកោះនេះដោយសេរី។

កោះនេះមានបីតំបន់សំខាន់ៗ ក្នុងនោះ តំបន់អប់រំ និងស្រាវជ្រាវស្ថិតនៅចំកណ្ដាល ខណៈតំបន់វេជ្ជសាស្ត្រ និងអគារស្នាក់នៅ ស្ថិតនៅជុំវិញ។ បណ្ដាផ្លូវស្ថិតនៅទីខ្ពស់ចន្លោះតំបន់នានានឹងនាំមកនូវខ្យល់បរិសុទ្ធ និងមានតួនាទីជាលំហបៃតង។ អ្នកថ្មើរជើងអាចផ្លាស់ទីក្នុងកម្ពស់ផ្សេងៗគ្នា អាចគយគន់ទេសភាពដ៏អស្ចារ្យរបស់ឌូបៃ និងឈូងសមុទ្រពែក្ស។

នៅកណ្ដាលកោះគឺជាអគារខ្ពស់កប់ពពកទំហំរហូតដល់មួយលានម៉ែត្រការ៉េ បែងចែកជាពីរផ្នែក រួមមាន ផ្នែក ផ្ទាល់ដី មានទំហំ 670,000 ម៉ែត្រការ៉េ សម្រាប់សកម្មភាពអប់រំ និងផ្នែកខាងលើដែលមានរាងដូចអឌ្ឍចន្ទ ទំហំ 330,000 ម៉ែត្រការ៉េ សម្រាប់ធ្វើជាសាលតាំងពិព័រណ៍ បន្ទប់ពិសោធន៍ និងអភិវឌ្ឍ សួនវិទ្យាសាស្ត្របច្ចេកវិទ្យា បណ្ណាល័យ និងពិព័រណ៍សមិទ្ធផលបច្ចេកវិទ្យាឌីជីថល។ ក្រៅពីអគារនៅចំកណ្ដាល Dubai Healthcare City នឹងមានអគារចំនួន 14 ផ្សេងទៀតដែលមានមុខងារវេជ្ជសាស្ត្រ និងសណ្ឋាគារចំនួន 24 នៅលើក្បាលទាំងពីររបស់កោះ។

គ្រប់អគារសុទ្ធតែមានសួនច្បារនៅខាងមុខ និងដាំរុក្ខជាតិច្រើនប្រភេទ ដែលនាំមកនូវម្លប់ត្រជាក់ និងខ្យល់បរិសុទ្ធបែបធម្មជាតិ រួមចំណែកលើកកម្ពស់គុណភាពបរិយាកាសរបស់ឌូបៃ៕

May 18, 2023

អគារសង់ដោយការបោះពុម្ព 3D ធំជាងគេបង្អស់នៅទ្វីបអឺរ៉ុប ប្រើពេលស្ថាបនាតែ 140 ម៉ោង

(អាល្លឺម៉ង់) – អគារដែលមានបណ្ដោយ 55 ម៉ែត្រ ទទឹង 11 ម៉ែត្រ និងកម្ពស់ 9 ម៉ែត្រ គ្រោងនឹងសាងសង់រួចរាល់ជាស្ថាពរដោយប្រើប្រាស់កម្មករពីរនាក់ និងប្រើពេលត្រឹមតែប៉ុន្មានថ្ងៃប៉ុណ្ណោះ។

គម្រោងនៅប្រទេសអាល្លឺម៉ង់នេះ ត្រូវបានបញ្ជាក់ថា ជាសំណង់បោះពុម្ព 3D ធំជាងគេបង្អស់នៅទ្វីបអឺរ៉ុប។ ជាធម្មតា ការសាងសង់អគារនីមួយៗគឺត្រូវប្រើប្រាស់កម្មករយ៉ាងហោចក៏ប្រាំ ឬដប់នាក់ ប៉ុន្តែ ការស្ថាបនាអគារបោះពុម្ព 3D នេះ មានបុគ្គលិកតែពីរនាក់ប៉ុណ្ណោះ។

កម្មករសំណង់នៅទីនេះគឺជារ៉ូបូតដែលធ្វើការទៅតាមគម្រោងដែលបានកំណត់នៅលើកុំព្យូទ័រ។ តាមផែនការ គម្រោងនេះនឹងត្រូវសាងសង់រួចរាល់ក្នុងរយៈពេល 140 ម៉ោង។ នៅពេលរួចរាល់ អគារនេះនឹងមានទំហំប្រហែល 55 ម៉ែត្រ x 11 ម៉ែត្រ x 9 ម៉ែត្រ។

លោក Hans-Joerg Kraus ដែលជានាយកប្រតិបត្តិរបស់ Kraus Gruppe ឱ្យដឹងថា «ខ្ញុំគិតថា បច្ចេកវិទ្យាបោះពុម្ព 3D មានអនាគតប្រកបដោយសក្ដានុពល។ …នៅទីនេះ យើងកំពុងប្រឹងប្រែងស្វែងយល់ឱ្យដឹងថា នេះជាផលិតផលដែលឆ្ពោះទៅកាន់អនាគត ឬអត់…។

ក្រៅពីអាល្លឺម៉ង់ ក៏មានប្រទេសជាច្រើនផ្សេងទៀតកំពុងបង្កើនការប្រើប្រាស់បច្ចេកទេសសាងសង់ដោយការបោះពុម្ព 3D។ កាលពីឆ្នាំ 2018 ក្រុមហ៊ុនមួយរបស់បារាំងបានបង្ហាញផ្ទះបោះពុម្ព 3D ជាលើកដំបូងមួយខ្នងដែលសាងសង់ក្នុងរយៈពេល 18 ថ្ងៃ។ ចំណែកប្រទេសចិនវិញ ក៏ប្រើប្រាស់បច្ចេកវិទ្យាបោះពុម្ព 3D ដើម្បីសាងសង់ទំនប់ទឹកមួយនៅតំបន់ខ្ពង់រាបទីបេ។

យោងតាម SCMP បច្ចេកវិទ្យាសាងសង់ដោយការបោះពុម្ព 3D ដំបូងឡើយត្រូវបានអភិវឌ្ឍឡើងក្នុងបំណងកាត់បន្ថយសំណល់នៅក្នុងការផលិត។ បច្ចេកវិទ្យានេះក៏មានសក្ដានុពលនៅក្នុងវិស័យជាច្រើនផ្សេងទៀត មានជាអាទិ៍ វិស័យវេជ្ជសាស្ត្រ ការពារជាតិ និងឧស្សាហកម្មផលិតអាហារ។ល។

May 10, 2023

Ford Ranger Raptor ម៉ាស៊ីនម៉ាស៊ូត 2.0L Bi-Turbo ត្រូវបានដាក់សម្ពោធជាផ្លូវការ

(ភ្នំពេញ-ថ្ងៃទី 28 ខែមេសា ឆ្នាំ 2023) – ជួបគ្នាម្ដងទៀតហើយជាមួយនឹងព្រឹត្តិការណ៍ដ៏អស្ចារ្យដែលត្រូវបានរៀបចំឡើយដោយក្រុមហ៊ុន អ អិម អេ (ខេមបូឌា) ម.ក ផ្នែករថយន្ត Ford នោះគឺពិធីសម្ពោធជាផ្លូវការរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលកម្មវិធីនេះបានប្រារព្ធឡើងនៅ ដឹ ព្រេមៀ សេនធ័រ សែនសុខ ដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។

កម្មវិធីនេះប្រារព្ធឡើងដើម្បីណែនាំនូវជម្រើសម៉ាស៊ីនថ្មីមួយទៀតដល់អតិថិជន នោះគឺម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលជាប្រភេទម៉ាស៊ីនមានកម្លាំងខ្លាំង សន្សំសំចៃខ្ពស់ និងទទួលបានការពេញនិយមយ៉ាងច្រើនកុះករពីសំណាក់អតិថិជន។ ចំណុចដែលកាន់តែពិសេសគួរឱ្យភ្ញាក់ផ្អើលនោះគឺ តម្លៃបង់ពន្ធផ្លូវសម្រាប់រថយន្តទំនើប Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតមួយនេះគឺត្រឹមតែ 20 ម៉ឺនរៀលតែប៉ុណ្ណោះ។

អតិថិជនដែលទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសរបស់ Ford ដើម្បីសាកល្បងនូវមុខងារនៃប្រព័ន្ធសុវត្ថិភាព និងបច្ចេកវិទ្យាទំនើបចុងក្រោយដែលបានបំពាក់នៅលើរថយន្តនេះ។

ជាពិសេសជាងនេះទៀតគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនម៉ាស៊ូត 2.0L Bi-Turbo (Diesel0 Inline4 ដែលអាចផលិតកម្លាំងសេះបានរហូតដល់ 210 PS និងកម្លាំងរមួលកង់រហូតដល់ 500 Nm ដែលផ្ដល់នូវសន្ទុះដ៏ខ្លាំងក្នុងការបើកបរ។

មិនតែប៉ុណ្ណោះ នៅមានមុខងារច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖

ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
បំពាក់នូវបូម Fox Racing Shocks ទំហំ 2.5 អ៊ីញ ដែលផ្ដល់នូវផាសុកភាពក្នុងពេលបើកបរ ជាពិសេសសម្រាប់ការបើកបរលើផ្លូវដែលមានឧបសគ្គ និងផ្លូវ Off-Road Performance
អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងចង្កូតពិជាធ្វើឱ្យការចុលរលូនខ្លាំង
បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពិចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Tochscreen 12 អ៊ីញបានយ៉ាងងាយស្រួល
ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ និងប្រព័ន្ធជំនួយលើចង្កូតបញ្ចៀសចេញពីគ្រោះថ្នាក់
ប្រព័ន្ធចង្កៀងឆ្លាតដែលអាចរេតាមចង្កូតដោយស្វ័យប្រវត្ត និងអាចបែងចែកពន្លឺដោយស្វ័យប្រវត្ត
ប្រព័ន្ធចាប់ហ្វ្រាំងបន្ទាន់ពេលថយក្រោយដោយស្វ័យប្រវត្ត
ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឱ្យរថយន្តនេះជម្នះបានគ្រប់ឧបសគ្គនៃការបើកបរ និងស័ក្ដិសមជាកំពូលរថយន្តភីកអាប់ Off-Road Performance ។

រថយន្ត រថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះមានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ 8 ជម្រើស រួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស ជាមួយនឹងតម្លៃពិសេសត្រឹមតែ $75,900 តែប៉ុណ្ណោះ។

សម្រាប់ព័ត៌មានបន្ថែម លោកអ្នកអាចអញ្ជើញទៅសាកសួរ និងបើកបរសាកល្បងរថយន្តFord Ranger Raptor ស៊េរីឆ្នាំ 2023 ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នៅតាមបណ្ដាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លូវព្រះមុនីវង្ស ជាប់ទូតវៀតណាម លេខទូរស័ព្ទ៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្ដោយផ្លូវទៅព្រលានយន្តហោះ លេខទូរស័ព្ទ៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 និងផ្សារសាំហាន់ លេខទូរស័ព្ទ៖ 078 959 935
អគារតាំងបង្ហាញរថយន្ត Ford Trade-In ដែលស្ថិតនៅតាមបណ្ដោយផ្លូវទៅកាន់ព្រលានយន្តហោះ លេខទូរស័ព្ទ៖ 077 722 999 ឬ 011 255 229
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្ដោយផ្លូវជាតិលេខ 6A លេខទូរស័ព្ទ៖ 077 666 357 ឬ 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្ដោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទ៖ 078 999 883 ឬ 088 3 999 883 ។

April 29, 2023

គម្រោងស្ដីពីព្រលានយន្តហោះសម្រាប់តាក់ស៊ីហោះអគ្គិសនីនៅឌូបៃ

ក្រុមហ៊ុនស្ថាបត្យកម្មល្បីឈ្មោះរបស់អង់គ្លេស Foster + Partners បានលើកឡើងគំនិតស្ដីពីរចនាសម្ព័ន្ធយន្តហោះថ្មីសម្រាប់មធ្យោបាយធ្វើដំណើរដែលហោះឡើង និងចុះចតបញ្ឈរត្រង់។

ក្រុមហ៊ុនខាងលើបានឱ្យដឹងថា ព្រលានយន្តហោះថ្មីនេះនឹងតភ្ជាប់បណ្ដាទីតាំងល្បីៗរបស់ឌូបៃ និងផ្ដល់សេវាកម្មផ្លាស់ទីក្នុងល្បឿនលឿន មិនបញ្ចេញឧស្ម័នពុល។ ស្ថាបត្យកម្មនេះត្រូវបានអភិវឌ្ឍដោយមានកិច្ចសហការរបស់ក្រុមហ៊ុន Skyports Infrastructure ហើយព្រះអង្គម្ចាស់ Sheikh Mohammed Bin Rashid AI Maktoum ដែលជាព្រះរាជារបស់រាជាណាចក្រឌូបៃ នៃប្រទេសអេមីរ៉ាតអារ៉ាប់រួម ក៏បានអនុម័តរួចរាល់។ ព្រលានយន្តហោះថ្មីនេះ តាមគម្រោងនឹងស្ថិតនៅក្បែរព្រលានយន្តហោះអន្តរជាតិឌូបៃ (DXB) ដែលតភ្ជាប់ជាមួយនឹងបណ្ដាញអាកាសយានដ្ឋានបច្ចុប្បន្ន ក៏ដូចជាមជ្ឈមណ្ឌលដឹកជញ្ជូននានា។

គំនូរប្លង់បង្ហាញថា ព្រលានយន្តហោះនេះស្ថិតលើផ្ទៃរាបនៅទីខ្ពស់ បង្កលក្ខណៈងាយស្រួលសម្រាប់ការហោះឡើង និងចុះចត។ អគារនានាស្ថិតនៅជុំវិញព្រលានយន្តហោះដែលតភ្ជាប់ជាមួយនឹងបន្ទប់រង់ចាំសម្រាប់អ្នកដំណើរ ព្រមទាំងអាចឱ្យអ្នកដំណើរមើលឃើញទិដ្ឋភាពដ៏អស្ចារ្យរបស់បណ្ដាយន្តហោះ និងទីក្រុងទាំងមូល។ Foster + Partners ក៏ជ្រើសរើសពណ៌យ៉ាងសមស្រប និងវត្ថុធាតុធម្មជាតិសម្រាប់ផ្នែកខាងក្នុងអាកាសយានដ្ឋាន បង្កើតបានជាបរិយាកាសធូរស្រាល និងបរិស្ថានស្និទ្ធស្នាលនឹងធម្មជាតិ។

កាលពីខែកុម្ភៈ ក្សត្រារបស់រាជាណាចក្រឌូបៃ បានប្រកាសថា ស្ថានីយតាក់ស៊ីហោះទាំងឡាយនឹងចាប់ផ្ដើមដំណើរការនៅឌូបៃ បន្ទាប់ពីរយៈពេលបីឆ្នាំទៀត។

ឌូបៃបានរៀបផែនការសម្រាប់សេវាកម្មតាក់ស៊ីហោះមិនបំភាយឧស្ម័នពុលតាំងពីយូរមកហើយ និងទទួលបានចំណាប់អារម្មណ៍ពីបណ្ដាក្រុមហ៊ុនក្នុងស្រុក និងក្រុមហ៊ុនអត្តរជាតិផងដែរ ពិសេសគឺក្រុមហ៊ុនមកពីប្រទេសចិន៕

April 29, 2023

អគារកាស៊ីណូណាហ្កាទី2នឹងបើកដំណើរការចុងឆ្នាំនេះ

អគារកាស៊ីណូ NAGA2 ដែលជាសណ្ឋាគារ និងកាស៊ីណូដែលតភ្ជាប់ទៅកាស៊ីណូ និងរមណីយដ្ឋាន Naga World តាមផ្លូវក្រោមដីនឹងបើកដំណើរការនៅចុងឆ្នាំនេះ ប្រសិនជាគ្មានអ្វីប្រែប្រួលទេនោះ។

យោងតាមរបាយការណ៍មួយកាលពីម្សិលមិញដែលទទួលបានពីក្រុមហ៊ុន GGR Asia បានឱ្យដឹងកាលពីដើមសប្តាហ៍នេះថា សណ្ឋាគារ និងកាស៊ីណូណាហ្កា2 ដែលមានបន្ទប់សណ្ឋាគារថ្មី 1,000បន្ទប់ តុលេងហ្គេម300 និងម៉ាស៊ីនហ្គេមអេឡិចត្រូនិក500នឹងបើកដំណើរការនៅចុងឆ្នាំនេះ។

អគារនេះនៅមានសាលដ៏ធំមួយដែលអាចដាក់មនុស្សបាន 3,000នាក់ផងដែរសម្រាប់រៀបចំកម្មវិធីផ្សេងៗ ដូចជាការប្រកួតកីឡាក្នុងសាលលំដាប់អន្តរជាតិ និងមហោស្រពផ្សេងៗទៀតផង។

ក្រុមហ៊ុនវិនិយោគគម្រោងនេះបានព្យាករពីការទទួលបានប្រាក់ចំណេញបន្ទាប់ពី113 លានដុល្លារមុនពេលបង់ការប្រាក់ បង់ពន្ធ ការបញ្ចុះតម្លៃ និងការសងបំណុល (EBITDA) នៅពេលដាក់ឲ្យដំណើរការពេញលេញនៅឆ្នាំដំបូង។

លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជាបានថ្លែងថា ការវិនិយោគលើសណ្ឋាគារ និងកាស៊ីណូរបស់ក្រុមហ៊ុន Naga Corp ជាផ្នែកមួយនៃផលិតផលទេសចរណ៍ក្នុងការទាក់ទាញភ្ញៀវមកទស្សនាកម្ពុជាព្រោះទេសចរមានប្រមាណពី៣០ទៅ៥០ប្រភេទហើយទេសចរមកលេងល្បែងជាទេសចរមួយប្រភេទដែលចំណាយប្រាក់ច្រើន។

លោកបន្តថា “យើងមិនមែនស្វាគមន៍ការលេងល្បែងនោះទេប៉ុន្តែយើងស្វាគមន៍ការវិនិយោគ និងការទាក់ទាញទេសចរបន្ថែម”។

ប្រធានសមាគមសណ្ឋាគារកម្ពុជាលោកឌិន សុមេធារិទ្ឋបានថ្លែងថា វិស័យសណ្ឋាគារកំពុងប្រឈមមុខនឹងការប្រកួតប្រជែងកាន់តែខ្លាំងដោយសារការផ្គត់ផ្គង់សណ្ឋាគារថ្មីៗកើនឡើងកាន់តែច្រើនប៉ុន្តែការមកដល់របស់ភ្ញៀវទេសចរមិនបានកើនឡើងខ្ពស់នោះទេ។ លោកបន្តថា ក្នុងពេលមានការប្រកួតប្រជែងតានតឹងបែបនេះបានធ្វើឲ្យសណ្ឋាគារតូចៗមួយចំនួនប្រឈមមុខនឹងការបិទទ្វារហើយសណ្ឋាគារធំៗនឹងលក់បញ្ចុះតម្លៃកាន់តែច្រើនដើម្បីទទួលបានភ្ញៀវស្នាក់នៅជាជាងទុកបន្ទប់ឲ្យនៅទំនេរ៕

June 17, 2017

ប្រជាជននៅលើ “អគារប៊ុលឌិងស” រើចេញជិតអស់ហើយ

បន្ទាប់ពីមានការជួបជុំហូបនំបញ្ចុករវាងអាជ្ញាធរដែលមានការចូលរួមពីសំណាក់ឯកឧត្ដមជា សុផារ៉ា ទេសរដ្ឋមន្រ្ដី និងជារដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ ជាមួយប្រជាពលរដ្ឋអតីតរស់នៅលើ ”អគារប៊ុលឌិងស” កាលពីថ្ងៃទី10 រួចមក គេសង្កេតឃើញថា ប្រជាពលរដ្ឋកាន់តែមានការញាប់ដៃញាប់ជើងក្នុងរើជញ្ជូនសម្ភាររបស់ខ្លួនចេញពីបន្ទប់ដើម្បីទទួលបានប្រាក់សំណងឆាប់ៗ។

គិតចាប់ពីម៉ោង6 និង30នាទីល្ងាច ថ្ងៃទី12 ខែមិថុនា ឆ្នាំ2017 ប្រជាពលរដ្ឋជាម្ចាស់កម្មសិទ្ធិបន្ទប់ចំនួន 343 ក្នុងចំនួនបន្ទប់សរុបទាំងអស់492 បានរើចេញដើម្បីទៅរកលំនៅដ្ឋានថ្មី និងបានទទួលប្រាក់ទូទាត់សំណងពីក្រុមហ៊ុនរួចរាល់ហើយ។

គួរបញ្ជាក់ដែរថា ដំណើរចាកចេញរបស់ប្រជាពលរដ្ឋដែលរស់នៅលើអគារប៊ុលឌិងសដើម្បីស្វែងរកលំនៅដ្ឋានថ្មី ត្រូវបានប្រព្រឹត្ដទៅដោយរលូន និងមានការសាទរពីប្រជាពលរដ្ឋជាច្រើន តែទោះជាយ៉ាងនេះក្ដី ក៏ប្រជាពលរដ្ឋទាំងនោះហាក់នៅមានអារម្មណ៍អាឡោះអាល័យដល់អគារដ៏កម្សត់មួយនេះដែលនឹងត្រូវបាត់រូបរាងចេញពីលើផែនទីទីក្រុងភ្នំពេញជារៀងរហូតនោះដែរ៕

June 13, 2017

ការចុះកិច្ចសន្យាលក់-ទិញ នៅអគារប៊ុលឌិង-ស ត្រូវបានបញ្ចប់ ១០០%

ក្រោមការសម្របសម្រួលដោយផ្ទាល់ពី ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ គិតត្រឹមល្ងាចថ្ងៃទី៣០ ខែឧសភា ឆ្នាំ២០១៧ ប្រជាពលរដ្ឋរស់នៅក្នុងអគារប៊ុលឌិង-ស បានចុះកិច្ចសន្យាលក់បន្ទប់ស្នាក់នៅបានចំនួន ៤៦៤បន្ទប់ ស្មើនឹង ៩៤,៣០% នៃចំនួន សរុប ៤៩២បន្ទប់ហើយ និងបើយោងតាមច្បាប់សហកម្មសិទ្ធិ បើសិនជាមានអ្នករស់នៅលើអគារ ៧៥% បានយល់ព្រម នោះមានន័យថា ការចុះកិច្ចសន្យាលក់-ទិញ ត្រូវអនុវត្ត ១០០%។

នៅថ្ងៃទី០៦ ខែមិថុនា ខាងមុខខាងក្រសួង និងគណៈកម្មការតំណាងឲ្យពលរដ្ឋរស់នៅលើអគារ រួមទាំងធនាគារនឹងរៀបចំផ្ដល់ប្រាក់ជូនពលរដ្ឋប៊ុលឌិងប្រមាណជា ២០០គ្រូសារ ដោយគ្រួសារនីមួយៗអាចទាក់ទងទៅកាន់ក្រសួង ដើម្បីទទួលបានព័ត៌មានលម្អិតទាក់ទងនឹងការទទួលប្រាក់ ហើយក្រោយពីទទួលបានប្រាក់ ពួកគាត់នឹងរើអីវ៉ាន់ចេញពីអគារតែម្ដង ចំណែកគ្រួសារដែលនៅសល់ នឹងរើចេញតាមក្រោយបន្តិចម្ដងៗ ទៅតាមការកំណត់របស់ក្រសួង។ ជាមួយគ្នានោះផងដែរ ឯកឧត្តម ជា សុផារ៉ា បានផ្ដល់ប្រាក់ដឹកជញ្ជូនចំនួន ១០០ដុល្លារ និងនៅថ្ងៃទី១០ ខែមិថុនា ខាងមុខនឹងមានកម្មវិធីជប់លៀងលាគ្នាផងដែរ ដែលរៀបចំដោយក្រសួងដែនដី៕

May 30, 2017

Tag: អគារ